មេង គ្រុយពន្លក (Meng Kroypunlok) – Newsroom Cambodia

បទយកការណ៍៖ពលរដ្ឋបឹងតាមោកសម្រេចទទួលយកសំណងទាំងបង្ខំក្រោយរងសម្ពាធពីអាជ្ញាធរ

មេង គ្រុយពន្លក (Meng Kroypunlok) — Wed, 28 Aug 2024 03:50:37 +0000

ប្រមាណ១០គីឡូមែត្រពីក្រុងភ្នំពេញ ផ្ទះមួយចំនួននៃសហគមន៍បឹងតាមោកបានរុះរើទៅទីតាំងថ្មីដែលមានចម្ងាយប្រមាណ៣០០ម៉ែត្រពីទីតាំងចេញពីផ្លូវ១៣០ស្ថិតក្នុងខណ្ឌព្រែកព្នៅ។ផ្ទុយពីផ្ទះផ្សេងទៀ តដែលកំពុងរុះរើមានសំឡេងតុងតាំង ផ្ទះឈើមួយខ្នងដែលជាប់នឹងផ្ទៃបឹងតាមោកដែលត្រូវបានចាក់ដីបំពេញរៀងរាល់ថ្ងៃ ក៏អាចនឹងមានវាសនា មិនខុសពីលំនៅឋានផ្សេងទៀតប៉ុន្មានដែរ។ថ្វីបើម្ចាស់ផ្ទះនេះ មិនព្រមចាកចេញ ការចាក់ដីលប់រាល់ថ្ងៃនេះ មិនយូរមិនឆាប់ផ្ទះមួយខ្នងនេះ នឹងលែងមានរូបរាងបង្អួតគេឯងដូចមុនទៀតហើយ ក្នុងពេលដ៏ខ្លី។

តំណាងពលរដ្ឋបឹងតាមោក អ្នកស្រី ស៊ា ដាវី លើកឡើងថាអ្នកស្រី បានទទួលសំណងចុងក្រោយគេ កាលពីចុងខែកក្កដា ឆ្នាំនេះ ដោយអាជ្ញាធរនៃខណ្ឌព្រែកព្នៅបានផ្ដល់ដីពីរឡូតិ៍ និងផ្ទះពីរខ្នង ដែលមានទំហំក្បាលដី៤ម៉ែត្រ បណ្ដោយជាង២០ម៉ែត្រ និងលុយ៣ម៉ឺនដុល្លារអាមេរិក។

អ្នកស្រីបន្តថាកន្លងមកអ្នកស្រីបានចូលរួមជាមួយពលរដ្ឋផ្សេងទៀតដែរ ដើម្បីស្នើសុំរស់នៅទីតាំងជាប់នឹងផ្ទៃបឹងតាមោក ប៉ុន្តែអាជ្ញាធរ និងតុលាការបានចោទប្រកាន់លោកស្រី និងតំណាងពលរដ្ឋផ្សេងទៀត ដែលជំរុញធ្វើឲ្យអ្នកស្រី និងពលរដ្ឋផ្សេងទៀតបង្ខំចិត្តទទួលយកសំណង។

អ្នកស្រីបន្តថា៖«វាបន្ថយសម្ពាធកុំឲ្យយើងរវល់ជាមួយអាការឈ្លោះគ្នាញាំញីនឹង បើថាឲ្យយើងពេញចិត្តសប្បាយរីករាយនឹងទៅ ដូចអត់មានទេ តែកាត់ដូរនឹងសេរីភាពកុំឲ្យមានការឈ្លោះគ្នា បង្ករហឹង្សាអីតទៅទៀត ដូចថាយើងធុញទ្រាន់រស់នៅក្នុងសភាពនឹងណាស់ »។

បឹងតាមោកជាបឹងធំជាងគេ និងអាចស្ដុកទឹកបានច្រើនជាងគេដែរនៅក្នុងរាធានីភ្នំពេញ។នៅជុំវិញបឹងមានប្រជាជនរស់នៅប្រមាណ ៣០០គ្រួសារ និងមានមនុស្សប្រហែល ១ ០០០នាក់ ដែលភាគច្រើនពួកគេប្រកបរបរចិញ្ចឹមជីវិតដោយការនេសាទត្រី ដាំដំណាំ ចិញ្ចឹមត្រី និងរកស៊ីលក់ដូរនៅផ្ទះ។ហើយបឹងនេះ ក៏ជាទីតាំងដែលមានប្រព័ន្ធអេកូដ៏សម្បូរបែប និងចម្រុះរបស់សត្វស្លាប និងសត្វត្រី។

ទោះជាយ៉ាងណា គិតត្រឹមខែសីហា ឆ្នាំ២០២៣កន្លងទៅ រដ្ឋាភិបាលបានកាត់ដីបឹងចំនួន៧៩លើក ប្រគល់ឱ្យឯកជន និងក្រសួងនានា ដែលមានចំនួនជាង២ពាន់ (២,៤១១)ហិកតា នៃផ្ទៃបឹងសរុបជាង ៣ពាន់ (៣,២៣៩) ហិកតា។

ចាប់តាំងពីរដ្ឋាភិបាលចាប់ផ្ដើមកាត់ផ្ទៃបឹងតាមោកកាលពីឆ្នាំ២០១៨មក សហគមន៍បឹងតាមោកចាប់ផ្ដើមចេញតស៊ូមតិ ហើយត្រូវរង់ដោយអំពើហិង្សាជាបន្តបន្ទាប់នៅពេលពួកគេ សំដែងនៅនៅតាមដងផ្លូវ។

ប្រភពដដែលបន្តថាសាលាដំបូងរាជធានីភ្នំពេញបានចោទប្រកាន់អ្នកស្រី និងក្រុមគ្រួសារចំនួន៣ករណីក្រោមបទចោទពីបទហិង្សាដោយចេតនា និងប្រឆាំងនឹងអ្នករាជការសាធារណៈ និងបទចោទផ្សេងៗទៀត។អ្នកស្រីថាមូលហេតុដែលអ្នកស្រីចង់រស់នៅទីតាំងចាស់នេះគឺដោយសារតែជាប់នឹងផ្លូវធំដែលអាចឱ្យអ្នកស្រីលក់ដូរបាន ហើយអ្នកស្រីថាផ្ទះនេះគឺជាអនុស្សាវរីយ៍ អស់រយៈពេលប្រមាណ៣០ឆ្នាំមកហើយ។

បើតាមអ្នកស្រី ស៊ា ដាវី ក្នុងរយៈពេលប៉ុន្មានឆ្នាំចុងក្រោយនេះ រូបគេបានចូលរួមជាមួយសមាជិកសហគមន៍ផ្សេងទៀត ដើម្បីតស៊ូមតិដោយអហិង្សា ទាមទារសុំរស់នៅទីតាំងចាស់ដដែល។អ្នកស្រីបន្តថាចាប់តាំងពីអ្នកស្រីតស៊ូមតិកន្លងមក រូបគេរងនូវសំពាធផ្លូវចិត្ត និងរងអំពើហិង្សាពីសំណាក់អាជ្ញាធរថែមទៀតផង។

អ្នកស្រីថ្លែងថា៖ «សុខភាពមួយឆ្នាំចុងក្រោយនេះវេទនា និយាយតាំងពីគេលុបដីបឹង រើកន្លែងអាស្រ័យផល ហើយដល់ដីលំនៅឋានទៀត គេដាក់លិខិតឲ្យរុះរើ ផ្ទះអ្នកនេះ ផ្ទះអ្នកនោះ ដល់រុះរើទាំងសហគមន៍ទៀត កាន់តែធ្វើឲ្យគិតច្រើន យប់ខ្លះដេកអត់លក់ទេ ម៉ោងមួយយប់អីទៅអង្គុយឆុងកាហ្វេ អង្គុយម្នាក់ឯង មួយយប់ទល់ភ្លឺ ដើរចេញដើរចូល ស្ត្រេស វាងងុយប៉ុន្តែគេងអត់លក់ »។

គេសង្កេតឃើញថាប្រជាជននៅតំបន់បឹងតាមោកដែលបានទទួលយកគោលនយោបាយសំណងលើកដំបូងមានចំនួន ៣២ ខ្នងផ្ទះ ហើយកំឡុងឆ្នាំ២០២៣នៅសល់ ៧៦ខ្នងផ្ទះ ដែលមានទៅដល់ ១០០គ្រួសារបន្តទទួលយកគោលនយោបាយជាបន្តបន្ទាប់ ក្រោយពីមានសកម្មភាព ការគំរាមកំហែងនានា និងការលាបពណ៌ចោទប្រកាន់ប្រជាពលរដ្ឋនៅតំបន់បឹងតាមោកដែលព្យាយាមតវ៉ាទាំងនោះថាជាក្រុមគណបក្សប្រឆាំង។

ចំណែកតំណាងប្រជាពលរដ្ឋបឹងតាមោកដែលកំពុងភៀសខ្លួននៅប្រទេសថៃដើម្បីគេចចេញពីដីការបស់តុលាការ អ្នកស្រី ប្រាក់ សុភា ឱ្យដឹងថាប្ដីរបស់អ្នកស្រីសម្រេចទទួលយកសំណងកាលពីចុងខែ មិថុនា នឹងគេដែរ ដោយទទួលបាន ផ្ទះមួយល្វែង រួមទាំងថវិកាមួយម៉ឺនដុល្លារ គឺដោយសារ អាជ្ញាធរបានគ្រោងនឹងឈូសឆាយលើផ្ទះអ្នកស្រី និងពលរដ្ឋផ្សេងទៀតដើម្បីសាងសង់ស្ពាន។

បើតាមអ្នកស្រី ប្រាក់ សុភា សំណងដែលរដ្ឋាភិបាលផ្ដល់ឱ្យគឺមិនអាចបំពេញតម្រូវការចំពោះទីផ្សារ ដែលមានតម្លៃក្រោមធម្យបានទេ ប្រសិនបើគ្រួសារអ្នកស្រីចង់យកទៅប្រើប្រាស់សម្រាប់ការតាំងទីលំនៅថ្មី។អ្នកស្រីឱ្យដឹងថាសាលាដំបូងរាជធានីភ្នំពេញនៅមិនទាន់ទម្លាក់ការចោទប្រកាន់លើអ្នកស្រីចំនួន៣ករណីអំឡុងពេលដែលអ្នកស្រីចេញមុខដឹកនាំការតវ៉ាកន្លងមកនៅឡើយទេ ដូច្នេះអ្នកស្រីបន្តរស់នៅក្រៅប្រទេសដដែល។អ្នកស្រីពិតជាសោកស្ដាយដែលអាជ្ញាធរមិនអាចឱ្យ អ្នកស្រី និងពលរដ្ឋផ្សេងទៀតអាចរស់នៅជាប់បឹងតាមោកបាន។

អ្នកស្រីបន្តថា៖«បើក្មួយសួរអារម្មណ៍ ឲ្យប្រៀបបាន ប្រៀបអត់បានទេ ប៉ុន្តែយើងត្រូវតែបង្ខំចិត្ត យកដោយការឈឺចិត្តបំផុត [ទទួលសំណងពីរដ្ឋាភិបាល] ហើយបើយើងមិនទទួលយកទេ គឺយើងអត់មានជំរើស ពីព្រោះអីថ្នាក់ដឹកនាំគាត់អត់អើពើ គាត់អត់ខ្វល់ពីការឈឺចាប់របស់ពួកយើងអញ្ចឹង យើងអត់មានជម្រើសទេ »។

ប្រភពដដែលឱ្យដឹងថាបឹងតាមោកគឺមានអត្ថន័យសំខាន់សម្រាប់អ្នកស្រី និងពលរដ្ឋឯទៀតគឺដោយសារបឹងតាមោកដែលធ្លាប់ឱ្យពលរដ្ឋអាចនេសាទត្រី បេះផ្កាឈូក រកខ្ចៅ និងចញ្ចឹមត្រី សម្រាប់ផ្គត់ផ្គង់ជីវភាពប្រចាំថ្ងៃ បានផ្តល់ក្តីសុខសម្រាប់សហគមន៍ ដែលរស់នៅជុំវិញបឹងធម្មជាតិមួយនេះ។មួយវិញទៀតបឹងនេះក៏ជាកន្លែងរំដោះទឹកជំនន់នៅរាជធានីភ្នំពេញនៅពេលដែលមានភ្លៀងធ្លាក់ម្ដងៗដែរ។

អ្នកស្រីបន្តថា៖«ទីមួយវាលុបបំបាត់ធនធានធម្មជាតិដែលគួរឲ្យសោកស្ដាយបំផុត ទីពីរបើសិនជាបឹងនឹងនៅ ប្រជាពលរដ្ឋយើងច្រើនគ្រួសាររស់នៅដោយធូធារ ទីបីទៀតសោកស្ដាយការអភិវឌ្ឃមានសិទ្ធរស់នៅតែអស់លោកមន្ត្រី ឧកញ៉ា និងក្រុមហ៊ុន ចំណែកប្រជាពលរដ្ឋពួកយើង ត្រូវតែបង្ខំចិត្តចាកចេញ ដោយក្ដីឈឺចាប់ ដោយការសោកស្ដាយបំផុត ហើយយើងចង់ឲ្យបឹងតាមោកត្រឡប់វិញតែយើងអត់មានជំរើសអ្វី »។

មិនខុសគ្នាទេ តំណាងពលរដ្ឋម្នាក់ទៀត ដែលបង្ខំចិត្តទៅតាំងលំនៅថ្មី អ្នកស្រី សឿន ស្រីសុត ឱ្យដឹងថាមូលហេតុដែលគ្រួសារអ្នកស្រីព្រមទទួលយកសំណងគឺនៅពេលដែលប្ដីរបស់អ្នកស្រីបានជួបគ្រោះថ្នាក់ចរាចរណ៍ធ្ងន់ធ្ងរ ហើយគ្រួសារអ្នកស្រីមិនមានថវិកាទូទាត់ថ្លៃព្យាបាលជំងឺឱ្យប្តីរបស់អ្នកស្រី។

លើសពីនេះទៀត អាជ្ញាធរបានផ្ដល់សំណងផ្ទះ និងដីចំនួន២កន្លែង រួមទាំងថវិកាជាង១ម៉ឺនដុល្លារដែរ ប៉ុន្តែបច្ចុប្បន្នគ្រួសាររបស់ខ្លួន បានចំណាយលុយទាំងនោះអស់ដោយត្រូវឱ្យថ្លៃពេទ្យ និងជួសជុលផ្ទះបន្ថែមដើម្បីអាចរស់នៅបាន។

អ្នកស្រី សឿន ស្រីសុត ថ្លែងទៀតថាសំណងដែលទទួលបាននេះមិនអាចធ្វើឱ្យគ្រួសារអ្នកស្រីអាចប្រកបមុខរបររកត្រី និងបេះផ្កាឈូកដូចកន្លែងចាស់បាននោះឡើយ។ហើយបើគិតពីអនាគតកូនៗដែលកំពុងសិក្សាវិញ ក៏ជួបបញ្ហាដែរ ដោយសារតែទីតាំងថ្មីស្ថិតនៅផ្លូវលំដែលមិនអាចលក់ដូរបាន។

អ្នកស្រីបន្តថា ៖«មានតែលក់ដូរតិចតួចនៅផ្ទះបន្តទៀត ព្រោះដោយសារ បញ្ហាក្នុងគ្រួសារខ្ញុំប្ដីខ្ញុំ គាត់ជួបគ្រោះថ្នាក់ចររាចរណ៍អញ្ចឹង គាត់ប៉ះពាល់ក្បាលគាត់អត់អាចចេញទៅរកស៊ីក្រៅបានទេ អញ្ចឹងមានតែខ្ញុំនៅលក់ដូរតិចតួចនៅផ្ទះនឹងដើម្បីប្រកមុខបរបរចិញ្ចឹមជីវិត តទៅថ្ងៃមុខទៀត ដើម្បីដោះទាល់ការសិក្សារបស់កូនអញ្ចឹង ព្រោះបើខ្ញុំចេញរកក្រៅត្រូវចោលប្ដីគាត់អត់មានសតិ អត់មានស្មារតីអញ្ចឹងគឺអាចមានហានិភ័យ »។

ដោយឡែក អភិបាលរងសាលារាជធានីភ្នំពេញ លោក កើត ឆែ និងអភិបាលខណ្ឌព្រែកព្នៅ លោក ធឹម សំអាន បដិសេធក្នុងការអត្ថាធិប្បាយចំពោះបញ្ហានេះ មុននឹងផ្តាច់ទូរស័ព្ទចុះ។

រីឯប្រធានកម្មវិធីសិទ្ធិក្នុងទីក្រុង នៃអង្គការសមាគមធាងត្នោត លោក ស៊ាង មួយឡៃ ប្រាប់គេហទំព័រ Newsroom Cambodia នៅថ្ងៃនេះថាទាក់ទងនឹងទំហំនៃសំណងរបស់រដ្ឋាភិបាលចំពោះប្រជាពលរដ្ឋនៅទីនោះនៅមិនទាន់គ្រប់គ្រាន់ ឬស្មើនឹងទំហំនៃសំណងដែលពួកគាត់ត្រូវទទួលបាននោះទេ ព្រោះថាបើដំបន់នោះមានការអភិវឌ្ឍនៅនឹងកន្លែងប្រជាពលរដ្ឋនៅតំបន់នោះអាចមានជីវភាពប្រសើរជាងនេះ។

លោកបន្តថា៖«ហើយចំពោះសំណងយើងឃើញថា ប្រជាពលរដ្ឋភាគច្រើនហើយដែលគាត់បានព្រមទទួលសំណង ហើយដោះដូរទៅទីតាំងផ្សេង ប៉ុន្តែជាកាចាប់អារម្មណ៍របស់ខ្ញុំ ខ្ញុំគិតថាសំណងនោះវាមិនទាន់បានសមរម្យទៅតាមលក្ខខណ្ឌនៃការកាន់ដីធ្លី របស់គាត់នៅឡើយទេ »។

កាលពីឆ្នាំ២០២២ រដ្ឋាភិបាលបានសម្រេចកាត់ផ្ទៃដីនៃបឹងតាមោកជាង ៧ ហិកតារ(៧,០៥) ឱ្យទៅអគ្គិសនីកម្ពុជា (EDC) និងចំនួន៣ហិកតារទៀត ឱ្យទៅតារាចម្រៀង និងជាសមាជិកបក្សកាន់អំណាច លោក ព្រាប សុវត្ថិ។ក្រៅពីនេះ ផ្ទៃដីបឹងតាមោកទំហំសរុបជាង៦ហិកតារទៀត កាត់ទៅឱ្យលោក សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ នៃរក្រសួងមហាផ្ទៃ និង កាត់ដីបឹងតាមោកទំហំ៦៧ ហិកតារ ទៅឱ្យលោក នុត តុន ដែលគេស្គាល់ថាជានាយកក្រុមហ៊ុន អ័រគីដេ វីឡា (Orkide Villa)។តួលេខនេះ នៅមិនទាន់គិតដល់មន្រ្តីជាន់ខ្ពស់មួយចំនួនទៀត ដូចជាលោក ទៀ បាញ់ អតីតរដ្ឋមន្រ្តីក្រសួងការពារជាតិ ជាដើមនៅឡើយផង ដែលធ្លាប់ទទួលបានសិទ្ធិកាន់កាប់ដីនៅតំបន់បឹងតាមោកនេះដូចគ្នាដែរ៕

បទយកការណ៍៖ ផ្លូវខូចខាតខ្លាំងមួយខ្សែ ក្នុងសង្កាត់កន្ទោក ជាយរាជធានី បង្កការលំបាកដល់ប្រជាពលរដ្ឋ

មេង គ្រុយពន្លក (Meng Kroypunlok) — Mon, 16 Aug 2021 15:40:46 +0000

ប្រជាពលរដ្ឋមួយចំនួនរស់នៅតាមបណ្ដោយផ្លូវបេតុងមួយខ្សែ ត្អូញត្អែរថាពួកគេពិបាកក្នុងការធ្វើដំណើរទៅមក ដោយសារតែផ្លូវនេះមាន សភាពហុយនៅពេលគ្មានភ្លៀង និងដក់ទឹកនៅពេលមានភ្លៀងខ្លាំងម្ដងៗ។ ទន្ទឹមនឹងការត្អួញត្អែរ ពួកគេក៏ព្រួយបារម្ភអំពីសុវត្ថិភាពផងដែរ ដោយសារវាហុយពិបាកក្នុងការប្រកបរបរលក់ដូរចិញ្ចឹមជីវិត ផ្លូវនេះក៏មានគ្រលុកធំៗ និងមិនបង្កភាពងាយស្រួលដល់យានយន្តគ្រប់ប្រភេទ ជាពិសេសនៅពេលត្រូវការសេវាសុខភាពនិងសេវាសង្គ្រោះបន្ទាន់ជាដើម។

ផ្លូវបេតុង ស្ថិតក្នុងសង្កាត់កន្ទោក ខណ្ឌកំបូល ជាយរាជធានីភ្នំពេញ។ រូបភាព៖ មេង គ្រុយពន្លក

ផ្លូវបេតុងដែលមានសភាពខូចខាតខ្លាំងនេះមានប្រវែងប្រមាណជា ៤គីឡូម៉ែត្រ លាតសន្ធឹងឆ្លងកាត់ភូមិចំនួន ០៤គឺភូមិ កន្ទោកខាងត្បូង ភូមិកន្ទោកខាងជើង ភូមិត្រាំស្លឹក និងភូមិអង្គត្រកៀត ក្នុងសង្កាត់កន្ទោក ខណ្ឌកំបូល ជាយរាជធានីភ្នំពេញ។

ផ្លូវនេះភ្ជាប់ផ្លូវជាតិលេខ០៤ ទៅនឹងផ្លូវជាតិលេខ០៣ ហើយផ្លូវនេះបច្ចុប្បន្នមិនមែនមានតែប្រជាពលរដ្ឋមូលដ្ឋានធ្វើដំណើរទៅមកប៉ុណ្ណោះទេ ប៉ុន្តែផ្លូវនេះហាក់មមាញឹកណាស់ ដោយសារតែមានឡានដឹកទំនិញធំៗ ឡានកុងទីន័រ និងឡានដឹកកម្មកររោងចក្រឆ្លងកាត់ជាហូរហែរចាប់តាំងពីព្រឹកព្រលឹម រហូតដល់ម៉ោងជិត ១០យប់។

អង្គុយលើគ្រែខាងមុខផ្ទះជួលតូចមួយ ដៃទាំងពីរតាមចាប់ចៅដែលកំពុងវារលេងនៅលើគ្រែ សម្បុរស្រអែមនិយាយមួយៗ មានស្រុកកំណើតនៅខេត្តស្វាយរៀង លោកស្រីពេជ ប៊ន បានឲ្យដឹងថា ប្រជាពលរដ្ឋនិងអ្នកដំណើរតែងតែរអ៊ូរទាំរឿងផ្លូវហុយ គ្រលុកធំៗរួមជាមួយនឹងការបើកជែងពីសំណាក់ឡានធំ ឡានកុងទីន័រ ជាមួយនឹងម៉ូតូ រ៉ឺម៉កដែលស្ថិតនៅលើផ្លូវជាមួយគ្នា។

លោកស្រីបានឲ្យដឹងយ៉ាងដូច្នេះថា៖ «មានប្រជាពលរដ្ឋគេរអ៊ូររឿងដីហ៊ុយ ប្រជាជនរអ៊ូរហូត ម្សិលមិញអ៊ីលក់សាច់ជ្រូកដួលត្រឡប់ត្រឡិន ដួលឡើងប្រលាក់សាច់ជ្រូកអស់ ឡានធំហើយគាត់ជែងទៀតមកដល់ជិះអែបអត់ទាន់»។

ស្ត្រីចំណាស់វ័យប្រហែលជា ៦០ឆ្នាំរូបនេះបានឲ្យដឹងទៀតថា លោកស្រីមកភ្នំពេញនេះគឺមកតាមនៅជាមួយកូន និងជួយមើលចៅតូចៗជំនួសម្ដាយរបស់ពួកគេ ដែលជាកម្មកររោងចក្រ ។ រៀបរាប់បណ្ដើរឆ្លៀតប្រលែងនឹងចៅបណ្ដើរ លោកស្រីពេជ ប៊នថា ក៏ចង់ប្រកបមុខរបរលក់នំបញ្ចុកនៅមុខផ្ទះនេះដែរ តែដោយសារផ្លូវមានសភាពហុយហើយមានឡានធំៗផងនោះ លោកស្រីក៏ផ្អាកគម្រោងនេះវិញ ហើយសំណូមពរឲ្យអាជ្ញាធរពាក់ព័ន្ធជួយពន្លឿនក្នុងការជួសជុលផ្លូវនេះឲ្យបានឆាប់រហ័ស។

លោកស្រីថា៖ «ខ្ញុំមកពីខេត្តស្វាយរៀង មកតាមកូន គាត់ធ្វើរោងចក្រ ប្ដីគាត់ទៅបើកឡាននៅខេត្តក្រចេះ ទៅយូរដែរហើយ បើកុំហ៊ុយចៅធំតិចដាក់លក់នំបញ្ចុកដែរ លើកនំគេមកលក់។ ចង់សំណូមពរឱ្យធ្វើផ្លូវថ្នល់ ឱ្យជិះស្រួលចឹងហាសអូន ពេលភ្លៀងមកលិចទៀត»។

ប្រជាពលរដ្ឋមួយរូបទៀតដែលជាអ្នកលក់ដូរជាប់នឹងផ្លូវបេតុងមួយនេះគឺលោកស្រីមុំ បានឲ្យដឹងថា ផ្លូវនៅខាងមុខផ្ទះលោកស្រីនេះ រងការខូចខាតយូរណាស់មកហើយ ដោយមិនមានឃើញអាជ្ញាធរណាមកឈឺឆ្អាល ឬធ្វើការជួសជុលអ្វីនោះទេ ហើយប្រធានភូមិក៏ដឹងពីបញ្ហានេះដែរ ហើយនៅខែធ្លាក់ភ្លៀងវិញផ្លូវនេះមានសភាពលិចទឹកបង្កការលំបាកក្នុងការធ្វើដំណើទៅមកយ៉ាងខ្លាំង។

លោកស្រីបានបន្តថា ពេលខ្លះមានឡាន និងរ៉ឺម៉កធីងធោងរកកល់នឹងក្រឡាប់ ឬពេលខ្លះក្រឡាប់តែម្ដង។

លោកស្រីថា៖ «ផ្លូវហ្នឹងខូចខាតយូហើយអត់មានអាជ្ញាធរជួសជុលផង។ ឥឡូវអត់មានទឹកលិច អត់អីទេ បើខែទឹកលេចវិញ ឡើងលេចពេញហ្នឹងចឹង។ ប្រព័ន្ធទឹកវាអត់ទៅមុខ រ៉ឺម៉កក្រឡាប់ច្រើន នៅហ្នឹងបើមានអីថតៗ ចាំតើមើលទៅ ក្រឡាប់ភីងៗ សូម្បី ល្ងាចតិចរ៉ឺម៉កអ៊ីលក់ត្រីហ្នឹង លើកសឹងពីរថ្ងៃ»។

មានមុខរបរជាអ្នកលក់សាច់គោអាំង ស្រ្តីវ័យ ៣៥ឆ្នាំរូបនេះបានបន្តទៀតថា លោកស្រីចង់បានផ្លូវល្អដើម្បីងាយស្រួលក្នុងការធ្វើដំណើរ និងប្រកបរបរចិញ្ចឹមជីវិត ហើយបើប្រធានភូមិដើររៃលុយដើម្បីជួសជុល ក៏លោកស្រីសុខចិត្តចូលរួមជួយដែរ។ លោកស្រីបានបន្តថា លោកស្រីនិងប្រជាពលរដ្ឋ ៣គ្រួសារផ្សេងទៀតមានបំណងសហការគ្នាទិញអាចម៏ដីមកចាក់បំពេញបរិវេណផ្លូវមុខផ្ទះដែរ តែទាល់តែសួរនាំមេភូមិសិន ហើយទទួលភ្លើងខៀវពីមេភូមិទើបហ៊ានធ្វើ។

លោកស្រីបាននិយាយថា៖ «បើជួលគេចាក់មួយឡាន៥០ដុល្លារ ហើយមានលទ្ធភាពចាក់តែកន្លែងហ្នឹងទេ (មុខផ្ទះ) ហើយតាមដំណើរចឹងសិនទៅ តែអត់មានលទ្ធភាពចាក់ទាំងអស់ទេ ចង់ចាក់៣នាក់ហ្នឹង តែមុនទៅចាក់ទាល់តែទៅសួរប្រធានភូមិសិន»។

បន្ទាប់ពីឆ្លងផ្លូវក្រហូង ពោរពេញទៅដោយទឹកដក់ ពេលខ្លះសុំឱ្យគេជួយរុញម្ដងៗ អ្នកបើករឺម៉កដឹកធូបម្នាក់ លោកវាសនា លីន បានលើកឡើងថាផ្លូវហ្នឹងពិបាកក្នុងការធ្វើដំណើរ។

លោកបានមានសំណូមពរថា «យូរៗជិះកាត់ម្ដង់ដែរ អត់ចង់ហ៊ានមកដែរឃើញផ្លូវពិបាក ផ្លូវកែងហ្នឹងពិបាកខ្លាំងដែរ ខ្ញុំចង់ឱ្យជួសជុលផ្លូវក្នុងការធ្វើដំណើរបានស្រួល ក៏វាល្អម្យ៉ាងដែរ បើពិបាកចឹងអាចជាបញ្ហាគេចគ្នា»។

ប្រធានសមាគមគណនេយ្យសង្គមកម្ពុជា លោកសន ជ័យបានប្រាប់ Newsroom Cambodia ថាការសាងសងផ្លូវនៅប្រទេសកម្ពុជាមានសភាពយឺតយ៉ាវ មិនសូវគិតដល់សុខភាពប្រជាពលរដ្ឋ ហើយបញ្ហាផ្លូវនេះដែរនឹងបន្ថែមផលវិបាកលើសុខភាពប្រជាពលរដ្ឋអំឡុងពេលវិបត្តិជំងឺកូវិដដែលមានស្រាប់។

លោកបានលើកឡើងថា៖ «ហើយខ្ញុំយល់ថាបញ្ហានេះគួរតែមានការដោះស្រាយរួចរាល់យូរណាស់មកហើយ អ៊ីចឹងរឿងដែលសំខាន់ដែលសំខាន់គឺការដាក់បញ្ចូលនៅការ ការពារសុខភាពប្រជាពលរដ្ឋ»។

«នៅក្នុងគម្រោងហេដ្ឋារចនាសម្ព័ន្ធទាំងឡាយគួរតែត្រូវបានពិចារណាជាពិសេស បាទយើងដឹងហើយបើនៅក្នុងវិបត្តនេះប្រសិនបើប្រជាពលរដ្ឋរស់នៅប្រឈមជាមួយបញ្ហាកូវីដផង ហើយប្រឈមហ្នឹងសុខមាលភាពផង ថាតើការហ៊ុយធូលីធ្ងន់ធ្ងរបែបនេះ វាអាចហ្នឹងធ្វើឱ្យសុខមាលភាពកាន់តែរងគ្រោះ»។

លោកបន្តថារដ្ឋាភិបាលគួរតែដោះស្រាយបណ្ដោះអាសន្នលើបញ្ហា ដើម្បីកុំប៉ះពាល់ដល់សុខភាពប្រជាពលរដ្ឋធ្ងន់ធ្ងរ។

លោកបានលើកឡើងថា «ទោះបីជាយ៉ាងណាក៏ដោយ កាលណាបើផ្លូវហ្នឹងវាមានបញ្ហានៅកណ្ដាលទីបែបនេះ អាជ្ញាធរគួរតែរកមធ្យោបាយថ្មីថែមទៀតដើម្បីផ្លូវហ្នឹងហ៊ុយ ឬក៏រំខានដល់ការរស់នៅរបស់ប្រជាពលរដ្ឋ បើវាមិនអាចទៅមុខរួចគេត្រូវរកមធ្យោបាយដោះស្រាយអន្តរកាលហ្នឹងមិនមែនទុកឱ្យហ៊ុយតាមតែយថាកម្មអ៊ីចឹងទេ»។

មេភូមិកន្ទោកជើង លោកលឹម តូច បានប្រាប់ Newsroom Cambodia ថាផ្លូវបាទសាងសងរយៈពេល ៦ឆ្នាំ និងមានសភាពខូចខាតធ្ងន់ធ្ងរ ពិសេសមានឡានធំច្រើនឆ្លងកាត់។ លោកបន្តទៀតថា គម្រោងជួសជុលផ្លូវមានរួចមកហើយតែដោយសារតែវិបត្តិជំងឺកូវីដទើបមានការផ្អាកមួយរយៈ។

លោកលើកឡើងថា៖ «គម្រោងពីភូមិតាកៀបមក គម្រោងមានហើយមកដល់ភូមិអង្គ ប៉ុន្តែគម្រោងពង្រីកផ្លូវអស់ហើយប៉ុន្តែកូវីដមកអាក់ខានមកវិញ មិនមែនរដ្ឋាភិបាលអត់ធ្វើទេ គម្រោងមានតែកូវីដនែក វាអត់មានថវិកា»។

អភិបាលខ័ណ្ឌកំបូល លោកឃឹម ស៊ុនសូដា បានប្រាប់ Newsroom Cambodia ថាអាជ្ញាធរកំពុងតែជួសជុលផ្លូវនេះផងដែរ៕

បទយកការណ៍៖ ជីវភាពអ្នកនេសាទតាមបណ្តោយទន្លេមេគង្គកាន់តែយ៉ាប់យឺន ខណៈទិន្នផលត្រីស្រុតចុះខ្លាំង

មេង គ្រុយពន្លក (Meng Kroypunlok) — Sat, 14 Aug 2021 16:00:18 +0000

ប្តីប្រពន្ធនេសាទមួយគូ មានញើសពេញផ្ទៃមុខ ដៃកំពុងប្រញាប់វេញមងស្របជើងកំពុងកន្រ្តាក់ទាញខ្សែមងដែលជាទង្វើរនៃការរំដោះមងដែលជំពាក់គ្នាបន្ទាប់ពីនេសាទត្រីរួច។ ការប្រមូលផលត្រីឆ្នាំនេះមិនសូវល្អទេសម្រាប់ពួកគាត់ដោយសារតែទឹកទន្លេរាក់ជាងមុន ប្រែប្រួលអាកាសធាតុ និងច្រាំងទន្លេបានបាក់ជាដើម។

អ្នកស្រីណាត់ ត្រីឌីយ៉ាស ៤០ឆ្នាំ និងលោកឌិន ស្គាលលេះ អាយុ៤២ បាននិយាយថាទិន្នផលត្រីចាប់ផ្ដើមថយចុះពីមួយឆ្នាំទៅមួយឆ្នាំ ដោយកាលពីប្រមាណជិតដប់ឆ្នាំមុន អាចរកបានក្នុងមួយថ្ងៃខ្ទង់ ១០០គីឡូ ប៉ុន្តែឥឡូវអាចរកត្រីបានសឹងតែមិនបាន ១០គីឡូផង។

អ្នកស្រីណាត់ ត្រីឌីយ៉ាស និងលោកឌិន ស្គាលលេះ កំពុងវេញខ្សែរមងលើទូកនៅត្រើយម្ខាង នៅថ្ងៃទី៣០ ខែកក្កដា ឆ្នាំ២០២១។ រូបភាព៖ ឆន រស្មី

លោកស្គាលលេះ បាននិយាយមួយៗភ្ជាប់ជាមួយទឹកមុខស្រងូតស្រងាត់ថា៖ «ឥឡូវតាំងពីខែទឹកឡើងមកនេសាទមួយថ្ងៃមិនដល់១០ម៉ឺនផងហ្នឹង កាលពីមុនរកបាន១០០គីឡូយ៉ាងតិច តែតម្លៃវាក៏ថោកដែរខ្ទង់១០០០ ហើយថ្លៃអស់ហើយ៣០០០ហ្នឹង»។

គ្រួសារនេសាទមួយនេះគឺស្ថិតក្នុងចំណោមអ្នកនេសាទជាច្រើនផ្សេងទៀតដែលត្រូវបានសម្ភាសនាពេលថ្មីៗនេះថា ពួកគាត់បានជួបការលំបាកក្នុងការនេសាទ ហើយអ្នកផ្សេងទៀតក៏បានពិចារណាថាឈប់ធ្វើនេសាទផងដែរដើម្បីរកការងារសំណង់ និងលក់បន្លែ។

ព្រះអាទិត្យរៀបនឹងអស្ដង្គតចាំងលើផ្ទៃទឹកទន្លេបញ្ចេញនូវពន្លឺព្រិចៗ ពណ៌លឿងឆ្អិនឆ្អៅ គួរជាទីគយគន់ មនុស្សម្នានាំគ្នាមកធ្វើលំហាត់ប្រាណ លំហែអារម្មណ៍ គយគន់ទិដ្ឋភាពស្រស់ត្រកាលតាមបណ្តោយសួនច្បារទល់មុខអគារខ្ពស់ស្កឹមស្កៃពណ៌ពងមាន់កំពុងឈរបង្អួតខ្លួននៅខាងត្រើយម្ខាង។

មនុស្សជាច្រើនស្គាល់កន្លែងនេះថាជាសណ្ឋាគារសុខា ដែលជាលំដាប់ផ្កាយប្រាំ ព័ទ្ធទៅដោយមនុស្សម្នាជាច្រើន ខ្លះកំពុងធាក់កង់ ខ្លះកំពុងហាត់ប្រាណ ដោយដើរដាក់កាសស្តាប់តន្រ្តីបណ្តើរ ភ្នែកសំឡឹងមើលទេសភាពតាមបណ្តោយទន្លេមេគង្គ ខណៈទូកនេសាទតូចៗជាង ១០ ចតប្របនឹងច្រាំងទន្លេ។

អ្នកខ្លះកំពុងជជែកគ្នាលេងក្នុងទូក ខ្លះកាន់មង ទាំងដែលទូកកំពុងយោលយោគចុះឡើងតាមកម្លាំងនៃរលកទឹកដោយខ្យល់បក់ខ្លាំងៗ។ ពួកគាត់ហាក់មិនពុលនឹងរលកនោះទាល់តែសោះ។

លោកស្គាលលេះបានលើកឡើងថាមូលហេតុចំបងដែលធ្វើឱ្យផលត្រីធ្លាក់ចុះនេះមានដូចជា ផ្ទៃទឹកទន្លេរាក់ និងមានការបាក់ចាំងទន្លេជាដើម។

លោកបានបញ្ជាក់ថា៖ «តាមខ្ញុំសង្កេតមើលទឹកហ្នឹងរាក់ កាលណាតែទឹកនេសាទរាក់ត្រីចុះអត់ទៅដល់ទន្លេសាប អ៊ីចឹងវារស់នៅតាមៗហ្នឹងចឹងគេនេសាទអស់ហើយ ទឹករាក់មែនទែនអាចឈរដល់»។

ស្រដៀងគ្នានេះដែរ លោកងួត វុធ្ធី មានអាយុ៣០ឆ្នាំ ដែលជាអ្នកនេសាទតាំងពីតូចដោយរៀនចេះពីឪពុក បានប្រាប់ Newsroom Cambodia ថាប៉ុន្មានឆ្នាំមកនេះទិន្នផលត្រីមានការធ្លាក់ចុះហើយ ក្នុងស្ថានភាពមិនប្រាដកប្រជាបែបនេះលោកជ្រើសរើសការស៊ីឈ្នួលឱ្យគេដើម្បីដោះស្រាយជីវភាព។

លោកងួត វុធ្ធី ជាអ្នកនេសាទជនជាតិខ្មែរនៅកោះអរិក្សត្រ កំពុងយោងអង្រឹងកូនស្រីនៅក្រោមផ្ទះ ថ្ងៃទី៣០ កក្កដា ឆ្នាំ២០២១។ រូបភាព៖ មាស មល្លិកា

លោកបាននិយាយបណ្ដើរ យោលអង្រឹងកូនបណ្ដើរថា «មួយរយៈហ្នឹងអត់សូវមានត្រីមានតិចតួច បានតែមួយហូបៗចឹងវាអត់សូវបានច្រើន មួយថ្ងៃពីរ បីគីឡូប៉ុន្នឹង អត់ដែលបានច្រើនដូចមុន ប៉ុន្មានឆ្នាំមុនត្រីច្រើនកាលមុនរាយមង ១០ ទៅ ១៥ម៉ឺន ឥឡូវហ្នឹងរកតែមួយខែ ពីរខែ ដើរបាញ់ថ្នាំស្វាយគេ កាត់ស្មៅឱ្យគេ យើងរកបានមួយឆាវៗតិចតួច មិនមែនរកបាន រកបានរហូត»។

លោកដដែល ដែលជាអ្នកស្ថិតនៅឃុំស្វាយជ្រំ ស្រុកខ្សាច់កណ្ដាល ខេត្តកណ្ដាល លើកឡើងថាមូលហេតុដែលទិន្នផលត្រីថយចុះបែបនេះមកពីមូលហេតុមួយចំនួនដូចជា មានកប៉ាល់ឆ្លងកាត់ច្រើនដែលធ្វើឱ្យរហែកមង និងមានកំណាត់ឈើ សម្រាមនៅពេញទន្លេ។

អ្នកស្រីរស់ ម៉ាស់ ដែលជាជនជាតិឥស្លាម ហើយក៏អ្នកនេសាទត្រីដែលស្ថិតនៅផ្សារច្រាំងចម្រេះ ខណ្ឌឬស្សីកែវ បានប្រាប់ Newsroom Cambodia ថាអ្នកស្រីរស់នៅជាមួយមុខរបរនេសាទត្រីនេះតាំងពីអ្នកស្រីធំដឹងក្ដីមកម្លេះ។

អ្នកស្រីបានបញ្ជាក់ថា មួយឆ្នាំចុងក្រោយនេះកាន់តែមានភាពលំបាកជាខ្លាំងក្នុងការនេសាទ ដោយសារតែខ្សត់ត្រីធ្លាប់តែរដូវនេះមានទូកនេសាទចេញច្រើនបែរមកឆ្នាំនេះគ្មានអ្នកណាចេញនេសាទទៀតនោះទេ ហើយការខ្សត់ត្រីនេះប្រហែលមកពីការប្រែប្រួលអាកាសធាតុ។

អ្នកស្រី រស់ ម៉ាស់ ដែលជាអ្នកនេសាទជនជាតិឥស្លាមនៅផ្សារច្រាំងចម្រេះ ខណ្ឌឬស្សីកែវ ថ្ងៃទី៣១ កក្កដា ឆ្នាំ២០២១។ រូបភាព៖ ឆន រស្មី

អ្នកស្រីបានបន្តថា៖ «សម្រាប់តែឆ្នាំនេះទេដែលពិបាករកត្រីកូនចេញទៅរករាល់ថ្ងៃរកមួយថ្ងៃពេញពេលមកវិញរកត្រីបានត្រឹម៤-៥ត្រីតែប៉ុណ្ណោះស្ទើតែរកមួយសម្លមិនបានផង តែបើប្រៀបធៀបទៅ៥-៦ឆ្នាំមុនខុសគ្នាឆ្ងាយណាស់ពីមុនសម្បូរហើយរកបានសម្រាប់លក់ដូរទៀតផង ភ្ញៀវវិញមកយកដល់ៗកន្លែងម៉ង់»។

អ្នកស្រីវ័យ៥៨ឆ្នាំរូបនេះបានបន្ថែមថា ក្រៅពីរកក្នុងភូមិសាស្ត្ររបស់អ្នកស្រីមិនបានអ្នកស្រីក៏ហ៊ានទៅនេសាទកន្លែងណាផ្សេងទៀតគ្រប់ជនជាតិចាមដែលរស់នៅទីនោះបានត្រឹមរាយមងក្នុងបរិវេណនេះដោយសារតែមិនស្គាល់ពីទីតាំងកន្លែងផ្សេងច្បាស់ហើយបានត្រឹមតែធ្វើការនេសាទជុំវិញដែលខ្លួនឯងកំពុងរស់នៅ។

អ្នកស្រីបានលើកឡើងថា៖ «បើនៅតែពិបាកនេសាទដូចសព្វថ្ងៃនេះ ខ្ញុំប្រហែលឈប់នេសាទហើយដើរធ្វើការសំណង់ ឬបះបន្លែបន្តិចបន្ទួចលក់វិញដើម្បីដោះស្រាយបញ្ហាក្នុងការរស់នៅ»។

អ្នកស្រីញែម ផល្លី អាយុ៣៨ឆ្នាំ ជាអ្នកនេសាទនៅ ភូមិផ្សារព្រែកក្ដាម ឃុំកោះចិន ស្រុកពញ្ញាឮ ខេត្តកណ្តាល បានប្រាប់ Newsroom Cambodia ពីមូលហេតុការនេសាទត្រីក្នុងឆ្នាំនេះថាមិនបានគឺដោយសារខ្យល់ខ្លាំង និងទឹកឡើងជាលំដាប់។

អ្នកស្រីបានបន្យល់ថា បញ្ហាទឹកឡើងខ្យល់ចាប់ផ្ដើមបក់ខ្លាំង ចក កំប្លោក អណ្តែត ធ្វើឲ្យមានការលំបាកក្នុងការនេសាទ ពិសេសសម្រាប់រាយមង ទោះខែនេះជាខែដែលគេបិទនេសាទក្ដី តែបិទសម្រាប់តែត្រីតូចៗប៉ុណ្ណោះ សម្រាប់ត្រីធំគេបន្តនេសាទតាមធម្មតា ហើយវាក៏អាចប៉ាន់ស្មានបានថាបរិមាណត្រីឆ្នាំនេះឡើងឬក៏ចុះ។

អ្នកស្រី ញែម ផល្លី ជាអ្នកប្រកបរបបនេសាទស្ថិតនៅជិតស្ពានព្រែកក្តាម ខេត្តកណ្តាល កំពុងផ្តល់បទសម្ភាសន៍ជាមួយក្រុមការងារNewsroom Cambodia ថ្ងៃទី៣១ កក្កដា ២០២១។ រូបភាព៖ ធឹម សុភក្រ

អ្នកស្រីបានបន្តថា «ឆ្នាំនេះរកមួយថ្ងៃបានត្រីត្រឹមតែ ២គីឡូហ្នឹងអស់ បើប្រៀបធៀបទៅឆ្នាំមុនៗមួយថ្ងៃ រកបានប្រហែល១ ០គីឡូ បញ្ហារកត្រីមិនបានមិនមកពីខ្សត់ត្រីខ្លាំងពេកនោះទេតែបញ្ហាធំរបស់ ខ្ញុំមកពីខ្យល់ខ្លាំងធ្វើឲ្យចេញទូកទៅនេសាទពុំបាន ក្នុងឆ្នាំមុនកាលដែលសម្បូរត្រីក្នុងមួយថ្ងៃអាចរកប្រាក់ចំណូលបានជិត ២០ម៉ឺន តែសម្រាប់ឆ្នាំនេះគឺចប់ហ្មង រកតែ ៥ម៉ឺនក្នុងមួយថ្ងៃ មិនបានផង»។

ជាស្រ្តីដែលមានកូន ៦នាក់នៅក្នុងបន្ទុកបានបន្ថែមថា «ដំណោះស្រាយក្នុងការរកប្រាក់ចំណូលផ្គត់ផ្គង់គ្រួសារពឹងផ្អែកលើការនេសាទនេះតែឥឡូវកាន់តែពិបាក ខ្ញុំនិងសម្រេចឱ្យកូនៗច្បង ២នាក់ ទៅដើរធ្វើការនៅខាងក្រៅដើម្បីដោះទាល់»។

លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា អ្នកនេសាទមានការកើនឡើងរួមជាមួយវិធីសាស្រ្តនៃការចាប់ត្រីមានបច្ចេកទេសខ្ពស់ និងបទល្មើសច្រើន។

លោកបានបន្ថែមថា ការប្រែប្រួលបរិយាកាស របបទឹកជំនន់ និងការប្រែប្រួលនៃការប្រើប្រាស់ដី និងលំនៅដ្ធាននិងកក្ដាមួយចំនួនទៀត។

លោកបានបញ្ជាក់ថា៖ «តម្រូវការត្រីមានការកើនឡើងដោយសារកំណើនប្រជាជន សុខសន្តិភាព និងកំណើនសេដ្ធកិច្ចល្អក្នុងរយះពេលជាង២០កន្លងទៅ»។

លោកឱម សាវ៉ាត នាយកប្រតិបត្តិសម្ព័ន្ធដើម្បីអភិរក្សធនធានជលផល បានបញ្ជាក់ប្រាប់ Newsroom Cambodia ថាការនេសាទដែលប្រើប្រាស់ឧបករណ៍ខុសច្បាប់ ធ្វើឱ្យស្ទះផ្លូវរបស់ប្រភេទត្រីមួយចំនួនទៅពងបាន គម្រោងអភិវឌ្ឍន៍នានារួមមាន ការបូមខ្សាច់ គម្រោងទំនប់វារីអគ្គិសនី។

បូករួមទាំង ភាពមិនប្រក្រតីនៃលំហូរទឹក ដោយនៅរដូវប្រាំងបែរជាមានទឹកច្រើន ផ្ទុយមកវិញនៅរដូវវស្សាបែរជាមានកម្រិតទឹកតិចទៅវិញ ដោយសារការប្រើប្រាស់ទំបន់វារីអគ្គិសនីដែលត្រូវការទម្លាក់ទឹកនារដូវប្រាំង ទាំងនេះសុទ្ធសឹងជាដើមចមនៃការខ្សត់ត្រីធម្មជាតិ។ នេះយោងតាមការអះអាងរបស់លោកលោកឱម សាវ៉ាត។

លោកឱម សាវ៉ាត បាននិយាយថា «កាលណាមានទំនប់ច្រើន គឺស្ទាក់ទឹក កាលណាស្ទាក់ទឹកវាធ្វើឱ្យបម្រែបម្រួលកម្ពស់ទឹក។ ធម្មតានៅក្នុងខែកក្កដា ឬ ខែសីហា កញ្ញា គឺជាពេលវេលាដែលរលាយទឹកកកនៅភ្នំទីប៉េ ហូរធ្លាក់មកតំបន់ទំនាបទន្លេមេគ្គងខាងក្រោម បឹងទន្លេសាបយើង»។

ពីដើមឡើយអត់មានទំបន់វារីអគ្គិសនីច្រើនទេ ប៉ុន្តែឥឡូវនេះវាមានច្រើន។ អញ្ចឹងហើយមានការប្រែប្រួលហើយកម្ពស់ទឹក […] ខ្មែរយើង យើងធ្វើ(ទំបន់វារីអគ្គិសនី) តែ១ ទេ ប៉ុន្តែវៀតណាមធ្វើដល់ទៅ៦ »។ នេះយោងតាមលោកឱម សាវ៉ាត ។

អ្នកជំនាញរូបនេះបានយល់ឃើញថា ការធ្លាក់ចុះទិន្នផលត្រីនារដូវកាលនេះថា ក៏ដោយសារជារដូវបិទនេសាទផងដែរ ពីព្រោះរដ្ឋាភិបាលអនុញ្ញាតឱ្យនេសាទដោយប្រើមង មានសំណាញ់ត្រឹម ២ ទៅ ៣សង់ទីម៉ែត្រ រហូតដល់ថ្ងៃ១ ខែតុលា ទើបមានការបើកឱ្យមានការនេសាទជាធម្មតាវិញ។

លោកឱម សាវ៉ាត បាននិយាយថាមានកំណើនបទល្មើសនេសាទ ហើយវាចេះតែបន្តកើតមានឡើងដែលសកម្មភាពទាំងអស់នោះរួមមាន ការប្រើសំណាញ់ចាប់ត្រីលើសពី ៥០ម៉ែត្រ ការប្រើប្រាស់សន្ទូចលើសពី ១ផ្លែឡើង ដែលលើសពីចំនួនកំណត់ ព្រមទាំងការប្រើប្រាស់ឧបករណ៍ឆក់ត្រីបែបក្ តៅនិងត្រជាក់មានការកើនឡើង។

លោកម៉ៅ ហាក់ អគ្គនាយករងទទួលបន្ទុកកិច្ចការបច្ចេកទេសនិងជាប្រធាននាយកដ្ឋានជលសាស្រ្តក្រសួងធនធានទឹកបានបញ្ជាក់ថាយោងតាមព្រឹត្តិបត្រព្យាករណ៍ ទឹកនឹងស្រក ស្រកមែន ប៉ុន្តែមិនមែនមានន័យថាទាបនោះទេ ហើយបានបន្តថាទឹកទន្លេ បើធៀបនឹងឆ្នាំមុន វាខ្ពស់ជាង។

លោកបានបន្តថា ស្ថានភាពកម្ពស់ទឹកមិនអាចគ្រប់គ្រងបានទេ ពីព្រោះអាស្រ័យទៅនឹងរបាយណ៍ទឹកភ្លៀង។ «កម្ពស់ទឹកនេះវាឡើងវាចុះអញ្ចឹងហើយ តិចវាឡើងវិញហើយ។ កាលណាមានភ្លៀងនៅអាងទន្លេមេគង្គ ទឹកវាឡើងហើយ»៕

Q & A អំពីស្ថានភាពព្រៃឈើនៅប្រទេសកម្ពុជា

មេង គ្រុយពន្លក (Meng Kroypunlok) — Fri, 30 Jul 2021 14:29:24 +0000

តាមរយៈអង្គការទិន្នន័យនៅអំពីការអភិវឌ្ឍ ព្រៃឈើនៅប្រទេសកម្ពុជាមានការថយចុះគួរឱ្យកត់សម្គាល់ ទៅលើគម្របព្រៃឈើសរុប និងគម្របព្រៃស្ដុក ក្នុងកំឡុងប៉ុន្មានឆ្នាំចុងក្រោយនេះ។ មន្រ្តីនៃបណ្ដាញផ្សព្វផ្សាយ នៃអង្គការបណ្ដាញយុវជនកម្ពុជា (CYN) លោកម៉ា ចិត្រា បានផ្ដល់បទសម្ភាសន៍ជាសំណួរ ចំលើយដល់សិក្ខាកាម Newsroom Cambodia លោក មេង គ្រុយពន្លក អំពីស្ថានភាពព្រៃឈើនៅកម្ពុជា។

លោកម៉ា ចិត្រា

Q: តើអ្វីទៅជាបទល្មើសព្រៃឈើ?

A: បើជាទូទៅ បើដឹកចេញពីព្រៃការពារគឺខ្ញុំចាត់ទុកជាបទល្មើស ការដឹកចេញបើមិនមានការអនុញ្ញាតត្រឹមត្រូវ មិនមានលិខិតត្រឹមត្រូវ ព្រោះអីខ្ញុំគិតថាទោះបីជានៅក្នុងតំបន់ព្រៃការពារ ក៏ពិតមែន ប៉ុន្តែអ្នកមូលដ្ឋានគាត់អាចមានសិទ្ធិក្នុងការស្នើសុំទៅអាជ្ញាធរពាក់ព័ន្ធ សាងសង់ជាផ្ទះមិនមែនជាបទល្មើសទេ មានន័យថាគាត់អាចស្នើសុំជាផ្ទះសម្រាប់រស់នៅ ប៉ុន្តែអ្វីដែលខ្ញុំចាត់ទុកថាជាបទល្មើសនោះ គឺការលួចកាប់ឈើហើយដឹកឈើចេញពីក្នុងព្រៃយកទៅលក់បន្ត នេះបទល្មើសព្រៃឈើ។

Q: តើប្រភេទព្រៃណាខ្លះដែលអាចទាញយកអនុផលពីព្រៃឈើបានដោយមិនខុសច្បាប់?

A: បាទ ពាក់ព័ន្ធនឹងប្រភេទការប្រមូលផលអនុផលព្រៃឈើដែលមិនខុសច្បាប់ហ្នឹង វាមានដូចជាការដងជ័រទឹក យើងដុតគល់វាយកជ័រទឹកមានដូចជាឈើទាលអីជាដើម ហ្នឹងវាជាការដកហូតការប្រមូលផលដែលមិនខុសច្បាប់ ហើយទន្ទឹមហ្នឹងមានផ្សេងៗទៀត មានដូចជាការទៅរកវល្លិ ផ្ដៅ ទៅបេះគុយ យកមកលក់អីដើមហ្នឹង វាមិនមែនជាការប្រមូលផលដែលខុសច្បាប់ទេ។

Q: តើលោកយល់យ៉ាងណាដែរចំពោះ ស្ថានភាពព្រៃឈើនៅប្រទេសកម្ពុជា?

A: សម្រាប់ខ្ញុំយល់ឃើញថាអំពីព្រៃឈើនៅកម្ពុជា ខ្ញុំគិតថាវិនាសសកម្មហ្នឹងវានៅតែមានជាបន្តបន្ទាប់ ហើយវាជាជំងឺដែលពិបាកព្យាបាលណាស់ប្រសិនជាថ្នាក់ដឹកនាំរដ្ឋ ឬអ្នកដឹកនាំស្ថាប័នក្រសួងដែលធ្វើការពាក់ព័ន្ធហ្នឹងដែលមិនប្ដេជ្ញាចិត្តក្នុងការទប់ស្កាត់ទេ ខ្ញុំមិនរំពឹងថាព្រៃឈើដែលនៅក្នុងតំបន់ការពារហ្នឹងនៅសល់ទេ ព្រោះអីយើងមើលឃើញកន្លងមកហ្នឹងគាត់តែងតែនិយាយថាការពារមិនបានមួយរយភាគរយទេ ផ្ទៃដីព្រៃហ្នឹងវាធំធេងណាស់រហូតទៅដល់រាប់លានហិចតា ហើយឧទ្យាននុរក្សហ្នឹងមានតែប៉ុន្មានពាន់នាក់ទេ។

ខ្ញុំមិនដឹងថាគាត់យកជាហេតុផលត្រឹមត្រូវ ឬក៏ជាលេសដោះសារដើម្បីច្រានចោលការទទួលខុសត្រូវទេ ព្រោះកន្លងមកគាត់ថាឧទ្យាននុរក្សគាត់ខិតខំប្រឹងប្រែងធ្វើការ ខិតខំល្បាតអីជាដើមហ្នឹង ប៉ុន្តែវាមិនអាចទប់ស្កាត់បានមួយរយភាគរយហ្នឹង ដោយសារតែផ្ទៃដីហ្នឹងវាធំធេងជាដើមហ្នឹង ដែលគាត់ធ្លាប់លើកឡើង ហើយគាត់ធ្លាប់លើកឡើងថាព្រៃឈើស្រុកខ្មែរហ្នឹងមានតែបទល្មើសទ្រង់ទ្រាយតូចទេ។

អ្វីដែលជាការគត់សម្គាល់ហ្នឹង យើងមិនដែលឃើញក្រសួងបង្ហាញថាអ្វីទៅទ្រង់ទ្រាយតូច អ្វីទៅហៅថាទ្រង់ទ្រាយធំ បើមែនទែនទៅដឹកចេញពីតំបន់ព្រៃដូចគ្នា ទោះបីតូច ឬធំនៅតែជាបទល្មើសដដែលទេ ហើយរហូតមកដល់ថ្ងៃនេះ បើតាមសហគមន៍នៅមូលដ្ឋាន ក៏នៅបន្តឃើញមានការដឹកចេញពីតំបន់ព្រៃការពារដែរមានព្រៃឡង់ ព្រៃព្រះរកាអីជាដើម ចឹងចង់មិនចង់ព្រៃឈើយើងអាចនឹងនៅបានដូចមានចែងនៅក្នុងច្បាប់ទេបាទ ហើយវាអាចថានៅក្នុងថ្ងៃអនាគតទៅព្រៃហ្នឹងរិចរឹលទៅវាអាចថាដកព្រៃហ្នឹងចេញពីតំបន់ការពារអ៊ីចឹង អាចជាយកហេតុផលថាជាព្រៃសឹករឹចរឹលទៅ គេអាចវិនិយោគតំបន់ព្រៃណាមួយទៅឱ្យក្រុមហ៊ុនឯកជនអីជាដើមហ្នឹង។

Q: តើកត្តាអ្វីខ្លះដែលជាមូលហេតុនៃការបាត់បង់ព្រៃ នៅប្រទេសកម្ពុជា?

A: បើមែនទែនអាចពាក់ព័ន្ធរឿងសំខាន់បំផុតខ្ញុំអាចចាត់ទុកថាមានអំពើរពុករលួយនៅក្នុងវិស័យព្រៃឈើហ្នឹងទីមួយ ហើយទីពីរអាចថាកត្តាសេដ្ឋកិច្ចពលរដ្ឋនៅមូលដ្ឋានក្រីក្រដែលគាត់អត់មានគំនិតថាទៅរកស៊ីអី អ្វីដែលគាត់ធ្វើ គឺគាត់ទៅកាប់ព្រៃ លក់ដើម្បីជីវភាពគ្រួសារពួកគាត់អីជាដើមហ្នឹង ហើយមូលហេតុចម្បងទៀតនោះគឺពាក់ព័ន្ធទៅនឹងការមិនយកចិត្តទុកដាក់ និងទទួលបានលុយកាក់ពីការកាប់ព្រៃឈើអីហ្នឹងជាមូលហេតុសំខាន់។

ហើយមួយទៀតសោតហ្នឹង គឺថាមន្ត្រីថ្នាក់ក្រោមហ្នឹងអត់មានអំណាចគ្រប់គ្រាន់ មានន័យថាគាត់មិនមានសិទ្ធិក្នុងការចាប់ជនល្មើសណាដែល អាចមានករណីជនល្មើសមានខ្នងបង្អែកជាមន្រ្តីរាជការ ឬក៏ជាទាហានអីជាដើមទៅ។

Q: តើយើងត្រូវធ្វើយ៉ាងណាដើម្បីឱ្យមានការធានាថាមិនមានការកាប់ព្រៃឈើដោយខុសច្បាប់តទៅទៀត?

A: បើយើងនិយាយពីប្រទេសនីតិរដ្ឋ មិនបាច់ទៅធ្វើអីវែងឆ្ងាយទេ ឱ្យតែរដ្ឋខ្លួនឯងហ្នឹងមានស្មារតី មានឆន្ទៈពិតប្រាកដក្នុងការទប់ស្គាត់ជាចំណុចមួយសំខាន់ ហើយមួយទៀតរដ្ឋខ្លួនឯងហ្នឹងត្រូវតែលើកទឹកចិត្តឱ្យសាធារណជនហ្នឹងបានចូលរួមក្នុងកិច្ចការពារ បើទោះជាច្បាប់មានចែងមែន ក៏ប៉ុន្តែអ្វីដែលយើងឆ្លងកាត់កន្លងមកហ្នឹងមិនបានមានចែងក្នុងច្បាប់ទេ។

នៅក្នុងច្បាប់ គាត់សរសេរឱ្យសាធារណៈជនការពារ ក៏ប៉ុន្តែនៅពេលដែលសាធារណជនចូលរួមការពារ ក៏ប៉ុន្តែនៅសាធារណជន អង្គការសង្គមស៊ីវិលអី ឬក៏សហគមន៍ចូលរួមការពារគាត់បែរជាហាមឃាត់ គាត់ព្យាយាមរកហេតុផលដើម្បីចុះអនុស្សរណៈយោគយល់(MOU) ជាមួយក្រសួងបរិស្ថានមុនទៅល្បាត ឬក៏ទៅធ្វើការចូលព្រៃអីជាដើមទៅ ព្រោះអីយើងមិនមែនមិនទុកចិត្តមន្រ្តីរដ្ឋាភិបាលទាំងស្រុងទេប៉ុន្តែអ្វីដែលជាការយល់ឃើញរបស់ខ្ញុំ កាលណាដែលយើងចុះអនុស្សរណៈយោគយល់(MOU) ទៅវាអត់មានអីចំណេញទេវាមានតែខាតពេលនៅក្នុងការចុះទៅល្បាតទេ ការចុះអនុស្សរណៈយោគយល់(MOU)ហ្នឹងទៀតសោតមិនដែលសាធារណជនទៅធ្វើអនុស្សរណៈយោគយល់(MOU)ជាមួយក្រសួងទេ នេះជាហេតុផលអត់សមរម្យទេ។

អ៊ីចឹងក្រសួងពិចារណាឡើងវិញ ស្ថិតនៅក្នុងបុព្វហេតុនៃការពារព្រៃឈើដូចគ្នា ក្រសួងគួរតែបើកទូលាយឱ្យសាធារណជន ក៏ដូចជាសហកគមន៍មូលដ្ឋានឱ្យពួកគាត់បានចូលរួមចំណែកក្នុងការទប់ស្កាត់ក្នុងការទប់ស្កាត់ក្នុងការបំផ្លិចបំផ្លាញធនធានធម្មជាតិយើង។

Q: តើលោកយល់ថាស្ថានភាពព្រៃឈើនឹងមានភាពល្អប្រសើរទេក្នុងថ្ងៃអនាគត?

A: នាអនាគត យើងមិនអាចមើលឃើញទេ ប៉ុន្តែបើយើងពេលបច្ចុប្បន្ន ប្រសិនជាបច្ចុប្បន្ននេះ អ្វីដែលរដ្ឋាភិបាលនៅប្រកាន់ចរិកដដែល ការធ្វើការដដែលថ្ងៃក្រោយព្រៃឈើមិនស្ថិតថេរទេ នឹងកាន់តែសឹករិចរឹលបន្ថែមទៀត ហើយប្រសិនជាគាត់មានការកែប្រែមានយុត្តិសាស្រ្តថ្មី គាត់មានឆន្ទៈក្នុងការដោះស្រាយពិតប្រាកដ បំបាត់នៅអំពើរពុករលួយ បក្សពួកនិយមអ៊ីចឹងជាដើម ហើយបើកចិត្តទូលាយឱ្យសាធារណជនចូលរួម ទោះបីជាមានកាប់តិចតួចបំផុត ហ្នឹងខ្ញុំគិតថាអាចទប់ស្កាត់បានប្រសិនបើរដ្ឋាភិបាលគាត់យកគំនិតហ្នឹងទៅពិចារណា។

Q: តើលោកមានអនុសាន៍បានណាដើម្បីមិនមានបទល្មើសព្រៃឈើតទៅទៀត?

A: ជាយោបល់ខ្ញុំ ក្នុងនាមជាប្រជាពលរដ្ឋសាមញ្ញ ខ្ញុំមានគំនិតបែបសាមញ្ញ មានតែមានការបើកឱ្យពលរដ្ឋចូលរួមការពារហើយហ្នឹង ហើយរដ្ឋាភិបាលហ្នឹងមានឆន្ទៈពិតប្រាកដ កុំឱ្យមានអំពើពុករលួយក្នុងវិស័យព្រៃឈើហ្នឹង យើងការពារទ្រព្យសម្បត្តិយើងទាំងអស់គ្នា ប៉ុន្តែប្រសិនបើមន្ត្រីរដ្ឋាភិបាលមួយចំនួននៅតែមានគំនិតលោភលន់ចង់បានតែឯង ចង់បានការកេងចំណេញពីតួនាទីរបស់គាត់ បើកដៃឱ្យឈ្មួញកាប់បំផ្លាញព្រៃឈើ ហ្នឹងវាបាត់បង់ហើយ។

ហើយមួយទៀត សាធារណជនទាំងអស់គ្នា ទោះបីជាយើងមិនមែនជាអ្នកនៅស្រុកព្រៃ ក៏ពិតមែន ប៉ុន្តែមិនមែនមានន័យថាយើងអត់មានផលប៉ះពាល់ដែរដូចទស្សនៈលោកបណ្ឌិតកែម ឡីដែលគាត់លើកឡើងថា «បើយើងមិនធ្វើអ្វីសោះក៏រងគ្រោះដែរ» ហើយពាក្យដែលគាត់លើកឡើងហ្នឹងមានន័យទូលំទូលាយណាស់ ដែលគ្រប់ស្ថានការដែលយើងអាចមកសិក្សាបាន ចំណុចនេះ។

ខ្ញុំចង់រំលេចត្រង់ហ្នឹងដែលខ្ញុំចង់និយាយថាទោះបីជាយើងនៅក្នុងទីក្រុងក៏ដោយ យើងមិនមែននៅព្រៃក៏ដោយ តែប្រសិនជានៅតំបន់ព្រៃ វាបាត់បង់ព្រៃឈើទៅ អ្នកនៅក្រុងក៏រស់មិនបានសុខដែរ ដោយសារតែអស់ព្រៃឈើទៅ អាកាសធាតុប្រែប្រួល វាអាចថាខែវស្សាទៅទឹកជំនន់ ហើយខែប្រាំងទៅគ្រោះរាំងស្ងួតអ៊ីចឹងជាដើម វាមិនមែនប៉ះពាល់តែនៅស្រុកព្រៃទេ អ៊ីចឹងហើយបានជាខ្ញុំលើកទឹកចិត្តថាជាពិសេសយុវជនជំនាន់ក្រោយនេះត្រូវតែចូលរួមឱ្យបានសកម្មដើម្បី ទោះបីជាមិនបានចុះទៅព្រៃផ្ទាល់។

សាធារណជន យុវជនហ្នឹងត្រូវតាមដាមតាមរយៈការផ្សព្វផ្សាយតាមសារព័ត៌មាន តាមរយៈការផ្សព្វផ្សាយតាមប្រព័ន្ធសង្គមអីជាដើម យើងចូលរួមចែករំលែកគ្នាshare ដើម្បីឱ្យដំណឹងនេះបានទៅដល់ប្រមុខរដ្ឋាភិបាលឱ្យគាត់បានឃើញបានដឹង ថាសាធារណជនក៏បានចូលរួមដឹងលឺដែរអំពីការបាត់បង់ព្រៃឈើហ្នឹង កុំឱ្យមានការលើកឡើងថាអ្នកតវ៉ាមួយចំនួនមកដល់ផ្ទះគាត់អីហ្នឹង ជំនាន់ហ្នឹងគាត់និយាយថាគាត់អត់បានដឹងអីផង អាចដឹងថាលើកមុនគាត់អត់ដឹងអីមែន ប៉ុន្តែឥឡូវហ្វេសបុកវាមានប្រជាប្រិយភាពប្រជាពលរដ្ឋតាមដានច្រើន ខ្ញុំគិតថាពេកគាត់ចែករំលែកច្រើនគាត់បានឃើញបានដឹងចឹង៕

បុគ្គលិកតវ៉ាឲ្យក្រុមហ៊ុនព្រលានយន្តហោះសៀមរាបដោះស្រាយ ក្រោយត្រូវបានបញ្ឈប់ដោយសារវិបត្តិកូវីដ

មេង គ្រុយពន្លក (Meng Kroypunlok) — Wed, 28 Jul 2021 15:48:55 +0000

បុគ្គលិកជាង ១០០នាក់ កាលពីពេលថ្មីៗនេះបានស្នើរឲ្យក្រុមហ៊ុនព្រលានយន្តហោះនៅខេត្តសៀមរាប ឈ្មោះ VINCI/ CAMS/ SCA និងអាជ្ញាធរអាកាសចរស៊ីវិលព្រមទាំងមន្ទីរ និងក្រសួងការងារ ជួយដោះស្រាយបញ្ហាក្រោយពួកគាត់ត្រូវបានបញ្ឈប់ពីការងារដោយសារវិបត្តិជំងឺកូវីដ។

តាមរយៈទំព័រហ្វេសបុករបស់បុគ្គលិកម្នាក់ឈ្មោះហួរ សុខសំណាង (Hour Soksamnang) បានលើកឡើងថា តាមរបាយការណ៍ប្រាក់ចំណូលរបស់ក្រុមហ៊ុនមិនបានខាតទេ នឹងមានតែចំណេញ ហើយបានអះអាងថា ការបញ្ឈប់នេះគឺជាគឺជាអំពើអយុត្តិធម៌។

លោកហួរ សុខសំណាង

លោកបានលើកឡើងថា «ការបញ្ឈប់បុគ្គលិក ១៣១នាក់នៅព្រលានយន្តហោះខេត្តសៀមរាបនេះជាការឆ្លៀតឱកាសក្នុងវិបត្តិកូវីដ-១៩ ដែលធ្វើឲ្យបុគ្គលិកទទួលទុក្ខយ៉ាងធ្ងន់ធ្ងរពីអំពើអមនុស្សធម៌របស់ក្រុមហ៊ុនមួយនេះ»។

បុរសម្នាក់ក្នុងចំណោមបាតុករដ៏ទៃទៀតដែលជាបុគ្គលិកបានឈរបាតុកម្មដោយលើកបដាស្នើរឱ្យក្រុមហ៊ុន (VINCI/ CAMS/ SCA) និងក្រសួងការងារជួយដោះស្រាយការបញ្ឈប់បុគ្គលិកឱ្យបានឆាប់ចប់។

ស្រដៀងគ្នានេះ ស្រ្ដីម្នាក់ក្នុងចំណោមបាតុករដ៏ទៃទៀតដែលជាបុគ្គលិកបានឈរបាតុកម្មនៅមុខក្រុមហ៊ុនថា «ខ្ញុំស្នើរឱ្យក្រុមហ៊ុន (VINCI/ CAMS/ SCA) ក្រសួងការងារ អាជ្ញាធរអាកាសចរណ៍ជួយដោះស្រាយការបញ្ឈប់បុគ្គលិក ១៣១នាក់ឱ្យបានឆាប់ចប់ មិនត្រូវពន្យាពេលទៀតទេ»។

បុគ្គលិកផ្នែកបម្រើអតិថិជន លោកមុំ សឹមសីហា បានផ្ដល់កិច្ចសម្ភាសន៍មកកាន់Newsroom Cambodia ថាការបញ្ឈប់នេះផ្ទុយច្បាប់ទាំងស្រុង ដោយសារក្រុមហ៊ុនមិនបានជូនដំណឹងជាមុន ជាពិសេសបញ្ឈប់តែបុគ្គលិកណាដែលមានប្រាក់អតីតភាពការច្រើន។

លោកលើកឡើងថា «ជាក់ស្ដែងខ្ញុំមានអតីតភាពការងារ ១៩ឆ្នាំមកហើយ តាមមាត្រា៩៥នៅពេលគេបញ្ឈប់បុគ្គលិក ពេលគេកាត់បន្ថយបុគ្គលិកហ្នឹង អ៊ីចឹងអ្នកដែលមានអតីតភាពការងារយូរ គេអត់បញ្ឈប់ទេ គេបញ្ឈប់តែអ្នកមានអតីតភាពការងារតិចជាង»។

ដូចគ្នានេះដែរ លោកស្រីថុល ណាមុន្នី បុគ្គលិកទទួលបន្ទុកផ្នែកសេវាកម្មរថយន្តសម្រាប់ភ្ញៀវចេញចូលប្រលានយន្តហោះ ដែលមានអតីតភាពការងារចំនួន ១៦ឆ្នាំ បានលើកឡើងថា ការបញ្ឈប់នេះខុសច្បាប់ទាំងស្រុង ដោយសារក្រុមហ៊ុនមិនបានជូនដំណឹងជាមុន ជាពិសេសបញ្ឈប់តែបុគ្គលិកណាដែលមានប្រាក់អតីតភាពការច្រើន។ លោកស្រីក៏បានលើកឡើងដែរថាក្រុមហ៊ុនក៏បានទូទាត់សំណង តែអ្នកស្រីបានយល់ថាក្រុមហ៊ុនមិនបានទូរទាត់បានគ្រប់ចំនួននោះទេ។

ប្រធាននាយកដ្ឋានដោះស្រាយទំនាស់នៅខេត្តសៀមរាប លោកផេង ឈាងលី បានផ្ដល់កិច្ចសម្ភាសន៍មកកាន់ Newsroom Cambodia ថាលោកមិនដឹងថាក្រុមហ៊ុនរកស៊ីដោយវិធីណានោះទេ ហើយក៏មិនដឹងថាក្រុមហ៊ុននោះចំនេញ ឬខាតនោះដែរ ប៉ុន្តែទាំងកម្មករនិយោជិត និងនិយោជក ត្រូវតែគោរពច្បាប់។

លោកផេង ឈាងលី បាននិយាយថាលោកយល់ថាក្រុមហ៊ុនដូចជាបានធ្វើស្របតាមច្បាប់ការងារហើយ។ លោកបាននិយាយថា «ក្រុមហ៊ុនបានទូទាត់ប្រាក់បំណាច់

អតីតភាពការងារទៅតាមការណែនាំដែលមានតាមការបញ្ចាំងស្លាយ កម្មករនិយោជិតក៏បានចូលរួមក្នុងកម្មវិធីនេះ នេះជាការធ្វើបទបង្ហាញដោយក្រសួងការងាររួចហើយ បើមានបញ្ហាអីគួរតែជជែកគ្នាពេលហ្នឹងទៅ»។

នាយកប្រតិបត្តិទំនាក់ទំនងសាធារណៈលោក Khek Norinda បានប្រាប់ Newsroom Cambodia ថាដោយសារតែវិបត្តិជំងឺកូវីដនេះ ទើបក្រុមហ៊ុនបានបង្ខំសម្រចចិត្តបញ្ឈប់បុគ្គលិក និងក្រុមហ៊ុនក៏បានផ្ដល់កញ្ចប់សំណងដែលស្របទៅតាមច្បាប់ការងាររួចហើយដែរ។

លោកក៏បានបន្ដែមថាសូមឱ្យមានការយកយល់ទាំងអស់គ្នាក្នុងស្ថានភាពបែបនេះ ហើយការទ្រង់ទ្រងក្រុមហ៊ុន និងរក្សាបុគ្គលិក គីជារឿងសំខាន់ដែរ។ លោកបានលើកឡើងថា «វាជាការពិតដ៏ក្រៀមក្រំនៃវិបត្តិដោយសារជំងឺរាតត្បាតកូវីដ ១៩ ដែលបានបង្ខំឱ្យក្រុមហ៊ុនបញ្ឈប់បុគ្គលិករបស់ខ្លួនខ្លះនៅឯព្រលានយន្តហោះខេត្តសៀមរាប»។

លោកបាននិយាយថាក្រុមហ៊ុនបានបញ្ឈប់និយោជិកចំនួន ១៣០នាក់ កាលពីខែធ្នូឆ្នាំ ២០២០ បន្ទាប់ពីចំនួនអ្នកដំណើរនៅព្រលានយន្តហោះសៀមរាបបានធ្លាក់ចុះ ចំនួន ៨៤ ភាគរយសម្រាប់ឆ្នាំ ២០២០។

លោក Khek Norinda បាននិយាយថា «យើងបារម្ភថាឆ្នាំ ២០២១ រឹតតែពិបាកថែមទៀត។ ស្ថានភាពនេះកាន់តែអាក្រក់ទៅៗ ហើយ ៦ខែដំបូងក្នុងឆ្នាំ ២០២១ ឃើញថាចរាចរណ៍បានធ្លាក់ចុះ ៩៩,៩% ហើយភាពមិនប្រាកដប្រជាជាច្រើននៅខាងមុខ»៕

អ្នកការពារសិទ្ធិ និងបរិស្ថានថា ការចោទប្រកាន់បន្ថែមលើសកម្មជនមាតាធម្មជាតិ គឺជាបំបាក់ស្មារតីសកម្មជនផ្សេងទៀត

មេង គ្រុយពន្លក (Meng Kroypunlok) — Sat, 24 Jul 2021 04:37:27 +0000

អ្នកការពារសិទ្ធិ និងបរិស្ថានយល់ថា ការចោទប្រកាន់បន្ថែមលើសកម្មជនចលនាមាតាធម្មជាតិបីនាក់លើបទរួមគំនិតក្បត់ គឺជាការយាយី និងបំបាក់ស្មារតីលើសកម្មជនបរិស្ថាន។

សកម្មជនបរិស្ថានទាំងបីរូបរួមមានលោកថុន រដ្ឋា កញ្ញាភួង កែវរស្មើ និងកញ្ញាឡុង គន្ធា ត្រូវបានតុលាការក្រុងភ្នំពេញសម្រេចផ្តន្ទាទោសឱ្យជាប់ពន្ធនាគារពី១៨ ទៅ២០ខែ ក្រោមបទ «ញុះញង់» លើសកម្មភាពរបស់ពួកគេកាលពីខែកញ្ញា ឆ្នាំ២០២០។ អ្នកទាំងបីត្រូវបានសាកសួរដោយចៅក្រមស៊ើបសួរក្នុងសប្ដាហ៍នេះ ពាក់ព័ន្ធនឹងបទរួមគំនិតក្បត់ដែលត្រូវប្រឈមនឹងការជាប់ពន្ធនាគាររហូតដល់១០ឆ្នាំ ប្រសិនបើរកឃើញថាមានទោស។

លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) បានប្រាប់ Newsroom Cambodia ថា សកម្មភាពរបស់សកម្មជនបរិស្ថានទាំងបីរូបគឺមានចេតនាក្នុងការពាំនាំកង្វល់ចំពោះបញ្ហាបរិស្ថានហ្នឹងទៅជូនអាជ្ញាធរដើម្បីដោះស្រាយ។

លោកស្រីបញ្ជាក់ថា៖ «យើងឃើញកន្លងមកនេះមានការយាយី និងមានការចោទប្រកាន់ច្រើនច្រើនលើសកម្មជន ជាពិសេសយុវជនបរិស្ថាន ហើយអង្គការសង្គមស៊ីវិលយើងធ្លាប់លើករួចមកហើយថា សកម្មភាពនៃការថតរូបភាពការពារបរិស្ថានឬក៏ធនធានធម្មជាតិនេះមិនគួរជាបទល្មើសនោះទេ ហើយគ្រប់សកម្មភាពរបស់ពួកគេដែលត្រូវបានដែលត្រូវបានសារទរ និងកង្វល់នានាហ្នឹង គួរតែយកទៅដោះស្រាយជាជាងដែលការចោទប្រកាន់ ឬក៏យាយីពួកគាត់ម្ដង់ហើយម្ដងទៀត»។

លោកស្រីបន្ថែមថា ការចោទប្រកាន់បន្ថែមលើសកម្មជនបរិស្ថាននេះ គឺជាការយាយីមកលើសកម្មជនបរិស្ថាន។

លោកស្រីលើកឡើងថា៖ «យើងឃើញកន្លងមកនេះមានការយាយី និងមានការចោទប្រកាន់ច្រើនលើសកម្មជន ជាពិសេសយុវជនបរិស្ថាន ហើយអង្គការសង្គមស៊ីវិលយើងធ្លាប់លើករួចមកហើយថា សកម្មភាពនៃការថតរូបភាពការពារបរិស្ថាន ឬក៏ធនធានធម្មជាតិនេះមិនគួរជាបទល្មើសនោះទេ»។

អ្នកស៊ើបអង្កេតបទល្មើសព្រៃឈើនៃបណ្តាញយុវជនកម្ពុជា (CYN) លោក ម៉ា ចិត្រា បានលើកឡើងថាការចោទប្រកាន់នេះគឺជាការបំបាក់ស្មារតីលើអ្នកការពារបរិស្ថាន។

លោកបញ្ជាក់ថា៖ «ការចោទប្រកាន់បន្ថែមទៅលើសកម្មជនបរិស្ថាន៣នាក់ពីបទរួមគំនិតក្បត់អីហ្នឹង ខ្ញុំគិតថាជាគ្រាន់តែជាការបំបាក់ស្មារតីរបស់ពួកគាត់ទេ ហើយមិនត្រឹមតែពួកគាត់ទេគឺយុវជនផ្សេងទៀតដែលមានឆន្ទៈក្នុងការចូលរួមការពារបរិស្ថាន»។

Newsroom Cambodia មិនអាចទាក់ទងសុំការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល បានទេ។

លោក ថុន រដ្ឋា កញ្ញា ភួង កែវរស្មើ និងកញ្ញា ឡុង គន្ធា ត្រូវបានចាប់ខ្លួនកាលពីខែកញ្ញា ឆ្នាំ២០២០ និងផ្ដន្ទាទោសឱ្យជាប់ពន្ធនាគារ ត្រូវបានសាលាដំបូងរាជធានីភ្នំពេញចោទប្រកាន់ពី «បទរួមគំនិតក្បត់» ពាក់ព័ន្ធសកម្មជនបីនាក់ផ្សេងទៀតដែលបានចាប់ខ្លូនកាលពីខែមិថុនា ឆ្នាំ២០២១។

សកម្មជនបរិស្ថានចលនាមាតាធម្មជាតិចំនួនបីផ្សេងទៀតរូប រួមមាន កញ្ញា ស៊ុន រដ្ឋា អាយុ២៦ឆ្នាំ លោកយឹម លាងហ៊ី អាយុ៣២ឆ្នាំ លោកលី ចន្រ្ទាវុធ អាយុ២២ឆ្នាំ ត្រូវបានចោទប្រកាន់ដោយសាលាដំបូងរាជធានីភ្នំពេញ និងបញ្ជូនទៅពន្ធនាគារនៅថ្ងៃទី២១ ខែមិថុនា ឆ្នាំ២០២១ ពីបទរួមគំនិតក្បត់ និងបទប្រមាថព្រះមហាក្សត្រ៕

អ្នកនាំពាក្យក្រសួងសុខាភិបាលព្រមានថាកម្ពុជាអាចដើរហួសបន្ទាត់ក្រហមបើមិនអនុវត្តវិធានការការពារ

មេង គ្រុយពន្លក (Meng Kroypunlok) — Tue, 20 Jul 2021 03:48:33 +0000

អ្នកនាំពាក្យក្រសួងសុខាភិបាល អំពាវនាវដល់សាធារណជនឱ្យប្រុងប្រយ័ត្ន ជំងឺកូវីដ១៩ ពិសេសវីរុសបម្លែងប្រភេទថ្មីដែលតា និងអាល់ហ្វា ដោយភ្ជាប់នឹងការព្រមានថា កម្ពុជាកំពុងប្រឈមទៅនឹងការដើរហួសបន្ទាត់ក្រហមបើនៅតែមិន មានការទទួលខុសត្រូវរៀងៗខ្លួនក្នុងការការពារទេនោះ។

យោងតាមសារដែលលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ផ្ញើទៅកាន់ក្រុមអ្នកសារព័ត៌មានក្នុងបណ្តាញសង្គមតេឡេក្រាម កាលពីថ្ងៃទី១៧ ខែកក្កដានេះ លោកស្រី ឱ វណ្ណឌីន បានអំពាវនាវដល់បុគ្គល គ្រួសារ យកចិត្តទុកដាក់ការពារខ្លួនជាមួយជំងឺកូវីដ១៩ ជៀសវាងការដើរហួសបន្ទាត់ក្រហមដែលអាចបង្កជាសោកនាដកម្មដោយសារជំងឺកូវីដ១៩។

លោកស្រីបញ្ជាក់ថា៖ « សុំឱ្យបងប្អូនយើងងាកមករកការការពាររៀងៗខ្លួនឱ្យបានហ្មត់ចត់ឡើងវិញ កុំបន្ធូរបន្ថយឱ្យសោះបើយើងមិនចង់ឃើញសោកនាដកម្មសុខភាពសាធារណ: ដែលវាអាចនឹងទៅហួសបន្ទាត់ក្រហមនោះទេ»។

តាមរយៈសារអំពាវនាវដដែលលោកស្រីលើកឡើងពីវីរុសបម្លែងថ្មីប្រភេទដែលតា និងពិសេសប្រភេទអាល់ហ្វា ថាកំពុងមានការរាតត្បាតយ៉ាងខ្លាំងស្ទើគ្រប់ខេត្តក្រុង។

លោកស្រីលើកឡើងថា៖ «អ្វីដែលសំខាន់នាពេលនេះទោះជាដែលតា ឬអាល់ហ្វា យើងត្រូវតែរួមគ្នាការពារព្រោះបច្ចុប្បន្ននេះអាល់ហ្វាក៏កំពុងតែចរាចរខ្លាំងក្លាទៅសឹងគ្រប់ខេត្ត-ក្រុងទៅហើយ រីឯអ្នកស្លាប់ក៏មានជារៀងរាល់ថ្ងៃ»។

គិតត្រឹមថ្ងៃចន្ទ ទី១៩ ខែកក្កដានេះ កម្ពុជាមានអ្នកឆ្លងជមងឺ កូវីដ១៩សរុបចំនួន៦៧,៩៧១ អ្នកនិងមានអ្នកស្លាប់សរុបចំនួន១១២៨នាក់៕

Vox pop៖ អត្ថប្រយោជន៍នៃការរៀនភាសាបាលី និងសំស្រ្កឹត

មេង គ្រុយពន្លក (Meng Kroypunlok) — Sun, 18 Jul 2021 10:48:18 +0000

ភាសាបាលី និងសំស្រ្កឹតជាភាសាដ៏មានសារសំខាន់ ខាងផ្នែកពុទ្ធចក្រ ផ្នែកអាណាចក្រហើយ សាមណសិស្សពុទ្ធិកទាំងអស់តម្រូវឱ្យចូលរៀនភាសាទាំងពីរនេះ ចំណែកពាក្យកម្ចីរបស់ភាសាខ្មែរភាគច្រើនគឺបាលី និងសំស្រ្កឹត។

សិក្ខាកាម Newsroom Cambodia លោកមេង គ្រុយពន្លក បានសម្ភាសន៍ព្រះតេជគុណ ៦អង្គ កាលពីពេលថ្មីៗនេះអំពី អត្ថប្រយោជន៍នៃការសិក្សាភាសាបាលី និងសំស្រ្កឹត។

ព្រះតេជគុណអឿ ទី មានព្រះជន្ម២៣ព្រះវស្សា មកពីពុទ្ធកវិទ្យាល័យទេព វង្ស និរោធរង្សី បាននិយាយថាអត្ថប្រយោជន៍ភាសាបាលីមានច្រើន ទាំងការស្វែងយល់ពីពុទ្ធវចន និងផ្នែកអក្សរសាស្រ្ត ចំណែកឯសំស្រ្កឹតវិញងាយក្នុងការស្វែងយល់មូលដ្ឋានអក្សរសាស្រ្តខ្មែរនិងសិលាចរឹក។

ព្រះអង្គបានលើកឡើងថា៖ «ករុណាបើនិយាយពីអត្ថប្រយោជន៍នៃការរៀនភាសាបាលីវិញមិនអាចពណ៌នា ឬក៏បរិយាយអស់សេចក្ដីបាន ប៉ុន្តែគ្រាន់តែមួយចំនួនធំហ្នឹងគឺ បើនិយាយខាងផ្នែកពុទ្ធសាសនាវិញប្រសិនបើបុគ្គលណា នរជនណាដែលមិនសិក្សាភាសាបាលីវេយ្យាករណ៍ហ្នឹងទេ ហើយដល់ពេលរៀនព្រះត្រៃបិដកតែម្ដងនឹងមានការសង្ស័យ កើតសេចក្ដីសង្ស័យគ្រប់ៗបទទាំងអស់»។

ព្រះអង្គបានបន្តថា៖ «អ៊ីចឹងបានចាំបាច់រៀននូវភាសាបាលីហ្នឹងមុនទៅរៀនសិក្សាបិដក ព្រះសូត្រ អដ្ឋកថា ដីកា យោជនាអីហ្នឹង នឺងនិយាយតែទាក់ទងនឺងផ្នែកពុទ្ធចក្រអត្ថប្រយោជន៍នៃបាលី»។

ព្រះតេជគុណថា សារ៉ាត់ មានព្រះជន្ម២៧ព្រះវស្សា មកពីសាកលវិទ្យាល័យកម្ពុជា បាននិយាយថា អត្ថប្រយោជន៍នៃភាសាបាលីមានច្រើន ទាំងការស្វែងយល់ពីពុទ្ធវចន និងផ្នែកអក្សរសាស្រ្ត ចំណែកឯសំស្រ្កឹតវិញងាយក្នុងការស្វែងយល់មូលដ្ឋានគ្រឹះយ៉ាងសំខាន់នៅក្នុងការសិក្សាភាសាខ្មែរបានច្បាស់លាស់។

ព្រះតេជគុណថា សារ៉ាត់

ព្រះអង្គបានលើកឡើងថា៖ «ហើយមួយចំណែកទៀតផ្នែកភាសាដែលយើងអាចរៀនភាសាបាលីហ្នឹងគឺជំនួយដល់ភាសាដ៏ទៃទៀត ដែលយើងអាចនិយាយបានថាភាសាបាលីគឺជាមូលដ្ឋានគ្រឹះមួយក្នុងការរៀនភាសាដ៏ទៃទៀតហ្នឹងឱ្យបានទូលាយហើយមួយទៀតផ្នែកសតិបញ្ញា ដែលសតិបញ្ញា ដែលហេតុនាំឱ្យកើតបញ្ញាមានសំដែងយ៉ាងទូលាយក្នុងគម្ពីព្រះអភិធម្មដែលអ្នកសិក្សាភាសាបាលីនឺងអាចយល់បានច្បាស់ប្រសិនបើយើងចេះភាសាបាលីអាចធ្វើឱ្យយើងកើតបញ្ញាចេះពិចារណាក្នុងការស្វែងរកហេតុផលរឿងរាវនៃការពិតទាំងឡាយផ្សេងៗទៀត»។

«ចំណែកព្រះអង្គបានលើកឡើងថាភាសាសំស្រ្កឹតក៏មិនខុសពីភាសាបាលីប៉ុន្មានដែរដោយសារតែភាសាខ្មែរយើងភាគច្រើនកម្ចីពីបាលីសំស្រ្កឹត ការចេះភាសាសំស្រ្ដឹតក៏ធ្វើឱ្យយើងមានមូលដ្ឋានគ្រឹះយ៉ាងសំខាន់នៅក្នុងការសិក្សាភាសាខ្មែរបានច្បាស់លាស់»។

ព្រះតេជគុណសុខ រស្មី មានព្រះជន្ម ២២ព្រះវស្សា មកពុទ្ធកវិទ្យាល័យព្រះសុរាម្រឹត បាននិយាយថាអត្ថប្រយោជន៍នៃភាសាបាលីមានច្រើន ទាំងការស្វែងយល់ពីព្រះពុទ្ធសាសនា ចំណែកឯសំស្រ្កឹតវិញងាយក្នុងការស្វែងយល់ពីមូលដ្ឋានអក្សរសាស្រ្តខ្មែរ សុភាសិតនិងសិលាចរឹក។

ព្រះអង្គបានលើកឡើងថា៖«ចំណុចទីមួយហ្នឹងគឺទាក់ទងនឺងព្រះពុទ្ធសាសនាហើយភាសាបាលីនេះហើយនឺងព្រះពុទ្ធសាសនាមិនអាចខ្វះមួយណាបានទេ ទាល់តែមានទាំងពីរចឹងហើយអ្នកប្រាជ្ញបុរាណមិនថាសម្ដេចជួន ណាតអីគេប្រែបិដកហ្នឹងមកជាភាសាបាលីហ្នឹងមកខេមរភាសាហើយភាសាបាលីនេះទៀតសោទគេប្រើប្រាស់ក្នុងព្រះពុទ្ធសាសនាតាំងពីសម័យព្រះពុទ្ធមកចឹង »។

ចំណែកឯភាសាសំស្រ្កឹតវិញព្រះអង្គលើកឡើងថាជាភាសាមួយទាក់ទងជាយូរលង់ណាស់មកហើយហើយមុនពុទ្ធសាសនាទៅទៀត ពាក្យកាព្យ ពាក្យអប់រំ ពាក្យល្អៗភាគច្រើនចេញមកពីភាសាសំស្រ្កឹត។

ព្រះតេជគុណប៉ុង ម៉ៃ មានព្រះជន្ម២២ព្រះវស្សា មកពុទ្ធកវិទ្យាល័យព្រះសុរាម្រឹត បានប្រាប់និយាយថាការរៀនភាសាទាំងពីរនេះងាយស្រួលក្នុងការបង្រៀនអ្នកដ៏ទៃ។ ព្រះអង្គបានលើកឡើងថា៖«អត្ថប្រយោជន៍មានច្រើនតែបើយើងនិយាយអោយសង្ខេបទៅ ការសិក្សាភាសាបាលី និងសំស្រ្កឹតវាមានអត្ថប្រយោជន៍ច្រើនសម្រាប់ខ្លួនយើងផ្ទាល់ និងសម្រាប់អ្នកដ៏ទៃផងពីព្រោះកាលណាបើយើងចេះភាសាបាលី និងភាសាសំស្រ្កឹតយើងអាចបង្រៀនអ្នកដ៏ទៃ ពីព្រោះភាសាបាលីនិងសំស្រ្កឹតនេះមិនងាយមានអ្នកបង្រៀនបានទេព្រោះអីបើមាន មានតែនៅក្នុងព្រះពុទ្ធសាសនា»។

ព្រះតេជគុណប៉ុង ម៉ៃ

ព្រះតេជគុណសៀក ឈាង មានព្រះជន្ម ២២ព្រះវស្សា មកពុទ្ធកវិទ្យាល័យជួន ណាត បាននិយាយថាអត្ថប្រយោជន៍ភាសាបាលីមានច្រើន ទាំងការស្វែងយល់ពីពុទ្ធវចន និងផ្នែកអក្សរសាស្រ្ត ចំណែកឯសំស្រ្កឹតវិញងាយក្នុងការស្វែងយល់មូលដ្ឋានអក្សរសាស្រ្តខ្មែរនិងសិលាចរិកពីបុរាណ។

ព្រះតេជគុណសៀក ឈាង

ព្រះអង្គបានលើកឡើងថា៖ «ហើយហ្នឹងជាអត្ថប្រយោជន៍ដែលងាយស្រួលឱ្យយើងយល់ដឹងពីអត្ថន័យនៃពុទ្ធវចន ធ្វើយ៉ាងណាធ្វើឱ្យយើងងាយស្រួលស្វែងយល់ ជាក់ស្ដែងការសិក្សាក្នុងពុទ្ធចក្រក្នុងប្រទេសកម្ពុជាយើងតាមសាលាសិក្សាភាសាបាលីដូចថ្នាក់អនុវិទ្យាល័យគេមាន មង្គលត្ថទីបនី ហើយថ្នាក់វិទ្យាល័យមានវិសុទ្ធិមង្គជាដើម»។

ចំពោះភាសាសាស្រ្កឹតវិញ ព្រះអង្គបានលើកឡើងថា ក៏ជាមូលដ្ឋានក្នុងការសិក្សាពីប្រវត្តិអក្សរពីបុរាណដែលបានចារលើសិលាចរិកជាដើម។

ព្រះតេជគុណស៊ឹម វ៉ានដេត មានព្រះជន្ម ២២ព្រះវស្សា មកពុទ្ធកវិទ្យាល័យព្រះសុរាម្រិត បានលើកឡើងថាការចេះភាសាទាំងពីរនេះងាយក្នុងការយល់ពីមូលដ្ឋានអក្សរសាស្រ្តខ្មែរ។

ព្រះតេជគុណស៊ឹម វ៉ានដេត

ព្រះអង្គបានលើកឡើងថា៖«អត្ថប្រយោជន៍នៃភាសាបាលី បើយើងគិតពីអក្សរសាស្រ្ត អក្សរសាស្រ្តខ្មែរយើងក៏មានមូលដ្ឋានពីភាសាបាលីដែរ ប៉ុន្តែវាមិនមែនទាំងអស់នោះទេ វាអាចងាយស្រួលក្នុងការលើកឡើងក្នុងការយកភាសាបាលីទៅប្រើក្នុងភាសាខ្មែរយើង ព្រោះភាសាផ្លូវការភាគច្រើនជាបាលី ដូចជាឧទ្ធម្ភាគចក្រជាដើមនិយាយរួមទៅច្រើន។ ព្រះអង្គបន្តទៀតថា៖«ចំណែកឯសំស្រ្កឹតក្នុងអក្សរសាស្រ្តខ្មែរក៏មានប្រើដែរជាក់ស្ដែង ព្រះរាជាណាចក្រកម្ពុជា ហ្នឹងក៏មានលាយភាសាសំស្រ្ដឹតដែរ ហើយក៏ងាយក្នុងការស្វែងយល់ពីសិលាចរឹកដែរ»៕

អង្គការចំនួន ៤៥ អំពាវនាវឱ្យអាជ្ញាធរកម្ពុជាបង្កើតគណៈកម្មាការឯករាជ្យស៊ើបអង្កេតឃាតកម្មលោកបណ្ឌិតកែម ឡី

មេង គ្រុយពន្លក (Meng Kroypunlok) — Wed, 14 Jul 2021 15:05:35 +0000

អង្គការចំនួន ៤៥ដែលបានចុះហត្ថលេខានៅថ្ងៃទី០៩ ខែកក្ដដា បានអំពាវនាវឱ្យអាជ្ញាធរកម្ពុជាបង្កើតគណៈកម្មាការឯករាជ្យមួយដែលមានភារកិច្ចធ្វើការឯករាជ្យមិនលំអៀងនិងមានប្រសិទ្ធភាព លើឃាតកម្មលោកបណ្ឌិតកែម ឡី។

សេចក្ដីថ្លែការណ៍រួមរបស់អង្គការជាតិ និងអន្តរជាតិរួមមាន អង្គការលើកលែងទោសអន្តរជាតិ (Amnesty International) មជ្ឈមណ្ឌលសិទ្ធិមនុស្សកម្ពុជា(CCHR) និងអង្គការ ៤៣ផ្សេងទៀត បានចុះហត្ថលេខាអំពាវនាវក្នុងពិធីគម្រប់ខួប ៥ឆ្នាំ ឱ្យអាជ្ញាធរកម្ពុជាបង្កើតគណៈកម្មាការឯករាជ្យមួយដែលមានភារកិច្ចធ្វើការឯករាជ្យ និងធ្វើការស៊ើបអង្កេតលើការស្លាប់របស់លោកបណ្ឌិតកែម ឡី។

សេចក្ដីថ្លែងការណ៍ដដែលបានលើកឡើងថា ដោយអនុលោមតាមអនុសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយប្រទេសកម្ពុជាមានកាតព្វកិច្ចក្នុងការស៊ើបអង្កេតភ្លាមៗ ដោយឯករាជ្យ មិនលំអៀង និងធ្វើការស៊ើបអង្កេតរាល់ការស្លាប់ទាំងអស់ដែលសង្ស័យថាខុសច្បាប់ដើម្បីកំណត់អត្តសញ្ញាណមិនត្រឹមតែជនល្មើសដោយផ្ទាល់ប៉ុណ្ណោះទេ ប៉ុន្តែអ្នកផ្សេងទៀតដែលអាចទទួលខុសត្រូវចំពោះការប្រព្រឹត្តបទឧក្រិដ្ឋទាក់ទងនឹងការស្លាប់នេះ។

សេចក្ដីថ្លែងការណ៍ដដែលបានបញ្ជាក់ពីចំណុចខ្វះខាតចំនួន ០៧ចំនុចសំខាន់ៗ ដែលទាក់ទងនឹងសំណុំរឿងនេះ ដែលមិនត្រូវបានដោះស្រាយឱ្យបានគ្រប់គ្រាន់ក្នុងការជំនុំជម្រះ រួមមានការអះអាងរបស់ជនដែលត្រូវបានផ្តន្ទាទោស លោកអឿត អាងថា មូលហេតុនៃការបាញ់សម្លាប់ គឺដោយសារបំណុល ៣០០០ដុល្លារ និងដែល ការខកខានមិនបានសម្ភាសន៍សាក្សី។

ចំណុចផ្សេងទៀតរួមមានការខកខានមិនមានវីដេអូស៊ីស៊ីធីវីមួយនៅឯស្ថានីយ៍ប្រេងឥន្ធនៈ របស់អ្នកស៊ើបអង្កេតដើម្បីកំណត់អត្តសញ្ញាណបុរសម្នាក់ដែលអង្គុយជាមួយលោក កែម ឡី មុនពេលមានការបាញ់ប្រហារ និងការខកខានក្នុងការប៉ុនប៉ងដើម្បីកំណត់អត្តសញ្ញាណជនដែលត្រូវបានផ្តន្ទាទោស ដែលបានអះអាងថាត្រូវបានបាញ់លើរូបគាត់ខណៈដែលកំពុងរត់គេចពីកន្លែងនៃឧក្រិដ្ឋកម្ម។

ចំណុចដ៏ទៃទៀតរួមមាន ការខកខានរបស់អ្នកស៊ើបអង្កេតក្នុងការកំណត់ទីតាំង និងសម្ភាសន៏អ្នកលក់អាវុធដែលត្រូវបានចោទប្រកាន់ និងការខកខានរកប្រវត្តិរបស់ជនដែលត្រូវបានផ្តន្ទាទោស និងទំនាក់ទំនងដែលអាចកើតមានជាមួយយោធា និងចុងក្រោយ ការខកខានមិនបានបញ្ជាក់ពីអត្តសញ្ញាណរបស់បុគ្គលម្នាក់ក្នុងចំណោមពួកកម្លាំងប្រដាប់អាវុធ ហើយដែលត្រូវបានគេឃើញនៅក្នុងខ្សែវីដេអូដែលតាមស្វែងរកជនដែលត្រូវបានផ្តន្ទាទោស នៅពេលគាត់បានរត់គេចពីកន្លែងឧក្រិដ្ឋកម្ម។

តាមរយៈទំព័រផ្លូវការរបស់ឯកអគ្គរដ្ឋទូតសហរដ្ឋអាមេរិចប្រចាំនៅកម្ពុជានៅថ្ងៃទី០៩ ខែកក្កដា លោកW. Patrick Murphy បានចូលរួមរំលែកទុក្ខលើក្រុមគ្រួសារលោកបណ្ឌិតកែម ឡី និងប្រជាជនកម្ពុជាទាំងអស់ដែលបានផ្តល់តម្លៃដល់ភាពស្មោះត្រង់ និងស្នេហាជាតិរបស់លោកបណ្ឌិត។ បន្ថែមពីនេះលោកក៏បានទទូចសុំឱ្យអាជ្ញាធរធ្វើការស៊ើបអង្កេតពេញលេញក្នុងការស្លាប់នេះផងដែរ។

លើកឡើងនៅក្នុងវិទ្យុសិទ្ធិមនុស្សកម្ពុជា ភរិយាបណ្ឌិតកែមឡី លោកស្រីប៊ូ រចនា មានប្រសាសន៏ថា លោកស្រីមិនអាចទទូលយកបានទេ តែយ៉ាងណាលោកស្រីត្រូវតែទទូលយកព្រោះវាគឺជាការពិត។

«កាលដែលគាត់ស្លាប់ដំបូងៗ ពេលដែលដឹងរឿងហ្នឹងមកគឺខ្ញុំស្លុត ខ្ញុំមិនអាចទទួលបានទេ ប៉ុន្តែអ្វីៗវានៅតែជាការពិត»។

អ្នកនាំពាក្យក្រសួងយុត្តិធម៍ និងជាអនុប្រធានគណៈកម្មាធិការសិទ្ធិមនុស្សកម្ពុជា លោកជិន ម៉ាលីនតាមរយៈទំព័រហ្វេសប៊ុករបស់ខ្លួន បានហៅការអំពាវនាវរបស់ក្រុមអង្គការសង្គមស៊ីវិលនេះថា គឺជាការធ្វើអាជីវកម្មនយោបាយលើមរណៈភាពលោករបស់លោកបណ្ឌិតកែម ឡី។

លោកបាននិយាយថា ការស្នើឲ្យមានការបង្កើតគណៈកម្មាការឯករាជ្យ ដោយមានការចូលរួមពីបរទេសជាការដែលមិនអាចទៅរួច និងផ្ទុយអំពីច្បាប់រដ្ឋធម្មនុញ និងច្បាប់ជាតិកម្ពុជាផងដែរ៕

គណៈកម្មាធិការសិទ្ធិមនុស្សកម្ពុជាដាក់ដំណើរការពិគ្រោះយោបល់លើសេចក្ដីព្រាងច្បាប់ស្ដីពីការប្រព្រឹត្តិទៅរបស់គណៈកម្មាធិការសិទ្ធិមនុស្សកម្ពុជា

មេង គ្រុយពន្លក (Meng Kroypunlok) — Tue, 13 Jul 2021 04:51:24 +0000

គណៈកម្មាធិការសិទ្ធិមនុស្សកម្ពុជា (គ.ស.ម.ក) ដែលជាសេនាធិការរបស់រាជរដ្ឋាភិបាលបានសហការណ៍ជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា(OHCHR) និងភាគីពាក់ព័ន្ធផ្សេងទៀតដើម្បីប្រមូលធាតុចូលលើសេចក្ដីព្រាងច្បាប់ស្ដីពីការប្រព្រឹត្តិទៅរបស់គណៈកម្មាធិការសិទ្ធិមនុស្សកម្ពុជា។

យោងតាមសេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជានៅថ្ងៃទី៨ ខែកក្កដាឆ្នាំ២០២១នេះបានបញ្ជាក់ថា គណៈកម្មាធិការសិទ្ធិមនុស្សកម្ពុជាកំពុងដាក់ដំណើរការការពិគ្រោះយោបល់ដោយសហការណ៍ជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា(OHCHR) នឹងរៀបចំដាក់ដំណើរការពិគ្រោះយោបល់ជាមួយក្រសួង ស្ថាប័ន អង្គការសង្គមស៊ីវិល និងភាគីពាក់ព័ន្ធនានា ដើម្បីជាធាតុចូលលើសេចក្ដីព្រាងច្បាប់នេះ។

ចំពោះកិច្ចពិគ្រោះយោបល់គណៈកម្មាធិការសិទ្ធិមនុស្សកម្ពុជា (គ.ស.ម.ក) នឹងបែងចែកជាក្រុមពិគ្រោះយោបល់តាមវិស័យសិទ្ធិមនុស្សនីមួយៗដែលគ្រោងធ្វើដោយផ្ទាល់ ឬ/និងតាមវីដេអូ (Video Conference)។

តាមរយៈសេចក្ដីព្រាងច្បាប់ស្ដីពីការប្រព្រឹត្តទៅរបស់គណៈកម្មាធិការសិទ្ធិមនុស្សកម្ពុជាបានកំណត់ជា៨ជំពូក រួមដោយចាប់ផ្ដើមពីជំពូកទីមួយ បទប្បញ្ញត្តិទូទៅ ជំពូកទី២ គណៈកម្មការជ្រើសរើស និងជំពូកទី៨ អវសាន្តប្បញ្ញត្តិ និងមាន៣២មាត្រា។

Newsroom Cambodia បានព្យាយាមទាក់ទងសុំការអត្ថាធិប្បាយបន្ថែមពីលោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជា ប៉ុន្តែរហូតដល់ល្ងាចថ្ងៃចន្ទ នៅតែមិនមានការឆ្លើយតប។

លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្ស (CCHR) បានប្រាប់Newsroom Cambodia ថា អង្គការសង្គមស៊ីវិលមិនសង្ឃឹមថាស្ថាប័នថ្នាក់ជាតិនេះមិនអាចអនុលោមតាមគោលការណ៍ទីក្រុងប៉ារីសទេ។

លោកស្រីបានលើកឡើងថា៖ «ពាក់ព័ន្ធហ្នឹងបង្កើតគណៈកម្មាធិការសិទ្ធិមនុស្សថ្នាក់ជាតិនេះ កន្លងមកគឺជាការទាមទាររបស់អង្គការសង្គមស៊ីវិល ហើយនិងអ្នករាយការណ៍ពិសេសមួយចំនួនពីមុនមកហ្នឹងក៏លោកធ្លាប់លើកពីកិច្ចការងារនេះដែរ ប៉ុន្តែគ្រាន់តែយើងមើលថាកាលៈទេសៈបច្ចុប្បន្ននេះ ជាក្ដីបារម្ភរបស់អង្គការសង្គមស៊ីវិលហ្នឹងគឺយើងមិនមានសង្ឃឹមថាការបង្កើតគណៈកម្មាធិការថ្នាក់ជាតិមួយដែលអាចអនុលោមទៅតាមគោលការណ៍ទីក្រុងប៉ារីសបាននោះទេ ហើយការធានាឯករាជ្យភាពរបស់ស្ថាប័ននេះទៀតសោតក៏ជាចំណោទដែរ»។

លោកស្រីបានបន្ថែមទៀតថា កន្លងមកគណៈកម្មាធិការជាច្រើនដែលត្រូវដើរតួនាទីឯករាជ្យ មិនបានបំពេញតួនាទីរបស់ខ្លួនឲ្យឯករាជ្យនោះទេ។

លោកស្រីបញ្ជាក់ថា៖ «ក្នុងកាលៈទេសៈបច្ចុប្បន្ននេះ ទាំងនីតិបញ្ញត្តិអីហ្នឹងគឺត្រូវបានគ្រប់គ្រងដោយដោយរដ្ឋដែលមកពីគណបក្សកាន់អំណាចសុទ្ធហ្នឹង អ៊ីចឹងយើងមើលទៅដូចជាមិនមានអីដែលយើងអាចរំពឹងថាអាចដំណើរការតាក់តែងនូវច្បាប់មួយដែលយើងធានានូវឯករាជ្យ ហើយទីពីរហ្នឹងការបង្កើតគណៈកម្មាធិការទៀតសោតហ្នឹង តើអាចធានានូវឯករាជ្យកម្រិតណាគឺយើងមិនមានក្ដីសង្ឃឹមទេ»។

យោងតាមគេហទំព័រផ្លូវការគណៈកម្មាធិការសិទ្ធិមនុស្សកម្ពុជា (គ.ស.ម.ក) ដែលជាស្ថាប័នមានតួរនាទី និងភារកិច្ចក្នុងការពារ អភិវឌ្ឍន៍ និងលើកតម្កើងសិទ្ធិមនុស្សនៅកម្ពុជាបញ្ជាក់ថា គណៈកម្មាធិការសិទ្ធិមនុស្សកម្ពុជា(គ.ស.ម.ក) ត្រូវបង្កើតជាផ្លូវការតាមព្រះរាជក្រឹត្យលេខ នស/រកត/១២១៣/១៣៣៦ ចុះថ្ងៃទី៩ ខែធ្នូ ឆ្នាំ២០១៣ ស្ដីពីការរៀបចំជាថ្មីនៃគណៈកម្មាធិការសិទ្ធិមនុស្សកម្ពុជា និងអនុក្រឹត្យ ៥៧០ អនក្រ.បក ចុះថ្ងៃទី២៣ ខែធ្នូ ឆ្នាំ២០១៣ ស្ដីពីការរៀបចំនៃគណៈកម្មាធិការសិទ្ធិមនុស្សកម្ពុជា៕

កូនផ្សោតទី៥ ត្រូវបានប្រទះឃើញហែលទឹកជាមួយហ្វូងផ្សោតនៅកាំពី នៃខេត្តក្រចេះ

មេង គ្រុយពន្លក (Meng Kroypunlok) — Fri, 09 Jul 2021 14:00:45 +0000

កូនផ្សោតទី៥ ដែលមានអាយុតិចជាងមួយសប្ដាហ៍ ត្រូវបានប្រទះឃើញហែលទឹកជាមួយហ្វូងផ្សោត ៩ក្បាលផ្សេងទៀត នៅក្នុងទន្លេមេគង្គកាំពី នៃខេត្តក្រចេះ ដែលនេះការសញ្ញាវិជ្ជមានមួយទៀតអំពីស្ថានភាពផ្សោតនៅក្នុងប្រទេស។ នេះយោងតាមអង្គការមូលនិធិសកលសម្រាប់ការអភិរក្សធនធានធម្មជាតិនៅកម្ពុជា (WWF in Cambodia)។

យោងតាមទំព័រទ្វីទ័រ របស់WWF នៅថ្ងៃទី១ ខែកក្ដដា ឆ្នាំ ២០២១ កូនផ្សោតទី ៥នេះ ត្រូវបានគេប្រទះឃើញហែលទឹកនៅថ្ងៃទី២៨ ខែមិថុនា ឆ្នាំ២០២១។

ផ្សោតនៅប្រទេសកម្ពុជាមានចំនួនត្រឹមតែ ៨៩ ក្បាលប៉ុណ្ណោះ ហើយអ្នកវិទ្យាសាស្រ្តបានពន្យល់ថាចំនួននេះស្ថិតនៅក្នុងកម្រិតថេរ ក្នុងរយៈពេលចំនួនបីឆ្នាំចុងក្រោយនេះ។ នេះយោងតាមរបាយការណ៍ឆ្នាំ២០២០ របស់រដ្ឋបាលជលផល និងWWF in Cambodia។

យោងតាមការស្រាវជ្រាវដដែល ភាពវិជ្ជមាននៃការរស់រានរបស់កូនផ្សោតដល់ធំពេញវ័យក្នុងនោះ ៤,២២ភាគរយ ជាអាត្រារាប់ថ្មីខ្ពស់បំផុតដែលមិនធ្លាប់ត្រូវបានកត់ត្រាក្នុងប្រវិត្តសិក្សាអង្គេតចំនួនសត្វផ្សោតក្នុងរយៈកាលមួយទសវត្សរ៍ចុងក្រោយនេះ ដែលជាសញ្ញាបង្ហាញពីទំនោរនៃកំណើនសន្សឹមៗនៃចំនួនផ្សោតនៅកម្ពុជា។

តែទោះជាយ៉ាង សត្វផ្សោតទន្លេមេគងដែលត្រូវបានចាត់ថ្នាក់ជាប្រភេទសត្វដែលទទួលរងគ្រោះជិតផុតពូជក្នុងបញ្ជីក្រហមរបស់អង្គការIUCN នៅតែរងការប្រឈមនឹងគ្រោះថ្នាក់ធ្ងន់ធ្ងរ។ នេះបើតាមរបាយាការណ៍របស់ WWF។

មងនេសាទ ការសាងសង់ទំនប់នៅតាមទន្លេមេគង្គខាងលើ ការនេសាទហួសកម្រិត ការនេសាទខុសច្បាប់ដូចជាការប្រើប្រាស់ឧបករណ៍ឆក់ នុយពុល គ្រាប់បែកឆ្នៃ សុទ្ធសឹងតែជាកត្តាគម្រាមកំហែងចម្បងៗដល់ការរស់រានមានជីវិតរបស់ផ្សោតទន្លេមេគង្គ៕

អ្នកលក់បន្លែពេលយប់មុខផ្សារជម្ពូវ័ន្តត្អូញត្អែរពីការចំណាយហួសលទ្ធភាពដើម្បីអាចលក់ដូរនៅទីនោះបាន

មេង គ្រុយពន្លក (Meng Kroypunlok) — Wed, 07 Jul 2021 04:37:53 +0000

អ្នកលក់បន្លែតាមចិញ្ចើមផ្លូវជាប់របងសាលាបឋមសិក្សាជម្ពូវ័ន ត្អូញត្អែរចំពោះការចំណាយទៅលើភាស៊ីផ្សារ ថ្លៃសន្តិសុខ និងទីកន្លែងសម្រាប់ការដាក់លក់ទំនិញ ថាមានតម្លៃខ្ពស់ ត្បិតតំបន់នោះជាទីតាំងសាធារណៈ។

លោកស្រី ឈឹម ចាន់លក្ខិណា ជាអាជីវករម្នាក់លក់បន្លែនៅជាប់របងសាលាបឋមសិក្សាជម្ពូវ័ន បានប្រាប់ Newsroom Cambodia កាលពិថ្ងៃទី២៧ ខែមិថុនា ឆ្នាំ២០២១នេះថា លោកស្រីបានប្រកបរបរនេះអស់រយៈពេលប្រមាណជាជាង៣ឆ្នាំមកហើយ និងបានប្ដូរមកលក់នៅតំបន់ជម្ពូវ័នក្រោយពីផ្សារដើមគរដែលជាទីតាំងចាស់ត្រូវបានបិទដោយសារតែមានការឆ្លងរីករាលដាលជំងឺកូវីដ១៩។ លោកស្រីបន្តថា នៅទីតាំងជម្ពូវ័ន្តនេះ ខាងអ្នកគ្រប់គ្រងទីតាំងលក់ថ្មីហាក់មានការកេងប្រវ័ញ្ចទៅលើក្រុមអាជីវករ ដោយអាជីវករម្នាក់ៗត្រូវចំណាយច្រើនជាងនៅផ្សារដើមគរអំឡុងពេលមិនទាន់ត្រូវបានបិទ។

លោកស្រីលើកឡើងថា៖ «ខាងជម្ពូវ័ន្តនេះគាត់ដូចជាគៀបសង្កត់ខាងខ្ញុំពេក ដោយសារភាស៊ីថ្លៃលើសលប់ពីផ្សារដើមគរពេក នៅនេះ[ ជម្ពូវន្ត ] ខ្ញុំចំណាយអស់មួយម៉ឺនរៀលជាង ហើយបើនៅផ្សារដើមគរវិញខ្ញុំចំណាយអស់តែបួនពាន់ទៅប្រាំពាន់រៀលទេ ថ្លៃស៊ិនទ្រី សណ្ដាប់ធ្នាប់ ហើយកន្លែងដែលខ្ញុំជួលគឺមួយម៉ែត្រក្នុងមួយម៉ឺនរៀល។ ១០,០០០គឺពេញថ្លៃ»។

ស្រដៀងគ្នានេះដែរ អាជីវករមួយរូបទៀតសុំមិនបញ្ចេញឈ្មោះបានឲ្យដឹងថា គាត់បានមកលក់ដូរនៅទីតាំងនេះហើយជួលកន្លែងគេដើម្បីប្រកបរបរចិញ្ចឹមជីវិត ដោយបានចំណាយប្រាក់ច្រើនក្នុងមួយយប់ប្រមាណជាបីម៉ឺន ទៅបួនម៉ឺនរៀល នេះមិនគិតថ្លៃចំណាយខាងក្រៅដូចជាភាស៊ី ថ្លៃសំរាម ថ្លៃសណ្ដាប់ធ្នាប់ផងទេ។

លោកបញ្ជាក់យ៉ាងដូច្នេះថា៖ «បើតាមខ្ញុំគិត ថ្លៃភាស៊ីថ្លៃសំរាមអី គឺត្រូវតែយកហើយអាហ្នឹងព្រោះអីកន្លែងគេកាន់កាប់ ចំណែកថ្លៃកន្លែងយើងពិបាកថាដែរ ព្រោះដីនេះដីរបស់រដ្ឋ តាមពិតរបងនេះរបងវត្តទេ ណាមួយយើងពិបាកនិយាយផង កន្លែងនេះគេកាន់កាប់ គេនិយាយម៉េចថាចឹងហើយ យើងអត់អាចតវ៉ាគេបាន យើងអ្នកលក់ដូរចិញ្ចឹមគ្រួសារកូនតូចអ៊ីចឹង»។

ចំណែកឯអ្នកប្រមូលលុយពីអាជីវករដែលអះអាងថាប្រជាការពារភូមិបានប្រាប់ Newsrooom Cambodia ដោយមិនបង្ហាញអត្តសញ្ញាណថា លោកមិនសូវដឹងអំពីបញ្ហានេះទេ។

លោកលើកឡើងថា៖ «បើបងឯងជាអ្នកកាសែតបងមកយកនៅនេះមក បងឯងសួរខ្ញុំក៏ខ្ញុំអត់ដឹងដែរ ព្រោះជាការងាររបស់គេ ខ្ញុំគ្រាន់តែធ្វើចរាចណ៍តែប៉ុណ្នឹងទេ»។

រដ្ឋបាលខណ្ឌពោធិ៍សែនជ័យដែលបានបង្ហោះលេខទូរស័ព្ទលើទំព័រហ្វេសប៊ុក បានប្រាប់ Newsroom Cambodia តាមបណ្តាញសង្គមតេឡេក្រាមដោយមិនប្រាប់ឈ្មោះ និងតួនាទីថា៖ «សាលាខណ្ឌនឹងយកបញ្ហានេះដាក់ជូនលោកអភិបាលខណ្ឌ»។

Newsroom Cambodia បានព្យាយាមទាក់ទងសុំការបំភ្លឺពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី តែមិនមានការឆ្លើយតប ។

ប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ បានប្រាប់ Newsrooms Cambodia ថានេះមិនមែនជាលើកទីមួយទេដែលមានការយកថ្លៃហួសកំណត់ ហើយរដ្ឋាភិបាលគួរតែមានវិធានការក្នុងការដោះស្រាយលើបញ្ហាអាជីវករទាំងនេះ។

លោកលើកឡើងថា៖ «ខ្ញុំគិតថារឿងបែបនេះរដ្ឋាភិបាលគួរមានវិធានការហើយវាមិនមែនជា កុំឱ្យគេហៅថាទុក្ខលំបាករបស់អាជីវករទៅជាឱកាសរបស់មនុស្សខិលខូច មនុស្សលោភលន់»។

គួរបញ្ជាក់ថា អាជីវករផ្សារដើមគរបានប្តូរទីតាំងទៅលក់នៅតំបន់ផ្សេងៗក្នុងរាជធានីភ្នំពេញ ដូចជាតំបន់ជម្ពូរវ័ន្ត និងតំបន់គួរស្រូវជាដើម បន្ទាប់ពីផ្សារដើមគរត្រូវបានបិទបណ្តោះអាសន្នដោយសារមានការរីករាលដាលជំងឺកូវីដ១៩៕

Vox pop: ទស្សនៈយល់ឃើញលើហេដ្ឋារចនាសម្ព័ន្ធនៅកម្ពុជា

មេង គ្រុយពន្លក (Meng Kroypunlok) — Thu, 01 Jul 2021 03:35:57 +0000

ហេដ្ឋារចនាសម្ព័ន្ធសំដៅលើមធ្យោបាយ និងទំនាក់ទំនងផលិតកម្មដែលជាមូលដ្ឋាននៃសង្គមដែលមានជា ផ្លូវ (ថ្នល់ ដែក ទឹក អាកាស) កំពង់ផែ ការដឹកជញ្ជូនតាមផ្លូវអាកាស គមនាគមន៍ អ៊ីនធឺណិត ទូរសព្ទជាដើម។ល។ Newsroom Cambodia បានសម្ភាសន៍យុវជនចំនួន៦ អង្គនាក់ទាក់ទងហេដ្ឋារចនាសម្ព័ន្ធនៅប្រទេសកម្ពុជានាពេលបច្ចុប្បន្ននេះ។

លោក នុន វាសនា អាយុ២៨ឆ្នាំ បច្ចុប្បន្នកំពុងរស់នៅទីក្រុងភ្នំពេញបានផ្ដល់កិច្ចសម្ភាសន៍ដល់ Newsroom Cambodia ថា ហេដ្ឋារចនាសម្ព័ន្ធនៅកម្ពុជាមិនទាន់បំពេញតម្រូវការរបស់ប្រជាជនកម្ពុជានៅឡើយទេ។

លោកលើកឡើងថា៖ «តាមអ្វីដែលយើងមើលឃើញមិនថាប្រព័ន្ធទឹក ភ្លើង ឬក៏ថ្នល់ទេវាល្អប្រសើរច្រើន ប៉ុន្តែវាល្អប៉ុណ្ណឹងវាល្អពេញលក្ខណៈជារដ្ឋមួយដែលអាចអាចកសាងហេដ្ឋារចនាសម្ព័ន្ធបានហើយឬនៅដែលបានដឹកនាំរយៈពេល៤០ឆ្នាំចំពោះការយល់ឃើញរបស់ខ្ញុំវាមិនបានល្អទេ ហេតុអ្វីជាក់ស្ដែងចំពោះប្រព័ន្ធធារាសាស្រ្តមិនទាន់មានភាពល្អប្រសើរដែរ គឺប្រជាពលរដ្ឋនៅតែធ្វើស្រែពឹងទៅលើទឹកភ្លៀងដដែល»។

កញ្ញា ផល ករុណា អាយុ២១ ជានិស្សិតនៅសាកលវិទ្យាល័យភូមិន្ទភ្នំពេញ មានស្រុកកំណើតនៅខេត្តកណ្ដាល បានផ្ដល់កិច្ចសម្ភាសន៍ដល់ Newsroom Cambodia ថា ហេដ្ឋារចនាសម្ព័ន្ធមានការរីកចម្រើនដោយតំបន់ និងមានតំបន់ខ្លះមិនសូវមានគុណភាព។

កញ្ញាលើកឡើងថា៖ «សម្រាប់ខ្ញុំផ្លូវគមនាគមន៍នៅប្រទេសកម្ពុជាឃើញថាមានការរីកចម្រើនខ្លាំង ប៉ុន្តែខ្ញុំសង្គេតឃើញរីកចម្រើនតែតំបន់ណាឬក៏ផ្លូវណាដែលអនុគ្រោះដល់ប្រព័ន្ធសេដ្ឋកិច្ច ឧទាហណ៍ដូចជាផ្លូវជាតិលេខ៣ដោយសារតែមានកំពង់ផែនៅខាងកំពតអ៊ីចឹងបានជាគេបានពង្រីកផ្លូវហ្នឹង ហើយផ្លូវជាតិលេខ២ខ្ញុំឃើញថាដោយសារតែអត់សូវមានសក្ដានុពលទាក់ទងនៅខាងហ្នឹង អ៊ីចឹងគេអត់សូវយកចិត្តទុកដាក់ក្នុងការធ្វើទេ ប៉ុន្តែគេនៅតែធ្វើដែរគ្រាន់តែវាចំណាយពេលយូរអ៊ីចឹង ហើយហ្នឹងផ្លូវធំៗ ហើយបើផ្លូវមួយចំនួនទៀតដែលពីមុនមកដូចជាផ្លូវនៅម្ដុំខ្ញុំអី ឃើញធ្វើរហូតហើយបានតែប៉ុន្មានឆ្នាំខូចហើយដោយសារតែខូចហ្នឹង ទីមួយដោយសារតែឡានដឹកដីច្រើន ហើយមួយទៀតនៅតំបន់ខ្ញុំហ្នឹងវាមានទឹកលិចស្ទើតែរាល់ឆ្នាំ»។

កញ្ញាហ៊ាម ស្រីហ៊ាង អាយុ២០ឆ្នាំ មកពីខេត្តបន្ទាយមានជ័យ បានប្រាប់ Newsroom Cambodia ថាផ្លូវនៅតំបន់ជនបទមិនទាន់រីកចម្រើន និងពិបាកធ្វើដំណើរ។

កញ្ញាលើកឡើងថា៖ «តំបន់ខាងខ្ញុំ ខាងទីជនបទនៅស្រុកខ្មែរចំការយើងហ្នឹងនៅខាងតាមយើងហ្នឹងទីជនបទគឺគាត់ប្រកបរបរធ្វើស្រែចំការ ឬក៏ធ្វើចំការដំឡូងអីជាដើម អ៊ីចឹងនៅពេលប្រមូលផលមានឡានដឹកទំនិញជាច្រើនតែប្រសិនបើយើងនិយាយពីផ្លូវវិញ គឺផ្លូវមានតែមួយទេហើយផ្លូវនៅតាមទីជនបទវាអត់មានលក្ខណល្អប្រសើរដូចនៅភ្នំពេញទេ វាអត់មានផ្លូវគេហៅថាកៅស៊ូ ឬផ្លូវចាក់បេតុងអីទេ មានផ្លូវចាក់បេតុងតែគេចាក់ដោយកន្លែង ឃើញថានៅពេលដែលគាត់ដឹកទំនិញធ្ងន់ៗលើផ្លូវឆ្លងកាត់យើងតែមួយផ្លូវដើរក៏យើងដើរផ្លូវហ្នឹង ហើយផ្លូវម៉ូតូក៏យើងឆ្លងកាត់ផ្លូវហ្នឹងហើយចំណែកឯផ្លូវឡានសម្រាប់ដឹកទំនិញក៏យើងជិះកាត់ផ្លូវហ្នឹង អ៊ីចឹងនៅពេលដែលគាត់ដឹកទំនិញធ្ងន់ៗវាធ្វើឱ្យផ្លូវខូចទ្រង់ទ្រាយច្រើន យើងត្រូវជួសជុលផ្លូវហ្នឹងរហូត អ៊ីចឹងប្រសិនជាមានផ្លូវសម្រាប់ដឹកទំនិញធ្ងន់ៗផ្សេង ហើយផ្លូវសម្រាប់ប្រជាពលរដ្ឋដើរ ឬក៏ធ្វើដំណើរទៅណាផ្សេងៗហ្នឹងវាជាការល្អ»។

កញ្ញាសុគន្ធ កញ្ញា អាយុ២៣ឆ្នាំ ជានិស្សិតនៅសាកលវិទ្យាល័យភូមិន្ទភ្នំពេញ មានស្រុកកំណើតនៅខេត្តកណ្ដាល បានផ្ដល់កិច្ចសម្ភាសន៍ដល់ Newsroom Cambodia ថាហេដ្ឋារចនាសម្ព័ន្ធមានការរីកចម្រើនដោយតំបន់។

កញ្ញាលើកឡើងថា៖ «សម្រាប់ហេដ្ឋារចនាសម្ព័ន្ធនៅប្រទេសកម្ពុជា ខ្ញុំយល់ឃើញថាមានការរីកចម្រើនល្អប្រសើរជាងមុនដោយសារតែផ្លូវមានការអភិវឌ្ឍន៍បានច្រើនទាំងផ្លូវគោក ទាំងផ្លូវអាកាស។ យើងក្រឡេកមើលផ្លូវគោកគឺផ្លូវជាតិគឺយើងធ្វើ យើងសង្កេតឃើញថាធ្វើបានច្រើនអ៊ីចឹង ហើយទាក់ទងហ្នឹងផ្លូវអាកាសក៏ដូចគ្នាដែរគឺកំពុងសាងសង់ស្ពានជាច្រើនសម្រាប់ធ្វើដំណើរ ហើយមួយទៀតទាក់ទងទៅហ្នឹងប្រព័ន្ធធារាសាស្រ្តគឺមានតំបន់មួយចំនួនគាត់មានប្រព័ន្ធបង្ហូរចេញចូលអ៊ីចឹង គាត់អាចធ្វើស្រែក្នុងមួយឆ្នាំគឺបានបួនដងគឺធ្វើស្រូវស្រាល អ៊ីចឹងគឺពួកគាត់មានទឹកគ្រប់គ្រាន់សម្រាប់ការធ្វើកសិកម្មរបស់ពួកគាត់ហ្នឹង»។

ព្រះតេជគុណហឿន ចាន់មករា ជាសមណសិស្សនៃពុទ្ធកវិទ្យាល័យព្រះសុរាម្រិត ព្រះជន្ម២០ព្រះវស្សា មានសង្ឃដីកាថា ហេដ្ឋារចនាសម្ព័ន្ធនៅប្រទេសកម្ពុជាដូចជាផ្លូវ ស្ពាន ព្រែក រោងចក្រ អគ្គីសនី មិនសូវបានបម្រើដល់ប្រជាជនទូទៅនោះទេ។

«ចំពោះការយល់ឃើញរបស់ខ្ញុំករុណាចំពោះហេដ្ឋារចនាសម្ព័ន្ធនៅប្រទេសកម្ពុជាដូចជាផ្លូវ ស្ពាន ព្រែក រោងចក្រ អគ្គីសនី អីជាដើមហ្នឹង ជាការយល់ឃើញរបស់ខ្ញុំករុណារបស់ទាំងអស់នោះវាមិនសូវបានបម្រើដល់ប្រជាជនទូទៅដូចជាយើងមើលឃើញទៅលើអគ្គីសនីមួយ បើថាយើងបង្កើតមកដើម្បីធ្វើឱ្យប្រជាពលរដ្ឋប្រើប្រាស់អគ្គសនីច្រើនមែនក៏ប៉ុន្តែនៅក្នុងហ្នឹងប្រជាពលរដ្ឋមួយចំនួនក៏ពួកគាត់ត្រូវបាត់បង់ផលប្រយោជន៍ជាច្រើន ហើយសំណងផ្សេងៗហ្នឹងមិនបានតបទៅពួកគាត់ហើយអគ្គីសនីហ្នឹងទៀតសោទវានៅមានការខ្វះខាតច្រើន ដូចច្នេះជាការយល់ឃើញថាអគ្គសនីនេះគឺនៅខ្វះខាត ប្រលានយន្តហោះក៏ដូចគ្នាថ្វិតថាយើងឃើញមានការអភិវឌ្ឍច្រើនក៏ប៉ុន្តែហេដ្ឋារចនាសម្ព័ន្ធហ្នឹងវាល្អ តែវាក៏ប៉ះពាល់ដល់ប្រជាពលជាច្រើនទាំងដែលរដ្ឋាភិបាលរបស់យើងគាត់មិនបានដោះស្រាយបានល្អ»។

កញ្ញា ឈុន ស៊ីនិត មានអាយុ២០ឆ្នាំ មានស្រុកកំណើតនៅខេត្តព្រៃវែងបានប្រាប់ Newsroom Cambodia ថាផ្លូវមួយចំនួននៅប្រទេសកម្ពុជានៅមានកន្លែងខ្លះហុយនៅឡើយ។

កញ្ញាបញ្ជាក់ថា៖ «ទាក់ទងហ្នឹងហេដ្ឋារចនាសម្ព័ន្ធនៅប្រទេសកម្ពុជាយើងកន្លែងខ្លះក៏កំពុងតែអភិវឌ្ឍន៍ រៀបចំចាក់កៅស៊ូបំបាត់ការហ៊ុយដីអ៊ីចឹងទៅ ប៉ុន្តែកន្លែងខ្លះក៏បានសាងសងហើយធ្វើហើយ ប៉ុន្តែកន្លែងខ្លះទៀតក៏យើងឃើញថាមិនទាន់បានសាងសង់ហើយទេវានៅតែមានដីហ៊ុយលក្ខណៈថាវាមិនមែនដីកៅស៊ូអ៊ីចឹង អ៊ីចឹងវាមានច្រើនផ្នែកដែរ អ្វីដែលជាក់ស្ដែងខ្ញុំឃើញគឺឃើញតែដីហ៊ុយមានតែដែលកន្លែងហ្នឹងមិនទាន់មានការអភិវឌ្ឍនៅឡើយ ព្រោះអីខ្ញុំបានមើលទាក់ទងហ្នឹងព័ត៌មានមួយរបស់ចលនាមាតាធម្មជាតិដែលគេផ្សាយថ្មីៗហ្នឹង ផ្លូវមានដីហ៊ុយដូចព្រិលអ៊ីចឹងតែមិនមែនព្រិលទេជាកន្លែងមិនទាន់មានការអភិវឌ្ឍទេអ៊ីចឹង»៕

អង្គការឃ្លាំមើលសិទ្ធិមនុស្ស អំពាវនាវឱ្យរដ្ឋាភិបាលទម្លាក់បទចោទប្រកាន់ប្រឆាំងសកម្មជនបរិស្ថាន

មេង គ្រុយពន្លក (Meng Kroypunlok) — Fri, 25 Jun 2021 15:21:13 +0000

អង្គការឃ្លាំមើលសិទ្ធិមនុស្ស (Human Rights Watch) ថ្ងៃអង្គារ ទី២១ ខែកក្កដា បានអំពាវនាវឱ្យរដ្ឋាភិបាលកម្ពុជាទម្លាក់បទចោទប្រកាន់លើសកម្មជនបរិស្ថាន និងបញ្ឈប់ការធ្វើទុកបុកម្នេញលើអ្នកធ្វើយុទ្ធនាការដោយសន្ដិវិធី។

អង្គការឃ្លាំមើលសិទ្ធិមនុស្ស បាននិយាយក្នុងសេចក្ដីថ្លែងការណ៍ថារដ្ឋាភិបាលកម្ពុជាគួរទម្លាក់ការចោទប្រកាន់ប្រឆាំងក្រុមសកម្មជនបរិស្ថានចលនាមាតាធម្មជាតិចំនួនបីនាក់រួមមានកញ្ញាស៊ុន រដ្ឋាអាយុ២៦ឆ្នាំ លោកយឹម លាងហ៊ី៣២ឆ្នាំ និងលោកលី ចន្រ្ទាវុធ អាយុ២២ឆ្នាំ។

នាយករងទទួលទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្ស លោកហ្វីល រ៉ូប៊ើតសិន បានលើកឡើងថា «រដ្ឋាភិបាលកម្ពុជាបានបង្កើនយុទ្ធនាការរបស់ខ្លួនដើម្បីបំបិទមាត់សកម្មជនតស៊ូមតិដើម្បីការពារបរិស្ថាន»។

សេចក្ដីថ្លែងការណ៍ដដែលបានស្នើរទៅរដ្ឋាភិបាលបរទេស ក្រុមអង្គការសហប្រជាជាតិ និងម្ចាស់ជំនួយអន្តរជាតិគួរតែអំពាវនាវ ឲ្យអាជ្ញាធរកម្ពុជាទម្លាក់ចោលការចោទប្រកាន់ដែលមិនសមហេតុផលចំពោះសកម្មជនបរិស្ថាន និងថ្កោលទោសជាសាធារណៈចំពោះការគាបសង្កត់បន្ថែមទៀតលើសកម្មភាពសន្តិភាពដោយសេរី។

លោកហ្វីល រ៉ូប៊ើតសិន បានលើកឡើងថាតុលាការនៅប្រទេសប្រទេសកម្ពុជាមានលក្ខណៈនយោបាយ ដូចនេះសកម្មជនបរិស្ថានគ្មានឱកាសទទួលបានយុត្តិធម៌ទេ ដូច្នេះមានតែសម្ពាធអន្តរជាតិមកលើរដ្ឋាភិបាលកម្ពុជាប៉ុណ្ណោះ ទើបអាចជួយសង្គ្រោះសកម្មជនទាំងនេះពីការជាប់ពន្ធនាគារដោយអយុត្តិធម៌បាន។

Newsroom Cambodia បានទាក់ទងទៅជាអ្នកនាំពាក្យក្រសួងយុត្តិធម៌ លោកជិន ម៉ាលីនតាមរយៈប្រព័ន្ធតេឡេក្រាម (Telegram) តែលោកមិនបានឆ្លើយតបនោះទេ។

ក្រសួងមហាផ្ទៃ កាលពីថ្ងៃទី២៣ ខែមិថុនា ឆ្នាំ២០២១នេះ បាននិយាយថាអង្គការមាតាធម្មជាតិជាបណ្ដាញសកម្មជនខុសច្បាប់ ហើយបានបន្តលោក Alexandro Gonzalez Davidson សញ្ជាតិអេស្ប៉ាញ ដែលឈរពីក្រោយឈ្មោះអង្គការនេះ បានដឹកនាំកិច្ចប្រជុំជាមួយសកម្មជនរបស់ខ្លួន ០៣រូប ដោយបានប្រើពាក្យពេចន៍ប្រមាថលើអង្គព្រះមហាក្សត្រ និងរដ្ឋាភិបាល។

ក្រសួងមហាផ្ទែបាននិយាយដូច្នេះថា «ទង្វើទាំងនេះគឺជាផែនការញុះញង់បញ្ចើឱ្យមានការបែកបាក់ជាតិ និងរំលោភបំពានទៅលើរដ្ឋធម្មនុញ្ញនៃព្រះរាជាណាចក្រកម្ពុជា ក្នុងចេតនាបង្កអសន្តិសុខសង្គម និងប៉ះពាល់ដល់ស្ថិរភាពជាតិ ដែលអាជ្ញាធរមានសមត្ថកិច្ចចាំបាច់ត្រូវចាត់វិធានកាតាមច្បាប់ជាធរមាន»។

គួរបញ្ជាក់ផងដែរថា សហរដ្ឋអាមេរិកមួយផ្នែកដោយសារតែការយាយីសកម្មជនការពារបរិស្ថាន បានប្រកាសនៅថ្ងៃទី១៧ ខែមិថុនាថាខ្លួននឹងកាត់ផ្តាច់ថវិកាជាង ១០០លានដុល្លារសម្រាប់គម្រោង «បៃតងព្រៃឡង់» របស់រដ្ឋាភិបាលកម្ពុជា ហើយថវិកាទាំងនេះនឹងបង្វិលទៅក្រុមសង្គមស៊ីវិលដែលធ្វើការលើកិច្ចការពារបរិស្ថានវិញ៕

សកម្មជនបរិស្ថានមាតាធម្មជាតិត្រូវបានចោទប្រកាន់ពីបទរួមគំនិតក្បត់ និងបទប្រមាថព្រះមហាក្សត្រ

មេង គ្រុយពន្លក (Meng Kroypunlok) — Tue, 22 Jun 2021 08:22:24 +0000

សកម្មជនបរិស្ថានបីនាក់ត្រូវបានចោទប្រកាន់ដោយសាលាដំបូងរាជធានីភ្នំពេញ និងបញ្ជូនទៅពន្ធនាគារនៅថ្ងៃទី២១ ខែមិថុនា ឆ្នាំ២០២១ ពីបទរួមគំនិតក្បត់ និងបទប្រមាថព្រះមហាក្សត្រ។ នេះយោងអង្គការចលនាមាតាធម្មជាតិ (Mother Nature Cambodia)។

យោងតាមរយៈទំព័រហ្វេសបុកផ្លូវការរបស់ចលនាមាតាធម្មជាតិ សកម្មជនបរិស្ថានចំនួនបីនាក់រួមមានកញ្ញាស៊ុន រដ្ឋា លោកយឹម លាងហ៊ី និងលោកលីចន្រ្ទដារ៉ាវុត ដែលត្រូវបានចាប់ខ្លួនកាលពីសប្តាហ៏មុន នៅខណ្ឌដូនពេញ ក្រោយពីពួកគេថតវីដេអូទឹកស្អុយហូរចូលទន្លេ នៅម្ដុំមុខព្រះបរមរាជរាំង។

ចលនាមាតាធម្មជាតិបានសំដែងការសោកស្ដាយ និងបានហៅការចោទប្រកាន់នេះថាជាការចោទប្រកាន់តាមអំពីចិត្តទាំងស្រុងដោយគ្មានភ័ស្តុតាងអ្វីទាំងអស់។

មន្ត្រីជាន់ខ្ពស់តស៊ូមតិគម្រោងអ្នកការពារព្រៃឈើនៃសមាគមបណ្ដាញយុវជនកម្ពុជា លោកសាន ម៉ាឡាបាននិយាយថាការចាប់ខ្លួន និងចោទប្រកាន់សកម្មជនបរិស្ថានគឺប្រាសចាកការពិតឆ្ងាយ មិនសមហេតុផល និងមានលក្ខណៈធ្ងន់ធ្ងរ។

លោកបានប្រាប់ Newsroom Cambodia ដូច្នេះថា៖ «ខ្ញុំយល់ឃើញថាការដែលចាប់ខ្លូន និងចោទប្រកាន់សកម្មជនបរិស្ថានទាំងបីនាក់នេះពីបទរួមគំនិតក្បត់ និងប្រមាថអង្គព្រះមហាក្សត្រវាជារឿងមួយប្រាកចាកការពិតឆ្ងាយមិនសមហេតុផលហើយមានលក្ខណៈធ្ងន់ធ្ងរ អ្វីដែលពួកគាត់ធ្វើកន្លងមកគឺជាការចូលរួមចំណែកយ៉ាងសំខាន់មួយក្នុងដំណើរការអភិរក្ស ការពារថែរក្សាធនធានធម្មជាតិ ហើយពួកគាត់មានសេចក្ដីក្លាហាននៅក្នុងការរាយការណ៍អំពីវិនាសកម្មមកលើធនធានធម្មជាតិនៅក្នុងប្រទេសកម្ពុជារបស់យើង»។

ចំណែកឯលោកសឹង សែនករុណ អ្នកនាំពាក្យនៃសមាគមការពារសិទ្ធិមនុស្សអាដហុក(ADHOC)បានប្រាប់និយាយថាបទចោទទាំងអស់ហ្នឹងមិនបានឆ្លុះបញ្ជាំងទៅលើអំពើរបស់សកម្មជនបរិស្ថាននោះទេ។

លោកបានប្រាប់ Newsroom Cambodia ដូច្នេះថា៖ «បើយើងពិនិត្យអំពីមូលដ្ឋាននៃការចោទវិញ ខ្ញុំអត់ដឹងថាខាងតុលាការគេមានមូលដ្ឋានអ្វីក្នុងការចោទប្រកាន់មកលើសកម្មជនបរិស្ថាននោះទេទាំងរឿងប្រមាថព្រះមហាក្សត្រ ទាំងរឿងរួមគំនិតក្បត់ ប៉ុន្តែអ្វីដែលយើងមើលឃើញក្នុងរឿងសកម្មជនបរិស្ថានបួន ប្រាំរូបទាំងអស់ដែលបានចោទប្រកាន់ ហើយអ្នកខ្លះត្រូវបានគេដោះលែងទាំងអស់ហ្នឹង ខ្ញុំឃើញអ្នកដែលចោទប្រកាន់ក្នុងបទនេះវាហាក់ដូចអត់ស្របទៅហ្នឹងអំពើរបស់ពួកគាត់ ហើយគោលបំណងធ្វើសកម្មភាពរបស់ពួកគាត់»។

«ហើយបើយើងពិនិត្យមើលកន្លងមកនៅក្នុងបណ្ដាញសង្គមដែលពួកគាត់លើកឡើងបង្ហាញដល់សាធារណៈជនហ្នឹងគឺពាក់ពាន្ធហ្នឹងការការពារបរិស្ថាន ផលប៉ះពាល់បរិស្ថាន និងធនធានធម្មជាតិទាំងអស់នោះទៅវិញទេ ហើយបញ្ហាទាំងអស់នេះជាបញ្ហាកើតមានក្នុងសង្គមខ្មែរដែលយើងទទួលស្គាល់ទាំងអស់គ្នាដែលកំពុងមានបញ្ហាប៉ះពាល់ ហើយរងការបំផ្លិចបំផ្លាញផ្សេងៗទាំងអស់ហ្នឹង»។

តាមរយៈទំព័រហ្វេសបុកនៅថ្ងៃចន្ទ ទី២១ នាយិកានៃមជ្ឃមណ្ឌលសិទ្ធិមនុស្សកម្ពុជា(CCHR) លោកស្រី ចក់ សុភាព បានលើកឡើងទាថា ខណៈដែលនៅក្នុងពន្ធនាគារមានបញ្ហាប្រឈមនឹងការឆ្លងជំងឺកូវីដ១៩ តែបែរជាបន្ថែមការឃុំខ្លួនយុវជនទៅវិញ។

លើសពីនេះទៅទៀតលោកស្រីក៏បានលើកឡើងពីរចំនុច ដែលចំនុចទីមួយទាក់ទងអំពីគោលការណ៍ជនត្រូវចោទត្រូវតែមានសេរីភាព ហើយករណីពិសេសតែប៉ុណ្ណោះដែលការឃុំខ្លូនបណ្ដោះអាសន្នគួរធ្វើឡើងនិងតាមលក្ខខណ្ឌចាំបាច់ប៉ុណ្ណោះ។ ចំណែកចំនុចទីពីរលោកស្រីបានលើកឡើងអំពីលក្ខខណ្ឌសិទ្ធិទទួលបានការសន្មតទុកជាមុនថាគ្មានទោសគឺជាសិទ្ធិចាំបាច់មួយក្នុងការធានាថាពលរដ្ឋគ្រប់រូប ជាពិសេសជនជាប់ចោទ ទទួលបានការជំនុំជម្រះដោយយុត្តិធម៌។

ឯកអគ្គរដ្ឋទូតសហរដ្ឋអាមេរិក បាននិយាយនៅលើទ្វីទ័ររបស់ខ្លួនថាមានក្ដីបារម្ភលើការចាប់ខ្លួនសកម្មជនបរិស្ថានជាបន្តបន្ទាប់ ហើយលោកបានបន្ថែមថាការចុះផលិតវីដេអូស្ដីពីទឹកកខ្វក់ មិនមែនជាអំពើភេរវកម្មឡើយ។ បន្ថែមពីនេះលោកឯកអគ្គរដ្ឋទូតក៏បានអំពាវនាវឱ្យរដ្ឋាភិបាលកម្ពុជាធ្វើការឆ្លើយតបជាដំណោះស្រាយចំពោះពលរដ្ឋ ដោយមិនមែនជាការបំបិតសំឡេងទេ។

លោកប្លង់ សុផល អ្នកនាំពាក្យសាលាដំបូងរាជធានីភ្នំពេញ បានប្រាប់ Newsroom Cambodia ថាលោកមិនអាចផ្ដល់ចម្លើយណាមួយពាក់ព័ន្ធនឹងចំណាត់ការនៃរឿងក្ដីនោះទេ។

ចំពោះបទរួមគំនិតក្បត់នេះវិញ កថាខណ្ឌទី២ មាត្រា ៤៥៣នៃក្រមព្រហ្មទណ្ឌកំណត់ថា «ការរួមគំនិតក្បត់ត្រូវផ្ដន្ទាទោសដាក់ពន្ធធនាគារពី៥ឆ្នាំ ទៅ១០ឆ្នាំ»។ ចំពោះបទប្រមាថអង្គព្រះមហាក្សត្រវិញមាត្រា៤៣៧ (ស្ទួន) កថាខណ្ឌទីពីរកំណត់ថា «ការប្រមាថចំពោះអង្គព្រះមហាក្សត្រ ត្រូវផ្តន្ទាទោសដាក់ពន្ធនាគារពីមួយឆ្នាំ ទៅប្រាំឆ្នាំ និងពិន័យជាប្រាក់ពី ពីរលានរៀល ទៅដប់លានរៀល»៕

រដ្ឋបាលរាជធានីភ្នំពេញប្រកាសផ្អាកបណ្ដោះអាសន្នសកម្មភាពហានិភ័យខ្ពស់ឆ្លងកូវីដ រយៈពេលពីរសប្ដាហ៍

មេង គ្រុយពន្លក (Meng Kroypunlok) — Sat, 19 Jun 2021 13:09:23 +0000

រដ្ឋបាលរាជធានីភ្នំពេញនៅថ្ងៃសៅរ៍ ទី១៩នេះ បានដាក់ចេញសេចក្ដីសម្រចផ្អាកជាបណ្ដោះអាសន្ននូវសកម្មភាពមួយចំនួននៅរាជធានីដែលមានហានិភ័យខ្ពស់នៃការឆ្លង់ជំងឺកូវីដ ១៩ រយៈពេលពីរសប្ដាហ៍។

ចំពោះសកម្មភាពការងារ មុខរបរ ឬអាជីវកម្មដែលត្រូវបិទមានដូចជា សាលារៀនរួមទាំងសាលាបណ្ដុះបណ្ដាលលើកលែងតែសាលារៀនណាដែលណាបណ្ដុះបណ្ដាលតាមអនឡាញ អាជីវកម្មក្លឹបកំសាន្តគ្រប់ប្រភេទ រមណីដ្ឋាន សារមន្ទីរ សួនកំសាន្ត អាជីវកម្មម៉ាស្សា រោងភាពយន្ត រោងសម្ដែងសីល្បៈ ក្លឹបហាត់ប្រាណ និងមជ្ឍមណ្ឌលកីឡា។

ចំពោះការជួបជុំវិញត្រូវបានផ្អាកលក្ខណៈជាឯកជនដែលមិនឱ្យលើសពី ១៥នាក់ លើកលែងតែការជួបជុំនោះមានដូចជា«ការជួបជុំលក្ខណៈគ្រួសារ ការរៀបចំពិធីបុណ្យសពដោយគោរពវិធានការសម្ថកិច្ច ការជួបជុំរបស់ស្ថាប័នសាធារណៈជាដើម»។

គួរបញ្ជាក់ផងដែរថាការចេញវិធានការបែបនេះ បានកើតឡើងបន្ទាប់ពីក្រសួងសុខាភិបាលបានប្រកាសរកឃើញវីរុសកូវីដ១៩ បម្លែងថ្មីប្រភេទB.1.617-2(Delta) ចំនួន ០៧ករណីលើអ្នកដំណើរចូលមកកម្ពុជា និងករណីស្លាប់សរុបចំនួន២០នាក់ ជាករណីស្លាប់ក្នុងមួយថ្ងៃច្រើនបំផុតនៅថ្ងៃសោរ៍ដដែលនេះផងដែរ៕

Q&A: ការអនុវត្តអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្រ្តីភេទរបស់កម្ពុជា

មេង គ្រុយពន្លក (Meng Kroypunlok) — Wed, 09 Jun 2021 10:51:05 +0000

លោកស្រី ចក់សុភាព ជានាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា(Cambodian Center for Human Rights) ។ លោកស្រីបានផ្ដល់បទសម្ភាសន៍ដល់សិក្ខាកាម Newsroom Cambodia ព្រះតេជគុណ មេង គ្រុយពន្លក អំពីអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្រ្តីភេទ។

Q: តើអ្វីទៅជាអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្រ្តីភេទ ដែលកម្ពុជាក្លាយជារដ្ឋភាគីនៅថ្ងៃទី១៥ ខែតុលា ឆ្នាំ១៩៩២?

A: ច៎ា! ព្រះអង្គ អនុសញ្ញានេះគឺពាក់ព័ន្ធនឹងការចូលរួមទប់ស្គាត់នឹងការរើសអើងប្រឆាំងនឹងរាល់ទម្រង់នៃការប្រើប្រាស់ហិង្សា ឬក៏ការរើសអើងគ្រប់ទម្រង់ទៅលើស្ត្រីហើយ និងក្មេងស្រីផងដែរដោយសារឆ្លើយតប យើងឃើញហើយស្ថានភាពពាក់ព័ន្ធនឹងការរើសអើងលើស្រ្តីនេះនៅតែមានបើទោះបីជានៅលើសកលលោកហាក់ដូចជាមានវឌ្ឍនភាពពាក់ព័ន្ធនឹងសមភាពយេនឌ័រយ៉ាងណាក៏ដោយ ប៉ុន្តែកិច្ចការទាំងអស់នេះគឺនៅតែប្រឈមហើយដែលធ្វើឱ្យជាតិ អន្តរជាតិហ្នឹងមានការទទួលស្គាល់ថា ទាមទារនូវកិច្ចការងារចាំបាច់បន្ថែមទៀតដើម្បីធ្វើការលុបបំបាត់នូវរាល់ទម្រង់រើសអើងទៅលើស្រ្តីភេទនេះ។ ច៎ា! អ៊ីចឹងហើយបានជានៅឆ្នាំ១៩៧៩ អង្គការសហប្រជាជាតិក្នុងមហាសន្និបាតហ្នឹងបានដាក់ចេញនូវអនុសញ្ញា ព្រះអង្គ។

Q: ពរ! សូមអរគុណ ចំពោះសំណួរទីពីរវិញមុនពេលដែលកម្ពុជាទទួលសច្ចាប័ន តើមានការរើសអើងទៅលើស្ដី្រភេទដែរឬទេ? បើមាន មានលក្ខណៈយ៉ាងដូចម្ដេច?

A:ជាការពិតហើយ កម្ពុជាយើងក៏ដូចក្នុងបរិបទសកលហ្នឹង គឺដូចដែលករុណាបានលើកខាងដើម គឺស្ថានភាពស្ត្រីនៅតែប្រឈមនូវរាល់ទម្រង់នៃការរើសអើង ហើយយើងឃើញមានវិសមភាពរវាងស្រ្តីហើយនិងបុរស ហើយមកដល់បច្ចុប្បន្ននេះយើងជជែកដល់អ្នកដែលស្រលាញ់ភេទដូចគ្នាថែមទៀត។ អ៊ីចឹងហើយយើងឃើញថាមុនពេលមានការដាក់ចេញនូវអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្រ្តីនេះ គឺសឹងតែលើពិភពលោកហ្នឹងគឺមានការប្រឈម ហើយប្រទេសកម្ពុជាយើងក៏មិនខុសពីស្ថានភាពប្រទេសដទៃដែរ ដោយសារប្រទេសយើងមានប្រវត្តិ បើទោះបីក្នុងប្រទេសកម្ពុជាយើងមានប្រវត្តិយូរអង្វែងដែលមានការឱ្យតម្លៃលើស្រ្តីជាធំ មានស្រ្តីជាថ្នាក់ដឹកនាំក៏ដោយ ប៉ុន្តែយើងឃើញតួនាទីរបស់ស្រ្តីនេះត្រូវបានធ្លាក់ចុះ ហើយដែលសង្គមយើងមិនបានឱ្យតម្លៃ ហើយមាននូវវប្បធម៌ប្រពៃណីជាច្រើនដែលបានរឹតបន្ដឹង ហើយធ្វើឱ្យមានវិសមភាពយេនឌ័រមានភាព មានស្ថានភាពនេះកាន់តែអាក្រក់ហើយយើងឃើញវិសមភាពនៃអំណាចរវាងបុរសដែលជាទូទៅបានប្រើអំណាចទាំងអស់នោះក្នុងការបំពានទៅលើស្រ្តី ដោយផ្អែកលើយេនឌ័រហ្នឹង យើងហៅដូចផ្អែកលើយេនឌ័រហ្នឹងដោយសារវិសមភាពផ្នែកយេនឌ័រនេះ ធ្វើឱ្យស្រ្តីប្រឈម។

អ៊ីចឹងហើយយើងឃើញថា ប្រទេសកម្ពុជាយើងបើទោះបីជាចំនួនស្ត្រីបុរសមានចំនួនស្មើគ្នា ប៉ុន្តែបើយើងមើលសមាសភាពនៃការចូលរួមរបស់ស្រ្តីហ្នឹងគឺនៅមានកម្រិតនៅឡើយ អ៊ីចឹងទាំងមុនពេលដែលយើងទទួលស្គាល់នូវលិខិតតុបករណ៍របស់អន្តរជាតិ របស់អង្គការសហប្រជាជាតិ ស្ថានភាពនេះបានប្រឈមរួចទៅហើយ ហើយទោះបីជាយើងបានបានទទួលស្គាល់ហើយក្ដី ក៏មិនបានន័យថា នៅពេលយើងទទួលស្គាល់ហ្នឹង ស្ថានភាពនេះវានឹងប្រសើរជាស្វ័យប្រវត្តិក៏អត់ដែរ គ្រាន់តែការទទួលស្គាល់របស់រដ្ឋាភិបាលទៅលើលិខិតតុបករណ៍អន្តរជាតិនេះ វានឹងជួយជាការបង្ហាញនូវការប្ដេជ្ញាចិត្តរបស់រដ្ឋាភិបាល ក្នុងការចូលរួមលុបបំបាត់នូវរាល់ទម្រង់ការរើសអើងលើស្រ្តី ហើយដែលជាបទដ្ឋានមួយដែលកម្ពុជាយើងអាចប្រើប្រាស់ក្នុងការតាក់តែងគោលនយោបាយជាតិ ហើយនិងសកម្មភាព ផែនការ សកម្មភាពផ្សេងៗដោយអនុលោមទៅតាមគោលការណ៍អន្តរជាតិនេះ ។

Q: បន្ទាប់ពីកម្ពុជាក្លាយជារដ្ឋភាគីនៃអនុសញ្ញាអស់រយៈពេលជាង៤២ឆ្នាំមកនេះ តើលោកស្រីយល់ថាមានការផ្លាស់ប្ដូរយ៉ាងដូចម្ដេចដែរ?

A:មែនទែនទៅ យើងឃើញថាស្ថានភាពស្រ្តីនៅក្នុងប្រទេសកម្ពុជាយើង ឬក៏យើងហៅថាស្ថានភាពយេនឌ័រ មានវឌ្ឍនភាពបើយើងមើលជារួម វឌ្ឍនភាពក្នុងន័យថាយើងឃើងមានការចាប់ផ្ដើមយល់ច្រើនរបស់សាធារណជន របស់អ្នកតាក់តែងគោលនយោបាយហើយនិងស្ថាប័នពាក់ពន្ធទៅក្នុងការការបញ្ជ្រាបយេនឌ័រ យើងឃើញចាប់ផ្ដើមមានការជជែងអំពីយេនឌ័រ មានការលើកកម្ពស់អំណាចរបស់ស្រ្តីអីជាដើមនឹង នៅក្នុងសង្គមយើង ហើយនិងការយកចិត្តទុកដាក់ពីស្ថានប័នពាក់ព័ន្ធទាំងអស់ ទាំងរដ្ឋ ទាំងឯកជន នៅក្នុងការធ្វើយ៉ាងម៉េចឱ្យមានការ គេហៅថាឱ្យមានការ ដូចថាសម្រេចបាននូវគម្លាត បានន័យថាកុំឱ្យមានគម្លាតធំរវាងវិសមភាពយេនឌ័ររវាងស្ត្រីហើយនិងបុរសហ្នឹង។

អ៊ីចឹងវាជាកិច្ចប្រឹងប្រែងដែលយើងឃើញថាមានការចូលរួមទាំងពីសំណាក់រដ្ឋាភិបាល ហើយនិងខាងតួអង្គមិនមែនរដ្ឋាភិបាល មានទាំងអង្គការសង្គមស៊ីវិលក្នុងប៉ុន្មានទសវត្សរ៍ចុងក្រោយនេះ ប៉ុន្តែទោះបីជាមានវឌ្ឍនភាពនេះក៏ដោយការប្រឈមគឺនៅតែមាន យើងឃើញដូចដែលករុណាបានលើកពាក់ព័ន្ធនឹងសមាសភាពនៃការចូលរួមរបស់ស្រ្តីហ្នឹងគឺនៅមានតិចតូចទាំងនៅ វិស័យនយោបាយ ការសម្រចចិត្តនានា ការតាក់តែងគោលនយោបាយ ឬក៏ស្ត្រីនៅក្នុងវិស័យយុត្តិធម៌អីហ្នឹង គឺនៅមានចំនួនតិចតួចមែនទែន ហើយដែលទាំងអស់នេះគឺធ្វើឱ្យជាកូនឧបសគ្គ ដែលយើងឃើញថាអាចធ្វើឱ្យមានការមើលរំលងនូវការមើលពីជ្រុងខាងយេនឌ័រហើយមានបញ្ហាមួយចំនួនហ្នឹង ដែលធ្វើឱ្យជាឧបសគ្គរបស់ស្រ្តីក្នុងការក្នុងការទទួលបានយុត្តិធម៌ ។ល។ នេះជាចំណោទមួយ ហើយទីពីរយើងឃើញនូវការកើតឡើងនូវទម្រង់នៃការប្រើប្រាស់ហិង្សានៅក្នុងគ្រួសារឬក៏នៅក្នុងបរិបទសង្គមគឺនៅតែកើតមាន យើងឃើញមានករណីជាច្រើនដែលស្រ្តីនៅតែបន្តរងគ្រោះអំពីទម្រង់នៃហិង្សានេះ ហើយការទទួលបានយុត្តិធម៌នេះទៀតសោតហ្នឹងគឺនៅមិនទាន់បានពេញលេញ ហើយយើងឃើញករណីជាច្រើនបានរាយការណ៍ ប៉ុន្តែទន្ទឹមហ្នឹងមានករណីជាច្រើនផ្សេងទៀតមិនបានរាយការណ៍ដោយសារតែគម្លាតសង្គមវប្បធម៌ ហើយវប្បធម៌បន្ទោសលើជនរងគ្រោះជាដើម។ល។ ដែលជាឧបសគ្គធ្វើឱ្យស្រ្តីទទួលបាននូវយុត្តិធម៌និងការទទួលបានការគំាពារពីសង្គមផងដែរ។

Q: តើលោកស្រីយល់ថា រដ្ឋាភិបាលដែលបានអនុវត្តនូវការលុបបំបាត់ការប្រឆាំងនឹងស្រ្ដីភេទ បានគ្រប់គ្រាន់ហើយ ឬនៅ?

A: បើយើងមើលទៅតាមការត្រួតពិនិត្យចុងក្រោយរបស់គណៈកម្មការស៊ី-ដ (CEDAW) ជាគណៈកម្មការដែលគាត់ទទួលបន្ទុកក្នុងការត្រួតពិនិត្យទៅលើរបាយការណ៍របស់រដ្ឋភាគី ហើយនៅប្រទេសកម្ពុជាយើងក៏បានចូលរួមនៅក្នុងយន្តការ តាមរយៈការផ្ញើជូននូវរបាយការណ៍ ហើយឆ្លងកាត់ការត្រួតពិនិត្យពីគណៈកម្មការស៊ី-ដ (CEDAW) ហ្នឹងដែរ។ អ៊ីចឹងចុងក្រោយនោះ នៅក្នុងខែវិច្ឆិកា ឆ្នាំ២០១៩ហ្នឹងគឺប្រទេសកម្ពុជាយើងបានទទួលនូវអនុសាសន៍ជាច្រើនពីគណៈកម្មការ អ៊ីចឹងអនុសាសន៍ទាំងអស់នោះហើយដែលឆ្លុះបញ្ចាំងពីចំណុចចន្លោះប្រហោង ចំណុចខ្វះខាត ហើយចំណុចដែលរដ្ឋាភិបាលត្រូវបំពេញបន្ថែមទៅក្នុងការធានានូវសមភាពយេនឌ័រ ព្រមទាំងការលុបបំបាត់នូវការរើសអើងប្រឆាំងនឹងស្រ្តីភេទហ្នឹងដែលប្រទេសកម្ពុជាយើងត្រូវធ្វើកិច្ចការងារទាំងអស់នេះ ហើយនៅពេលដែលយើងឆ្លងកាត់នូវការត្រួតពិនិត្យជាថ្មីម្ដងទៀតដូចជានៅឆ្នាំ២០២៣ អ៊ីចឹងកម្ពុជាយើងអាចបង្ហាញនូវវឌ្ឍនភាពឆ្លើយតបនឹងបញ្ហា ឬក៏អនុសាសន៍ដែលគណៈកម្មការបានផ្ដល់ជូននោះ។ ករុណា!

Q: ហេតុអ្វីកម្ពុជាចាំបាច់ត្រូវទទួលសច្ចាប័នលើពិធីសារបន្ថែមលើអនុសញ្ញស្ដីពីការលុបបំបាត់រាល់ទម្រង់នៃការរើសអើងប្រឆាំងនិងស្ដ្រីភេទនៅថ្ងៃទី១៣ ខែតុលា ឆ្នាំ២០១០ បើទោះបីជាកម្ពុជាបានក្លាយជាភាគីអនុវត្តអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្រ្តីភេទ?

A: វាជាលិខិតតុបករណ៍បន្ថែមពីលើអនុសញ្ញាស្ដីពីការលុបបំបាត់រាល់ទម្រង់ស្ដីពីការរើសអើងប្រឆាំងនឹងនារីភេទ គឺខាងអង្គការសហប្រជាជាតិមានដាក់ចេញនូវលិខិតតុបណ៍បន្ថែមដែលផ្ដល់ជាជម្រើសបន្ថែមពីលើអនុសញ្ញាហ្នឹង គឺពិធីសារបន្ថែមនេះគឺអនុញ្ញាតឱ្យបុគ្គលអាចដាក់ពាក្យបណ្ដឹងបានទៅគណៈកម្មការ ដែលប្រសិនបើកម្ពុជាយើងមិនទទួលស្គាល់ មិនផ្ដល់សច្ចាប័នលើពិធីសារបន្ថែមនោះទេ បានន័យថាមានតែរដ្ឋភាគីប៉ុណ្ណោះដែលមានសិទ្ធិក្នុងការរាយការណ៍ហើយនិងការប្ដឹងផ្ដល់អីហ្នឹងគឺមិនមានជាលក្ខណៈបុគ្គលទេ អ៊ីចឹងនៅពេលដែលកម្ពុជាយើងបានផ្ដល់សច្ចាប័នទៅលើពិធីសារបន្ថែមនេះ អ៊ីចឹងអនុញ្ញាតឱ្យពលរដ្ឋកម្ពុជា មិនមែនចាំបាច់ទាល់តែមានជាលក្ខណៈស្ថាប័នជារដ្ឋទេ ប៉ុន្ដែជាបុគ្គលហ្នឹងគឺយើងអាច នៅពេលណាដែលយើងមិនអាចទទួលបាននូវយុត្តិធម៌ នៅពេលដែលយើងបានព្យាយាមគ្រប់លទ្ធភាពអស់ហើយក្នុងយន្តការក្នុងស្រុក បានន័យថាដូចជាតាមរយៈបណ្ដឹងតាមតុលាការអីជាដើមហ្នឹង គឺយើងនៅតែមិនទទួលបាននូវយុត្តិធម៌នោះ គឺពលរដ្ឋសាមញ្ញអាចដាក់ពាក្យបណ្ដឹងប្ដឹងផ្ដល់ទៅតាមរយៈយន្តការស៊ី-ដ (CEDAW)បាន។ នេះជាផលប្រយោជន៍នៃការផ្ដល់សច្ចាប័នបន្ថែមទៅលើពិធីសារបន្ថែមនៃអនុសញ្ញានេះ។ ករុណា!

Q: តើលោកស្រីមានអនុសាន៍បែបណាដើម្បីឱ្យប្រទេសកម្ពុជាមិនមានការរើសអើងប្រឆាំងនឹងស្រ្តីភេទនាពេលអនាគតឆាប់ៗនេះ?

A: ការងារទាំងអស់នេះមែនទែនទៅឃើញថាប្រទេសកម្ពុជាបានដាក់ចេញ ទីមួយយើងបានទទួលស្គាលលិខិតតុបករណ៍អន្តរជាតិដូចជា អនុសញ្ញាស៊ី-ដ (CEDAW) ឬក៏ពិធីសារបន្ថែមអីហ្នឹងគឺជាកិច្ចការមួយល្អហើយ ប៉ុន្តែការទទួលស្គាល់លើលិខិតតុបករណ៍ប៉ុណ្ណឹងគឺមិនទាន់គ្រប់គ្រាន់ទេ គឺទាមទារនូវការអនុវត្តជាក់ស្ដែងដែរ អ៊ីចឹងការអនុវត្តជាក់ស្ដែងនេះក្នុងនាមជារដ្ឋហត្ថលេខីហ្នឹងគឺទាមទារនូវការងារ បានន័យថាយើងមានកាតព្វកិច្ចសំខាន់បីគឺ ទីមួយគឺការធានាដល់ការគោរពទៅតាមអនុសញ្ញាទៅតាមពិធីសារបន្ថែម។ល។ ដែលយើងបានទទួលស្គាល់ហ្នឹង ហើយទីពីរនោះគឺយើងការពារ បានន័យថានៅពេលណាដែលមានបុគ្គលជាជនរងគ្រោះពីទម្រង់នៃការរើសអើងជាដើមហ្នឹងគឺរដ្ឋត្រូវផ្ដល់នូវកិច្ចគាំពារចាំបាច់ហើយនិងយុន្តការផ្សេងៗ ដើម្បីគាំពារក្នុងការទប់ស្កាត់ និងការដោះស្រាយចំពោះបញ្ហារើសអើងប្រឆាំងនឹងនារីភេទហ្នឹង ហើយទីបីនោះគឺកាតព្វកិច្ចក្នុងការបំពេញបន្ថែមគឺធានាថា ប្រសិនបើនៅក្នុងច្បាប់ជាតិយើងមិនមានច្បាប់គ្រប់គ្រាន់ ឬក៏ច្បាប់ដែលមានហើយ ប៉ុន្តែមិនបានអនុលោមទៅតាមគោលការណ៍អន្ដរជាតិអីហ្នឹង គឺរដ្ឋត្រូវធ្វើយ៉ាងម៉េចក្នុងការតាក់តែងច្បាប់ ឬក៏ធ្វើវិសោធនកម្ម ឬក៏ធ្វើកិច្ចការជាច្រើនថែមទៀតដូចជាការដាក់ចេញនូវគោលនយោបាយនានា ផែនការសកម្មភាពនានាហ្នឹងគឺដើម្បីធ្វើឱ្យសម្រេចបាននូវកិច្ចប្រឹងប្រែងក្នុងការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ អ៊ីចឹងគឺចាំបាច់ណាស់គឺការទទួលស្គាល់លិខិតតុបករណ៍គ្រាន់តែជំហានមួយទេ ប៉ុន្តែការអនុវត្តការធានានូវសិទ្ធិទទួលបាននូវជំនុំជម្រេះដោយយុត្តិធម៌ សិទ្ធិទទួលបានយុត្តិធម៌ សិទ្ធិទទួលបាននូវការគាំពារពីអាជ្ញាធរពាក់ព័ន្ធគឺចាំបាច់ក្នុងការឆ្លើយតបចំពោះការ រាល់ទម្រង់នៃការរើសអើងប្រឆាំងនឹងនារីភេទ។

Q: សូមអរគុណលោកស្រី សម្រាប់កិច្ចសម្ភាសន៍!

A: ករុណា ព្រះអង្គ!

អង្គការសង្គមស៊ីវិលស្នើឱ្យរដ្ឋាភិបាលដោះលែងអ្នកទោសមនសិការ ដោយបារម្ភពីការឆ្លងកូវីដ

មេង គ្រុយពន្លក (Meng Kroypunlok) — Mon, 07 Jun 2021 09:00:17 +0000

សហជីព និងអង្គការសង្គមស៊ីវិលចំនួន ២២ នៅថ្ងៃសុក្រ ទី៣ ខែឧសភានេះ បានចេញសេចក្ដីថ្លែងការណ៍រួមមួយដោយអំពាវនាវសារជាថ្មីឱ្យមានការដោះលែងអ្នកទោសមនសិការ ដោយសារពួកគេបារម្ភពីការឆ្លងរាលដាលនៃជំងឺកូវីដ១៩ក្នុងពន្ធនាគារ។

យោងតាមសេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា (CCHR) មជ្ឃមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) និងសហជីព សង្គមស៊ីវិលចំនួន ២០ទៀត បានចេញសេចក្ដីថ្លែងការណ៏រួមសារជាថ្មីនេះ បន្ទាប់ពីមានរបាយការណ៏ស្ដីពីការឆ្លងរាលដាលជំងឺកូវីដ១៩នៅក្នុងពន្ធនាគារ។

នៅក្នុងសេចក្ដីថ្លែងការណ៏រួមនោះផងដែរ សង្គមស៊ីវិលទាំងនោះក៏បានលើកឡើងថា សុវត្ថិភាព និងសុខភាពរបស់អ្នកទោសមនសិការទាំងអស់គឺជាទំនួលខុសត្រូវរបស់រដ្ឋាភិបាល។ បន្ថែមពីនេះសេចក្ដីថ្លែងការណ៏ក៏បានបញ្ជាក់ថា «ដោយមើលឃើញពីរបាយការណ៍នៃករណីកើតឡើងនៃជំងឺកូវីដ១៩ នៅក្នុងពន្ធនាគារកម្ពុជា រួមផ្សំនឹងចំនួនអ្នកទោសច្រើនពេកនៅក្នុងពន្ធនាគារ, យើងខ្ញុំសូមអំពាវនាវដល់រដ្ឋាភិបាលឱ្យដោះលែងអ្នកទោសមនសិការអហិង្សាទាំងអស់ ដែលជាវិធានការដើម្បីកាត់បន្ថយហានិភ័យបណ្ដាលមកពីការរីករាលដាលនៃវីរុសកូរ៉ូណា»។

សេចក្ដីថ្លែងការណ៍ដដែលក៏បានគូសបញ្ជាក់ផងដែរថា ក្នុងប្រទេសប្រជាធិបតេយ្យ រដ្ឋាភិបាលមិនត្រូវចោទប្រកាន់ ឬផ្ដន្ទាទោសចំពោះអ្នកទោសមនសិការឡើយ។ ផ្ទុយទៅវិញរដ្ឋាភិបាលគួរតែលើកទឹកចិត្តដល់ពលរដ្ឋសកម្ម ដែលរួមចំណែកដល់ការធ្វើឱ្យសង្គមមានភាពប្រសើរឡើង ដែលស្របនឹងមាត្រា៥១ នៃរដ្ឋធម្មនុញ្ញដែលបានចែងថា «ពលរដ្ឋកម្ពុជាគឺជាម្ចាស់នៃប្រទេសរបស់ខ្លួន»។

ជាងនេះទៅទៀត សេចក្ដីថ្លែងការណ៍បានចង្អុលបង្ហាញថា ប្រសិនបើពលរដ្ឋមិនអាចចូលរួមក្នុងកិច្ចការសង្គមនិងបញ្ចេញមតិរបស់ពួកគេទេ នោះពលរដ្ឋមិនអាចក្លាយជាម្ចាស់ប្រទេសបានឡើយ។

តាមសេចក្ដីថ្លែងការនេះដែរ អ្នកទោសមនសិការសំដៅលើបុគ្គលដែលត្រូវបានគេចាប់ដាក់គុកដោយសារតែការបញ្ចេញមតិដោយសន្ដិវិធីទាក់ទងនឹងបញ្ហានយោបាយ សង្គម ជំនឿសាសនាឬជំនឿផ្សេងៗតាមមនស្សការឬអត្ថសញ្ញាណរបស់ពួកគេ។

ឆ្លើយតបទៅនឹងសេចក្ដីថ្លែងការណ៍រួមរបស់អង្គការសង្គមស៊ីវិល លោកជិន មាលីន ដែលជាអ្នកនាំពាក្យរបស់ក្រសួងយុត្តិធម៌ និងជាអ្នកនាំពាក្យ គណៈកម្មការសិទ្ធិមនុស្សរបស់រដ្ឋាភិបាល តាមរយៈគណនីហ្វេសបុក បានបដិសេធទាំងស្រុងថាការចេញសេចក្ដីថ្លែងការណ៏ស្នើសុំឱ្យមានការដោះលែងអ្នកទោសមនសិការ ថាជាការមិនសមស្រប ខុសនឹងនីតិវិធីច្បាប់និងរដ្ឋធម្មនុញ្ញកម្ពុជា និងមានចរិតជានយោបាយ។

លោកបានលើកនៅមូលហេតុប្រាំចំណុចរួមមាន រដ្ឋាភិបាលមិនមានអំណាចដោះលែងអ្នកជាប់ឃុំដែលស្ថិតក្រោមសម្ថកិច្ចរបស់តុលាការ និងគ្មានបុគ្គលឬស្ថាប័នណាបញ្ជាតុលាការបានទេ។ លោកបានបន្តថា មិនមានអ្នកទោសមនសិការទេ ការដោះលែងមិនមែនជាវិធានការសមស្របទេ រដ្ឋាភិបាលមានវិធានការគ្រប់គ្រង ហើយការអំពាវនាវរបស់សង្គមស៊ីវិល ផ្ទុយនឹងច្បាប់និងមានលក្ខណៈនយោបាយ។

គួររំលឹកផងដែរថាតាំងពីសប្ដាហ៍មុនមកម្លេះ មានការឆ្លង់ជំងឺកូវីដ១៩នៅក្នុងពន្ធនាគារចំនួនបីរួមមាន ពន្ធនាគាររាជធានីភ្នំពេញ ពន្ធនាគារខេត្តកណ្ដាល និងពន្ធនាគារខេត្តព្រះសីហនុ ដែលមានការរកឃើញវិជ្ជមានកូវីដ១៩ជាង ១០០នាក់៕

សង្គមស៊ីវិល១២ស្ថាប័ន ប្រារព្ធទិវាបរិស្ថានពិភពលោកតាមប្រព័ន្ធអនឡាញរយៈពេល៥ថ្ងៃ

មេង គ្រុយពន្លក (Meng Kroypunlok) — Wed, 02 Jun 2021 07:02:45 +0000

អង្គការសង្គមស៊ីវិល និងសហគមន៍ ចំនួន១២ស្ថាប័ន នៅទី១ ខែមិថុនា ឆ្នាំ២០២១នេះ ប្រកាសគ្រោងប្រារព្ធទិវាបរិស្ថានពិភពលោក ក្រោមប្រធានបទ «បរិស្ថានជាបញ្ហាសកលដែលគ្រប់គ្នាមានសិទ្ធិ និងករណីយកិច្ចចូលរួមការពារថែរក្សាប្រកបដោយបរិយាប័ន្ន» តាមរយៈប្រព័ន្ធអនឡាញ។

យោងតាមសេចក្ដីប្រកាសព័ត៌មានរួមរបស់អង្គការសមាគមដែលមានដូចជា សមាគម បណ្ដាញយុវជនកម្ពុជា អង្គការអភិវឌ្ឍធនធានយុវជន និងស្ថាប័នសង្គមស៊ីវិលជាច្រើនទៀតសរុបចំនួន១២ ចេញនៅថ្ងៃទី១ ខែមិថុនា ឆ្នាំ២០២១នេះ បានឱ្យដឹងថា ការប្រារព្ធទិវាបរិស្ថានពិភពលោកតាមអនឡាញនេះ នឹងធ្វើឡើងរយៈពេល៤ថ្ងៃ ចាប់ពីថ្ងៃទី១ ខែមិថុនា ដល់ថ្ងៃទី៥ ខែមិថុនា។

សេចក្តីប្រកាសព័ត៌មានដដែលបន្ថែមថា ការប្រារព្ធទិវាបរិស្ថានក្នុងឆ្នាំនេះគោលបំណងសំខាន់ចំនួន៤ ទីមួយដើម្បីលើកកម្ពស់ការយល់ដឹងអំពីសារសំខាន់បរិស្ថាន ធនធានធម្មជាតិ និងព្រៃឈើទៅដល់យុវជន និងប្រជាពលរដ្ឋទូទៅ ទីពីរលើកទឹកចិត្ត បំផុស និងផ្ដល់ឱកាសដល់យុវជនដើម្បីចាប់ផ្ដើមចូលរួមដោះស្រាយបញ្ហាបរិស្ថាន ទីបីជំរុញឱ្យមានការបើកទូលាយ និងសហការគ្នារវាងសាធារណជន និងភាគីពាក់ព័ន្ធ ដើម្បីបញ្ឈប់បទល្មើស និងសកម្មភាពនានា ដែលបំផ្លាញធនធានធម្មជាតិ និងបរិស្ថាន និងទីបួនស្នើឱ្យក្រសួងបរិស្ថាន និងស្ថាប័នពាក់ព័ន្ធ ជួយសម្រួលភាពងាយស្រួលដល់សាធារណជនក្នុងការចូលរួមការពារបរិស្ថាន និងធនធានធម្មជាតិតាមច្បាប់ដែលបានកំណត់។

សេចក្តីថ្លែងការណ៍នោះបញ្ជាក់ថា៖ «ការយល់ដឹងពីសារៈសំខាន់របស់បរិស្ថាន ធនធានធម្មជាតិ និងព្រៃឈើ ដល់យុវជន សាធារណៈជន ធ្វើឱ្យពួកគេបានចូលរួមប្រារព្ធទិវាបរិស្ថានប្រកបដោយបរិយាប័ន្ន និងការទទួលខុសត្រូវ ក្នុងការរួមចំណែកការពារបរិស្ថាន និងការអភិរក្សប្រកបដោយនិរន្តរភាព»។

ក្រុមសង្គមស៊ីវិលទាំង១២ក៏បានបន្ថែមក្នុងសេចក្តីថ្លែងការណ៍ននោះថា ការប្រារព្ធទិវាបរិស្ថានពិភពលោកឆ្នាំ២០២១នេះ នឹងជំរុញទឹកចិត្ត បំផុសគំនិតដល់យុវជននិងអ្នកស្រឡាញ់បរិស្ថានអាចសម្តែងក្តីកង្វល់ ឱ្យមានការដោះស្រាយបញ្ហាគំរាមគំហែងដល់បរិស្ថាន ធនធានធម្មជាតិនិងព្រៃឈើ ដល់អ្នកមានកាតព្វកិច្ច។ នេះបើតាមសេចក្តីប្រកាសព័ត៌មានខាងលើ។

ពួកគេបញ្ជាក់ថា៖ «កិច្ចសហប្រតិបត្តិការរវាងសាធារណជន យុវជន និងអ្នកមានកាតព្វកិច្ច រួមគ្នាដើម្បីទប់ស្កាត់បទល្មើសព្រៃឈើនិងសកម្មភាពនានាដែលប៉ះពាល់បរិស្ថាន ដូចជាការទន្ទ្រានយកដីព្រៃ និងការដឹកជញ្ជូនឈើក្នុងតំបន់ការពារធម្មជាតិ និងបង្កផលប៉ះពាល់ដល់សហគមន៍ជនជាតិដើមភាគតិចជាដើម»។

អ្នកសម្របសម្រួលគម្រោងនៃសមាគមបណ្ដាញយុវជនកម្ពុជា លោក អូត ឡាទីន បានឲ្យដឹងថា ការរៀបចំកម្មវិធីទិវាបរិស្ថានតាមប្រព័ន្ធអនឡាញគឺជាការបត់បែន និងស្របតាមកាលៈទេសៈជាក់ស្ដែងខណៈកម្ពុជាកំពុងមានការរីករាលដាលនៃជំងឺកូវីដ១៩៖ «ខ្ញុំយល់ថា ការរៀបចំកម្មវិធីទិវាបរិស្ថាន តាមអនឡាញក្នុងឆ្នាំនេះ គឺជាការបត់បែនខ្ពស់ស្របតាមស្ថានការណ៏ជាក់ស្ដែង នៃការរីករាលដាល នៃការឆ្លងវីរុសកូវីត-១៩ដែលយើងមិនអាចជួបជុំគ្នាបាន» ។

លោកបន្តថា ការរៀបចំទិវាបរិស្ថាននេះគឺជាការចូលរួមចំណែកក្នុងការផ្សព្វផ្សាយ ចំណេះដឹងអំពីបរិស្ថាន ទៅកាន់ប្រជាពលរដ្ឋទូទៅ និងលើកឡើងពីក្ដីបារម្ភរបស់ពួកគេ ជុំវិញការបំពុលបរិស្ថាន ការកាប់បំផ្លាញព្រៃឈើ និងជម្រុញឱ្យមានការអនុវត្តច្បាប់ប្រកបដោយប្រសិទ្ធភាព និងបញ្ឈប់ការចោទប្រកាន់ទៅលើក្រុមសកម្មជនដែលការពារធនធានធម្មជាតិ និងបរិស្ថានរួមជាមួយនឹងការបើកចំហរសេរីភាពដល់សហគមន៍មូលដ្ឋានក្នុងការចុះល្បាត និងការពារព្រៃឈើដែលជាសម្បត្តិរបស់យើងទាំងអស់គ្នា។

បើតាមលោក អូត ឡាទីន ការប្រារព្ធទិវាបរិស្ថានពិភពលោកនេះ ត្រូវបានរៀបចំឡើងតាំងពីឆ្នាំ២០១២មកម្ល៉េះ ប៉ុន្តែពីរឆ្នាំចុងក្រោយនេះ ទិវាបរិស្ថានពិភពលោកត្រូវបានរៀបចំឡើងដោយមិនមានការជូបជុំនោះទេ ដោយសារតែស្ថានភាពកូវីដ១៩មិនទាន់មានភាពធូរស្រាលនៅឡើយ។

Newsroom Cambodia មិនអាចសុំការអធិប្បាយពីលោក នេត ភក្រ្តា អ្នកនាំពាក្យក្រសួងបរិស្ថានបានទេ ដោយលោកប្រាប់ថា លោកកំពុងជាប់ប្រជុំ។

ក្រសួងបរិស្ថានក៏បានចេញសេចក្តីជូនដំណឹងមួយនៅថ្ងៃទី៣១ ខែឧសភា ឆ្នាំ២០២១ បញ្ជាក់ពីការរៀបចំប្រារព្ធទិវាបរិស្ថានជាតិ និងបរិស្ថានពិភពលោក៥មិថុនានេះ ក្រោមប្រធានបទ «ជីវៈចម្រុះ និងសុខភាពមនុស្ស» ដោយប្រើប្រាស់បណ្ដាញសង្គមទាំងអស់ដែលខ្លួនមាន៕

កម្មវិធីបំលែងសំឡេងនិយាយខ្មែរទៅជាអត្ថបទសរសេរត្រូវបានដាក់ឱ្យដំណើរការ

មេង គ្រុយពន្លក (Meng Kroypunlok) — Sat, 29 May 2021 13:52:03 +0000

អ្នកស្រាវជ្រាវបណ្ឌិត្យសភាបច្ចេកទេសវិទ្យាឌីជីថលកម្ពុជា (CADT) នៃក្រសួងប្រៃសណីយនិងទូរគមនាគមន៍ បានដាក់ឱ្យដំណើរការជាផ្លូវការនូវកម្មវិធី (APP) ដែលអាចប្រែក្លាយសំឡេងនិយាយភាសាខ្មែរ ទៅជាអត្ថបទសរសេរបាន នៅថ្ងៃទី២៨ ខែឧសភា ឆ្នាំ២០២១នេះ។

បើតាមគេហទំព័ររបស់ប្រព័ន្ធ(Khmer ASR) កម្មវិធីនេះគឺប្រើបា្រស់បច្ចេកវិទ្យាបញ្ញាសិប្បនិមិត្តិ (Artificial Intelligence) ក្នុងការប្រើប្រាស់បច្ចេកទេសវិទ្យាសញ្ញាសិប្បនិមត្ត ក្នុងការបំលែងសំឡេងនិយាយ និងឯកសារជាសំលេងភាសាខ្មែរ ទៅជាអត្ថបទដោយស្វ័យប្រវត្តិ។

គេហទំព័រនោះបាននិយាយថា «ប្រព័ន្ធស្វ័យប្រវតិ្តកម្មបំលែងសំឡេងនិយាយភាសាខ្មែរទៅជាអត្ថបទសរសេរ (Khmer Automatic Speech Recognition – Khmer ASR) គឺជាប្រព័ន្ធដែលប្រើប្រាស់បច្ចេកវិទ្យាបញ្ញាសិប្បនិមិត្ត (Artificial Intelligence) ក្នុងការបំលែងសំឡេងនិយាយនិងឯកសារជាសំលេងជាភាសាខ្មែរ ទៅជាអត្ថបទសរសេរដោយ ស្វ័យប្រវត្តិ។»

ចំណែកឯអត្ថប្រយោជន៍វិញ អាចអនុញ្ញាតឱ្យសហគមន៍អ្នកប្រើប្រាស់ នៅកម្ពុជាអាចប្រើបា្រស់ ឬបំពាក់ជាមួយប្រព័ន្ធឬបច្ចេកវិទ្យាដ៏ទៃទៀត ដើម្បីប្រើប្រាស់ការងារសំខាន់ចំនួនបី រួមមានជួយសម្រួល និងពន្លឿនការងារកត់ត្រានៅកិច្ចប្រជុំ ជាជំនួយដល់ជនពិការបំពេញការងារ និងបង្កើតជាបច្ចេកវិទ្យាបញ្ជាដោយសំឡេង( Voice Command) ជាភាសាខ្មែរទៅលើវត្ថុ និងសម្ភារៈប្រើប្រាស់ផ្សេងៗ។

សម្រាប់អ្នកប្រើប្រាស់ អាចវាយពាក្យ Khmer ASR ក្នុង Play Store និង App Store ដើម្បីតំឡើងកម្មវិធីនេះបាន។ កម្មវិធីនេះក៏អនុញ្ញាតិអោយអ្នកប្រើប្រាស់ថតចំលងឯកសារទៅកាន់កម្មវិធីផ្សេងទៀតផងដែរដូចជាតេឡេក្រាម Telegram។

អ្នកសារព័ត៌មាន Newsroom Cambodia បានសាកប្រើប្រាស់កម្មវិធីនេះ ហើយបានជួបប្រទះភាពខ្វះខាតបន្ដិចបន្តួចដូចជា ខុសអក្ខរាវិរុទ្ធ និងមានការដកឃ្លាច្រើន៕

មេង គ្រុយពន្លក (Meng Kroypunlok) – Newsroom Cambodia

បទយកការណ៍៖ពលរដ្ឋ​បឹង​តាមោក​សម្រេច​ទទួល​យក​សំណង​​ទាំង​បង្ខំ​ក្រោយ​រង​សម្ពាធ​ពី​អាជ្ញាធរ

បទយកការណ៍៖ ផ្លូវខូចខាតខ្លាំងមួយខ្សែ ក្នុងសង្កាត់កន្ទោក ជាយរាជធានី បង្កការលំបាកដល់ប្រជាពលរដ្ឋ

បទយកការណ៍៖ ជីវភាពអ្នកនេសាទតាមបណ្តោយទន្លេមេគង្គកាន់តែយ៉ាប់យឺន ខណៈទិន្នផលត្រីស្រុតចុះខ្លាំង

Q & A អំពីស្ថានភាពព្រៃ​ឈើនៅប្រទេស​កម្ពុជា

បុគ្គលិកតវ៉ាឲ្យក្រុមហ៊ុនព្រលានយន្តហោះសៀមរាបដោះស្រាយ ក្រោយត្រូវបានបញ្ឈប់ដោយសារវិបត្តិកូវីដ

អ្នកនាំពាក្យក្រសួងសុខាភិបាលព្រមានថាកម្ពុជាអាចដើរហួសបន្ទាត់ក្រហមបើមិនអនុវត្តវិធានការការពារ

Vox pop៖ អត្ថប្រយោជន៍នៃការរៀនភាសាបាលី និងសំស្រ្កឹត​

កូន​ផ្សោត​ទី​៥ ​​ត្រូវ​​បាន​​ប្រទះ​​ឃើ​ញ​​ហែល​​ទឹក​​ជា​​មួយ​​ហ្វូង​ផ្សោតនៅកាំពី​ នៃ​ខេត្ត​ក្រចេះ