ផ្សារអូរឬស្សីនឹងត្រូវផ្អាកដំណើរការបណ្តោះអាសន្ន១៤ថ្ងៃ ដោយសារមានការឆ្លងជំងឺកូវីដ១៩

អាន សុភាវត្តី (An Sopheavattey) — Sun, 04 Apr 2021 03:36:58 +0000

រដ្ឋបាលរាជធានីភ្នំពេញនៅថ្ងៃទី៣ ខែមេសានេះ បានជូនដំណឹងពីការផ្អាកដំណើរការ ផ្សារអូឬស្សី ជាបណ្តោះអាសន្នចំនួន១៤ថ្ងៃ ដោយសារមានករណីឆ្លងជំងឺកូវីដ១៩មួយចំនួននៅទីនោះ។

ក្នុងសេចក្តីជូនដំណឹងរបស់សាលារាជធានីបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ មានអាជីវករ ក៏ដូចជាសន្តិសុខផ្សារមួយចំនួនបានឆ្លងជំងឺកូវីដ១៩ ពីព្រឹត្តិការណ៍ ២០ កុម្ភៈ ឆ្នាំ២០២១ ដោយមានការរីករាលដាលបន្តបន្ទាប់ជាច្រើនតូប និងទីតាំងខុសៗគ្នាក្នុងបរិវេណផ្សារអូឬស្សី បានបង្កជាការព្រួយបារម្ភ ដែលតម្រូវឲ្យចាំបាច់មានវិធានការសុខាភិបាលទប់ស្កាត់ជាបន្ទាន់។

សេចក្តីជូនដំណឹងនោះបញ្ជាក់ថា៖ «រដ្ឋបាលរាជធានីភ្នំពេញ សូមផ្អាកដំណើរការបណ្តោះអាសន្នមជ្ឈមណ្ឌលពាណិជ្ជកម្មផ្សារអូឬស្សីរយៈពេល១៤ថ្ងៃ គិតចាប់ពីថ្ងៃទី៤ ខែមេសា ឆ្នាំ២០២១ ដល់ថ្ងៃទី១៧ ខែមេសា ឆ្នាំ២០២១ ដើម្បីបង្ការ និងទប់ស្កាត់ការឆ្លងរាលដាលវីរុសកូវីដ១៩ ទៅដល់បងប្អូនអាជីវករ អតិថិជន ក៏ដូចជាប្រជាពលរដ្ឋដែលចេញចូលផ្សារនេះ»។

សាលារាជធានីក៏បានបន្ថែមថា រដ្ឋបាលរាជធានីនឹងធានារ៉ាប់រងចំពោះសន្តិសុខ និងសុវត្ថិភាព ចំពោះសម្ភារៈ និងឥវ៉ាន់គ្រប់ប្រភេទរបស់បងប្អូនអាជីវករ ដែលបានរក្សាទុកក្នុងតូបនីមួយៗ មិនឲ្យបាត់បង់ និងមិនតម្រូវឲ្យមានការបង់ថ្លៃសេវាឡើយ។ ដោយឡែក បន្លែ ផ្លែឈើ ត្រី សាច់ ស៊ុត ។ល។ រដ្ឋបាលរាជធានីភ្នំពេញស្នើសុំឲ្យអាជីវករទាក់ទងជាមួយគណៈកម្មការផ្សារ យកទៅរក្សាទុកដោយខ្លួនឯង ដើម្បីជៀសវាងការខូចខាតជាយថាហេតុ។

គិតត្រឹមថ្ងៃទី៣ ខែមេសា ឆ្នាំ២០២១ មានអ្នកឆ្លងជំងឺកូវីដ១៩ សរុបចំនួន ២,៦៨៩ករណី មានអ្នកជាសះស្បើយចំនួន១,៦៥៣នាក់ អ្នកកំពុងសម្រាកព្យាបាលចំនួន១,០១២នាក់ និងមានអ្នកស្លាប់ចំនួន១៩នាក់៕

បុរសពីរនាក់ទៀតស្លាប់ ធ្វើឲ្យករណីអ្នកបាត់បង់ជីវិតដោយសារជំងឺកូវីដ១៩ឡើងដល់៧ករណី

អាន សុភាវត្តី (An Sopheavattey) — Thu, 25 Mar 2021 09:40:24 +0000

បុរសពីរនាក់បានស្លាប់ដោយសារជំងឺកូវីដ១៩ នៅថ្ងៃទី២៥ ខែមីនា ដែលរហូតមកដល់ពេលនេះមានអ្នកស្លាប់ដោយសារជំងឺកូវីដ១៩សរុបចំនួន៧នាក់។ នេះបើតាមការប្រកាសរបស់ក្រសួងសុខាភិបាល។

ក្នុងសេចក្តីប្រកាសព័ត៌មានរបស់ក្រសួងសុខាភិបាល ចេញនៅថ្ងៃទី២៥ ខែមីនា ឆ្នាំ២០២១នេះបញ្ជាក់ថា នៅថ្ងៃពុធនេះមានបុរសពីរនាក់បានស្លាប់ដោយសារជំងឺកូវីដ១៩ ដោយម្នាក់ជាជនជាតិខ្មែរ មានអាយុ៣៨ឆ្នាំ និងម្នាក់ទៀតជាជនជាតិចិន មានអាយុ៤៣ឆ្នាំ។

សេចក្តីប្រកាសព័ត៌មានដដែលបន្តថា បុរសជាជនជាតិខ្មែរមានទីលំនៅភូមិសាមគ្គី សង្កាត់ត្រពាំងក្រសាំង ខណ្ឌពោធិសែនជ័យ ដែលលោកត្រូវបានគេតេស្តឃើញវិជ្ជមានវ៉ីរុសកូវីដ១៩ នៅថ្ងៃទី១៦ ខែមីនា ឆ្នាំ២០២១ ហើយលោកត្រូវបានបញ្ជូនទៅសម្រាកព្យាបាលនៅសណ្ឋាគារ Great duke។ រហូតដល់ថ្ងៃទី២០ ខែមីនា ឆ្នាំ២០២១ អាការៈរបស់គាត់មានសភាពធ្ងន់ធ្ងរ ក៏ត្រូវបានបញ្ជូនទៅមន្ទីរពេទ្យមិត្តភាពខ្មែរ-សូវៀត។ លោកបានបាត់បង់ជីវិតនៅថ្ងៃ២៥ ខែកុម្ភៈ ឆ្នាំ២០២១ នៅម៉ោង៧:៣៥នាទីនាពេលព្រឹកថ្ងៃពុធនេះ។

ចំណែកបុរសជាជនជាតិចិន មានអាស័យដ្ឋាននៅសណ្ឋាគារយ៉ុងយ័ន ឃុំសំពៅពួន ស្រុកកោះធំ ខេត្តកណ្តាល បានតេស្តឃើញវិជ្ជមានវ៉ីរុសកូវីដ១៩ នៅថ្ងៃទី១១ ខែមីនា ឆ្នាំ២០២១ ហើយលោកត្រូវបានបញ្ជូនទៅសម្រាកព្យាបាលនៅមន្ទីពេទ្យជ័យជំនះ។ រហូតដល់ថ្ងៃទី១៨ ខែមីនា ឆ្នាំ២០២១ អាការៈរបស់គាត់មានសភាពធ្ងន់ធ្ងរក៏ត្រូវបានបញ្ជូនទៅមន្ទីពេទ្យមិត្តភាពខ្មែរ-សូវៀត ហើយលោកបានបាត់បង់ជីវិតនៅថ្ងៃ២៥ ខែកុម្ភៈ ឆ្នាំ២០២១ នៅម៉ោង៧:៤៥នាទីព្រឹកថ្ងៃពុធនេះ។

ក្នុងសេចក្តីប្រកាសព័ត៌មានដដែលបញ្ជាក់ថា តាមរយៈការពិនិត្យសុខភាព និងថតសួត បុរសទាំងពីរនេះមានការរលាកសួតទាំងសងខាងធ្ងន់ធ្ងរ ហើយក្រុមគ្រូពេទ្យបានព្យាយាមសង្គ្រោះពួកគាត់ដោយម៉ាស៊ីនជំនួយដង្ហើម តាំងពីថ្ងៃដែលពូកគាត់បានបញ្ជូនមកមន្ទីពេទ្យមិត្តភាពខ្មែរ-សូវៀតមក។

ជាការសន្និដ្ឋានរបស់ក្រុមគ្រូពេទ្យនៅក្នុងសេចក្តីប្រកាសព័ត៌មាននោះបញ្ជាក់ថា៖ «បុរសទាំង២ខាងលើ គឺបានស្លាប់បាត់បង់ជីវិតដោយជំងឺកូវីដ១៩ វ៉ៃលុកលឿន ធ្វើឲ្យរលាកសួតទាំងសងខាងធ្ងន់ធ្ងរ និងខ្សោយសួតខ្លាំងពេក»។

គួរបញ្ជាក់ផងដែរថា មរណភាពបុរសទាំងពីរនាក់នេះ ជាករណីទី៧ហើយ ក្នុងករណីដែលមានអ្នកស្លាប់បាត់បង់ជីវិតដោយសារកូវីដ១៩ នៅកម្ពុជា៕

អាន សុភាវត្តី (An Sopheavattey) – Newsroom Cambodia

ផ្សារអូរឬស្សីនឹងត្រូវផ្អាកដំណើរការបណ្តោះអាសន្ន​១៤​ថ្ងៃ ដោយសារមានការឆ្លងជំងឺកូវីដ១៩

បុរស​ពីរនាក់​ទៀត​ស្លាប់ ធ្វើ​ឲ្យ​ករណី​អ្នក​បាត់បង់ជីវិត​ដោយសារ​ជំងឺ​កូវីដ​១៩​ឡើង​ដល់​៧​ករណី

ផ្សារអូរឬស្សីនឹងត្រូវផ្អាកដំណើរការបណ្តោះអាសន្ន១៤ថ្ងៃ ដោយសារមានការឆ្លងជំងឺកូវីដ១៩

បុរសពីរនាក់ទៀតស្លាប់ ធ្វើឲ្យករណីអ្នកបាត់បង់ជីវិតដោយសារជំងឺកូវីដ១៩ឡើងដល់៧ករណី