​​Newsroom Cambodia បានសម្ភាសន៍ប្រជាពលរដ្ឋជាអាជីវករ និងយុវជនចំនួន​៦រូប ដែល​រស់នៅ​រាជធានី​ភ្នំពេញ អំពី​ការយល់​ឃើញ​របស់​ពួកគាត់​លើ​ការទុកដាក់​សំរា​ម​នៅ​រាជធានី​ភ្នំពេញ៖

កញ្ញា យាង សុខម៉េង មកពីខេត្តត្បូងឃ្មុំ ជានិស្សិតរៀនជំនាញគណនេយ្យ ឆ្នាំទី១ នៅ​វិទ្យាស្ថាន​វ៉ាន់ដា​លើកឡើងថា ​នៅរាជធានីភ្នំពេញ​​​​មាន​ធុងសំរាម​ច្រើន ប៉ុន្តែ​ធុង​សំរាម​ខ្លះ​នៅ​មាន​សំរាម​ក្នុងធុង​ដែល​ប្រមូលមិនបានអស់ ចំណែក​កន្លែង​ខ្លះទៀ​ត​ដែល​គ្មាន​ការអនុញ្ញាត​ឱ្យ​មាន​ការចោ​លសំរាមនៅទីនោះ តែមានសំរាមចោលរប៉ាត់រប៉ាយ។  

កញ្ញាបញ្ជាក់​​ថា៖ «បើសិនយើងជាយុវជន ពេលធ្វើដំណើរទៅជួប ឬឃើញ​សំរាម​កន្លែង​ហ្នឹង​ហើយ ទោះជាយើងមិនបានប្រមូលចេញ ក៏យើង​មិន​គួរ​យក​សំរាម​ទៅ​ដាក់​ចោល​កន្លែង​ហ្នឹង​ថែម​ទៀតដែរ ទោះបីឃើញមានសំរាមនៅហ្នឹងមានច្រើនហើយក្ដី បើសិនគេ​ឃើញ​យើង​នៅ​តែ​បន្ត​ចោលសំរាមនៅទីនោះ អ្នកផ្សេងទៀតនឹងបន្តចោលតាមដែរ ដូច្នេះ​មាន​ន័យ​ថា​ធ្វើ​ឱ្យ​បរិស្ថាន​​ស្អា​តត្រូវមានការចាប់ផ្ដើមពីខ្លួនឯងផ្ទាល់»។

កញ្ញាបន្ថែមថា៖ «សូមឱ្យបងប្អូនឈប់បន្ត​ចោលសំរាម​ពាស​វាល​ពាស​កាល និង​ត្រូវ​រក្សា​ទុក​ជាប់​ខ្លួនរហូតទៅដល់កន្លែងដែលមានធុងសំរាមច្រើនសម្រាប់ចោល គឺ​មិនមាន​ការខាត​បង់​អ្វី​ទេ ហើយណាមួយបើសិនជាបរិស្ថានស្អាតធ្វើឱ្យយើងមានសុខភាពល្អ ទីក្រុង​មានការអភិវឌ្ឍ និង​មាន​ការទាក់ទាញ​ភ្ញៀវ​ទេសចរ​មាន​ចំណាប់​អារម្មណ៍​មក​ដើរកំសាន្ត​នៅ​ក្នុង​ប្រទេស​ស្អាត ធ្វើឱ្យប្រទេសជាតិរីកសុសសាយ»។

កញ្ញា អ៊ី កែវរស្មី អាយុ១៩ឆ្នាំ មកពីខេត្តកំពត ជានិស្សិតរៀនជំនាញគណិតវិទ្យា ឆ្នាំទី៣ នៅ​វិទ្យាល័យភូមិន្ទភ្នំពេញ លើកឡើងថា ការទុកដាក់ ឬចោលសំរាមនៅរាជធានីភ្នំពេញ ​មានការ​រៀបចំ និង​ទុកដាក់​បាន​ល្អ​ដោយកន្លែង។

កញ្ញាបញ្ជាក់ថា៖ «ដើម្បី​មាន​បរិស្ថាន​ល្អ​ប្រសើរ​គឺ​អាស្រ័យ​លើ​យើង​ត្រូវ​ចាប់ផ្ដើម​កាត់បន្ថយ​ការប្រើប្រាស់​សំរាម។ ព្រោះធម្មតាក្នុងទីក្រុងភ្នំពេញយើង​គឺ​មាន​ក្រុមហ៊ុន​ខាង​ការប្រមូល​សំរាម ដូច្នេះហើយមានការរៀបចំកន្លែងចោលសំរាមនីមួយៗ និង​ចង់​ឱ្យ​ពួកគាត់​ដែល​ចោល​សំរាម​ក្នុង​ទីកន្លែង​ពាសវាលពាសកាល ឬ​ក្នុង​លូទឹក ត្រូវ​មាន​ការប្រមូល​សំរាម​ដាក់​ទុក​ក្នុង​ធុង​ដែល​គេ​តម្រូវឱ្យចោលបាននោះវិញ​ដូចជា​នៅមុខផ្ទះនីមួយៗគឺមានកន្លែង​ទុកដាក់​សំរាម​សម្រាប់​ទុក​ឱ្យខាងអ្នកប្រមូលសំរាម​មកធ្វើការប្រមូល បើតាមមើលឃើញពេលខ្លះ២ថ្ងៃ ឬ៣​ថ្ងៃ​មក​ប្រមូល​ម្ដង»។

ព្រះតេជគុណ អួន សូនី អាយុ២៤ឆ្នាំ មកពីខេត្តកំពត ជានិស្សិតរៀនជំនាញអក្សរសាស្ត្រខ្មែរ ឆ្នាំទី១ នៅវិទ្យាល័យភូមិន្ទភ្នំពេញ យល់ឃើញថា សំរាម​តាមដងវិថីនានា​​​ក្នុង​រាជធានី​ភ្នំពេញ​ មាន​ការរៀបចំ​ទុកដាក់បានល្អ ខណៈប្រជាពលរដ្ឋ​ភាគច្រើន​​យកចិត្តទុក​ដាក់​ចោល​សំរាម​ក្នុង​ធុង​សំរាម​មានសណ្ដាប់ធ្នាប់ត្រឹមត្រូវ។

ព្រះតេជគុណ​បន្ថែមថា៖ «សម្រាប់និយមន័យរួមប្រពលរដ្ឋខ្មែរនៅរាជធានីភ្នំពេញ គឺយើងត្រូ​វ​ធ្វើ​យ៉ាងណា​ទម្លាប់​ខ្លួន​ឱ្យ​ជា​មនុស្ស​ដែល​ស្រលាញ់​សំរាម​ មាន​ន័យ​ថា ពេល​ឃើញ​សំរា​ម​គឺ​យើង​ចង់​កាន់វាយកទៅដាក់នៅក្នុងធុងសំរាម ដើម្បី​ឱ្យ​រាជធានី​ភ្នំពេញ​របស់​យើង​មាន​សោភ័ណ​ភាព​ល្អ ហើយជាពិសេសសម្រាប់ទាក់ទាញ និង​បង្ហាញ​ភ្ញៀវ​បរទេស​ឱ្យ​គាត់​បាន​ឃើញ​ពី​ទិដ្ឋភាពថា ប្រជាជនខ្មែរគឺមាន​​របៀបរបប និង​មាន​វិន័យ​ត្រឹមត្រូវ គឺ​ពេល​ឃើញ​សំរាម​អី​គឺពួ​កគាត់ចង់ប្រមូលចោលក្នុងធុងសំរាម»។​

អ្នកនាង វ៉េង ស្រីមាស អាយុ៣៣ឆ្នាំ ជាអ្នកលក់ភេសជ្ជៈ​តាមដងផ្លូវនៅសង្កាត់កាកាប ខណ្ឌពោធិ៍សែនជ័យ រាជធានីលើកឡើងថា ការទុកដាក់សំរាម​នៅរាជធានីភ្នំពេញ​នៅមា​ន​ការខ្វះ​ចន្លោះ ដោយសារ​ការយល់ដឹង​របស់​ប្រជាពលរដ្ឋ​នៅមា​នកម្រិត​នៅឡើយ។

អ្នកនាង វ៉េង ស្រីមាស បានបន្ថែមថា៖ «ការផ្សព្វផ្សាយជូនដំណឹងក្នុងការទុក​ដាក់​សំរាម​ជូន​ដល់​ប្រជាពលរ​ដ្ឋ ​ច្រើន តែបងប្អូនប្រជាពលរដ្ឋភាគច្រើន​មិនមាន​ចំណាប់​អារម្មណ៍​តាមដាន​ស្ដាប់ មើលពីរបៀបរបបល្អៗក្នុងការទុកដាក់សំរាម ដូច្នេះ​ហើយ​សូម​សំណូមព​​រ​ឱ្យ​ប្រជាពលរដ្ឋ​យកចិត្ត​ដាក់មើល និងធ្វើតាមសកម្មភាពល្អៗ ព្រោះបើ​មិនទុកដាក់​ឱ្យ​បាន​ត្រឹមត្រូវ​ទេ​នោះ សំរាមជះផលប៉ះពាល់មកយើងវិញ»។​

អ្នកនាង អ៊ាម ស្រីតូច អាយុ៣៣ឆ្នាំ ជាអាជីវករលក់បន្លែនៅផ្សារសិនជូរីផ្លាហ្សា​លើកឡើង​ថា ការទុកដាក់សំរាមនៅរាជធានីភ្នំពេញ មានភាពល្អប្រសើរ​ដោយកន្លែង។ អ្នកនាង​បន្ថែម​ថា៖

អ្នកនាង អ៊ាម ស្រីតូច បានបន្ថែមថា៖ «ចង់បានបរិស្ថាន និងទីលំនៅយើង​ស្អាតគឺមាន​ការចាប់​ផ្ដើម​ពី​យើងត្រូវមានការទុកដាក់សំរាមដោយមានការវេចខ្ចប់ទុកដាក់ឱ្យបានត្រឹមត្រូវ ព្រោះ​សំរាម​មាន​ក្លិនមិនល្អដល់បរិស្ថាន ធ្វើខូចសុខភាពផងដែរ»។​

អ្នកស្រី យ៉ែម សុផា អាយុ៤៤ឆ្នាំ ជាអ្នកប្រកបមុខរបរលក់ត្រី នៅផ្សារសិនជូរីផ្លាហ្សា លើកឡើងថា ការទុកដាក់ ឬចោល​សំរាម​នៅរាជធានី​ភ្នំពេញ​គឺ​កន្លែង​ខ្លះ​មាន​សណ្ដាប់​ធ្នាប់​ក្នុង​ការទុកដាក់សំរាមដោយមានការវេចខ្ចប់ក្នុងថង់ និងយកទៅចោល​ក្នុង​​ធុងសំរាម និង​កន្លែង​ខ្លះទៀត​មានការចោលពាសវាលពាសកាល ដោយគ្មានសណ្ដាប់ធ្នាប់។

អ្នកស្រី​បន្ថែមថា៖ «ចំពោះកន្លែង​ដែលមានការចោលសំរាម​ពាសវាល​ពាស​កាល​គ្មាន​សណ្ដាប់​ធ្នាប់ សូមឱ្យបងប្អូនជាពិសេស​អាជីវករ​លក់ដូរ​ទាំងអស់​ជួយ​ប្រមូល​ដោយ​មាន​ការវេចខ្ចប់​ដាក់​ក្នុងថង់ចោលក្នុងធុងសំរាម កុំមានការពង្រាយក្នុងទីធ្លាសាធារណៈ  ព្រោះ​សំរាមប៉ះពាល់ដល់បរិស្ថាន និងបង្កឱ្យមានផលប៉ះពាល់ដល់សុខភាព»៕

ក្នុង​សេចក្ដីជូនដំណឹងរបស់ក្រសួងធនធានទឹក និងឧតុនិយម​ស្តីពីការព្យាករ​អាកាសធាតុ​លើកទី​២​សម្រាប់​រដូវ​ប្រាំង​ពីខែ​មីនា ដល់ដើមរដូវវស្សា​​​​ ខែឧសភា ឆ្នាំ​២០២៤​បញ្ជាក់ថា ធាតុភូត​សកល​ក្នុង​រយៈពេល​ពី​ខែមីនា ដល់ខែមេសា​ ឆ្នាំ២០២៤ នេះ​នឹង​មាន​អត្រា​បាតុភូតអែលនីណូ (EI Nino) ខ្ពស់​ជាង​​៧០% នៅ​បន្តមានឥទ្ធិពល​លើតំប​ន់​ជុំវិញ​មហាសមុទ្រ​ប៉ាស៊ីហ្វិក។ ហើយចាប់ពី​ខែ​​ឧសភា​ ឆ្នាំ​២០២៤តទៅ បាតុភូតនេះ​នឹង​ថយ​ចុះមកត្រឹម​២០% ដោយ​ជំនួសមកវិញ​នូវស្ថានភាព​អព្យាក្រឹត (ENSO-Neutral)។

សេចក្តីជូនដំណឹង​ដដែល​បន្ត​​ថា សីតុណ្ហភាព​នៅ​ទូទាំង​ប្រទេស​​កម្ពុជា​នឹង​ឡើង​ខ្ពស់​ជាង​​មធ្យមភាគ​ច្រើនឆ្នាំ ដែល​ជាកត្តា​ដែល​ធ្វើ​ឱ្យ​អាកាសធាតុ​ក្តៅ ហើយស្ងួត។ ចំណែក​បរិមាណ​ទឹក​ភ្លៀង​​នឹង​ទាបជាង​មធ្យមភាគ​ច្រើនឆ្នាំ ហើយ​ភ្លៀង​កក់ខែ​​ធ្លាក់តិចតួច ដោយតិចជាង​ឆ្នាំ​២០២៣ ជាមួយគ្នា​នឹង​បាតុភូត​​​​​​ផ្គរ​រន្ទះ និង​ខ្យល់​កន្រ្តាក់កើតឡើងច្រើន។​

សេចក្តី​ជូន​ដំណឹង​នោះ​បន្ថែម​​​​ថា ​នៅ​ដើម​រដូវវស្សា​ ឆ្នាំ​២០២៤ សីតុណ្ហភាព​ស្មើ​ ឬខ្ពស់ជាង​មធ្យម​ភាគ​ជាច្រើន​ឆ្នាំ។ បរិមាណ​ទឹកភ្លៀង​នឹង​ទាបជាងមធ្យមភាគ​ច្រើន​ឆ្នាំ ហើយ​មិនសូវ​រាយប៉ាយ​ រួមជាមួយ​នឹង​​​​បាតុភូត​ផ្គរ​រន្ទះ។​

បើតាម​សេចក្តីជូនដំណឹង​ ក្រសួងធនធានទឹក និង​ឧតុនិយម​អំពាវនាវ​ឱ្យ​មានការ​ប្រើប្រាស់​ទឹក​ដោយ​សន្សំ​សំចៃ​ក្នុងកម្រិត​ខ្ពស់ ​​ជាពិសេស​​បណ្តា​ជនបទ​ដែល​ឆ្ងាយពីប្រភពទឹក និង​​​ត្រូវ​ប្រុង​ប្រយ័ត្ន​ចំពោះ​អាកាសធាតុ​ក្តៅ​ហើយ​ស្ងួត បាតុភូត​ផ្គររន្ទៈ និង​ខ្យល់​កន្រ្តាក់ ដែល​អាច​កើត​មាន​ក្នុង​ខែ​មេសា និង​ឧសភា ឆ្នាំ​២០២៤​នេះ៕​

Newsroom Cambodia​ បាន​សម្ភាស​និស្សិតមួយ​​ចំនួន​មក​ពី​ភ្នំពេញ និងបណ្ដាខេ​ត្ត​នានា​ក្នុងប្រទេស​​ដែលកំពុង​​​បន្ដ​​ការ​​សិក្សា​​ និង​​​រស់​នៅ​​រាជធានី​ភ្នំពេញ​​ អំពី​ការយល់​ឃើញ​ទៅ​លើទីផ្សា​រការងារ​នៅ​កម្ពុជា​ក្រោ​យ​​​​​​​បញ្ចប់​ការសិក្សា​។​​

លោក សូត្រ សំបូរ​ អាយុ ​២០ឆ្នាំ​​ ជា​និស្សិត​នៅ​សាកល​វិទ្យាល័យ​ភូមិន្ទភ្នំពេញ​ជំនាញ​គ្រប់គ្រ​ងពាណិជ្ជកម្មអន្តរជាតិ​ លើក​ឡើង​ថា​ទីផ្សារ​ការងារ​គឺ​មាន​សម្រាប់​និស្សិត​ដែល​ខិត​ខំប្រឹងប្រែង​រៀនសូត្រ​ និង​បណ្ដុះ​បណ្តាលសមត្ថភាព​របស់​ខ្លួនទៅ​លើជំនាញ​នីមួយៗ​ដែល​ខ្លួនជ្រើសរើស​​​​។

លោកបញ្ជាក់ថា៖ «ប្រសិនបើយើងខិតខំប្រឹងប្រែងរៀនកាន់តែច្រើនឲ្យបានកាន់តែស៊ីជម្រៅ ជំនាញនឹងរត់មករកយើង ហើយសំខាន់យើងមានសមត្ថភាពធ្វើវាអត់​»។​

លោក​​ សុខុម​ ច័ន្ទរិទ្ធ អាយុ ​២៦ឆ្នាំ ជានិស្សិតនៅវិទ្យាស្ថានភាសាបរទេសជំនាញទំនាក់ទំនងវិជ្ជាជីវៈ(Professional Communication)​ លើកឡើងថា ​និស្សិតដែលបញ្ចប់ការសិក្សា​ត្រូវប្រឹងរកការងារ​តាមប្រព័ន្ធ​អនឡាញ ឬវេបសាយដែលបានបង្ហោះអំពីការងារទៅតាមផ្នែក ឬតួនាទីនីមួយៗ​ដែលនិស្សិតចង់​ធ្វើ​​។​​

លោកបញ្ជាក់ថា៖ «ភាគច្រើនលោក[ស្វែង]រក​[ការងារ]តាមវេបសាយច្រើនជាងព្រោះដោយសារ​តែ​នៅ​តាមហាង​​ ក្រុមហ៊ុន ស្ថាប័នផ្សេងៗ ភាគច្រើនទាល់តែយើងមាន​ប្រវត្តិការងារ​និងបទពិសោធន៍​​ការងារ​ហើយ យើងអាចដាក់ប្រវិត្តរូបអីចឹងទៅ»។

លោកបន្ថែមថា៖ «លោកមានក្ដីបារម្ភច្រើនចំពោះទីផ្សារការងារនៅកម្ពុជាដោយសារមិនសូវមានភាពទូលំទូលាយហើយដោយសារប្រទេសយើងស្ថិតនៅក្នុងប្រទេសកំពុងអភិវឌ្ឍន៍ដល់ពេលចឹង គឺយើងព្យាយាម រកសង្វាសខ្លួនឯង ចឹងខ្ញុំគិតថាវាពិតហើយ​វាផ្ដល់ផលវិបាកសម្រាប់យើងនិងសម្រាប់​ សិស្ស ផ្សេងៗ»​​។

កញ្ញា សន​ បញ្ញា​ អាយុ២០ នៅវិទ្យាស្ថានបច្ចេកទេសកម្ពុជា​ជំនាញគីមីចំណីអាហារ លើកឡើងពីទស្សនៈថាក្រោយពេលបញ្ជប់ការសិក្សាលើជំនាញដែលគាត់រៀនគឺមានទីផ្សារក្នុង [ស្រុក] ដោយសារកម្ពុជា​ត្រូវការ​អ្នកមានបទ​ពិសោធ​ក្នុង​ជំនាញ​កែច្នៃ​អាហារ​និង​នាំអាហារ​ទៅ​ក្រៅ​ប្រទេស។

​កញ្ញាប្រាប់ថា៖«ខ្ញុំគិតថាល្អសម្រាប់មុខវិជ្ជាខ្ញុំកំពុងរៀននិងដោយសារតែយើងត្រូវការកែច្នៃច្រើនខ្ញុំឥឡូវរៀនខាងគីមីចំណីអាហារ ចឹងហើយប្រទេសយើង ត្រូវការអ្នកដែលមានបទពិសោធ ក្នុងការធ្វើកែច្នៃផលិតផលក្នុងស្រុក។ ដើម្បីបម្រើការក្នុងស្រុកផង ដើម្បីនាំចេញផង ដោយសារខ្ញុំឃើញភាគច្រើននៅក្រៅស្រុកអត់មានផលិតផលខ្មែរប៉ុន្មានទេ»។

លោក ​ពឿន ប៉ូលីស​ អាយុ ២២​ឆ្នាំ ជានិស្សិតនៅវិទ្យាស្ថានភាសាបរទេស ជំនាញ​ភាសា​អង់គ្លេស​​លើកឡើងថា ទីផ្សារនៅកម្ពុជាមានភាពទូលំទូលាយ តែទាមទារឲ្យមានការកែសម្រួល​ឲ្យកាន់តែល្អប្រសើរជាងកាលពីមុន។ លោកបន្ដថា​​​ ទាក់ទង​នឹង​ប្រាក់បៀវត្ស​ ប្រា​ក់​កម្រៃនិងអត្តប្រយោជ​​ន៍ ដែលទទួលបានពីការងារគឺតិចតួចនៅឡើយ។ លោកបន្តថា សម្រាប់ទីផ្សារការងារ​មានការ​ប្រកួត​ប្រជែង​មិនស្មើគ្នា ប្រកាន់បក្សពួកច្រើន​ និង​មិន​ផ្ដោតទៅលើសមត្ថភាពរបស់និស្សិតទេ។

លោកបញ្ជាក់ថា​៖​ «ទៅធ្វើការ គឺបានតែប្រាក់ខែតែប៉ុណ្ណឹងឯង អត់មានទាក់ទង​នឹងការ​ធានា​រ៉ាប់រង​ទៅលើ​សុ​ខភា​ព ​ឬក៏ទៅលើ​គ្រួសារ​របស់គាត់គឺអត់មាន​អីទាំងអស់»។

លោកបន្ថែមថា៖​ «បើយើងចង់ធ្វើការនេះ ទាល់យើងស្គាល់គ្នា។ បើយើងអត់ស្គាល់គ្នាគឺថាកន្លែង នឹង គឺ​យើង​អត់​​អាច​​ចូល​​សោះម៉ង​​»។​