ឈួន ចាន់រស្មី (Chhoun Chanraksmey) – Newsroom Cambodia

ក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង ផ្តល់ក្តីសង្ឃឹមថានឹងជួយកាត់បន្ថយផលប៉ះពាល់អវិជ្ជមាននៃគ្រឿងស្រវឹង ទាំងសេដ្ឋកិច្ច និងគ្រោះថ្នាក់ផ្សេងៗ

ឈួន ចាន់រស្មី (Chhoun Chanraksmey) — Thu, 13 Jun 2024 00:58:46 +0000

នៅតាមដងវិថីធំៗ តាមទីកន្លែងសាធារណៈនានា ក្នុងទីក្រុងភ្នំពេញ និងតាមទីរួមខេត្តជាច្រើននៅកម្ពុជា គេឃើញមានផ្ទាំងផ្សព្វផ្សាយពាណិជ្ជកម្ម ឬផ្ទាំងប៉ាណូផ្សព្វផ្សាយផលិតផលគ្រឿងស្រវឹងយ៉ាងព្រោងព្រាត។ ក្រៅពីនេះ ក៏មានផ្សព្វផ្សាយតាមកញ្ចក់ទូរទស្សន៍ កាសែត ទស្សនាវដ្តី និងបណ្តាញសង្គមយ៉ាងផុសផុលផងដែរ។ ទាំងនេះ ជាយុទ្ធសាស្ត្រទីផ្សារ ដើម្បីឱ្យអតិថិជនបានស្គាល់ និងជំរុញការពិសារគ្រឿងស្រវឹង ដោយភ្ជាប់ជាមួយសារមួយចំនួនទាក់ទងនឹងគុណសម្បត្តិស្រាបៀរ និង រសជាតិឆ្ងាញ់កម្រិតពិភពលោក ព្រមទាំងមោទនភាពជាតិជាដើម។

ការផ្សព្វផ្សាយដ៏សន្ធឹកសន្ធាប់នេះ បង្កឲ្យមានការពិភាក្សាក្នុងចំណោមសាធារណជនជុំវិញផលប៉ះពាល់ជាច្រើនដែលបង្កឡើងដោយគ្រឿងស្រវឹង ជាអាទ៍បញ្ហាសុខភាព គ្រោះថ្នាក់ចរាចរណ៍ ខាតពេលវេលា ថវិកា និងសុភមង្គលជាដើម។ កាលពីខែមេសាកន្លងទៅ រដ្ឋាភិបាលសម្រេចបង្កើតក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងដែលត្រូវបានគេរំពឹងថាជាជំហាន វិជ្ជមានមួយ។ ក្រុមការងារនេះ ទទួលបន្ទុកកំណត់វិធានការ និងរៀបចំសណ្តាប់ធ្នាប់នៃការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងតាមគ្រប់មធ្យោបាយប្រព័ន្ធផ្សព្វផ្សាយ និងការដាក់តាំងជាសាធារណៈគ្រប់ទីកន្លែង ដើម្បីលើកកម្ពស់សោភណភាព និងសុវត្ថិភាពសង្គម។

សាធារណជនដែល Newsroom Cambodia បានជួបសម្ភាសកាលពីខែឧសភាកន្លងទៅបង្ហាញការសាទរចំពោះការបង្កើតក្រុមការងារថ្មីនេះ ដោយរំពឹងថាការកាត់បន្ថយ និងរិតត្បិតការផ្សព្វផ្សាយគ្រឿងស្រវឹងអាចហុចផលវិជ្ជមានដល់ពលរដ្ឋ និងសង្គមកម្ពុជា។ នេះ ក៏ដោយសារក្រុមការងារនេះ នឹងត្រួតពិនិត្យការផ្សាយពាណិជ្ជកម្មគ្រឿងស្រវឹង វាយតម្លៃ យុទ្ធសាស្ត្រផ្សាយពាណិជ្ជកម្ម និងតម្រូវឲ្យក្រុមហ៊ុនមានទំនួលខុសត្រូវខ្ពស់ ដែលអាចកាត់បន្ថយការពិសារគ្រឿងស្រវឹង ដែលជារឿយៗបង្កឲ្យមានគ្រោះថ្នាក់នានា។ ពួកគេក៏បានលើកឡើងស្តីពីផលប៉ះពាល់ជាច្រើនដែលបង្កឡើងដោយគ្រឿងស្រវឹង ដូចជាបញ្ហាសុខភាព គ្រោះថ្នាក់ចរាចរណ៍ ខាតពេលវេលា ថវិកា និងសុភមង្គលជាដើម។

កំពុងតែដើរទស្សនានៅក្នុងសារមន្ទីរជាតិនាទីក្រុងភ្នំពេញ ដែលមានមនុស្សម្នាកំសាន្តច្រើន លោកឌីម ចិត្រា អាយុ១៩ឆ្នាំ និស្សិតឆ្នាំទី១សិក្សានៅសាកលវិទ្យាល័យវិទ្យាសាស្ត្រសុខាភិបាលត្រេកអរចំពោះសេចក្តីសម្រេចរបស់រដ្ឋាភិបាល លើវិធានការបង្កើតក្រុមការងារគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង។

លោកនិយាយថា៖ «រាល់ថ្ងៃគ្រឿងស្រវឹងធ្វើឱ្យយុវជនជំនាន់ក្រោយឈ្លក់វង្វេង បាត់បង់ប្រយោជន៍ក្នុងជីវិតរបស់គាត់ច្រើន ដូចជាខាតពេលវេលា ខាតថវិកា ធ្វើឱ្យគ្រួសារអត់មានសុភមង្គល និងមានច្រើនជាងហ្នឹងទៀត»។

លោក ឌីម ចិត្រា អាយុ១៩ឆ្នាំ ជានិស្សិតឆ្នាំទី១សិក្សានៅសាកលវិទ្យាល័យវិទ្យាសាស្ត្រសុខាភិបាល (រូបភាព៖ ទេព សួគានី)

លោក ថាន់ ប៊ុនថង អាយុ៣១ឆ្នាំ ជាអ្នកគ្រប់គ្រងភោជនីយដ្ឋានមួយកន្លែងនៅរាជធានីភ្នំពេញ ពេញចិត្ត និងគាំទ្រ លើសេចក្តីសម្រេចរបស់រដ្ឋាភិបាល ព្រោះលោកសង្កេតឃើញថាគ្រឿងស្រវឹងផ្ដល់ផលអវិជ្ជាមានដល់ការសិក្សា សុខភាព និងសង្គម។

លោកនិយាយថា៖ «តាមការពិត ការលក់ដូរមានផលប៉ះពាល់ដែរ តែមិនប៉ះពាល់ខ្លាំងទេ ហាងខ្ញុំផ្ដោតលើភេសជ្ជៈដូចជាកូកាអីចឹង មិនប្រាកដថាភ្ញៀវទាំងអស់ញ៉ាំគ្រឿងស្រវឹងទាំងអស់ទេ។

លោក ថាន់ ប៊ុនថង អាយុ៣១ឆ្នាំ ជាអ្នកគ្រប់គ្រងភោជនីយដ្ឋានមួយកន្លែងនៅរាជធានីភ្នំពេញ (រូបភាព៖ ទេព សួគានី)

ចំណែកព្រះតេជគុណ ប៉ិច ផាត ព្រះជន្ម ២៣ព្រះវស្សា ជានិស្សិតកំពុងសិក្សាជំនាញស្ថាបត្យកម្មសំណង់ស៊ីវិល នៅសាកលវិទ្យាល័យន័រតុន។ នៅក្នុងបទសម្ភាសជាមួយ Newsroom Cambodia ព្រះតេជគុណ មានសេចក្តីសោមនស្សជាខ្លាំង ក្រោយទទួលដំណេឹងពីវត្តមានក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងនេះ។ ព្រះតេជគុណ រំពឹងឃើញកម្ពុជានឹងមានសណ្តាប់ធ្នាប់ជាងមុន។

ព្រះតេជគុណមានសង្ឃដីកាថា៖ «គុណវិបត្តិនៃគ្រឿងស្រវឹង វាអាចប៉ះពាល់ច្រើន ដូចជានាំឱ្យមានអំពើហិង្សាក្នុងគ្រួសារ ឬក៏នាំឱ្យមានគ្រោះថ្នាក់ចរាចរណ៍ផ្សេងៗបាត់បង់ជីវិតអីចឹង»។

ព្រះតេជគុណសំណូមពរឱ្យទាំងអ្នកលក់ និងក្រុមហ៊ុនផ្សព្វផ្សាយគ្រឿងស្រវឹង គោរពតាមច្បាប់ ដែលរាជរដ្ឋាភិបាលបានកំណត់មកនេះ និងចូលរួមកាត់បន្ថយគ្រឿងស្រវឹងក្នុងសង្គម។

ព្រះតេជគុណ ប៉ិច ផាត ព្រះជន្ម ២៣ព្រះវស្សា ជានិស្សិតកំពុងសិក្សាជំនាញស្ថាបត្យកម្មសំណង់ស៊ីវិល នៅសាកលវិទ្យាល័យន័រតុន (រូបភាព៖ ទេព សួគានី)

តាមរបាយការណ៍របស់ Wisevoter នៅក្នុងឆ្នាំ២០២៣ រកឃើញថាកម្ពុជាឈរនៅលេខរៀងទី៣ ដែលមានប្រជាជនផឹកស្រាច្រើនជាងគេនៅក្នុងតំបន់អាស៊ាន និងឈរលេខរៀងទី៣៦ នៅក្នុងចំណោមប្រទេសនៅលើពិភពលោក ដែលប្រជាជនកម្ពុជាម្នាក់អាចផឹកស្រាបាន ២១.៧លីត្រ។

ការសិក្សាថ្មីមួយរបស់ក្រុមហ៊ុនភេសជ្ជៈជប៉ុនឈ្មោះ Kirin ចេញផ្សាយកាលពីពេលថ្មីៗនេះ បានឱ្យដឹងថា ប្រជាជនកម្ពុជាសរុបទាំងអស់បានចំណាយប្រាក់ប្រមាណ២,៣ពាន់លានដុល្លារទៅលើការពិសាស្រាបៀរ ដោយម្នាក់ៗបានពិសាស្រាបៀរប្រមាណ៧២លីត្រ និងចំណាយប្រាក់ប្រមាណ១៣៦ដុល្លារក្នុងមួយឆ្នាំ។ របាយការណ៍នេះបានសិក្សាក្នុងចន្លោះឆ្នាំ២០២០-២០២១។

លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាព បានប្រាប់ Newsroom Cambodia ថា ការបង្កើតក្រុមការងារនេះគ្រាន់តែជាការចាប់ផ្តើមទេ ចំណែកឯប្រសិទ្ធភាពអាស្រ័យទៅលទ្ធផលរបស់ក្រុមការងារ។ លោកបន្តថា ដើម្បីបង្ការគ្រោះថ្នាក់នានា កម្ពុជាគួរតែបញ្ឈប់ការផ្សាយពាណិជ្ជកម្ម ឬយ៉ាងហោចណាស់កម្រិតការផ្សព្វផ្សាយ។

លោកនិយាយថា៖ «តាមពិតទៅដើម្បីបង្ការយុវជន ក៏ដូចជាកុមារកុំអោយធ្លាក់ខ្លួនសេពគ្រឿងស្រវឹងដែលធ្វើអោយមានបញ្ហាដល់ធនធានមនុស្សជំនាន់ក្រោយ ជាពិសេសដើម្បីបង្ការគ្រោះថ្នាក់ចរាចរណ៍ដែលកើតឡើងដោយសារអ្នកបើកបរស្រវឹងហ្នឹងគឺការផ្សាយពាណិជ្ជកម្មនឹងគួរតែហាមទាំងស្រុងតែម្ដងគ្រប់មធ្យោបាយទាំងអស់»។

លោកបន្តថា៖ «ក្នុងករណីដែលមិនអាចហាមឃាត់ការផ្សាយទាំងស្រុងទេ យើងគួរហៅថាកម្រិតការផ្សាយពាណិជ្ជកម្ម។ មានន័យថាយើងអនុញ្ញាតតែការផ្សាយម៉ាកនិងឡួហ្គូ(logo)របស់ក្រុមហ៊ុនបានហើយ មិនអនុញ្ញាតការផ្សាយពាក់ព័ន្ធនឹងការត្រូវរង្វាន់ ឬយកយុវជន យុវនារី តារា មកធ្វើការទាក់ទាញកុមារនោះទេ»។

យោងតាមគណៈកម្មាធិការជាតិសុវត្ថិភាពចរាចរណ៍ផ្លូវគោក អត្រាគ្រោះថ្នាក់ចរាចរណ៍ក្នុងឆ្នាំ២០២៣ បានកើនឡើង ១១ភាគរយ ច្រើនជាងឆ្នាំ២០២២ ដោយចំនួនគ្រោះថ្នាក់ចរាចរណ៍កើតឡើងជិត ៤ពាន់ដង ក្នុងនោះមានមនុស្សស្លាប់ ១.៥៩០នាក់ និងរបួស ៤.៥០០នាក់។

ចំណែករបាយការណ៍ ដែលចេញផ្សាយដោយគណៈកម្មាធិការជាតិសុវត្ថិភាពចរាចរណ៍ផ្លូវគោក និងកម្មវិធីអភិវឌ្ឍន៍សហប្រជាជាតិ (UNDP) ឆ្នាំ២០២៣ ដោយប្រើប្រាស់ទិន្នន័យបានពីប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ (RCVIS)ឆ្នាំ២០១៩ ឲ្យដឹងថាកម្ពុជាខាតបង់ថវិកាចំនួន ៤៦៦.៨ លានដុល្លារអាមេរិក ដោយក្នុងចំណោមការខាតបង់សរុប ៨៨.៨ភាគរយ គឺដោយសារការបាត់បង់ជីវិត និងការបាត់ប្រាក់ចំណូល ដែលជនរងគ្រោះអាចរកបានពេញមួយជីវិត។

បើតាមឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន កិច្ចសហការគ្នារវាងភាគីរដ្ឋ និងឯកជន មានភាពចាំបាច់ដើម្បីគ្រប់គ្រងសណ្តាប់ធ្នាប់នៃការផ្សាយពាណិជ្ជកម្មផលិតផលគ្រឿងស្រវឹង។ យោងតាមការចុះផ្សាយរបស់ក្រសួងព័ត៌មានកាលពីខែមីនា ឆ្នាំ២០២៤ កន្លងមក ឯកឧត្តម នេត្រ ភក្ត្រា ថ្លែងយ៉ាងដូច្នេះ៖ «ការរួមគ្នាគ្រប់គ្រងសណ្តាប់ធ្នាប់នៃការផ្សព្វផ្សាយពាណិជ្ជកម្មគ្រឿងស្រវឹងគឺដើម្បីជួយទៅដល់សង្គម ជួយទៅដល់ក្រុមហ៊ុន ជួយទៅដល់ប្រជាជនកម្ពុជាដែលជាអ្នកប្រើប្រាស់ផលិតផល, កាត់បន្ថយគ្រោះថ្នាក់និងបង្កើននូវសុខដុមនីយកម្មក្នុងសង្គម»។

អង្គការសហប្រជាជាតិផ្តួចផ្តើមព្រឹត្តិការណ៍ដ៏សំខាន់មួយគឺទិវាសប្ដាហ៍ជាតិសុវត្ថិភាពចរាចរណ៍ផ្លូវគោក ដែលបានកំណត់យកខែឧសភា ជារៀងរាល់ឆ្នាំ ប្រារព្ធឡើងនៅតាមបណ្តាប្រទេសនានាទូទាំងសកលលោក ដើម្បីជាការក្រើនរំលឹកទៅដល់ប្រជាពលរដ្ឋនៅទូទាំងពិភពលោក ពិសេសប្រទេសក្នុងតំបន់អាស៊ីប៉ាស៊ីហ្វិក រួមទាំងប្រទេសកម្ពុជា ឱ្យយកចិត្តទុកដាក់លើកកម្ពស់វិស័យសុវត្ថិភាពចរាចរណ៍ផ្លូវគោក។ នេះបើយោងតាមការចុះផ្សាយរបស់ក្រសួងសាធារណៈការ និងដឹកជញ្ជូននៅថ្ងៃទី៩ ខែឧសភា ឆ្នាំ២០២៤។

ការស្ទង់មតិមួយដែលធ្វើឡើងដោយក្រសួងសុខាភិបាល និងស្ថាប័នរដ្ឋាភិបាលពាក់ព័ន្ធផ្សេងទៀតក៏បានបង្ហាញថា បុរស៧នាក់ក្នុងចំណោម១០នាក់ ដែលស្មើប្រមាណ៧០% សេពគ្រឿងស្រវឹង។ នេះបើតាមរបាយការណ៍ស្តីពីការអង្កេតប្រជាសាស្ត្រ និងសុខភាពកម្ពុជាឆ្នាំ២០២១-២០២២ ដែលចេញផ្សាយកាលពីថ្ងៃទី៤ ខែមេសា ឆ្នាំ២០២៣។ ការស្ទង់មតិបង្ហាញថា ក្នុងមួយខែ បុរស១០% ពិសាគ្រឿងស្រវឹងជារៀងរាល់ថ្ងៃ ឬស្ទើរតែរាល់ថ្ងៃ។ ចំណែកបុរស ៦០% សេពគ្រឿងស្រវឹងពី១ ថ្ងៃទៅ ៥ ថ្ងៃ។ បុរស១៨% ពិសាគ្រឿងស្រវឹង ៦ថ្ងៃទៅ១០ថ្ងៃ និងបុរស១២% ពិសាគ្រឿងស្រវឹងពី១១ថ្ងៃទៅ២៤ថ្ងៃ។

លោក ទេព អស្នារិទ្ធ អ្នកនាំពាក្យក្រសួងព័ត៌មាន លើកឡើងថា ការងារអាទិភាពរបស់ក្រុមការងារ គ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង គឺត្រូវពិនិត្យមើលលើវឌ្ឍនភាពនៃការងារពាក់ព័ន្ធទៅនឹងការអនុវត្តសារាចរណ៍ណែនាំ ក៏ដូចជាលិខិតបទដ្ឋានគតិយុត្តិផ្សេងទៀត ដែលក្រសួងព័ត៌មានបានដាក់ចេញសម្រាប់ការអនុវត្តដោយភាគីពាក់ព័ន្ធទាំងអស់។ នេះបើតាម លោក ទេព អស្នារិទ្ធ ផ្តល់បទសម្ភាសដល់ Newsroom Cambodia តាមរយៈប្រព័ន្ធតេលេក្រាម កាលពីថ្ងៃទី១៦ ខែឧសភា ឆ្នាំ២០២៤។

លោកបន្តថា៖ «អាទិភាពដែលផ្ដោតទៅលើការពង្រឹងកិច្ចសហការជាមួយភាគីពាក់ព័ន្ធទាំងអស់ទាំងវិស័យរដ្ឋ និងឯកជន ដើម្បីពង្រឹងប្រសិទ្ធភាពក្នុងការគ្រប់គ្រងការផ្សព្វផ្សាយផលិតផលគ្រឿងស្រវឹងនៅទូទាំងប្រទេស ហើយដោយក្នុងនោះគឺក៏មានការផ្តោតលើការយកចិត្តទុកដាក់ទៅលើការរៀបចំនៃលិខិតបទដ្ឋានគតិយុទ្ធនានាដែលគាំទ្រដល់ការគ្រប់គ្រង និងការបង្កើនប្រសិទ្ធភាពក្នុងការអនុវត្តការងារក្នុងវិស័យនេះ»។

អ្នកនាំពាក្យក្រសួងព័ត៌មានរូបនេះ ក៏បានអំពាវនាវឱ្យគ្រប់ភាគីពាក់ព័ន្ធទាំងអស់ចូលរួមសហការ ដើម្បីធ្វើឱ្យការអនុវត្តការងារពាក់ព័ន្ធនឹងការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងមានប្រសិទ្ធភាពផងដែរ។

លោកថ្លែងថា៖ «[…]ធ្វើយ៉ាងណាចូលរួមចំណែកក្នុងការផ្សព្វផ្សាយអំពីផលវិបាកដែលអាចកើតមានឡើងចេញពីការសេពគ្រឿងស្រវឹង និងភាពចាំបាច់ក្នុងការទប់ស្កាត់ ក៏ដូចជាការកាត់បន្ថយផលវិបាកដែលអាចកើតមានឡើង។ ហើយត្រូវបង្កើនកិច្ចសហការនៅក្នុងការគ្រប់គ្រងសណ្តាប់ធ្នាប់ និង ការផ្សព្វផ្សាយពាណិជ្ជកម្មផលិតផលគ្រឿងស្រវឹងឱ្យមានប្រសិទ្ធភាពតាមរយៈទាំងប្រព័ន្ធ ផ្សព្វ ផ្សាយបុរាណ និងប្រព័ន្ធផ្សព្វផ្សាយទំនើប»។

ការគ្រប់គ្រងផ្សព្វផ្សាយ និងការប្រើប្រាស់គ្រឿងស្រវឹង ក្រសួងសុខាភិបាល និងក្រសួងស្ថាប័នពាក់ព័ន្ធ នៅកម្ពុជាបានរៀបចំសេចក្តីព្រាងច្បាប់គ្រប់គ្រងការប្រើប្រាស់គ្រឿងស្រវឹងតាំងពីថ្ងៃទី២៥ ខែឧសភា ឆ្នាំ២០១៥ មកម្ល៉េះ។ បើទោះបីកន្លងហួសទៅជិត១០ឆ្នាំទៅហើយក្តី ក៏ច្បាប់ដ៏មានសារៈសំខាន់នេះមិនទាន់ត្រូវបានអនុម័តប្រកាសឱ្យប្រើប្រាស់ដើម្បីដោះស្រាយ និងទប់ស្កាត់ផលប៉ះពាល់ដែលបង្កពីគ្រឿងស្រវឹងក្នុងសង្គមនៅឡើយទេ។

សេចក្តីព្រាងច្បាប់នេះមិនអនុញ្ញាតឱ្យយុវជនអាយុក្រោម២១ឆ្នាំប្រើប្រាស់គ្រឿងស្រវឹងនោះទេ ហើយច្បាប់នេះនឹងដាក់បន្ទុកពន្ធខ្ពស់ទៅលើគ្រឿងស្រវឹង និងរឹតបន្តឹងលើការបើកលក់គ្រឿងស្រវឹងពេលយប់ជាដើម។

អង្គការ និងសមាគមក្រៅរដ្ឋាភិបាលចំនួន២៣ ក៏ធ្លាប់បានដាក់ចេញនូវសេចក្តីថ្លែងការណ៍មួយស្តីពីការស្នើសុំរាជរដ្ឋាភិបាលកម្ពុជាឱ្យពន្លឿនការបង្កើតច្បាប់ស្តីពីការត្រួតពិនិត្យផលិតផលគ្រឿងស្រវឹង ដោយយកទីតាំងវត្តសំពៅមាស ដែលស្ថិតក្នុងខណ្ឌ៧មករា រាជធានីភ្នំពេញ ជាកន្លែងផ្សព្វផ្សាយ ហើយមានមនុស្សចូលរួមប្រមាណ២០០នាក់ កាលពីថ្ងៃទី១៨ ខែកុម្ភៈ ឆ្នាំ២០២៤។

តាមរយៈសេចក្តីថ្លែងការណ៍នោះ ស្ថាប័នក្រៅរដ្ឋាភិបាលទាំង២៣បានបង្ហាញការព្រួយបារម្ភជុំវិញផលប៉ះពាល់ធ្ងន់ធ្ងរដល់សុខភាពមនុស្ស និងសន្តិសុខសង្គម ដោយសារតែភាពសម្បូរបែប នៃគ្រឿងស្រវឹង។ ជាពិសេសការកើតឡើងនៃបញ្ហាគ្រោះថ្នាក់ចរាចរណ៍ដ៏សាហាវ ដែលស្ថាប័នទាំងនេះទទូចឱ្យរដ្ឋាភិបាលពន្លឿនការបង្កើតច្បាប់គ្រប់គ្រងគ្រឿងស្រវឹង ដោយបញ្ចូលការហាមឃាត់ការផ្សាយពាណិជ្ជកម្ម ការដំឡើងពន្ធ និងការដាក់កម្រិតភាពទូលំទូលាយនៃគ្រឿងស្រវឹង៕

បទយកការណ៍៖ អ្នកស្រី ថុន ថាវរី ចាប់ផ្ដើមពីក្ដីស្រមៃរហូតក្លាយជាអ្នកនិពន្ធប្រលាមលោក

ឈួន ចាន់រស្មី (Chhoun Chanraksmey) — Fri, 07 Jun 2024 09:35:06 +0000

អ្នកស្រី ថុន ថាវរី ជាអ្នកនិពន្ធប្រលាមលោកបែបលើកទឹកចិត្ត។ សៀវភៅដែលធ្វើឱ្យអ្នកអានស្គាល់អ្នកស្រីច្រើន ទាំងក្នុង និងក្រៅប្រទេស គឺ «សៀវភៅនារីប្រពៃ» ឬ «A Proper Woman»។

មានសម្បុរស្រអែម សក់រួញអង្គាដីជាមួយនឹងស្នាមញញឹមស្រស់អ្នកនិពន្ធវ័យ៣៣ឆ្នាំ ដែលមានស្រុកកំណើតនៅស្រុកកោះធំ ខេត្តកណ្ដាល រៀបរាប់ប្រាប់ Newsroom Cambodia ថា អ្នកស្រីមានក្ដីស្រមៃចង់ក្លាយជាអ្នកនិពន្ធតាំងពីអាយុ៩ឆ្នាំ។ ប៉ុន្តែកង្វះព័ត៌មានជុំវិញការនិពន្ធសៀវភៅ ក្រោយចប់បាក់ឌុបអ្នកស្រីមិនបានចាប់យកជំនាញផ្នែកនេះទេ។

ដោយមិនបានបោះបង់ចោលក្ដីស្រមៃ អ្នកស្រីថាវរី ចាប់ផ្ដើមនិពន្ធសៀវភៅបែបកុមារ បោះពុម្ពដោយអង្គការមិនមែនរដ្ឋាភិបាលមួយនៅរាធានីភ្នំពេញក្នុងឆ្នាំ២០០៩។ បន្ទាប់ពីផ្អាកមួយរយៈ អ្នកស្រីនិពន្ធសៀវភៅនារីប្រពៃ ឬ A Proper Woman ជាសៀវភៅបែបជីវប្រវត្តិពិតក្នុងឆ្នាំ២០១៦។ ក្រោយបោះពុម្ពជាសាធារណៈ ទទួលបានការគាំទ្រពីអ្នកអាន និងត្រូវបានគេអញ្ជើញទៅកម្មវិធីជាច្រើននៅក្រៅប្រទេស។ នេះជាមោទនភាពមួយសម្រាប់អ្នកស្រី។

អ្នកស្រីបន្តថា៖ «A Proper Woman (សៀវភៅនារីប្រពៃ) បកប្រែ៤ភាសា ហើយមានភាសាខ្មែរ ភាសាអង់គ្លេស ភាសាឆែក និងភាសាបារាំង។ យ៉ាងហោចណាស់ខ្ញុំជាក្មេងស្រីម្នាក់មកពីតាម ជនបទ អាចឱ្យពិភពលោកស្គាល់ពីខ្មែរយើងតាមរយៈសៀវភៅរបស់ខ្ញុំ អាចឱ្យប្រទេសផ្សេងទៀតគេទទួលស្គាល់ស្នាដៃដែលយើងធ្វើ នឹងអាចឱ្យ Publisher (អ្នកបោះពុម្ពផ្សាយ) នៅស្រុកគេទទួលស្គាល់ហើយសុំសិទ្ធិបកប្រែជាភាសាគេហើយដើម្បីចែកផ្សាយនៅប្រទេសគេ»។

អ្នកស្រីនិពន្ធសៀវភៅប្រភេទបែបជីវប្រវត្តិពិត និងស្វ័យជីវប្រវត្តិ ជាប្រលាមលោកបែបខ្សែជីវិត ដកស្រង់ចេញពីបទពិសោធន៍ផ្ទាល់ខ្លួនរបស់អ្នកស្រី ប្រិយមិត្តអ្នកអាន និងអ្នកជុំវិញខ្លួន។ សៀវភៅទាំងនោះបានជះឥទ្ធិពលវិជ្ជមានដល់ផ្នត់គំនិតអ្នកអាន ជាផ្នែកមួយក្នុងការជំរុញការអានផងដែរ។

អ្នកស្រីថ្លែងថា៖ «ពេលដែលគាត់បានអានសៀវភៅដែលខ្ញុំនិពន្ធនឹងទៅ គាត់មានការលើកទឹកចិត្តដើម្បីឱ្យគាត់មានកំលាំងចិត្តក្នុងការបន្តក្ដីស្រមៃ ឬការងារដែលគាត់ស្រលាញ់កុំទាន់បោះបង់ចោលងាយៗ ព្រោះអីខ្ញុំបានសរសេរផ្ដល់គំនិតអប់រំច្រើន ក្នុងនឹងឆ្លុះបញ្ចាំងក្នុងតួអង្គដែលខ្ញុំបង្កើត»។

អ្នកស្រីបន្ថែមថា៖ «ទាក់ទងជាមួយនឹងរូបរាងក៏ដោយ សៀវភៅដែលខ្ញុំនិពន្ធ តួអង្គខ្ញុំអត់ស្អាត Perfect (ល្អឥតខ្ចោះ) ដូចបវរកញ្ញាទេ គឺមានល្អិត មានសក់ក្រញ៉ាញ់មានខ្មៅ មានស្អាត មានចម្រុះ ឱ្យអ្នកអានឃើញថា មនុស្សយើងអត់ដូចគ្នាទាំងអស់ទេ ហើយអត់មានអ្នកណាគេឥតខ្ចោះទេ ប៉ុន្តែអ្វីដែលគាត់មានគឺការតាំងចិត្ត និងការខិតខំប្រឹងប្រែងដើម្បីក្ដីស្រមៃខ្លួនឯង ហើយគោលបំណងខ្ញុំ ចង់ឃើញអ្នកអានពេលដែលគាត់បានអានស្នាដៃនឹងទៅ គាត់អត់បោះបង់ចោលក្ដីស្រមៃខ្លួនឯង»។

អ្នកស្រីថាវរីចំណាយពេលនិពន្ធសៀវភៅនីមួយៗមានចន្លោះរយៈពេល១ឆ្នាំ។ អំឡុងពេលនិពន្ធ អ្នកស្រីជួបផលលំបាកច្រើន ពិសេសសៀវភៅដំបូង ត្រូវចំណាយពេលយូរ កែសម្រួលសាច់រឿង បកប្រែជាភាសាបរទេស ឯបទពិសោធន៍ និងថវិការបោះពុម្ពផ្យាយក៏មានកម្រិត ពេលនោះមិនសូវមានកំណើនអ្នកអានផង។ ពេលខ្លះត្រូវរកកន្លែងស្ងាត់ ដូចជាតំបន់ភ្នំ ដើម្បីបំផុសគំនិតក្នុងការសរសេររឿង។ ទោះបីជួបឧបសគ្គយ៉ាងណា អ្នកស្រីដែលមិនគិតចង់បោះបង់ម្ដងណាឡើយ។

អ្នកស្រីប្រាប់ថា៖ «ពេលដែលខ្ញុំមានអារម្មណ៍ពិបាក ខ្ញុំត្រលប់ទៅមើលសារពីអ្នកអានដែលគាត់ផ្ញើមកថាសៀវភៅដែលគាត់បានអាន បានផ្លាស់ប្ដូរគាត់យ៉ាងម៉េចខ្លះ អ៊ីចឹងខ្ញុំផ្ដោតទៅលើចំណុចវិជ្ជមាននៃកិច្ចការរបស់ខ្ញុំ ធ្វើឱ្យខ្ញុំមានកម្លាំងបន្តទៅមុខទៀត ហើយមួយទៀតអ្នកនៅជុំវិញខ្លួនខ្ញុំគាត់គំាទ្រទាំងអស់»។

អ្នកស្រីថាវរី បានបញ្ចប់ការសិក្សាផ្នែកគ្រប់គ្រងព័ត៌មានវិទ្យា នៅសាធារណរដ្ឋឆែកក្នុងឆ្នាំ២០១២។ គ្រួសារជាផ្នែកមួយដ៏សំខាន់ក្នុងជីវិតអ្នកស្រី។ បើទោះបីជារវល់យ៉ាងណាក្ដី ក៏អ្នកស្រីផ្ដល់ពេលវេលាជាអាទិភាពចម្បងដល់គ្រួសារ។

បន្ទាប់ពីគ្រួសារ អ្នកអានជាផ្នែកមួយក្នុងការជំរុញលើកទឹកចិត្តអ្នកស្រីថាវរី ឱ្យបន្តអាជីពជាអ្នកនិពន្ធមកដល់សព្វថ្ងៃ។ ដោយមើលឃើញគុណតម្លៃការនិពន្ធសៀវភៅ រួមទាំងអ្នកអានមានការផ្លាស់គំនិតបែបវិជ្ជមាន។

អ្នកស្រីបន្ដថា៖ «ម្នាក់នោះ [អ្នកអាន] គាត់ធ្លាប់ផ្ញើសារមកខ្ញុំថាគាត់រកបញ្ចប់ជីវិតខ្លួនឯង ហើយតែស្រាប់ តែគាត់ចាប់សៀវភៅខ្ញុំអានធ្វើឱ្យគាត់ផ្លាស់ប្តូរគំនិត ហើយប្ដូរការគិត ចឹងទើបគាត់មិនស្លាប់ខ្លួន។ ពេលដែលខ្ញុំអាន ខ្ញុំសឹងតែស្រក់ទឹកភ្នែក។ ខ្ញុំគិតថាអ្វីដែលខ្ញុំបានសរសេរពិតជាបានផ្លាស់ប្ដូរជីវិតមនុស្សម្នាក់ អ៊ីចឹងការងារខ្ញុំធ្វើសព្វថ្ងៃគឺមានតម្លៃណាស់»។

សៀវភៅដែលធ្វើឱ្យអ្នកស្រីដិតជាប់ក្នុងចិត្ត គឺសៀវភៅកាពីទែនជីវិត រឿងបែបស្វ័យជីវប្រវត្តិ ដែលបានដាក់បញ្ចូលបទពិសោធន៍ជីវិតការតស៊ូរបស់អ្នកស្រី និងមនុស្សជុំវិញខ្លួនក្នុងសាច់រឿងនោះ។ សៀវភៅនេះបានឆ្លុះបញ្ចាំងពីការតស៊ូរបស់ក្មេងស្រីម្នាក់ដែលឪពុកមិនបានផ្ដល់តម្លៃក្នុងនាមជាកូនស្រី រងអំពើហិង្សាក្នុងគ្រួសារ ប្រែពីការឈឺចាប់ ប្រឹងប្រែងរហូតបានជោគជ័យ។ ហើយបច្ចុប្បន្ននេះ អ្នកស្រីកំពុងបន្តសរសេររឿងថ្ងៃថ្មីនៅតែមាន ភាគ៣។

អ្នកស្រីថាវរី លើកឡើងថា ដើម្បីក្លាយជាអ្នកនិពន្ធ ត្រូវអានសៀវភៅ ស្វែងយល់ពីសង្គមឱ្យបានច្រើន។ ចង់ក្លាយជាអ្នកនិពន្ធព្រោះស្រលាញ់ ចែករំលែក ចំណេះដឹង ទើបទទួលបានជោគជ័យ ។

អ្នកស្រីផ្ញើសារដល់អ្នកដែលចង់ក្លាយជាអ្នកនិពន្ធថា៖ «គាត់គួរតែហ៊ានចាប់ផ្ដើមសរសេរពីអត្ថបទ ឬក៏រឿងខ្លីទៅមុន ហើយព្យាយាមអានស្នាដៃអ្នកនិពន្ធផ្សេងទៀតឲ្យបានច្រើន រៀនពីរបៀបនៃអ្នកនិពន្ធផ្សេងទៀតតែងនិពន្ធ។ ប្រសិនបើគិតថាក្លាយជាអ្នកនិពន្ធនឹងក្លាយជាអ្នកមាន នោះក្ដីស្រមៃរបស់គាត់នឹងទៅមុខមិនបានឆ្ងាយឡើយ»៕

កម្រងរូបភាព៖ លោក សូ ម៉ុង ២០ឆ្នាំក្នុងមុខរបរជាអ្នកធាក់ស៊ីក្លូ

ឈួន ចាន់រស្មី (Chhoun Chanraksmey) — Thu, 16 May 2024 03:33:59 +0000

លោក សូ ម៉ុង អាយុ៦៧ឆ្នាំ ជាអ្នកធាក់ស៊ីក្លូនៅម្តុំផ្សារកណ្តាល និងសារមន្ទីរជាតិ តាំងពីឆ្នាំ២០០៤ រហូតបច្ចុប្បន្ន។ លោកមកពីស្រុកពារាំង ខេត្តព្រៃវែង។ ភ្ញៀវដែលជិះស៊ីក្លូរបស់លោកភាគច្រើនជាជនបរទេស។ ក្នុងមួយថ្ងៃលោករកចំណូលបានចន្លោះពី៦,០០០ ទៅ៤០,០០០រៀល ថ្ងៃខ្លះលោករកចំណូលមិនបានទាល់តែសោះក៏មាន។ នារដូវប្រាំងនេះលោករកចំណូលពុំបាន ពេលខ្លះលោកត្រូវយកលុយសន្សំមកចំណាយលើថ្លៃម្ហូប៣ពេល ចន្លោះពី១០,០០០ទៅ១៥,០០០រៀល។ នៅពេលដែលលោកមិនអាចរកចំណូលបាន សប្បុរសជនបានផ្តល់ជាម្ហូបអាហារ គ្រឿងបរិភោគ និងសម្ភារផ្សេងៗដល់លោក។

លោក សូ ម៉ុង នៅមុខភោជនីដ្ឋានមួយកន្លែងម្តុំមាត់ទន្លេ រាជធានីភ្នំពេញ ថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

លោក សូ ម៉ុង និងស៊ីក្លូចាំហៅភ្ញៀវនៅមុខភោជនីដ្ឋានមួយកន្លែងម្តុំមាត់ទន្លេ រាជធានីភ្នំពេញ ថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

លោក សូ ម៉ុងកំពុងកាន់ទប់ស៊ីក្លូ នាថ្ងៃទី២៩ ខែមេសាឆ្នាំ២០២៤។ (រូបភាព៖ ឈួន ចាន់រស្មី)

លោក សូ ម៉ុង កំពុងធាក់ស៊ីក្លូ នាថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

បាយ និងទឹកលោក សូ ម៉ុង ត្រៀមសម្រាប់អាហារពេលល្ងាច បានមកពីសប្បុរសជន នាថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

លោក សូ ម៉ុង កំពុងរៀបចំពិសារបាយពេលល្ងាច នាថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

បាយល្ងាចរបស់លោក សូ ម៉ុង បានមកពីសប្បុរសជន នាល្ងាចថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

លោក សូ ម៉ុង កំពុងពិសារបាយពេលល្ងាច នាថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

អំណាយជាថ្នាំពេទ្យ មុងភួយ របស់សប្បុរសជនផ្ដល់ជូនលោក សូ ម៉ុង នាថ្ងៃទី២៩ ខែមេសា ឆ្នាំ២០២៤។ (រូបភាព៖ ឈួន ចាន់រស្មី)

កម្រងរូបភាព៖ អាជីវករលក់ត្រីនៅផ្សារលើខេត្តកំពង់ឆ្នាំង

ឈួន ចាន់រស្មី (Chhoun Chanraksmey) — Thu, 25 Apr 2024 02:42:00 +0000

អ្នកស្រី សេត ម៉ារីយ៉ាន អាយុ៤៣ឆ្នាំ ជាអាជីវករលក់ត្រីនៅផ្សារលើ ខេត្តកំពង់ឆ្នាំង។ អ្នកស្រីប្រកបរបរនេះយូរឆ្នាំមកហើយ។ អ្នកស្រីត្រូវក្រោកពីម៉ោង២ ទៅ៣ទាបភ្លឺជារៀងរាល់ថ្ងៃដើម្បីទៅទិញត្រីនៅផែត្រីមាត់ទន្លេផ្សារក្រោម មកលក់នៅផ្សារលើ ចាប់ពីម៉ោង៥ព្រឹករហូតដល់ម៉ោង១២ថ្ងៃត្រង់។

អ្នកស្រី សេត ម៉ារីយ៉ាន កំពុងធ្វើត្រីលក់ជូនអតិថជន នាថ្ងៃទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

អតិថិជនកំពុងទិញត្រីរបស់អ្នកស្រី សេត ម៉ារីយ៉ាន នាម៉ោង៥:៣០នាទីព្រឹក នៅថ្ងៃទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

អតិថិជនកំពុងទិញត្រីរបស់អ្នកស្រី សេត ម៉ារីយ៉ានាម៉ោង៥:៣០នាទីព្រឹក នៅទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

អ្នកស្រី សេត ម៉ារីយ៉ានកំពុងធ្វើត្រីឱ្យអតិថិជននាម៉ោង៥:៣០នាទីព្រឹក នៅទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

អ្នកស្រី សេត ម៉ារីយ៉ាន ធ្វើត្រីលក់ជូនអតិថិជន នាម៉ោង៥:៣០នាទីព្រឹក នៅទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

ត្រីងៀត និងត្រីធ្វើរួចរបស់អ្នកស្រី សេត ម៉ារីយ៉ាន នាថ្ងៃទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

អ្នកស្រី សេត ម៉ារីយ៉ាន ទិញពីផែត្រីមាត់ទន្លេផ្សាក្រោមមកលក់ចន្លោះពី៧០ ទៅ៨០គីឡូក្រាម ក្នុងនោះ មានត្រីទន្លេត្រីចិញ្ចឹម និងត្រីបែ កាលពីថ្ងៃទី១៨ ខែមេសា ឆ្នាំ២០២៤។ (រូបភាព: ឈួន ចាន់រស្មី)

Voxpop៖ ទស្សនៈពលរដ្ឋលើការប្រើប្រាស់បណ្ដាញទំនាក់ទំនងសង្គមរបស់កុមារក្រោម១៨ឆ្នាំ

ឈួន ចាន់រស្មី (Chhoun Chanraksmey) — Wed, 20 Mar 2024 03:57:05 +0000

ការប្រើប្រាស់បណ្ដាញទំនាក់ទំនងសង្គមដូចជា Facebook,Tik Tok, Instagram, Whatsapp,Telegram និងកម្មវិធីជាច្រើនទៀត កំពុងមានការពេញនិយមចំពោះមនុស្សគ្រប់វ័យ ជាពិសេសកុមារក្រោយអាយុ១៨ឆ្នាំដែលកំពុងស្ថិតនៅក្នុងវ័យសិក្សា។ បណ្តាញទំនាក់ទំនងសង្គមត្រូវបានទទួលស្គាល់ថាមានទាំងចំណុចវិជ្ជមាន និងអវិជ្ជមាន ។

Newsroom Cambodia បានសម្ភាសន៍ពលរដ្ឋចំនួន៦នាក់ ជុំវិញការយល់ឃើញរបស់ពួកគេទាក់ទងនឹងការប្រើប្រាស់បណ្ដាញទំនាក់ទំនងសង្គមរបស់កុមារក្រោមអាយុ១៨ឆ្នាំ៖

លោក វឿន ទិវា អាយុ២៥ ជាទាហាន យល់ឃើញថា ការប្រើប្រាស់បណ្ដាញសង្គមរបស់កុមារក្រោមអាយុ១៨ឆ្នាំ ធ្វើឲ្យពួកគេយល់ដឹង តាមទាន់បច្ចេកវិទ្យាសម័យថ្មី ប៉ុន្តែអាចធ្វើឱ្យប៉ះពាល់ដល់ការសិក្សារបស់ពួកគេ។

លោកបន្តថា៖ «ចំពោះផលវិជ្ជមានពួកគាត់ អាចយល់ដឹងច្រើនពីសង្គមជាក់ស្ដែង។ ផលអវិជ្ជមានពួកគាត់ អាចញៀនរបស់អស់នឹង នៅពេលដែលគាត់ញៀនច្រើន លេងច្រើន អាចប៉ះពាល់ដល់ការសិក្សារបស់ពួកគាត់»។

លោក វឿន ទិវា អាយុ២៥ ជាទាហាន។ (រូបភាព៖ ឈួន ចាន់រស្មី)

លោក លីប សេងហួរ ជានិសិ្សតនៅសាកលវិទ្យាល័យវិទ្យាសាស្រ្តសុខាភិបាល លើកឡើងថា បច្ចុប្បន្ននេះកុមារមួយចំនួនប្រើជំនាញរបស់ពួកគេ បង្កើតជាជំនួញ (លក់អនឡាញ) ស្របពេលដែលកុមារមួយចំនួនទៀតបង្កើតមាតិកាមិនសមរម្យ ។

លោកបន្តថា៖ « គាត់អាចបង្កើតជា Page(ទំព័រលើបណ្តាញសង្គម)គាត់បង្កើតBusiness(ជំនួញ)ខ្លួនឯងក្មេងខ្លះគាត់ឆ្លាតគាត់ចំណាប់ខាងរកស៊ីប្រើពួកនឹងទៅល្អទម្រាំពួកគាត់ចូលសាកលទៀត ការវិវឌ្ឍន៍របស់ពួកគាត់កាន់តែល្អ»។

លោក លីប សេងហួរ និសិ្សតនៅសាកលវិទ្យាល័យវិទ្យាសាស្រ្តសុខាភិបាល។ (រូបភាព៖ ឈួន ចាន់រស្មិ)

លោកបន្ថែមថា៖ «ក្មេងខ្លះទៀតគាត់ប្រើក្រោមរូបភាពមិនត្រឹមត្រូវ ឬ Post (ផ្សព្វផ្សាយ) ប្រភេទរូបភាពមិនល្អធ្វើសកម្មភាពឆ្គាំឆ្គង វាមិនល្អដល់សង្គម […] មើលទៅមិនល្អសម្រាប់គាត់ នៅក្មេងថតរូបសិចស៊ីបង្ហាញលើ Social media(បណ្ដាញសង្គម)ដែលធ្វើឲ្យអាប់ឱនដល់មុខមាត់គាត់ ក៏ដូចជាប៉ាម៉ាក់គាត់»។

កញ្ញា ស៊ឹម ផាត់ទីយ៉ា ជាបុគ្គលិកសង្គមកិច្ច ក្នុងអង្គការមិនមែនរដ្ឋាភិបាល យល់ឃើញថា សព្វថ្ងៃនេះឪពុកម្ដាយមួយចំនួនធំមានលទ្ធភាពឲ្យកូនប្រើប្រាស់ទូរស័ព្ទទំនើប ធ្វើឲ្យកុមារងាយស្រួលក្នុងការប្រើបណ្ដាញទំនាក់ទំនងសង្គម ទង្វើទាំងនេះប្រៀបដូចអាវុធមុខពីរចំពោះកុមារស្ថិតក្នុងវ័យសិក្សា។

កញ្ញាបន្តថា៖ «ឧទាហរណ៍ពាក់ព័ន្ធជាមួយកម្មវិធី Tik Tok (ទិកតុក) មួយចុះ ជាកម្មវិធីដែលយើង Post (ផ្សព្វផ្សាយ) រូប ឬវីដេអូ ហើយវាទាក់ទងការ Post (ផ្សព្វផ្សាយ) វីដេអូរាំ អ្វីដែលអត់ល្អចំពោះក្មេង អ៊ីចឹងទៅនឹងធ្វើឲ្យប៉ះពាល់ការគិតរបស់ក្មេងហើយជះឥទ្ធិពលដល់ពួកគាត់ ឲ្យគាត់ធ្វើតាមរឿងអស់នឹងដែរ គាត់វក់លេងវាច្រើន លែងចង់រៀន ហើយរបៀបរៀបចំខ្លួនរបស់ពួកគាត់មើលទៅខុសពីក្មេងដទៃ»។

កញ្ញា ស៊ឹម ផាត់ទីយ៉ា ជាបុគ្គលិកសង្គមកិច្ច ក្នុងអង្គការមិនមែនរដ្ឋាភិបាល។ (រូបភាព៖ ផ្តល់ដោយ ស៊ឹម ផាត់ទីយ៉ា)

កញ្ញាបន្ថែមថា៖ «ទន្ទឹមនឹងនោះក៏មានផលវិជ្ជមានដែរ បើសិនជាក្មេងក្នុងវ័យនឹងគាត់អាចប្រើជាប្រយោជន៍មើល Youtube (យូធូប) មើលមេរៀន»។

កញ្ញា កែវ សុធា ជានិស្សិតនៅវិទ្យាស្ថានវ៉ាន់ដា បានលើកឡើងថាមានផលប៉ះពាល់ខ្លាំងប្រសិនបើកុមារធ្វើត្រាប់តាមមាតិកាមិនសមរម្យ ដែលផ្សព្វផ្សាយលើបណ្តាយសង្គម ស្របគ្នានេះធ្វើឲ្យកុមារស្គាល់ពីសង្គមខាងក្រៅកាន់តែច្បាស់។

កញ្ញាសំណូមពរថា៖ «អ្នកម្តាយ ឬលោកឪពុកគ្រប់រូប ពេលទំនេរនាំកូនដើរលេងកម្សាន្តកុំឲ្យគាត់ [កុមារ] លេងទូរសព្ទច្រើន»។

កញ្ញា កែវ សុធា ជានិស្សិតនៅវិទ្យាស្ថានវ៉ាន់ដា។ (រូបភាព៖ ឈួន ចាន់រស្មី)

កញ្ញា ប៉ិច សៀមលី ជាបុគ្គលិកធនាគារ យល់ឃើញថាកុមារចំណាយពេលលើបណ្តាញសង្គមច្រើនខ្លាំងពេកធ្វើឲ្យប៉ះពាល់ដល់ទំនាក់ទំនងរបស់កុមារជាមួយក្រុមគ្រួសារ។

កញ្ញាបន្តថា៖ «ផលប៉ះពាល់ទី១គឺជះឥទ្ធិពលខ្លាំងលើContent(មាតិកា)មិនសូវសរម្យធ្វើឲ្យគាត់យកគំរូតាម ទី២គឺប៉ះពាល់លើការសិក្សារបស់ពួកគាត់ព្រោះវ័យនឹង ជាវ័យដែលកំពុងក្រេបយកចំណេះវិជ្ជា»។

កញ្ញា ប៉ិច សៀមលី ជាបុគ្គលិកធនាគារ។ (រូបភាព៖ ឈួន ចាន់រស្មី)

កញ្ញាបន្ថែមថា៖ «ប្រសិនបើគាត់ប្រើលើផ្លូវត្រូវគឺគាត់ទទួលបានចំណេះដឹងច្រើន គាត់ទទួលបាន Video(វីដេអូ)ល្អគាត់យកគំរូតាម»។

លោក កែវ សំណាង ជានិស្សិតសាកលវិទ្យាល័យវេស្ទើន លើកឡើងថាមានផលល្អបើកុមារប្រើបណ្តាញទំនាក់ទំនងសង្គមជាប្រយោជន៍សម្រាប់ស្រាវជ្រាវឯកសារមេរៀន។

លោក កែវ សំណាង ជានិស្សិតសាកលវិទ្យាល័យវេស្ទើន។ (រូបភាព៖ ឈួន ចាន់រស្មី)

លោកបន្តថា៖ «គុណវិបត្តិធ្វើឲ្យកុមារមួយចំនួនវក់នឹងការប្រើបណ្តាញសង្គម មិនថាYoutube(យូធូប) ឬកម្មវិធីផ្សេងៗ»៕

Vox Pop: ទស្សនៈរបស់ពលរដ្ឋលើការប្រើប្រាស់បារីអេឡិចត្រូនិច ឬ e-cigarette

ឈួន ចាន់រស្មី (Chhoun Chanraksmey) — Tue, 05 Mar 2024 04:02:23 +0000

បច្ចុប្បន្ននេះទោះបីជាមានសេចក្ដីប្រកាសព័ត៌មានរបស់ក្រសួងសុខាភិបាលស្ដីពីផលប៉ះពាល់បណ្ដាលមកពីការប្រើប្រាស់បារីអេឡិចត្រូនិច ផលិតផលស៊ីហ្សា និងផលិតផល អេចឈ៍ ធី ភី យ៉ាងណាក្ដី យើងសង្កេតឃើញថានៅតែមានការប្រើប្រាស់ ជាពិសេសនៅក្នុងស្រទាប់យុវជនមួយចំនួន ដែលបារីអេឡិចត្រូនិចមានឈ្មោះជាច្រើនដូចជា E-cigs, Mods, Vape pens, Vapes ជាទូទៅគេហៅថា Vaping។ នេះបើតាមក្រសួងសុខាភិបាល។

Newsroom Cambodia បានសម្ភាសន៍ប្រជាពលរដ្ឋចំនួន៧នាក់ដែលរស់នៅក្នុងរាជធានីភ្នំពេញ ជុំវិញការយល់ឃើញចំពោះការប្រើប្រាស់បារីអេឡិចត្រូនិច៖

លោក លីណា ជាអ្នកបកប្រែភាសាចិនយល់ថា ការប្រើប្រាស់បារីអេឡិចត្រូនិចធ្វើឱ្យខូចសុខភាព ធ្វើឲ្យអ្នកប្រើប្រាស់ប្រឈមមុខជាមួយជំងឺផ្សេងៗ និងអាចប៉ះពាល់ដល់សេដ្ឋកិច្ចគ្រួសាររបស់ពួកគេ។

លោកបន្ថែមថា៖ «នេះបើតាមការយល់ដឹងរបស់ខ្ញុំ វាធ្វើឲ្យប៉ះពាល់ដល់សួត ក៏ដូចជាប៉ះពាល់ដល់ខួរក្បាល ឬក៏ធ្មេញ បាត់បង់ការចងចាំជាដើម» ។

លោក លីណា ជាអ្នកបកប្រែភាសាចិន (រូបភាព៖ ឃីម សុគន្ធី)

ចំណែកកញ្ញា លក្ខិណា អាយុ១៨ឆ្នាំ ជានិស្សិតនៅពុទ្ធិកសាកលវិទ្យាល័យព្រះសីហនុរាជ បានលើកឡើងថា កញ្ញាសង្កេតឃើញមាន ការប្រើប្រាស់បារីអេឡិចត្រូនិចច្រើនក្នុងពេលបច្ចុប្បន្ននេះ ដែលផ្ដល់ផលប៉ះពាល់យ៉ាងខ្លាំងដល់សុខភាព។

កញ្ញាបានលើកឡើងថា៖ «ឥឡូវនៅក្នុងសង្គមយើងសព្វថ្ងៃនាពេលបច្ចុប្បន្ននឹងគឺ យុវជនភាគច្រើនប្រើនូវបារីអេឡិចត្រូនិច ខ្ញុំគិតថាវាអត់ផ្ដល់ផលប្រយោជន៍អីដល់យើងទេ ពីព្រោះវាជាគ្រឿងដែលមានសារធាតុគីមីច្រើននៅក្នុងហ្នឹង ហើយវាផ្ដល់ផលប៉ះពាល់ដល់សុខភាពយើងច្រើន»។

កញ្ញា លក្ខិណា ជានិស្សិតនៅពុទ្ធិកសាកលវិទ្យាល័យព្រះសីហនុរាជ។ (រូបភាព៖ ឈួន ចាន់រស្មី)

អ្នកស្រី រដ្ឋា មានអាយុ៣០ឆ្នាំ មុខរបរជាអ្នកលក់ទឹកអំពៅ និយាយថា គាត់ឃើញមានការផ្សព្វផ្សាយពីផលប៉ះពាល់របស់បារីអេឡិចត្រូនិច ប៉ុន្តែនៅតែមានអ្នកបន្តប្រើប្រាស់ ហើយភាគច្រើនគាត់ប្រើប្រាស់តាមគ្នា។

អ្នកស្រីបន្ថែមទៀតថា៖ «បងចង់ផ្ដាំទៅក្មេងៗដែលគាត់ជក់គ្រឿងអស់ហ្នឹង បើគាត់ផ្អាកបានគាត់ផ្អាកទៅ វាអត់ល្អដល់សុខភាពយើងទេ វាប៉ះពាល់សុខភាព។ បងសូមផ្ដាំទៅក្មេងៗទាំងអស់សូមកុំឱ្យគាត់ជក់អាហ្នឹងទៀត»។

អ្នកស្រី រដ្ឋា អ្នកលក់ទឹកអំពៅ។ (រូបភាព៖ ឈួន ចាន់រស្មី)

អ្នកស្រី កៅ មុំ អាយុ៥៦ ពលរដ្ឋរស់នៅរាជធានីភ្នំពេញបានលើកឡើងថា ការប្រើប្រាស់បារីអេឡិចត្រូនិចធ្វើឱ្យប៉ះពាល់ដល់ខួរក្បាល និងសង្គមជាតិ។

អ្នកស្រីសំណូមពរបន្ថែមថា៖ «ខ្ញុំសូមសំណូមពរដល់កូនក្មួយ សូមកុំឲ្យប្រើបារីអេឡិចត្រូនិច សូម្បីតែបារីក៏ដោយក៏កុំឱ្យប្រើ ព្រោះរបស់ទាំងអស់ហ្នឹងវាមានជាតិពុលច្រើនណាស់ រាប់រយរាប់ពាន់ វាមិនមែនតិចតួចទេ វាខូចសុខភាព ត្រូវចេះស្រលាញ់សុខភាព កុំនាំគ្នាប្រើ សូមកំចាត់របស់អញ្ចឹងៗចោលទៅសូមកុំយកចិត្តទុកដាក់ជាមួយរបស់អ៊ីចឹង»។

អ្នកស្រី កៅ មុំ ពលរដ្ឋរស់នៅរាជធានីភ្នំពេញ។ (រូបភាព៖ ឃីម សុគន្ធី)

កញ្ញា ថុល ធីតាមុនី មុខរបរ ជានិស្សិតនៅសាកលវិទ្យាល័យភូមិន្ទភ្នំពេញ ជំនាញទំនាក់ទំនងអន្តរជាតិ រស់នៅរាជធានីភ្នំពេញយល់ឃើញថា បារីអេឡិចត្រូនិចដោយប៉ះពាល់ពេលវេលានៃការសិក្សារៀនសូត្រ និងពេលវេលាជាមួយគ្រួសារ។

កញ្ញាបន្ថែមថា៖ «បារីអេឡិចត្រូនិចវាបានប៉ះពាល់ដល់គ្រួសារគាត់ និងការចំណាយថវិការគ្រួសារយកទៅទិញមកប្រើប្រាស់»។

កញ្ញាបន្តទៀតថា៖ «ចំពោះសង្គមធ្វើឱ្យគ្មានសណ្ដាប់ធ្នាប់សង្គម ដូចជាការប្រើប្រាស់បារីអេឡិចត្រូនិចនៅតាមទីសាធារណៈធ្វើឱ្យសង្គមមិនសូវល្អ»។

កញ្ញា ថុល ធីតាមុនី និស្សិតនៅសាកលវិទ្យាល័យភូមិន្ទភ្នំពេញ។

លោក កោ ពិសិដ្ឋ ជានិស្សិតច្បាប់រស់នៅខណ្ឌសែនសុខ រាជធានីភ្នំពេញយល់ថា ចំពោះការប្រើប្រាស់បារីអេឡិចត្រូនិច ដែលគេហៅថាវេប ឬយ៉ូស គឺមានផលប៉ះពាល់យ៉ាងខ្លាំងទៅដល់មនុស្សយើង ដោយបារីប្រភេទនេះមានផលប៉ះពាល់ធ្ងន់ធ្ងរជាងបារីទូទៅ។

លោកបន្តថា៖ «អ្វីដែលខ្ញុំបានឃើញការប្រើប្រាស់បារីអេឡិចត្រូនិច មានផលប៉ះពាល់ខ្លាំង ប្រសិនបើគាត់ប្រើច្រើនធ្វើឱ្យប៉ះពាល់ដល់សួត វាក៏ជារឿងមួយដែលមិនល្អ មិនគួរយុវជនប្រើប្រាស់ឡើយ ព្រោះថាវាមានកម្រិតញៀនខ្លាំងជាងបារីទៅទៀត។ ជាតិទឹកដែលគេដាក់ចូលហ្នឹងមិនដឹងជាសារធាតុអ្វីឡើយ ដោយទឹកនោះមានក្លិនក្រអូប ប៉ុន្តែវាជាសារធាតុគីមីខ្លាំងជាងបារីទៅទៀត»។

លោកបន្តទៀតថា៖ «ទីមួយ ធ្វើឱ្យគាត់ខាតបង់ពេលវេលារៀនសូត្រ ទីពីរ ការផ្លាស់អត្តចរិក និងធ្លាក់ចុះនូវសីលធម៌នៅក្នុងការរស់នៅអាចក្លាយទៅជាក្មេងមិនល្អ និងទី៣ អាចឱ្យគាត់ហ៊ានប្រើប្រាស់អ្វីផ្សេង ដូចជាសារធាតុញៀន ឬគ្រឿងញៀនជាដើម និងអាចឱ្យពួកគាត់ដើរលើផ្លូវខុសផ្សេងៗ»។

លោក កោ ពិសិដ្ឋ និស្សិតច្បាប់។

លោក សៀវវ័ន្ត បច្ចុប្បន្នរស់នៅភូមិព្រែកឡុង ក្រុងតាខ្មៅ យល់ឃើញចំពោះការប្រើប្រាស់បារីអេឡិចត្រូនិចធ្វើឱ្យប៉ះពាល់សុខភាពខ្លាំង។

លោកបន្តថា៖ «ប្រសិនបើយុវជនចង់ប្រើប្រាស់បារីអេឡិចត្រូនិច កុំអី វាមិនល្អ វាធ្វើឱ្យញៀន ប៉ះពាល់ដល់សុខភាព សួត ថ្លើម ណាមួយនៅពេលយើងលេងកីឡាឆាប់ហត់ ដង្ហក់ និងស្រេកទឹកខ្លាំង។ សូមផ្ដាំទៅយុវជនជំនាន់ក្រោយកុំប្រើប្រាស់បារីអេឡិចត្រូនិច វាមិនល្អដល់សុខភាព និងសង្គមឡើយ»។

លោក សៀវវ័ន្ត ពលរដ្ឋរស់នៅភូមិព្រែកឡុង ក្រុងតាខ្មៅ។

គួរបញ្ជាក់ថា បារីអេឡិចត្រូនិចបារីបង្កផលប៉ះពាល់លើសុខភាព ធ្វើឱ្យញៀនខ្លាំង មានគ្រោះថ្នាក់ដល់គភ៌ ការលូតលាស់ខួរក្បាល ប្រឈមមុខនឹងជំងឺមហារីកសួត ការលូតលាស់ ខួរក្បាល ធ្វើឱ្យថយចុះនៃការផ្ចង់អារម្មណ៍លើការរៀនសូត្រ ការគ្រប់គ្រងកំហឹង ការប្រែប្រួលផ្លូវចិត្ត ភាពមួរម៉ៅ រសាប់រសល់ ថប់បារម្ភ ឬអស់សង្ឃឹម វិបត្តិនៃការគេង និងសន្ទុះចិត្តចង់ប្រើបារីអេឡិចត្រូនិច។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល៕

រដ្ឋាភិបាលចេញបទបញ្ជាឱ្យមានការបណ្តេញចេញរាល់មន្រ្តីស្ថាប័នរដ្ឋដែលពាក់ព័ន្ធនឹងគ្រឿងញៀនខុសច្បាប់

ឈួន ចាន់រស្មី (Chhoun Chanraksmey) — Wed, 21 Feb 2024 02:42:32 +0000

រាជរដ្ឋាភិបាលដាក់ចេញបទបញ្ជាឱ្យបង្កើនការត្រួតពិនិត្យជាប្រចាំ និងបណ្តេញចេញពីក្របខណ្ឌដោយគ្មានការលើកលែងចំពោះមន្រ្តីរាជការ មន្រ្តីនគរបាលជាតិ យោធិន និងមន្រ្តីជាប់កិច្ចសន្យាគ្រប់ស្ថាប័នរដ្ឋដែលត្រូវបានរកឃើញថាមានការប្រើប្រាស់ ឬពាក់ព័ន្ធនឹងគ្រឿងញៀនខុសច្បាប់។

យោងតាមបទបញ្ជាស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ ចេញកាលពីថ្ងៃទី២០ ខែកុម្ភៈ ឆ្នាំ២០២៤ បញ្ជាក់ថា គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវបង្កើនការត្រួតពិនិត្យជាប្រចាំចំពោះមន្ត្រី រាជការស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យាដែលស្ថិតក្រោមឱវាទរបស់ខ្លួន លើការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់។

បទបញ្ជាដដែលបន្ថែមថា៖ «គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវចាត់វិធានការបញ្ចប់មុខតំណែង និងបណ្តេញចេញពីក្របខ័ណ្ឌដោយគ្មានការលើកលែង ចំពោះមន្ត្រីរាជការស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យាណាដែលត្រូវបានរកឃើញថាមានការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់»។

បទបញ្ជាដដែលបន្ថែមថា ការអនុវត្តទណ្ឌកម្មខាងវិន័យនេះ ពុំរារាំងដល់ការអនុវត្តទណ្ឌកម្មព្រហ្មទណ្ឌដោយអនុលោមតាមច្បាប់ និងបទប្បញ្ញត្តិជាធរមានឡើយ។

បទបញ្ជាដដែលបន្ថែមថា បទបញ្ជានេះដាក់ចេញដើម្បីចូលរួមចំណែកធានាប្រសិទ្ធភាពនៃការអនុវត្តយុទ្ធនាការប្រឆាំងគ្រឿងញៀនខុសច្បាប់ លើកទី៩ និងដើម្បីលើកកម្ពស់ជំនឿទុកចិត្តប្រសិទ្ធភាពការងារ និងអភិបាលកិច្ចល្អនៅក្នុងស្ថាប័នរដ្ឋ ទាំងថ្នាក់ជាតិ ទាំងថ្នាក់ក្រោមជាតិ៕