មាស ដា (Meas Da) – Newsroom Cambodia

តុលាការច្រានចោលសេចក្តីថ្លែងការណ៍របស់សហព័ន្ធសហជីពកម្ពុជាដែលស្នើសុំដោះលែងលោក ជា ចាន់

មាស ដា (Meas Da) — Fri, 21 Jun 2024 09:07:59 +0000

តុលាការខេត្តកំពង់ស្ពឺ នៅតែបន្តរក្សាសាលក្រមក្នុងសំណុំរឿងព្រហ្មទណ្ឌប្រឆាំងលោក ជា ចាន់ ដាក់ពន្ធនាគាររយៈពេល១ឆ្នាំដដែល បើទោះបីជាសហព័ន្ធសហជីពកម្ពុជា(CATU)បានចេញសេចក្តីថ្លែងការណ៍ ដោយស្នើសុំឱ្យតុលាការទម្លាក់បទចោទ និងដោះលែងលោក ជា ចាន់ ដោយឥតលក្ខខ័ណ្ឌក៏ដោយ។

កាលពីថ្ងៃទី២០ មិថុនា ឆ្នាំ២០២៤ សហព័ន្ធសហជីពកម្ពុជា (CATU) បានចេញសេចក្តីថ្លែងការណ៍មួយ ដោយស្នើឱ្យក្រសួងយុត្តិធម៌ សាលាដំបូងខេត្តកំពង់ស្ពឺ និងឧត្តមក្រុមប្រឹក្សានៃអង្គចៅក្រុមពិនិត្យ និងស៊ើបអង្កេត ឡើងវិញលើចំពោះសំណុំរឿងព្រហ្មទណ្ឌលោក ជា ចាន់ ឱ្យបានដិតដល់ និងទំលាក់បទចោទ ព្រមទាំងដោះលែងលោក ជា ចាន់ ប្រធានសហជីពកម្ពុជានៃក្រុមហ៊ុន វីងស្តារស៊ូ ដោយឥតលក្ខខណ្ឌ ដោយពួកគេលើកឡើងថា សំណុំរឿងនេះគ្មានអង្គហេតុ និងភស្តុតាងនៃបទល្មើសនោះទេ។

សេចក្តីថ្លែងការណ៍នេះ ធ្វើឡើងបន្ទាប់ពីតុលាការបានចេញសាលក្រម ក្នុងថ្ងៃតែមួយដោយសម្រេចផ្តន្ទាទោសលោក ជា ចាន់ ដាក់ពន្ធនាគារចំនួន១២ខែ អនុវត្តទោសក្នុងពន្ធនាគារ៦ខែ ហើយទោសដែលនៅសល់ត្រូវព្យូរ។

សហជីពយល់ឃើញថា ការសម្រេចសាលក្រមនេះ គឺមានភាពអយុត្តិធម៌សម្រាប់លោក ជា ចាន់ ដោយពួកគេអះអាងថាប្រធានសហជីពមូលដ្ឋានរូបនេះ ពុំបានប្រព្រឹត្តបទល្មើសដូចការចោទប្រកាន់ឡើយ។ផ្ទុយទៅវិញ ការចោទប្រកាន់ និងផ្តន្ទាទោសតាមអំណាចសាលក្រម ដែលចេញដោយសាលាដំបូងខេត្តកំពង់ស្ពឺនេះ គឺជាការបង្ហាញពីការគំរាមកំហែង ការបំភិតបំភ័យ ការរើសអើង និងជាការធ្វើទុក្ខបុកម្នេញមកលើសហជីព (CATU) ដែលជាការរំលោភសិទ្ធិក្នុងទម្រង់ធ្ងន់ធ្ងរ ផ្ទុយពីច្បាប់ជាតិ និងច្បាប់អន្តរជាតិដែលមានជាធរមានក្នុងវិស័យការងារនៅកម្ពុជា។

ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ដែលបានចូលរួមស្តាប់ការប្រកាសសាលក្រម លោក ជា ចាន់ ប្រាប់ Newsroom Cambodia នៅថ្ងៃសុក្រ ទី២១ ខែ មិថុនា ឆ្នាំ២០២៤នេះថា អ្នកស្រីខកចិត្តចំពោះការប្រកាសសាលក្រមរបស់ តុលាការកាលពីម្សិលមិញ ជារឿងអយុត្តិធម៌ដោយអ្នកស្រីថា លោក ជា ចាន់ មិនបានប្រព្រឹត្តអំពើលួចដូចការចោទប្រកាន់ទេ។លើសពីនេះទៀត អ្នកស្រីចោទប្រកាន់ថា ជុំវិញការសម្រេចរបស់តុលាការនេះ ជាការរៀបចំទុកមុនរបស់ក្រុមហ៊ុន និងតុលាការ។

អ្នកស្រីបន្តថា៖«ការសម្រេចនេះ មិនបានផ្អែកលើភស្តុតាងដែលថ្លឹងថ្លែងទៅនឹងរឿងដែលបានកើតឡើងរហូតមានសវនាកាចុងក្រោយនេះ គ្មានបានបង្ហាញចេញបទល្មើសមកបង្ហាញនោះទេ…ហេតុអីបានតុលាការសម្រេចឱ្យ ចាន់ ជាប់ពន្ធនាគារដោយអយុត្តិធម៌…ខ្ញុំគិតថា រឿងនេះគឺជា រឿងអត់ត្រឹមត្រូវ អត់យុត្តិធម៌ ដែលខ្ញុំមើលឃើញថា ការសម្រេចនេះមិនផ្អែកលើភស្តុតាងច្បាប់ ជាការយល់ឃើញរបស់ខ្ញុំ »។

ឆ្លើយតបរឿងនេះ ប្រធានលេខាធិការដ្ឋាន និងជាអ្នកនាំពាក្យរបស់តុលាការខេត្តកំពង់ស្ពឺលោក ផេង ស៊ីភ័ណ អះអាងដោយខ្លីថា តុលាការនៅតែរក្សាសាលក្រមដែលបានសម្រេចរួចហើយ ប្រឆាំងលោក ជា ចាន់ ដោយផ្តន្ទាទោសទោស ដាក់ពន្ធនាគាររយៈពេល១ឆ្នាំ ដដែល។

លោកបន្តថា៖«បាទ! សម្រេចតាមសាលក្រម»។

សម្រាប់អ្នកស្រី យ៉ាង សុភ័ណ្ឌ ចាត់ទុកជំហររបស់តុលាការដែលច្រានចោលចំពោះសេចក្តីថ្លែងការណ៍របស់សហព័ន្ធសហជីពកម្ពុជាថា ជាការសម្រេចដែលមិនផ្អែកលើមូលដ្ឋានច្បាប់ និងភស្តុតាងនោះទេ។

គេហទំព័រ Newsroom Cambodia មិនទាន់អាចសុំការអត្ថាធិប្បាយពី អ្នកនាំពាក្យក្រសួងយុត្តិធម៌ លោក ជិន ម៉ាលីន បាននៅឡើយទេ នៅថ្ងៃទី២១ ខែមិថុនា ឆ្នាំ២០២៤ នេះ។

លោក ជា ចាន់ កាលពីថ្ងៃទី១៤ ខែកុម្ភៈ ឆ្នាំ២០២៤ ត្រូវសមត្ថកិច្ចឃាត់ខ្លួន បន្ទាប់មានបណ្តឹងពីភាគីរោងចក្រ ដែលប្តឹងពីបទ«សមគំនិតក្នុងអំពើលួច»។

បើទោះបែបណា ក្រុមសហជីព អះអាងថាការអនុវត្តនីតិវិធីដោយនគរបាលយុត្តិធម៌នេះ គឺការចាប់ខ្លួនលោក ជា ចាន់ ធ្វើឡើងដោយគ្មានដីការត្រឹមត្រូវនោះទេ។ហើយការចាប់ខ្លូននេះទៀតសោត ធ្វើឡើងនៅក្រោយកម្មករប្រចាំនៅរោងចក្រ វីងស្តារស៊ូ បោះឆ្នោតផ្តល់សេចក្តីទុកចិត្តឱ្យលោក ជា ចាន់ ធ្វើជាតំណាងសហជីពមូលដ្ឋាន ប្រចាំនៅរោងចក្រមួយនេះ។រោងចក្រ វីងស្តារស៊ូ ដែលមានទីតាំងនៅក្នុងស្រុកគង់ពិសី ខេត្តកំពង់ស្ពឺ គឺជារោងចក្រដែលផលិត និងផ្គត់ផ្គង់ស្បែកជើងដែលក្រុមហ៊ុន ASICS របស់ប្រទេសជប៉ុន គឺជាអ្នកបញ្ជាទិញ៕

រដ្ឋាភិបាលកំពុងពិនិត្យលើលិខិតសុំទោសរបស់លោកស៊ុន ចន្ធី

មាស ដា (Meas Da) — Mon, 10 Jun 2024 07:42:30 +0000

រដ្ឋាភិបាលកម្ពុជា កំពុងពិនិត្យលើលិខិតសុំទោសរបស់ លោក ស៊ុន ចន្ធី ប្រធានគណបក្សកម្លាំងជាតិ ក្រោយពីមេដឹកនាំគណបក្សរូបនេះ បានចេញលិខិតសុំទោសជាសាធារណៈទៅលោកនាយករដ្ឋមន្រ្តី ចំពោះការថ្លែងរបស់ខ្លួនធ្វើឱ្យប៉ះពាល់ដល់កិត្តិយស និងការដឹកនាំរបស់រដ្ឋាភិបាល។

កាលពីចុងសប្តាហ៍មុននេះ មានការផ្សព្វផ្សាយនូវលិខិតសុំទោសជាសាធារណៈរបស់ប្រធានគណបក្សកម្លាំងជាតិ លោក ស៊ុន ចន្ធី ដែលក្នុងលិខិតនោះមានតែស្នាមមេដៃ និងមិនមានចុះកាលបរិច្ឆេទ។ លិខិតនោះ បានលើកឡើងថា លោកមានការសោកស្តាយ និងសុំទោសចំពោះមតិលើកឡើងដោយអចេតនា ក្នុងពេលដែលលោកជួបជាមួយពលរដ្ឋនៅប្រទេសជប៉ុន កាលពីថ្ងៃទី០៥ ខែឧសភា ឆ្នាំ២០២៤ ដែលបានធ្វើឱ្យប៉ះពាល់ដល់កិត្តិយស និងកិច្ចខិតខំប្រឹងប្រែងអភិវឌ្ឍន៍ប្រទេសជាតិរបស់រដ្ឋាភិបាលកម្ពុជា។

អ្នកនាំពាក្យរដ្ឋាភិបាល លោក ប៉ែន បូណា ប្រាប់ Newsroom Cambodia នៅថ្ងៃទី១០ ខែមិថុនានេះថា រដ្ឋាភិបាលមិនទាន់មានការសម្រេចបែបណានៅឡើយទេ ចំពោះការចេញលិខិតសុំទោសរបស់លោក ស៊ុន ចន្ធី ដាក់មករដ្ឋាភិបាល។

លោកថ្លែងថា៖ «ចាំសម្តេច[លោកនាយករដ្ឋមន្ត្រី ហ៊ុន ម៉ាណែត]លោកសម្រេចយ៉ាងណា ចាំជូនព័ត៌មានតាមក្រោយ»។

ទោះជាយ៉ាងណា លិខិតសុំទោសជាសាធារណៈដែលគេថា ជារបស់លោក ស៊ុន ចន្ធី ដាក់ទៅលោកនាយករដ្ឋមន្រ្តី កាលពីពេលថ្មីៗនេះ គេមិនទាន់ដឹងច្បាស់នៅឡើយថា លិខិតនោះជាលិខិតចេញដោយលោក ស៊ុន ចន្ធី មែនឬយ៉ាងណា។

ទីប្រឹក្សាគណបក្សកម្លាំងជាតិ លោក រ៉ុង ឈុន មានប្រសាសន៍ថា លោកនៅមិនទាន់អាចសន្និដ្ឋានបានថា លិខិតសុំទោសរបស់លោក ស៊ុន ចន្ធី ពិតជាចេញដោយលោក ស៊ុន ចន្ធី ផ្ទាល់ពិតមែនឬយ៉ាងណាឡើយ ព្រោះលិខិតនោះមិនបានបញ្ជាក់ពីកាលបរិច្ឆេទ និងមិនមានការបញ្ជាក់ពីសាច់ញាតិក្រុមគ្រួសាររបស់គាត់នៅឡើយ។

តែយ៉ាងណា លោកថា ការចេញលិខិតសុំទោសរបស់លោក ស៊ុន ចន្ធី គឺជាសិទ្ធិបញ្ចេញមតិរបស់គាត់តែប៉ុណ្ណោះ មិនមានអ្វីប៉ះពាល់ដល់គោលនយោបាយ ឬការដឹកនាំរបស់គណបក្សកម្លាំងជាតិទេ។

លោក រ៉ុង ឈុន ថ្លែងថា៖ «ចំពោះ[គណបក្ស]ជំហគណបក្សអត់មាន[បញ្ហា]អីទេ។ ប្រសិន[ជា]ថា លិខិតហ្នឹងពិត អាហ្នឹងគ្រាន់តែជាសេរីភាពរបស់បុគ្គលទេ មិនមែនឆ្លុះបញ្ចាំងអំពីជំហគណបក្សនោះទេ»។

ជាមួយគ្នានេះដែរ អ្នកស្រី យាន ស្រីយ៉ាន ភរិយារបស់លោក ស៊ុន ចន្ធី លើកឡើងថា អ្នកស្រីក៏មិនទាន់ដឹងថា លិខិតនោះពិតជារបស់ស្វាមីឬយ៉ាងណាឡើយ។

អ្នកស្រីថា៖ «ខ្ញុំ មិនដឹងថាលិខិត[នោះ]ជារបស់នរណា[ឡើយ]»។

ប៉ុន្តែអ្នកនាំពាក្យនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានបញ្ជាក់ថា លិខិតនេះ ពិតជារបស់លោក ស៊ុន ចន្ធី ដោយសារក្នុងលិខិតមានស្នាមមេដៃរបស់គាត់ ដោយការចេញលិខិតនោះគឺធ្វើឡើងដោយការស្ម័គ្រចិត្តពិតមែន និងគ្មានការបង្ខិតបង្ខំឡើយ។ លោកបន្តថា មូលហេតុដែលលិខិតនោះរៀបចំសរសេរដោយប្រើកុំព្យូទ័រ មិនមែនជាការសរសេរដោយផ្ទាល់ដៃ ព្រោះវាជាការស្ម័គ្រចិត្តព្រមព្រៀងរវាងលោក ស៊ុន ចន្ធី និងមន្រ្តីមណ្ឌលពន្ធនាគារ។

លោកថ្លែងថា៖ «ស្នាមមេដៃដែលបានផ្តិត ពិតជាស្នាមមេដៃរបស់លោក ស៊ុន ចន្ធី ពិតមែន។ ចំពោះការផ្តិតនេះ យើងក៏បានឱ្យគាត់ពិនិត្យមើលខ្លឹមសារឃ្លាឃ្លោងនៅលើឯកសារនេះដែរ មុននឹងគាត់ផ្តិតដោយស្ម័គ្រចិត្ត»។

គួរបញ្ជាក់ថា លោក ស៊ុន ចន្ធី ត្រូវបានសមត្ថកិច្ចចាប់ខ្លួន នៅព្រលានយន្តហោះអន្តរជាតិភ្នំពេញ កាលពីថ្ងៃទី៩ ខែឧសភា ឆ្នាំ២០២៤ វេលាម៉ោង ៩ព្រឹក គ្រាដែលលោកទើបតែវិលត្រឡប់មកពីប្រទេសជប៉ុនវិញ ជាទីដែលលោកបានជួបសំណេះសំណាលជាមួយសកម្មជន និងអ្នកគាំទ្រគណបក្ស។ លោក ស៊ុន ចន្ធី ត្រូវបានតុលាការសម្រេចចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងត្រូវបានឃុំខ្លួនជាបណ្តោះអាសន្ននៅពន្ធនាគារខេត្តពោធិ៍សាត់។

បើតាមសេចក្តីប្រកាសព័ត៌មានរបស់គណបក្សកម្លាំងជាតិ ចុះថ្ងៃទី៧ ខែមិថុនា ឆ្នាំ២០២៤ លោក ស៊ុន ចន្ធី នឹងត្រូវសាលាឧទ្ធរណ៍រាជធានីភ្នំពេញ បើកសវនាការលើបណ្តឹងសុំនៅក្រៅឃុំបណ្តោះអាសន្ន នៅរសៀលថ្ងៃទី១១ ខែមិថុនា ស្អែកនេះ៕

ក្រសួងយុត្តិធម៌ចាត់ទុករបាយការណ៍អង្គការលីកាដូរឿងឃុំខ្លួនអនីតិជនក្នុងពន្ធនាគារគឺមិនស្របនឹងច្បាប់

មាស ដា (Meas Da) — Mon, 03 Jun 2024 22:50:23 +0000

ក្រសួងយុត្តិធម៌ ចាត់ទុករបាយការណ៍របស់អង្គការការពារសិទ្ធិមនុស្ស លីកាដូ ជុំវិញការរកឃើញភាពមិនចាំបាច់នៃការឃុំខ្លួនកុមារដែលតាមម្តាយនៅក្នុងពន្ធនាគារថា គឺជារឿងដែលផ្ទុយពីស្មារតីច្បាប់។

ប្រតិកម្មនេះ ធ្វើឡើងនៅក្រោយពេលដែល អង្គការការពារសិទ្ធិមនុស្ស លីកាដូ (Licadho) បានចេញរបាយការណ៍នៅចំថ្ងៃទិវាសិទ្ធិកុមារអន្តរជាតិ ១មិថុនា ក្រោមចំណងជើងថា«បញ្ឈប់ការឃុំខ្លួនមិនចាំបាច់លើកុមារ ក្នុងពន្ធនាគារ »។

ថ្លែងប្រាប់គេហទំព័រ Newsroom Cambodia នៅថ្ងៃទី៣ ខែមិថុនា នេះ លោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ថាការចេញសេចក្តីថ្លែងការណ៍របស់អង្គការ លីកាដូ គឺ មិនសមស្របទៅនឹងនីតិវិធីច្បាប់នោះទេ ទាំងច្បាប់ជាតិ និងច្បាប់អន្តរជាតិ។លើសពីនេះទៀត ជាទូទៅវិធានការច្បាប់លើអនីតិជនភាគច្រើនផ្តោតទៅលើការអប់រំ ស្តារនីតិសមប្បទាជាជាងការឃុំខ្លួន។

លោកបញ្ជាក់ថា៖«ការដែលមិនឱ្យឃុំខ្លួនហ្នឹង វាមិនមែនជាវិធីសាស្រ្តក្នុងការដោះស្រាយការចង្អៀតណែនក្នុងពន្ធនាគារទេ។ អ្វីដែលយើងអនុវត្តគឺឃុំ ឬមិនឃុំផ្អែកលើច្បាប់នីតិវិធីច្បាប់ដែលមានជាធរមាន។ ការឃុំខ្លួនអនីតិជនហ្នឹង ត្រូវតែផ្អែកលើច្បាប់ ច្បាប់គេកំណត់អាយុប៉ុន្មានដែលត្រូវទទួលការខុសត្រូវ។ ការឃុំខ្លួនអនីតិជនគឺលុះត្រាតែចាំបាច់ ហើយជាមធ្យោបាយចុងក្រោយ »។

ស្រដៀងគ្នានេះដែរ អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ លោក នុត សវនា បញ្ជាក់ថាទាំងទារក និងកុមារដែលរស់នៅក្នុងពន្ធនាគារទទួលបានការយកចិត្តទុកដាក់ខ្ពស់ពីពន្ធនាគារ និងអង្គការជាដៃគូ។ក្រៅពីនេះ ច្បាប់ក៏បានឱ្យខាងពន្ធនាគារយកចិត្តទុកដាក់ផ្គត់ផ្គង់ចំណីអាហារ និងអាហារបំប៉នសុខភាពដល់ទារកឱ្យល្អដែរ។

លោកបន្តថា៖«ក្មេងនៅក្នុងពន្ធនាគារមានការយកចិត្តទុកដាក់ ហើយអ្នកជាប់ឃុំដទៃទៀតហ្នឹង ជួយមើលគ្នាបានដិតដល់ណាស់។ មើលសាច់ឈាមទៅចង់ល្អជាងអ្នកនៅខាងក្រៅ សម្រាប់អ្នកដែលមានជីវភាពខ្វះខាតអីហ្នឹង។ ទារកនៅក្នុងទទួលបានការថែទាំល្អជាងទាំងការចាក់វាំងសាំង អាហាររូបត្ថបម្ភ »។

ការរិះគន់ពីស្ថាប័នជំនាញរបស់រដ្ឋាភិបាលនេះ គឺបន្ទាប់ពីអង្គការ លីកាដូ បានចេញផ្សាយរបាយការណ៍របស់ខ្លួន កាលពីថ្ងៃទី១ មិថុនា ឆ្នាំ២០២៤ ដោយអំពាវនាវឱ្យបញ្ឈប់រាល់ទម្រង់នៃការឃុំខ្លួនកុមារ ដែលតាមម្តាយនៅក្នុងពន្ធនាគារ ប្រយោជន៍ដើម្បីកុំឱ្យមានភាពចង្អៀតណែននៅក្នុងឃុំ។សេចក្តីថ្លែងការណ៍ អមដោយ ឃ្លីបវីដេអូ ផង លីកាដូ ទទូចឱ្យក្រសួងមហាផ្ទៃ ក្រសួងយុត្តិធម៌ ស្ថាប័នតុលាការ និងស្ថាប័នអនុវត្តច្បាប់ដទៃទៀត បញ្ឈប់ការឃុំខ្លួនដោយមិនចាំបាច់លើកុមារ និងអនីតិជនក្នុងពន្ធនាគារ។

មិនតែប៉ុណ្ណោះ ស្ថាប័នមិនមែនរដ្ឋាភិបាលដដែលនេះ ក៏បានអំពាវនាវឱ្យអាជ្ញាធរពាក់ព័ន្ធប្រើប្រាស់ទោសនៅក្នុងពន្ធនាគារជាជម្រើសចុងក្រោយសម្រាប់អនីតិជន និងម្តាយដែលមានកូនតូចនៅក្នុងពន្ធនាគារដែលមានលក្ខណៈចង្អៀតណែន និងកង្វះបរិក្ខារ និងធនធានគ្រប់គ្រាន់ដែលកំពុងបន្តកើនឡើងពីមួយឆ្នាំទៅមួយឆ្នាំ។

បន្ថែមលើរបាយការណ៍នេះ លោក អំ សំអាត នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ ឱ្យដឹងថា ពន្ធនាគារមិនមែនជា កន្លែងសម្រាប់ឃុំខ្លួនកុមារ និងអនីតិជននោះទេ។ ដូច្នេះលោកថា គួរតែប្រើប្រាស់ជម្រើសផ្សេងទៀតជាបន្ទាន់ និងជាលក្ខណ:ប្រព័ន្ធ ជំនួសឱ្យការឃុំខ្លួនកុមារ និងអនីតិជនក្នុងពន្ធនាគារ ដោយជ្រើសរើសការឃុំខ្លួន ជាជម្រើសចុងក្រោយ។

លោកថ្លែងថា៖«កុមារនិងអនីតិជន មិនគួរត្រូវដាក់នៅក្នុងបន្ទប់ឃុំខ្លួនដែលមានភាពចង្អៀតណែន មិនទទួលបានអាហារដែលមានជីវជាតិគ្រប់គ្រាន់ មិនមានកន្លែងគេងគ្រប់គ្រាន់ មិនមានឱកាសទទួលបានការអប់រំ កង្វះលទ្ធភាពទទួលការជួបសួរសុខទុក្ខពីក្រុមគ្រួសារ កង្វះសុខមាលភាព កង្វះការទទួលបានសម្ភារ:អនាម័យ ឬសម្ភារ:សម្រាប់ស្រ្តីមានរដូវ និងកង្វះទឹកសម្រាប់ទទួលទាន និងប្រើប្រាស់ ជាពិសេសនៅក្នុងអំឡុងពេលដែលមានការឡើងកំដៅខ្លាំងនៅក្នុងប្រទេស »។

យ៉ាងនេះក្តី អ្នកនាំពាក្យរងក្រសួងមហាផ្ទៃលោក ទូច សុខៈ បដិសេធថា ក្រសួងមហាផ្ទៃមិនមានអំណាចណាមួយក្នុងការសម្រេចឃុំខ្លួនបុគ្គលណាម្នាក់មិនថាកុមារ ឬអនីតិជនទេ។ផ្ទុយទៅវិញ ការសម្រេចឃុំខ្លួន ឬមិនឃុំនេះគឺជាសមត្ថកិច្ចរបស់តុលាការ និងក្រសួងយុត្តិធម៌ឯណោះទៅវិញទេ។

លោកបន្តថា៖«តុលាការលោកពិនិត្យមើលទៅលើចរិតនៃបទល្មើសដែលគ្រោះថ្នាក់រួមផ្សំនិងបទល្មើសគ្រប់គ្រាន់ លោកមិនមែនចេះតែឃុំខ្លួនទេ។ នេះជាការយល់ឃើញរបស់ខ្ញុំ ព្រោះវាអត់បានប្រយោជន៍អីទេចំពោះតុលាការ។ ប៉ុន្តែវាគិតពីប្រយោជន៍ធំ ផលប៉ះពាល់ធំមកលើសង្គម មកលើកុមារខ្លួនឯងនិងកុមារដទៃៗទៀត អាហ្នឹងគេសម្រេចឃុំខ្លួនបណ្តោះអាសន្នវាគឺជា សិទ្ធិស្របច្បាប់របស់ខាងតុលាការ »។

បើទោះជាទាំងក្រសួងយុត្តិធម៌ និងអគ្គនាយកដ្ឋានពន្ធនាគារ នៃក្រសួងមហាផ្ទៃ ថ្លែងការពារថាការឃុំខ្លួននេះ វាស្របទៅនឹងគោលការណ៍ច្បាប់ ហើយមានការពិនិត្យដោយហ្មត់ចត់ផ្នែកសុខភាពសម្រាប់កុមារក្តី ក៏អ្នកការពារសិទ្ធិមនុស្ស នៃអង្គការ លីកាដូ រកឃើញថាបញ្ហានេះស្ថាប័នសាម៉ីរបស់រដ្ឋ នៅមិនទាន់បានដោះស្រាយឱ្យបានសមស្របនៅឡើយទេ។ម្យ៉ាងវិញទៀត ការឃុំខ្លួនកុមារ និងអនីតិជនក្នុងពន្ធនាគាររួមទាំងកុមារដែលរស់នៅតាមម្តាយ និងស្រី្តមានផ្ទៃពោះក្នុងពន្ធនាគារមានការប៉ះពាល់ដល់ការលូតលាស់សារពាង្គកាយ និងបញ្ញាស្មារតីរបស់កុមារមានរូបភាពអាក្រក់ជាងមុន។

លើសពីនេះទៀត អង្គការ លីកាដូ បានចេញផ្សាយនូវ ឃ្លីបវីដេអូ ខ្លីមួយ នៅចំថ្ងៃទិវាសិទ្ធិកុមារ ដោយបង្ហាញពីការកើនឡើងនៃចំនួនរបស់កុមារ និងអនីតិជននៅក្នុងពន្ធនាគារ ដែលអ្នកទាំងនោះគួរតែរស់នៅក្នុងផ្ទះ ជាមួយក្រុមគ្រួសាររបស់ពួកគេ ឬក៏បានចូលសាលារៀនជាមួយមិត្តភ័ក្តិរបស់ពួកគេ។

របាយការណ៍ដែលចេញដោយអគ្គនាយកដ្ឋានពន្ធនាគារ នៃក្រសួងមហាផ្ទៃ នៅក្នុងខែមីនា ឆ្នាំ២០២៤ បង្ហាញថា អនីតិជនមានចំនួន២.២១៤នាក់ ត្រូវឃុំខ្លួននៅក្នុងពន្ធនាគារចំនួន១៩ ដែលអង្គការលីកាដូ កំពុងធ្វើការងារជាមួយ។ចំណែក ច្បាប់ស្តីពីយុត្តិធម៌អនីតិជន និងទណ្ឌិតជាអនីតិជន ត្រូវបានមន្ត្រីពន្ធនាគារកំណត់ថា ជាជនដែលមានអាយុចាប់ពី១៤ ឆ្នាំដល់២៤ ឆ្នាំ៕

បទយកការណ៍៖ គ្រូបង្រៀននៅតាមសាលារដ្ឋនៅតែបង្ហាញក្តីបារម្ភចំពោះសុខភាពក្រោយកម្តៅធ្លាក់ចុះ

មាស ដា (Meas Da) — Tue, 07 May 2024 08:41:44 +0000

ស្របពេលមានសេចក្តីជូនដំណឹងថ្មីស្តីពីការធ្លាក់ចុះនៃការកើនឡើងនៃកម្តៅ សម្រាប់ក្រុមគ្រូបង្រៀននៅតាមគ្រឹះស្ថានសិក្សារដ្ឋ នៅតែដាក់ក្តីបារម្ភចំពោះមុខ គឺការប្រែប្រួលអាកាសធាតុ និងការវាយលុកនៃកម្តៅខុសពីធម្មតា ក្នុងពេលបច្ចុប្បន្ននេះ។

ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានរបស់ខ្លួន កាលពីថ្ងៃអាទិត្យកន្លងទៅ ដោយបញ្ជាក់ថា ស្ថានភាពអាកាសធាតុ នឹងវិលមករកប្រក្រតីវិញក្នុងកម្រិត៣៩ អង្សាសេ ចាប់ពីថ្ងៃទី៥ ដល់ថ្ងៃទី៧ ឧសភា។

ផ្ទុយពីនេះ សម្រាប់សិស្សានុសិស្ស និងគ្រូបង្រៀនមួយចំនួន បានបង្ហាញការយល់ឃើញស្របគ្នាថា ការបន្តវាយលុកកម្តៅជាប់ៗគ្នា ក្នុងរយៈពេលចុងក្រោយនេះ បានបង្កើតទៅជាបរិបថថ្មីមួយសម្រាប់កម្ពុជា។ពួកគាត់ចាត់ទុកថា ការផ្តាស់ប្តូរអាកាសធាតុខុសពីធម្មតា ដែលពុំធ្លាប់មាននេះ បានបង្កើតជាក្តីព្រួយបារម្ភសម្រាប់សុខភាពប្រចាំថ្ងៃ។

ក្រសួងធនធានទឹក និងឧតុនិយមកាលពីដើមខែមីនាបានបញ្ជាក់ថា ប្រទេសកម្ពុជានឹងទទួលរងនូវបាតុភូតអែលនីញ៉ូ (El Niño) ដែលនឹងប្រឈមនូវអាកាសធាតុក្តៅហើយស្ងួត ចាប់ពីខែមីនា ដល់ខែឧសភា ទើបវិលទៅរកសីតណ្ហភាពធម្មតាវិញ។

កញ្ញា ស៊ីណា សុធីតា គ្រូបង្រៀនមុខវិជ្ជាគណិតវិទ្យា នៃអនុវិទ្យាល័យកោះអន្លង់ចិនប្រាប់ Newsroom Cambodia ថា ក្នុងអំឡុងនៃការកើនឡើងកម្តៅនេះវាបានបង្កឱ្យមានផលប៉ះពាល់មួយចំនួនទៅកាន់សិស្ស និងគ្រូបង្រៀន ក៏ដូចជាប៉ះពាល់ទៅដល់លទ្ធផលនៃការសិក្សារបស់សិស្សដែរ។

កញ្ញាថ្លែងថា៖ «ចំពោះបញ្ហាសុខភាពយើងដឹងហើយខែក្តៅប៉ះពាល់ម៉េចខ្លះ? ពេលរៀនត្រូវក្តៅអីវាពិបាកវាសឺៗ ឈរបង្រៀនវាពិបាក ហើយភាគច្រើនកូនសិស្សបងគាត់ក្តៅខ្លួនឈឺក្បាល គាត់មករៀនអត់កើតគាត់សុំច្បាប់។ បើទាក់ទងនឹងបញ្ហាលទ្ធផលនៃការសិក្សាដឹងស្រាប់ហើយ អាកាសធាតុក្តៅកូនសិស្សរៀនៗវាបែកញើសពីខាងក្នុងមកទោះដាក់កង្ហាម៉េចក៏ដោយ អ៊ីចឹងវាប៉ះពាល់សតិអារម្មណ៍ខួរក្បាលរបស់គាត់មិនចាប់មេរៀនបានដូចមុនទេ »។

យ៉ាងណាមិញ គ្រូបង្រៀនមុខវិជ្ជាគណិតវិទ្យារូបនេះ បញ្ជាក់ដែរថា ដោយសារតែសិស្សដែលកញ្ញាបង្រៀនជាសិស្សស្ថិតក្នុងថ្នាក់មធ្យមសិក្សា ដូច្នេះពួកគេទាំងនោះមានការយល់ដឹងខ្លះៗពីវិធីសាស្ត្រការពារខ្លួនក្នុងអំឡុងពេលឡើងកម្តៅខ្លាំង។កញ្ញា ស៊ីណា សុធីតា បន្តទៀតថា ដោយសារតែអាកាសធាតុប្រែប្រួល គណៈគ្រប់គ្រងក៏សម្រេចផ្អាកម៉ោងសិក្សាបន្ថែមនាពេលរលៀស ដោយតម្រូវឱ្យពួកគេមករៀនមួយពេល គឺពេលព្រឹក។

កញ្ញានិយាយថា៖ «ហើយណាមួយកាត់បន្ថយម៉ោងសិក្សាទៀត ដោយសារភាគច្រើនឆ្លងម៉ោងទៅពេលថ្ងៃដូចជា២ថ្ងៃដែរ ប៉ុន្តែឥឡូវផ្អាកហើយយើងមករៀនតែព្រឹកៗ »។

បើតាម គ្រូគណិតវិទ្យាដដែលក៏ស្នើឱ្យសិស្សានុសិស្សបន្តធ្វើស្វ័យសិក្សាដោយខ្លួនឯងនៅតាមផ្ទះ ក្នុងពេលដែលមានការកាត់បន្ថយម៉ោងសិក្សា ដើម្បីជួយឱ្យលទ្ធភាពនៃការសិក្សារបស់សិស្សពុំសូវមានការថមថយចុះ។

មិនខុសគ្នាដែរ អ្នកគ្រូ យ៉េង ថាន្នី គ្រូបង្រៀនកម្រិតមត្តេយ្យមសិក្សានៅសាលាបឋមសិក្សាភូមិកណ្តាល ស្ថិតក្នុងខេត្តបាត់ដំបង ប្រាប់ Newsroom Cambodia ថា ក្នុងស្ថានភាពសីតុណ្ហភាពកើនកម្តៅវាគឺជា ការរំខានមួយដែលប៉ះពាល់ទៅដល់ការបង្រៀនរបស់អ្នកគ្រូ ជួបការពិបាកច្រើនបូករួមទាំងការប៉ះពាល់ដល់ការសិក្សារបស់សិស្សានុសិស្សតូចៗផង។

អ្នកគ្រូបញ្ជាក់ថា៖«ក្តៅខ្លាំងពេកទោះបី គាត់ពាក់មួកពាក់អាវក្រាស់ម៉េចក៏ដោយ ក៏ខ្យល់បក់មកភាយដោយចំហាយក្តៅខ្លាំងហ្នឹង ធ្វើឱ្យគាត់[សិស្ស]រសេះរសោះហត់ដល់ពេលចូលក្នុងថ្នាក់ទៀត សូម្បីតែកង្ហារ ឬក៏ខ្យល់បក់ចូលក៏មានសីតុណ្ហភាពក្តៅ អ៊ីចឹងធ្វើឱ្យគាត់ពិបាកផ្តោតអារម្មណ៍ក្នុងការរៀនជាមួយយើង។ ជាគ្រូក៏ដូចគ្នាដែរ ពីមុនមកមានកម្លាំងបង្រៀនណាស់ បង្រៀនលាស់ៗ ដល់ពេលធាតុអាកាសប្រែប្រួលអ៊ីចឹង អត់កម្លាំងមិនដឹងបាត់ទៅណាអស់ទេ »។

គ្រូបង្រៀនរូបនេះ គាំទ្រចំពោះការលើកឡើងរបស់លោកនាយករដ្ឋមន្រ្តី ហ៊ុន ម៉ាណែត ក្នុងការផ្អាកការសិក្សាដល់សិស្ស ខណៈសីតុណ្ហភាពកើនកម្តៅលើសពី៤០អង្សាសេ ក្នុងពេលបច្ចុប្បន្ននេះ។ អ្នកគ្រូថា បើទោះបីជាការផ្អាកនេះធ្វើឱ្យសិស្សខាកខាននូវមេរៀនមួយចំនួនក៏ពិតមែន តែវាប្រសើរជាជាងបង្ខំចិត្តបង្រៀនពួកគេ ទាំងអាកាសធាតុមិនអំណោយផល ដែលអាចបង្កជាការប៉ះពាល់ដល់សុខភាពសិស្សនិងគ្រូ។

ប្រភពបន្តថា៖«អ្នកខ្លះគាត់មានការយល់ឃើញថា ការផ្អាកការសិក្សាបណ្តោះអាសន្នហ្នឹងគឺ ខាត ព្រោះរាល់ថ្ងៃយើងបង្រៀនតិចម៉ោង ម៉ោងសិក្សាវា៤ម៉ោង។ បើយើងផ្អាកទៀតធ្វើឱ្យកុមារខាកការសិក្សា។តែបើយើងគិតឱ្យស៊ីជម្រៅទៅ ស្របទៅនឹងសីតុណ្ហភាពក្តៅសព្វថ្ងៃ បើយើងនៅតែជម្នះទៀត វានឹងបង្កផលប៉ះពាល់ខ្លាំងជាងហ្នឹងទ្វេរដង ប៉ះពាល់ទាំងសុខភាពបញ្ញា និងសុខភាពរាងកាយរបស់ក្មេងហ្នឹង »។

កំពុងដើរត្រឡប់ទៅផ្ទះតាមផ្លូវកម្តៅហួតហែង ដោយនៅក្នុងដៃយួរទឹកដបធំមួយដបផង យុវជន ភក្តី វិច្ឆិកា អាយុ ១៧ឆ្នាំ ដែលកំពុងសិក្សាថ្នាក់ទី១០ នៃវិទ្យាល័យ ហ៊ុន សែន បុរី១០០ខ្នង ក្នុងរាជធានីភ្នំពេញ ប្រាប់Newsroom Cambodiaនៅ ថា ឥឡូវដោយសារតែមើលឃើញថា កម្តៅវាកើនឡើង ខាងសាលាបានកាត់បន្ថយម៉ោងសិក្សាខ្លះដើម្បីកុំឱ្យសិស្សប្រឈមនឹងកម្តៅ។ វិច្ឆិកា បន្តថា ជារៀងរាល់ថ្ងៃពេលមកសាលារៀនរូបគេតែងតែយកទឹក និងក្រដាសជូនមាត់មកតាមខ្លួនជាប្រចាំ ដើម្បីការពារសុខភាពទប់ទល់នឹងអាកាសធាតុដែលចេះតែបន្តឡើងកម្តៅខុសពីធម្មតាដូចនេះ។

ប្រភពបន្តថា៖«ចំពោះខ្ញុំតែម្តង ខ្ញុំយកទឹកនិ ងក្រដាសជូតមាត់ជាប់ខ្លួនតែម្តង»។

ទោះជាយ៉ាងណា សិស្សថ្នាក់ទី១០រូបថា អាកាសធាតុក្តៅបែបនេះសម្រាប់សិស្សដែលរៀនក្នុងកម្រិតអនុវិទ្យាល័យ វិទ្យាល័យ និងនិស្សិត គឺមិនសូវមានបញ្ហាប្រឈមខ្លាំង ឬងាយនឹងចាញ់កម្តៅទេ ព្រោះពួកគេអាចចេះការពារខ្លួនឯងបាន។ ប៉ុន្តែយុវជនរូបនេះថា បើក្មេងៗតូចៗដូចជា ថ្នាក់បឋមពិសេសថ្នាក់មតេ្តយ្យសិក្សាវិញ ពួកគេអាចនឹងប្រឈមចំពោះសុខភាព នៅពេលរៀន ខណៈអាកាសធាតុក្តៅបែបនេះ។

ប្រភពបន្តថា៖«ខ្ញុំគិតថា ព្រោះគាត់នៅក្មេង ហើយបរិយាកាសបច្ចុប្បន្នវាក្តៅខ្លាំងឡើងដល់៤០អង្សាសេ យើងមនុស្សធំក្តៅប៉ុណ្ណឹងហើយ ហើយគ្នាក្មេងទៀតអាចនឹងក្តៅជាងយើង»។

ហាក់មិនខុសគ្នាប៉ុន្មានទេ យុវតី ខាន់ ធីតា សិស្សថ្នាក់ទី៩ នៃអនុវិទ្យាល័យ ហ៊ុន សែន បុរី១០០ខ្នង ក៏និយាយដែរថា បើទោះបីជាលោកគ្រូអ្នកគ្រូបានបន្ថយម៉ោងបង្រៀនដើម្បីបង្ការដល់សិស្សពីអាកាសធាតុក្តៅក៏ពិតមែន ក៏យុវតីរូបនេះថា ខ្លួននៅតែប្រឈមនឹងបរិយាកាសក្តៅនេះដដែលទេ។

ប្រភពបន្តថា៖«ខ្ញុំរៀនថ្នាក់ជាន់លើ ដល់ពេលឡើងកាំជណ្តើរទៅវាឆាប់ហត់ ហើយឆាប់បែកញើស ពិបាកដង្ហើមហ្មង។ ខ្ញុំញ៉ាំទឹកហើយនៅតែស្រេកទៀត ព្រោះខ្វះជាតិទឹក»។

ចំណែក អ្នកស្រី សុផុន លីមួយ ដែលត្រូវជាអាណាព្យាបាលសិស្សកម្រិតមតេ្តយ្យសិក្សាម្នាក់ ក្នុងខេត្តបាត់ដំបង លើកឡើងថារាល់ថ្ងៃអ្នកស្រីមានកូនប្រុស២នាក់នៅក្នុងបន្ទុក។ប៉ុន្តែកូនប្រុសច្បងដែលមានអាយុ៣ឆ្នាំ អ្នកស្រីបានបញ្ជូនឱ្យទៅរៀនថ្នាក់មតេ្តយ្យកម្រិតទាបទៅហើយ នៅសាលាបឋមសិក្សា អូរអន្លក់ ។

បើតាមអ្នកស្រី សុផុន លីមួយ ស្របពេលអាកាធាតុកំពុងតែក្តៅហែងបែបនេះ នឹងបណ្តាលឱ្យស្បែករបស់កុមារងាយប្រឈមនឹងបញ្ហាដូចជា ឡើងរមាស់ រោល រលោក និងឆាប់គ្រុនជាដើម។ ជាក់ស្តែងអ្នកស្រីថា កូនរបស់អ្នកស្រីផ្ទាល់កំពុងឡើងរមាស់ រោលក្រហមពេញខ្លួន ដែលបណ្តាលមកពីហប់បែកញើស ព្រោះអាកាសធាតុក្តៅ។

ប្រភពបន្តថា៖«ថ្ងៃមិញពេលក្តៅខ្លាំង ពេលមកពីរៀនវិញ ដោះខោអាវដោះអីចេញ[ខ្នង]ឡើងក្រហមពេញខ្លួន…បើដូចបងមួយនោះ កូនគាត់រៀនពេលថ្ងៃ ទៅរៀនក្តៅអ៊ីចឹងទៅវាលេងអីផងវាឆាប់បែកញើស វាឡើងពងក្រហមៗហ្នឹង វាអេះទៅរមាស់ ទៅជាក្លាយមេរោគអីវាឆ្លងចូលតាមកន្ទួលក្រហមហ្នឹង ជាមួយធូលីពេលប៉ះជាមួយស្បែក។ ឥឡូវឡើងពងបែកពេញខ្លួននិងមាត់ ហើយឥឡូវយកទៅពេទ្យ។ អាណិតមែនទែន»។

ក្រសួងអប់រំ យុវជន និងកីឡា កាលពីថ្ងៃទី៣០ ខែមេសា កន្លងទៅបានចេញសេចក្តីណែនាំមួយដើម្បីបង្ការទប់ស្កាត់ហានិភ័យ និងចៀសវាងជំងឺផ្សេងៗ ដែលអាចប៉ះពាល់ដល់សុខភាព ការរៀនសូត្ររបស់សិស្ស និងការបំពេញការងាររបស់គ្រូបង្រៀន ដោយបានផ្លាស់ប្តូរម៉ោងចេញ-ចូលរៀនពីម៉ោង៧ ដល់ម៉ោង១០សម្រាប់ថ្នាក់ពេលព្រឹក និងម៉ោង២ ដល់ម៉ោង៤សម្រាប់ថ្នាក់ពេលរសៀល។

ក្រសួងអប់រំបញ្ជាក់ក្នុងសេចក្តីណែនាំទៀតថា សិស្សានុសិស្សត្រូវអនុញ្ញាតឱ្យសម្រាករយៈពេល១៥នាទីក្នុងមួយម៉ោងសិក្សា គ្រឹះស្ថានសិក្សានីមួយៗត្រូវត្រៀមទឹកសម្រាប់គ្រូបង្រៀន និងសិស្សប្រើប្រាស់ ព្រមទាំងណែនាំសិស្សឱ្យយកទឹកឆ្អិនពីផ្ទះមកទទួលទាន។ ក្រសួងអប់រំបន្ថែមថា ក្នុងករណីសីតុណ្ហភាពឡើងកម្តៅលើសពីការគ្រប់គ្រង គ្រឹះស្ថានសិក្សាមានសិទ្ធិក្នុងការសម្រេចតាមស្ថានភាពជាក់ស្តែង។

ស្របពេលជាមួយគ្នានេះដែរ លោកនាយករដ្ឋមន្រ្តី ហ៊ុន ម៉ាណែត លើកឡើងថា គណៈគ្រប់គ្រងសាលានីមួយៗជា ពិសេសតាមសាលាបង្រៀនក្មេងៗអាចផ្អាកការសិក្សាបាន ប្រសិនបើថ្ងៃណាកើនឡើងកម្តៅលើសពី៤០ អង្សាសេ។ថ្លែងនៅចំពោះមុខ កម្មករនិយោជិត នៅកំពង់ផែស្វយ័ត ក្រុងព្រះសីហនុ កាលពីថ្ងៃទី១ ឧសភា ឆ្នាំ២០២៤ លោក ហ៊ុន ម៉ាណែត អះអាងថា ដើម្បីបញ្ចៀសបញ្ហា ការសិក្សានឹងត្រូវផ្អាក ជាបណ្តោះអាសន្ន ដោយយោងលើភាពចាំបាច់ ក្នុងការការពារសុខភាពសាធារណៈរបស់សិស្សានុសិស្ស។

លោកបន្តថា៖«បើចាំបាច់គឺ ប្រគល់សិទ្ធិឱ្យគណៈគ្រប់គ្រង បើសិនជាក្តៅខ្លាំងលើស៤០អង្សាសេ ហើយសាលាមិនអំណោយផលអាចមានសិទ្ធិផ្អាកការសិក្សាថ្ងៃនោះកុំឱ្យនៅអង្គុយ ព្រោះខ្ញុំឃើញម្សិលមិញតាមសាលាកន្លែងខ្លះតាមហ្វេសប៊ុកកន្លែងខ្លះសិស្សត្រូវដាក់យកកន្សែងត្រជាក់ជ្រលក់ទឹកយកមកដាក់លើក្បាល នៅអង្គុយរាប់ម៉ោងមិនល្អទេ »។

ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី លើកឡើងថា បញ្ហាសុខភាពរបស់សិស្សគឺជារឿងសំខាន់មួយក្នុងអំឡុងពេលអាកាសធាតុប្រែប្រួល និងចេះតែបន្តឡើងកម្តៅបែបនេះ ពីព្រោះវាអាចនឹងប៉ះពាល់ដល់ការសិក្សារបស់ពួកគេ។ អ្នកស្រីបន្តថា សាលារៀនក្នុងទីក្រុងភាគច្រើនពុំសូវមានដើមឈើដែលអាចកាត់បន្ថយកម្តៅ ឬនាំឱ្យខ្យល់បក់ក្នុងបរិវេណសាលាឡើយ។

អ្នកស្រីថ្លែងថា៖ «ដោយឡែកតំបន់ដូចជានៅភ្នំពេញអីកន្លែងខ្លះគឺអត់មានដើមឈើអីដែលគួរឱ្យនាំខ្យល់អីត្រជាក់ទេ គឺហាក់បីដូចជាក្តៅហែងសម្រាប់សិស្សានុសិស្ស សម្រាប់គ្រូបង្រៀនប្រឈមនឹងបញ្ហាសុខភាពរបស់គាត់»។

ជុំវិញបញ្ហានៃការផ្អាក និងផ្លាស់ម៉ោងសិក្សា ប្រធានសមាគមគ្រូបង្រៀនឯករាជ្យរូបនេះយល់ឃើញថា ដើម្បីចៀសវាងផលប៉ះពាល់ដល់ការសិក្សារបស់សិស្ស ក្រសួងអប់រំគួរមានការសិក្សាតាមប្រព័ន្ធអនឡាញបន្ថែមពីគ្រូបង្រៀន ដោយអ្នកស្រីថា បើទោះបីជាមានការផ្លាស់ម៉ោងសិក្សាក៏ពិតមែន ក៏គ្រូបង្រៀន និងសិស្សគឺត្រូវធ្វើដំណើរចន្លោះម៉ោងដែលកំពុងក្តៅដដែល។

អ្នកស្រីថ្លែងថា៖ «គួរតែពួកគាត់រៀនតាមអនឡាញត្រូវរៀនតាមអនឡាញខ្លះទៅ ដោយសារតែយើងឃើញហើយការធ្វើដំណើរទៅរៀន និងទៅបង្រៀននេះគឺក្តៅខ្លំាងណាស់។ នេះគ្រាន់តែជាការធ្វើដំណើរផង ចុះទម្រាំយើងចូលដល់ក្នុងថ្នាក់ ដែលមានបន្ទប់សាលារៀនខ្លះគាត់បាំងស័ង្កសី»។

ស្រដៀងគ្នានេះដែរ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គីមអេង យល់ឃើញថា បញ្ហាកើនឡើងកម្តៅ និងបម្រែបម្រួលអាកាសធាតុនេះមិនមែនកើតមានតែកម្ពុជាទេ។ក្នុងន័យនេះ ការផ្អាក ឬបន្ថយម៉ោងសិក្សានៅតាមសាលារៀនរបស់ក្រសួងអប់រំគឺជាជម្រើសមួយល្អក្នុងការការពារសុខភាពរបស់សិស្សានុសិស្ស ពីព្រោះកាលណាពួកគេស្ថិតនៅក្រោមកម្តៅខ្លាំងវានឹងបង្កឱ្យពួកគេមានជំងឺផ្សេងៗជាដើម។

លោកបន្តថា៖ «អ៊ីចឹងកម្តៅហ្នឹងអាចបណ្តាលឱ្យគាត់ឈឺ អាចបណ្តាលឱ្យគាត់មានបញ្ហាសុខភាពធ្ងន់ធ្ងរ អ៊ីចឹងការការពារអាយុជីវិតរបស់សិស្សនិស្សិត របស់ប្រជាពលរដ្ឋគឺសំខាន់ចាំបាច់។ ខ្ញុំថាការចេញវិធានការរបស់ក្រសួងក៏ដូចជារដ្ឋាភិបាល ខ្ញុំថាជារឿងមួយល្អដើម្បីការពារកុំឱ្យយុវជន កុំឱ្យនិស្សិត កុមារគ្នារងគ្រោះដោយសារតែការឡើងកម្តៅនេះ »។

លោក យង់ គីមអេង ក៏ជំរុញឱ្យសាលារៀននីមួយៗផ្តល់ទឹកស្អាតប្រើប្រាស់ និងសម្រាប់បរិភោគសម្រាប់សិស្សក្នុងអំឡុងមានការកើនឡើងកម្តៅដែរ។ជាងនេះទៀត ការផ្តល់សិទ្ធិក្នុងការសម្រេចនៅតាមគ្រឹះស្ថានពីក្រសួងអប់រំគួរតែមានការណែនាំបន្ថែមពីក្រសួង ដើម្បីឱ្យគណៈគ្រប់គ្រងសាលារៀនអាចមានលទ្ធភាពប្រសើរក្នុងពេលដែលខ្លួនធ្វើការសម្រេចចិត្ត៕

ផ្ទះពលរដ្ឋជាង១០០ខ្នង រងការខូចខាតដោយខ្យល់កន្រ្តាក់ខណៈមានភ្លៀងរយៈពេលប៉ុន្មានថ្ងៃនេះ

មាស ដា (Meas Da) — Mon, 06 May 2024 10:31:48 +0000

បន្ទាប់ពីមានភ្លៀងធ្លាក់រយៈពេលប៉ុន្មានថ្ងៃជាប់ៗគ្នាចុងក្រោយនេះមន្រ្តីជាន់ខ្ពស់នៃគណៈកម្មាធិការគ្រប់គ្រងគ្រោះមហន្តរាយលើកឡើងថា ផ្ទះពលរដ្ឋជាង១០០ខ្នង ត្រូវខូចខាតដោយសារខ្យល់កន្រ្តាក់។

អ្នកនាំពាក្យនៃគណៈកម្មាធិការគ្រប់គ្រងគ្រោះមហន្តរាយ លោក សុទ្ធ គឹមកុលមុនី ប្រាប់ Newsroom Cambodia នៅព្រឹកថ្ងៃចន្ទនេះថា លំនៅដ្ឋានរបស់ប្រជាពលរដ្ឋត្រូវរងការប៉ះពាល់ដោយសារតែមានខ្យល់កន្រ្តាក់ ពេលភ្លៀងធ្លាក់កាលពីពេលថ្មីៗនេះ ទាំងនៅតាមបណ្តាខេត្តមួយចំនួន និងរាជធានីភ្នំពេញផង។

លោកបន្តថា៖«តាមតួលេខដែលយើងទទួលបានពីគណៈកម្មាធិការគ្រប់គ្រងគ្រោះមហន្តរាយខេត្ត មកដល់ថ្ងៃនេះគឺបានប៉ះពាល់ជាង១០០ខ្នងហើយ។ ជាមួយនេះដែរ ក៏បានធ្វើឱ្យខូចខាតជាង៣០ខ្នង នេះទិន្នន័យបឋមដែលយើងទទួលបាន ហើយនៅខេត្តមួយចំនួនទៀតមិនទាន់បានរាយការណ៍មកគណៈកម្មាធិការជាតិគ្រប់គ្រងគ្រោះមហន្តរាយ» ។

លោកឱ្យដឹងទៀតថា ក្នុងចំណោមផ្ទះដែលរងការប៉ះពាល់ជាង១០០ខ្នង ក្នុងហេតុការណ៍ខ្យល់កន្ត្រាក់នេះ លោកថា ក្នុងនោះមានផ្ទះ៣០ខ្នងត្រូវខូចខាតទាំងស្រុង ប៉ុន្តែមិនបណ្តាលឱ្យប៉ះពាល់ដល់អាយុជីវិតមនុស្ស និងសត្វទេ។

លោកបន្តថា៖«ជាបឋមនេះ យើងបានទទួលទិន្នន័យការខូចខាត ប៉ះពាល់ផ្ទះ របើកដំបូលអីផ្សេងៗនេះ គឺជាង១០០ខ្នង ហើយខូចខាតទាំងស្រុងគឺជាង៣០ខ្នង។ ជាមួយគ្នានេះ បញ្ហាផ្គរន្ទះបានកើតមាន បានបង្កឱ្យឆេះផ្ទះពលរដ្ឋយើង១ខ្នង និងងាប់គោរ១ក្បាល។ ប៉ុន្តែករណីទាំងពីរនេះមិនបានបណ្តាលឱ្យមានមនុស្សស្លាប់ទេ »។

ក្នុងពេលមានបញ្ហាកើតឡើង អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយរូបនេះថា ជាការឆ្លើយតបបន្ទាន់ក្នុងការជួយសង្គ្រោះប្រជាពលរដ្ឋកងកម្លាំងប្រដាប់អាវុធទាំងបីប្រភេទគឺមានតួនាទីក្នុងការចុះជួយ។ ក្រៅពីនេះក៏មានកងកម្លាំងអាជ្ញាធរនៅតាមមូលដ្ឋានជួយអន្តរាគមន៍ បូករួមទាំងក្រុមកាកបាតក្រហមកម្ពុជាដែលមានទីតាំងតាមស្រុកខេត្តទាំងអស់នោះទៀតផង។

យ៉ាងនេះក្តី លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ប្រាប់ Newsroom Cambodia នៅថ្ងៃចន្ទនេះថា នៅពេលមានគ្រោះមហន្តរាយកើតឡើង ក្រៅពីការជួយសង្គ្រោះពីក្រុមអាជ្ញាធរ អ្នកដែលមានតួនាទីសំខាន់ជាងគេក្នុងការជួយប្រជាពលរដ្ឋ គឺមានតែគណៈកម្មាធិការគ្រប់គ្រងគ្រោះមហន្តរាយទេ ដែលដើរតួនាទីសំខាន់ក្នុងរឿងនេះ។

លោកបន្តថា៖«ចំពោះបញ្ហាគ្រោះមហន្តរាយដែលកើតឡើង យើងឃើញថា អ្នកដែលសំខាន់ទីមួយគឺ គណៈកម្មាធិការគ្រប់គ្រងគ្រោះមហន្តរាយ ដែលជាអ្នកត្រូវជួយប្រជាពលរដ្ឋ។ បើសិនជាមានទឹកជំនាន់យ៉ាងណាគឺត្រូវជួយសង្គ្រោះអាយុជីវិតរបស់ប្រជាពលរដ្ឋ។ អាជ្ញាធរជួយធ្វើម៉េច នៅពេលប្រជាពលរដ្ឋខូចខាតផ្ទះសម្បែង ខូចខាតអីហ្នឹង គាត់ត្រូវជួយប្រជាពលរដ្ឋ ជួយធ្វើម៉េចជួយជួសជុលអ្នកខ្វះខាតខាងជីវភាព»។

លោកបន្ថែមទៀតថា អ្នកដែលធ្វើការក្នុងវិស័យគោលនយោបាយរបស់រដ្ឋាភិបាលក្នុងការជួយសង្គ្រោះប្រជាពលរដ្ឋ ក៏ត្រូវពិនិត្យមើលឡើងវិញចំពោះការអនុវត្តគោលនយោបាយផ្សេងៗ ដើម្បីធ្វើយ៉ាងណា ទប់ស្កាត់កាត់បន្ថយហានិភ័យនានាកុំឱ្យកើតមានខ្ពស់សម្រាប់ប្រជាពលរដ្ឋ។ ក្រសួងធនធានទឹក និងឧតុនិយម នៅថ្ងៃចន្ទនេះ បានចេញសេចក្តីជូនដំណឹងរបស់ខ្លួន អំពីស្ថានភាពធាតុអាកាសនៅកម្ពុជាសម្រាប់ថ្ងៃទី៦ ខែឧសភា ឆ្នាំ២០២៤ ដោយលើកឡើងថា ចាប់ពីថ្ងៃទី៦ ដល់ថ្ងៃទី៨ ខែឧសភា ឆ្នាំ២០២៤ នៅតាមបណ្តាខេត្តក្រុងអាចនឹងមានភ្លៀងធ្លាក់លាយឡំដោយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដីចន្លោះពី២០% ទៅ២៥%៕

ភ្ញៀវទេសចរជាតិ និងអន្តរជាតិដើរកំសាន្តជិត៤៤ម៉ឺននាក់នាសប្តាហ៍ចុងខែធ្នូនេះ

មាស ដា (Meas Da) — Tue, 27 Dec 2022 03:12:11 +0000

កម្ពុជាមានភ្ញៀវទេសចរជាតិ និងអន្តរជាតិធ្វើដំណើរកំសាន្តជិត៤៤ម៉ឺននាក់ នៅសប្ដាហ៍ចុងខែធ្នូនេះ ហើយក្នុងនោះខេត្តព្រះសីហនុនៅតែនាំមុខ ក្នុងការទទួលបានភ្ញៀវទេសចរច្រើនជាងគេ។

យោងតាមការបង្ហោះស្ថិតិភ្ញៀវទេសចរ លើទំព័រហ្វេសប៊ុកផ្លូវការរបស់ក្រសួងទេសចរ នៅថ្ងៃទី២៧ ខែធ្នូ ឆ្នាំ២០២២ បានឱ្យដឹងថា កម្ពុជាទទួលបានភ្ញៀវទេសចរ សរុបមានចំនួន ៤៣៩,០៤៦នាក់ ក្នុងនោះភ្ញៀវទេសចរជាតិមានចំនួន ៤០២,៣៤៧នាក់ និងភ្ញៀវទេសចរបរទេសមាន ៣៦,៦៩៩នាក់ ដោយគិតចាប់ពីថ្ងៃទី ១៩ ដល់ទី២៥ ខែធ្នូ ឆ្នាំ២០២២។

បើតាមក្រសួងទេសចរណ៍ គោលដៅទេសចរសំខាន់ៗ រូមមាន ខេត្តព្រះសីហនុ ១៩០,០១៥នាក់ ខេត្តសៀមរាប ៧៦,០២២នាក់ រាជធានីភ្នំពេញ ៣២,១៧៥នាក់ខេត្តកំពត ២៧,៦៨១នាក់ ខេត្តបាត់ដំបង ១៩,៩៧០នាក់ ខេត្តកំពង់ចាម ១៤,១៦១នាក់ និងខេត្តកែប ១០,៨៧៨នាក់។

ដោយឡែក បើយោងតាមតួលេខតារាងស្ថិតិភ្ញៀវទេសចរកម្ពុជា កាលពីចុងខែវិច្ឆិកា នៅថ្ងៃទី២៨ ដល់ដើមខែធ្នូ ថ្ងៃទី៤ ឆ្នាំ២០២២ កម្ពុជាទទួលបានភ្ញៀវទេសចរសរុប ៥៥៤,០៦២នាក់ ច្រើនជាងចុងសប្តាហ៍ខែធ្នូនេះ៕

ក្រសួងទេសចរណ៍បដិសេធព័ត៌មានដែលថាភ្ញៀវទេសចរត្រូវមានទឹកប្រាក់តាមខ្លួន១ទៅ២ពាន់ដុល្លាមុនមកកម្ពុជា

មាស ដា (Meas Da) — Mon, 26 Dec 2022 04:31:28 +0000

ក្រសួងទេសចរណ៍បានបដិសេធនូវព័ត៌មានដែលបានលើកឡើងថា ភ្ញៀវទេសចរត្រូវតែមានទឹកប្រាក់ចាប់ពី ១,០០០ ឬ ២,០០០ ដុល្លារសិនមុនចូលមកព្រះរាជាណាចក្រកម្ពុជា ក្នុងនោះក៏មានបុគ្គលិកក្រុមហ៊ុនអាកាសចរណ៍មួយចំនួនបានឱ្យភ្លៀវទេសចរបង្ហាញទឹកប្រាក់ ១,០០០ ឬ ២,០០០ ដុល្លារ មុនអនុញ្ញាតឱ្យជិះយន្តហោះ។

យោងតាមការប្រកាសព័ត៌មានរបស់ក្រសួងទេសចរណ៍ដែលបានបង្ហោះលើទំព័រហ្វេសប៊ុកផ្លូវការរបស់ខ្លួន កាលពីថ្ងៃទី២៣ ខែធ្នូ ឆ្នាំ២០២២ បានឱ្យដឹងថា ថ្មីៗនេះមានព័ត៌មានមួយចំនួនលើកឡើងថា មានការកំណត់ឱ្យភ្ញៀវទេសចរណ៍ត្រូវមានទឹកប្រាក់តាមខ្លួនពី១ពាន់ ទី២ពាន់ដុល្លារ ហើយថា បុគ្គលិកក្រុមហ៊ុនទេសចរណ៍តម្រូវឱ្យភ្ញៀវបង្ហាញទឹកបប្រាក់ទាំងនោះមុនឡើងជិះយន្តហោះ។

ក្រសួងទេសចរណ៍បានបញ្ជាក់ការបដិសេធក្នុងសេចក្តីជូនដំណឹងនោះតាមន័យដើមថា៖ «រាជរដ្ឋាភិបាលកម្ពុជាមិនមានគោលនរយោបាយណាមួយតម្រូវឱ្យភ្ញៀវទេសចរមានទឹកប្រាក់តាមខ្លួនចំនួន ១.០០០ ឬ ២.០០០ ដុល្លារ ដើម្បីអាចចូលមកព្រះរាជាណាចក្រកម្ពុជានោះទេ និង ការសាកសួរភ្ញៀវទេសចរអំពីចំនួនទឹកប្រាក់យកតាមខ្លួន គឺជាកាតព្វកិច្ចរបស់មន្រ្តីជំនាញ ដែលមានសមត្ថកិច្ចនៅច្រកទ្វារអន្តរជាតិ ដែលត្រូវធ្វើឡើងតែចំពោះករណីសង្ស័យមួយចំនួនតែប៉ុណ្ណោះ មិនប្រកាន់ភ្ញៀវទេសចរជនជាតិណាឡើយ និងមិនធ្វើឡើងជាទូទៅគ្រប់ភ្ញៀវទេសចរទាំងអស់នោះទេ»។

ក្នុងការប្រកាសព័ត៌មាននេះដែរ ក្រសួងទេសចរណ៍បានលើកទឹកចិត្តឱ្យភ្ញៀវទេសចរទាំងអស់គោរពតាមលក្ខខណ្ឌតម្រូវការរបស់ព្រះរាជាណាចក្រកម្ពុជា និងសូមស្វាគមន៍ភ្ញៀវទេសចរទាំងអស់មកទស្សនាព្រះរាជាណាចក្រកម្ពុជា៕

ធនាគារពិភពលោកផ្ដល់ហិរញ្ញប្បទាន ២៧៤លានដុល្លារអាមេរិកសម្រាប់ជួយកម្ពុជាស្តារសេដ្ឋកិច្ច

មាស ដា (Meas Da) — Wed, 21 Dec 2022 08:25:00 +0000

កម្ពុជាបានទទួលហិរញ្ញប្បទាន២៧៤លានដុល្លារអាមេរិកពីសមាគមអភិវឌ្ឍន៍អន្តរជាតិ (IDA) ដែលជាមូលនិធិរបស់ធនាគារពិភពលោក ដើម្បីជួយដល់កំណែទម្រង់សម្រាប់ជំរុញកំណើន និងពង្រឹងភាពធន់របស់កម្ពុជាឡើងវិញ បន្ទាប់ពីប៉ះទង្គិចនឹងជំងឺរាតត្បាតកូវីដ១៩។

យោងតាមប្រកាសព័ត៌មានរបស់ធនាគារពិភពលោក ចេញនៅថ្ងៃទី២១ ខែធ្នូ ឆ្នាំ២០២២បានឱ្យដឹងថា សេដ្ឋកិច្ចរបស់កម្ពុជាបានរងការខូចខាតធ្ងន់ធ្ងរពីសំណាក់ជំងឺរាតត្បាតកូវីដ១៩ ដោយធ្វើឱ្យផលិតផលក្នុងស្រុកសរុបបានធ្លាក់ចុះដល់ ៣,១ ភាគរយ ក្នុងឆ្នាំ២០២០ ដែលជាការធ្លាក់ចុះដ៏ខ្លាំងលើកដំបូងក្នុងរយៈពេល៣០ឆ្នាំចុងក្រោយនេះ។

សេចក្តីប្រកាសព័ត៌មានរបស់ធនាគារពិភពលោកបន្ថែមថា ការវិភាគទិន្នន័យបានបង្ហាញថា អត្រានៃភាពក្រីក្របានកើនឡើងចំនួន ២,៨ភាគរយ ដោយរុញមនុស្សប្រហែល ៤៦០,០០០នាក់ ឱ្យធ្លាក់ក្នុងភាពក្រីក្រវិញសម្រាប់កម្ពុជា។

រដ្ឋាភិបាលបានឆ្លើយតបយ៉ាងរហ័សថា បើទោះជាសេដ្ឋកិច្ចបានងើបឡើងវិញនៅឆ្នាំ២០២១ និង២០២២ មែនក្តី បរិយាកាសចុះខ្សោយនៅខាងក្រៅមានន័យថាលទ្ធភាពវិលទៅទទួលបានអត្រាកំណើនដ៏រឹងមាំដែលធ្លាប់មាននៅមុនការផ្ទុះជំងឺរាតត្បាត ពិតជានឹងមិនងាយរកបានទេ ហើយប្រទេសកម្ពុជាក៏ងាយរងគ្រោះខ្លាំងពីផលប៉ះពាល់នៃការប្រែប្រួលអាកាសធាតុផងដែរ ដោយសារត្រូវប្រឈមនឹងទឹកជំនន់ និងគ្រោះរាំងស្ងួតញឹកញាប់។

បើតាមសេចក្តីប្រកាសព័ត៌មានដដែលក៏បានស្រង់សម្តីរបស់ លោកស្រី ម៉ារៀម សាលីម ប្រធានគ្រប់គ្រងរបស់ធនាគារពិភពលោកប្រចាំកម្ពុជា ក្នុងន័យដើមថា៖ «ខណៈដែលយុទ្ធសាស្ត្រ “រស់ជាមួយកូវីដ-១៩” បានជួយស្តារសេដ្ឋកិច្ចឱ្យងើបឡើងវិញក៏ពិតមែន ប៉ុន្តែកម្ពុជានៅតែងាយរងគ្រោះដោយសារតែចរន្តធ្លាក់ចុះនូវតម្រូវការក្រៅប្រទេស និងការរអាក់រអួលនានានៅក្នុងខ្សែចង្វាក់ផ្គត់ផ្គង់សកល នៅឡើយ។ ប្រតិបត្តិការរបស់ហិរញ្ញប្បទាននេះ នឹងជួយកម្ពុជាក្នុងការជំរុញភាពប្រកួតប្រជែងរបស់ផ្នែកឯកជន, ពង្រឹងស្ថានភាពសារពើពន្ធរបស់កម្ពុជា និងផ្តល់ជំនួយដល់ប្រជាជនងាយរងគ្រោះបំផុតរបស់ខ្លួន»។

ធនាគារពិភពលោកបានបញ្ជាក់ទៀតថា ហិរញ្ញប្បទាននេះ ឈរលើផែនការរបស់រដ្ឋាភិបាលសម្រាប់ស្តារសេដ្ឋកិច្ចឡើងវិញក្រោយសម័យជំងឺរាតត្បាត ដែលមានគោលបំណងទូលំទូលាយបី គឺការស្តារសេដ្ឋកិច្ច, កំណែទម្រង់ និងការបង្កើនភាពធន់ និងបន្ថែមពីលើហិរញ្ញប្បទានចំនួន២០០លានដុល្លារអាមេរិក សម្រាប់ Cambodia Relief, Recovery, and Resilience Development Policy Financing ដែលត្រូវបានអនុម័តនៅក្នុងឆ្នាំ២០២១៕

សត្វផ្សោតមួយក្បាលស្លាប់ និងអណ្ដែតតាមទន្លេត្រង់ព្រំប្រទល់ខេត្តក្រចេះនិងស្ទឹងត្រែង

មាស ដា (Meas Da) — Wed, 21 Dec 2022 03:31:01 +0000

សត្វផ្សោតឈ្មោលមួយក្បាល ទម្ងន់១៦២ គីឡូក្រាមត្រូវបានប្រទះឃើញស្លាប់អណ្ដែតតាមទឹកទន្លេក្បែរអន្លង់កោះដំបង ត្រង់ព្រំប្រទល់ខេត្តក្រចេះ និងស្ទឹងត្រែង។

បើតាមការបង្ហោះលើទំព័រហ្វេសប៊ុកផ្លូវការរបស់ អង្គការ WWF កាលពីថ្ងៃអង្គារ បានឱ្យដឹងថា សត្វផ្សោតដែលបានស្លាប់នោះគឺជាផ្សោតឈ្មោល អាយុចន្លោះពី ១៥-២០ ឆ្នាំ មានប្រវែង២៣០សង់ទីម៉ែត្រ និងទម្ងន់១៦២ គីឡូក្រាម។ សាកសពសត្វផ្សោតនេះត្រូវបានប្រទះឃើញអណ្ដែត តាមទឹកទន្លេ ក្បែរអន្លង់កោះដំបង ត្រង់ទីតាំងព្រំប្រទល់ខេត្តក្រចេះ និងស្ទឹងត្រែង។

បើតាម WWF សត្វផ្សោតនេះបានស្លាប់ដោយសារជាប់នឹងមងនេសាទតាមការសន្និដ្ឋាន ក្រោយពីពិនិត្យសោកសពកាលពីថ្ងៃទី១៨ ខែធ្នូ ឆ្នាំ២០២២ ដោយក្រុមជំនាញស្រាវជ្រាវរបស់រដ្ឋបាលជលផល WWF។

ក្នុងសារដែលបង្ហោះដោយ WWF ដដែល ក៏បានស្រង់សម្តីរបស់ លោក សេង ទៀក នាយកអង្គការ WWF កម្ពុជា ក្នុងន័យដើមថា៖ «ព័ត៌មានអំពីការរកឃើញសត្វផ្សោតស្លាប់នីមួយៗពិតជាធ្វើឱ្យមានភាពសោកសង្រេងខ្លាំងណាស់ ហើយយើងសោកស្តាយខ្លាំងបំផុតគឺ នៅពេលសត្វផ្សោតពេញវ័យ ដែលមានសុខភាពល្អដូចសត្វផ្សោតមួយក្បាលនាពេលនេះ បានបាត់បង់ជីវិត ព្រោះវាប៉ះពាល់ធ្ងន់ធ្ងរដល់លទ្ធភាពនៃការបន្តពូជរបស់សត្វផ្សោតទន្លេមេគង្គដែលមានចំនួនសេសសល់តិចតួចស្រាប់»។

លោកបាន អំពាវនាវយ៉ាងទទូចដល់អាជ្ញាធរពាក់ព័ន្ធទាំងអស់ ឱ្យបង្កើនវិធានការអនុវត្តច្បាប់បន្ថែមទៀត ដើម្បីបញ្ឈប់ឱ្យបានទាំងស្រុងនូវរាល់សកម្មភាពនេសាទខុសច្បាប់គ្រប់ទម្រង់នៅក្នុងតំបន់អភិរក្សសត្វផ្សោត។

យោងតាមរបាយការណ៍ ដែលរៀបរាប់ក្នុងទំព័រហ្វេសប៊ុករបស់អង្គការ WWF បានបន្ថែមថា សត្វផ្សោតដែលស្លាប់ក្នុងឆ្នាំ ២០២២ នេះមានរហូតដល់ ៩ក្បាល ហើយរយៈពេល ៣ឆ្នាំចុងក្រោយនេះសត្វផ្សោតបានស្លាប់មានចំនួនសរុប ២៧ក្បាល ចន្លោះពីឆ្នាំ២០២០ ដល់២០២២ (គិតត្រឹមថ្ងៃទី ១៨ ខែធ្នូ)៕

បទយកការណ៍៖ កសិករស្រុកថ្មគោលមួយចំនួនបន្ថែមមុខរបរ ខណៈមួយចំនួនទៀតបង្ខំចិត្តបន្តធ្វើស្រែបន្ទាប់ពីស្រូវចុះថោក

មាស ដា (Meas Da) — Tue, 20 Dec 2022 04:07:23 +0000

កំពុងអង្គុយនៅក្រោមផ្ទះប្រក់ពីស័ង្កសីពណ៌សលាយច្រែះពណ៌ក្រហម អ្នកស្រី រឿន ស៊ីណេត អាយុ ៣០ឆ្នាំ ជាកសិករធ្វើស្រែវស្សារស់នៅភូមិអង់ ឃុំតាពូង ស្រុកថ្មគោល ខេត្តបាត់ដំបង ប្រាប់ Newsroom Cambodia ថា អ្នកស្រីមានដី៥ហិចតាសម្រាប់ធ្វើស្រែ ប៉ុន្តែធ្វើបានតែស្រូវវស្សាប៉ុណ្ណោះ។ អ្នកស្រីថា សម្រាប់ឆ្នាំនេះ ស្រូវរបស់អ្នកស្រីត្រូវបានលិចទឹកអស់ ដោយសារទឹកភ្លៀង និងទឹកជំនន់។

អ្នកស្រីបន្តថា៖ «និយាយរួមគឺលិចបីដងហើយ បើនិយាយពីស្រូវដែលលិចនោះគឺនៅសល់តែមួយដើមៗ ហើយឆ្នាំមុនៗក៏លិចអ៊ីចឹងដែរ រយៈពេល២ ទៅ៣ឆ្នាំហើយ តែទទួលបានស្រូវខ្លះគឺ ២៧បាវ បើឆ្នាំនេះបានមិនដល់១០បាវទេ ព្រោះស្រូវទុំដួលទៅនឹងទឹកទៀត ហើយមកទល់ពេលនេះទឹកមិនទាន់ស្រកទេ»។

អ្នកស្រីបានប្រាប់ពីផលលំបាកដោយសារការធ្វើស្រែមិនបានផលថា៖ «ខ្ញុំត្រូវជំពាក់ថ្លៃជីគេ ថ្លៃថ្នាំគេ ហើយបញ្ហាដែលធំគឺយើងអត់អង្ករហូប ពេលអត់អង្ករហូបអ៊ីចឹង គឺត្រូវទៅទិញអង្ករគេនៅផ្សារហូប និយាយរួមយើងអត់មានពូជស្រូវសម្រាប់ធ្វើស្រែបន្តទៀតទេ និយាយទៅគឺត្រូវចំណាយទិញគេបន្តទៀត»។

អ្នកស្រី ស៊ីណេត បន្ថែមថា អ្នកស្រីបានសាកធ្វើស្រែប្រាំង ប៉ុន្តែមិនបានផលដោយសារមិនមានទឹក។ អ្នកស្រីថា ដោយសារតែដីធ្វើដំណាំអ្វីផ្សេងមិនកើត ក្រៅពីធ្វើស្រែ អ្នកស្រីក៏បានចាប់យកអាជីពមួយទៀតគឺប្រវាស់គោ និងស៊ីឈ្នួលមើលគោឱ្យគេ។

អ្នកស្រីនិយាយទាំងសើចស្ងួតថា៖ «ឆ្នាំនេះសូម្បីតែចំបើងក៏គ្មាន សម្រាប់ទុកយកឱ្យគោស៊ីដែរ ហើយចំបើងមុខផ្ទះនេះគឺទៅសុំនៅស្រែគេទេ»។

អ្នកស្រី រឿន សុីណេត (រូបថត៖ កញ្ញា មាស ដា)

មិនមែនតែអ្នកស្រីស៊ីណេតទេដែលប្រឈមនឹងការធ្វើស្រែមិនបានផល ហើយចាប់ផ្តើមបង្កើតរបរផ្សេងៗបន្ថែមដើម្បីផ្គត់ផ្គង់ជីវភាព ប៉ុន្តែប្រជាកសិករមួយចំនួនទៀតក្នុងស្រុកថ្មគោល ខេត្តបាត់ដំបង ក៏បានងាកមកចាប់អាជីពបន្ថែម ខណៈកសិករខ្លះទៀតនៅតែបន្តធ្វើស្រែដដែលបើទោះបីត្រូវប្រឈមនឹងបញ្ហាទីផ្សារ និងទិន្នផលទាបក្តី ដោយសារតែគ្មានលទ្ធភាព ហើយដីរបស់ពួកគាត់មិនអំណោយផលក្នុងការដាំដុះដំណាំផ្សេងៗទៀតផងនោះ។

កំពុងអង្គុយដកស្មៅក្នុងរោងជីររណា អ្នកស្រី យាន យឹម អាយុ៤១ឆ្នាំ រស់នៅភូមិសំរោង ឃុំតាម៉ឺន ស្រុកថ្មគោល ខេត្តបាត់ដំបង ដែលជាកសិករធ្លាប់តែធ្វើស្រែតែមួយមុខ បានប្រាប់ Newsroom Cambodia ថា ការធ្វើស្រែគឺពិបាករកទីផ្សារ ហើយត្រូវចំណាយអស់ច្រើន ហើយលក់បានតម្លៃថោក ដូច្នេះអ្នកស្រី និងគ្រួសារសម្រេចចិត្តប្រកបរបរដាំជីររណារមួយមុខទៀត។

អ្នកស្រីបានអះអាងថា៖ «ដាំជីរបើដាំកើត វាបានផលជាងធ្វើស្រែ ហើយវាងាយស្រួលជាងធ្វើស្រែហើយសម្រាប់ការប្រមូលផលវិញគឺត្រូវការជួលគេមកជួយកាត់ ដោយគិតជាថង់ ក្នុងមួយថង់១០គីឡូឱ្យគេតម្លៃ៥,០០០រៀល ហើយមានឈ្មួញគេមកទិញដល់ផ្ទះក្នុងភូមិ ដោយក្នុងមួយថង់មាន១០គីឡូ បានតម្លៃ ២០,០០០រៀល»។

អ្នកស្រីបានបន្តថា តម្លៃជីរដែលលក់បានថ្លៃបំផុត មួយថង់ ៣៥,០០០រៀល ទៅ ៤០,០០០រៀល ហើយថោកបំផុតគឺ ១០,០០០ ទៅ៦,០០០រៀល និងជួនកាលដល់ ១,០០០រៀល ប៉ុន្តែនៅតែមានគេទិញរហូតស្រួលរកទីផ្សារជាងស្រូវ។

អ្នកស្រី បានលើកឡើងថា ៖ «ខ្ញុំដាក់ស្រូវបានតែម្ដង អត់សូវបានកាត់លក់ដូចជីរទេ ហើយស្រូវវាថោកពេក ហើយដីដាំជីរនេះគឺ ខ្ញុំកាយដីស្រែយកមកដាំ»។

អ្នកស្រី បានបន្តទៀតថា ៖«ខ្ញុំចាប់ផ្ដើមដាំជីរនេះ បាន៣ទៅ៤ឆ្នាំហើយ ហើយការដាំជីរនេះគឺ មិនមានខាងអាជ្ញាធរមកបណ្ដុះបណ្ដាលណែនាំទេ គឺអ្នកភូមិដាំតាមគ្នា ដោយសារតែមានគេទិញ»។

អ្នកស្រី ឆែម សម្បត្តិ អាយុ៦០ឆ្នាំ ជាស្រ្តីមេម៉ាយ រស់នៅភូមិក្រសាំង ឃុំតាម៉ឺន ស្រុកថ្មគោល ខេត្តបាត់ដំបង អ្នកស្រីបានប្តូរមកដាំជីររណាវិញ ដោយសារមានភាពងាយស្រួលជាងធ្វើស្រែ និងទទួលបានការប្រមូលផលបានច្រើនដង។ ទោះយ៉ាងណាអ្នកស្រីថា អ្នកស្រីមិនដឹងថាទៅថ្ងៃខាងមុខទៀតនឹងយ៉ាងម៉េចនោះទេ។

អ្នកស្រី បានប្រាប់ថា៖ «កាលពីមុនខ្ញុំធ្លាប់មានដីសម្រាប់ធ្វើស្រែដែរ តែត្រូវបានលក់ព្រោះតែធ្វើស្រូវមិនបានផល ព្រោះលិចទឹករាល់ឆ្នាំធ្វើមិនកើត ហើយគាប់ជួនពេលនោះប្តី និងកូនខ្ញុំឈឺទៀត គ្មានលុយ គ្មានកាក់ទើបខ្ញុំ សម្រេចចិត្តលក់ដីស្រែនោះ ហើយមកប្រកបរបរដាំជីររណាមកដល់សព្វថ្ងៃ»។

លោក ឆាំ ឆប មានវ័យ ៧២ ឆ្នាំ ដែលរស់នៅភូមិ អង់ ឃុំ តាម៉ឺន ស្រុក ថ្មគោល ខេត្ដបាត់ដំបង និយាយថា ក្នុងមួយឆ្នាំលោកចំណាយដី៣ហិចតាសម្រាប់ធ្វើស្រូវ៥១ ៥៤ ឬស្រូវក្រអូប។

កំពុងតែនៅហាលថ្ងៃដើម្បីឈរហាលស្រូវនៅមុខផ្ទះ បុរសសម្បុរស្រអែមរូបនេះនិយាយថា៖ «នៅពេលយើងមិនសូវមានកម្លាំងអ៊ីចឹង គឺត្រូវការចំណាយថ្លៃភ្ជួររាស់អ៊ីចឹងទៅឱ្យគេវ៉ៃដីឱ្យក្នុងតម្លៃ២ពាន់ជាងក្នុងមួយហិចតា ហើយនៅពេលប្រមូលមកយើងទូទាត់កត់ត្រាវាទុកទៅ វាអស់ច្រើនវាមិនបានរួចខ្លួនប៉ុន្មានទេ»។

លោកបន្តថា៖ «ឆ្នាំមុនមួយហិចតាបាន៤តោនជាង បើធ្វើកើតទៅបាន៥តោន ហើយក្នុង១ហិចតាជីដាក់ ៣ដង ក្នុង១ដងដាក់៣ការ៉ុងក៏នៅមិនកើតទៀត នៅដង្កូវស៊ី បាញ់ថ្នាំខ្យង បាញ់ថ្នាំដង្កូវ បាញ់ថ្នាំពន្លូតវាពេលលិចទឹកផងអីផង ច្រើនណាស់លំបាកណាស់ ក្ដាមកាត់អីទៀត ទៅបាញ់ថ្នាំក្ដាមទៀត ហើយបើយើងមិនធ្វើ មិនដឹងធ្វើអី ហើយពេលធ្វើស្រែបានក៏វាមិនមានហាងឆេងដែលគេទទួលខុសត្រូវក្នុងទីផ្សារទៀត»។

លោកបន្ថែមថា ពីមុនធ្លាប់មានមេភូមិ មេឃុំគេជ្រើសរើសឱ្យជាពូជស្រូវមកធ្វើដែរតែប្រជាជននៅតែជួបបញ្ហាដដែល។

លោក ឆាំ ឆប បានបន្ថែមដោយអំពាវនាវថា៖ «ខ្ញុំសុំឱ្យមានទីផ្សារក្នុងការលក់ស្រូវឱ្យបានច្រើនជាងមុន ដើម្បីឱ្យងាយស្រួលក្នុងការលក់ចេញស្រូវក្រោយពីច្រូតកាត់រួច កុំឱ្យមានស្រូវហើយពិបាករកទីផ្សារលក់ទៀត»។

អ្នកស្រី ហួយ គីមហុង មានអាយុ៤៤ឆ្នាំ រស់នៅភូមិកៀនកែស២ ឃុំគោកឃ្មុំ ស្រុកថ្មគោល ខេត្ដបាត់ដំបងលើកឡើថា អ្នកស្រីមានដីស្រែចំនួន៥ហិចតា ដែលធ្វើស្រូវវស្សាចាប់ពីខែ៦មក ទើបច្រូតនៅខែ១២នេះ ហើយនៅពេលប្រមូលផលនេះ ២ហិចតាបានស្រូវ ៥០បាវ ហើយឆ្នាំដែលស្រូវកើតបាន ១ ហិចតា បាន៤០បាវ តែឆ្នាំនេះវាលិចទឹកដោយសារមានភ្លៀងកាលពីភ្ជុំ និងទឹកធ្លាក់មកពីថៃ។

អ្នកស្រីបន្ដទាំងកំពុងហាលស្រូវដែលលិចទឹកនៅក្បែរផ្លូវជិតផ្ទះរបស់អ្នកស្រីថា៖ «ដីស្រែខ្ញុំមិនអាចដាំអីបានទេ គឺធ្វើបានតែស្រែនេះឯង តែលិចទឹកអស់ហើយ ហើយនៅពេលយើងលិចអ៊ីចឹង ហើយក៏មានគេចុះមកឱ្យជាទឹកប្រាក់ និងជាស្រូវពូជដែរនៅពេលដែលស្រូវយើងលិចទឹក»។

កសិករដែលផ្តល់សម្ភាសន៍ដល់ Newsroom Cambodia បញ្ជាក់ថា តម្លៃស្រូវដែលគាត់ទទួលបានពីការធ្វើស្រែគឺនៅតែ តម្លៃទាបដដែរពី ៧ទៅ៨រយរៀលក្នុងមួយគីឡូប៉ុណ្ណោះ។ ពួកគេបន្ថែមថា សម្រាប់តម្លៃនេះបើគិតថ្លៃចំណាយលើការដាំដុះ និងការប្រមូលផលវិញស្ទើតែមិនបានរួចខ្លួននោះទេ។

ជារឿយៗ គេតែងឃើញប្រជាកសិករធ្វើស្រែចំការ ក៏ដូចជាអ្នកដាំដំណាំកសិកម្ម ដូចជាបន្លែផ្សេងៗ តែងរអ៊ូរទាំអំពីបញ្ហាទិន្នផលទាប និងកង្វះទីផ្សារស្ទើររាល់ឆ្នាំ។ ឆ្នាំខ្លះពួកគាត់ថតរូបចាក់ស្រូវចោលតាមដងផ្លូវ និងឆ្នាំខ្លះទៀតមានអ្នកថតរូប និងវីដេអូនៃកាឈូសឆាយបន្លែរបស់ពួកគាត់ចោល ដោយបង្ហោះលើបណ្តាញសង្គម ដោយសារទទួលបានតម្លៃទាបខ្លាំងជាដើម។

កាលពីឆ្នាំ២០១៦ ប្រជាកសិករដែលរស់នៅខេត្ដបាត់ដំបង បានប្រមូលផ្ដុំគ្នាចាក់ស្រូវនៅលើផ្លូវដើម្បីតវ៉ាពីការធ្លាក់ចុះនៃតម្លៃស្រូវ និងគ្មានទីផ្សារសម្រាប់ការលក់ចេញ ឬក៏តម្លៃស្រូវមានតម្លៃថោក ដោយនៅពេលនោះតម្លៃស្រូវ ដែលលក់បានត្រឹមតែ៥ទៅ៦រយតែប៉ុណ្ណោះក្នុងមួយគីឡូ ដែលធ្វើឱ្យពួកគាត់ខាតបង់ប្រាក់ចំណេញ ឬមិនអាចរួចថ្លៃចំណាយទៅលើសម្ភារៈផ្សេងៗ។

កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់ Newsroom Cambodia ថា ការដែលកសិករចាប់យកមុខរបរដាំបន្លែបន្ថែម គឺជាការល្អ ដែលកសិករមានគំនិតច្នៃប្រឌិតបន្ថែម ក្រៅពីការដាំស្រូវតែមួយមុខដែលអាចបង្កើនប្រាក់ចំណូល ហើយស្របទៅនឹងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ស្តីពីការធ្វើពិពិធកម្មដំណាំ។

កញ្ញាបញ្ជាក់ថា៖ «ចំពោះការដាំដុះបន្លែ កន្លងមកអគ្គនាយកដ្ឋានកសិកម្ម មន្ទីរកសិកម្ម រុក្ខាប្រមាញ់ និងនេសាទ សហការជាមួយគម្រោងផ្សេងនានា បានចងក្រងជាក្រុម ឬជាសហគមន៍កសិកម្មប្រមូលផ្តុំផលិតកម្មបន្លែដើម្បីបង្កើនអំណាចក្នុងការចរចាថ្លៃ និងងាយស្រួលផ្តល់សេវាផ្សព្វផ្សាយបច្ចេកទេសកសិកម្ម និងផ្តល់ឥណទានសម្រាប់ពង្រីកអាជីវកម្ម»។

កញ្ញាបន្ថែមទៀតថា ដើម្បីគាំទ្រដល់ការអភិវឌ្ឍដំណាំបន្លែឱ្យមានការរីកចម្រើន និងជួយគាំទ្រដល់កសិករដំណាំបន្លែឱ្យទទួលបានលទ្ធផលល្អ និងមានប្រសិទ្ធភាពខ្ពស់ ក្រសួងកសិកម្ម រុក្ខាប្រមាញ់ និងនេសាទ បាននិងកំពុងពង្រឹងសម្ថតភាពកសិករឱ្យមានជំនាញក្នុងការផលិតបន្លែប្រកបដោយប្រសិទ្ធភាពនិងប្រសិទ្ធផល ជំរុញការដាំដុះតាមរយៈការធ្វើផែនការដាំដុះតភ្ជាប់ទៅទីផ្សារតាមរយៈយន្តការកិច្ចសន្យាកសិកម្ម និងបន្តជំរុញការផលិតបន្លែតាមស្ដង់ដារសុវត្តិភាពដូចជា CAM-GAP និង CAM-ORG។

កញ្ញាបន្ថែមថា៖ «ប្រសិនបើកសិករគាត់ធ្វើការបោះចោលមុខរបរដាំដុះស្រូវទាំងស្រុងនោះ គឺមិនល្អទេ ព្រោះយ៉ាងហោចស្រូវអាចផ្គត់ផ្គង់ការហូបចុកក្នុងគ្រួសារដែរ ហើយតម្លៃស្រូវមានការឡើងចុះ ដោយសារតម្រូវការទីផ្សារ តាមប្រភេទពូជ ពេលវេលាប្រមូលផល និងគុណភាពស្រូវ»។

ចំពោះវិធានការទៅខាងមុខទៀត កញ្ញា បានលើកឡើងថា អគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់ និងនេសាទ នឹងជំរុញបន្ថែមទៀតលើការផលិតស្រូវមានគុណភាពល្អ ស្របតាមតម្រូវការទីផ្សារ និងមានកិច្ចសន្យាជាមួយរោងម៉ាស៊ីនកិនស្រូវ។

លោក ថេង សាវឿន ប្រធានសមាគមកសិកម្មកម្ពុជា បានប្រាប់ Newsroom Cambodia ថា ចំពោះការប្តូរមុខរបររបស់កសិករងាកមកដាំជីរ បន្លែ និង ការងារផ្សេងៗទៀតនេះគឺ ជាយុទ្ធសាស្រ្ត និងជាដំណោះស្រាយរបស់គាត់មួយ ដើម្បីធ្វើយ៉ាងណាបង្កើនប្រាក់ចំណូល និងបង្កើនមុខរបរក្នុងវិស័យកសិកម្ម។

លោកបញ្ជាក់ថា៖ «ចំពោះដំណោះស្រាយដែលរដ្ឋផ្ដល់ជូនពួកគាត់ក្នុងវិស័យស្រូវនេះ គឺវាមិនបានធ្វើឱ្យពួកគាត់មានភាពល្អប្រសើរឡើងទៅលើជីវភាព ផ្ទុយទៅវិញគឺធ្វើឱ្យពួកគាត់ខាត ពិបាកក្នុងការស្វែងរកទីផ្សារក្នុងការលក់ស្រូវ»។

លោកបន្តថា ប៉ុន្តែបើពួកគាត់ដាំជីរ បន្លែ ឬក៏ធ្វើការងារផ្សេងៗ ដែលពួកគាត់សម្រេចចិត្តប្តូរ នេះគឺជាឱកាសដែលពួកគាត់ទទួលបានប្រាក់ចំណេញ និងធ្វើឱ្យជីវភាពកាន់តែប្រសើរ មួយវិញទៀតធ្វើឱ្យប្រាក់ចំណូលមានការកើនឡើង ហើយអត្រានៃការខាតបង់ ឬក៏ការប្រឈមនឹងហានិភ័យដោយសារបញ្ហាទីផ្សារក៏មានការកាត់បន្ថយ និងធ្លាក់ចុះ។

លោកបន្ថែមថា៖ «ខ្ញុំបន្តលើកទឹកចិត្ត ដល់ស្ថាប័នពាក់ព័ន្ធ ក៏ដូចជាអាជ្ញាធរមូលដ្ឋាន ធ្វើយ៉ាងណាត្រូវចេះខិតខំអប់រំ ក៏ដូចជាណែនាំប្រជាពលរដ្ឋអំពីរបៀបនៃការដាំ ការប្រើប្រាស់ផលិតផលកសិកម្មនេះផងដែរបាទ»៕

ខេត្តបាត់ដំបងនឹងរៀបចំពិព័រណ៍ម្ហូបអាហារដ៏ធំ

មាស ដា (Meas Da) — Wed, 14 Dec 2022 09:06:26 +0000

ព្រឹត្តិការណ៍ពិព័រណ៍ម្ហូបអាហារ ខេត្តបាត់ដំបងនឹងរៀបចំឡើងនៅថ្ងៃទី៣០-៣១ ខែធ្នូ ឆ្នាំ២០២២ វេលាម៉ោង ១៥:០០ នាទីរសៀលដើម្បីអបអរសាទរពិធីបុណ្យឆ្លងឆ្នាំសកលឆ្នាំ ២០២២-២០២៣ ដែលមានទីតាំងចាប់ពី សួននាគបាញ់ទឹក ដល់មុខអគារសាលាខេត្តចាស់។

យោងតាមការបង្ហោះសារអមដោយរូបភាព លើទំព័រហ្វេសប៊ុកផ្លូវការរបស់មន្ទីរទេសចរណ៍ខេត្តបាត់ដំបង នៅថ្ងៃអង្គារ បានឱ្យដឹងក្នុងន័យដើមថា៖ «នៅរសៀលថ្ងៃទី ១៣ ខែ ធ្នូ ឆ្នាំ ២០២២ នៅសាលាខេត្តបាត់ដំបង លោក អ៊ុច អ៊ុំភីស្សារ៉ា ប្រធានមន្ទីរទេសចរណ៍ខេត្តបាត់ដំបង និងមន្ត្រីជំនាញ បានចូលរួមកិច្ចប្រជុំឆ្លងកម្មវិធីព្រឹត្តិការណ៍ម្ហូបអាហារខេត្តបាត់ដំបង ក្រោមអធិបតីភាពឯកត្តម សុខ លូ អភិបាលនៃគណៈអភិបាលខេត្តបាត់ដំបង»។

ក្នុងខ្លឹមសារដែលបានបង្ហោះបានបញ្ជាក់បន្ថែមថា មាតិកានៃព្រឹត្តិការណ៍ពិព័រណ៍ម្ហូបអាហារនេះ បែងចែកជា ៨មាតិកា ក្នុងនោះរួមមាន ផែនការរួម ការបែងចែកតំបន់ ការសម្តែងរបាំ និងទស្សនីយភាព បញ្ចីរមុខម្ហូបបាត់ដំបង សំលៀកបំពាក់ សម្ភារៈប្រើប្រាស់ តំបន់ថតរូប(ផ្ទះបាយខ្មែរ) និងប្លង់បង្ហាញទីតាំង៕

ក្រសួងធនធានទឹកជូនដំណឹងពីការចុះត្រជាក់ចាប់ពីថ្ងៃទី ១៤ ដល់ ២០ខែធ្នូ

មាស ដា (Meas Da) — Wed, 14 Dec 2022 04:01:32 +0000

ក្រសួងធនធានទឹក និងឧតុនិយមនៅថ្ងៃអង្គារ បានជូនដំណឹងដល់ប្រជាពលរដ្ឋ និងវីរៈកងទ័ពដែលរស់នៅ និងឈរជើងនៅតំបន់ជួរភ្នំដងរែក និងខ្ពង់រាបភាគឦសាន ព្រមទាំងប្រជានេសាទ ឱ្យបង្កើនការយកចិត្តទុកដាក់ថែរក្សាសុខភាពចំពោះស្ថានភាពចុះត្រជាក់ក្នុងមួយសប្តាហ៍ខាងមុខនេះ។

យោងតាមសេចក្តីជូនដំណឹង របស់ក្រសួងធនធានទឹក និងឧតុនិយមបានបង្ហោះលើទំព័រហ្វេសប៊ុកផ្លូវការរបស់ខ្លួននៅថ្ងៃទី១៣ ខែធ្នូ ឆ្នាំ២០២២ កម្ពុជានឹងទទួលរងឥទ្ធិពលពីទ្រនុងសម្ពាធខ្ពស់(ចិន)និងខ្យល់មូសុងឦសានក្នុងកម្រិតពីបង្គួរទៅខ្លាំង។

បើតាមសេចក្តីជូនដំណឹងខាងលើបន្ថែមថា ស្ថានភាពបែបនេះនឹងធ្វើឱ្យតំបន់បីមានការប្រែប្រួល ក្នុងនោះរួមមានតំបន់ទំនាបកណ្ដាល សីតុណ្ហភាពអប្បបរមា មានពី ១៨-២២ អង្សាសេ និងសីតុណ្ហភាពអតិបរមា មានពី ២៩-៣១ អង្សាសេ ហើយសីតុណ្ហភាពអប្បបរមា នឹងអាចចុះត្រជាក់ក្នុងរង្វង់ពី ១៦-១៩ អង្សាសេតាមបណ្តាខេត្តមួយចំនួន៖ ខេត្តបន្ទាយមានជ័យ ប៉ៃលិន សៀមរាប និងបាត់ដំបង។

ចំពោះតំបន់ខ្ពង់រាប សីតុណ្ហភាពអប្បបរមា មានពី ១៦-១៩ អង្សាសេ និងសីតុណ្ហភាពអតិបរមា មានពី ២៨-៣០ អង្សាសេ។សីតុណ្ហភាពអតិបរមា មានពី ២៨-៣០ អង្សាសេ និងសីតុណ្ហភាពអប្បបរមា នឹងអាចចុះត្រជាក់ក្នុងរង្វង់ពី ១៦-១៨ អង្សាសេ នៅបណ្តាខេត្តមួយចំនួន៖ ខេត្តមណ្ឌលគិរី រតនគិរី ព្រះវិហារ និងឧត្តរមានជ័យ។

ចំណែកឯខាងតំបន់មាត់សមុទ្រវិញ សីតុណ្ហភាពអប្បបរមា មានពី ១៩-២១ អង្សាសេ និង សីតុណ្ហភាពអតិបរមា មានពី ២៩-៣១ អង្សាសេ ហើយសីតុណ្ហភាពអប្បបរមា នឹងអាចចុះត្រជាក់ក្នុងរង្វង់ពី ១៨-២០ អង្សាសេ។នៅលើផ្ទៃសមុទ្រ អាចមានរលកក្នុងកម្រិតពីមធ្យមទៅបង្គួរ៕

កម្ពុជាទទួលកម្ចីជាង២ពាន់លានដុល្លារពីកូរ៉េខាងត្បូង

មាស ដា (Meas Da) — Fri, 09 Dec 2022 02:21:59 +0000

នៅព្រឹកថ្ងៃសុក្រនេះ រដ្ឋាភិបាលកម្ពុជាចុះហត្ថលេខាទទួលកម្ចីជាងពីរពាន់លានដុល្លារសហរដ្ឋអាមេរិកពីសាធារណរដ្ឋកូរ៉េ ដោយក្នុងនោះមានការចុះហត្ថលេខាដើម្បីសាងសង់ស្ពានមិត្តភាពកម្ពុជា-សាធារណរដ្ឋកូរ៉េពីភ្នំពេញទៅអរិយក្សត្រ ក្នុងទឹកប្រាក់ប្រមាណជា២៤៥លានដុល្លារសហរដ្ឋអាមេរិក។

យោងតាមសារដែលបានបង្ហោះលើទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន នៅថ្ងៃទី៩ ខែធ្នូ ឆ្នាំ២០២២នេះបញ្ជាក់ថា លោកនាយករដ្ឋមន្រ្តី ហ៊ុន សែន ចូលរួមក្នុងពិធីប្រគល់ និងទទួលប្រាក់កម្ចីសរុបជិត២ពាន់លានដុល្លារសហរដ្ឋអាមេរិកពីកូរ៉េខាងត្បូង សម្រាប់ការគាំទ្រការអភិវឌ្ឍនៅកម្ពុជា។

សារដែលបង្ហោះលើទំព័តហ្វេសប៊ុករបស់លោកនាយករដ្ឋមន្រ្តីដដែលបន្ថែមថា លោក ប្រាក់ សុខុន រដ្ឋមន្រ្តី ក្រសួងការបរទេសកម្ពុជានឹងឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា នឹងចុះហត្ថលេខាលើកិច្ចសម្របសម្រួលក្របខណ្ឌស្តីពីការផ្តល់សម្បទាននៃមូលនិធិសហប្រតិបត្តិការអភិវឌ្ឍន៍សេដ្ឋកិច្ចសម្រាប់ឆ្នាំ២០២២-២០២៦ ដែលមានទំហំទឹកប្រាក់ចំនួន១៥០០លានដុល្លារសហរដ្ឋមអាមេរិក។

ក្នុងពិធីនោះ លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចក៏នឹងចុះហត្ថលេខាជាមួយប្រធានមូលនិធិសម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ចនៃធនាគារនីហរ័ណអាហរ័ណកូរ៉េប្រចាំកម្ពុជា សម្រាប់គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ ដែលមានទឹកប្រាក់ប្រមាណជា២៤៥លានដុល្លារសហរដ្ឋអាមេរិក (២៤៥ ៩០៩ ០០០ ដុល្លារអាមេរិក)។ បន្ថែមនោះ ក៏គម្រោងសមត្ថភាពប្រព័ន្ធបណ្តាញបញ្ជូនអគ្គិសនីនៅខេត្តព្រះសីហនុ ដែលមានទឹកប្រាក់៧០លានដុល្លារសហរដ្ឋអាមេរិកផងដែរ។

គម្រោងសាងសង់ស្ពានមិត្តភាពកម្ពុជា-សាធារណេដ្ឋកូរ៉េ នឹងធ្វើពីផ្សារចាស់-ជ្រោយចង្វារ និងជ្រោយចង្វារ-អរិយក្សត្រ។ ទោះយ៉ាងណាមិនទាន់មានការបញ្ជាក់ថា ស្ពាននេះនឹងចាប់ផ្តើមសាងសង់នៅពេលណានៅឡើយ៕

រដ្ឋមន្រ្តីមហាផ្ទៃអំពាវនាវឱ្យពលរដ្ឋគោរពច្បាប់ចរាចរណ៍បន្ថែមទៀតដើម្បីការពារជីវិតខ្លួន និងគ្រួសារ

មាស ដា (Meas Da) — Thu, 08 Dec 2022 08:02:20 +0000

រដ្ឋមន្រ្តីក្រសួងមហាផ្ទៃ លោក ស ខេង អំពាវនាវដល់ប្រជាពលរដ្ឋឱ្យចូលរួមបន្ថែមទៀតក្នុងការគោរពអនុវត្តច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន ដើម្បីការពារអាយុជីវិតខ្លួនឯង និងក្រុមគ្រួសារ។

យោងតាមការបង្ហោះជាវីដេអូលើទំព័រហ្វេសប៊ុករបស់ក្រសួងមហាផ្ទៃនៅថ្ងៃទី៨ ខែធ្នូ ឆ្នាំ២០២២ រដ្ឋមន្ត្រីក្រសួងមហាផ្ទៃ ស ខេង បានចូលរួមទិវាអន្តរជាតិរំឮកដល់ ជនរងគ្រោះដោយគ្រោះថ្នាក់ចរាចរណ៍ផ្លូវគោក លើកទី១៧ ដែលប្រារព្ធធ្វើឡើងនៅ សួនមុខវត្តបុទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ នៅថ្ងៃទី៧ ខែធ្នូ ឆ្នាំ២០២២។

ក្នុងវីដេអូដែលមានប្រវែងជិត៧នាទីនោះ លោក ស ខេង មានប្រសាសន៍ថា៖ «សូមធ្វើការអំពាវនាវដល់បងប្អូនប្រជាពលរដ្ឋអ្នកប្រើប្រាស់ផ្លូវទាំងអស់ ត្រូវចូលរួមបន្ថែមទៀត ក្នុងការគោរពអនុវត្តច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន ដើម្បីការពារអាយុជីវិតខ្លួនឯងផ្ទាល់ ដើម្បីភាពសុខដុមរមនាក្នុងក្រុមគ្រួសារ ដើម្បីការពារទ្រព្យសម្បត្តិរបស់បងប្អូន និងដើម្បីរួមគ្នាលើកកម្ពស់កិត្តិយសសេចក្តីថ្លៃថ្នូរ របស់ប្រទេសជាតិយើង»។

លោក ស ខេង បន្ថែមដោយជំរុញឱ្យប្រជាពលរដ្ឋខ្លាចច្បាប់ ជាជាងខ្លាចប៉ូលីស។

លោកថា៖ «ពេលដែលប៉ូលិសរឹតបន្តឹង ពួកគាត់ខ្លាច ហើយពេលប៉ូលិសឈប់រឹតបន្តឹង ពួកគាត់ក៏លែងខ្លាចដែរ មានន័យថាគាត់មិនមែនខ្លាចច្បាប់ទេ គឺគាត់ខ្លាចប៉ូលិសទៅវិញ។ ខ្ញុំសុំឱ្យមានការប្តូរការយល់ឃើញបែបនេះចេញ គឺត្រូវខ្លាចច្បាប់ជាងខ្លាចប៉ូលិស»។

លោក ស ខាង ក៏បានស្នើឱ្យមានការបំពាក់កាមេរ៉ាតាមដងផ្លូវ រួមនឹងបរិក្ខាសុវត្ថិភាពចរាចរណ៍ឱ្យបានគ្រប់គ្រាន់ ព្រមទាំងស្នើដល់គ្រប់ក្រសួង-ស្ថាប័នពាក់ព័ន្ធអង្គការជាតិ អន្តរជាតិ ប្រព័ន្ធផ្សព្វផ្សាយនានា សិល្បករ-សិល្បការនី គ្រឹះស្ថានសិក្សាគ្រប់កម្រិត ក្រុមហ៊ុន រោងចក្រ សហគ្រាស និងវិស័យឯកជន បន្តអប់រំផ្សព្វផ្សាយច្បាប់ ស្តីពីចរាចរណ៍ផ្លូវគោក និងអនុក្រឹត្យស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកឱ្យបានទូលំទូលាយ និងជាប់ជាប្រចាំ។

លោក គង់ រតនៈ អ្នកជំនាញផ្នែកសុវត្ថិភាពផ្លូវថ្នល់ ប្រាប់ Newsroom Cambodia ថា ការបញ្ចេញមតិរបស់រដ្ឋមន្ត្រីក្រសួងមហាផ្ទៃ ស ខេង មិនមែនជាលើកទីមួយទេ ក្នុងការជួបជុំ ក្នុងការអំពារនាវសុំឱ្យប្រជាពលរដ្ឋគោរពច្បាប់។ លោកថា បច្ចុប្បន្ន គ្រោះថ្នាក់ចរាចរណ៍តែងបណ្តាលឱ្យមនុស្សស្លាប់ជាមធ្យមពី ៤ទៅ៥នាក់ ក្នុងមួយថ្ងៃ ហើយចំនួនអ្នកដែលរងរបួសធ្ងន់ ជាមធ្យមចាប់ពី ១០ទៅ១២នាក់ក្នុងមួយថ្ងៃ ដែលជាហេតុត្រូវមានការប្រកាសអាសន្នអំពីគ្រោះថ្នាក់ចរាចរណ៍។

លោកថា៖ «យើងត្រូវតែប្រកាសអាសន្នពីព្រោះថា មនុស្សបើនិយាយពីតម្លៃ គឺអត់មាននរណាទិញបានទេ ភាគច្រើនការខាតបង់ទាំងឡាយ ការបាត់បង់ជីវិត គឺសុទ្ធសឹងតែជារឿងដែលយើងពិបាកទទួលយក អ៊ីចឹងសម្រាប់ខ្ញុំធ្វើការក្នុងវិស័យសុវត្ថិភាពខ្ញុំយល់ថា វាគឺជារឿងសំខាន់ដែលយើងត្រូវតែគិតគូរទាំងអស់គ្នា»។

លោកបានបន្ថែមថា គ្រោះថ្នាក់ចរាចរណ៍គឺជាបញ្ហាយើងទាំងអស់គ្នា មិនមែនបញ្ហា របស់នរណាម្នាក់នោះទេ ហើយមនុស្សម្នាក់ដែលគោរពច្បាប់ចរាចរណ៍ ក៏មិនប្រាកដថាមានសុវត្ថិភាពដែរ នៅពេលធ្វើដំណើរជាមួយ នឹងមនុស្សជាច្រើនទៀត ដែលប្រកាន់យកឥរិយាបថបើកបរប្រកបដោយគ្រោះថ្នាក់តាមដងផ្លូវ។

លោកបញ្ជាក់ថា៖ «អ្វីដែលប្រជាពលរដ្ឋត្រូវធ្វើ គឺត្រូវស្គាល់ពីតួនាទីរបស់ខ្លួនឯង មានន័យថាប្រជាពលរដ្ឋត្រូវតែចូលរួមក្នុងការគោរពច្បាប់ តាមបញ្ញត្តិច្បាប់ ដែលមានជាធរមាន បន្ទាប់មកទៀតអាជ្ញាធរដែលទទួលបន្ទុកក្នុងផ្នែកចរាចរណ៍នេះឯងត្រូវធ្វើតួនាទីអនុវត្តច្បាប់ឱ្យបានត្រឹមត្រូវ បន្ទាប់មកទៀតអ្នកដែលទទួលបន្ទុកផ្នែកវិស្វកម្មធ្វើផ្លូវថ្នល់ សូមមេត្តាគិតគូរអំពីសុវត្ថិភាពជាចម្បង ហើយដាក់បញ្ចូលវិធានសុវត្ថិភាពក្នុងការកសាងផ្លូវ ដើម្បីឱ្យយើងទទួលបានផ្លូវមួយដែលមានលក្ខណៈល្អប្រសើរងាយបើកបរ ប្រជាពលរដ្ឋងាយគោរពតាមជាដើម»។

បើតាមរបាយការណ៍របស់អង្គការ UNDP ក្នុងឆ្នាំ២០១៩ នៅកម្ពុជាមានអ្នករងរបួសជិត១៣,៧០០ករណី និងបាត់បង់ជីវិតជាង ២,០០០ ករណី ដោយសារតែគ្រោះថ្នាក់ចរាចរណ៍ ដែលគិតជាមធ្យមមានមនុស្ស ៥,៤នាក់ បាត់បង់ជីវិតជារៀងរាល់ថ្ងៃ៕

ក្រសួងការងារពន្យារពេលការស្នើសុំប្រើប្រាស់ហត្ថពលកម្មបរទេសដល់ខែមករាឆ្នាំ២០២៣

មាស ដា (Meas Da) — Wed, 07 Dec 2022 08:30:16 +0000

ក្រសួងការងារ និងបណ្តុះបណ្តាលវិជ្ជាជីវៈ ពន្យារពេលការស្នើសុំការអនុញ្ញាតឱ្យប្រើប្រាស់ហត្ថពលកម្មបរទេសឆ្នាំ២០២៣ រហូតដល់ខែមករា ឆ្នាំ២០២៣ ដោយសាររោងចក្រ ឬសហគ្រាសមួយចំនួនមិនទាន់យល់ច្បាស់ពីប្រព័ន្ធគ្រប់គ្រងទិន្នន័យរួមពាក់ព័ន្ធនឹងវិស័យការងារ ដែលនាំឱ្យមិនមានឯកសារគ្រប់គ្រាន់សម្រាប់ស្នើសុំការអនុញ្ញាតឱ្យប្រើប្រាស់ហត្ថពលកម្មបរទេស (កូតា)។

ហត្ថពលកម្មបរទេស (កូតា) គឺជាលិខិតអនុញ្ញាតប្រើប្រាស់ហត្ថពលកម្មបរទេស ហើយក៏ជាឯកសារចាំបាច់សម្រាប់ស្នើសុំបណ្ណការងារជូនបុគ្គលិកបរទេសផងដែរ។

យោងតាមសេចក្តីជូនដំណឹង របស់ក្រសួងការងារ ចេញនៅថ្ងៃទី០៥ ខែធ្នូ ឆ្នាំ២០២២ បានជូនដំណឹងដល់ម្ចាស់ ឬនាយករោងចក្រ សហគ្រាស ក្នុងន័យដើមថា៖ «ក្រសួងបានពន្យារពេលសម្រាប់ការស្នើសុំលិខិតអនុញ្ញាតឱ្យប្រើប្រាស់ហត្ថពលកម្មបរទេស (កូតា) សម្រាប់ឆ្នាំ២០២៣ រហូតដល់ដំណាច់ខែមករា ឆ្នាំ២០២៣»។

ក្នុងសេចក្តីជូនដំណឹងបានបញ្ជាក់បន្ថែមថា ម្ចាស់ ឬនាយករោងចក្រ សហគ្រាស ដែលត្រូវការប្រើប្រាស់ហត្ថពលកម្មបរទេសសម្រាប់ឆ្នាំ២០២៣ ត្រូវប្រញាប់ដាក់សំណើសុំការអនុញ្ញាតឱ្យប្រើប្រាស់ហត្ថពលកម្មបរទេស (កូតា) ឱ្យបានមុនថ្ងៃទី៣១ ខែមករា ឆ្នាំ២០២៣ ជាកំហិត។ ចំពោះការខកខានមិនបានស្នើសុំការអនុញ្ញាត ក្រសួងនឹងចាត់វិធានការផាកពិន័យតាមទោសប្បញ្ញត្តិក្នុងជំពូកទី១៦ នៃច្បាប់ស្តីអំពីការងារ៕

អាជ្ញាធរខ្មែរ និងថៃបើកច្រកទ្វារតំបន់ព្រំដែន៤០០ ស្រុកសំឡូតឡើងវិញបន្ទាប់ពីជំងឺកូវីដ១៩បានធូរស្រាល

មាស ដា (Meas Da) — Tue, 06 Dec 2022 04:01:24 +0000

អាជ្ញាធរខេត្តបាត់ដំបង និងខេត្តត្រាតប្រទេសថៃ បើកដំណើរការឡើងវិញនូវច្រកទ្វារតំបន់ព្រំដែន ៤០០ ស្រុកសំឡូត ខេត្តបាត់ដំបង ទល់នឹងច្រកទ្វារតំបន់ព្រំដែនបានម៉ាក់មួង ស្រុកបរ៉ៃ ខេត្តត្រាត បន្ទាប់ពីស្ថានភាពជំងឺកូវីដ១៩ មានភាពប្រសើរឡើង។

យោងតាមលិខិតរបស់រដ្ឋបាលខេត្តបាត់ដំបង ជូនទៅអភិបាលខេត្តត្រាត កាលពី ថ្ងៃទី៥ ខែធ្នូ ឆ្នាំ២០២២ បញ្ជាក់ថា ដោយសារបច្ចុប្បន្នចំនួនអ្នកឆ្លងកូវីដ១៩មានការថយចុះ ហើយប្រជាពលរដ្ឋទទួលបានការចាក់វ៉ាក់សាំងការពារជំងឺកូវីដ១៩ បានយ៉ាងពេញលេញ និងមានប្រសិទ្ធភាព ទើបសម្រេចឱ្យបើកច្រកទ្វារនេះឡើងវិញ។

ក្នុងលិខិតរបស់រដ្ឋបាលខេត្តបាត់ដំបងដដែលបញ្ជាក់តាមន័យដើមថា៖ «ដើម្បីបន្តសហប្រតិបត្តិការ រវាងព្រះរាជាណាចក្រកម្ពុជា និងព្រះរាជាណាចក្រថៃ ជាពិសេសខេត្តជាប់ព្រំដែន (ខេត្តបាត់ដំបង និងខេត្តត្រាត) រដ្ឋបាលខេត្តបាត់ដំបង សូមឯកភាព និងចូលរួមសហការបើកដំណើរការឡើងវិញច្រកទ្វារតំបន់ព្រំដែន ៤០០ ស្ថិតក្នុងស្រុកសំឡូត ខេត្តបាត់ដំបង ទល់នឹងច្រកទ្វារព្រំដែនបានម៉ាក់មួង ស្រុកបរ៉ៃ ខេត្តត្រាត ដោយអនុវត្តទៅតាមនីតិវិធីនៃកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ ស្តីពីការឆ្លងកាត់ព្រំដែនរវាងប្រទេសទាំងពី កម្ពុជា-ថៃ»។

កន្លងមកច្រកទ្វារតំបន់ព្រំដែន ៤០០ ស្រុកសំឡូត ខេត្តបាត់ដំបង ទល់នឹងច្រកទ្វារតំបន់បានម៉ាក់មួង ស្រុកបរ៉ៃ ខេត្តត្រាត ត្រូវបានបិទបណ្ដោះអាសន្នអំឡុងពេលមានការរាលដាលនៃជំងឺកូវីដ១៩ និងមេរោគបំប្លែងថ្មី៕

អាជ្ញាធរជាតិអប្សរាបើកឱ្យសាធារណជនចូលរួមកម្មវិធីដោយសេរីក្នុងព្រឹត្តិការណ៍ «រំលឹកគុណអង្គរ»

មាស ដា (Meas Da) — Fri, 02 Dec 2022 13:45:54 +0000

អាជ្ញាធរជាតិអប្សរា បានប្រកាសបើកឱ្យសាធារណជនចូលរួមដោយសេរីចំពោះកម្មវិធីនានាក្នុងព្រឹត្តិការណ៍ «រំលឹកគុណអង្គ» ដើម្បីចូលរួមអបអរសាទរខួប៣០ឆ្នាំនៃការចុះរមណីយដ្ឋានអង្គរ ក្នុងបញ្ជីនៃសម្បត្តិបេតិកភណ្ឌពិភពលោកនាថ្ងៃទី១៤ ខែធ្នូ ឆ្នាំ១៩៩២។

យោងតាមសេចក្តីជូនដំណឹង អាជ្ញាធរជាតិអប្សរាបានបង្ហោះលើទំព័រហ្វេសប៊ុករបស់ខ្លួននៅថ្ងៃសុក្រ បានជូនដំណឹងដល់ ក្រសួង ស្ថាប័នជាតិ-អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ ភ្ញៀវទេសចរជាតិ-អន្តរជាតិ និងសាធារណជនទាំងអស់ឱ្យបានជ្រាប និងចូលរូមឱ្យបានច្រើនកុះករ នៅក្នុងការប្រារព្វពិធីរៀបចំ «រំលឹកគុណអង្គរ» នៅរមណីយដ្ឋានអង្គរ នឹងប្រព្រឹត្តិទៅចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២២ ខាងមុននេះ។

ក្នុងសេចក្តីជូនដំណឹងបានបញ្ជាក់បន្ថែមទៀតថា ចំពោះកម្មវិធីថ្ងៃទី១៤ ចាប់ពីម៉ោង៦ព្រឹក មានពិធីបើកព្រឹត្តិការណ៍រំលឹកគុណអង្គរ និងដាក់បាត្រព្រះសង្ឃ ចំនួន១៣០អង្គ ទីតាំងនៅផ្នែកខាងមុខប្រាសាទអង្គរវត្ត ហើយចាប់ពីម៉ោង១៨យប់តទៅ មានការរៀបចំព្រឹត្តិការណ៍រាត្រីចងចាំ និងមានការសម្តែងសិល្បៈទស្សនីយភាពនានា ដោយក្រុមសិល្បៈក្រសួងវប្បធម៌ និងវិចិត្រសិល្បៈ ដែលមានទីតាំងនៅខាងក្រោយប្រាសាទអង្គរវត្ត។

ចំពោះថ្ងៃទី១៥ ចាប់ពីម៉ោង១៨យប់តទៅ នឹងមានការសម្តែងសិល្បៈអាយ៉ៃឆ្លើយឆ្លងដោយលោកតាស្មៀន ម៉ាញ នៅបរិវេណព្រះលានជល់ដំរី នៃក្រុងអង្គរធំ។ ឯថ្ងៃទី១៦ ចាប់ពីម៉ោង១៨យប់តទៅ នឹងមានការសម្តែងសិល្បៈល្ខោនស្បែកធំ ដោយក្រុមសិល្បៈវត្តរាជបូរណ៌ នៅបរិវេណអតីតទីស្នាក់ការប៉ូលិសបេតិភណ្ឌចាស់ ជាប់នឹងទីលានប៉ារីសប្រាសាទអង្គរវត្ត៕

ពិព័រណ៍សៀវភៅកម្ពុជានឹងធ្វើឡើងវិញនៅខែធ្នូនេះ ក្រោយផ្អាកអស់២ឆ្នាំដោយសារជំងឺកូវីដ១៩

មាស ដា (Meas Da) — Tue, 29 Nov 2022 08:04:19 +0000

ពិព័រណ៍សៀវភៅកម្ពុជានឹងត្រូវធ្វើឡើងវិញនៅបណ្ណាល័យជាតិ ចាប់ពីថ្ងៃទី៩ ដល់ថ្ងៃទី១១ធ្នូ បន្ទាប់ពីត្រូវបានផ្អាកចំនួន២ឆ្នាំ ដោយសារការរាតត្បាតជំងឺកូវីដ១៩។

ក្នុងសន្និសីទសារព័ត៌មាននាព្រឹកថ្ងៃទី ២៨ ខែវិច្ឆិកា ឆ្នាំ ២០២២ នៅបណ្ណាល័យជាតិលោក គឹម ពិនន់ អនុរដ្ឋលេខាធិការក្រសួងវប្បធម៌ និង វិចិត្រសិល្បៈលើកឡើងថា អំឡុងកម្ពុជារងការរាតត្បាតដោយជំងឺកូវីដ១៩ ពិព័រណ៍សៀវភៅកម្ពុជាត្រូវបានផ្អាកចំនួន២ឆ្នាំ។ លោកថា ដោយសារឆ្នាំ២០២២នេះបញ្ហាកូវីដ១៩បានធូរស្បើយ ទើបមានការរៀបចំឡើងវិញ ដោយនឹងមានស្តង់ច្រើនជាងមុន រហូតដល់ចំនួន១៩៧ស្តង់។

«បន្ទាប់ពីវិបត្តិកូវីដ១៩ ពិព័រណ៍សៀវភៅកម្ពុជាត្រូវបានផ្អាកចំនួន២ឆ្នាំ គឺក្នុងឆ្នាំ២០២០ និងឆ្នាំ២០២១ ក៏ដោយ តែសម្រាប់ឆ្នាំ២០២២នេះបញ្ហាកូវីដបានធូរស្បើយ ទើបគណៈកម្មការបានសម្រេចបន្តរៀបចំឡើងវិញ»។

លោកបន្ថែមថា ពិព័រណ៍សៀវភៅថ្នាក់ជាតិលើកទី៩នេះ នឹងមានសកម្មភាពចំនួន៧ គឺការដាក់តាំងសៀវភៅ ការបើកវេទិកាស្តីពីការបោះពុម្ពសៀវភៅផ្សាយតាមប្រព័ន្ធអេឡិចត្រូនិក។ បទបង្ហាញនានាទាក់ទិននឹងអក្សរសាស្រ្ត អក្សរសីលខ្មែរ និងវិទ្យាសាស្ត្រ។ ការនិពន្ធសៀវភៅទៅជាខ្សែភាពយន្ត និងអភិវឌ្ឍន៍ជំនាញការអានចាប់ផ្តើមអំណានដំណាក់កាលដំបូងនៃជីវិត។ ការជួបពិភាក្សាដែលជាការទទួលយកបទពិសោធន៍ពីអ្នកនិពន្ធល្បីៗ និងការចុះហត្ថលេខាពីអ្នកនិពន្ធ និងវិចិត្រករ។ ការអានរឿង និងល្បែងសិក្សាសម្រាប់កុមារ និងការប្រគំតន្ត្រីនិងសំណួរចម្លើយចាប់យករង្វាន់ជាដើម។

លោក គឹម ពិនន់ បន្តថា ពិព័រណ៍សៀវភៅថ្នាក់ជាតិលើកទី៩ ក្នុងឆ្នាំ២០២២នេះ ធ្វើឡើងក្នុងគោលបំណងផ្សព្វផ្សាយនូវវប្បធម៌នៃការអានសៀវភៅក្នុងសង្គមខ្មែរ ជាពិសេសយុវជន ផ្សព្វផ្សាយសៀវភៅនានាដែលបានបោះពុម្ពផ្សាយ បង្កើនវិធីនិទានរឿង និងសៀវភៅសម្រាប់កុមារដើម្បីបណ្តុះឱ្យកុមារស្រឡាញ់ការអាន និងលើកទឹកចិត្តអ្នកនិពន្ធឱ្យបន្តបញ្ចេញស្នាដៃថ្មីៗជាបន្ត។

ពិព័រណ៍សៀវភៅកម្ពុជាលើកទី៩នេះ នឹងប្រារព្ធធ្វើឡើងនៅថ្ងៃទី៩ រហូតដល់ថ្ងៃទី១១ធ្នូ ឆ្នាំ២០២២ នៅបណ្ណាល័យជាតិរាជធានីភ្នំពេញ ក្រោមប្រធានបទ «មួយថ្ងៃអាន មួយថ្ងៃដឹង»៕

សង្គមស៊ីវិលចំនួន១៧ ប្រារព្ធយុទ្ធនាការ១៦ថ្ងៃដើម្បីបញ្ឈប់អំពើហិង្សាផ្អែកលើយេនឌ័រ

មាស ដា (Meas Da) — Mon, 28 Nov 2022 04:22:58 +0000

អង្គការ សមាគម និងសហជីពចំនួន១៧ រួមគ្នាប្រារព្ធយុទ្ធនាការ ១៦ថ្ងៃ ដើម្បីបញ្ឈប់អំពើហិង្សាផ្អែកលើយេនឌ័រគ្រប់ពេលវេលា គ្រប់ទីកន្លែង ចាប់ពីថ្ងៃទី២៥ ខែវិច្ឆិកា តទៅ។

ក្នុងសេចក្តីប្រកាសព័ត៌មានរួមដែលត្រូវបានបង្ហោះលើទំព័រហ្វេសប៊ុករបស់អង្គការ សមាគម និងសហជីពដែលពាក់ព័ន្ធកាលពីចុងសប្តាហ៍មុនបញ្ជាក់ថា អង្គការសង្គមស៊ីវិល សមាគម និងសម្ព័ន្ធសហជីពដែលកំពុងធ្វើការចម្រុះវិស័យផ្នែកសិទ្ធិមនុស្ស និងសិទ្ធិការងារសង្គម ប្រារព្ធយុទ្ធនាការ ១៦ថ្ងៃ ក្រោមប្រធានបទ «គាំពារស្រ្ដី និងក្មេងស្រ្ដី ដើម្បីសង្គមគ្មានអំពើហិង្សា» ចាប់ពីថ្ងៃទី២៥ ខែវិច្ឆិកា ដល់ថ្ងៃទី១០ ខែធ្នូ ឆ្នាំ២០២២។

គោលបំណងនៃយុទ្ធនាការនោះ គឺដើម្បីកំណត់សេចក្តីត្រូវការជាអាទិភាពរួមជាមួយដំណោះស្រាយទៅកាន់អ្នកធ្វើនយោបាយ និងធ្វើសេចក្តីសម្រេចចិត្ត ហើយស្រ្ដីដែលធ្វើការផ្សេងៗជួបជុំ បញ្ចេញសារ សំឡេងរបស់ខ្លួនដើម្បីទាមទារឱ្យមានការបញ្ឈប់អំពើហិង្សាផ្អែកលើយេនឌ័រគ្រប់ពេលវេលា គ្រប់ទីកន្លែង។ ជំរុញ និងលើកទឹកចិត្តដល់ភាគីពាក់ព័ន្ធ ជាពិសេសរាជរដ្ឋាភិបាលក្នុងការអនុវត្តផែនការ ជាយុទ្ធសាស្រ្តដើម្បីដោះស្រាយ និងគាំពារស្ត្រី និងក្មេងស្រ្តីឱ្យកាន់តែមានប្រសិទ្ធិភាព។

បើតាមសារដែលបង្ហោះដោយអង្គការសង់ត្រាល់ ដែលជាអង្គការមួយរូលរួមក្នុងយុទ្ធនាការ១៦ថ្ងៃនេះ បញ្ជាក់ថា អំពើហិង្សាទាក់ទងនឹងយេនឌ័រ និងការបៀតបៀន រួមចំណែកដ៏ធំក្នុងគម្លាតប្រាក់ឈ្នួលទាក់ទង នឹងយេនឌ័រ និងខាតបង់នូវសក្តានុពលដើម្បីរកប្រាក់ចំណូល។ វាគឺជារនាំងធំមួយចំពោះការចូលរួម ពេញលេញ និងផលិតភាពរបស់ស្ត្រីក្នុងការងារ ដែលបណ្តាលឱ្យមាន ការចំណាយខ្ពស់ក្នុងអាជីវកម្ម និងធ្វើឱ្យសេដ្ឋកិច្ចបាត់បង់ផលិតភាព។

ចាប់ពីថ្ងៃទី២៥ វិច្ឆិកា ដល់១០ធ្នូ នេះគឺជា គឺជាយុទ្ធនាការអន្តរជាតិមួយដែលដំណើរការជារៀងរាល់ ឆ្នាំដែលហៅថាយុទ្ធនាការ ១៦ ថ្ងៃ ក្នុងការលុបបំបាត់អំពើហិង្សាលើស្ត្រី, រហូតដល់ថ្ងៃទី ១០ ខែធ្នូដែលជាទិវាសិទ្ធិមនុស្ស៕

ក្រសួងសុខាភិបាលអំពាវនាវឱ្យពលរដ្ឋប្រុងប្រយ័ត្នពីជំងឺកូវីដ១៩ក្នុងឱកាសបុណ្យណូអែល និងចូលឆ្នាំសកល

មាស ដា (Meas Da) — Wed, 23 Nov 2022 03:42:28 +0000

ក្រសួងសុខាភិបាល នៅថ្ងៃអង្គារ បានអំពាវនាវដល់ប្រជាពលរដ្ឋប្រុងប្រយ័ត្នចំពោះជំងឺកូវីដ១៩ក្នុងឱកាសបុណ្យណូអែល និងចូលឆ្នាំសកលខាងមុខ ដោយបន្តអនុវត្តវិធានការសុខាភិបាល ៣ការពារឱ្យបានខ្ជាប់ខ្ជួន។

ក្រសួងសុខាភិបាល កាលពីថ្ងៃទី២២ ខែវិច្ឆិកា ឆ្នាំ២០២២ បានបង្ហោះសារលើទំព័រហ្វេសប៊ុកផ្លូវការរបស់ខ្លួន ដោយបានលើកយកសាររបស់លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល ដែលបានផ្សាយលើបណ្ដាញសង្គមធ្វីតធឺ (Twitter) នាថ្ងៃចន្ទ ទី២១ ឆ្នាំ២០២២។

ក្រសួងបានបញ្ជាក់ថា លោកស្រី ឱ វណ្ណឌីន បានក្រើនរំឮកដល់ប្រជាពលរដ្ឋទាំងអស់ឱ្យបន្តបង្កើនការប្រុងប្រយ័ត្នឱ្យកាន់តែខ្ពស់ ក្នុងអំឡុងពេលបុណ្យណូអែល និងចូលឆ្នាំសកលឆ្នាំ២០២៣ ដែលនឹងឈានមកដល់នាពេលខាងមុខ។ លោកស្រីក៏បានរំឮកឱ្យប្រជាពលរដ្ឋបន្តការអនុវត្តវិធានការសុខាភិបាល ៣ការពារឱ្យបានខ្ជាប់ខ្ជួន ព្រមទាំងបន្តទៅចាក់វ៉ាក់សាំងកូវីដ១៩ ឱ្យបានគ្រប់ដូស ដើម្បីពង្រឹងកងការពារខ្លួន និងពង្រឹងភាពសុំាសហគមន៍ ដើម្បីបន្តចៀសផុតពីគ្រោះមហន្តរាយសុខភាពសាធារណៈ និងបន្តនិរន្ដន៍ភាពនៃការរស់នៅធម្មតា តាមគន្លងប្រក្រតីភាពថ្មី។

យោងតាមតួលេខរបស់ក្រសួងសុខាភិបាល គិតត្រឹមថ្ងៃទី២២ ខែវិច្ឆិកា ឆ្នាំ២០២២ កម្ពុជាមានអ្នកឆ្លងសរុបចំនួន ១៣៨,០៣៥នាក់ ក្នុងនោះអ្នកស្លាប់ចំនួន ៣,០៥៦នាក់៕

មាស ដា (Meas Da) – Newsroom Cambodia

តុលាការ​ច្រានចោល​សេចក្តី​ថ្លែងការណ៍​របស់​សហព័ន្ធ​សហជីព​កម្ពុជាដែល​ស្នើសុំ​ដោះលែង​លោក ជា ចាន់

រដ្ឋាភិបាល​កំពុង​ពិនិត្យ​លើ​លិខិត​សុំទោស​របស់​លោក​ស៊ុន ចន្ធី

ក្រសួងយុត្តិធម៌ចាត់ទុករបាយការណ៍អង្គការលីកាដូរឿងឃុំខ្លួនអនីតិជនក្នុងពន្ធនាគារគឺមិនស្របនឹងច្បាប់

បទយកការណ៍៖ គ្រូបង្រៀននៅតាមសាលារដ្ឋនៅតែបង្ហាញក្តីបារម្ភចំពោះសុខភាពក្រោយកម្តៅធ្លាក់ចុះ

ផ្ទះ​ពលរដ្ឋ​ជាង​១០០​ខ្នង​ រង​ការខូចខាតដោយខ្យល់​កន្រ្តាក់​ខណៈមានភ្លៀង​រយៈពេល​ប៉ុន្មាន​ថ្ងៃ​នេះ

ភ្ញៀវ​ទេសចរជាតិ និង​អន្តរជាតិ​ដើរ​កំសាន្ត​​ជិត​​៤៤​ម៉ឺន​នាក់​នាសប្តាហ៍ចុងខែធ្នូនេះ​

ធនាគារពិភព​លោក​ផ្ដល់​ហិរញ្ញប្បទាន​ ២៧៤​លាន​ដុល្លារ​អាមេរិក​សម្រាប់​ជួយ​កម្ពុជា​ស្តារ​សេដ្ឋកិច្ច

សត្វផ្សោតមួយក្បាលស្លាប់ និង​​អណ្ដែត​​តាម​​ទន្លេ​​​ត្រង់​​​ព្រំ​ប្រទល់​ខេត្ត​ក្រចេះ​និង​ស្ទឹង​ត្រែង

ខេត្ត​បាត់ដំបង​នឹង​រៀប​ចំពិព័រណ៍​ម្ហូប​អាហារ​ដ៏ធំ

ក្រសួង​ធន​ធាន​ទឹក​ជូន​ដំណឹង​ពី​ការ​ចុះ​ត្រជាក់​ចាប់​ពី​ថ្ងៃ​ទី ​១៤ ​ដល់ ​២០ខែ​ធ្នូ​

កម្ពុជា​ទទួល​កម្ចី​ជាង​២ពាន់​លាន​ដុល្លារ​ពីកូរ៉េ​ខាង​ត្បូង

ក្រសួងការងារ​ពន្យារ​ពេល​​ការ​​ស្នើ​សុំ​ប្រើ​ប្រាស់​ហត្ថ​ពលកម្ម​បរទេស​​ដល់ខែ​មករា​ឆ្នាំ​២០២៣￼

ពិព័រណ៍​សៀវភៅ​កម្ពុជា​នឹង​ធ្វើ​ឡើង​វិញ​នៅ​ខែធ្នូនេះ ក្រោយផ្អាក​អស់​២​ឆ្នាំ​ដោយ​សារ​ជំងឺ​កូវីដ​១៩​

សង្គមស៊ីវិល​ចំនួន​​​១៧ ប្រារព្ធយុទ្ធនាការ​១៦ថ្ងៃ​ដើម្បី​បញ្ឈប់​​អំពើ​ហិង្សា​ផ្អែក​លើ​យេនឌ័រ​