ហូយ ម៉េងទៀង (Houy Mengteang) – Newsroom Cambodia

សហគមន៍ព្រៃឡង់ និងអង្គការសង្គមស៊ីវិលខកចិត្តអាជ្ញាធររារាំងប្រារព្ធពិធីបំបួសដើមឈើ

ហូយ ម៉េងទៀង (Houy Mengteang) — Thu, 27 Feb 2020 02:12:12 +0000

បណ្ដាញសហគមន៍ព្រៃឡង់ខេត្តស្ទឹងត្រែង និងសកម្មជនព្រៃឈើជាង១០០នាក់ ធ្វើដំណើរតាមគោយន្ត និងមធ្យោបាយផ្សេងៗ មកប្រមូលផ្តុំក្នុងភូមិមួយ ក្នុងស្រុកថាឡាបរីវាត់ ខេត្តស្ទឹងត្រែង នៅល្ងាចថ្ងៃទី២១ ខែកុម្ភៈ ឆ្នាំ២០២០ ដើមត្រៀមខ្លួនចូលរួមពិធីបំបួសដើមឈើ។

មិនយូរប៉ុន្មាន មានអាជ្ញាធរមូលដ្ឋាន នគរបាល និងមន្ត្រីបរិស្ថាន នៃខេត្តស្ទឹងត្រែង បានមកសួរនាំពួកគេ ព្រមទាំងថតរូបផងដែរ។ នៅពេលយប់ មានមន្ត្រីបរិស្ថានខ្លះបានចងអង្រឹងក្រោមផ្ទះប្រជាពលរដ្ឋសម្រាប់សម្រាក ដើម្បីឃ្លាំមើលសកម្មភាពផ្សេងៗរបស់បណ្ដាញសហគមន៍ព្រៃឡង់ ព្រះសង្ឃ និងយុវជន។

នៅព្រឹកថ្ងៃបន្ទាប់ បណ្ដាញសហគមន៍ព្រៃឡង់ខេត្តស្ទឹងត្រែង និងសកម្មជនព្រៃឈើ បានត្រៀមខ្លួនចេញពីភូមិ ដើមចូលព្រៃឡង់ ប៉ុន្តែ អាជ្ញាធរឃុំកាំងចាម នគរបាល និងមន្ត្រីបរិស្ថាន ប្រដាប់ដោយអាវុធប្រមាណជាង១០នាក់ រារាំងពួកគេមិនឲ្យចូលព្រៃប្រារព្ធកម្មវិធីបុណ្យ។ អាជ្ញាធរ បានគម្រាមវាយខ្នោះ ប្រសិនបើប្រជាសហគមន៍ទទូចចូលព្រៃ។ ការឃ្លាំមើល និងការគំរាមកំហែងនេះ ធ្វើឲ្យពួកគេមានការបារម្ភពីសុវត្ថិភាព ផ្ទាល់ខ្លួន។

អ្នកសម្របសម្រួលបណ្ដាញសហគមន៍ព្រៃឡង់ខេត្តស្ទឹងត្រែង កញ្ញា ឈាង លី បាននិយាយថា អាជ្ញាធរមូលដ្ឋាន និងមន្ត្រីបរិស្ថានបានរារាំងសហគមន៍ មិនឲ្យចូលក្នុងព្រៃឡង់ដើមធ្វើពិធីបំបួសដើមឈើ ដែលគ្រោងធ្វើនៅថ្ងៃទី២៣ ខែកុម្ភៈ ឆ្នាំ២០២០។ កញ្ញាថា អាជ្ញាធរគំរាមវាយខ្នោះ បើពួកគេនៅទទូចចង់ចូលព្រៃ។ ដោយបារម្ភពីសុវត្ថិភាព សហគន៍បានសម្រេចចិត្តលុបចោល ការធ្វើដំណើរចូលព្រៃឡង់។

កញ្ញា ឈាង លី និយាយថា៖ «គាត់ហាមមិនឲ្យចូលរួមបុណ្យនុងទេ តាហ៊ានទៅវ៉ៃដាក់ខ្នោះ»។

កញ្ញា ឈាង លី បានសម្តែងការសោកស្តាយចំពោះអាជ្ញាធរ ដែលបានចុះរារាំងពួកគេ ហើយការរារាំងនេះនឹងធ្វើឲ្យប៉ះពាល់ដល់ផលប្រយោជន៍សហគមន៍។

កញ្ញា ឈាង លី បន្ថែមថា៖ «ធ្វើការរាល់ថ្ងៃជាមួយចឹងវាសាំហើយចំពោះការហាមឃាត់របស់គាត់។ អ្វីដែលបណ្ដាញសហគមន៍គាត់គិតទាំងអស់គ្នាដោយយល់ឃើញហ្នឹងគឺគ្មានអ្វីក្រៅពីធ្វើឲ្យប៉ះពាល់ដល់ផលប្រយោជន៍រួម»។

ក្រុមស្នូលបណ្ដាញសហគមន៍ព្រៃឡង់ លោក ខេង ខូ ក៏បានស្ដែងការខកចិត្តជាខ្លាំងខណៈពេលដែលអាជ្ញាធរមករារាំងមិនឲ្យពួកគាគ់ជាប្រជាសហគមន៍ ព្រះសង្ឃ និងយុវជនមកពីគ្រប់ទិសទីចូលព្រៃប្រារព្ធកម្មវិធីបុណ្យព្រៃឡង់ និងបំបួសដើមឈើនេះ។

លោក ខេង ខូ បានជជែកជាមួយអាជ្ញាធរឃុំ និងមន្ត្រីបរិស្ថាន នៅពេលដែលពួកគេចុះមករារាំងថាលោកនិងក្រុមការងារ បានដាក់សំណើជូន អាជ្ញាធរពាក់ព័ន្ធមុននឹងប្រារព្ធពិធីនេះ ប៉ុន្តែគ្មានការឆ្លើយតបនោះទេ។

លោក ខេង ខូ បានថ្លែងថា៖ «ពួកខ្ញុំឲ្យគាត់យូរហើយ ប៉ុន្តែគាត់អត់មានការឆ្លើយតប។ ចឹងបើសិនជាគាត់មិនចង់ឲ្យបណ្ដាញសហគមន៍ព្រៃឡង់ធ្វើប្រារព្ធពិធីបុណ្យ ហេតុអ្វីលិខិតពួកខ្ញុំដាក់ទៅមិនធ្វើការឆ្លើយតបឲ្យផ្ដល់ដំណឹងមុន ចាំបាច់ដល់ពេលពួកខ្ញុំទៅហើយ ពួកគាត់ធ្វើការរារាំង»។

មេឃុំកាំងចាម លោក ឃឹម សុខា បានឆ្លើយឆ្លងជាមួយសហគមន៍ថា លោកពិតជាបានទទួលលិខិតអញ្ជើញពីសហគន៍មែន ប៉ុន្តែអាជ្ញាធរស្រុក បានបញ្ជាឲ្យលោកហាមឃាត់។ លោក អះអាងថា សហគមន៍មិនបានសហការជាមួយអាជ្ញាធរស្រុក និងខេត្ត ហើយជាពិសេសក្រសួងបរិស្ថាន។

លោក ឃឹម សុខា បាននិយាយថា៖ «ខាងបណ្ដាញសហគមន៍បានដាក់លិខិតអញ្ជើញខ្ញុំចូលរួមមកដែរ ហើយខ្ញុំមិនបានបដិសេធទេ និងប្រុងរៀបចំក្រុមប្រឹក្សាទៅជាមួយគ្នា»។

លោក ឃឹម សុខា បន្ថែមថា៖ «ខ្ញុំល្ងាចមិញអភិបាលគាត់ចុចមកឲ្យមកសួរមកនាំទៅ បើមានការស្នើសុំត្រឹមត្រូវគាត់ឲ្យចូល។ ប៉ុន្តែបើអត់មានការស្នើសុំត្រឹមត្រូវទេ គាត់អត់អាចអនុញ្ញាតឲ្យចូលបានទេ វាជាបញ្ហា។ ខ្ញុំអត់មានអីទេ ខ្ញុំនៅក្រោមបទបញ្ជាដែរ»។

បណ្ដាញសហគមន៍ព្រៃឡង់បួនខេត្ត គ្រោងនឹងប្រារព្ធពិធីបុណ្យបំបួសដើមឈើ នៅថ្ងៃទី២៣ ខែកុម្ភៈ ឆ្នាំ២០២០នៅចំណុច ក្នុងតំបន់ព្រៃឡង់ ភូមិសាស្ត្រព្រំប្រទល់ខេត្តកំពង់ធំ ព្រះវិហារ ស្ទឹងត្រែង និងក្រចេះ។ ពីធីនេះ ធ្វើឡើងក្នុងគោលបំណង រំលឹកគុណព្រៃឈើ ថែរក្សានូវអត្តសញ្ញាណជនជាតិដើមភាគតិច បង្ហាញនូវសក្តានុពលរបស់ព្រៃឡង់ ដល់សាធារណជនទូទៅដើម្បីរួមចំណែកជាមួយបណ្ដាញសហគមន៍ព្រៃឡង់ និងពង្រឹងកិច្ចសហការជាមួយរដ្ឋាភិបាលក្នុងបុព្វហេតុការពារធនធានធម្មជាតិ និងជីវៈចម្រុះក្នុងតំបន់ព្រៃឡង់។

ពិធីបំបួសដើមឈើ ត្រូវបានលុបចោលវិញ ក្រោយពីអាជ្ញាធរខេត្តទាំងបួន បានចុះរារាំង ដោយចោទថា សហគមន៍ពុំបានសុំការអនុញ្ញាត។

អ្នកនាំពាក្យក្រសួងបរិស្ថាន លោក នេត្រ ភក្ត្រា បានចោទ បណ្តាញសហគមន៍ព្រៃឡង់ថាបានធ្វើសកម្មភាពដែលមានភាពមិនស្មោះត្រង់ក្នុងកិច្ចសហការ និងបង្កើតការអុកឡុក ស្ថានការណ៍ បង្កើតរបាយការណ៍បំភ្លៃសាធារណមតិលើការងារគ្រប់គ្រងនិងអភិរក្សធនធានធម្មជាតិ។ លោកថា ការបំភ្លៃរបាយការណ៍ នៃការកាប់បំផ្លាញព្រៃឈើគឺដើម្បី ទទួលបានជំនួយពីបរទេស។

លោកនិយាយថា៖ «ម្តងហើយម្តងទៀត ក្រោមខ្សែញាក់របស់ម្ចាស់ជំនួយរបស់ខ្លួន ពួកគេនៅតែបន្តធ្វើសកម្មភាពខុសច្បាប់ដើរចេញពីគន្លងសមូហភាពដឹកនាំគ្រប់គ្រង និងព្យាយាមចិញ្ចឹមទំនាស់លើបញ្ហាព្រៃឡង់ តាមរយៈការលួចចូលល្បាតដោយអនាធិបតេយ្យ លួចប្រើប្រាស់ Apps ដែលគ្មានការទទួលស្គាល់ជាផ្លូវការពីអាជ្ញាធរមានសមត្ថកិច្ច បំភ្លៃលើទិន្នន័យនៃបទល្មើសធនធានធម្មជាតិ រាប់គល់ឈើមួយដើមថាជាបទល្មើសមួយដែលគ្មានលក្ខណៈវិទ្យាសាស្ត្រ»។

អង្គការសង្គមស៊ីវិលប្រមាណជាង១០០ស្ថាប័ន បានចេញសេចក្ដីថ្លែងការណ៍រួម នៅថ្ងៃទី២៥ ខែកុម្ភៈ ឆ្នាំ២០២០ ដោយសម្តែងការសោកស្តាយ និងខកចិត្តចំពោះការរឹតត្បិតសមាជិកសហគមន៍ ព្រះសង្ឃ និងសកម្មជនបរិស្ថានរាប់រយនាក់ មិនឱ្យចូលទៅតំបន់ការពារព្រៃឡង់កាលពីចុងសប្តាហ៍មុន។

សេចក្តីថ្លែងការណ៍រួម លើកឡើងថា៖ ការប្រើប្រាស់មន្រ្តីឧទ្យានុរក្សប្រដាប់ដោយកាំភ្លើង ដើម្បីរារាំងសមាជិកបណ្ដាញសហគមន៍ព្រៃឡង់ ពីការប្រារព្ធពិធីបុណ្យបំបួសដើមឈើប្រចាំឆ្នាំនៅក្នុងព្រៃ គឺជាការរឹតត្បិតមិនសមហេតុផលទៅលើសេរីភាពដើរហើរ និងបង្អាក់ការខិតខំប្រឹងប្រែងអភិរក្សព្រៃឈើ»។

សេចក្តីថ្លែងការណ៍ បានបន្ថែមទៀតថា៖ «ការហាមឃាត់នោះ មិនបានបង្ហាញអំណះអំណាងត្រឹមត្រូវតាមច្បាប់នោះឡើយ បើទោះបីជាការរៀបចំពិធីរបស់សហគមន៍ពួកគាត់បានជូនដំណឹងទៅអាជ្ញាធរក៏ដោយ»។

គួរបញ្ជាក់ផងដែរថា រដ្ឋាភិបាលបានចេញអនុក្រឹត្យលេខ៧៤ បង្កើតឡើងនៅថ្ងៃទី០៩ ខែឧសភា ឆ្នាំ២០១៦ ដែលមាន ទំហំ៤៣១,៦៨៣ហិចតា ស្ថិតក្នុងភូមិសាស្ត្រ ខេត្តស្ទឹងត្រែង ក្រចេះ កំពង់ធំ និងព្រះវិហារ ជាតំបន់ការពារ ដែនជម្រកសត្វព្រៃ«ព្រៃឡង់»។

ពលរដ្ឋមានជម្លោះដីធ្លីនៅកោះកុង នឹងបន្តទាមទារដំណោះស្រាយ ក្រោយក្រសួងដែនដីបដិសេធ

ហូយ ម៉េងទៀង (Houy Mengteang) — Wed, 26 Feb 2020 10:38:21 +0000

សហគមន៍ចំនួនបី ដែលមានជម្លោះដីធ្លី ក្នុងខេត្តកោះកុង ប្រកាសបន្តទាមទាររកដំណោះស្រាយ ក្រោយពីក្រសួងរៀបចំដែនដី ចេញសេចក្តីប្រកាស ពុំទទួលដោះស្រាយរឿងបញ្ហាដីធ្លី ជូនពួកគេ។

ក្រសួងរៀបចំដែនដី បានប្រកាស កាលពីសប្តាហ៍មុនថា ក្រសួងពុំទទួលដោះស្រាយសំណើរជម្លោះដីធ្លីបីករណីរបស់ប្រជាពលរដ្ឋនៅក្នុងស្រុកស្រែអំបិល ខេត្តកោះកុង ដោយក្រសួងអះអាងថា បានដោះស្រាយជួនពួកគេរួចរាល់ហើយ។

ការប្រកាសនេះបន្ទាប់ពី ប្រជាពលរដ្ឋទាំងបីសហគមន៍ បានឡើងមកតវ៉ានៅទីស្ដីការក្រសួង កាលពីថ្ងៃទី១៤ ខែកុម្ភៈ ឆ្នាំ២០២០ ដើម្បីជម្រុញឲ្យក្រសួងដែនដី ដោះស្រាយទំនាស់ដីធ្លី ១៥គ្រួសារដែលបានស្នើសុំឲ្យចេញបណ្ណតាមភូមិសាស្ត្រ តាមការទាមទាររបស់ពួកគាត់។

ហើយពីរករណីផ្សេងទៀត ក្រុមប្រជាពលរដ្ឋ៧៣០គ្រួសារទាមទារដីសង្គមកិច្ច និងករណីក្រុមប្រជាពលរដ្ឋ១៩៧គ្រួសារ ប្តឹងទាមទារដីដែលមានជម្លោះជាមួយ ក្រុមហ៊ុនស្ករអំពៅ ហេង ហ៊ុយ។

អ្នកស្រី ផាវ ញើង អាយុ៤៤ឆ្នាំ ជាប្រជាពលរដ្ឋ ដែលមានបញ្ហាជំម្លោះដីធ្លី ១២ឆ្នាំ នៅភូមិ ព្រែកជីក ឃុំ ជីខក្រោម ស្រុកស្រែអំបិល ខេត្ត កោះកុង និងប្រជាពលរដ្ឋសហគមន៍ផ្សេងទៀត បានច្រានចោលសេចក្តីប្រកាសរបស់ក្រសួង។

ពួកគេនឹងបន្តធ្វើការទាមទារ ដោយជួបជុំគ្នានៅថ្ងៃទី១ ខែមិនា ខាងមុខនេះ ដើម្បីពិភាក្សាក្នុងការប្រារព្ធ «ទិវាសិទ្ធនារីអន្តរជាតិ» ដោយជ្រើសរើសយកថ្ងៃទី៥ ខែមិនា ជំនួសឲ្យថ្ងៃទី៨ មិនា។ ក្នុងពិធីនោះ ពួកគេនឹងថ្លែងអំពីបញ្ហារបស់ពួកគេ រួមមាន បញ្ហាជម្លោះដីធ្លី ការរំលោភបំពានសិទ្ធិ និងជាពិសេសស្ត្រី។

អ្នកស្រី ផាវ ញើង និយាយថា៖ «ពួកយើងមិនព្រមទទួលយកទេ ពីព្រោះសេចក្តីប្រកាសនោះ មិនត្រូវនូវអ្វីដែលពួកយើងចង់បានទេ»។

អ្នកស្រី បន្ថែមថា៖ «ពួកយើងនឹងបន្តធ្វើការទាមទារ»។

អ្នកស្រី ផាវ ញើង បានបន្ថែមទៀតថា កាលពីឆ្នាំ២០០៧ ពួកគាត់ធ្លាប់មានបញ្ហាដីធ្លីជាមួយនឹងលោក សុខ ហុង និងបានប្រឈមនឹងបញ្ហារុះរើសផ្ទះអស់ប្រាំមួយខ្នង តែបញ្ហាត្រូវបានបញ្ចប់ដោយមានការតវ៉ា ទប់ស្កាត់ពីប្រជាពលរដ្ឋ។

ក៏ប៉ុន្តែកំឡុងពេលឆ្នាំ២០០៩ លោក ហេង ហ៊ុយ បានយកអនុក្រឹត្យលេខ៣៦ របស់រាជរដ្ឋភិបាលបានប្រគល់ដី ៧៧៩ហិចតា ដើម្បីអភិវឌ្ឍន៍ភូមិ ឃុំ និងចេញប័ណ្ណដីធ្លីឲ្យប្រជាពលរដ្ឋ និងអភិវឌ្ឍន៍សហគមន៍ ប៉ុន្តែ លោក ហេង ហ៊ុយ បានយកអនុក្រឹត្យទៅក្លែងបន្លំដាក់ថា ភូមិឈូក ទៅវិញ។

អ្នកស្រីបានទាមទារឲ្យក្រសួងមហាផ្ទៃចេញសេចក្តីប្រកាសថាពិតជាបានដូរទីតាំងមែន ឬក៏អត់។ កាលថ្ងៃទី៨ ខែតុលាឆ្នាំ២០១៧ គឺពួកគាត់មិនបានទទួលឯកសារអី្វបញ្ជាក់ច្បាស់ ក្រៅពីការធ្វើកំណត់ហេតុណ៍ដោះស្រាយបញ្ហា និងថតចម្លងសខ្មៅឲ្យពួកគាត់។

អ្នកសម្របសម្រួលអង្គការលីកាដូ ប្រចាំខេត្តកោះកុង លោក ហ៊ូ អ៊ីន បានប្រាប់ឲ្យដឹងពីបញ្ហាជំម្លោះដីធ្លីរបស់អ្នកស្រី ផាវ ញើង និងប្រជាពលរដ្ឋផ្សេងទៀតជាមួយ លោក ហេង ហ៊ុយ ក្នុងឃុំជីខក្រោម ស្រុក ស្រែអំបិល ខេត្ត កោះកុង បានកើតឡើងជាច្រើនឆ្នាំ ប៉ុន្តែមិនទាន់មានដំណោះស្រាយ។ លោកថាអ្នកស្រី ផាវ ញើង បានទាមទារឲ្យអាជ្ញាធរចុះបញ្ជីដីធ្លីតាមភូមិសាស្ត្រ ហើយអាជ្ញាធរគួរបញ្ជាក់ជូនគាត់ឲ្យបានច្បាស់លាស់។

លោក ហ៊ូ អ៊ីន បាននិយាយថា៖ «ក្រសួង ក៏ដូចជាអាជ្ញាធរគួរតែបង្ហាញផែនទីជាក់ស្តែងថា ដីរបស់អ្នកស្រី ផាវ ញើង ស្ថិតនៅក្នុងភូមិព្រែកជីក ឬក៏ភូមិឈូក»។

ក្រសួងក៏បានបញ្ជាឲ្យអាជ្ញាធរខេត្តកោះកុង ចុះធ្វើការអប់រំដល់ពលរដ្ឋ និងស្វែរកអ្នកនៅពីក្រោយពួកគេ ដើម្បីចាត់វិធានការផ្លូវច្បាប់។

GMAC ស្នើសហភាពអឺរ៉ុប ពិចារណាឡើងវិញ នូវការសម្រេចព្យួរផ្នែកខ្លះនៃ EBA

ហូយ ម៉េងទៀង (Houy Mengteang) — Thu, 20 Feb 2020 08:10:59 +0000

សមាគមរោងចក្រកាត់ដេរនៅកម្ពុជា(GMAC) ស្នើគណៈកម្មការ និងសមាជិកសភាអឺរ៉ុប ពិចារណាឡើងវិញចំពោះសេចក្ដីសម្រេចការព្យួរដោយផ្នែកនៃប្រពន្ធ័អនុគ្រោះពន្ធលើគ្រប់មុខទំនិញលើកលែងតែគ្រឿងសព្វាវុធ(EBA)សម្រាប់កម្ពុជា ដែលបានអនុវត្តជិត២០ឆ្នាំមកហើយ។

សមាគមរោងចក្រកាត់ដេរកម្ពុជា កាលពីថ្ងៃទី១៧ ខែកុម្ភៈ ឆ្នាំ២០២០ បានចេញសេចក្តីថ្លែងការណ៍មួយដោយលើកឡើងថា ការសម្រេចរបស់សហភាពអឺរ៉ុប នៅថ្ងៃទី១២ ខែកុម្ភៈ ឆ្នាំ២០២០ ដោយព្យួរផ្នែកខ្លះនៃប្រពន្ធ័អនុគ្រោះពន្ធ (EBA)នឹងធ្វើឲ្យប៉ះពាល់ដល់ជីវភាពរបស់កម្មករ និងក្រុមគ្រួសាររបស់ពួកគេ។

សមាគមនេះ បានសម្តែងការខកចិត្តចំពោះការសម្រេចព្យួរ និងស្នើឲ្យពិចារណាឡើងវិញដើម្បីចូលរួមកាត់បន្ថយភាពក្រីក្រ របស់ប្រជាជនកម្ពុជា។

សេចក្តីថ្លែងការណ៍ លើកឡើងថា៖ «សមាគមសូមជំរុញគណៈកម្មការ និងសមាជិកសភាអឺរ៉ុប សូមពិចារណាឡើងវិញចំពោះសេចក្ដីសម្រេចដោយពិចារណាទៅលើគុណតម្លៃនៃកម្មវិធីនេះ ដែលបានអនុវត្តជិត២០ឆ្នាំកន្លងទៅ ជំនួយអភិវឌ្ឍន៍ ការកាត់បន្ថយភាពក្រីក្រ និងសេចក្ដីថ្លៃថ្នូការងារ»។

សមាគម បានបន្ថែមថា ការផ្ដល់ការងារក្នុងវិស័យកាត់ដេរដែលគាំទ្រដោយកម្មវិធីអនុគ្រោះពន្ធEBA មានចំនួនលើស៧៥ម៉ឺននាក់ និងបានរួមចំណែកទាញប្រជាជនកម្ពុជារាប់លាននាក់ចេញពីភាពក្រីក្រ។ កម្មករភាគច្រើនបំផុតជាស្ត្រីដែលជាអ្នកគ្រប់គ្រងគ្រួសារ មើលថែសុខភាព និងសុខមាលភាពកូនៗ ដែលផ្ដល់ប្រាក់ចំណូលដោយផ្ទាល់ដល់គ្រួសារមាន២០ភាគរយ នៃគ្រួសារក្នុងប្រទេសកម្ពុជា។

កាលពីថ្ងៃទី១៨ ខែកុម្ភៈ ឆ្នាំ២០២០ លោក នាយករដ្ឋមន្ត្រី ហ៊ុន សែន បានថ្លែងក្នុងពិធីចែកសញ្ញាបត្រថា កម្ពុជា នឹងមិនចេញសេចក្តីថ្លែងការណ៍ចំពោះការសម្រេចចិត្តរបស់សហភាពអឺរ៉ុបក្នុងការព្យួរផ្នែកខ្លះ នៃEBAនោះទេ។

សហភាពអឺរ៉ុប កាលពីថ្ងៃទី១២ ខែកុម្ភៈ បានសម្រេចព្យួរដោយផ្នែកនៃប្រពន្ធ័អនុគ្រោះពន្ធលើគ្រប់មុខទំនិញលើកលែងតែគ្រឿងសព្វាវុធ(EBA) ដោយសារការរំលោភសិទ្ធិមនុស្ស និងបំពានលិទ្ធិប្រជាធិបតេយ្យ ដែលបង្កឡើងដោយរដ្ឋាភិបាលកម្ពុជា។

សហភាពអឺរ៉ុបបានសម្រេចយកពន្ធលើទំនិញកម្ពុជា៤០មុខ ដែលមានទំហំទឹកប្រាក់ជាង១ពាន់លានដុល្លារ។ ទំនិញដែលជាប់ពន្ធទាំងនោះរួមមាន ផ្នែកខ្លះនៃផលិតផលសម្លៀកបំពាក់ ផលិតផលធ្វើដំណើរ និងស្ករសទាំងស្រុង។ ការសម្រេចនេះ នឹងចូលជាធរមាន ចាប់ពីខែសីហា ឆ្នាំ២០២០។

តម្លៃស្រូវនៅខេត្តតាកែវ និងខេត្តព្រៃវែងនៅតែប្រែប្រួលតាមមាត់ឈ្មួញវៀតណាម

ហូយ ម៉េងទៀង (Houy Mengteang) — Wed, 22 Jan 2020 09:50:09 +0000

ប្រជាកសិករ និងឈ្មួញមួយចំនួននៅខេត្តតាកែវ និងខេត្តព្រៃវែង លើកឡើងពីការលំបាករបស់ពួកគាត់ថា តម្លៃស្រូវប្រែប្រួលទៅតាមមាត់របស់ឈ្មួញវៀតណាម ធ្វើឱ្យពួកគាត់ខាតបង់ទាំងអ្នកដាំដុះ និងអ្នកទិញយកទៅលក់បន្ត។

Source: https://vodkhmer.news/2020/01/21/price-rice-flexible-depend-on-vn-market/

អ្នកមានជម្លោះដីធ្លី ពីខេត្តត្បូងឃ្មុំ និងស្វាយរៀង ស្វែងរកអន្តរាគមន៍ ពីរដ្ឋាភិបាល

ហូយ ម៉េងទៀង (Houy Mengteang) — Fri, 10 Jan 2020 09:52:29 +0000

ប្រជាពលរដ្ឋ ជាង១០០នាក់ មកពីខេត្តស្វាយរៀង និងត្បូងឃ្មុំ បាននាំគ្នាមកដាក់ញ្ញត្តិ នៅក្រសួងយុត្តិធម៌ និងក្រសួងមហាផ្ទៃ ដើម្បីស្វែង រកអន្តរាមគន៍ ឲ្យដោះលែងតំណាង របស់ពួកគេ និងដោះស្រាយ បញ្ហដីធ្លី ជាមួយក្រុមហ៊ុន ចិន និងឥណ្ឌា ដែលអូសបន្លាយ ជាច្រើនឆ្នាំមកហើយ។

ប្រជាសហគមន៍៤ មកពីខេត្តត្បូងឃ្មុំ និងខេត្តស្វាយរៀង កាលពីថ្ងៃទី៨ ខែមករា ឆ្នាំ២០២០នេះ បានប្រមូលផ្តុំគ្នា មុខក្រសួងយុត្តិធម៌ និងក្រសួងមហាផ្ទៃ ដោយស្នើឲ្យ ស្ថាប័នទាំងពីរ ជួយអន្តរាគន៍ដោះលែងតំណាងរបស់ពួកគេម្នាក់ ដែលបានចាប់ខ្លួន កាលពីថ្ងៃទី១៧ ខែតុលា ឆ្នាំ២០១៩។

តំណាងសហគមន៍មកពី ខេត្តត្បូងឃ្មុំ គឺលោក ហៀង សុខហាន បានថ្លែងថា សហគមន៍៣គឺ កំប្រើស ស្រែប្រាំង និងបុស្សស្នោ ឃុំត្រពាំងព្រីង ស្រុកតំបែរ ចំនួន១៨២គ្រួសារ មានជម្លោះធ្លីជាង១២០០ហិកតា ជាមួយក្រុមហ៊ុនចិន ហាមីនីវីស អ៊ីនវេសមេន ជិត១០ឆ្នាំមកហើយ ដោយពុំមានដំណោះស្រាយ។ លោកថា បញ្ហាអូសបន្លាយនេះធ្វើឲ្យប៉ះពាល់ ដល់ជីវាភាពប្រចាំថ្ងៃរបស់ប្រជាពលរដ្ឋដែលកំពុងមានជម្លោះ។

លោក សុខហាន និយាយថា៖ «ពួកយើងអត់ឃ្លាន គ្មានស៊ី ហើយទើបបានប្រជាពលរដ្ឋមករករដ្ឋាភិបាលនិងអ្នកពាក់ពន្ធ័ជួយរកដំណោះស្រាយបែបនេះ»។

លោក សុខហាន បានបន្ថែមថា ប្រសិនបើក្រសួង មិនអន្តរាគមន៍ ដោះលែងតំណាង របស់ពួកគេ និងឆ្លើយតជាវិជ្ជមាននោះទេ លោកនិងប្រជាសហគមន៍នឹងបន្តដាក់ញាត្តិទៀត។

ប្រជាពលរដ្ឋម្នាក់ទៀត លោក បឿន រ៉ាវ៉េត ត្រូវជាប្អូនជីដូនមួយរបស់ សកម្មជនដីធ្លីដែលបានត្រូវឃាត់ខ្លួន គឺ លោក សែម សាង បាននិយាយថា ដោយសារបញ្ហាអូសបន្លាយ ដោយគ្មានដំណោះស្រាយ ទើបប្រជាពលរដ្ឋតវ៉ា និងឈានដល់ការចាប់ខ្លួនបងជីដូនមួយរបស់ខ្លួន។

លោក រ៉ាវេត និយាយថា៖ «រង់ចាំអាជ្ញាធរ មិនទាន់មានវិធានការដោះស្រាយ ពីមួយថ្ងៃទៅមួយថ្ងៃ ពីមួយខែទៅមួយខែ»។

លោក សែម សាង ត្រូវបានចាប់ខ្លួន កាលពីថ្ងៃទី១៧ ខែតុលា ឆ្នាំ២០១៩ តាមដីកាចុះថ្ងៃទី២៦ ខែកក្តដា ឆ្នាំ២០១៩ ដែលចេញដោយ ចៅក្រមស៊ើបសួរសាលាដំបូងខេត្តត្បូងឃ្មុំលោក ហៃ ណៃហេង។ ក្នុងដីកានោះ បានបង្គាប់ឲ្យនាំខ្លួនលោក សែម សាង ទៅសួរចម្លើយនៅសាលាដំបូងខេត្ត ក្រោមការបទចោទ «កំហែងយកដោយមានស្ថានទម្ងន់ទោសដោយសារប្រើប្រាស់អាវុធ» ដែលបានប្រព្រឹត្តកាលពីឆ្នាំ២០១៦។

អ្នកនាំពាក្យក្រសួងយុត្តិធម៌ លោក ជិន ម៉ាលីន បានឆ្លើយតបតាម ប្រព័ន្ធសង្គមតេឡេក្រាមថា ក្រសួងបានទទួលញ្ញត្តិ និងកំពុងពិនិត្យ។ ទោះជាយ៉ាងណា លោកថា ក្រសួងមិនអាចជ្រៀតជ្រែកនិតិវិធីតុលាការ បាននោះទេ។

លោក ជិន ម៉ាលី លើកឡើងថា៖ «ក្រសួង អាចនឹងបញ្ជូនសំណើរនេះទៅកាន់តុលាការដើម្បីពិនិត្យនិងដោះស្រាយតាមនីតិវិធីច្បាប់។ លើកលែងតែមានមូលដ្ឋានច្បាស់លាស់បង្ហាញពីភាពមិនប្រក្រតីឬកំហុសឆ្គងនៃការអនុវត្តនីតិវិធី និងការសម្រេចសេចក្តីរបស់ចៅក្រម»។

ប្រជាសហកមន៍មកពីខេត្តស្វាយរៀង អ្នកស្រី ខៀវ សារ៉ុន ផ្ដល់បទសម្ភាសន៍ជាមួយVOD ថាប្រជាពលរដ្ឋជាង ៤៤០គ្រួសារ នៅឃុំអំពិលស្រុករមាហែក ខេត្តស្វាយរៀង មានជម្លោះ ជាមួយក្រុមហ៊ុនដាំអំពៅ លើផ្ទៃដីលើដីទំហំ៦៧០ហិកតា តាំងពីឆ្នាំ២០១០។ អ្នកស្រីថា ជម្លោះនេះ អាជ្ញាធរគ្មានលទ្ធភាពដោះស្រាយជូនពួកគាត់ទេ ធ្វើឲ្យក្រុមហ៊ុនមានលទ្ធភាពប្តឹងពួកគាត់ទៅតុលាការទៀតផង ពីបទកាន់កាប់ដីក្រុមហ៊ុន

ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បាននិយាយថា ការពន្យាពេលដោះស្រាយ បញ្ហាដីធ្លីជូនពលរដ្ឋ ធ្វើឲ្យប៉ះពាល់ជីវភាពរស់នៅប្រចាំថ្ងៃរបស់ពួកគេ។ ម្យ៉ាងវិញទៀត នៅពេលដែលជម្លោះបន្តអូសបន្លាយ តំណាងរបស់ពួកគេអាចប្រឈមនឹងការចាប់ខ្លួនផងដែរ។

លោក សាវឿន បានបន្តថា «ប្រសិនបើអាជ្ញាធរបន្តពន្យាពេលលើរឿងនេះ នឹងធ្វើឲ្យប្រជាពលរដ្ឋកាន់តែធ្លាក់ខ្លួនក្រីក្រទៅៗ។ ហើយនឹងធ្វើឲ្យបញ្ហាសង្គមកើតមានឡើង ប្រជាពលរដ្ឋអត់ការងារ អត់មុខរបរធ្វើស្រែ»។

រាយការណ៍បន្ថែមដោយ លី មីសាន (Ly Misan) និង ទុយ អេងលី (Tuy Engly)

ហូយ ម៉េងទៀង (Houy Mengteang) – Newsroom Cambodia

ពលរដ្ឋ​មានជម្លោះ​ដីធ្លី​នៅកោះកុង នឹងបន្ត​ទាមទារ​ដំណោះ​ស្រាយ ក្រោយក្រសួង​ដែនដី​បដិសេធ

GMAC ​ស្នើ​សហភាព​អឺរ៉ុប​ ពិចារណា​ឡើង​វិញ​ នូវ​ការ​សម្រេច​ព្យួរ​ផ្នែក​ខ្លះ​នៃ​ EBA

តម្លៃស្រូវនៅខេត្តតាកែវ និងខេត្តព្រៃវែងនៅតែប្រែប្រួលតាមមាត់ឈ្មួញវៀតណាម

អ្នកមានជម្លោះដីធ្លី ពីខេត្តត្បូងឃ្មុំ និងស្វាយរៀង ស្វែងរកអន្តរាគមន៍ ពីរដ្ឋាភិបាល

ពលរដ្ឋមានជម្លោះដីធ្លីនៅកោះកុង នឹងបន្តទាមទារដំណោះស្រាយ ក្រោយក្រសួងដែនដីបដិសេធ

GMAC ស្នើសហភាពអឺរ៉ុប ពិចារណាឡើងវិញ នូវការសម្រេចព្យួរផ្នែកខ្លះនៃ EBA