ឌុច ស្រី ផានីន (Duch Sreyphanin) – Newsroom Cambodia

បទយកការណ៍៖ ប្រជាជន៧គ្រួសារនៅដងទន្លេសាបក្បែរស្ពានជ្រោយចង្វារទាមទារសំណងបន្ថែមជាថ្នូរនឹងការរុះរើ

ឌុច ស្រី ផានីន (Duch Sreyphanin) — Sun, 04 Feb 2024 11:02:01 +0000

កំពុងតម្រេតខ្លួនសម្រាកលើអង្រឹងក្នុងផ្ទះឈើលើថ្មក្រោមនៅក្បែរស្ពានជ្រោយចង្វារ លោកឈឿន ប៊ុនឆាន ដែលមានអាយុ៦៧ឆ្នាំ គឺជាប្រជាពលរដ្ឋម្នាក់ក្នុងចំណោម៧គ្រួសារ ដែលកំពុងទាមទារឱ្យមានការផ្តល់សំណងបន្ថែមពីការបណ្តេញចេញ បន្ទាប់ពីគ្រួសារនៅតំបន់នោះប្រមាណជាជាង៣០០ បានទទួលយកសំណង និងរុះរើចេញ។

លោក ប៊ុន ឆាត គឺជាអតីតយុទ្ធជនដែលត្រូវពិការជើងដោយសារជំងឺគ្រុនចាញ់ផងនោះ ប្រាប់ Newsroom Cambodia ថា លោកនឹងមិនរុះរើផ្ទះចេញនោះទេ ប្រសិនបើអាជ្ញាធរមិនផ្ដល់ដី២ឡូតិ៍ និងលុយ២ ទៅ៣ពាន់ដុល្លាតាមសំណើ។

លោកនិយាយថា៖ «បើថាបាន២ឡូត៍ៗទៅចុះឱ្យបាន២ឡូតិ៍អរងាប់ហើយឱ្យឯងតែ១ឡូតិ៍ទៀតហ្នឹងបញ្ហាលំបាកគឺវាអញ្ចឹង។ហើយបើមិនឱ្យខ្ញុំ២ ៣ឡូតិ៍ ខ្ញុំមិនទៅណាទេ ខ្ញុំនៅហ្នឹង ដេកហ្នឹង ដេកអង្រឹងនៅហ្នឹង មិនទៅណាទេ។ មានដីប៉ុណ្ណាណី គ្រាន់សុំ២ឡូតិ៍ ៣ឡូតិ៍មិនឱ្យដែរ ហើយខ្ញុំ១២នាក់។ ហើយឱ្យខ្ញុំ១ឡូតិ៍ម៉ែត្រឱ្យទៅនៅម៉េច? មិន១២នាក់ វាលើសហ្នឹងទៀត វាគិតឱ្យល្អិតទៅវាលើស កូនប្រសារ៣ កូនបង្កើត៥ ចៅ៣»។

លោក ឈឿន ប៊ុនឆាន

កាលពីខែកញ្ញា ឆ្នាំ២០២២ លោកនាយករដ្ឋមន្រ្តី ហ៊ុន សែន បានចុះហត្ថលេខាលើអនុក្រឹត្យសម្រេចផ្ដល់ដីទំហំ១២,៩៨ហិកតានៅតាមបណ្ដោយមាត់ទន្លេ ស្ថិតក្នុងភូមិផ្សារតូច សង្កាត់ទួលសង្កែ១ និងសង្កាត់ឫស្សីកែវ ទៅឱ្យក្រុមហ៊ុនឯកជនមួយឈ្មោះថា អ៊ែតវ៉ានស៍ ត្រាស់ (ខេមបូឌា) ឯ.ក (Advanced Trust (Cambodia) Co., Ltd)។

ប្រជាជនសេសសល់៧គ្រួសារនៅដងទន្លេសាបក្នុងខណ្ឌឫស្សីកែវ ក្បែរស្ពានជ្រោយចង្វារក្នុងនោះគ្រួសារលោកឈឿន ប៊ុនឆាន ផងដែរនោះ កំពុងទាមទារសំណងបន្ថែមជាថ្នូរនឹងការរុះរើចេញទៅកន្លែងថ្មី បន្ទាប់ពីអាជ្ញាធរអះអាងថា ប្រជាជនប្រមាណជាង៣០០គ្រួសារផ្សេងទៀតបានចាកចេញទៅនៅភូមិសំរោង ខណ្ឌព្រែកព្នៅតាមការរៀបចំរបស់អាជ្ញាធរ។

លោក ឈឿន ប៊ុនឆាត បន្តថា បញ្ហាដែលលោកបារម្ភជាងគេរាល់ថ្ងៃ គឺការដេញចេញឱ្យរុះរើផ្ទះទៅនៅតាំងទីលំនៅថ្មី និងការផ្តល់សំណងមិនសមស្របទៅតាមការស្នើសុំរបស់លោក។

លោករៀបរាប់ទាំងទឹកមុខមាំ និងសំឡេងខ្លាំងៗថា៖ «បើនិយាយពីការលំបាក លំបាកពេកហើយ ច្រើនពេកហើយ។ បញ្ហាគិតធំជាងគេ គឺអារឿងរុះរើផ្ទះហ្នឹងតែម្តង ដេញផ្ទះហ្នឹងតែម្តង។ មិនដឹងចេញពីហ្នឹង ទៅនៅហ្នឹង ដីណា អីណី គេឱ្យកន្លែងណា? ដីប៉ុណ្ណា? លុយប៉ុន្មាន? អាហ្នឹងលំបាកជាងគេបញ្ហាលំបាក។ ថាគេឱ្យប៉ុន្មានម៉ែត្រ? ប៉ុន្មានម៉ែត្រ? ប៉ុន្មានលុយអ៊ីចឹងទៅ យើងដឹងស្រួល ដល់មិនដឹងមិនប្រាប់ផង មិនដឹងជាម៉េច»។

ផ្ទះរបស់លោក ឈឿន ប៊ុនឆាន

ស្រដៀងនឹងគ្រួសាររបស់លោក ឈឿន ប៊ុនឆាន ដែរ អ្នកស្រី ជា វណ្ណា ពលរដ្ឋនៃគ្រួសារមួយក្នុងចំណោមគ្រួសារទាំង៧ដែលមិនព្រមរើចេញ ក៏បានស្នើទៅអាជ្ញាធរសុំសំណងបន្ថែម ឬដីនៅវត្តទួលដែលនៅជិត ឬដី៥ឡូតិ៍នៅព្រែកព្នៅ ប៉ុន្តែមិនទាន់មានដំណោះស្រាយ។

អ្នកស្រី វណ្ណា និយាយដោយទឹកភ្នែករលីងរលោង និងអួលដើមកថា៖ «មុនដំបូងខ្ញុំសុំគាត់ជាថរិកា៨ម៉ឺនផ្ទះរបស់ខ្ញុំ គាត់ថាអត់ឱ្យគាត់ថាអត់មាន។ ខ្ញុំស្នើសុំគាត់ ទី១ស្នើសុំលុយ ទី២សុំយកដីវត្តទួល ទី៣បើគាត់ឱ្យខ្ញុំនៅសំរោងខ្ញុំសុំយក៥ឡូតិ៍ខ្ញុំនិយាយចឹង។ តែទី១ក៏អត់បាន ទី២ក៏អត់បាន មានតែទី៣ ទី៣គាត់ឱ្យខ្ញុំតែ២ឡូតិ៍ម៉េចកើត យើងឃើញផ្ទះស្រាប់ហើយ ផ្ទះប៉ុន្មាន? គាត់ឱ្យខ្ញុំ២ឡូតិ៍ ខ្ញុំទទួលយកមិនបានទេ។ ខ្ញុំមិនមែនប្រឆាំង ឬក៏អត់មានបញ្ហាអី គ្រាន់តែខ្ញុំសុំសំណូមពរឱ្យគាត់ដោះស្រាយតាមសំណើរបស់ខ្ញុំទៅ ខ្ញុំគ្រាន់ថាប៉ុណ្ណឹង»។

ស្ត្រីមេផ្ទះវ័យជាង៧០ឆ្នាំរូបនេះបន្ថែមថា អ្នកស្រីបារម្ភថានៅទីតាំងថ្មីក្នុងភូមិសំរោងពិបាករស់នៅដោយសារគ្មានអគ្គិសនី និងហេដ្ឋារចនាសម្ព័ន្ធគ្រប់គ្រាន់។

អ្នកស្រីនិយាយថា៖ «កាលពួកហ្នឹង [ពលរដ្ឋដែលបានរើចេញ] មិនទាន់ទៅច្រើន ប៉ុន្មានគ្រួសារមុនគាត់និយាយថាទៅៗ គេសង់ផ្ទះឱ្យនៅដល់ពេលយកគ្នាទៅ សង់ជាផ្ទះដូចថាបិទស័ង្កសីជុំវិញអ៊ីចឹងទៅដំបូលបំាងស័ង្កសី ភ្លើងមិនទាន់ទឹកមិនទាន់មានពេលនុងមុនដំបូង»។

អ្នកស្រីអះអាងថា អាជ្ញាធរដេញប្រជាជនដែលជាម្ចាស់ផ្ទះដោយមិនគោរពសិទ្ធិរបស់ពួកគាត់ និងដោយប្រើអំពើហិង្សា។

អ្នកស្រីលើកឡើងដោយសំឡេងខ្លាំងៗថា៖ «គេចាប់ផ្តើមដេញ២ទៅ៣ឆ្នាំគេគ្រាន់តែដេញមិនទាន់ឱ្យរុះរើខ្លាំងទើបឆ្នាំទៅដើមឆ្នាំពេលមុនបោះឆ្នោតហ្នឹងគេសន្ទុះខ្លាំង គេដេញយើងតាំងខែ៣ខែ៤។ មានបាតុកម្មខែ៣ខែ៤ ចុះមកដល់ទាញគ្នាទម្លាក់ចុះគ្នាដេកអត់ដឹងអីទៅទាញទម្លាក់ផ្ទះគេប៉ាតណាប៉ាតណីឡើងផ្អើលគេ កាសែតចុះមកថតពេញទឹកពេញដី»។

ចំណែកអ្នកស្រី នី ជាប្រជាពលរដ្ឋម្នាក់ទៀតដែលប្រកបរបរលក់ដូរមុខផ្ទះបាននិយាយថា អ្នកស្រីមករស់នៅទីនេះបានជិត២០ឆ្នាំហើយ ខណៈស្វាមីរបស់អ្នកស្រីរស់នៅបាន៤០ឆ្នាំមកហើយ។ អ្នកស្រីថា អ្នកស្រីបានស្នើសុំទៅខណ្ឌសុំទំហំដីហ្នឹង១ឡូតិ៍ដែលនៅតំបន់ជិតនោះ ដោយសារមិនអាចទៅនៅឆ្ងាយបាន។

អ្នកស្រីនិយាយថា៖ «បើដូរពីផ្ទះខ្ញុំទៅកន្លែងឆ្ងាយខ្ញុំអត់ទៅទេ។ ព្រោះដោយសារទី១ កូនខ្ញុំរៀន កូនខ្ញុំ៣នាក់រៀនចិន។ ចិនគឺអត់អាចទៅដល់ហ្នឹងគឺអត់មានទេ អ៊ីចឹងពិបាកក្នុងការធ្វើដំណើរ ទី២ខ្ញុំអត់មានមធ្យោបាយធ្វើដំណើរដូចគេខ្ញុំមានតែម៉ូតូអាកញ្ចាស់មួយធាក់៣ជើងមិនទាន់ឆេះផង»។

អ្នកស្រីនិយាយបន្ថែមទាំងកំពុងលក់ដូរបណ្តើរថា មូលហេតុផ្សេងទៀតដែលគ្រួសារអ្នកស្រីមិនព្រមរុះរើទៅកន្លែងថ្មី គឺដោយសារតែឳពុកម្ដាយរបស់អ្នកស្រីមានវ័យចំណាស់មិនអាចទៅនៅឆ្ងាយបានទេណាមួយអ្នកស្រីបារម្ភពីមុខរបរនៅកន្លែងថ្មីផង។

អ្នកស្រីលើកឡើងថា៖ «ពេលដែលយើងចេញទៅវាអត់មានមុខរបរ ទៅហ្នឹងអត់មានដឹងរកស៊ីអីបានទេ នៅនេះទៅគ្រាន់មានមុខរបរខ្លះអ៊ីចឹង លក់ដូរបានអ៊ីចឹងណា‍‍»។

លោក ស៊ឹង សែនករុណា អ្នកនាំពាក្យសមាគមអាដហុកអំពាវនាវឱ្យស្ថាប័នពាក់ព័ន្ធអាជ្ញាធរយកចិត្តទុកដាក់ទៅលើគ្រួសារដែលសេសសល់ដោយពិចារណាលើការទាមទាររបស់ពួកគេ។

លោកលើកឡើងថា៖ «យើងទទូចឱ្យមានការពិនិត្យមើលឡើងវិញថាតើហេតុផលនៃការទាមទាររបស់ពួកគាត់ដែលគាត់ចង់បានហ្នឹងតើអាចសម្របសម្រួលគ្នា និងរកដំណោះស្រាយជូនពួកគាត់បានឬយ៉ាងណា អ៊ីចឹងយើងទទួចឱ្យមានការដោះស្រាយជូនពួកគាត់ឱ្យបានឆាប់រហ័ស ជាជាងចេះតែអូសបន្លាយពេលវេលា»។

លោក ប្រាជ្ញ សីហា អភិបាលរងខណ្ឌឫស្សីកែវបានបដិសេធការអធិប្បាយលំអិតដោយលោកបានប្រាប់ដោយខ្លីថា លោកកំពុងដោះស្រាយបញ្ហាដីជូនពលរដ្ឋ។

លោកលើកឡើងថា៖ «បញ្ហាហ្នឹងយើងកំពុងតែបន្តដោះស្រាយជាមួយបងប្អូនប្រជាពលរដ្ឋហើយយើងសង្ឃឹមថាគាត់នឹងឯកភាពជាមួយគោលការណ៍ដោះស្រាយរបស់យើង»។

ងាកមកលោក ឈឿន ប៊ុនឆាន ដែលកំពុងអង្គុយលើអង្រឹងក្នុងផ្ទះនិយាយថា លោកនឹងមិន ចាកចេញទៅនៅកន្លែងថ្មីនោះទេ ប្រសិនបើខាងអាជ្ញាធរខណ្ឌឬស្សីកែវមិនផ្តល់សំណងសមរម្យដល់ក្រុមគ្រួសាររបស់លោកទៅតាមអ្វីដែលបានស្នើសុំ។

លោកនិយាយថា៖ «ខ្ញុំគ្រាន់តែថាបើគេដេញខ្ញុំមិនប្រកែកទេគេទៅហើយ ប៉ុន្តែថាដោះស្រាយឱ្យសមរម្យបើខ្ញុំទារប៉ុណ្ណឹងគិតគូរគ្នាទៅពិភាក្សាគ្នាឱ្យតាប៉ុណ្ណឹងទៅខ្ញុំមិនទាមទារហួសហេតុពេកណា»៕

ក្រសួងការងាររៀបចំវេទិកាការងារ និងឱកាសកម្មសិក្សាជាង៥០០កន្លែងនៅថ្ងៃទី៣០ ខែវិច្ឆិកា

ឌុច ស្រី ផានីន (Duch Sreyphanin) — Wed, 10 Jan 2024 08:01:08 +0000

ក្រសួងការងាររៀបចំវេទិកាការងារ និងឱកាសកម្មសិក្សា នៅអាគារទីភ្នាក់ងារជាតិមុខរបរ និងការងារក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣០ ខែវិច្ឆិកា ឆ្នាំ២០២៣ ដោយមានការងារជាង៥០០កន្លែង។

យោងតាមហ្វេកប៊ុកផេករបស់ក្រសួងការងារ និងបណ្តុះបណ្តាលវិជ្ជាជីវៈ ចុះផ្សាយថ្ងៃទី២៩ខែវិច្ឆិកា ឆ្នាំ២០២៣ បានបញ្ជាក់ថា វេទិកាការងារ និងឱកាសកម្មសិក្សារបស់ NEA នឹងប្រារព្ធឡើងថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០២៣ ចាប់ពីម៉ោង ៨ ព្រឹក ដល់ម៉ោង៥ល្ងាចរៀបចំឡើងដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជាវិស័យការងារ និងបណ្តុះបណ្តាលវិជ្ជាជីវៈ។ ក្នុងវេទិកាការងារនិងឱកាសកម្មសិក្សានេះ នឹងមានក្រុមហ៊ុនចំនួន៧ ដើម្បីផ្តល់ឱកាសការងារបន្ថែម។

ក្រសួងការងារបានបន្ថែមថា៖ «ស្អែកនេះក្រុមហ៊ុនធំៗ៧នឹងផ្តល់ឱកាសការងារថ្មីបន្ថែមទៀតជាង៥០០កន្លែង ក្នុងវេទិកាការងាររបស់ NEA! ដាក់ពាក្យភ្លាម សម្ភាសភ្លាម!។ ក្រុមហ៊ុនទាំង៧ដែលនឹងចូលរួមក្នុងវេទិកាការងារនាថ្ងៃស្អែកនេះរួមមាន៖ ក្រុមហ៊ុន JACCS, ក្រុមហ៊ុន DevelocusInvestment, ផ្សារទំនើប ម៉ាក្រូ, ធនាគារស្ថាបនា, ធនាគារឯកទេស AEON, Sokimexនិងពន្លឺអលង្កការ»។

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ក្នុងវេទិការនេះនឹងចូលរួមផ្តល់ឱកាសការងារថ្មីបន្ថែមទៀតដល់យុវជន សិស្ស/និស្សិត និងអ្នកកំពុងស្វែងរកការងារធ្វើ នាថ្ងៃព្រហស្បតិ៍ទី៣០ ខែវិច្ឆិកា។

ក្រសួងបញ្ជាក់ថា៖ «ចំពោះសិស្ស/និស្សិតនិងអ្នកកំពុងតែស្វែងរកការងារធ្វើ ឬចង់ផ្លាស់ប្តូរការងារអាចយកប្រវត្តិរូបសង្ខេប(CV) ដើម្បីចូលរួមដាក់ពាក្យនិងសម្ភាសផ្ទាល់ជាមួយតំណាងក្រុមហ៊ុនទាំងនោះបាន ចាប់ពីម៉ោង ៨ ព្រឹក ដល់ម៉ោង ៥ ល្ងាច នៅក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ»៕

ក្រសួងអប់រំកំណត់យកថ្ងៃទី៦ វិច្ឆិកា ដើម្បីប្រឡងសញ្ញាបត្រមធ្យមសិក្សាទុតិយភូមិ

ឌុច ស្រី ផានីន (Duch Sreyphanin) — Wed, 10 Jan 2024 07:55:34 +0000

ក្រសួងអប់រំ យុវជន និងកីឡា ប្រកាសកំណត់យកថ្ងៃទី៦ ខែវិច្ឆិកា ឆ្នាំ២០២៣ ជាថ្ងៃប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៣។

យោងក្នុងសេចក្តីប្រកាសព័ត៌មានរបស់ក្រសួងអប់រំ យុវជន និងកីឡាចេញនៅថ្ងៃទី២៧ ខែតុលា ឆ្នាំ២០២៣ បានបញ្ជាក់ថា ការរៀបចំប្រឡងសញ្ញាបត្រមធ្យមសិក្សាទុតិយភូមិនាសម័យប្រឡងថ្ងៃទី០៦ ខែវិច្ឆិកា ឆ្នាំ២០២៣ ដោយមានការរៀបចំផែនការនិងកាលបរិច្ឆេទសំខាន់ៗផ្សេងៗពីគ្នា។

សេចក្តីប្រកាសព័ត៌មានដដែលបន្ថែមថា៖ «ដំណើរការសំណេរ ប្រព្រឹត្តទៅរយៈពេល២ថ្ងៃ គឺថ្ងៃទី០៦ និងថ្ងៃទី០៧ ខែវិច្ឆិកា ឆ្នាំ២០២៣ ដំណើរការកំណែប្រព្រឹត្តទៅចាប់ពីថ្ងៃទី០៩ ខែវិច្ឆិកា ឆ្នាំ២០២៣ ដល់ថ្ងៃទី១៥ ខែវិច្ឆិកា ឆ្នាំ២០២៣ ដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ចាប់ពីថ្ងៃទី១៦ ដល់ថ្ងៃទី២៦ ខែវិច្ឆិកា ឆ្នាំ២០២៣ ក្រសួងកំណត់យកថ្ងៃទី២៨ ខែវិច្ឆិកា ឆ្នាំ២០២៣ ពេលរសៀល សម្រាប់ការប្រកាសលទ្ធផលប្រឡង នៅរាជធានីភ្នំពេញ និងខេត្ត កណ្តាល និងនៅថ្ងៃទី២៩ ខែវិច្ឆិកា ឆ្នាំ២០២៣ សម្រាប់ខេត្តផ្សេងៗនៅទូទាំងប្រទេស»។

ក្នុងសេចក្តីប្រកាសព័ត៌មានដដែលបានបន្ថែមថា ការប្រឡងសញ្ញាបត្រមធ្យមសិក្សាទុតិយភូមិ បេក្ខជនថ្នាក់វិទ្យាសាស្ត្រច្រើនជាងបេក្ខជនថ្នាក់វិទ្យាសាស្ត្រសង្គម។ ចំណែកឯការរៀបចំបន្ទប់សម្រាប់បេក្ខជនប្រឡងគឺតាមមណ្ឌលសំណេរ រាជធានី ខេត្តនីមួយៗ។

សេចក្តីប្រកាសព័ត៌មានដដែលបន្ថែមថា៖ «សម័យប្រឡង ០៦ វិច្ឆិកា ២០២៣ មានបេក្ខជនចុះឈ្មោះ ប្រឡងសរុបចំនួន១៣៧.៤១២នាក់(ស្រី៧៣.២៧៨នាក់ក្នុងនោះបេក្ខជនថ្នាក់វិទ្យាសាស្ត្រ មានចំនួន៤១.៣៧៩នាក់ (ស្រី២៤.៧៨៩នាក់) បេក្ខជនថ្នាក់វិទ្យាសាស្ត្រសង្គមមានចំនួន៩៦.០៣៣នាក់(ស្រី៤៨.៤៨៩ នាក់)។

សេចក្តីប្រកាសព័ត៌មានបញ្ជាក់ថា ចំពោះកាលបរិច្ឆេទក្រសួងនឹងបិទប្រកាសឈ្មោះរបស់បេក្ខជនចំនួនពីរដងតាមរាជធានីខេត្ត ដើម្បីឱ្យបេក្ខជនបានពិនិត្យនិងរកមើលឈ្មោះតាមមណ្ឌលប្រឡង។

សេចក្តីប្រកាសបន្ថែមថា៖ «ក្រសួងនឹងបិទផ្សាយបញ្ជីឈ្មោះបេក្ខជនប្រឡងនៅតាមរាជធានីខេត្តចំនួនពីរដង គឺលើកទី១នៅថ្ងៃទី៣០ ខែតុលា ឆ្នាំ២០២៣ ដើម្បីឱ្យបេក្ខជនបានពិនិត្យនិងរកមើលឈ្មោះតាមមណ្ឌលប្រឡង និងលើកទី២នៅថ្ងៃទី០៥ ខែវិច្ឆិកា ឆ្នាំ២០២៣ ដើម្បីពិនិត្យមើលនិងបញ្ជាក់ម្តងទៀតអំពីមណ្ឌលប្រឡង លេខបន្ទប់ និងលេខតុ»។

ក្រសួងអប់រំយុវជននិងកីឡាអំពាវនាវដល់បេក្ខជនទាំងអស់ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទ ឬសំណៅឯកសារ ផ្សេងៗចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ ក្នុងករណីរកឃើញថាបានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ៕

មន្ទីរសុខាភិបាលភ្នំពេញ ស្នើម្ចាស់ផេកហ្វេសប៊ុកចំនួនពីរលុបរូបភាពវីដេអូចេញពីគេហទំព័ររបស់ខ្លួនដែលចេញផ្សាយពុំមានប្រភព

ឌុច ស្រី ផានីន (Duch Sreyphanin) — Wed, 10 Jan 2024 07:51:06 +0000

មន្ទីរសុខាភិបាលភ្នំពេញ ស្នើម្ចាស់ផេកហ្វេសប៊ុកឈ្មោះ Mekong News និងចំណេះដឹងទូទៅ លុបរូបភាពវីដេអូចេញពីគេហទំព័ររបស់ខ្លួនដែលចេញផ្សាយពុំមានប្រភព និងកាលបរិច្ឆេទមិនច្បាស់លាស់ព្រមទាំងសរសេរខ្លឹមសារមិនត្រឹមត្រូវ។

យោងតាមសេចក្តីជូនដំណឹងរបស់មន្ទីរសុខាភិបាលនៃរដ្ឋបាលរាជធានីភ្នំពេញ ចេញកាលថ្ងៃទី១១ខែតុលា ឆ្នំា២០២៣បានឱ្យដឹងថា ផេកហ្វេកប៊ុកឈ្មោះ Mekong News និងចំណេះដឹងទូទៅបានធ្វើការចុះផ្សាយរូបភាពវីដេអូនៃការដឹកជញ្ជូនជនរងគ្រោះ ដោយគ្រោះថ្នាក់ចរាចរណ៍ដែលសរសេរខ្លឹមសារមិនត្រឹមត្រូវនៅលើគេហទំព័ររបស់ខ្លួន។

ក្នុងសេចក្តីជូនដំណឹងដដែលបន្ថែមថា៖ «ផេកហ្វេកប៊ុកឈ្មោះ Mekong News យកទៅសង្គ្រោះតែបើអត់មានលុយគឺទម្លាក់ចុះវិញហើយ និងផេកហ្វេសប៊ុកមួយទៀត ឈ្មោះ ចំណេះដឹងទូទៅ បានផុសរូបភាពវីដេអូដដែល និងសរសេរខ្លឹមសារថា(Caption) ឡានពេទ្យមួយនេះមកយកអ្នករបួសដោយគ្រោះថ្នាក់ចរាចរណ៍ ពេលដែលលើកដាក់ ហើយគ្មានលុយលើកចុះពីឡានមកវិញ»។

មន្ទីរសុខាភិបាលបញ្ជាក់ថា រូបភាពវីដេអូដែលបានចុះផ្សាយនេះជាករណីគ្រោះថ្នាក់ចរាចរណ៍ដែលបានកើតឡើងតាំងពីដើមឆ្នាំ២០២៣មកម្លេះ។

ក្នុងសេចក្តីជូនដំណឹងបានបញ្ជាក់ថា មន្ទីរសុខាភិបាលនៃរដ្ឋបាលរាជធានីភ្នំពេញបានចាត់វិធានការផ្លូវការស្របតាមច្បាប់ ជាពិសេសនឹងមិនមានករណីនេះកើតឡើងសារជាថ្មីម្តងទៀតឡើយ។

បើតាមសេចក្តីជូនដំណឹងបានបន្ថែមថា៖ «ស្នើដល់ម្ចាស់ផេកហ្វេកប៊ុកទាំងពីរលុបរូបភាពវីដេអូនេះចេញពីគេហទំព័ររបស់ខ្លួនជាបន្ទាន់ ជាពិសេសដើម្បីជៀសវាងធ្វើឪ្យសាធារណៈជនមានការភាន់ច្រឡំ និងប៉ះពាល់យ៉ាងខ្លាំងដល់វិស័យសុខាភិបាល»។

មន្ទីរសុខាភិបាលក៏បានអំពាវនាវដល់ប្រជាពលរដ្ឋ ក្នុងករណីជួបប្រទះគ្រោះចរាចរណ៍នៅមូលដ្ឋានរាធានីភ្នំពេញ សូមហៅទៅកាន់លេខរថយន្តគិលានសង្រ្គោះ១៩៩ ឬលេខទំនាក់ទំនងរបស់មន្ទីរពេទ្យបង្អែកដែលនៅជិតបំផុត ដើម្បីជួយសង្រ្គោះ និងបញ្ជូនទៅមន្ទីរពេទ្យបានទាន់ពេលវេលា៕

សាលាក្រុងបញ្ចៀសចរាចរក្នុងពិធីសម្ពោធមន្ទីរពេទ្យជាតិតេជោសន្តិភាពនៅថ្ងៃទី២៤ ខែតុលា

ឌុច ស្រី ផានីន (Duch Sreyphanin) — Wed, 10 Jan 2024 07:42:20 +0000

រដ្ឋបាលរាជធានីភ្នំពេញបញ្ចៀសចរាចរជុំវិញទីតាំងប្រារព្ធពិធីសម្ពោធមន្ទីរពេទ្យជាតិ តេជោសន្តិភាព ដែលស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ នៅថ្ងៃទី២៤ ខែតុលា ឆ្នាំ២០២៣។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចេញនៅថ្ងៃទី១៩ ខែតុលា ឆ្នាំ២០២៣បញ្ជាក់ថា ការបញ្ចៀសចរាចរនេះត្រូវបានហាមឃាត់យាន្តជំនិះគ្រប់ប្រភេទធ្វើដំណើរបណ្តោះអាសន្ន ដើម្បីរក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ។

ក្នុងសេចក្តីជូនដំណឹងបានបញ្ជាក់ថា៖ «មិនអនុញ្ញាតឱ្យយានយន្តធុនធ្ងន់គ្រប់ប្រភេទឆ្លងកាត់មហាវិថីឈ្នះឈ្នះចាប់ពីស្ពានព្រែកព្នៅ រហូតដល់ ផ្លូវជាតិលេខ៤ នៅថ្ងៃទី២៤ ខែតុលា ឆ្នាំ២០២៣ ចាប់ពីវេលាម៉ោង ០៥:០០នាទី រហូតដល់បញ្ចប់កម្មវិធី។ ផុតរយៈពេលហាមឃាត់បណ្តោះ អាសន្ននេះ រដ្ឋបាលរាជធានីភ្នំពេញនឹងបើកឱ្យចរាចរជាធម្មតាវិញ»។

រដ្ឋបាលរាជធានីភ្នំពេញបានអំពាវនាវដល់ប្រជាពលរដ្ឋដែលជាម្ចាស់ក្រុមហ៊ុនដឹកជញ្ជូន និងអ្នកបើកបរយានយន្តធុនធ្ងន់គ្រប់ប្រភេទដែលធ្វើដំណើរឆ្លងកាត់តាមដងផ្លូវខាងលើមេត្តាជ្រាបយោគយល់អធ្យាស្រ័យនិងបញ្ចៀសការធ្វើដំណើឆ្លងកាត់ទីតាំងប្រារព្ធពិធីតាមកាលបរិច្ឆេទខាងលើដោយអនុគ្រោះ។

រដ្ឋបាលរាជធានីភ្នំពេញបានអំពាវនាវដល់មន្រ្តីក្រសួង រដ្ឋបាលដែលពាក់ព័ន្ធទាំងអស់ ត្រូវធ្វើការផ្សព្វផ្សាយឱ្យបានទូលំទូលាយ និងចាត់តាំងអនុវត្តឱ្យមានប្រសិទ្ធភាពខ្ពស់៕

Q&A៖ ការសង្រ្គោះផ្លូវចិត្តបឋមទប់ស្កាត់ការវិវត្តទៅរកបញ្ហាផ្លូវចិត្តធ្ងន់ធ្ងរ

ឌុច ស្រី ផានីន (Duch Sreyphanin) — Tue, 14 Nov 2023 03:42:02 +0000

សុខភាពផ្លូវចិត្តកំពុងជាបញ្ហាដែលមានការជជែក និងយកចិត្តទុកដាក់នៅកម្ពុជា និងនៅលើពិភពលោក។ ប្រសិនបើបញ្ហាផ្លូវចិត្តក្នុងកម្រិតស្រាល និងមធ្យមមិនត្រូវបានដោះស្រាយទាន់ពេលវេលា នោះនឹងអាចបង្កផលប៉ះពាល់ទាំងសុខភាពផ្លូវកាយ និងផ្លូវចិត្ត។ ការសង្រ្គោះផ្លូវចិត្តបឋម ជាវិធីសាស្រ្តមួយក្នុងការលើកកម្ពស់ផ្លូវចិត្តសម្រាប់មនុស្សគ្រប់គ្នាឱ្យបានប្រសើរ និងទប់ស្កាត់ការវិវត្តទៅរកបញ្ហាផ្លូវចិត្តធ្ងន់ធ្ងរ។

លោក អ៊ុំ ផ្លាកទីន ជាប្រធានសមាគម អ៊ី. អឹម.ឌី.អា (EMDR) កម្ពុជាបានផ្តល់កិច្ចសម្ភាសន៍ជាមួយសិក្ខាកាម Newsroom Cambodia គឺកញ្ញា ឌុច ស្រីផានីន អំពីការសង្រ្គោះផ្លូវចិត្តបឋម៖

Q. ជម្រាបសួរលោកគ្រូ!

A. បាទជម្រាបសួរ!

Q. តើការសង្គ្រោះផ្លូវចិត្តបឋមជាអ្វី?

A. ការសង្គ្រោះផ្លូវចិត្តបឋម សាមញ្ញដូចផ្លូវកាយបឋមដែរ។ ការសង្រ្គោះបឋមដែលយើងតែងឧស្សាហ៍និយាយ ប៉ុន្តែនេះវាទាក់ទងផ្លូវចិត្ត។ អ៊ីចឹងបានន័យថាយើងអាចធ្វើអីមុនគេ ព្រោះពាក្យបឋមបានន័យថា ក្រោយពេលម្នាក់ឆ្លងកាត់ព្រឹត្តិការណ៍មួយតក់ស្លុតណាមួយទៅ ទាំងយើងទាំងគេ ដូចគ្រោះថ្នាក់ចរាចរណ៍ គ្រោះថ្នាក់ធម្មជាតិ ឬក៏បញ្ហាវិបត្តិក្នុងគ្រួសារ វិបត្តិនៅសាលា ឬវិបត្តិផ្សេងៗ ជាទូទៅមនុស្សមួយចំនួនអាចតក់ស្លុត។ ហើយជាទូទៅនៅពេលឆ្លងកាត់ មនុស្សមួយចំនួនទៀតគេហៅថាជម្ងឺតានតឹងផ្លូវចិត្តវាបង្កផលប៉ះពាល់រំខានជាច្រើន។

ដូច្នេះយើងត្រូវការសង្រ្គោះផ្លូវចិត្តបឋមធ្វើយ៉ាងណាជួយឱ្យផ្លូវចិត្តមានភាពប្រសើរឡើង ដើម្បីទីមួយកាត់បន្ថយការតានតឹងផ្លូវចិត្ត និងទីពីរបណ្តុះភាពខ្លាំងរបស់គាត់។ ភាពខ្លាំងផ្លូវចិត្តរបស់បុគ្គលម្នាក់ៗមានន័យថា អ្នកខ្លះមានភាពខ្លាំងទៅ ពេលឆ្លងកាត់រឿងរ៉ាវប៉ះទង្គិចផ្លូវចិត្តរឿងរ៉ាវហ្នឹងគាត់អត់សូវប៉ះពាល់ទេ។ បើនិយាយឱ្យសាមញ្ញប្រព័ន្ធរាងកាយផ្លូវចិត្តរឹងមាំ អ៊ីចឹងអន្តរាគមន៍ផ្លូវចិត្តកម្រិតបឋម ឬការសង្រ្គោះផ្លូវចិត្ត គឺយើងផ្តល់របៀបបឋមនៅពេលម្នាក់ឆ្លងកាត់រឿងរ៉ាវណាមួយដែលបានកើតឡើង។

Q. តើការសង្គ្រោះផ្លូវចិត្តបឋមមានសារៈសំខាន់បែបណាខ្លះ?

A. ដូចលោកគ្រូជម្រាបមុនហ្នឹងអ៊ីចឹង វាដូចផ្លូវកាយបឋមដែរ លោកគ្រូបញ្ជាក់ម្តងទៀត។ នៅពេលណាយើងអន្តរាគមន៍កាន់តែលឿន ផ្តល់ការជួយកាន់តែលឿនវាអត់វិវត្តធ្ងន់ទេនៅពេលក្រោយ។ យើងសាកនឹកគិតស្រម៉ៃ ពេលឆ្លងកាត់តក់ស្លុតមានបញ្ហា ហើយមានម្នាក់មកលួងលោម ស្តាប់ យកចិត្តទុកដាក់ ផ្តល់កម្លាំងចិត្ត គឺមានអារម្មណ៍សប្បាយ។

លោកគ្រូឧទាហរណ៍សាមញ្ញ ថ្មីៗនេះលោកគ្រូចូលរួមពិធីបុណ្យសពម្តាយរបស់មិត្តភក្តិ ធម្មតានៅពេលមានរឿងរ៉ាវអ៊ីចឹងវាប៉ះទង្គិច ប៉ុន្តែពេលមានវត្តមានមនុស្សទៅ ដូចចាស់ៗទៅរបៀបប្រជាជនខ្មែរយើងធ្វើកាន់អង្ករ មានទាន មានធូបអ៊ីចឹងទៅ ស្លៀកសរពាក់សរសង្រួមចិត្ត ទៅដល់លើកទឹកចិត្តម្ចាស់ដើមបុណ្យ សួរនាំអង្គហេតុខ្លះៗ។ ពេលខ្លះអង្អែលខ្នង ពេលខ្លះមុខស្រពោនចូលរួមរំលែកទុក្ខជាមួយ ពេលខ្លះនៅក្បែរ លើកទឹកចិត្តអ្នកដែលគាត់បាត់បង់ សុំឱ្យញ៉ាំបបរ ថែទាំខ្លួន។ នៅពេលហ្នឹងសំខាន់វត្តមានរបស់មនុស្សស្តាប់រឿងរ៉ាវរបស់យើង ផ្តល់កម្លាំងចិត្តដល់យើង អត់វិនិច្ឆ័យ និងមិនត្រឹមតែប៉ុណ្ណោះជួយយើងអាចធ្វើទៅបាន ពីព្រោះនៅពេលឆ្លងកាត់រឿងរ៉ាវចឹង មនុស្សខ្លះមានអារម្មណ៍ថាឯកោខ្លាំង ហើយវត្តមានរបស់មនុស្សមួយចំនួនដែលនៅក្បែរជួយគាត់ លោកគ្រូលើកឧទាហរណ៍សាមញ្ញរឿងប៉ុណ្ណឹង។

ប៉ុន្តែវាមិនមែនមានតែរឿងប៉ុណ្ណឹង ព្រោះពេលខ្លះមិនមែនមានរឿងតែបាត់បង់ទេ ជួនកាលនិយាយសាមញ្ញអ្នកខ្លះមានវិបត្តិគ្រួសារ សិស្សខ្លះមានវិបត្តិការសិក្សា ក្រុមគ្រួសារខ្លះមានបញ្ហាទាក់ទងប្តីប្រពន្ធ ជួនកាលកូនមួយម្តាយឪពុកអីក៏មានខ្លះដែរ អ៊ីចឹងវាមានច្រើន សូម្បីមិត្តភក្តិក៏មាន។ យើងធ្លាប់ហើយពេលខ្លះពិបាកចិត្តពិបាកអី ជួនកាលមានមិត្តភក្តិ ឧទាហរណ៍ថា កុំពិបាកចិត្តអី កុំគិតច្រើនពេក ហៅទៅញ៉ាំអី ជួនកាលអត់ញ៉ាំអីថ្លៃៗទេ ទិញស្វាយ សណ្តែកដី ទឹកក្រូចមួយកំប៉ុង ប៉ុន្តែជួនកាលទៅមាត់ទន្លេអង្គុយនិយាយមួយគ្នា ដូចមានអ្នកយល់ចិត្ត ស្តាប់អាចជួយយើងច្រើន។

ហើយប្រសិនតទៅខាងមុន បញ្ហាធំរបស់មនុស្សបច្ចុប្បន្ន គឺអត់សូវមានអ្នកស្តាប់ អត់សូវស្តាប់គ្នា អត់សូវចេះចំណាយពេលមួយគ្នា ព្រោះអីម្នាក់ៗរវល់ច្រើន អ្នកខ្លះមានសម្ពាធនេះ សម្ពាធនោះ ជំពាក់គេឯងជាដើម នៅពេលអត់សូវស្តាប់ ហ្នឹងហើយមានបញ្ហាធំ។

មនុស្សបច្ចុប្បន្នឯកោច្រើន ការស្រាវជ្រាវក៏បានបង្ហាញរឿងហ្នឹង ជួនកាលទូរស័ព្ទទំនើបកាន់ក្នុងដៃជួយឱ្យយើងទាក់ទងមនុស្សបានរាប់ពាន់រាប់ម៉ឺនគីឡូ តែជួនកាលមនុស្សនៅមុខយើង យើងអត់អាចទាក់ទងបានទេ មនុស្សអត់មានវាអត់កើត។ ពេលកំពុងនិយាយមួយគ្នាយើងទាញវាមកមើល ការផ្តល់ឱ្យក៏ថយចុះក៏ច្រើនមូលហេតុអ្វីនិយាយរឿងហ្នឹង ការសង្រ្គោះផ្លូវចិត្តបឋមគឺយើងមើល យើងស្តាប់ យើងផ្សារភ្ជាប់ទំនាក់ទំនង។

Q. តើការសង្គ្រោះផ្លូវចិត្តបឋមធ្វើឡើងក្រោមរូបភាពអ្វីខ្លះ ឬដោយរបៀបណា?

A. ជាទូទៅពេលគាត់មកពិគ្រោះយោបល់ យើងហៅថា counseling ប៉ុន្តែការសង្រ្គោះផ្លូវចិត្តបឋម ភាគច្រើនយើងចុះទៅស្ថាប័នណាមួយ។ ក្នុងការ counseling យើងក៏ប្រើការសង្រ្គោះផ្លូវចិត្តបឋមពីអ្នកជំនាញមួយចំនួន គ្រាន់ថាពាក្យការសង្រ្គោះផ្លូវចិត្តបឋមភាគច្រើន Specific [ជាក់លាក់] ដូចក្រោយពេលឆ្លងកាត់ព្រឹត្តិការណ៍តក់ស្លុតណាមួយ អ្នកជំនាញគេចុះទៅ ឬក៏ជួបគ្នានៅសា្ថប័នណាមួយ បន្ទាប់មកយើងចុះទៅធ្វើការអន្តរាគមន៍។ នេះនៅក្នុង Original plan [ផែនការដើម] ប៉ុន្តែក៏មានអ្នកខ្លះ ឆ្លងកាត់វិបត្តិគ្រួសារ ក៏យើងធ្វើអន្តរាគមន៍បែបសង្រ្គោះផ្លូវចិត្តបឋមដែរ។

Q.តើលក្ខខណ្ឌណាខ្លះដែលគួរតែស្វែងរកការសង្គ្រោះផ្លូវចិត្តបឋម?

A. ការសង្រ្គោះផ្លូវចិត្តបឋមជាទូទៅយើងធ្វើទូលំទូលាយ។ មែនទែនទៅខុសពីការយើងផ្តល់ counseling ឬT12 អ៊ីចឹងប្រសិនសួរថា តើលក្ខខណ្ឌដែលគាត់មកទទួលការសង្គ្រោះផ្លូវចិត្តបឋម ខ្ញុំបញ្ជាក់ ជាទូទៅយើងផ្តល់ទៅឱ្យគេ ឧទាហរណ៍ថាពេលណាយើងគួរធ្វើការសង្រ្គោះផ្លូវចិត្តបឋម? ជួនកាលមានព្រឹត្តិការណ៍មួយតក់ស្លុតកើតឡើង យើងផ្តល់អន្តរាគមន៍ផ្លូវចិត្តសង្រ្គោះបឋម។ ឧទាហរណ៍សាមញ្ញមួយ ប្រហែលពីរឆ្នាំមុនមានព្រឹត្តិការណ៍មួយកើតឡើងធ្វើឱ្យមនុស្សមួយចំនួនបាត់បង់ជីវិត ហើយអ្នកនៅមានជីវិត គាត់ប៉ះទង្គិចផ្លូវចិត្តនៅតក់ស្លុត។ ស្របពេលហ្នឹងគេបានទាក់ទងមកខាង EMDR ដើម្បីទៅជួយ យើងប្រើ Q អន្តរាគមន៍ផ្លូវចិត្តពេលចុះទៅ អ្វីដែលយើងធ្វើមុនដំបូងគឺការសង្រ្គោះផ្លូវចិត្តបឋម បានន័យថាយើងទៅជួបពួកគាត់ យើងសួរនាំ សួរសុខទុក្ខគាត់ មើលអំពីតម្រូវការបាយទឹករបស់គាត់ កន្លែងដែលមានសុវត្ថិភាពអ៊ីចឹងទៅ។

ទាំងយើងទាំងគេកំពុងភ័យស្លុតទាល់មានអីញ៉ាំសិន ទាល់តែមានកន្លែងសុវត្ថិភាពទើបមានអារម្មណ៍និយាយពីអារម្មណ៍គាត់ អ៊ីចឹងយើងប្រើវិធីសាស្រ្តហ្នឹង ស្តាប់គាត់ដោយយកចិត្តទុកដាក់ អត់វិនិច្ឆ័យ ផ្តល់ទំនុកចិត្ត ព័ត៌មានខ្លះយើងដឹង យើងចែករំលែក ព័ត៌មានខ្លះយើងអត់ដឹង យើងអត់ចែករំលែកទេ ហើយព័ត៌មានខ្លះយើងអត់ច្បាស់ យើងប្រាប់ថាអត់ច្បាស់។ ការសង្រ្គោះផ្លូវចិត្តបឋមយើងអត់កុហក មែនទែនទៅ ហើយធ្វើកាន់តែលឿនកាន់តែល្អ។ គ្រប់ស្ថាប័នមួយចំនួនធំគួរតែដឹងរឿងហ្នឹង ប្រសិនក្រោយនរណាគេឆ្លងកាត់រឿងរ៉ាវតក់ស្លុតណាមួយ ក្នុងក្រុមគ្រួសារ ឬក៏ក្នុងស្ថាប័នហ្នឹង មានអ្នកចេះសង្រ្គោះបឋម ជួយច្រើន។

Q. តើអ្នកមកសង្រ្គោះផ្លូវចិត្តបឋម ភាគច្រើនមានបញ្ហាអ្វីខ្លះ?

A. អ្នកដែលមកប្រឹក្សាយោបល់ គឺបានន័យថាគាត់មានបញ្ហាយូរហើយ ក្រោយពីឆ្លងកាត់រឿងរ៉ាវតក់ស្លុត មនុស្សមួយចំនួនគាត់ទៅជាមានបញ្ហាផ្លូវចិត្ត គាត់មានបញ្ហាតានតឹងផ្លូវចិត្ត ក្រោយពីតានតឹងហើយវិវត្តទៅជាជម្ងឺផ្លូវចិត្ត។

អ៊ីចឹងប្រឹក្សាយោបល់យើងធ្វើនៅពេលគាត់មានបញ្ហាផ្លូវចិត្ត ឬក៏មានជម្ងឺផ្លូវចិត្តហើយ គឺយើងធ្វើតាមរបៀបអ៊ីចឹង។ ពេលខ្លះយើងធ្វើអន្តរាគមន៍មួយចំនួនផ្សេងទៀត យើងប្រើ PFA ឬការសង្រ្គោះផ្លូវចិត្តបឋម យើងប្រើការគាំទ្រផ្លូវចិត្តទៅកាន់មនុស្សក្រោយពេលឆ្លងកាត់រឿងរ៉ាវតក់ស្លុត ឬរឿងរ៉ាវប៉ះទង្គិចផ្លូវចិត្ត។

Q. តើការសង្គ្រោះផ្លូវចិត្តបឋមអាចផ្តល់ឲ្យនៅពេលណា និងនៅកន្លែងណា?

A. ជាទូទៅយើងផ្តល់ឱ្យគ្រប់គ្នាតាមដែលអាចធ្វើទៅបាន ទាំងក្មេង ទាំងចាស់ ទាំងប្រុស ទាំងស្រី ដែលគាត់អន្តរភេទ គឺយើងធ្វើទាំងអស់។ យើងធ្វើនៅពេលណាដែលក្រោយពេលឆ្លងកាត់រឿងរ៉ាវតក់ស្លុត ឬក៏រឿងរ៉ាវប៉ះទង្គិចផ្លូវចិត្ត ឬក៏រឿងរ៉ាវណាដែលរំខាន។ ហើយនៅកន្លែងណា? ច្បាស់ហើយយើងអត់ប្រកាន់កន្លែងទេ ធម្មតាយើងមកកន្លែងសុវត្ថិភាពសិន។

ការសង្រ្គោះផ្លូវចិត្តបឋមពេលខ្លះគេប្រើនៅក្នុង War Zone (តំបន់សង្រ្គោម) ឬក៏កន្លែងមានគ្រោះធម្មជាតិ គ្រោះរញ្ជួយដី ឧទាហរណ៍ មួយរយៈមុនមានរលំអាគារ ឬក៏ក្រោយពេលឆ្លងកាត់ធ្ងន់ធ្ងរណាមួយអ៊ីចឹងទៅ គេប្រើការសង្រ្គោះផ្លូវចិត្តបឋម។

ការសង្រ្គោះផ្លូវចិត្តបឋម គេមើលស្ថានភាពម៉េចដែរ? សុវត្ថិភាពហើយនៅ? មើលគេត្រូវការតម្រូវការអ្វីខ្លះ? មើលហើយគាត់ស្តាប់ដែរ អ៊ីចឹងពេលមើលហើយ គាត់ចូលទៅម៉េចដែរខ្ញុំអាចជួយបានអត់? ជួនកាលយើងប្រើកាយវិការតាមភេទ តាមវប្បធម៌តាមអីទៅ។ អ្នកខ្លះចូលទៅឱប ឬក៏លើកទឹកចិត្តអង្អែលខ្នង ហើយសួរម៉េចដែរ បានញ៉ាំអីនៅ? បានធូរនៅ?

អ៊ីចឹងគោលការណ៍ធំរបស់ការសង្រ្គោះផ្លូវចិត្តបឋម គេមានភាសាបី គេហៅ (Three L) បានន័យថា Look (មើល) Listen (ស្តាប់ដើម្បីដឹងរឿងរ៉ាវ) ហើយនិង Link (ភ្ជាប់និងព័ត៌មាន ឬក៏ភា្ជប់សេវានេះសេវានោះ)។ មុនពេលយើងភ្ជាប់បានទាល់តែយើងស្តាប់សិន គាត់ត្រូវការអី? ហើយមុនពេលស្តាប់គាត់ យើងក៏មើលគាត់សិន មើលទៅយើងអាចចូលទៅបានអត់? យើងមើលស្ថានភាពវាសមរម្យអត់? យើងមើលកន្លែងដែលយើងផ្តល់ចង់និយាយមួយគាត់មានសុវត្ថិភាពឬនៅ? ជួនកាលយើងមើលសិន គាត់មិនទាន់ពិសារអីផង ហើយយើងទៅនិយាយជាមួយក៏វាអត់ត្រូវអីអ៊ីចឹង។

Q. ប្រសិនបើមិនទទួលបានការសង្គ្រោះផ្លូវចិត្តបឋម តើបុគ្គលនោះអាចប្រឈមនឹងបញ្ហាអ្វី?

A. វាដូចផ្លូវកាយអ៊ីចឹង ពេលយើងមានរបួសស្នាមភ្លាមយើងឆាប់ Apply (រកថ្នាំដាក់) ត្រឹមត្រូវអីទៅវាអាចជួយឱ្យរបួសមួយចំនួនវាអាចជាខ្លួនឯង ព្រោះរាងកាយយើងមានប្រព័ន្ធភាពខ្លាំងមួយដែរ។ ផ្លូវចិត្តដូចគ្នា ប្រសិនជាគាត់ក្រោយឆ្លងកាត់រឿងរ៉ាវតក់ស្លុតយូរហើយ ក្រោយមកអត់មានអន្តរាគមន៍ត្រឹមត្រូវ យូរទៅវាវិវត្តប៉ះពាល់គាត់ច្រើន។ លោកគ្រូឧទាហរណ៍សាមញ្ញក្មេងម្នាក់រត់ដួល ហើយក្រោយពេលគាត់រត់ដួល រកថ្នាំអ៊ីចឹងទៅគាត់រត់ទៅរកម៉ាក់គាត់ ជួនកាលម៉ាក់គាត់អង្អែល ផ្លុំអ៊ីចឹងទៅ ពេលខ្លះអាហ្នឹងផ្លូវកាយដាក់ថ្នាំដាក់អ៊ីចឹងទៅ តែផ្លូវចិត្តគាត់កក់ក្តៅ។ ប៉ុន្តែយើងនឹកគិតស្រម៉ៃ ប្រសិនជាគាត់អត់ដែលមានអ្នកណាយកចិត្តទុកដាក់អីសោះ អ៊ីចឹងវាប៉ះពាល់អីខ្លះ? តាំងដើមទីដំបូង លោកគ្រូនិយាយថា ការសង្រ្គោះផ្លូវចិត្តបឋមវាជួយកាត់បន្ថយការតានតឹង កាត់បន្ថយការវិវត្តទៅជាបញ្ហាធ្ងន់ធ្ងរ។ អ៊ីចឹងផ្លូវចិត្តដូចគ្នា បើគាត់អត់ទទួលសេវាហ្នឹងអត់ត្រឹមត្រូវ ឬក៏អត់មានការជួយគាំទ្រផ្លូវចិត្តបឋមនៅតាមស្ថាប័នទេ ជួនកាលពេលក្រោយវាទៅជាបញ្ហាផ្លូវចិត្ត ឬក៏ទៅជារបួសស្នាមផ្លូវចិត្តរ៉ាំរ៉ៃ ឬក៏ទៅជាជម្ងឺផ្លូវចិត្តដែលវារំខាន។

Q. ជាចុងក្រោយតើលោកមានជាសារ ឬអនុសាសន៍អ្វីទេពាក់ព័ន្ធនឹងការសង្គ្រោះផ្លូវចិត្តបឋមនេះ?

A. ការសង្រ្គោះផ្លូវចិត្តបឋមគឺជារឿងរ៉ាវដែលយើងទាំងអស់គ្នាគួរតែចេះ គួរតែដឹង ព្រោះវាក្តោបទៅន័យសុខភាពផ្លូវចិត្ត អ្វីទៅជាការប៉ះទង្គិចផ្លូវចិត្ត និងរបៀបនៃការអន្តរាគមន៍កម្រិតបឋម ដែលយើងទាំងអស់គ្នានឹងឆ្លងកាត់រឿងរ៉ាវហ្នឹង គ្មាននរណាគេគេចផុតទេ។ អ៊ីចឹងនៅពេលណាមនុស្សដឹងច្រើន យល់ច្រើន ច្បាស់ហើយអាចមានធនធាននៅហ្នឹងកន្លែង ទោះបីនៅក្នុងក្រុមគ្រួសារ នៅមានអ្នកយល់ពីហ្នឹងច្រើន ជាឪពុកម្តាយ ពេលកូនមានបញ្ហានៅកន្លែងការងារជាមួយប្រធាន នៅពេលបុគ្គលិកមានបញ្ហា។

ប្រសិនយើងចាប់អារម្មណ៍ មួយរយៈចុងក្រោយនេះ បញ្ហាផ្លូវចិត្តត្រូវបានកើតឡើងខ្លាំងជម្ងឺ Depression (ការធ្លាក់ចិត្ត) មួយចំនួនឥឡូវសម្លាប់ខ្លួនច្រើន។ អ៊ីចឹងនៅពេលណាយើងដឹងពីការសង្រ្គោះផ្លូវចិត្តបឋម យ៉ាងហោចណាស់ ទៅជាអ្នកស្តាប់ដ៏ល្អ អត់វិនិច្ឆ័យ នៅពេលទៅជាអ្នកស្តាប់ដ៏ល្អ ផ្នែកមួយនៃការណែនាំអង្គការសុខភាពពិភពលោក គឺកាត់បន្ថយបញ្ហាធ្លាក់ទឹកចិត្ត តាមរយៈនិយាយជាមួយនឹងអ្នកដែលយើងទុកចិត្តបាន។ ពេលខ្លះគាត់មិនបាច់ជាអ្នកផ្តល់ដំបូន្មានអីទេ ប៉ុន្តែនិយាយទៅមានអ្នកយល់ចិត្ត ហើយពេលនិយាយទៅ ឧទាហរណ៍មានម្នាក់មានបញ្ហាផ្លូវចិត្ត ធ្លាក់ទឹកចិត្ត មកនិយាយមួយយើង យកចិត្តទុកដាក់ យើងស្តាប់ ហើយយើងណែនាំមកសមាគម ដូចសមាគម EMDR គេជួយ។ មនុស្សដឹងកាន់តែច្រើន មានវាអត្ថប្រយោជន៍ច្រើនហើយគួរតែដឹងតាមអាចធ្វើទៅបាន វាអត់មានស្មុគស្មាញទេ។

បញ្ហាសុខភាពផ្លូវចិត្តកើតមានច្រើន វាមានសម្ពាធច្រើន ការផ្លាស់ប្តូរសង្គមផង សេដ្ឋកិច្ចផង សង្រ្គាមផង ហើយឥលូវយើងមើលទៅ ឬបញ្ហាអសន្តិសុខមួយចំនួនជាឧទាហរណ៍។ តិច ឬច្រើនវាធ្វើឱ្យមនុស្សគិតច្រើន ខ្វល់ច្រើន ហើយពេលខ្លះវាប៉ះទង្គិចដោយប្រយោល អ៊ីចឹងផ្នែកមួយនៃសកម្មភាពយើងមានគម្រោងទទួល Fund (មូលនិធិ) មកពី BMZ របស់អាឡឺម៉ងហ្នឹងតាមរយៈអង្គការចុះ Editor (សម្របម្រួល) ហ្នឹង គឺយើងធ្វើលើអាហ្នឹងច្រើន។ ឧទាហរណ៍សាមញ្ញថា ផ្សព្វផ្សាយឱ្យមនុស្សយល់ដឹងសុខភាពផ្លូវចិត្តកាន់តែច្រើន ផលប៉ះពាល់របស់វា របៀបការពារ និងរបៀបថែទាំ។ នៅពេលដឹងពីរឿងហ្នឹងយើងចាប់អារម្មណ៍ យើងដឹងថាធ្វើម៉េចវាប៉ះពាល់ ហើយនិងរបៀបការពារខ្លួន។ ហើយការធ្វើរបស់យើងជាទូទៅជាមួយប្រជាជន ជាមួយសិស្ស ជាមួយសាស្រ្តាចារ្យ ឬក៏ជាមួយព្រះសង្ឃ អាចារ្យ អ៊ីចឹងពេលដឹងកាន់តែច្រើនវាជួយច្រើន។

មិនត្រឹមតែប៉ុណ្ណឹងទេ យើងមានកម្មវិធីចូលរួមជាមួយសុខាភិបាលដើម្បីចែករំលែកជាមួយលោកគ្រូពេទ្យអ្នកគ្រូពេទ្យ ឬក៏គិលានុបដ្ឋាក ឬពេទ្យឆ្មបនៅតាមមណ្ឌលមួយចំនួនហ្នឹងអំពីរបៀបសង្រ្គោះផ្លូវចិត្តកម្រិតបឋម ប្រឹក្សាយោបល់កម្រិតបឋម។ អ៊ីចឹងលោកគ្រូពេទ្យអ្នកគ្រូពេទ្យដែលគាត់រៀនខាងហ្នឹងគាត់ធ្វើបានទាំងពីរ គាត់ផ្តល់ទាំងសង្រ្គោះផ្លូវកាយកម្រិតបឋម ស្របពេលហ្នឹងគាត់ផ្តល់ការសង្រ្គោះផ្លូវចិត្តកម្រិតបឋមបន្ថែមទៀតទៅ អ៊ីចឹងទាំងកាយទាំងចិត្តត្រសងជាមួយគ្នា។ មូលហេតុអ្វីយើងធ្វើអ៊ីចឹង ព្រោះផែនការរបស់រដ្ឋាភិបាលក៏លោកយកចិត្តទុករឿងហ្នឹងច្រើន ជាពិសេសនៅតាមនាយកដ្ឋានសុខភាពផ្លូវចិត្ត និងការពារគ្រឿងញៀន ឃើញគាត់ខិតខំច្រើន ខ្ញុំចង់ Promote (ផ្សព្វផ្សាយ) លើកតម្កើងអាហ្នឹងច្រើន។

ថ្ងៃមុនចូលរួមប្រជុំជាមួយគាត់ យើងឃើញលោកប្រធានក៏ដូចជាក្រុមការងារនៅហ្នឹងមគាត់ចង់ពង្រីកសេវាហ្នឹងកាន់តែច្រើន។ អ៊ីចឹងផែនការសកម្មភាពគម្រោងរបស់យើងវាដើរត្រដំត្រសងជាមួយគ្នា យើងចង់បណ្តុះបណ្តាលធនធាននៅហ្នឹងមូលដ្ឋាន ហើយវានឹងជួយច្រើន លោកគ្រូសង្ឃឹមថា នៅថ្ងៃខាងមុខយើងនៅមានឱកាសផ្សព្វផ្សាយឱ្យមនុស្សយល់ដឹងច្រើនពីបញ្ហាសុខភាពផ្លូវចិត្ត ជាពិសេសការសង្រ្គោះផ្លូវចិត្តបឋម ទាំងនៅសាលារៀនក៏យើងចង់ធ្វើច្រើន។ ទូទៅនៅតាមរោងចក្រកាត់ដេរ ទោះបីនៅតាមស្ថាប័នសាសនា នៅតាមមន្ទីរចង់ចូលរួមជួយច្រើន ជាពិសេសបណ្តុះបណ្តាលធនធាន នៅតំបន់ពេលមានរឿងរ៉ាវណាកើតឡើងគាត់ដើរតួរបាន។ លោកគ្រូឧទាហរណ៍ ជួនកាលមានរឿងរ៉ាវគ្រោះធម្មជាតិកើតឡើង គ្រោះធម្មជាតិវាផ្លូវកាយ ហើយទាំងយើងទាំងគេពេលឆ្លងកាត់រឿងរ៉ាវហ្នឹងវាប៉ះផ្លូវចិត្ត អ៊ីចឹងគាត់នៅហ្នឹងគាត់អាចផ្តល់ជាអន្តរាគមន៍។

Q: ចា៎! អរគុណច្រើនសម្រាប់ការផ្ដល់បទសម្ភាសន៍!

A: បាទ! អរគុណច្រើន៕

មន្ទីរសាធារណការ ខេត្តកណ្តាលបិទចរាចរណ៍ទូកដរចម្លងក្រុងតាខ្មៅ ដើម្បីរៀបចំប្រណាំងទូក

ឌុច ស្រី ផានីន (Duch Sreyphanin) — Tue, 31 Oct 2023 01:18:33 +0000

មន្ទីរសាធារណការ និងដឹកជញ្ជូនខេត្តកណ្តាលបានអំពាវនាវដល់បងប្អូនប្រជាពលរដ្ឋដែលរស់នៅមាត់ទន្លេបាសាក់ នឹងធ្វើការបិទចរាចរណ៍ទូកដរចម្លងក្រុងតាខ្មៅ ដើម្បីនឹងរៀបចំពិធីប្រណាំងទូក។

ក្នុងសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តកណ្តាលកាលថ្ងៃទី២៧ខែតុលា ឆ្នាំ២០២៣ បានឱ្យដឹងថារដ្ឋបាលខេត្តកណ្តាលនឹងរៀបចំពិធីប្រណាំងទូកនៅមាត់ទន្លេបាសាក់ ក្រុងតាខ្មៅ ខេត្តកណ្តាល។

សេចក្តីជូនដំណឹងបានបញ្ជាក់ថា ៖«សូមធ្វើការបិទចរាចរណ៍ ទូកដរចម្លង ជលយាន សាឡង់បូមខ្សាច់ និងមធ្យោបាយដឹកជញ្ជូនផ្លូវទឹកគ្រប់ប្រភេទ តាមបណ្ដោយទន្លេបាសាក់ ចាប់ពីវិហារ អ្នកតាសានថៃជី ដល់ស្ពានមិត្តភាពកម្ពុជា-ចិន តាខ្មៅ(ស្ពានព្រែកសំរោង)ក្នុងក្រុងតាខ្មៅ ខេត្តកណ្តាល ចំនួន ០២ថ្ងៃ ចាប់ពីថ្ងៃទី២៨ ដល់ថ្ងៃទី២៩ ខែតុលា ឆ្នាំ ២០២៣»។

មន្ទីរសាធារណការ និងដឹកជញ្ជូនខេត្តកណ្តាលអំពាវនាវដល់បងប្អូនប្រជាពលរដ្ឋ ព្រមទាំងស្ថាប័នមានសមត្ថកិច្ចពាក់ព័ន្ធទាំងអស់ ដើម្បីឱ្យការប្រារព្ធពិធីប្រណាំងទូក ប្រព្រឹត្តទៅដោយរលូន រក្សាបាននូវសណ្តាប់ធ្នាប់ របៀបរៀបរយនិងសុវត្ថិភាព សូមចូលរួមសហការអនុវត្តតាមខ្លឹមសារសេចក្ដីជូនដំណឹងនេះប្រកបដោយប្រសិទ្ធភាព៕

Vox Pop: ទស្សនៈយុវជនលើបញ្ហាសុខភាពផ្លូវចិត្ត

ឌុច ស្រី ផានីន (Duch Sreyphanin) — Mon, 30 Oct 2023 03:42:23 +0000

របាយការណ៍របស់យូនីសេហ្វ (UNICEF) និងមូលនិធិសហប្រជាជាតិសម្រាប់ប្រជាជន (UNFPA) នៅក្នុងប្រទេសកម្ពុជានៅថ្ងៃទី១០ ខែតុលា ឆ្នាំ២០២៣ បានបង្ហាញថា ក្មេងជំទង់ម្នាក់ក្នុងចំណោម ៧ នាក់ ដែលមានអាយុពី ១០ ទៅ ១៩ ឆ្នាំ ទទួលរងវិបត្តិផ្លូវចិត្តនៅទូទាំងសកលលោក បានធ្វើអត្តឃាតគឺជាមូលហេតុនាំមុខគេទីបួននៃការស្លាប់ក្នុងចំណោមមនុស្សវ័យក្មេងដែលមានអាយុពី ១៥-១៩ឆ្នាំ។

នៅក្នុងឆ្នាំ ២០២២ មនុស្សយ៉ាងតិច ៨៧៣ នាក់ បានស្លាប់ដោយសារការធ្វើអត្តឃាតដែលភាគច្រើនមានអាយុចន្លោះពី ១៥ ទៅ ១៩ ឆ្នាំ។ ប្រជាជនកម្ពុជាប្រមាណកន្លះលាននាក់ ទទួលរងផលប៉ះពាល់ដោយវិបត្តិបាក់ទឹកចិត្ត ឬការថប់បារម្ភ ដែលជាកត្តារួមចំណែកដ៏ធំចំពោះការធ្វើអត្តឃាត។

Newsroom Cambodia បានសម្ភាសន៍ពលរដ្ឋនិងនិស្សិតចំនួន ៧នាក់អំពីទស្សនៈរបស់ពួកគេទាក់ទងនឹងបញ្ហាសុខភាពផ្លូវចិត្តដែលកើតមានឡើងចំពោះយុវជននាពេលបច្ចុប្បន្ន៖

កញ្ញា ធីតា

កញ្ញា ធីតា មានអាយុ២៥ឆ្នាំ បច្ចុប្បន្នធ្វើការនៅអង្គការមិនមែនរដ្ឋាភិបាលមួយកន្លែង នៅរាជធានីភ្នំពេញបានលើកឡើងថា យុវជនមានសក្តានុពល និងភាពខ្លាំងច្រើន ប៉ុន្តែការថែរក្សាសុខភាពផ្លូវចិត្តនៅមានកម្រិតនៅឡើយ។

កញ្ញានិយាយថា៖ «ជាពិសសឥទ្ធិពលពីមជ្ឈដ្ឋានជុំវិញគាត់ដូចជា ទាក់ទងនឹងគ្រួសារ កន្លែងធ្វើការ ឬក៏ការទំនាក់ទំនងផ្សេងៗជុំវិញខ្លួនគាត់។ ហើយមួយផ្នែកទៀតទាក់ទងជាមួយសម័យឌីជីថលដែរ គឺ Social media [បណ្តាញសង្គម] វាមានព័ត៌មានមួយចំនួនដែល Effect [មានឥទ្ធិពល] ផ្លូវចិត្តគាត់ច្រើនមែនទែន អ៊ីចឹងទោះបីជាយើងមានភាពខ្លាំង ឬពូកែប៉ុណ្ណាក៏ដោយ បើសិនជាយើងមានផ្លូវចិត្តអត់ល្អគឺវាប៉ះពាល់ដល់ការរស់នៅប្រចាំថ្ងៃខ្លាំង»។

កញ្ញា ផាន់ នី

កញ្ញា ផាន់ នី មានអាយុ ២១ឆ្នាំ និស្សិតឆ្នាំទី៤នៃសាកលវិទ្យាល័យមួយកន្លែងក្នុងរាជធានីភ្នំពេញយល់ថា ឱកាសការងារ និងថវិការសម្រាប់ផ្គត់ផ្គង់ការសិក្សា បានក្លាយជាបញ្ហាសុខភាពផ្លូវចិត្តសម្រាប់យុវជនជានិស្សិតដែលមកពីបណ្ដាខេត្ត។

កញ្ញាបន្ថែមថា៖ «សម្រាប់គ្រួសាររបស់និស្សិតដែលមានជីវភាពធូរធារ ពួកគេមិនបានជួបប្រទះនឹងបញ្ហាទាំងនេះទេ ប៉ុន្តែសម្រាប់និស្សិតដែលមានជីវភាពក្រីក្រពួកគេពិតជាប្រឈមនឹងបញ្ហាទាំងនេះ»។

កញ្ញា ស្រី ល័ក្ខ

ចំណែកកញ្ញា ស្រី ល័ក្ខ អាយុ ២០ឆ្នាំ រស់នៅរាជធានីភ្នំពេញ បានលើកឡើងថា៖ «ខ្ញុំគិតថា សុខភាពផ្លូវចិត្តរបស់យុវជននាពេលបច្ចុប្បន្ននេះ ពិតជាពិបាកយ៉ាងខ្លាំងព្រោះពួកគាត់ត្រូវរស់នៅក្នុងសង្គមមួយ ហើយត្រូវសម្របខ្លួនជាមួយមនុស្សផ្សេងៗទៀតដែលរស់នៅក្នុងសង្គម»។

កញ្ញាបានបន្ថែមថា៖ «យុវជនមួយចំនួនត្រូវរស់នៅដើម្បីតម្រូវចិត្តរបស់គ្រួសារ និង មនុស្សនៅជុំវិញខ្លួនរបស់ពួកគេ»។

លោក ចាន់ កុសល

លោក ចាន់ កុសល អាយុ ២៣ឆ្នាំ ជានិស្សិតឆ្នាំទី៣ នៃដេប៉ាតឺម៉ង់ភាសាជប៉ុននៃសាកលវិទ្យាល័យភូមិន្ទភ្នំពេញ បានលើកឡើងថា៖ «ខ្ញុំយល់ឃើញថា នាពេលបច្ចុប្បន្នបញ្ហាផ្លូវចិត្តពិតជាសំខាន់ មិនថាយុវជន ឬមនុស្សដែលមានវ័យចំណាស់ទេ នៅពេលដែលពួកគាត់មានវិបត្តិផ្លូវចិត្តអាចធ្វើឲ្យពួកគាត់គិតអ្វីមិនចេញដែលជាហេតុបង្កឲ្យពួកគាត់មានបញ្ហាផ្លូវចិត្ត»។

កញ្ញា សិន បូរី

កញ្ញា សិន បូរី ជាពលរដ្ឋរស់នៅក្នុងរាជធានីភ្នំពេញបានលើកឡើងថា៖ «ទាក់ទងនឹងបញ្ហាសុខភាពផ្លូវចិត្ត នៅពេលដែលយើងជួបនូវបញ្ហាអ្វីមួយគឺយើងត្រូវការការលើកទឹកចិត្តពីមនុស្សដែលនៅជុំវិញខ្លួន»។

កញ្ញាបន្ថែមថា៖ «សូមកុំឱ្យក្រុមគ្រួសារ ឬមនុស្សនៅជុំវិញខ្លួនស្ដីបន្ទោសឱ្យយុវជនដែលកំពុងតែមានបញ្ហាសុខភាពផ្លូវចិត្តដើម្បីការពារយុវជនដែលកំពុងមានបញ្ហាសុខភាពផ្លូវចិត្តឈានទៅដល់ការធ្វើអត្តឃាតសម្លាប់ខ្លួន»។

កញ្ញា មឿន ម៉ារី

កញ្ញា មឿន ម៉ារី ជានិស្សិតឆ្នាំទី១ នៃវិទ្យាស្ថានជាតិសង្គមកិច្ច ជំនាញរដ្ឋបាលសាធារណៈ បានលើកឡើងថា សុខភាពផ្លូវចិត្តរបស់យុវជននាពេលបច្ចុប្បន្នរងផលប៉ះពាល់ ដោយសារមានករណីសម្លាប់ជាញឹកញាប់។

កញ្ញាបន្តថា៖ «វិបត្តិផ្លូវចិត្តទាំងអស់នោះមកពីកត្តាគ្រួសារ បាត់បង់មនុស្សជាទីស្រឡាញ់ដូចជាសង្សារអីហ្នឹង ហើយមួយទៀតគាត់គិតច្រើនអំពីគាត់ធ្វើការងារផងរៀនផង ចឹងទៅវាអាចថាគាត់ស្រ្តេស គាត់អត់បានលំហែរខួរអ៊ីចឹងទៅ ក៏អាចថាជាកត្តាមួយដែលគាត់ចង់សម្លាប់ខ្លួន»។

កញ្ញាបន្ថែមថា៖ «ខ្ញុំឃើញពីភាពខ្លាំងរបស់ពួកគាត់ ហើយខ្ញុំគិតថាពួកគាត់នៅតែមានទទួលរងគ្រោះនូវការមានជម្ងឺផ្លូវចិត្តហ្នឹង ឬក៏មានជម្ងឺធ្លាក់ទឹកចិត្ត ដែលវាអាចផ្តល់ជាផលវិបាកដល់គាត់បើសិនជាគាត់មិនបានយល់ដឹងអំពីវិធីសាស្រ្តក្នុងការថែទាំខ្លួនឯង ការស្រលាញ់ខ្លួនឯង ឬការការពារពីការជាជនរងគ្រោះ»។

លោក ច្រឹង សំណាង

ចំណែកលោក ច្រឹង សំណាង ជាពលរដ្ឋរស់នៅក្នុងរាជធានីភ្នំពេញ លើកឡើងថា៖ «ខ្ញុំមើលឃើញថាយុវជនភាគច្រើនប្រឈមនឹងជំងឺបាក់ទឹកចិត្ត ទាក់ទងនឹងបញ្ហាការសិក្សា ស្នេហា និងជីវភាពផ្ទាល់ខ្លួន»៕

ក្រសួងធនធានទឹកអំពាវនាវឱ្យប្រជាពលរដ្ឋប្រុងប្រយ័ត្នខ្យល់មូសុងដែលអាចបង្កជាជំនន់ទឹកភ្លៀង

ឌុច ស្រី ផានីន (Duch Sreyphanin) — Tue, 24 Oct 2023 06:44:51 +0000

ក្រសួងធនធានទឹក និងឧតុនិយមអំពាវនាវដល់ប្រជាពលរដ្ឋដែលរស់នៅតាមតំបន់មាត់ សមុទ្រ តំបន់ទំនាបកណ្តាល និងតំបន់ខ្ពស់រាបឱ្យប្រុងប្រយ័ត្នខ្ពស់ចំពោះស្ថានភាពខ្យល់មូសុងដែលនឹងអាចបង្កជាជំនន់ទឹកភ្លៀង។

ក្នុងសេចក្តីជូនដំណឹងរបស់ក្រសួងធនធានទឹក និងឧតុនិយមចេញផ្សាយនៅថ្ងៃទី២៤ ខែតុលា ឆ្នាំ២០២៣ បានឱ្យដឹងថា ខ្យល់មូសុងនិរតីបានបង្កើនកម្លាំងបក់មកលើសមុទ្រអាន់ដាមែន (Andaman Sea) និងឈូងសមុទ្រថៃ រួមជាមួយលំហូរខ្យល់បក់មកពីទិសខាងត្បូង ខាងកើត និងទិសអាគ្នេយ៍ នាំមកជាមួយសំណើមពីសមុទ្រចិនខាងត្បូងមកលើប្រទេសកម្ពុជា។

ក្រសួងធនធានទឹក និងឧតុនិយមបានបញ្ជាក់ថា៖ «ចាប់ពីថ្ងៃទី២៤ ដល់ថ្ងៃទី២៨ ខែតុលា នៅតាមបណ្តាខេត្តមួយចំនួននៅតំបន់មាត់សមុទ្រ និងបណ្តាខេត្តមួយចំនួនក្នុងតំបន់ទំនាបកណ្តាល រួមទាំងរាជធានីភ្នំពេញនឹងមានភ្លៀងធ្លាក់ក្នុងកម្រិតបង្គួរ លាយឡំជាមួយផ្គររន្ទះ និងខ្យល់កន្ត្រាក់ដែលគ្របដណ្តប់លើផ្ទៃដីពី៥០% ទៅ៦០%។ ដោយឡែក បណ្តាខេត្តមួយចំនួនក្នុងតំបន់ខ្ពង់រាបនឹងមានភ្លៀងធ្លាក់ក្នុងកម្រិតពីមធ្យមទៅបង្គួរ គ្របដណ្តប់លើផ្ទៃដីពី ៤០% ទៅ៥០%»។

ក្រសួងធនធានទឹក និងឧតុនិយមអំពាវនាវដល់ប្រជាពលរដ្ឋប្រុងប្រយ័ត្នឱ្យបានខ្ពស់ចំពោះស្ថានភាពខ្យល់មូសុងនេះ ថាអាចនឹងបង្កជាជំនន់ទឹកភ្លៀង៕

កុមារីអាយុពីរឆ្នាំម្នាក់ស្លាប់ដោយសារជំងឺផ្តាសាយបក្សី H5N1

ឌុច ស្រី ផានីន (Duch Sreyphanin) — Wed, 11 Oct 2023 08:45:16 +0000

កុមារីអាយុ២ឆ្នាំម្នាក់រស់នៅភូមិឆ្មាលោត ឃុំស្នោងខាងត្បូង ស្រុកកំចាយមារ ខេត្តព្រៃវែង បានស្លាប់ដោយវីរុសផ្តាសាយបក្សី ប្រភេទ H5N1។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។

សេចក្តីប្រកាសព័ត៌មានក្រសួងសុខាភិបាល ចេញនៅថ្ងៃទី៩ ខែតុលា ឆ្នាំ២០២៣ បញ្ជាក់ថា នេះជាករណីផ្ដាសាយបក្សីទី៥៩ ដែលកើតមានលើមនុស្ស និងបានបណ្តាលឱ្យមានអ្នកស្លាប់ចំនួន៤០នាក់ ចាប់តាំងពីឆ្នាំ២០០៥មក។ ហើយនេះជាករណីទី៣ ដែលបានកើតឡើងនៅក្នុងឆ្នាំ២០២៣។

កាលថ្ងៃទី៧ ខែតុលា ឆ្នាំ២០២៣ បុរសអាយុ៥០ឆ្នាំម្នាក់រស់ននៅភូមិម្រាក់ទាប ឃុំត្រស់ ស្រុករមាសហែក ខេត្តស្វាយរៀងក៏បានស្លាប់ដោយសារវីរុសផ្តាសាយបក្សី H5N1 នេះផងដែរ។

ក្នុងសេចក្តីប្រកាសព័ត៌មានដដែលបន្ថែមថា ក្រសួងសុខាភិបាលថ្នាក់ជាតិ និងថ្នាក់ក្រោមជាតិ បាននិងកំពុងអង្កេតស្រាវជ្រាវការកើតឡើងនូវជំងឺផ្តាសាយបក្សីប្រភេទនេះ និងកំពុងស្វែងរកប្រភពចម្លងទាំងលើសត្វ និងមនុស្ស និងបន្តស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លងបន្តទៅអ្នកដទៃទៀត ក្នុងសហគមន៍។

សេចក្តីប្រកាសព័ត៌មានរបស់ក្រសួងសុខាភិបាលដដែលបញ្ជាក់តាមន័យដើមថា៖ «ក្រសួងសុខាភិបាលសូមក្រើនរំឭកសារជាថ្មីម្តងទៀតដល់បងប្អូនប្រជាពលរដ្ឋទាំងអស់ សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋ ជាពិសេសលើកុមារដែលជាក្រុមហានិភ័យ និងមានភាពងាយរងគ្រោះ»។

បើតាមក្រសួងសុខាភិបាល ជំងឺផ្ដាសាយបក្សី H5N1 គឺជាជំងឺផ្ដាសាយមួយ ដែលជាធម្មតាចម្លងរវាងសត្វបក្សីឈឺទៅបក្សីផ្សេងទៀត ប៉ុន្តែជួនកាលវាអាចចម្លងពីបក្សីទៅមនុស្ស តាមការប៉ះពាល់ជិតស្និទ្ធជាមួយបក្សីដែលឈឺ ឬស្លាប់។ ជំងឺផ្តាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យមានការធ្វើការព្យាបាលនៅមន្ទីរពេទ្យទាន់ពេលវេលា៕

ឌុច ស្រី ផានីន (Duch Sreyphanin) – Newsroom Cambodia

ក្រសួង​ការងារ​រៀបចំ​​វេទិកា​ការងារ​ និងឱ​កាស​កម្ម​សិក្សា​ជាង​៥០០កន្លែង​នៅ​ថ្ងៃទី​៣០ ខែវិច្ឆិកា

ក្រសួង​អប់រំ​កំណត់​យក​ថ្ងៃទី​៦ វិច្ឆិកា ដើម្បី​ប្រឡង​សញ្ញាបត្រ​មធ្យម​សិក្សា​ទុតិយ​ភូមិ​

សាលាក្រុង​​​បញ្ចៀស​ចរាចរ​ក្នុង​ពិធី​សម្ពោធ​មន្ទីរ​ពេទ្យ​ជាតិ​តេជោ​សន្តិភាព​នៅ​ថ្ងៃទី​២៤ ខែ​តុលា

Q&A៖ ការ​សង្រ្គោះ​ផ្លូវ​ចិត្ត​បឋមទប់ស្កាត់​ការវិវត្ត​ទៅរក​បញ្ហា​ផ្លូវ​ចិត្ត​ធ្ងន់ធ្ងរ