នៅខាងមុខភោជនីយដ្ឋាននីមួយៗមានមនុស្សប្រុសស្រីចំនួន២ទៅ៥នាក់ឈររង់ចាំចាប់ឡានម៉ូតូភ្ញៀវទេសចរដែលបានមកលេងឆ្នេរកែប។

នៅពេលមានឡានឬម៉ូតូភ្ញៀវមកដល់ម្ដងៗមានអ្នកខ្លះបក់ដៃអ្នកខ្លះរត់ទៅចាប់ដៃម៉ូតូ កាក់ឡានភ្ញៀវមានភាពរញ៉េរញ៉ៃនៅលើដងផ្លូវ មើលទៅហាក់គ្មានសណ្តាប់ធ្នាប់ទាល់តែសោះ។ ភ្ញៀវទេសចរមកលេងនៅឆ្នេរកែបស្នើឱ្យអាជ្ញាធរណែនាំអប់រំអាជីវករដែលរកស៊ីលក់ម្ហូបអាហាររត់ចាប់ឡានម៉ូតូភ្ញៀវពាសពេញផ្លូវឱ្យរក្សាសណ្ដាប់ធ្នាប់។

ពាក់អាវយឺតដៃវែងពាក់មួកពណ៌ខ្មៅដៃម្ខាងពរកូនប្រុសតូចមានអាយុជាង២ឆ្នាំដៃម្ខាងទៀតកាន់ដៃកូនប្រុសម្នាក់ទៀតដើរលេងនៅម្ដុំរូបសំណាក់ស្រីស លោក ណូ រីយ៉ា រស់នៅខេត្ដកំពត បានមកលេងនៅខេត្ដកែបជាលក្ខណៈគ្រួសារ។

បុរស់វ័យ៣៧ឆ្នាំរូបនេះបានប្រាប់ Newsroom Cambodia ថា អាជីវករដែរលក់ម្ហូបអាហារនៅឆ្នេរកែបមានភាពរញ៉េរញ៉ៃមិនដូចអ្នកលក់នៅតំបន់ផ្សេងៗ លោកមើលឃើញថាអាជីវករខេត្ដព្រះសីហនុ កំពត កោះកុង ឬនៅរមណីយដ្ឋានផ្សេងៗមិនមានអ្នករត់ចាប់ភ្ញៀវរញ៉េរញ៉ៃពេញផ្លូវដូចនៅឆ្នេរកែបនោះទេ។

លោកលើកឡើងថា៖ « ខ្ញុំយល់ថាមិនល្អមើលទេបើគាត់មានកន្លែងមានហាងអីត្រឹមត្រូវយើងចូលស្ម័គ្រចិត្ដ ចូលហាងណាចូលហាងហ្នឹងហ្មង។ចាប់តាមផ្លូវ ប្រសេកប្រសាច[ខុស]ច្បាប់ចរាចរណ៍ »។

លោក សូ ម៉ុង អាយុ៧២ឆ្នាំ ប្រកបមុខរបរជាអ្នកថតរូបនៅតំបន់ឆ្នេរកែបមើលឃើញថា ការហៅភ្ញៀវរបស់អាជីវករលក់ដូរតាមតំបន់ឆ្នេរកែបគឺមិនល្អទេ អ្នកខ្លះគ្រាន់តែឃើញឡានភ្ញៀវឈប់ភ្លាមអូសដៃទៅអង្គុយលើកន្ទេលរួចគិតលុយ៤ម៉ឺន។ លោកថា ការចាប់ភ្ញៀវគឺមានផលប៉ះពាល់ខ្លាំងដល់អារម្មណ៍ភ្ញៀវ ធ្វើឱ្យភ្ញៀវខ្លះខឹង ព្រោះភ្ញៀវទើបតែមកដល់មិនទាន់បានដកដង្ហើមស្រួលបួលផងមានអ្នកលក់មកទាញដៃទាញជើងហើយភ្ញៀវខ្លះមិនមានលុយគ្រប់គ្រាន់នោះទេ។

លោកបន្តថាកន្លងមកការហៅភ្ញៀវបានធ្វើឱ្យមានគ្រោះថ្នាក់ចរាចរណ៍ដល់អ្នកធ្វើដំណើរតាមដងផ្លូវ លោកថាកន្លងមកអាជ្ញាធរធ្លាប់បានណែនាំអបរំច្រើនដងមកហើយដល់អាជីវករប៉ុន្តែមិនមានអ្នកអនុវត្តតាមនោះទេ។

លោកលើកឡើងថា៖ «អាជ្ញាធរ[អនុវត្តច្បាប់]ធូរពេកដោយចាប់ហើយស្តីពីរបីម៉ាត់រួចស្អែកឡើងគឺមកទៀត បើចាប់បានគួរតែមានវិធានការដាក់ទោសត្រឹម១០ថ្ងៃ បើ១០ថ្ងៃក្រោយមកធ្វើទៀតត្រូវរំសាយអាជីវកម្មចោល តែអាជ្ញាធរមិនធ្វើអញ្ចឹងទេគឺធ្វើលេងសើចៗដូច្នេះទើបអាជីវករមួយចំនួនមិនខ្លាច»។

ភ្ញៀវទេសចរម្នាក់មកពីខេត្តកំពតថ្លែងសុំមិនបញ្ចេញឈ្មោះ បានប្រាប់ Newsroom Cambodiaថា អ្នកស្រីមកលេងនៅឆ្នេរកែបនេះច្រើនដងហើយ ប៉ុន្តែការរៀបចំសណ្តាប់ធ្នាប់នៅទីនេះមិនទាន់ល្អនោះទេ។

អ្នកស្រីលើកឡើងថា៖ «ខ្ញុំមិនសប្បាយចិត្តនោះទេ នៅពេលដែលអ្នកលក់មកស្ទាក់ចាប់ភ្ញៀវចឹង ខ្ញុំទៅកំពង់សោមអត់មានចឹងទេ ឡានអាចបើកទៅដាក់ជិតកន្លែងលេងទឹក អាចក្រាលកន្ទេលហូបបាយហូបអីបាន មិនចាំបាច់ចូលកញ្ចុះទេ បើយើងមិនចង់គ្មានអ្នកមកទាញអីទេ គេគ្រាន់ហៅធម្មតា បើយើងមិនចូលក៏ស្រេចចិត្ត។ការលក់ដូរនៅនេះមើលទៅរញ៉េរញ៉ៃ អត់រៀបរយ ហើយឆ្នេរអត់សូវស្អាត មានសម្រាមទៀត ខ្ញុំមកនេះអត់ដែលចូលហូបអីទេ ដាំបាយដាក់មកពីផ្ទះរហូតហ្នឹង»។

លោក ញ៉ែត ផល អាយុ៤៨ឆ្នាំ រស់នៅភូមិអូរក្រសារ ឃុំអូក្រសារ ស្រុកដំណាក់ចង្អើរ ខេត្តកែប ដែលជាអ្នកលក់ដូរតាមរទេះនៅឆ្នេរកែប លោកបានប្រាប់ Newsroom Cambodia ថាការហៅឡានម៉ូតូភ្ញៀវ របស់អាជីវករដើម្បីឱ្យភ្ញៀវចូលមកហូបម្ហូបអាហារនៅកន្លែងរបស់ខ្លួន ពីសំណាក់អាជីរករមួយចំនួនមិនល្អ បើសិនជាអាចកាត់បន្ថយបានគឺល្អណាស់ លោកមិនយល់់ស្របចំពោះអាជីវករដើរកាក់ឡានម៉ូតូភ្ញៀវនោះទេ។

នៅពេលដែលលោកឃើញសកម្មភាពបែបនេះលោកមិនអាចទទួលយកបានទេ ព្រោះជាខ្មែរដូចគ្នា ជាពិសេសភ្ញៀវដែលបានមកលេង ទាំងយើងទាំងគេគឺមិនសប្បាយចិត្តឡើយ លោកថាបញ្ហានេះបានកើតមានយូរមកហើយនៅខេត្ដកែបនេះ។ នៅតំបន់ផ្សេងមិនមានអាជីវកររត់ចាប់ភ្ញៀវដូចនៅឆ្នេរកែបទេ ដូចជាកំពង់សោមនិងទឹកឈូ។

លោកបន្ថែមថា៖ «ខ្ញុំមិនអាចទទួលយកបានទេ យើងខ្មែរដូចគ្នានិយាយស្តាប់គ្នាបានភ្ញៀវ[បរទេស]ម៉េចចេះស្តាប់ ខ្ញុំគិតថាទោះបីក្នុងចិត្តគាត់ក៏មិនអាចទទួលយកបានដូចតែគ្នាហ្នឹង»។ លោកថា ទង្វើបែបនេះធ្វើឱ្យភ្ញៀវទេសចរជាតិអន្តរជាតិមានការថយចុះនៅពេលឃើញ សកម្មភាពមិនល្អបែបនេះ។

លោក ខេង សេងហុង ជានិស្សិតផ្នែក IT នៅរាជធានីភ្នំពេញបានធ្វើដំណើរកម្សាន្តមកខេត្តកែបថ្ងៃចុងសប្តាហ៍ បានថ្លែងប្រាប់ Newsroom Cambodia ថា ចំពោះអ្នកលក់ដែលមានកាយវិការទាញឬក៏អូសភ្ញៀវហើយជាពិសេសគឺឈរលើផ្លូវតែម្តងវាធ្វើឱ្យមានការកកស្ទះចរាចរណ៍ហើយក៏អាចបណ្តាលឱ្យមានគ្រោះថ្នាក់ដល់អ្នកធ្វើដំណើរនិយាយរួមគឺពិបាកភ្នែកមើលតែម្តង។

លោកបញ្ជាក់ថា៖ «ការអូសឬក៏ទាញភ្ញៀវទេសចរគឺជាភាសាគ្មានសំឡេងប៉ុន្តែវាក៏អាចបញ្ជាក់ថាជាការមិនសមរម្យ»។

លោកថា លោកសប្បាយចិត្តនៅពេលឃើញអាជីវករចេះលក់ដូរដើម្បីចិញ្ចឹមខ្លួនឯង ប៉ុន្តែបញ្ហាវិបត្តិមួយទៀតនោះគឺភ្ញៀវភាគច្រើនគឺមិនសប្បាយចិត្តនៅពេលឃើញសកម្មភាពដូចជាការអូសទាញស្ទាក់ភ្ញៀវចូលហាងរបស់គាត់។ ភ្ញៀវពិបាកទទួលយកនៅពេលដែលឃើញទិដ្ឋភាពមួយពិបាកភ្នែកមើល និងធ្វើឱ្យខូចទម្រង់ទ្រង់ទ្រាយរបស់ឆ្នេរកែបជាឆ្នេរមួយដែលទាក់ទាញភ្ញៀវទេសចរខ្លាំង។

លោកបន្ថែមថា៖ «ខ្ញុំអត់សប្បាយចិត្តនៅពេលគាត់មកស្ទាក់នៅពេលដែលយើងកំពុងធ្វើដំណើរ ប្រសិនបើអ្នកធ្វើដំណើរកំពុងភ្លឹកមើលទេសភាព មើលផ្លូវ មើលសមុទ្រ មើលភ្ញៀវទេសចរដើរជាដើម ប្រសិនបើមិនចាប់អារម្មណ៍ទៅមើលអ្នករត់មកហៅមកស្ទាក់ទាញភ្ញៀវទេនោះនឹងមានគ្រោះថ្នាក់»។

លោកសំណូមពរឱ្យអាជ្ញាធរជួយសម្រួលហើយចាត់វិធានការដល់អ្នកលក់ដូរតាមឆ្នេរកែបមួយចំនួនដែលមានសកម្មភាពមិនសមរម្យក្នុងការអូសទាញភ្ញៀវដូចជាឈរកណ្តាលទ្រូងផ្លូវកាក់ភ្ញៀវចូលហាងជាដើម។

លោកបញ្ជាក់ថា៖ «ខ្ញុំគិតថាប្រសិនបើអាជីវករនៅតែបន្តសកម្មភាពបែបនេះវាអាចនឹងធ្វើឱ្យភ្ញៀវទេសជាតិ-អន្តរជាតិធ្លាក់ចុះមកកម្សាន្តខេត្តកែប»។

លោក ខេង យ័ន អភិបាលក្រុងកែបបានប្រាប់Newsroom Cambodia ថាបញ្ហានេះរដ្ឋបាលក្រុងកែបធ្លាប់បានអញ្ជើញអាជីវករមកអប់រំណែនាំបានចំនួន២ទៅ៣ដងរួចមកហើយដើម្បីឱ្យអាជីវករបញ្ឈប់ការហៅភ្ញៀវប្រសេចប្រសាចតាមផ្លូវ។ ប៉ុន្តែនៅមានអាជីវករមួយចំនួនតូចនៅតែមិនបានចូលរួមនៅតែបន្តហៅភ្ញៀវដដែលតែមានចំនួនតិចតួចជាងមុន។

លោកថា ពីមុនមានអាជីវករទាំងនោះចេញមកហៅភ្ញៀវដល់លើផ្លូវប៉ុន្តែឥឡូវអាជីវករទាំងនោះចេញមកហៅភ្ញៀវហួសតែតូប លក់របស់ខ្លូនបន្តិចប៉ុណ្ណោះ។

លោកបន្តថា៖ ការឈានជើងចេញហៅបែបនេះគឺជាទម្លាប់របស់អាជីវករ បញ្ហាទាំងនេះរដ្ឋបាលក្រុងកែបនឹងអប់រំអាជីវករបន្ថែមទៀតដើម្បីឱ្យអាជីវករផ្លាស់ប្តូរទម្លាប់បន្តិចម្ដងៗ។ តែយ៉ាងណាលោកថាការផ្លាស់ប្ដូរទម្លាប់មនុស្សដែលធ្វើបែបនេះយូរឆ្នាំមកហើយគឺពិបាកណាស់ ប៉ុន្តែអាជ្ញាធរនៅតែបន្តអប់រំរហូតធ្វើឱ្យអាជីវករមានការផ្លាស់ប្តូរដោយមិនដឹងខ្លូន លោកក៏សុំឱ្យភ្ញៀវទេសចរទាំងអស់មានការយោគយល់ផងដែរ។

លោកលើកឡើងថា៖ « ពាក់ពន្ធ័នឹងចំណាត់ការអាជ្ញាធរបន្តពង្រឹងការអប់រំផ្សព្វផ្សាយឱ្យគាត់យល់ដឹងអំពីគោលការ[…] បើសិនជាគាត់នៅតែបន្តភាពអាណាធិបតេយ្យ[…] ផលប៉ះពាល់គឺនៅលើបងប្អូនអាជីវករទាំងអស់ហ្នឹងទេ ធ្វើឱ្យភ្ញៀវទេសចរគាត់អត់មកលេង ហើយឥឡូវតំបន់ទេសចរណ៍ថ្មីៗច្រើនណាស់ហើយល្អៗច្រើនណាស់ យើងហ្នឹងបន្តណែនាំគាត់[…]នៅតែរឿងពីរទេ ទីមួយគឺតម្លៃ[ម្ហូបអាហា]ទីពីរគឺរឿងហៅភ្ញៀវធ្វើឱ្យប៉ះពាល់ដល់អារម្មណ៍ភ្ញៀវ»។

ដោយឡែកលោក អំ សំអាត នាយកកិច្ចការទូទៅនៃអង្គការលីកាដូ ថ្លែងប្រាប់ Newsroom Cambodia លោកយល់ឃើញថា គួរតែមានការរៀបចំសណ្តាប់ធ្នាប់ឱ្យបានត្រឹមត្រួវជាពិសសអាជ្ញាធរត្រូវតែមានការណែនាំដល់អាជីវករឱ្យមានសណ្តាប់ធ្នាប់រក្សានូវសុជីវធម៌។

លោកថា ការប្រកបមុខរបររបស់អាជីវករគឺជារឿងមួយហើយក៏ប៉ុន្តែយើងត្រូវប្រកាន់ភ្ជាប់នូវគុណធម៌សណ្តាប់ធ្នាប់ចៀសវាងធ្វើយ៉ាងណាកុំឱ្យប៉ះពាល់ភ្ញៀវទេសចរ។

លោកលើកឡើងថា៖ «ការប៉ះពាល់ដល់ភ្ញៀវការចាប់ប្រទាញប្រទុងគឺប៉ះពាល់ដល់សណ្តាប់ធ្នាប់មិនល្អ ប៉ះពាល់ដល់សីលធម៌ ហើយវាប៉ះពាល់ដល់ការកម្សាន្តរបស់ភ្ញៀវមានអារម្មណ៍អាក់អន់ស្រពោនចិត្តជួនកាលអាចរងគ្រោះថ្នាក់ជាដើម»៕

កាលពីថ្ងៃសុក្រ ទី៣១ ខែមីនា ឆ្នាំ២០២៣ ក្រសួងបរិស្ថានចេញសេចក្តីជូនដំណឹងស្តីពីការប្រឡងប្រណាំង ភូមិ ឃុំ សង្កាត់មានសុវត្ថិភាពក្នុងក្របខណ្ឌលក្ខណសម្បត្តិទី៦ គឺ មានអនាម័យ មានសោភ័ណ្ឌភាពល្អ និងបរិស្ថានល្អ ក្នុងគោលបំណងគាំទ្រ និងអនុវត្តគោលនយោបាយរបស់រាជរដ្ឋាភិបាលកម្ពុជា ដើម្បីលើកទឹកចិត្តដល់ ភូមិ ឃុំ សង្កាត់ ដែលអនុវត្តបានល្អតាមគោលនយោបាយខាងលើ។

ក្រសួងបានបន្ថែមថា អភិបាលនៃគណៈអភិបាល ក្រុង ស្រុកខណ្ឌ អាចជ្រើសរើសបេក្ខភាព ឃុំ សង្កាត់ ដែលមានសមត្ថភាព ជួយការពារថែរក្សាធនធានធម្មជាតិ និងបរិស្ថានបានល្អ ជាពិសេសបានជួយបញ្ជ្រាបការយល់ដឹងដល់ពលរដ្ឋអំពីអនាម័យ ក្នុងដំបន់ប្រកបដោយភាពជោគជ័យ រួចបញ្ជូនទៅ នាយកដ្ឋានរង្វាន់និងលើកទឹកចិត្ត នៃនាយកដ្ឋានចំណេះដឹងនិងព័ត៌មាន ក្រសួងបរិស្ថាន៕

កាលពីថ្ងៃទី១៩ មេសា ឆ្នាំ២០២៣ ក្រសួងសុខាភិបាលបានចេញសេចក្តីជូនដំណឹងដល់សាធារណជន និងអាជ្ញាធរគ្រប់លំដាប់ថ្នាក់ អំពីការរៀបចំផែនការសង្រ្គោះបន្ទាន់ ក្នុងព្រឹត្តិការណ៍(Sea Games)ដែលនឹងប្រព្រឹត្តទៅនៅថ្ងៃទី០៥ ដល់ទី១៧ ខែឧសភា ឆ្នាំ២០២៣។ ដើម្បីការពារសុខសុវត្ថិភាពដល់ប្រជាពលរដ្ឋដែលបានចូលរួមក្នុងព្រឹត្តិការណ៍នោះដោយឥតគិតថ្លៃនៅពហុកីឡាដ្ឋានជាតិមរតតេជោ និងទីកន្លែងប្រកួតសំខាន់ៗមួយចំនួនទៀតនៅរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត និងខេត្តកែប។

តាមប្រភពដដែលបញ្ជាក់ថាទីតាំងដែលនឹងផ្តល់សេវាសង្រ្គោះដោយឥតគិតថ្លៃរួមមាន មន្ទីរពេទ្យជាតិចំនួន០៧ ក្នុងនោះមានមន្ទីរពេទ្យតេជោសន្ដិភាព មន្ទីរពេទ្យកាល់ម៉ែត មន្ទីរពេទ្យមិត្តភាពកម្ពុជា-ចិនព្រះកុសុមះ មន្ទីរពេទ្យមិត្តភាពខ្មែរ-សូវៀត មន្ទីរពេទ្យព្រះអង្គឌួង និងមជ្ឍមណ្ឌជាតិគាំពារមាតា និងទារក។សម្រាប់មន្ទីរពេទ្យបង្អែកខេត្តមានចំនួន០៤ មាន ខេត្តសៀមរាម ខេត្តព្រះសីហនុ ខេត្តកំពត និងខេត្តកែប ។

ក្រសួងបានបន្ថែមថាក្នុងករណីបងប្អូនប្រជាពលរដ្ឋមានបញ្ហាសុខភាព អាចស្វែងរកសេវាសុខភាព និងសង្គ្រោះបន្ទាន់ដោយឥតគិតថ្លៃនៅតាមទីតាំងដូចមានខាងលើ និងភ្ជាប់មកជាមួយតារាងកំណត់ទីតាំង(QR CODE) ប្រភេទរថយន្តគិលានសង្គ្រោះ ឈ្មោះមន្រ្តីបុគ្គលិកទទួលខុសត្រូវ និងលេខទូរស័ព្ទតាមទីតាំងនីមួយៗ។ ក្រសួងសុខាភិបាលនឹងធ្វើបច្ចុប្បន្នភាពទីតាំងផ្ដល់សេវាសុខភាព និងសង្គ្រោះបន្ទាន់តាមស្ថានភាពជាក់ស្ដែង ក្រសួងសង្ឃឹមយ៉ាងមុតមាំថា បងប្អូនប្រជាពលរដ្ឋនឹងចូលរួមសហការណ៍ជាមួយសមត្ថកិច្ចពាក់ព័ន្ធដោយស្មារតីទទួលខុសត្រូវខ្ពស់៕

ខាងក្រោមនេះគឺជាការផ្តល់បទសម្ភាសរបស់លោក រ៉ុង ឈុន ជាមួយ លោក ខាត់ ណាក់ និង លោក ហ៊ែល កំសាន មកពី Newsroom Cambodia៖

Q. សូមជម្រាបសួរលោក រ៉ុង ឈុន ។

A. បាទ!សូមជម្រាបសួរ ។

Q. តើក្បួនធម្មយាត្រាដែលសមាគមគ្រូបង្រៀនកម្ពុជាឯករាជ្យហែពីរូបសំណាកលោកយាយ​ពេញ​ ទៅខេត្តពោធិ៍សាត់ដើម្បីលើកកម្ពស់សីលធម៌សង្គម ប្រើរយៈពេលប៉ុន្មានថ្ងៃដែរលោក ?

A. បាទ! ក្បួនធម្មយាត្រារបស់យើងប្រើរយ:ពេល៧ថ្ងៃ គិតពីថ្ងៃទី១ ខែកុម្ភៈ និង​បាន​បិទ​បញ្ចប់​នៅ​ម៉ោង​​១២:៣០នាទីថ្ងៃត្រង់ ថ្ងៃទី៧ ខែកុម្ភៈ ឆ្នាំ២០២៣ នេះ ។

Q. ក្នុង​រយៈពេល​៧ថ្ងៃ​នៃ​ការហែក្បួនធម្មយាត្រា​នេះ ​តើ​ក្បួន​ជួប​នូវ​បញ្ហាអ្វី​ខ្លះ​ពាក់ព័ន្ធ​ទៅ​នឹង​ការហូប​ចុកក៏ដូចជាកន្លែងសម្រាក ?

A. យើងដើររយ:ពេល៧ថ្ងៃនេះឃើញថាថ្ងៃទី១យើងមានបញ្ហាកន្លែងស្នាក់នៅបន្តិច តែវា​មិន​ជា​បញ្ហា​អី​ធំដុំទេ គ្រាន់តែអាជ្ញាធរស្រុកពញាឮ ឃុំវិហារហ្លួង គាត់​បាន​បញ្ជា​ប្រជា​ការពារ​ម​​ក​រាំង​ក្បួន​ដែលយើងបានសុំព្រះសង្ឃដើម្បីសម្រាក ព្រះចៅ​អធិការ​លោក​អនុញ្ញាត ប៉ុន្តែ​លោក​សុំ​ឱ្យ​មាន​ការយល់ព្រម​ពីសាលាឃុំ ឯឃុំ​រុញ​ទៅ​ស្រុក​ដោយ​ឃើញ​ថា ព្រលប់​ទៅ​ហើយ​យើង​ក៏បាន​ទៅ​ស្នាក់​នៅឯ​ផ្ទះ​របស់​ប្រជាពលរដ្ឋ​ដែល​គាត់​យល់​ព្រម​ឱ្យ​ស្នាក់​នៅ​មាន​ចម្ងាយ​ប្រហែល​៥គីឡូ​ពី​ទីនោះ។

Q. តើការធ្វើធម្មយាត្រានេះមានសមាសភាពចូលរួមពីខាងណាខ្លះ ហើយ​មាន​ចំនួន​ប្រហែល​ប៉ុន្មាន​នាក់ ?

A. សមាសភាពចូលរួមក្បួនធម្មយាត្រានេះមានគ្រូបង្រៀន សមាជិកសមាគមគ្រូបង្រៀនឯករាជ្យ មានមេសហជីព មានក្រុមយុវជនរួមជាមួយប្រជាពលរដ្ឋមួយចំនួន ហើយ​ថ្ងៃ​ដំបូង​មាន​ចំនួន​ជាង​៥០​នាក់។

Q. ក្នុងការធ្វើធម្មយាត្រានេះតើប្រជាពលរដ្ឋនៅតាមដងផ្លូវលោកមានឆ្ងល់ទេ ហើយ​មាន​ទទួល​ស្វាគមន៍ ផ្តល់ជាទឹកសុទ្ធ អាហារឬកន្លែងសម្រាកអីដែរទេលោក?

A. ប្រជាពលរដ្ឋចេញមកស្វាគមន៍ច្រើន ពួកគាត់បានជូនជាភេសជ្ជៈ ជូនជាទឹកសុទ្ធ ជូនជាបច័្ចយ ជាហូរហែ​នៅតាមដងផ្លូវ។

Q. តាំងពីចាប់ផ្តើមចេញដំណើរ រហូតដល់ឆ្លងកាត់ព្រំប្រទល់ខេត្តនីមួយៗ តើ​មាន​ការយាយី​រំខាន​ពី​សំណាក់​អាជ្ញាធរ​ដែរ​ឬ​ទេ ឬមានការសហការល្អនៅតាមតំបន់នីមួយៗ?

A. យើងមានការរំខានខ្លះកាលពីថ្ងៃទី១ដំបូងគេ ដោយអាជ្ញាធរស្រុកពញាឮ មានការរាំង សួរនាំ និង​រុញ​ដា​ក់គ្នាពីការសម្រាក ឬស្នាក់នៅនេះ។ បន្ទាប់ពី​នោះ​មក​ចូល​ដល់​ខេត្ត​កំព​ង់​ស្ពឺ​ក៏​អត់​មាន​អី​ទេ ការហែទៅបានរលូនរហូតទៅដល់កំពង់ឆ្នាំងត្រូវបានអាជ្ញាធរសហការបានល្អ ជួយ​ធ្វើ​ចរាចរណ៍ និង​បាន​ដាក់​កម្លាំង​នគរបាល​ឱ្យ​មក​គេង​ជាមួយ​បងប្អូន​ដែល​ចូលរួម​ហែក្បួន​រហូត​ដល់​ទឹ​ក​ដី​ពោធិ៍សាត់​ក៏​មិន​មាន​អី​ដែរ ប៉ុន្តែ​យើង​សោកស្តាយ​នៅ​ថ្ងៃបញ្ចប់​ដោយសារ​តែ​ប្រជាពលរដ្ឋ​លោក​មក​ចូលរួម​ច្រើន​ក្នុង​ការប្រារព្ធ​ពិធី​សាសនា​តែត្រូវ​បាន​អាជ្ញាធរ​ខេត្ត​មក​រារាំង​មិន​ឱ្យ​ចូលរួម​វា​ជា​រឿង​មួយ​ដែលមិ​ន​គួរ​កើត​មាន​ក្នុងរយ:ពេល​នៃ​ថ្ងៃចុង​ក្រោយ​នេះ។

Q. លោកមានអ្វីជាប្រសាសន៍ចុងក្រោយពាក់ព័ន្ធនឹងធម្មយាត្រានេះ ?

A. ជុំវិញធម្មយាត្រារយ:ពេល៧ថ្ងៃនេះយើងឃើញថាមានការចាប់អារម្មណ៍ច្រើន ហើយ​យើង​គិត​ថា​ការដង្ហែ​នេះ​បាន​បញ្រ្ជាប​ទៅ​ដល់​ជួរ​ថ្នាក់​ដឹកនាំ​ក៏​ដូចជា​ប្រជាពលរដ្ឋ​ឱ្យ​ចាប់ផ្តើម​គិត​អំពី​សីលធម៌​ឡើងវិញ​មុន​នឹង​ធ្វើ​សុន្ទរកថា ឬ​មួយ​ផ្ញើសារ​ទៅ​កាន់​ប្រជាពលរដ្ឋក្តី ចៀសវាង​ប្រើ​ពាក្យ​អសុរោះ​មិន​គួរ​ប្បី​ដែល​ជា​គំរូអាក្រក់នៅក្នុងសង្គម៕

Q. សូមអរគុណលោក រ៉ុង ឈុន!

A. បាទ សូមអរគុណ!

Q៖ ជម្រាបសួរលោក គេច សុគន់!

A៖ បាទជម្រាបសួរ!

Q៖ តើលោកចាប់ផ្តើមមានជំងឺទឹកនោមផ្អែមតាំងពីពេលណាដែរ?

A៖ ខ្ញុំចាប់ផ្ដើមបរិភោគភេសជ្ជៈ (គោជល់ និងខារ៉ាបាវ) តាំងពីឆ្នាំ២០០០ នៅ​ពេល​ដែល​ខ្ញុំ​ជា​អ្នក​បើកបរ​គ្រឿងចក្រ និងណាមួយខ្ញុំព្យាយាមសិក្សារហូតដល់យប់ជ្រៅ ជំនាន់នោះពុំសូវមានកាហ្វេ ឬភេជ្ជៈ Sugar free ទេ ហើយនេះគឺជាមូលហេតុដែលធ្វើឱ្យខ្ញុំមានជំងឺទឹកនោមផ្អែម។

Q៖ តើមានកត្តាអ្វីខ្លះដែលធ្វើឱ្យលោកកើតមានជំងឺ​ទឹកនោមផ្អែមនេះ?

A៖ ជាការយល់ឃើញ៖ ការលំហាត់ប្រាណ របបអាហារ និង ទម្លាប់រស់នៅ ការមិន​សូវ​ខ្វល់ខ្វាយ​ពី​សុខភាព​ចេះ​តែ​បណ្តោយយូរៗទៅក៏មានជំងឺ។

Q៖ តើជំងឺនេះមានការធ្វើទុក្ខដូចម្តេចខ្លះ?

A៖ ធ្វើឱ្យខ្ញុំស្រវាំងភ្នែក ស្រេកទឹកច្រើនជាងធម្មតា នោមញឹកញាប់ជាងធម្មតា អស់កម្លាំង និងងងុយគេង តែងតែ​ឃ្លាន ការមុត ឬដាច់ ជាសះស្បើយយឺត រមាស់ ការឆ្លងមេរោគលើស្បែក មើល​មិន​សូវ​ឃើញ​ច្បាស់​ស្រក​ទម្ងន់​ដែល​មិន​​អាច​​ពន្យល់​បាន (ប្រភេទទី១) ស្រក​ទម្ងន់​បន្តិចម្តងៗ (ប្រភេទទី២) ប្រែប្រួលអារម្មណ៍ ឈឺក្បាល។

Q៖ តើលោកធ្លាប់បានទៅជួបជាមួយវេជ្ជបណ្ឌិតដែលជំនាញព្យាបាលជំងឺទឹកនោមផ្អែមនេះប៉ុន្មានលើកដែរ?

A៖ ជាទូទៅជួប ២សប្ដាហ៍ ឬ១សប្ដាហ៍ម្ដង។​

Q៖ តើលោកទទួលបានដំណោះស្រាយអ្វីខ្លះពីវេជ្ជបណ្ឌិតដើម្បីព្យាបាលជំងឺនេះ?

A៖ ប្រឹក្សាយោបល់ ការប្រើប្រាស់ឱសថ និងគ្រប់ការប្រែប្រួលជាតិស្ករ។​

Q៖ តើពេលនេះស្ថានភាពជំងឺរបស់លោកយ៉ាងម៉េចដែរ?

A៖ ខ្ញុំឈឺជំងឺនេះ ស្ករ ៤០០ មានន័យថាកម្រិតស្ករនេះឡើងខ្ពស់។​

Q៖ តើលោក​អាច​ចែក​រំលែក​ពី​វិធីសាស្រ្ត​ដើម្បី​ព្យាបាល​ និង​វិធី​ការពារ​ពី​ជំងឺ​ទឹកនោម​ផ្អែម​នេះ​ទៅ​កាន់​សាធារណជន​ដើម្បី​ឱ្យ​ពួកគាត់​បានដឹង​ផង​លោក?

A៖ តាមបទពិសោធន៍របស់ខ្ញុំដើម្បីព្យាបាលជំងឺនេះទី១ ត្រូវ​ធ្វើ​លំហាត់​ប្រាណ​ជា​រៀងរាល់​ថ្ងៃ​ ឬ២ដង​ក្នុង​មួយ​សប្តាហ៍ ទី២ គ្រប់គ្រង​របបអាហារ មាន​ន័យ​កុំ​សូវ​ហូប​អ្វី​ដែល​មិន​ល្អដ​ល់​សុខភាព​ដូចជា​ភេសជ្ជៈ​ប៉ូវ​កម្លាំង​ដែល​មា​នជាតិផ្អែម ទី៣ ថែទាំសុខភាពពីជំងឺផ្សេងៗ។​

Q៖ សូមអរគុណលោក គេច សុគន់!

A៖ បាទ សូមអរគុណ!

សមាគម​ប្រតិបត្តិករទូរគមនាគមន៍បានបញ្ជាក់ថា ប្រតិបត្តិករ​ផ្តល់​សេវា​ទូរស័ព្ទ​ចល័ត​ទាំង​អស់ និង​បញ្ឈប់​សេវាក​ម្ម​គម្រោង​ប្តូរ​ប្រាក់​ជា​មុ​ន​​នៅ​ថ្ងៃទី០១ ខែ​មីនា ឆ្នាំ២០២៣។ ហើយ​អតិថិជន​ទាំងអស់​អាច​អញ្ជើញ​ទៅ​កាន់​សាខា​ផ្តល់​សេវា​ទូរស័ព្ទ​ចល័ត​ដើម្បី​ផ្លាស់​ប្តូរ​ទៅ​កាន់​គម្រោង​ថ្មី។ ចំពោះអតិថិជនដែលមិនបានទៅផ្លាស់ប្តូរគម្រោងថ្មីនេះមុនថ្ងៃទី២៨ ខែកុម្ភៈ ឆ្នាំ​២០២៣ប្រតិបត្តិករផ្តល់សេវាទូរស័ព្ទចល័តរបស់លោកអ្នក និង​ផ្លាស់ប្តូ​រ​ទៅ​កាន់​គម្រោង​ថ្មី​ដោយ​ស្វ័យ​ប្រវត្តិ​​នៅ​មុន​ថ្ងៃទី០១ ខែមីនា ឆ្នាំ២០២៣។

ប្រជាពលរដ្ឋ​ចំនួន​៦​​នាក់​​បា​ន​ផ្តល់បទសម្ភាសន៍​ដល់ Newsroom Cambodia អំពី​មតិ​របស់​ពួកគេ​ជុំវិញ សេចក្តី​ជូន​ដំណឹង​របស់​សមាគម​ប្រតិបត្តិករ​ទូរគមនាគមន៍​ទាក់ទង​ជាមួយ​ការផ្លាស់ប្តូរ​សេវា​ទូរស័ព្ទ​ចល័តពីកញ្ចប់គម្រោងប្រើបច្ចុប្បន្នទៅកញ្ចប់គម្រោងថ្មី។

លោក កុសល ពិសិដ្ឋ ​អ្នកកាត់តវីដេអូបានលើកឡើងថា តាម​បទពិសោធន៍​របស់​លោក​រយៈពេល​ដែល​ចេះ​ប្រើ​ទូរស័ព្ទ​មក​នៅ​ឆ្នាំ២០០៥ ពេលនោះមិនទាន់មានគម្រោងប្តូរលុយទេ ហើយ​ការប្រើប្រាស់គឺបានតិចណាស់។ លោកថា ចាប់​តាំងពី​មាន​គម្រោង​ប្តូរ​លុយ​មក​ការ​តេ​ក្នុង​ប្រព័ន្ធ​ការប្រើប្រាស់ទៅ​លើសេវាកម្មនានាមានភាពងាយស្រួលជាងមុន និង​មិនសូវ​កាត់​លុយ​ដូច​ពី​មុន​ឡើយ។

លោកបានបន្ថែមថា ប្រសិនបើគោលការណ៍​ថ្មី​នេះ​គឺ​ធ្វើ​ឡើង​ដើម្បី​លុប​បំបាត់​ការកេង​ចំណេញ​​ពី​អតិថិជន​គឺ​លោក​គាំទ្រ​ព្រោះ​ជា​ទូទៅ​នៅ​ពេល​ដែល​លោក​បញ្ចូល​ទឹកប្រាក់​ក្នុង​ទូរស័ព្ទ​តែងតែ​មាន​ការកាត់​ដោយ​មិ​ន​ដឹង​មូលហេតុ​ហើយ​ប្រសិនបើ​ក្រសួង​មាន​គោលការណ៍​ដាក់​​​អតិ្ថភាព យកអតិថិជនជាគោលដៅធំមានន័យថាអាចជួយសម្រួលអតិថិជន កុំ​ឱ្យ​ក្រុមហ៊ុន​​កេង​​ចំណេញ​បាន​តទៅ​ទៀត​។​ 

លោកបានបន្តថា៖ «ជាមួយកញ្ចប់សេវាប្រើប្រាស់ទាក់ទងនិងប្រព័ន្ធទូរស័ព្ទ អាហ្នឹង​ខ្ញុំ​គិត​ថា​ខ្ញុំ​ប្រើ​រាល់ថ្ងៃ​ដូចជា​មិន​ជា​បញ្ហា​ចោទ​អី​ធំ​ទេ ហើយណាមួយឥឡូវអាចតេក្នុងប្រព័ន្ធអីស្រួល តែ​គ្រាន់​តែ​មានបញ្ហាសេវាទូរស័ព្ទ ដោយសារ​តែ​ឥឡូវ​ហ្នឹង​គឺ​ប្រើប្រាស់​អត់​ដូច​មុន​ទេ​គឺ​ប្រើ​ទាល់​តែ​រកទីតាំង​ដែល​ត្រឹមត្រូវ​មិន​ចឹង​ទេ​បើ​ក្នុង​បុ​រី​គឺអត់មានសេវាប្រើប្រាស់ពិបាកមែនទែន តែបើ​​ពាក់ព័ន្ធ​ជាមួយ​កញ្ចប់​សេវាកម្មប្រើប្រាស់គឺមិនមានបញ្ហាទេ»។

លោក គេច សុគន់ ​ពេទ្យ​សត្វ​នៅ​រាជធានី​ភ្នំពេញ​យល់​ថា៖ «ក្នុងនាម​ជា​អ្នក​ប្រើប្រាស់​​សេវា​ក​ម្ម​ទូរស័ព្ទ ចំពោះគោលនយោបាយនេះ​មានលក្ខណៈផ្លាស់ប្ដូរ ឬ​កំណែ​ទម្រង់​ថ្មី​ដ៍​ធំ​មួយ​​ដែរ។ ខ្ញុំ​កំពុងរងចាំមើល និង​សង្ឃឹម​ថា​ការផ្លាស់ប្ដូរ ឬ​​កំណែទម្រង់​នេះ​នឹង​នាំ​ឱ្យ​ការផ្ដល់​សេវា​ទូរស័ព្ទ​របស់​ក្រុមហ៊ុន​កាន់តែល្អប្រសើរ»។

កញ្ញា ចិត្ត ស្រីយ៉ា ​ដែលជានិស្សិតសាកលវិទ្យាល័យភូមិន្ទភ្នំពេញបានយល់ឃើញថា៖ «វានឹង​ល្អ​ប្រសិនបើ​ក្រុមហ៊ុន​ទូរស័ព្ទទាំងអស់ហ្នឹង គាត់កំណត់យកការដូរលុយគម្រោងតែមួយ។ ឧទាហរណ៍​១ដុល្លារ​ដូរ​បានប៉ុន្មាន គាត់​ប្រាប់​អតិថិជន​មក​ថា ១ដុល្លារដូ​រ​គម្រោងនេះ​បាន​ប៉ុណ្ណោះ​ ហើយអ៊ីនធឺណិតបានប៉ុននេះ សារបានប៉ុននេះ តែមួយមុខអ៊ីចឹកមកបានហើយ។ ព្រោះ​នៅ​ពេល​ដែល​មាន​គម្រោង​ច្រើន​អ៊ី​ចឹង ខ្ញុំជា​អ្នកប្រើ​ក៏​មានអារម្ម​ណ៍​ថា​រញ៉េរញ៉ៃ​ក្នុងការប្រើ គួរ​យក​មួយណា​គួរអត់មួយណា»។

កញ្ញា ចិត្ត ស្រីយ៉ា ក៏បានសំណូមពរឱ្យក្រុមហ៊ុនផ្ដល់សេវាទូស័ព្ទគិតគូរពីទិន្នន័យអ៊ីនធឺណិត ទិន្នន័យសារ ទិន្នន័យខល ធ្វើយ៉ាងណា​ឱ្យសមរម្យ និងគ្រប់គ្រាន់សម្រាប់អ្នកប្រើប្រាស់​។

លោក សុវណ្ណឡេងឡេង​ ជាសិល្បៈករខាងចាប៉ីដងវែងមួយរូបបានលើកឡើងថា៖ «បើ​តាម​គំនិត​របស់​ខ្ញុំ​បើសិន​ជា​ប្តូរ​គម្រោង​លក្ខណៈ​មា​ន​តម្លាភាព​ត្រឹមត្រូវ​ឧទាហរណ៍​ថា​ក្រុមហ៊ុន​នេះផ្លាស់ប្តូរ​ក្នុង​មួយដុល្លារ​ដូរ​បាន1G or 500MB គឺ​ឲ្យបា​នដូ​ចគ្នា​ហើយ​មាន​សុពលភាព​ត្រឹមត្រូវ»។

លោកបានបន្តថា៖ «ហើយបើប្តូរ​ទៅ​ជា​គម្រោង​ជាក់លាក់​នៅថ្ងៃ២៨​នឹង​មែន​គឺ​ខ្ញុំ​ពិត​ជា​ពេញចិត្ត​បើ​សិន​ជាទៅតាមលក្ខខណ្ឌហើយច្បាស់លាស់»។

លោកសុវណ្ណឡេងឡេង បន្ថែម​ថា លោក​បាន​សង្កេតឃើញ​ថា កន្លង​មក​អ្នក​ប្រើប្រាស់​សេវា​ទូរស័ព្ទ​តែងតែ​ជួបបញ្ហាកាត់លុយក្រោយពេលបញ្ចូលហើយ ដោយសារ​គម្រោង​ផ្សេងៗ​ក្រៅ​ពី​គម្រោង​ប្ដូរ​លុយ ជាហេតុនាំឱ្យខ្វះលុយមិនអាចប្ដូរបាន។ លោក​បាន​សំណូមពរ​ឱ្យ​ក្រុមហ៊ុន​ទូរស័ព្ទ​ផ្ដល់​តែ​សេវាប្ដូរលុយដែលមានតម្លាភាព មិន​បញ្ឈប់​ការផ្ដល់​គម្រោង​ក្រៅ​ដើម្បី​ជៀស​វាង​​បញ្ហា​កាត់​លុយ។

តាមរយៈកិច្ចសម្ភាសន៍តាមតេលេក្រាម កញ្ញា ស៊ុន​ ស្រីណៃ អ្នកសម្របសម្រួលការរៀនសូត្រ និងអភិវឌ្ឍន៍យុវជននៃសមាគមបណ្ដាញយុវជនកម្ពុជា​បាន​បង្ហា​ញ​ចំណាប់​អារម្មណ៍​ចំពោះ​​គម្រោង​​​នៃការ​ផ្លាស់ប្តូរនេះថាប្រសិន​បើ​ប្រព័ន្ធនៃការដូរលុយមាន​ភាពល្អប្រសើរ​ជាងមុន ​វា​មាន​ភាព​ងាយ​ស្រួល​ជាង​មុន​ នេះជារឿងដែលល្អសម្រាប់យើងក្នុង​នាម​​​ជា​អតិថិជន​​ប្រើ​ប្រាស់​ប្រព័ន្ធនានា​របស់​ក្រុមហ៊ុនសេវា​ទូរស័ព្ទនៅកម្ពុជាផ្ទាល់។

កញ្ញាថា៖ «ប្រសិន​ជាការ​ផ្លាស់ប្តូរ​គម្រោង​ ផ្តល់ភាពងាយស្រួល​ទៅដល់អតិថិជន​​ដែល​ជា​អ្នក​ប្រើ​ប្រាស់​ ហើយបើសិនជា​គម្រោង​ហ្នឹង​ប្តូរ​លុយ​ទៅ​ធ្វើអោយនៅ​តែរក្សា​ចំនួន​លុយ​ឬក៏រក្សា​នូវ​ចំនួនការ​កាត់សាច់ប្រាក់​នៅពេលដែលយើងប្រើប្រាស់​អ៊ីនធឺណែត​ ​នៅ​ពេល​ដែល​យើង​ប្រើ​ប្រាស់​​ការខលហៅ​​ ឬការផ្ញើសារ​ទៅ​កាន់ដៃគូរ​ផ្សេងទៀត​ នៅតែរក្សា​ការកាត់​ចំនួន​លុយ​ហ្នឹង​ដដែលក្នុងចំនូនតិច គម្រោង​ហ្នឹង​បងគិតថា​ល្អ ប៉ុន្តែ​បើស្រប​ពេល​នៃការផ្លាស់ប្តូរ​គម្រោង​ដូរ​លុយហ្នឹង ឧទាហរណ៍ថាប្តូរ​ពីចំនួនពីប៉ុន្មានទៅប៉ុន្មានអញ្ចឹង»។​

កញ្ញាក៏បានបន្ថែមថា៖ «ប៉ុន្តែនៅ​ពេលដែលអតិថិជន​ប្រើ​​អ៊ីនធឺណេត នៅពេលដែលគាត់ខល ចេញ ឬក៏គាត់ផ្ញើរសារ​ មានការ​កាត់ថវិការច្រើន​​ហើយ​ធ្វើអោយ​ការប្រើប្រាស់ប្រព័ន្ធ ​អ៊ីន​​​​​​ធឺ​​ណិត​​​មានភាពយឺតយ៉ាវ​ ឬបញ្ហាផ្សេងៗ វានឹងជារឿងមួយមិនល្អសម្រាប់ការផ្លាស់​ប្តូរនូវ​គម្រោងការដូរ​លុយ ហ្នឹង​ហើយ​មួយទៀតហ្នឹង​គឺអ្នក​ប្រើប្រាស់ក៏មានភាពធុញទ្រាន់​ ភាព​មិ​ន​ពេញចិត្តនៅក្នុងការប្តូរគម្រោង​ហ្នឹងដែរ​»។

យុវជន គីម ជីលីន និស្សិតសង្គមវិទ្យានៅសាកលវិទ្យាភូមិន្ទភ្នំពេញបានផ្តល់បទសម្ភាស៍ថា នៅពេលដែលក្រសួងប្រៃសនីយ៍បានរៀបចំ​ធ្វើកំណែទម្រង់លើសេវាទូរស័ព្ទនៃក្រុមហ៊ុនផ្តល់សេវាទូរស័ព្ទនៅកម្ពុជាបែបនេះ វា​ជា​ផ្នែក​មួយ​​នៃការលើកកម្ពស់ទៅលើតម្លាភាព​នៃ​គម្រោង​ថវិការ​របស់​អតិថិជន​ក្នុង​ការ​ប្រើប្រាស់​សេវាទូរស័ព្ទនៅកម្ពុជា ។

លោកថា៖ «នៅ​ពេ​ល​ដែលក្រសួងចាប់ផ្តើមពង្រឹងស្តង់ដាសេវាទូរស័ព្ទអី​ទាំង​អស់ហ្នឹង ខ្ញុំ​អាច​ប្រើ​ប្រាស់​សេវា​ទូរស័ព្ទ​សម្រាប់ការរៀនសូត្រ​ខ្ញុំបានល្អប្រសើរទៀត ហើយ​អ្វី​ដែល​សំខាន់​ចុង​ក្រោយ​នោះ​គឺ​ខ្ញុំ​អាច​សន្សំ​សំចៃ​ថវិកា​​ខ្លះផងដែរ ពីព្រោះ​កន្លង​ទៅ​នៅ​ពេល​ដែល​ក្រសួង​មិន​ទាន់​​បា​ន​​រឹត​បន្តឹងក្នុង​ចំណុចហ្នឹង​ ខ្ញុំប្រើសេវាទូរស័ព្ទទាំងអស់ហ្នឹង អស់​លុយ​ពីមួយ​ខែ​ទៅ​មួយ​ខែ​ចន្លោះ​ពី​៥​ដុល្លារ​ទៅ​៦ដុល្លារ ឬក៏ឈានចូលជិត១០ដុល្លារទៅ​តាមតម្រូវការ​ តែនៅពេល​កំណត់​បែប​នេះ​ខ្ញុំ​គិត​ថា​​វា​នឹងជួយសន្សំសំចៃថវិកា ទាំងខ្ញុំផ្ទាល់ជានិស្សិត និង ពលរដ្ឋ​ផ្សេង​ទៀត​ដែល​ទទួល​សេវាកម្មទូរស័ព្ទបែបហ្នឹងដែរ»។

យុវជនរូបនេះបន្តថា៖ «ខ្ញុំនៅតែលើកទឹកចិត្តឱ្យក្រសួង​បន្តរឹត​បន្តឹង​ទៀត​ហើយ​ជួយ​ព្យាយាម​ជម្រុញ​យ៉ាងណាឱ្យសេវាទូរស័ព្ទអាចដើរលឿននៅគ្រប់ទីតាំង គ្រប់​ទី​កន្លែង​នៃ​ប្រទេស​កម្ពុជា ជាពិសេស​ដ​ល់ទីជនបទ ដើម្បី​ឱ្យ​ប្រជាជន​ដែល​នៅ​ទី​ជនបទ​អាច​ទទួល​បានសេវា​ទូរស័ព្ទ​ក្នុង​ការរៀនសូត្រ ក្នុងការប្រើប្រាស់ក្នុងការទាក់ទងជាដើម»៕​

បច្ចុប្បន្ន មានព្រះសង្ឃជាច្រើនអង្គ បានសម្រេចចិត្តចាកចេញពីស្រុកកំណើត បន្ទាប់ពីប្រឡងជាប់សញ្ញាប័ត្របាក់ឌុក មូលហេតុដែលព្រះអង្គមករស់នៅភ្នំពេញ ដើម្បីបន្តការសិក្សាថ្នាក់បរិញ្ញាប័ត្រ។

ព្រះអង្គទ្រី សុកជា ព្រះជន្ម២៥វស្សា ជាកូនទី៨ និងកំព្រាម្ដាយ ក្នុងចំណោមបងប្អូន៩នាក់ បានរៀបរាប់ថា ផលលំបាកដែលព្រះអង្គជួបគឺ ខ្វះខាតបច្ច័យបង់ថ្លៃសាលា ការធ្វើដំណើរប្រចាំថ្ងៃ និងថ្លៃម្ហូបអាហារមិនមានគ្រប់គ្រាន់។

ព្រះអង្គ សុកជា នៅភូមិត្រពាំងមាស ឃុំដំណាក់សុក្រំ ស្រុកដងទង់ ខេត្តកំពត បច្ចុប្បន្នជានិស្សិតមកពី សាកលវិទ្យាល័យ ភូមិន្ទកសិកម្ម គង់នៅវត្តស្ទឹងមានជ័យ រាជធានីភ្នំពេញ។ ទន្ទឹមនេះ ព្រះអង្គត្រូវនិមន្តបិណ្ឌបាត្រដើម្បីផ្គត់ផ្គង់លើការទិញសម្ភារ:សិក្សា ថ្លៃសាលា និងចុះពិសោធន៏ដំណាំតាមខេត្ត។

ព្រះបន្តថា «សព្វថ្ងៃខ្ញុំករុណាជួបផលលំបាកច្រើន ដូចជាខ្វះបច្ច័យបង់សាលា ការធ្វើដំណើរទៅវិញទៅមក និងចង្ហាន់ពីរពេល»។

ព្រះអង្គបញ្ជាក់ថា «បើខ្ញុំព្រះករុណា មិនខំតស៊ូ ព្យាយាម និងអត់ធ្មត់ទេ ប្រហែលមិនបានចូលរៀននៅសកលវិទ្យាល័យ និងយល់ដឹងពីសង្គមទេ»។

ភិក្ខុមួយអង្គ សុំមិនបញ្ចេញឈ្មោះបានឱ្យដឹងថា ក្រោយចាកចេញពីស្រុក មករស់នៅក្រុងតាខ្មៅ ពេលនោះជួបផលលំបាក ដោយសារនៅក្មេង មករស់នៅឆ្ងាយ មិនទាន់សម្របខ្លួន ណាមួយអាពាធច្រើន និងខ្វះខាតបច្ច័យខ្លះដែរ បន្ទាប់មកប្ដូរមករស់នៅភ្នំពេញ ក៏រាងប្រសើរជាងមុន គ្រាន់តែត្រូវការចំណាយច្រើនប្រចាំថ្ងៃ។

ព្រះអង្គ ព្រះជន្ម២២វស្សា នៅភូមិសំព័រ ឃុំស្វាយអង្គ ស្រុកស្វាយជ្រំ ខេត្តស្វាយរៀង សព្វថ្ងៃជាសាមណ:និស្សិតនៃសាកលវិទ្យាល័យប៊ែលធី។

ព្រះអង្គ គឺជាកូនទី២ និងកំព្រាឳពុកក្នុងចំណោមបងប្អូនចំនួន៣នាក់ ដោយអ្នកម្ដាយប្រកបមុខរបរជាកសិករ ហើយបែកពីផ្ទះមករស់នៅភ្នំពេញតាំងពីឆ្នាំ២០១៦មក។

ព្រះអង្គបន្តថា «ចំពោះផលលំបាកក្នុងការសិក្សា គឺមធ្យោបាយធ្វើដំណើរប្រចាំថ្ងៃ និងបង់ថ្លៃសាលា ដោយសារញោមស្រី នៅឯស្រុកម្នាក់ឯង រឿងផ្គត់ផ្គង់ហិរញ្ញមិនចង់ឱ្យលំបាកដល់គាត់ ដូច្នេះខ្ញុំករុណាត្រូវពឹងលើការបិណ្ឌបាត្រ»។

ព្រះអង្គបន្ថែមថា៖ «ចំពោះការធ្វើដំណើរត្រូវចំណាយច្រើនប្រចាំថ្ងៃ ដូច្នេះជាផលលំបាកមួយដែរ ពេលខ្លះធ្វើដំណើរថ្មើរជើង ដើម្បីកាត់បន្ថយការចំណាយ និងដើម្បីសុខភាពផង។ [… ]សម្រាប់ចង្ហាន់ពីរពេល មិនមានផលលំបាកឡើង នៅវត្តមានការផ្គត់ផ្គងរាល់ថ្ងៃ ញាតិញោមដាក់វេនញឹកញាប់។»

ព្រះអង្គបញ្ជាក់ថា៖ «កត្តាដែលជម្រុញឱ្យខ្ញុំករុណា បន្តរៀនសូត្រនៅភ្នំពេញ ដោយសារទីនេះសំបូរកន្លែងសិក្សា មានតែមកទីនេះទេទើបមានលទ្ធភាពអាចបន្តមហាវិទ្យាល័យបាន»។

ព្រះអង្គសំណូមពរថា៖ ខ្ញុំករុណា អាត្មាភាព សំណូមពរដល់ប្រជាពលរដ្ឋខ្មែរទាំងអស់ មានស្មារតីសាមគ្គី គោរព ស្រឡាញ់គ្នា ក្នុងនាមជាមនុស្សជាតិតែមួយ ជាពិសេសសូមជួយលើកកម្ពស់ការអប់រំ យកចិត្តទុកដាក់ចំពោះយុវជនខ្មែរ ជៀសវាងការសប្បាយភ្លើតភ្លើនវីវក់នឹងរឿងសប្បាយភ្លេចគិតសុខភាព និងសាសនាប្រទេសជាតិ។

លោកសេង សុមុនី អ្នកនាំពាក្យក្រសួងធម្មការ និងសសានា នៅពេលអ្នកសារព័ត៌មាន Newsroom Cambodia បានទាក់ទងទៅតាមរយ: Telegramដើម្បីសុំការអត្ថាធិបាយបន្ថែម ប៉ុន្តែលោក មិនបានឆ្លើយតបទេ៕

នៅក្នុងវីដេអូដែលបានបង្ហោះលើបណ្តាញសង្គម Facebook លោកបាននិយាយពីយុវវ័យដែលមកទីក្រុងដើម្បីធ្វើការហើយមានលទ្ធភាពអាចបង់រំលោះ ឬទិញផ្ទះបាន តែគុណភាពសំណង់មិនល្អ ហើយធ្វើឱ្យពួកគេខាត់បង់ប្រាក់បន្ថែមដើម្បីជួសជុលទៅលើកន្លែងដែលមានបញ្ហាទាំងនោះ។

លោកបន្ថែមថា អ្នកដែលចំណេញគឺជាថៅកែសំណង់ឯទុក្ខលំបាក គឺបងប្អូនដែលបានទិញ ឬបង់រំលោះផ្ទះនោះ។

ដោយមើលឃើញពីបញ្ហាទាំងអស់នេះលោកបានប្រកាសរឹតបន្តឹងទៅលើគុណភាពសំណង់ទូទាំងរាជធានីភ្នំពេញ ជាពិសេសត្រូវឱ្យមានការ ត្រួតពិនិត្យរាល់លក្ខណៈទាំងអស់។

លោកបានបញ្ជាក់ថាម្ចាស់សំណង់ និងម្ចាស់សំណង់បូរីត្រូវអនុវត្តដូចជា ត្រូវមានលិខិតអនុញ្ញាតសាងសង់ឱ្យបានត្រឹមត្រូវ និងមិនត្រូវសាងសង់ខុសលិខិតអនុញ្ញាត។ លោកបន្តថាម្ចាស់សំណង់ត្រូវសហការជាមួយក្រុមហ៊ុនសាងសង់ដែលមានអាជ្ញាប័ណ្ណ ពីក្រសួងដែនដី នគរូបនីយកម្ម និងសំណង់ និងត្រូវអនុវត្តតាមគោលការ សុវត្តិភាព។ លោកបានបន្តថា ត្រូវយកចិត្តទុកដាក់ចំពោះ គុណភាពសំណង់ របស់ខ្លួនប្រកបដោយស្មារតីទទួលខុសត្រូវខ្ពស់។

លោកសឹង សែនករុណា អ្នកនាំពាក្យ​សមា​គម​ការពារ​សិទ្ធិ​មនុស្ស​អាដហុក បាននិយាយថារឿងនេះមិនមានអ្វីថ្មីទេ ព្រោះវាជាកិច្ចការរបស់សមត្ថកិច្ចក្នុងការត្រួតពិនិត្យ។ លោកបានលើកឡើងថា វាមិនត្រូវតែជាការអំពាវនាវប៉ុណ្ណោះទេ គឺត្រូវមានការចុះត្រួតពិនិត្យ និងត្រូវមានវិធានការ បើសិនជារកឃើញថាសំណង់ទាំងនោះមិនបានសាងសង់ឱ្យបានត្រឹមត្រូវ។

លោកបន្តថា៖ «ខ្ញុំគិតថាគ្មានអីដែលវាជារឿងមួយប្លែកទេ វាជាកាតព្វកិច្ចរបស់ខាងអាជ្ញាធរដែលពាក់ព័ន្ធទៅនឹងការគ្រប់គ្រប់រដ្ឋបាលមូលដ្ឋានរបស់ខ្លួនហ្នឹងណាស់បាទ»។

ចំពោះការផ្សព្វផ្សាយពីការរឹតបន្តឹងនេះមានការគាំទ្រជាច្រើនពីសំណាក់មហាជនដែលនិយមប្រើប្រាស់បណ្តាញសង្គមហើយមានអ្នកខ្លះបានថ្លែងអំណរគុណចំពោះលោកដែលបានខ្វល់ខ្វាយពីបញ្ហានេះ៕

ក្នុងវីដេអូដែលលោកបានផ្សព្វផ្សាយនោះ មានមនុស្សចូលទស្សនាជាច្រើនហើយមានការបញ្ចេញមតិថាលោកជាតារា មិនគួរនិយាយពីបញ្ហាកាប់ព្រៃឈើទេ ព្រោះខ្លាចមានការប៉ះពាល់ និងមានមតិខ្លះថាជញ្ជាំងផ្ទះលោក ប្រើនិងក្រាលដោយឈើ ជាពិសេសគ្រឿងសង្ហារឹមដែលដាក់តុបតែងក្នុងផ្ទះគឺសុទ្ធតែឈើ។

នៅពេលដែលអ្នកសារព័ត៍មាន Newsroom Cambodia បានទាក់ទងទៅដើម្បីសុំការអត្ថាធិប្បាយបន្ថែម លោកចែម ចាន់រ៉ា បានបដិសេដមិនឆ្លើយតប។

នៅក្នុងវីដេអូដដែល លោកចែម ចាន់រ៉ា ហៅពាក់មី បានតបទៅកាន់អ្នកទស្សនាថាយើងដូចជាម្ចាស់ព្រៃដែរគួរតែនិយាយខ្លះទៅ។

ចំណែកមតិដែលថាផ្ទះធ្វើពីឈើនោះលោកបានជម្រាបថា តម្រូវការឈើក្នុងប្រទេសចេះតែមានហើយដើម្បីយកមកប្រើប្រាស់ដូចជាធ្វើគ្រឿងសង្ហារឹម ឬយកធ្វើផ្ទះជាដើម។ លោកថាបើត្រឹមតែការប្រើប្រាស់ក្នុងប្រទេសគឺមិនរលាយហិនហោចទេ តែប្រហែលជាមានការដឹកចេញទៅក្រៅប្រទេសច្រើនជាពិសេសប្រភេទឈើប្រណិត។

លោកបន្តថា៖ «បេង នាងនួន ក្រញូង ដែលជាប្រភេទឈើលេខ១ បើក្រញូងវិញបងប្អូនអើយ អស់ទាំងឬស ចឹងមិនបាច់ក្មេងជំនាន់ក្រោយទេសូម្បីតែខ្ញុំរកដើមក្រញូងទៅមើលផ្ទាល់ដល់ព្រៃ ក៏រកមិនឃើញដែរបាទ អស់ហើយបាទ អស់រលីង អស់ទាំងឬសទៀត។»

ករណីមួយទៀតដែលលោកឆ្ងល់នោះគឺហេតុអ្វីការបង្រ្កាបនៅតែមិនអស់ បើការកាប់ព្រៃឈើប្រើដោយរណារដែលមានសំឡេងឮខ្លាំងប្រហែល ១០គីឡូម៉ែត្រឯណោះ។ បើមកចាប់តែកន្លែងកាប់ក៏អស់ដែរ ឬចាប់តែមុខផ្ទះក៏បានដែរព្រោះឈើទាំងនោះដឹកតែតាមមុខផ្ទះទេ។

លោកក៏បានជួបជាមួយប្រជាពលរដ្ឋដែលជាអ្នកកាប់ឈើហើយពួកគេប្រាប់លោកថាដោយសារជីវភាពក្រីក្រ លោកបានពន្យល់ឱ្យពួកគាត់ទៅរកមុខរបរផ្សេងក្រៅពីការកាប់ព្រៃឈើទៀតផង៕

ជាចុងក្រោយលោក ចាន់រ៉ា ឱ្យប្រជាជនខ្មែរចូលរួមផ្សព្វផ្សាយទាំងគ្នាមិនចាំតែអ្នកចាប់ទេដើម្បីឱ្យអ្នកដែលកាប់ព្រៃឈើបានឃើញហើយងាកមករកមុខរបរថ្មីហើយបើយើងមិនជួយទេនោះដើមឈើធំៗជាច្រើននិងត្រូវបាត់បង់ជាមិនខាន៕