ឈាន សៅវ័ន (Chhean Saovon) – Newsroom Cambodia

បទពិសោធន៍ឆ្លងកាត់ជំងឺបាក់ទឹកចិត្តរបស់អ្នកនិពន្ធម្នាក់

ឈាន សៅវ័ន (Chhean Saovon) — Mon, 19 Apr 2021 08:34:19 +0000

អ្នកនិពន្ធប្រលោមលោកខ្មែរម្នាក់ដែលបានឆ្លងកាត់ជំងឺបាក់ទឹកចិត្ត បានរៀបរាប់ពីបទពិសោធន៍ និងវិធីដោះស្រាយបញ្ហា រួមទាំងការនិពន្ធសៀវភៅ «មនុស្សបាក់ទឹកចិត្ត»។

កញ្ញា គឹម ឌីណា គឺជាអតីតនិស្សិតអក្សសាស្រ្តអង់គ្លេសនៃសាកលវិទ្យាល័យបញ្ញាសាស្ត្រកម្ពុជា និងបានក្លាយជាអ្នកនិពន្ធប្រលោមលោកខ្មែរប្រចាំហាងសៀវភៅ Le Story និងជាពិធីការិនីឯករាជ្យ។ ក្រៅពីនេះកញ្ញា ក៏ជាអ្នកសរសេរអត្ថបទភាពយន្ត និងទំនុកច្រៀង ចម្រៀងក្នុងប្រលោមលោករបស់ខ្លួនដែរ។ ស្នាដៃសៀវភៅរបស់កញ្ញាមានដូចជា ភរិយាខ្ញុំអាយុ១៨ឆ្នាំ មនុស្សបាក់ទឹកចិត្ត ស្នេហ៍អស់ពីហឫទ័យ និងផ្ការីកវិញទេ?។

កញ្ញា គឹម ឌីណា បានប្រាប់ Newsroom Cambodia កាលពីថ្ងៃចន្ទសប្តាហ៍មុនថា កញ្ញាបានសរសេរសៀវភៅមនុស្សបាក់ទឹកចិត្ត ដោយសារមានកម្លាំងជំរុញទឹកចិត្តចំនួពីរ ដែលធ្វើឱ្យកញ្ញាសរសេរសៀវភៅនេះឡើង។

ទាំងនេះគឺជាកញ្ញារៀបរាប់លម្អិតរបស់កញ្ញា គឹម ឌីណា ពាក់ព័ន្ធនឹងបទពិសោធន៍នៃការធ្លាក់ទឹកចិត្ត និងការសរសេរសៀវភៅ៖

ទី ១ ខ្ញុំខ្លួនឯងធ្លាប់ឆ្លងកាត់បញ្ហានេះ ហើយដឹងថាវាពិបាកខ្លាំងណាស់ បើបើសិនយើងមិនប្រញាប់រកដំណោះស្រាយ ឬព្យាបាលទេ គឺអាចប៉ះពាល់ដល់គុណភាពនៃជីវិត ឬអាយុជីវិតរបស់យើងក៏ថាបាន។ ដូច្នេះខ្ញុំចង់ចែករំលែកបទពិសោធន៍របស់ខ្លួនទៅកាន់មនុស្សដទៃទៀតថាគាត់មិនជួបបញ្ហាបាក់ទឹកចិត្តតែម្នាក់ឯងទេ ព្រោះក្នុងនោះក៏មានខ្ញុំ។

ខ្ញុំអាចក្រោកមកវិញបាន ខ្ញុំជឿជាក់ថាពួកគាត់គឺអាចដូចគ្នា អ្នកខ្លះគាត់មានជំងឺធ្លាក់ទឹកចិត្ត តែដល់ពេលគាត់មិនធ្លាប់បានដឹងពីវាសោះ គាត់មិនដឹងថាគាត់មានបញ្ហាអ្វី។ អ្នកខ្លះទៀតគាត់គ្រាន់តែពិបាកចិត្តធម្មតា តែគាត់គិតថាគាត់មានជំងឺធ្លាក់ទឹកចិត្ត។ ការសិក្សាពីជំងឺធ្លាក់ទឹកចិត្ត និងដឹងពីបទពិសោធន៍របស់អ្នកដទៃមិនអាចធានាបានទេថាយើងនឹងអាចគេចផុតពីជំងឺនេះ ប៉ុន្តែវាជួយយើងឱ្យចេះសង្កេតពីការផ្លាស់ប្តូរនៃការគិត និងឥរិយាបថរបស់ខ្លួន ឬមនុស្សនៅជុំវិញខ្លួន ថាកំពុងតែមានរោគសញ្ញា ឬបញ្ហានៃជំងឺធ្លាក់ទឹកចិត្ត ឬអត់។ បើសិនជាយើងសង្ស័យ យើងគួរទៅរកគ្រូពេទ្យជំនាញផ្នែកផ្លូវចិត្ត ដើម្បីទទួលបានការព្យាបាលឱ្យទាន់ពេលវេលា។

ទី២ គឺ ក្នុងគោលបំណងដើម្បីលើកទឹកចិត្តស្ត្រីខ្មែរដែលត្រូវប្រឈមបញ្ហាជាច្រើនក្នុងការរស់នៅឱ្យចាប់ផ្តើមមានភាពរឹងមាំ និងយុវជនដទៃទៀតដែលធ្លាក់ក្នុងសភាពបាក់ទឹកចិត្តឱ្យងើបឡើងតស៊ូនឹងបញ្ហា ពីព្រោះក្នុងសៀវភៅមនុស្សបាក់ទឹកចិត្តមានជារឿងខ្លីផងដែរ ដែលនិយាយពីបញ្ហារបស់មនុស្សស្រី។

«មនុស្សស្រី» ជាពាក្យដែលធ្វើឱ្យខ្ញុំគិតថា ខ្ញុំត្រូវតែតស៊ូក្នុងភាពដែលខ្លួនឯងជាស្រ្តី មិនថាជួបបញ្ហា ឬការកៀបសង្កត់ដោយគំនាបសង្គមណាមួយឡើយ។ រាល់ពេលជួបបញ្ហាលំបាក ខ្ញុំប្រាប់ខ្លួនឯងថា ព្រោះខ្ញុំជាកូនស្រី ទើបខ្ញុំត្រូវតែតស៊ូ។ ខ្ញុំធ្លាប់បានជួបស្ត្រីដែលលាក់ទុកសមត្ថភាព និងទេពកោសល្យនៅពីក្រោយរូបរាងមិនសមសួនរបស់ខ្លួន ស្ត្រីដែលបោះបង់ចោលអ្វីៗទាំងអស់នៅពេលស្នេហាមិនសមប្រកប ស្ត្រីដែលអនុញ្ញាតឱ្យគ្រួសារ ឬអ្នកដទៃសម្រេចចិត្តលើអនាគតរបស់ខ្លួនទាំងដែលស្ត្រីទាំងនោះជាអ្នកប្រឈមដោយផ្ទាល់ទៅលើលទ្ធផលដែលកើតចេញពីការសម្រេចចិត្តរបស់អ្នកដទៃ។ល។

ដូច្នេះ សៀវភៅ «មនុស្សបាក់ទឹកចិត្ត» ហាក់និយាយច្រើនពីបញ្ហារបស់មនុស្សស្រី តែក្នុងន័យលើកទឹកចិត្តឱ្យគាត់គិតវិជ្ជមានក្នុងជីវិត។

ខ្ញុំចង់ឱ្យអ្នកអានចងចាំថា នេះមិនមែនជារូបមន្តសម្រាប់ព្យាបាលជំងឺធ្លាក់ទឹកចិត្តនោះទេ ពោលគឺវាគ្រាន់តែជាបទពិសោធន៍ប៉ុណ្ណោះ។ មួយទៀត មុននឹងជួយស្រោចស្រង់ខ្លួនឯងឱ្យផុតពីជំងឺធ្លាក់ទឹកចិត្ត គឺយើងត្រូវទទួលស្គាល់ថា យើងមានជំងឺនេះជាមុនសិន។

ងាកមកបទពិសោធរបស់ខ្ញុំនៅឆ្នាំ ២០១៨ វិញ គឺមុនដំបូងខ្ញុំមិនដឹងទេថាខ្ញុំមានបញ្ហាធ្លាក់ទឹកចិត្ត តែក្រោយពេលខ្ញុំចូលរួមសិក្ខាសាលាដែលនិយាយពីជំងឺធ្លាក់ទឹកចិត្ត ទើបខ្ញុំសម្គាល់មើលលើរោគសញ្ញារបស់ខ្លួន ហើយក៏ទទួលស្គាល់ថាខ្លួនមានជំងឺនេះ។

ខ្ញុំបានព្យាយាមស្រោចស្រង់ខ្លួនឯងតាមវិធីដូចខាងក្រោម៖

១. អានសៀវភៅ និងមើលវីដេអូលើកទឹកចិត្ត ពីព្រោះវាជួយខ្ញុំក្នុងការបណ្តុះភាពវិជ្ជមានក្នុងខ្លួន។ តែមិនមែនអានហើយ មានគំនិតវិជ្ជមានតែពេលអានឬមើលទេ ពោលគឺខ្ញុំយកវាមកអនុវត្តក្នុងជីវិតរបស់ខ្លួនជាពិសេសគឺពេលកំពុងជួបបញ្ហា។

២. ប្រាប់បញ្ហានេះដល់អ្នកជិតស្និទ្ធ៖ សម្រាប់ខ្ញុំការឈឺចាប់ដែលពិបាកនឹងស្រោចស្រង់គឺនៅពេលដែលមានបញ្ហា ហើយមិនដឹងនិយាយប្រាប់អ្នកណា។ ពេលខ្ញុំបាក់ទឹកចិត្ត ខ្ញុំគ្រាន់តែចង់ឱ្យមានអ្នកណាម្នាក់ស្តាប់ពីបញ្ហារបស់ខ្ញុំ យល់ពីខ្ញុំ និងលើកទឹកចិត្តខ្ញុំ ឬសរសើរខ្ញុំ និងប្រាប់ខ្ញុំថាខ្ញុំអាចឆ្លងកាត់វាបាន។ ខ្ញុំបាននិយាយពីបញ្ហារបស់ខ្ញុំទៅកាន់មិត្តជិតស្និទ្ធរបស់ខ្ញុំ ហើយខ្ញុំមានអារម្មណ៍ថាធូរស្បើយខ្លាំង។ ឆ្លងកាត់រឿងនេះខ្ញុំតែងតែចាំពាក្យមួយថាបើមិនបានលើកទឹកចិត្តគេ កុំបំបាក់ទឹកចិត្តគេព្រោះតែពាក្យសម្តីរបស់យើង។

៣. រំឭកពីស្នាដៃ និងសមត្ថភាពរបស់ខ្លួន៖ អំឡុងពេលបាក់ទឹកចិត្ត ខ្ញុំមើលឃើញខ្លួនឯងអន់គ្រប់រឿង មើលទៅអ្នកដទៃពូកែគ្រប់រឿង។ ខ្ញុំសរសេររឿងលែងចេញ។ ខ្ញុំហាក់ដូចជាបាត់បង់ការជឿជាក់ និងព្រងើយជាមួយនឹងទេពកោសល្យរបស់ខ្លួនមួយទំហឹង។ ក្រោយមកខ្ញុំក៏ចាប់ផ្តើមសើរើអតីតកាលរបស់ខ្លួន ហើយក៏ឃើញថាខ្ញុំធ្វើរឿងបានច្រើនដែរតើ ដូច្នេះខ្ញុំគួរតែមានមោទនភាព ហើយចាប់ផ្តើមបន្តធ្វើវាទៀត។

៤. ការហាត់ប្រាណ៖ ពិតជាសំខាន់ខ្លាំងណាស់! វាជួយទាំងសុខភាពផ្លូវកាយ និងផ្លូវចិត្ត! ជាពិសេសជួយបង្កើតជាតិសេរ៉ូទីនីននៅក្នុងខួរក្បាល ដែលជាសារធាតុសម្រាប់បំបាត់ជំងឺធ្លាក់ទឹកចិត្ត។

៥. រាប់អានមនុស្សវិជ្ជមាន៖ មនុស្សប្រភេទនេះជួយខ្ញុំឱ្យឃើញពីភាពស្រស់បំព្រងនៃជីវិត និងរំឭកខ្ញុំពីភាពវិជ្ជមាន។

៦. លែងផ្តាច់ខ្លួនពីសង្គម និងមិត្តភក្តិ៖ ខ្ញុំធ្លាប់សម្ងំនៅតែក្នុងបន្ទប់ លែងចង់ជួបអ្នកណាពេលមានបញ្ហាធ្លាក់ទឹកចិត្ត។ ដូច្នេះខ្ញុំក៏ចាប់ផ្តើមរក្សាទំនាក់ទំនងជាមួយនិងមិត្តរបស់ខ្ញុំ ហ៊ានចេញទៅក្រៅ ឬចូលរួមកម្មវិធីផ្សេងៗឡើងវិញ។ ពេលនៅម្នាក់ឯង គំនិតចេះតែគិតផ្តេសផ្តាស ដូច្នេះខ្ញុំលែងឃុំខ្លួនក្នុងបន្ទប់។

៧. ធ្វើរឿងដែលខ្លួនស្រឡាញ់ តែមិនធ្លាប់បានធ្វើ៖ ខ្ញុំបាននិពន្ធ និងច្រៀងបទ «មនុស្សបាក់ទឹកចិត្ត»។ ខ្ញុំសប្បាយចិត្ត ហើយរកឃើញន័យនៃជីវិតបន្ថែមទៀត បើទោះជាមានគេថាខ្ញុំច្រៀងមិនកើតក៏ដោយ។ ខ្ញុំហៅថាជាការសាកល្បងថ្មីមួយ សម្រាប់ជីវិត! កុំជឿខ្ញុំត្រង់ចំណុចនេះ! ប៉ុន្តែបើសិនជាអ្នកអានដល់ត្រង់នេះ ហើយអ្នកក៏ស្រាប់តែគិតថាខ្លួនមានរឿងអីដែលមិនធ្លាប់ធ្វើទេ ហើយសាកចាប់ផ្តើមធ្វើ អ្នកប្រាកដជាអាចយល់ពីអារម្មណ៍មួយនេះបាន។

៨. T2MM (Talk to Motivate Myself ឬនិយាយលើកទឹកចិត្តខ្លួនឯង) និង W2MM (Write to Motivate Myself ឬសរសេរលើកទឹកចិត្តខ្លួនឯង)៖ អ្នកតាមដានយូធូបរបស់ខ្ញុំមួយចំនួនប្រហែលជាបានឃើញញឹកញាប់នូវពាក្យថា T2MM ពីព្រោះខ្ញុំបានយកវាមកដាក់ជាឡូហ្គូរបស់ខ្លួន។

ការបង្កើតទាំង T2MM និង W2MM ពេលដែលខ្ញុំស្ថិតនៅក្នុងដំណាក់កាលស្រោចស្រង់ខ្លួនឯង ពីព្រោះខ្ញុំយល់ថា មុននឹងអាចនិយាយ ឬសរសេរលើកទឹកចិត្តអ្នកដទៃ ខ្ញុំត្រូវចេះនិយាយ និងសរសេរលើកទឹកចិត្តខ្លួនឯងជាមុនសិន ឬបើអ្នកដទៃមិនលើកទឹកចិត្តខ្ញុំ គឺខ្ញុំនឹងលើកទឹកចិត្តខ្លួនឯងបាន។ ខ្ញុំមិនចង់ធ្វើជាខ្ញុំពីមុន ដែលលើកទឹកចិត្តគេបាន តែមិណអាចលើកទឹកចិត្តខ្លួនឯងបាននោះទេ។

មនុស្សម្នាក់ៗ អាចដោះស្រាយបញ្ហាបាននៅពេលគេហ៊ាននិយាយពីបញ្ហារបស់ខ្លួន។ ខ្ញុំបន្តអនុវត្ត T2MM និង W2MM រហូតមកដល់សព្វថ្ងៃនេះ។

ជាចុងក្រោយ បើសិនជាអ្នកប្រឹងប្រែងអស់ពីលទ្ធភាពហើយ តែនៅមិនអាចជួយខ្លួនឯងបានទៀត សូមប្រញាប់ទៅរកគ្រូពេទ្យផ្នែកផ្លូវចិត្ត ដើម្បីទទួលបានការព្យាបាលត្រឹមត្រូវ និងទាន់ពេលវេលា។

សូមកុំខ្វល់ថាអ្នកដទៃនឹងមើលមកអ្នកថាជាមនុស្សយ៉ាងម៉េចដោយសារតែជំងឺធ្លាក់ទឹកចិត្តរបស់អ្នក ពីព្រោះសុខភាពផ្លូវចិត្តរបស់អ្នក និងជីវិតរបស់អ្នកគឺពិតជាសំខាន់ណាស់។ សូមកុំលាក់ទុកបញ្ហាតែម្នាក់ឯង ហើយគួរចាំថាគ្រួសារអ្នក មិត្តរបស់អ្នក និងមនុស្សជាទីស្រឡាញ់របស់អ្នកពិតជាមិនចង់ឃើញអ្នកពិបាកតែម្នាក់ឯងនោះទេ ហើយពួកគេនឹងរង់ចាំជួយអ្នក។

ខ្ញុំក៏សូមផ្ញើសារទៅកាន់មនុស្សផ្សេងទៀតផងដែរ ថាគួរតែបញ្ឈប់ការវិនិច្ឆ័យពីជីវិតរបស់អ្នកមានជំងឺធ្លាក់ទឹកចិត្ត និងជាពិសេសគិតថាពួកគេជាមនុស្សឆ្កួត ពីព្រោះការគិតបែបនេះហើយដែលរាំងស្ទះពួកគេមិនឱ្យនិយាយពីបញ្ហារបស់ខ្លួន ឬទទួលស្គាល់ថាខ្លួនមានបញ្ហាធ្លាក់ទឹកចិត្ត។ សូមព្យាយាមសង្កេតមើលពីឥរិយាបថ និងការផ្លាស់ប្តូរបែបអវិជ្ជមានណាមួយរបស់សមាជិកគ្រួសារ មិត្តភក្តិ អ្នករួមការងារ ឬមនុស្សជាទីស្រឡាញ់របស់អ្នក ពីព្រោះអ្នកប្រហែលជាអាចជួយពួកគេបានទាន់ពេល។ បើអ្នកមិនដឹងថានិយាយលើកទឹកចិត្តពួកគេយ៉ាងណា ឬជួយយ៉ាងណា អ្វីដែលអ្នកអាចធ្វើដំបូងគេ គឺស្តាប់ពួកគេ ដោយគ្មានការកាត់ក្តីពីរឿងរ៉ាវនៃជីវិតដែលពួកគេឆ្លងកាត់។

ជាចុងក្រោយ កុំបោះបង់ងាយ កុំរំលាយក្តីសង្ឃឹម! ឈឺបេះដូង ឈោងសុបិន!!

ក្រសួងប្រកាសករណីវិជ្ជមានកូវីដថ្មី ៦១៨នាក់ ខណៈជាង ៤០០នាក់មិនទាន់រកកន្លែងព្យាបាលបាន

ឈាន សៅវ័ន (Chhean Saovon) — Sun, 18 Apr 2021 13:22:09 +0000

ក្រសួងសុខាភិបាលបានប្រកាសថាមានគិតថ្ងៃទី១៨ ខែមេសា ឆ្នាំ២០២១ មានករណីមានវេជ្ជមានវីរុសកូវីដ-១៩
ថ្មីចំនួន ៦១៨នាក់ មានអ្នកជាសះស្បើយចំនួន ៦០នាក់ និងប្រមាណជាង ៤០០នាក់មិនទាន់កំណត់កន្លែងសម្រាកព្យាបាលបាន។

ក្នុងសេចក្ដីប្រកាសព័ត៌មានរបស់ក្រសួងចេញក្នុងថ្ងៃទី១៨ ខែមេសា គិតត្រឹមម៉ោង៧:០០នាទី
បានប្រកាសថាករណីវិជ្ជមានវីរុសកូវីដ ១៩ថ្មីសរុបចំនួន ៦១៨នាក់ ដែលជាអ្នកពាក់ព័ន្ធទៅនឹងព្រឹត្តិការណ៍សហគមន៍២០កុម្ភៈ។

អ្នកជំងឺដែលឆ្លងជំងឺកូវីដ១៩ថ្មីនេះ មាន ១នាក់បាត់បង់ជីវីត និង ១២៥នាក់ កំពុងសម្រាកព្យាបាលនៅមន្ទឺពេទ្យ ចំណែក៤៩២នាក់ ទៀតក្រសួងនឹងជូនដំណឹងបន្តពីកន្លែងសម្រាកព្យាបាល តាមក្រោយ។

គិតត្រឹមថ្ងៃទី១៨ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ៦៣៨៩នាក់
អ្នកជាសះស្បើយសរុបចំនួន ២៤៧៦នាក់ អ្នកកំពុងសម្រាកព្យាបាល ៣៨៦៥នាក់ និងអ្នកស្លាប់ចំនួន ៤៣នាក់៕

ក្រសួងប្រកាសថាករណីវិជ្ជមានថ្មីសរុបចំនួន៤៧៧នាក់ ជាង៤០០នាក់មិនទាន់កំណត់កន្លែងសម្រាកព្យាបាល

ឈាន សៅវ័ន (Chhean Saovon) — Sat, 10 Apr 2021 09:19:23 +0000

ក្រសួងសុខាភិបាលបានប្រកាសថា គិតថ្ងៃទី១០ ខែមេសា ឆ្នាំ២០២១ មានករណីវិជ្ជមានជំងឺកូវីដ១៩ ថ្មីចំនួន៤៧៧នាក់ មានអ្នកជាសះស្បើយចំនួន៩៦នាក់ និងស្លាប់២នាក់ ស្របពេលជាង៤០០នាក់មិនទាន់កំណត់ពីកន្លែងសម្រាកព្យាបាល។

ក្នុងសេចក្ដីប្រកាសព័ត៌មានរបស់ក្រសួងចេញនៅថ្ងៃទី១០ ខែមេសា បញ្ជាក់ថា គិតត្រឹមម៉ោង៧:០០នាទីព្រឹកថ្ងៃសៅរ៍នេះ ករណីវិជ្ជមានវីរុសកូវីដ១៩ថ្មីសរុបចំនួន៤៧៧នាក់ ដែលជាអ្នកពាក់ព័ន្ធទៅនិងព្រឹត្តិការណ៍សហគមន៍២០កុម្ភៈ។

អ្នកជំងឺដែលឆ្លងជំងឺកូវីដ១៩ថ្មីនេះ មានប្រមាណតែ២០នាក់ប៉ុណ្ណោះមានកន្លែងសម្រាកព្យាបាល ចំណែកជាង៤០០នាក់ ក្រសួងនឹងជូនដំណឹងបន្តពីកន្លែងសម្រាកព្យាបាល តាមក្រោយ។

គិតត្រឹមថ្ងៃទី១០ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ៤,០៨១នាក់ អ្នកជាសះស្បើយសរុបចំនួន ២,០៨០ នាក់ អ្នកកំពុងសម្រាកព្យាបាល ១,៩៧០នាក់ និងអ្នកស្លាប់ចំនួន ២៦នាក់៕

ស្រ្តីជនជាតិខ្មែរម្នាក់ទៀតបានស្លាប់ដោយសារជំងឺកូវីដ១៩ ធ្វើឲ្យករណីស្លាប់កើនដល់២៥នាក់

ឈាន សៅវ័ន (Chhean Saovon) — Sat, 10 Apr 2021 05:04:27 +0000

ក្រសួងសុខាភិបាលបានប្រកាសឲ្យដឹងថា ស្រ្តីជនជាតិខ្មែរ អាយុ៥៥ឆ្នាំ បានបាត់បង់ជីវិតដោយសារកូវីដ១៩ នៅថ្ងៃទី៩ ខែមេសា ឆ្នាំ២០២១ ដែលបាននាំឲ្យមានអ្នកស្លាប់សរុបទូទាំងប្រទេសមានចំនួន២៥នាក់។

យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី៩ ខែមេសា ឆ្នាំ២០២១នេះបានឲ្យដឹងថា ស្រ្តីជនជាតិខ្មែរ អាយុ៥៥ឆ្នាំ ដែលរស់នៅសង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ បានស្លាប់បាត់បង់ជីវិតដោយសារជំងឺកូវីដ១៩ នាថ្ងៃទី៩ ខែមេសា ឆ្នាំ២០២១។

អ្នកជំងឺត្រូវបានរកឃើញវិជ្ជមានកូវីដ១៩នៅថ្ងៃទី៣០ ខែមីនា ឆ្នាំ២០២១ ដោយស្ថានភាពអ្នកជំងឺមានសភាពធ្ងន់ធ្ងរតាំងពីចូលសម្រាកពេទ្យដំបូង តម្រូវឲ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើមតាំងពីថ្ងៃចូលសម្រាកពេទ្យដំបូង តែទោះបីជាក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយអ្នកជំងឺបាន ហើយស្ថានភាពអ្នកជំងឺកាន់តែធ្ងន់ធ្ងរឡើងៗ ដែលបណ្ដាលឲ្យអ្នកជំងឺបានស្លាប់បាត់បង់ជីវិតនៅថ្ងៃទី០៩ ខែមេសា ឆ្នាំ២០២១ វេលាម៉ោង ០២:៥៦នាទីរសៀល។

ការសន្និដ្ឋានរបស់ក្រុមគ្រូពេទ្យបានបញ្ជាក់ថា៖ «ស្រ្តីជនជាតិខ្មែរ អាយុ៥៥ឆ្នាំ ខាងលើនេះបានស្លាប់បាត់បង់ជីវិតដោយសារខ្សោយសួតធ្ងន់ធ្ងរ រលាកសួតសងខាង ដោយសារវីរុសកូវីដ១៩ លើអ្នកជំងឺទឹកនោមផ្អែម »។

គិតត្រឹមថ្ងៃទី៩ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ៣,៦០៤នាក់ អ្នកជាសះស្បើយសរុបចំនួន១,៩៨៤នាក់ អ្នកកំពុងសម្រាកព្យាបាល ១,៥៩១នាក់ និងអ្នកស្លាប់ចំនួន ២៥នាក់៕

ក្រសួងសុខាភិបាលប្រកាសករណីវិជ្ជមានកូវីដខ្ពស់បំផុតប្រចាំថ្ងៃចំនួន ៥៧៦នាក់

ឈាន សៅវ័ន (Chhean Saovon) — Fri, 09 Apr 2021 11:26:48 +0000

ក្រសួងសុខាភិបាលបានប្រកាសថាមាន ករណីមានវិជ្ជមានវីរុសកូវីដ-១៩ ថ្មីចំនួន ៥៧៦នាក់ ជាតួលេខដែលខ្ពស់បំផុតមិនធ្លាប់មានកន្លងមក និងមានអ្នកជាសះស្បើយចំនួន ៧០នាក់ គិតថ្ងៃទី០៩ ខែមេសា ឆ្នាំ២០២១។

ក្នុងសេចក្ដីប្រកាសព័ត៌មានរបស់ក្រសួងចេញក្នុងថ្ងៃទី០៩ ខែមេសា គិតត្រឹមម៉ោង៧:០០នាទី ករណីវិជ្ជមានវីរុសកូវីដ ១៩ថ្មីសរុបចំនួន ៥៧៦នាក់ គឺជាអ្នកពាក់ព័ន្ធទៅនិងព្រឹត្តិការណ៍សហគមន៍២០កុម្ភៈ។

គួរបន្ថែមទៀតថា អ្នកជំងឺដែលឆ្លងជំងឺកូវីដ១៩ថ្មីនេះ នឹងត្រូវបានសម្រាកព្យាបាល ១នាក់នៅមន្ទីរពេទ្យខេត្តកំពង់ចាម ១នាក់នៅមណ្ឌលព្យាបាល ស្រុកកោះធំ ខេត្តកណ្ដាល ២នាក់ទៀតដាក់នៅមន្ទីរពេទ្យខេត្តសៀមរាប ១២នាក់ព្យាបាលនៅមន្ទីរពេទ្យបង្អែកខេត្តព្រះស៊ីហនុ ១៦នាក់នៅមន្ទីរពេទ្យស្វាយជ្រុំ ខេត្តស្វាយរៀង ៤៧នាក់នៅ ត្រូវដាក់ឲ្យព្យាបាលនៅសណ្ឋាគារក្រេតឌុក និង ៤៩៧នាក់ ក្រសួងនឹងជូនដំណឹងបន្តពីកន្លែងសម្រាកព្យាបាល។

គិតត្រឹមថ្ងៃទី០៩ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ៣៦០៤នាក់
អ្នកជាសះស្បើយសរុបចំនួន ១៩៨៤ នាក់ អ្នកកំពុងសម្រាកព្យាបាល ១៥៩១នាក់ និងអ្នកស្លាប់ចំនួន ២៤នាក់៕

ក្រសួងសុខាភិបាលប្រកាសករណីស្លាប់២នាក់ទៀតដោយសារកូវីដ នាំឲ្យមានអ្នកស្លាប់សរុបមានចំនួន ២៤នាក់

ឈាន សៅវ័ន (Chhean Saovon) — Thu, 08 Apr 2021 14:02:35 +0000

ក្រសួងសុខាភិបាលបានប្រកាសឲ្យដឹងថា បុរសជនជាតិខ្មែរ អាយុ ៦៨ឆ្នាំ និងអាយុ ៤៩ឆ្នាំ បានបាត់បង់ជីវិតដោយសារកូវីដ ១៩ ក្នុងថ្ងៃទី៧ ខែមេសា ឆ្នាំ២០២១ ដែលបាននាំឲ្យមានអ្នកស្លាប់សរុបទូទាំងប្រទេសមានចំនួន ២៤នាក់ហើយ។

យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី៨ ខែមេសាឆ្នាំ២០២១នេះ អ្នកស្លាប់ទាំងពីរនេះបានរស់នៅក្នុងភូមិទ្រា៤ និងភូមិទ្រា៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ

អ្នកស្លាប់អាយុ ៦៨ឆ្នាំ ត្រូវបានរកឃើញវិជ្ជមានកូវីដ ១៩ នៅថ្ងៃទី៧ ខែមេសា ឆ្នាំ២០២១ ហើយត្រូវបញ្ជូនមកសម្រាកព្យាបាលនៅមន្ទីពេទ្យហ្លួងម៉ែ នៅថ្ងៃដដែល នៅវេលាម៉ោង ១:៣០នាទីរំលងអាធ្រាត ហើយគាត់បាន«ស្ថិតនៅក្នុងស្ថានភាពគ្មានសញ្ញាជីវិត សន្លប់បាត់បង់ស្មារតី» ។ នេះយោងតាមក្រសួងសុខាភិបាល។

សេចក្តីប្រកាសព័ត៌មានបានបន្តថា ក្រុមគ្រូពេទ្យបានខិតខំជួយសង្រ្គោះដោយធ្វើចលនាបេះដូង និងជួយសង្គ្រោះតាមលក្ខណៈបច្ចេកទេស ប៉ុន្តែនៅតែមិនអាចជួយសង្គ្រោះអ្នកជំងឺបាន ហើយគាត់ក៏បានស្លាប់នៅថ្ងៃទី០៧ ខែមេសា ឆ្នាំ២០២១ វេលាម៉ោង ០១:៤០ នាទីរំលងអធ្រាត។

ដោយឡែកស្ថានភាពអ្នកស្លាប់អាយុ ៤៩ឆ្នាំ ក៏បានស្ថិតក្នុង «ស្ថានភាពធ្ងន់ធ្ងរហត់ដង្ហក់ខ្លាំង» ហើយនៅវេលាម៉ោង ១១:៥៥ នាទីព្រឹក អ្នកជំងឺក៏បានស្លាប់។ នេះយោងតាមក្រសួងសុខាភិបាល។

ហើយគិតត្រឹមម៉ោង៧:០០នាទីព្រឹក ថ្ងៃទី០៨ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩សរុបចំនួន ៣០២៨នាក់ អ្នកជាសះស្បើយសរុបចំនួន ១៩១៤នាក់ អ្នកកំពុងសម្រាកព្យាបាល ១០៨៥នាក់ និងអ្នកស្លាប់ចំនួន ២៤នាក់៕

ក្រសួងសុខាភិបាលរកឃើញករណីថ្មីចំនួន ៩១នាក់ និងមានអ្នកជាសះស្បើយចំនួន ២៩នាក់

ឈាន សៅវ័ន (Chhean Saovon) — Wed, 07 Apr 2021 08:44:11 +0000

ក្រសួងសុខាភិបាលបានប្រកាសថា មានបានរកឃើញករណីថ្មីចំនួន ៩១នាក់ និងមានអ្នកជាសះស្បើយចំនួន ២៩នាក់ គិតថ្ងៃទី០៧ ខែមេសា ឆ្នាំ២០២១។

ក្នុងសេចក្ដីប្រកាសព័ត៌មានរបស់ក្រសួងចេញក្នុងថ្ងៃទី០៧ ខែមេសា គិតត្រឹមម៉ោង៧:០០នាទី
បានប្រកាសថាករណីវិជ្ជមានវីរុសកូវីដ ១៩ថ្មីសរុបចំនួន ៩០នាក់ ដែលជាអ្នកពាក់ព័ន្ធទៅនឹងព្រឹត្តិការណ៍សហគមន៍២០កុម្ភៈ និង ០១នាក់ទៀតជាជនជាតិឥណ្ឌូនេស៊ី ចូលមកស្រុកខ្មែរតាមច្រកព្រំដែនថៃ។

គួរបន្ថែមទៀតថាអ្នកជំងឺដែលឆ្លងជំងឺកូវីដ១៩ថ្មីនេះ នឹងត្រូវបានសម្រាកព្យាបាល ៤នាក់នៅមន្ទីរពេទ្យខេត្តតាកែវ ៣នាក់ទៀតដាក់នៅមន្ទីរពេទ្យស្វាយជ្រុំ ខេត្តស្វាយរៀង ១នាក់ព្យាបាលនៅមន្ទីរពេទ្យខេត្តត្បូងឃ្មុំ
១នាក់នៅមន្ទីរពេទ្យខេត្តពោធិ៍សាត់ ១នាក់នៅមន្ទីរពេទ្យខេត្តកំពង់ចាម ១នាក់នៅមន្ទីរពេទ្យខេត្តប៉ៃលិន
១នាក់នៅមន្ទីរពេទ្យខេត្តព្រៃវែង ១នាក់ទៀតនៅមណ្ឌលសុខភាពចាក់អង្រែ និង៤០នាក់នៅ សណ្ឋាគារក្រេតឌុក និង ៣៧នាក់ ក្រសួងនឹងជូនដំណឹងបន្តពីកន្លែងសម្រាកព្យាបាល។

ចំណែកជនជាតិឥណ្ឌូនេស៊ីចំនួន ១នាក់ដែលមានវីរុសកូវីដ ១៩ មកដល់កម្ពុជានៅថ្ងៃទី០៥ ខែមេសា
លទ្ធផលធ្វើតេស្តវត្ថុសំណាក របស់បុគ្គលខាងលើនេះ ផ្ដល់ដោយវិទ្យាស្ថានប៉ាស្ទ័រកម្ពុជា ហើយបច្ចុប្បន្ននេះត្រូវបានដាក់ឲ្យព្យាបាលនៅសណ្ឋាគារក្រេតឌុក។

គិតត្រឹមថ្ងៃទី០៧ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ២៩១៥នាក់
អ្នកជាសះស្បើយសរុបចំនួន ១៨២៤នាក់ អ្នកកំពុងសម្រាកព្យាបាល ១០៦៤នាក់ និងអ្នកស្លាប់ចំនួន ២២នាក់៕

ជនជាតិខ្មែរម្នាក់ទៀតបានស្លាប់ដោយសារជំងឺកូវីដ១៩ នាំឲ្យអ្នកស្លាប់កើនដល់២២នាក់

ឈាន សៅវ័ន (Chhean Saovon) — Tue, 06 Apr 2021 10:00:28 +0000

ក្រសួងសុខាភិបាលនៅថ្ងៃអង្គារនេះបានប្រកាសថា បុរសជនជាតិខ្មែរ អាយុ៣៥ឆ្នាំម្នាក់ ដែលរស់នៅក្នុង ខេត្តព្រៃវែង បានបាត់បង់ជីវិតដោយសារកូវីដ១៩ កាលពីថ្ងៃទី៥ ខែមេសា ឆ្នាំ២០២១ ដែលនាំឲ្យមានអ្នកស្លាប់ដោយជំងឺនេះសរុបទូទាំងប្រទេសមានចំនួន ២២នាក់។

យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី០៦ ខែមេសា ឆ្នាំ២០២១នេះ បញ្ជាក់ថា បុរសជនជាតិខ្មែរ រូបនោះរស់ភូមិឬស្សីចក ឃុំព្រៃគ្នេស ស្រុកមេសាង ខេត្តព្រៃវែង បានស្លាប់បាត់បង់ជីវិតដោយសារជំងឺកូវីដ១៩ នាថ្ងៃទី០៥ ខែមេសា ឆ្នាំ២០២១ វេលាម៉ោង ១០:២០ នាទី។

ក្រសួងបន្ថែមថា អ្នកជំងឺខាងលើត្រូវបានមកដល់មន្ទីរពេទ្យមិត្តភាពខ្មែរ សូរវៀត នៅថ្ងៃទី ០៥ ខែមេសា ឆ្នាំ២០២១ វេលាម៉ោង១០:២០នាទីព្រឹក ដោយស្ថានភាពសន្លប់ បាត់ និងគ្មានសញ្ញាជីវិត ប៉ុន្តែក្រុមគ្រូពេទ្យបានព្យាយាមជួយសង្គ្រោះតាមលក្ខណៈបច្ចេកទេស ដោយធ្វើចលនាបេះដូងអស់រយៈពេល២០នាទី ប៉ុន្តែនៅតែមិនអាចជួយសង្គ្រោះអ្នកជំងឺឲ្យរួចផុតពីសេចក្ដីស្លាប់បាន។

ក្រសួងបញ្ជាក់ថា៖ «ដោយមានការសង្ស័យក្រុមគ្រូពេទ្យបានយកសំណាករបស់សពដើម្បីធ្វើការវិភាគរកកូវីដ១៩ ជាលទ្ធផលបានបញ្ជាក់ថាសពមានវិជ្ជមានកូវីដ១៩»។

គិតត្រឹមថ្ងៃទី៦ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ២,៨២៤នាក់។ អ្នកជាសះស្បើយសរុបចំនួន ១,៧៩៤នាក់ អ្នកកំពុងសម្រាកព្យាបាល ១,០០៣នាក់ និងអ្នកស្លាប់ចំនួន២២នាក់៕

អ្នកបានចាក់វ៉ាក់ការពារជំងឺកូវីដ១៩ក្នុងរយៈពេលជិត២ខែនេះ មានចំនួនជាង៤សែននាក់

ឈាន សៅវ័ន (Chhean Saovon) — Tue, 06 Apr 2021 09:39:35 +0000

អ្នកចាក់វ៉ាក់ការពារជំងឺកូវីដ១៩ទាំងបីប្រភេទ កើនឡើងដល់ជាង៤សែននាក់ នៅទូទាំងប្រទេស ក្នុងរយៈពេលជិតពីរខែ បន្ទាប់ពីបានចាប់ផ្តើមចាក់តាំងពីថ្ងៃទី១០ ខែកុម្ភៈមក។ នេះបើតាមការបញ្ជាក់ពីអ្នកនាំពាក្យក្រសួងសុខាភិបាល។

ក្នុងវីដេអូដែលលោកស្រី ឱ វណ្ណឌីន អ្នកនាំពាក្យក្រសួងសុខាភិបាលផ្តល់សម្ភាសន៍ទៅអ្នកសារព័ត៌មាន និងត្រូវបានផ្សាយបន្តលើទំព័រហ្វេសប៊ុករបស់ក្រសួងសុខាភិបាលនៅថ្ងៃទី៥ ខែមេសា ឆ្នាំ២០២១នេះ លោកស្រីលើកឡើងថា ដំណើរការចាក់វ៉ាក់សាំងដែលចាប់ផ្តើមតាំងពីថ្ងៃទី១០ ខែកុម្ភៈ មកដល់ត្រឹមថ្ងៃទី៥ ខែមេសានេះ អ្នកចាក់សរុបចំនួន៤១៨,៥៦៩នាក់។ ចំនួនអ្នកចាក់វ៉ាក់សាំងជាងបួនសែននាក់នេះ គឺជាការចាក់វ៉ាក់សាំងទាំងបីប្រភេទ ដែលមានកូវីស្យែល ស៊ីណូហ្វាម និងស៊ីណូវ៉ាក់។

លោកស្រី ឱ វណ្ណឌីន បន្ថែមថា រដ្ឋាភិបាលកំពុងបន្តផ្តល់វ៉ាក់សាំងដល់ក្រុមជនអាទិភាព ចំណែកប្រជាពលរដ្ឋទូទៅសូមមានការអត់ធ្មត់។

«ក្រុមអទិភាពគួរតែទទួលបានវ៉ាក់សាំងជាបណ្តើរៗ ទៅតាមការទទួលបានវ៉ាក់សាំង និងសូមឲ្យបងប្អូនមានការអត់ធ្មត់ និងសូមរង់ចាំទៅ បន្តិចនឹងចាក់ជូនជាបណ្ដើរៗទៀតហើយ»។

កម្ពុជាកំពុងពង្រីកការចាក់វ៉ាក់សាំងចំនួនបីប្រភេទដែលខ្លួនមាន ដោយវ៉ាក់សាំងស៊ីណូហ្វាមដែលបានជំនួយពីប្រទេសចិនមានប្រមាណជា១លាន៣សែនដូស វ៉ាក់សាំងកូវីស្យែលដែលទទួលបានជំនួយពីអង្គការសុខភាពពិភពលោកមានចំនួនជាងបីសែនដូស និងវ៉ាក់សាំងស៊ីណូវ៉ាក់ដែលកម្ពុជាបានទិញពីក្រុមហ៊ុនផលិតនៅប្រទេសចិនមានចំនួន១លាន៥សែនដូស៕

ជនជាតិចិនស្លាប់ដោយកូវីដ ដែលនាំចំនួនអ្នកស្លាប់ទូទាំងប្រទេសដល់ចំនួន ២១នាក់

ឈាន សៅវ័ន (Chhean Saovon) — Mon, 05 Apr 2021 07:13:05 +0000

ក្រសួងសុខាភិបាលបានប្រកាសឲ្យដឹងថា បុរសជនជាតិចិន អាយុ ៤២ឆ្នាំម្នាក់ ដែលរស់នៅក្នុងអាផាតមិន ក្នុងរាជធានីភ្នំពេញ បានបាត់បង់ជីវិតដោយសារកូវីដ ១៩ កាលពីថ្ងៃទី៤ ខែមេសា ឆ្នាំ២០២១ ដែលបាននាំឲ្យមានអ្នកស្លាប់សរុបទូទាំងប្រទេសមានចំនួន ២១នាក់ហើយ។

យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី០៥ ខែមេសា ឆ្នាំ២០២១នេះ
បុរសជនជាតិចិននោះ ដែលបានរស់នៅក្នុងអាផាតមិនមួយក្នុងសង្កាត់វាលវង់ ខណ្ឌ៧មករា រាជធានីភ្នំពេញ បានស្លាប់ បន្ទាប់ពីរកឃើញវិជ្ជមានកូវីដ១៩ នៅថ្ងៃទី២៧ ខែមីនា ឆ្នាំ២០២១ ហើយគាត់ក៏ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ សូរវៀត នៅថ្ងៃដដែលនោះផងដែរ។

ដោយសារស្ថានភាពអ្នកជំងឺមានសភាពធ្ងន់ធ្ងរតាំងពីថ្ងៃចូលសម្រាកពេទ្យដំបូង វាបានតម្រូវឲ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើម ក៏ប៉ុន្តែទោះបីជាក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេសយ៉ាងណាក៏ដោយក៏មិនអាចជួយអ្នកជំងឺបាន។ នេះយោងតាមសេចក្តីប្រកាសព័ត៌មានដដែល។

«ស្ថានភាពអ្នកជំងឺកាន់តែធ្ងន់ធ្ងរឡើងៗ ដែលបណ្តាលឲ្យអ្នកជំងឺបានស្លាប់បាត់បង់ជីវិតនៅថ្ងៃទី០៤
ខែមេសា ឆ្នាំ២០២១ វេលាម៉ោង២២:០០នាទី»។

ក្រុមគ្រូពេទ្យបានសន្និដ្ឋានថាបុរសជនជាតិចិននេះបានស្លាប់ដោយសារខ្សោយសួតធ្ងន់ធ្ងរ និងរលាកសួតសងខាងដោយសារជំងឺកូវីដ ១៩។

ជនជាតិខ្មែរម្នាក់ផ្សេងទៀតក៏បានស្លាប់ផងដែរដោយឆ្លងវីរុសកូវីដ១៩ កាលពីថ្ងៃទី០៣ ខែមេសា ឆ្នាំ២០២១ ហើយ គិតត្រឹមថ្ងៃទី០៥ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ២៧៥២នាក់
អ្នកជាសះស្បើយសរុបចំនួន ១៧៤៧នាក់ អ្នកកំពុងសម្រាកព្យាបាល ៩៧៩នាក់ និងអ្នកស្លាប់ចំនួន ២១នាក់៕

Q&A: ការនិពន្ធសៀវភៅ និងដំណោះស្រាយក្នុងការរកទីផ្សារដើម្បីលក់របស់អ្នកនិពន្ធ ឃុន ធីតា

ឈាន សៅវ័ន (Chhean Saovon) — Wed, 24 Mar 2021 03:22:45 +0000

កញ្ញា ឃុន ធីតា មាននាមប៉ាកកាថា វីនធ័រ មានអាយុ២៥ឆ្នាំ បច្ចុប្បន្នជានិស្សិតឆ្នាំទី២ មុខវិជ្ជាទំនាក់ទំនងអន្តរជាតិ នៃសាកលវិទ្យាល័យបញ្ញាសាស្ត្រ និងជាអ្នកនិពន្ធប្រលោមលោកឯករាជ្យម្នាក់។ កញ្ញាបានផ្ដល់បទសម្ភាសន៍ដល់សិក្ខាកាម Newsroom Cambodia លោកឈាន សៅវ័ន អំពីការនិពន្ធសៀវភៅ និងដំណោះស្រាយក្នុងការរកទីផ្សារដើម្បីលក់។

Q: មូលហេតុអ្វីបានបងសម្រេចចិត្តធ្វើជាអ្នកនិពន្ធសៀវភៅ?

A: មូលហេតុដែលនាំឱ្យខ្ញុំក្លាយជាអ្នកនិពន្ធ គឺដោយសារខ្ញុំជាអ្នកចូលចិត្តអានប្រលោមលោកម្នាក់។ ការអានពីមួយថ្ងៃទៅមួយថ្ងៃបង្កើតបានជាការស្រលាញ់ រួចហើយក៏បង្កើតបានជាគំនិតចង់តែងនិពន្ធប្រលោមលោកដោយខ្លួនឯងតែម្ដង។

Q: មានការលំបាកអ្វីខ្លះក្នុងការនិពន្ធ?

A: ជាការពិតទៅផលវិបាកនៃការតែងប្រលោមលោកនីមួយៗឡើងមកវាមានច្រើន ដូចជាការប្រើគំនិតច្រើនដើម្បីបង្កើតតួអង្គនីមួយៗឡើងមក បង្កើតជាព្រឹត្តិការណ៍ណាមួយ រួចចងបញ្ចូលវាទៅក្នុងសាច់រឿងដើម្បីឱ្យមានភាពស៊ីសង្វាក់គ្នា ការប្រើប្រាស់ពាក្យពេចន៍របស់តួអង្គទៅតាមតថភាពពិតនៅក្នុងសង្គម និងមានការសិក្សាស្រាវជ្រាវពីអ្វីៗមួយចំនួនទៀតនៅលើអ៊ីនធឺរណេត (Internet)។

Q: តើភាគច្រើនជាប្រភេទសៀវភៅបែបណា? តើមានប៉ុន្មានសៀវភៅហើយដែលបងបាននិពន្ធ?

A: សម្រាប់សៀវភៅដែលខ្ញុំបាននិពន្ធក្នុងរយៈកាលក្រោយៗមកនេះ គឺមានទាំងខ្មែរ និងបរទេស ប៉ុន្តែភាគច្រើននៃស្នាដៃរបស់ខ្ញុំគឺប្រលោមលោកបរទេស។ សៀវភៅដែលខ្ញុំបាននិពន្ធមានចំនួន ១០ ចំណងជើង។ ហើយសម្រាប់សៀវភៅដែលមានការចាប់អាម្មណ៍ពីអ្នកអាន និងមានអ្នកស្គាល់សៀវភៅខ្ញុំនោះគឺ សៀវភៅ «ពិភពនិម្មិត»។

Q: តើមានគន្លះអ្វីដើម្បីជំរុញឲ្យមនុស្សម្នាក់ៗអោយចូលចិត្តអានសៀវភៅ?

A: សម្រាប់ខ្ញុំផ្ទាល់គិតថាគន្លឹះដែលជួយជំរុញឱ្យមនុស្សម្នាក់ចូលចិត្តអានសៀវភៅ គឺគ្មានអ្វីច្រើនទេ គ្រាន់តែពួកគាត់ព្យាយាមស្វែងរកប្រភេទសៀវភៅដែលខ្លួនចូលចិត្តអាន ហើយចាប់ផ្ដើមអានវាបន្តិចម្ដងៗជារៀងរាល់ថ្ងៃ នៅពេលណាមួយដែលគាត់បានប្រទះនឹងចំណុចណាមួយនៃសៀវភៅដែលអាចទាញចំណូលចិត្តគាត់បាន ពេលនោះគាត់នឹងចាប់ផ្ដើមស្រលាញ់ហើយបង្កើតជាចំណង់នៃការអានសៀវភៅ រហូតបង្កើតបានជាទម្លាប់នៃការអានដោយខ្លួនឯង។

Q: តើមានការប៉ះពាល់ខ្លាំងទេពេលដែលចេញសៀវភៅ ក្នុងអំឡុងពេល Covid នេះ?

A: ពិតណាស់! ការចេញផ្សាយសៀវភៅអំឡុងពេលកូវីដគឺមានផលប៉ះពាល់ច្រើនមកលើអ្នកនិពន្ធផ្ទាល់ និងលើគ្រឹះស្ថានបោះពុម្ពផ្សាយថែមទៀត ដោយសារតែអត្រានៃការលក់លើទីផ្សារគឺធ្លាក់ចុះស្ទើរតែពាក់កណ្ដាលមុនពេលមានកូវីដចូលមកដល់ ម៉្យាងការចំណាយផ្សេងៗក្នុងពេលបោះពុម្ពផ្សាយក៏ខ្ពស់ ទើបយើងជួបប្រទះផលលំបាកច្រើនមែនទែននៅពេលវេលាបែបនេះ។

Q: ដើម្បីធ្វើឲ្យសៀវភៅមានការគាំទ្រពីអ្នកអានច្រើន តើអ្នកនិពន្ធគួរតែធ្វើបែបណា?

A: ដើម្បីទទួលបានការគាំទ្រពីអ្នកអាន អ្នកនិពន្ធគួរតែព្យាយាមពង្រឹងស្នាដៃរបស់ខ្លួនឯងផ្ទាល់ឱ្យបានល្អ រិះរកគំនិតរឿងថ្មីៗមករួមបញ្ជូលក្នុងស្នាដៃរបស់ខ្លួន បន្ថែមលើនេះគឺគួរព្យាយាមបង្កប់គំនិតអប់រំតូចៗនៅក្នុងស្នាដៃរបស់ខ្លួន ដែលអាចជួយឱ្យអ្នកអានគាត់ស្វែងយល់ និងពិចារណា ម៉្យាងទៀតចំណុចទាំងអស់នោះគួរតែមានពិតនៅក្នុងសង្គមយើងសព្វថ្ងៃនេះផងដែរ។ មួយវិញទៀតសីល្ប៍វិធីក្នុងការតែងនិពន្ធក៏ជាផ្នែកមួយជួយជំរុញឱ្យស្នាដៃរបស់អ្នកនិពន្ធម្នាក់ៗមានចំណុចកាន់តែលេចធ្លោផងដែរ។

Q: តើផលលំបាកអ្វីខ្លះក្នុងរកទីផ្សារសម្រាប់អ្នកនិពន្ធ?

A: ចំពោះចំណុចនេះបងសុំឆ្លើយក្នុងនាមជាអ្នកនិពន្ធប្រលោមលោកបែបបរទេសម្នាក់ ផលវិបាកសម្រាប់បង គឺដោយសារតែអ្នកអានមួយចំនួនគាត់នៅតែដក់ជាប់ផ្នត់គំនិតមួយថា ប្រលោមលោកបែបបរទេសវាមិនល្អ វាមិនបានផ្ដល់ផលអ្វីដល់អ្នកអាន និងមានមួយចំនួនទៀតគាត់គិតថាបង ឬអ្នកនិពន្ធស្រករក្រោយមិនអាចសរសេរទៅក្នុងបរិបទបែបនេះបាន ភាគច្រើនគឺចម្លងស្នាដៃ ឬបកប្រែពីប្រទេសជិតខាង អ្វីបែបនេះ ទើបបានជាទីផ្សារគឺ នៅមានភាពចង្អៀតច្រើន។

Q: តើការបង្កើតកម្មវិធីពិព័រណ៍សៀវភៅផ្ដល់ប្រយោជន៍អ្វីខ្លះដល់អ្នកអាន និងអ្នកនិពន្ធ?

A: ការបង្កើតឱ្យមានពិព័រណ៍សៀវភៅជារៀងរាល់ឆ្នាំ គឺពិតជាមានសារៈសំខាន់ណាស់សម្រាប់ទាំងអ្នកអាន និងអ្នកនិពន្ធ គឺដោយសារតែពេលវេលានោះអាចនាំឱ្យអ្នកអាន និងអ្នកនិពន្ធបានជួបគ្នាដោយផ្ទាល់ អ្នកនិពន្ធទាំងជំនាន់មុន និងជំនាន់ក្រោយក៏អាចបានជួបគ្នានៅក្នុងពេលវេលានេះ មួយវិញទៀតអ្នកអានគាត់នឹងអាចទិញនូវបណ្ដាសៀវភៅដែលគាត់ពេញចិត្ត ហើយថែមទាំងគាត់ទទួលបានការបញ្ចុះតម្លៃ ឬកាដូផ្សេងៗជាអនុស្សាវរីយថែមទៀត។ ហើយកម្មវិធីនេះគឺអាចជះផលវិជ្ជមានសម្រាប់កុមារតូចៗនៅពេលគាត់បានចូលរួម គាត់អាចទទួលបានការបណ្ដុះផ្នត់គំនិតស្រលាញ់សៀវភៅ និងស្រលាញ់ការអានបានថែមទៀតផង។

Q: បាទ! អរគុណច្រើនសម្រាប់ការផ្តល់សម្ភាសន៍៕

Q&A៖ សារព័ត៌មានឌីជីថល ខេមបូណូមីស រំពឹងថាអាចជួយឲ្យពលរដ្ឋដឹងពីសេដ្ឋកិច្ចបានច្រើន

ឈាន សៅវ័ន (Chhean Saovon) — Thu, 11 Mar 2021 10:40:42 +0000

លោកថៃ សុធា ជាសហស្ថាបនិក និងជាប្រធានគ្រប់គ្រងទូទៅសារព័ត៌មានឌីជីថល ខេមបូណូមីស។ លោកបានផ្តល់សម្ភាសដល់លោកឈាន សៅវ័ន ដែលជាសិក្ខាកាមព័ត៌មាន Newsroom Cambodia ដោយនិយាយអំពីការបង្កើត «ខេមបូណូមីស» ឡើង។

Q: ជម្រាបសួរលោក ថៃ សុធា!

A: បាទ! ជម្រាបសួរ។

Q: តើខេមបូណូមីស (Cambonomist) ជាអ្វី?

A: ខេមបូណូមីស បង្កើតឡើងដំបូងកាលពី៤ឆ្នាំមុន ដោយសហស្ថាបនិក ៤រូបដោយក្នុងនោះម្នាក់ជាអ្នកជំនាញផ្នែក IT និងបីនាក់ទៀតជាអ្នកកាសែតដែលមានបទពិសោធន៍ច្រើនឆ្នាំនិងច្រើនវិស័យនៃព័ត៌មាន រាប់តាំងពីកាសែតបោះពុម្ព ទូរទស្សន៍ និងអនឡាញ។ ដំបូងឡើយខ្ញុំអាចនិយាយបានថា ខ្ញុំជាមេគំនិត ពីព្រោះកាលណោះខ្ញុំលាឈប់ពីស្ថាប័នទូរទស្សន៍ធំមួយ មកធ្វើការងារជាអ្នកកាសែត freelance ផង ហើយក៏បានបបួលមិត្តភក្ដិជាសហស្ថាបនិកមករួមគ្នាបង្កើតជា ខេមបូណូមីស នេះឡើង។

Q: ហេតុអ្វីបានជាបង្កើតស្ថាប័ន ខេមបូណូមីស នេះឡើង ?

A: ខ្ញុំ និងសហស្ថាបនិកដទៃទៀតមានគំនិតគិតថា នៅកម្ពុជាយើង មិនសូវសម្បូរព័ត៌មានសេដ្ឋកិច្ចទេ។ មានមួយចំនួន គេធ្វើតែរឿងសេដ្ឋកិច្ចបែបដំណឹង គេបោះពុម្ពជាកាសែត។ ហើយទូរទស្សន៍វិញ សឹងតែពិបាករកដំណឹងសេដ្ឋកិច្ចត្រឹមត្រូវ ច្បាស់លាស់ ស៊ីជម្រៅណាស់ ។ សម្បូរតែដំណឹងសេដ្ឋកិច្ចបែបសម្ពោធហាងសម្ពោធក្រុមហ៊ុន ឬផលិតនេះនោះ ។ល។ មួយវិញទៀត ខ្ញុំចូលចិត្តអានព័ត៌មានសេដ្ឋកិច្ចនៅលើ CNBC Bloomberg Economist Business Insider ជាដើម ហើយក្នុងចំណោមនេះខ្ញុំចូលចិត្តជាងគេ គឺអត្ថបទរបស់ទស្សនាវដ្ដី Economist។

ដូច្នេះ ខ្ញុំគិតថា យើងគួរតែមានសារព័ត៌មានអនឡាញជាភាសាខ្មែរមួយ ដែលផ្ដោតលើផ្នែកសេដ្ឋកិច្ច សហគ្រិន ធុរជនល្បីៗ និងវិនិយោគិន។ បើនិយាយពីទស្សនវិស័យរបស់ខេមបូណូមីស គឺយើងចង់ក្លាយជា The Economist of Cambodia ដូច្នេះហើយ សូម្បីតែឈ្មោះ ក៏ខ្ញុំនិងសហស្ថាបនិកគិតចេញពីគំនិតនេះដែរ ទើបយើងដាក់ថា Cambonomist ចង់បានន័យថា Cambodia Economist ឬ The Economist of Cambodia នេះឯង។

យើងមិនដល់គេទេ យើងតូចណាស់ ប៉ុន្តែ យ៉ាងណាក៏ដោយ នេះជាមហិច្ឆតារបស់យើង ដែលចង់ក្លាយដូចគេហ្នឹង។ ធ្វើអ្វីក៏ដោយយើងត្រូវមានមហិច្ឆតា។ យើងចង់ក្លាយដូច Economist ប៉ុន្តែ ទោះបានត្រឹមពាក់កណ្ដាលគេ ក៏យើងខ្លាំងដែរ។ ហេតុផលមួយទៀតដែលយើងបង្កើតខេមបូណូមីស ដោយសារយើងជឿជាក់ថា ពីនេះតទៅ គឺជាយុគសម័យព័ត៌មានឌីជីថល (អនឡាញ)នេះឯង។

នៅលើអនឡាញ (ឌីជីថល) ហ្នឹង យើងធ្វើអ្វីក៏បានដែរ ដូចជា ផ្សាយអត្ថបទ រូបភាព សំឡេង វីដេអូ និយាយរួមទៅ ឌីជីថល ឬអនឡាញនេះ គឺ យើងធ្វើកាសែតក៏បាន ធ្វើទូរទស្សន៍ក៏បាន ធ្វើវិទ្យុក៏បាន វាធំទូលាយខ្លាំងណាស់។ ហើយអ្នកអានអ្នកទស្សនាទៀតសោត មានប្រមាណ ១០លាននាក់ជាង (បើគិតតាមចំនួនអ្នកប្រើហ្វេសប៊ុក ឬអ៊ីនធើណិត)។ ដូច្នេះ វិសាលភាពគឺវាធំធេងណាស់។

Q: ដោយសារខេមបូណូមីសផ្ដោតសំខាន់ទៅលើរឿងសេដ្ឋកិច្ច តើគួរធ្វើយ៉ាងណាឲ្យប្រជាជនយល់ដឹងកាន់តែច្បាស់លើរឿងសេដ្ឋកិច្ច និងអាចផ្ដល់សារសំខាន់អ្វីខ្លះដល់ពួកគាត់?

A: ច្បាស់ណាស់ គឺយើងនិយាយខ្លីថា យើងជាសារព័ត៌មានសេដ្ឋកិច្ចឌីជីថលមានន័យថា យើងជាសារព័ត៌មានឌីជីថលដែលផ្ដោតសំខាន់លើប្រធានបទសេដ្ឋកិច្ចហើយពាក្យសេដ្ឋកិច្ចហ្នឹងវាទូលំទូលាយណាស់ យើងធ្វើមិនអស់ទេ។ សព្វថ្ងៃ យើងផ្សាយរឿងសេដ្ឋកិច្ចក្នុងតំបន់ សេដ្ឋកិច្ចពិភពលោក និងសេដ្ឋកិច្ចប្រទេសកម្ពុជា។

នៅស្រុកគេ តួយ៉ាងស្រុកថៃ វៀតណាម និងស្រុកឯទៀតៗក្បែរខាងកម្ពុជា យើងផ្សាយអំពីធុរកិច្ចវិនិយោគ និងការរកស៊ីនៅស្រុកគេ ពីអាជីវកម្មតូច ដល់ក្រុមហ៊ុនខ្នាតយក្ស តើគេកំពុងធ្វើអី ធ្វើដល់ណា ការនាំចេញនាំចូលគេយ៉ាងម៉េច? ទីផ្សារគេនៅទីណាខ្លះ ? ធុរជនគេ វិនិយោគិនគេធ្វើអ្វីខ្លះ ប្រជាជនគេរកស៊ីអ្វីខ្លះ ។ល។

នៅកម្រិតពិភពលោក យើងផ្សាយព័ត៌មានអំពីសុខភាពសេដ្ឋកិច្ចរបស់ប្រទេសមហាអំណាចធំៗ ដែលវាមានផលប៉ះពាល់ដល់សេដ្ឋកិច្ចពិភពលោកទាំងមូល ដូចជា សង្គ្រាមពាណិជ្ជកម្មចិន អាមេរិក។

ក្នុងកាលៈទេសៈបច្ចុប្បន្ន យើងក៏ផ្ដោតលើបញ្ហាកូវីដ ១៩ដែរ ទៅលើជ្រុងនៃការវិវឌ្ឍថ្មីៗទាក់ទងនឹងវ៉ាក់សាំង វិធានការ និងយុទ្ធសាស្ត្រដោះស្រាយបញ្ហារបស់ប្រទេសនីមួយៗ វិធានការស្ដារ និងជួយសេដ្ឋកិច្ចក្នុងអំឡុងពេលវិបត្តិកូវីដ ១៩។ រីឯនៅកម្ពុជាវិញ យើងផ្ដោតលើកសិកម្មច្រើនខ្លាំងដែរ ដោយផ្សាយអំពីបញ្ហាទីផ្សាររបស់កសិករ ដំណោះស្រាយរបស់រដ្ឋាភិបាល។

យើងផ្សាយអំពីការវិនិយោគទូទៅ អំពីវិស័យអចលនទ្រព្យ និងសុខភាព វិស័យនេះយើងផ្សាយពីការនាំចេញនាំចូល ចំណូលពន្ធគយ ពាណិជ្ជកម្មទ្វេភាគី យើងផ្សាយពីវិស័យធនាគារនិងហិរញ្ញវត្ថុ។ ទន្ទឹមនឹងនេះ យើងក៏ផ្សាយអំពីគំនិតអាជីវកម្ម គន្លឹះក្នុងការរកស៊ី ។ល។ និង។ល។ ផងដែរ ដោយយើងធ្វើកិច្ចសម្ភាសន៍ពិសេសជាមួយធុរជនល្បីៗ តួអង្គសំខាន់ៗក្នុងវិស័យសេដ្ឋកិច្ច និងមន្ត្រីរដ្ឋាភិបាលជាន់ខ្ពស់ជាច្រើន។

ហើយពិសេសបំផុតនោះ ខ្ញុំចង់បញ្ជាក់បន្តិចថា យើងជាសារព័ត៌មានឌីជីថល ដែលផ្ដោតលើការផ្សាយជាវីដេអូ ពោលប្រៀបបីដូចជាទូរទស្សន៍អ៊ីចឹងដែរ គ្រាន់តែយើងគ្មានអង់តែន ។ យើងមានកម្មវិធីដំណឹងសេដ្ឋកិច្ចរាល់ព្រឹក ដែលផ្សាយផ្ទាល់ទៅលើបណ្ដាញសង្គមហ្វេសប៊ុក និងយូធូប។

Q: តើខេមបូណូមីស ជួបបញ្ហាប្រឈមអ្វីខ្លះនៅពេលដែលបង្កើតដំបូង? ព្រោះជាស្ថាប័នដែលផ្ដោតសំខាន់ខ្លាំងលើរឿងសេដ្ឋកិច្ចបែបហ្នឹង?

A: បញ្ហាប្រឈមវារាប់មិនអស់ទេ។ យើងចាប់ផ្ដើមដោយគ្មានចំណាយលុយកាក់អ្វីទេ។ ខ្ញុំ និងសហស្ថាបនិកពីរនាក់ទៀតជាអ្នកកាសែត យើងផលិតមាតិកាព័ត៌មាន រីឯមិត្តយើងម្នាក់ទៀត គាត់បង្កើតវិបសាយ ផេកហ្វេសប៊ុក និងYouTube រួចហើយយើងខំផលិតព័ត៌មានល្អៗផ្សាយទៅ។

ពីដំបូង យើងចេះតែខំធ្វើទៅដោយគ្មានដើមទុនអ្វីទេ ប្រើកម្លាំង ប្រើពេលវេលារបស់យើងទាំងអស់គ្នា។បន្ទាប់មក មានអ្នកអានច្រើនគួរសម យើងក៏រកបានការផ្សាយពាណិជ្ជកម្ម មានន័យថា យើងមានលុយខ្លះ យើងក៏ពង្រីកចំនួនអ្នកសរសេរអត្ថបទ ផលិតវីដេអូ កាត់តវីដេអូ ជាដើម។ គិតមើលទៅ លំបាកយ៉ាងម៉េច?

គ្មានអ្នកណាចង់ធ្វើការឲ្យយើងទេ បើយើងគ្មានលុយផ្ដល់ប្រាក់ខែឲ្យគេផងហ្នឹង។ មានតែធ្វើខ្លួនឯង ពេលមានលុយ ទើបយើងអាចរកមនុស្សបានបន្ថែមឲ្យជួយធ្វើការងារ។ បញ្ហាមួយទៀត ខ្ញុំគិតថាវាជារឿងទូទៅទេ គឺ យើងផ្សាយដំណឹង ឬព័ត៌មានត្រឹមត្រូវតាមវិជ្ជាជីវៈ ហើយផ្សាយច្រើន តែទៅលើសេដ្ឋកិច្ចអីហ្នឹងមិនសូវមានអ្នកមើល អ្នកអានទេ ។ គេចូលចិត្តអានឬមើលគេផ្សាយផ្ទាល់ពីនេះពីនោះជាង។

យើងដឹងហើយជួនកាលមនុស្សម្នាក់អង្គុយ liveហែកកេរ្តិ៍អ្នកនេះអ្នកនោះ គេមើលច្រើនណាស់។ អានេះជារឿងទូទៅ។ ប៉ុន្តែ ខ្ញុំជឿជាក់ថា យូរៗទៅ នឹងមានមនុស្សកាន់តែច្រើនឡើងដែលងាកមកអានឬទស្សនាព័ត៌មានដែលត្រឹមត្រូវតាមវិជ្ជាជីវៈ និងច្បាស់លាស់ ។

Q: តើយល់ឃើញយ៉ាងណាដែរលើវិស័យសារព័ត៌មានសព្វថ្ងៃ ? ហើយតើគួរធ្វើយ៉ាងណាដើម្បីឲ្យស្ថាប័នអ្នកសារព័ត៌មានមួយនេះ ប្រកបដោយក្រមសីលធម៌ និងមានវិជ្ជាជីវៈ ?

A: ចំពោះខ្ញុំ និយាយពីវិស័យសារព័ត៌មានសព្វថ្ងៃ កាសែត ទស្សនាវដ្ដីបោះពុម្ពជាក្រដាស គឺក្លាយជារឿងអតីតកាលទៅហើយ បិទសឹងតែអស់ទាំងស្រុងហើយ ។ ទូរទស្សន៍វិញ ក៏សឹងតែគេលែងមើលព័ត៌មានដែរ នៅសល់អ្នកមើលកម្មវិធីកម្សាន្ត មើលកុនអាចថានៅមានអ្នកមើលច្រើន (នេះជាការយល់ឃើញផ្ទាល់ខ្លួនរបស់ខ្ញុំ)។

នេះយើងនិយាយពីមធ្យោបាយនៃការផ្សាយព័ត៌មាន។ ដោយឡែក ចំពោះអ្នកសារព័ត៌មានវិញ ខ្ញុំយល់ថា យើងមានសេរីភាពដោយអន្លើ មានន័យថា បើយើងផ្សាយរឿងកម្សាន្ត រឿងសង្គមធម្មតាៗ មិនប៉ះពាល់ដល់អ្នកណា ឬមិនពាក់ព័ន្ធនឹងនយោបាយអី យើងផ្សាយបានដោយសេរី ។

យើងឃើញហើយអ្នកណាៗក៏អាចបើកវិបសាយ សារព័ត៌មានអនឡាញបានដែរ។ ប៉ុន្តែ បើជាព័ត៌មានបែបស៊ើបអង្កេតអំពីករណីបទល្មើសព្រៃឈើធំៗ ការរំលោភដីធ្លី សិទ្ធិមនុស្សធំៗអី លែងសូវមានអីអានហើយ នៅសល់តែសារព័ត៌មានពីរបីស្ថាប័នប៉ុណ្ណោះដែលផ្សាយរឿងរសើបៗទាំងនេះ។

ចំពោះគុណភាពវិញ នៅលើអនឡាញ ឬវិស័យសារព័ត៌មានឌីជីថល ឬអនឡាញនេះ គឺនៅខ្វះគុណភាព និងភាពវិជ្ជាជីវៈត្រឹមត្រូវហ្នឹងច្រើនណាស់ ហើយម្យ៉ាង អ្នកមើលអ្នកអានក៏មិនមានចំណេះដឹងផ្នែកឌីជីថល ឬយើងហៅថា digital media literacy អីដែរ។

ភាគច្រើន គាត់មើលមិនដឹងថាព័ត៌មានហ្នឹងមានវិជ្ជាជីវៈត្រឹមត្រូវ ឬអត់ផងទេ។ ដូច្នេះ សរុបមកវិញ មានតែអ្នកសារព័ត៌មានដែលបានទទួលការបណ្ដុះបណ្ដាលត្រឹមត្រូវ និងមានវិជ្ជាជីវៈខំប្រឹងធ្វើការងារទៅ ដើម្បីរក្សាគុណភាពនិងវិជ្ជាជីវៈ និងខំផ្សាយនូវអ្វីដែលពិតច្បាស់លាស់ និងគោរពក្រមសីលធម៌វិជ្ជាជីវៈ ខ្ញុំគិតថា យូរៗទៅ មនុស្សម្នាអ្នកអានអ្នកមើលហ្នឹងមានការយល់ដឹងច្រើន ពួកគាត់គង់តែនឹងបោះបង់ចោលសារព័ត៌មានអនឡាញជជុះ (គ្មានវិជ្ជាជីវៈ) ងាកមកអានព័ត៌មានដែលច្បាស់លាស់និងមានវិជ្ជាជីវៈមិនខានឡើយ។

មួយវិញទៀត ខ្ញុំជឿជាក់ថា ក្រុមហ៊ុនធំៗ អ្នកផ្សាយពាណិជ្ជកម្មធំៗ ក៏នឹងជួយគាំទ្រដល់សារព័ត៌មានដែលមានវិជ្ជាជីវៈ ដើម្បីពួកយើងអាចពង្រីកនិងបំពេញ ការងារបានកាន់តែច្រើនថែមទៀត សម្រាប់បម្រើដល់អ្នកអាននិងមហាជន ។ ខ្ញុំគិតថា នៅពេលណា មហាជន សង្គម ធុរជន អ្នកនយោបាយ គាំទ្រសារព័ត៌មានដែលមានវិជ្ជាជីវៈ ពេលនោះហើយដែលឥទ្ធិពលនៃសារព័ត៌មានគ្មានវិជ្ជាជីវៈ វានឹងថមថយចុះដោយឯកឯង៕

តម្លៃប្រេងឥន្ធនៈខែមីនាឡើងថ្លៃ ខណៈអ្នកប្រើប្រាស់ថាឡើងចំពេលលំបាករកចំណូលដោយសារកូវីដ

ឈាន សៅវ័ន (Chhean Saovon) — Sun, 07 Mar 2021 08:09:42 +0000

ក្រសួងពាណិជ្ជកម្មបានប្រកាសកាលពីពេលថ្មីៗនេះថា តម្លៃប្រេងឥន្ធនៈនាខែមីនា មានតម្លៃថ្លៃជាងខែកុម្ភៈ ខណៈពេលដែលអ្នកប្រើប្រាស់មួយចំនួនថាការឡើងនេះកើតឡើងចំពេលដែលពួកគាត់មានការលំបាកក្នុងការរកប្រាក់ចំណូលដោយសារតែជំងឺរាតត្បាតកូវីដ ១៩។

បើយោងទៅតាមសេចក្តីជួនដំណឹងរបស់ក្រសួងពាណិជ្ជកម្ម តម្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី០១ ដល់ ថ្ងៃទី១៥ ខែមីនា ឆ្នាំ២០២១ លក់ក្នុងតម្លៃ ៣.៧០០រៀល/លីត្រ សម្រាប់សាំងធម្មតា EA92 និង ៣.៣៥០រៀល/លីត្រ សម្រាប់ប្រេងម៉ាស៊ូត។

កញ្ញាទួន ស្រីវីន មានអាយុ ២២ឆ្នាំជានិស្សិតម្នាក់នៅក្នុងភ្នំពេញ បានប្រាប់មកកាន់សិក្ខាកាមNewsroom Cambodia ថា «ថ្លៃ ពីព្រោះរយៈពេលកូវីដ រកចំណូលមិនសូវបាន»។

លោកសម្បតិ្ត អាយុ៥៦ឆ្នាំ ដែលជាអ្នករត់កង់បីប្រមាណជាង១០ឆ្នាំនៅក្នុងរាជធានីភ្នំពេញ បាននិយាយាថា «តាំងពីមានកូវីតមក ខ្ញុំរកមិនសូវបានទេ ពេលខ្លះមានភ្ញៀវ ពេលខ្លះក៏អត់ហើយ ពេលនេះសាំងឡើងថ្លៃទៀត គេមិនសូវជិះកង់បីទេ ភាគច្រើនគេជិះកង់បីឥណ្ឌា ដែលគេចាក់ហ្គាសដែលជាផលប៉ះពាល់សម្រាប់ខ្ញុំ»។

លោកក៏បានបន្ថែមទៀតថា លោកគ្មានលុយណាទៅបង់រំលស់កង់បីឥណ្ឌាដូចគេ បើឥឡូវរកមិនសូវបានផង។

ក្រសួងពាណិកម្មបានបញ្ជាក់ផងដែរថា មិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង ចុះនៃប្រេងតាមទីផ្សារអន្តរជាតិ មកគណនាតាមប្រកាសដូចមានក្នុងឯកសារយោងតែប៉ុណ្ណោះ៕

ឈាន សៅវ័ន (Chhean Saovon) – Newsroom Cambodia

បទពិសោធន៍ឆ្លងកាត់ជំងឺបាក់ទឹកចិត្តរបស់​អ្នក​និពន្ធ​ម្នាក់

ក្រសួងប្រកាសករណីវិជ្ជមានកូវីដថ្មី​ ៦១៨នាក់​ ខណៈជាង ៤០០នាក់មិនទាន់រកកន្លែងព្យាបាលបាន

ក្រសួងប្រកាសថាករណីវិជ្ជមានថ្មីសរុបចំនួន៤៧៧នាក់ ជាង​៤០០​នាក់​មិនទាន់​កំណត់​កន្លែង​សម្រាក​ព្យាបាល​

ស្រ្តីជនជាតិខ្មែរ​ម្នាក់​ទៀត​​បានស្លាប់​ដោយសារជំងឺ​កូវីដ​១៩ ធ្វើ​ឲ្យ​ករណី​ស្លាប់​កើន​ដល់​២៥នាក់

ក្រសួងសុខាភិបាលប្រកាសករណីវិជ្ជមានកូវីដខ្ពស់បំផុតប្រចាំថ្ងៃចំនួន​ ៥៧៦នាក់