ឃីម សុគន្ធី (Khim Sokunthy) – Newsroom Cambodia

បទយកការណ៍៖ ទីផ្សារ និងទិន្នផលម្រេចកំពតបន្តធ្លាក់ចុះដោយសារបញ្ហាអាកាសធាតុ

ឃីម សុគន្ធី (Khim Sokunthy) — Thu, 13 Jun 2024 07:14:57 +0000

កំពុងបេះម្រេចបណ្ដើរជជែកជាមួយកសិករពីនេះពីនោះបណ្ដើរ លោក ងួន ឡាយ ដែលជាប្រធានសមាគមលើកកម្ពស់ម្រេចកំពត និងជាម្ចាស់ចំការម្រេចមួយកន្លែងនៅខេត្តកំពតនិយាយថា ទីផ្សារម្រេចកំពតកាន់តែថយចុះ បើប្រៀបធៀបទៅនឹងឆ្នាំ២០១៣-២០១៤។ លោកសម្គាល់ឃើញថា យុទ្ធសាស្ដ្រពង្រីកផ្ទៃដីដាំដុះហាក់បីដូចជាគ្មានប្រសិទ្ធភាព ដោយសារគ្មានលទ្ធភាពផ្គត់ផ្គង់។

លោកបន្តប្រាប់ដោយកំពុងសម្លឹងមើលទៅកាន់ចំការម្រេចរបស់លោកថា៖ «សណ្ឋានដីដាំដុះចាប់ផ្ដើមអស់ម្ដងបន្តិចៗ ផលិតផលដែលប្រមូលបានធ្វើខុសទីផ្សារដែលគេចង់បាន ចំណែកឯទំហំ ពណ៌វិញមិនចំគោលដៅ ជាពិសេសគ្មានតុល្យភាពក្នុងការចំណាយ។ ម្រេចប្រមាណ១៧ម៉ឺនគុម្ព ត្រូវបានបំផ្លាញដោយអាកាសធាតុ និងចំការជាច្រើនកន្លែងត្រូវបោះបង់ចោល មូលហេតុខ្វះការគ្រប់គ្រង»។

លោក ងួន ឡាយ ប្រធានសមាគមលើកកម្ពស់ម្រេចកំពត និងជាម្ចាស់ចំការម្រេចមួយកន្លែងនៅខេត្តកំពត

ម្រេចកំពតត្រូវបានចុះបញ្ជីនៅក្រសួងមហាផ្ទៃ នៅឆ្នាំ២០០៨ ហើយចុះបញ្ជីសម្គាល់ម៉ាកម្រេចកំពតនៅក្រសួងពាណិជ្ជកម្មនៅថ្ងៃទី២ មេសា ឆ្នាំ២០១០។ ហើយនៅឆ្នាំ២០១៦ ម្រេចកំពតត្រូវបានទទួលស្គាល់ដោយសហភាពអ៊ឺរ៉ុប។

កាលពីឆ្នាំ២០០៨នៃការចាប់ផ្ដើមបង្កើតសមាគមម្រេច ទីផ្សារ និងទិន្នផលកើនឡើងជាលំដាប់ដោយសារសមាគមចំណាយតិច ប្រមូលផលបានច្រើន មានការចុះកុងត្រាជាពាណិជ្ជករក្រៅប្រទេស មានបចេ្ចសថែទាំដំណាំ និងមានប្រភពទឹកផ្គត់ផ្គង់គ្រប់គ្រាន់។ ប៉ុន្តែចាប់តាំងពីមានវិបត្តិកូវីដ១៩ ទីផ្សារម្រេចជួបបញ្ហាប្រឈមជាច្រើន ហើយរហូតដល់បច្ចុប្បន្ន ទីផ្សារ និងទិន្នផលម្រេចកាន់តែថយដោយសារបញ្ហាអាកាសធាតុ រហូតធ្វើឱ្យកសិករទាំងខ្នាតតូច និងមធ្យមមួយចំនួនសម្រេចចិត្តបោះបង់ផ្ទៃដីដាំដំណាំជាច្រើនហិកតា។

លោក ងួន ឡាយ បន្ថែមថា បច្ចុប្បន្នសមាគមលើកកម្ពស់ម្រេចកំពតមាន៣៨០គ្រួសារ និងផ្ទៃដី២៤០ហិចតា។ លោកថា កសិករដែលដាំម្រេចនៅកំពតប្រមាណ៣០-៤០គ្រួសារ បានបោះបង់អាជីវកម្មរបស់ពួកគេដោយសារ ប្រឈមនឹងទីផ្សារ បរិស្ថាន អាកាសធាតុ និងគ្មានទឹកផ្គត់ផ្គង់ដំណាំ។

លោកបន្ថែមថា៖ «កសិករតូចៗក៏ងាប់ កសិករធំៗក៏ងាប់ចឹងហា ហើយតែងាប់ម្រេចដឹងតែបោះបង់ចោលហើយ ព្រោះឥឡូវមិនដូចពីមុនទេ កាលឆ្នាំ២០១០-២០១៣ អ្នកវិនិយោគគេចូលមកវិនិយោគដើម្បីពង្រីងផ្ទៃដីបង្កើតទិន្នផលផ្គត់ផ្គង់ទីផ្សារ តែមកដល់ពេលឥឡូវនេះ ការពង្រឹងក៏គ្មានលទ្ធភាពពង្រឹង កុំថាឡើយពង្រឹងតែពង្រីកក៏គ្មានលទ្ធភាពពង្រីកដែរ»។

សមាគមលើកកម្ពស់ម្រេចកំពតមានទីតាំងស្ថិតនៅភូមិអង្គរជ័យ ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។ សមាគមនេះ គឺជាគម្រោងនាំមុខការការពារការសម្គាល់ភូមិសាស្រ្តទំនិញរបស់ក្រសួងពាណិជ្ជកម្ម សហការជាមួយក្រសួង ឧបត្ថម្ភដោយភ្នាក់ងារបារាំងសម្រាប់ការអភិវឌ្ឍ ក្នុងគោលបំណងការពារ និងផ្សព្វផ្សាយម្រេចកំពត។

របាយការណ៍របស់សមាគមលើកម្ពស់ម្រេចកំពតបង្ហាញថា ម្រេចកំពតត្រូវបាននាំចេញចំនួន១០៣តោនក្នុងឆ្នាំ២០២៣។ បើធៀបទៅនឹងឆ្នាំ២០២២ ថយចុះចំនួន១១ភាគរយ។

កសិករកំពុងប្រមូលផលម្រេច

លោកស្រី លី ឃ្លាំង ជាម្ចាស់ចំការម្រេចម្នាក់ទៀតបានប្រាប់ញូវស៍រូមខេមបូឌាថា លោកស្រីបានដាំម្រេចអស់រយៈពេលជាង១០ឆ្នាំមកហើយ ក្នុងទំហំ៤ហិចតា ដោយមួយឆ្នាំប្រមូលផលម្ដង។

លោកស្រីប្រាប់ថា៖ «តម្លៃទីផ្សារឡើងចុះអត់ទៀង ជួនណាឈ្មួញមកទិញបាន១ម៉ឺនជាង ឬ២ម៉ឺន បើយើងនាំចេញខ្លួនឯងបាន១០$ និងទុកលក់ឱ្យជនបរទេសខ្លះដែលមកដល់ចំការផ្ទាល់ បាន១៥$ដែរ»។

លោកស្រីបន្ថែមទៀតថា ឆ្នាំទៅប្រមូលបានជាង១តោន ប៉ុន្តែឆ្នាំនេះអត់បានដោយសារអាកាសធាតុរាំងស្ងួតពេក។

អ្នកស្រី ទូច ផែ អាជីវករលក់ម្រេចនៅខេត្តកំពត ប្រាប់ញូវស៍រូមខេមបូឌាថា ម្រេចពេលខ្លះលក់ដាច់ច្រើន ពេលខ្លះលក់អត់ដាច់។ អ្នកស្រីថា ម្រេចខ្ចីក្នុង១ថ្ងៃលក់បាន១០គីឡូ ហើយសម្រាប់ម្រេចទុំពេលណាមានជនបរទេសមកលក់ដាច់បានច្រើន។

អ្នកស្រីប្រាប់ថា៖ «ម្រេចឆ្នាំនឹងឡើងថ្លៃតម្លៃនាំចូល ម្រេចស ៣ម៉ឺន ម្រេចក្រហម៣ម៉ឺនជាង តម្លៃលក់ចេញវិញបាន៦ម៉ឺន ឬ៦ម៉ឺនជាង បើទិញចូល២ម៉ឺន លក់វិញបាន៣-៤ម៉ឺន។ វាមិនទៀង»។

អ្នកស្រីបន្តថាប្រសិនបើតម្លៃនាំចូលចុះថយជាងមុនបន្តិចដើម្បីងាយស្រួលក្នុងការលក់ចេញហើយក៏ចង់ឱ្យទីផ្សារម្រេចកំពតមានការរីកចម្រើនជាងមុនផងដែរ។

កញ្ញា អៀង លីលី អាជីវករនៅផ្សារសាមគ្គីទីរួមខេត្តកំពត ដែលបានបន្តអាជីពនេះពីម្ដាយ អស់រយៈពេលជាងដប់ឆ្នាំហើយនោះ ប្រាប់ Newsroom Cambodia ថា ម្រេចបច្ចុប្បន្ននាំចូលកំពុងឡើងថ្លៃ ហើយនៅពេលដែលតម្លៃម្រេចឡើងថ្លៃហួសពេក ពេលខ្លះមិនអាចយកមកលក់បាន។ កញ្ញាបន្តថា ម្រេចដែលកញ្ញាលក់នាំចូលពីចម្ការម្រេចកំពតដែលអ្នកភូមិយកមកចែកចាយដល់ក្នុងផ្សារ។

កញ្ញានិយាយថា៖ «គេប្រមូលតាមចម្ការគេយកមកលក់ឱ្យយើង អីចឹងគេយកមកលក់ឱ្យយើង យើងក៏អត់បានទៅទិញដល់ចម្ការគេដែរ។ គេមកចូលផ្សារមួយថង់បានដប់គីឡូប្រាំគីឡូតាមហ្នឹងអីចឹងទៅ»។

កញ្ញាបន្ថែមថា កញ្ញាចង់ឱ្យប្រជាជនទូទៅយល់ថា ម្រេចកំពតមានតម្លៃថ្លៃ ព្រោះវាខុសពីម្រេចខេត្តដទៃ ដោយសារវាមានគុណភាពល្អ និងហិរ។

កញ្ញានិយាយថា៖ «ចង់ឱ្យគេយល់ថាម្រេចកំពតខុសពីម្រេចកំពង់ចាម ម្រេចរតនគីរីអីចឹង ដោយសារតម្លៃវាខុសគ្នាពេក ដល់ពេលអ្នកទិញគេឆ្ងល់ថាម៉េចក៏ម្រេចកំពតវាថ្លៃជាងខ្លាំងម្ល៉េះ ដូចខ្ញុំអ្នកលក់ខ្ញុំតែងតែប្រាប់គេ ធម្មតាម្រេចកំពតគឺវាថ្លៃ វាហិរជាងអីចឹងគុណភាពវាល្អជាង»។

កញ្ញាប្រាប់ទៀតថា ចង់ឱ្យម្រេចកំពតមានភាពល្បីល្បាញដោយសារម្រេចកំពតមានគុណភាពល្អ មានគេទទួលស្គាល់ច្រើនទាំងភ្ញៀវជាតិនិងអន្តរជាតិ។

លោក តេង វ៉ាន់ធឿន ប្រធានការិយាល័យមន្ទីរកសិកម្មនៅខេត្តកំពតប្រាប់ថា ម្រេចកំពតជាម្រេចដែលដាំដុះដោយប្រើប្រាស់ជីសរីរាង្គ (ជីលាយមកគោ និងអាចម៍ប្រចៀវ) មានការត្រួតពិនិត្យសណ្ឋានដីប្រកបដោយបច្ចេកទេស និងស្តង់ដា ជាពិសេសបានចុះកិច្ចសន្យាទិញ លក់ រវាងអ្នកលក់ និងអ្នកទិញផងដែរ។

លោកបន្តថា ម្រេចកំពតបាននាំចេញទៅក្រៅប្រទេសចំនួន២០ជាងប្រទេសដែលក្នុងនោះមានម្រេចខ្មៅ តម្លៃ ១៥ដុល្លារក្នុងមួយគីឡូក្រាម ក្រហម ២៥ដុល្លារក្នុងមួយគីឡូក្រាម និងស ២៨ដុល្លារក្នុងមួយគីឡូក្រាម។ ម្រេចដែលល្បីល្បាញជាងគេមាននៅខេត្តកំពត ៤ស្រុក និងខេត្តកែបមាន២ស្រុក។

លោកបន្ថែមថា៖ «ទិន្នផលនៅក្នុងឆ្នាំ២០២៤នេះមានការថយចុះដោយសារបញ្ហអាកាសធាតុ។ កាលសម័យកូវីដឆ្នាំ២០១៩-២០២០ គ្រប់ដំណាំទាំងអស់តែងតែមានផលប៉ះពាល់ ប៉ុន្ដែចំពោះម្រេចកំពតមិនមានផលប៉ះពាល់ទេ ដោយសារមូលហេតុអី ម្រេចយើងពេលដាំត្រូវមានផលិតកម្មចុះកិច្ចសន្យាទិញលក់រវាងសហភាពអ៊ឺរ៉ុប និងប្រទេសដទៃ»។

បើតាម លោក តេង វ៉ាន់ធឿន ប្រសិនបើកសិករមានបញ្ហាប្រឈម ខាងមន្ទីរតែងតែចាត់មន្រ្តីជំនាញ ឬការិយាល័យដែលជាសេនាធិការទៅជួយដោះស្រាយ ព្រមទាំងមាន វគ្គបណ្ដុះបណ្ដាលបច្ចេកទេសថែទាំដំណាំម្រេចទៅកាន់សហគមន៍ផង។

ការនាំចេញម្រេចកម្ពុជាគ្រប់ប្រភេទទៅក្រៅប្រទេសក្នុងរយៈពេល៨ខែ ឆ្នាំ២០២៣ ប្រមាណ ៥០០០តោន ថយចុះជាង៣០ភាគរយ បើធៀបនឹង៨ខែក្នុងឆ្នាំ២០២២។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

ម្ចាស់ចំការម្រេចដូចជាលោក ងួន ឡាយ រំពឹងថា ម្រេចនឹងមានតម្លៃថ្លៃជាងមុន ហើយស្ថានភាពនៃការដាំដុះនឹងបានប្រសើរ មុននឹងអ្នកដាំម្រេចសម្រេចចិត្តថាបោះបង់ដំណាំនេះនាពេលខាងមុខ៕

Voxpop៖ ទស្សនៈយុវជនលើការអានព័ត៌មាន

ឃីម សុគន្ធី (Khim Sokunthy) — Thu, 07 Mar 2024 10:22:18 +0000

យុវជន គឺជាកម្លាំងចលករក្នុងការអភិវឌ្ឍជាតិ ដូចនេះយុវជនមានតួនាទីយ៉ាងសំខាន់ក្នុងការដឹងឮនូវរឿងរ៉ាវ ហេតុការណ៍ ព្រឹត្តិការណ៍ដែលកើតមានក្នុងសង្គម ដើម្បីយល់ដឹងពីចំណុចល្អ និងចំណុចខ្វះខាតរបស់សង្គម យុវជនអាចទទួលបានដំណឹងទាំងនោះតាមរយៈការអាន និងស្ដាប់ព័ត៌មាន។ ហើយបច្ចុប្បន្នព័ត៌មានត្រូវបានផ្សព្វផ្សាយជាច្រើនទម្រង់ដូចជា កាសែត ទស្សនាវត្ដី វិទ្យុ ទូរទស្សន៍ និងបណ្ដាញសង្គមនានា ដែលផ្ដល់លក្ខណៈ ងាយស្រួល និងរហ័សជាងមុន។

កាលពីថ្ងៃទី១ ខែមិនា ឆ្នាំ២០២៤ Newsroom Cambodia បានសម្ភាសនិស្សិតចំនួន៦នាក់ មកពីសាកលវិទ្យាល័យភូមិន្ទភ្នំពេញ អំពីទស្សនៈរបស់ពួកគេលើការអានព័ត៌មាន៖

កញ្ញា សុភាព ហារីណា ជានិសិ្សតឆ្នាំទី៤នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍បានលើកឡើងថា បច្ចុប្បន្នយុវជនមិនសូវមើលព័ត៌មាននោះទេ ដោយពួកគាត់និយមមើលមាតិកាបែបកម្សាន្តច្រើនជាង។

កញ្ញាបាននិយាយថា៖ «សម្រាប់បង បងគិតថាយុវជននៅប្រទេសកម្ពុជាយើងអត់សូវសកម្មជាមួយនឹងការអាន ឬមើលព័ត៌មានប៉ុន្មានទេ តាមអ្វីដែលបងឮពួកគាត់ អាហ្នឹងជាគំនិតរបស់បង។ បងគិតថាពួកគាត់ចូលចិត្តបែបកម្សាន្តបែបអីដែលសប្បាយៗច្រើន ហើយចំណែកមើលព័ត៌មានដែលទាក់ទងជាមួយសកម្មភាពសង្គមគាត់ក៏អត់សូវមើលខ្លាំងទេ»។

កញ្ញា សុភាព ហារីណា សិក្សានៅដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (រូបភាព៖ តាំង ប៉ហ្គិច)

កញ្ញា ហារីណា បន្ថែមថា ការអានព័ត៌មានផ្ដល់នូវគំនិតថ្មីៗក្នុងការជជែកគ្នា និងអាចចូលរួមដោះស្រាយបញ្ហាសង្គម។

កញ្ញាបន្ថែមថា៖ «ការអានព័ត៌មានហ្នឹងវាក៏ល្អដែរ នៅពេលដែលយើងនិយាយគ្នាយើងអាចផ្លាស់ប្ដូរគំនិតផ្សេងៗ ហើយវាជួយដល់ការបញ្ចេញមតិរបស់ពួកយើងអាចជាយុវជនអីអាចជួយដល់សង្គមដែរ អាចដោះស្រាយបញ្ហាអីផ្សេងៗ អីចឹងបងគិតថាវាល្អ»។

កញ្ញា ស្រីភួង អាយុ២០ឆ្នាំ សិក្សាផ្នែកទំនាក់ទំនងអន្តរជាតិ នៅវិទ្យាស្ថានគោលនយោបាយសាធារណៈបានលើកឡើងថា កញ្ញាត្រូវតាមដានព័ត៌មានរាល់ថ្ងៃដើម្បីសង្ខេបឱ្យគ្រូ ហើយកញ្ញាសង្កេតឃើញថាបច្ចុប្បន្នយុវជនមិនសូវខ្វល់ខ្វាយរឿងសេដ្ឋកិច្ច នយោបាយ ក្នុងនិងក្រៅប្រទេសនោះទេ។

កញ្ញា ស្រីភួង និស្សិតទំនាក់ទំនងអន្តរជាតិ (រូបភាព៖ តាំង ប៉ហ្គិច)

កញ្ញាបានបញ្ជាក់ថា៖ «បើតាមគំនិតរបស់ខ្ញុំ សម្រាប់ខ្ញុំជាសិស្សIR (ទំនាក់ទំនងអន្តរជាតិ) អីចឹង គឺខ្ញុំត្រូវតាមដានព័ត៌មានជារៀងរាល់ថ្ងៃដើម្បី summery (សង្ខេប) ឱ្យគ្រូអីចឹងទៅ ហើយសម្រាប់ការយល់ដឹងរបស់ខ្ញុំលើយុវជនក្នុងសង្គមឥឡូវនឹងគឺភាគច្រើនគាត់អត់សូវរវីរវល់ ជាមួយ រឿង នយោបាយ ឬ ក៏រឿង economic (សេដ្ឋកិច្ច) ឬក៏រឿងអ្វីៗដែលនៅក្នុងប្រទេស ឬក៏ក្រៅប្រទេសនោះទេ អីចឹងអាចនិយាយបានថា ពួកគាត់អាចនៅមានកម្រិតនៅឡើយក្នុងការតាមដានព័ត៌មាន»។

ព្រះអង្គ ជឹម ឆៃលន់ ជានិសិ្សតឆ្នាំទីមួយនៅដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍នៃសាកលវិទ្យាល័យភូមិន្ទភ្នំពេញមានសង្ឃដីកាថា យុវជនមិនសូវយល់ពីតម្លៃ និងតាមដានព័ត៌មាននោះទេ ដោយឡែកពួកគេចាប់អារម្មណ៍លើរឿងផ្ទាល់ខ្លួនរបស់អ្នកដទៃជាង។

ព្រះអង្គមានសង្ឃដីកាថា៖ «អាត្មាយល់ឃើញថា ភាគតិចដែលគាត់មានគំនិតក្នុងការតាមដានព័ត៌មាន គាត់ដូចជាមិនយល់តម្លៃអំពីសារព័ត៌មានយ៉ាងម៉េចទេ ភាគច្រើនគាត់បែរជាចាប់អារម្មណ៍រឿងផ្ទាល់ខ្លួនរបស់អ្នកដទៃវិញ។ ឧទាហរណ៍ថានរណាម្នាក់ឈ្លោះគ្នានៅក្នុងបណ្ដាញសង្គមអីចឹងទៅ គាត់បែជាទៅតាមដានរឿងអីចឹងវិញគាត់មិនសូវជាចាប់អារម្មណ៍ទៅលើស្ថានភាពសារព័ត៌មាន»។

ព្រះអង្គ ជិន ឆៃលន់ សិក្សានៅដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (រូបភាព៖ តាំង ប៉ហ្គិច)

ព្រះអង្គបន្តថា៖ «ការអានព័ត៌មាន វាពិតជាមានប្រយោជន៍ ព្រោះថាសង្គមមួយអាចរីកចម្រើនទៅបានគឺចាំបាច់ណាស់យុវជនគឺត្រូវតែមានព័ត៌មាននៅក្នុងដៃ អាចយល់ដឹងពីស្ថានភាពស្រុកទេសថាការអភិវឌ្ឍនឹងវាបែបម៉េច ហើយតើមានស្ថានភាពបែបម៉េច មានការរីកចម្រើនបែបម៉េច មានការខ្វះខាតបែបម៉េច រឿងទាំងអស់នឹងគឺស្ថិតនៅក្នុងព័ត៌មាន អីចឹងយុវជនចាំបាច់ណាស់នៅក្នុងការអានព័ត៌មាន ត្រូវការដឹងអំពីស្ថានភាពនៃការអភិវឌ្ឍស្រុកទេស។»

កញ្ញា សឿន ស្រីនិច ជានិស្សិតអក្សរសាស្ត្រខ្មែរ នៅសាកលវិទ្យាល័យភូមិន្ទភ្នំពេញ បានលើកឡើងថា កញ្ញាមិនសូវចូលចិត្តអានព័ត៌មាននោះទេ ដោយសារព័ត៌មានមួយចំនួនមិនពិត ហើយមានប្រភពមិនច្បាស់លាស់។

កញ្ញាបញ្ជាក់ថា៖ «តាមជាក់ស្ដែងចំពោះខ្ញុំផ្ទាល់ ការអានព័ត៌មាននឹងខ្ញុំអត់សូវចាប់អារម្មណ៍ក្នុងការអានព័ត៌មានប៉ុន្មានទេ ដោយសារតែពេលខ្លះប្រភពព័ត៌មានវាអត់ច្បាស់ហើយពេលខ្លះនិយាយអត់សូវពិតអីចឹងទៅវាធ្វើឱ្យខ្ញុំអត់សូវចង់អាន តែសម្រាប់បេក្ខជនដទៃខ្ញុំអត់ច្បាស់ថាគាត់ចូលចិត្តអានឬក៏អត់ចូលចិត្តអានដូចខ្ញុំអីចឹងដែរទេ តែសម្រាប់ខ្ញុំ ខ្ញុំអត់សូវចូលចិត្តអានប៉ុន្មានទេ។»

កញ្ញា សឿន ស្រីនិច និស្សិតអក្សរសាស្រ្តខ្មែរ (រូបភាព៖ តាំង ប៉ហ្គិច)

លោក ភាន់ ភ័ក្រណា អាយុ២២ឆ្នាំ ជានិស្សិតឆ្នាំទី៣ផ្នែកគណិតវិទ្យានៅសាកលវិទ្យាល័យភូមិន្ទភ្នំពេញ បានលើកឡើងថា ការអានព័ត៌មានអាចឱ្យយើងជួយដោះស្រាយបញ្ហាក្នុងសង្គម លុបបំបាត់អំពើពុករលួយ និងស្វែងរកយុត្តិធម៌ជូនប្រជាជន។

លោកបានបន្តថា៖ «ដូចជាក់ស្ដែងទូទៅអីចឹងនៅពេលដែលមានបញ្ហាណាមួយ ក្នុងនាមយើងជាយុវជនអីចឹងយើងគួរតែព្យាយាមជួយដោះស្រាយទៅលើពួកគាត់។ កាលណាយើងចេះជួយគ្នាទៅវិញទៅមកអីចឹងភាពដែលអយុត្តិធម៌មិនអាចកើតមានទៀតទេ ហើយធ្វើឱ្យសង្គមយើងលែងមានអំពើពុករលួយ កាលណាយុវជនដឹងច្បាស់ពីព័ត៌មានច្បាស់លាស់ប្រទេសយើងកាន់តែរីកចម្រើនថែមទៀត»។

លោក ភាន់ ភ័ក្រណា និសិ្សតគណិតវិទ្យា (រូបភាព៖ តាំង ប៉ហ្គិច)

លោក ឡេវ ពិសិដ្ឋ អាយុ១៨ឆ្នាំ ជានិស្សិតផ្នែកគីមីវិទ្យានៅសាកលវិទ្យាល័យភូមិន្ទភ្នំពេញ បានលើកឡើងថា ការអានព័ត៌មានមានសារៈសំខាន់ព្រោះព្រឹត្តិការណ៍ផ្សេងៗតែងតែអាប់ដេតតាមរយៈព័ត៌មាន។

លោក ឡេវ ពិសិដ្ឋ និស្សិតគីមីវិទ្យា (រូបភាព៖ តាំង ប៉ហ្គិច)

លោកបានបន្ថែមថា៖ «ជាការពិតណាស់ ការអានព័ត៌មានគឺវាមានសារៈសំខាន់ណាស់ ព្រោះអីជាធម្មតានៅក្នុងសង្គមមួយវាតែងតែមានការផ្លាស់ប្ដូរនូវបរិបទសង្គមផ្សេងៗ ក៏ដូចជាស្ថានការណ៍អីចឹងទៅទាំងអស់នឹងគឺគេតែងតែអាប់ដេតទៅតាមព័ត៌មានដែលបង្ហោះនៅតាមឧទាហរណ៍ថាទស្សនាវត្ដី កាសែត ប្រព័ន្ធ social media(បណ្ដាញសង្គម) ជាដើម»៕

Vox Pop: ទស្សនៈរបស់ពលរដ្ឋលើការប្រើប្រាស់បារីអេឡិចត្រូនិច ឬ e-cigarette

ឃីម សុគន្ធី (Khim Sokunthy) — Tue, 05 Mar 2024 04:02:23 +0000

បច្ចុប្បន្ននេះទោះបីជាមានសេចក្ដីប្រកាសព័ត៌មានរបស់ក្រសួងសុខាភិបាលស្ដីពីផលប៉ះពាល់បណ្ដាលមកពីការប្រើប្រាស់បារីអេឡិចត្រូនិច ផលិតផលស៊ីហ្សា និងផលិតផល អេចឈ៍ ធី ភី យ៉ាងណាក្ដី យើងសង្កេតឃើញថានៅតែមានការប្រើប្រាស់ ជាពិសេសនៅក្នុងស្រទាប់យុវជនមួយចំនួន ដែលបារីអេឡិចត្រូនិចមានឈ្មោះជាច្រើនដូចជា E-cigs, Mods, Vape pens, Vapes ជាទូទៅគេហៅថា Vaping។ នេះបើតាមក្រសួងសុខាភិបាល។

Newsroom Cambodia បានសម្ភាសន៍ប្រជាពលរដ្ឋចំនួន៧នាក់ដែលរស់នៅក្នុងរាជធានីភ្នំពេញ ជុំវិញការយល់ឃើញចំពោះការប្រើប្រាស់បារីអេឡិចត្រូនិច៖

លោក លីណា ជាអ្នកបកប្រែភាសាចិនយល់ថា ការប្រើប្រាស់បារីអេឡិចត្រូនិចធ្វើឱ្យខូចសុខភាព ធ្វើឲ្យអ្នកប្រើប្រាស់ប្រឈមមុខជាមួយជំងឺផ្សេងៗ និងអាចប៉ះពាល់ដល់សេដ្ឋកិច្ចគ្រួសាររបស់ពួកគេ។

លោកបន្ថែមថា៖ «នេះបើតាមការយល់ដឹងរបស់ខ្ញុំ វាធ្វើឲ្យប៉ះពាល់ដល់សួត ក៏ដូចជាប៉ះពាល់ដល់ខួរក្បាល ឬក៏ធ្មេញ បាត់បង់ការចងចាំជាដើម» ។

លោក លីណា ជាអ្នកបកប្រែភាសាចិន (រូបភាព៖ ឃីម សុគន្ធី)

ចំណែកកញ្ញា លក្ខិណា អាយុ១៨ឆ្នាំ ជានិស្សិតនៅពុទ្ធិកសាកលវិទ្យាល័យព្រះសីហនុរាជ បានលើកឡើងថា កញ្ញាសង្កេតឃើញមាន ការប្រើប្រាស់បារីអេឡិចត្រូនិចច្រើនក្នុងពេលបច្ចុប្បន្ននេះ ដែលផ្ដល់ផលប៉ះពាល់យ៉ាងខ្លាំងដល់សុខភាព។

កញ្ញាបានលើកឡើងថា៖ «ឥឡូវនៅក្នុងសង្គមយើងសព្វថ្ងៃនាពេលបច្ចុប្បន្ននឹងគឺ យុវជនភាគច្រើនប្រើនូវបារីអេឡិចត្រូនិច ខ្ញុំគិតថាវាអត់ផ្ដល់ផលប្រយោជន៍អីដល់យើងទេ ពីព្រោះវាជាគ្រឿងដែលមានសារធាតុគីមីច្រើននៅក្នុងហ្នឹង ហើយវាផ្ដល់ផលប៉ះពាល់ដល់សុខភាពយើងច្រើន»។

កញ្ញា លក្ខិណា ជានិស្សិតនៅពុទ្ធិកសាកលវិទ្យាល័យព្រះសីហនុរាជ។ (រូបភាព៖ ឈួន ចាន់រស្មី)

អ្នកស្រី រដ្ឋា មានអាយុ៣០ឆ្នាំ មុខរបរជាអ្នកលក់ទឹកអំពៅ និយាយថា គាត់ឃើញមានការផ្សព្វផ្សាយពីផលប៉ះពាល់របស់បារីអេឡិចត្រូនិច ប៉ុន្តែនៅតែមានអ្នកបន្តប្រើប្រាស់ ហើយភាគច្រើនគាត់ប្រើប្រាស់តាមគ្នា។

អ្នកស្រីបន្ថែមទៀតថា៖ «បងចង់ផ្ដាំទៅក្មេងៗដែលគាត់ជក់គ្រឿងអស់ហ្នឹង បើគាត់ផ្អាកបានគាត់ផ្អាកទៅ វាអត់ល្អដល់សុខភាពយើងទេ វាប៉ះពាល់សុខភាព។ បងសូមផ្ដាំទៅក្មេងៗទាំងអស់សូមកុំឱ្យគាត់ជក់អាហ្នឹងទៀត»។

អ្នកស្រី រដ្ឋា អ្នកលក់ទឹកអំពៅ។ (រូបភាព៖ ឈួន ចាន់រស្មី)

អ្នកស្រី កៅ មុំ អាយុ៥៦ ពលរដ្ឋរស់នៅរាជធានីភ្នំពេញបានលើកឡើងថា ការប្រើប្រាស់បារីអេឡិចត្រូនិចធ្វើឱ្យប៉ះពាល់ដល់ខួរក្បាល និងសង្គមជាតិ។

អ្នកស្រីសំណូមពរបន្ថែមថា៖ «ខ្ញុំសូមសំណូមពរដល់កូនក្មួយ សូមកុំឲ្យប្រើបារីអេឡិចត្រូនិច សូម្បីតែបារីក៏ដោយក៏កុំឱ្យប្រើ ព្រោះរបស់ទាំងអស់ហ្នឹងវាមានជាតិពុលច្រើនណាស់ រាប់រយរាប់ពាន់ វាមិនមែនតិចតួចទេ វាខូចសុខភាព ត្រូវចេះស្រលាញ់សុខភាព កុំនាំគ្នាប្រើ សូមកំចាត់របស់អញ្ចឹងៗចោលទៅសូមកុំយកចិត្តទុកដាក់ជាមួយរបស់អ៊ីចឹង»។

អ្នកស្រី កៅ មុំ ពលរដ្ឋរស់នៅរាជធានីភ្នំពេញ។ (រូបភាព៖ ឃីម សុគន្ធី)

កញ្ញា ថុល ធីតាមុនី មុខរបរ ជានិស្សិតនៅសាកលវិទ្យាល័យភូមិន្ទភ្នំពេញ ជំនាញទំនាក់ទំនងអន្តរជាតិ រស់នៅរាជធានីភ្នំពេញយល់ឃើញថា បារីអេឡិចត្រូនិចដោយប៉ះពាល់ពេលវេលានៃការសិក្សារៀនសូត្រ និងពេលវេលាជាមួយគ្រួសារ។

កញ្ញាបន្ថែមថា៖ «បារីអេឡិចត្រូនិចវាបានប៉ះពាល់ដល់គ្រួសារគាត់ និងការចំណាយថវិការគ្រួសារយកទៅទិញមកប្រើប្រាស់»។

កញ្ញាបន្តទៀតថា៖ «ចំពោះសង្គមធ្វើឱ្យគ្មានសណ្ដាប់ធ្នាប់សង្គម ដូចជាការប្រើប្រាស់បារីអេឡិចត្រូនិចនៅតាមទីសាធារណៈធ្វើឱ្យសង្គមមិនសូវល្អ»។

កញ្ញា ថុល ធីតាមុនី និស្សិតនៅសាកលវិទ្យាល័យភូមិន្ទភ្នំពេញ។

លោក កោ ពិសិដ្ឋ ជានិស្សិតច្បាប់រស់នៅខណ្ឌសែនសុខ រាជធានីភ្នំពេញយល់ថា ចំពោះការប្រើប្រាស់បារីអេឡិចត្រូនិច ដែលគេហៅថាវេប ឬយ៉ូស គឺមានផលប៉ះពាល់យ៉ាងខ្លាំងទៅដល់មនុស្សយើង ដោយបារីប្រភេទនេះមានផលប៉ះពាល់ធ្ងន់ធ្ងរជាងបារីទូទៅ។

លោកបន្តថា៖ «អ្វីដែលខ្ញុំបានឃើញការប្រើប្រាស់បារីអេឡិចត្រូនិច មានផលប៉ះពាល់ខ្លាំង ប្រសិនបើគាត់ប្រើច្រើនធ្វើឱ្យប៉ះពាល់ដល់សួត វាក៏ជារឿងមួយដែលមិនល្អ មិនគួរយុវជនប្រើប្រាស់ឡើយ ព្រោះថាវាមានកម្រិតញៀនខ្លាំងជាងបារីទៅទៀត។ ជាតិទឹកដែលគេដាក់ចូលហ្នឹងមិនដឹងជាសារធាតុអ្វីឡើយ ដោយទឹកនោះមានក្លិនក្រអូប ប៉ុន្តែវាជាសារធាតុគីមីខ្លាំងជាងបារីទៅទៀត»។

លោកបន្តទៀតថា៖ «ទីមួយ ធ្វើឱ្យគាត់ខាតបង់ពេលវេលារៀនសូត្រ ទីពីរ ការផ្លាស់អត្តចរិក និងធ្លាក់ចុះនូវសីលធម៌នៅក្នុងការរស់នៅអាចក្លាយទៅជាក្មេងមិនល្អ និងទី៣ អាចឱ្យគាត់ហ៊ានប្រើប្រាស់អ្វីផ្សេង ដូចជាសារធាតុញៀន ឬគ្រឿងញៀនជាដើម និងអាចឱ្យពួកគាត់ដើរលើផ្លូវខុសផ្សេងៗ»។

លោក កោ ពិសិដ្ឋ និស្សិតច្បាប់។

លោក សៀវវ័ន្ត បច្ចុប្បន្នរស់នៅភូមិព្រែកឡុង ក្រុងតាខ្មៅ យល់ឃើញចំពោះការប្រើប្រាស់បារីអេឡិចត្រូនិចធ្វើឱ្យប៉ះពាល់សុខភាពខ្លាំង។

លោកបន្តថា៖ «ប្រសិនបើយុវជនចង់ប្រើប្រាស់បារីអេឡិចត្រូនិច កុំអី វាមិនល្អ វាធ្វើឱ្យញៀន ប៉ះពាល់ដល់សុខភាព សួត ថ្លើម ណាមួយនៅពេលយើងលេងកីឡាឆាប់ហត់ ដង្ហក់ និងស្រេកទឹកខ្លាំង។ សូមផ្ដាំទៅយុវជនជំនាន់ក្រោយកុំប្រើប្រាស់បារីអេឡិចត្រូនិច វាមិនល្អដល់សុខភាព និងសង្គមឡើយ»។

លោក សៀវវ័ន្ត ពលរដ្ឋរស់នៅភូមិព្រែកឡុង ក្រុងតាខ្មៅ។

គួរបញ្ជាក់ថា បារីអេឡិចត្រូនិចបារីបង្កផលប៉ះពាល់លើសុខភាព ធ្វើឱ្យញៀនខ្លាំង មានគ្រោះថ្នាក់ដល់គភ៌ ការលូតលាស់ខួរក្បាល ប្រឈមមុខនឹងជំងឺមហារីកសួត ការលូតលាស់ ខួរក្បាល ធ្វើឱ្យថយចុះនៃការផ្ចង់អារម្មណ៍លើការរៀនសូត្រ ការគ្រប់គ្រងកំហឹង ការប្រែប្រួលផ្លូវចិត្ត ភាពមួរម៉ៅ រសាប់រសល់ ថប់បារម្ភ ឬអស់សង្ឃឹម វិបត្តិនៃការគេង និងសន្ទុះចិត្តចង់ប្រើបារីអេឡិចត្រូនិច។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល៕

អ្នកនាំពាក្យនាយករដ្ឋមន្រ្តីថា លោក ហ៊ុន ម៉ាណែត មិននៅពីក្រោយក្រុមហ៊ុន ប្រ៊ីនលាន ស៊ីធី

ឃីម សុគន្ធី (Khim Sokunthy) — Wed, 21 Feb 2024 09:23:12 +0000

អ្នកនាំពាក្យនាយករដ្ឋមន្រ្តីបំភ្លឺថា លោកនាយករដ្ឋមន្ត្រី ហ៊ុន ម៉ាណែត មិនជាប់ពាក់ព័ន្ធនឹងក្រុមហ៊ុន ប្រ៊ីនលាន ស៊ីធី របស់ឧកញ៉ា ឡេង ចាន់ណា ដូចការផ្សព្វផ្សាយលើបណ្តាញសង្គមនោះទេ។

យោងតាមសេចក្ដីបំភ្លឺព័ត៌មានរបស់អង្គភាពអ្នកនាំពាក្យខុទ្ទកាល័យនាយករដ្ឋមន្រ្តីចេញនៅថ្ងៃទី២១ ខែកុម្ភៈ ឆ្នាំ២០២៤ បានឱ្យដឹងថា លោកនាយករដ្ឋមន្រ្តី ហ៊ុន ម៉ាណែត មិនបានជាប់ពាក់ព័ន្ធ ឬនៅពីក្រោយក្រុមហ៊ុន ប្រ៊ីនលាន ស៊ីធី របស់ឧកញ៉ា ឡេង ចាន់ណា

ដូចវីដេអូដែលបានផ្សព្វផ្សាយក្នុងបណ្ដាញសង្គមនោះទេ។

សេចក្ដីបំភ្លឺព័ត៌មានដដែលបានបន្ថែមក្នុងន័យដើមថា៖ «កាលពីថ្ងៃទី១៦ ខែកុម្ភៈ ឆ្នាំ២០២៤ កន្លងទៅថ្មីៗនេះ ឧកញ៉ា ឡេង ចាន់ណា ដែលជាអគ្គនាយិកាក្រុមហ៊ុនប្រ៊ីនលាន ស៊ីធី ក៏បានចេញនូវសេចក្ដីប្រកាសព័ត៌មានមួយ បដិសេធចំពោះការផ្សព្វផ្សាយតាមបណ្ដាញផ្សព្វផ្សាយសង្គមនានាដែលថាខ្លួនយកឈ្មោះ សម្ដេចធិបតី ទៅប្រើប្រាស់ក្នុងរូបភាពបោកប្រាស់ប្រជាពលរដ្ឋនោះ និងប្រកាសកុំឱ្យសាធារណៈជនទូទៅមានការយល់ច្រឡំថា សម្ដេចធិបតី មានការពាក់ព័ន្ធឬនៅពីក្រោយខ្នងក្រុមហ៊ុន ប្រ៊ីនលាន ស៊ីធី»។

សេចក្ដីបំភ្លឺព័ត៌មានដដែលបន្ថែមក្នុងន័យដើមទៀតថា៖ «នៅថ្ងៃទី២០ ខែកុម្ភៈឆ្នាំ២០២៤ ឧកញ៉ា ឡេង ចាន់ណា ក៏បានចេញលិខិតសារភាពកំហុស និងសូមអភ័យទោសពីសម្ដេចធិបតី ចំពោះការលើកឡើងថា សម្ដេចធិបតីជាអ្នកបង្កើតសមាគមពលករ និងអតីតពលករដើម្បីសប្បុរសធម៌ផងដែរ»។

ការចេញសេចក្ដីបំភ្លឺព័ត៌មាននេះធ្វើឡើងបន្ទាប់ពីវីដេអូឃ្លីបមួយចំនួនរបស់ឧកញ៉ា ឡេង ចាន់ណា ដែលជាម្ចាស់ក្រុមហ៊ុនប្រ៊ីលានស៊ីធី ត្រូវបានអ្នកប្រើបណ្តាញសង្គមផ្សព្វផ្សាយ តគ្នាពាក់ព័ន្ធនឹងការលើកឡើងថា ក្រុមហ៊ុនរបស់អ្នកស្រី ជាដៃគូរបស់រដ្ឋាភិបាល និងត្រូវបានជួយជ្រោមជ្រែងដោយរដ្ឋាភិបាល រីឯសមាគមរបស់អ្នកស្រីបង្កើតឡើងដោយលោក ហ៊ុន ម៉ាណែត។

តាមរយៈវីដេអូនោះអ្នកស្រី ឡេង ចាន់ណា បានលើកឡើងថា៖ «ពួកខ្ញុំទាំងអស់គ្នាក៏មានសិទ្ធិការពារនូវកេរ្តិ៍ឈ្មោះរបស់ពួកខ្ញុំដែរ ជាពិសេសគឺសមាគមដែលបង្កើតឡើងដោយឯកឧត្ដម ហ៊ុន ម៉ាណែត ទៀត ពួកខ្ញុំមិនអាចបណ្ដោយឱ្យជនខិលខូចណាមួយនិយាយបង្ខូចបង្កាច់នូវសកម្មភាពរបស់ពួកខ្ញុំបានឡើយ»។

វីដេអូនោះត្រូវបានចែកចាយបន្ទាប់ពីមានការផ្ទុះការតវ៉ាពីសំណាក់ប្រជាពលរដ្ឋនៅតាមបណ្តាខេត្តមួយចំនួនទាមទារឱ្យឧកញ៉ា ឡេង ចាន់ណា សងប្រាក់ដល់ពួកគាត់វិញ ក្រោយដាក់វិនិយោគជាមួយក្រុមហ៊ុននេះតែមិនទទួលបានការប្រាក់៕

ឃីម សុគន្ធី (Khim Sokunthy) – Newsroom Cambodia

បទយកការណ៍៖ ទីផ្សារ និងទិន្នផលម្រេចកំពតបន្តធ្លាក់ចុះដោយសារ​បញ្ហា​អាកាសធាតុ​

Voxpop៖ ទស្សនៈយុវជនលើការអានព័ត៌មាន

Vox Pop: ទស្សនៈរបស់ពលរដ្ឋលើការប្រើប្រាស់បារីអេឡិចត្រូនិច ឬ e-cigarette

អ្នកនាំពាក្យនាយករដ្ឋមន្រ្តីថា​ លោក​​ ហ៊ុន ម៉ាណែត មិននៅពីក្រោយ​ក្រុមហ៊ុន ប្រ៊ីនលាន ស៊ីធី

បទយកការណ៍៖ ទីផ្សារ និងទិន្នផលម្រេចកំពតបន្តធ្លាក់ចុះដោយសារបញ្ហាអាកាសធាតុ

អ្នកនាំពាក្យនាយករដ្ឋមន្រ្តីថា លោក ហ៊ុន ម៉ាណែត មិននៅពីក្រោយក្រុមហ៊ុន ប្រ៊ីនលាន ស៊ីធី