ជា សុខនី (Chea Sokny) – Newsroom Cambodia

បណ្ដាញសង្គមបង្កើនឥទ្ធិពលទិវានៃក្ដីស្រលាញ់លើយុវជន

ជា សុខនី (Chea Sokny) — Sat, 13 Feb 2021 02:02:49 +0000

ទិវានៃក្ដីស្រលាញ់ ឬជាភាសាអង់គ្លេសហៅថា វ៉ាឡិនថាញដេយ (Valentine’s Day) ជាទិវាដែលត្រូវបានគេទទួលស្គាល់តាមបណ្តាប្រទេសជាច្រើនក្នុងពិភពលោក ក្នុងនោះយុវជនខ្មែរមួយចំនួននៅកម្ពុជាក៏បានប្រារព្ធទិវានេះផងដែរ។

យុវជននៅកម្ពុជាមួយចំនួនយល់ច្រឡំទិវានៃក្ដីស្រលាញ់ ថ្ងៃទី១៤ កុម្ភៈ ថាជាថ្ងៃបុណ្យសង្សារ ដែលនាំឲ្យមានការលើកឡើងថា ពួកគេជ្រើសយកការរួមភេទជាមួយដៃគូក្នុងថ្ងៃនោះផងដែរ។

កាលពីថ្ងៃទី០៨ ខែកុម្ភៈ ឆ្នាំ២០២១ មួយសប្តាហ៍មុនពេលដែលទិវានៃក្តីស្រលាញ់នេះចូលមកដល់ ក្រសួងអប់រំ យុវជន និងកីឡា បានចេញសេចក្ដីណែនាំអំពីវិធានការទប់ស្កាត់ភាពមិនប្រក្រតីក្នុងទិវានៃក្ដីស្រលាញ់នៅតាមគ្រឹះស្ថានសិក្សាសាធារណៈ និងឯកជន។ ក្នុងនោះក្រសួងអប់រំបានប្រាប់ឲ្យគ្រប់គ្រឹះស្ថានសិក្សាទាំងអស់ ត្រូវផ្សព្វផ្សាយទៅដល់សិស្សានុសិស្សឱ្យបានច្បាស់ និងកុំឱ្យមានការយល់ខុសអំពីអត្ថន័យនៃទិវាក្តីស្រលាញ់ ថ្ងៃទី១៤ ខែកុម្ភៈ និងត្រូវសហការជាមួយអាណាព្យាបាលសិស្សដើម្បីអប់រំ និងទប់ស្កាត់ភាពមិនប្រក្រតីណាមួយដែលប្រព្រឹត្តដោយសិស្សានុសិស្ស។

កំពុងអង្គុយស្រាវជ្រាវឯកសារក្នុងបណ្ណាល័យមួយ កញ្ញា រ៉ា ជីយ៉ាង និស្សិតឆ្នាំទី៣ ជំនាញទំនាក់ទំនងអន្តរជាតិ នៅសាកលវិទ្យាល័យអាស៊ីអ៊ឺរ៉ុប លើកឡើងថា ទិវានៃក្ដីស្រលាញ់ ជាទិវាល្អមួយសម្រាប់ជនជាតិដទៃ ប៉ុន្តែដោយសារយុវវ័យកម្ពុជាមិនយល់អំពីអត្ថន័យបុណ្យនេះ បានធ្វើការប្រារព្ធដោយខុសឆ្គង ធ្វើឲ្យសង្គមមើលមកមិនត្រឹមត្រូវ។ កញ្ញាបន្តថា ទិវានៃក្តីស្រលាញ់គឺមានដើមកំណើតមកពីអឺរ៉ុបតាមរយៈសាសនាគ្រឹស្ត ប៉ុន្តែការប្រារព្ធនៅកម្ពុជាគឺមិនមានអ្វីខុសនោះទេ សំខាន់គឺអនុវត្តឲ្យត្រឹមត្រូវ។

កញ្ញាបញ្ជាក់ថា៖ «បើយុវវ័យយកទៅប្រើផ្លូវខុស គឺខុសហើយ ហើយបើយកទៅប្រើផ្លូវត្រូវ គឺបុណ្យនេះអាចផ្ដល់ផលល្អសម្រាប់យុវវ័យកម្ពុជា ហើយបុណ្យនេះផងដែរ គឺមានន័យថា បង្ហាញអំពីក្ដីស្រលាញ់ចំពោះក្រុមគ្រួសារ ឪពុកម្ដាយ បងប្អូន និងមិត្តភក្តិ»។

កញ្ញាបន្ថែមថា៖ «យុវវ័យអាចប្រារព្ធថ្ងៃបុណ្យ ១៤ កុម្ភៈហ្នឹង ដូចជាការទិញកាដូរឲ្យគ្នា ជាពិសេសនោះបើល្អគួរតែទិញជាសៀវភៅ ដែលក្នុងន័យរក្សាទំនាក់ទំនងគ្នា និងចែកចំណេះដឹងប្រៀបដូចជាការឲ្យទ្រព្យគ្នាទៅវិញទៅមក»។

កញ្ញាបន្ថែមថា ការផ្សព្វផ្សាយពីរូបភាព និងវីដេអូបែបស្រើបស្រាលផ្សេងៗលើបណ្តាញសង្គម ឬអ៊ីនធឺណេត ក៏ជះឥទ្ធិពលលើការអនុវត្តទិវានេះផងដែរ។

«ប្រព័ន្ធ Social Media គេផ្សព្វផ្សាយមកបែបរឿងស្នេហា ដូចជាយើងឃើញរឿងហូលីវូដ រឿងចិន ភាគច្រើនគឺចឹងកាលណាមើលហើយអារម្មណ៍បែបនឹង គឺវាដក់ជាប់ កាលណាដក់ជាប់ហើយអាចបបួលដៃគូទៅធ្វើរឿងផ្ដេសផ្ដាស ហើយចៃដន្យអីវាមានរឿងក្ដីស្រលាញ់ចឹងទៀត ក៏វាចឹងទៅ សំខាន់វាទាក់ទងគំនិតរបស់យើងវាប្រើប្រាស់បុណ្យនៃក្ដីស្រលាញ់បែបណា ហើយមនុស្សប្រុសនឹងចេះគិតគូររឿងនឹងអត់ ចេះគ្រប់គ្រងខ្លួនឯងដែរអត់ អាហ្នឹងវាជាបញ្ហា»។

ចំណែកយុវជនឈ្មោះ វៃ គឹមយូ អតីតនិស្សិតបរិញ្ញាបត្ររងគិលានុបដ្ឋាក លើកឡើងថា ជាទូទៅលោកមើលឃើញប្រជាពលរដ្ឋ យុវជន ដឹងព័ត៌មានច្រើនតាមរយៈបណ្ដាញសង្គម ឬក៏បណ្ដាញផ្សេងៗ អំពីទិវានៃក្ដីស្រលាញ់ ថាជាបុណ្យវប្បធម៌បរទេសមកពីលោកខាងលិច ប៉ុន្តែលោកថា ភាគច្រើនយុវជនទទួលយកទិវានេះមកប្រារព្ធ ដូចជាការទិញកាដូរ ទិញផ្កា ជូនមនុស្សជាទីស្រលាញ់។ លោកថា ទិវានេះជាទិវានៃក្ដីស្រលាញ់សម្រាប់យុវជនខ្មែរ តែសម្រាប់ប្រទេសលោកខាងលិចនេះ ទិវានេះគ្រាន់តែជាការបង្ហាញពីក្ដីស្រលាញ់សកលមួយ ដែលរំឮកដល់មនុស្សឲ្យចេះស្រលាញ់គ្នាប៉ុណ្ណោះ។

លោកបញ្ជាក់ថា៖ «ជាទូទៅយុវជនយើងបានដឹងព័ត៌មានច្រើនទាក់ទងនឹងបណ្ដាញសង្គម ឬក៏មានបណ្ដាញផ្សេងៗទៀត ខ្វះក្នុងការប្រើប្រាស់វាឲ្យមានភាពត្រឹមត្រូវ ហើយស្របតាមស្ថានការណ៍សង្គម ដូចជាយកទៅប្រើដើម្បីបំពេញចិត្តខ្លួនឯង និងដៃគូក្នុងថ្ងៃបុណ្យនោះ»។

ចំណែកការជូនផ្កាលោកថា៖ «វាអាស្រ័យទៅលើបុគ្គលដែលអោយថាក្នុងន័យចេញពីទឹកចិត្ត មួយទៀតក្នុងគោលបំណងចង់បានផលប្រយោជន៍។ ចំណែកការជូនអំណោយ ឬកាដូ មិនមែនសុទ្ធតែមិនល្អនោះទេ គឺអាស្រ័យទៅលើបុគ្គលម្នាក់ៗ និងការមើលខ្លួនឯង ដែលមិនអាចទៅបន្ទោសឲ្យតែអ្នកជូនផ្កាកុលាបខុសនោះទេ»៕

ក្រុមមេធាវីបារម្ភពីសិទ្ធិ និងសុខភាពរបស់លោក កឹម សុខា ខណៈតុលាការមិនកំណត់ពេលបន្តសវនាការ

ជា សុខនី (Chea Sokny) — Wed, 27 Jan 2021 08:56:07 +0000

ក្រុមមេធាវីការពារក្តីឲ្យលោក កឹម សុខា មេដឹកនាំគណបក្សប្រឆាំងដែលកំពុងស្ថិតក្រោមការឃ្លាំមើលរបស់តុលាការលើកឡើងថា ការមិនបន្តសវនាការលើកូនក្តីរបស់ពួកគេ កំពុងធ្វើឲ្យប៉ះពាល់ដល់សិទ្ធិ និងសុខភាពរបស់កូនក្តី។

សហមេធាវីរបស់លោក កឹម សុខា កាលពីថ្ងៃទី២២ ខែមករា ឆ្នាំ២០២១ បានដាក់លិខិតទៅសាលាដំបូងរាជធានីភ្នំពេញជាលើកទី៣ ស្នើឲ្យតុលាការបន្តសវនាការជំនុំជម្រះក្ដីលោក កឹម សុខា ឡើងវិញ បន្ទាប់ពីបានផ្អាកអស់រយៈពេលជិតមួយឆ្នាំ។

ការស្នើសុំនេះត្រូវបានធ្វើឡើងរួមគ្នាដោយសហមេធាវីការពារសិទ្ធិលោក កឹម សុខា រួមមានលោក អាង ឧត្តម លោក ផែង ហេង លោកស្រី ម៉េង សុភារី និងលោក ចាន់ ចេន ដោយបានបញ្ជាក់ប្រាប់ចៅក្រម ដែលជាប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញថា សិទ្ធិទទួលបានការជំនុំជម្រះឆាប់រហ័ស និងយុត្តិធម៌ គឺជាគោលការណ៍មូលដ្ឋានសង្គមដ៏ត្រឹមត្រូវ និងដើរតួនាទីយ៉ាងសំខាន់ ក្នុងការបង្ការភាពអយុត្តិធម៌ ដូចមានចែងក្នុងមាត្រ១៤ (ចំណុចគ) នៃកតិកាសញ្ញាស្ដីពីសិទ្ធិពលរដ្ឋ និងសិទ្ធនយោបាយ ដែលចែងថា «ជនគ្រប់រូបត្រូវបានជំនុំជម្រះដោយឥតពន្យាពេល»។

ក្រុមមេធាវីរបស់លោក កឹម សុខា ក៏បានបញ្ជាក់ថា សំណុំរឿងលោក កឹម សុខា ត្រូវបានអូសបន្លាយពេលជាច្រើនឆ្នាំ ហើយរាល់កាត់ក្ដី ឬក៏បើកសវនាការ តុលាការព្យាយាមពន្យារមិនចង់បញ្ចប់កិច្ចដំណើរការនីតិវិធីនៅសាលាដំបូងឡើយ។ ពួកគេថា ការបន្តពន្យារពេលសវនាការនេះ អាចនឹងប៉ះពាល់ដល់សិទ្ធិកូនក្ដីរបស់ពួកគេយ៉ាងធ្ងន់ធ្ងរ ជាពិសេសនោះគឺសិទ្ធិធ្វើនយោបាយរបស់លោក កឹម សុខា។

លោក ចាន់ ចេន មេធាវីមួយរូបដែលការពារក្ដីឲ្យលោក កឹម សុខា ប្រាប់ Newsroom Cambodia ថា ការស្នើសុំបើកសវនាការពីរដងមុន លោកថាលើកទី១ មិនទាន់មានការឆ្លើយតបទេពីខាងតុលាការ និងលើកទី២លោកថា បានស្នើទៅក្រសួងយុត្តិធម៌ សុំឲ្យជួយអន្តរាគមន៍ និងពន្លឿនទៅតុលាការ ប៉ុន្តែលោកថាក្រសួងមួយនេះមិនទាន់មានការឆ្លើយតបជាផ្លូវការចំពោះក្រុមមេធាវីរបស់លោកនៅឡើយ។ លោកបន្តថា មូលហេតុដែលក្រុមមេធាវីបន្តស្នើសុំបើកសវនាការ ពីព្រោះពួកលោកចង់ឃើញប្រព័ន្ធតុលាការមួយអព្យាក្រឹត យុត្តិធម៌ចំពោះកូនក្ដីលោក និងអ្នកនយោបាយផ្សេងទៀត។

លោកបញ្ជាក់ថា៖ «លោក កឹម សុខា មានជំងឺប្រចាំកាយដែលអត់ទាន់ព្យាបាល អីចឹងហើយគាត់ត្រូវការសិទ្ធិក្នុងការដើរហើរ អាចចេញទៅក្រៅប្រទេសបាន និងចំណុចមួយទៀតនោះ គាត់ជាអ្នកនយោបាយ អីចឹងវាប៉ះពាល់ធ្ងន់ធ្ងរណាស់ដែលហាមគាត់មិនឲ្យធ្វើនយោបាយ នេះជាការរំលោភសិទ្ធិរបស់គាត់» ។

លោក កឹម សុខា ត្រូវបានចាប់ខ្លួននៅឆ្នាំ២០១៧ ហើយគណបក្សសង្គ្រោះជាតិ ដែលជាគណបក្សប្រឆាំងធំជាងគេ ត្រូវបានតុលាកំពូលរំលាយមុនការបោះឆ្នោតឆ្នាំ២០១៨ ក្រោមបទចោទដូចគ្នា។

អ្នកស្រី ចក់ សុភាព នាយិការប្រតិបត្តិមជ្ជមណ្ឌលសិទ្ធិមនុស្សកម្ពុជាបានបង្ហរោះសារលើគណនីហ្វេសប៊ុករបស់អ្នកស្រីនៅថ្ងៃពុធនេះថា ការបន្តដាក់ករណីលោក កឹម សុខា នៅទ្រឹង នាំឱ្យមានចំណោទកាន់តែខ្លាំងពីហេតុផលនយោបាយនៅពីក្រោយករណីនេះ។ អ្នកស្រីបន្តថា ការពន្យាពេលដំណើរការជំនុំម្រះ និងដំណើររឿង និងនីតិវិធីជាច្រើនជុំវិញករណីលោក កឹម សុខា នេះ បានប៉ះពាល់ដល់សិទ្ធិទទួលបានការជំនុំជម្រះដោយយុត្តិធម៌របស់លោក ដែលត្រូវបានធានាដោយច្បាប់ជាតិ និងអន្តរជាតិ។

អ្នកស្រីសរសេរបញ្ជាក់ថា៖ «ជាការសំខាន់ណាស់ចំពោះសវនាការលើករណីលោក កឹម សុខា ដែលត្រូវបានចោទប្រកាន់ពីបទក្បត់ជាតិហើយដែលបានទទួលរងការរិះគន់យ៉ាងច្រើនគួរត្រូវធ្វើឡើងដោយសាធារណ និងធានាឲ្យបានផងដែរនូវសិទ្ធិទទួលបានការជំនុំជម្រះដោយយុត្តិធម៌ដល់ភាគីពាក់ព័ន្ធ»។

Newsroom Cambodia បានទាក់ទងលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ ដោយលោកប្រាប់ថា លោកជាប់ប្រជុំ ហើយលោកប្រាប់ឲ្យទៅសួរលោក សួស វិទ្យារ៉ាន់ឌី ដែលជាអ្នកនាំពាក្យដូចគ្នា។ Newsroom Cambodia ក៏បានព្យាយាមទាក់ទងលោក សួស វិទ្យារ៉ាន់ឌី ជាច្រើនដង ប៉ុន្តែមិនមានការឆ្លើយតប៕

ព្រះសង្ឃក្នុងវត្តវិសុទ្ធិមគ្គខេត្តសៀមរាបគោរពវិន័យយ៉ាងតឹងរ៉ឹងបែបព្រះពុទ្ធសាសនាសុទ្ធ

ជា សុខនី (Chea Sokny) — Wed, 27 Jan 2021 06:27:22 +0000

(សៀមរាប)៖ វត្តវិសុទ្ធិមគ្គជាវត្តមួយស្ថិតនៅក្នុងភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប មានព្រះសង្ឃជាង១២០អង្គ មានផ្ទៃដីប្រមាណ១០០ហិកតា ព័ទ្ធដោយព្រៃឈើក្រាស់ឃ្មឹក ត្រជាក់ត្រឈឹងត្រឈៃ និងមានស្ទឹងព័ទ្ធជុំវិញប្រៀបបាននឹងកសិណនៅអង្គរ។

វត្តនេះកសាងឡើងក្នុងព.សឆ្នាំ២៥៥១ ដែលមានលោកគ្រូ សាន សប្បាយ ជាចៅធិការវត្ត។ ក្នុងទំហំផ្ទៃដីដ៏ធំ មានកុដិជាងមួយរយសម្រាប់ព្រះសង្ឃដាច់ដោយឡែកពីគ្នា វត្តវិសុទ្ធិមគ្គជាវត្តមួយគោរពព្រះពុទ្ធសាសនាសុទ្ធ មិនមានការអុជធូប ដាក់បាយសី ឬស្រោចទឹកនោះទេ។

ព្រះសង្ឃដែលគង់នៅក្នុងវត្តវិសុទ្ធិមគ្គប្រកាន់បទប្បញ្ញត្តិយ៉ាងតឹងរ៉ឹង ម៉ឹងម៉ាត់ ដោយមិនអនុញ្ញាតឲ្យព្រះសង្ឃប្រើប្រាស់ទូរស័ព្ទដៃទំនើប មិនពាក់ស្បែកជើង និងមិនកាន់បច្ច័យជាដើម។

ឧបាសិកា ជួន គីមឡេង ដែលមានតួនាទី រៀបចំបង្អែម បានរៀបរាប់ថា ព្រះសង្ឃនៅក្នុងវត្ត វិសុទ្ធិមគ្គ កាន់វិន័យល្អប្រៀបបាននឹងទៅនឹងសម័យព្រះពុទ្ធ។

«ព្រលឹមលោកចេញនិមន្តបិណ្ឌបាត្រ គោះជួងម៉ឺង លោកនិមន្តបិណ្ឌបាត្រមួយអង្គៗ ដូចជំនាន់ព្រះពុទ្ធចឹង លោកនិមន្តមកទាំងអស់ទាំង១០០អង្គមកទទួលបិណ្ឌបាត្រ តើកូនជ្រះថ្លាប៉ុណ្ណា ហើយលោកពេលឆាន់អត់ឮសូរ ដូចយាយតាប្រកែកគ្នាទេ យាយតាប្រកែកខ្លះព្រោះនូវធម្មជន ហើយចុះលោក លោកនូវធម្មជន ប៉ុន្តែនូវធម្មជនជាន់ខ្ពស់យើងនិយាយអីចេះទៅ។ វត្តណាមិនកាន់វិន័យ កាន់វិន័យ កូនចូលទៅដឹងហើយ មិនចាំថាយាយនិយាយទេ ច្បាស់ជាលោកមកសួរញោមអញ្ចេះញោមអញ្ចុះទៅ កូនអញ្ចេះកូនអញ្ចុះទៅ ប៉ុន្តែលោកអត់» ។

ឧបាសិកា ហៀង ធឿន អាយុ៨១ឆ្នាំ ដែលស្នាក់នៅក្នុងវត្តវិសុទ្ធិមគ្គរយៈពេល១១ឆ្នាំ មានប្រសាសន៍ថា ព្រះសង្ឃក្នុងវត្តវិសុទ្ធិមគ្គប្រតិបត្តិនូវវិន័យបានយ៉ាងល្អ គឺមិនពាក់ស្បែកជើង មិនប្រើប្រាស់ទូរស័ព្ទ និងមិនកាន់បច្ច័យ។

ខណៈពេលដែលកំពុងសាងសង់កុដិតូចៗជាមួយនឹងព្រះសង្ឃអង្គផ្សេង និងកូននេន ព្រះតេជគុណ ឈ្លន់ សៅ ព្រះជន្ម៣០ព្រះវស្សា មានសង្ឃដីកាថា មូលហេតុដែលព្រះតេជគុណមកវត្តនេះដោយសារវត្តវិសុទ្ធិមគ្គកាន់ព្រះពុទ្ធសាសនាសុទ្ធសាធ ព្រះសង្ឃក៏ជ្រះថ្លាមកកាន់វត្តវិសុទ្ធិមគ្គនេះ។

«ដោយសារតែអ្នកបួសយើងគឺយកវិន័យសិរសាពីព្រះពុទ្ធសាសនាចំៗ អីចឹងវាត្រូវនឹងសេចក្ដីជ្រះថ្លារបស់អាត្មាទៅថាវត្តនេះគឺជាវត្តមួយដែលមានសិរសាព្រះពុទ្ធសាសនាច្បាស់លាស់ចឹង មិនមែនតែវត្តនេះទេ នៅមានវត្តផ្សេងៗទៀត តែអធ្យាស្រ័យអាត្មាស្រលាញ់វត្តនេះទៅ ត្រង់ខ្លួនឯងនៅសៀមរាបផង ជិតផងក៏ជ្រះថ្លាក្នុងការបដិបត្តិនូវធម៌ នូវវិន័យ»។

លោក សេង សុមុនី អ្នកនាំពាក្យក្រសួងធម្មការ និងសាសនា បានប្រាប់ Newsroom Cambodiaនៅថ្ងៃទី២៦ ខែមករាថា សព្វថ្ងៃក្នុងប្រទេសកម្ពុជាមានវត្តជាង៥០០០ ប៉ុន្តែមិនទាន់មានទិន្នន័យច្បាស់លាស់អំពីវត្តដែលកាន់ព្រះពុទ្ធសាសនាសុទ្ធសាធនោះទេ។

លោកលើកឡើងដូច្នេះថា៖ «តួរលេខហ្នឹងយើងរាប់ក្នុងព្រះពុទ្ធសាសនាមានពីរ ទីមួយសាសនាបែបគន្ថធុរៈ គឺលោករៀនបាលី រៀនសំស្ក្រឹត មុខវិជ្ជាទូទៅ ក្រសួងអប់រំអីចឹង។ មួយទៀតគឺវិបស្សនាធុរៈ ដែលក្មួយថាតឹងរ៉ឹងហ្នឹងគឺវិបស្សនាធុរៈ ហើយមានមណ្ឌលរបស់លោក មណ្ឌលធំកណ្តាលហ្នឹងនៅភ្នំអដ្ឋរស្សនេះ មជ្ឈឹមមនុស្ស លោកបើកសាខាតាមខេត្ត ទាំង២៥រាជធានីខេត្តហ្នឹង ហើយនៅក្នុងខេត្តនីមួយៗលោកមានវត្តច្រើន ប៉ុន្មានវត្តដែលប្រតិបត្តិបន្តទៅទៀត»៕

រកឃើញករណីវិជ្ជមានកូវីដ១៩ចំនួន២នាក់ និងជាសះស្បើយចំនួន៣នាក់នៅថ្ងៃទី២៥ ខែមករា

ជា សុខនី (Chea Sokny) — Tue, 26 Jan 2021 08:15:27 +0000

ក្រសួងសុខាភិបាលនៅថ្ងៃទី២៥ ខែមករា ឆ្នាំ២០២១ បានប្រកាសថារកឃើញមានករណីវិជ្ជមានជំងឺកូវីដ១៩ចំនួនពីរនាក់ និងមានករណីជាសះស្បើយចំនួនបីនាក់។

យោងតាមសេចក្តីប្រកាសព័ត៌មានរបស់ក្រសួងសុខាភិបាល ករណីវិជ្ជមានជំងឺកូវីដ១៩ទាំងពីរនេះ ត្រូវបានរកឃើញលើបុរសជនជាតិឥណ្ឌូនេស៊ីម្នាក់ មានអាយុ២៤ឆ្នាំដែលជាអ្នកដំណើរមកពីឥណ្ឌូនេស៊ី បន្តជើងហោះហើរទៅប្រទេសសិង្ហបុរី មកដល់ប្រទេសកម្ពុជានៅថ្ងៃទី១២ ខែមករា ឆ្នាំ២០២១ ហើយមានអាសយដ្ឋានស្នាក់នៅ ខេត្តព្រះសីហនុ។

ចំណែកស្រ្តីខ្មែរម្នាក់ទៀតមានអាយុ២៣ឆ្នាំ ដែលជាពលករធ្វើដំណើរពីប្រទេសថៃ មកដល់ប្រទេសកម្ពុជានៅថ្ងៃទី១២ ខែមករា ឆ្នាំ២០២១ ហើយមានអាសយដ្ឋានស្នាក់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

បច្ចុប្បន្នបុរសជនជាតិឥណ្ឌូនេស៊ីដែលមានវិជ្ជមានជំងឺកូវីដ១៩ កំពុងត្រូវបានដាក់ឲ្យសម្រាកព្យាបាលនៅមជ្ឃមណ្ឌលជាតិកំចាត់រោគរបេង និងហង់សិន រាជធានីភ្នំពេញ។ ចំណែកឯស្រ្តីជនជាតិខ្មែរជាពលករមកពីប្រទេសថៃ កំពុងត្រូវបានដាក់ឲ្យសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។

សម្រាប់ករណីជាសះស្បើយចំនួន៣នាក់ ក្នុងនោះម្នាក់ជាស្រ្តីជនជាតិខ្មែរដែលធ្វើដំណើរមកពីសហរដ្ឋអាមរិក និងម្នាក់ទៀតជាបុរសជនជាតិឥណ្ឌូនេស៊ី ធ្វើដំណើរពីប្រទេសឥណ្ឌូនេស៊ី និងម្នាក់ទៀតជាពលករមកពីប្រទេសថៃ។

គិតមកត្រឹមព្រឹកថ្ងៃទី២៦ ខែមករា ឆ្នាំ២០២១ មានអ្នកឆ្លងសរុប៤៦០នាក់ អ្នកជាសះស្បើយមានចំនួន៤១២នាក់ និងកំពុងសម្រាកព្យាបាលមានចំនួន៤៨នាក់ នេះបើតាមសេចក្ដីជូនដំណឹងរបស់ក្រសួងសុខាភិបាល៕

អាជីវកម្មនៅតំបន់ប្រាសាទអង្គរវត្តប្រឈមនឹងភាពមិនប្រាកដប្រជាបន្ទាប់ពីការធ្លាក់ចុះនៃភ្ញៀវទេសចរដោយសារតែកូវីដ

ជា សុខនី (Chea Sokny) — Mon, 25 Jan 2021 04:12:49 +0000

ខេត្តសៀមរាប៖ អាជីវករ និងអ្នករត់ម៉ូតូកង់បីនៅតំបន់ប្រាសាទអង្គរវត្ត ខេត្តសៀមរាប បាននិយាយថាពួកគាត់បានរងផលប៉ះពាល់ដោយការធ្លាក់ចុះនៃភ្ញៀវទេសចរ បន្ទាប់ពីការផ្ទុះឡើងនៃជំងឺ ១៩ ដែលបានវាយលុកប្រទេសកម្ពុជាកាលពីដើមឆ្នាំ២០២០។

លោកស ឡៃ អាយុ៤៨ឆ្នាំ ជាអ្នករត់កង់បីនៅក្នុងតំបន់អង្គរបានប្រាប់ថា ប្រាក់ចំណូលរបស់លោកពីមុនមានចន្លោះពី១០ដុល្លារ ទៅដល់ ៧០ដុល្លារ ក្នុងមួយថ្ងៃ ក៏ប៉ុន្តែបច្ចុប្បន្ននេះ បានត្រឹម ៥០០០រៀល ហើយពេលខ្លះ បាន៣ម៉ឺន ទៅ៤ម៉ឺនរៀល។

លោកលើកឡើងដូច្នេះថា៖ «កាលភ្ញៀវមាននៅ ចំណូលយ៉ាងតិចក៏១០ដុល្លារដែរ បើអាខ្ពស់បំផុតមិនអាចប្រាកដទេ ដូចថា ២០-៣០ដុល្លារ ជួនកាលបានដល់ទៅ ៧០ដុល្លារអីទៅ បើយកភ្ញៀវទៅដាក់ទន្លេ ឬតាមហាងអីទៅអញ្ចឹង យើងបានច្រើនតាមហ្នឹងទៅជាពិសេសភ្ញៀវបរទេស។ បើឥឡូវនិយាយអោយត្រង់ទៅជួនកាលបានប្រាំពាន់ ហើយថ្ងៃណាក៏អត់ទៅ បើហេងបាន ៣ទៅ៤ម៉ឺន»។

លោកបានបន្ថែមថា៖ «បើផ្គត់ផ្គង់គ្រួសារទៅ គឺទៅអត់រួចទេ ទាល់តែមានប្រពន្ធជួយរកនេះខ្លះ នោះខ្លះ តែប្រពន្ធពូនៅតែផ្ទះមើលតែកូន តែពូមានម្តាយនៅក្រៅប្រទេសផងដែរ គាត់អោយមួយខែ ១០០ដុល្លារគ្រាន់ជួយទប់ខ្លះក្នុងពេលកូវីដអញ្ចឹង»។

«ពិបាកនិយាយវាខុសប្លែកគ្នាឆ្ងាយណាស់ ហើយក្នុងមួយថ្ងៃទៅលើម្ហូបតិចបំផុតក៏ត្រឹម ៣ម៉ឺនដែរ ឥឡូវទិញម្ហូបត្រឹម៣ពាន់ ហូបពីរនាក់ប្តីប្រពន្ធទៅ និយាយទៅវាពិបាកណាស់ មិនហ៊ានស៊ីចាយអីទេ ពិបាករកលុយមិនបានតែម្តងបើអាកាលផ្ទុះកូវីដដំបូង គឺស្ងាត់ឈឹងតែម្តង អត់មាននរណាមកទេ»។

អ្នកស្រីឡាយ លី អាយុ ៣៦ឆ្នាំ។ រូបភាព៖ កេត អ៊ីយាន

អ្នកស្រីឡាយ លី អាយុ ៣៦ឆ្នាំ ជាអ្នកលក់វត្ថុអនុស្សាវរីយ៍នៅជិតប្រាសាទអង្គរវត្តបានប្រាប់ថាពីមុនអ្នកស្រី រកប្រាក់ចំណូលបានពី ៤ម៉ឺន ទៅ១០ម៉ឺនរៀលក្នុងមួយថ្ងៃ បច្ចុប្បន្នរកបានតិចតួច ចំណេញបានតិចតួចស្ទើរតែមិនអាចផ្គត់ផ្គង់ជីវភាពព្រោះត្រូវចំណាយលើម្ហូបអាហារ ការរៀនសូត្ររបស់កូន និងត្រូវបង់ការ ប្រាក់នៅធនាគារជាដើម។

អ្នកស្រីបានលើកឡើងថា៖ «ខ្ញុំលក់នៅនេះយូរហើយ តែនៅខាងក្នុង ៦-៧ឆ្នាំហើយ លក់តែអាហ្នឹងឯង កាលមុនកូវីដ មួយថ្ងៃបានប្រហែលជា ៤-១០ម៉ឺនអត់ទៀងទេ តែថ្ងៃនេះអត់។ ផ្គត់ផ្គង់អត់គ្រប់គ្រាន់ទេ ព្រោះវាចំណេញតិចតួចលក់បាន ៦-៧ម៉ឺនយកទៅទិញឥវ៉ាន់វិញ សល់តែបន្តិចបន្តួចគ្រាន់ទុកអោយកូនហូបអោយរួចមួយថ្ងៃ សឹងតែមិនរួច»។

«ប៉ះព៉ាល់តែមែនទែនតែម្តង ដូចជាពួកខ្ញុំលក់អញ្ចឹងមានការជំពាក់អង្គការអីអញ្ចឹង ហើយត្រូវការបង់អោយគេរាល់ខែ ដល់ពេលអញ្ចឹងទៅវាពិបាកណាស់ ដូចការរៀនសូត្ររបស់កូន វាត្រូវរៀនគួរ រៀនអង់គ្លេស អញ្ជឹងយើងត្រូវការចំណាយដល់ពេលអត់បានអញ្ចឹងវាពិបាក»។

លោកប៊ុន យូរឆៃលៀង អាយុ ៣៨ឆ្នាំ។ រូបភាព៖ វឌ្ឃនៈ វណ្ណសក្តិ

លោកប៊ុន យូរឆៃលៀង អាយុ ៣៨ឆ្នាំ ជាអ្នករត់កង់បីបាននិយាយថាប្រាក់ចំណូលពីមុន និងបច្ចុប្បន្នខុសគ្នា ឆ្ងាយហើយឥឡូវនេះរកបានតែ២ម៉ឺនរៀល ទៅ៣ម៉ឺនរៀលប៉ុណ្ណោះក្នុងមួយថ្ងៃ ជួនកាលក៏អត់បាន។

លោកបានលើកឡើងថា៖ «ខុសគ្នាឆ្ងាយណាស់ប្អូន កាលនៅភ្ញៀវបរទេសហើយអត់មានកូវីដ យើងរកបានម៉ូយស្រួល ឲ្យតែចេញរកដឹងតែបាន ប៉ុន្តែឥឡូវ ទោះបីយើងប្រឹងចេញរកប៉ុណ្ណានៅតែរកអត់បានដូចមុនទេ ដោយសារយើងអត់មានភ្ញៀវបរទស អាចបានជា ៨-១០ម៉ឺន តែឥឡូវបានតែ ២ម៉ឺន ៣ម៉ឺន ជួនកាលសឹងតែអត់សោះតែម្តង»។

លោកបន្ថែមថាចំណូលអត់គ្រប់ដោយសារតែគាត់ជំពាក់គេដែរ ហើយមានការពិបាកក្នុងការសន្សំសងគេ ដូចជាប៉ុន្មានខែមុន គាត់បានសុំពន្យារសងលុយគេ ព្រោះតែអត់មានលទ្ធភាពសង អញ្ចឹងទៅគេឲ្យបង់តែការ។

«ពេលបង់តែការអញ្ចឹងទៅវាខាតយើងវិញ។ មុនធ្លាប់ឲ្យគ្រូសារគាត់ចេញលក់ដូរតិចតួច តែពេលលក់ទៅវាអត់ដាច់ ព្រោះឥឡូវគេចេញលក់ច្រើន នៅពេលបាត់បង់ទេសចរណ៍ទៅ គាត់អត់មានអីធ្វើ គាត់ចេញលក់ដូចយើងដែរ ដល់ពេលយូរៗទៅវាពិបាកអត់មានពីណាមើលកូន អញ្ចឹងទៅអោយគាត់មើលកូនយើងចេញរកតែឯងទៅ តែជួនកាលខ្វះខាតអីម៉ែឪគាត់ផ្ញើរមកខ្លះទៅ»។

លោក ង៉ូវ សេងហាក់ ប្រធានមន្ទីរទេសចរណ៍ខេត្តសៀមរាបបានប្រាប់ Newsroom Cambodia យ៉ាងខ្លីថា ភ្ញៀវទេសចរនឹងចាប់ផ្តើមមកកម្សាន្តវិញនៅពេលដែលស្ថានភាពជំងឺកូវីដមានភាពប្រសើរឡើង។

«បើសភាពការណ៍កូវីដប្រសើរ ភ្ញៀវនឹងត្រឡប់មកវិញ ដល់ពេលកូវីដអីចឹង យើងដឹងថាស្ថានភាពវាដោយសារជំងឺកូវីដ ការហោះហើរក៏អត់មានដែរ មកសៀមរាបអីចឹង»។

Newsroom Cambodia មិនអាចសុំការអធិប្បាយពីលោក តុប សុភ័ក អ្នកនាំពាក្យក្រសួងទេសចរណ៍ ដោយ ទូរស័ព្ទហៅជាច្រើនដង ប៉ុន្តែគ្មានអ្នកទទួល។

យោងទៅតាមរបាយការណ៍របស់ក្រសួងទេសចរណ៍ ចំនួនភ្ញៀវទេសចរណ៍ក្នុងឆ្នាំ២០១៩ មានប្រមាណជាជាង ៦លាននាក់ កើនឡើង៨ភាគរយប្រៀបធៀបឆ្នាំ២០១៨ ក៏ប៉ុន្តែក្នុងឆ្នាំ ២០២០ ភ្ញៀវទេសចរណ៍សរុបមានត្រឹមតែជាង ១លាននាក់ប៉ុណ្ណោះ ពោលគឺមានការធ្លាក់ចុះជិត៨០ភាគរយ។ នេះយោងតាមស្ថិតិផ្លូវការ៕

ខណៈកូវីដវាយលុក ការធ្វើឱ្យវត្ថុអនុស្សាវរីយ៍ពីដូងជាប្រភពចំណូលថ្មីសម្រាប់អ្នកភូមិក្នុងខេត្តសៀមរាប

ជា សុខនី (Chea Sokny) — Sat, 23 Jan 2021 05:12:46 +0000

ស្រុកអង្គធំ ខេត្តសៀមរាប៖ កាលពីដំបូងឡើយ អ្នកស្រីសំ សំភាស់ គ្រាន់តែចង់កែច្នៃផ្លែដូងធ្វើជារបស់លេងសម្រាប់កូនគាត់នៅក្នុងភូមិមួយនៃស្រុកអង្គធំ ខេត្តសៀមរាប តែប៉ុណ្ណោះ ហើយការច្នៃប្រឌិតរបស់គាត់ក៏បានចាប់ផ្តើមទទួលបានការចាប់អារម្មណ៍ពីអ្នកទេសចរដែលបានឆ្លងកាត់។

វត្ថុអនុស្សាវរីយ៍សត្វក្រពើធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

ជាមួយនឹងការមកដល់នៃជំងឺរាតត្បាតកូវីដ១៩ ដែលបានប៉ះពាល់ដល់ជីវភាពរស់នៅរបស់ប្រជាជនរាប់ម៉ឺននាក់ ការធ្វើរូបជាសិល្បៈចេញពីផ្លែដូងសម្រាប់ភ្ញៀវទេសចរ បានក្លាយជាប្រភពចំណូលថ្មីសម្រាប់អ្នកស្រីសំ សំភាស់ និងគ្រួសារដទៃទៀតនៅភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប ដែលភាគច្រើនប្រកបរបរជាកម្មករសំណង់។

អ្នកស្រីសំ សំភាស់ អាយុ ២៩ឆ្នាំ បាននិយាយថាគំនិតនៃការច្នៃប្រឌិតនេះគឺប្តីគាត់បានឃើញគេធ្វើនៅប្រទេសថៃនៅពេលគាត់ធ្វើជាពលករចំណាកស្រុកនៅប្រទេសថៃកាលពីដើមឆ្នាំ២០២០។

ទឹកមុខញញឹមដែលបង្កប់ទៅដោយក្ដីរីករាយ និងការស្វាគមន៍ អ្នកស្រី សំ សំភាស់ បាននិយាយថា «មុនដំបូងប្ដីរបស់ខ្ញុំគាត់ទៅថៃ មិនដឹងថាគាត់ឃើញឯណោះ ឬក៏យ៉ាងណាទេ ដល់ពេលគាត់ត្រឡប់មកវិញ ឃើញផ្លែដូងក៏ធ្វើតាមគេដាក់ឱ្យកូនលេងទៅ»។

ដោយសម្តីរដឺនៗបន្ដិចផងនោះ អ្នកស្រីសំ សំភាស់បានបន្តថា «ប៉ុន្តែកាលធ្វើលើកនោះមិនបានស្អាតអ្វីទេដោយសារមិនទាន់លាបថ្នាំ ហើយកូនឈប់លេងហើយក៏វាចោលទៅ ស្រាប់តែពេលក្រោយកូនក៏វាទារលេងម្ដងទៀត ក៏ធ្វើឱ្យវាម្ដងទៀតទៅ តែលើកនេះលាបពណ៌ហើយក៏ចេះតែច្នៃដាក់ជើងផងអីផង ហើយក៏ស្រាប់តែអ្នកស្រុកឃើញក៏មកសុំរៀនបន្តក៏ចេះ បានដាក់លក់ ហើយកាលនោះលក់ដាច់សម្បើម»។

អ្នកស្រីសំ សំភាស់បានរៀបរាប់ថាកាលដើមឡើយ គឺមានតែគ្រួសារគាត់តែប៉ុណ្ណោះដែលចេះពីរបៀបនៃការកែច្នៃផ្លែដូងចេញជារូបសត្វនេះមុនគេ ហើយក៏ត្រូវបានអ្នកស្រុកដឹង ក៏បានមកសុំរៀនបន្ត ហើយរហូតមកដល់ក្នុងពេលបច្ចុប្បន្ននេះ អ្នកស្រីថាឱ្យតែមានអ្នកចង់រៀន គឺគាត់រីករាយក្នុងការបង្ហាត់បង្រៀនដោយមិនកំណាញ់នោះទេ។

វត្ថុអនុស្សាវរីយ៍សត្វទន្សាយធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

អ្នកស្រីបាននិយាយផងដែរថាមុខរបរនេះជារបរបន្ទាប់បន្សំរបស់គាត់ដែលអាចជួយសម្រួល
ទៅដល់ការចំណាយម្ហូបប្រចាំថ្ងៃបាន។ អ្នកស្រីបានបន្ថែមថារូបសត្វមួយអ្នកស្រីលក់បាន១៥០០០៛ ប៉ុន្ដែបើមានគេកម្ម៉ង់ច្រើន អ្នកស្រីលក់ក្នុងមួយរូបតែ ១២០០០៛តែប៉ុណ្ណោះ ហើយក៏ មិនសូវជាបានចំណេញច្រើននោះទេ ដោយសារត្រូវចំណាយទៅលើការទិញក្រដាសកាសែតមករុំពីលើ។

អ្នកស្រីបានបន្ថែមថាក្នុងមួយថ្ងៃ គាត់ផលិតបានមួយរូបដោយសារតែអ្នកស្រីរវល់និងកិច្ចការផ្ទះខ្លាំងពេក ប៉ុន្តែជួនពេលខ្លះ ទំនេរ ក៏បាន ០៤រូបទៅ ប្រសិនបើមានគេកម្ម៉ង់អ្នកស្រីអាចធ្វើបានរហូតដល់ទៅជាង១០ក្នុងមួយថ្ងៃ ហើយមិនលក់ដាច់រាល់ថ្ងៃនោះទេ ជួនកាល មួយអាទិត្យ ឬមួយខែ ទើបមានការកម្ម៉ង់ម្ដង។

របរធ្វើដូងទៅជាវត្ថុអនុស្សាវរីយ៍ មានជារូបសត្វឱម៉ាល់ ក្រពើ ទន្សាយ និងមេអំបៅផងដែរនោះ បានពង្រីកដល់ចំនួនប្រហែល ៤ ឬ ៥ គ្រួសារហើយនៅក្នុងភូមិនេះ ដែលនេះបានបង្កឲ្យមានការលំបាកក្នុងការស្វែងរកដូងមកធ្វើ។

អ្នកស្រីបាននិយាយថា៖ «ចាប់តាំងតែពីអ្នកភូមិចេះធ្វើដែរមក ពិបាករកផ្លែដូងមកធ្វើខ្លាំងណាស់ ប្រសិនបើចង់រក មានតែទៅភូមិឆ្ងាយៗ ទើបបានហើយត្រូវទិញទៀតទើបបាន»។

«កាលមុនគេយកដុតចោល តែឥលូវចាប់តាំងពីគេដឹងមក ផ្លែដូងសណ្ដមួយត្រូវចំណាយ ៥០០៛ទិញមកទើបបាន ជួនណា គេមិនយកលុយទេ តែយើងយកមកធ្វើលក់ដែរ ក៏ជូនលុយគេខ្លះៗទៅ»។

អង្គុយលើកៅអីហើយនិយាយលឺៗ អ្នកស្រី ហាវ សារុំ អាយុ ៥៤ឆ្នាំ ដែលជាអ្នកភូមិរស់នៅភូមិក្បែរនោះក៏បាន
និយាយបន្ថែមថាកាលពីគាត់នៅក្មេងៗ គាត់មិនដែលធ្លាប់ឃើញការច្នៃផ្លែដូងធ្វើជារូបសត្វបែបនេះនោះទេ ហើយកាលមុន គ្រាន់តែយកមកធ្វើជាអុសដុតបបរបាយជ្រូកតែប៉ុណ្ណោះ។

«ខ្ញុំស្ងើចសរសើរថាវាល្អដែលគេមានគំនិតបែបនេះ បើខ្ញុំមិនដឹងយកធ្វើអ្វីមានតែយកទៅដុតបបរបាយជ្រូក។ មិនបាច់ទៅធ្វើការស្រុកគេ ក៏អាចយកលក់បានលុយស្រួល ហើយវាអាចជួយទៅលើបរិស្ថានបានច្រើនដែរណា»។

នៅក្រោមដំបូលផ្ទះប្រក់ក្បឿង ហើយអង្គុយចាក់រូបមានទឹកមុខផ្ចង់អារម្មណ៍នឹងការងារតែបង្កប់ដោយក្ដីរាក់ទាក់ អ្នកស្រីសំ ទូច អាយុ ៤២ឆ្នាំ ដែលជាអ្នកភូមិម្នាក់ទៀត ហើយបាន ចេះការច្នៃផ្លែដូងបន្តពីប្អូនស្រីគាត់។

គាត់បានរៀបរាប់ថាកាលដើមឡើយគាត់គ្រាន់តែធ្វើឱ្យកូនគាត់លេងតែប៉ុណ្ណោះ តែដល់មាន អ្នកធ្វើដំណើរឃើញ ក៏បានចុះមកសួរ និងសុំទិញ សុំថត។ ចាប់តាំងតែពីពេលនោះមក របរច្នៃដូងរបស់អ្នកស្រីសំ ទូច ក៏ចេះតែល្បីតៗគ្នារហូតដល់មានអ្នកខ្លះកម្ម៉ង់ឱ្យធ្វើតែម្ដងទៅ។

អ្នកស្រីបាននិយាយថា៖ «ថាទៅវាមិនបានចំណេញចំណូលអ្វីប៉ុន្មាននោះទេ ដូចថាយើងរករបស់បានដូចជាដូងអីចេះតែចង់ធ្វើទៅ បើទោះបីជាយើងរកចំណូលអ្វីមិនបានច្រើនក៏យើងចាត់ទុកថាយើងរួចថ្លៃម្ហូបមួយពេលដែរ។ មានអ្នកឆ្ងាយៗ មកទិញដែលភាគច្រើនជាភ្ញៀវទេសចរ ហើយក៏មានអ្នកកម្ម៉ង់មកពីឆ្ងាយដែលតែភាគច្រើនមិនសូវជាចំណេញទេ ដោយសារការចំណាយទៅលើការវិចខ្ចប់ច្រើន»។

លោក ខុង ឆន អាយុ ៦១ឆ្នាំ ដែលជាមេឃុំ ឃុំលាងដៃ បាននិយាយថាអ្នកចេះកែច្នៃផ្លែងដូងជារូបសត្វនេះមានត្រឹមតែ ៥គ្រួសារ ក្នុង៨ភូមិ ហើយលោកក៏បានរៀបរាប់បន្តថា អាជ្ញាធរក្នុងឃុំក៏មានការគាំទ្រ និងលើកទឹកចិត្ត សរសើរពួកគេដែលមានគំនិតក្នុងការច្នៃប្រឌិត ដោយលោកបានជួយផ្សព្វផ្សាយដែរដើម្បីមានការគាំទ្រ រួមមានការលើកឡើងក្នុងអង្គប្រជុំក្រុមប្រឹក្សាឃុំជាដើម ឲ្យមានកាទិញយកទៅលំអរ៕

ការផុតសុពលភាពការអនុគ្រោះពន្ធទូទៅរបស់អាមេរិកធ្វើឲ្យប៉ះពាល់ដល់កម្មករ និងអ្នកបញ្ជាទិញ

ជា សុខនី (Chea Sokny) — Tue, 12 Jan 2021 03:03:21 +0000

ការផុតសុពលភាពកម្មវីធីអនុគ្រោះពន្ធទូទៅរបស់សហរដ្ឋអាមេរិក (Generalized system of preferences-GSP) កាលពីថ្ងៃទី៣១ ខែធ្នូ ឆ្នាំ២០២០ ធ្វើឲ្យប៉ះពាល់ដល់អ្នកបញ្ជាទិញដែលនាំចូលទៅអាមេរិកដោយសារតម្រូវឲ្យបង់ពន្ធរហូតដល់ការអនុគ្រោះពន្ធមានឡើងវិញ។ នេះបើតាមសេចក្ដីជូនដំណឹងរបស់សមាគមរោងចក្រកាត់ដេរនៅកម្ពុជា (GMAC) ។

សេចក្ដីជូនដំណឹងរបស់សមាគមរោងចក្រកាត់ដេរនៅកម្ពុជា (GMAC) ចេញនៅ ថ្ងៃទី៦ ខែមករា ឆ្នាំ២០២១ បញ្ជាក់ថា ការផុសុពលភាពប្រព័ន្ធអនុគ្រោះពន្ធនេះ គឺដោយសារភាពយឺតយ៉ាវនៃការអនុម័តច្បាប់របស់សភាអាមេរិក។ ក្នុងនោះ មិនមែនតែប្រទេសកម្ពុជាទេដែលត្រូវផុតសុពលភាពកម្មវិធីអនុគ្រោះពន្ធទូទៅរបស់សហរដ្ឋអាមេរិក (US GSP) ប៉ុន្តែក៏មានបណ្ដាប្រទេសជាច្រើនដែលពាក់ព័ន្ធនឹងការទទួលបានផល ហើយសរុបទាំងប្រទេសកម្ពុជាមាន១១៩ប្រទេស។

Newsroom Cambodia មិនអាចទាក់ទងលោក ខេន លូ អគ្គលេខាធិការសមាគមរោងចក្រកាត់ដេរកម្ពុជា (GMAC) ដើម្បីសុំការអត្ថាធិប្បាយបន្ថែមបានទេ។

លោក អាត់ ធន់ ប្រធានសហភាពការងារកម្ពុជា ប្រាប់ Newsroom Cambodia តាមរយៈប្រព័ន្ធទូរស័ព្ទថា ក្នុងពេលបច្ចុប្បន្ន ប្រព័ន្ធអនុគ្រោះពន្ធទូទៅនេះត្រូវបានត្រូវបានបញ្ចប់ និងត្រូវរង់ចាំកិច្ចព្រមព្រៀងថ្មី។ លោកបន្តថា ការផុតសុពលភាពនេះនឹងមានផលប៉ះពាល់ខ្លះសម្រាប់កម្ពុជា ជាពិសេសកម្មករ។

លោកថា៖ «ដោយសារតែយើងជាអ្នកនាំអ៊ីវ៉ាន់ចេញទៅសហរដ្ឋអាមេរិក ហើយចំពោះសម្លៀកបំពាក់ និងស្បែងជើងយើងអមតាមប្រព័ន្ធ MFN អានឹងវាធម្មតាវាយកពន្ធហើយ ប៉ុន្តែកាបូបយួរដៃយើងនាំតាមប្រព័ន្ធ GSP ហើយឥឡូវនេះប្រព័ន្ធ GSP ត្រូវបានបញ្ចប់ ចឹងមានន័យថាគឺអាចនាំបានតាមប្រព័ន្ធ MFN ចឹងយើងត្រូវជាប់ពន្ធ ពន្ធនៅក្នុងរង្វង់ដល់ទៅ៣០%ទៅតាមមុខទំនិញដែលគេបានហើយ ចឹងដែលធ្វើឲ្យអ្នកបញ្ជាទិញធំៗគាត់ផ្អាកការលក់ ឬក៏នាំចូលអ៊ីវ៉ាន់ទៅអាមេរិកអំឡុងពេលនឹង ចឹងប្រសិនបើជាគាត់ផ្អាកការនាំចូលចឹងមានន័យថាកម្ពុជាអាចនឹងផ្អាកការផលិតអីខ្លះដែរ ចឹងអាផលប៉ះពាល់វាអាចមានការព្យួរ ឬការបិទអីជៀសមិនផុតទេ»។

Newsroom Cambodia មិនអាចទាក់ទងសុំការអត្ថាធិប្បាយពីលោក ហេង សួរ អ្នកនាំពាក្យក្រសួងការងារបណ្ដុះបណ្ដាលវិជ្ជាជីវៈបានទេ។

គួរបញ្ជាក់ផងដែរ កម្មវិធីអនុគ្រោះពន្ធទូទៅរបស់សហរដ្ឋអាមេរិកត្រូវបានផ្ដល់ឲ្យដំបូងរយៈពេល១០ឆ្នាំ ដោយចាប់ផ្ដើមពីឆ្នាំ១៩៧៤។ ចាប់តាំងពីពេលនោះមក កម្មវិធីនេះត្រូវបានផ្ដល់សុពលភាពឲ្យអនុវត្តជាបន្តបន្ទាប់ចំនួន១៤ដង ដែលជាទូទៅការផ្តល់ទាំងនោះមានសុពលភាពរយៈពេលពី២ទៅ៣ឆ្នាំ។ ប្រទេសកម្ពុជាទទួលបានអត្ថប្រយោជន៏ពីកម្មវិធីនេះចាប់តាំងពីឆ្នាំ១៩៩៧ បន្ទាប់មកនៅឆ្នាំ២០១៦ ប្រទេសកម្ពុជាបាននាំទំនិញរបស់ខ្លួនមានដូចជា កាបូបយួរ កាបូបដៃ និងវ៉ាលីសជាដើមទៅកាន់សហរដ្ឋអាមេរិក ដោយមិនបាច់បង់ពន្ធជាង១៧៩លានដុល្លារ។ នេះបើតាមទិន្នន័យស្ថានទូតអាមេរិកប្រចាំកម្ពុជា៕

Vox Pop: ពលរដ្ឋខ្លះមិនពេញចិត្តចំពោះការផ្លាស់ប្តូរទីតាំងសត្វស្វាចេញពីតំបន់អង្គរ ហើយ សំណូមពរឲ្យអាជ្ញាធរមានដំណោះស្រាយប្រសើរជាងនេះ

ជា សុខនី (Chea Sokny) — Sat, 09 Jan 2021 05:08:11 +0000

ពលរដ្ឋមួយចំនួន ដែលត្រូវបានសម្ភាសន៍ដោយ Newsroom Cambodia បាននិយាយថាពួកគេមានការស្រងាកចិត្តដោយសារការផ្លាស់ទីលំនៅរបស់សត្វស្វាចេញពីតំបន់ប្រាសាទអង្គរវត្ត ដោយនិយាយថាវាជាផ្នែកមួយនៃធម្មជាតិដែលមនុស្សរស់នៅជាមួយសត្វស្វា ហើយអាជ្ញាធរគួរតែមានដំណោះស្រាយល្អជាងនេះ។

ស្វាដែលនៅជុំវិញប្រាសាទអង្គរ ក្នុងខេត្តសៀមរាប ត្រូវបានជាបញ្ហាក្នុងការជជែកដេញដោយយ៉ាងខ្លាំងក្នុងប៉ុន្មានសប្តាហ៏នេះ បន្ទាប់ពីអាជ្ញាធរជាតិអប្សរាបានសម្រេចយកស្វាកាចចេញពីតំបន់ប្រាសាទ ដោយយល់ឃើញថាសត្វស្វាទាំងនោះ បានដណ្តើមចំណី និងបានបង្កហានិភ័យជាច្រើន ក៏ដូចជាធ្វើឲ្យខាតបង់ទ្រព្យសម្បត្តិភ្ញៀវទេសចរផងដែរ។

ខាងក្រោមនេះគឺជាការលើកទ្បើងរបស់ពលរដ្ឋមួយចំនួននៅរាជធានីភ្នំពេញដែលបានធ្វើកិច្ចសម្ភាសន៍ជាមួយ Newsroom Cambodia។

កញ្ញាចាប ចាន់ធា

កញ្ញាចាប ចាន់ធា អាយុ២៨ឆ្នាំ បានឱ្យដឹងថា ស្វាជាសត្វស្លូតក្នុងចំណោមសត្វ ដែលអាចរស់នៅចុះសម្រុងជាមួយមនុស្សបាន ហើយធម្មតាប្រាសាទមានលក្ខណៈធម្មជាតិ ដូច្នេះធម្មជាតិត្រូវការមានសត្វអមមកជាមួយដើម្បីជួយលំអង។ ស្វាមិនអាចទៅប៉ះពាល់មនុស្សខ្លាំងណាស់ណាទេ បើសិនជាមុនុស្សមិនទៅធ្វើអីពួកវាមុន។

កញ្ញាបាននិយាយថា «សត្វអ្វីក៏ដោយ ក៏វាមានភាពកាចសាហាវ ធម្មតាទោះបីខ្ងុំស្រទ្បាញ់ឆ្កែ ក៏មានសត្វឆ្កែមួយចំនួនកាចដែរ។ ចំណែកស្វា ក៏ដូចតែគ្នា បើនិយាយទៅ យើងប្រៀបធៀបជាមួយមនុស្ស មនុស្សយើងមានសម្បញ្ញៈ តែចំពោះសត្វស្វាវិញ គឺមិនសូវមានទេ ពេលខ្លះវាអាចជ្រុលជ្រួសខាំយើង ប៉ុន្តែវាមិនអាចបណ្តាលឲ្យយើងស្លាប់ទេ»។

កញ្ញាបានញ្ជាក់ទៀតថា ពេលខ្លះមនុស្សមិនគួរមើលឃើញតែមួយជ្រុង វាយតម្លៃស្វាទាំងអស់ទេ យើងមើលទៅ តើស្វាណាកាច យើងចាប់វា ឬក៏បង្រៀនវាទៅ ព្រោះអីសត្វនឹង អាចបង្រៀនវាបាន មិនមែនសត្វស្វាមកបំផ្លាញប្រាសាទទេ មកពីប្រសាទកសាងយូរ វាមានភាពបាក់បែកខ្លះ។

កញ្ញាចាប ចាន់ធាបានបន្តថាបើយើងឲ្យចំណីស្វាគ្រប់គ្រាន់ វាមិនមកកញ្ឆក់ឥវ៉ាន់យើងទេ ហើយទុកវាឱ្យនៅដូចជួយលំអងប្រាសាទ និងជួយទាក់ទាញទេសចរម្យ៉ាងដែរ។

កុមារាអ៊ុន សិរីវណ្ណណុប (កណ្តាល)

កុមារាអ៊ុន សិរីវណ្ណណុប អាយុ១៥ឆ្នាំ បានឲ្យដឹងថា សត្វស្វានៅតាមប្រាសាទមើលទៅគួរឲ្យស្រលាញ់ និងគួរឱ្យចាប់អារម្មណ៍ ដល់ភ្ញៀវបរទេសពេលបានឃើញស្វានៅតាមប្រាសាទធ្វើឲ្យគេចង់មកទស្សនាទៀត។

អ៊ុន សិរីវណ្ណណុប បាននិយាយថា ស្វាធ្លាប់រកខាំពីមុនដែរ ក៏ប៉ុន្តែមិនចង់ឱ្យយកស្វាចេញពីប្រាសាទទេ ព្រោះចំនួនសត្វស្វាវាមានតិច ភ្ញៀវទេសចរណ៍ខ្លះគេចង់មកមើល ឬថតស្វាផងដែរ។

ព្រះនាម ថៈរៈមុន្នី គីមសាង

ព្រះនាម ថៈរៈមុន្នី គីមសាង ព្រះជន្ម២៧ឆ្នាំ សព្វថ្ងៃរៀននៅពុទ្ធិកសកលវិទ្យាល័យព្រះសីហមុនីរាជា ផ្នែកបរិស្ថានវិទ្យាបានប្រាប់ឲ្យដឹងថា ស្វាជាសត្វដ៍ល្អ និងឆ្លាតមួយ សម្រាប់ការទាក់ទាញភ្ញៀវទេសចរមកទស្សនា ជួយជម្រុញវិស័យទេសចរណ៍ ផ្តល់ចំណូលដល់អាជ្ញាធរ និងប្រជាពលរដ្ឋផងដែរ។

ព្រះនាម ថៈរៈមុន្នី គីមសាងបានបន្តថាការយកសត្វស្វាចេញពីប្រាសាទបាយ័ន្តមិនមែនជាដំណោះស្រាយល្អទេ អាជ្ញាធរត្រូវមានវិធីសាស្ត្រល្អជាងនេះ ដូចជានៅប្រទេសថៃ គេមានសត្វស្វាច្រើន ហេតុអ្វីគេក៏មិនយកវាចេញ។ សត្វស្វាមានសារធាតុពីធម្មជាតិមួយ គឺមានភាពរពិលរប៉ូច សម្បីតែចរិកមនុស្ស មនុស្សខ្លះកើតមកមានចរិកឈ្លើយ ចរិករពិលរប៉ូចដែរ យើងមិនអាចទៅកែប្រែចរិកមនុស្សបានទេ ប៉ុន្តែយើងអាចបង្រៀនបាន ស្វាក៏ដូចគ្នា។

«សត្វស្វា វាជាសត្វមួយដែលមានសញ្ញា ក៏ដូចវិញ្ញាណអត់ដូចមនុស្សទេ ធម្មតារបស់មនុស្សយើងវាមានធម្មវិញ្ញាណនៃការគិត រកភាពខុសត្រូវ ប៉ុន្តែសត្វស្វាវាអត់មានធម្មសញ្ញានៃការគិតទេ»។

លោកបានបន្ថែមថា «គំនិតរបស់អាត្មាផ្ទាល់ បរទេស ពួកគាត់ចូលចិត្តរបស់អ្វីដែលធម្មជាតិ ចូលចិត្តសត្វច្រើនជាងខ្មែរយើង បរទេសគេចូលចិត្តថែរក្សាសត្វច្រើន ហើយខ្មែរយើងគាត់មិនថែរក្សាទេ គាត់ចូលចិត្តបាញ់សម្លាប់យកសត្វហូប ហើយជួនកាលយកសត្វហ្នឹងទៅលក់ទៅឱ្យបរទេសជាច្រើន»។

លោកបងបញ្ជាក់ថា «ការយកសត្វស្វាចេញពីប្រាសាទបាយ័ន្តគឺអាជ្ញាធរមិនចេះដោះស្រាយបញ្ហា ដោយសារអ្វីរឿងតូចមួយទេ បើសិនជាសត្វស្វាកាច យើងអាចយកវាទៅបង្រៀន រកវិធីសាស្ត្រមួយដើម្បីកែស្វាហ្នឹងទៅ ឧទាហរណ៍ការយកសត្វស្វាចេញទៅកន្លែងផ្សេងទៀត អាចមាន ជនដែលនៅខាងក្រៅដូចជាសហគមន៍ផ្សេងៗ ឬមានជនខិលខូចគាត់នឹងបាញ់សម្លាប់សត្វយកទៅហូប»។

កញ្ញា រ៉ង រក្សា

កញ្ញា រ៉ង រក្សា អាយុ ១៨ឆ្នាំ បានប្រាប់ថា កញ្ញាចង់ឲ្យទុកស្វាទាំងនេះនៅតាមប្រាសាទ ព្រោះបើយើងថែរក្សាបានល្អ បរទេសនឹងកោតសរសើរថាយើងថែរក្សាមើលថែវាបានល្អ ហើយគួរតែរកមធ្យោបាយផ្សេងក្រៅពីការចាប់ចេញពីប្រាសាទ បើសិនជាវាពិតជាខាំភ្ញៀវមែន។

«ខ្ញុំគិតថាដល់ពេលជនជាតិ ឬជនបរទេសមកមើលអីចឹង មានលក្ខណៈសរសើរប្រទេសយើង ថារក្សាសត្វបានល្អ ចេះស្រលាញ់សត្វ និងស្រលាញ់ប្រទេសជាតិចឹង»។

កញ្ញាបានបន្ថែមថា «ខ្ញុំគ្រាន់តែចង់សំណូមពរទៅអាជ្ញាធរឱ្យរក្សាសត្វនៅហ្នឹង ទោះបីជាវាខាំ ឬយ៉ាងម៉េចក៏ដោយ គ្រាន់តែចង់ឱ្យរក្សាសត្វទុកនៅហ្នឹង ពេលភ្ញៀវទេសចរណ៍គេមកចឹងទៅ គេអាចសរសើរប្រទេសកម្ពុជាដែលរក្សាសត្វទុកបានល្អ ទោះបីវាខាំចឹង យើងអាចរកវិធីផ្សេងបាន»។

Vox Pop: ទស្សនៈពលរដ្ឋជុំវិញការទទួលបានតំណក់ប្រេងដំបូងនៅកម្ពុជា

ជា សុខនី (Chea Sokny) — Tue, 05 Jan 2021 09:43:32 +0000

លោកនាយករដ្ឋមន្រ្តី ហ៊ុន សែន ប្រកាសពីការទទួលបានតំណក់ប្រេងដំបូង កាលពីថ្ងៃថ្ងៃទី២៩ ខែធ្នូ ឆ្នាំ២០២០។ លោកបញ្ជាក់ថា នេះជាការចាប់ផ្ដើមមួយជំហានដំបូងដ៏សំខាន់សម្រាប់កម្ពុជាឆ្ពោះទៅបង្កើតបាននូវសមត្ថភាពជាតិ និងខឿនឧស្សាហកម្មប្រេងកាត ឧស្ម័ន និងថាមពលនៅកម្ពុជា។ លោកបន្ថែមថា ចំណូលបានពីប្រេងនឹងយកទៅអភិវឌ្ឍន៍វិស័យអប់រំ និងសុខាភិបាល។

យោងតាមការផ្សាយរបស់សារព័ត៌មានរ៉យទ័រ រដ្ឋាភិបាលកម្ពុជាមានភាគហ៊ុន៥% ក្នុងការបណ្តាក់ទុនជាមួយក្រុមហ៊ុន KrisEnergy និងថា កម្ពុជានឹងទទួលបានប្រមាណជា៥០០លានដុល្លារ ជាថ្លៃពន្ធ និងផ្សេងៗ។

Newsroom Cambodia បានសម្ភាសន៍ពលរដ្ឋមួយចំនួនអំពីការយល់ឃើញរបស់ពួកគេទៅលើតំណក់ប្រេងដំបូងនេះ៖

លោក នាវ ចន្ថា អាយុ២៩ឆ្នាំ ជាបុគ្គលិកនៅធនាគារកាណាឌីយ៉ាបាននិយាយថា លោកត្រេកអរដែលកម្ពុជាទទួលបានតំណក់ប្រេងដ៏មានតម្លៃដំបូងបំផុត។ លោកថា ប្រសិនបើរដ្ឋាភិបាលបង្កើតឲ្យមានរោងចក្រដើម្បីចម្រាញ់ផ្សេងៗ សេដ្ឋកិច្ចកម្ពុជានឹងខ្លាំងក្លា ហើយអាចជួយឲ្យវិស័យធំៗនៅកម្ពុជារីកចម្រើនបាន។

លោក នាវ ចន្ថា

លោកលើកឡើងដូច្នេះថា៖ «បើសិនជារដ្ឋាភិបាលរកឃើញប្រេងហ្នឹង គាត់បង្កើតឲ្យមានរោងចក្រ ចឹងមានន័យថាចំពោះសេដ្ឋកិច្ចរីកចម្រើនខ្លាំងជួយដល់ពីរវិស័យ ធំៗនៅក្នុងប្រទេសយើង ទីមួយគឺវិស័យអប់រំ ទីពីរគឺវិស័យសុខាភិបាល។

លោកបានបន្តថា៖ «ប្រសិនបើរដ្ឋាភិបាលរកឃើញប្រេងហើយគាត់មិនបង្កើតឲ្យមានរោងចក្រនៅក្នុងប្រទេសយើងទេ បានន័យថា យើងមានតែធនធានទេ តែយើងខ្វះសមត្ថភាពក្នុងការផលិត។ ចឹងបានន័យថាកន្លែងនេះគឺជា ចំណុចមួយដែលធ្វើឲ្យសេដ្ឋកិច្ចប្រទេសយើង ប្រេងនៅតែបន្តកើនឡើងដដែល»។

កញ្ញា កែវ ស្រីលាំង អាយុ២១ឆ្នាំ និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចយល់ថា វាជាដំណឹងល្អដែលប្រទេសកម្ពុជាអាចផលិតប្រេងដោយខ្លួនឯង ហើយអាចនឹងនាំចេញទៅបរទេសនាពេលអនាគត។

កញ្ញាលើកឡើងថា៖ «វាអាចជាដំណឹងល្អដែរដោយសារតែយើងអាចរកបានអ្វីដែលជារបស់ខ្លួនយើងផ្ទាល់ យើងអាចផលិត និងចែកចាយនៅក្នុងប្រទេសរបស់យើង រឿងមួយទៀតគឺយើងអាចចែកចាយទៅក្រៅប្រទេស អាហ្នឹងរឿងថ្ងៃមុខ»។

កញ្ញាក៏មានការព្រួយបារម្ភថា អាចនឹងមានអំពើពុករលួយដោយសារកម្ពុជាជាប្រទេសកំពុងអភិវឌ្ឍន៍។

កញ្ញាលើកឡើងថា៖ «ប្រទេសរបស់យើង គឺប្រទេសកំពុងអភិវឌ្ឍន៍ ជាប្រទេសក្រីក្រនៅឡើយ អញ្ចឹងវាក៏អាចមានអំពើពុក រលួយមួយចំនួនជាទិដ្ឋភាពទូទៅ ប្រទេសណាឲ្យតែជាប្រទេសក្រីក្រវាតែងតែមានហើយអំពើពុករលួយ។ ពេលដែលយើងយកប្រេងមកពីគេ គឺមានតម្លៃថ្លៃ វាអាចនឹងមានចុះដែរប៉ុន្តែចុះទៅតាមស្ថានភាព ចឹងពេលដែលយើងមានប្រេងខ្លួនឯង ហើយសំណូមពរឲ្យគាត់បន្ថយនូវតម្លៃប្រេងឲ្យវាចុះថោកជាងមុន»។

កញ្ញា កែវ ស្រីលាំង

កញ្ញា ង៉ឹល ហេន អាយុ២០ឆ្នាំ និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច សាទរចំពោះការទទួលបានប្រេងដំបូងដែលប្រទេសយើងមិនចាំបាច់នាំចូលពីបរទេស។ យ៉ាងណាក្តី កញ្ញានៅចង់ដឹងបន្ថែមពាក់ព័ន្ធនឹងចំណូលលើការបូមប្រេងទាំងនោះ។

កញ្ញាលើកឡើងថា៖ «យើងបានតំណក់ប្រេងមកហើយ ប៉ុន្តែយើងអត់ទាន់ដឹងទេថាតើក្នុង១ខែ ១ឆ្នាំយើងទទួលបានប្រេងប៉ុន្មាន ហើយប្រេងហ្នឹងតើយើងនឹងយកទៅប្រើប្រាស់ទៅលើអ្វីខ្លះ ក៏ដូចជាសញ្ញាណផ្សេងៗគឺយើងអត់ទាន់ដឹងទេ រាជ រដ្ឋាភិបាលអត់ទាន់បង្ហាញឲ្យយើងដឹងថា តើប្រេងហ្នឹងអាចទទួលចំណូលប៉ុន្មានពីប្រេង ប្រជាជនទទួលបានអ្វីខ្លះគឺ យើងអត់ទាន់ដឹងទេ។ កាលណាយើងទាញផលប្រយោជន៍អត់បានគិតពីបរិស្ថាន វាអាចនឹងមានផលប៉ះពាល់ ហើយ ការប្រើប្រាស់ប្រេងហ្នឹងដោយអត់មានតម្លាភាព»។

កញ្ញា ង៉ឹល ហេន

លោក ទឺ រតនា អាយុ២៩ឆ្នាំ អ្នកធ្វើវីដេអូបាននិយាយថា លោកសប្បាយចិត្តដែលកម្ពុជាអាចមានតំណក់ប្រេងដំបូងបំផុតដែលរង់ចាំអស់ជាយូរមកហើយ។

លោកលើកឡើងថា៖ «ខ្ញុំមានចំណាប់អារម្មណ៍ថាសប្បាយចិត្ត ហើយមួយទៀតគឺយើងត្រេកអរសម្រាប់ប្រទេសកម្ពុជា របស់យើងដែលយើងអាចមានសមត្ថភាពផលិតប្រេងដោយខ្លួនឯងបាន ហើយវាក៏ជាលើកទី១ដែរ»។

លោក ទឺ រតនា

លោក ឈឹម អូន អាយុ២៥ អ្នកធ្វើការនៅអង្គការអភិវឌ្ឍធនធានយុវជនបានប្រាប់ថា លោកសប្បាយចិត្តដែលកម្ពុជាអាចរកប្រភពចំណូលមួយទៀត ហើយជំរុញសេដ្ឋកិច្ចកម្ពុជាបានមួយកម្រិតទៀត។

លោកលើកឡើងថា៖ «ខ្ញុំសប្បាយចិត្តដោយសារតែធម្មតាពីមុនមកយើងមានមុខរបរចឹង បើថាវាជាប្រភពចំណូលមួយផ្សេងទៀត ចឹងវាអាចជំរុញឲ្យសេដ្ឋកិច្ចប្រទេសយើងវាអាចរីកចម្រើនជាងមុន។

ប៉ុន្តែលោកថា លោកសោកស្ដាយដោយសារកម្ពុជាខ្វះលក្ខណៈបច្ចេកទេស ទើបត្រូវសហការជាមួយក្រុមហ៊ុនបរទេសដើម្បីបូមយក ជាហេតុធ្វើឲ្យកម្ពុជាចំណេញបានត្រឹមតែ៥ភាគរយ។

«សម្រាប់ខ្ញុំចង់អោយព័ត៌មានហ្នឹងវាមានតម្លាភាពជាងហ្នឹងតិច‍‍ ព្រោះអ្វី? បើតាមខ្ញុំស្ដាប់ការប្រកាសរបស់សម្ដេចគាត់អត់មាននិយាយ តែខ្ញុំអត់ហ៊ាននិយាយដោយសារតែខ្ញុំស្ដាប់អត់បាន full [ពេញ] អីចឹង ខ្ញុំស្ដាប់ទៅបានតែលក្ខណៈកន្លែងល្អៗចឹង ខ្ញុំអត់ដឹងថាគេបាន៩៥% យើងបានតែ៥%»។

កញ្ញា ផុល លីដា និស្សិតនៅសាកលវិទ្យាល័យភូមិន្ទភ្នំពេញបាននិយាយថា ការទទួលបានតំណក់ប្រេងដំបូងនេះអាចនឹងជួយជីវភាពប្រជាពលរដ្ឋមួយផ្នែកដោយសារតែបច្ចុប្បន្នកំពុងជួបវិបត្តិកូវីដ១៩។

កញ្ញាលើកឡើងថា៖ «នៅពេលដែលឮថាខ្មែរទទួលបានដំណក់ប្រេងកាត ហើយគិតថាជីវភាពប្រជាជនយើងនឹងល្អប្រសើរជាងមុនចឹងទៅ ដោយសារតែដូចដឹងស្រាប់ហើយថាប្រទេសយើងកំពុងតែជួបបញ្ហាវិបត្តិសេដ្ឋកិច្ចដោយសារកូវីដចឹង នៅពេលដែលដឹងថាទទួលបានដំណក់ប្រេងគិតថាអស្ចារ្យខ្លាំងណាស់ វាជាផ្នែកមួយជួយដល់សេដ្ឋកិច្ចប្រជាជនឲ្យប្រសើរឡើងជាងមុនចឹងទៅ»។

កញ្ញាបន្តថា៖ «តែទាក់ទងនឹងការដែលយើងទទួលបានដំណក់ប្រេង៥% វារាងមិនស្មើគ្នាមែនទែន ដោយសារហេតុអី យើងជាម្ចាស់ប្រទេសហើយយើងបានតិចចឹងវាដូចអត់សមហ្មង បើមិនបានអីក៏បានស្មើភាពគ្នាដែរ ព្រោះអីធម្មតាចូលហ៊ុនគ្នាយើងត្រូវតែមានការចុះកុងត្រាអីត្រឹមត្រូវ បែងចែកថាត្រូវចែកគ្នាប៉ុន្មានភាគរយឲ្យវាសមាមាត្រចឹងណា។ ខ្ញុំចង់ឲ្យរដ្ឋាភិបាលគាត់ត្រឡប់ទៅមើលចំណុចនឹងឡើងវិញថា ធ្វើម៉េចឲ្យវាស្មើភាពគ្នាចឹង ព្រោះអីខ្ញុំគិតថាមិនមែនមានតែខ្ញុំដែលអត់សប្បាយចិត្ត នៅពេលដែលឮថាបានតែ៥%ចឹង ព្រោះអី១០០%គេបានទាល់តែ៩៥ហើយចឹងបានតែ៥% គឺតិចខ្លាំងមែនទែន »។

លោក ឃឿន កំសត់ និស្សិតវិទ្យាស្ថានជាតិសង្គមកិច្ចយល់ថា វាជារឿងល្អមួយដែលយើងអាចផលិតប្រេងបាន ប៉ុន្តែវាអាស្រ័យទៅលើកម្រិតនៃការបែងចែកថាមានតម្លាភាពកម្រិតណា។ លោកក៏មានការព្រួយបារម្ភ ដោយសារតែធនធាន មនុស្សកម្ពុជានៅមានកម្រិតដែលភាគច្រើនទៅពឹងផ្អែកទៅលើអ្នកដទៃ។

លោកលើកឡើងថា៖ «ខ្ញុំចង់ឲ្យរដ្ឋាភិបាលមានជាកញ្ចប់ថវិកាមួយសម្រាប់អ្នកជំនាន់ក្រោយ ឬធ្វើអ្វីមួយឲ្យរីកចម្រើនសម្រាប់អ្នកជំនាន់ក្រោយអោយបានឃើញដែរ ព្រោះអីធនធាននេះជាធនធានសម្រាប់អ្នកជំនាន់ក្រោយដូចគ្នា ខ្ញុំចង់ឲ្យរដ្ឋាភិបាលបែងចែកបង្កើតនូវតម្លាភាព តុល្យភាព ក៏ដូចជាគណនេយ្យភាពដើម្បីឲ្យមានភាពស្មើគ្នានៅក្នុងសង្គមចឹង»៕

ក្នុងសារជូនពរឆ្នាំថ្មី លោកកឹម សុខា បួងសួងឲ្យមានការបង្រួបបង្រួមជាតិ និងការគោរពសិទ្ធមនុស្ស

ជា សុខនី (Chea Sokny) — Thu, 31 Dec 2020 07:28:58 +0000

នៅក្នុងឱកាសឆ្លងឆ្នាំចាស់ចូលឆ្នាំថ្មី លោក កឹម សុខា អតីតប្រធានគណបក្យជំទាស់ នៅថ្ងៃទី៣១ ខែធ្នូ ឆ្នាំ២០២០នេះ បានបួងសួងឲ្យមានការបង្រួបបង្រួមជាតិ ការគោរពសិទ្ធិមនុស្ស និងសុំឲ្យកម្ពុជារួចផុតពីអំពើអកុសលផ្សេងៗ រួមមានការឈឺចាប់ ភាពអវិជ្ជមាន ភាពអយុត្តិធម៌ និងសេចក្ដីទុក្ខទាំងឡាយ។

តាមរយៈហ្វេសប៊ុក លោកកឹម សុខា អតីតប្រធានគណបក្សសង្រ្គោះជាតិ បានសរសេរដូច្នេះថា «សូមឲ្យឆ្នាំថ្មី២០២១នេះ នាំមកនូវការបង្រួបបង្រួមជាតិ ឯកភាពជាតិ សាមគ្គីជាតិ ដែលនឹងផ្តល់នូវសន្តិភាព ស្ថិរភាពរឹងមាំ ភាពសុខដុមរមនា ភាពកក់ក្តៅ ជូនដល់ប្រជាពលរដ្ឋខ្មែរយើង ដើម្បីកសាងវាសនាអនាគតថ្លៃថ្នូរ សម្បូររុងរឿង និងដើម្បីរួមគ្នាបម្រើ ការពារ ឯករាជ្យភាព អធិបតេយ្យភាពជាតិ បូរណភាពទឹកដី និងការអភិវឌ្ឍន៍ មាតុភូមិកម្ពុជាប្រកបដោយចីរភាព និងកិត្តិយស»។

បានបានបន្តថា «សូមឲ្យឆ្នាំចាស់ពីរពាន់ម្ភៃ (២០២០) ដែលត្រូវបញ្ចប់ថ្ងៃនេះ នាំយកទៅឲ្យផុតរលត់ពីភពផែនដី ជាពិសេស ពីមាតុភូមិកម្ពុជា នូវគ្រោះភ័យ ជំងឺរាតត្បាត អំពើអកុសល ដែលបណ្តាលឲ្យមានការឈឺចាប់ ភាពអវិជ្ជមាន ភាពអយុត្តិធម៌ ជាសេចក្តីទុក្ខទាំងឡាយ ទោះបីបង្កដោយធម្មជាតិក្តី ឬដោយមនុស្សលោកក្តី កុំឲ្យកើតមាននិងប៉ះពាល់ដល់ប្រជាពលរដ្ឋខ្មែរតទៅទៀត»។

លោកកឹម សុខា ត្រូវបានចាប់ខ្លួននៅឆ្នាំ ២០១៧ ហើយគណបក្សរបស់លោកត្រូវបានតុលាការកំពូលរំលាយមុនការបោះឆ្នោតឆ្នាំ២០១៨ ដែលគណបក្សកាន់អំណាចឈ្នះគ្រប់អាសនៈនៅក្នុងសភា។

លោក កឹម សុខា ត្រូវបានអាជ្ញាធរចាប់ខ្លួនក្រោមការចោទប្រកាន់ពីបទ «ក្បត់ជាតិ» ជាបទចោទដែលលោកបានបដិសេដចោល។

លោក សុខ ឥសាន្ត អ្នកនាំពាក្យគណបក្សកាន់អំណាច បានប្រាប់ Newsroom Cambodia តាមរយៈប្រព័ន្ធទូរស័ព្ទថា នេះគ្រាន់តែជាយោបល់ និងការគិតឃើញរបស់លោកកឹម សុខាទេ ក៏ប៉ុន្តែ «ចំពោះករណីគាត់វាកំពុងតែស្ថិតក្នុងនីតិវិធីរបស់តុលាការ មិនអាចទៅបន់ស្រង់ ឬមួយមិនអាចជូនពរចូលឆ្នាំថ្មី វារួចខ្លួនទេ»។

Vox Pop: អ្នកធាក់ស៊ីក្លូជួបការលំបាកនឹងជីវភាព ខណៈការប្រើប្រាស់ស៊ីក្លូធ្លាក់ចុះ

ជា សុខនី (Chea Sokny) — Sat, 26 Dec 2020 04:41:53 +0000

ស៊ីក្លូគឺជាមធ្យោបាយធ្វើដំណើរសម្រាប់មនុស្សរាប់ទសវត្សមកហើយ ក៏ប៉ុន្តែក្នុងរយៈប៉ុន្មានឆ្នាំចុងក្រោយនេះ ការប្រើស៊ីក្លូបានធ្លាក់ចុះយ៉ាងខ្លាំង ជាពិសេសតាំងពីមានការរីករាលដាលវីរុសកូវីដ ១៩ ក្នុងឆ្នាំ២០២០នេះ។

នេះបានធ្វើឲ្យអ្នកធាក់ស៊ីក្លូជួបការលំបាកក្នុងការទ្រទ្រង់ជីវភាពរបស់ពួកគាត់។ អ្នកធាក់ស៊ីក្លូនៅក្នុងទីក្រុងភ្នំពេញ កាលពីថ្ងៃពុធ ទី២៣ ខែធ្នូ ឆ្នាំ២០២០ នេះបានប្រាប់ Newsroom Cambodia អំពីបញ្ហាប្រឈមរបស់ពួកគាត់ដូចខាងក្រោម៖

លោក ឡេង ផាត កំពុងឈរក្បែរសុីក្លូរបស់គាត់នៅជិតព្រះបរមរាជវាំង

លោក ឡេង ផាត អាយុ ៦២ឆ្នាំ ជាអ្នកធាក់ស៊ីក្លូរយៈពេល ៣០ឆ្នាំ បាននិយាយថាគាត់រកប្រាក់ចំណូលមិន សូវបាននោះទេក្នុងពេលបច្ចុប្បន្ន ព្រោះមិនសូវមានភ្ញៀវជិះស៊ីក្លូរបស់គាត់។

«ពីមុនមានគេជិះ មានម៉ូយដឹកអីវ៉ាន់ចឹងណា ហើយមាននៅផ្សារ ឡូវអត់មានទេ»។

លោកបន្តថា «មួយថ្ងៃ រកបានពីមុនហ្នឹង ៣ម៉ឺន អីចឹងយើងហូបអស់១ម៉ឺន អីចឹងសល់២ម៉ឺន ហ្នឹងពីមុន ហើយឥឡូវបាន១ម៉ឺន ហ្នឹងហូបអស់អាលីង»។

លោកថាមូលហេតុដែលមិនសូវមានភ្ញៀវនេះគឺបណ្តាលមកពីមានវីរុសកូវីដ ១៩ ហើយមានមធ្យោបាយធ្វើ ដំណើរផ្សេងទៀតច្រើនដូចជា តុកតុក ម៉ូតូ ជាដើម។

លោក ម៉ែន ផែន កំពុងអង្គុយលើសុីក្លូរបស់គាត់នៅមុខក្លោងទ្វាវត្តឧណ្ណាឡោម

លោក ម៉ែន ផែន អាយុ ៩០ឆ្នាំ ជាអ្នកធាក់ស៊ីក្លូតាំងពីសម័យអាណានិគមនិយមបារាំង បាននិយាយថាលោក បាននិយាយថាបច្ចុប្បន្ននេះរកបានតែ ១ម៉ឺន ទៅ ១ម៉ឺន ជាងទេក្នុងមួយថ្ងៃ គ្រាន់តែសម្រាប់ហូបបាយប្រចាំថ្ងៃ ប៉ុណ្ណោះ។

លោកក៏ទទួលបានការផ្តល់ជាបាយខ្លះពីអង្គការដែរ ប៉ុន្តែលោកមិនបានបញ្ជាក់ពីឈ្មោះអង្គការនោះទេ។

លោកឡើងដូច្នេះថា៖ «មួយថ្ងៃបាន ១ម៉ឺន ១ម៉ឺនជាង គ្រាន់តែហូបកាហ្វេ ហូបបាយ ប៉ិនបានអង្គការផ្តល់ បាយទឹកអី »។«នៅតស៊ូអីចឹង ដឹងនៅធើ្វអី ចាស់ហើយមិនដឹងធើ្វអី»។

លោក ឡុត សុគត កំពុងអង្គុយនៅលើសុីក្លូរបស់គាត់នៅលើបណ្តោយផ្លូវចន្លោះមាត់ទន្លេ និងព្រះបរមរាជវាំង

លោក ឡុត សុគត អាយុ ៤៦ឆ្នាំ ជាអ្នកធាក់ស៊ីក្លូរយៈពេល ៣ឆ្នាំ ថាគាត់រកមិនសូវបាននោះទេក្នុងពេល បច្ចុប្បន្ននេះដោយសារតែមានមធ្យោបាយធ្វើដំណើរផ្សេងទៀតច្រើន គឺគាត់មានភ្ញៀវតែចាស់ៗដែលមកវត្ត ក្នុងថ្ងៃសីលបានប្រមាណជា ៥០០០ រៀលប៉ុណ្ណោះ។

លោកលើកឡើងដូច្នេះថា៖ «មិនបានទេ បានតែ៥០០០យកទៅ ធ្វើម៉េចបើគេជិះតែ PassApp ហើយស៊ីក្លូ យើងបានដឹកយាយៗ ថ្ងៃសីល ១០០០, ១៥០០»។

លោកបានបន្តថា ចង់រកមុខរបរថ្មីទៀតព្រោះមុខរបរនេះមិនអាចផ្គត់ផ្គង់ជីវភាពរបស់គាត់បានទេ ប៉ុន្តែគាត់មិនទាន់រកបានមុខរបរថ្មីនៅឡើយ។

លោក សុ ផាត កំពុងអង្គុយនៅលើសុីក្លូរបស់គាត់ក្បែរព្រះបរមរាជវាំង

លោក សុ ផាត អាយុ ៦២ឆ្នាំ ជាអ្នកធាក់ស៊ីក្លូប្រមាណ៣០ឆ្នាំ បាននិយាយថាសព្វថ្ងៃនេះរូបលោកកំពុងជួប វិបត្តិសេដ្ឋកិច្ចយ៉ាងខ្លាំង ដោយសាររកប្រាក់ចំណូលមិនសូវបានក្នុងអំឡុងពេលមានវីរុសកូវីដ ១៩។

លោកបាននិយាយថា៖ «មានផលវិបាក រកមិនបានហ្នឹងឡូវហ្នឹង តាំងកូវីដមករហូតទាល់តែឡូវ គ្មានភ្ញៀវគ្មានអីដឹកទេ»។

លោកនិយាយថាកាលពីមុនលោករកបានប្រាក់ចំណូលចន្លោះពីជាង ២ម៉ឺនដល់ ៥ម៉ឺនរៀលក្នុងមួយថ្ងៃ ចំណែកបច្ចុប្បន្នបានត្រឹម១ម៉ឺន។ លោកបន្តទៀតថា៖ «ជួលសមាគមស៊ីក្លូ មួយខែ ៥ម៉ឺន ដល់ឥឡូវគ្រូអត់យក ដល់កូវីដ អីចេះ»។

លោក ដារ៉ូ កំពុងឈរនៅក្បែរសុីក្លូក្បែរផ្សារកណ្តាល

លោក ដារ៉ូ អាយុ ៦១ឆ្នាំ ជាអ្នកធាក់ស៊ីក្លូប្រមាណជា ៣០ឆ្នាំ ក៏កំពុងជួបបញ្ហាមិនខុសពីអ្នកធាក់ស៊ីក្លូផ្សេងទៀតដែរ លោកថាពីមុនគាត់រកបានយ៉ាងហោចណាស់ក៏បាន ២ម៉ឺន ទៅ ៣ម៉ឺនរៀលដែរ ប៉ុន្តែឥឡូវបានត្រឹម ១ម៉ឺនរៀល មិនអាចចំណាយគ្រប់គ្រាន់នោះទេ។

លោកលើកឡើងដូច្នេះថា៖ «ពីមុនយើងរកបាន ឥឡូវរកអត់បានទេម៉ាព្រឹកបាន ១ម៉ឺន ចាយមិនគ្រាន់ ពីមុន បាន៣ ទៅ ៤ម៉ឺនម៉ាព្រឹក» ។

«វាមានជំងឺហ្នឹងហើយគេលែងជិះ លែងម៉ោ លែងម៉ោផ្សារចឹងទៅ មាន PassApp ២០០០ ទៅ ៣០០០ គេទៅហើយ ស៊ីក្លូរកអត់បាន គេអត់ជិះ»។

លោកថាបើសិនជាស្ថានភាពក្នុងប្រទេសនៅតែបែបនេះទៀត លោកនឹងបោះបង់ចោលអាជីពមួយនេះ។

«ស្រុកម៉េចៗ បោះបង់ចោលអាហ្នឹង ព្រោះស្រុក ណាកើតជំងឺ»។

លោក អ៊ឹម សម្បត្តិ ប្រធានសមាគមអភិរក្សស៊ីក្លូ និងមុខរបបរក្រៅប្រព័ន្ធបានប្រាប់តាមរយៈទូរស័ព្ទថាលោកមានការព្រួយបារម្ភជាខ្លាំង អំពីការធ្លាក់ចុះជាបន្តបន្ទាប់នៃអ្នកធាក់ស៊ីក្លូ។

លោកបានអះអាងថា នៅឆ្នាំ១៩៩៩ មានអ្នកធាក់ស៊ីក្លូនៅក្នុងភ្នំពេញ ប្រមាណជាង ១៥០០នាក់ ហើយក្នុង ២០១២ ចន្លោះពី ៦០០ ទៅ ៦០០ នាក់ជាង។

ដោយឡែកពីឆ្នាំ ២០១២ មកទល់បច្ចុប្បន្ននេះ មានអ្នកធាក់ស៊ីក្លូប្រហែលជា ៣០០នាក់ជាង និងចំនួនស៊ីក្លូ ៤០០គ្រឿង។

លោកបានបន្តថា មូលហេតុដែលបណ្តាលឲ្យពួកគាត់ដែលជាអ្នកធាក់ស៊ីក្លូជួបការលំបាកគឺដោយសារតែមុខរបរ នេះពឹងផ្អែកទៅលើវិស័យទេសចរណ៍ទាំងស្រុង ខណៈដែលប្រទេសកំពុងជួបវិបត្តិកូវីដ ១៩ ផងធ្វើឲ្យមិនសូវភ្ញៀវទេសចរកម្សាន្តជាដើម។

«ដោយសារឥឡូវនេះ ពឹងផ្អែកទៅលើវិស័យទេសចរណ៍សុទ្ធសាធតែម្តង មែនទែនទៅ បើសិនជាមានស៊ីក្លូនៅថេរ ទាល់ណាតែមានវិស័យទេសចរណ៍»។

លោកបានប្រាប់ទៀតថា រដ្ឋាភិបាលបានជួយឧបត្ថម្ភជាថវិកា២១ម៉ឺន ក្នុងមួយខែសម្រាប់អ្នកធាក់ស៊ីក្លូនៅ ក្នុងសមាគម និងទទួលបានប័ណ្ណ ប.ស.ស ពីក្រសួងការងារ។

លោកលើកដូច្នេះថា៖ «រដ្ឋាភិបាលលោកជួយម៉ាផ្នែកទៅហើយសព្វថ្ងៃហ្នឹង គាត់មានប្រាក់ឧបត្ថម្ភប្រចាំខែ មួយខែបាន ២១ម៉ឺន មួយផ្នែកផ្សេងទៀតបានប័ណ្ណ ប.ស.ស ពីក្រសួងការងារនៅពេលគាត់ឈឺ គាត់អី គាត់ អាចទៅមន្ទីរពេទ្យរដ្ឋ គេមិន Charge ( គិតថ្លៃ ) ថវិកាគាត់ទេ»៕

តុលាការព្រះសីហនុផ្ដន្ទាទោសឪពុកដែលរំលោភកូនស្រីខ្លួនឯងឲ្យជាប់ពន្ធនាគាររយៈពេល៧ឆ្នាំ

ជា សុខនី (Chea Sokny) — Fri, 25 Dec 2020 09:10:03 +0000

សាលាដំបូងខេត្តព្រះសីហនុ កាលថ្ងៃទី១៥ ខែឆ្នូ ឆ្នាំ២០២០ បានផ្ដន្ទាទោសបុរសជាឪពុកដែលមានអាយុ៤១ឆ្នាំពីបទរំលោភសេពសន្ថវៈទៅលើកូនស្រីរបស់ខ្លួនដែលមានអាយុ១២ឆ្នាំ ឲ្យជាប់ពន្ធនាគាររយៈពេល៧ឆ្នាំ។ នេះបើតាមសេចក្តីប្រកាសព័ត៌មានរបស់អង្គការសកម្មភាពដើម្បីកុមារ។

ក្នុងសេចក្តីប្រកាសព័ត៌មានរបស់អង្គការសកម្មភាពដើម្បីកុមារ ចេញនៅថ្ងៃទី១៥ ខែធ្នូ ឆ្នាំ២០២០ បញ្ជាក់ថា ហេតុការណ៍នៃការរំលោភកូនស្រីខ្លួនឯងនេះបានកើតឡើងនៅពេលដែលម្ដាយក្មេងស្រីរងគ្រោះទុកកូនៗនៅជាមួយឪពុក ដោយម្ដាយបានចេញទៅធ្វើការនៅប្រទេសម៉ាឡេស៊ីកាលពីឆ្នាំ២០១៩ រហូតមកដល់ខែមករា ឆ្នាំ២០២០។ សេចក្តីប្រកាសដដែលបន្ថែមថា ស្រ្ដីដែលជាម្ដាយក្មេងស្រីរងគ្រោះបានត្រឡប់មកប្រទេសកម្ពុជាវិញ ហើយដឹងថាប្ដីរបស់ខ្លួនបានរំលោភកូនស្រីបង្កើតខ្លួនឯង ក៏បានទៅដាក់ពាក្យបណ្ដឹងឲ្យសមត្ថកិច្ចចាប់ខ្លួនប្ដីយកទៅចាត់ការតាមច្បាប់។

លោក ឃឹម វ៉ាន់ដូ ជាអ្នកឯកទេសផ្នែកគាំពារកុមារនៅអង្គការសកម្មភាពដើម្បីកុមារ ប្រាប់ Newsroom Cambodia តាមរយៈប្រព័ន្ធទូរស័ព្ទ កាលពីថ្ងៃទី១៧ ខែធ្នូ ឆ្នាំ២០២០ថា កុមារីរងគ្រោះត្រូវបានបញ្ជូនទៅខាងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះសីហនុ ហើយខាងមន្ទីរនឹងក៏បានធ្វើការនៅក្នុងមូលដ្ឋានជាមួយអង្គការម្លប់តាប៉ាង និងអង្គការសកម្មភាពដើម្បីកុមារ ដែលផ្ដល់ជាការគាំពារ និងផ្ដល់ការគាំទ្រពីផ្នែកច្បាប់។

លោកក៏បានបន្ថែមថា៖ «ក្នុងអំឡុងពេលដែលគាត់ចូលរួមក្នុងនីតិវិធីមានន័យថាការគាំទ្រមួយចំនួនត្រូវបានផ្ដល់ជូនគាត់ ដើម្បីឲ្យគាត់អាចចូលរួមបានគ្រប់នីតិវិធី ដែលទាក់ទងផ្នែកប្រឹក្សាផ្ដល់យោបល់ផ្លូវអារម្មណ៍ និងប្រឹក្សាផ្នែកច្បាប់ផងដែរ ដូចជាផ្ដល់មេធាវីដោយមិនគិតកម្រៃ»។

លោក ប៊ុន ហេង ព្រះរាជអាជ្ញារងសាលាដំបូងខេត្តព្រះសីហនុ បានប្រាប់ Newsroom Cambodia តាមរយៈប្រព័ន្ធតេលេក្រាមថា លោកមិនទាន់អាចស្វែងរកករណីនេះដើម្បីផ្ដល់ព័ត៌មានបាននៅឡើយទេ៕

ពលរដ្ឋ២៤គ្រួសារក្នុងតំបន់អភិវឌ្ឍន៍បណ្ដោយដងស្ទឹងសៀមរាប តវ៉ាមិនផ្លាស់ប្តូរលំនៅតាមរដ្ឋបាលខេត្ត

ជា សុខនី (Chea Sokny) — Thu, 24 Dec 2020 06:08:35 +0000

ពលរដ្ឋចំនួន២៤គ្រួសារស្ថិតក្នុងតំបន់អភិវឌ្ឍន៍តាមបណ្ដោយដងស្ទឹងសៀមរាប ខេត្តសៀមរាប បន្តតវ៉ាដោយមិនព្រមផ្លាស់ប្តូរលំនៅឋានតាមការរៀបចំរបស់រដ្ឋបាលខេត្ត។ នេះបើតាមការបញ្ជាក់ពីមន្រ្តីអង្គការអាដហុកប្រចាំខេត្តសៀមរាប។

លោក សួស ណារិន មន្រ្តីស៊ើបអង្កេតនៅអង្គការអាដហុកប្រចាំខេត្តសៀមប្រាប់ Newsroom Cambodia តាមទូរស័ព្ទថា ពលរដ្ឋជាង៤០០គ្រួសារបានស្ម័គ្រចិត្តរុះរើ និងផ្លាស់ប្ដូរដីលំនៅដ្ឋានដែលស្ថិតក្នុងតំបន់អភិវឌ្ឍន៍តាមបណ្ដោយដងស្ទឹងសៀមរាប ចន្លោះស្ពាននាគ និងស្ពានអង្គរក្នុងខេត្តសៀមរាប ដោយមានការចាប់ឆ្នោតសម្រាប់ដីឡូត៍ថ្មី ហៅថាភូមិធម្មជាតិរុនតាឯក រៀបចំដោយរដ្ឋបាលខេត្ត។

លោកបន្ថែមថា ក្រោយពីមានការរុះរើ ក៏មានគោលនយោបាយដោះស្រាយដីធ្លី ហើយនៅពេលដែលយកប្រជាជនពីមាត់ស្ទឹងសៀមរាបនេះ យកទៅដាក់នៅភូមិធម្មជាតិរុនតាឯក គឺមានចាប់ឆ្នោត ពុះលេខឡូត៍សម្រាប់ប្រជាជនដែលចេញពីមាត់ស្ទឹង។ ទោះយ៉ាងណាលោកថា ក៏នៅមានពលរដ្ឋជាង២០គ្រួសារបន្តតវ៉ានៅឡើយ។

«ខ្ញុំគិតថានៅពេលដែលយកប្រជាពលរដ្ឋទៅដាក់ភូមិធម្មជាតិរុនតាឯក វាប៉ះដីអ្នកស្រុកនៅភូមិតានី ឃុំរុនតាឯក ២៤គ្រួសារដែលពួកគាត់កំពុងតវ៉ា ពួកគាត់អត់ព្រមទេ»។

លោក នួន ពុទ្ធារ៉ា អភិបាលក្រុងសៀមរាប ប្រាប់ Newsroom Cambodia តាមទូរស័ព្ទថា មានប្រជាពលរដ្ឋប្រមាណ៩៥%បានមកផ្ដិតមេដៃ ហើយនឹងទទួលបានរបបគោលនយោបាយ។ លោកថា នៅសល់ជាង៤%ទៀត ដែលអាជ្ញាធរកំពុងតែធ្វើការស្វះស្វែងរក ដោយសារពលរដ្ឋខ្លះបានធ្វើការនៅឆ្ងាយ ប៉ុន្តែលោកបានបដិសេធថាមិនមានពលរដ្ឋដែលរុះរើហើយមិនទាន់បានទទួលរបបគោលនយោបាយនោះទេ។

លោកបញ្ជាក់ថា៖ «ខ្ញុំបានបញ្ជក់ជាមួយក្រុមការងារដែរឃើញព័ត៌មានចុះ ករណីនឹងកើតឡើងយូរហើយ អីចឹងហើយអាជ្ញាធរនៅទីនោះកំពុងបន្តការដោះស្រាយ ក៏ប៉ុន្តែទាក់ទងនឹងទីតាំងគឺផ្សេងគ្នា។ ខ្ញុំសូមបដិសេធទាំងស្រុងចំពោះករណីប៉ះពាល់ដល់ដីអ្នកភូមិតានីគ្មានទេ» ។

សូមបញ្ជាក់ថា កាលពីថ្ងៃទី២១ ខែឆ្នូ ឆ្នាំ២០២០ លោកទៀ សីហា ជាអភិបាល នៃគណៈអភិបាលខេត្តបានដឹកនាំក្រុមការងារចុះពិនិត្យ និងរៀបចំដីធ្លីសម្រាប់ប្រជាពលរដ្ឋដែលធ្វើការផ្លាស់ប្ដូរទីតាំងដីដងស្ទឹង ដោយទទួលបានគោលនយោបាយដីទំហំ២០ម៉ែត្រគុណនឹង៣០ម៉ែត្រ ស្ថិតក្នុងភូមិធម្មជាតិរុនតាឯក ឃុំឃុនរាម ស្រុកបន្ទាយស្រី ខេត្តសៀមរាប៕

សិស្សទី១២មួយចំនួនខកចិត្តចំពោះមិនមានការកំណត់និទ្ទេសប្រឡង

ជា សុខនី (Chea Sokny) — Tue, 22 Dec 2020 08:01:18 +0000

ការរីករាលដាលជំងឺកូវីដ១៩ បានធ្វើឲ្យកម្ពុជាផ្អាកការសិក្សា និងការប្រឡងជាបន្តបន្ទាប់ជាច្រើនដង ជាពិសេសសិស្សថ្នាក់ទី១២ ជាឆ្នាំដែលត្រូវប្រឡងសញ្ញាប័ត្រមធ្យមសិក្សាទុតិយភូមិ។ ចាប់តាំងពីពាក់កណ្តាលឆ្នាំ២០២០មក ក្រសួងអប់រំបានពន្យារពេលប្រឡងម្ដងហើយម្ដងទៀត រហូតដល់សម្រេចមិនមានការប្រឡង ហើយឲ្យជាប់ទាំងអស់ ដោយមិនបានផ្ដល់និទ្ទេស។

ការសម្រេចមិនមានការប្រឡងបាក់ឌុប ហើយឲ្យសិស្សទាំងអស់ជាប់ដោយស្វ័យប្រវត្តិដោយមិនមាននិទ្ទេសក្នុងឆ្នាំ២០២០នេះ បានធ្វើឲ្យសិស្សមួយចំនួនដែលអះអាងថាបានខិតខំប្រឹងប្រែងរៀនសូត្រតាំងពីដើមឆ្នាំមក មានការខកចិត្ត។

កញ្ញា សន រំចង់ សិស្សថ្នាក់ទី១២ នៅវិទ្យាល័យមេសាង ខេត្តព្រៃវែង បានឲ្យដឹងថា កញ្ញារៀនថា្នក់វិទ្យាសាស្ត្រពិត ហើយខិតខំប្រឹងប្រែងតាំងពីដើមឆ្នាំដើម្បីប៉ងយកនិទ្ទេស A ប៉ុន្តែកញ្ញាថា ការសម្រេចឲ្យសិស្សទី១២ទាំងអស់ជាប់ដោយមិនមាននិទ្ទេសធ្វើឲ្យកញ្ញាមានការសោកស្ដាយយ៉ាងខ្លាំង ដោយសារមិនបានបញ្ចេញសមត្ថភាពរបស់ខ្លួន។

សិស្សវ័យ១៧ឆ្នាំរូបនេះបញ្ជាក់ថា៖ «អាចនឹងប៉ះពាល់ដល់ខ្ញុំនៅពេលដែលមិនមានការកំណត់និទ្ទេស ពេលទៅសិក្សាថ្នាក់មហាវិទ្យាល័យអាចនឹងបាត់បង់អាទិភាពមួយចំនួន និងគ្មានអ្វីទៅបង្ហាញពេលចង់ដាក់ទៅធ្វើការ»។

ចំណែកកញ្ញា សូត្រ សម្ភស្ស សិស្សទី១២ នៅវិទ្យាល័យសុខអានសំរោង ប្រាប់ថា កញ្ញាខំរៀនទាំងថ្ងៃទាំងយប់គ្មានពេលសម្រាក ដើម្បីចង់បាននិទ្ទេសល្អសម្រាប់អនាគតខ្លួនឯង និងគ្រួសារ។ ប៉ុន្តែកញ្ញាថា កញ្ញាបែរជាត្រូវខកចិត្តចំពោះការមិនបានប្រឡង ដោយក្រសួងអនុញ្ញាតឲ្យជាប់ទាំងអស់ ដែលកញ្ញាថា នេះ ជារឿងអយុត្តិធម៌សម្រាប់អ្នកប្រឹងប្រែងរៀនសូត្រដូចកញ្ញា។

សម្ភស្សលើកឡើងថា៖ «ខ្ញុំបាក់ទឹកចិត្តជាខ្លាំងដែលខំប្រឹងរៀនសូត្រដើម្បីបាននិទ្ទេសល្អ តែបែរជាមិនកំណត់និទ្ទេស»។

លោកស្រី អ៊ុក ឆាយាវី ប្រធានសមាគមគ្រូបង្រៀនឯករាជ្យ ប្រាប់ Newsroom Cambodia ថា ថ្នាក់ទី១២ជាថ្នាក់បញ្ចប់នៃវិទ្យាល័យរបស់សិស្សដើម្បីឆ្ពោះទៅរកការងារ ឬក៏រៀនបរិញ្ញាបត្របន្តទៀត ដូច្នេះត្រូវតែមានការបញ្ចេញសមត្ថភាព និងការប្រកួតប្រជែងសម្រាប់ពួកគាត់។ លោកស្រីបន្ថែមថា លោកស្រី មិនគាំទ្រចំពោះការជាប់ដោយមិនបាច់ប្រឡងនោះទេ។

លោកស្រីបញ្ជាក់ថា៖ «ការស្រង់ពិន្ទុតាមសាលាគឺមិនសុក្រឹត្យដូចថ្នាក់ជាតិប្រសិនបើមានការប្រឡងតេស្តទូទាំងប្រទេស ប៉ុន្ដែមិនប្រមូលផ្ដុំតែទីរួមខេត្តមួយដូចរាល់ដងទេ យើងធ្វើតាមវិទ្យាល័យមួយៗអីចឹង ខ្ញុំគិតថាជាតេស្តមួយដ៏ល្អប្រសើរបំផុតក្នុងសម័យកូវីដនេះ»។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ដោយមិនបានឆ្លើយសំណួរពីខាង Newsroom Cambodia ពាក់ព័ន្ធនឹងការមិនពេញចិត្តចំពោះការមិនកំណត់និទ្ទេននោះទេ ប៉ុន្តែលោកថា ក្រសួងនឹងជូនដំណឹងបន្ថែមស្ដីពីទិដ្ឋភាពពាក់ព័ន្ធក្នុងពេលឆាប់ៗនេះ។

កាលពីថ្ងៃទី១៦ ខែធ្នូ ឆ្នាំ២០២០ ក្រសួងអប់រំ យុវជន និងកីឡាកំណត់ឲ្យជាប់ជាស្ថាពរ ចំពោះបេក្ខជនទាំងអស់ (រួមទាំងបេក្ខជនស្វៃរិនបំពេញវិជ្ជា និងស្វៃរិនបំពេញវិជ្ជា) ដែលបានចុះឈ្មោះប្រឡង ក្នុងឆ្នាំសិក្សា២០១៩-២០២០ ដោយគ្មានការកំណត់និទ្ទេស៕

ក្រសួងសុខាភិបាលប្រកាសឲ្យពលរដ្ឋដែលបានចូលហាង Hidden Coffee ទៅធ្វើតេស្តរកជំងឺកូវីដ១៩

ជា សុខនី (Chea Sokny) — Wed, 16 Dec 2020 08:10:46 +0000

ក្រសួងសុខាភិបាល នៅព្រឹកថ្ងៃទី១៦ ខែធ្នូ ឆ្នាំ២០២០នេះ បានប្រកាសដល់ប្រជាពលរដ្ឋដែលធ្លាប់ចូលហាងកាហ្វេ Hidden Coffee ចន្លោះម៉ោង១៥:៣០នាទី ដល់ម៉ោង១៦:០០នាទីរសៀល នាថ្ងៃទី០៤ ខែធ្នូ ឆ្នាំ២០២០ ទៅធ្វើតេស្តរកជំងឺកូវីដ១៩ និងធ្វើចត្តាឡីស័ក។

យោងតាមសេចក្ដីប្រកាសព័ត៌មានរបស់ក្រសួងសុខាភិបាលដដែលបន្ថែមថា បុរសជាអ្នកជំងឺកូវីដ១៩ម្នាក់ (មុនពេលរកឃើញថាមានជំងឺកូវីដ១៩) ធ្លាប់បានទៅអង្គុយពិសាកាហ្វេនៅហាង Hidden Coffee នេះ កាលពីថ្ងៃទី៤ ខែធ្នូ ឆ្នាំ២០២០។ ក្រសួងបន្ថែមថា ប្រជាពលរដ្ឋដែលបានចូលហាងកាហ្វេ Hidden Coffee ក្នុងអំឡុងពេលវេលានោះ ត្រូវទៅធ្វើតេស្តរកជំងឺកូវីដ១៩នៅវិទ្យាស្ថានជាតិសុខាភិបាលសាធារណៈ និងធ្វើចត្តាឡីស័កនៅតាមផ្ទះឲ្យគ្រប់រយៈពេល១៤ថ្ងៃ តាមការណែនាំរបស់ក្រសួងសុខាភិបាល។

អ្នកជំងឺកូវីដ១៩ ដែលបានរកឃើញពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ចាប់ពីថ្ងៃទី២៨ ខែវិច្ឆិកា ដល់ព្រឹកថ្ងៃទី១៦ ខែធ្នូ ឆ្នាំ២០២០ មានចំនួន៤១នាក់ អ្នកសះស្បើយមានចំនួន០៧នាក់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន ៣៤នាក់៕

អង្គការចំនួន៣ទទូចឲ្យរដ្ឋាភិបាលផ្តល់សេវាសុខភាពរបស់អ្នកជាប់ឃុំនៅពន្ធនាគារដើម្បីការពារពីជំងឺកូវីដ១៩

ជា សុខនី (Chea Sokny) — Tue, 15 Dec 2020 14:27:43 +0000

អង្គការសង្គមស៊ីវិលជាតិ និងអន្តរជាតិចំនួន៣នៅថ្ងៃទី៩ ខែធ្នូ បានអំពាវនាវឲ្យរដ្ឋាភិបាលកម្ពុជាចេញវិធានការការពារអ្នកដែលកំពុងជាប់ឃុំក្នុងពន្ធនាគារពីជំងឺកូវីដ១៩ បន្ទាប់ពី មានការរកឃើញមន្ត្រីពន្ធធនាគារឆ្លងជំងឺកូវីដ១៩។

បើតាមសេចក្តីថ្លែងការណ៍រួមរបស់អង្គការលើកលែងទោសអន្តរជាតិ អង្គការឃ្លាំមើលសិទ្ធិមនុស្ស និងសម្ព័ន្ធខ្មែរជំរឿន និងការពារសិទ្ធិមនុស្សលីកាដូ ចេញនៅថ្ងៃទី៩ ខែធ្នូ ឆ្នាំ២០២០ បញ្ជាក់ថា ដោយសាររកឃើញមានមន្ត្រីពន្ធនាគារមួយចំនួនមានផ្ទុកជំងឺកូវីដ១៩ ដែលជាហេតុធ្វើឲ្យមានការព្រួយបារម្ភទៅដល់អ្នកជាប់ឃុំថាអាចងាយនឹងឆ្លងជំងឺនេះ។

សេចក្តីថ្លែងការណ៍រួមនោះបញ្ជាក់ក្នុងន័យដើមថា៖ «ដោយសារពន្ធនាគារនៅក្នុងប្រទេសកម្ពុជាមានភាពចង្អៀតណែនខ្លាំង កង្វះនូវការទទួលបានសេវាថែរទាំ និងព្យាបាលជំងឺ ក៏ដូចជាតម្រូវការមូលដ្ឋានដូចជាសាប៊ូ និងទឹកស្អាត ដើម្បីអនុវត្តវិធានការអនាម័យ អ្នកជាប់ឃុំក្នុងពន្ធនាគារនៅកម្ពុជាជិត៤ម៉ឺននាក់ គឺកំពុងតែប្រឈមយ៉ាងខ្លាំងពីការឆ្លងវីរុសកូវីដ១៩ ដែលអាចបណ្ដាលឱ្យមានការស្លាប់បាត់បង់ជីវិតដោយសារការឆ្លងវីរុសនេះ»។

អង្គការទាំងនេះក៏បានទទូចឲ្យអាជ្ញាធរចាត់វិធានការឲ្យបានឆាប់ ដើម្បីការពារសិទ្ធិក្នុងការរស់រានមានជីវិត និងសិទ្ធិក្នុងការទទួលបានសេវាសុខភាពរបស់មនុស្សគ្រប់រូបដែលកំពុងជាប់ឃុំនៅក្នុងប្រទេសកម្ពុជា។

«សូមស្នើសុំដោយទទូចឱ្យរាជរដ្ឋាភិបាលកម្ពុជាចាត់វិធានការឱ្យបានឆាប់ ដើម្បីការពារសិទ្ធិទទួលបានសេវាសុខភាពរបស់អ្នកជាប់ឃុំក្នុងពន្ធនាគារ មន្រ្តីពន្ធនាគារ និងសហគមន៍នៅខាងក្រៅ ដោយការធ្វើតេស្តរកមេរោគកូវីដ១៩ដោយប្រុងប្រយ័ត្នសម្រាប់អ្នកដែលនៅក្នុងពន្ធនាគារ អនុវត្តវិធានការអនាម័យនិងរក្សាគម្លាតសង្គមនៅក្នុងពន្ធនាគារប្រកបដោយប្រសិទ្ធភាព និងចាត់វិធានការភ្លាមៗដើម្បីកាត់បន្ថយភាពចង្អៀតណែននៅក្នុងពន្ធនាគារ»។

លើសពីនេះទៅទៀតអង្គការទាំងបីក៏បានអំពាវនាវឲ្យអាជ្ញាធរគោរព និងការពារសិទ្ធិក្នុងការទទួលបានការជំនុំជម្រះក្ដីដោយយុត្តិធម៌ និងផ្តល់អាទិភាពក្នុងការដោះលែងអ្នកជាប់ឃុំដែលត្រូវបានកាត់ទោសបទល្មើសស្រាល អ្នកជាប់ឃុំដែលបានអនុវត្តទោសជិតចប់ មនុស្សចាស់ អ្នកជាប់ឃុំដែលមានបញ្ហាសុខភាពធ្ងន់ធ្ងរ ស្រ្ដីជាប់ឃុំដែលមានកូនតូចនៅជាមួយ អ្នកជាប់ឃុំជាស្រ្ដីមានផ្ទៃពោះ និងអនីតិជន។

លោក នុត សវនា អ្នកនាំពាក្យអគ្គនាយកដ្ឋានពន្ធនាគារ បានប្រាប់ Newsroom Cambodia ថា មកដល់ពេលនេះមិនទាន់មានជងឺកូវីដ១៩នៅពន្ធនាគារនៅឡើយទេ។ លោកបន្តថា នៅពន្ធនាគារតែងមានការអនុវត្តតាមការណែនាំរបស់ក្រសួងសុខាភិបាល។

លោកថា៖ «ទីមួយអនុលោមទៅតាមបទបញ្ជាផ្ទៃក្នុងរបស់ពន្ធនាគារ ហើយទីពីរយកវិធានការបង្ការនេះជាគោល»។

កម្ពុជាឲ្យកើតមានករណីឆ្លងជំងឺកូវីដ១៩ក្នុងសហគមន៍កាលពីពីរសប្តាហ៍មុន ដែលបានបង្កឲ្យមានកាព្រួយបារម្ភបន្ថែមទៀតអំពីជំងឺផ្លូវដង្ហើមមួយនេះ៕

ជម្រើសជំនាញក្នុងទីផ្សារការងារ ត្រូវបន្ថែមជំនាញបន្ទាប់បន្សំ

ជា សុខនី (Chea Sokny) — Fri, 11 Dec 2020 05:30:23 +0000

ការជ្រើសរើសជំនាញមួយដើម្បីសិក្សាគឺជារឿងសំខាន់សម្រាប់យុវជន មិនថាជាការពេញចិត្តដោយខ្លួនឯង ឬគ្រួសារជាអ្នករៀបចំឲ្យឡើយ។ រយៈពេលបួនឆ្នាំនៃការសិក្សាលើជំនាញមួយមុខ គឺមិនគ្រប់គ្រាន់ទេ តែត្រូវចំណាយពេលខ្លះៗទៅលើជំនាញបន្ទាប់បន្សំ ដូចជាភាសាអង់គ្លេស កុំព្យូទ័រជាដើម ដើម្បីពង្រឹងសមត្ថភាពបន្ថែមសម្រាប់ឱកាសការងារជាច្រើនពីទីផ្សារ។

ក្នុងចំណោមបណ្ដាអ្នកកំពុងសិក្សា និងបញ្ចប់ការសិក្សាមួយចំនួនមានការបារម្ភខ្លះៗទៅលើជំនាញដែលកំពុងសិក្សា ដោយពួកគេខ្លាចខ្វះសមត្ថភាពដើម្បីបំពេញការងារ។

លោក អាត់ ដេត និស្សិតកំពុងសិក្សាជំនាញវិស្វករសំណង់ស៊ីវិល បានប្រាប់ Newsroom Cambodia តាមរយៈទូរស័ព្ទកាលពីថ្ងៃទី៨ ខែធ្នូថា លោកបានជ្រើសរើសជំនាញវិស្វករសំណង់នេះដោយខ្លួនឯង បន្ទាប់ពីលោកបោះបង់ជម្រើសទី១ធ្វើជាគ្រូបង្រៀន។ លោកបន្តថា ជំនាញដែលលោកបាននិងកំពុងរៀន បានលើកស្ទួយវិស័យស្ថាបត្យកម្ម (សាងសង់) កម្ពុជាឲ្យឈានទៅមុខ។

លោកបញ្ជាក់ថា៖ «ចំពោះទីផ្សារការងារបច្ចុប្បន្ន ប្រទេសកម្ពុជាមានការអភិវឌ្ឍ មានសុខសន្តិភាព ហើយក៏មានការសាងសង់ផ្ទះ អគារនានាជាច្រើន អីចឹងហើយការងារក៏មានច្រើនដែរសម្រាប់ជំនាញនេះ»។

ចំណែកលោក សុខ ទៀង និស្សិតបញ្ចប់បរិញ្ញាបត្រជំនាញធនាគារ និងហិរញ្ញវត្ថុ នៅសាកលវិទ្យាល័យធនធានមនុស្ស ហើយសព្វថ្ងៃនេះលោកបម្រើការងារនៅគ្រឹះស្ថានមីក្រូហិរញ្ញវត្ថុមួយ បានប្រាប់ Newsroom Cambodia តាមទូរស័ព្ទថា សម្រាប់លោក ក្រៅពីជំនាញដែលលោករៀន លោកតែងចំណាយពេលខ្លះដើម្បីរៀនជំនាញបន្ទាប់បន្សំ ដូចជាភាសាអង់គ្លេស និងកុំព្យូទ័រជាដើម។ លោកបន្ថែមថា ទីផ្សារការងារសម្រាប់ជំនាញរបស់លោកមានលក្ខណៈទូលាយ បើទោះបីជាដើមទុនរកស៊ីត្រូវពឹងផ្អែកពីក្រៅប្រទេសក៏ដោយ។

លោកបញ្ជាក់ថា៖ «ត្រូវពង្រឹងសមត្ថភាពជំនាញរបស់ខ្លួនឯងឲ្យច្បាស់លាស់ និងចាប់យកអ្វីដែលជាចំណូលចិត្តរបស់ខ្លួនឯង ជាពិសេសគឺការកំណត់គោលដៅ និងរៀបចំផែនការជីវិតឲ្យបានត្រឹមត្រូវ»។

មិនមែនតែសិស្សនិស្សិតនោះទេដែលត្រូវយកចិត្តទុកដាកើលើការជ្រើសរើសមុខជំនាញសិក្សា សម្រាប់សាលារៀនក៏មានការកែប្រែយុទ្ធសាស្ត្រមួយចំនួនតាមក្រសួងអប់រំ យុវជន និងកីឡា ដូចជាការពង្រឹងសមត្ថភាពគ្រូបង្រៀន ការផ្អាកលើជំនាញដែលមានទីផ្សារចង្អៀតជាដើម។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ប្រាប់ Newsroom Cambodia តាមរយៈបណ្តាញសង្គមតេលេក្រាមថា ក្រសួងអប់រំ បានដាក់បញ្ចូលជំនាញបច្ចេកទេសថ្មីៗមួយចំនួនទៅក្នុងកម្មវិធីសិក្សាថ្នាក់វិទ្យាល័យ ចំណេះទូទៅ និងអប់រំបច្ចេកទេស ដើម្បីឆ្លើយតបទៅនឹងតម្រូវការទីផ្សារការងារ និងសម្រាប់ចូលរួមចំណែកអភិវឌ្ឍន៍វិស័យឧស្សាហកម្ម។ លោកបន្ថែមថា ជំនាញបច្ចេកទេសថ្មីៗនោះមានដូចជា អេឡិចត្រូនិក អគ្គិសនី ក្សេត្រសាស្ត្រ មេកានិក និងគណនេយ្យ។

លោកសរសេរតាមន័យដើមថា៖ «ជំនាញបច្ចេកទេសទាំងនេះនឹងជួយបង្កើនបរិមាណ និងគុណភាពធនធានមនុស្សផ្នែកជំនាញបច្ចេកទេសនៅតាមរោងចក្រ ទីផ្សារការងារផ្សេងៗ និងសម្រាប់ជាមូលដ្ឋានគ្រឹះដល់សិស្សមួយចំនួនដែលចង់រៀនជំនាញនេះបន្ត។

កាលពីថ្ងៃទី៣១ ខែធ្នូ ឆ្នាំ២០១៤ ក្រសួងអប់រំ យុវជន និងកីឡា បានប្រកាសផ្អាកការផ្ដល់អាជ្ញាប័ណ្ណឲ្យការបើកមុខជំនាញគ្រប់គ្រង គណនេយ្យ ធនាគារ និងហិរញ្ញវត្ថុនៅតាមគ្រឹះស្ថានឧត្តមសិក្សា ដើម្បីជំរុញការអនុវត្តកំណែទម្រង់នៅឧត្តមសិក្សា ឲ្យឆ្លើយតបនឹងតម្រូវការទីផ្សារការងារ និងការវិវត្តសេដ្ឋកិច្ចជាតិក្នុងយុគ្គសម័យឧស្សាហកម្ម៤.០៕