ហ៊ុន ពិសី (Hun Pisey) – Newsroom Cambodia

បទយកការណ៍៖ អ្នកអភិរក្សដំរីនៅខេត្តរតនគិរីចង់ឱ្យមានការចូលរួមការពារ និងអភិរក្សបន្ថែម

ហ៊ុន ពិសី (Hun Pisey) — Fri, 01 Sep 2023 10:50:36 +0000

ដំរីជាសត្វដែលវៃឆ្លាតលំដាប់ទី២នៅលើពិភពលោក ហើយពួកវាក៏ជាសត្វដែលពោរពេញដោយក្ដីស្រលាញ់ចំពោះគ្រួសារ និងកូនៗរបស់ពួកវាផងដែរ។ សត្វដំរីជានិមិត្តរូបមួយដែលទាក់ទងដល់ប្រវត្តិសាស្រ្ដ និងវប្បធ៌មដ៏រុងរឿងរបស់កម្ពុជា។

ប៉ុន្តែដំរីព្រៃ ក៏កំពុងទទួលបានការគំរាមកំហែងយ៉ាងខ្លាំង ដែលអាចឈានទៅដល់ការផុតពូជនផងដែរ។ ដំរីព្រៃដែលនៅសេសសល់មានចំនួនតិចតួច កំពុងរស់នៅជាក្រុមតូចៗក្នុងទីជម្រកដាច់ដោយឡែកពីគ្នា។ ដំរីព្រៃនៅកម្ពុជាបច្ចុប្បន្ន ត្រូវបានគេប៉ាន់ស្មានថាមានចំនួនពី ៤០០ ទៅ ៦០០ ក្បាលតែប៉ុណ្ណោះ ហើយតំបន់ដែលមានដំរីព្រៃច្រើនជាងគេគឺ ឧទ្យានជាតិជួរភ្នំក្រវ៉ាញខាងត្បូង។ ប៉ុន្តែការកាត់ផ្តាច់ជម្រកក្នុងកម្រិតខ្ពស់ ធ្វើឱ្យដំរីព្រៃនៅកម្ពុជាងាយនឹងទទួលការរងគ្រោះខ្លាំង រហូតអាចឈានទៅដល់ការផុតពូជដោយសារការរស់នៅរប៉ាត់រប៉ាយ បែកខ្ញែកគ្នា ដែលនាំឱ្យមានការថយចុះនូវអត្រាបង្កកំណើត និងភាពធន់នឹងជំងឺផ្សេងៗ។

នៅតំបន់ភាគឦសាន្តនៃប្រទេសកម្ពុជា ចំងាយប្រមាណជាជិត ៥០០ គីឡូពីរាជធានីភ្នំពេញ និង ១៥ គីឡូ ពីក្រុងបានលុង មានសមាគមមួយឈ្មោះថាសមាគមអៃរាវត្តា ដែលបានបង្កើតឡើងក្នុងគោលបំណងថែរក្សា អភិរក្ស និងបង្កាត់ពូជសត្វដំរីស្រុកដែលមានចំនួនតិចតួចបំផុតនៅក្នុងខេត្តរតនគិរីនេះ។

បច្ចុប្បន្នដំរីស្រុកចំនួន៤ក្បាល កំពុងទទួលបានការថែទាំយ៉ាងយកចិត្តទុកដាក់បំផុត ទាំងតាមបែបប្រពៃណីជនជាតិដើមភាគតិច គួបផ្សំនឹងរបៀបបច្ចេកទេសមួយចំនួនដើម្បីធានាអោយបាននូវបរិយាកាសសមស្របសម្រាប់ការរស់នៅរបស់សត្វដំរី។

កំពុងអង្គុយលើកៅអីឈើដែលមានរចនាបទលាតបែបខ្មែរដ៏សាមញ្ញ ទឹកមុខពោរពេញដោយស្នាមញញឹម អ្នកស្រី ខៃ ចិន្តា ប្រធានសមាគមអៃរាវត្តាបានថ្លែងប្រាប់ Newsroom Cambodia ថា សមាគមអៃរាវត្តាបានចាប់ផ្តើមពីឆ្នាំ២០១៥ មក បានធ្វើកិច្ចការងារអភិរក្សជីវចំរុះ ការអភិវឌ្ឍន៍វិស័យអេកូទេសចរណ៍ ពិសេសការបង្កាត់ពូជសត្វដំរីស្រុក និងការមើលថែទាំចិញ្ចឹមដំរីក្នុងបរិបទធម្មជាតិ។ អ្នកស្រីថា នេះដោយសារទឹកចិត្តស្រឡាញ់ ចង់ឃើញសត្វដំរីស្រុកមានការកើនឡើងបន្តបន្ទាប់ ទើបសមាគមបានខិតខំពុះពារឧបសគ្គជាច្រើនមិនបោះបង់ក្នុងពេលកន្លងមក។

អ្នកស្រីថា៖ «ក្រុមគ្រួសារខ្ញុំ និងក្រុមការងារទាំងអស់យើងធ្លាប់បានពិភាក្សាគ្នា យើងមានចិត្តដូចគ្នាគឺអាណិតស្រឡាញ់ ចង់អភិរក្សសត្វដំរី យើងមិនចង់បានអ្វីក្រៅពីចង់ឃើញការងារជាតិ ការងាររួម និងឃើញកូនដំរីកើតបានច្រើនហើយឱ្យប្រជាពលរដ្ឋស្រឡាញ់បរិស្ថាន អាណិតដើមឈើ ការពារថែរក្សារ និងដាំដើមឈើឱ្យបានច្រើន»។

អ្នកស្រីបន្ថែមថា ដំរីស្រុកនៅកម្ពុជាមានតែជាង ៧០ ក្បាលប៉ុណ្ណោះ ដែលនេះជាចំនួនដ៏តិចតួច ហើយប្រសិនបើមិនមានការអភិរក្ស ក្នុងរយៈពេលប៉ុន្មានឆ្នាំទៅមុខទៀត កម្ពុជាអាចនឹងលែងមានវត្តមានដំរីសម្រាប់ក្មេងជំនាន់ក្រោយ។

អ្នកស្រី ខៃ ចិន្តា ប្រធានសមាគមអៃរាវត្តា ផ្តល់បទសម្ភាសន៍មកកាន់Newsroom Cambodia នៅការិយាល័យធ្វើការផ្ទាល់របស់អ្នកស្រី ថ្ងៃទី០២ សីហា ២០២៣។ (រូបភាព៖ ខុន លាងហេង)

យ៉ាងណាមិញការអភិរក្សសត្វដំរីគឺមានផលលំបាកច្រើនដោយកិច្ចការនេះត្រូវការអ្នកជំនាញក្នុងការចិញ្ចឹមមើលថែទាំប្រចាំថ្ងៃ និងត្រូវការមានពេទ្យសត្វដែលអាចជួយព្យាបាលពេលដំរីមានជម្ងឺ និងរបួសកើតឡើង ហើយលើសពីនេះគឺការរៀបចំដែនជម្រក និងអាហារ ដែលកិច្ចការទាំងនេះទាមទាអោយមានការយកចិត្តទុកដាក់ខ្ពស់ និងចំណាយថវិការច្រើន។

អ្នកស្រី ខៃ ចិន្តា បន្ថែមថា៖ «បើទោះមានឧបសគ្គ ឬបញ្ហាលើផ្នែកហិរញ្ញវត្ថុ ការចោទប្រកាន់ថាជាការធ្វើបាបចំពោះដំរីពីសំណាក់អ្នកនៅជុំវិញខ្លួន ឬផ្នត់គំនិតរបស់ប្រជាពលរដ្ឋ មិនទាន់យល់ពីគោលបំណងនៃការអភិរក្សដំរីយ៉ាងណា ក៏សមាគមអៃរាវត្តានៅតែបន្តខិតខំការពារ និងបន្តកិច្ចការអភិរក្សដំរីស្រុកនេះតទៀត»។

អ្នកស្រីក៏បានសំណូមពរដល់ប្រជាពលរដ្ឋទាំងអស់ឱ្យចូលរួមសហការ និងអភិរក្សសត្វដំរីស្រុកដែលមាននៅសេសសល់តិចតួចនាពេលបច្ចុប្បន្ន ជាពិសេស សូមឱ្យមានការជួយគាំទ្រដល់សមាគមអភិរក្សសត្វដំរីអៃរាវត្តា ព្រោះនេះជាដំរីរបស់យើងទាំងអស់គ្នា ជាដំរីរបស់កម្ពុជាមិនមែនជាដំរីរបស់សមាគមអៃរាវត្តាតែឯងនោះទេ។

ការបរបាញ់ក្នុងអំឡុងពេលជាង ៣០ ឆ្នាំចុងក្រោយនេះ បានសម្លាប់ដំរីព្រៃនៅកម្ពុជាអស់ជាច្រើនក្បាល។ ប៉ុន្តែកម្រិតនៃការបរបាញ់នេះបានធ្លាក់ចុះយ៉ាងខ្លាំងក្នុងរយៈពេល១០ឆ្នាំចុងក្រោយ ដោយសារតែមានការពង្រឹងការអនុវត្តច្បាប់។

មានស្រុកកំណើតនៅខេត្តរតនគិរី បុរសជនជាតិព្រៅ អាយុ ៥៨ឆ្នាំ លោកមិល អេន គឺជាហ្មម្នាក់ដែលមានវ័យចំណាស់ជាងគេក្នុងចំណោមហ្មផ្សេងទៀត ដែលកំពុងបំពេញការងារជាអ្នកមើលថែដំរីនៅក្នុងសមាគមអៃរាវត្តាអស់រយៈកាលជាង៧ឆ្នាំមកហើយ។ លោកថាដំរីនៅសមាគមនេះបច្ចុប្បន្នមាន៤ក្បាល ដែលជាប្រភេទដំរីស្រុកចុងក្រោយក្នុងខេត្តរតនគិរីដែលកំពុងស្ថិតក្រោមការមើលថែទាំ។

លោក មិល អេន កំពុងហុចចេកឲ្យដំរីអុីកែវបណ្តើរ និងផ្តល់បទសម្ភាសន៍មកក្រុមការងារNewroomបណ្តើរ នៅក្នុងសមាគមអៃរាវត្តា កាលពីថ្ងៃទី ០៣ សីហា ២០២៣។ (រូបភាព៖ ខុន លាងហេង)

ខាំ សែន ជាដំរីឈ្មោលដែលមានវ័យចំណាស់ជាងគេ គឺមានអាយុ៥៤ឆ្នាំ។ វាមានសុខភាពទ្រុឌទ្រោម និងភ្នែកខាងស្ដាំកំពុងមានបញ្ហាឡើងបាយមើលអ្វីមិនឃើញ។ ចំណែកដំរីញី អ៊ី កែវ អាយុ៤២ឆ្នាំ កំពុងស្ថិតក្នុងការសាកល្បងបង្ករកំណើតកូនទី២ បន្ទាប់ពីបានផ្តល់កំណើតកូនដំរីញី ណូអែល កាលពីចុងឆ្នាំ ២០២១ កន្លងទៅ។ រីឯបុក វ៉ា មានអាយុ ៤៥ ឆ្នាំ ត្រូវបានយកទៅចងនៅកណ្ដាលព្រៃ ព្រោះវាកំពុងតែចុះប្រេង។

កំពុងពាក់មួកជាមួយអាវដៃវែងចាស់ស្ទើរតែហើរពណ៌អស់ និងខោជើងវែងមានស្នាមប្រឡាក់ភក់សើមថ្មីៗ លោក មិល អេន បានរៀបរាប់ពីការលំបាកពេលថែទាំដំរី ដោយលោកត្រូវប្រឈមនឹង សត្វចូលត្រចៀកឬខាំ ត្រូវភ្លៀងទទឹក រហែកខោអាវ ប៉ុន្តែលោកពេញចិត្តនិងធ្វើវាដោយក្ដីស្រលាញ់។ តែទោះជាលំបាកយ៉ាងណា ភាពងាយស្រួលក៏នៅតែមានក្នុងកិច្ចការមើលថែទាំដំរី ដោយសារតែការមើលថែទាំនេះគឺទៅតាមបែបធម្មជាតិតែប៉ុណ្ណោះ។

កំពុងហុចចេកម្តងមួយផ្លែឱ្យដំរីញីចាស់ដែលនៅក្បែរនោះបណ្តើរ លោកនិយាយថា៖ «ភាពងាយស្រួលចិញ្ចឹមថែរក្សារបស់ដំរី គឺឱ្យវារស់នៅដោយធម្មជាតិ ស៊ីស្មៅ ស៊ីចេក អំពៅ ជាជាងចង និងដាក់ក្នុងទ្រុង»។

មិនខុសពីហ្មរខាងលើ លោក ប៉ាល់ កាហែម អាយុ ៣៥ ឆ្នាំ ជាជនជាតិដើមភាគតិចព្រៅ ដែលរស់នៅឃុំរបាំង១ ខេត្តរតនគិរី និងជាអ្នកមានបទពិសោធន៍ក្នុងការមើលថែដំរីតាំងពីជំនាន់ឪពុកអស់រយៈពេលជិត៣០ឆ្នាំ បានរៀបរាប់ពីផលលំបាកនិងបច្ចេកទេសផ្សេងៗក្នុងការមើលថែដំរីពេលឈឺ និងការរកថ្នាំសង្កូវសម្រាប់ព្យាបាលតាមបែបធម្មជាតិរបស់សត្វដំរី។

លោកថា៖ «នៅពេលដែលដំរីឈឺគឺពួកខ្ញុំបានប្រលែងដំរីចូលទៅ ក្នុងព្រៃដើម្បីឱ្យដកឬសឈើនៅក្នុងព្រៃស៊ីជាថ្នាំ ហើយប្រសិនបើវាមានរបួសគឺដំសំបកសាក្រំ លាយជាមួយធ្យូងថ្មពិលដាក់បិទដើម្បីកុំឱ្យមានដង្កូវក្នុងដំបៅ ព្រោះមិនមានលទ្ធភាពទៅទិញថ្នាំទាន់ពេលវេលា»។

ោក ប៉ាល់ កាហែម ជាហ្មដំរី កំពុងអង្គុយផ្តល់កិច្ចសម្ភាសន៍ជាមួយNewsroom Cambodia ថ្ងៃទី០៤ សីហា ២០២៣ នៅសមាគមអៃរាវត្តា។ (រូបភាព៖ ខុន លាងហេង)

ក្រៅពីការថែទាំព្យាបាលនៅពេលដំរីមានជម្ងឺ ការបង្កាត់ពូជដំរីក៏ជាកិច្ចការមួយដ៏លំបាក ទាមទារឲ្យមានការយកចិត្តទុកដាក់ជាខ្លាំង និងមិនមានភាពងាយស្រួលប៉ុន្មាននោះទេ។

លោកបានត្អូញត្អែរថា៖ «ផលលំបាកសម្រាប់ការថែទាំចំពោះដំរីឈ្មោល គឺត្រូវការហ្មពីរនាក់ ព្រោះអារម្មណ៍ និងចិត្តរបស់វា គឺមិនទៀងទាត់ទេតែមួយប៉ព្រិចភ្នែកវាខឹង គឺយើងអត់ដឹងទេ មូលហេតុគឺវាចុះប្រេងអាចមួយឆ្នាំ ១ ទៅ ២ ដងនៅពេលដែលវាចុះប្រេងអ៊ីចឹង គឺវាលែងស្គាល់ហ្មហើយ វាងប់ងុលដូចជាពួកជក់ថ្នាំញៀនអញ្ចឹង វាលែងស្គាល់អ្វីទាំងអស់សូម្បីតែរូបខ្ញុំផ្ទាល់ក៏វាដេញដែរនៅពេលដែលយកចំណីទៅឱ្យវា ប្រៀបដូចជាចុះទៅសមរភូមិអញ្ចឹង»។

លោកបន្ថែមថា នៅពេលបង្កាត់ពូជ ដំរីឈ្មោលកាចព្រោះត្រូវកាងមេ ដូចនេះប្រសិនបើដំរីចង់ ធ្វើបាបមនុស្សគឺមិនមានផ្ដល់សញ្ញាអ្វីឱ្យយើងដឹងជាមុនឡើយ។ សម្រាប់ដំរីញីមិនសូវជាមានផលលំបាកអ្វីទេប្រសិនបើវាមិនស្រួលខ្លួន គឺមានពេលខ្លះវាគ្រាន់តែរត់ ឬមិនឱ្យហ្មរជិះតែប៉ុណ្ណោះ។

ទោះជាយ៉ាងណាក៏ដោយ លោក ប៉ាល់ កាហែម ទទួលបានការបង្ហាត់បង្រៀនបច្ចេកទេសក្នុងការមើលថែសត្វ ដំរីពីខាងសមាគមដែលមានគ្រូពីបរទេស និងបូករួមជាមួយនឹងទំនៀមទំលាប់មើលថែតាំងតែពីបុរាណមក ធ្វើឱ្យមានភាពងាយស្រួលជាងមុនសម្រាប់លោកផ្ទាល់ ក្នុងការថែរក្សាសត្វដំរី។ លើសពីការថែទាំ ការបង្កាត់ពូជក៏ជាផ្នែកមួយសំខាន់នៅក្នុងការអភិរក្សផងដែរ។

លោកថា៖ «ក្រុមការងារពួកខ្ញុំកំពុងបន្តការបង្កាត់ពូជបន្ថែមទៀតពួកខ្ញុំសង្ឃឹមថា នឹងទទួលបានលទ្ធផលល្អប្រសើរព្រោះពួកខ្ញុំបានបង្កាត់ដោយផ្ទាល់ដៃ និងយកចិត្តទុកដាក់បំផុត ហើយគ្មានវិធីសាស្រ្តអ្វីក្រៅពីការបង្កាត់ដំរីតាមបែបបុរាណ ឬធម្មជាតិនោះទេ។ ជាក់ស្ដែងដើម្បីបង្កើតកូនដំរីស្រុកបានមួយក្បាលគឺ ណូអែល នេះលោកបានរងចាំ មេដំរីពរពោះប្រើរយៈពេល ២ ឆ្នាំជាង ឬ ២ ឆ្នាំ ២ ខែ»។

លោកចង់ឱ្យមានសកម្មភាពអភិរក្សបែបនេះកើតឡើងបន្តទៀតដើម្បីឱ្យមានកំណើនសត្វដំរី ស្រុកច្រើនជាងមុន ហើយមិនចង់ឱ្យមានការប្រលែងនៅតាមព្រៃទេ ព្រោះខ្លាចមានការសម្លាប់ និងធ្វើបាបពីមនុស្ស។

អ្នកស្រី ប៊ុន ណា វ័យ២៧ឆ្នាំ ជាជនជាតិដើមភាគតិចប្រកបរបរត្បាញ ដែលរស់នៅជិតសមាគមអៃរាវត្តា បានបង្ហាញពីការគាំទ្រទៅដល់សកម្មភាពអភិរក្សសត្វដំរី ដោយថា វត្តមាននៃសត្វនេះមានចំនួនកាន់តែតិចទៅៗហើយ។

អ្នកស្រីថា៖ «ការអភិរក្សដំរី គឺសំខាន់ ដោយសារសត្វដំរីយើងលែងសូវមានហើយ អ៊ីចឹងមានសមាគមដែលអភិរក្សបែបនេះគឺវាល្អ‍។ សម្រាប់ខ្ញុំផ្ទាល់ ខ្ញុំចង់ឃើញការអភិរក្សដំរីនៅតែបន្តមាន ដោយសារវាបានទាំងការពារដំរី និងសុវត្ថិភាពរបស់បងប្អូនជនជាតិដើមភាគតិចផងដែរ ដោយសារព្រៃនៅមានតិច បើដំរីត្រូវបានលែងនៅក្នុងព្រៃ ពួកគេអាចនឹងស៊ីដំណាំរបស់ប្រជាពលរដ្ឋ»។

អ្នកស្រី ប៊ុន ណា ជាប្រជាពលរដ្ឋរស់នៅជិតសមាគម ផ្តល់បទសម្ភាសន៍មកកាន់Newsroom Cambodia ថ្ងៃទី០៤ សីហា ២០២៣ ។ (រូបភាព៖ ខុន លាងហេង)

ជុំវិញការអភិរក្សសត្វដំរីនៅក្នុងតំបន់នៃខេត្តរតនគិរី លោក ផុន ខេមរិន្ទ ប្រធានមន្ទីរបរិស្ថានខេត្តនេះលើកឡើងថា ចំនួនសត្វដំរីព្រៃមិនទាន់អាចធ្វើការស្ទាបស្ទង់បានទេ ដោយសារចំនួនដំរីព្រៃមានច្រើនទីតាំងភូមិសាស្ត្រធំៗ និងកង្វះឧបករណ៍បច្ចេកទេសសម្រាប់តាមដានលើការបំលាស់ទីរបស់សត្វដំរី។ លោកបន្ថែមថា ដំរីបច្ចុប្បន្នមាននៅពីរតំបន់ គឺនៅឧទ្យានជាតិវីរជ័យ និងឧទ្យានជាតិអូរយ៉ាដាវ ដែលនៅឧទ្យានជាតិអូយ៉ាដាវមានដំរីព្រៃប្រហែល ៤ ទៅ ៥ ហ្វូង ដែលអាចប៉ាន់ប្រមាណបានថាមានប្រហែល ៣០ ទៅ ៤០ ក្បាល។

ប្រធានមន្ទីបរិស្ថានរូបនេះបានបន្ថែមថា មិនមែនតែសត្វដំរីទេដែលត្រូវអភិរក្ស គឺគ្រប់សត្វទាំងអស់ដែលនៅក្នុងព្រៃសុទ្ធតែត្រូវបានការពារ និងអភិរក្ស។ ហើយមន្ទីបរិស្ថានក៏បានព្យាយាមអប់រំប្រជាពលរដ្ឋមិនឱ្យបរបាញ់ ឬដាក់អន្ទាក់សត្វព្រៃយកមកធ្វើអាជីវកម្មនៅក្នុងរូបភាពផ្សេងៗ។

លោកបន្ថែមថា កត្តាធម្មជាតិរបស់សត្វ ពួកគេអាចរស់នៅក្នុងព្រៃដោយសុខសាន្តបើគ្មានការយាយី ដូចនេះអ្វីដែលចាំបាច់ត្រូវធ្វើ គឺអប់រំប្រជាពលរដ្ឋ និងដាក់វិធានការតឹងរឹងក្នុងការទប់ស្កាត់ បង្ក្រាបមិនឱ្យមានករណីលួចដាក់អន្ទាក់ជាដើម។

លោកអះអាងថា៖ «ដំរីគឺវារស់តាមបែបធម្មជាតិនៅក្នុងព្រៃនៅក្នុងតំបន់ការពារធម្មជាតិ អ៊ីចឹងយើងអត់ទាន់មានការមើលថែទាំទេ។ ប៉ុន្តែគោលការណ៍របស់យើងគឺ អភិរក្ស ការពារមិនឱ្យមានការលបបាញ់ ឬដាក់អន្ទាក់ដើម្បីទៅធ្វើជាអាជីវកម្មណាមួយឡើយ»។

ក្រសួងបរិស្ថានធ្លាប់មានយន្តការក្នុងការជួយទ្រទ្រង់ទៅលើមូលនិធិរបស់សមាគម ហើយមន្ទីរជួយបន្ថែមក្នុងករណីដែលសមាគមមានតម្រូវការជាមួយខាងមន្ទីរ ដូចជាជួយក្នុងការណែនាំប្រជាពលរដ្ឋ និងរារាំងមិនឱ្យមានការយាយីនៅក្នុងព្រៃធម្មជាតិជាដើម។

នាអតីតកាល ដំរីបានដើរតួយ៉ាងសំខាន់ជាទីបំផុតនៅក្នុងការជួយធ្វើសឹកទប់ទល់នឹងសត្រូវឈ្លានពាន និងជាសត្វសំខាន់នៅក្នុងវិស័យស្ថាបត្យកម្ម រួមមានការសាងសង់ប្រាសាទបុរាណល្អឯកជាច្រើន ដែលបច្ចុប្បន្នត្រូវបានទទួលស្គាល់ជាសកល៕

រដ្ឋាភិបាលផ្ដល់ប្រាក់ឧបត្ថម្ភជូនកម្មករនិយោជិតដែលត្រូវបានព្យួរ កិច្ចសន្យាការងារ

ហ៊ុន ពិសី (Hun Pisey) — Wed, 02 Aug 2023 16:05:55 +0000

ក្រសួងការងារ និងបណ្ដុះបណ្តាលវិជ្ជាជីវៈ បានប្រកាសបើកផ្ដល់ប្រាក់ឧបត្ថម្ភជូនបងប្អូនកម្មករនិយោជិតចំនួនប្រហែល ៧ពាន់នាក់ជាង នៃវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប ដែលរងផលប៉ះពាល់ដោយសារវិបត្តិ សេដ្ឋកិច្ចសកល។

ប្រាក់ឧបត្ថម្ភនេះនឹងត្រូវបើកផ្ដល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារនោះ ក្នុងចំនួន ៨១ ០០០រៀល សម្រាប់ការព្យួរកិច្ចសន្យាការងាររយៈពេល ៧ថ្ងៃ ដល់ ១៤ថ្ងៃ និងចំនួន ១៦២ ០០០រៀល សម្រាប់ការព្យួរកិច្ចសន្យាការងាររយៈពេល ១៥ថ្ងៃ ដល់ ១ខែ។

គួរបញ្ជាក់ផងដែរថា រោងចក្រចំនួន១៥ រួមមាន៖ ក្រុមហ៊ុន ផាភីលៀន ថោកស្តាយ (ខេមបូឌា) ខូអិលធីឌី (ភ្នំពេញ) ក្រុមហ៊ុន វីនក្រោន (ខេមបូឌា) អ៊ិនដាសស្ទៀល ឯ.ក (កំពង់ស្ពឺ) ក្រុមហ៊ុន អៅដរ ហ្គូ(ខេមបូឌា) ឯ.ក (តាកែវ) ជាដើម៕

ស្ថានភាពទឹកទន្លេមេគង្គហក់ឡើងគួរឱ្យកត់សំគាល់

ហ៊ុន ពិសី (Hun Pisey) — Wed, 02 Aug 2023 16:01:25 +0000

ក្រសួងធនធានទឹក និងឧតុនិយមបានព្យាករអំពី ការហក់ឡើងនៃទឹកទន្លេមេគង្គ ក្នុងរយៈពេលពី ៣ទៅ៤ ថ្ងៃខាងមុខ ដែលអាចនឹងប៉ះពាល់ដល់តំបន់ទំនាបតាមដងទន្លេ ពិសេសនៅភាគខាងលើនៃប្រទេសកម្ពុជា។

យោងលើស្ថានភាពអាកាសធាតុ ដែលបាននឹងកំពុងមានការប្រែប្រួលកើតឡើងដោយសារឥទ្ធិពលនៃប្រព័ន្ធសម្ពាធទាប (ITCZ) បណ្តាលឲ្យនៅតំបន់ផ្ទៃរងទឹកភ្លៀងនៃទន្លេមេគង្គ ក្នុងប្រទេសថៃ ឡាវ និងប្រទេសកម្ពុជា មានភ្លៀងធ្លាក់ច្រើននៅក្នុងអាងទន្លេមេគង្គ ក្នុងស្ថានភាពនេះ នៅមិនទាន់ដល់កម្រិតប្រកាសឲ្យមានការប្រុងប្រយ័ត្ន ឬប្រកាសអាសន្ននៅឡើយទេ ។

គួរបញ្ជាក់ដែរថា៖ ខេត្តដែលដែលទទួលរងមាន ខេត្តស្ទឹងត្រែងទឹកអាចឡើងដល់កម្ពស់ ៧,៦៥ ម៉ែត្រ, ខេត្តក្រចេះ ទឹកអាចឡើងដល់កម្ពស់ ១៦,៧០ ម៉ែត និងខេត្តកំពង់ចាម ទឹកនឹងអាចឡើងដល់កម្ពស់ ៩,៩០ ម៉ែត្រ។

នេះបើតាមការចេញផ្សាយរបស់ក្រសួងធនធានទឹក និងឧតុនិយម ចុះថ្ងៃទី៣១ ខែកក្កដា ឆ្នាំ ២០២៣៕

ផ្លូវជាតិលេខ៤ ត្រូវផ្អាកចរាចរណ៍ជាបណ្ដោះអាសន្នក្រោយភ្លៀងជំនន់

ហ៊ុន ពិសី (Hun Pisey) — Wed, 02 Aug 2023 15:55:17 +0000

តំបន់មួយចំនូន នៃខេត្តព្រះសីហនុ មានការជន់លិច ដែលបង្ករឱ្យមានគ្រោះថ្នាក់ ដូចនេះមន្ទីរសាធារណការ និងដឹកជញ្ជូនខេត្ត បានប្រកាសកាលពីថ្ងៃទី៣០ ខែកក្កដា ឆ្នាំ២០២៣ សម្រេចផ្អាកការធ្វើចរាចរណ៍ ជាបណ្ដោះអាសន្នតាមបណ្ដោយផ្លូវជាតិលេខ៤។

ក្រោយពីមានភ្លៀង ខ្យល់ធ្លាក់ចុះយ៉ាងខ្លាំងជាបន្តបន្ទាប់ អាជ្ញាធរបានកំណត់ចំណុចស្ថិតត្រង់ស្ពានស្ទឹងសំរោង ចន្លោះគីឡូម៉ែត្រលេខ ១១៥ ដល់គីឡូម៉ែត្រលេខ ១១៦ និងត្រង់ស្ពានអូរគគីរ ចន្លោះគីឡូម៉ែត្រលេខ ១០៦ ដល់គីឡូម៉ែត្រលេខ ១០៨ ត្រូវបានបិទរហូតដល់មានការជូនដំណឹងសារជាថ្មី ដើម្បីធានាដល់សុវត្ថិភាពក្នុងការធ្វើដំណើរ។

គួររំលឹកដែរថា៖ រដូវនេះជារដូវវស្សារ សូមបងប្អូនប្រជាពលរដ្ឋ បង្កើនការប្រុងប្រយ័ត្នក្នុងការធ្វើដំណើរ នឹងរកផ្លូវវៀងជាបណ្តោះអាសន្ន ឬអាចប្រើប្រាស់ផ្លូវល្បឿនលឿនបាន៕

លោកស្រី ចក់ សុភាព៖ យុវជនគួរតែស្វែងយល់ពីសិទ្ធិឱ្យបានទូលំទូលាយ ទោះបីជារៀនខុសជំនាញសិក្សាក៏ដោយ

ហ៊ុន ពិសី (Hun Pisey) — Sun, 25 Jun 2023 15:29:51 +0000

លោកស្រី ចក់ សុភាព នាយិកាប្រតិបត្តិអង្កការសិទ្ធិមនុស្សកម្ពុជាបានលើកឡើងថា យុវជនគួរតែស្វែងយល់ពីសិទ្ធិឱ្យបានទូលំទូលាយ ទោះបីជារៀនខុសជំនាញសិក្សាក៏ដោយ ឬ ខុសអាជីពក្ដី ឬ នាថ្ងៃអនាគតបានក្លាយទៅជាចៅក្រម មេធាវី ក្រឡាបញ្ជី លោកស្រីជឿថាចំណេះដឹងនេះនឹងអាចយកទៅអនុវត្តប្រើប្រាស់ក្នុងជីវភាពប្រចាំថ្ងៃ រួមទាំងចែករំលែកជាប្រយោជន៍ដល់សហគមន៍ទាំងមូល បន្ទាប់ពីខ្លួនឯង និងគ្រួសារ ក្នុងការជម្រុញការគោរពសិទ្ធិជំនុំជម្រះដោយយុត្តិធម៌។

លោកស្រីបានបញ្ជាក់ផងដែរថា «មានតែការទទួលបាននូវយុត្តិធម៌ សិទ្ធិសេរីភាពទេ ដែលជម្រុញឱ្យយើងមានសុខសន្តិភាពពេញលេញ»។

លោកស្រី ចក់ សុភាពបានមានប្រសាសន៏បែបនេះនៅក្នុងវគ្គបំពាក់បំប៉នស្ដីអំពីសិទ្ធិទទួលបានការជំនុំជម្រះដោយយុត្តិធម៌ និងសង្កេតការណ៍សវនាការដែលធ្វើឡើងចាប់ពីថ្ងៃទី១៩ មិថុនា ដល់ ២១ មិថុនា ឆ្នាំ២០២៣ ស្ថិតនៅសណ្ឋាគារភ្នំពេញ ៥១ ក្បែរវិមានឯករាជ្យ រាជធានីភ្នំពេញ។

សិក្ខាកាមចូលរួមមានព្រះសង្ឃ ជនជាតិដើមភាគតិចទំពួន យុវជនតាមបណ្ដាខេត្ត នៃសាកលវិទ្យាល័យផ្សេងៗគ្នា។

គោលបំណងនៃកម្មវិធីនេះគឺដើម្បីឱ្យអ្នកចូលរួមទទួលបានចំណេះដឹងបន្ថែមអំពីគោលគំនិតនៃសិទ្ធិទទួលបានការជំនុំជម្រះដោយយុតិ្តធម៌ ក្នុងក្របខ័ណ្ឌច្បាប់ជាតិ និងអន្តរជាតិ ដែលធានាដល់សិទ្ធិទទួលបានការជំនុំជម្រះដោយយុត្តិធម៌ និងស្វែងយល់នូវការអនុវត្តជាក់ស្ដែងក្នុងតុលាការនៃប្រទេសកម្ពុជា។

លោកសូ វាសនា ជានិស្សិតរៀនឆ្នាំទី៤ ផ្នែកនីតិសាស្រ្ត នៃសាកលវិទ្យាល័យឯកទេសនៃកម្ពុជា និងជាមន្តី្រកិច្ចសន្យា នៅទីស្ដីការគណរដ្ឋមន្ត្រី ក្រោយវគ្គនេះ លោកទទួលបានចំណេះដឹងថ្មីបន្ថែមទៀត និងផ្ដល់សារៈសំខាន់ជាច្រើន ដែលផ្ដោតទៅលើសិទ្ធិការពារជនសង្ស័យ ក្នុងការជំនុំជម្រះ ជាក់ស្ដែងជនសង្ស័យទាំងនោះ ពួកគេក៏ជាជនរងគ្រោះផងដែរ ជាពិសេសអនីតិជន ដូចនេះពួកគេមានសិទ្ធិការពារខ្លួន សិទ្ធិទទួលបានមេធាវី សិទ្ធិមិនបង្ខំឱ្យសារភាព សិទ្ធិទទួលបានការជូនដំណឹង សិទ្ធិស្មើភាពគ្នាចំពោះច្បាប់ សិទ្ធិទទួលបានការកាត់សេចក្ដីក្នុងពេលសមស្រប សិទ្ធិទទួលបានការបកប្រែជាដើម មុនពេលនិងអំឡុងពេលសវនាការ។

អ្នកនាងណា មួយឡេង ជានិស្សិតផ្នែកច្បាប់ ឆ្នាំទី៣នៃសកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច បានថ្លែងពីសារៈសំខាន់នៃការអង្កេតការណ៍សវនាការ ក្នុងការត្រួតពិនិត្យវិសាលភាពនៃការអនុវត្តច្បាប់នៅក្នុងប្រទេសកម្ពុជា ក្នុងអង្គសវនាការផ្ទាល់ ថាតើការអនុវត្តន៍នីតិវីធីបានត្រឺមត្រូវតាមផ្លូវច្បាប់ដែរឬទេ។

អ្នកនាងណា មួយឡេង ជានិស្សិតផ្នែកច្បាប់

ក្នុងនោះ មួយឡេង បានសង្កេតឃើញថាក្នុងសវនាការមានការគោរព និងផ្ដល់សិទ្ធិចំពោះជនសង្ស័យបានល្អច្រើនហើយ។ បើតាមមួយឡេង ធ្លាប់បានសិក្សាកន្លងមក ដើម្បីកាត់សេចក្ដីមួយដែលមានយុត្តិធម៌ និងអព្យាក្រិត្យត្រឹមត្រូវ គឺត្រូវផ្អែកទៅលើភស្ដុតាង និងសក្ខីកម្មដែលមានស្រាប់។

មួយឡេងបានបន្ថែមទៀតថា «កាលណាប្រព័ន្ធយុត្តិធម៌ស្រុកខ្មែរមានភាពអព្យាក្រិត្យ ធ្វើឱ្យប្រជាជនមានភាពកក់ក្ដៅ ប្រៀបបានគ្រួសារមួយដែលមានអ្នកគ្រប់គ្រងពោពេញដោយព្រហ្មវិហាធម៌ទាំងបួន។‍‌»

លោកថន ធន់ អាយុ២៤ឆ្នាំ ជានិស្សិតផ្នែកប្រវត្តិវិទ្យា នៃសាកលវិទ្យាល័យហេង សំរិនត្បូងឃ្មុំ ថាពិតជាសប្បាយរីករាយ និងមានសារៈសំខាន់ច្រើនដែលបានចូលរួមក្នុងវគ្គនេះ លោកនឹងយកខ្លឹមសារទាំងអស់នេះផ្សព្វផ្សាយទៅក្នុងតំបន់ និងសហគមន៍របស់គាត់ក្នុងនាមជាសិក្ខាកាម។

លោកថន ធន់ អាយុ២៤ឆ្នាំ

ម៉្យាងវិញទៀតលោកសង្ឃឹមថាប្រជាពលរដ្ឋទាំងអស់គ្នាចូលរួមសិក្សាស្វែងយល់នូវច្បាប់មួយចំនួន ដើម្បីជាការការពារខ្លួន និងការគោរពនូវច្បាប់ ឬសិទ្ធិផ្សេងៗដែលមានចែង ចៀសវាងកុំឱ្យមានផលប៉ះពាល់ដល់ខ្លួនឯង អ្នកដទៃ។

យ៉ាងណាមិញ អង្គការសិទ្ធិមនុស្សប្រចាំកម្ពុជា ហៅការថា (CCHR) តែងតែបន្តយកចិត្តទុកដាក់ និងធ្វើសកម្មភាពយ៉ាងសកម្មលើវគ្គបំពាក់បំប៉នស្ដីអំពីសិទ្ធិទទួលបានការជំនុំជម្រះដោយយុត្តិធម៌ និងសង្កេតការណ៍សវនាការ គ្រប់កាល:ទេស: និងមានការសហការណ៍គាំទ្រពីតុលាការផងដែរ ដែលផ្ដល់ឪកាសឱ្យ (CCHR) និងសិក្ខាកាមបានចូលរួមអង្កសវនាការផ្ទាល់។

ជាពិសេសអង្កការសិទ្ធិមនុស្សកម្ពុជាបានរៀបអ្នកឃ្លាំមើលសវនាការប្រចាំនៅសាលាឧទ្ធរណ៍ និងសាលាដំបូង តាមតំបន់រាជធានី ខេត្តមួយចំនួនផងដែរ ដើម្បីជាប្រយោជន៍ជនទូទៅ ឬជនងាយរងគ្រោះ និងជាការកែលំអឡើងវិញនូវភាពអវិជ្ជមានក្នុងសវនកា តុលាការឱ្យមានភាពប្រសើរឡើង៕

VoxPop: ទស្សន:របស់ប្រជាជនចំពោះការផ្សព្វផ្សាយព័ត៌មានក្លែងក្លាយលើបណ្ដាញសង្គម

ហ៊ុន ពិសី (Hun Pisey) — Sun, 18 Jun 2023 17:15:29 +0000

បច្ចុប្បន្នប្រជាជនកម្ពុជាកំពុងប្រឈមចំពោះព័ត៌មានក្លែងក្លាយ ដែលបានចែកចាយនៅលើបណ្ដាញសង្គមដូចជា Facebook, TikTok, Instagram ជាដើម។ ជាក់ស្ដែងក្នុងអំឡុងពេលមួយខែចុងក្រោយនេះ នាយកដ្ឋានប្រឆាំងបទល្មើសបច្ចេកវិទ្យាកម្ពុជា បានច្រានចោលការផ្សព្វផ្សាយព័ត៌មានមិនពិត ចំពោះករណីចាប់ក្មេងវះយកអវយវ: ការបង្ហោះព័ត៌មានប្រមាថអាយុជីវិតកូនស្រីម្នាក់ និងការក្លែងបន្លំតាមប្រព័ន្ធទូរសព្ទ(SMS Scam)។ ទាំងនេះជាចំណុចរសើបសម្រាប់អ្នកលេងបណ្ដាញសង្គម។

ខាងក្រោមនេះគឺជាបទសម្ភាសន៍ពីប្រជាពលរដ្ឋដែលរស់នៅក្នុងរាជធានីភ្នំពេញ បានសម្ដែងមតិមកកាន់ Newsroom Cambodia។

លោកសុភី រុន ជាប្រជាពលរដ្ឋរស់នៅទីក្រុងភ្នំពេញបានយល់ឃើញពីព័ត៌មានក្លែងក្លាយនៅក្នុងបណ្ដាញសង្គមត្រូវបានផ្សព្វផ្សាយលឿន ហើយជាពិសេសនៅក្នុងបណ្ដាញសង្គមទៀតសោតរឹតតែជះឥទ្ធិពលខ្លាំងទៅដល់មនុស្សទូទៅទាំងក្មេងទាំងចាស់ដែលបានឃើញ។

លោកសុភី រុន។ រូបភាព៖ ស៊ឹង ចិនសែ

ជាក់ស្ដែងទៀតប្រសិនបើពួកគេទទួលបានព័ត៌មានក្លែងក្លាយដោយមិនបានដឹងពីប្រភពច្បាស់លាស់ និងមិនបានគិតពិចារណាមុននឹងនាំគ្នាចែកចាយបន្ត វាគឺជារឿងដែលធ្វើឲ្យមានការភាន់ច្រឡំចំពោះអ្នកដែលកាន់ ឬផ្សព្វផ្សាយនូវព័ត៌មានពិត ធ្វើឲ្យមានការប៉ះពាល់ សុខសុវត្ថិភាព ឬផលប្រយោជន៍ជនរងគ្រោះដែលគ្នាមិនបានដឹង។

លោកបានបន្ថែមទៀតថា៖ «ចំពោះព័ត៌មានក្លែងក្លាយគឺមានជនមួយក្ដាប់តូចរស់នៅដើម្បីតែ បំភ្លៃព័ត៌មានក្នុងសង្គម ហើយចែកចាយលើបណ្ដាញសង្គម វាមិនមែនជារឿងលេងសើច ពេលខ្លះវាជាផ្នត់គំនិតរបស់ពួកគេតែម្ដង ចង់បំប៉ោងព័ត៌មាននោះ ឱ្យសុសសាយទៅក្នុងសង្គម ដើម្បីជាផលប្រយោជន៍ របស់ពួកគេផ្ទាល់ខ្លួន ដោយមិនបានខ្វល់ពីសង្គមពិតប្រាកដ និងផ្នត់គំនិតសុខសន្តិភាព របស់ប្រជាពលរដ្ឋទូទៅទេ»។

យុវជនឈុង ហួត ជានិស្សិតឆ្នាំទី២ នៃសាកលវិទ្យាល័យភូមិន្ទភ្នំពេញវិចិត្រសិល្បៈ បានយល់ឃើញថា៖ ព័ត៌មានក្លែងក្លាយនៅលើបណ្ដាញសង្គម នៅពេលណាដែលចេញផ្សាយហើយគឺ នាំឲ្យសង្គមរញ៉េរញ៉ៃ បង្កភាពវឹកវរ និងគិតខុសលើគ្នានៅពេលណាដែលបានទទួលព័ត៌មានមិនពិត។

ប្រភពបន្ថែមទៀតថា៖ «មុននឹងជឿលើព័ត៌មានអ្វីមួយគឺយើងត្រូវដឹង ឬមើលអំពីប្រភពច្បាប់ដើម្បីឱ្យច្បាស់លាស់ និងមើលពីកាលបរិច្ឆេទផងដែរ»។

កញ្ញាចន្នី អាយុ១៧ឆ្នាំ បច្ចុប្បន្នបម្រើការងារនៅក្រុមហ៊ុនមួយកន្លែង បានចូលរួមមតិផ្ទាល់ខ្លួនត្រង់ៗថា៖ នៅពេលទទួលបាននូវព័ត៌មានដែលមិនពិត គឺធ្វើឱ្យគាត់ច្របូកច្របល់ គាត់ភ័យខ្លាច ខាតពេលវេលា និងការងារ ខាតបង់ប្រាក់ចំណូលទៀតផង។

កញ្ញាក៏មានសំណូមពរ៖ «សូមឱ្យពួកគេបញ្ឈប់នូវទង្វើទាំងអស់នេះ ព្រោះវាមិនមានប្រយោជន៍អ្វីទេ ក្រៅពីទោសទណ្ឌនោះទេ»។

កញ្ញាម៉ានីន អាយុ២២ឆ្នាំ បច្ចុប្បន្នជានិស្សិតនៃមហាវិទ្យាល័យមួយ កញ្ញាបានសម្ដែងការព្រួយបារម្មពីឥទ្ធិពលព័ត៌មានក្លែងក្លាយនៅលើប្រព័ន្ធបណ្ដាញសង្គមបច្ចុប្បន្ន ដែលមនុស្សមួយចំនួនគាត់នៅផ្ទះ ហើយគាត់តាមដានដំណឹង និងព័ត៌មានតែតាមទូរសព្ទដៃ ដូចនេះវាអាចធ្វើមានការយល់ច្រលំ ជាមួយព័ត៌មានពិត វាធ្វើឱ្យមានចលាចល ព្រួយបារម្ភ តក់ស្លុត ភ័យខ្លាច ហេតុនេះនាំឱ្យប៉ះពាល់ដល់ផលប្រយោជន៍សង្គមជាច្រើន។

កញ្ញា ម៉ានីន អាយុ២២ឆ្នាំ បច្ចុប្បន្នជានិស្សិត។ រូបភាព៖ ស៊ឹង ចិនសែ

កញ្ញាបានបន្តថា «សូមអាជ្ញាធរដែលពាក់ព័ន្ធ និងក្រសួងនានាមេត្តាយកចិត្តទុកដាក់ចំពោះរឿងនេះ ឱ្យបានលឿន រហ័សផង»។

ព្រះតេជព្រះគុណ ចម្រើន សុផា ព្រះជន្ម ២៥វស្សា ដែលទើបតែបញ្ចប់ថ្នាក់បរិញ្ញាបត្រនៅសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច នៅទីក្រុងភ្នំពេញ បានយល់ឃើញចំពោះការផ្សព្វផ្សាយព័ត៌មានក្លែងក្លាយលើបណ្ដាញសង្គម ជាព័ត៌មានមិនពិត មិនមានមូលដ្ឋាន ឬប្រភពច្បាស់លាស់។ បើទោះបីវាជាសេរីភាពនៃការបញ្ចេញមតិក៏ពិតមែន តែពួកគេមិនគួរផ្សាព្វផ្សាយនោះទេ ព្រោះវាបានជះឥទ្ធិពលដល់សង្គមជាតិទាំងមូល ជាពិសេសយុវជន និងក្មេងៗ វាជារូបភាពបំពុល បំប៉ោងស្ថានការណ៍ ឱ្យវឹកវរក្នុងសង្គម។

ព្រះអង្គមានដីការបន្ថែមទៀតថា «ការផ្សព្វផ្សាយព័ត៌មានតែងតែមានផលវិជ្ជមានខ្លះ និងអវិជ្ជមានខ្លះ ដូចនេះគួរកុំបណ្ដោយឱ្យមានបញ្ហានេះកើតឡើងកាន់តែច្រើន គួរតែរឹតបន្តឹងច្បាប់នៃការផ្សព្វផ្សាយចំពោះព័ត៌មានដែលមានផលប៉ះពាល់ និង ជួយជម្រុញនូវការផ្សព្វផ្សាយព័ត៌មានពីបណ្ដាស្ថាប័នសារព័ត័មានផ្សេងៗ ដែលជួយជាប្រយោជន៍ដល់សង្គម ជាពិសេសត្រូវផ្ដើមចេញពីយើងខ្លូនឯងផ្ទាល់ដើម្បីបញ្ឈប់នូវការផ្សព្វផ្សាយ និងចែកចាយព័ត៌មានមិនពិត»។

ព្រះតេជព្រះគុណ ចម្រើន សុផា។ រូបភាព៖ ស៊ឹង ចិនសែ

កញ្ញា ឆោម វឌ្ឍនា អាយុ២២ឆ្នាំ ជានិស្សិតនៃសាកលវិទ្យាល័យភូមិន្ទភ្នំពេញបានសំដែងមតិស្រដៀងៗគ្នាដែរថា៖ យើងគួរកុំឆាប់ជឿស្លុង និងការផ្សព្វផ្សាយពីម្ចាស់គណនីណាមួយដែលគ្មានប្រវត្តិ ការបរិច្ឆេទ ទីកន្លែង អត្តសញ្ញាណត្រឹមត្រូវ នោះវាបណ្ដាលឱ្យយើងងាយនឹងរងគ្រោះ។

កញ្ញាបន្ថែមថា «ចំពោះព័ត៌មានពិតយើងគួរជួយផ្សព្វផ្សាយបន្ត ប្រសិនបើជាករណីដែលក្លែងក្លាយ យើងគួរបន្ថែមមតិខាងលើថាជាព័ត៌មានមិនពិត»។

យោងតាមស្ថិតិដែលបានបង្ហាញដោយក្រុមស្រាវជ្រាវ Nepoleon Cate បានឱ្យដឹងថា គិត្រឹមខែមិថុនា ឆ្នាំ២០២០ ចំនួនអ្នកប្រើFacebook នៅកម្ពុជាបានកើនឡើងដល់ ១០,៨៧២,០០០នាក់ ដែលស្មើនឹង ៦៤.៥ភាគរយនៃប្រជាជនទាំងអស់។

កញ្ញា ឆោម វឌ្ឍនា អាយុ២២ឆ្នាំ។ រូបភាព៖ ស៊ឹង ចិនសែ

គួរបញ្ជាក់ផងដែរថា គិតត្រឹមពាក់កណ្ដាលឆ្នាំ ២០២០ នេះ ចំនួនអ្នកប្រើប្រាស់ Facebook សរុបនៅជុំវិញពិភពលោកបានកើនឡើងដល់ជាង ២.៦ពាន់លាននាក់ ដោយក្នុងនោះ ឥណ្ឌាជាប្រទេសទី១ ដែលមានចំនួនអ្នកប្រើ Facebook ច្រើនជាងគេរហូតដល់ជាង ២៨០លាននាក់ ខណៈ សហរដ្ឋអាមេរិកឈរនៅលេខរៀងទី២ មានត្រឹមតែ ១៩០លាននាក់ប៉ុណ្ណោះ៕