ឆនរស្មី (Chhorn Raksmey) – Newsroom Cambodia

បទយកការណ៍៖ ជីវភាពអ្នកនេសាទតាមបណ្តោយទន្លេមេគង្គកាន់តែយ៉ាប់យឺន ខណៈទិន្នផលត្រីស្រុតចុះខ្លាំង

ឆនរស្មី (Chhorn Raksmey) — Sat, 14 Aug 2021 16:00:18 +0000

ប្តីប្រពន្ធនេសាទមួយគូ មានញើសពេញផ្ទៃមុខ ដៃកំពុងប្រញាប់វេញមងស្របជើងកំពុងកន្រ្តាក់ទាញខ្សែមងដែលជាទង្វើរនៃការរំដោះមងដែលជំពាក់គ្នាបន្ទាប់ពីនេសាទត្រីរួច។ ការប្រមូលផលត្រីឆ្នាំនេះមិនសូវល្អទេសម្រាប់ពួកគាត់ដោយសារតែទឹកទន្លេរាក់ជាងមុន ប្រែប្រួលអាកាសធាតុ និងច្រាំងទន្លេបានបាក់ជាដើម។

អ្នកស្រីណាត់ ត្រីឌីយ៉ាស ៤០ឆ្នាំ និងលោកឌិន ស្គាលលេះ អាយុ៤២ បាននិយាយថាទិន្នផលត្រីចាប់ផ្ដើមថយចុះពីមួយឆ្នាំទៅមួយឆ្នាំ ដោយកាលពីប្រមាណជិតដប់ឆ្នាំមុន អាចរកបានក្នុងមួយថ្ងៃខ្ទង់ ១០០គីឡូ ប៉ុន្តែឥឡូវអាចរកត្រីបានសឹងតែមិនបាន ១០គីឡូផង។

អ្នកស្រីណាត់ ត្រីឌីយ៉ាស និងលោកឌិន ស្គាលលេះ កំពុងវេញខ្សែរមងលើទូកនៅត្រើយម្ខាង នៅថ្ងៃទី៣០ ខែកក្កដា ឆ្នាំ២០២១។ រូបភាព៖ ឆន រស្មី

លោកស្គាលលេះ បាននិយាយមួយៗភ្ជាប់ជាមួយទឹកមុខស្រងូតស្រងាត់ថា៖ «ឥឡូវតាំងពីខែទឹកឡើងមកនេសាទមួយថ្ងៃមិនដល់១០ម៉ឺនផងហ្នឹង កាលពីមុនរកបាន១០០គីឡូយ៉ាងតិច តែតម្លៃវាក៏ថោកដែរខ្ទង់១០០០ ហើយថ្លៃអស់ហើយ៣០០០ហ្នឹង»។

គ្រួសារនេសាទមួយនេះគឺស្ថិតក្នុងចំណោមអ្នកនេសាទជាច្រើនផ្សេងទៀតដែលត្រូវបានសម្ភាសនាពេលថ្មីៗនេះថា ពួកគាត់បានជួបការលំបាកក្នុងការនេសាទ ហើយអ្នកផ្សេងទៀតក៏បានពិចារណាថាឈប់ធ្វើនេសាទផងដែរដើម្បីរកការងារសំណង់ និងលក់បន្លែ។

ព្រះអាទិត្យរៀបនឹងអស្ដង្គតចាំងលើផ្ទៃទឹកទន្លេបញ្ចេញនូវពន្លឺព្រិចៗ ពណ៌លឿងឆ្អិនឆ្អៅ គួរជាទីគយគន់ មនុស្សម្នានាំគ្នាមកធ្វើលំហាត់ប្រាណ លំហែអារម្មណ៍ គយគន់ទិដ្ឋភាពស្រស់ត្រកាលតាមបណ្តោយសួនច្បារទល់មុខអគារខ្ពស់ស្កឹមស្កៃពណ៌ពងមាន់កំពុងឈរបង្អួតខ្លួននៅខាងត្រើយម្ខាង។

មនុស្សជាច្រើនស្គាល់កន្លែងនេះថាជាសណ្ឋាគារសុខា ដែលជាលំដាប់ផ្កាយប្រាំ ព័ទ្ធទៅដោយមនុស្សម្នាជាច្រើន ខ្លះកំពុងធាក់កង់ ខ្លះកំពុងហាត់ប្រាណ ដោយដើរដាក់កាសស្តាប់តន្រ្តីបណ្តើរ ភ្នែកសំឡឹងមើលទេសភាពតាមបណ្តោយទន្លេមេគង្គ ខណៈទូកនេសាទតូចៗជាង ១០ ចតប្របនឹងច្រាំងទន្លេ។

អ្នកខ្លះកំពុងជជែកគ្នាលេងក្នុងទូក ខ្លះកាន់មង ទាំងដែលទូកកំពុងយោលយោគចុះឡើងតាមកម្លាំងនៃរលកទឹកដោយខ្យល់បក់ខ្លាំងៗ។ ពួកគាត់ហាក់មិនពុលនឹងរលកនោះទាល់តែសោះ។

លោកស្គាលលេះបានលើកឡើងថាមូលហេតុចំបងដែលធ្វើឱ្យផលត្រីធ្លាក់ចុះនេះមានដូចជា ផ្ទៃទឹកទន្លេរាក់ និងមានការបាក់ចាំងទន្លេជាដើម។

លោកបានបញ្ជាក់ថា៖ «តាមខ្ញុំសង្កេតមើលទឹកហ្នឹងរាក់ កាលណាតែទឹកនេសាទរាក់ត្រីចុះអត់ទៅដល់ទន្លេសាប អ៊ីចឹងវារស់នៅតាមៗហ្នឹងចឹងគេនេសាទអស់ហើយ ទឹករាក់មែនទែនអាចឈរដល់»។

ស្រដៀងគ្នានេះដែរ លោកងួត វុធ្ធី មានអាយុ៣០ឆ្នាំ ដែលជាអ្នកនេសាទតាំងពីតូចដោយរៀនចេះពីឪពុក បានប្រាប់ Newsroom Cambodia ថាប៉ុន្មានឆ្នាំមកនេះទិន្នផលត្រីមានការធ្លាក់ចុះហើយ ក្នុងស្ថានភាពមិនប្រាដកប្រជាបែបនេះលោកជ្រើសរើសការស៊ីឈ្នួលឱ្យគេដើម្បីដោះស្រាយជីវភាព។

លោកងួត វុធ្ធី ជាអ្នកនេសាទជនជាតិខ្មែរនៅកោះអរិក្សត្រ កំពុងយោងអង្រឹងកូនស្រីនៅក្រោមផ្ទះ ថ្ងៃទី៣០ កក្កដា ឆ្នាំ២០២១។ រូបភាព៖ មាស មល្លិកា

លោកបាននិយាយបណ្ដើរ យោលអង្រឹងកូនបណ្ដើរថា «មួយរយៈហ្នឹងអត់សូវមានត្រីមានតិចតួច បានតែមួយហូបៗចឹងវាអត់សូវបានច្រើន មួយថ្ងៃពីរ បីគីឡូប៉ុន្នឹង អត់ដែលបានច្រើនដូចមុន ប៉ុន្មានឆ្នាំមុនត្រីច្រើនកាលមុនរាយមង ១០ ទៅ ១៥ម៉ឺន ឥឡូវហ្នឹងរកតែមួយខែ ពីរខែ ដើរបាញ់ថ្នាំស្វាយគេ កាត់ស្មៅឱ្យគេ យើងរកបានមួយឆាវៗតិចតួច មិនមែនរកបាន រកបានរហូត»។

លោកដដែល ដែលជាអ្នកស្ថិតនៅឃុំស្វាយជ្រំ ស្រុកខ្សាច់កណ្ដាល ខេត្តកណ្ដាល លើកឡើងថាមូលហេតុដែលទិន្នផលត្រីថយចុះបែបនេះមកពីមូលហេតុមួយចំនួនដូចជា មានកប៉ាល់ឆ្លងកាត់ច្រើនដែលធ្វើឱ្យរហែកមង និងមានកំណាត់ឈើ សម្រាមនៅពេញទន្លេ។

អ្នកស្រីរស់ ម៉ាស់ ដែលជាជនជាតិឥស្លាម ហើយក៏អ្នកនេសាទត្រីដែលស្ថិតនៅផ្សារច្រាំងចម្រេះ ខណ្ឌឬស្សីកែវ បានប្រាប់ Newsroom Cambodia ថាអ្នកស្រីរស់នៅជាមួយមុខរបរនេសាទត្រីនេះតាំងពីអ្នកស្រីធំដឹងក្ដីមកម្លេះ។

អ្នកស្រីបានបញ្ជាក់ថា មួយឆ្នាំចុងក្រោយនេះកាន់តែមានភាពលំបាកជាខ្លាំងក្នុងការនេសាទ ដោយសារតែខ្សត់ត្រីធ្លាប់តែរដូវនេះមានទូកនេសាទចេញច្រើនបែរមកឆ្នាំនេះគ្មានអ្នកណាចេញនេសាទទៀតនោះទេ ហើយការខ្សត់ត្រីនេះប្រហែលមកពីការប្រែប្រួលអាកាសធាតុ។

អ្នកស្រី រស់ ម៉ាស់ ដែលជាអ្នកនេសាទជនជាតិឥស្លាមនៅផ្សារច្រាំងចម្រេះ ខណ្ឌឬស្សីកែវ ថ្ងៃទី៣១ កក្កដា ឆ្នាំ២០២១។ រូបភាព៖ ឆន រស្មី

អ្នកស្រីបានបន្តថា៖ «សម្រាប់តែឆ្នាំនេះទេដែលពិបាករកត្រីកូនចេញទៅរករាល់ថ្ងៃរកមួយថ្ងៃពេញពេលមកវិញរកត្រីបានត្រឹម៤-៥ត្រីតែប៉ុណ្ណោះស្ទើតែរកមួយសម្លមិនបានផង តែបើប្រៀបធៀបទៅ៥-៦ឆ្នាំមុនខុសគ្នាឆ្ងាយណាស់ពីមុនសម្បូរហើយរកបានសម្រាប់លក់ដូរទៀតផង ភ្ញៀវវិញមកយកដល់ៗកន្លែងម៉ង់»។

អ្នកស្រីវ័យ៥៨ឆ្នាំរូបនេះបានបន្ថែមថា ក្រៅពីរកក្នុងភូមិសាស្ត្ររបស់អ្នកស្រីមិនបានអ្នកស្រីក៏ហ៊ានទៅនេសាទកន្លែងណាផ្សេងទៀតគ្រប់ជនជាតិចាមដែលរស់នៅទីនោះបានត្រឹមរាយមងក្នុងបរិវេណនេះដោយសារតែមិនស្គាល់ពីទីតាំងកន្លែងផ្សេងច្បាស់ហើយបានត្រឹមតែធ្វើការនេសាទជុំវិញដែលខ្លួនឯងកំពុងរស់នៅ។

អ្នកស្រីបានលើកឡើងថា៖ «បើនៅតែពិបាកនេសាទដូចសព្វថ្ងៃនេះ ខ្ញុំប្រហែលឈប់នេសាទហើយដើរធ្វើការសំណង់ ឬបះបន្លែបន្តិចបន្ទួចលក់វិញដើម្បីដោះស្រាយបញ្ហាក្នុងការរស់នៅ»។

អ្នកស្រីញែម ផល្លី អាយុ៣៨ឆ្នាំ ជាអ្នកនេសាទនៅ ភូមិផ្សារព្រែកក្ដាម ឃុំកោះចិន ស្រុកពញ្ញាឮ ខេត្តកណ្តាល បានប្រាប់ Newsroom Cambodia ពីមូលហេតុការនេសាទត្រីក្នុងឆ្នាំនេះថាមិនបានគឺដោយសារខ្យល់ខ្លាំង និងទឹកឡើងជាលំដាប់។

អ្នកស្រីបានបន្យល់ថា បញ្ហាទឹកឡើងខ្យល់ចាប់ផ្ដើមបក់ខ្លាំង ចក កំប្លោក អណ្តែត ធ្វើឲ្យមានការលំបាកក្នុងការនេសាទ ពិសេសសម្រាប់រាយមង ទោះខែនេះជាខែដែលគេបិទនេសាទក្ដី តែបិទសម្រាប់តែត្រីតូចៗប៉ុណ្ណោះ សម្រាប់ត្រីធំគេបន្តនេសាទតាមធម្មតា ហើយវាក៏អាចប៉ាន់ស្មានបានថាបរិមាណត្រីឆ្នាំនេះឡើងឬក៏ចុះ។

អ្នកស្រី ញែម ផល្លី ជាអ្នកប្រកបរបបនេសាទស្ថិតនៅជិតស្ពានព្រែកក្តាម ខេត្តកណ្តាល កំពុងផ្តល់បទសម្ភាសន៍ជាមួយក្រុមការងារNewsroom Cambodia ថ្ងៃទី៣១ កក្កដា ២០២១។ រូបភាព៖ ធឹម សុភក្រ

អ្នកស្រីបានបន្តថា «ឆ្នាំនេះរកមួយថ្ងៃបានត្រីត្រឹមតែ ២គីឡូហ្នឹងអស់ បើប្រៀបធៀបទៅឆ្នាំមុនៗមួយថ្ងៃ រកបានប្រហែល១ ០គីឡូ បញ្ហារកត្រីមិនបានមិនមកពីខ្សត់ត្រីខ្លាំងពេកនោះទេតែបញ្ហាធំរបស់ ខ្ញុំមកពីខ្យល់ខ្លាំងធ្វើឲ្យចេញទូកទៅនេសាទពុំបាន ក្នុងឆ្នាំមុនកាលដែលសម្បូរត្រីក្នុងមួយថ្ងៃអាចរកប្រាក់ចំណូលបានជិត ២០ម៉ឺន តែសម្រាប់ឆ្នាំនេះគឺចប់ហ្មង រកតែ ៥ម៉ឺនក្នុងមួយថ្ងៃ មិនបានផង»។

ជាស្រ្តីដែលមានកូន ៦នាក់នៅក្នុងបន្ទុកបានបន្ថែមថា «ដំណោះស្រាយក្នុងការរកប្រាក់ចំណូលផ្គត់ផ្គង់គ្រួសារពឹងផ្អែកលើការនេសាទនេះតែឥឡូវកាន់តែពិបាក ខ្ញុំនិងសម្រេចឱ្យកូនៗច្បង ២នាក់ ទៅដើរធ្វើការនៅខាងក្រៅដើម្បីដោះទាល់»។

លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា អ្នកនេសាទមានការកើនឡើងរួមជាមួយវិធីសាស្រ្តនៃការចាប់ត្រីមានបច្ចេកទេសខ្ពស់ និងបទល្មើសច្រើន។

លោកបានបន្ថែមថា ការប្រែប្រួលបរិយាកាស របបទឹកជំនន់ និងការប្រែប្រួលនៃការប្រើប្រាស់ដី និងលំនៅដ្ធាននិងកក្ដាមួយចំនួនទៀត។

លោកបានបញ្ជាក់ថា៖ «តម្រូវការត្រីមានការកើនឡើងដោយសារកំណើនប្រជាជន សុខសន្តិភាព និងកំណើនសេដ្ធកិច្ចល្អក្នុងរយះពេលជាង២០កន្លងទៅ»។

លោកឱម សាវ៉ាត នាយកប្រតិបត្តិសម្ព័ន្ធដើម្បីអភិរក្សធនធានជលផល បានបញ្ជាក់ប្រាប់ Newsroom Cambodia ថាការនេសាទដែលប្រើប្រាស់ឧបករណ៍ខុសច្បាប់ ធ្វើឱ្យស្ទះផ្លូវរបស់ប្រភេទត្រីមួយចំនួនទៅពងបាន គម្រោងអភិវឌ្ឍន៍នានារួមមាន ការបូមខ្សាច់ គម្រោងទំនប់វារីអគ្គិសនី។

បូករួមទាំង ភាពមិនប្រក្រតីនៃលំហូរទឹក ដោយនៅរដូវប្រាំងបែរជាមានទឹកច្រើន ផ្ទុយមកវិញនៅរដូវវស្សាបែរជាមានកម្រិតទឹកតិចទៅវិញ ដោយសារការប្រើប្រាស់ទំបន់វារីអគ្គិសនីដែលត្រូវការទម្លាក់ទឹកនារដូវប្រាំង ទាំងនេះសុទ្ធសឹងជាដើមចមនៃការខ្សត់ត្រីធម្មជាតិ។ នេះយោងតាមការអះអាងរបស់លោកលោកឱម សាវ៉ាត។

លោកឱម សាវ៉ាត បាននិយាយថា «កាលណាមានទំនប់ច្រើន គឺស្ទាក់ទឹក កាលណាស្ទាក់ទឹកវាធ្វើឱ្យបម្រែបម្រួលកម្ពស់ទឹក។ ធម្មតានៅក្នុងខែកក្កដា ឬ ខែសីហា កញ្ញា គឺជាពេលវេលាដែលរលាយទឹកកកនៅភ្នំទីប៉េ ហូរធ្លាក់មកតំបន់ទំនាបទន្លេមេគ្គងខាងក្រោម បឹងទន្លេសាបយើង»។

ពីដើមឡើយអត់មានទំបន់វារីអគ្គិសនីច្រើនទេ ប៉ុន្តែឥឡូវនេះវាមានច្រើន។ អញ្ចឹងហើយមានការប្រែប្រួលហើយកម្ពស់ទឹក […] ខ្មែរយើង យើងធ្វើ(ទំបន់វារីអគ្គិសនី) តែ១ ទេ ប៉ុន្តែវៀតណាមធ្វើដល់ទៅ៦ »។ នេះយោងតាមលោកឱម សាវ៉ាត ។

អ្នកជំនាញរូបនេះបានយល់ឃើញថា ការធ្លាក់ចុះទិន្នផលត្រីនារដូវកាលនេះថា ក៏ដោយសារជារដូវបិទនេសាទផងដែរ ពីព្រោះរដ្ឋាភិបាលអនុញ្ញាតឱ្យនេសាទដោយប្រើមង មានសំណាញ់ត្រឹម ២ ទៅ ៣សង់ទីម៉ែត្រ រហូតដល់ថ្ងៃ១ ខែតុលា ទើបមានការបើកឱ្យមានការនេសាទជាធម្មតាវិញ។

លោកឱម សាវ៉ាត បាននិយាយថាមានកំណើនបទល្មើសនេសាទ ហើយវាចេះតែបន្តកើតមានឡើងដែលសកម្មភាពទាំងអស់នោះរួមមាន ការប្រើសំណាញ់ចាប់ត្រីលើសពី ៥០ម៉ែត្រ ការប្រើប្រាស់សន្ទូចលើសពី ១ផ្លែឡើង ដែលលើសពីចំនួនកំណត់ ព្រមទាំងការប្រើប្រាស់ឧបករណ៍ឆក់ត្រីបែបក្ តៅនិងត្រជាក់មានការកើនឡើង។

លោកម៉ៅ ហាក់ អគ្គនាយករងទទួលបន្ទុកកិច្ចការបច្ចេកទេសនិងជាប្រធាននាយកដ្ឋានជលសាស្រ្តក្រសួងធនធានទឹកបានបញ្ជាក់ថាយោងតាមព្រឹត្តិបត្រព្យាករណ៍ ទឹកនឹងស្រក ស្រកមែន ប៉ុន្តែមិនមែនមានន័យថាទាបនោះទេ ហើយបានបន្តថាទឹកទន្លេ បើធៀបនឹងឆ្នាំមុន វាខ្ពស់ជាង។

លោកបានបន្តថា ស្ថានភាពកម្ពស់ទឹកមិនអាចគ្រប់គ្រងបានទេ ពីព្រោះអាស្រ័យទៅនឹងរបាយណ៍ទឹកភ្លៀង។ «កម្ពស់ទឹកនេះវាឡើងវាចុះអញ្ចឹងហើយ តិចវាឡើងវិញហើយ។ កាលណាមានភ្លៀងនៅអាងទន្លេមេគង្គ ទឹកវាឡើងហើយ»៕

កម្រិតទឹកទន្លេមេគង្គក្រោម កើនឡើងដោយសារភ្លៀងធ្លាក់និងការបញ្ចេញទឹកពីទំនប់

ឆនរស្មី (Chhorn Raksmey) — Fri, 30 Jul 2021 13:48:26 +0000

គណៈកម្មាការទន្លេមេគង្គ (MRC) នៅថ្ងៃទី២៨ ខែកក្ដដា ឆ្នាំ ២០២១ បានលើកឡើងថាកម្រិតទឹកដែលបានកត់ទុកនៅក្នុងអាងទន្លេមេគង្គក្រោម (LMB) មានការកើនឡើងគួរឱ្យកត់សម្គាល់ក្នុងអំឡុងពេល ៧ ថ្ងៃចុងក្រោយនេះ ដោយសារមានភ្លៀងធ្លាក់ខ្លាំង និងការបញ្ចេញទឹកភ្លាមៗពីទំនប់វារីអគ្គីសនី ក៏ប៉ុន្តែកំរិតទឹកទន្លេឆ្លងកាត់ស្ថានីយ៍ត្រួតពិនិត្យទាំងអស់នៅតែទាបជាងកំរិតប្រកាសអាសន្ន ឬចំនុចគ្រោះថ្នាក់។

លោកឡាំហុង សុន ប្រធានលេខាធិការដ្ឋានតំបន់ទឹកជំនន់ និងគ្រោះរាំងស្ងួតបានមានប្រសាសន៍ថា ដោយសារមានភ្លៀងធ្លាក់ខ្លាំង ទំនប់វារីអគ្គិសនីនៅទន្លេមេគង្គក្រោម រួមទាំងទំនប់ទឹកបានបញ្ចេញបរិមាណទឹកយ៉ាងច្រើនក្នុងកំឡុងថ្ងៃទី២៤-២៥ ខែកក្កដា ដែលបណ្តាលឱ្យកម្ពស់ទឹកហក់ឡើងយ៉ាងលឿន។

លោកបានបន្ថែមទៀតថាគេមិនទាន់ដឹងច្បាស់ថាតើការកើនឡើងទាំងនេះបណ្តាលឱ្យមានការខូចខាត ឬយ៉ាងណានោះទេ។

លោកឡាំ ហុងសុនបានមានប្រសាសន៍ថា៖ «ការបញ្ចេញទឹកភ្លាមៗពីទំនប់វារីអគ្គិសនីបង្កជាបញ្ហាប្រឈមចំពោះការព្យាករណ៍កម្ពស់ទឹកទន្លេ» ដោយកត់សម្គាល់ថា

គណៈកម្មការទន្លេមេគង្គបានដំឡើងស្ថានីយជលសាស្ត្រស្វ័យប្រវត្តិចំនួន ៦៧ នៅតាមដងទន្លេមេគង្គ និងដៃទន្លេ ដើម្បីប្រមូលទិន្នន័យទឹកភ្លៀង និងកម្រិតទឹក។

នៅប្រទេសកម្ពុជា កំរិតទឹកនៅលាតសន្ធឹងចាប់ពីខេត្តស្ទឹងត្រែង ដល់អ្នកលឿងក្នុងខេត្តព្រៃវែង ត្រូវបានគេរាយការណ៍ថាបានកើនឡើង ០,៨៥ម ក្នុងរយៈពេលដូចគ្នា។ក្នុងរយៈពេលប្រាំថ្ងៃបន្ទាប់ កម្រិតត្រូវបានព្យាករណ៍ថានឹងកើនឡើង ២,៦០ម ទៀត៕

ក្រសួងប្រកាសប្រឆាំងនឹងការកេងចំណេញលើឧបករណ៍តេស្តអង់ទីហ្សែនកូវីដ

ឆនរស្មី (Chhorn Raksmey) — Mon, 26 Jul 2021 15:24:29 +0000

ក្រសួងប្រៃសណីយ៍ និងទូរគមនាគមន៍កាលពីពេលថ្មីៗនេះបានប្រកាសពីវិធានការចំពោះជនឆ្លៀតឱកាសដែលបានយកឧបករណ៍តេស្តរហ័សអង់ទីហ្សែនកូវីដ-១៩ ទៅធ្វើអាជីវកម្មបន្ត ដែលខុសពីគោលការណ៍កំណត់ថា ឧបករណ៍នេះអាចទិញបានតែក្នុងគោលដៅប្រើប្រាស់ប៉ុណ្ណោះ។

សេចក្តីប្រកាសព័ត៌មានដែលបានចេញនៅថ្ងៃទី២១ ខែកក្ដដា ឆ្នាំ២០២១ បានឲ្យដឹងថា ក្រោយពីបានស៊ើបអង្កេតយ៉ាងជាក់លាក់រួចមក ក្រសួងបានកំណត់មុខសញ្ញាជនឆ្លៀតឱកាសទាំងនោះ ហើយបានទៅចុះចាត់វិធានការភ្លាមៗនៅទីតាំងចំនួន៥ និងរឹបអូសឧបករណ៍តេសចំនួន ៤,២៥០គ្រឿងដែលឧបករណ៍តេស្តទាំងនោះបានបញ្ជាទិញពីក្រសួងប្រៃសណីយ៍ និងទូរគមនាគមន៍។

សេចក្តីប្រកាសព័ត៌មានបានបញ្ជាក់ថា ការទិញឧបករណ៍តេសពីក្រសួងប្រៃសណីយ៍និងទូរគមនាគមន៍យកទៅធ្វើអាជីវកម្មបន្តនេះពុំបានផ្ដល់ផលប្រយោជន៍អ្វីឡើយដល់ប្រជាពលរដ្ឋ ក៏ប៉ុន្តែនាំឱ្យប្រជាពលរដ្ឋខាតបង់ថវិកា ស្របពេលកំពុងជួបលំបាកពីជំងឺកូវីដ១៩។

សេចក្តីប្រកាសព័ត៌មានបានបន្ថែមថា ក្រសួងប្រៃសនីយ៍ និងទូរគមនាគមន៍នឹងបន្តសហការជាមួយអាជ្ញាធរមានសមត្ថកិច្ច ដើម្បីកំណត់មុខសញ្ញាជនឆ្លៀតឱកាស ហើយចាត់វិធានឱ្យកាន់តែខ្លាំងក្លាបន្ថែមទៀត ដោយមិនបណ្ដោយឱ្យជនឆ្លៀតឱកាសទាំងនោះនៅបង្កបញ្ហា និងរំលោភបំពានលើគោលការណ៍កំណត់របស់ក្រសួង។

គួរបញ្ជាក់ផងដែរថា បច្ចុប្បន្នក្រសួងកំពុងបន្តនាំចូលឧបករណ៍តេស្តរហ័សនេះ មកចែកចាយក្នុងតម្លៃដើមត្រឹមតែ ៣,៧ដុល្លារអាម៉េរិក ហើយធ្វើការចែកចាយបន្តពីថ្ងៃច័ន្ទ ដល់ថ្ងៃអាទិត្យ ជាមធ្យមក្នុងមួយថ្ងៃចំនួន ៣៥០ប្រតិបត្តិការបញ្ជាទិញរបស់ក្រុមហ៊ុន សហគ្រាស រោងចក្រ ស្ថាប័ន ដោយផ្ដល់អាទិភាពលើទីតាំងដែលកំពុងជួបហានិភ័យខ្ពស់ពាក់ព័ន្ធនឹងជំងឺកូវីដ១៩៕

បទយកការណ៍៖ ការចែករំលែកបទពិសោធន៍ដាំក្រញូងលក់របស់ម្ចាស់ចំការមួយនៅស្រុកស្អាង ខេត្តកណ្ដាល

ឆនរស្មី (Chhorn Raksmey) — Fri, 16 Jul 2021 05:39:36 +0000

នារសៀលម៉ោង១ នៅថ្ងៃទី១១ ខែកក្កដា សំឡេងស្រ្តីម្នាក់ឮចេញពីក្នុងផ្ទះយ៉ាងរួសរាយរាក់ទាក់ ជាមួយទឹកមុខអមនឹងស្នាមញញឹមផង អ្នកស្រី សុខ ហៀងហី ជាអ្នកធ្វើចំការ ដាំដំណាំចម្រុះ និងជាម្ចាស់ចំការក្រញូង ដែលមានទីតាំងស្ថិតនៅឃុំព្រែកអំបិល ស្រុកស្អាង ខេត្តកណ្ដាល។

ក្រៅពីខាងមុខផ្ទះចម្រុះដោយដំណាំហូបផ្លែ ក្នុងចំការក្បែរផ្ទះរបស់អ្នកស្រី ហៀងហី វិញ ដើមក្រញូងកំពុងដុះបណ្ដាក់គ្នាយ៉ាងខៀវស្រងាត់។

អ្នកស្រីវ័យ៣២ឆ្នាំរូបនេះ បានចង្អុលទៅចំការក្រញូងរបស់អ្នកស្រីបណ្តើរ ហើយប្រាប់ Newsroom Cambodia បណ្តើរថា អ្នកស្រីបានចំណាយរយៈពេល៤ឆ្នាំមកហើយ ក្នុងបទពិសោធន៍ដាំ និងមើលថែដំណាំក្រញូងនេះ។ អ្នកស្រីថា ក្រញូងជាប្រភេទដំណាំងាយស្រួលដាំ ងាយមើលថែជាងដំណាំផ្សេងៗទៀត។

ក្រញូងជាប្រភេទឈើប្រណីត និងនិងមិនសូវមានអ្នកដាំ ហើយវាចំណាយពេលយូរក្នុងការមើលថែទាំ។ ទោះដំណាំនេះមិនសូវពេញនិយមសម្រាប់ទីផ្សារ តែវាជាក្ដីសង្ឃឹមមួយដែលល្អសម្រាប់ប្រកបរបរដែលមិនសូវចំណាយកំលាំងច្រើនក្នុងការថែទាំ ដូចជាអ្នកស្រី សុខ ហៀងហី។

អ្នកស្រី ហៀងហី បានបញ្ជាក់ថា ដំបូងឡើយអ្នកស្រីគឺជាអ្នកចំការដាំបន្លែ ដំណាំហូបផ្លែធម្មតា ប៉ុន្តែបន្ទាប់ពីមានគំនិតផ្ចុងផ្ដើមពីប្អូនប្រុសដែលជាអ្នកលក់គ្រឿងសង្ហារឹមបានផ្តល់គំនិតឱ្យដាំក្រញូង ក៏សាកល្បងរហូតក្លាយជារបរដែលសមគួរក្នុងការរកប្រាក់កម្រៃ។ ភាគច្រើនពូជក្រញូងនេះគឺមកពីថៃ និងវៀតណាម ហើយអ្នកស្រីសព្វថ្ងៃយកត្រឹមពីរប្រភេទប៉ុណ្ណោះយកមកដាំ គឺមានដូចជាប្រភេទក្រញូងខ្មែរ និងប្រភេទក្រញូងហៃណាន ដោយសារប្រភេទទាំងពីរនេះ មានការគាំទ្រច្រើនពីសំណាក់អ្នកដាំ ពិសេសអតិថិជនប្រចាំរបស់អ្នកស្រី។

អ្នកស្រីថា៖ «ភាគច្រើនភ្ញៀវដែលមកទិញគឺទិញម្ដងៗរាប់ពាន់ដើមដើម្បីយកទៅដាំ។ ច្រើនមកពីតំបន់ដែលមានដីចំការធំៗនៅស្រុកយើងមាននៅរតនគិរី មណ្ឌលគិរីជាដើម ដំណាំនេះបើដាំនៅដីបែបតំបន់ភ្នំគឺឆាប់ទទួលបានខ្លឹមតែម្ដង ព្រោះវាត្រូវនឹងប្រភេទដីនៅតំបន់ភ្នំ តែសម្រាប់តំបន់ដីល្បាប់វាមិនសូវជាឆាប់ទទួលបានខ្លឹមល្អនោះទេ កាលណាដីល្អពេកវាឆាប់ធំពិតមែនតែមិនមានខ្លឹមពេញហាប់នោះឡើយ»។

ខែដែលសាកសមនឹងទទួលពូជពីស្រុកក្រៅ គឺនៅចន្លោះខែកញ្ញា មកទល់ខែធ្នូ ដោយសារតែជារដូវដែលមានភ្លៀងធា្លក់គ្រប់គ្រាន់អំណោយផលជាខ្លាំងដល់ការដាំដុះប្រភេទក្រញូង។ ទោះជាមិនពិបាកមើលថែដូចដំណាំផ្សេងៗក៏ពិតមែន ប៉ុន្តែវាទាមទារឲ្យមានការមើលថែក្នុងរយៈពេលដែលបណ្ដុះដើម្បីធានាថា វាទទួលទិន្នផលបានគ្រប់ចំនួន។ នេះជាការលើកឡើងរបស់អ្នកស្រី ហៀងហី។

ក្រញូងខ្មែរ

អ្នកស្រីបញ្ជាក់ថា ក្រញូងទាំងនេះត្បិតថាងាយស្រួលដាំ មិនចំណាយកំលាំងច្រើនក្នុងការមើលថែ តែប្រភេទទាំងពីរនេះមានរយៈពេលក្នុងការដាំដុះ និងលក់ចេញផ្សេងគ្នា ដោយក្រញូងខ្មែរវាតម្រូវឱ្យមើលថែរយៈពេលយូរជាងក្រញូងហៃណាន។ ក្រញូងខ្មែរងាយនឹងរងការបំផ្លាញពីសត្វល្អិត តែតម្លៃថ្លៃជាងក្រញូងហៃណាន។

អ្នកស្រីបន្ថែមថា ក្រញូងទាំងពីរប្រភេទអាចលក់ចេញបានពេលវាមានកម្ពស់ត្រឹមបួនតឹក។ ជាទូទៅក្រញូងអាយុកាន់តែច្រើន តម្លៃក៏កាន់តែថ្លៃ ហើយក្រញូងដែលមានកម្ពស់កន្លះម៉ែត្រមានតម្លៃ ៦,០០០រៀល សម្រាប់ក្រញូងខ្មែរ តម្លៃ៤,០០០រៀល សម្រាប់ក្រញូងហៃណាន។

ក្រញូងហៃណាន

ដៃម្ខាងកំពុងដកស្មៅចេញពីកូនក្រញូងចំណែកដៃម្ខាងទៀតលាតជូតញើសចេញពីថ្ងាស អ្នកស្រី ហៀងហី បានរៀបរាប់ប្រាប់ Newsroom Cambodia ពីរបៀបដាំក្រញូងថា៖ «ដំបូងយើងរៀបចំថ្នាល់ឲ្យរៀបរយ ហើយយកគ្រាប់ទៅព្រួសទៅលើថ្នាល ព្រួសរួចហើយយកចំបើងមករោយពីលើឱ្យក្រាស់បន្ដិចដើម្បីកុំឱ្យខ្ទាតគ្រាប់ និងការពារកុំឱ្យគ្រាប់ត្រូវថ្ងៃខ្លាំងពេក។ បន្ទាប់មកស្រោចទឹកតាមសភាពដី និងកម្ដៅថ្ងែ កាលណាមេឃថ្ងៃក្ដៅខ្លាំងត្រូវស្រោចទឹកមួយពីរដងព្រឹកល្ងាច តែបើមេឃស្រទុំស្រោចទឹកមួយថ្ងៃម្ដងបានហើយ។ នៅពេលសំបកគ្រាប់ក្រញូងប្រេះបែកមាត់ចាប់តម្រូវឱ្យបកចំបើងចេញខ្លះដើម្បីឱ្យវាទទួលពន្លឺថ្ងៃ តែបើទុកយូរពេកវាអាចនឹងរលួយគ្រាប់។ ទុករយៈពេល១០ ទៅ២០ថ្ងៃដកកូនក្រញូងសមល្មមដាក់កន្ទោងដែលច្រកដីរួច កុំទុកយូរពេកវាអាចនឹងអន់កូននៅពេលដែលយើងយកទៅស្ទូង»។

អ្នកស្រី ហៀងហី បន្ថែមថាពីរបៀបដាំក្រញូងថា៖ «ស្ទូងដំបូងៗយើងស្រោចទឹកពីរទៅបីដងទៅកុំឱ្យស្លោកស្វិត។ រយៈពេលបួនខែទៅមុខយើងអាចប្រមូលផលបានហើយ ជាពិសេសដែលធ្លាក់ភ្លៀងគឺយើងលក់ចេញបានច្រើនព្រោះថាខែដែលចាប់ផ្ដើមភ្លៀងគឺភ្ញៀវត្រូវការដាំមិនពិបាកស្រោចទឹក ដាច់ទឹកភ្លៀងគឺវាលាស់ស្លឹកល្អ ហើយភាគរយនៃការដុះក៏ខ្ពស់សឹងថា១០០កូនមិនខូចទាំងអស់ លើសពីនោះក្រញូងយើងអាចកំណត់បានថាវាមានរូបរាងពេញលីងចាប់ពី៧ឆ្នាំឡើងទៅ»។

ចាប់តាំងឆ្នាំ២០១៨មកដល់បច្ចុប្បន្ន អ្នកស្រី សុខ ហៀងហី ដាំក្រញូងផ្គត់ផ្គង់ត្រឹមតែក្នុងស្រុកតែប៉ុណ្ណោះ ហើយនៅលើផ្ទៃដ៏ធំល្វឹងល្វើយរបស់អ្នកស្រីមានគ្របដណ្ដប់ដោយក្រញូងរាប់ពាន់ដើម៕

ក្រសួងសុខាភិបាលជម្រុញឲ្យមានការប្រុងប្រយ័ត្នទាំងអស់គ្នាដើម្បីបញ្ចៀស «សោកនាដកម្ម» ដោយកូវីដ

ឆនរស្មី (Chhorn Raksmey) — Thu, 15 Jul 2021 15:33:45 +0000

មន្រ្តីក្រសួងសុខាភិបាលបាននិយាយនៅថ្ងៃព្រហស្បតិ៍ ថាកម្ពុជាត្រូវការចាំបាច់នូវការប្រុងប្រយ័ត្ន និងសកម្មភាពរួមគ្នាដើម្បីអនុវត្តវិធានការទប់ស្កាត់ការឆ្លងកូវីដ ១៩ ឲ្យបានឆាប់រហ័សដើម្បីចៀសវាងសោកនាដកម្មផ្នែកសុខភាពសាធារណៈ និងសេដ្ឋកិច្ច។

លោកស្រីវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល បាននិយាយថាធ្វីតធ័រ «យើងចាំបាច់ត្រូវមានការប្រុងប្រយ័ត្ន និងសកម្មក្នុងការចូលរួមសកម្មភាពរួមគ្នាដើម្បីអនុវត្តវិធានការបង្ការទប់ស្កាត់ការឆ្លងកូវីដ ១៩ នៅកម្ពុជា ឲ្យបានឆាប់រហ័សដើម្បីចៀសវាងសោកនាដកម្មបញ្ហាសុខភាពសាធារណៈ និងសេដ្ឋកិច្ច»។

We need to be vigilant and proactive in joining action together to implement the preventive measures to suppress the COVID-19 transmission in Cambodia ASAP in order to avoid the public health and economic tragedy although more than 5 millions vaccinated people have been reached. pic.twitter.com/9n2aOXmuNd
— Or Vandine (@or_vandine) July 15, 2021

ក្រសួងសុខាភិបាលនៅថ្ងៃព្រហស្បតិ៍នេះក៏បានប្រកាសដែរថា មានអ្នកស្លាប់ដោយសារជំងឺកូវីដ១៩ចំនួន ៣៩នាក់ ជាតួលេខខ្ពស់បំផុតប្រចាំថ្ងៃ ហើយចំនួននេះបានធ្វើឲ្យមានស្លាប់សរុបកើនដល់ ១០២៥នាក់។

គិតត្រឹមថ្ងៃទី១៤ ខែកក្ដដា ឆ្នាំ២០២១នេះ កម្ពុជាមានអ្នកឆ្លងជំងឺកូវីដសរុបកើនដល់ ៦៤,៦១១នាក់ អ្នកជារសះស្បើយសរុបចំនួន ៥៦,១៧៨នាក់ និងអ្នកស្លាប់សរុបកើនដល់ ១០២៥នាក់គិតចាប់តាំងពីការរកឃើញដំបូងនៅចុងខែមករា ឆ្នាំ២០២០នេះមក។

យោងតាមរបាយការណ៌ ចំនួនអ្នកបានចាក់វ៉ាក់សាំងបង្ការជំងឺកូវីដនៅទូទាំងប្រទេស ចាប់តាំងពីថ្ងៃទី១០ ខែកុម្ភៈ ឆ្នាំ២០២១ ដល់ថ្ងៃទី១៤ ខែកក្ដដា ឆ្នាំ២០២១នេះ មានចំនួន៥,២៤០,១៥៩នាក់ ស្មើនឹង៥២.៤០ភាគរយ បើធៀបនឹងគោលដៅ១០លាននាក់ដែលកម្ពុជាគ្រោងនឹងសម្រេច៕

ក្រសួងសុខាភិបាលប្រកាសថា មានអ្នកស្លាប់ដោយសារកូវីដចំនួន ៣៩នាក់ ជាតួលេខខ្ពស់បំផុតប្រចាំថ្ងៃ

ឆនរស្មី (Chhorn Raksmey) — Thu, 15 Jul 2021 09:42:20 +0000

ក្រសួងសុខាភិបាលនៅថ្ងៃព្រហស្បតិ៍នេះបានប្រកាសថា មានអ្នកស្លាប់ដោយសារជំងឺកូវីដ១៩ចំនួន ៣៩នាក់ ជាតួលេខខ្ពស់បំផុតប្រចាំថ្ងៃ ហើយចំនួននេះបានធ្វើឲ្យមានស្លាប់សរុបកើនដល់ ១០២៥នាក់។

សេចក្តីជូនដំណឹងរបស់ក្រសួងសុខាភិបាលចេញនៅថ្ងៃទី១៥ ខែកក្ដដា ឆ្នាំ២០២១ នេះបានបង្ហាញថានៅថ្ងៃទី១៤ ខែកក្ដដា ឆ្នាំ២០២១ មានករណីឆ្លងថ្មីចំនួន ៩៩៦នាក់ និងជាសះស្បើយចំនួនថ្មីចំនួន ៨១៣នាក់។ គិតត្រឹមថ្ងៃទី១៤ ខែកក្ដដា ឆ្នាំ២០២១នេះ កម្ពុជាមានអ្នកឆ្លងជំងឺកូវីដសរុបកើនដល់ ៦៤,៦១១នាក់ អ្នកជារសះស្បើយសរុបចំនួន ៥៦,១៧៨នាក់ និងអ្នកស្លាប់សរុបកើនដល់ ១០២៥នាក់គិតចាប់តាំងពីការរកឃើញដំបូងនៅចុងខែមករា ឆ្នាំ២០២០នេះមក។

សេចក្តីជូនព័ត៌មានដដែលនោះបានបញ្ជាក់ទៀតថា៖ «ក្នុងចំណោមករណីឆ្លងថ្មីចំនួន ៩៩៦នាក់ ក្នុងនោះមានករណីឆ្លងថ្មីចំនួន ១៦៧នាក់ គឺជាករណីនាំចូលពីក្រៅប្រទេស ហើយនាំឱ្យករណីនាំចូលពីក្រៅប្រទេសកើនសរុបរហូតទៅដល់៥,៥១៤នាក់»៕

បើគិតមកដល់ថ្ងៃទី១០ ខែកក្ដដា ឆ្នាំ២០២១ កម្ពុជាទទួលបានវ៉ាក់សាំងកូវីត១៩ ចំនួន១៦លានដូស ក្នុងនោះកម្ពុជាប្រើប្រាស់វ៉ាក់សាំងចំនួន៣ប្រភេទមានដូចជា វ៉ាក់សាំង AstraZeneca ផលិតនៅប្រទេសឥណ្ឌាចំនួន ៣២៤០០០ដូស វ៉ាក់សាំង ស៊ីណូហ្វាមចំនួន ៥២០០០០០ដូស និងវ៉ាក់សាំងស៊ីណូវ៉ាក់ចំនួន ១០៥០០០០០ដូស។ គិតមកទល់ថ្ងៃទី១៣ ខែកក្ដដា ឆ្នាំ២០២១នេះ កម្ពុជាបានសម្រេចចាក់វ៉ាក់សាំងការពារជំងឺកូវីតជូនពលរដ្ឋរបស់ខ្លួនបានចំនួន ៥លាននាក់ ស្មើនឹង៥០% នៃប្រជាជនដែលត្រូវទទួលវ៉ាក់សាំងចំនួន ១០លាននាក់។

អង្គការ សង្គមស៊ីវិល អំពាវនាវដល់រដ្ឋាភិបាលឱ្យមានតម្លាភាពអំពីគម្រោងអភិវឌ្ឍន៍កោះអរិយក្សត្រ

ឆនរស្មី (Chhorn Raksmey) — Wed, 14 Jul 2021 14:24:15 +0000

អង្គការ សង្គមស៊ីវិល និងសកម្មជនបរិស្ថាន បានអំពាវនាវដល់រដ្ឋាភិបាលឱ្យមានតម្លាភាពអំពីគម្រោងអភិវឌ្ឍន៍កោះអរិយក្សត្រ ក្នុងស្រុកល្វាឯម ខណ:ដែលប្រជាពលរដ្ឋនៅក្នុងតំបន់នោះមានការព្រួយបារម្ភពីផលអវិជ្ជមានដែលអាចកើតមានដោយសារគម្រោងចាក់ដីចូលទន្លេភ្ជាប់បន្តពីកោះដែលមានប្រមាណ ៧០ហិចតា។

លោកសាន ម៉ាឡា ដែលជាសកម្មជនបរិស្ថាន បានប្រាប់ Newsroom Cambodia កាលពីថ្ងៃព្រហស្បតិ៍នេះថា ពីក្តីព្រួយបារម្ភនៃការអភិវឌ្ឍដោយសារការចាក់ដីលុបទន្លេ ស្ទឹង ព្រែក ឬបឹង អាចផ្តល់ផលប៉ះពាល់យ៉ាងធ្ងន់ធ្ងរដល់បរិស្ថានដែលអាចធ្វើឱ្យទន្លេរួមតូចនាពេលអនាគត ក៏ដូចជាបាត់បង់នូវសោភណ្ឌភាព។

លោកសាន ម៉ាឡាបានបន្តថា រាជរដ្ឋាភិបាលគួរពិចារណាពីនិន្នាការណ៍អភិវឌ្ឍន៍ដែលប្រើមធ្យោបាយចាក់បំពេញដីចូលក្នុងប្រភពទឺកនេះឡើងវិញ។

«ប្រទេសកម្ពុជាយើងត្រឹមចំនួនប្រជាពលរដ្ឋ ១៥- ១៦ លាននាក់ ខ្ញុំគិតថានៅមិនទាន់ដល់ពេលដែលយើងត្រូវលុបទន្លេ ស្ទឹង ឬក៏បឹងបួរ ដើម្បីអភិវឌ្ឍន៍នោះទេ បើយើងនៅសេសសល់ដីទូលាយច្រើន»។

លោកសាន ម៉ាឡា បានជំរុញឱ្យរាជរដ្ឋាភិបាលធ្វើការអភិវឌ្ឍតាមគំរូដែលបុព្វបុរសខ្មែរសម័យបុរាណដែលបានធ្វើការអភិវឌ្ឍរាជធានី តាមរយ:ការសាងសង់ប្រព័ន្ធធារាសាស្រ្តបានល្អ ដោយមានការប្រើប្រាស់គូរទឹកព័ទ្ធជុំវិញប្រាសាទដែលជាសសរគ្រឹះការពារប្រាសាទឱ្យកាន់តែស្ថិតស្ថេរយូរអង្វែង ជៀសវាងការបំផ្លាញធនធានធម្មជាតិផ្លូវទឹកបែបនេះដែលលោកគិតថាមិនមែនជាគំរូល្អនោះទេ។

លោកបានបញ្ជាក់ថា៖ «ដូចដែលយើងបានឃើញនៅតំបន់អង្គរ យើងឃើញមានការស្ថាបនាបារាយណ៍ទឹក មានទឹកព័ន្ធជុំវិញប្រាសាទផ្សេងៗ។ ដូច្នេះ អ្នកអភិវឌ្ឍន៍នៅក្នុងសម័យទំនើបនេះ ឬក៏រដ្ឋាភិបាលគួរតែយកគំរូតាមដូនតារបស់យើងដែលបានសាងសង់សំណង់ប្រាសាទផ្សេងៗ ជៀសវាងការអភិវឌ្ឍដែលត្រូវចាក់លុបបឹង ស្ទឹង ឬក៏ទន្លែបែបនេះវាមិនមែនជាគំរូល្អនោះទេ»។

ទីកន្លែងដែលក្រុមហ៊ុនចាក់លុបទន្លេ។ រូបភាព៖ Newsroom Cambodia

អ្នកស្រីចក់ សុភាព ប្រធានប្រតិបត្តិនៃអង្គការសិទ្ធិមនុស្សកម្ពុជា បានអំពាវនាវឱ្យរដ្ឋាភិបាលដោះស្រាយដោយតម្លាភាព គឺត្រូវមានការជូនដំណឹងដល់ប្រជាពលរដ្ឋជាមុនដើម្បីឱ្យពួកគាត់បានត្រៀមលក្ខណ: និងផ្តល់នូវសំណងដែលសមស្របអាចទទួលយកបានដល់សំណាក់ប្រជាពលរដ្ឋដែលរងផលប៉ះពាល់នៅតំបន់នោះ ដោយសារគម្រោងអភិវឌ្ឍន៍នៅដែលស្ថិតនៅកោះអរិយក្សត្រនេះ។

លោកហែម ឧត្តម ជាអ្នកប្រឹក្សាយោបល់ឯករាជ្យសម្រាប់អភិបាលកិច្ចធនធានធម្មជាតិនៃទន្លេមេគង្គ បានប្រាប់ Newsroom Cambodia កាលពីថ្ងៃទី១២ ខែកក្កដានេះថា សកម្មភាពចាក់ថ្ម ចាក់ខ្សាច់ចូលទៅក្នុងទន្លេលោកសង្កេតឃើញថា ជាបញ្ហាចម្បងសំខាន់គឺតម្លាភាព ត្រូវការទទួលដឹង ឮនូវព័ត៌មានដែលគេធ្វើសកម្មភាពចាក់ដី។

លោកបានមានប្រសាសន៍ថា៖ «យើងមិនអាចបដិសេធចំពោះការអភិវឌ្ឍន៍បានទេ ហើយជាពិសេសការប្រើប្រាស់ធនធានធម្មជាតិ យើងរាប់តាំងពីព្រៃឈើ ខ្សាច់ ហើយទន្លេក៏នៅក្នុងហ្នឹងដែរ ប៉ុន្តែយើងត្រូវគិតអពីនិរន្តរភាពនៃការទាញយកធនធានធម្មជាតិប្រើប្រាស់ដូចជាទន្លេ តើយើងប្រើប្រាស់កម្រិតណា»។

លោកបានបន្ថែមថា ការចាក់ខ្សាច់ ចាក់ថ្មចូលទន្លេត្រូវដឹងពីជម្រៅ វិសាលភាព ចំងាយ ទាំងនេះជាចំណុចសំខាន់ ហើយផលប៉ះពាល់ត្រូវតែមានការសិក្សាឱ្យបានច្បាស់លាស់ មិនអាចធ្វើការប៉ាន់ស្មានបានទេ ប៉ះពាល់តែងតែកើតមានតិច ឬច្រើន។

លោកបានថ្លែងថា៖ «ដើម្បីឱ្យគម្រោងនេះមានភាពប្រក្រតី ឬល្អប្រសើរ យើងគួរតែមានព័ត៌មានបកស្រាយដើម្បីឱ្យអស់ចម្ងល់កាលណាដែលយើងមិនមានតម្លាភាពនៅក្នុងការធ្វើអ្វីដែលយើងធ្វើទេ ការសង្ស័យ ការរិះគន់ ការប៉ាន់ស្មាន វានឹងមានមិចអាចចៀសផុត និងអាចប៉ះពាល់ដល់គម្រោងដែលយើងកំពុងនឹងធ្វើ គម្រោងហ្នឹងអាចនាំផលវិជ្ជមានច្រើនជាងអវិជ្ជមានក៏អាចថាបាន ឬមួយអវិជ្ជមានច្រើនជាងវិជ្ជមានក៏យើង អត់ដឹង»។

ស្របពេលមានការចាក់ថ្មចូលទឹកទន្លេក្នុងភូមិសាស្រ្តអរិយក្សត្រ ប្រជាពលរដ្ឋដែលរស់នៅមិនឆ្ងាយពីទឹកទន្លេ បានបង្ហាញក្តីព្រួយបារម្ភអំពីការបណ្តេញចេញនៅពេលខាងមុខ ខណៈពួកគេមិនមានព័ត៌មានអំពីការអភិវឌ្ឍនៅទីនោះនៅឡើយទេ។

ប្រជាពលរដ្ឋជាស្រ្តីវ័យចំណាស់មួយរូបសុំមិនបញ្ចេញឈ្មោះ ដោយហាក់មានការភ័យខ្លាចផង និងស្តាយស្រណោះទទឹមគ្នាផងបាននិយាយប្រាប់ Newsroom Cambodia ថា៖ «ខ្ញុំមិនដឹងជាអ្វីទេ បានតែនៅអញ្ចឹង អារម្មណ៍វាចេះតែមានហើយគ្រាន់តែថាមិនដឹងធ្វើយ៉ាងម៉េច ។»

Newsroom Cambodia បានខិតខំព្យាយាមទាក់ទងទៅលោកមេឃុំ អរិយក្សត្រកាលពីថ្ងៃ០៧ ខែកក្កដានេះច្រើនលើកច្រើនសារ តែមិនអាចសុំការបកស្រាយលំអិតពីរឿងនេះបានទេ។

លោកគង់ សោភ័ណ្ឌ អភិបាលខេត្តកណ្តាល បានប្រាប់សារព័ត៌មានថ្មីៗ ថាការចាក់ថ្មចូលទឹកទន្លេក្នុងភូមិសាស្រ្តអរិយក្សត្រ ជាគម្រោងអភិវឌ្ឍន៍របស់ក្រុមហ៊ុន ឃុន សៀ (Khun Sea Development Group) ដែលបានជួលដីរដ្ឋចំនួន ៧០ហិកតា ក្នុងការអភិវឌ្ឍតំបន់សេដ្ឋកិច្ចតាមដងទន្លេនេះ។

ការចាក់ថ្ម ឬចាក់គ្រឹះនៅក្នុងទន្លេនេះ គឺជាការចាប់ផ្តើមនៃការអភិវឌ្ឍមួយ ដោយលោកបានបន្ថែមថា មានការសិក្សាពីអ្នកជំនាញផ្នែកបរិស្ថានគ្រប់ស្ថាប័នរួចហើយ ដើម្បីធានាមិនឲ្យប៉ះពាល់លំហូរទឹកទន្លេ។ នេះបើយោងតាមការចុះផ្សាយនៅថ្ងៃទី៧ ខែកក្កដា ពីវិទ្យុសម្លេងសហរដ្ឋអាមេរិក (VOA)។

តំណាងក្រុមហ៊ុន គឺលោកសេង ផេង បានប្រាប់វីអូអេនៅថ្ងៃពុធនេះថាក្រុមហ៊ុនបានជួលដីរដ្ឋចំនួន ៧០ហិកតា រយៈពេល៥០ឆ្នាំ ដោយបានដោះស្រាយរួចរាល់ហើយចំពោះប្រជាពលរដ្ឋដែលមានផ្ទះនៅទីនោះ។ លោកបញ្ជាក់ថាក្រុមហ៊ុននឹងអភិវឌ្ឍតំបន់នោះឲ្យដូចជានៅទីក្រុងហុងកុង ដែលអាចមើលឃើញទឹកទន្លេនាពេលយប់។ លោកបន្ថែមថាក្រុមហ៊ុននឹងស្ថាបនាសំណង់នានា ដើម្បីធានាការទប់ច្រាំងទន្លេផងដែរ។

លោកនេត្រ ភក្រ្តា អ្នកនាំពាក្យក្រសួងបរិស្ថាន មិនអាចសុំការអធិប្បាយបន្ថែមបានទេ។

គួរបញ្ជាក់ផងដែលថា អនុក្រឹត្យចុះថ្ងៃទី១៧ ខែធ្នូ ឆ្នាំ២០២០ ដែលចុះហត្ថលេខាដោយលោកនាយករដ្ឋ

មន្ត្រីហ៊ុន សែន បានសម្រេចជួលដីកោះមាស ទំហំជាង ៣៤០ហិកតា ស្ថិតក្នុងខណ្ឌច្បារអំពៅ រាជធានីភ្នំពេញ ដែលនៅជាប់ស្រុកល្វាឯម និងស្រុកកៀនស្វាយ ខេត្តកណ្តាល ឱ្យទៅក្រុមហ៊ុន «ឃុន សៀ Import Export» ដើម្បីធ្វើការអភិវឌ្ឍរយៈពេល ៥០ឆ្នាំ ខណៈដីទំហំ៧០ហិកតាទៀតក៏ត្រូវបានរដ្ឋាភិបាលជួលឱ្យក្រុមហ៊ុននេះ សម្រាប់អភិវឌ្ឍជាតំបន់សេដ្ឋកិច្ចតាមដងទន្លេត្រើយខាងកើត ក្បែរគ្នាអភិវឌ្ឍន៍កោះពេជ្រ៕

ធនាគារពិភពលោកអនុម័តកញ្ចប់ឥណទាន២០០លានដុល្លារ ជួយកម្ពុជា ដែលប៉ះពាល់ដោយសារកូវីដ

ឆនរស្មី (Chhorn Raksmey) — Fri, 25 Jun 2021 15:10:55 +0000

ធនាគារពិភពលោកបានប្រកាសនៅថ្ងៃទី២៤ ខែមិថុនា ឆ្នាំ២០២១ថា បានអនុម័តកញ្ចប់ឥណទានមានតម្លៃទឹកប្រាក់ចំនួន ២០០លានដុល្លារអាមេរិកសម្រាប់ជួយសង្គ្រោះ ការរើបឡើងវិញ និងការកសាងភាពធន់របស់កម្ពុជា ដែលទទួលផលប៉ះពាល់ដោយសារកូវីដ ១៩។

យោងតាមសេចក្ដីប្រកាសព័ត៏មាន គម្រោងថ្មីនេះនឹងជួយកម្ពុជាក្នុងការដោះស្រាយវិបត្តិកូវីដ១៩ តាមរយៈកិច្ចអន្តរាគមន៍សង្គ្រោះទាន់ពេលវេលា និងចំគោលដៅសម្រាប់ពលរដ្ឋងាយរងគ្រោះ ការសម្រួលឱ្យសេដ្ឋកិច្ចងើបឡើងវិញដោយស្វាហាប់តាមរយៈការកែទម្រង់ជារចនាសម្ព័ន្ធ និងការកសាងភាពធន់សម្រាប់ទប់ទល់ទៅនឹងស្ថានភាពអង្រួនផ្នែកសេដ្ឋកិច្ចនាពេលអនាគត។

សេចក្ដីប្រកាសដដែលបានបញ្ជាក់ថា កម្ពុជាកំពុងតែប្រឈមមុខនឹងវិបត្តិសេដ្ឋកិច្ច និងសង្គមដែលមិនធ្លាប់មាន ហើយជាលើកដំបូងហើយក្នុងរយៈពេល៣០ឆ្នាំដែលសេដ្ឋកិច្ចនៃប្រទេសនេះ នៅក្នុងឆ្នាំ២០២០ បានរួញទំហំអស់ ៣,១ភាគរយ ហើយពេលនេះ កម្ពុជាកំពុងស្ថិតនៅកណ្តាលស្ថានភាពដ៏អាក្រក់នៃការឆ្លងវីរុសកូវីដ១៩ ចាប់តាំងពីមានការផ្ទុះឡើងនៃការរាតត្បាតជំងឺនេះដំបូងមក។

«វិស័យដែលរងផល់ប៉ះពាល់ខ្លាំងបំផុតរួមមាន ផ្នែកកាត់ដេរ ទេសចរណ៍ និងសំណង់ ហើយវិស័យទាំងនេះសុទ្ធតែបានផ្តល់ការងារច្រើនជាងគេនៅកម្ពុជា ដែលវាបានបង្កើតបន្ថែមនូវបញ្ហាប្រឈមសម្រាប់ការស្តារសេដ្ឋកិច្ចឱ្យមាននិរន្តភាពឡើងវិញ»។

យោងតាមធនាគារពិភពលោក ខណៈដែលវិធានទប់ស្កាត់បញ្ហាប្រឈមសំខាន់ៗបំផុតនៅមិនទាន់មាន ការរាតត្បាតជំងឺនេះអាចនឹងបណ្តាលឱ្យភាពអត់ការងារធ្វើ និងភាពក្រីក្រកាន់តែកើនឡើងថែមទៀត ដែលក្នុងនោះ ពលរដ្ឋជិតមួយលាននាក់ត្រូវបានគេរំពឹងថានឹងធ្លាក់ចុះទៅក្នុងភាពក្រីក្រវិញ។

បើគិតត្រឹមថ្ងៃទី២៤ ខែមិថុនា ឆ្នាំ២០២១នេះ កម្ពុជាមានអ្នកឆ្លងជំងឺកូវីដ១៩សរុបកើនដល់ ៤៦,០៦៥នាក់ និងអ្នកជាសះស្បើយសរុបចំនួន ៤០,៧៦៩នាក់ និងអ្នកស្លាប់សរុបកើនដល់៥០៩នាក់ គិតចាប់តាំងពីការរកឃើញដំបូងនៅចុងខែមករា ឆ្នាំ២០២០នេះមក៕

ក្រសួងសុខាភិបាលប្រកាសថាមានអ្នកស្លាប់ដោយសារកូវីដ ១៦នាក់ និងអ្នកឆ្លងថ្មី ៦៩៩នាក់

ឆនរស្មី (Chhorn Raksmey) — Fri, 25 Jun 2021 12:15:26 +0000

ក្រសួងសុខាភិបាលនៅថ្ងៃសុក្រ ទី២៥ ខែមិថុនានេះបានប្រកាសថាមានអ្នកស្លាប់ដោយសារជំងឺកូវីដ១៩ចំនួន១៦នាក់ និងអ្នកឆ្លងថ្មីចំនួន៦៩៩នាក់។

សេចក្តីជូនព័ត៌មានដដែលនោះបានបញ្ជាក់ទៀតថា៖ «ក្នុងចំណោមករណីឆ្លងថ្មីចំនួន៦៩៩នាក់ ក្នុងនោះមានករណីឆ្លងថ្មីចំនួន១១៣នាក់គឺជាករណីនាំចូលពីក្រៅប្រទេស ហើយនាំឱ្យករណីនាំចូលពីក្រៅប្រទេសកើនសរុបរហូតទៅដល់២,០៣៨នាក់»៕

ក្រសួងសុខាភិបាលប្រកាសថាមានអ្នកស្លាប់ដោយសារកូវីដចំនួន ១៨នាក់ និងអ្នកឆ្លងថ្មីចំនួន៦៥៥នាក់

ឆនរស្មី (Chhorn Raksmey) — Thu, 24 Jun 2021 14:07:28 +0000

ក្រសួងសុខាភិបាលនៅថ្ងៃព្រហស្បត្តិ៍ ទី២៤ ខែមិថុនានេះ បានប្រកាសថាមានអ្នកស្លាប់ដោយសារជំងឺកូវីដ១៩ចំនួន១៨នាក់ និងអ្នកឆ្លងថ្មីចំនួន៦៥៥នាក់។

យោងតាមសេចក្តីជូនដំណឹងរបស់ក្រសួងសុខាភិបាលចេញនៅថ្ងៃទី២៤ ខែមិថុនា មានអ្នកជាសះស្បើយចំនួន៦៩៦នាក់ ហើយគិតត្រឹមថ្ងៃទី២៣ ខែមិថុនា ឆ្នាំ២០២១នេះ កម្ពុជាមានអ្នកឆ្លងជំងឺកូវីដ១៩សរុប កើនដល់ ៤៥,៣៦៦នាក់ និងអ្នកជាសះស្បើយសរុបចំនួន ៤០,០១០នាក់ និងអ្នកស្លាប់សរុបកើនដល់៤៩៣នាក់។

សេចក្តីជូនព័ត៌មានដដែលនោះបានបញ្ជាក់ទៀតថា៖ «ក្នុងចំណោមករណីឆ្លងថ្មីចំនួន ៦៥៥នាក់ ក្នុងនោះមានករណីឆ្លងថ្មីចំនួន ៧២នាក់ គឺជាករណីនាំចូលពីក្រៅប្រទេស ហើយនាំឱ្យករណីនាំចូលពីក្រៅប្រទេសកើនសរុបរហូតទៅដល់១,៩២៥នាក់»។

បញ្ជាក់ផងដែរថា កំណើនអត្រាការចាក់វ៉ាក់សាំងកូវីត១៩នៅកម្ពុជាគិតត្រឹមថ្ងៃទី២៣ ខែមិថុនា ឆ្នាំ២០២១មាន៣៦,១៩%ធៀបជាមួយចំនួនប្រជាជនគោលដៅ១០លាននាក់៕

ក្រសួងសុខាភិបាលប្រកាសថាមានអ្នកស្លាប់ដោយសារកូវីដចំនួន ១៨នាក់ និងអ្នកឆ្លងថ្មីចំនួន ៦៧៨នាក់

ឆនរស្មី (Chhorn Raksmey) — Tue, 22 Jun 2021 07:57:18 +0000

ក្រសួងសុខាភិបាលនៅថ្ងៃអង្គារ ទី២២ ខែមិថុនានេះ បានប្រកាសថាមានអ្នកស្លាប់ដោយសារជំងឺកូវីដ១៩ចំនួន ១៨នាក់ និងអ្នកឆ្លងថ្មីចំនួន ៦៧៨នាក់។

យោងតាមសេចក្តីជូនដំណឹងរបស់ក្រសួងសុខាភិបាល នៅថ្ងៃទី២១ ខែមិថុនាឆ្នាំ ២០២១ មានអ្នកជាសះស្បើយថ្មីចំនួន ៧៦៣នាក់។

គិតត្រឹមថ្ងៃទី២១ ខែមិថុនា ឆ្នាំ២០២១នេះ កម្ពុជាមានអ្នកឆ្លងជំងឺកូវីដ១៩សរុបកើនដល់ ៤៤,១២៤នាក់ និងអ្នកជាសះស្បើយសរុបចំនួន ៣៨,៧៦៦នាក់ និងអ្នកស្លាប់សរុបកើនដល់ ៤៥៩នាក់ គិតចាប់តាំងពីការរកឃើញដំបូងនៅចុងខែមករា ឆ្នាំ២០២០នេះមក។

សេចក្តីជូនព័ត៌មានដដែលនោះ បានបញ្ជាក់ទៀតថា៖ «ក្នុងចំណោមករណីឆ្លងថ្មីចំនួន ៦៧៨នាក់ ក្នុងនោះមានករណីឆ្លងថ្មីចំនួន ៥៨នាក់ គឺជាករណីនាំចូលពីក្រៅប្រទេស ហើយនាំឱ្យករណីនាំចូលពីក្រៅប្រទេសកើនសរុបរហូតទៅដល់១,៧៩៩នាក់»៕

ក្រសួងសុខាភិបាលប្រកាស អ្នកស្លាប់ ២០នាក់ដោយកូវីដ ជាតួលេខខ្ពស់បំផុតប្រចាំថ្ងៃ

ឆនរស្មី (Chhorn Raksmey) — Sat, 19 Jun 2021 06:21:42 +0000

ក្រសួងសុខាភិបាលនៅថ្ងៃសៅរ៍នេះបានប្រកាសថា មានអ្នកស្លាប់ដោយសារជំងឺកូវីដ១៩ ចំនួន២០នាក់ ជាតួលេខខ្ពស់បំផុតប្រចាំថ្ងៃ ហើយចំនួននេះបានធ្វើឲ្យមានស្លាប់សរុបកើនដល់ ៤១៤នាក់។

សេចក្តីជូនដំណឹងរបស់ក្រសួងសុខាភិបាលចេញនៅថ្ងៃសៅរ៍ទី១៩ ខែមិថុនា ឆ្នាំ២០២១នេះបង្ហាញថា នៅថ្ងៃទី១៨ ខែមិថុនាឆ្នាំ ២០២១ មានករណីឆ្លងថ្មីចំនួន ៤៧១នាក់ និងជាសះស្បើយចំនួនថ្មីចំនួន ៩២៨នាក់។

គិតត្រឹមថ្ងៃទី១៨ ខែមិថុនា ឆ្នាំ២០២១នេះ កម្ពុជាមានអ្នកឆ្លងជំងឺកូវីដ១៩សរុបកើនដល់ ៤២,០៥២នាក់ និងអ្នកជាសះស្បើយសរុបចំនួន ៣៦,៨៦៨នាក់ និងអ្នកស្លាប់សរុបកើនដល់ ៤១៤នាក់ គិតចាប់តាំងពីការរកឃើញដំបូងនៅចុងខែមករា ឆ្នាំ២០២០នេះមក។

សេចក្តីជូនព័ត៌មានដដែលនោះ បានបញ្ជាក់ទៀតថា៖ «ក្នុងចំណោមករណីឆ្លងថ្មីចំនួន ៤៧១នាក់ ក្នុងនោះមានករណីឆ្លងថ្មីចំនួន ៤៥នាក់ គឺជាករណីនាំចូលពីក្រៅប្រទេស ហើយនាំឱ្យករណីនាំចូលពីក្រៅប្រទេសកើនសរុបរហូតទៅដល់១,៦៦២នាក់»៕

សហរដ្ឋអាមេរិកកាត់ជំនួយបរិស្ថានជុំវិញការកាប់បំផ្លាញព្រៃឈើ និងការបំបិទសំឡេងសកម្មជន

ឆនរស្មី (Chhorn Raksmey) — Thu, 17 Jun 2021 11:43:45 +0000

សហរដ្ឋអាមេរិកបានប្រកាសកាលពីថ្ងៃថ្ងៃព្រហស្បតិ៍ថាខ្លួនកំពុងបញ្ចប់ជំនួយដល់ក្រសួងបរិស្ថាន នៅក្រោមគម្រោងព្រៃឡង់បៃតង ដែលទ្រទ្រង់ដោយទីភ្នាក់ងារជំនួយអាមេរិក USAID ដោយសារកម្ពុជានៅតែបន្តរកឃើញករណីការកាប់បំផ្លាញព្រៃឈើ និងការឃាត់ខ្លួនសកម្មជនបរិស្ថានមានការកើនឡើងជាលំដាប់។

យោងតាមសេចក្តីថ្លែងការណ៍របស់ស្ថានទូតអាមេរិកនៅភ្នំពេញ ថវិកានឹងបង្វែរទៅសង្គមស៊ីវិលវិញហើយថាខ្លួនបានចំណាយថវិកាចំនួនជាង ១០០ លានដុល្លារ លើកម្មវិធីមួយចំនួនសម្រាប់ប្រយុទ្ធប្រឆាំងនឹងការការពារបរិស្ថាននៅកម្ពុជា។

សេចក្ដីថ្លែងការណ៍បាននិយាយថា «ថ្វីបើប្រទេសកម្ពុជាសម្រេចបាននូវដំណើរចម្រើនទៅមុខខ្លះ នៅក្នុងការការពារបរិស្ថានក្តី តែសហរដ្ឋអាមេរិកបាន សម្តែងនូវកង្វល់ម្តងហើយម្តងទៀតលើការកាប់បំផ្លាញព្រៃឈើ ដែលនៅតែមានច្រើន នៅក្នុងតំបន់ការពារ ពិសេសនៅដែនជម្រកសត្វព្រៃនៅព្រៃឡង់ ជាទីដែលទីភ្នាក់ងារជំនួយអាមេរិក USAID បានចំណាយធនធានជាច្រើន»។

សេចក្ដីថ្លែងការណ៏ដដែលបានបញ្ជាក់បន្ថែមថា តាំងពីឆ្នាំ ២០១៦ មក ទោះបីជាមានការគាំទ្ររបស់ទីភ្នាក់ងារជំនួយអាមេរិកដើម្បីឲ្យមានការដើរល្បាត ការបណ្តុះបណ្តាលដល់ផ្នែកអនុវត្តច្បាប់ច្រើនថែមទៀត និងការរៀបចំបង្កើតប្រព័ន្ធគ្រប់គ្រងតំបន់ការពារថ្នាក់ជាតិក៏ដោយ ក៏តំបន់ដែនជម្រកសត្វព្រៃនៅព្រៃឡង់ នៅតែបានបាត់បង់ដដែល នូវផ្ទៃដីព្រៃប្រមាណ ៣៨ ០០០ ហិកតា គឺជិត ៩% នៃគម្របព្រៃឈើនៅទីនោះ។

«ការកាប់ឈើខុសច្បាប់ដែលត្រូវបានបញ្ជាក់ច្បាស់ នៅតែបន្តមាន នៅក្នុងនិងជុំវិញដែនជម្រកសត្វព្រៃនៅព្រៃឡង់ ហើយអាជ្ញាធរ កម្ពុជាមិនបានធ្វើការកាត់ទោសបានសមល្មម ចំពោះបទល្មើសសត្វព្រៃ ឬបញ្ឈប់សកម្មភាពខុសច្បាប់ទាំងនេះឡើយ។ លើសពីនេះទៀត អាជ្ញាធរបានបន្តបំបិទសំឡេង ហើយធ្វើទុក្ខសហគមន៍មូលដ្ឋាន និងសង្គមស៊ីវិល ដែលជាដៃគូរបស់គេ ដែលបង្ហាញកង្វល់ដ៏សមហេតុផល លើការបាត់បង់ធនធានធម្មជាតិរបស់គេ»។

សេចក្តីថ្លែងការណ៏បានបន្តថា «ដោយសារមានបញ្ហាទាំងនេះ ដែលមិនត្រូវបានដោះស្រាយ សហរដ្ឋអាមេរិកសូមបញ្ចប់ជំនួយដល់ស្ថាប័នរដ្ឋាភិបាល នៅក្រោមគម្រោងព្រៃឡង់បៃតង ដែលទ្រទ្រង់ដោយទីភ្នាក់ងារជំនួយអាមេរិក USAID»។

អ្នកនាំពាក្យក្រសួងបរិស្ថាន លោកនេត្រ ភក្រ្តា បានច្រានចោលការចោទប្រកាន់ ដោយបានអះអាងថា មិនមានបទល្មើសធនធានធម្មជាតិទ្រង់ទ្រាយធំនៅក្នុងតំបន់ដែនជម្រកសត្វព្រៃព្រៃឡង់ និងនៅតំបន់ការពារធម្មជាតិផ្សេងទៀតនោះទេ គឺមានតែបទល្មើសទ្រុងទ្រាយតូចៗកើតឡើងប៉ុណ្ណោះ។

លោកនេត្រ ភក្រ្តា បាននិយាយថា «នេះគឺជាក្តីព្រួយបារម្ភដែលនៅសេសសល់តិចតួចដែលក្រសួងបរិស្ថាន និងសមត្ថកិច្ចពាក់ព័ន្ធបាននិងកំពុងបន្តអនុវត្តច្បាប់ដោយការទទួលខុសត្រូវ»។

លោកបានបន្តថា៖ «ការបញ្ចប់គម្រោងព្រៃឡង់បៃតងដែលជាកិច្ចសហប្រតិបត្តិការរវាងកម្ពុជានិងសហរដ្ឋមេរិកនៅតំបន់ដែនជម្រកសត្វព្រៃព្រៃឡង់នៅពេលនេះ ក្រសួងបរិស្ថានក្នុងនាមសេនាធិការនៃរាជរដ្ឋាភិបាលនិងមន្ត្រីរបស់ខ្លួនមានការទទួលខុសត្រូវ និងមានភាពរឹងមាំគ្រប់គ្រាន់ក្នុងភាពជាម្ចាស់ក្នុងការបំពេញតួនាទីនិងភារកិច្ចរបស់ខ្លួនលើការការពារនិងអភិរក្សធនធានធម្មជាតិដោយឈរនៅលើមូលដ្ឋានច្បាប់ជាធរមាន»៕

Vox pop: ទស្សនៈអំពីកត្តាជំរុញឲ្យយុវជនប្រើប្រាស់គ្រឿងញៀន

ឆនរស្មី (Chhorn Raksmey) — Wed, 16 Jun 2021 08:36:59 +0000

គ្រឿងញៀនកំពុងរីករាលដាល និងពង្វក់យុវជនទៅដល់ទីជនបទនៃប្រទេសកម្ពុជា។ ខាងក្រោមនេះជាមតិយល់ឃើញរបស់ប្រជាពលរដ្ឋ ជុំវិញកត្តាជំរុញឲ្យយុវជនសព្វថ្ងៃឈានទៅប្រើប្រាស់គ្រឿងញៀន។

អ្នកស្រី សុផាត ដែលមានវ័យ៣៦ឆ្នាំ ជាអ្នកលក់ចាប់ហួយនៅផ្សារតាកែវ បាននិយាយប្រាប់ Newsroom Cambodia ថា អ្នកស្រីព្រួយចិត្តជាខ្លាំងចំពោះបញ្ហាគ្រឿងញៀននេះ។

អ្នកស្រីថា៖ «ពិបាកណាស់ក្មួយអើយ! កូនមីងម្នាក់បានជ្រុលខ្លួនចូលទៅសេពអាគ្រឿងឆ្កួតហ្នឹង (គ្រឿងញៀន) វាវក់វង្វេងគ្មានស្គាល់ផ្ទះសម្បែងស្អីទេ។ ពេលប្រលប់ៗ មិត្តភក្តិវាមកយកហើយមិនដឹងវាទៅរកស្អីវាទេ និយាយមិនដែលស្ដាប់មីងទេវាស្ដាប់តែមិត្តភក្កិវាហ្នឹង ពីមួយថ្ងៃទៅមួយថ្ងៃៗកាន់តែពិបាកឡើងៗ ពីមុនកូនមីងមិនមែនវាពាលាចឹងទេក្មួយ! និយាយឱ្យអស់ទៅមកពីវាដើរតាមគ្នាវាហ្នឹងម៉ង់បានជាខូចមនុស្សអស់ទៅ»។

និស្សិតឆ្នាំទី២ ផ្នែកទំនាក់ទំនងអន្តរជាតិ នៅសកលវិទ្យាល័យជាតិគ្រប់គ្រង ថ្លែងដោយសុំមិនបញ្ចេញឈ្មោះនិយាយថា កញ្ញាបានឃើញករណីការប្រើប្រាស់គ្រឿងញៀនច្រើនគួរសមដែរ ពួកគេធ្វើដោយមិនខ្លាចញញើតច្បាប់នោះទេ។

កញ្ញាបាននិយាយថា៖ «ឥឡូវកាន់តែពិបាកព្រោះអីគ្រឿងញៀនបានសុះសាយនៅក្នុងសង្គមច្រើន មានក្មេង និងយុវជនខ្លះលែងមានភាពគ្រប់គ្រងនៅលើខ្លួនទៅហើយ សម្រាប់នាងខ្ញុំបើតាមយល់ឃើញមានកត្តាច្រើនដែលធ្វើឱ្យយុវជនទាំងនោះធ្វើ ពួកគេឈាននឹងលង់ខ្លួនទៅដល់ការប្រើប្រាស់គ្រឿងញៀន មានខ្លះមានបញ្ហាគ្រួសារច្រើនជាង ដូចនៅក្នុងគ្រួសារមួយដែលខ្វះការអប់រំណែនាំ ជម្លោះគ្រួសារ ភាពមិនចុះសម្រុងរវាងសមាជិកគ្រួសារកូនៗនៅក្នុងបន្ទុក មានរកាំរកូសច្រើន។ កក្តាទាំងនេះហើយដែលធ្វើកូនៗមិនចង់នៅផ្ទះ ហើយជាពិសេសការរាប់អានជាមួយមិត្តដែលបានដើរផ្លូវខុស ការអូសទាញពីមិត្តមិនល្អជាដើម»។

ងាកមកស្ដាប់សម្តីរបស់អ្នកគ្រូ ឡុង ធីដា វ័យ២៩ឆ្នាំ ជាគ្រូបង្រៀននៅខេត្តកំពង់ស្ពឺលើកឡើងថា៖ «អាចថាជាកត្តាមួយសំខាន់ក្នុងការសេពគប់មិត្តភក្តិដូចពាក្យស្លោក សេពគប់បណ្ឌិតជាបណ្ឌិត សេពគប់ពាលគឺពាល នៅជាមួយមនុស្សប្រភេទណាក្លាយជាបែបនោះ ព្រោះមនុស្សយើងម្នាក់ៗត្រូវការមិត្តភក្តិសំខាន់បន្ទាប់ពីគ្រួសារ បើមិត្តភក្តិអ្នករៀន គឺរៀនតែបើយើងឃើញគេមិនល្អ យើងបញ្ឈប់ការសេពគប់ទៅ កុំបន្តការទំនាក់ទំនង ឬក៏នៅរាប់អានតែត្រឹមស្គាល់ នោះយើងក៏មិនលង់ខ្លួនហើយមនុស្សក៏មានចរិតរបស់ខ្លួនបង្ហាញឱ្យយើងឃើញ»។

យុវជន វង្ស រក្សា ដែលជានិស្សិតសិក្សានៅសកលវិទ្យាល័យបញ្ញាសាស្ត្រកម្ពុជាបានប្រាប់Newsroom Cambodia ថា៖ «ពេលដែលគាត់ប្រើប្រាស់គ្រឿងញៀនធ្វើឱ្យគាត់ឈ្លក់វង្វេង ការប្រើប្រាស់គ្រឿងញៀនទី១បំផុត គឺធ្វើឱ្យគាត់ខូចសុខភាព ខូចសុខភាពហ្នឹងខូចទាំងសុខភាពទាំងផ្លូវកាយ និងផ្លូវចិត្ត រាងកាយរបស់គាត់ និងធ្វើឱ្យទ្រុឌទ្រោម អាចនឹងមានជំងឺជាច្រើន ហើយបញ្ហាផ្លូវចិត្តរបស់គាត់ទៀតសោតក៏មានការប៉ះទង្គិចដែលធ្វើឱ្យការចងចាំ ការគិត ការពិចារណាគឺវាមានការថយចុះជាខ្លាំង ហើយធ្វើឱ្យគាត់បាត់បង់ទ្រព្យសម្បត្តិ ការប្រើប្រាស់គ្រឿងញៀនធ្វើឱ្យមនុស្សបាត់បង់ការចងចាំ កក្តាអស់ហ្នឹងហើយគឺបាត់ជាច្រើនតែម្តង»។

លោកបានបន្ថែមថា៖ «ទី២ កត្តាមិត្តភក្តិសម្រាប់ផ្នែកមួយដែលធ្វើឱ្យមនុស្សហ្នឹងសេពនូវគ្រឿងញៀនហ្នឹង។ កត្តាទី៣ដែលធ្វើឱ្យគាត់សេពគ្រឿងញៀនហ្នឹងគឺកត្តាខ្លួនឯងផ្ទាល់ ដែលគាត់ចង់សាកចង់ដឹង ហើយកត្តាមួយទៀតគឺកត្តាស្មុគស្មាញដែលគាត់មានវិបត្តិដោះស្រាយមិនចេញអ៊ីចឹងទៅ។ គាត់គិតថាអាគ្រឿងញៀនហ្នឹងអាចជួយបញ្ហាគាត់បានមួយពេលអ៊ីចឹងទៅ។ ទាល់តែពេលគាត់សាកហើយធ្វើឱ្យគាត់ដកខ្លួនលែងរួច»។

យុវតីមួយរូបទៀតដែលមានស្រុកកំណើតនៅខេត្តកណ្ដាលនិយាយដោយសុំមិនបញ្ចេញឈ្មោះថា អ្នកប្រើប្រាស់គ្រឿងញៀននៅពេលដែលញៀន លែងខ្វល់អ្វីទាំងអស់ ចូលចិត្តការសប្បាយ ចង់សាកចង់ដឹង តែអ្នកខ្លះភ្ងាក់ខ្លួនចង់កែតែក៏ពិបាក។

កញ្ញាបានលើកឡើងថា៖ «ហ្នឹងហើយ! ដូចជានៅក្នុងភូមិរបស់ខ្ញុំជាដើម តាំងពីមុនអត់អីទេទាល់តែដល់ពេលឥឡូវគឺរបៀបថាស្រុកភូមិវាមិនសូវដូចពីមុន។ វាបង្កចលាចលដូចជាថា ឱ្យតែយប់ៗឡើងពួកគេជិះម៉ូតូ ធ្វើឱ្យរំខានអ្នកស្រុកភូមិមិនបានដេកបានពួន»៕

Q & A ជាមួយសមាជិកបណ្ដាញស្ត្រីអ្នកដឹកនាំវ័យក្មេង អំពីបញ្ហាស្ត្រីនិងបរិបទសង្គមដែលស្រ្តីកំពុងប្រឈម

ឆនរស្មី (Chhorn Raksmey) — Tue, 15 Jun 2021 03:51:56 +0000

កញ្ញាហឿន យូអៀង ជាសមាជិកស្ម័គ្រចិត្តនៃបណ្ដាញស្ត្រីអ្នកដឹកនាំវ័យក្មេង ហើយក៏ជាបុគ្គលិកអង្គការក្រៅរដ្ឋាភិបាលមួយដែលមានតួនាទីជាមន្ត្រីផ្នែកសម្របសម្រួលផ្នែកទំនាក់ទំនង។ កញ្ញាបានបទសម្ភាសន៍ដល់សិក្ខាកាម Newsroom Cambodia កញ្ញាឆន រស្មី អំពីបញ្ហាស្ត្រីនិងបរិបទសង្គមមួយចំនួនដែលស្រ្តីកំពុងប្រឈម។

Q: ជម្រាបសួរបងស្រី! ជាបឋមសូមឱ្យបងអាចជួយណែនាំខ្លួនប្រាប់ប្អូនបន្តិច?

A: សួស្ដី! នាងខ្ញុំឈ្មោះហឿន យូអៀង ជាសមាជិកស្ម័គ្រចិត្តនៃបណ្ដាញស្ត្រីអ្នកដឹកនាំវ័យក្មេង ហើយក៏ជាបុគ្គលិកអង្ការក្រៅរដ្ឋាភិបាលមួយដែលមានតួនាទីជាមន្ត្រីផ្នែកសម្របសម្រួលផ្នែកទំនាក់ទំនង។

Q: បងទាក់ទងនឹងបរិបទសង្គម(social construction)មួយបាននិយាយថា«កូនស្រីមិនចាំបាច់រៀនច្រើនពេកទេ រៀនឱ្យចេះល្មមៗទៅបានហើយពេលមានកូន-ប្ដីទៅនៅផ្ទះដដែលហ្នឹង»តើបងយល់យ៉ាងណាដែរចំពោះបរិបទមួយនេះ?

A. សម្រាប់ឃ្លាតាមគំនិតរបស់ខ្ញុំផ្ទាល់តែម្ដង ខ្ញុំយល់ថាវាជាការយល់ឃើញតៗគ្នាពីមួយជំនាន់ទៅមួយជំនាន់ដោយសារតែមនុស្សប្រុសភាគច្រើនមានគំនិតថាខ្លួនឯងគួរតែជាមេគ្រួសារ ខ្លួនឯងគួរតែជាអ្នករកចំណូលហើយចិញ្ចឹមមនុស្សស្រី ហើយមនុស្សស្រីគួរតែជាអ្នកដែលនៅផ្ទះមើលថែទាំកូន នេះជាការយល់ឃើញរបស់មនុស្សនៅក្នុងសង្គមពីមួយជំនាន់ទៅមួយជំនាន់ ប៉ុន្តែ…ខ្ញុំគិតថាការគិតហ្នឹងជាការគិតដ៏លំអៀងបំផុតសម្រាប់មនុស្សស្រីស្របពេលដែលមនុស្សស្រីនៅផ្ទះមើលកូនហើយប្តីអ្នកចិញ្ចឹមគេគិតថាជាមនុស្សស្រីដែលមានសំណាង។

ផ្ទុយមកវិញខ្ញុំគិតថាការដែលមនុស្សស្រីបោះបង់ក្ដីស្រមៃខ្លួនឯងហើយរស់នៅរំពឹងចាំការមើលថែពីដៃគូរគឺជាការប្រថុយប្រថានមែនទែននៅពេលដែលយើងអត់មានចំណេះជំនាញខ្លួនឯងពិតប្រាកដណាមួយហើយយើងរំពឹងទៅលើការចិញ្ចឹមឬការយកចិត្តទុកដាក់មើលថែពីគេទាំងស្រុងគឺជីវិតរបស់យើងហ្នឹង អាចនិយាយបានថាវាប្រថុយប្រថាន។

ឧទាហរណ៌ថា នៅពេលដែលអត់មានគេឬក៏មានឧបទ្ទវហេតុនិយាយឱ្យអាក្រក់ស្ដាប់បន្តិចទៅមានរឿងអីកើតឡើងហើយយើងត្រូវរស់នៅដោយខ្លួនឯងតើយើងទៅរំពឹងអី? ចឹងវាប្រថុយប្រថានមែនទែនសម្រាប់ជីវិតរបស់មនុស្សស្រីដែលត្រូវទៅរស់នៅមើលថែគ្រួសារហើយអត់មានចំណេះជំនាញខ្លួនឯងផ្ទាល់។

អ៊ីចឹង! ឃ្លាដែលគេលើកឡើងថាអត់ចាំបាច់រៀនច្រើនគង់តែនៅផ្ទះ ទោះបីយើងគង់តែនៅផ្ទះក៏ដោយតែចំណេះដឹងនឹងជំនាញហាស! វាជួយយើងច្រើនមែនទែនក្រៅពីមានភាពឯករាជ្យខ្លួនឯង ផ្គត់ផ្គង់គ្រួសារបានល្អប្រសើរ អាចដោះស្រាយបញ្ហាបានគឺវាជារឿងចាំបាច់សម្រាប់ការរស់នៅរបស់យើង។

ឪពុកម្ដាយឬអាណាព្យាបាលដែលមានកូនស្រីភាគច្រើនគឺគាត់គិតថា ហ៊ឺស! គួរតែឱ្យកូនស្រីមានគ្រួសារទៅត្រូវបានគេមើលថែទាំគឺជីវិតរបស់កូនគាត់និងស្រួលនិងល្អប្រសើរ…អ៊ីចឹងទៅ ប៉ុន្តែតើគាត់ធ្លាប់ដែលគិតអត់ថាក្មេងស្រីត្រូវរស់នៅក្នុងជីវិតដែលរំពឹងទៅលើដៃគូរហ្នឹងវាប្រថុយប្រថានមួយសម្រាប់ពួកគេ អាចនិយាយបានថា៥០/៥០ដូចជាការយកជីវិតទៅផ្ញើគេ។

នោះជាការយល់ឃើញរបស់ខ្ញុំ ហើយចំណេះជំនាញ ការអប់រំមិនត្រឹមតែធ្វើឱ្យក្មេងស្រីមានទំនុកចិត្ត ភាពជឿជាក់ធ្វើជាម្ដាយល្អ ជំហរគ្រួសារល្អ និងគំរូល្អនោះទេពួកគេក៏អាចក្លាយជាអ្នកដឹកនាំដ៏ល្អដែរហើយពួកគេក៏អាចធ្វើឱ្យឪពុកម្ដាយមានមោទនភាពចំពោះពួកគេដែរក្រៅពីអាចធ្វើម្ដាយនៅក្នុងគ្រួសារឬក៏ជាប្រពន្ធនៅក្នុងគ្រួសារ។

Q: តើបងគិតថាក្មេងស្រីនៅតែទទួលរងនូវគំនៀបនេះភាគច្រើនកូនដែលស្ថិតក្នុងស្ថានភាពបែបគ្រួសារបែបណា(គ្រួសារក្រីក្រ មធ្យម មាន)?

A. សម្រាប់នាងខ្ញុំគិតថាក្មេងស្រីដែលស្ថិតក្នុងស្ថានភាពគ្រួសារក្រីក្រនិងមធ្យមព្រោះថាគ្រួសារក្រីក្រគាត់អាចនិងមានលទ្ធភាពគ្រាប់គ្រាន់ដើម្បីបញ្ជូនកូនគាត់ទៅសាលារៀន អ៊ីចឹងហេតុផលមួយហ្នឹងក៏អាចសម្រួលដល់គាត់ដែលអត់ចាំបាច់ត្រូវបញ្ជូនកូនទៅរៀនខ្ពង់ខ្ពស់វែងឆ្ងាយដែលត្រូវចំណាយលុយចំណាយពេលច្រើន គាត់រំពឹងចាំវាសនាកូនគាត់ទៅលើដៃគូរបស់នាង ព្រោះតែគាត់ចង់ឱ្យកូនស្រីរបស់គាត់ឆាប់មានទំនួលខុសត្រូវ ឆាប់មានជីវិតគូមានគ្រួសារមានលំនឹងអ៊ីចឹងទៅហ្នឹងប្រហែលអ្វីដែលជាការគិតរបស់គាត់ឬក៏គ្រួសារមធ្យមហើយសម្រាប់គ្រួសារដែលមានជីវភាពធូរធារគាត់អាចនឺងរស់នៅបានសមរម្យ…អ៊ីចឹងគាត់ក៏ចំណាយពេលវេលាតិចទន់តិចឱ្យកូនសិក្សាព្រោះថាកូនរបស់គាត់អាចមានវាសនា សម្រេចក្ដីប្រថ្នារបស់ខ្លួនរបស់ពួកគេ។

Q: តើបងធ្លាប់ឆ្លងកាត់បរិបទសង្គម ចេញពីគ្រួសារឬបងប្អូនដែររឺទេ?

A: សម្រាប់បទពិសោធន៍ខ្ញុំផ្ទាល់ពាក់ព័ន្ធនិងបរិបទសង្គមហ្នឹងហាស! ក៏ខ្ញុំធ្លាប់ជួបដែរប៉ុន្តែវាប្រហែលជាមិនតឹងតែងពេករហូតដល់ខ្ញុំរើបម្រាស់មិនរួចនោះទេ។ ការពិតទៅវាគ្រាន់តែជាមតិយោបល់និងការយល់ឃើញរបស់មនុស្សជុំវិញខ្លួនដែលគេប្រាប់ថាមនុស្សស្រី ទោះខំប្រឹងរៀនយ៉ាងណាក៏ដោយ ខ្ពស់យ៉ាងណាក៏ដោយត្រូវតែចេះធ្វើការងារផ្ទះព្រោះអី?

គឺនៅតែក្លាយជាប្រពន្ធគេមើលថែទាំកូនដដែលហ្នឹង យេស! ស្ដាប់មើលទៅហាក់ដូចជាការខិតខំរៀនសូត្ររបស់យើងអត់សូវមានន័យ។ព្រោះអីយើងគួរតែទៅធ្វើការងារផ្ទះនិងប្រពន្ធរបស់គេប៉ុន្តែពាក្យទាំងអស់ហ្នឹងវាឮវាជាការបញ្ចេញមតិយោបល់របស់គេ អ៊ីចឹងវាជាការសម្រេចចិត្តរបស់យើងថាយើងជឿគេធ្វើតាមគេឬក៏ជឿជាក់លើក្ដីស្រមៃរបស់ខ្លួនឯងធ្វើតាមបេះដូងខ្លួនឯង ក៏ប៉ុន្តេបញ្ហាមួយទៀតនៅពេលដែលឪពុកម្ដាយឬអាណាព្យាបាលរបស់យើងត្រូវបានប្រាប់ឬបញ្ចេញមតិជុំវិញខ្លួនពីរឿងហ្នឹងពួកគាត់នឹងដាក់សម្ពាធមកលើយើង។

ពួកគាត់ក៏មានសម្ពាធរងឥទ្ធិពលពីពាក្យទាំងហ្នឹងពីសង្គមដែរ ពួកគាត់ចាប់ផ្ដើមយល់ឃើញថា មនុស្សភាគច្រើនគឺគិតចឹងហេតុអ្វីបានកូនខ្ញុំគិតខុសគេខ្ញុំមិនអាចឱ្យកូនខ្ញុំខុសគេបានទេត្រូវតែធ្វើតាមគេ។ អ៊ីចឹងគាត់ចាប់ផ្ដើមដាក់សម្ពាធលើយើង ប៉ុន្តែយើងក៏ត្រូវរើបម្រាស់ដែរដូចខ្ញុំចឹង ខ្ញុំខំរៀនឱ្យពូកែដើម្បីឱ្យគេឃើញថាខ្ញុំរៀនបានលទ្ធផលល្អដែរចឹងហេតុអីខ្ញុំត្រូវបោះបង់ការសិក្សាចោលទៅខំប្រឹងធ្វើការងារផ្ទះវិញ?

Q: តើកូនស្រីត្រូវព្យាយាមលុបបំបាត់បរិបទសង្គមទាំងនេះដោយរបៀបណា ឬគួរតែនៅត្រងត្រាប់តាមបរិបទសង្គមនេះដដែល?

A: តាមពិតទៅយើងអត់អាចលុបបំបាត់ហ្មងទេ តែដូចខ្ញុំនិយាយមុនហ្នឹងចឹងវាជាការជ្រើសរើសនូវការសម្រេចចិត្តរបស់យើង ប្រសិនបើយើងគិតថាអ្វីដែលយើងធ្វើត្រឹមត្រូវយើងមានក្ដីស្រមៃរបស់យើងនិងវិធីដែលយើងដើរទៅរកក្ដីស្រមៃរបស់យើងត្រឹមត្រូវហេតុអ្វីបានជាយើងសម្រេចចិត្តឱ្យបរិបទសង្គមមករារាំងដែលវាជាការយល់ឃើញនិងការជឿរបស់មនុស្សមួយចំនួន។

យេស មនុស្សស្រីមួយចំនួនគាត់ធំធាត់ឡើងទាំងដែលគាត់យល់ស្របនិងជឿលើផ្នត់គំនិតបាត់ទៅហើយ គាត់អត់បានដឹងថាអាហ្នឹងវាជាការគៀបសង្កត់ជាឧបសគ្គមួយសម្រាប់គាត់ទេ ប៉ុន្តែទន្ទឹមហ្នឹងដែរក្មេងស្រីមូយចំនួនដែលស្រមៃខ្ពស់ហើយព្យាយាមជម្នះនូវការយល់ឃើញរបស់សង្គមមួយនេះព្រោះពួកគេចង់រស់នៅដោយឯករាជ្យពឹងពាក់លើជីវិតខ្លួនឯងរីករាយក្នុងការរស់នៅក្នុងក្ដីស្រមៃរបស់ពូកគេ។

Q: តើក្នុងនាមបងជាកូនស្រីម្នាក់ ស្រី្តម្នាក់ តើបងរង់ចាំឱ្យសង្គមជាអ្នកផ្លាស់ប្ដូររបរិបទនេះ ឬមួយក៏បងខិតខំកែប្រែវាដោយផ្ដើមចេញពីខ្លួនឯង?

A: ក្នុងនាមខ្ញុំជាកូនស្រីម្នាក់ ជាស្រ្តីម្នាក់ខ្ញុំនឹងមិនរង់ចាំឱ្យនរណាម្នាក់ឬក៏ឱ្យសង្គមទាំងមូលនៅសុខៗមកផ្លាស់ប្ដូរទេ! ខ្ញុំគិតថាវាអត់អាចទៅរួចទេដែលនៅសុខៗសង្គមផ្លាស់ប្ដូរ តែត្រូវឱ្យសង្គមដឹងសិនថាមានបញ្ហាអ្វីខ្លះកំពុងកើតឡើងចំពោះយើងដែលយើងគិតថាត្រូវផ្លាស់ប្ដូរខ្លះ ឬផ្លាស់ប្ដូរកន្លែងនេះ ត្រូវផ្លាស់ប្ដូរកន្លែងនេះចេញ ព្រោះអីវាបានប៉ះពាល់ដល់ខ្ញុំមែនទែន។ អ៊ីចឹង មានតែយើងខ្លួនឯងដែលជាស្ត្រីហ្នឹងបង្ហាញនូវការពិបាករបស់យើងនិយាយឱ្យឮឱ្យគេដឹងថាមានបញ្ហាអី? ហើយសម្រាប់ខ្ញុំ ខ្ញុំនឹងចាប់ផ្ដើមបង្ហាញឱ្យមនុស្សជុំវិញខ្លួនឃើញថាខ្ញុំគឹជាស្ត្រីដែលខុសពីស្ត្រីនៅក្នុងរង្វង់យេនឌ័រដែលគេបានកំណត់ គេបានកំណត់នៅក្នុងប្រអប់មួយថាមនុស្សស្រីតែអញ្ចេះៗ អ៊ីចឹងខ្ញុំនឹងបង្ហាញឱ្យគេឃើញថាមិនមែនមនុស្សស្រីទាំងអស់សុទ្ធតែចង់បានដូចអ្វីដែលគេកំណត់ទេ។

ខ្ញុំចង់លោតចេញពីប្រអប់ហ្នឹង! ខ្ញុំចង់មើលឃើញពិភពលោក ចង់ដើរហើរមានសេរីភាព អូខេ! ចឹងខ្ញុំចាប់ផ្ដើមតាមចាប់ក្ដីស្រមៃតាមវិធីត្រឹមត្រូវដែលខ្ញុំជឿជាក់ហើយប្រសិនបើទោះបីជាវាលំបាកត្រូវជម្នះ ប៉ុន្តែក្នុងនាមយើងជាស្ត្រីខ្លួនឯងបើយើងមិនក្រោកឡើងដោយខ្លួនឯងទេតើអ្នកណានឹងមកធ្វើវាជំនួសយើងបើយើងជាអ្នកជួបបញ្ហាដោយខ្លួនឯងហ្នឹង។

Q: តើអ្វីជាការរំពឹងទុករបស់បងក្នុងការជួយជម្រុញលើកទឹកចិត្តដល់ក្មេងស្រីជំនាន់ក្រោយឲ្យមានភាពក្លាហានដើរតាមក្ដីស្រមៃរបស់ខ្លួនចៀសវាងរស់នៅក្រោមបរិបទបុរាណរបស់គ្រួសារ?

A: នាងខ្ញុំសូមមានសារសូមលើកទឹកចិត្តមួយសូមឱ្យស្ត្រីនិងក្មេងស្រីក្នុងនាមយើងជាមនុស្សស្រីត្រូវកសាងសមត្ថភាពខ្លួនឯងឱ្យរឹងមាំ បង្ហាញឱ្យគេឃើញថាយើងអាចមានលទ្ឋភាពមើលថែទាំខ្លួនឯងបាននៅថ្ងៃមុខ យើងត្រូវការជ្រើសរើសដៃគូជីវិតគឺមិនមែនដើម្បីយើងក្លាយទៅជាអ្នកធ្វើកិច្ចការផ្ទះឬរស់នៅរំពឹងគេទេ គឹយើងជ្រើសរើសយកគេដើម្បីដើររួមផ្លូវជាមួយគ្នា បង្កើតជំនាន់ក្រោយជាមួយគ្នា និងមើលថែគ្នាទៅវិញទៅមក ទោះជាយើងក្លាយទៅជាម្ដាយក៏ក្លាយដែលមានការអប់រំ សម្រាប់ជាគំរូដល់កូនៗ។

ហើយអ្វីដែលសំខាន់នៅពេលដែលយើងមានចំណេះដឹងជំនាញគឺយើងនិងមានសមត្ថភាពអាចដោះស្រាយក្នុងជីវិតគ្រួសាររបស់យើងអាចគ្រប់គ្រងគ្រួសាររបស់យើងរស់នៅក្នុងជីវិតមួយដែលល្អប្រសើរជាជាងដែលយើងរស់រំពឹងទៅលើដៃគូររបស់យើងតែម្ខាង៕