ឱ ម៉េងហៀង(Ao Mengheang) – Newsroom Cambodia

រយៈពេលបួនខែ ពលករកម្ពុជាជាង១០ម៉ឺននាក់បានត្រឡប់មកកម្ពុជាវិញក្នុងអំឡុងកើតមានជំងឺកូវីដ

ឱ ម៉េងហៀង(Ao Mengheang) — Fri, 31 Jul 2020 11:16:42 +0000

(ភ្នំពេញ)៖ ពលករកម្ពុជាជាង១០ម៉ឺននាក់ ដែលចំណាកស្រុកទៅធ្វើការនៅក្រៅប្រទេស បានវិលត្រឡប់មកកម្ពុជាវិញ ក្រោយប្រទេសទាំងនោះកំពុងរិតបន្តឹង ឬបិទប្រទេស ដើម្បីកាត់បន្ថយការឆ្លងជំងឺកូវីដ១៩។ នេះបើតាមការបញ្ជាក់របស់លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស។

លោក ស ខេង ថ្លែងបែបនេះក្នុងសិក្ខាសាលាពិគ្រោះយោបល់ថ្នាក់ជាតិលើកទី២ ស្តីពីកតិកាសញ្ញាពិភពលោកសម្រាប់ទេសន្តរប្រវេសន៍ដោយសុវត្ថិភាព រៀបរយ និងស្របច្បាប់ កាលពីថ្ងៃទី៣០ ខែកក្កដា។

លោកលើកឡើងថា ចាប់ពីថ្ងៃទី២១ ខែមីនា រហូតដល់ថ្ងៃទី២៣ ខែកក្កដា ឆ្នាំ២០២០ មានពលករកម្ពុជាដែលវិលត្រឡប់ពីការធ្វើទេសន្តរប្រវេសន៍ ក្នុងអំឡុងរាតត្បាតជំងឺកូវីដ១៩ មានប្រមាណ ១០,៣០០០នាក់។ លោកថា អាជ្ញាធរក៏បានជួយសង្គ្រោះពលករដែលវិលត្រឡប់មកវិញ ដោយព្យាយាមឆ្លងដែនខុសច្បាប់ និងតាមច្រកមិនផ្លូវការ ទៅកាន់ប្រទេសទាំងនោះវិញផងដែរ។

លោក ស ខេង បន្ថែមថា ក្នុងអំឡុងស្ថានភាពជំងឺកូវីដ១៩បែបនេះ នឹងមិនអាចបញ្ចប់ដោយឆាប់នោះទេ ហើយថា ករណីនេះក៏អាចអូសបន្លាយបន្តទៀតក្នុងរយៈពេលវែង ដែលចាំបាច់ត្រូវមានកិច្ចការពារពលករ និងទេសន្តរប្រវេសន៍ គឺជាកិច្ចការដ៏ចាំបាច់ដែលត្រូវយកចិត្តទុកដាក់ឱ្យបានខ្លាំងក្លាពីប្រទេសដើម និងប្រទេសគោលដៅ។

«នៅក្នុងដំណាក់កាលបច្ចុប្បន្ន ការធ្វើទេសន្តរប្រវេសន៍ រឹតតែត្រូវប្រឈមយ៉ាងខ្លាំង ដោយហេតុថា ការរាតត្បាតនៃជំងឺកូវីដ១៩ នៅមិនទាន់ស្ងប់ស្ងាត់នៅឡើយ ព្រមជាមួយគ្នានេះ ប្រទេសមួយចំនួនបាននិងកំពុងតែកើនឡើងនូវចំនួនអ្នកឆ្លងថ្មី យ៉ាងច្រើនលើសលប់ជារៀងរាល់ថ្ងៃ ស្ថានភាពនេះ»។

លោក ឌី ថេហូយ៉ាង មន្ត្រីកម្មវិធីនៃអង្គការសង់ត្រាល់លើកឡើងថា ប្រជាពលរដ្ឋកម្ពុជា ដែលធ្វើទេសន្តរប្រវេសន៍ភាគច្រើនខ្វះការងារធ្វើនៅស្រុកខ្មែរ ជាហេតុត្រូវមានការពិចារណាទៅលើឱកាសការងារនៅក្នុងស្រុក កុំផ្តល់ឱកាសឱ្យជនបរទេស ខណៈពេលដែលប្រជាពលរដ្ឋខែ្មរ ទៅចំណាកស្រុកទៅរកការងារនៅស្រុកគេ។

លោកបញ្ជាក់ថា៖ «រដ្ឋត្រូវតែអនុវត្តយន្តការគាំពារសង្គមនៅពេលដែលគាត់ត្រឡប់មកវិញ នៅពេលដែលគាត់ធ្វើការងាររបស់គេ ហើយយកអាជំនាញរបស់គាត់បម្រើការនៅស្រុក ដើម្បីចូលរួមអភិវឌ្ឍន៍ប្រទេស ក៏ដូចជាប្រាក់ចំណូលសម្រាប់មកពីស្រុកគេមកខ្មែរវិញ»។

បើតាមរបាយការណ៍លទ្ធផលនៃសន្និបាតបូកសរុបការងាររបស់ក្រសួងការងារ និងបណ្តុះបណ្តាលវិជ្ជាជីវៈ ចេញកាលពីថ្ងៃទី១៣ ខែមីនាឆ្នាំ២០១៨ បង្ហាញថា រដ្ឋាភិបាលកម្ពុបានផ្តល់សេវាស្វែងរកការងារធ្វើនៅក្រៅប្រទេសដល់ពលរដ្ឋចំនួនជាង១,២លាននាក់។ ក្នុងចំណោមពលករទាំង១,២លាននាក់នោះ កម្ពុជាបានបញ្ជូនពលករទៅប្រទេសថៃចំនួនជាង១លាននាក់ កូរ៉េខាងត្បូងចំនួន៤ម៉ឺននាក់ ជប៉ុនចំនួន៦ពាន់នាក់ ម៉ាឡេស៊ីចំនួន៣ម៉ឺននាក់ សិង្ហបុរីជិត៥០០នាក់ និងតំបន់រដ្ឋបាលពិសេសហុងកុងចាប់ផ្ដើមទទួលពលការិនីចំនួន១៥នាក់៕

ទាហានមួកខៀវ អ.ស.ប. ៤នាក់ ក្នុងចំណោម៨០នាក់ ដែលត្រឡប់ពីប្រទេសម៉ាលី រកឃើញមានជំងឺកូវីដ១៩

ឱ ម៉េងហៀង(Ao Mengheang) — Wed, 29 Jul 2020 10:28:14 +0000

(ភ្នំពេញ)៖ ក្រុមទាហានមួកខៀវអង្គការសហប្រជាជាតិចំនួនបួននាក់ ក្នុងចំណោម៨០នាក់ ដែលត្រឡប់មកពីប្រទេសម៉ាលី រកឃើញមានផ្ទុកវិជ្ជមានជំងឺកូវីដ១៩ បន្ទាប់ពីពួកគេមកដល់កម្ពុជាកាលពីថ្ងៃ១០ ខែកក្កដា និងកំពុងត្រូវបានដាក់ឲ្យនៅដាច់ដោយឡែក។ នេះបើតាមសេចក្តីជូនដំណឹងរបស់ក្រសួងសុខាភិបាលកម្ពុជា។

សេចក្តីជូនដំណឹងរបស់ក្រសួងសុខាភិបាលកម្ពុជាចេញនៅថ្ងៃទី២៩ ខែកក្កដា នេះបញ្ជាក់ថា នៅថ្ងៃទី២៨ ខែកក្កដា ក្រសួងសុខាភិបាលបានរកឃើញអ្នកឆ្លងជំងឺកូវីដ១៩ចំនួន៧នាក់ ក្នុងនោះ៤នាក់ មកពីប្រទេសម៉ាលី និង៣នាក់ទៀតមកពីប្រទេសឥណ្ឌូនេស៊ី។ ក្រសួងបន្ថែមថា បុរស៤នាក់ដែលមកពីប្រទេសម៉ាលី គឺជាក្រុមទាហានមួកខៀវអង្គការសហប្រជាជាតិ ដែលទើបត្រឡប់មកដល់កម្ពុជាវិញកាលពីថ្ងៃទី១០ ខែកក្កដា ជាមួយទាហានមួកខៀវចំនួន៧៦នាក់ទៀត។

ក្រសួងបញ្ជាក់ថា៖ «ពួកគាត់ជាក្រុមមួកខៀវអង្គការសហប្រជាជាតិ ដែលសរុបមាន៨០នាក់ បានវិលត្រឡប់មកពីប្រទេសម៉ាលី កាលពីថ្ងៃទី១០ ខែកក្កដា ឆ្នាំ២០២០។ ក្រៅពីអ្នកជំងឺ ក្រុមនេះត្រូវបានបន្តដាក់ឲ្យធ្វើចត្តាឡីស័ក [នៅដាច់ដោយឡែក] នៅមណ្ឌលកងទ័ពអង្គការសហប្រជាជាតិនៅខេត្តកំពង់ស្ពឺ»។

ក្នុងសេចក្តីជូនដំណឹងរបស់ក្រសួងសុខាភិបាលដដែលបញ្ជាក់ថា ក្រៅពីទាហានមួកខៀវអង្គការសហប្រជាជាតិទាំង៤នាក់ នៅថ្ងៃទី២៨ ខែកក្កដា នេះ កម្ពុជាក៏បានរកឃើញមានអ្នកឆ្លងជំងឺនេះចំនួន៣នាក់ផ្សេងទៀត ដែលជាបុរសខ្មែរធ្វើដំណើរមកពីប្រទេសឥណ្ឌូនេស៊ី ជាមួយអ្នកដំណើរចំនួន៥៦នាក់ផ្សេងទៀត កាលពីថ្ងៃទី២៣ ខែកក្កដា។ អ្នកដំណើរដែលមានលទ្ធផលតេស្តអវិជ្ជមានវីរុសកូវីដ១៩ ត្រូវបានបន្តដាក់ឲ្យធ្វើចត្តាឡីស័កនៅមណ្ឌលកងទ័ពអាកាស រាជធានីភ្នំពេញ។

គិតត្រឹមនៅថ្ងៃទី២៩ ខែកក្កដា នេះ កម្ពុជាមានអ្នកឆ្លងជំងឺកូវីដ១៩សរុប ចំនួន២២៣នាក់ ក្នុងនោះ អ្នកព្យាបាលបានជាសះស្បើយចំនួន១៥៤នាក់ និងអ្នកដែលកំពុងសម្រាកព្យាបាលមានចំនួន៧៧នាក់។

រដ្ឋាភិបាលកម្ពុជានៅសប្តាហ៍នេះ បានសម្រេចផ្អាកជើងហោះហើរពីប្រទេសម៉ាឡេស៊ី និងឥណ្ឌូនេស៊ីជាបណ្តោះអាសន្ន ចាប់ពីថ្ងៃទី០១ ខែសីហា ឆ្នាំ២០២០ បន្ទាប់ពីរកឃើញអ្នកមានផ្ទុកជំងឺកូវីដ១៩ ធ្វើដំណើរមកពីប្រទេសទាំងពីរនេះជាបន្តបន្ទាប់៕

ក្រសួងសុខាភិបាល៖ ការមើលរំលងការចម្លងវីរុសកូរ៉ូណា គឺជាគ្រោះថ្នាក់បំផុតសម្រាប់ថ្ងៃឈប់សម្រាកខាងមុខ

ឱ ម៉េងហៀង(Ao Mengheang) — Tue, 28 Jul 2020 14:54:55 +0000

(ភ្នំពេញ)៖ ក្រសួងសុខាភិបាល បន្តអំពាវនាវឱ្យប្រជាពលរដ្ឋទាំងអស់ អនុវត្តការការពារជំងឺកូវីដ១៩ឱ្យបានខ្ជាប់ខ្ជួន ជាពិសេសនៅថ្ងៃឈប់សម្រាកចំនួន០៥ថ្ងៃខាងមុខ បើទោះបីកម្ពុជាមិនទាន់មានករណីឆ្លងក្នុងសហគមន៍។

កាលពីថ្ងៃទី១៧ ខែកក្កដា កន្លងទៅនេះ ក្រសួងសុខាភិបាល ជូនដំណឹងដល់សាធារណៈជន សម្រាប់ថ្ងៃឈប់សម្រាកចំនួន០៥ថ្ងៃ គឺនៅថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ដែលជាការឈប់សម្រាក ដើម្បីសងថ្ងៃឈប់សម្រាកការងាររបស់មន្ត្រីរាជការ និយោជិត កម្មករ ក្នុងពិធីបុណ្យចូលឆ្នាំថ្មីប្រពៃណីជាតិ បន្ទាប់ពីរដ្ឋាភិបាលបានលើកការឈប់សម្រាក កាលពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២០ កន្លងទៅដោយសារបញ្ហាកូវីដ១៩។

ក្នុងសេចក្តីជូនដំណឹងរបស់ក្រសួងសុខាភិបាលចេញនៅថ្ងៃ២៧ ខែកក្កដា ឆ្នាំ២០២០ ឲ្យដឹងថា ការអនុញ្ញាតឱ្យឈប់សម្រាកក្នុងរយៈពេលយូរ ប្រជាពលរដ្ឋ នឹងអាចធ្វើដំណើរទៅជួបជុំក្រុមគ្រួសារនៅស្រុកកំណើត ឬក៏អាចដើរលេងកំសាន្តផងដែរ ដូច្នេះក្រសួងណែនាំដល់ប្រជាពលរដ្ឋទាំងអស់ បន្តអនុវត្តការការពារការចម្លងជំងឺកូវីដ១៩ឱ្យបានខ្ជាប់ខ្ជួន ទៅតាមការណែនាំរបស់ក្រសួង។

ក្រសួងបញ្ជាក់ថា៖ «យើងមិនត្រូវមានការធ្វេសប្រហែស ដោយត្រូវការពារខ្លួន តាមការណែនាំឱ្យបានត្រឹមត្រូវ ហើយមិនត្រូវមើលរំលងនូវលទ្ធភាពនៃការចម្លងរហ័សនៃវីរុសដ៏កាចសាហាវនេះ ដែលនឹងអាចកើតមានគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់»។

នាយិការប្រតិបត្តិអង្គការឆេក (CHEC) លោកស្រី កាសែម កុលណារី លើកឡើងថា ប្រជាពលរដ្ឋត្រូវយកចិត្តទុកដាក់ថែរទាំសុខភាពដើម្បីឱ្យផុតពីការឆ្លងជំងឺកូវីដ១៩ មិនត្រូវមានការធ្វេសប្រហែស និងត្រូវធ្វើតាមការណែនាំរបស់ក្រសួងសុខាភិបាល។ លោកស្រីបន្ថែមថា ក្នុងពេលមានការឈប់សម្រាកជំនួសថ្ងៃបុណ្យចូលឆ្នាំ ក្រសួងបានផ្សព្វផ្សាយឱ្យពលរដ្ឋបានច្រើន នូវវិធីបង្ការជំងឺកូវីដ១៩ តាមរយៈទូរទស្សន៍ និងវិទ្យុ កុំឱ្យមានការឆ្លងទៅដល់សហគមន៍។

លោកស្រីបញ្ជាក់ថា៖ «ប្រជាពលរដ្ឋត្រូវចូលរួមក្នុងការទប់ស្កាត់នៃការចម្លងជំងឺកូវីដ១៩ហ្នឹង យើងត្រូវចូលរួមអនាម័យ មានការពាក់ម៉ាសឱ្យបានខ្ជាប់ខ្ជួន កុំធ្វេសប្រហែស យើងត្រូវអនុវត្តជាប្រចាំ ត្រូវរក្សាគម្លាត»។

បើតាមសេចក្តីប្រកាសព័ត៌មានរបស់ក្រសួងសុខាភិបាល គិតត្រឹមថ្ងៃទី២៨ ខែកក្កដា ឆ្នាំ២០២០ ចំនួនអ្នកឆ្លងជំងឺកូវីដ១៩សរុប មាន២២៦នាក់ ក្នុងនោះព្យាបាលជាសះស្បើយចំនួន១៤៧នាក់ និងកំពុងសម្រាកព្យាបាលនៅមន្ទីរពេទ្យរដ្ឋមានចំនួន៧៧នាក់៕

កម្មកររោងចក្រវ៉ាយអូលែតជាង៣០០នាក់ ស្នើក្រសួងការងារអន្តរាគមន៍ឲ្យក្រុមហ៊ុនផ្តល់សំណង

ឱ ម៉េងហៀង(Ao Mengheang) — Fri, 24 Jul 2020 11:29:51 +0000

កម្មករ-កម្មការិនីរោងចក្រវ៉ាយអូលែត អឹភែរឹល ខេមបូឌា ខូអិលធីឌី ជាង៣០០នាក់ នៅថ្ងៃព្រហស្បតិ៍នេះ ប្រមូលផ្តុំគ្នាតវ៉ានៅមុខក្រសួងការងារ ស្នើឱ្យមានការអន្តរាគមន៍ជំរុញក្រុមហ៊ុនឲ្យផ្តល់សំណង ដោយសារ ព្យួរការងារមិនមានការជូនដំណឹង និងការមិនផ្តល់ប្រាក់ឈ្នួលដល់កម្មករ។

អ្នកស្រី អ៊ុង ចាន់ធឿន ជាតំណាងកម្មករ និងជាសហជីពក្នុងរោងចក្រលើកឡើងថា ក្រុមកម្មករទាមទារឱ្យក្រសួងអន្តរាគមន៍លុបលិខិតដែលរោងចក្រព្យួរការងាររយៈពេល២ខែ ដោយមិនមានការជូនដំណឹង និងទាមទារសំណង៥ចំណុចបន្ថែមទៀត ដូចជាលុយបំណាច់ឆ្នាំ ប្រាក់ខែចុងក្រោយ ប្រាក់អតីតភាពការងារ លុយជំងឺចិត្តដែលរោងចក្របិទអត់មានការជូនដំណឹងត្រឹមត្រូវ និងលុយដែលធ្វើការថ្ងៃចូលឆ្នាំ។

អ្នកស្រីបញ្ជាក់ថា៖ «ការស្រាយបំភ្លឺទៅ GMAC ដែលជាសមាគមគ្របដណ្តប់វិស័យកាត់ដេរ ផ្នែកវាយនភណ្ឌ និងស្បែកជើង ហើយស្រាយបំភ្លឺថា ចំពោះរោងចក្រណាដែលព្យួរការងាររយៈពេល២ខែ ហើយអត់មានអ្នកបញ្ជាទិញ អីចឹងមិនចាំបាច់ជូនដំណឹង និងសងជំងឺចិត្ត»។

តំណាងកម្មកររូបនេះបន្ថែមថា រោងចក្របានផ្តល់ប្រាក់សំណងមួយចំនួន ដូចជា លុយបំណាច់ឆ្នាំ ប្រាក់ខែចុងក្រោយ និងប្រាក់អតីតភាពការងារ ប៉ុន្តែមិនពេញលេញ។ អ្នកស្រីថា សម្រាប់លុយជំងឺចិត្តដែលរោងចក្របិទអត់មានការជូនដំណឹងត្រឹមត្រូវ និងលុយដែលធ្វើការថ្ងៃចូលឆ្នាំ គឺកម្មករមិនបានទទួលនោះទេ។

អ្នកស្រីថា៖ «នៅពេលរោងចក្របិទ បើមិនមានការជូនដំណឹង ត្រូវគិតគូរទៅតាមផ្លូវច្បាប់»។

នៅថ្ងៃសុក្រនេះ ក្រុមកម្មកររោងចក្រវ៉ាយអូលែត បានតវ៉ាម្តងទៀតនៅខាងមុខរោងចក្ររបស់ពួកគេ ស្ថិតនៅសង្កាត់អូរបែកក្អម ខណ្ឌសែនសុខ រាជធានីភ្នំពេញ។

លោក រ៉ុង ឈុន ប្រធានសហភាពសហជីពកម្ពុជា លើកឡើងថា កម្មករ-កម្មការិនី ចង់ទាមទារសំណងពីរោងចក្រ ដោយសាររោងចក្រត្រូវទទួលខុសត្រូវជូនដល់ពួកគេ។ លោកបន្ថែមថា ក្រសួងការងារបានដោះស្រាយបញ្ហាមួយចំនួនចាប់ពីការតវ៉ារបស់កម្មករនៅថ្ងៃព្រហស្បតិ៍ រហូតមកដល់ថ្ងៃសុក្រនេះ ដូចជាសំណងចំពោះស្ត្រីមានផ្ទៃពោះ ដោះស្រាយបាន ៥០ភាគរយ ប៉ុន្តែចំណុចមួយចំនួនទៀត ក្រសួងមិនទាន់បានដោះស្រាយនៅឡើយ។

លោកបន្តថា៖ «ចង់ឲ្យក្រសួងការងារប៉ះប៉ូវចំពោះគាត់ទៅតាមផ្លូវច្បាប់ គាត់ចង់បានអ្វីដែលកំណត់ដោយច្បាប់»។

Newsroom Cambodia មិនអាចទាក់ទងសុំការអត្ថាធិប្បាយពីលោក ហេង សួរ អ្នកនាំពាក្យក្រសួងការងារ បាននៅឡើយ ដោយទូរស័ព្ទចូល តែលោកចុចបិទ។

យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី២៦ ខែឧសភា ឆ្នាំ២០២០ ស្តីពីការបើកផ្តល់ប្រាក់ឧបត្ថម្ភជូនបងប្អូនកម្មករនិយោជិត ក្នុងវិស័យកាត់ដេរ និងវិស័យទេសចរណ៍ ដែលត្រូវបានព្យួរកិច្ចសន្យាការងារ បញ្ជាក់ថា ក្រសួងការងារបានផ្តល់ប្រាក់ឧបត្ថម្ភដល់កម្មករនិយោជិតចំនួន៣៣,២៣១នាក់ នៃរោងចក្រសហគ្រាសទាំង១១១ ក្នុងវិស័យកាត់ដេរ និងវិស័យទេសចរណ៍ដែលរងផលប៉ះពាល់ជំងឺកូវីដ១៩៕

ក្រសួងការងារចាប់ផ្តើមសិក្សាពីស្ថានភាពកម្មករដែលប៉ះពាល់ដោយជំងឺកូវីដ១៩ ខណៈសហជីពថាជីវភាពកម្មករកំពុងជួបបញ្ហាខ្លាំង

ឱ ម៉េងហៀង(Ao Mengheang) — Thu, 23 Jul 2020 02:49:39 +0000

ក្រសួងការងារ និងបណ្តុះបណ្តាលវិជ្ជាជីវៈ នៅសប្តាហ៍នេះប្រកាសថា ខ្លួនកំពុងសិក្សាស្រាវជ្រាវអំពីស្ថានភាពជីវភាពរស់នៅ និងផលប៉ះពាល់ដោយសារជំងឺកូវីដ១៩របស់កម្មករ។

ក្នុងសេចក្តីជូនដំណឹងមួយរបស់ក្រសួងការងារ ចេញកាលពីថ្ងៃទី១៧ ខែកក្កដា និងត្រូវបានបង្ហោះលើទំព័រហ្វេសប៊ុករបស់ក្រសួងនៅថ្ងៃទី១៩ ខែកក្កដា បញ្ជាក់ថា ក្រសួងការងារនឹងចាប់ផ្តើមធ្វើការស្រាវជ្រាវនេះពីថ្ងៃទី១៧ ដល់ថ្ងៃទី៣១ ខែកក្កដា។ ក្រសួងថា លិខិតនេះក៏ជាការជូនដំណឹងដល់នាយកសហគ្រាសគ្រឹះស្ថាន និងកម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើង និងអាជ្ញាធរមានសមត្ថកិច្ចពាក់ព័ន្ធទាំងអស់។

ក្រសួងបញ្ជាក់ថា៖ «អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមានៃក្រសួងការងារ និងបណ្តុះបណ្តាលវិជ្ជាជីវៈ ការអង្កេតនេះ នឹងចាប់អនុវត្តពីថ្ងៃ១៧ ដល់៣១ ខែកក្កដា ឆ្នាំ២០២០ ទៅលើគំរូសំណាកកម្មករនិយោជិត ដែលជ្រើសរើសដោយចៃដន្យនៅតាមបណ្តារាជធានី-ខេត្ត»។

លោក ហេង សួរ អ្នកនាំពាក្យក្រសួងការងារ មិនឆ្លើយពាក់ព័ន្ធនឹងការសិក្សាស្រាវជ្រាវនេះ ដោយគ្រាន់តែបញ្ជាក់ថា៖ «វាជាការងាររដ្ឋបាលផ្ទៃក្នុង ដែលយើងបានធ្វើជារៀងរាល់ឆ្នាំសម្រាប់ចែកជូនសមាជិកក្រុមប្រឹក្សាជាតិប្រាក់ឈ្នួលតែប៉ុណ្ណោះ»។

លោក អាត់ ធន់ ប្រធានសហភាពការងារកម្ពុជា លើកឡើងថា ស្ថានភាពជីវភាពរបស់កម្មករប្រឈមនឹងភាពអត់ការងារធ្វើ និងការធ្វើទុក្ខបុកម្នេញពីនិយោជក ដូច្នេះលោកថា ការស្រាវជ្រាវនេះគឺជារឿងល្អ ប៉ុន្តែលោកថា លោកចង់ឱ្យការសិក្សានោះមានការចូលរួមពីស្ថាប័នឯករាជ្យ។

លោកបញ្ជាក់ថា៖ «យើងចង់បានឱ្យមានស្ថាប័នសិក្សាឯករាជ្យទៅ នៅពេលចូលតុចរចារប្រជុំទៅ គឺនឹងបានផលប្រយោជន៍ច្បាស់ទាំងអស់គ្នា»។

ចំណែកលោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាលើកឡើងថា កម្មករនៅតែជួបបញ្ហាជីវភាព ទោះបីមានប្រាក់ឧបត្ថម្ភពីនិយោជក និងរដ្ឋាភិបាលក៏ដោយ។

លោកបន្តថា៖ «កម្មករកំពុងជួបប្រទះបញ្ហាប្រឈមធ្ងន់ធ្ងរបំផុត និងអ្នកដែលព្យួរការងារគឺជួបបញ្ហាខ្វះខាតជីវភាពដោយសារប្រាក់ចំណូលគាត់បានតិច ដែលទទួលបានឧបត្ថម្ភពីនិយោជក និងរដ្ឋាភិបាល គឺគាត់មិនអាចដោះស្រាយជីវភាពបានទេ»។

ចាប់តាំងពីរោងចក្រព្យួរការងារកម្មករ ដោយសាររោងចក្របិទទ្វារមិនមានអ្នកបញ្ជាទិញ ដោយសារវិបត្តិជំងឺកូវីដ១៩ លោកនាយករដ្ឋមន្រ្តី ហ៊ុន សែន បានបញ្ជាក់ថា រោងចក្រផ្តល់ប្រាក់៣០ដុល្លារក្នុងមួយខែឲ្យកម្មករ ចំណែករដ្ឋាភិបាលផ្តល់ឲ្យ៤០ដុល្លារ។

លោក ខេន លូ អគ្គលេខាធិការសមាគមរោងចក្រកាត់ដេរកម្ពុជា GMAC មានប្រសាសន៍ថា ដោយសារជំងឺកូវីដ១៩ ទំនិញដែលផលិតនៅកម្ពុជាមិនមានការបញ្ជាទិញ បណ្តាលឲ្យមានការបិទទីផ្សារ ។

លោកបញ្ជាក់ថា៖ «បើរោងចក្រអត់មានអីវ៉ាន់អីចឹង អត់ត្រូវការបុគ្គលិកច្រើននោះទេ។ អាហ្នឹងទី១ ទី២បើអត់មានអីវ៉ាន់ធ្វើ មានលុយឯណាបើកប្រាក់ខែ»។

បើតាមអ្នកនាំពាក្យក្រសួងការងារ ក្នុងអំឡុងការកើតមានជំងឺកូវីដ១៩ យ៉ាងហោចណាស់រោងចក្រជាង១០០បានព្យួរការផលិត និងធ្វើឱ្យកម្មករនិយោជិតខ្មែរប្រមាណ១០ម៉ឺននាក់ បាត់បង់ការងារ៕

ក្រសួងអប់រំអនុញ្ញាតឲ្យគ្រឹះស្ថានសិក្សាឯកជនប្រឡងបាក់ឌុបមុនគ្រឹះស្ថានរដ្ឋ

ឱ ម៉េងហៀង(Ao Mengheang) — Thu, 16 Jul 2020 00:12:17 +0000

ក្រសួងអប់រំ យុវជន និងកីឡា អនុញ្ញាតឱ្យគ្រឹះស្ថានសិក្សាឯកជនដែលមានលទ្ធភាព រៀបចំការប្រឡងមធ្យមសិក្សាទុតិយភូមិដោយខ្លួនឯងនៅក្នុងខែសីហាខាងមុខ ខណៈដែលគ្រឹះស្ថានសិក្សាសាធារណៈមិនទាន់មានការជូនដំណឹងនៅឡើយ។

ក្នុងសេចក្តីណែនាំរបស់ក្រសួងអប់រំ ស្តីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិនៅតាមគ្រឹះស្ថានសិក្សាឯកជនសម្រាប់ឆ្នាំសិក្សា២០១៩-២០២០ ចេញកាលពីថ្ងៃទី១៤ ខែកក្កដា បញ្ជាក់ថា ក្រសួងអប់រំបានកំណត់យកថ្ងៃទី១៧ ខែសីហា សម្រាប់ គ្រឹះស្ថានសិក្សាឯកជនទាំងឡាយណាដែលអាចរៀបចំការប្រឡងមធ្យមសិក្សាទុតិយភូមិដោយខ្លួនឯង។ ក្រសួងបន្ថែមថា សម្រាប់គ្រឹះស្ថានសិក្សាឯកជនដែលមិនមានលទ្ធភាព ត្រូវរងចាំប្រឡងជាមួយស្ថាប័នសិក្សារបស់រដ្ឋ ដែលនឹងត្រូវជូនដំណឹងអំពីកាលបរិច្ឆេទប្រឡងនៅពេលក្រោយ។

សេចក្តីណែនាំរបស់ក្រសួងបន្ថែមថា ដោយសារតែមានការរីករាលដាលនៃជំងឺកូវីដ១៩ ក្រសួងអប់រំ យុវជន និងកីឡា បានអនុញ្ញាតឱ្យគ្រឹះស្ថានសិក្សាឯកជនបង្រៀន និងរៀនពីចម្ងាយ ព្រមទាំងសិក្សាតាមប្រព័ន្ធអេឡិចត្រូនិក និងរៀបចំការប្រឡងសញ្ញាបត្រមធ្យមសិក្សាទុតិយភូមិរៀងៗខ្លួន ដើម្បីធានាបានស្តង់ដារគុណភាពនៃការប្រឡង។ ហើយប្រសិនបើសាលាឯកជនទាំងនោះមានលទ្ធភាពក្នុងការរៀបចំការប្រឡង ត្រូវដាក់ពាក្យស្នើសុំរៀបចំការប្រឡង ដោយភ្ជាប់បញ្ជីរាយនាមបេក្ខជនត្រូវប្រឡងមកក្រសួង តាមរយៈមន្ទីរអប់រំ យុវជន និងកីឡា រាជធានី/ខេត្ត ឱ្យបានមុនដំណាច់ខែកក្កដានេះ។

ក្រសួងបញ្ជាក់ថា៖ «គ្រឹះស្ថានសិក្សានីមួយៗជាអ្នកចេញសញ្ញាបត្រ និងចុះហត្ថលេខាលើសញ្ញាបត្រដោយខ្លួនឯង ហើយក្រសួងទទួលស្គាល់ក្រោយពេលពិនិត្យឃើញថា ការប្រឡងប្រព្រឹត្តទៅតាមការណែនាំរបស់ក្រសួង ព្រមទាំងប្រធានវិញ្ញាសារមានកម្រិតស្តង់ដារប្រហាក់ប្រហែលឆ្នាំកន្លងមក ត្រូវរៀបចំការប្រឡងមធ្យមសិក្សាទុតិយភូមិដោយខ្លួនឯង»។

លោក ចាន់ វាសនា នាយករងសាលាអន្តរជាតិបញ្ញាសាស្ត្រខេត្តបាត់ដំបងលើកឡើងនៅថ្ងៃពុធនេះថា នៅសាលារបស់លោក មានបេក្ខជនដែលជាសិស្សថ្នាក់ទី១២ចំនួន១០០នាក់។ លោកថា ចំពោះការប្រឡងបាក់ឌុប មានបែងចែកជា២មណ្ឌល គឺមណ្ឌលផ្នែកវិទ្យាសាស្រ្តចំនួន៦៦នាក់ និងមណ្ឌលផ្នែកវិទ្យាសាស្ត្រសង្គម ចំនួន៣៤នាក់។

លោកបញ្ជាក់ថា៖ «ខ្ញុំបានត្រៀមរួចហើយក្នុងការធ្វើសំណើសុំឆ្លងកាត់ទៅលើនីតិវិធី ផ្ញើទៅក្រសួង ដើម្បីធ្វើឱ្យការងារនឹង បានបញ្ចប់ក្នុងសប្តាហ៍ទី៣ ខែកក្កដា»។

កាលពីខែមីនា ឆ្នាំ២០២០ ក្រសួងអប់រំ យុវជន និងកីឡា បានចេញសេចក្ដីប្រកាសមួយឱ្យបិទសាលារៀនទាំងរដ្ឋ និងឯកជនទាំងអស់ជាបណ្តោះអាសន្ន ដើម្បីអនុវត្តវិធានការការពារទប់ស្កាត់បន្ទាន់មួយ ក្រោយកម្ពុជាបានរកឃើញករណីវីរុសកូវីដ១៩ជាបន្តបន្ទាប់៕

Acleda Bank Calls NGO Report on Workers’ Debt Baseless

ឱ ម៉េងហៀង(Ao Mengheang) — Tue, 14 Jul 2020 11:38:10 +0000

Acleda Bank earlier this month called a recent report on the indebtedness of garment workers dangerously misleading, saying the report distorted facts and could incite social unrest.

The bank’s statement follows the release of “Worked to Debt: Over-Indebtedness in Cambodia’s Garment Sector,” a joint report that said tens of thousands of workers were suffering because of microfinance loans.

The joint report was written by the Cambodian Alliance of Trade Unions, labor group Central, and human rights NGO Licadho.

The report went beyond mere inaccuracies, the bank said, with defamatory claims intended to tarnish the image of banks and microfinance institutions. Acleda has asked authorities to investigate, and to take legal action in case of reputational damage.

“Please take legal action against any person or group that causes disruption, impairs national economic stability, and loses the trust and safety of depositors in the sector of banks and finance as a whole,” the statement said.

Attempts to contact In Channy, CEO of Acleda Bank, went unanswered.

Am Sam Ath, deputy director for human rights at Licadho, said the group interviewed 162 workers at three fully or partially suspended factories in Kampong Chhnang province and Phnom Penh.

“As a result, 158 people said they were in debt to a bank and were afraid they would be unable to repay their loans,” he said.

The longer workers go without pay, the more fragile their financial situations become, he said.

“Workers are fearful about their future,” he said. “They are thinking, firstly, can I sell some land to get money and repay my loan; secondly, can I eat less; and thirdly, can I borrow the money from somewhere. This is their concern.”

Among its points of contention, Acleda denounced the report because its authors spoke to only several dozen of the industry’s 800,000 workers.

But Khun Tharo, a program coordinator for Central, said the study never claimed to represent the industry as whole, much less the country’s estimated 2.6 million MFI clients. Still, of the 162 workers they spoke with, 158 said loan payment conditions represented a significant burden.

“We had no intention of harming the reputation of Acleda or any microfinance institution in Cambodia,” he said. “But this study shows the real challenges that workers face when they lose their income and cannot afford to repay the bank.”

ខួបស្លាប់បួនឆ្នាំរបស់អ្នកវិភាគ កែម ឡី អ្នកឃ្លាំមើល និងអ្នកគាំទ្រនៅតែជឿថា ឃាតកពិតមិនទាន់ត្រូវបានរកឃើញ

ឱ ម៉េងហៀង(Ao Mengheang) — Tue, 14 Jul 2020 10:59:14 +0000

នៅថ្ងៃទី១០ ខែកក្កដា ឆ្នាំ២០២០ គឺជាថ្ងៃរំឮកខួប៤ឆ្នាំនៃការបាត់បង់អ្នកវិភាគបញ្ហាសង្គមមួយរូប គឺលោកបណ្ឌិត កែម ឡី ដោយសារខ្មាន់កាំភ្លើងបាញ់សម្លាប់ទាំងកណ្តាលថ្ងៃត្រង់។ មិនខុសពីឆ្នាំមុនៗនោះទេ ពិធីនេះត្រូវបានក្រុមគ្រួសារលោករៀបចំជារៀងរាល់ឆ្នាំ នៅស្រុកត្រាំកក់ ខេត្តតាកែវ ដែលជាស្រុកកំណើតរបស់លោក។

ក្នុងរោងពិធី មានអ្នកចូលរួមជាបន្តបន្ទាប់ ខ្លះមកអុជធូប ដើម្បីជាការគោរព និង ដឹងគុណដល់រូបលោកកាលនៅមានជីវិត ក្នុងនោះមានយុវជន អ្នកជិតខាង និងមន្រ្តីសង្គមស៊ីវិលមួយចំនួនយកកម្រងផ្កា ដាក់ពីមុខចេតិយរបស់លោក។

កំពុងមមាញឹកទទួលភ្ញៀវដែលមកចូលរួមក្នុងពិធីនោះ អ្នកស្រី កែម ថាវី បងស្រីបង្កើតរបស់លោក កែម ឡី លើកឡើងថា ក្នុងឆ្នាំនេះអ្នកស្រីសង្កេតឃើញថាមានមនុស្សមកចួលរួមច្រើនជាងឆ្នាំមុន ដោយខ្លះមកចូលរួមតាំងពីថ្ងៃទី៨ និងថ្ងៃទី៩ មក។ អ្នកស្រីបានប្រែទឹកមុខទៅជាក្រៀមក្រំ នៅពេលនិយាយដល់លោក កែម ឡី ត្រូវបានគេបាញ់សម្លាប់ ដោយមានហូរទឹកភ្នែកផងថា ប្អូនប្រុសរបស់អ្នកស្រី មិនទាន់ទទួលបានយុត្តិធម៌នៅឡើយទេ ដោយថា ឃាតកដែលត្រូវបានឃុំខ្លួនបច្ចុប្បន្ន ជាឃាតកក្លែងក្លាយ។

អ្នកស្រី ថាវី មានប្រសាសន៍ថា‍‌៖ «នៅពេលដែលប្អូនខ្ញុំស្លាប់មកដល់ថ្ងៃនេះ ខ្ញុំមិនដែលស្រាកស្រាន្តទុក្ខសោកទេ។ ដោយសារខ្ញុំមិនបានទទួលយុត្តិធម៌ទាល់តែសោះ។ ខ្ញុំមិនទាន់មានពន្លឺថា អ្នកណាអ្នកសម្លាប់ប្អូនខ្ញុំហ្នឹង។ ទោះបីរាប់រយឆ្នាំទៀតក៏ដោយ បើជីវិតខ្ញុំនៅរស់ ខ្ញុំមិនអាចទទួលយកបានទេ »។

អង្គុយលើកៅអីផ្អែកក្រោមរោងប្រក់ស័ង្កសីខាងមុខចេតិយរបស់លោក កែម ឡី ជាមួយភ្ញៀវផ្សេងទៀត អ្នកស្រី ភោគ សេ ម្តាយបង្កើតលោក កែម ឡី មានប្រសាសន៍ថា ទោះបីជាលោក កែម ឡី បាត់បង់ជីវិតទៅក៏ដោយ តែលោកនៅតែមានអ្នកស្រលាញ់ និងចូលចិត្ត និងមកគោរពវិញ្ញាណក្ខ័ន្ធលោកជាបន្តបន្ទាប់។ អ្នកស្រីបន្ថែមទាំងទឹកមុខក្រៀមក្រំថា តាំងពីកូនប្រុសរបស់អ្នកស្រីទទួលមរណភាពទៅ អ្នកស្រីតែងធ្វើបុណ្យឧទ្ទិសកុសលជូនកូន និងនិមន្តព្រះសង្ឃឆាន់ចង្ហាន់ជាដើម។ ស្រ្តីវ័យ៧៩ឆ្នាំរូបនេះបន្ថែមថា អ្នកស្រីនៅតែនឹករឮកដល់កូន ទោះបីជាលោក កែម ឡី ទទួលមរណៈភាពអស់រយៈពេល៤ឆ្នាំទៅហើយក្តី។

អ្នកស្រីថា៖ «នឹកឃើញគ្រប់សព្វទាំងអស់ ដែលជីវភាពយើងអាចរស់នៅ យើងគិតឃើញទាំងអស់ គិតឃើញថាអត់ពីកូនទៅយើងដុនដាបខ្លាំង ចាស់ក៏ចាស់ទៀត ហើយសម្រាប់ធ្វើបុណ្យរាល់ឆ្នាំ អត់មានគិតអីទៀតទេ»។

អ្នកស្រីបន្តថា៖ «នឹកម្តងៗអញ្ចឹងទៅយើងចេះតែទ្រាំ មិនដឹងធ្វើម៉េច អាហ្នឹងកម្មផលរបស់កូនខ្ញុំ កសាងមកអីចឹង កសាងមកគេបាញ់សម្លាប់អីចឹង។ គេយកកម្មពារទៅគេវិញទៅ»។

កាលពីថ្ងៃទី១០ ខែកក្កដា ឆ្នាំ២០១៦ លោក កែម ឡី ត្រូវបានខ្មាន់កាំភ្លើងបាញ់សម្លាប់ក្នុងហាងទំនិញមួយ នៅស្ថានីយ៍ប្រេងសាំង ម្តុំស្តុបបូកគោ រាជធានីភ្នំពេញ។ នៅពេលនោះលោកស្លៀកខោជើងវែងពណ៌ខ្មៅ អាវពណ៌ឈាមជ្រូក និងពាក់ស្បែកជើងកីឡាពណ៌ស។

ភ្លាមៗ បន្ទាប់ពីបាញ់សម្លាប់ ឃាតកដែលមានឈ្មោះថា អឿត អាង និងហៅខ្លួនឯងថា ជួប សម្លាប់ ត្រូវសមត្ថកិច្ចចាប់បាន ហើយបញ្ជូនទៅតុលាការ កាត់ទោសដាក់ពន្ធគារអស់មួយជីវិត ក្រោយសារភាពថា ខ្លួនជាអ្នកបាញ់លោក កែម ឡី ក្រោមហេតុផលថា លោក កែម ឡី ជំពាក់លុយខ្លួន៣,០០០ដុល្លារ។

ទោះបីជាខ្មាន់កាំភ្លើងត្រូវបានផ្តន្ទាទោស ប៉ុន្តែក្រុមអង្គការសង្គមស៊ីវិល និងអ្នកគាំទ្ររូបលោក នៅតែទាមទារឲ្យមានការស៊ើបអង្កេតលើករណីឃាតកម្មនេះ។

បន្ទាប់ពីថតរូបជាមួយរូបសំណាកលោក កែម ឡី នៅក្នុងពិធីបុណ្យនោះរូច កញ្ញា សាក់ កន្និការ មកពីរាជធានីភ្នំពេញម្នាក់ និយាយថា លោក កែម ឡី ជាបុគ្គលដែលគួរឲ្យគោរព ដោយសារលោកជាអ្នកផ្តល់ចំណេះដឹងដល់យុវជន និងពលរដ្ឋទូទៅ។ នៅពេលនិយាយដល់រឿងបាញ់សម្លាប់លោក កែម ឡី ស្រ្តីវ័យ២៩ឆ្នាំរូបនេះនិយាយថា នាងមិនជឿលើការសារភាពរបស់ឃាតកឈ្មោះ អឿត អាង ហៅ ជួប សម្លាប់ នោះទេ ដោយនាងនិយាយថាហេតុផលដែលឃាតកសារភាពថា លោក កែម ឡី ជំពាក់លុយ៣០០០ដុល្លារនោះ មិនអាចទទួលយក។

កន្និការនិយាយថា៖ «វាហាក់បីដូចជាគួរឲ្យហួសចិត្តមែនទែន គាត់ខឹងលោកបណ្ឌិតត្រង់ខ្ចីលុយ៣ពាន់។ ប៉ុន្តែគាត់មានលុយរាប់ម៉ឺនទិញកាំភ្លើងទំនើប ដែលមានតម្លៃលើសហ្នឹងទៅទៀត។ អញ្ចឹងសម្រាប់ខ្ញុំផ្ទាល់នៅតែគិតថាមិនមានភាពយុត្តិធម៌សម្រាប់រឿងនេះទេ»។

យុវតីរូបនេះបន្តថាតុលាការគួរស៊ើបអង្កេតលើឃាតកម្មនេះជាបន្តទៀត។

នាងនិយាយថា៖ «តុលាការគួរតែចាប់ផ្តើមបន្តការស៊ើបអង្កេតរឿងនេះបន្តទៀតដើម្បីឱ្យប្រជាពលរដ្ឋខ្មែរទាំងអស់គ្នា ក៏ដូចជាក្រុមគ្រួសារនៃលោកបណ្ឌិតបានទទួលភាពយុត្តិធម៌ និងស្ងប់ចិត្ត»។

លោក កែម ឡី ត្រូវបានឃាតករបាញ់សម្លាប់ក្នុងវ័យ៤៦ឆ្នាំ។ កាលនៅមានជីវិត អ្នកស្រាវជ្រាវបញ្ហាសង្គមរូបនេះ តែងតែវិភាគអំពីបញ្ហាជាច្រើនក្នុងសង្គមដូចជា ការកាប់បំផ្លាញព្រៃឈើ បញ្ហាព្រំដែន អំពើពុករលួយ បក្សពួកនិយមក្នុងជួររដ្ឋាភិបាលជាដើម។

អ្នកស្រី ចក់ សុភាព នាយិការមជ្ឈមណ្ឌលសិទ្ធិមនុស្សកម្ពុជា ដែល បានចូលរួមក្នុងពិធីរំឮកខួបរបស់លោក កែមឡី ដែរនោះ លើកឡើងថា ក្នុងរយៈពេល២ឆ្នាំចុងក្រោយនេះ ក្រុមអង្គការសង្គមស៊ីវិលជាច្រើនបានអំពាវនាវឲ្យរដ្ឋាភិបាលបង្កើតគណៈកម្មការមួយដោយឯករាជ្យ ក្នុងការស៊ើបអង្កេតលើករណីឃាតកម្មលោកបណ្ឌិត កែម ឡី ។

កំពុងអង្គុយលើកៅអីទល់មុខរូបសំណាកលោក កែម ឡី ក្នុងរោងពិធី និងជាមួយសំលៀកបំពាក់អាវពណ៌សដោយមានសរសេរអក្សរ កែម ឡី នៅពីមុខអាវ អ្នកស្រី សុភាព មានប្រសាសន៍ថា៖ «មកដល់ពេលនេះ យើងមិនទាន់ឃើញមានភាពយុត្តិធម៌ពេញលេញសម្រាប់គាត់នោះទេ យើងឃើញមានការចោទប្រកាន់ទៅលើបុគ្គលឈ្មោះ ជួប សម្លាប់ ឬឈ្មោះ អួត អាង ហ្នឹង យើងមើលពុំមានពលរដ្ឋជឿជាក់លើករណីនេះទេ»។

មុនថ្ងៃរំឮកខួបបួនឆ្នាំនៃការស្លាប់របស់លោក កែម ឡី ក្រុមអង្គការសង្គមស៊ីវិលជាតិ និងអន្តរជាតិចំនួន៣០ស្ថាប័ន បានចេញសេចក្តីថ្លែងការណ៍រួមមួយនៅថ្ងៃទី៩ ខែកក្កដា ដោយជំរុញឲ្យអាជ្ញាធរកម្ពុជាបង្កើតគណៈកម្មការឯករាជ្យមួយ ដើម្បីស៊ើបអង្កេតលើករណីឃាតកម្មនេះ។

ក្នុងសេចក្តីថ្លែងការណ៍ដែលមានចំនួន៣ទំព័រ បានរៀបរាប់ពីភាពមិនប្រក្រតីនៃដំណើរការកាត់ក្តី ដោយមិនមានភាពម៉ត់ចត់ និងឯករាជ្យ។ ក្នុងសេចក្តីថ្លែងការណ៍នោះបន្តថា គួរតែមានការចូលរួមពីអង្គការសហប្រជាជាតិ។

សេចក្តីថ្លែងការណ៍សរសេថា៖ «យើងខ្ញុំជាអង្គការសង្គមស៊ីវិលចំនួន៣០ដែលមានរាយនាមខាងក្រោម នឹងនៅតែបន្តការអំពាវនាវឲ្យមានការស៊ើបអង្កេតដោយឯករាជ្យ មិនលម្អៀង មានប្រសិទ្ធភាព និងម៉ត់ចត់ក្នុងករណីឃាតកម្មលើលោកបណ្ឌិត កែម ឡី រហូតទាល់តែជនទាំងឡាយដែលមានចំណែកទទួលខុសត្រូវចំពោះឃាតកម្មលើលោក ត្រូវបាននាំខ្លួនមកផ្តន្ទាទោស»។

ក្នុងអំឡុងពេលដែលក្រុមគ្រួសារលោក កែម ឡី ប្រារព្ធពិធីរំឮកខួប៤ឆ្នាំ ឯកអគ្គរដ្ឋទូតសហរដ្ឋប្រចាំនៅកម្ពុជា លោក Partrik Murphy ក៏បានបង្ហោះសារតាមបណ្តាញសង្គមហ្វេសប៊ុករបស់ស្ថានទូត និងធ្វីតថឺ (Twitter) ផ្ទាល់ខ្លួនរបស់លោក ដោយអំពាវនាវឲ្យ ប្រទេសកម្ពុជាបើកការស៊ើបអង្កេតសារជាថ្មី លើករណីឃាតកម្មលោក កែមឡី ផងដែរ។

លោក ជិន ម៉ាលីន អ្នកនាំពាក្យក្រសួងយុត្តិធម៌មានប្រសាសន៍ថា រដ្ឋាភិបាលបានផ្តល់យុត្តិធម៌ឲ្យអ្នកដែលត្រូវបានគេសម្លាប់ទៅតាមផ្លូវច្បាប់ តាមរយៈការចាប់ខ្លួនជនដៃដល់ ឈ្មោះ ជួន សម្លាប់ និងផ្តន្ទាទោសតាមច្បាប់រួចហើយ។ លោកបន្តថា សម្រាប់អ្នកពាក់ព័ន្ធផ្សេងទៀត តុលាការបានបំបែកសំណុំរឿង និងកំពុងស្ថិតក្នុងដំណើរស៊ើបអង្កេត។

លោក ជិន ម៉ាលីន បន្ថែមថា ប្រសិនបើមានភាគីណាអះអាងថា ការស្លាប់របស់ លោក កែម ឡី មិនមានយុត្តិធម៌ សូមចូលរួមសហការដើម្បីស្វែងរកភស្តុតាងជាក់លាក់។

លោកថា៖ «ប្រសិនបើភាគីណាមួយយល់ថា ជនដែលត្រូវផ្តន្ទាទោសនេះ មិនមែនជាឃាតករពិត សុំចូលរួមសហការ ហើយផ្តល់ភស្តុតាង និងមូលដ្ឋានឱ្យបានច្បាស់លាស់ ដើម្បីបញ្ជាក់ថា ជនដៃដល់ គឺជាបុគ្គលផ្សេង មិនមែនបុគ្គលដែលបានចាប់ខ្លួន និងផ្តន្ទាទោស»។

ស្របពេលដែលឃាតកម្មលើលោក កែម ឡី នៅតែមានភាពប្រទាំងប្រទើសរវាងរដ្ឋាភិបាល និងអ្នកគាំទ្រលោកពាក់ព័ន្ធនឹងបញ្ហាយុត្តិធម៌ កញ្ញា សាក់ កន្និការ ដែលជាអ្នកចូលរួមម្នាក់ក្នុងពិធីបុណ្យខួបបួនឆ្នាំនោះ និយាយថា លោក កែម ឡី បានជួយកម្ពុជាច្រើន តាមរយៈការស្រាវជ្រាវ និងវិភាគរបស់លោក ហើយថា យុវជនគួរតែគោរព និងចងចាំជារៀងរហូត។

«យើងគួរនាំគ្នាចងចាំពីលោកបណ្ឌិត មិនមែនត្រឹមតែថ្ងៃនេះទេ គឺគ្រប់ពេលវេលា ឬអាចថា មួយជីវិតយើង។ យើងគួរតែធ្វើអ្វីដើម្បីតបស្នងទៅគាត់វិញ»៕

សហជីព និងសង្គមស៊ីវិលជាង៤០នាក់ ស្នើនាយករដ្ឋមន្ត្រីឲ្យបើកប្រាក់បំណាច់អតីតភាពជូនកម្មករ

ឱ ម៉េងហៀង(Ao Mengheang) — Mon, 13 Jul 2020 14:28:11 +0000

ក្រុមសហជីព និងសង្គមស៊ីវិលការពារសិទ្ធិកម្មករជាង៤០នាក់ នៅថ្ងៃចន្ទនេះ បានដាក់លិខិតសុំអន្តរាគមន៍ពីនាយករដ្ឋមន្ត្រី បន្ទាប់ពីក្រសួងការងារសម្រេចពន្យារពេលបើកប្រាក់បំណាច់អតីតភាពជូនកម្មករ។

នៅព្រឹកថ្ងៃទី១៣ ខែកក្កដា នេះ អង្គការសង្គមស៊ីវិល និងតំណាងសហភាពសហជីពទាំងជាង៤០ បានដាក់លិខិតទៅខុទ្ទកាល័យនាយករដ្ឋមន្ត្រី ដែលមានទីតាំងនៅទល់មុខវត្តបុទុមវត្តី រាជធានីភ្នំពេញ ស្នើលោកនាយករដ្ឋមន្ត្រី ហ៊ុន សែន អន្តរាគមន៍ជំរុញឲ្យនិយោជកអនុវត្តការបើកប្រាក់រំឮកអតីតភាពដល់កម្មករនិយោជិត ក្នុងអំឡុងពេលកើតមានជំងឺកូវីដ១៩។

អ្នកស្រី យ៉ាង សុភ័ណ្ឌ តំណាងសហភាព សហជីព បានលើកឡើងថា កម្មករដែលត្រូវបានព្យួរការងារកំពុងប្រឈមនឹងបញ្ហាជីវភាពយ៉ាងខ្លាំងស្រាប់ ប៉ុន្តែក្រសួងការងារក៏សម្រេចពន្យារពេលបើកប្រាក់បំណាច់អតីតភាពដល់ពួកគេ ដែលនេះធ្វើឲ្យពួកគេកាន់តែប្រឈមនឹងបញ្ហាធ្ងន់ធ្ងរ។

អ្នកស្រីបញ្ជាក់ថា៖ «សេដ្ឋកិច្ចរបស់ពួកគាត់សព្វថ្ងៃនេះ ក្រុមហ៊ុនមួយចំនួនធំគឺ ព្យួរការងារ ចឹងគាត់បានប្រាក់នៃការព្យួរការងារនឹងគឺតិចតួច ទី១គាត់បាន៣០ដុល្លារពីក្រុមហ៊ុន គាត់បាន៤០ដុល្លារពីរដ្ឋាភិបាល អីចឹងគាត់បានតែលុយប៉ុណ្ណឹងទេ សួរថាលុយប៉ុណ្ណឹងអាចដោះស្រាយជីវភាពគាត់បានទេ?»។

អ្នកស្រី សុភ័ណ្ឌ បន្តថា កន្លងទៅនេះ ក្រសួងការងារ និងស្ថាប័នរដ្ឋតែងគិតគូរតែវិស័យឯកជន តែមិនសូវយកចិត្តទុកដាក់លើកម្មករ ហើយថ្មីៗនេះក្រុមហ៊ុនបានបិទទ្វារជាបន្តបន្ទាប់ ធ្វើឲ្យកម្មករបាត់បង់ចំណូល និងអត្ថប្រយោជន៍ជាច្រើន។ អ្នកស្រីថា ក្រុមសង្គមស៊ីវិល និងសហជីព ស្នើឲ្យនាយករដ្ឋមន្រ្តី ចូលរួមដោះស្រាយជូនកម្មករទាំងអស់បន្ថែមទៀត។

អ្នកស្រីបញ្ជាក់ថា៖ «មានតែបងប្អូនកម្មករប្រជាពលរដ្ឋនឹងហើយដែលអាចផ្តល់នូវសិទ្ធិអំណាចជូនគាត់បាន ពីព្រោះយើងដូចតាមរយៈការបោះឆ្នោត ចឹងហើយបានយើងស្នើសុំឲ្យពួកគេគិតគូរឲ្យបានពិតប្រាកដទៅដល់ពួកគាត់ទាំងអស់គ្នា ហើយពួកគាត់នឹងឆ្លើយតបមកវិញតាមរយៈនៃការបោះឆ្នោត»។

អ្នកស្រី ឈឹម ស៊ីថរ ប្រធានសហជីពប្រចាំក្រុមហ៊ុនណាហ្គាវើលដ៍ លើកឡើងថា គិតមកដល់សប្តាហ៍ទី៣នៃការដំណើរការកាស៊ីណូណាហ្គាវើលដ៍ឡើងវិញបុគ្គលិកដែលធ្វើការនៅទីនោះ ទើបតែបំពេញការងារបានមួយសប្តាហ៍ប៉ុណ្ណោះ ហើយក្រុមហ៊ុនពុំទាន់បានដោះស្រាយសំណើ៣ចំណុចរបស់បុគ្គលិកនៅឡើយ។ អ្នកស្រីបន្ថែមថា ដំបូងក្រុមហ៊ុនសន្យាថានឹងឆ្លើយតបនៅសប្តាហ៍ទីមួយនៃការដំណើរឡើងវិញ ប៉ុន្តែក្រោយមកក្រុមហ៊ុនសន្យាថានឹងឆ្លើយតបនៅសប្តាហ៍នេះ តែមិនទាន់កំណត់ថ្ងៃណានៅឡើយ។

អ្នកស្រី ឈឹម ស៊ីថរ បន្ថែមថា បុគ្គលិកកាស៊ីណូណាហ្គាវើលដ៍ ក៏បានដាក់ញត្តិសុំអន្តរាគមន៍ពីក្រសួងការងារដើម្បីឲ្យជំរុញម្ចាស់ក្រុមហ៊ុនដោះស្រាយសំណើជូនបុគ្គលិក ប៉ុន្តែមិនមានការឆ្លើយតប ទើបអ្នកស្រីមកដាក់ញត្តិនៅខុទ្ទកាល័យនាយករដ្ឋមន្រ្តីវិញ។

អ្នកស្រីថា៖ «បើទោះបីជារាជរដ្ឋាភិបាលប្រកាសឲ្យបើកកាស៊ីណូ ប្រកាសឲ្យបើកក្លឹបកំសាន្ត ខារ៉ាអូខេឡើងវិញមែន ប៉ុន្តែជាក់ស្តែងដូចនៅណាហ្គាវើលដ៏អីចឹង បុគ្គលិកធ្វើការអត់ទាន់បានចូលធ្វើការវិញទាំងអស់គ្នាទេ ហើយអ្នកដែលបានចូលធ្វើការវិញនឹង ក៏ធ្វើការបានត្រឹមតែមួយសប្តាហ៍ប៉ុណ្ណោះមកទល់នឹងពេលនេះ»។

ចំណែកលោក ឃុន ថារ៉ូ អ្នកគ្រប់គ្រងកម្មវិធីការងារ នៃអង្គការសង់ត្រាល់ លើកឡើងថា ការដាក់សំណើទៅខុទ្ទកាល័យនាយករដ្ឋមន្ត្រីនៅព្រឹកថ្ងៃទី១៣ ខែកក្កដានេះ មន្ត្រីខុទ្ទកាល័យបានទទួលហើយ ប៉ុន្តែមិនបានសន្យា និងមិនមានការឆ្លើយតបជាផ្លូវការនៅឡើយទេ។ លោកថា ការពន្យាពេលបើកប្រាក់បំណាច់អតីតភាពការងារដល់កម្មករនិយោជិត ធ្វើឲ្យប៉ះពាល់ដល់បញ្ហាជីវភាពក្នុងការរស់នៅរបស់កម្មករយ៉ាងខ្លាំង ដូច្នេះលោកសង្ឃឹមថា លោកនាយករដ្ឋមន្ត្រីអាចដោះស្រាយប្រាក់បំណាច់អតីតភាពជូនកម្មករនៅក្នុងឆ្នាំ២០២០នេះបាន។

លោកថា៖ «យើងសង្ឃឹមថា នាយករដ្ឋមន្រ្តី លោកនឹងធ្វើការពិចារណាឲ្យល្អិតល្អន់ ដោយសារការពន្យាពេលការបើកប្រាក់បំណាច់អតីតភាពការងារដល់កម្មករនិយោជិតឆ្នាំ២០២១ហ្នឹង វាខាតបង់នូវផលប្រយោជន៍របស់កម្មករ ខណៈពេលដែលកម្មករក្នុងកាលៈទេសៈនេះគាត់ត្រូវការថវិកាដើម្បីទ្រទ្រង់នូវជីវភាពរស់នៅ និងផ្នែកសេដ្ឋកិច្ចរបស់ពួកគាត់»។

ក្រសួងការងារ និងបណ្តុះបណ្តាលវិជ្ជាជីវៈ កាលពីដើមខែមិថុនា បានសម្រេចលើកពេលបើកប្រាក់បំណាច់អតីតភាពការងារសម្រាប់កម្មករទៅឆ្នាំ២០២១ ក្នុងគោលបំណងជួយដល់រោងចក្រដែលរងផលប៉ះពាល់ធ្ងន់ធ្ងរពីការរាលដាលជំងឺកូវីដ១៩។

លោក គង់ ចំរើន មន្ត្រីខុទ្ទកាល័យនាយករដ្ឋមន្ត្រី ប្រាប់ Newsroom Cambodia សំណើរបស់សហភាពសហជីព និងអង្គការសង្គមស៊ីវិលទាំងនោះយ៉ាងខ្លីថា៖ «ពាក្យហ្នឹងខ្ញុំទទួលហើយ ខ្ញុំបញ្ជូនទៅលើបាត់ទៅហើយ»។

ចាប់តាំងពីរោងចក្រព្យួរការងារកម្មករ ដោយសាររោងចក្របិទទ្វារមិនមិនមានអ្នកបញ្ជាទិញ ដោយសារវិបត្តិជំងឺកូវីដ១៩ លោកនាយករដ្ឋមន្រ្តី ហ៊ុន សែន បានលើកឡើងថា រោងចក្រផ្តល់ប្រាក់៣០ដុល្លារក្នុងមួយខែឲ្យកម្មករ។ ចំណែករដ្ឋាភិបាលថា ផ្តល់ឲ្យ៤០ដុល្លារ៕

អាជ្ញាធរខេត្តតាកែវរារាំងប្រជាពលរដ្ឋទៅចូលរួមពិធីបុណ្យខួបបួនឆ្នាំរបស់លោក កែម ឡី

ឱ ម៉េងហៀង(Ao Mengheang) — Fri, 10 Jul 2020 10:34:45 +0000

(តាកែវ): អាជ្ញាធរខេត្តតាកែវ នៅថ្ងៃសុក្រនេះ ព្យាយាមហាមឃាត់ប្រជាពលរដ្ឋជាង៥០នាក់ ដែលធ្វើដំណើរទៅចូលរួមពិធីបុណ្យខួប៤ឆ្នាំនៃការស្លាប់របស់លោកបណ្ឌិត កែម ឡី នៅស្រុកកំណើត។

លោក វ៉ន ពៅ ប្រធានសមាគមឯករាជ្យប្រជាធិបតេយ្យសេដ្ឋកិច្ចក្រៅប្រព័ន្ធ (IDEA) លើកឡើងថា ក្រុមប្រជាពលរដ្ឋជាង៥០នាក់ ដែលជាយុវជន និងសមាជិកសមាគមរបស់លោក បានធ្វើដំណើរពីរាជធានីភ្នំពេញ ដោយរថយន្តក្រុងមួយគ្រឿង និងកង់បីឥណ្ឌាជាង១០គ្រឿងដើម្បីចូលរួមពិធីបុណ្យខួបគម្រប់៤ឆ្នាំនៃការស្លាប់របស់លោកបណ្ឌិត កែម ឡី។ លោកបន្តថា ខណៈក្រុមពលរដ្ឋទាំងនោះធ្វើដំណើរមកដល់ចំណុចផ្សារអង្គតាសោម នាម៉ោងប្រមាណជា៩កន្លះព្រឹក អាជ្ញាធរបានហាមឃាត់មិនឲ្យធ្វើដំណើរទៅមុខ ដោយលើកហេតុផលថា ជាបញ្ជាពីថ្នាក់លើ ដើម្បីត្រួតពិនិត្យសុខភាព។

លោក វ៉ន់ ពៅ បន្ថែមថា ក្រោយការត្រួតពិនិត្យសុខភាពដោយវាស់កម្តៅ និងចុះឈ្មោះអស់ជាងបីម៉ោង អាជ្ញាធរនៅតែបន្តឃាត់រថយន្តក្រុង និងកង់បីឥណ្ឌាទាំងនោះមិនឲ្យធ្វើដំណើរទៅមុខដដែល ទើបពលរដ្ឋសម្រេចធ្វើដំណើរដោយថ្មើរជើងមកកាន់រោងពិធី ដែលមានចម្ងាយប្រមាណជា១០គីឡូម៉ែត្រពីផ្សារអង្គតាសោម។

លោកបញ្ជាក់ទាំងដែលកំពុងដើរតាមផ្លូវថា៖ «នេះជារឿងអយុត្តិធម៌សម្រាប់លោក កែម ឡី ពេកហើយ ដែលត្រូវបាញ់សម្លាប់នៅកណ្តាលទីក្រុង ហើយយើងជាប្រជាពលរដ្ឋដឹងគុណ លោកបណ្ឌិត កែម ឡី បែរជាគេរារាំងមិនឲ្យយើងធ្វើដំណើរ អីចឹងវាជារឿងអយុត្តិធម៌សម្រាប់យើងដែលជាអ្នកដឹងគុណលោកបណ្ឌិត កែម ឡី»។

ក្នុងពិធីបុណ្យគម្រប់ខួប៤ឆ្នាំនៃការស្លាប់របស់លោក កែម ឡី នៅព្រឹកនេះ គេឃើញមានអាជ្ញាធររាប់សិបនាក់ស្លៀកពាក់ស៊ីវិល អង្គុយឃ្លាំមើលនៅខាងមុខ និងក្នុងរោងពិធី ដោយខ្លះថតរូបភាព និងវីដេអូរបស់អ្នកចូលរួម និងអ្នកសារព័ត៌មាន។ ចំណែកនៅតាមដងផ្លូវនៃផ្ទះពិធីនោះ មានអាជ្ញាធរចម្រុះប្រមាណជា១០០នាក់ រាយបណ្តាក់គ្នាដោយកន្លែង។

បើតាមបងស្រី របស់លោក កែម ឡី គឺអ្នកស្រី កែម ថាវី បានថ្លែងថាអាជ្ញាធរទាំងនោះ គឺសមត្ថកិច្ចស្រុក និងខេត្ត។

អ្នកស្រី ចក់ សុភាព នាយិការប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) លើកឡើងថា ការរារាំងរបស់អាជ្ញាធរទៅលើពលរដ្ឋដែលជាយុវជន និងសមាជិកសមាគមឯករាជ្យប្រជាធិបតេយ្យសេដ្ឋកិច្ចក្រៅប្រព័ន្ធ គឺជាការបំពានលើសិទ្ធិពលរដ្ឋក្នុងការជួបជុំ សិទ្ធិក្នុងការបញ្ចេញមតិ និងជាការបំពានលើសិទ្ធិប្រពៃណី ក្នុងការចូលរួមពិធីបុណ្យខួបគម្រប់៤ឆ្នាំរបស់លោកបណ្ឌិត កែម ឡី ផងដែរ។ អ្នកស្រីបន្ថែមថា សកម្មភាពទាំងនេះមិនមែនជាលើកទីមួយនោះទេ ដូច្នេះអ្នកស្រីថា ហាក់ដូចជាបង្ហាញពីចេតនាក្នុងការទប់ស្កាត់របស់រាជរដ្ឋាភិបាល។

អ្នកស្រីបញ្ជាក់ថា៖ «វាជារូបភាពមួយដែលបង្ហាញថា រដ្ឋាភិបាលមានចេតនាក្នុងការទប់ស្កាត់មិនឲ្យមានការជួបជុំ មិនឲ្យមានការចូលរួមក្នុងការប្រារព្ធ អឺ ! រំឮកនូវវីរៈភាពរបស់លោកបណ្ឌិត កែម ឡី»។

Newsroom Cambodia មិនអាចទាក់ទងលោក អ៊ូច ភា អភិបាលខេត្តតាកែវ និងលោក សុខ សំណាង ស្នងការខេត្តតាកែវ បានទេ។

កាលថ្ងៃទី០៨ ខែកក្កដា ឆ្នាំ២០២០ អាជ្ញាធរខណ្ឌចំការមនក៏បានហាមឃាត់យុវជន និងព្រះសង្ឃជាង២០អង្គនាក់ មិនឲ្យដាក់កម្រងផ្កាគោរពវិញ្ញាណក្ខន្ធលោកបណ្ឌិត កែម ឡី នៅស្ថានីយ៍ប្រេងឥន្ទនៈកាល់តិច ស្តុបបូកគោ នារាជធានីភ្នំពេញផងដែរ៕

ក្រុមអ្នកវិភាគវ័យក្មេងដែលជាសិស្សលោកបណ្ឌិត កែម ឡី ប្តេជ្ញាដើរតាមគន្លងគ្រូ

ឱ ម៉េងហៀង(Ao Mengheang) — Fri, 10 Jul 2020 01:25:33 +0000

ក្រុមអ្នកវិភាគវ័យក្មេងដែលទទួលបានការបណ្តុះបណ្តាលពីលោកបណ្ឌិត កែម ឡី អ្នកវិភាគដែលត្រូវបានគេបាញ់សម្លាប់កាលពីបួនឆ្នាំមុន ប្តេជ្ញាបន្តវិភាគរឿងនយោបាយ បើទោះជាមានការគំរាមគំហែង។

នៅថ្ងៃទី១០ ខែកក្កដា ឆ្នាំ២០២០ គឺជាខួបគម្រប់បួនឆ្នាំនៃការបាញ់សម្លាប់លោកបណ្ឌិត កែម ឡី អ្នកវិភាគសង្គម និងនយោបាយ ដែលត្រូវបានខ្មាន់កាំភ្លើងបាញ់សម្លាប់ក្នុងផ្សារលក់ទំនិញមួយកន្លែង ស្ថិតក្នុងស្ថានីយ៍ប្រេងឥន្ធនៈកាល់តិច ស្តុបបូកគោ រាជធានីភ្នំពេញ។

ប្រធានក្រុមអ្នកវិភាគវ័យក្មេងកញ្ញា លី ស្រីស្រស់ លើកឡើងថា ក្រុមអ្នកវិភាគវ័យក្មេងក្នុងពេលបច្ចុប្បន្នមានសមាជិក០៥នាក់ ដែលសុទ្ធតែជាអ្នកទទួលបានការបណ្តុះបណ្តាលពីលោកបណ្ឌិត កែម ឡី។ កញ្ញាបន្តថា ក្រុមអ្នកវិភាគវ័យក្មេងនៅបន្តការងារជាធម្មតា ដោយអនុវត្ត នូវគោលការណ៍របស់ខ្លួន និងប្តេជ្ញាបន្តការងារជាអ្នកវិភាគបញ្ហានានានៅក្នុងសង្គម បើទោះបីមានការគំរាមគំហែង។

កញ្ញាបញ្ជាក់ថា៖ «យើងអាចធ្វើបាន ឬមិនអាចធ្វើបាន ដោយសារវាមានសុវត្ថិភាព និងអត់សុវត្ថិភាព ប៉ុន្តែដរាបណារឿងនោះវាសំខាន់ ទោះបីវាគ្រោះថ្នាក់ ឬយ៉ាងមិច ហ្នឹងជាការលះបង់របស់យើង»។

ចំណែកលោក ហង្ស វិទូ អតីតប្រធានក្រុមអ្នកវិភាគវ័យក្មេង លើកឡើងដែរថា តាំងពីដើមមកដល់ពេលនេះ ក្រុមរបស់លោកនៅតែសកម្មភាពក្នុងសង្គមជាធម្មតា បើទោះបីពេលខ្លះ លោកមិនបាននិយាយជាសាធារណៈ ឬតាមវិទ្យុ និងតាមសារព័ត៌មានមួយចំនួនក៏ដោយ។ លោកបន្តថា លោកបានបណ្តុះបណ្តាលយុវជនថ្មីៗ មានប្រមាណជា៨នាក់ ដែលធ្វើសកម្មភាពពាក់ព័ន្ធនឹងការវិភាគរហូតមក។

លោកបញ្ជាក់ថា៖ «បើនិយាយតាមវិទ្យុអីហ្នឹង គឺយើងមានការដូរវេនគ្នា អាស្រ័យលើសារព័ត៌មានគាត់សួរ។ យើងនៅបន្តដំណើរការធម្មតា តែពេលនេះយើងបានដូរប្រធាន ខ្ញុំពីដើមខ្ញុំជាប្រធាន ដល់ពេលខ្ញុំអស់អាណត្តិចុះពីតំណែងប្រធាននឹង មកជាប្រធានទីប្រឹក្សាវិញ ប៉ុន្តែនៅធ្វើការដូចដើម។ ចំពោះឧបសគ្គវាមានតិចតួចដែរ តែយើងនៅបន្ត»។

ក្រុមអ្នកវិភាគវ័យក្មេងចាប់ផ្តើមទទួលបានបណ្តុះបណ្តាលពីលោកបណ្ឌិត កែម ឡី កាលពីដើមឆ្នាំ២០១៥។ ជាទូទៅគេឃើញក្រុមអ្នកវិផាគវ័យក្មេងទាំងនេះបានចូលរួមវិភាគអំពីបញ្ហានយោបាយ សេដ្ឋកិច្ច សង្គម អប់រំ ប្រជាធិបតេយ្យ និងវិស័យផ្សេងៗ នៅតាមសារព័ត៌មាន និងមានទីសាធារណៈ។

លោកបណ្ឌិត មាស នី អ្នកវិភាគ និងជាអ្នកឃ្លាំមើលផ្នែកអភិវឌ្ឍន៍សង្គម លើកឡើងថា ក្រុមអ្នកវិភាគវ័យក្មេង បានចូលរួមយ៉ាងសកម្មក្នុងការតស៊ូមតិទៅលើបញ្ហានានាក្នុងសង្គម។

លោកមានប្រសាសន៍ថា៖ «ខ្ញុំឃើញក្រុមគាត់បានល្អចេញមកខំប្រឹងចូលរួមកិច្ចការនៅក្នុងសង្គមផ្សេងៗទៀត ហើយពិសេសចូលទៅធ្វើវាគ្មិនក្នុងការប្រជុំរបស់ក្រុមយុវជនអី តាមក្រុមៗ។ ខ្ញុំឧស្សាហ៍ឃើញពួកគាត់ចូលរួមទាំងអស់នឹង ហើយនឹងកិច្ចការតស៊ូមតិមួយចំនួនទៀត ក៏ឃើញមានវត្តមានក្រុមពួកគាត់ចូលរួមដែរ»។

លោកបណ្ឌិត កែម ឡី គឺជាអ្នកវិភាគបញ្ហាសង្គម និងនយោបាយក្នុងប្រទេសកម្ពុជា ដែលត្រូវបានប្រជាជនជាច្រើនស្គាល់ ដោយសារការវិភាគត្រង់ៗ និងចំៗទៅលើបញ្ហាដែលកំពុងកើតមានក្នុងប្រទេស។ ការវិភាគរបស់លោកពេលខ្លះប៉ះចំបុគ្គលផ្ទាល់ ឬផលប្រយោជន៍របស់អ្នកមានលុយ មានអំណាច ឬមានឥទ្ធិពលក្នុងជួររដ្ឋាភិបាល ទាំងគណបក្សកាន់អំណាច និងគណបក្សប្រឆាំងនៅក្នុងប្រទេសកម្ពុជា៕

អាជ្ញាធររារាំងក្រុមយុវជន និងព្រះសង្ឃមិនឲ្យគោរពវិញ្ញាណក្ខ័ន្ធលោកបណ្ឌិត កែម ឡី

ឱ ម៉េងហៀង(Ao Mengheang) — Wed, 08 Jul 2020 14:10:31 +0000

នៅព្រឹកថ្ងៃពុធនេះ អាជ្ញាធរខណ្ឌចំការមនបានហាមឃាត់យុវជន និងព្រះសង្ឃជាង២០អង្គនាក់ មិនឲ្យដាក់កម្រងផ្កាគោរពវិញ្ញាណក្ខន្ធលោកបណ្ឌិត កែម ឡី ក្នុងខួបបួនឆ្នាំនៃការបាញ់សម្លាប់លោក នៅស្ថានីយ៍ប្រេងឥន្ទនៈកាល់តិច ស្តុបបូកគោ។

យុវជនដែលគាំទ្រលោកបណ្ឌិត កែម ឡី និងព្រះសង្ឃជាង២០អង្គនាក់ នៅព្រឹកថ្ងៃទី០៨ ខែកក្កដានេះ បានប្រមូលផ្តុំគ្នាម្តុំស្ថានីយ៍ប្រេងឥន្ធនៈកាល់តិច ស្តុបបូកគោ រាជធានីភ្នំពេញ ដើម្បីគ្រោងធ្វើពិធីបង្សុកូលរំឮកខួបនៃការបាត់បង់ជីវិតរបស់លោកបណ្ឌិត កែម ឡី ដែលជាអ្នកវិភាគត្រូវបានគេបាញ់សម្លាប់នៅស្ថានីយ៍ប្រេងឥន្ធនៈនោះ កាលពីថ្ងៃទី១០ ខែកក្កដា ឆ្នាំ២០១៦ កន្លងទៅ។

ខណៈពួកគេកំពុងប្រមូលផ្តុំដើម្បីត្រៀមចូលទៅស្ថានីយ៍ប្រេងឥន្ធនៈនោះ កងសន្តិសុខខណ្ឌរាប់សិបនាក់បានហាមឃាត់ និងដេញពួកគេចេញពីបរិវេណនោះ មិនឲ្យពួកគេចូលធ្វើពិធី ដោយមូលហេតុថា មានការស្នើសុំពីម្ចាស់ស្ថានីយ និងដើម្បីរក្សាសណ្តាប់ធ្នាប់សន្តិសុខសាធារណៈ។

កញ្ញា ភឿន កែវរស្មី យុវជនម្នាក់ដែលបានចូលរួមក្នុងគម្រោងគោរពវិញ្ញាណក្ខន្ធនោះ លើកឡើងថា ការប្រមូលផ្តុំគ្នាដែលមានទាំងយុវជន និងព្រះសង្ឃ គឺចង់ធ្វើពិធីគោរពវិញ្ញាណក្ខ័ន្ធរបស់លោកបណ្ឌិត កែម ឡី។ កញ្ញាបន្តថា ការរារាំងពីសំណាក់អាជ្ញាធរគឺជាការបង្ហាញឲ្យឃើញពីការរឹតត្បិតសិទ្ធិសេរីភាព ដែលធ្វើឲ្យយុវជនមានការភ័យខ្លាច និងមិនហ៊ានធ្វើអ្វីដែលខ្លួនចង់ធ្វើ។

កញ្ញាបញ្ជាក់ថា៖ «អ្វីដែលយើងធ្វើរាល់ថ្ងៃនឹង ហើយក៏ដូចជាព្រឹកនឹង អត់មានខុសច្បាប់ទេ ប៉ុន្តែខាងអាជ្ញាធរទេដែលគាត់ខុសច្បាប់ ហើយក៏ដូចជាប្រមូលផ្តុំគ្នាច្រើនជាងយើងយុវជនយើងមកធ្វើផង។ អីចឹងទៅអ្នកខ្លះក៏មានម៉ាសអ្នកខ្លះក៏អត់ម៉ាស ហើយមើលទៅវា វាបង្កទៅជាគ្រោះថ្នាក់ដល់យើងដែលជាយុវជនមកចូលរួមវិញ»។

កញ្ញាបន្ថែមដោយសំណូមពរឲ្យអាជ្ញាធរចូលរួមគោរព ធ្វើការតាមនីតិវិធី និងអនុវត្តន៍ច្បាប់ ជៀសវាងការធ្វើអ្វីមួយតាមថ្នាក់លើដោយបំពានច្បាប់។

កញ្ញាថា៖ «បើគាត់កាន់ច្បាប់ គាត់ចេះច្បាប់ សូមឲ្យគាត់គោរពច្បាប់ មែនគាត់ជាអ្នកកាន់ច្បាប់ គាត់ចេះច្បាប់ តែទង្វើរដែលគាត់ធ្វើមកធ្វើតាមមេតាមកើយ តាមបញ្ជាថ្នាក់លើ មិនដែលលើកច្បាប់មកនិយាយទេ។ ហើយនៅពេលដែលប្រជាពលរដ្ឋលើកច្បាប់មកនិយាយគឹគាត់មិនទទួលស្គាល់ថា ស្អីដែលយើងធ្វើហ្នឹងត្រូវច្បាប់ដែរ។ គាត់នៅតែរឹតត្បិតសិទ្ធិសេរីភាពយើង»។

ចំណែកព្រះតេជគុណ កើត សារ៉ាយ ព្រះសង្ឃមួយអង្គដែលបានចូលរួមជាមួយយុវជន មានសង្ឃដីកាថា ការរារាំងយុវជន និងព្រះសង្ឃនាព្រឹកថ្ងៃពុធនេះ ជាការរំលោភបំពានសិទ្ធិធ្ងន់ធ្ងរដល់ប្រជាពលរដ្ឋ។ ព្រះតេជគុណបន្តថា សិទ្ធិសេរីភាពដែលចែងដោយច្បាប់ និងបានមកពីការច្បាំងដោយចំណេះដឹង ទើបជាសិទ្ធិសេរីភាពពិតប្រាកដសម្រាប់ប្រជាពលរដ្ឋទាំងអស់។

តេជគុណមានសង្ឃដីកាថា៖ «មិនមានការរំពឹងខ្ពស់នៅឡើយទេដែលអាចធ្វើឲ្យសង្គមខ្មែរមានសុចរិតភាព ដរាបណាការអនុវត្តច្បាប់នៅតែប្រកាន់និន្នាការនយោបាយ»។

ចំណែកលោក ហ៊ុន វណ្ណៈ យុវជនម្នាក់ទៀតដែលចូលរួមប្រារព្ធពិធីនោះដែរ លើកឡើងថាសកម្មភាពរបស់អាជ្ញាធរធ្វើឲ្យប្រជាពលរដ្ឋ និងយុវជនចាប់ផ្តើមមើលរំលង និងមិនឲ្យតម្លៃពួកគាត់ទៅវិញ។

លោកថា៖ «បើយើងសិក្សាពីផ្លូវច្បាប់ គឺលិខិតហ្នឹង [លិខិតចេញដោយរដ្ឋបាលខណ្ឌចំការមន ហាមមិនឲ្យពលរដ្ឋប្រារព្ធពិធីរំឮកវិញ្ញាណក្ខន្ឌលោកបណ្ឌិត កែម ឡី] ក៏គាត់រំលោភសិទ្ធិសេរីភាពប្រជាពលរដ្ឋ ក៏ធ្វើខុសនឹងច្បាប់រដ្ឋធម្មនុញ្ញដែរ។ អីចឹងរបស់ដែលគាត់ធ្វើកន្លងមក ដូចបង្រៀនឲ្យប្រជាពលរដ្ឋចាប់ផ្តើមលែងគោរពគាត់ »។

លោក ស៊ឹង សែនករុណា មន្ត្រីជាន់ខ្ពស់ និងជាអ្នកនាំពាក្យសមាគមការពារសិទ្ធិមនុស្សអាដហុក (ADHOC) លើកឡើងថា ការហាមឃាត់ព្រះសង្ឃ និងក្រុមយុវជនដែលគាំទ្រលោកបណ្ឌិត កែម ឡី មិបឲ្យធ្វើពិធីរំលឹកវិញ្ញាណក្ខ័ន្ធលោកនៅក្នុងបរិវេណម៉ាតកាល់តិចបូកគោ ក្រោមហេតុផលរៀបចំសណ្តាប់ធ្នាប់សាធារណៈ និងមានបណ្តឹងពីខាងម្ចាស់ម៉ាតកាល់តិច គឺជារឿងមិនសមហេតុផល។ លោកបន្ថែមថា អាជ្ញាធរគួរតែអនុញ្ញាតឲ្យប្រជាពលរដ្ឋដែឡជាអ្នកគាំទ្រលោកលបណ្ឌិត កែម ឡី ទាំងនោះបានធ្វើកម្មវិធី ដើម្បីគោរពវីរៈភាពរបស់លោក។

លោកបន្តថា៖ «អាជ្ញាធរគួរតែសម្រួលឲ្យគាត់ធ្វើពិធីបានចប់សព្វគ្រប់ នៅម៉ាតបូកគោហ្នឹង គឺមិនមានភាពច្របូកច្របល់ទេ។ អាជ្ញាធរធ្វើអីចឹងអាចនឹងប៉ះពាល់ដល់សណ្តាប់ធ្នាប់សាធារណៈ វាមិនអាចមកពីពួកគាត់ទេ អាចមកពីអាជ្ញាធរទាំងអស់ហ្នឹងវិញ»។

នៅព្រឹកនេះដែរ ក៏មានការឃា៦ត់ខ្លួនយុវជនម្នាក់ដែលមានពាក់អាវយឺតរូបលោកបណ្ឌិត កែម ឡី នៅស្តាម៉ាត ក្នុងស្ថានីយ៍ប្រេងឥន្ធនៈនោះផងដែរ។

លោក ថេង សុថុល អភិបាលខណ្ឌចំការមនមានប្រសាសន៍ អាជ្ញាធរមិនបានចាប់ខ្លួនយុវជននោះទេ គ្រាន់តែហៅសាកសួរតែប៉ុណ្ណោះ។ លោកបន្តថា មូលហេតុគឺ «ដោយសារយុវជននោះពាក់អាវយឺតដែលគួរឲ្យសង្ស័យ»។ ប៉ុន្តែលោកថា អាជ្ញាធរក៏បានឲ្យយុវជននោះត្រឡប់ទៅវិញផងដែរនៅព្រឹកមិញនេះ។

សម្រាប់ការហាមឃាត់ក្រុមយុវជន និងព្រះសង្ឃមិនឲ្យធ្វើពិធី លោក ថេង សុថុល លើកឡើងថា ដោយសារក្រុមយុវជនទាំងនោះមិនបានសុំច្បាប់អនុញ្ញាត និងថា នោះក៏ជាសំណូមពររបស់ម្ចាស់ស្ថានីយ៍អោយរក្សាសន្តិសុខសណ្តាប់ធ្នាប់ និងដោយការជូនដំណឹងរបស់រដ្ឋាភិបាល និងក្រសួងធម្មការមិនឲ្យជួបជុំក្នុងកំឡុងពេលមានជំងឺកូវីដ។

លោកថា៖ «ខ្ញុំមើលឃើញថាវាអត់មានប៉ះពាល់សិទ្ធិអីផង ព្រោះអីកន្លែងគោរពពិធី កន្លែងអី អឺ ចង់និយាយថា ខ្ញុំជាអាជ្ញាធរ ខ្ញុំគិតរឿងបញ្ហាសុខសុវត្ថិភាព សណ្តាប់ធ្នាប់សង្គម »។

លោកបណ្ឌិត កែម ឡី អ្នកវិភាគនយោបាយ ត្រូវបានឃាតករបាញ់សម្លាប់ទាំងកណ្តាលថ្ងៃ នៅក្នុងហាងលក់ទំនិញមួយកន្លែង ក្នុងស្ថានីយ៍ប្រេងឥន្ធនៈកាល់តិច ស្តុបបូកគោ នៅរាជធានីភ្នំពេញ កាលពីថ្ងៃអាទិត្យ ទី១០ ខែកក្កដា ឆ្នាំ២០១៦។ ជារៀងរាល់ឆ្នាំ នៅថ្ងៃទី១០ ខែកក្កដា តែងមានក្រុមយុវជន និងអ្នកគាំទ្រលោកចូលរួមប្រារព្ធពិធីគោរពវិញ្ញាក្ខន្ធ ដោយមានដាក់កម្រងផ្កា និងរៀបចំពិធីបែបសាសនាផ្សេងៗ ប៉ុន្តែរាល់ការជួបជុំនោះ អាជ្ញាធរតែងរារាំងដោយមូលហេតុផ្សេងៗ៕

កម្ពុជាលើកពេលប្រជុំកំពូលអាស៊ី-អឺរ៉ុបទៅពាក់កណ្តាលឆ្នាំ២០២១ដោយសារជំងឺកូវីដ១៩

ឱ ម៉េងហៀង(Ao Mengheang) — Mon, 06 Jul 2020 11:48:38 +0000

កិច្ចប្រជុំកំពូលអាស៊ី-អឺរ៉ុប (ASEM) លើកទី១៣ ដែលមានកម្ពុជាធ្វើជាម្ចាស់ផ្ទះសម្រាប់ដឹកនាំកិច្ចប្រជុំនៅខែវិច្ឆិកានេះ ត្រូវបានសម្រេចលើកពេលទៅពាក់កណ្តាលឆ្នាំ២០២១វិញ ដោយសារការរីករាលដាលជំងឺកូវីដ១៩។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។

ក្នុងសេចក្តីប្រកាសព័ត៌មានរបស់ក្រសួងការបរទេសកម្ពុជា ចេញកាលពីថ្ងៃទី៤ ខែកក្កដា ឆ្នាំ២០២០ បញ្ជាក់ថា កាលពីថ្ងៃទី០២-០៣ ខែកក្កដា ឆ្នាំ២០២០ កម្ពុជាបានរៀបចំកិច្ចប្រជុំឧត្តមមន្រ្តីអាស៊ី-អឺរ៉ុប តាមប្រព័ន្ធវីដេអូ ដោយមានលោក សុក ស៊ីផាន់ណា មន្រ្តីទទួលបន្ទុកកិច្ចប្រជុំអាស៊ី-អឺរ៉ុប និងមន្រ្តីនៃបណ្តាប្រទេសជាដៃគូកិច្ចប្រជុំកំពូលអាស៊ី-អឺរ៉ុបចូលរួម។ ក្នុងកិច្ចប្រជុំនោះ ឧត្តមមន្រ្តីនៃបណ្តាប្រទេសទាំងនោះបានឯកភាពគាំទ្រចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលអាស៊ី-អឺរ៉ុបទី១៣ ខែគ្រោងនឹងធ្វើនៅថ្ងៃទី១៦-១៧ ខែវិច្ឆិកានេះ ទៅប្រជុំនៅពាក់កណ្តាលឆ្នាំ២០២១វិញ។

សេចក្តីប្រកាសព័ត៌មានដដែលនោះបញ្ជាក់ថា៖ «ដោយសារតែផលវិបាកអាក្រក់ នៃការរីករាលដាលនៃជំងឺកូវីដ១៩ ទើបឧត្តមមន្ត្រីទទួលបន្ទុកកិច្ចប្រជុំកំពូលទាំងអស់ បានបង្ហាញការឯកភាពប្រកបដោយស្មារតីយោគយល់ និងគាំទ្រជាឯកច្ឆន្ទចំពោះសំណើរបស់កម្ពុជាសុំលើកពេលកិច្ចប្រជុំកំពូលអាស៊ី-អឺរ៉ុបលើកទី១៣នេះ ទៅប្រព្រឹត្តនៅពាក់កណ្តាលឆ្នាំ២០២១វិញ»។

បើតាមសេចក្តីប្រកាសព័ត៌មានដដែល ឧត្តមមន្ត្រីអាស៊ី-អឺរ៉ុបទាំងអស់ បានពិភាក្សាលើសេចក្តីព្រាង និងសេចក្តីថ្លែងការណ៍ ស្តីពីជំងឺកូវីដ១៩ ដោយរំពឹងថា នឹងអាចដាក់ចេញនៅពាក់កណ្តាលខែកក្កដា ឆ្នាំ២០២០ខាងមុខនេះ ដើម្បីឆ្លើយតបរួមទៅលើបញ្ហានៃការរីករាលដាលនៃជំងឺកូវីដ១៩។ ។

Newsroom Cambodia មិនអាចទាក់ទងសុំការអត្ថាធិប្បាយពីលោក សុក ស៊ីផាន់ណា មន្រ្តីទទួលបន្ទុកកិច្ចប្រជុំអាស៊ី-អឺរ៉ុបនៅកម្ពុជាបានទេ។ ចំណែក លោក កុយ គួង អ្នកនាំពាក្យក្រសួងការបរទេសកម្ពុជា មិនទទួលទូរស័ព្ទ។

លោក ឈាង វណ្ណារិទ្ធ នាយកប្រតិបត្តិវិទ្យាស្ថានចក្ខុវិស័យអាស៊ី លើកឡើងថា ការសម្រេចលើកពេលប្រជុំនេះ ជាការសម្រេចត្រឹមត្រូវមួយ ដោយសារកិច្ចប្រជុំអាស៊ី-អឺរ៉ុប មានប្រទេសច្រើនរហូតដល់ជាង៥០ចូលរួម ស្របពេលដែលជំងឺកូវីដ១៩ មានការកើនឡើង។

លោកបញ្ជាក់ថា៖ «ការពន្យាពេលនឹងគឺជារឿងត្រឹមត្រូវ ក៏មានការគាំទ្រពីសមាជិក ASEM ផងដែរ ហើយយើងមានឱកាសក្នុងការពិភាក្សាបន្ថែម និងការប្រជុំផ្នែករដ្ឋមន្រ្តីការបរទេសផង អាចពិភាក្សានូវការស្តារសេដ្ឋកិច្ចឡើងវិញ បន្ទាប់ពីសម័យកូវីដ១៩ ដែលជាបញ្ហាធំ នៅពាក់កណ្តាលឆ្នាំក្រោយ»។

បើតាមការគ្រោងទុក កម្ពុជាគឺជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប ដែលគ្រោងនឹងប្រព្រឹត្តទៅនៅថ្ងៃទី១៦-១៧ ខែវិច្ឆិកា ឆ្នាំ២០២០ ក្រោមមូលបទ «ការពង្រឹងពហុភាគីនិយម ដើម្បីកំណើនរួមគ្នា»៕

ធនាគារអេស៊ីលីដា ហៅរបាយការណ៍របស់សង្គមស៊ីវិលអំពីបំណុលកម្មករ ថាជាការបង្កឲ្យមានចលាចល

ឱ ម៉េងហៀង(Ao Mengheang) — Sat, 04 Jul 2020 05:50:37 +0000

ធនាគារអេស៊ីលីដា នៅថ្ងៃសុក្រនេះ បានចេញសេចក្តីថ្លែងការណ៍មួយ ដោយបានហៅការចុះផ្សាយរបាយការណ៍របស់អង្គការសង្គមស៊ីវិលមួយក្រុមពាក់ព័ន្ធនឹង «ការជំពាក់បំណុលវ័ណ្ឌករបស់កម្មករក្នុងវិស័យកាត់ដេរ» ថាជា «ការបំភ្លៃ និងបង្កឲ្យមានចលាចលក្នុងសង្គម»។

សេចក្តីថ្លែងការណ៍របស់ធនាគារអេស៊ីលីដា ធ្វើឡើងបន្ទាប់ពីក្រុមសង្គមស៊ីវិល និងសហជីពមួយក្រុមនៅដើមសប្តាហ៍នេះ បានចេញផ្សាយរបាយការណ៍សិក្សាមួយឈ្មោះថា «ធ្វើការងាររហូតជំពាក់បំណុលវ័ណ្ឌក៖ ភាពជំពាក់បំណុលច្រើនលើសលុបក្នុងវិស័យកាត់ដេរនៅប្រទេសកម្ពុជា» ដោយបានរកឃើញថា កម្មករ-កម្មការិនីរាប់ម៉ឺននាក់កំពុងជួបការលំបាកខ្លាំងដោយសារតែបំណុល។

បើតាមសេចក្តីថ្លែងការណ៍របស់ធនាគារអេស៊ីលីដាលើកឡើងថា ស្ថាប័នសង្គមស៊ីវិល សហព័ន្ធសហជីពកម្ពុជា មជ្ឈមណ្ឌលសម្ព័ន្ធភាពការងារ និងសម្ព័ន្ធខ្មែរជំរឿន និងការពារសិទ្ធិមនុស្សលីកាដូ ថាកំពុងតែបំភ្លៃ និងបំភ័ន្តប្រជាពលរដ្ឋដែលកំពុងប្រើប្រាស់សេវាហិរញ្ញវត្ថុឲ្យមានការយល់ច្រឡំ និងបង្កឲ្យមានចលាចលក្នុងសង្គម។

សេចក្តីថ្លែងការណ៍របស់អេស៊ីលីដានោះបន្ថែមថា របាយការណ៍របស់អង្គការសង្គមស៊ីវិលទាំងនោះធ្វើឡើងដោយគ្មានមូលដ្ឋានត្រឹមត្រូវ ក្នុងចេតនាបង្ខូចកេរ្តិ៍ឈ្មោះធនាគារ និងស្ថាប័នមីក្រូហិរញ្ញវត្ថុ។ ធនាគារអេស៊ីលីដាក៏បានស្នើឲ្យអាជ្ញាធរចាត់វិធានការច្បាប់ ក្នុងករណីធ្វើឲ្យប៉ះពាល់ដល់វិស័យធនាគារ និងមីក្រូហិរញ្ញវត្ថុ។

សេចក្តីថ្លែងការណ៍របស់ធនាគារអេស៊ីលីដាបញ្ជាក់ថា៖ «សូមមេត្តាចាត់វិធានការច្បាប់ចំពោះជន ឬក្រុមទាំងឡាយណាដែលធ្វើឲ្យមានការរង្គោះរង្គើរ ជំរុញឲ្យមានផលប៉ះពាល់ដល់ស្ថិរភាពសេដ្ឋកិច្ចជាតិ ធ្វើឲ្យបាត់បង់នូវជំនឿទុកចិត្ត សុវត្ថិភាពដល់អ្នកដាក់ប្រាក់បញ្ញើក្នុងវិស័យធនាគារ និងហិរញ្ញវត្ថុទាំងមូល»។

Newsroom Cambodia បានព្យាយាមទាក់ទងទៅលោក អ៊ិន ចាន់នី នាយកប្រតិបត្ដិធនាគារ អេស៊ីលីដា ជាច្រើនដ តែលោកមិនទទួលទូរស័ព្ទ។

លោក អំ សំអាត នាយករងផ្នែកឃ្លាំមើលការរំលោភសិទិ្ធមនុស្សរបស់អង្គការលីកាដូមានប្រសាសន៍ថា របាយការណ៍ដែលចេញដោយក្រុមសង្គមស៊ីវិល និងសហជីព គឺបានសម្ភាសន៍ និងស្រាវជ្រាវលើកម្មករចំនួន១៦២នាក់ក្នុងរោងចក្រដែលត្រូវបានភ្ជួរការងារចំនួន៣ គឺនៅខេត្តកំពង់ឆ្នាំង និងនៅភ្នំពេញ ហើយការស្រាវជ្រាវនោះគឺផ្តោតលើការរស់នៅរបស់កម្មករក្រោយពីបានភ្ជួរការងារ។ លោកបន្តថា ជាលទ្ធផល មនុស្ស១៥៨នាក់បានឆ្លើយថា ពួកគេបានជំពាក់បំណុលធនាគារខាងហិរញ្ញវត្ថុ និងបំណុលផ្សេងៗ ដោយមានការបារម្ភថា ក្នុងកាលៈទេសៈត្រូវបានព្យួរការងារនេះពួកគេមិនមានលទ្ធភាពក្នុងការសងត្រលប់ទៅវិញ»។

លោកបញ្ជាក់ថា៖ «អីចឹងអ្វីដែលគាត់ (កម្មករ) គិតទៅថ្ងៃក្រោយ ពួកគាត់គិតថា ទីមួយគឺគាត់អាចប្រឈមមុខក្នុងការលក់ដីយកទៅសងគេ ទីពីរអាចកាត់បន្ថយរបបអាហារហូបចុក ហើយទីបីអាចខ្ចីពីកន្លែងផ្សេងទៅសង។ នេះជាកង្វល់របស់គាត់»។

លោក អំ សំអាត បន្ថែមថា ការស្ទង់មតិនេះធ្វើឡើងក្នុងគោលបំណងដើម្បីឲ្យស្ថាប័នដែលពាក់ព័ន្ធរកវិធានការ ឬការផ្សព្វផ្សាយយ៉ាងណាដើម្បីជួយសម្របសម្រួលដល់ក្រុមកម្មករទាំងនោះ។

លោកបញ្ជាក់ថា៖ «ព្រោះកន្លងមកគោលនយោបាយរបស់រដ្ឋាភិបាលបានចេញ ថាធ្វើយ៉ាងណាសុំឲ្យស្ថាប័នមីក្រូហិរញ្ញវត្ថុហ្នឹងជួយសម្របសម្រួល និងបន្ធូរបន្ថយទៅលើការព្យួរនៃការសង៣ខែ ត្រូវសងទាំងការ ឬដើម និងនីតិវិធីផ្សេងៗទៀត»។

ចំណែកលោក ឃុន ថារ៉ូ មន្ត្រីសម្របសម្រួលការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស សង់ត្រាល់ លើកឡើងថា របាយការណ៍នៃការសិក្សាស្រាវជ្រាវនេះ មិនតំណាងឲ្យតួលេខរបស់អតិថិជនគ្រឹះស្ថានមីក្រូហិរញ្ញវត្ថុ ដែលមានប្រមាណជាជាង២លាន៦សែននាក់ និងមិនតំណាងឲ្យកម្មករនិយោជិត ដែលធ្វើការងារក្នុងវិស័យរោងចក្រកាត់ដេរជាង៨០ម៉ឺននាក់នោះទេ។ លោកបន្តថា ក្រុមសង្គមស៊ីវិល និងសហជីពបានសម្ភាសន៍កម្មករ កម្មការិនីរោងចក្រកាត់ដេរជាង១៦០នាក់ ដែលទទួលរងផលប៉ះពាល់ដល់ស្ថានភាពសេដ្ឋកិច្ច ទាក់ទងនឹងសិទ្ធិរបស់ពួកគេ នៅពេលដែលរោងចក្រព្យួរការងារ។

លោកបញ្ជាក់ថា៖ «យើងមិនមានចេតនាណាមួយដើម្បីទៅធ្វើការញុះញង់ បង្កឲ្យមានការប៉ះពាល់ដល់កេរ្តិ៍ឈ្មោះ កិត្តិយសរបស់អេស៊ីលីដា ឬក៏បណ្តាគ្រឹះស្ថានមីក្រូហិរញ្ញវត្ថុ នៅក្នុងប្រទេសកម្ពុជាដែរ។ ការសិក្សានេះបង្ហាញអំពីទិដ្ឋភាពជាក់ស្តែង បញ្ហាប្រឈមដែលកម្មករនិយោជិតគាត់បាត់បង់នូវប្រាក់ចំណូល គាត់មិនមានលទ្ធភាពក្នុងការបង់ទៅធនាគារ»។

គិតត្រឹមដំណាច់ខែឧសភានេះ រោងចក្រសហគ្រាសក្នុងវិស័យវាយនភណ្ឌចំនួន២៦៣ កំពុងបិទផ្អាកដំណើរការ និងមានកម្មករប្រមាណជា១៣៥.០០០នាក់ កំពុងរងផលប៉ះពាល់ដោយត្រូវព្យួរការងារ ដោយសារមិនមានការបញ្ជាទិញ ពាក់ព័ន្ធនឹងការរីករាលដាលជំងឺកូវីដ១៩ លើពិផពលោក។ នេះបើតាមតាមតួលេខរបស់ក្រសួងការងារ៕

ក្រសួងកសិកម្មកំពុងស្វែងរកទីផ្សារមៀនប៉ៃលិននៅប្រទេសចិន ខណៈអ្នកដាំត្អូញត្អែរពីតម្លៃ

ឱ ម៉េងហៀង(Ao Mengheang) — Tue, 30 Jun 2020 09:52:22 +0000

រដ្ឋមន្រ្តីក្រសួងកសិកម្មកម្ពុជាបញ្ជាក់ថា ក្រសួងកំពុងសិក្សារកទីផ្សារមៀនប៉ៃលិននៅប្រទេសចិន ខណៈអ្នកដាំមួយចំនួនត្អូញត្អែរថា មៀនប៉ៃលិនដែលពួកគេកំពុងដាំមានតម្លៃថោក។

កញ្ញា ថោង កន្និកា កសិករដាំផ្លែមៀនប៉ៃលិន (តាង៉ែន) នៅខេត្តបាត់ដំបង លើកឡើងកាលពីថ្ងៃទី២៤ ខែមិថុន ថា ទីផ្សារមៀនប៉ៃលិនត្រូវបានឈ្មួញកណ្តាលជាអ្នកកំណត់ ដោយជាទូទៅមួយគីឡូតម្លៃ៣,០០០រៀល។ ប៉ុន្តែសម្រាប់ពេលធ្លាក់ថ្លៃ ឈ្មួញកណ្តាលកំណត់ត្រឹមតែ២,០០០ ទៅ២,៥០០រៀលប៉ុណ្ណោះ ក្នុងមួយគីឡូ។

កញ្ញាបន្ថែមថា ការថែរទាំមៀនប៉ៃលិន (តាង៉ែន) នេះ មានផលលំបាកណាស់ ដោយសារត្រូវការការថែរទាំខ្លាំង ចំណែកទីផ្សារបច្ចុប្បន្នភាគច្រើនគឺនៅប្រទេសថៃ។ កញ្ញាថា ការនាំចេញប្រទេសថៃ គឺគេបេះយកមៀនដែលល្អៗ ដូចជាមានលេខ១ និង២។ ចំណែកមៀនដែលមិនសូវល្អ គឺយើងលក់នៅខ្មែរ។

កញ្ញាបញ្ជាក់ថា៖ «ក្នុង១ពាន់ដើម យើងត្រូវបេះបាន៥០តោន អីចឹងគេបេះយកតែ២០តោនទេដែលល្អ អីចឹងក្នុងអាផ្សេងនឹងដែលយើងវៃចូលទៅខ្មែរនឹង គឺវាអត់បានដូចតម្លៃប៉ុណ្ណឹងទេ។ យើងមានអារបស់បែកៗចូលទៅខ្មែរ គឺយើងបានតែតម្លៃ១០០០រៀលជាងអីទេ អីចឹងបើកសិករយើងបានតម្លៃក្នុង ៣០០០រៀលស្មើទាំងអស់អីចឹង ទាំងនាំចេញ នាំចូលទៅថៃ អាចបានតម្លៃខ្ពស់ជាងនឹង អាចធ្វើទៅវាចំណេញ»។

កញ្ញា ថោង កន្និកា បន្ថែមថា កញ្ញា និងអ្នកដាំផ្សេងទៀត ស្នើសុំឲ្យមានការកំណត់តម្លៃឲ្យបានសមរម្យ កុំឲ្យឈ្មួញកណ្តាលចេះតែកំណត់ថ្លៃស្រេចតែចិត្ត។ ហើយថា ប្រសិនបើមានទីផ្សារនៅប្រទេសចិន កញ្ញាស្នើសុំតម្លៃត្រឹម៣,៥០០រៀលឡើង។

ចំណែកអ្នកដាំមៀនប៉ៃលិនម្នាក់ទៀតនៅខេត្តប៉ៃលិន លោក អ៊ិន អាហ្សា ថ្លែងថា ការលក់ផ្លែមៀនប៉ៃលិនទៅកាន់សហគមន៍នាំទៅប្រទេសថៃ ក្នុង១គីឡូក្រាម តម្លៃ២៨ ទៅ៣០បាត ឬស្មើនឹងប្រមាណជា៣,៥០០រៀល។ លោកបន្តថា មៀនប៉ៃលិនត្រូវការការថែរទាំខ្ពស់ដើម្បីឲ្យមានពណ៌ស្អាត ត្រូវតាមស្តង់ដារទើបឈ្មួញកណ្តាលទិញយក។

លោកបញ្ជាក់ថា៖ «ចំពោះផ្លែមៀនប៉ៃលិនដែលមានដងស្មៅ ឬក៏មានចៃ ហើយវាមិនសូវមូល គឺគេអត់ដែរបង។ ហើយតម្លៃ២០ទៅ៣០បាត គឺវាអាចម៉ាទប់ទល់ បើបានតម្លៃខ្ពស់ ប្រជាកសិករអរចឹងទៅ។ បើវាខុសខ្នាត យើងត្រូវលក់ក្នុងតម្លៃផ្សេង មៀននឹងបានត្រឹមមួយគីឡូ១ពាន់លុយខ្មែរអីចឹងទៅ»។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍កាលពីថ្ងៃទី២៥ ខែមិថុនា ថា កន្លងទៅពាក់ព័ន្ធនឹងផ្លែឈើទាំងអស់ ក្រសួងបាននាំចេញទៅក្រៅប្រទេសជាបន្តបន្ទាប់។ លោកបន្តថា សម្រាប់ការនាំចេញទៅប្រទេសចិន កម្ពុជាបានទទួលការគាំទ្រ ចេក ស្វាយ ដែលនឹងត្រៀមនឹងនាំចេញទៅចិននៅពេលខាងមុខ បន្ទាប់មកនឹងមានការនាំចេញមៀនប៉ៃលិន (តាង៉ែន) ម្រេច ផ្លែស្រកានាគ និងម្នាស់ជាដើម។

លោកបញ្ជាក់ថា៖ «ក្រៅពីប្រទេសចិន គឺយើងនាំចេញធម្មតា អត់បញ្ហាអីទេ។ ចំពោះតម្លៃផ្លែមៀនប៉ៃលិន (តាង៉ែន) ទៅកាន់ប្រទេសចិន គឺយើងកំពុងធ្វើរឿងនេះជាមួយប្រទេសចិន»។

ក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅបន្ដរបស់រដ្ឋបាលខេត្តប៉ៃលិន» កាលពីថ្ងៃទី២០ ខែឧសភា អភិបាលរងខេត្តប៉ៃលិន លោក ធូ ភា លើកឡើងថា មៀនប៉ៃលិន ឬតាង៉ែន ក្នុងខេត្តប៉ៃលិនផ្ទាល់ដែលបាននាំចេញទៅប្រទេសថៃ គឺមានចំនួនពី៥,៥០០តោន ទៅ៦,០០០តោន ក្នុងមួយឆ្នាំ។ លោកបន្ថែមថា តាមការគ្រោងទុក ផ្លែមៀនប៉ៃលិនបម្រុងនឹងនាំចេញទៅប្រទេសចិន កាលពីពេលកន្លងទៅ ប៉ុន្ដែលោកថា ដោយសារការផ្ទុះឡើងនូវជំងឺកូវីដ១៩ ទើបផែនការនេះត្រូវបានខកខាន៕

កម្មករកាត់ដេរជាង៥០នាក់តវ៉ានៅមុខក្រសួងការងារទាមទារឲ្យរោងចក្របើកប្រាក់ខែ

ឱ ម៉េងហៀង(Ao Mengheang) — Tue, 30 Jun 2020 02:10:49 +0000

កម្មកររោងចក្រ ញូបេស គ្លូបល ថេកស្តាយ ក្នុងខេត្តកំពង់ស្ពឺជាង៥០នាក់ នៅថ្ងៃចន្ទនេះ បានតវ៉ានៅមុខក្រសួងការងារ ទាមទារឲ្យមានការដោះស្រាយ ក្រោយថៅកែមិនបើកប្រាក់ខែឲ្យកម្មករអស់ជាងបួនខែ។

អ្នកស្រី ង៉ែត ស្រីណាក់ តំណាងកម្មករលើកឡើងថា ក្រុមកម្មករមកក្រសួងការងារដើម្បីដាក់ញត្តិទៅក្រសួង សុំអន្តរាគមន៍ឲ្យថៅកែរោងចក្រ ញូបេស គ្លូបល ថេកស្តាយ បើកប្រាក់ខែ និងប្រាក់លើកទឹកចិត្តផ្សេងៗ ដល់កម្មករសរុបចំនួន៦៦៣នាក់ ឲ្យបានឆាប់រហ័ស បន្ទាប់ពីក្រុមហ៊ុននេះបានផ្អាកការងារកម្មករ និងមិនបើកប្រាក់ខែឲ្យ តាំងថ្ងៃទី១០ ខែកុម្ភៈ មក។ អ្នកស្រីបន្តថា ក្នុងរយៈពេលជាង៤ខែមកនេះ កម្មករទាំងអស់បានដាក់ពាក្យប្តឹងទៅកាន់មន្ទីរការងារខេត្តកំពង់ស្ពឺ និងធ្លាប់បានដាក់ពាក្យបណ្តឹងមកក្រសួងការងារ២ដងរួចមកហើយ ប៉ុន្តែមិនមានការឆ្លើយតប។

តំណាងកម្មកររូបនេះបន្ថែមថា បើទោះបីរដ្ឋាភិបាល និងក្រសួងសុខាភិបាលប្រកាសមិនឲ្យជួបជុំគ្នាច្រើនដើម្បីចូលរួមការពារជំងឺកូវីដ១៩ ប៉ុន្តែអ្នកស្រីថា ដោយសារជីវភាព កម្មករជាង៥០នាក់នេះបានបង្ខំចិត្តមកជុំគ្នាដើម្បីតវ៉ារកដំណោះស្រាយ។

អ្នកស្រីបញ្ជាក់ថា៖ «ពួកខ្ញុំអត់ចង់ជុំគ្នាទេ ប៉ុន្តែដោយសារតែពួកខ្ញុំទាល់ អស់ជម្រើស ហើយពួកខ្ញុំមកនេះពួកខ្ញុំជិះឡានឈ្នួលមកទម្រាំមកដល់ទីនេះ ពួកខ្ញុំត្រូវចំណាយលុយជិះឡានឈ្នួល ទោះបីជាពួកខ្ញុំអត់មានលុយ ក្នុងការទិញម្ហូបហូប ប៉ុន្តែខ្ញុំរកដំណោះស្រាយដើម្បីខ្ចីលុយគេ ដើម្បីឲ្យបានជិះឡានឈ្នួលមកដល់ក្រសួងការងារនេះ»។

ចំណែកអ្នកស្រី រ៉ុម ចាន់ណា កម្មការិនីកាត់ដេរនៅរោងចក្រ ញូបេស គ្លូបល ថេកស្តាយ លើកឡើងដែរថា ក្នុងរយៈពេលជាងបួនខែដែលរោងចក្រនេះផ្អាកដំណើរការ អ្នកស្រីមិនបានបំពេញការងារកន្លែងផ្សេងទេ ដោយសាររោងចក្រផ្សេងទៀតក៏ផ្អាកការងារបណ្តោះអាសន្នដូចគ្នា។ កម្មការិនីកាត់ដេររូបនេះបន្តថា ក្នុងអំឡុងពេលដែលរោងចក្រផ្អាកការងារ ព្រមទាំងមិនបើកប្រាក់ខែឲ្យ កម្មករមានការប្រឈមយ៉ាងខ្លាំងទាក់ទងនឹងជីវភាព និងការបង់សងធនាគារ។

អ្នកស្រីនិយាយថា៖ «ខ្ញុំសំណូមពរដល់សម្តេច ជួយពួកខ្ញុំផង ព្រោះពួកខ្ញុំទាល់ខ្លាំងណាស់ អត់មានលុយបង់ធនាគារ បង់ថ្លៃផ្ទះ ថ្លៃភ្លើង ទឹកដោះគោកូន។ អ្នកខ្លះគ្នាសម្រាលកូនក៏អត់មានបានលុយ […] ពិបាកជាងគេគឺធនាគារ រោងចក្របិទ ម៉េចគេដឹងតែមកយក ដល់ខែដឹងតែគាត់មកយកពួកខ្ញុំហើយ»។

ក្រោយការតវ៉ាប៉ុន្មានម៉ោង តំណាងខាងក្រសួងការងារបានចេញមកយកញត្តិពីក្រុមកម្មករ។

លោក និន វណ្ណៈ អគ្គលេខាធិការងក្រសួងការងារមានប្រសាសន៍ថា ក្រសួងនឹងរៀបចំផែនការដោះស្រាយជូនកម្មករនៅថ្ងៃពុធ ទី០១ ខែកក្កដា ខាងមុខនេះ ហើយលោកសំណូមពរឲ្យកម្មករទាំងអស់រងចាំការដោះស្រាយពីក្រសួង។

លោកថា៖ «សូមឲ្យបងប្អូនរក្សាភាពស្ងៀមស្ងាត់ រង់ចាំការដោះស្រាយ»។

លោក ឃុន ថារ៉ូ អ្នកគ្រប់គ្រងកម្មវិធីការងារនៃអង្គការសង់ត្រាល់ លើកឡើងថា ក្រុមហ៊ុនរោងចក្រ ញូបេស គ្លូបល ថេកស្តាយ បិទដោយមិនបានផ្តល់ដំណឹងទៅតាមផ្លូវច្បាប់ ហើយមកទល់ពេលនេះក្រសួងមិនទាន់បានបញ្ជូនសំណុំរឿងរបស់កម្មករទៅកាន់ក្រុមប្រឹក្សាអាជ្ញាកណ្តាលនៅឡើយទេ។

លោកបញ្ជាក់ថា៖ «មកដល់ពេលនេះសំណុំរឿងរក្សា និងការពារទ្រព្យសម្បត្តិបានចេញពីតុលាការហើយ ខណៈការអនុវត្តច្បាប់នៃការរក្សា និងការពារទ្រព្យសម្បត្តិមិនមានប្រសិទ្ធភាព ដែលធ្វើឲ្យម្ចាស់ក្រុមហ៊ុន និងម្ចាស់អគារយកសម្ភារៈចេញក្រៅបាន ហើយប្រសិនបើក្រសួងនៅតែអូសបន្លាយពេលទៀត សម្ភារៈនឹងត្រូវយកចេញអស់ជាមិនខាន»។

លោក ឃុន ថារ៉ូ បន្ថែមថា ប្រសិនបើប្រធានក្រុមហ៊ុនមិនចូលរួមដោះស្រាយទៅតាមផ្លូវច្បាប់ទេ នោះគួរតែមានការយកសម្ភារៈក្នុងរោងចក្រដើម្បីលក់ទូទាត់ជូនកម្មករ ប៉ុន្តែផ្ទុយទៅវិញម្ចាស់រោងចក្របានជញ្ជូនសម្ភារៈចេញជាបន្តបន្ទាប់។

លោកថា៖ «មានតែឲ្យអាជ្ញាធរ ឲ្យក្រសួងហ្នឹងទេដែលចាត់វិធានការឲ្យបានលឿន ដោះស្រាយដល់ពួកគាត់ […] ហើយបើមិនមានដំណោះស្រាយ គាត់មានជម្រើសអីក្រៅពីបន្តការតវ៉ា»។

បើតាមលោក ឃុន ថារ៉ូ ការតវ៉ារបស់កម្មករទាមទារប្រាក់ខែ និងប្រាក់រង្វាន់ផ្សេងៗនេះ ធ្វើឡើងជាច្រើនលើកច្រើនសារមកហើយ តាំងពីខែមិនាមក ហើយមកទល់ពេលនេះពុំទាន់មានដំណោះស្រាយណាមួយសមស្របសម្រាប់ពួកគាត់នៅឡើយ៕

រយៈពេល៥ខែ ឆ្នាំ២០២០ អាជ្ញាធរបង្ក្រាបគ្រឿងញៀនបានជាង៤ពាន់ករណី

ឱ ម៉េងហៀង(Ao Mengheang) — Fri, 26 Jun 2020 11:46:17 +0000

អាជ្ញាធរបង្ក្រាបបទល្មើសគ្រឿងញៀនបានជាង៤,០០០ករណី ក្នុងរយៈពេល៥ខែដំបូង នៅដើមឆ្នាំ២០២០ ដោយចំនួននេះកើនឡើងជិត១២០០ករណី បើប្រៀបធៀបនឹងរយះពេលដូចគ្នាក្នុងឆ្នាំ២០១៩។ នេះបើតាមបញ្ជាក់របស់ប្រធានអាជ្ញាធរជាតិប្រយុទ្ធប្រឆាំងគ្រឿងញៀន។

ថ្លែងក្នុងកម្មវិធីទិវាអន្តរជាតិប្រយុទ្ធប្រឆាំងគ្រឿងញៀន នៅថ្ងៃទី២៦ ខែមិថុនា ឆ្នាំ២០២០នេះ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនលើកឡើងថា ក្នុងរយៈពេល៥ខែ នៃឆ្នាំ២០២០ អាជ្ញាធរជាតិប្រយុទ្ធប្រឆាំងគ្រឿងញៀន បានបង្រ្កាបបទល្មើសគ្រឿងញៀនចំនួន៤,៥១០ករណី ខណៈដែលឆ្នាំ២០១៩ មានតែ៣,៣៣៥ករណី បើគិតជាភាគរយកើនឡើងប្រមាណជា២៦ភាគរយ។

លោកបន្តថា ការបង្រ្កាបនេះគឺជាការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៥ ដោយគិតចាប់ពីថ្ងៃទី០១ ខែមករា រហូតដល់ថ្ងៃទី៣១ ខែឧសភា ឆ្នាំ២០២០នេះ។ លោកបន្ថែមថា អាជ្ញាធរបានឃាត់ខ្លួនជនសង្ស័យចំនួន៨,៩២៧នាក់ ក្នុងនោះមានស្រី ៥៦១នាក់ និងរឹបអូសគ្រឿងញៀនបានជាង២០៩គីឡូក្រាម និងមានសម្ភារៈដូចជា រថយន្ត៥០គ្រឿង ម៉ូតូ១,១៨៣គ្រឿង ទូរស័ព្ទដៃ៣៤,៤៩៩គ្រឿង និងប្រាក់រៀលជាង៨៥លានរៀល ប្រាក់ដុល្លារអាមេរិក៥៣,៤៦៩ដុល្លារ។

ក្នុងពិធីប្រារព្ធទិវាអន្តរជាតិប្រយុទ្ធប្រឆាំងគ្រឿងញៀននៅដថ្ងៃសុក្រនេះ អាជ្ញាធរគ្រឿងញៀនបានដុតកម្ទេចគ្រឿងញៀនដែលរឹបអូសបានចំនួន៥០០គីឡូក្រាម នៅកោះពេជ្រ រាជធានីភ្នំពេញផងដែរ។

បើតាមលោក កែ គឹមយ៉ាន គ្រឿងញៀនដែលបានដុតកម្ទេចចោលនេះមានចំនួន៥០០គីឡូក្រាម គឺបានមកពីការបង្ក្រាបនៅរាជធានីភ្នំពេញ ខេត្តកណ្តាល តាកែវ និងកំពង់ស្ពឺ ហើយយុទ្ធនាការនេះនឹងនៅតែបន្តនៅតាមបណ្តាខេត្តផ្សេងៗបន្ថែមទៀត។

លោកបញ្ជាក់ថា៖ «រដ្ឋាភិបាលមិនបានមើលងាយគ្រឿងញៀនទេ យើងគ្រាន់តែមើលបញ្ជាការយុទ្ធនាការ ឥឡូវ៥លើកហើយ វាអត់លុបទេ តាមពិតមានអាជ្ញាធរគ្រឿងញៀន មានស្ថាប័នប៉ូលីសហើយ គួរតែមិនបាច់ ប៉ុន្តែយើងអត់លុបទេ»។

លោកបន្ថែមថា៖ «គ្រឿងញៀន ខ្ញុំថាមិនងាយនឹងចប់ ដោយសារអី? ប្រទេសយើងមិនមែនអ្នកផលិតគ្រឿងញៀនទេ…គ្រឿងញៀនឥឡូវមិនបាច់ទៅដាំទេ គេយកតែគីមីយកមកផ្សំ វាកើតគ្រឿងញៀនលក់ភ្លាម»។

លោក អំ សំអាត ជានាយករងផ្នែកទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ មានប្រសាសន៍ថា បច្ចុប្បន្នជនរងគ្រោះដោយសារគ្រឿងញៀនកើនឡើង ជាពិសេសនៅជនបទ។ លោកបន្តថា ដើម្បីកាត់បន្ថយគ្រឿងញៀន គឺត្រូវមានការចូលរួមពីគ្រប់ភាគីពាក់ព័ន្ធទាំងអស់ ដែលរួមមានប្រជាពលរដ្ឋ និងមន្ត្រីសង្គមស៊ីវិល។

លោក អំ សំអាត ក៏បានសំណូមពរឲ្យរដ្ឋាភិបាល និងអាជ្ញាធរពាក់ព័ន្ធបន្ថែមការទប់ស្កាត់ទៅលើការនាំចូល និងការត្រួតពិនិត្យផ្សេងៗ ជាពិសេសអាជ្ញាធរពាក់ព័ន្ធនិងមិនពាក់ព័ន្ធ សូមនៅឲ្យឆ្ងាយពីគ្រឿងញៀន។

លោកបញ្ជាក់ថា៖« ដើម្បីឲ្យមានប្រសិទ្ធភាព ទោះបីជាអ្នកដែលពាក់ព័ន្ធនឹងគ្រឿងញៀនហ្នឹងមានឋារន្តរស័ក ឬក៏ឋានៈធំប៉ុណ្ណាក៏ដោយឲ្យតែមានពាក់ព័ន្ធនឹងគ្រឿងញៀន យើងត្រូវតែបង្ក្រាប»។ នៅថ្ងៃសុក្រនេះដែរ លោកនាយករដ្ឋមន្ត្រី ហ៊ុន សែន ក៏បានបង្ហោះសារនៅលើទំព័រហ្វេសប៊ុករបស់លោក ជាការអបអរការរៀបចំប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន។ លោកបញ្ជាក់ថា ទិវានេះជាស្មារតីបានកំណត់ឡើងដោយមហាសន្និបាតអង្គការសហប្រជាជាតិកាលពីឆ្នាំ១៩៨៧ និងត្រូវបានរៀបចំឡើងជារៀងរាល់ឆ្នាំក្រោមប្រធានបទផ្សេងៗ ដើម្បីដាស់តឿនដល់ជនគ្រប់រូបឲ្យយកចិត្តទុកដាក់ និងចូលរួមឲ្យកាន់តែសកម្មក្នុងការទប់ស្កាត់ បង្ក្រាប និងដោះស្រាយបញ្ហាដែលពាក់ព័ន្ធនឹងគ្រឿងញៀន៕

វៀតណាមឆ្លើយតបលិខិតអន្តរាគមន៍របស់សមាគមខ្មែរកម្ពុជាក្រោមលើកដំបូង ពាក់ព័ន្ធជម្លោះដីស្រែ

ឱ ម៉េងហៀង(Ao Mengheang) — Mon, 08 Jun 2020 03:08:46 +0000

សមាគមខ្មែរកម្ពុជាក្រោមប្រចាំនៅប្រទេសកម្ពុជា បានអះអាងថា រដ្ឋាភិបាលវៀតណាមបានឆ្លើយតបជាលើកដំបូងពាក់ព័ន្ធទៅនិងសំណើរបស់ខ្លួនដែលស្នើប្រគល់ដីស្រែចំនួន៣០០០ហិកតាជូនពលរដ្ឋខ្មែរកម្ពុជាក្រោម ស្ថិតក្នុងខេត្តក្រមួនសរ ដែលមានហិង្សាកើតឡើងកាលពីដើមខែឧសភា។

រដ្ឋាភិបាលវៀតណាមបានឆ្លើយតបសំណើអន្តរាគមន៍របស់សមាគមខ្មែរកម្ពុជាក្រោម កាលពីចុងខែឧសភា តាមរយៈប្រៃសណីយ៍ ដែលសមាគមនេះ បានស្នើឲ្យដោះស្រាយបញ្ហាជម្លោះដីធ្លីជាមួយពលរដ្ឋ១៤៥គ្រួសារ ក្នុងភូមិប៉ប្រក់ ឃុំប៉ប្រ៉ក ស្រុកព្រៃមេង។

អគ្គលេខាធិការសមាគមខ្មែរកម្ពុជាក្រោម ដើម្បីសិទ្ធិមនុស្ស និងការអភិវឌ្ឍន៏ លោក សឺន ជុំជួន បានមានប្រសាសន៍ថា លេខាធិការដ្ឋានអង្គការ សមាគមខ្មែរកម្ពុជាក្រោម ដែលមានសមាជិក១១ ប្រចាំប្រទេសកម្ពុជា បានដាក់លិខិតទៅកាន់ នាយករដ្ឋមន្ត្រីវៀតណាម កាលពីថ្ងៃទី១៨ ឧសភា ឆ្នាំ២០២០ ដើម្បីជួយអន្តរាគមន៍ បន្ទាប់ពីសមត្ថកិច្ចវៀតណាមបានប្រើហិង្សា និងរឹបអូសយកដីស្រែពលរដ្ឋខ្មែរក្រោម។ នៅក្នុងអំពើហិង្សានោះបានធ្វើឲ្យប្រជាពលរដ្ឋជាង១០នាក់រងរបួស។

លោកថា ជម្លោះដីធ្លីនេះកើតឡើងតាំងពីឆ្នាំ២០០០ ប៉ុន្តែពុំទាន់មានដំណោះស្រាយនោះទេ។ សមាគនខ្មែរកម្ពុជាក្រោមបានដាក់លិខិតអន្តរាគន៍ជាច្រើនដង ប៉ុន្តែពុំមានការឆ្លើយតបនោះទេ។ នេះជាលើកទីមួយហើយ ដែលភាគីវៀតណាមបានឆ្លើយតបលិខិតអន្តរាគមន៍ ប៉ុន្តែមិនបានបញ្ជាក់ថានឹងជួយដោះស្រាយពេលណានោះទេ។

លោក ជុំជួន មានប្រសាសន៍ថា៖ «រឿងនេះខាងវៀតណាមបានទទួលញ្ញត្តិរបស់សមាគម

ហើយប៉ុន្តែមិនទាន់បានមកជួយដោះស្រាយនៅឡើយទេ»។

យោងតាមពាក្យបណ្តឹងរបស់លោក ទៀម ស៊ីមជាតំណាងប្រជាពលរដ្ឋ ទាំង១៤៥គ្រួសារ ដែលបានផ្ញើជូន លោកនាយករដ្ឋមន្រ្តីវៀតណាម បានរៀបរាប់ថា រូបគាត់ និងប្រជាពលរដ្ឋដទៃទៀតបាន កាប់ឆ្ការដីធ្វើស្រែនៅតំបន់នោះតាំងពីឆ្នាំ១៩៨២។

នៅក្នុងពាក្យបណ្តឹងនោះបានបន្តទៀតថា ប្រជាពលរដ្ឋរស់នៅទីនោះគឺពឹងផ្អែកលើការធ្វើស្រែចម្ការជាប្រភពចំណូល សម្រាប់ជីវភាពប្រចាំថ្ងៃ និងផ្គត់ផ្គង់ការសិក្សាកូនៗរបស់ពួកគាត់។ នៅពេលដែលបញ្ហានេះនៅអូសបន្លាយពេលវេលាកាន់តែយូរពួកគាត់ពុំមានលទ្ធភាពគ្រប់គ្រាន់ក្នុងការផ្គត់ផ្គង់ជីវភាពគ្រួសារនោះទេ។

មន្ត្រីស្ថានទូតវៀតណាមប្រចាំប្រទេសកម្ពុជា មិនអាចទាក់ទងដើម្បីធ្វើការអត្ថាធិប្បាយបាននោះទេ។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជាលោក កុយ គួងបានបញ្ជាក់តាមតេលេក្រាមយ៉ាងខ្លីថា កម្ពុជាមិនជ្រៀតជ្រែកកិច្ចការផ្ទៃក្នុងវៀតណាម នោះទេ។

លោក កុយ គួង សរសេរថា៖«រឿងរ៉ាវនេះកើតនៅក្នុងដែនដីរបស់វៀតណាមគឺជាកិច្ចការផ្ទៃក្នុងរបស់វៀតណាម»។

នាយិកាមជ្ឈមណ្ឌលសិទ្ធិមនុស្សកម្ពុជា (CCHR) លោកស្រី ចក់ សុភាព ក៏បានលើកឡើងដែរថាករណីនេះគឺជាករណីមួយប៉ុណ្ណោះក្នុងចំណោមករណីជាច្រើនដែលខាង CCHR ទទួលបានរបាយការណ៍ជាច្រើន ពាក់ព័ន្ធនិងការរឹតត្បិត និងការបំពានសិទ្ធិទៅលើពលរដ្ឋខ្មែកម្ពុជាក្រោមពីសំណាក់អាជ្ញាធរវៀតណាម។ លោកស្រីថា មិនត្រឹមតែអាជ្ញាធរវៀតណាមនោះទេ ដែលរឹតត្បិតសិទ្ធិសេរីភាពរបស់ពួកគេ សូម្បីតែអាជា្ញធរនៃប្រទេសកំណើតរបស់ខ្លួន ក៏មានការឹតត្បិត និងការរើសអើងផងដែរ។

អ្នកស្រីចក់ សុភាព៖ «យើងមើលទៅពួកគាត់ស្ថិតនៅចន្លោះមួយដែលរស់នៅប្រទេសវៀតណាមត្រូវបានគេរើសអើងត្រូវបានគេបំពានដោយសារគេមើលឃើញពួកគាត់ជាប្រជាពលរដ្ឋខ្មែរ។ ប៉ុន្តែនៅពេលដែលមកប្រទេសខ្មែរគាត់ត្រូវបានប្រឈមនូវការរឹតត្បិត រឺក៏ការរើសអើងផងដែរ។ អញ្ចឹងជារឿងលំបាកមែនទែន»។

កាលពីថ្ងៃទី៥ខែឧសភាឆ្នាំ២០២០ ពលរដ្ឋខ្មែរក្រោមដែលរស់នៅ ខេត្តក្រមួនសរត្រូវបានអាជ្ញាធរនិងកងកម្លាំងនគរបាលវៀតណាមជិត១០០នាក់ ប្រដាប់ដោយអាវុធ ខែល ដំបងឆក់បានរារាំងនិងបោកគ្រាប់បែកផ្សែង៣គ្រាប់បណ្តាលឲ្យប្រជាពលរដ្ឋខ្មែរក្រោមរងរបួសធ្ងន់និងស្រាល១០នាក់។

យោងតាមការផ្សាយរបស់VOD បានឲ្យដឹងថា នៅថ្ងៃទី៣ ខែមិថុនា ឆ្នាំ២០២០ សមគមនខ្មែរកម្ពុជាក្រោម នៅទីក្រុងភ្នំពេញ បានប្រារព្ធពិធីរំលឹកការបាត់បង់ទឹកដីខ្មែរកម្ពុជាក្រោមទី៧១ឆ្នាំ (៤មិថុនា ឆ្នាំ១៩៤៩ -៤មិថុនា ឆ្នាំ២០២០)។