អេង សិតសុខលីលី (Eng Setsoklily) – Newsroom Cambodia

បទយកការណ៍៖ បណ្ណាល័យ សួន បញ្ញា ជំរុញការអានបន្ថែមក្នុងសហគមន៍មួយនៅខេត្តបាត់ដំបង

អេង សិតសុខលីលី (Eng Setsoklily) — Mon, 29 Jan 2024 03:20:35 +0000

កាលពីឆ្នាំ២០១៨ កញ្ញា យ៉ែម បញ្ញា បានបង្កើតបណ្ណាល័យតូចមួយដោយមានឈ្មោះថា បណ្ណាល័យ សួន បញ្ញា ដែលមានទីតាំងស្ថិតនៅ ភូមិកំប៉ូវ ឃុំភ្នំសំពៅ ស្រុកបាណន់ ខេត្តបាត់ដំបង។

កំពុងអង្គុយក្នុងបរិវេណបណ្ណាល័យ ស្ថាបនិកបណ្ណាល័យសួនបញ្ញា វ័យ៣៨ឆ្នាំរូបនេះ និយាយថា៖ «បណ្ណាល័យសហគមន៍ជាផ្នែកមួយក្នុងការជួយដល់យុវជននៅជនបទហ្នឹង គាត់អាចមានកម្លាំងក្នុងការរកមធ្យោបាយក្នុងការអាន [សៀវភៅ] បាន»។

បណ្ណាល័យសួនបញ្ញាត្រូវបានបង្កើតឡើងក្នុងគោលបំណងចង់ឱ្យក្មេងៗក្នុងសហគមន៍អាចរៀនបន្ថែមបន្ទាប់ពីទំនេរពីការសិក្សា ដូចជាថ្ងៃចុងសប្តាហ៍ ហើយក្មេងៗដែលមកអានសៀវភៅនៅទីនេះអាចខ្ចីសៀវភៅទៅអាននៅផ្ទះបានដោយសេរី។

កញ្ញា យ៉ែម បញ្ញា បន្ថែមថា យុវជនក្នុងសហគមន៍របស់កញ្ញាតែងខ្វះខាតបណ្ណាល័យ និងសៀវភៅសម្រាប់អានដើម្បីបង្កើនចំណេះ។

កញ្ញាលើកឡើងថា៖ «បណ្ណាល័យនៅតាមសាលាមិនសូវជាសម្បូរ ក៏នៅតាមជនបទមានតែសៀវភៅទាក់ទងនឹងកម្មវិធីសិក្សា ចឹងយើងឃើញថាមានការខ្វះខាតទាក់ទងនឹងសៀវភៅចំណេះដឹងទូទៅ[—] ដូច្នេះជាផ្នែកមួយក្នុងការជួយយុវជននៅជនបទអាចរកមធ្យោបាយក្នុងការអានបាន»។

បណ្ណាល័យ សួន បញ្ញា ត្រូវបានបង្កើតឡើងក្នុងទីធ្លាផ្ទះរបស់ឪពុកម្តាយកញ្ញាបញ្ញាផ្ទាល់ ដែលដំបូងឡើយគឺសាងសង់ឡើងដោយប្រើប្រាស់ឈើ។ តែក្រោយមកកញ្ញាបានស្វែងរកធនធានគាំទ្ររហូតដល់បង្កើតបានជាកូនផ្ទះមួយដែលសាងសង់ដោយថ្មដែលមានសភាពប្រសើរជាងមុន និងអាចឱ្យអ្នកអានមានទីធ្លាអង្គុយអានបាន។

កញ្ញា ធឿន សុភា និស្សិតរៀននៅសាកលវិទ្យាល័យបាត់ដំបង កំពុងអានសៀវភៅរឿងនិទានឱ្យក្មេងៗក្នុងភូមិស្តាប់ ជាមួយកាយវិការយ៉ាងរស់រវើកធ្វើឱ្យក្មេងៗផ្ទុះសំណើចម្តងៗផង។

ជានិស្សិតរៀននៅសាកលវិទ្យាល័យបាត់ដំបង និងជាអ្នកប្រើប្រាស់បណ្ណាល័យនេះផ្ទាល់ផងនោះ កញ្ញាលើកឡើងថា ការបង្កើតបណ្ណាល័យនេះអាចផ្តល់ផលប្រយោជន៍ដល់យុវជននៅក្នុងសហគមន៍ដោយរួមបញ្ចូលជាមួយចំណេះដឹង និងពេលវេលាជួបជុំគ្នាផងដែរ។

កញ្ញាបន្ថែមថា៖ «ការបង្កើតបណ្ណាល័យនៅក្នុងសហគមន៍នេះគឺថាល្អ ព្រោះអាចឱ្យក្មេងបានអាន សម្រាប់អ្នកដែលមិនសូវចេះ ក៏អាចចេះបានដែរ ព្រោះថាមានការបង្រៀន មានយុវជននៅនឹងចឹងហើយក្មេងមកមួយអាទិត្យម្ដងចឹងកាន់តែល្អ ព្រោះយើងជួយបង្រៀនគាត់បន្ថែម ហើយខ្ញុំគិតថាជួយឱ្យក្មេង ជ្រាបពីបណ្ណាល័យតាំងពីតូចទៅ អាចជួយឱ្យពួកគាត់ចេះអាន ចេះសរសេរកាន់តែទូលំទូលាយ»។

ការបង្កើតបណ្ណាល័យសហគមន៍នេះឡើង គឺបានផ្តល់ប្រយោជន៍ដល់សហគមន៍ទាំងមូល ជាពិសេសសិស្សានុសិស្សដែលមិនមានលទ្ធភាពក្នុងការទិញសៀវភៅ ហើយមិនមានទីតាំងណាមួយស្ងប់ស្ងាត់ក្នុងការអានសៀវភៅ។

ចំណែកកញ្ញា ប៉ិច លីដា អាយុ ២២ឆ្នាំ ជាអ្នកស្ម័គ្រចិត្តនៅបណ្ណាល័យសួន បញ្ញា និងជាអ្នកធ្លាប់ប្រើប្រាស់បណ្ណាល័យនេះផ្ទាល់បានប្រាប់ Newsroom Cambodia ថា បណ្ណាល័យសហគមន៍នេះ បានផ្តល់ឱកាសក្នុងការបង្កើនចំណេះដឹង និងអាចអានសៀវភៅដែលខ្លួនមិនមានសមត្ថភាពក្នុងការទិញមកអានបាន។

ថ្វីត្បិតតែបណ្ណាល័យសហគមន៍នេះបង្កើតឡើងសម្រាប់សាធារណៈជន ជាពិសេសប្រជាជនក្នុងសហគមន៍នេះផ្ទាល់ក្តី តែប្រជាជនក្នុងសហគមន៍នោះមិនសូវបានងាកមកចាប់អារម្មណ៍ក្នុងការអានសៀវភៅទេ ដូច្នេះការខ្ចីសៀវភៅពីបណ្ណាល័យនេះគឺនៅមានកម្រិតទាបនៅឡើយ។

កញ្ញា ប៉ិច លីដា បន្តថា៖ «អ្នកដែលចង់ខ្ចីសៀវភៅអានអាចមកខ្ចីអានបាន តែមិនសូវមានមនុស្សមកខ្ចីនោះឡើយ។ បណ្ណាល័យសហគមន៍ពិតជាសំខាន់ណាស់ ព្រោះវាជួយដល់យុវជនទទួលបានចំណេះដឹងជាច្រើន ពីការអានសៀវភៅពីបណ្ណាល័យសហគមន៍បន្ទាប់ពីការរៀននៅសាលា» ។

ការបង្កើតបណ្ណាល័យគឺមិនមានភាពងាយស្រួលឡើយ ជាពិសេសបណ្ណាល័យនៅតាមសហគមន៍ ដែលទាមទារជាច្រើនផ្នែកដើម្បីឱ្យបណ្ណាល័យដែលបង្កើតនោះអាចដំណើរការទៅមុខបាន។

កញ្ញា យ៉ែម បញ្ញា ក៏បានរៀបរាប់ទាំងរអាក់រអួលទាក់ទងនឹងឧបសគ្គនៃការបង្កើតបណ្ណាល័យសួន បញ្ញា នេះឡើងថា៖ «ពាក់កណ្តាលឆ្នាំ ២០១៨ ខ្ញុំចាប់ផ្តើមសាងសង់បណ្ណាល័យដោយប្រើប្រាស់ប្រាក់សន្សំ ហើយសម្ភារៈជាឈើពីម៉ាក់ប៉ា រួមទាំងទីធ្លាផ្ទះរបស់គាត់»។

កញ្ញាបន្ថែមថា បញ្ហាថវិកា ធនធានមនុស្ស នៅតែជាបញ្ហាប្រឈមដែលបណ្ណាល័យ សួន បញ្ញា កំពុងជួបប្រទះក្នុងពេលបច្ចុប្បន្ន ដែលធ្វើឱ្យការរីកដុះដាលនៃបណ្ណាល័យនេះមានសភាពយឺត ហើយជាពិសេសបណ្ណាល័យនេះស្ថិតក្នុងការបិទដំណើរការតាំងពីការរីករាលដាលជំងឺកូវីដ១៩មក។

យ៉ាងណាមិញ បណ្ណាល័យ សួន បញ្ញា ក៏បានទទួលការគាំទ្រពីយុទ្ធនាការមួយ ដែលមានជំនួយជាសៀវភៅ ការរកនូវយុទ្ធសាស្រ្តក្នុងការធ្វើឱ្យបណ្ណាល័យនេះមានការអភិវឌ្ឍ ក៏ដូចជាការចូលរួមផ្សព្វផ្សាយអំពីបណ្ណាល័យនេះដែរ។

កាលពីថ្ងៃទី០៦ ខែមករា ឆ្នាំ២០២៤ យុទ្ធនាការ «សៀវភៅមួយ សហគមន៍មួយ» បានរៀបចំដំណើរទស្សនៈកិច្ចទៅកាន់បណ្ណាល័យ សួន បញ្ញា ក្នុងគោលបំណងជួយឱ្យបណ្ណាល័យនេះអាចដំណើរការឡើងវិញក្រោយពេលបិទខ្ទប់អំឡុងពេលកូវីដ១៩។

យុទ្ធនាការនេះ បានចូលរួមចំណែកជាច្រើនក្នុងការធ្វើឱ្យបណ្ណាល័យសហគមន៍មានដំណើរការយ៉ាងរលូន ហើយបានផ្តល់ជាប្រយោជន៍ជាច្រើនសម្រាប់សិស្សានុសិស្សដែលរស់នៅទីតាំងនោះ។

លោក សុខ ឡាក់ សហស្ថាបនិកយុទ្ធនាការ សៀវភៅមួយ សហគមន៍មួយបានប្រាប់ Newsroom Cambodia ថា គោលដៅនៃយុទ្ធនាការនេះគឺដើម្បីជួយបង្កើនទម្លាប់ក្នុងការអាន និងមានបញ្ហាគោលផ្សេងទៀតដែលយុទ្ធនាការនេះព្យាយាមដោះស្រាយដោយបូកបញ្ចូលជាមួយកម្មវិធីជួយគាំទ្រដល់បណ្ណាល័យសហគមន៍តាមបណ្តាខេត្តក្រុង។

លោកលើកឡើងថា៖ «គោលដៅដែលចង់ដោះស្រាយនោះគឺ ទម្លាប់ក្នុងការអាន ដែលយើងព្យាយាមដោះស្រាយហ្នឹងទាក់ទងនឹងយុវជន»។

លោកបានបន្ថែមថា ៖ «បញ្ហាមួយទៀតដែលកើតឡើងគឺ បញ្ញាជម្ងឺអូទីសឹម ដែលឪពុកម្តាយដែលអត់សូវមានទម្លាប់ក្នុងការអានមានភាពធ្វេសប្រហែស ទុកឱ្យកូនគាត់ទៅលេងទូរស័ព្ទ ដូច្នេះយុទ្ធនាការនេះមានគោលដៅចង់បណ្តុះយុវជនដែលមានកូនឱ្យបង្កើនទម្លាប់ក្នុងការអានដើម្បីដោះស្រាយបញ្ហាទាំងអស់ហ្នឹង»។

លោកក៏បានសង្កេតឃើញពីសកម្មភាព និងសក្តានុពលរបស់បណ្ណាល័យ សួន បញ្ហា ដែលបានអនុវត្តជាច្រើនឆ្នាំមកហើយ តែបានអាក់ខានសកម្មភាពអំឡុងពេលកូវីដ ១៩ ហេតុដូចនេះទើបយុទ្ធនាការ សៀវភៅមួយ សហគមន៍មួយ បានមកដល់ទីតាំងនៃបណ្ណាល័យនេះផ្ទាល់ក្នុងគោលបំណងឱ្យបើកដំណើរការបណ្ណាល័យនេះឡើងវិញ។

លោក សុខ ឡាក់ ក៏បានលើកឡើងពីមូលហេតុដែលនាំឱ្យមានយុទ្ធនាការនេះឡើងដែរថា៖ «យុវជនយើងមានបញ្ហាជាច្រើន បញ្ហាទាំងធនធានមនុស្ស បញ្ហាទាំងគុណភាពការងារ បញ្ហាទាំងការគិត បញ្ហាប្រឈមនឹងការរកការងារធ្វើ ការរៀនហ្នឹង ចឹងយើងចង់ចូលរួមចំណែកមួយតូចក្នុងការដោះស្រាយបញ្ហាទាំងអស់នេះ»។

បណ្ណាល័យលក្ខណៈជាសហគមន៍មានសភាពតូច តែពោរពេញទៅដោយសៀវភៅនៅផ្នែកខាងក្នុង ជាប្រភពនៃចំណេះដឹង ដែលសិស្សានុសិស្សអាចប្រើប្រាស់ជាផលប្រយោជន៍ពីបណ្ណាល័យសហគមន៍នោះ។

លោក សុខ ឡាក់ ក៏បានគូសបញ្ជាក់ផងដែរថា៖ «បណ្ណាល័យសហគមន៍បើកជាសាធារណៈ ដូច្នេះអ្នកដែលនៅជុំវិញភូមិអាចទៅប្រើប្រាស់សេវាកម្មបណ្ណាល័យទាំងអស់នឹង ដែលជាលក្ខណៈពិសេសរបស់បណ្ណាល័យសហគមន៍»។

ក្នុងថ្ងៃដដែលនៃយុទ្ធនាការ សៀវភៅមួយ សហគមន៍មួយនេះ លោក ទឹម ម៉ានី អាយុ៧៨ឆ្នាំ ជាអ្នកនិពន្ធសៀវភៅ ក៏បានអញ្ជើញមកចែករំលែកទាក់ទងនឹងវិធីសាស្រ្តអានសៀវភៅចូលរួមប្រកួតប្រជែងការអាន។

លោក ទីម ម៉ានី បានលើកឡើងថា ការងាកមកអានសៀវភៅគឺជាភារកិច្ចរបស់យុវជនគ្រប់រូប ព្រោះចំណេះដឹងគឺកើនឡើងក្រោយពីការអាន ទោះបីអានតិចក្តីច្រើនក្តី ក៏ទទួលបានផលវិជ្ជមាន ហើយកុំព្យាយាមខ្ជះខ្ជាយពេលវេលាលើទូរស័ព្ទច្រើន។

លោកលើកឡើងថា៖ «សំខាន់ឱ្យសិស្សបានអានបានមើលសៀវភៅ មិនមែនលោកគ្រូហាមផ្ដាច់មិនឱ្យលេងទូរសព្ទ កុំព្យូទ័រទេ យើងចង់ឱ្យគាត់ងាកមកអានសៀវភៅវិញ»។

លោកបន្ថែមដែរថា យុវជនមួយចំនួនចាប់ផ្តើមបាត់បង់ការប្រើប្រាស់អក្សរសាស្រ្តខ្មែរដែលនាំគ្នាងាកទៅរកការប្រើប្រាស់សំនៀងអង់គ្លេស ដែលនាំឱ្យប៉ះពាល់ដល់វប្បធម៌ជាតិខ្មែរ។

លោកបាននិយាយថា៖ «ព្រោះអក្សសាស្រ្តខ្មែរយើងកំពុងតែលុតចុះបន្តិចម្ដងៗដោយសារកូនខ្មែរមួយចំនួនគាត់ចូលចិត្ត សរសេរអក្សរខ្មែរជាភាសារបរទេស អង់គ្លេស ហើយជាសំនៀងខ្មែរខុស ព្រោះអនាគតទៅអាចខ្លាចដូចជាប្រទេសមួយចំនួនដែលសម័យបារាំងកាន់កាប់ គាត់បន្ថែមសក់បន្ថែមអីទៅក្លាយជារបស់បារាំង ដូច្នេះយើងចង់ឱ្យខ្មែរសរសេរខ្មែរឱ្យត្រូវនឹងអក្ខរាវិរុទ្ធដែលមានវចនានុក្រម សម្ដេច ជួន ណាត លោកជាប្រធានបាទសុំអរគុណកូន»។

ក្តីស្រមៃរបស់កញ្ញា យ៉ែម បញ្ញា បានក្លាយជាការពិត ក្រោយពីការខិតខំរបស់កញ្ញា ដែលព្យាយាមបង្កើតបណ្ណាល័យនេះឡើងសម្រាប់សហគមន៍របស់កញ្ញាផ្ទាល់ ទោះបីជាបណ្ណាល័យនេះបច្ចុប្បន្នមិនមានអ្នកឧបត្ថម្ភច្រើនក្តី។

កញ្ញាចង់ឃើញយុវជនជំនាន់ក្រោយអាចបង្កើតបណ្ណាល័យសហគមន៍ ដែលជាចំណែកមួយធំជួយដល់សហគមន៍ខ្លួន ដែលជាចំណុចក្នុងការអភិវឌ្ឍចំណេះដឹងរបស់យុវជនគ្រប់រូប។

កញ្ញាបាននិយាយថា៖ «ខ្ញុំចង់ឱ្យមានអ្នកបន្តវេនការងារហ្នឹងបន្ថែមទៀត អត់ចង់មានតែខ្ញុំ ដោយធ្វើយ៉ាងណាបណ្តុះយុវជនផ្សេងទៀតអាចយកគំនិតហ្នឹងមិនថាក្នុងភូមិទេគឺអ្នកផ្សេងៗទៀត»៕

លោក ហ៊ុន ម៉ាណែត ប្រកាសឱ្យអនុវត្តកម្មវិធីជាតិជំនួយសង្គមឆ្លើយតបនឹងគ្រោះអាសន្ន

អេង សិតសុខលីលី (Eng Setsoklily) — Tue, 09 Jan 2024 03:05:41 +0000

លោកនាយករដ្ឋមន្រ្ដីហ៊ុន ម៉ាណែត ប្រកាសឱ្យអនុវត្តក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងកិច្ចគាំពារសង្គមឆ្លើយតបនឹងគ្រោះអាសន្ន នាខែមេសា ឆ្នាំ២០២៤ខាងមុខ ដើម្បីជួយដល់គ្រួសារក្រីក្រ និងជនងាយរងគ្រោះក្រោយពីត្រូវបានបិទបញ្ចប់កម្មវិធីប្រយុទ្ធកូវីដ១៩។

ថ្លែងក្នុងពិធីប្រកាសឱ្យអនុវត្តកម្មវិធីគោលការណ៍ណែនាំស្ដីពីក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងគោលការណ៍ណែនាំស្ដីពីក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្ន កាលពីព្រឹកថ្ងៃអង្គារ ទី៥ ខែធ្នូ ឆ្នាំ២០២៣ លោក ហ៊ុន ម៉ាណែត លើកឡើងថា គោលការណ៍ណែនាំ ពាក់ព័ន្ធកម្មវិធីជាតិជំនួយសង្គមនឹងក្លាយជាផែនទីបង្ហាញផ្លូវ សម្រាប់តម្រង់ទិសការអនុវត្តកម្មវិធី និងប្រព័ន្ធគាំពារសង្គម ។

លោកបញ្ជាក់ថា៖ «តាំងពីសម័យបញ្ចប់សង្រ្គាមមក ជីវភាពរបស់ប្រជាជនហាក់ដូចជាមានការរីកចម្រើនឡើង ក្នុងនោះអត្រាភាពក្រីក្រក៏បានកាត់បន្ថយផងដែរ ។ ជាក់ស្ដែង ក្នុងរយៈពេលជាង១៥ឆ្នាំមកនេះ អត្រាភាពក្រីក្របានកាត់បន្ថយតាំងពីឆ្នាំ២០០៧ ជាង ៤៧% ទៅដល់ឆ្នាំ ២០១៧ ក្រោម១០% តែដោយសារបញ្ហាកូវីដ ១៩ ក៏បានកើនឡើងទៅដល់ជាង ១៧%»។

លោកបន្ថែមដោយបញ្ជាឱ្យត្រៀមលក្ខណៈជួយប្រជាពលរដ្ឋក្នុងការជួបវិបត្ដិសង្គមជាយថាហេតុណាមួយកើតឡើងនាពេលខាងមុខ ហើយអត្តសញ្ញាណកម្មគ្រួសារក្រីក្រ គឺជាឆ្អឹងខ្នងនៃការអន្តរាគមន៍គាំពារសង្គមនានាផងដែរ។

កម្មវិធីជាតិជំនួយសង្គមក្នុងកញ្ចប់គ្រួសារនេះនឹងចាប់ផ្ដើមអនុវត្តនៅខែមេសា ឆ្នាំ២០២៤ ខាងមុខនេះដើម្បីជួយទ្រទ្រង់គ្រួសារក្រីក្រ និងជនងាយរងគ្រោះបន្ទាប់ពីកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងជនងាយរងគ្រោះ ក្នុងអំឡុងពេលប្រយុទ្ធជំងឺកូវីដ១៩ត្រូវបានបិទបញ្ចប់។

កម្មវិធីចំនួន៤នឹងត្រូវធ្វើសមាហរណមុខងារក្រោមកញ្ចប់គ្រួសាររួមមាន កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ កម្មវិធីអាហារូបករណ៍សម្រាប់សិស្សក្រីក្រថ្នាក់បឋមសិក្សា និងមធ្យមសិក្សា កម្មវិធីឧបត្ថម្ភសាច់ប្រាក់ជូនជនមានពិការភាព កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ ៦០ឆ្នាំឡើង) ។

លោកនាយករដ្ឋមន្រ្តីបន្ថែមថា ការអនុវត្តកម្មវិធីជាតិជំនួយគាំពារសង្គមទាំងនេះ ដើម្បីឱ្យសម្រេចបាននូវចក្ខុវិស័យប្រែក្លាយប្រទេសកម្ពុជាកា្លយជាប្រទេសមានចំណូលមធ្យមកម្រិតខ្ពស់ ឆ្នាំ២០៣០ និងជាប្រទេសមានចំណូលខ្ពស់ឆ្នាំ២០៥០ ដោយផ្អែកលើមនុស្សជាចម្បងក្នុងការបន្តជំរុញប្រព័ន្ធគាំពារដោយលក្ខណៈប្រមូលផ្ដុំ សុគតភាព ប្រសិទ្ធភាព និងចីរភាព៕

អគ្គិសនីកម្ពុជាបញ្ចុះថ្លៃអគ្គិសនីចំពោះអ្នកប្រើប្រាស់ប្រភេទពាណិជ្ជកម្ម អាជីវកម្ម និងសេវាកម្មក្នុងវិស័យទេសចរណ៍

អេង សិតសុខលីលី (Eng Setsoklily) — Fri, 05 Jan 2024 04:34:43 +0000

អាជ្ញាធរអគ្គិសនីកម្ពុជាបានសម្រេចកាត់បន្ថយថ្លៃអគ្គិសនីដែលភ្ជាប់បណ្តាញអគ្គិសនីជាតិ ក្នុងក្របខ័ណ្ឌជាតិ ដើម្បីកាត់បន្ថយចំណាយរបស់អ្នកប្រើប្រាស់ប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍។

ក្នុងសេចក្តីជូនដំណឹងរបស់អាជ្ញាធរអគ្គិសនីកម្ពុជា (EDC ) ចេញកាលពីថ្ងៃទី០៤ ខែធ្នូ ឆ្នាំ២០២៣ អាជ្ញាធរអគ្គិសនីកម្ពុជា (EDC) និងរាជរដ្ឋាភិបាលកម្ពុជាបានជូនដំណឹងឱ្យអនុវត្តការអនុគ្រោះតម្លៃអគ្គិសនីសម្រាប់បរិមាណ អគ្គិសនីដែលប្រើប្រាស់លើសពីមធ្យមភាគក្នុងរយៈពេល ៣ ខែ ចាប់ពីខែធ្នូ ឆ្នាំ២០២៣ ដល់ខែកុម្ភៈ ឆ្នាំ២០២៤ ដើម្បីជំរុញសហគ្រាសទេសចរណ៍នៅចុងឆ្នាំ២០២៣ និងដើមរដូវឆ្នាំ២០២៤។

សេចក្តីជូនដំណឹងដដែលបញ្ជាក់ថា ក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជានឹងបញ្ចុះថ្លៃអគ្គិសនី ១៥% ចំពោះបរិមាណថាមពលដែលប្រើលើសពីការប្រើមធ្យមក្នុងរយៈពេល ៦ខែកន្លងមករបស់អ្នកប្រើប្រាស់ អគ្គិសនីប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍។

អគ្គិសនីកម្ពុជាបន្ថែមថា ការអនុវត្តត្រូវធ្វើឡើងតាមគោលការណ៍ និងលក្ខខណ្ឌ ដូចជា អ្នកប្រើប្រាស់ប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍ អ្នកប្រើប្រាស់ធុនតូចទិញពីខ្សែបណ្តាញចែកចាយ LV សាធារណៈ រួមមាន សណ្ឋាគារ និង ផ្ទះសំណាក់ (មានអត្រាថ្លៃលក់ជារៀល) អ្នកប្រើប្រាស់ធុនមធ្យម ទិញតាមនាឡិកាស្ទង់តង់ស្យុងទាប ឬតង់ស្យុងមធ្យម (មានអត្រា លក់ជាដុល្លារ) អតិថិជនធុនធំ ទិញពីទ្វារចរន្តតង់ស្យុងមធ្យមនៃអនុស្ថានីយ និង អតិថិជនធុនដុំទិញពីខ្សែបណ្តាញតង់ស្យុងខ្ពស់ លើកលែងតែអតិថិជនពាណិជ្ជកម្ម អាជីវកម្ម មួយចំនួនដូចជា គ្រឹះស្ថានសិក្សា វិស័យសុខាភិបាល គ្រឹះស្ថានហិរញ្ញវត្ថុ ក្រុមហ៊ុនធានារ៉ាប់រង ក្រុមហ៊ុនដឹកជញ្ជូន អគាររដ្ឋបាល ជាដើម មិនទទួលបានការបញ្ចុះថ្លៃនេះទេ ។

សម្រាប់លក្ខខណ្ឌដែលត្រូវបញ្ចុះថ្លៃ គឺបញ្ចុះថ្លៃអគ្គិសនី ១៥% សម្រាប់បរិមាណថាមពលអគ្គិសនីប្រើប្រចាំខែដែលលើសពីមធ្យម ភាគក្នុងរយៈពេល ៦ខែកន្លងមក ក្នុងលក្ខខណ្ឌធម្មតា ការបញ្ចុះថ្លៃនេះចំពោះតែបរិមាណថាមពលអគ្គិសនី (kWh) ដែលប្រើលើស ប៉ុណ្ណោះ។

សម្រាប់រយៈពេលដែលត្រូវបញ្ចុះថ្លៃ អគ្គិសនីកម្ពុជាបញ្ជាក់ថា ចំពោះថាមពលដែលប្រើនៅខែធ្នូ ឆ្នាំ២០២៣ ដល់ ខែកុម្ភៈ ឆ្នាំ២០២៤ រយៈពេលនេះអាចបន្ថែមទៀត អាស្រ័យលើលទ្ធភាពហិរញ្ញវត្ថុរបស់អគ្គិសនីកម្ពុជា។

អាជ្ញាធរអគ្គិសនីកម្ពុជាក៏បានបន្ថែមថា ចំពោះអ្នកប្រើប្រាស់អគ្គិសនីដែលយល់ថា ការប្រើប្រាស់អគ្គិសនីរបស់ខ្លួនស្របតាមលក្ខខណ្ឌខាងលើ អាចដាក់ពាក្យស្នើសុំទៅអ្នកផ្គត់ផ្គង់ដែលឋិតក្នុងតំបន់ដែលខ្លួនកំពុងប្រើអគ្គិសនី ដើម្បីទទួលបានការបញ្ចុះថ្លៃនេះ៕

ក្រសួងសុខាភិបាលហាមឃាត់ការចែកចាយ ឬលក់ឱសថឈ្មោះ SATTOCHI ដែលគ្មានលេខបញ្ជិកា

អេង សិតសុខលីលី (Eng Setsoklily) — Fri, 05 Jan 2024 04:05:14 +0000

ក្រសួងសុខាភិបាលបានជូនដំណឹងដល់សាធារណៈជនទាំងអស់មិនត្រូវទិញ ឬប្រើប្រាស់ឱសថឈ្មោះ SATTOCHI ដែលគ្មានលេខបញ្ជិកាពីក្រសួង ដើម្បីជៀសវាងផលប៉ះពាល់ដល់សុខភាព ឬអាចមានគ្រោះថ្នាក់ដល់អាយុជីវិតរបស់អ្នកប្រើប្រាស់ ។

តាមសេចក្ដីជូនព័ត៌មាននៅថ្ងៃទី០៦ ខែធ្នូ ឆ្នាំ២០២៣ បានបញ្ជាក់ថា ក្រសួងសុខាភិបាលនៃព្រះរាជាណាចក្រកម្ពុជា បានចុះពិនិត្យការលក់ថ្នាំ SATTOCHI ដែលជាថ្នាំគ្មានអាជ្ញាប័ណ្ណដែលបាន និងកំពុងផ្សព្វផ្សាយលក់នៅតាមបណ្ដាញសង្គមហ្វេសប៊ុក (facebook) ឈ្មោះមជ្ឃមណ្ឌលព្យាបាលជំងឺទឹកនោមផ្អែម ដែលភ្ជាប់ទៅនឹងវេបសាយ https://www.sattochidiabetes.com/campuchia ។

តាមសេចក្ដីជូនព័ត៌មានដដែលបានបញ្ជាក់ថា៖ «អនុលោមតាមច្បាប់ ស្ដីពីការគ្រប់គ្រងឱសថ និងច្បាប់ស្ដីពីវិសោធនកម្មច្បាប់ ស្ដីពីការគ្រប់គ្រងឱសថ តម្រូវឲ្យរាល់ការចរាចរណ៍ឱសថ និងផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខបញ្ជិកាពីក្រសួងសុខាភិបាល»។

ក្រសួងបន្ថែមថា មុននឹងទិញឱសថគ្រប់ប្រភេទ សូមពិនិត្យមើលលតាបត្របញ្ជិកាដែលមានបិទលើសំបកវេចខ្ចប់ ហើយលតាបត្រដែលត្រឹមត្រូវ គឺមានពីរផ្នែក ផ្នែកខាងលើមានឈ្មោះគ្រឹះស្ថានអាហរ័ណ នីហរ័ណឱសថ ផ្នែកខាងក្រោមមានលេខបញ្ជិកា ដូចមានគំរូភ្ជាប់មកជាមួយ ។

ក្រសួងសុខាភិបាលក៏បានតម្រូវឱ្យបុគ្គលណាដែលបានចែកចាយ ឬលក់ឱសថដែលគ្មានលេខបញ្ចិកាខាងលើ សូមបញ្ឈប់ការចូលរួមផ្សព្វផ្សាយ ឬលក់បន្ដ បើមិនដូច្នេះទេ ក្រសួងនឹងមានវិធានការតាមផ្លូវច្បាប់ទៅតាមវិសោធនកម្មច្បាប់ស្ដីពីការគ្រប់គ្រងឱសថ។

បើតាមសេចក្តីជូនព័ត៌មានដដែល ក្នុងករណីឃើញមានជនណាដែលកំពុងចែកចាយ ឬលក់ឱសថខាងលើ ត្រូវប្រញាប់ផ្ដល់ដំណឹងឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង សូមទាក់ទងតាមរយៈលេខទូរសព្ទ ០១២ ៣៥៥ ១៦១ / ០១២ ៩៨៣ ៣៣៤៕

ក្រសួងការងារជូនដំណឹងពីករណីឆបោកលើការជ្រើសរើសពលករទៅធ្វើការនៅអ៊ីស្រាអែល

អេង សិតសុខលីលី (Eng Setsoklily) — Thu, 04 Jan 2024 08:12:48 +0000

ក្រសួងការងារជូនដំណឹងដល់ប្រជាពលរដ្ឋកម្ពុជាអំពីករណីឆបោកនៃការជ្រើសរើសពលករខុសច្បាប់ទៅធ្វើការងារនៅប្រទេសអ៊ីស្រាអែល ដោយបញ្ជាក់ថា កម្ពុជាមិនទាន់មានកិច្ចព្រមព្រៀងជាផ្លូវការជាមួយអ៊ីស្រាអែលទាក់ទងនឹងការផ្ទេរកម្លាំងពលករនៅឡើយ។

ក្នុងសេចក្ដីជូនដំណឹងរបស់ក្រសួងការងារចេញនៅថ្ងៃទី៣ ខែមករា ឆ្នាំ២០២៤ បញ្ជាក់ថា ក្រសួងការងារ កំពុងចរចាជាមួយតំណាងអ៊ីស្រាអែលដើម្បីពិភាក្សាលើសេចក្តីព្រាងអនុស្សរណៈនៃការយោគយល់គ្នាស្តីពីការជ្រើសរើស និងការបញ្ជូនពលករឲ្យបានត្រឹមត្រូវផងដែរ។

សេចក្តីជូនដំណឹងដដែលបន្ថែមថា ការជ្រើសរើស និងការបញ្ជូនពលករទៅធ្វើការនៅបរទេសដោយខុសច្បាប់ គឺជាបទល្មើសជួញដូរមនុស្ស។

ក្រសួងការងារបញ្ជាក់បន្ថែមតាមន័យដើមថា៖ «ក្នុងករណីបានឃើញ ឬមានការផ្សព្វផ្សាយជ្រើសរើសពលករទៅបម្រើការងារននីប្រទេសអ៊ីស្រាអែលក្នុងរូបភាពណាក៏ដោយ សូមមេត្តាជូនដំណឹង ឬរាយការណ៍មកក្រសួងការងារ និងបណ្តុះបណ្តាលវិជ្ជាជីវៈតាមរយៈ Hotline: ១២៩៨ ជាបន្ទាន់ ដើម្បីអាចឱ្យក្រសួងពិនិត្យ និងចាត់វិធានការតាមផ្លូវច្បាប់»។

សេចក្តីជូនដំណឹងរបស់ក្រសួងការងារចេញ បន្ទាប់ពីរដ្ឋមន្រ្តីក្រសួងការងារ លោក ហេង សួរ បានផ្សព្វផ្សាយសារក្នុងបណ្តាញសង្គមតេឡេក្រាមរបស់លោកនៅថ្ងៃជាមួយគ្នានោះថា លោកទទួលបានព័ត៌មានថាមាន បុគ្គលមួយរូបដែលមានឈ្មោះក្នុងតេលេក្រាមថា MEAN Sodara បានបង្កើតតេលេក្រាមឆានែលមួយឈ្មោះ ISRAEL WORK 2024 ដើម្បីជ្រើសរើស និងបញ្ជូនពលករឱ្យទៅធ្វើការងារនៅប្រទេសអ៊ីស្រាអែលដោយខុសច្បាប់។

លោកបញ្ជាក់ថា៖ «សូមសាធារណជនមេត្តាជ្រាប និងប្រុងប្រយ័ត្នកុំចាញ់បោកបុគ្គល MEAN Sodara ឬខ្លឹមសារដែលបានផ្សព្វផ្សាយនៅតេលេក្រាមឆានែល ISRAEL WORK 2024 ឱ្យសោះ។ ហើយក្រសួងនឹងកំពុងធ្វើការជាមួយគណៈកម្មាធិការជាតិប្រយុទ្ធប្រឆាំងការជួញដូរមនុស្សដើម្បីចាត់វិធានការដល់បុគ្គលពាក់ព័ន្ធ»។

លោកបន្ថែមថា ក្រសួងការងារនឹងជូនដំណឹងជាសាធារណៈនៅពេលដែលកម្ពុជាមានកិច្ចព្រមព្រៀង និងយន្តការគ្រប់គ្រង ការពារ និងគាំពារពលករនៅប្រទេសអ៊ីស្រាអែលជាផ្លូវការក្នុងពេលអនាគត នៅពេលដែលមានកិច្ចព្រមព្រៀងច្បាស់លាស់ និងវិធីសាស្ត្រគ្រប់គ្រងជាក់លាក់ក្នុងការការពារ និងគាំពារសិទ្ធិពលករកម្ពុជានៅប្រទេសអ៊ីស្រាអែល៕

ក្រសួងសុខាភិបាលអំពាវនាវឱ្យបង្កើនការប្រុងប្រយ័ត្នវីរុសកូវីដ១៩បំប្លែងថ្មីប្រភេទអូមីក្រុង JN.1

អេង សិតសុខលីលី (Eng Setsoklily) — Wed, 03 Jan 2024 09:42:19 +0000

ក្រសួងសុខាភិបាលប្រកាសរកឃើញវីរុសកូវីដ១៩ប្រភេទថ្មីឈ្មោះថា អូមីក្រុង JN.1 និងអំពាវនាវឱ្យមានការចូលរួមអនុវត្តវិធានការបង្ការ និងទប់ស្កាត់ការឆ្លង។

ក្នុងសេចក្ដីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី២៨ ខែធ្នូ ឆ្នាំ២០២៣បានឱ្យដឹងថា ក្រសួងបានរកឃើញវីរុសបំប្លែងថ្មីប្រភេទអូមីក្រុង JN.1 (Omicron JN.1) ចំនួន ៤ករណីលើអ្នកជំងឺបួននាក់ដែលបានធ្វើរោគវិនិច្ឆ័យដំបូងថាមានប្រភេទនេះ។ បច្ចុប្បន្នពួកគេបានជាសះស្បើយពេញលេញ និងកំពុងស្ថិតក្រោមការដាក់ឱ្យនៅដាច់ដោយឡែកនៅគេហដ្ឋានរបស់ពួកគេ។

ក្រសួងបញ្ជាក់ថា អង្គការសុខភាពពិភពលោក (WHO) បានចាត់ថ្នាក់វ៉ារ្យ៉ង់ថ្មីនេះថាជាវ៉ារ្យង់នៃចំណាប់អារម្មណ៍ (VOI) ដោយបង្ហាញថាវាមិនធ្ងន់ធ្ងរពេកទេហើយបច្ចុប្បន្នមិនបង្កើតជាវ៉ារ្យង់នៃការព្រួយបារម្ភ (VOC) ទេ។ ហើយប្រព័ន្ធតាមដានជំងឺឆ្លងរបស់ក្រសួងសុខាភិបាលក៏បានបញ្ជាក់ពីការសង្កេតឃើញការកើនឡើងនៃករណីជំងឺកូវីដ-១៩ កើតឡើងជាពិសេសក្នុងចំណោមបុគ្គលដែលចូលប្រើប្រាស់សេវាថែទាំសុខភាព។

ក្រសួងក៏កំពុងជំរុញឲ្យប្រជាពលរដ្ឋទូទៅរក្សាការប្រកាន់ខ្ជាប់យ៉ាងម៉ឺងម៉ាត់ចំពោះគោលការណ៍ណែនាំបង្ការ ដើម្បីទប់ស្កាត់ការរីករាលដាលនៃប្រភេទថ្មីនេះ។ វិធានការទាំងនេះរួមមាន ការលាងដៃជាប្រចាំជាមួយសាប៊ូ ឬការប្រើទឹកអាកុលលាងដៃ ពាក់ម៉ាស់ និងអនុវត្តសុជីវធម៌ផ្លូវដង្ហើម ដូចជាខ្ទប់មាត់ និងច្រមុះពេលក្អក ឬកណ្តាស់។

ក្រសួងក៏ផ្តោតជាពិសេសទៅលើក្រុមដែលមានហានិភ័យខ្ពស់ រួមមានកុមារ មនុស្សចាស់ និងអ្នកដែលមានបញ្ហាសុខភាពពីមុនមក ដោយណែនាំពួកគេឱ្យជៀសវាងការជួបជុំគ្នាច្រើន និងរក្សាគម្លាតសង្គម។

តាមសេចក្ដីជូនដំណឹងដដែលបញ្ជាក់ថា ចំពោះបុគ្គលដែលចេញរោគសញ្ញាដូចជា គ្រុនក្តៅ ក្អក ឬពិបាកដកដង្ហើមត្រូវប្រញាប់ទៅជួបគ្រូពេទ្យជាបន្ទាន់ ឬប្រជាពលរដ្ឋអាចទទួលបានព័ត៌មានបន្ថែម និងស្វែងរកជំនួយតាមរយៈលេខទូរសព្ទបន្ទាន់លេខ ១១៥ របស់ក្រសួងសុខាភិបាល ៕

ក្រសួងពាណិជ្ជកម្មកម្ពុជាកំពុងចាត់ការក្រុមហ៊ុនមួយចំនួននៅអាមេរិកដែលប្រើសញ្ញាជាតិដោយគ្មានការអនុញ្ញាត

អេង សិតសុខលីលី (Eng Setsoklily) — Sat, 23 Dec 2023 05:38:04 +0000

ក្រសួងពាណិជ្ជកម្មកម្ពុជាកំពុងសហការជាមួយស្ថាប័នមានសមត្ថកិច្ចដើម្បីចាត់វិធានការផ្លូវច្បាប់លើការប្រព្រឹត្តល្មើសដោយក្រុមហ៊ុនមួយចំនួននៅសហរដ្ឋអាមេរិក ដែលកំពុងប្រើប្រាស់ស្លាកសញ្ញាដែលជានិមិត្តសញ្ញាជាតិកម្ពុជាលើសម្បកវេចខ្ចប់ផលិតផលដាក់លក់លើទីផ្សារសហរដ្ឋអាមេរិក។

ក្នុងសេចក្តីប្រកាសព័ត៌មានរបស់ក្រសួងពាណិជ្ជកម្មចេញកាលពីថ្ងៃទី២០ ខែធ្នូ ឆ្នាំ២០២៣ បញ្ជាក់ថា នាពេលថ្មីៗនេះ ក្រសួងបានសង្កេតឃើញមានការប្រើប្រាស់រូបភាពប្រាសាទបាយ័ន និងប្រាសាទអង្គរវត្តនៅលើសម្បកវេចខ្ចប់ផលិតផលសរសៃគុយទាវបាញ់កាញ់ក្រៀម និងមុខទំនិញខ្លះទៀតដែលបានដាក់លើលើទីផ្សារនានា តាមហាងលក់ទំនិញ និងតាមទីផ្សារអនឡាញនៅរដ្ឋកាលីហ្វ័រញ៉ា និងនៅរដ្ឋដទៃទៀតក្នុងសហរដ្ឋអាមេរិក ដោយពុំមានការអនុញ្ញាតពីអាជ្ញធរមានសមត្ថកិច្ចកម្ពុជា។

ក្នុងសេចក្តីប្រកាសព័ត៌មានដដែលបន្ថែមថា៖ «ក្រសួងពាណិជ្ជកម្មបាននិងកំពុងសហការជាមួយក្រសួង និងស្ថាប័នមានសមត្ថកិច្ចដើម្បីមានវិធានការផ្លូវច្បាប់លើការប្រព្រឹត្តល្មើសដោយក្រុមហ៊ុន SENG CHEANG MONG FOOD CORP ដែលមានទីតាំងនៅរដ្ឋកាលីហ្វ័រញ៉ា សហរដ្ឋអាមេរិក កំពុងប្រើប្រាស់ស្លាកសញ្ញាប្រាសាទបាយ័នលើសម្បកវេចខ្ចប់សរសៃបាញ់កាញ់ក្រៀម ដាក់លក់លើទីផ្សារផ្ទាល់ និងទីផ្សារអនឡាញក្នុងរដ្ឋកាលីហ្វ័រញ៉ា និងរដ្ឋផ្លរីដាសហរដ្ឋអាមេរិក និងក្រុមហ៊ុនដទៃទៀតផងដែរ»។

ញូសន៍រូមខេមបូឌា (Newsroom Cambodia) មិនអាចទាក់ទងសុំការអត្ថាធិប្បាយបន្ថែមពីអ្នកនាំពាក្យក្រសួងពាណិជ្ជកម្មលោក ប៉ែន សុវិជាតិ បានទេ ដោយខលចូលតែលោកប្រាប់ថារវល់។ លោកក៏មិនព្រមឆ្លើយតបសារលើបណ្តាញសង្គមតេឡេក្រាមដែរ រហូតដល់ល្ងាចថ្ងៃសុក្រនេះ។

ក្នុងសេចក្តីប្រកាសព័ត៌មានដដែល ក្រសួងពាណិជ្ជកម្មក៏បានអំពាវនាវដល់ប្រជាពលរដ្ឋទាំងក្នុង និងក្រៅប្រទេស ជួយសហការផ្តល់ព័ត៌មានតាមរយ:លេខ ០១២ ៨១៦ ៦៦៣ ០១២ ៣៨៧ ៨៧៨ និង០១២ ៦៦៦ ៩៧៥ ក្នុងករណីប្រហាក់ប្រហែលនឹងអំពើល្មើសខាងលើ ដើម្បីការពារវប្បធម៌ ប្រពៃណី និងសម្បត្តិជាតិ និងលើកស្ទួយដល់កិត្តិនាម និងកេរ្តិ៍ឈ្មោះរបស់កម្ពុជា៕

ក្រុមប្រឹក្សាអភិវឌ្ឍន៍កម្ពុជាចុះបញ្ជីគម្រោងវិនិយោគចំនួន១៥ ទុនជាង២៤៧លានដុល្លារ

អេង សិតសុខលីលី (Eng Setsoklily) — Fri, 22 Dec 2023 02:10:35 +0000

ក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីសំណើគម្រោងវិនិយោគចំនួន ១៥ ដែលមានទុនសរុបជាង ២៤៧ លានដុល្លារសហរដ្ឋអាមេរិក ដោយអាចបង្កើតការងារជាង១៦,០០០កន្លែង។

តាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍ចេញនៅថ្ងៃទី២០ ខែធ្នូ ឆ្នាំ២០២៣ បញ្ជាក់ថា គម្រោងវិនិយោគចំនួន ១៥ ក្នុងនោះមានគម្រោងវិនិយោគតាមវិស័យឧស្សាហកម្មចំនួន ១៤ និងហេដ្ឋារចនាសម្ព័ន្ធ និងផ្សេងៗចំនួន១។

សេចក្ដីប្រកាសព័ត៌មានដដែលបន្ថែមថា គម្រោងវិនិយោគដែលទទួលបានការអនុម័តរួមមាន គម្រោងវិនិយោគស្ថានីយន៍ផលិតអគ្គិសនីដើរដោយថាមពលពន្លឺព្រះអាទិត្យ រោងចក្រកាត់ដេរសម្លៀកបំពាក់ រោងចក្រផលិតសម្ភារៈវេចខ្ចប់កេសកាតុង និងថង់ប្លាស្ទិក រោងចក្រផលិតស្បែកជើង គ្រឿងបន្សំស្បែកជើង និងកាបូប រោងចក្រផលិតសម្ភារៈសត្វចិញ្ចឹម រោងចក្រផលិតសម្ភារៈតុបតែងគេហដ្ឋាន ស៊ុមរូបថត អំពូលភ្លើង អំពូលភ្លើងលំអ និងសម្ភារៈតុបតែងដើមណូអែល សម្ភារៈបន្ទប់ទឹកនិងគ្រឿងបង្គុំវាំងនន គ្រឿងអេឡិចត្រូនិក និងតុក្កតាសម្រាប់តាំងលំអរសួនច្បារ ៕

អគ្គនាយកដ្ឋានពន្ធដាររំឭកឱ្យម្ចាស់យានយន្តទៅបង់ពន្ធលើមធ្យោបាយដឹកជញ្ជូនសម្រាប់ឆ្នាំ២០២៣

អេង សិតសុខលីលី (Eng Setsoklily) — Wed, 20 Dec 2023 05:23:12 +0000

អគ្គនាយកដ្ឋានពន្ធដារបានក្រើនរំឮកឱ្យម្ចាស់យានយន្តដែលខកខានមិនបានប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣កន្លងទៅ ត្រូវរួសរាន់ទៅប្រកាសបង់ពន្ធ និងបង់ពន្ធបន្ថែមចំពោះការយឺតយ៉ាវតាមច្បាប់ជាធរមាន។

ក្នុងសេចក្ដីជូនដំណឹងរបស់អគ្គនាយកដ្ឋានពន្ធដារចេញនៅថ្ងៃទី១៨ ខែធ្នួ បានបញ្ជាក់ថា អាជ្ញាធរមានសមត្ថកិច្ចថ្នាក់ក្រោមជាតិនឹងចុះត្រួតពិនិត្យការ ប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣នៅតាមគោលដៅមួយចំនួនលើកំណាត់ផ្លូវសំខាន់ៗនៅរាជធានី-ខេត្ត ចាប់ពីថ្ងៃទី១៥ ខែមករា រហូតដល់ថ្ងៃទី៣១ ខែមីនា ឆ្នាំ២០២៤។

តាមសេចក្ដីជូនដំណឹងដដែលបន្ថែមថា៖ «ក្នុងករណីម្ចាស់យានយន្តខកខានមិនបានប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣កន្លងទៅ សូមមេត្តារួសរាន់អញ្ជើញទៅប្រកាសបង់ពន្ធ និងបង់ពន្ធបន្ថែមចំពោះការយឺតយ៉ាវក្នុងការប្រកាសបង់ពន្ធតាមច្បាប់ជាធរមាន»។

អគ្គនាយកដ្ឋានពន្ធដារបន្ថែមថា ការបង់ពន្ធអាចធ្វើឡើងនៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត-ខណ្ឌ ឬនៅធនាគារដែលជាដៃគូសហការជាមួយអគ្គនាយកដ្ឋាន ឬអាចបង់តាមរយៈកម្មវិធី GDT Taxpayer App ដើម្បីចៀសវាងអាជ្ញាធរមានសមត្ថកិច្ចថ្នាក់ក្រោមជាតិ ធ្វើការឃាត់យានយន្តតាមដងផ្លូវតម្រូវឱ្យបង់ប្រាក់ពន្ធ ដែលនាំឱ្យខកខានពេលវេលា និងកកស្ទះចរាចរណ៍ ៕

Q&A៖ ការអនុវត្តថាមពលប្រកបដោយនិរន្តរភាពនៅកម្ពុជា

អេង សិតសុខលីលី (Eng Setsoklily) — Sat, 11 Nov 2023 06:10:40 +0000

កម្ពុជាបាននិងកំពុងបោះជំហានទៅមុខក្នុងការអនុវត្តថាមពលប្រកបដោយនិរន្តរភាពក្នុងរយៈពេលប៉ុន្មានឆ្នាំចុងក្រោយនេះ ដោយផ្តោតលើការបង្កើនសមត្ថភាពថាមពលកកើតឡើងវិញរបស់ខ្លួន ជាពិសេសនៅក្នុងវិស័យថាមពលព្រះអាទិត្យ និងវារីអគ្គិសនី។ កិច្ចខិតខំប្រឹងប្រែងរបស់កម្ពុជាក្នុងការលើកកម្ពស់ការអនុវត្តថាមពលប្រកបដោយនិរន្តរភាព គឺជាជំហានវិជ្ជមានមួយឆ្ពោះទៅរកការកាត់បន្ថយការបញ្ចេញកាបូន និងធានាឱ្យមានអនាគតថាមពលប្រកបដោយនិរន្តរភាព និងមិត្តភាពបរិស្ថានសម្រាប់ប្រទេស។

ខាងក្រោមនេះគឺ ជាកិច្ចសម្ភាសន៍រវាងកញ្ញា ជិន សូនីតា អ្នកគ្រប់គ្រងគម្រោងនៅអង្គការ EnergyLap Cambodia ជាមួយកញ្ញា អេង សិតសុខលីលី សិក្ខាកាមមកពីញូសន៍រូមខេមបូឌា (Newsroom Cambodia)៖

Q. ជម្រាបសួរ កញ្ញា!

A. ចា៎ ជម្រាបសួរ!

Q. តើការអនុវត្តថាមពលដែលមាននិរន្តរភាពសំដៅទៅលើអ្វីដែរ?

A. ការអនុវត្តថាមពលដែលមាននិរន្តរភាពសំដៅទៅលើចំណុចពីរ គឺប្រភពនៃការប្រើប្រាស់ ឧទាហរណ៍ ថាមពលហ្នឹងមកពីណា? វាអាចជាវារីអគ្គិសនី ថាមពលធ្យូងថ្ម ថាមពលខ្យល់ជាដើម។ នៅក្នុងប្រភពថាមពលទាំងនោះយើងឃើញថា ថាមពលខ្យល់ ថាមពលសូឡាគឺសុទ្ធតែជាថាមពលដែលមាននិរន្តរភាព ឬថាមពលស្អាតដែលសុទ្ធតែគ្មានផលប៉ះពាល់ទៅដល់បរិស្ថាន។ ប្រសិទ្ធភាពថាមពលឬថាមពលប្រកបដោយនិរន្តរភាពសំដៅទៅលើសកម្មភាពដូចជា ការប្រើប្រាស់អំពូលអិលអ៊ីឌី (LED) ដែលមានប្រសិទ្ធភាពខ្ពស់ ការត្រួតពិនិត្យទៅលើសីតុណ្ហភាពម៉ាស៊ីនត្រជាក់ និងការប្រើប្រាស់ប្រព័ន្ធស្មាតដែលបិទបើកភ្លើងអូតូជាដើម។

Q. តើកញ្ញាអាចពន្យល់ពីគោលគំនិតនៃការអនុវត្តថាមពលប្រកបដោយនិរន្តរភាព និងសារៈសំខាន់របស់វានៅក្នុងពិភពលោកសព្វថ្ងៃនេះបានទេ?

A. បើទាក់ទងទៅនឹងការអនុវត្តថាមពលប្រកបដោយនិរន្តរភាព បើយើងមកមើលក្នុងវិស័យ ឯកជន យើងឃើញថាពួកគាត់ទទួលរងសម្ពាធដែលតម្រូវឲ្យកាត់បន្ថយការបញ្ចេញឧស្ម័នកាបូនិច និងការប្រើប្រាស់ថាមពលដើម្បីកាត់បន្ថយការកើនឡើងសីតុណ្ហភាពផែនដី។ ការអនុវត្តថាមពលប្រកបដោយនិរន្តរភាពផ្ដល់សារៈសំខាន់យ៉ាងខ្លាំងទៅដល់វិស័យឯកជន ដោយកាត់បន្ថយទៅលើការចំណាយ។ ឧទាហរណ៍ ប្រសិនបើយើងកាត់បន្ថយការប្រើប្រាស់ថាមពលនោះ ការចំណាយរបស់យើងនឹងចុះដូចគ្នា ហើយសារៈសំខាន់មួយទៀតនោះគឺក្រុមហ៊ុនឯកជនមានកិត្តិយសល្អ ដោយសារពួកគាត់បានគិតគូរទៅដល់បរិស្ថានដែលជាហេតុធ្វើឲ្យពួកគាត់ងាយនឹងទទួលបានការគាំទ្រពីសាធារណជន និងរដ្ឋាភិបាល។

Q. តើការអនុវត្តថាមពលប្រកបដោយនិរន្តរភាពអ្វីខ្លះដែលកម្ពុជាយើងបានធ្វើក្នុងរយៈពេលប៉ុន្មានឆ្នាំចុងក្រោយនេះ?

A. បើយើងងាកទៅមើលពីចំណុចដែលខ្ញុំបានលើកឡើងពីលើមក គឺប្រភពប្រើប្រាស់ និងកន្លែងប្រើប្រាស់។ បើយើងគិតទៅលើពីប្រភពប្រើប្រាស់វិញ ក្នុងអំឡុងពេលប៉ុន្មានឆ្នាំចុងក្រោយនេះបើធៀបជាមួយប៉ុន្មានឆ្នាំមុន យើងឃើញថាពីមុនយើងមិនទាន់មានកសិដ្ឋានសូឡា (Solar farm) ធំៗដែលអាចប្រើប្រាស់បានក្នុងកម្រិតថ្នាក់ជាតិនៅឡើយ។ ចំណែក ឥឡូវយើងឃើញថាការប្រើប្រាស់ថាមពលសូឡាមានរហូតដល់បួនភាគរយនៃការប្រើប្រាស់ថាមពលសរុបដែលសរបញ្ជាក់ពីការអភិវឌ្ឍប្រព័ន្ធថាមពលដែលមាននិរន្តរភាពនៅកម្ពុជា។ ចំពោះការប្រើប្រាស់វិញ យើងឃើញថាអ្នកខ្លះគាត់បំពាក់នូវប្រព័ន្ធសូឡាដោយខ្លួនឯង ដែលក្នុងនោះគាត់ប្រើប្រាស់នូវថាមពលសូឡាផងនិងថាមពលដែលបានពីរដ្ឋផង។

ក៏ប៉ុន្តែកាលពីមុនយើងឃើញថានៅមានកង្វះខាតគោលនយោបាយសម្រាប់ការអនុញ្ញាតកន្លែងឯកជនមួយចំនួនបំពាក់នូវប្រព័ន្ធសូឡានៅឡើយ។ ហេតុនេះហើយទើបយើងឃើញថាថ្មីៗនេះ រដ្ឋាភិបាលបានដាក់ចេញនូវគោលនយោបាយមួយដែលអនុញ្ញាតឲ្យមានការបំពាក់នូវប្រព័ន្ធសូឡាលើដំបូលផ្ទះបាន។

លើសពីនេះទៅទៀតយើងក៏ឃើញថាក្រុមហ៊ុនឯកជនក៏ដូចជាក្រុមហ៊ុនក្រៅស្ថាប័នរដ្ឋមួយចំនួនបានផ្ដួចផ្ដើមនូវគម្រោងជាច្រើនដែលជំរុញទៅដល់ការអនុវត្តថាមពលប្រកបដោយនិរន្តរភាពនៅតាមអគារក៏ដូចជាកន្លែងការងារក្រុមហ៊ុនជាដើមដូចជាគម្រោងការប្រកួតប្រជែងប្រសិទ្ធភាពថាមពលកម្ពុជា (Cambodia Energy Efficiency Competition) ដែលមានការចូលរួមពីក្រុមហ៊ុនជាច្រើនដើម្បីប្រកួតប្រជែងយកជ័យលេភីលេខមួយ។ ហើយយើងឃើញថា ក្រុមហ៊ុនឯកជនក៏បានងាកមកគិតគូររឿងការប្រើប្រាស់ថាមពលប្រកបដោយនិរន្តរភាពផងដែរ ដោយហេតុថាវាបានផ្ដល់នូវសារៈសំខាន់ដូចជាការកាត់បន្ថយនូវការចំណាយ។

Q. តើអ្វីជាបញ្ហាប្រឈមធំបំផុត នៅពេលអនុវត្តគោលការណ៍ថាមពលប្រកបដោយនិរន្តរភាព?

A. និយាយទៅវាមានច្រើនទិដ្ឋភាព វាមានទាំងការអនុវត្តនិងប្រភព តែបើប្រភពវាពាក់ព័ន្ធនឹងគោលនយោបាយត្រង់ថាដូចខ្ញុំនិយាយមុនអញ្ចឹង តើការប្រើប្រាស់សូឡាបានអត់ បើប្រជាជន និងក្រុមហ៊ុនដាក់សូឡានៅលើដំបូលផ្ទះ? តើរដ្ឋាភិបាលនិងខាងអគ្គិសនីកម្ពុជា (EDC) គាត់អនុញ្ញាតឱ្យប្រជាជនដាក់បានអត់ ? អញ្ចឹងគោលនយោបាយថ្មីហ្នឹងគេអនុញ្ញាតឱ្យដាក់ហើយ ក៏ប៉ុន្តែវាគ្រាន់តែចេញជាគោលនយោបាយ មិនទាន់ចាប់ផ្ដើមអនុវត្តទេ តែរាងពិបាកចាប់ផ្ដើមអនុវត្ត អាចថាបញ្ហាមួយចំនួនដែលមើលឃើញក្នុងគោលនយោបាយថ្មីហ្នឹងបើសិនប៉ះពាល់ ឬបញ្ហាប្រឈមមានតែក្រុមហ៊ុនធំៗដូចជា រោងចក្រ ដោយសារតែគេមានចំនួនកំណត់ ដូចឧទាហរណ៍ នៅតំបន់ណាមួយនៅខេត្តណាមួយអញ្ចឹង គេកំណត់ថានៅហ្នឹងដាក់សូឡាបានតែប៉ុន្មានជីកាវ៉ាត់អីអញ្ចឹងទៅ នៅតំបន់ហ្នឹងគេស្នើសុំដាក់ឲ្យតែប៉ុណ្ណឹង អញ្ចឹងអ្នកមកក្រោយអត់អាចស្នើសុំបន្តទៀតទេ អាចថាគោលនយោបាយហ្នឹងមិនទាន់ទំលំទូលាយ ដើម្បីបើកឲ្យខាងឯកជនដាក់សូឡា។ បញ្ហាមួយទៀតទាក់ទងនឹងតម្លៃ បើសិនតាមគោលនយោបាយថ្មី ខាងក្រុមហ៊ុនខាងណាដែលប្រើសូឡាហ្នឹង គាត់ប្រើសូឡា តែគាត់នៅតែប្រើភ្លើងរដ្ឋដដែល។

ជាធម្មតា សូឡាហ្នឹងមិនអាចផ្គត់ផ្គង់ពេញលេញទៅលើគាត់ប្រើទេ ដូចដែលបានដឹងហើយ សូឡាអាចបង្កើតបានតែពេលថ្ងៃទេ ក្នុងលក្ខខណ្ឌហ្នឹងក៏ត្រូវប្រើទាំងពីរ មានទាំងសូឡា និងភ្លើងពីរដ្ឋ។ តាមជាក់ស្ដែង អាចថាសន្សំសំចៃគាត់នៅពេលប្រើសូឡាតែថាយើងត្រូវចំណាយលុយនៅពេលយើងដំឡើងសូឡាដំបូង បន្ទាប់មកយើងអាចបានថាមពលសូឡាមកប្រើហើយ។ ប៉ុន្តែជាក់ស្ដែង នៅក្នុងគោលនយោបាយហ្នឹង ត្រូវគិតថ្លៃទៅលើសមត្ថភាពសូឡាផ្ទុក (Sola Capacity) ពីលើហ្នឹងទៀត ឧបមាថាគាត់ប្រើទៅអស់ប៉ុណ្ណឹង តែក៏គាត់ត្រូវប្រើភ្លើងរដ្ឋអស់ប៉ុណ្ណឹងដែរ គាត់ត្រូវចំណាយថ្លៃភ្លើងប៉ុណ្ណឹង ហើយក៏គាត់ត្រូវបង់ទៅលើការគិតថ្លៃសមត្ថភាពសូឡាផ្ទុក (Sola Capacity) ហ្នឹងទៀត តែតម្រូវការភ្លើងគាត់ជាក់ស្ដែងអស់តែប៉ុណ្ណេះទេ ដោយសារគាត់ប្រើសូឡា។

ការប្រើសូឡាហ្នឹង គេនៅតែគិតតម្លៃហ្នឹងដែរ តែវានៅក្នុងភាគរយមួយដែលវាអត់ស្មើនឹងថ្លៃភ្លើងពេញ។ វាអាចថាគោលនយោបាយហ្នឹងនៅតែមានបញ្ហាប្រឈមមួយចំនួនដែលមិនទាន់មានការជំរុញទឹកចិត្តក៏ដូចជាការផ្ដួចផ្ដើមខ្លាំងខាងឯកជនក្នុងការប្រើប្រាស់ថាមពលសូឡាពេលហ្នឹង។ ខ្ញុំនិយាយតែជាមួយនឹងសូឡាទេព្រោះអីវាមានគោលនយោបាយអីផ្សេងទៀតទាក់ទងជាមួយប្រសិទ្ធភាពថាមពល ហើយឥឡូវយើងក៏មានគោលនយោបាយប្រសិទ្ធភាពថាមពលហ្នឹង បើតាមខ្ញុំយល់ជាក់ស្ដែងប្រសិទ្ធភាពថាមពលហ្នឹងអត់មានបញ្ហាប្រឈមទេ អាស្រ័យទៅលើថា រដ្ឋាភិបាលគាត់មានយុទ្ធសាស្ត្របែបម៉េចដើម្បីរៀបចំផែនការសកម្មភាព។ ដោយសារក្នុងគោលនយោបាយប្រសិទ្ធភាពថាមពលស្អាតហ្នឹងវាទាក់ទងទៅនឹងវិស័យច្រើន ទាក់ទងទៅនឹងវិស័យមធ្យោបាយដឹកជញ្ជូន វិស័យឧស្សាហកម្ម និងរឿងអីផ្សេងៗទៀត។

Q. តើរដ្ឋាភិបាល អ្នកបង្កើតគោលនយោបាយ និងយុវជនយើងគួរមានតួនាទីអ្វីខ្លះក្នុងការលើកកម្ពស់ការអនុវត្តថាមពលប្រកបដោយនិរន្តរភាព?

A. បើខ្ញុំនិយាយទៅខាងរាជរដ្ឋាភិបាល ពួកគាត់កំពុងតែមានគោលនយោបាយថ្មីៗច្រើនដែលទាក់ទងជាមួយនឹងវិស័យថាមពល តែអ្វីដែលសំខាន់ដំបូង គិតថាគាត់ធ្វើម៉េចត្រូវបញ្ចូលគោលនយោបាយទៅអ្នកខាងក្រោមដែលអនុវត្ត ដូចជាសាធារណជន ខាងក្រុមហ៊ុន ឬក៏អីហ្នឹងឱ្យគាត់យល់ច្បាស់ពីគោលនយោបាយព្រោះវាមានកន្លែងខ្លះមួយចំនួន ឧទាហរណ៍ ដូចជាគោលនយោបាយរូតថបសូឡា (Root Top Sola) តាមបទពិសោធន៍ពួកខ្ញុំជាក់ស្ដែងខាងអេនជីឡេប (EnergyLap) យើងជួយផ្សព្វផ្សាយពីគោលនយោបាយថ្មីហ្នឹង អញ្ចឹងមានវិស័យមួយចំនួនទៀត អាចថាអ្នកមួយចំនួនទៀតគាត់អត់យល់ថាតើគោលនយោបាយហ្នឹងមានដំណើរការម៉េច? អាចថាពីខាងរដ្ឋាភិបាលគាត់មានផែនការរបស់គាត់ហើយ ក៏ប៉ុន្តែធ្វើម៉េចឲ្យអ្នកដែលអនុវត្តហ្នឹងគាត់យល់ ត្រូវអនុវត្តពីណាទៅណា អាចថាប្រើភាសាអីដែលអាចឲ្យអ្នកអនុវត្តនៅក្រោមក៏យល់ហើយយកទៅអនុវត្ត។

ទាក់ទងទៅនឹងអ្នកបង្កើតនយោបាយវិញ ធម្មតាគោលនយោបាយខ្លះវានៅថ្មី ឧទាហរណ៍៖ គោលនយោបាយប្រសិទ្ធភាពថាមពលអញ្ចឹងវានៅថ្មីលើគោលនយោបាយលើកទីមួយពីមុនមកដែលយើងអត់ទាន់មាន។ នៅពេលមានគោលនយោបាយហ្នឹង យើងត្រូវអនុវត្តទៅលើគោលនយោបាយហ្នឹងហើយ។ អ្នកបង្កើតគោលនយោបាយហ្នឹងត្រូវមើលដែរថា យើងអាចត្រូវប្រើគោលនយោបាយនេះដើម្បីជាការអនុវត្តក៏ដូចជាការសាកល្បងបានអត់? នៅពេលដែលគាត់ឃើញជាក់ស្ដែងអ្វីដែលគាត់បង្កើតឡើងមកហើយ វានៅមានបញ្ហាអីទៀត គាត់ត្រូវតែក្រឡេកទៅមើលអ្នកអនុវត្តដូចជាខាងវិស័យឯកជន និងអីផ្សេងទៀត អញ្ចឹងគាត់ត្រូវច្នៃធ្វើម៉េចឱ្យគោលយោបាយកាន់តែប្រសើរដល់អ្នកអនុវត្តបន្ថែមទៀត។

ទាក់ទងទៅនឹងយុវជន អាចថាគាត់មានតួនាទីមួយក្នុងការផ្សព្វផ្សាយ ក៏ដូចជាការអនុវត្ត បើសិនជាគាត់យល់ដឹង អាចថាយុវជនខ្លះគាត់មានចំណេះដឹងខ្ពស់ ហើយជួយផ្សព្វផ្សាយទៅឲ្យអ្នកដទៃបានយល់ អីគេទៅជាថាមពលមួយដែលមាននិរន្តរភាព? ហើយការអនុវត្តមួយហ្នឹងផ្ដល់អត្ថប្រយោជន៍អីខ្លះដល់ខ្លួនឯងក៏ដូចជាសង្គម? ហើយខ្លួនគាត់ក៏ត្រូវអនុវត្តដែរដើម្បីសម្រេចបានទៅតាមអ្វីដែលរាជរដ្ឋាភិបាលបានកំណត់។

Q. តើយល់ឃើញយ៉ាងណាចំពោះអនាគតនៃការអនុវត្តថាមពលប្រកបដោយនិរន្តរភាពដែលនឹងវិវឌ្ឍនៅក្នុងទសវត្សរ៍ក្រោយៗ?

A. តាមខ្ញុំឃើញជាក់ស្ដែងថាទៅមុខទៀតទៅវិស័យថាមពលប្រកបដោយនិរន្តរភាពនៅស្រុកខ្មែរយើងនឹងកាន់តែល្អប្រសើរ ដូចបើយើងត្រឡប់ទៅមើលពីរបីឆ្នាំមុនយើងអត់ទាន់មានគោលនយោបាយអីច្រើនទាក់ទងនឹងវិស័យថាមពលទេ។ អញ្ចឹងមួយឆ្នាំ ពីរឆ្នាំក្រោយ ឬក៏ក្នុងឆ្នាំ២០២៣ នេះហ្មង មានគោលនយោបាយថ្មីច្រើនទាក់ទងឬគិតគូរទៅលើនិរន្តរភាព គិតគូរទៅលើសេដ្ឋកិច្ចក៏ដូចជាការប្រែប្រួលអាកាសធាតុ អាចថាក្នុងឆ្នាំនេះ វាទើបតែចេញគោលនយោបាយថ្មីៗ។ អញ្ចឹងបន្ទាប់ពីឆ្នាំក្រោយៗមក នៅពេលដែលគោលនយោបាយហ្នឹងចាប់ផ្ដើមអនុវត្តក៏ដូចជាឃើញការវិវត្ត និងសន្ទុះច្រើនទៅនឹងការអនុវត្តគោលនយោបាយថាមពលដោយនិរន្តរភាពតាមវិស័យឯកជន ប្រសិទ្ធភាពថាមពលស្អាតដែលខ្ញុំបានលើកមុនអញ្ចឹង វាមានគោលនយោបាយទាំងវិស័យឧស្សាហកម្ម វិស័យឯកជនអីអញ្ចឹងទៅ ហើយយើងនឹងឃើញថាមានការអនុវត្តអាហ្នឹងច្រើនប៉ុន្មានឆ្នាំទៅមុខទៀត។

Q. អរគុណកញ្ញាសម្រាប់ផ្ដល់បទសម្ភាស!

A. ចា៎ អរគុណ!

Voxpop: ទស្សនៈនិស្សិតចំពោះការសិក្សាពីរសាកលវិទ្យាល័យក្នុងពេលតែមួយ

អេង សិតសុខលីលី (Eng Setsoklily) — Tue, 31 Oct 2023 03:42:33 +0000

សាកលវិទ្យាល័យជាទីកន្លែងដែលនិស្សិតអាចជ្រើសរើសបន្តការសិក្សាទៅលើមុខវិជ្ជាផ្សេងៗបន្ទាប់ពីបញ្ចប់វិទ្យាល័យ។ និស្សិតខ្លះជ្រើសរើសយកមុខជំនាញតែមួយគត់សម្រាប់មុខជំនាញសិក្សា ចំណែកនិស្សិតខ្លះទៀតជ្រើសយកការសិក្សាពីរមុខជំនាញក្នុងពេលតែមួយ។

Newsroom Cambodia បានសម្ភាសន៍អតីតនិស្សិត និងនិស្សិតចំនួន៩ នាក់តាមសាកលវិទ្យាល័យផ្សេងៗគ្នា អំពីការយល់ឃើញរបស់ពួកគេទាក់ទងនឹងការសិក្សានៅសាកលវិទ្យាល័យពីរក្នុងពេលតែមួយ ៖

រូបភាព៖ លោក ហ៊ី សុខថានិត

លោក ហ៊ី សុខថានិត អាយុ១៩ឆ្នាំ ជានិស្សិតឆ្នាំទី១នៃសាកលវិទ្យាល័យអាមេរិកាំងភ្នំពេញបានលើកឡើងថា ការសិក្សាពីរសាកលវិទ្យាល័យក្នុងពេលតែមួយគឺប្រឈមទាំងផលវិជ្ជមាន និងផលអវិជ្ជមានស្របគ្នា។

លោកបាននិយាយថា៖ «អ្នកដែលរៀនពីរសាកលវិទ្យាល័យ ហើយបន្តរៀនដល់តែចប់បានសញ្ញាប័ត្រប្រាកដណាស់ពួកគេនឹងទទួលបាននូវឱកាសការងារក៏ដូចជាបើកឱកាសឲ្យខ្លួនឯងបានច្រើនដោយសារតែចេះជំនាញច្រើនជាជាងអ្នកដែលរៀនមួយសាកលវិទ្យាល័យ»។

លោកបន្តថា៖ «ទោះបីជាលទ្ធផលអ្នករៀនពីរសាកលវិទ្យាល័យគឺរកការងារបានលឿនមែនពិត តែពួកគេប្រឈមមុខនឹងបញ្ហាពេលវេលា និងសមត្ថភាពផ្ទាល់ខ្លួន ដែលអ្នកខ្លះមិនអាចផ្តោតទៅលើទាំងពីរជំនាញក្នុងពេលតែមួយនោះទេ គឺផ្តោតមួយជំនាញ ប្រលែងមួយជំនាញ»។

រូបភាព៖ កញ្ញា នៅ នាថខេមា

កញ្ញា នៅ នាថខេមា អាយុ ២១ឆ្នាំ ជានិស្សិតឆ្នាំទី៣ នៃវិទ្យាស្ថានបច្ចេកវិទ្យាកម្ពុជា បានលើកឡើងថា ការរៀនពីរសាកលវិទ្យាល័យក្នុងពេលតែមួយគឺអាចប្រឈមមុខនឹងបញ្ហាសុខភាពក្នុងពេលកំពុងសិក្សា។

កញ្ញាបាននិយាយថា៖ «ការរៀនពីរសាកលវិទ្យាល័យក្នុងពេលតែមួយគឺអាចប្រឈមនឹងបញ្ហាមួយគឺមិនអាចគ្រប់គ្រងពេលវេលាថែទាំសុខភាពបានល្អ ព្រោះសុខភាពជាកត្តាចម្បង បើយើងមិនមានសុខភាពល្អ នោះការសិក្សារៀនសូត្រយើងក៏មានការរអាក់រអួលផងដែរ»។

កញ្ញាបានបន្តទៀតថា៖ «ការរៀនតែមួយសាកលវិទ្យាល័យនោះគឺអាចធ្វើឲ្យយើងអាចផ្តោតទៅលើជំនាញដែលយើងរៀនច្បាស់ ហើយក៏មិនមានបញ្ហាអ្វីដែរចំពោះការរកកាងារប្រសិនបើយើងខិតខំរៀនសូត្រ»។

កញ្ញាក៏បានបញ្ជាក់ពីចំណុចអ្នកដែលរៀនពីរសាកលវិទ្យាល័យដែរថា ប្រសិនបើពួកគេអាចគ្រប់គ្រងពេលវេលាបានល្អ នោះពួកគេនឹងអាចបង្កើនចំណេះដឹងច្រើនជាងអ្នករៀនមួយសាកលវិទ្យាល័យ។

រូបភាព៖ កញ្ញា ញិល ហេងថារ័ត្ន

កញ្ញា ញិល ហេងថារ័ត្ន ជានិស្សិតកំពុងរៀនពីរសាកលវិទ្យាល័យ គឺសាកលវិទ្យាល័យជាតិគ្រប់គ្រង និងវិទ្យាស្ថានសេដ្ឋកិច្ច និងហិរញ្ញវត្ថុ។ កញ្ញាបាននិយាយថា ការរៀនពីរសាកលវិទ្យាល័យក្នុងពេលតែមួយ អាស្រ័យលើសមត្ថភាពរបស់និស្សិតខ្លួនឯង។

កញ្ញាបាននិយាយថា៖ «បើយើងនិយាយថាវាពិបាក វាពិបាកហើយ ប៉ុន្តែសំខាន់យើងធ្វើបានអត់ For me [សម្រាប់ខ្ញុំ] ខ្ញុំអាចធ្វើបាន វាពិបាកនៅពេល assignment [កិច្ចការសាលា] បុកមកទាំងពីរ»។

រូបភាព៖ កញ្ញា ជូ គឹមអេង

ចំណែកកញ្ញា ជូ គឹមអេង និស្សិតរៀននៅសាកលវិទ្យាល័យជាតិគ្រប់គ្រង ជំនាញសេដ្ឋកិច្ចឌីជីថល និងនៅវិទ្យាស្ថានភាសាបរទេស IFL ជំនាញភាសាអង់គ្លេសនិយាយថា ការរៀនពីរសាកលវិទ្យាល័យមិនមានការលំបាកនោះទេ ប្រសិនបើមានការគ្រប់គ្រងពេលវេលាបានល្អ។

កញ្ញាលើកឡើងថា៖ «អាចមកពីជំនាញរបស់ខ្ញុំដែរ ខ្ញុំរៀនជំនាញសេដ្ឋកិច្ចឌីជីថលដែលភាគច្រើនផ្ដោតលើការសិក្សាស៊ីជម្រៅ តែបែររៀននៅ IFL ជាភាសាអង់គ្លេសមិនសូវស៊ីជម្រៅណាស់ណាទេ។ ហើយមួយវិញទៀត ការរៀនពីរមុខវិជ្ជានេះមិនមានការជាន់ឆ្នាំគ្នានោះទេ មួយរៀននៅឆ្នាំទី៣ មួយទៀតនៅឆ្នាំទី១»។

កញ្ញាបន្ថែមថា៖ «ដូចខ្ញុំអ៊ីចឹង ខ្ញុំរៀនមួយជាជំនាញ មួយទៀតជាភាសា ដើម្បីពង្រឹងភាសាខ្ញុំ ក៏ដូចជាជំនាញដែលខ្ញុំរៀនបច្ចុប្បន្ន តែបើដឹងថាជំនាញហ្នឹងពិបាក យើងត្រូវផ្ដោតទៅជំនាញហ្នឹងតែមួយទៅ ព្រោះវាអាចនាំឱ្យយើងបែក យើងអត់អាចចាប់បានទាំងពីរទេ ក៏ប៉ុន្ដែ បើមួយស្រាលមួយធ្ងន់ វាអត់សូវអីទេ ព្រោះយើងមានស្មារតីបែងចែកវាបាន»។

រូបភាព៖ គិត ចន្ទធីតា

កញ្ញា គិត ចន្ទធីតា ជានិស្សិតរៀននៅសាកលវិទ្យាល័យជាតិគ្រប់គ្រងបានលើកឡើងពីទស្សនៈរបស់កញ្ញាលើការរៀនពីរសាកលវិទ្យាល័យក្នុងពេលតែមួយថា៖ «វាអាចត្រូវការពេលច្រើន ដោយសារតែយើងត្រូវបែងចែកពីរសាកល ចឹងខ្ញុំគិតថារៀនច្បាប់ រៀនតែមួយសាកលទេ ព្រោះបើខ្ញុំរៀនពីរសាកល ខ្ញុំអាចនឹងអត់មានពេលមកខាងច្បាប់ច្រើន ខ្ញុំអាចនឹងបែងចែកអត់កើតសម្រាប់ខ្ញុំ»។

រូបភាព ៖ លោក គង់ វិរៈរតនៈសម្បត្តិ

លោក គង់ វិរៈរតនៈសម្បត្តិ អាយុ ២១ ឆ្នាំ ជានិស្សិតឆ្នាំទី៤ នៅសាកលវិទ្យាល័យភូមិនីតិសាស្ត្រ និងវិទ្យាសាស្ត្រសេដ្ឋកិច្ច ជំនាញនីតិសាស្ត្រ លើកឡើងថា ការរៀន២ សាកលក្នុងពេលតែមួយ គឺមានការលំបាក ដោយសារត្រូវផ្ដោតទៅលើមុខវិជ្ជានីមួយៗ ហើយមិនស្រូវមានពេលយកចិត្តទុកដាក់លើមុខវិជ្ជាណាមួយ។

លោកបញ្ជាក់ថា៖ «ចំពោះបងប្អូនដែលចង់រៀន ២សាកលក្នុងពេលតែមួយ ខ្ញុំចង់ឱ្យពួកគាត់ ត្រូវបែងចែកពេលវេលាឱ្យបានច្បាស់លាស់ ហើយស្ទង់ពីស្ថានភាព និងសមត្ថភាពរបស់ខ្លួនថាទ្រទ្រង់នឹងការលំបាក ដូចជាការងារមួយគុណពីរ ត្រូវផ្តោតលើមុខវិជ្ជាផ្សេងៗគ្នា តើអាចទ្រទ្រង់ស្ថានភាពលំបាកបែបហ្នឹងបាន ឬអត់? ប្រសិនមានសមត្ថភាព និងលទ្ធភាពក្នុងការរៀនពីរសាកល គឺគាំទ្រឱ្យធ្វើ ទី១ ចំណេញពេលវេលា និងមិនខាតពេលប្រកបវិជ្ជាជីវៈ»។

រូបភាព៖ លោក ឈុន ហុង

លោក ឈុន ហុង អាយុ ២៨ឆ្នាំ ជានិស្សិតសិក្សានៅសាកលវិទ្យាល័យន័រតុន ជំនាញស្ថាបត្យកម្ម ឆ្នាំទី៣ និងសាកលវិទ្យាល័យភូមិនីតិសាស្ត្រ និងវិទ្យាសាស្ត្រសេដ្ឋកិច្ច ជំនាញនីតិសាស្ត្រ ឆ្នាំទី៤ បានលើកឡើងថា ការសិក្សាជំនាញខុសគ្នា គឺមានភាពលំបាក តែអាស្រ័យលើខ្លួនឯងក្នុងការបែងចែកជំនាញរៀន ដោយសារការងារសាលាច្រើន។

លោកបញ្ជាក់ថា៖ «ការរៀនពីរមុខជំនាញ មានផលវិជ្ជមាន និងផលអវិជ្ជមាន។ ផលអវិជ្ជមាន គឺពេលវេលាមមាញឹក បូកផ្សំជាមួយកិច្ចការសាលា ហើយភាពនឿយហត់ក្នុងការសិក្សា។ បើយើងបែងចែកឱ្យដាច់ និងច្បាស់លាស់ នោះនឹងមានភាពល្អប្រសើរ។ ហើយភាពវិជ្ជមាន គឺទទួលបានចំណេះទូលំទូលានៅក្នុងសង្គម ហើយស្តែងឱ្យឃើញជំនាញស្ថាបត្យកម្ម និងច្បាប់មានភាពប្រទាក់ក្រឡាគ្នា។ ហើយការរៀន ២ មុខវិជ្ជា គឺជាមុខវិជ្ជាដែលស្រលាញ់»។

លោកបន្ថែមថា៖ «ចំពោះប្អូនៗ ដែលមានបំណងរៀនពីរមុខជំនាញ សូមប្អូនជ្រើសរើសមុខវិជ្ជាដែលខ្លួនស្រលាញ់ និង សូមពិនិត្យទៅលើបរិបទសង្គម។ សង្គមតម្រូវការអ្វីខ្លះ ដោយសារជាឱកាសការងារ។ ប្រសិនយើងរៀនមានសមត្ថភាពពិតប្រាកដ យើងនឹងទទួលបានការងារ គ្រាន់តែថាឱកាសការងារបូកជាមួយក្តីស្រលាញ់របស់យើង គឺកាន់តែជម្រុញយើងឱ្យមានភាពល្អប្ររសើរ។ ហើយសុំឱពុកម្តាយ និស្សិតខ្លួន គួរកុំជ្រើសរើសមុខវិជ្ជារៀនតាមមិត្ត ឬឱពុកម្តាយ ព្រោះបើជ្រើសរើសរៀនតាមឱពុកម្តាយ ឬមិត្ត យើងគ្មានភាពជាខ្លួនឯង ហើយមានភាគរយច្រើនដែលធ្វើឱ្យយើងមិនអាចបន្តសិក្សាបាន ប៉ុន្តែបើរៀនក៏អាចរៀនទៅមុខដែរ»។

កញ្ញា នាក់ សុជាខេមា

កញ្ញា នាក់ សុជាខេមា ជានិស្សិតមកពីខេត្តតាកែវ សព្វថ្ងៃសិក្សាអក្សរសាស្រ្តខ្មែរនៅសាកលវិទ្យាល័យភូមិន្ទភ្នំពេញលើកទ្បើងថា ការរៀនពីរសាកលវិទ្យាល័យអាចនឹងពិបាក ប៉ុន្តែអាចបង្កើនចំណេះដឹងដល់និស្សិតបានច្រើន។

កញ្ញាបានបន្ថែមថា៖ «ការសិក្សាសាកលវិទ្យាល័យមួយអាចនឹងចំណាយពេលច្រើនលើការរៀនសូត្រផង និងការធ្វើការផង។ ចំណែកអ្នករៀនពីរសាកលវិទ្យាល័យអាចនឹងផ្ដោតលើការសិក្សាច្រើនជាងការចំណាយពេលវេលាច្រើនជាង និងគិតច្រើន ព្រោះមេរៀនក៏ច្រើនដែរ»។

កញ្ញា ខាន់ ឧស្សា

កញ្ញា ខាន់ ឧស្សា អាយុ ២០ឆ្នាំ និស្សិតឆ្នាំទី ៣ នៃដេប៉ាតឺម៉ង់សិក្សាអន្តរជាតិនៃវិទ្យាស្ថានសិក្សាបរទេសបាននិយាយថា ការរៀនអាចនឹងធ្លាក់ចុះ បើគ្មានការគ្រប់គ្រងពេលវេលាឲ្យបានល្អ ប៉ុន្តែការរៀនពីរសាកលវិទ្យាល័យអាចជួយនិស្សិតឲ្យមានបទពិសោធន៍គ្រប់គ្រាន់ពីការសិក្សា និងអនុវត្ត។

កញ្ញាបានបន្តទៀតថា៖ «បើគាត់រៀនពីរជំនាញក្នុងពេលតែមួយ ផលល្អគឺគាត់ទទួលបានបរិញ្ញាបត្រពីរ អ៊ីចឹងគាត់អាចទៅធ្វើការអ្វីក៏បានតាមជំនាញដែលគាត់រៀន»៕

ក្រសួងប្រៃសណីយ៍ និងក្រុមប្រឹក្សាធុរកិច្ចសភាពអឺរ៉ុប-អាស៊ាន ពិភាក្សាពង្រីកការវិនិយោគបន្ថែមផ្នែកឌីជីថល

អេង សិតសុខលីលី (Eng Setsoklily) — Tue, 31 Oct 2023 01:01:19 +0000

រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានពិភាក្សាការងារជាមួយ ប្រធានក្រុមប្រឹក្សាធុរកិច្ចសភាពអឺរ៉ុប-អាស៊ាន ក្នុងគោលបំណងដើម្បីពង្រីកកិច្ចសហការធុរកិច្ចរបស់សភាពអឺរ៉ុបជាមួយវិស័យឯកជន និងសាធារណៈនៅព្រះរាជាណាចក្រកម្ពុជាហើយក៏បានលើកឡើងពីទិសដៅការងាររបស់ក្រសួងពាក់ព័ន្ធនឹងការប្រើប្រាស់5G។

តាមរយ:កិច្ចពិភាក្សា នាព្រឹកថ្ងៃទី២៥ ខែតុលា ឆ្នាំ២០២៣ លោកជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានស្វាគមន៍លោក JENS Ruebbert ប្រធានក្រុមប្រឹក្សាធុរកិច្ចសភាពអឺរ៉ុប-អាស៊ាន (EU-ASEAN Business Council) និងគណៈប្រតិភូដែលមានចំណាប់អារម្មណ៍ស្វែងរកឱកាសវិនិយោគ ក៏ដូចជាការពង្រីកការវិនិយោគដែលមានស្រាប់នៅក្នុងប្រទេសកម្ពុជា។

ក្នុងកិច្ចពិភាក្សាដដែលនេះ តំណាងក្រុមហ៊ុនមួយចំនួន Zuellig Pharma, DHL និង Eurocham ប្រចាំនៅកម្ពុជាក៏បានសាកសួរពីយុទ្ធសាស្រ្តនៅក្នុងការគាំទ្រវិស័យឯកជនពាក់ព័ន្ធនឹងឌីជីថលូបនីយកម្មវិស័យសុខាភិបាល ការគាំទ្រដល់បរិវត្តកម្មឌីជីថលរបស់ SMEs ក្នុងស្រុក ក៏ដូចជាទិសដៅការងាររបស់ក្រសួងពាក់ព័ន្ធនឹងការប្រើប្រាស់ 5G។

លោករដ្ឋមន្ត្រីក៏មានការឆ្លើយតបពីវឌ្ឍនភាពការងារ ក្នុងការរៀបចំគោលនយោបាយ ច្បាប់ និងបទប្បញ្ញត្តិ ការអភិវឌ្ឍធនធានមនុស្សតាមរយៈកម្មវិធីអាហារូបករណ៍ជំនាញឌីជីថល បច្ចេកវិទ្យាសហគមន៍ ការបង្កើតកម្មវិធីប្រកួតប្រជែង ការរៀបចំកសាងមជ្ឈមណ្ឌលទិន្នន័យជាតិ ថ្នាលឌីជីថល ហេដ្ឋារចនាសម្ព័ន្ធតភ្ជាប់ឌីជីថល ការពង្រឹងគុណភាពសេវាទូរគមនាគមន៍កាន់តែប្រសើរឡើង ព្រមទាំងការរៀបចំផែនទីបង្ហាញផ្លូវលើបច្ចេកវិទ្យា 5G ផងដែរ។

ជាកិច្ចបញ្ចប់ពិភាក្សានេះ លោករដ្ឋមន្ត្រីក៏បានថ្លែងអំណរគុណជូនចំពោះប្រធានក្រុមប្រឹក្សា និងគណៈប្រតិភូដែលបានពិភាក្សាការងារក្នុងដំណើរទស្សនៈកិច្ចមកកម្ពុជាលើកនេះ ក៏ដូចជាបានលើកទឹកចិត្តដល់ គណៈប្រតិភូ EU-ABC និង Eurocham ប្រចាំនៅកម្ពុជា ជំរុញ និងពង្រឹងការវិនិយោគបន្ថែមផ្នែកបច្ចេកវិទ្យាឌីជីថលនៅកម្ពុជា៕

អាជ្ញាធរ ផ្អាកចរាចរណ៍បណ្ដោះអាសន្នលើកំណាត់ផ្លូវជាតិលេខ៤ ក្នុងភូមិសាស្រ្តខណ្ឌកំបូល រាជធានីភ្នំពេញ

អេង សិតសុខលីលី (Eng Setsoklily) — Thu, 26 Oct 2023 03:39:24 +0000

ការបញ្ជៀសចរាចរណ៍យានយន្តធុនធ្ងន់គ្រប់ប្រភេទដោយសារ ស្ថានភាពទឹកភ្លៀងនៅតែធ្លាក់ជាបន្តបន្ទាប់បានបង្កជាជំនន់ទឹកភ្លៀងលិចតំបន់មួយចំនួនលើកំណាត់ផ្លូវជាតិលេខ៤ ស្ថិតក្នុងភូមិសាស្រ្តខណ្ឌកំបូល រាជធានីភ្នំពេញ។

រដ្ឋបាលខណ្ឌកំបូលបានចេញសេចក្ដីជូនដំណឹងនាថ្ងៃទី២១ ខែតុលា ឆ្នាំ ២០២៣ ថា ដើម្បីបញ្ជៀសការខូចខាតកំណាត់ផ្លូវជាតិលេខ៤ ស្ថិតក្នុងភូមិសាស្រ្តខណ្ឌកំបូល រាជធានីភ្នំពេញ ហើយដើម្បីធានាសុខសុវត្តិភាពប្រជាពលរដ្ឋក្នុងការធ្វើដំណើរ ខណ្ឌបានផ្អាកចរាចរណ៍យានយន្តធុនធ្ងន់គ្រប់ប្រភេទលើកំណាត់ផ្លូវជាតិលេខ៤ក្នុងទិសដៅពីស្រុកអង្គស្នួល ខេត្តកណ្ដាល ចូលមករាជធានីភ្នំពេញ ដោយធ្វើដំណើរវាងទៅផ្លូវជាតិលេខ៤២ ស្ថិតក្នុងភូមិបែកចាន ស្រុកអង្គស្នួល ខេត្តកណ្ដាល និងសូមធ្វើដំណើរវាងទៅផ្លូវជាតិលេខ៣ ផ្លូវក្រវ៉ាត់ក្រុងទី៣ ឬផ្លូវទំនប់កប់ស្រូវ ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ។

តាមសេចក្ដីជូនដំណឹងនេះ ប្រជាពលរដ្ឋ ម្ចាស់ក្រុមហ៊ុនដឹកជញ្ជូន និងអ្នកបើកបរយានយន្តធុនធ្ងន់គ្រប់ប្រភេទដែលធ្វើដំណើរឆ្លងកាត់កំណាត់ផ្លូវជាតិលេខ៤ ស្ថិតក្នុងភូមិសាស្រ្តខណ្ឌកំបូល រាជធានីភ្នំពេញ គួរមានការយោគយល់អធ្យាស្រ័យ និងបញ្ជៀសការធ្វើដំណើរតាមផ្លូវនេះដោយវាងទៅតាមផ្លូវដែលបានជម្រាបជូនខាងលើ៕

ព្រះមហាក្សត្រ នរោត្តម សីហមុនី នឹងយាងសម្ពោធដាក់ប្រើប្រាស់ជាផ្លូវការស្ពានហាលខាងលិចប្រាសាទអង្គរវត្ត

អេង សិតសុខលីលី (Eng Setsoklily) — Thu, 26 Oct 2023 03:28:31 +0000

អាជ្ញាធរជាតិអប្សរានឹងមានការរៀបចំព្រះរាជពិធីសម្ពោធដាក់ប្រើប្រាស់ជាផ្លូវការ ស្ពានហាលខាងលិចប្រាសាទអង្គរវត្ត នាថ្ងៃទី ០៤ ខែ វិច្ឆិកា ឆ្នាំ ២០២៣នេះ ក្រោមព្រះរាជាធិបតីភាពព្រះករុណា ព្រះបាទសម្ដេច នរោត្តម សីហមុនី។

អាជ្ញាធរជាតិអប្សរាក៏បានសូមជម្រាបជាផ្ដល់ដំណឹងថា គម្រោងអភិរក្ស និងជួសជុលស្ពានហាលខាងលិចប្រាសាទអង្គរវត្តបានបញ្ចប់ជាស្ថាពរ ក្រោមកិច្ចសហការរវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ានៃប្រទេសជប៉ុន។

ក្នុងសេចក្ដីជូនដំណឹងក៏បានបញ្ជាក់ពីទិសដៅសម្រាប់គ្រប់គ្រងលំហូរការទស្សនានៅប្រាសាទអង្គរវត្តឲបានល្អប្រសើរផងដែរ ក្រោយពីព្រះរាជពិធីសម្ភោធជាផ្លូវការនេះ។ ទិសដៅទស្សនាទាំងនោះរួមមាន ប្រើប្រាស់ស្ពានហាលខាងលិចប្រាសាទអង្គរវត្តជាច្រកចូលសម្រាប់ការទស្សនា និងប្រើប្រាស់ស្ពានបណ្ដែតទឹកប្រាសាទអង្គរវត្តដែលជាច្រកចេញសម្រាប់ការទស្សនា៕

ក្រសួងបរិស្ថានស្នើវិស័យឯកជនចូលរួមយុទ្ធនាការកាត់បន្ថយការប្រើប្រាស់ប្លាស្ទិក

អេង សិតសុខលីលី (Eng Setsoklily) — Wed, 25 Oct 2023 04:54:10 +0000

ក្រសួងបរិស្ថានស្នើម្ចាស់រោងចក្រ សហគ្រាស និងក្រុមហ៊ុនវិស័យឯកជនទាំងអស់ ចូលរួមជំរុញយុទ្ធនាការកាត់បន្ថយការប្រើប្រាស់ប្លាស្ទិក «ថ្ងៃនេះខ្ញុំមិនប្រើប្លាស្ទិកទេ» ដើម្បីថែរក្សាបរិស្ថានឲ្យបានស្អាត និងរក្សាអនាម័យសុខភាព សុខុមាលភាពសាធារណៈ។

បើតាមលិខិតរបស់ក្រសួងបរិស្ថានជូនទៅម្ចាស់សហគ្រាស ក្រុមហ៊ុន វិស័យឯកជន ចេញនៅថ្ងៃទី២៤ ខែតុលា ឆ្នាំ២០២៣ បានឱ្យដឹងថា ក្នុងរយៈពេលមិនដល់៦០ថ្ងៃ ក្រោយដាក់ចេញនូវយុទ្ធនាការក្រោមប្រធានបទ «ថ្ងៃនេះខ្ញុំមិនប្រើប្លាស្ទិកទេ» មានសិស្សានុសិស្សទូទាំងប្រទេស ព្រមទាំងលោកគ្រូ អ្នកគ្រូ បានចូលរួមប្រមាណជាង២លាននាក់ មកពីសាលាជាង ៩០០០ បានចូលរួម។

លិខិតដដែលបន្ថែមថា៖ «ដើម្បីឱ្យយុទ្ធនាការនេះក្លាយជាចលនាមួយមានកម្លាំងខ្លាំងក្លាអាចនាំកម្ពុជាឱ្យក្លាយជាប្រទេសនាំមុខគេក្នុងការប្រយុទ្ធប្រឆាំងសំណល់រឹង ពិសេសសំណល់ប្លាស្ទិក ខ្ញុំស្នើសុំអ្នកឧកញ៉ា ឧកញ៉ា លោក-លោកស្រី ដែលជាម្ចាស់ ឬ នាយករោងចក្រ សហគ្រាស ក្រុមហ៊ុន វិស័យឯកជន មេត្តាចូលរួមជំរុញចលនា និងដឹកនាំបុគ្គលិក កម្មករទាំងអស់ អនុវត្តយុទ្ធនាការកាត់បន្ថយការប្រើប្រាស់ផ្លាស្ទិកនេះនៅតាមបណ្ដារោងចក្រ សហគ្រាស ក្រុមហ៊ុន សំដៅជំរុញអនុវត្តការកាត់បន្ថយការប្រើប្រាស់ថង់ប្លាស្ទិកនៅកម្ពុជាឱ្យទទួលបាននូវភាពជោគជ័យកុំបីអាក់ខានឡើយ»។

ក្រសួងបន្ថែមក្នុងលិខិតនោះថា រោងចក្រ សហគ្រាស កាកបាទក្រហមកម្ពុជា សង្គមស៊ីវិល អង្គការមិនមែនរដ្ឋាភិបាល និងវត្តអារាមមួយចំនួនក៏បាននិងកំពុងចូលរួមយ៉ាងផុសផុលនៅទូទាំងប្រទេស៕

អេង សិតសុខលីលី (Eng Setsoklily) – Newsroom Cambodia

បទយកការណ៍៖ បណ្ណាល័យ​​ សួន បញ្ញា ជំរុញការអាន​បន្ថែម​ក្នុង​សហគមន៍​មួយនៅ​ខេត្តបាត់​ដំបង​

លោក ហ៊ុន ម៉ាណែត ប្រកាសឱ្យអនុវត្តកម្មវិធីជាតិជំនួយ​សង្គម​​ឆ្លើយ​តប​នឹង​គ្រោះអាសន្ន

ក្រសួងសុខាភិបាលហាមឃាត់ការចែកចាយ ឬលក់ឱសថឈ្មោះ SATTOCHI ដែលគ្មានលេខបញ្ជិកា

ក្រសួងការងារជូនដំណឹង​ពី​ករណីឆបោក​លើ​ការ​ជ្រើសរើសពលករ​ទៅធ្វើការនៅអ៊ីស្រាអែល

ក្រសួងសុខាភិបាល​អំពាវនាវឱ្យបង្កើនការប្រុងប្រយ័ត្នវីរុសកូវីដ១៩​បំប្លែងថ្មីប្រភេទអូមីក្រុង JN.1

ក្រុមប្រឹក្សាអភិវឌ្ឍន៍កម្ពុជាចុះបញ្ជី​គម្រោង​វិនិយោគ​​ចំនួន​​១៥​ ទុន​​ជាង​​២៤៧​​លាន​​ដុល្លារ

អគ្គនាយកដ្ឋានពន្ធដាររំឭកឱ្យម្ចាស់យានយន្តទៅ​បង់​ពន្ធ​លើ​មធ្យោបាយ​ដឹក​ជញ្ជូន​សម្រាប់​ឆ្នាំ​២០២៣​