ញឹក ឆន្នី (Nhoek Chhornny) – Newsroom Cambodia

បញ្ហាប្រឈមនៅតែមានសម្រាប់អាជីវករខេត្តសៀមរាប បើទោះជាប្រទេសបើកដំណើរការឡើងវិញក៏ដោយ

ញឹក ឆន្នី (Nhoek Chhornny) — Mon, 27 Dec 2021 02:39:46 +0000

សៀមរាប៖ អាជីវករមួយរូបអង្គុយយ៉ាងស្រងូតស្រងាត់លើគ្រែលក់ស្ពៃជ្រក់ និងក្តាមប្រៃ រងចាំមើលអ្នកមកទិញម្ហូប ហើយកាលពីពេលថ្មីៗនេះ មិនសូវមានអ្នកមកទិញច្រើននោះ បន្ទាប់ពីមានការរាតត្បាត ជំងឺកូវីដ១៩មក ទោះបីមានការបើកប្រទេស និងផ្សារគ្រប់ទីកន្លែងកាលពីខែវិច្ឆិកាក៏ដោយ។

អ្នកស្រីទេរ នឿន អាយុ ៤៦ឆ្នាំ ជាអាជីវករលក់ស្ពៃជ្រក់ និងក្តាមប្រៃ នៅផ្សារលើរយៈពេល ៤ឆ្នាំ ហើយអ្នកស្រីត្រូវទទួលរ៉ាប់រងចិញ្ចឹមកូនចំនួន ៣នាក់។ គាត់បានពោលទាំងទឹកភ្នែក និងអួលដើមកថា៖ «ប្ដីខ្ញុំបានស្លាប់ចោល ៣ឆ្នាំហើយ កូនប្រុសបងរៀន ទី១២ឈប់រៀនដោយអត់លទ្ធភាព និងទប់ទល់លែងកើត កូននៅរៀនពីរនាក់ដែរ ខ្ញុំត្រូវរកម្នាក់ឯងឲ្យកូនបានរៀនត»។

ក្នុងបទសម្ភាសន៍ថ្មីៗនេះជាមួយអាជីវករតូចៗក្នុងខេត្តសៀមរាប ខេត្តដែលពឹងផ្អែកខ្លាំងលើវិស័យទេសចរណ៍ ពួកគាត់បាននិយាយថាបានរងផលប៉ះពាល់យ៉ាងធ្ងន់ធ្ងរដោយសារកូវីដ ហើយទោះបីជាមានការបើកដំណើរការឡើងវិញក៏ដោយ ក៏នៅតែជួបការលំបាក ជាពិសេសការព្រួយបារម្ភថ្មីអំពីមេរោគអូមីក្រុង។

បើយោងតាមអាជីវករនៅតាមទីផ្សារក្នុងក្រុងនិងនៅតំបន់អង្គរបានឲ្យដឹងថា ពួកគាត់នៅតែមានការលំបាកទោះបីជាបើកប្រទេសឡើងវិញក៏ដោយ ព្រោះភ្ញៀវទេសចរណ៍ហាក់នៅមានកម្រិតដែលធ្វើឲ្យការរកចំណូលពួកគាត់នៅមិនទាន់គ្រប់គ្រាន់សម្រាប់ផ្គត់ផ្អង់គ្រួសារ។

អ្នកស្រីទេស នឿន

អ្នកស្រីទេស នឿនបានបន្តទាំងកំសត់ថា មុនសម័យកូវីដ គាត់មានលទ្ធភាពរស់នៅបាន មានលទ្ធភាពឲ្យកូនរៀនបាន ក៏ប៉ុន្តែពេលកំឡុងពេលកូវីដ គាត់មិនរកចំណូលបាននោះទេ ហើយរកលុយឲ្យកូនសឹងមិនបានទៅរៀន អត់បានលក់ គេបិទផ្សារ ជាប់កន្លែងឃុំកូវីដម្ភៃថ្ងៃ ហើយបន្ទាប់ពីហ្នឹងលក់តែបន្លែនៅផ្លូវ៦០ម៉ែត្រ។

«ពេលខ្លះ ប៉ូលីសដេញ ហើយរត់ទៅលក់តាមផ្លូវថ្នល់ម្តង»។

អ្នកស្រីបាននិយាយថាទើបតែបានមកលក់នៅផ្សារបានមួយខែជាង មួយថ្ងៃចំណាយពីរម៉ឺនរៀនសម្រាប់កូន

ទុក ១៥០ដុល្លារ សម្រាប់បង់កន្លែងជួលមួយខែៗ។

អ្នកស្រីទេស នឿន «រាល់ថ្ងៃនេះនៅលំបាកខ្លាំងដោយត្រូវដោះស្រាយថ្លៃតូប ហើយកូនពីរនាក់ត្រូវចូលរៀនហើយទិញខោអៅ សៀវភៅគ្រប់មុខដែលត្រូវទទួលបន្ទុកតែម្នាក់ឯង»។

អ្នកស្រីបានសម្តែងការព្រួយបារម្ភចំពោះជំងឺកូវីដអូមីក្រុងថ្មីដោយក្តីអស់សង្ឃឹម ព្រោះបើមានទៀតគាត់ប្រឈមមុខនឹងការគ្មានចំណូល និងគ្មានអីហូបដូចមុនទៀត។

អ្នកស្រីទេរ នឿន៖«ខ្ញុំសុំសំណូមពរឲ្យរាជរដ្ឋាភិបាលជួយឧបត្ថម្ភឲ្យកូនពីរនាក់ហ្នឹងបានរៀន ខ្ញុំគ្មានចង់បានអ្វីច្រើនទេ គ្រាន់តែចង់ឲ្យកូនបានរៀន»។

ស្រដៀងគ្នាផងដែរ អ្នកស្រី ឈ្មោះដា នី អាយុ៤២ឆ្នាំ ជាអាជីវករលក់ចេកអាំង នៅលើរ៉ីម៉កម៉ូតូ ម្តុំមន្ទីរពេទ្យកុមារអង្គរ បានលើកឡើងថា កាលមុនកូវីដគឺអ្នកស្រីរកចំណូលមានភាពល្អប្រសើរក្នុងមួយថ្ងៃបាន ៣ម៉ឺនរៀល តែមកដល់ឥឡូវបានត្រឹមតែ ១ម៉ឺនប៉ុណ្ណោះ។

អំឡុងពេលកូវីដមានសភាពពិបាក គ្មានលទ្ធភាពបង់ការប្រាក់ធនាគារ ព្រោះលក់មិនដាច់ រួមទាំង មានការ

បិទខ្ទប់ទៀត។

អ្នកស្រីដា នី

លោកស្រី និយាយបណ្តើរប្រែចេកអាំងបណ្តើរថា «ពេលកូវីដពីរឆ្នាំហ្នឹង បើខាតមិនបាច់និយាយទេ ហើយបើយើង លក់អត់ដាច់មានជាប់លុយធនាគារ មិនមានអ្វីដើម្បីផ្គត់ផ្គង់កូនរៀនដូច្នេះបានឲ្យកូនឈប់រៀន។ កាលកូវីដហ្នឹង លក់រហូតអត់ឈប់ទេ មកលក់រាល់ថ្ងៃ ប៉ុន្ដែពេលបិទខ្ទប់អត់បានមក ព្រោះគេបិទមកអត់កើត នៅនេះក៏គេបិទនៅនោះក៏គេបិទ គេបិទខេត្តសៀមរាបទាំងមូលតែម្តង »។

លោកស្រីបង្ខំចិត្តឲ្យកូនឈប់រៀនដើម្បីឲ្យកូនជួយរកចំណូលផ្គត់ផ្គង់គ្រួសារ ព្រោះគ្មានលទ្ធភាពបង់ការប្រាក់ធនាគារឡើយ។

អ្នកលក់ចេកអាំងរូបនេះបន្ថែមទាំងទឹកមុខស្រពាប់ស្រពោនថា «បើថានិយាយរឿងពិបាកនិយាយមិនចេញទេ ជំពាក់ធនាគារ សុំគេបង់តែការហ្នឹង យើងយកលុយធនាគារយកមកធ្វើផ្ទះ ទិញដីនៅរកស៊ីអីចឹងណាមួយប្រាក់ចំណូលពីកូនផង ហើយឥលូវដល់ថ្ងៃទៀតហើយគ្មានលទ្ធភាពបង់មិនបានឲ្យគេទេ រកមិនបានតែម្តងរកត្រឹមបានតែការប្រាក់សម្រាប់បង់ធនាគារ លក់មួយថ្ងៃទាល់ល្ងាច អីចឹងកូនសុំឈប់រៀនហើយ កូនសុំទៅធ្វើការនៅប៉ោយប៉ែតដើម្បីទៅរកលុយបង់លុយធនាគារព្រោះមិនចង់ឲ្យលក់ផ្ទះលក់សម្បែងសងគេ»។

បន្ទាប់ពីបើកប្រទេសឡើងចំណូលអ្នកស្រីមានការល្អប្រសើរជាងអំឡុងពេលកូវីដ ព្រោះបានចំណូលច្រើនជាងអំឡុងពេលកូវីដ ប៉ុន្ដែចំណូលនៅតែមិនដូចមុនកូវីដទេ។

អ្នកស្រីបន្តទៀតថា «ព្រួយបារម្ភណាស់អំពីជំងឺកូវីដ-១៩ បម្លែងខ្លួនថ្មីអូមីក្រុង ចាំតែមើលទៅណាស់អូន ឲ្យតែយើងចេះការពារអីចឹងទៅ មានពាក់ម៉ាស់មានអាកុលតាមខ្លួន បើយើងលក់ដូរធ្វើម៉េចយើងការពារបានល្អអាជំងឺហ្នឹងក៏មិនអាចចូលមកស្រុកយើងកើត ហើយណាមួយយើងក៏បានចាក់វ៉ាក់សាំងដែរ»។

អ្នកស្រី ម៉េ ស្រ៊ីម អាយុ៤២ឆ្នាំ មានកូន៣នាក់ ស្រី២ប្រុស១ ជាអ្នកកោះធំ ដែលលក់នៅតំបន់អង្គរតូចខេត្តសៀមរាបរយៈពេលជាងដប់ឆ្នាំ ទីលំនៅបច្ចុប្បន្ននៅខេត្តសៀមរាបតែម្តង។

អ្នកស្រីអង្គុយលើកៅអីជ័រ ក្តោបដៃ និយាយដោយទឹកមុខស្រងូតស្រងាត់ថា៖«មុនពេលដែលមានកូវីដ ខ្ញុំអាចលក់បានម៉ាហូបៗ ឬក៏នៅសល់តិចតួច ទុកគ្រាន់បង់ឲ្យអង្គការដែលគាត់ជំពាក់បំណុលគេ និងឲ្យកូនរៀនសូត្រ។»

អ្នកស្រី ម៉េ ស្រ៊ីម

តែនៅពេលកំឡុងពេលកូវីដនោះអ្នកស្រីមិនអាចរកចំណូលនបាននោះទេ អ្នកស្រីយកដៃអេះស្មាបណ្តើរនិយាយបណ្តើរថា៖ «នៅក្នុងរយៈពេលពីរឆ្នាំអំឡុងពេលកូវីដនេះខ្ញុំរកបានខ្លះអត់ខ្លះព្រោះពេលនោះ គាត់នៅតំបន់ក្រហមហើយគាត់មិនអាចមកលក់បាន គេបិទខ្ទាប់កន្លះខែទើបគាត់អត់មានអ្វីហូប ទោះបីគេបើកឲ្យលក់វិញថ្ងៃខ្លះខ្ញុំមកលោកទាំងអត់បានចំណូលអ្វីទាំងអស់ ព្រោះលក់អត់ដាច់សូម្បីតែមួយ ថ្ងៃខ្លះលក់ដាច់បានត្រឹមតែ១ម៉ឺន ២ម៉ឺនរៀល តែទោះបីជាយ៉ាងណាក៏ខ្ញុំខំរកលុយដើម្បីបង់ការប្រាក់សម្រាប់លុយចងការគេនិងទុកខ្លះសម្រាប់កូនរៀនអនឡាញផង»។

បន្ទាប់ពីមានការបើកប្រទេសឡើងវិញ និងមានភ្ញៀវទេសចរមកទស្សនានៅប្រាសាទអង្គរវត្តអ្នកស្រីបានឲ្យដឹងថាគាត់អាចលក់បានប្រាំពីរទៅប្រាំបីម៉ឺនរៀលដែលធ្វើឲ្យគាត់អាចផ្គត់ផ្គង់គ្រួសារគាត់បានឡើងវិញអាចឲ្យកូនរៀនបាន។

អំឡុងពេលផ្ទុះខ្លាំងលោកស្រី និងស្វាមីក៏បានទៅធ្វើការនៅភ្នំពេញជាអ្នកសម្អាតបន្ទប់សណ្ឋាគារនិងស្វាមីធ្វើជាកម្មករសំណង់ ដោយការធ្វើការនៅភ្នំពេញជាមួយស្វាមីអ្នកស្រីមានការលំបាកនិងបែកពីកូននិងចៅរបស់គាត់គាត់ក៏សម្រេចចិត្តថាមកនៅសៀមរាបវិញដើម្បីជុំគ្រួសារ ដោយអ្នកស្រីបាននិយាយថា៖«ទោះមានរឿងអ្វីក៏បាននៅជុំគ្រួសារដែរ សុខចិត្តនៅជុំគ្នាកុំឲ្យព្រាត់កូនព្រាត់ចៅ។»

អ្នកស្រីនិយាយដោយទឹកមុខស្លេកស្លាំងនិងការភ័យខ្លាចថា៖ «បារម្ភខ្លាចប្រសិនបើមានមេរោគបម្លែងថ្មីអូមីក្រុងចូលមកកម្ពុជាដែលអាចបណ្ដាលឲ្យមានការបិទប្រទេសសារជាថ្មី ខ្ញុំព្រួយបារម្ភខ្លាំងដោយសារតែយើងអត់មានមុខរបរ និងលុយសម្រាប់ផ្គត់ផ្គង់គ្រួសារនិងត្រូវបង់អង្គការទៀត»។

អ្នកស្រីសៀន អូន អាយុ៥៩ឆ្នាំ ជាអាជីវករលក់ផ្លែឈើនៅមុខផ្សារលើធំថ្មី កំពុងអង្គុយនៅលើកៅអីជ័រ នៅខាងមុខដងផ្លូវពោរពេញទៅដោយឡាន ម៉ូតូ ក្នុងខេត្តសៀមរាប បានលើកឡើងទាំងទឹកមុខក្រៀមក្រំអំពីចំណូលប្រចាំថ្ងៃរបស់គាត់។

អ្នកស្រីសៀន អូន

អ្នកស្រីបានលើកឡើងថា ការលក់មុនពេលកូវីដបាន១លានជាងក្នុងមួយថ្ងៃ ប៉ុន្តែនៅពេលដែលកូវីដផ្ទុះខ្លាំងគេមិនឱ្យលក់ទេហើយមានពេលខ្លះរហូតដល់ដាច់បាយគ្មានអ្វីហូប ហើយអ្នកស្រីត្រូវនៅលក់ដាច់យប់មានពេលខ្លះទាល់ភ្លឺទៀតក៏មានដែរ។ បញ្ហាប្រឈមខ្លាំងរបស់អ្នកស្រីគឺអត់បាយគ្មានអ្វីហូបដោយមិនបានលក់ដូរអ្វីទាំងអស់ រហូតមកទាល់ពេលនេះទោះបីប្រទេសបានបើកឡើងវិញក៏ដោយក៏អ្នកស្រីលក់មិនដាច់ដែរ ដោយមួយថ្ងៃលក់បានតែ៣ទៅ១០ម៉ឹនរៀលតែប៉ុណ្ណោះ។

លោក គី សេរីវុឌ្ឍន៍ ប្រធាននៃមជ្ឍមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិតសភាកម្ពុជាបានប្រាប់ Newsroom Cambodiaថាវិស័យទេសចរណ៍គឺជាតួនាទីស្នូលមួយក្នុងការស្តារសេដ្ឋកិច្ចក៏ប៉ុន្តែអ្វីដែលជំរុញឲ្យទេសចរមានការដំណើរការខ្លាំងជាងនេះ វាត្រូវការជំនាញវិជ្ជាជីវៈនិងការរៀបចំវិស័យទេសចរឲ្យបានល្អ។ «ចឹងយើងសង្កេតឃើញថាមានការរៀបចំហេដ្ឋារចនាសម្ព័ន្ធបានល្អប្រសើរហើយ រដ្ឋាភិបាលបានធ្វើផ្លូវនៅក្រុងព្រះសីហនុនិងខេត្តសៀមរាប មួយកន្លែងៗចំនួន៣៨គម្រោងឯណោះ»។

បន្ថែមលើសពីនេះទៀត លោកបានបន្តថារចនាសម្ព័ន្ធលក់ដូរតាមឆ្នេរក៏មានលក្ខណៈល្អប្រសើរ ហើយមើលទៅលើស្ថានភាពនៃការផ្តល់មគ្គុទេសទេសចរណ៍ សហគមន៍ទេសចរណ៍ការលក់ផលិតផលនៅមានកម្រិតនៅឡើយចឹងហើយទាមទារឲ្យមានការពង្រឹងនិងជំរុញបន្ថែមទៀតដើម្បីឲ្យវិស័យទេសចរណ៍ដើរជាតួនាទីស្នូលក្នុងការទាញកំណើនសេដ្ឋកិច្ចបន្ទាប់ពីវិបត្តិកូវីដ១៩។

អ្នកសេដ្ឋកិច្ចរូបនេះក៏បានបន្តទៀតថា៖ «ជាមួយគ្នាផងដែរ វិស័យកសិកម្មសម្រាប់ផ្គត់ផ្គង់លើទេសចរណ៍ក៏ដើរតួនាទីសំខាន់ណាស់គឺកសិកម្មសិរីរាង្គដែលភ្ញៀវទេសចរហ៊ានចំណាយលុយយ៉ាងសម្បើមដើម្បីទទួលទានអាហារដែលគ្មានសារធាតុគីមី ទទួលទានអាហារមានវិជ្ជាជីវៈខ្ពស់ អនាម័យ ជាមួយការផ្តល់សេវាទេសចរណ៍ដ៏ល្អ សេវាបម្រើភោជនីយដ្ឋានដ៏ល្អមានការបណ្តុះបណ្តាលវិជ្ជាជីវៈ ដូច្នេះការបណ្តុះបណ្តាលវិជ្ជាជីវៈមានតួនាទីសំខាន់ក្នុងការជំរុញវិស័យនេះផងដែរ។»

លោកគី សេរីវុឌ្ឍន៍បាននិយាយថា៖«លោកមិនអាចនិយាយបានទេថាពេលណាទើបសេដ្ឋកិច្ចកម្ពុជាអាចដូចកាលពីមុនកូវីដឡើងវិញបាន ព្រោះជំងឺកូវីដវាអត់ប្រាកដច្បាស់ ចឹងពេលដែលជំងឺកូវីដអស់ ហើយការធ្វើដំណើរបើកឡើងវិញហ្នឹង ទើបអាចនិយាយបាន បើមិនមានភាពច្បាស់លាស់នៃជំងឺកូវីដទេយើងមិនអាចនិយាយបានទេ។»

លោកទៀ សីហា អភិបាលខេត្តសៀមរាបបានប្រាប់ Newsroom Cambodia ថាក្នុងអន្តរកាលកំពុងផ្ទុះកូវីដ-១៩ នៅពេលនោះ រដ្ឋបាលខេត្តបានចេញវិធានការមួយចំនួនដើម្បីកាត់ផ្ដាច់ជំងឺរាតត្បាតកូវីដ-១៩ ឈានទៅដល់ការបិទខ្ទប់ដែលបែងចែកជាតំបន់ក្រហម លឿនទុំ បៃតង។

«ចំពោះការបិទខ្ទប់នៅក្នុងតំបន់ក្រហមនានា វាធ្វើឲ្យមានការប៉ះពាល់ដល់អាជីវកម្មចំពោះពុកម៉ែបងប្អូន ដែលប្រកបមុខរបរ មិនត្រឹមតែប៉ះពាល់តែវិស័យទេសចរណ៍ ឬមួយប្រតិបត្តិទេសចរណ៍នោះទេ ប៉ុន្ដែប៉ះពាល់ដល់ការលក់ដូរផ្សេងៗ គឺត្រូវបានផ្អាកទាំងស្រុងក្នុងតំបន់ក្រហម វាធ្វើឲ្យមានផលលំបាកប៉ះពាល់ដល់ប្រជាពលរដ្ឋតែម្ដង»។

លោកអភិបាលខេត្តបានបន្តថា «រដ្ឋបាលខេត្តក៏បានជួយពាក់ព័ន្ធការបិទខ្ទប់នេះ ជួយទី១គឺការចែកស្បៀងឲ្យបានគ្រប់ៗគ្នា ថ្វីត្បិតថាមានការយឺតយ៉ាវក៏ដោយ បង្កើតជាអេប(App)ដែលសំណមពរបងប្អូន រត់រម៉កនិងកង់បីជួយដឹងជញ្ចូនស្បៀង បើកជាផ្សារតូចៗដែលអាចទិញតាមលទ្ធភាព ហើយចំពោះអ្នកដែលខ្លះខាតមែនទែន គឺតាមចៅសង្កាត់ មេឃុំគឺផ្ដល់ព័ត៌មានដល់រដ្ឋបាលខេត្ត ហើយយើងបានរៀបចំស្បៀងអាហារចំពោះគាត់ផង»។

យ៉ាងណាមិញ តំបន់ផ្សារ និងតំបន់ប្រាសាទ មានផលប៉ះពាល់ច្រើនដោយសារមានការរឹតបន្ទឹង ដែលធ្វើឲ្យប៉ះពាល់ដល់ជីវភាពខ្លាំង ប៉ុន្ដែរដ្ឋបាលខេត្តក៏បានដាក់វិធានការរៀបចំថ្មី រក្សាគម្លាត និងដាក់វេនឲ្យអាជីវករលក់ ដើម្បីដោះស្រាយជីវភាពពួកគាត់់ផងដែរ។

លោកបានមានប្រសាសន៍បន្ថែមថា «តំបន់ផ្សារ និងតំបន់ប្រាសាទ គឺមានផលប៉ះពាល់ច្រើន យើងចាត់វិធានការមួយ គឺការចុះសម្អាតផ្សារ ដូចជាដាក់គម្លាត ដាក់វេនលក់ជូនបងប្អូនប្រជាពលរដ្ឋដែលលក់ដូរនៅក្នុងផ្សារគឺមួយអាទិត្យមួយចំហៀង ហើយមួយអាទិត្យមួយទៀតចំហៀងទៀត ហើយយើងក៏បើកផ្សារបណ្ដុះអាសន្ននៅផ្សារកុងទីន័រដល់អ្នកលក់ដូរ ដែលត្រូវឆ្លាស់គ្នាមួយអាទិត្យម្ដង ទោះបីដោះស្រាយបញ្ហាពួកគាត់មិនពេញលេញ ប៉ុន្ដែក៏ដោះស្រាយជីវភាពពួកគាត់បានខ្លះៗដែរ»។

ប្រជាពលរដ្ឋអាចបើកអាជីវកម្មឡើងវិញ មកដល់បច្ចុប្បន្ននេះផ្សារទាំងអស់ត្រូវបើកឡើងវិញ ដោយមានរក្សាគម្លាត ស្កេន QR code តំបន់អង្គរត្រូវបានបើកឡើងវិញ ដូច្នេះជីវៈភាពរបស់ប្រជាពលរដ្ឋជាពិសេសអ្នកលក់ដូរបានប្រសើរជាងមុនខ្លាំងណាស់ ឥឡូវនេះបើកស្ទើរតែ៥០ភាគរយនៅសណ្ឋាគារ និងផ្ទះសំណាក់។ នេះយោងតាមលោកអភិបាលខេត្ត។

លោកក៏បាននិយាយថាសៀមរាបនឹងមានការចាប់ផ្តើមចាក់វ៉ាក់សាំងដូសទី៣ជូនប្រជាពលរដ្ឋនៅដើមខែមករានេះផងដែរ៕

Challenges Remain for Siem Reap Businesses Despite the Country Reopening

ញឹក ឆន្នី (Nhoek Chhornny) — Mon, 27 Dec 2021 01:44:03 +0000

Siem Reap businesses say they are still struggling for survival despite the country reopening, and face fresh fears with the emergence of Omicron

Full story here: https://kiripost.com/stories/challenges-remain-for-siem-reap-businesses-despite-the-country-reopening

Q&A ជាមួយលោកប៉ា ចាន់រឿន អំពីលទ្ធិប្រជាធិបតេយ្យនៅកម្ពុជា

ញឹក ឆន្នី (Nhoek Chhornny) — Sun, 05 Dec 2021 02:25:29 +0000

លោកប៉ា ចាន់រឿន ប្រធានវិទ្យាស្ថានប្រជាធិបតេយ្យកម្ពុជា បាននិយាយថាប្រជាធិបតេយ្យគឺជាប្រព័ន្ធ ឬក៏របបនយោបាយដែលផ្តល់សិទ្ធិអំណាចឱ្យប្រជាពលរដ្ឋជាធំមានអំណាចក្នុងដៃដើម្បីជ្រើសរើសតំណាងរបស់ខ្លួន ហើយលទ្ធិប្រជាធិបតេយ្យនេះក៏បានធ្វើឱ្យកម្ពុជាផ្លាស់ប្តូររបបនយោបាយសេដ្ឋកិច្ចផែនការមកជាសេដ្ឋកិច្ចទីផ្សារសេរី បើកឱកាសឱ្យប្រទេសអាចរកស៊ីជួញដូរជាមួយប្រទេសផ្សេងៗផងដែរ។

ក្នុងកិច្ចសម្ភាសន៍ជាសំណួរ ចំលើយ (Q&A) ជាមួយលោកញឹក ឆន្នី សិក្ខាកាមនៃ Newsroom Cambodia លោកប៉ា ចាន់រឿនបានបន្តថាស្ថានភាពប្រជាធិបតេយ្យបាន «ដាំក្បាលធ្លាក់ចុះគួរឱ្យព្រួយបារម្ភ» ក្នុងមួយរយៈពេលចុងក្រោយនេះ ជាពិសេសមកលើវិស័យសារព័ត៍មាន។

លោកញឹក ឆន្នី៖ ជម្រាបសួរលោក ប៉ា ចាន់រឿន

លោកប៉ា ចាន់រឿន៖ បាទ ជម្រាបសួរ

លោកញឹក ឆន្នី៖ ជាដំបូងខ្ញុំសុំសួរលោកថា តើអ្វីទៅជាប្រជាធិបតេយ្យ?

ប៉ា ចាន់រឿន៖ ប្រជាធិបតេយ្យវាមាននិយមន័យច្រើនប៉ុន្តែបើយើងនិយាយជារួមថា ប្រជាធិបតេយ្យហ្នឹងគឺសំដៅទៅលើប្រព័ន្ធ ឬក៏របបនយោបាយដែលផ្តល់សិទ្ធិអំណាចឱ្យប្រជាពលរដ្ឋជាធំអំណាចស្ថិតនៅក្នុងដៃរបស់ប្រជាពលរដ្ឋៗរួមគ្នាជ្រើសរើសតំណាងរបស់ខ្លួនទាំងតំណាងរាស្ត្រ និងតំណាងអ្នកដឹកនាំកំពូលដើម្បីយកមកធ្វើកិច្ចការងារចំពោះពួកគាត់ទាំងនៅក្នុងការសម្រេចចិត្តទាំងការអនុវត្ត និងការងារដទៃនៅក្នុងសង្គម យើងអាចសង្ខេបជារួមមកប្រជាធិបតេយ្យគឺជាប្រព័ន្ធនយោបាយដែលធ្វើដើម្បីប្រជាពលរដ្ឋ និងជារបបនយោបាយដែលមានអ្នកដឹកនាំដែលជ្រើសតាងដោយប្រជាពលរដ្ឋផ្តល់តែម្តង ។

លោក ញឹក ឆន្នី៖ តើប្រជាធិបតេយ្យចូលមកនៅក្នុងប្រទេសកម្ពុជាយើងតាំងពីពេលណា និងដោយរបៀបណាដែរ?

លោក ប៉ា ចាន់រឿន៖ ប្រសិនបើយើងក្រឡេកមើលប្រវត្តិសាស្ត្រតែបន្តិច ប្រជាធិបតេយ្យបានកកើតនៅក្នុងប្រទេសកម្ពុជាយើងនៅក្នុងទសវត្សឆ្នាំ១៩៤០ ជាពិសេសគឺតាមបញ្ញវ័ន្តខ្មែរនៅក្នុងប្រទេសបារាំងនៅពេលនោះសាធារណជនទទួលស្គាល់តាមរយៈព្រះអង្គម្ចាស់ស៊ីសុវត្ថិ យុទ្ធវង្ស ដែលលោកក៏បានបើកគណបក្សនៅក្នុងទសវត្ស ១៩៤០ គឺគណបក្សប្រជាធិបតេយ្យ ហើយក៏មានការរីកដុះដាល់ជាបន្តបន្ទាប់ជាហូហែរហូតដល់កម្ពុជាយើងទទួលបានឯករាជ្យពីប្រទេសបារាំង។

លទ្ធិប្រជាធិបតេយ្យក៏មានទម្រង់មានរូបភាពកាន់តែច្បាស់លាស់ និងមានការរីកចម្រើនជាបន្តបន្ទាប់រហូតដល់មានការធ្វើរដ្ឋប្រហារកាលដែលប្រទេសធ្លាក់ចូលនៅក្នុងសង្គ្រាមវៀតណាម អាមេរិក បានទាញទម្លាក់ខ្មែរយើងឱ្យធ្លាក់ក្នុងការអន្តរាយរហូតដល់មានសង្ក្រាមស៊ីវិល គឺការកើតឡើងនៃរបបខ្មែរក្រហម ឬរបប ប៉ុល ពត។

ប្រជាធិបតេយ្យទី២ គឺតាមរយៈកិច្ចព្រមព្រៀងទីក្រុងបារីស២៣ តុលា ឆ្នាំ១៩៩១ ដែលបានបញ្ចប់សង្គ្រាមនៅកម្ពុជានៅតែមួយទេដែលជាសង្គ្រាមរវាងខ្មែរ និងខ្មែរជាសង្គ្រាមខ្ចីដៃ ឬក៏ជាសង្គ្រាមអាយ៉ង របបបរទេសនៅស្រុកខ្មែរយើង ជាពិសេសគឺរវាងចិន និងវៀតណាមសព្វថ្ងៃ ហើយតាមរយៈកិច្ចព្រមព្រៀងទីក្រុងប៉ារីស ការរៀបចំបោះឆ្នោតដោយសេរីទូទៅនៅឆ្នាំ ១៩៩៣ បានបង្កើតជារដ្ឋធម្មនុញ្ញ ៩៣ រដ្ឋាភិបាលបានបង្កើតឱ្យព្រះរាជាណាចក្រទីពីរ ហើយក៏មានការវិវត្តិរហូតមកដល់សព្វថ្ងៃនេះ ។

លោកញឹក ឆន្នី៖ តើប្រជាធិបតេយ្យបានរួមចំណែកនៅក្នុងវឌ្ឍនភាពរបស់សង្គមកម្ពុជាដោយរបៀបណា?

លោក ប៉ា ចាន់រឿន៖ ជាការពិតប្រវត្តិសាស្ត្របានបង្ហាញឱ្យយើងឃើញហើយថាប្រទេសកម្ពុជាយើងឆ្លងកាត់ក៏ដូចជាសាកល្បងនៅនយោបាយជាច្រើន ហើយអតីតកាលក៏បានបង្ហាញយើងដែរការឆ្លងកាត់របបនយោបាយខ្លះធ្វើឱ្យប្រទេសជាតិធ្លាក់នៅក្នុងសង្គ្រាមភាពវឹកវរ រហូតដល់មានការកាប់សម្លាប់ជនជាតិឯង រាប់លាននាក់ ទន្ទឹមគ្នានេះដែរ យើងឃើញថាមានតែរបបនយោបាយបែបប្រជាធិបតេយ្យទេ ដែលបានធ្វើឱ្យខ្មែរយើងមានភាពសុខដុមរម្យនាមានសុខសន្តិភាពមានការអភិវឌ្ឍរីកចម្រើន។

អ្នកនយោបាយខ្មែរ អាចរៀនរស់ជាមួយគ្នានិយាយគ្នាអាចធ្វើការជាមួយគ្នាប្រកបទៅដោយសុខដុមរម្យនាទោះបីជាប្រព័ន្ធនយោបាយវាមានចំណុចខ្វះខាតខ្លះ ហើយភាពអសកម្មមួយចំនួនមាននៅក្នុងប្រជាធិបតេយ្យប៉ុន្តែវាគឺជាប្រព័ន្ធមួយដែលរបបនយោបាយ ដែលមានបញ្ហាតិចជាងគេហើយក៏ជាប្រព័ន្ធនយោបាយដែលអាចជួយផ្សះផ្សាដំបៅនយោបាយអរិភាពរបស់ខ្មែរយើងរវាងអ្នកនយោបាយ និងអ្នកនយោបាយនិងគាំទ្រនយោបាយផ្សេងគ្នា។

លទ្ធិប្រជាធិបតេយ្យបានធ្វើឲ្យកម្ពុជាយើងផ្លាស់ប្តូររបបនយោបាយសេដ្ឋកិច្ចផែនការមកជាសេដ្ឋកិច្ចទីផ្សារសេរី ដែលបានបើកឱកាសឲ្យប្រទេសកម្ពុជាអាចរកស៊ីជួញដូរជាមួយប្រទេសជិតខាង។

ប្រទេសមួយចំនួនទៀតនៅក្នុងពិភពលោកជាពិសេសសហភាពអឺរ៉ុប សហរដ្ឋអាមេរិកដែលជាទីផ្សារធំៗនៅក្នុងពិភពលោកដែលធ្វើឱ្យប្រជាពលរដ្ឋយើងទទួលបានចំណូល និងអត្ថប្រយោជន៍ជាច្រើនពីការអនុវត្តសេដ្ឋកិច្ចទីផ្សារ ជាលទ្ធផលស្រុកទេសយើង ៣០ឆ្នាំក្រោមព្រមព្រៀងទីក្រុងបារីស មានការបោះឆ្នោតឆ្នាំ ៩៣ដែលនាំមកនៅលទ្ធិប្រជាធិបតេយ្យឡើងវិញ។

លទ្ធិប្រជាធិបតេយ្យបានធ្វើឱ្យស្រុកយើងមានការរីកចម្រើនស្ទើរគ្រប់វិស័យទាំងរូបវន្ត និងទាំងស្មារតីនៅក្នុងសង្គមប្រជាជន យើងបានចាកផុតពីភាពក្រីក្រភាព សុខសន្តិភាព ចម្បាំងរាំងជលក៏កាត់បន្ថយទោះបីជាមានបញ្ហារង្គោះរង្គើរផ្នែកនយោបាយខ្លះក្តី ប៉ុន្តែស្ថិតនៅក្នុងស្ថានភាពមួយខ្មែរនៅអាចនិយាយបាននៅមានឱកាសនិយាយគ្នាកើតអាចរូបរួមគ្នាជាកម្លាំងនៅក្នុងការកសាងជាតិទៅមុខទៀតបាន។

លោកញឹក ឆន្នី៖ តើប្រជាធិបតេយ្យអាចជួយប្រជាពលរដ្ឋបានកម្រិតណាដែរ?

លោកប៉ា ចាន់រឿន៖ បើយើងមើលអំពីប្រជាពលរដ្ឋយើងឃើញថាប្រជាពលរដ្ឋខ្មែរឱ្យតម្លៃហើយទទួលស្គាល់អំពីសារសំខាន់នៃលទ្ធិប្រជាធិបតេយ្យទាំងផ្តល់ឱកាសឱ្យពួកគាត់មានឱកាសចូលរួមនៅក្នុងកិច្ចការងារសង្គមគ្រប់វិស័យនាំមកនៅសុខសន្តិភាព ដូច្នេះយើងឃើញថាប្រជាពលរបស់យើងប៉ែតសិបភាគរយឡើងបានចូលរួមបោះឆ្នោតដើម្បីសម្តែងនៅឆន្ទៈរបស់ពួកគាត់នៅក្នុងការជ្រើសរើសមេដឹកនាំ។

ប៉ុន្តែផ្ទុយទៅវិញដំណើរការប្រជាធិបតេយ្យរបស់យើងនៅក្នុងចរន្តនយោបាយជាពិសេសនៅក្រោយការរំលាយគណបក្សសង្គ្រោះជាតិដែលមានទំទាស់ខ្លាំងជាងគេតាងពីឆ្នាំ ២០១៧មក ដំណើរប្រជាប្រជាធិបតេយ្យនៅស្រុកយើងមានការថយចុះដែលសហគមន៍អន្តរជាតិជាច្រើនបានសំដែងនៅការព្រួយបារម្ភ មានទាំងការចេញសេចក្តីថ្លែងការទាំងរបាយការណ៍ ថ្លែងសារផ្ទាល់នៅក្នុងពិធីជាច្រើន។

ដូចជាថ្មីៗនេះកម្មវិធីគម្រប់ខួបទី ៣០ឆ្នាំនៃកិច្ចព្រមព្រៀងទីក្រុងប៉ារីសដែលសហគមអន្តរជាតិគេឱ្យឈ្មោះថាថ្ងៃកំណើតនៃរបបប្រជាធិបតេយ្យកម្ពុជា ហើយសហគមអន្តរជាតិជាច្រើនបានសម្តែងនៅការបារម្ភអំពីការរំលោភបំពានសិទ្ធិមនុស្ស និងការធ្លាក់ចុះនៃដំណើរប្រជាធិបតេយ្យនៅកម្ពុជាអាចប៉ះពាល់សុខសន្តិភាពនិងការវិវត្តិដែលកម្ពុជា និងភាគីដទៃទៀតដែលបានជួយប្រជាពលរដ្ឋខ្មែរយើងអភិវឌ្ឍស្រុកក្នុងរយៈពេលជាងម៉្ភៃឆ្នាំកន្លងមកនេះ។

លោកញឹម ឆន្នី៖ នៅប៉ុន្មានឆ្នាំខាងមុខទៀត តើប្រជាធិបតេយ្យនឹងមានការរីកចម្រើនហើយប្រជាពលរដ្ឋមានសិទ្ធិគ្រប់គ្រាន់ក្នុងនិយាយស្តីដែរ ឬទេ?

លោកប៉ា ចាន់រឿន៖ ស្ថានភាពប្រជាធិបតេយ្យនៅស្រុកយើង វាអាស្រ័យលើស្ថានភាពនយោបាយៗប្រេះឆាគ្នា ជំលោះគ្នាវាកាន់តែរីករាលដាលទៅដល់កម្រិតមួយកាន់តែធ្ងន់ធ្ងរ ស្ថានភាពប្រជាធិបតេយ្យយើងក៏ដាំក្បាលធ្លាក់ចុះគួរឱ្យព្រួយបារម្ភ នៅពេលដែលប្រជាធិបតេយ្យធ្លាក់ចុះ ការរឹតត្បិតផ្នែកសិទ្ធិសេរីភាព ជាពិសេសការសារព័ត៌មានក៏នឹងត្រូវរងសំពាធ ការគាបសង្កតទាំងអ្នកសារព័ត៌មាន ទាំងប្រជាពលរដ្ឋទូទៅនោះ ពិបាក ឬក៏អាចប្រឈមមុខការធ្វើទុកបុកម្នេញតាំងពីការសំឡុតគំរាម និងចាប់ដាក់គុក៕

Voxpop: ទស្សនៈយុវជនលើការអនុវត្តលទ្ធិប្រជាធិបតេយ្យនៅកម្ពុជា

ញឹក ឆន្នី (Nhoek Chhornny) — Wed, 24 Nov 2021 10:13:21 +0000

ប្រទេសកម្ពុជាបានប្រកាន់ភ្ជាប់នៅលទ្ធិប្រជាធិបតេយ្យដែលមានន័យថា ផ្តល់សិទ្ធិដល់ប្រជាពលរដ្ឋជាម្ចាស់ប្រទេស និងមានសិទ្ធិគ្រប់គ្រាន់នៅក្នុងការបញ្ចេញមតិជាសាធារណៈដោយមិនមានការភ័យខ្លាច ។

Newsroom Cambodia បានសម្ភាសន៍យុវជនយុវនារីដែលរស់នៅរាជធានីភ្នំពេញពាក់ព័ន្ធនឹងការយល់ឃើញរបស់ពួកគាត់ទៅលើលទ្ធិប្រជាធិបតេយ្យនៅកម្ពុជាក្នុងពេលបច្ចុប្បន្ន។

លោក មៀន វិបុលវីរៈ អាយុ២៤ឆ្នាំ ជានិស្សិតផ្នែកទំនាក់ទំនងអន្តរជាតិឆ្នាំទី៤ រស់នៅក្រុងតាខ្មៅ ខេត្តកណ្តាលយល់ថា៖ «លទ្ធិប្រជាធិបតេយ្យនៅកម្ពុជាមិនទាន់ពេញលេញនៅឡើយទេ។ មានហេតុផលមួយចំនួនដែលខ្ញុំយល់ថាអ៊ីចឹង ព្រោះបើយើងនិយាយអំពីលទ្ធិប្រជាធិបតេយ្យយើងអាចក្រឡេកទៅមើលចំណុចស្នូលចំនួន៣គឺ ទី១ទាក់ទងជាមួយនឹងរាជរដ្ឋាភិបាល យើងឃើញមានការបញ្ចេញមតិជាច្រើនជាសាធារណៈតែវានៅមានកម្រិតនៅឡើយ។ ទី២គឺពាក់ព័ន្ធជាមួយនឹងការបោះឆ្នោត បើយើងនិយាយអំពីការបោះឆ្នោតគឺត្រូវមានសេរីភាព និងតម្លាភាព ប៉ុន្តែបើយើងនិយាយសុក្រឹត្យភាពគឺនៅមានកម្រិតនៅឡើយខ្ញុំអាចនិយាយថាហាសិបហាសិប។ ទី៣បើយើងក្រឡេកទៅមើលអំពីសិទ្ធិមនុស្សនៅក្នុងបរិបទនៃប្រទេសកម្ពុជាគឺនៅមានកម្រិតនៅឡើយ បើយើងប្រៀបធៀបទៅនឹងប្រទេសដទៃទៀត ដូចជាសហរដ្ឋអាមេរិក ហើយយើងប្រៀបធៀបបរិបទនៃសិទ្ធិមនុស្សគឺខុសគ្នាឆ្ងាយមែនទែន»។

និស្សិតរូបនេះបន្ថែមថា៖ «ឧទាហរណ៍ដូចជាការប្រកួតប្រជែងការបោះឆ្នោតហើយការបោះឆ្នោតគួរតែមានគណបក្សចូលរួមច្រើន ហើយមានលក្ខណៈប្រកួតប្រជែង ហើយបើយើងក្រលេកទៅមើលកម្ពុជាមកទល់ពេលនេះ គឺមានតែពីរទេដែលមានភាពលេចធ្លោរ គឺមានCPP និងCNRP ហើយយើងឃើញថាមកទាល់ពេលនេះគណបក្សត្រូវបានរំលាយ ហើយមានការចាប់ខ្លួន និងភៀសខ្លួនទៅក្រៅប្រទេស ដូច្នេះប្រជាធិបតេយ្យគឺមិនមានទៀតទេ តម្លាភាពនៅក្នុងការបោះឆ្នោតគឺមានការគាបសង្កត់» ។

កញ្ញា សឿង លក្ខិណា អាយុ២២ឆ្នាំ ជានិស្សិតផ្នែកច្បាប់ឆ្នាំទី៣ បានលើកឡើងថា៖ «សម្រាប់ខ្ញុំពាក្យថាប្រជាធិបតេយ្យគឺប្រជាជនមានសិទ្ធិបញ្ចេញបតិយោបល់ប៉ុន្តែជាក់ស្តែងដូចប្រជាជននៅក្នុងខេត្តកំពង់ធំពួកគាត់អត់អាចមានសិទ្ធិទៅនិយាយអ្វីបានទេ គាត់អាចនិយាយប្រាប់ក្រុមគ្រួសារគាត់បានប៉ុន្តែគាត់អត់អាចយករឿងហ្នឹងទៅនិយាយជាមួយនរណាម្នាក់ដែលទាក់ទងនិងដីធ្លីរបស់គាត់នោះទេ នៅស្រុកបារាយណ៍ខេត្តកំពង់ធំពួកគាត់មានបញ្ហារឿងដីធ្លីតាំងពីឆ្នាំ២០០៧មកម្លេះ រហូតមកដល់ឥឡូវរឿងដីធ្លីហ្នឹងមិនទាន់បានដោះស្រាយទេ ដូច្នេះពាក្យពាក់ព័ន្ធជាមួយលទ្ធិប្រជាធិបតេយ្យប្រជាជនគាត់អត់ទាន់មានសិទ្ធិគ្រប់គ្រាន់ក្នុងការបញ្ចេញមតិយោបល់ទេ»។

ចំណែកព្រះតេជគុណ លិន យូរ៉ា ព្រះជន្ម២៣វស្សា ជានិស្សិតឆ្នាំទី២ ផ្នែកទំនាក់ទំនងអន្តរជាតិបានមានថេរដីកាថា ប្រជាធិបតេយ្យនៅកម្ពុជាមានភាពប្រសើរឡើងច្រើនក្នុងរយៈពេលជាង៣០ឆ្នាំចុងក្រោយ បុន្តែព្រះអង្គថា សម្រាប់ប្រជាធិបតេយ្យនៅកម្ពុជា មិនទាន់ពេញលេញនៅឡើយ៖ «ការបញ្ចេញមតិជាសាធារណរបស់ប្រជាពលរដ្ឋគឺនៅមានកម្រិត មានន័យថាប្រទេសកម្ពុជាដែលជាប្រទេសកាន់របបប្រជាធិបតេយ្យនោះមិនទាន់មានសិទ្ធិពេញលេញនៅឡើយក្នុងការបញ្ចេញមតិរបស់ខ្លួននៅក្នុងការស្ថាបនាប្រទេសជាតិ មានន័យថាបើទោះបីជាប្រទេសកាន់លទ្ធិប្រជាធិបតេយ្យ ប៉ុន្តែសិទ្ធិសេរីភាពនៅក្នុងការបញ្ចេញមតិរបស់ប្រជាពលរដ្ឋយើងឃើញថានៅពេលប្រជាពលរដ្ឋបញ្ចេញមតិច្រើនទាក់ទងទៅនិងរដ្ឋាភិបាលផ្សេងៗ ហើយភាគច្រើនមានការគំរាមគំហែង ហើយវាជាផលវិបាករបស់ប្រជាពលរដ្ឋនៅក្នុងការបញ្ចេញមតិ ជារួមមកវិញនៅពេលយើងកាន់លទ្ធិប្រជាធិបតេយ្យឱ្យល្អប្រជាពលរដ្ឋមានការរីកចម្រើនជាងមុនទាំងការយល់ដឹងទាំងជីវភាព ប៉ុន្តែនៅមានចំណុចខ្វះខាតបន្តិចបន្តួចបើយើងប្រៀបធៀបជាមួយប្រទេសកាន់លទ្ធិប្រជាធិបតេយ្យដទៃទៀត» ។

កញ្ញា យ៉ាត ម៉ាឡៃ អាយុ២៣ឆ្នាំ ជានិស្សិតផ្នែកទំនាក់ទំនងអន្តរជាតិឆ្នាំទី២ រស់នៅក្រុងតាខ្មៅ ខេត្តកណ្តាលយល់ឃើញថា មានសកម្មផាពមួយចំនួនដែលកើតឡើងនៅកម្ពុជា ដែលកញ្ញាឃើញថាជាការបង្ហាញថាលទ្ធិប្រជាធិបតេយ្យនៅកម្ពុជាមិនទាន់ពេញលេញនៅឡើយ។

កញ្ញាបានបន្ថែមថា៖ «មានបញ្ហាមួយចំនួនដូចជាយុទ្ធនាការប្រឆាំងនឹងអំពើពុករលួយ ការតស៊ូការបញ្ចេញមតិដែលទាក់ទងទៅនឹងបញ្ហាការការពារបរិស្ថានដែលទាក់ទងទៅនឹងសកម្មជនរបស់យើងត្រូវបានហាមឃាត់ ទាក់ទងនឹងបញ្ហានេះដូចគ្នាក៏មានការចាប់ខ្លួនចំពោះសកម្មជនណាដែលហ៊ានលេចមុខ និងលើកឡើងទៅលើអំពើអវិជ្ជមាននៅក្នុងសង្គមដូចជាការបូមខ្សាច់ ការកាប់បំផ្លាញព្រៃឈើ ក៏ដូចជាការលុបបឹងនៅតាមទីក្រុងដូចគ្នា មួយវិញទៀតពាក់ព័ន្ធជាមួយនឹងការបោះឆ្នោតនៅប្រទេសលទ្ធិប្រជាធិបតេយ្យ គឺប្រកាន់ការសម្រេចចិត្តរបស់ប្រជាពលរដ្ឋជាធំនៅក្នុងការជ្រើសរើសអ្នកដឹកនាំ ប៉ុន្តែនៅក្នុងប្រទេសកម្ពុជាយើងៗក៏ធ្លាប់ឃើញមានបញ្ហាបាតុកម្មជាមួយគណបក្សប្រឆាំងព្រោះការបោះឆ្នោតមិនមានលក្ខណៈវិជ្ជមាននោះទេ»។

កញ្ញាបន្ថែមថា៖ «ចំពោះបញ្ហាទាំងអស់នេះការប្រកាន់លទ្ធិប្រជាធិបតេយ្យនៅក្នុងសង្គមមួយគឹវាល្អនៅក្នុងចំណោមលទ្ធិផ្សេងទៀតដូចជាលទ្ធិកុម្មុនីស្ត ដូច្នេះក្នុងនាមជាប្រទេសលទ្ធិប្រជាធិបតេយ្យគួរតែមានអព្យាក្រឹតប្រកាន់យកនៅគោលការណ៍គំនិតសំខាន់ៗឱ្យដើរទាន់នៅប្រទេសផ្សេងៗទៀតដែលលុបបំបាត់អំពើពុករលុយ និងការកេងប្រវ័ញ្ចឬកេងចំណេញលើសិទ្ធិរបស់ប្រជាពលរដ្ឋក្នុងសិទ្ធិបញ្ចេញមតិនៅក្នុងសង្គមប្រជាធិបតេយ្យដូចគ្នា»។

លោក ឈួន ពន្លក អាយុ២២ ឆ្នាំជានិស្សិតឆ្នាំ៤ ផ្នែកនីតិសាស្ត្របានយល់ឃើញថា៖ «ប្រទេសកម្ពុជាបានទទួលឥទ្ធិពលប្រជាធិបតេយ្យដែលបានហូរចូលមកនៅក្នុងប្រទេសយើងហើយប្រទេសយើងកំពុងតែអភិវឌ្ឍដែរពាក្យថាអភិវឌ្ឍគឺអភិវឌ្ឍគ្រប់វិស័យ ទាំងការឈានទៅមុខដំណើរការរបស់ប្រជាធិបតេយ្យៗនៅក្នុងប្រទេសកម្ពុជាគឹនៅមានកម្រិតហើយកំពុងអភិវឌ្ឍដើម្បីឱ្យទៅជាប្រជាធិបតេយ្យពេញលេញឥឡូវនេះប្រជាធិបតេយ្យនៅក្នុងប្រទេសកម្ពុជាមិនទាន់មានភាពពេញលេញទេរយៈកាលកន្លងមកនេះ»។

លោកបានបន្ថែមថា៖ «នៅក្នុងអន្តរកាលយើងឃើញថាសកម្មជនមួយចំនួនដែលថ្មីៗនេះទើបតែដោះលែងទេដូចជាលោករ៉ុង ឈុន ឬក្រុមចលនាមាតាធម្មជាតិ និងក្រុមយុវជនខ្មែរថាវរៈពួកគាត់ទាំងអស់នេះបានធ្វើសកម្មភាពមួយចំនួនដែលធ្វើឱ្យមានការចាប់ខ្លួនហើយសកម្មភាពរបស់រាជរដ្ឋាភិបាលបានរំលោភទៅលើសិទ្ធិសេរីភាពរបស់ប្រជាពលរដ្ឋត្រង់ចំណុចនេះហើយទើបខ្ញុំកត់សម្គាល់ថាលទ្ធិប្រជាធិបតេយ្យមិនទាន់មានសិទ្ធិពេញលេញទេ»៕

ក្រសួងសុខាភិបាល អំពាវនាវឲ្យពលរដ្ឋបញ្ឈប់ការប្រើប្រាស់ផលិតផលគ្រឿងសម្អាងមិនមានបញ្ជិការ

ញឹក ឆន្នី (Nhoek Chhornny) — Thu, 04 Nov 2021 09:00:17 +0000

ក្រសួងសុខាភិបាល អំពាវនាវឲ្យប្រជាពលរដ្ឋបញ្ឈប់ការប្រើប្រាស់ផលិតផលគ្រឿងសម្អាងដែលមិនមានការអនុញ្ញាតពីក្រសួង ជៀសវាងផលប៉ពាល់សុខភាព និងអាយុជីវិត។

បើតាមសេចក្តីជូនព័ត៌មានរបស់ក្រសួងសុខភិបាល ចេញនៅថ្ងៃទី១ ខែវិច្ឆិកា ឆ្នាំ២០២១ និងត្រូវបានបង្ហោះលើទំព័រហ្វេសប៊ុករបស់ក្រសួងសុខាភិបាលកាលពីថ្ងៃទី៣ ខែវិច្ឆិកា បញ្ជាក់ថា ក្រសួងបានពិនិត្យឃើញលើបណ្តាញសង្គមគណនីហ្វេសប៊ុក ឈ្មោះ វ៉ូ-ជី ខសមេធីក ឯ.ក កំពុងផ្សព្វផ្សាយលក់ផលិតផលគ្រឿងសម្អាងឈ្មោះ WOG WHITENING FAC IAL FOAM គ្មានលេខប្រវេទន៍ពីក្រសួងសុខាភិបាល គិតត្រឹមថ្ងៃទី២១ ខែតុលា ឆ្នាំ២០២១។

ក្រសួងបន្ថែមថា ដោយអនុលោមតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ តម្រូវឱ្យរាល់ការចរាចរ ឱសថ ឬគ្រឿងសម្អាងគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខបញ្ជិកា ឬប្រវេទន៍ពីក្រសួង សុខាភិបាល ហើយរាល់ការផ្សព្វផ្សា យផលិតផលទាំងនេះតម្រូវឲ្យមានការអនុញ្ញាតពីក្រសួងសុខាភិបាល ។

ក្នុងសេចក្តីជូនព័ត៌មាននោះបានបញ្ជាក់ថា៖ «ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាព ឬឈានដល់បាត់បង់ អាយុជីវិតរបស់អ្នកប្រើប្រាស់ទៀតនោះ ក្រសួងសុខាភិបាលសូមជូនព័ត៌មានដល់បងប្អូនប្រជាពលរដ្ឋទាំងអស់ ត្រូវបញ្ឈប់ការប្រើប្រាស់ផលិតផលគ្រឿងសម្អាងដែលគ្មានលេខប្រវេទន៍ពីក្រសួងសុខាភិបាល ព្រោះផលិតផលទាំងនេះពុំអាចធានាបាននូវគុណភាព និងសុវត្ថិភាពបានឡើយ»។

នៅថ្ងៃជាមួយគ្នានេះ ក្រសួងសុខាភិបាលក៏បានចេញសេចក្តីជូនព័ត៌មានមួយទៀត ស្តីពីការហាមឃាត់គណនីហ្វេសប៊ុកឈ្មោះ Lee Yuri Beauty & Health ដែលបានផ្សព្វផ្សាយលក់ផលិតផលបំប៉នសុខភាពគ្មានលេខបញ្ជិកាពីក្រសួងសុខាភិបាលផងដែរ ។

សេចក្តីជូនព័ត៌មានបានបញ្ជាក់ថា៖ «គណនីហ្វេសប៊ុកមាន ឈ្មោះ Lee Yuri Beauty & Health កំពុងផ្សព្វផ្សាយលក់ផលិតផលបំប៉នសុខភាពឈ្មោះ ១. Lee Yuri Collagen , ២, Multi-Vita min For Men & Women , ៣. Lee Yuri DETOX គ្មានលេខបកា និងគ្មានច្បាប់អនុញ្ញាតឲ្យផ្សព្វផ្សាយពីក្រសួងសុខាភិបាលឡើយ»។

ក្រសួងសុខាភិបាលបន្ថែមថា ក្រសួងនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកឈ្មោះ វ៉ូ-ជីខសមធីក ឯ.ក និង Lee Yuri Beauty & Health ដែលនាំចូល ចែកចាយ និងផ្សព្វផ្សាយលក់ផលិតផលខាងលើ នេះទៅតាមច្បាប់ស្តីពីច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន៕

កុមារដែលត្រូវចូលរៀនអាចប្រើ បណ្ណចាក់វ៉ាក់សាំងថតចម្លងដើម្បីការពារការបាត់បង់

ញឹក ឆន្នី (Nhoek Chhornny) — Thu, 04 Nov 2021 03:57:14 +0000

លោកនាយករដ្ឋមន្រ្តី ហ៊ុន សែន កាលពីថ្ងៃទី២ ខែវិច្ឆិកា បានប្រកាសថា កុមារដែលត្រូវចូលរៀននៅសាលា អាចប្រើប្រាស់បណ្ណចាក់វ៉ាក់សាំងដែលថតចម្លង ដើម្បីការពារការបាត់បង់។

ក្នុងវីដេអូដែលលោកនាយករដ្ឋមន្រ្តីបានបង្ហោះលើទំព័រហ្វេសប៊ុក នៅថ្ងៃទី៣ខែវិច្ឆិកា ឆ្នាំ២០២១ លោកលើកឡើងថា ប្រសិនបើអនុញ្ញាតឱ្យប្រើបណ្ណចាក់វ៉ាក់សាំងដើមសម្រាប់ពាក់ទៅចូលរៀន នោះអាចនឹងខូចខាត ឬបាត់បង់ ។

លោកបញ្ជាក់ថា៖ «បាត់ប័ណ្ណ ឬខូចបណ្ណ ហើយបាត់បង់នូវសុពលភាព ឬក៏ខ្វះការទទួលស្គាល់នៅពេលដែលមានការបាត់បណ្ណ ហើយការប្តូរបណ្ណគឺមិនមែនជាការងាយស្រួលនោះទេ ដែលត្រូវយកបណ្ណថ្មី ដូច្នេះយកល្អគឺយើងប្រើប្រាស់ដដែល គឺថតចម្លងហើយរក្សាបណ្ណនៅផ្ទះ»។

លោកនាយករដ្ឋមន្រ្តីបានបន្ថែមដោយស្នើឲ្យរដ្ឋមន្ត្រីក្រសួងអប់រំ និងអភិបាលខេត្ត រាជធានី ពិនិត្យ និងដោះស្រាយបញ្ហានេះ ដោយអាចថតចម្លងបណ្ណចាក់វ៉ាក់សាំងជាសខ្មៅ ឬជាពណ៌។

លោកបន្ថែមថា៖ «សូមឱ្យលោកគ្រូអ្នកគ្រូសាលានីមួយៗ ជួយរៀបចំថត គ្រួ សារនីមួយៗដែលមានលទ្ធភាពថតក៏សូមថត ហើយក្នុងករណីដែលគ្រួសារពុំមានលទ្ធភាពថតទេ អាចឱ្យសាលាជួយថតសម្រាប់ឱ្យសិស្សប្រើប្រាស់នៅកាតចាក់វ៉ាក់សាំងនេះ»។

ក្នុងវីអេដូដដែលនោះ លោកនាយករដ្ឋមន្រ្តីក៏បានប្រាប់ទៅក្រសួងសុខាភិបាល គណៈកម្មការចំពោះការចាក់វ៉ាក់សាំង និងក្រសួងការពារជាតិដែលជាអ្នកធ្វើការលើការចាក់វ៉ាក់សាំង ត្រូវសរសេរឈ្មោះរបស់ប្រជាជនឲ្យបានត្រឹមត្រូវ ជាពិសេសផ្នែកភាសាអង់គ្លេស សម្រាប់ងាយស្រួលក្នុងការធ្វើដំណើរទៅក្រៅប្រទេស។

លោកបញ្ជាក់ថា៖ «ប្រជាពលរដ្ឋរបស់យើង មន្រ្តីរបស់យើងមានការចាំបាច់ធ្វើដំណើរទៅក្រៅប្រទេស ក្នុងករណីដែលមានការដាក់ឈ្មោះជាភាសាអង់គ្លេសមិនបានត្រឹមត្រូវស្របទៅតាមឈ្មោះដែលមាននៅក្នុងលិខិត ឆ្លងដែន គឺមិនអាចធ្វើដំណើរចេញទៅក្រៅប្រទេសបានទេ ដូច្នេះសូមយកចិត្តទុកដាក់ នៅក្នុងការដាក់ឈ្មោះឱ្យបានត្រឹមត្រូវទាំងជាភាសាខ្មែរ និងទាំងជាភាសាអង់គ្លេស»។

កាលពីថ្ងៃទី១ ខែវិច្ឆិកា ឆ្នាំ២០២១ លោកនាយករដ្ឋមន្រ្តី ហ៊ុន សែន បានប្រកាសបើកប្រទេសឡើងវិញគ្រប់វិស័យ ជាមួយនឹងការរៀនរស់នៅជាមួយជំងឺកូវីដ១៩តាមគន្លងថ្មី ប៉ុន្តែពិចារណាលើការបើកហានខារ៉ាអូខេ៕

ក្រសួងអប់រំសម្រេចបើកសាលារៀនដោយអនុវត្តតាមគន្លងថ្មី ខណៈជំងឺកូវីដ១៩បន្តរីករាលដាល

ញឹក ឆន្នី (Nhoek Chhornny) — Wed, 03 Nov 2021 02:50:32 +0000

ក្រសួងអប់រំ យុវជន និងកីឡា ប្រកាសបើកសាលារៀនគ្រប់កម្រិតទូទាំងប្រទេស ទាំងរដ្ឋ និងឯកជន ដោយតម្រូវឲ្យរៀនតាមគន្លងថ្មី ចាប់ពីថ្ងៃទី១ ខែវិច្ឆិកា នេះតទៅ ខណៈជំងឺកូវីដ១៩នៅបន្តរីករាលដាលច្រើននៅកម្ពុជា។

ក្រសួងអប់រំបានចេញសេចក្តីណែនាំចេញកាលពីថ្ងៃទី២១ ខែតុលា ឆ្នាំ២០២១កន្លង ស្តីពីការបង្រៀន និងរៀនតាមបណ្តុំសម្រាប់គ្រឹះស្ថានសិក្សាចំណេះទូទៅគ្រប់កម្រិត គ្រឹះស្ថានឧត្តមសិក្សា ទាំងសាធារណៈ និងឯកជន និងគ្រឹះស្ថានបណ្ដុះបណ្ដាលគ្រូ ក្នុងស្ថានភាពនៃការឆ្លងជំងឺកូវីដ១៩។ សេចក្ដីណែនាំនោះបញ្ជាក់ថា ដើម្បីឈានទៅដំណើរការអប់រំតាមគន្លងប្រក្រតីភាពថ្មីក្នុងបរិបទកូវីដ១៩ចាប់ពីថ្ងៃទី០១ ខែវិច្ឆិកា ឆ្នាំ២០២១ ក្រសួងនឹងពង្រីកវិសាលភាពនៃការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាសាធារណៈ និងឯកជនគ្រប់កម្រិត ក្នុងភូមិសាស្រ្តទូទាំងរាជធានីខេត្តទាំងអស់។

សេចក្តីណែនាំនោះបញ្ជាក់ថា៖ «ការបើកដំណើរការឡើងវិញ គ្រឹះស្ថានសិក្សាចំណេះទូទៅគ្រប់កម្រិតគ្រឹះស្ថានឧត្តមសិក្សាទាំងសាធារណៈ និងឯកជន និងគ្រឹះស្ថានបណ្តុះបណ្តាលគ្រូនៅតាមក្រុង ស្រុក ខណ្ឌ ដែលជំងឺកូវីដ១៩ អាចគ្រប់គ្រងបាន ដោយកំណត់រូបភាពនៃការបង្រៀន និងរៀនតាមបណ្តុំ ១៥ ទៅ២០នាក់ និងផ្លាស់វេន និងបន្តអនុវត្តនូវគម្លាតសុវត្ថិភាព និងវិធានាការសុខាភិបាលចាំបាច់នានា»។

សេចក្តីណែនាំបន្ថែមថា ក្នុងករណីមានការឆ្លងក្នុងគ្រឹះស្ថានសិក្សានោះ ត្រូវសម្រេចផ្អាកតែក្រុមសិស្ស ឬថ្នាក់រៀននោះប៉ុណ្ណោះ និងត្រូវចាត់ចែងយកអ្នកវិជ្ជមាន និងអ្នកដែលមានការពាក់ព័ន្ធទៅព្យាបាល និងធ្វើចត្តាឡីស័ក១៤ថ្ងៃ។

ឆ្លើយតបទៅនឹងសេចក្តីជូនដំណឹងរបស់ក្រសួងអប់រំ នាយិកាសាលាបឋមសិក្សាទន្លាប់ ក្នុងស្រុកសំរោង ខេត្តតាកែវ អ្នកស្រី ចេង ណាវី បានឲ្យដឹងថា ការបើកសាលារៀនឡើងវិញគឺជារឿងល្អ អាចធ្វើឲ្យសិស្សមានពេលរៀនវគ្គបំប៉នបានច្រើនជាមួយលោកគ្រូអ្នកគ្រូ មុននឹងប្រឡងឡើងថ្នាក់។ ទទ្ទឹមនឹងនេះអ្នកស្រីក៏បានសម្ដែងក្តីបារម្ភលើបញ្ហាប្រឈមមួយចំនួនចំ ពោះសិស្សានុសិស្សដែលខ្វះនូវការប្រុងប្រយ័ត្ន និងគ្មានអនាម័យនៅពេលចេញលេងដែលអា ចធ្វើឲ្យមានការឆ្លងជំងឺកូដវីដ១៩ពីសិស្សម្នាក់ទៅសិស្សម្នាក់ទៀត។

អ្នកស្រីលើកឡើងថា៖ «សិស្សានុសិស្សពុំសូវមានការប្រុងប្រយ័ត្នក្នុងការពាក់ម៉ាសឲ្យបានជាប់លាប់នោះទេ។ ជាពិសេសពេលឲ្យគាត់ចេញលេង គឺពិបាកគ្រប់គ្រងណាស់។ បើមានកូវីដកើតឡើងលើនរណាម្នាក់នោះនឹងពិបាក អាចឆ្លងទៅច្រើនគ្នាហើយ»។

ស្រដៀងគ្នានេះដែរ នាយកសាលាសន្ធរម៉ុកក្នុងរាជធានីភ្នំពេញ លោក ឡៅ ម៉ូលីណា ក៏បានឲ្យដឹងដែរថា នៅសាលារបស់លោក គឺមានអនុវត្តវិធានការសុវត្ថិភាពចំពោះសិស្ស និងគ្រូដោយមានរៀបចំសន្តិសុខត្រៀមចាំដើម្បីវាស់កម្ដៅ និងបាញ់អាល់កុល មុនពេលចូលសាលា។ លោកបន្តថា ឪពុកម្ដាយភាគច្រើនបានបញ្ជូនកូនមករៀនដោយគិតថា រៀននៅសាលាចេះជាងរៀនតាមអនឡាញ ហើយតំបន់ខ្លះមិនសូវមានអ៊ីនធឺណិត ឬមិនមានអ៊ីនធឺណិតគ្រប់គ្រាន់ ដូចនេះការរៀននៅក្នុងថ្នាក់គឺមានប្រសិទ្ធភាពជាងតាមអនឡាញ ពោលគឺសិស្សឆ្ងល់ភ្លាមអាចសួរ និងទទួលការណែនាំពីគ្រូបានភា្លមផងដែរ។

លោកបញ្ជាក់យ៉ាងដូច្នេះថា៖ «សម្រាប់អាណាព្យាបាលសិស្សគឺមានការបញ្ជូនកូនឲ្យមករៀន ស្ទើតែទាំងអស់ ហើយសាលាមានរៀបចំឆ្លាស់វេន ២០នាក់រៀន និង២០នាក់សម្រាក។

សម្រាប់សិស្សដែលមិនទាន់ចាក់វ៉ាក់សាំងក៏ (ខាងសាលា) ឲ្យចូលរៀនដែរ តែត្រូវឲ្យពាក់ម៉ាស់ហើយមានការប្រុងប្រយ័ត្នជាងគេ ព្រោះពួកគេប្រឈមខ្លាំង»។

ចំណែកនាយកសាលាបាក់ទូក លោក តូច កន្តាល់ បានឲ្យដឹងដែរថា ក្នុងសាលារៀនរបស់លោកនៅតែរៀបចំវិធានការសុវត្ថិភាព ដោយអនុវត្តជាប្រចាំនូវគោលការណ៍៣កុំ និង៣ការពារដដែល។

លោកបន្ថែមថា សាលារបស់លោកបាន បែងចែកសិស្សក្នុងមួយថ្នាក់៣០នាក់ ឲ្យទៅជា១៥នាក់ រៀនក្នុងថ្នាក់ និង១៥នាក់រៀនតាមអនឡាញទៅតាមសេចក្ដីណែនាំរបស់ក្រសួងអប់រំ។

លោកបញ្ជាក់ថា៖ «សម្រាប់ឪពុកម្ដាយមានការអនុញ្ញាតឲ្យកូនមករៀនច្រើន ព្រោះទោះមិនមកក៏កូវីដនៅតែប៉ុណ្ណឹង មកក៏កូវីដនៅតែប៉ុណ្ណឹង សំខាន់ពួកគាត់ចេះរស់នៅជាមួយកូវីដ ហើយកូនៗរបស់ពួកគាត់បានចាក់ថ្នាំរួចហើយ»៕

កម្ពុជាចាក់វ៉ាក់សាំងការពារកូវីដ១៩បានជាង១០លាននាក់ ស្មើនឹងជាង១០០% នៃប្រជាពលរដ្ឋក្នុងគម្រោង

ញឹក ឆន្នី (Nhoek Chhornny) — Mon, 01 Nov 2021 06:43:08 +0000

អត្រាចាក់វ៉ាក់សាំងកូវីដ-១៩នៅកម្ពុជាគិតត្រឹមថ្ងៃទី៣១ ខែតុលា ឆ្នាំ២០២១ មាន ១០០ ,០០១% ធៀបជាមួយចំនួនប្រជាជនគោលដៅ ១០លាននាក់ និងលើកុមារ-យុវវ័យអាយុពី ១២ឆ្នាំ ទៅក្រោម១៨ឆ្នាំ មាន៩៧,៨៩%។ នេះបើតាមការផ្សាយរបស់ក្រសួងសុខាភិបាល។

បើតាមសារដែលបង្ហោះលើទំព័រហ្វេសប៊ុករបស់ក្រសួងសុខាភិបាល នៅថ្ងៃទី១ ខែវិច្ឆិកា ឆ្នាំ២០២១នេះបញ្ជាក់ថា៖ «បើធៀបជាមួយចំនួនប្រជាជនគោលដៅ ១,៨២៧,៣៤៨ នាក់ និងលើកុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០១,២២% ធៀបជាមួយនឹងប្រជាជនគោលដៅ ១,៨៩៧,៣៨២នាក់»។

នៅថ្ងៃជាមួយគ្នានេះ លោកនាយករដ្ឋមន្ត្រី ហ៊ុន សែន បានបង្ហោះសារលើទំព័រហ្វេសប៊ុករបស់លោកដែរថា បើទោះបីជានៅកម្ពុជាមានការចាក់វ៉ាក់សាំងបានជាង១០លាននាក់ ឬស្មើនឹងជាង១០០%នៃចំនួនគ្រោងដំបូងក៏ដោយ ក៏នៅមានប្រជាជនរាប់ម៉ឺននាក់ទៀតដែលមិនទាន់បានចាក់វ៉ាក់សាំង ហើយដែលត្រូវបន្តចាក់ជូនឱ្យបានគ្រប់ៗគ្នា។

ក្នុងសារដដែលនោះបញ្ជាក់ថា៖ «ក្រៅពីប្រជាជនដែលមានអាយុ១៨ឡើងចំនួនជាង១០លាននាក់បានចាក់វ៉ាក់សាំង យើងក៏បានចាក់វ៉ាក់សាំងជូនកុមារ និងយុវ វ័យអាយុ១២ ទៅ១៨ឆ្នាំ បានចំនួន១.៧៨៨.៨០២នាក់ ដែលស្មើនឹង៩៧.៨៩% និង កុមារអាយុពី៦ ដល់១២ បានចំនួន១.៩២០.៥៩៩នាក់ ស្មើនឹង១០១.២២%។ គិតសរុបយើងបានចាក់វ៉ាក់សាំងជូនជនរួមជាតិយើងចំនួន១៣.៧០៩.៤៨៧នាក់ ស្មើនឹង៨៥.៦៨%នៃប្រជាជនសរុប១៦លាននាក់»។

លោកនាយករដ្ឋមន្រ្តីបន្ថែមថា៖ «ខ្ញុំសូមអំពាវនាវបងប្អូនជនរួមជាតិបន្តអនុវត្តវិធានការការពារតាមការណែនាំរបស់ក្រសួងសុខាភិបាល ពិសេសវិធានការ៣ការពារ និង៣កុំ ព្រោះថាវ៉ាក់សាំងតែមួយមុខ បើទោះបីចាក់បានប៉ុន្មានដូសរហូតមុជវ៉ាក់សាំង ក៏មិនអាចការពារបានដែរ ប្រសិនជាបងប្អូនធ្វេសប្រហែស បោះបង់ចោលវិធីការពារខ្លួនតាមរយៈវិធានការ៣ការពារ និង៣កុំ»។

បើតាមលោកនាយករដ្ឋមន្រ្តី រហូតមកដល់ពេលនេះ កម្ពុជាមានវ៉ាក់សាំងក្នុងដៃប្រមាណជិត១០លានដូស និងមានមនុស្សបានចាក់វ៉ាក់សាំងដូសទី៣ ប្រមាណជិត២លាននាក់រួចមកហើយ។ ក្នុងវ៉ាក់សាំងនឹងមកដល់ជាបន្តបន្ទាប់ទៀត៕

ក្រសួងសុខាភិបាលលើកលែងការធ្វើចត្តាឡីស័កសម្រាប់អ្នកជំងឺកូវីដ១៩ដែលបានព្យាបាលជាសះស្បើយ

ញឹក ឆន្នី (Nhoek Chhornny) — Wed, 27 Oct 2021 04:28:07 +0000

រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ប្រកាសថា អ្នកជំងឺកូវីដ១៩ ដែលបានព្យាបាលជាសះស្បើយ ទាំងនៅមន្ទីរពេទ្យ និងនៅតាមផ្ទះ ត្រូវបានលើកលែងការធ្វើចត្តាឡីស័ក។

បើតាមលិខិតដែលរដ្ឋមន្រ្តីក្រសួងសុខាភិបាល លោក ម៉ម ប៊ុនហេង ជូនទៅប្រធានគណៈកម្មការប្រយុទ្ធនឹងជំងឺកូវីដ១៩ថ្នាក់រាជ ធានី ខេត្ត ចេញនៅថ្ងៃទី២៦ ខែតុលា ឆ្នាំ២០២១បញ្ជាក់ថា៖ «អ្នកជំងឺកូវីដ១៩ ដែឡបានបញ្ចប់ការព្យាបាលនៅតាមមន្ទីរពេទ្យ ឬមណ្ឌលព្យាបាលជំងឺកូវីដ១៩ ពុំតម្រូវឲ្យធ្វើចត្តាឡីស័ក១៤ថ្ងៃទៀតទេ»។

លិខិតដដែលបន្ថែមថា អ្នកជំងឺកូវីដ១៩ដែលសម្រាកថែទាំ និងព្យាបាលនៅតាមផ្ទះ ត្រូវបានអនុញ្ញាតឲ្យបញ្ចប់ការព្យាបាលតាមលក្ខខណ្ឌដូចជា អ្នកជំងឺដែលពុំបានចាក់វ៉ាក់សាំងកូវីដ១៩ដូសមូលដ្ឋានបានពេញលេញ អនុញ្ញាតឲ្យបញ្ចប់ការព្យាបាលនៅថ្ងៃទី១៤ ប្រសិនបើពុំមានរោគសញ្ញាជំងឺកូវីដ១៩រយៈពេលបីថ្ងៃចុងក្រោយ និងពុំតម្រូវឲ្យធ្វើចត្តាឡីស័ករយៈពេល១៤ថ្ងៃទៀតទេ។ ក្នុងករណីអ្នកជំងឺកូវីដ១៩បានចាក់វ៉ាក់សាំងកូវីដដូសមូលដ្ឋានបានពេញលេញ ហើយចាប់ពីថ្ងៃទី៦ទៅ ពុំមានរោគសញ្ញាជំងឺកូវីដ១៩ រយៈពេលបីថ្ងៃ ត្រូវធ្វើតេស្តរហ័សអង់ទីហ្សែនកូវីដ១៩ដោយខ្លួនឯង នៅថ្ងៃទី៩។

លិខិតដដែលក៏បានបន្ថែមថា អ្នកជំងឺកូវីដ១៩ដែលត្រូវបានអនុញ្ញាតឲ្យបញ្ចប់ការព្យាបាល ទោះបីត្រូវបានលើកលែងការធ្វើចត្តាឡីស័ក ប៉ុន្តែត្រូវតែបន្តអនុវត្តវិធានការសុខាភិបាលជាធរមាន ៣កុំ និង៣ការពារ ឲ្យបានខ្ជាប់ខ្ជួន៕

ខេត្តសៀមរាបបញ្ចប់ការដាក់បម្រាមគោចរទប់ស្កាត់ជម្ងឺកូវីដ១៩ជាបណ្តោះអាសន្ន

ញឹក ឆន្នី (Nhoek Chhornny) — Thu, 21 Oct 2021 03:31:29 +0000

រដ្ឋបាលខេត្តសៀមរាបនៅថ្ងៃទី១៨ ខែតុលា ឆ្នាំ២០២១នេះ បានសម្រេចដាក់ចេញវិធានការបញ្ចប់ការដាក់បម្រាមគោចរជាបណ្តោះអាសន្ន បន្ទាប់ពីបានបិទខ្ទប់ខេត្តសៀមរាបអស់មួយរយៈដោយសារមានការឆ្លងរាលដាលជំងឺកូវីដ១៩ច្រើន។

ក្នុងសេចក្តីសម្រេចស្តីពីការបញ្ចប់ការដាក់ចេញនូវវិធានការរដ្ឋបាលជាបណ្តោះអាសន្នសម្រាប់បម្រាមគោចរដើម្បីទប់ស្កាត់ការឆ្លងរាលដាលនៃជំងឺកូវីដ១៩ក្នុងភូមិសាស្រ្តខេត្តសៀមរាប ចេញថ្ងៃទី១៨ ខែតុលា ឆ្នាំ២០២១ បញ្ជាក់ថា៖ «សេចក្តីសម្រេចលេខ១៥១/២១ ស.ស.រ ចុះថ្ងៃទី០៨ ខែកញ្ញា ឆ្នាំ២០២១ របស់រដ្ឋបាលខេត្តសៀមរាប ការដាក់ចេញនូវវិធានការរដ្ឋបាលជាបណ្តោះអាសន្នសម្រាប់បម្រាមគោចរដើម្បីទប់ស្កាត់ការឆ្លងរាលដាលនៃជម្ងឺកូវីដ១៩ក្នុងភូមិសាស្ត្រខេត្តសៀមរាប និងសេចក្តីសម្រេចលេខ១៨០/២១ ស.ស.រ ចុះថ្ងៃទី០៤ ខែតុលា ឆ្នាំ២០២១ របស់រដ្ឋបាលខេត្តសៀមរាបស្តីពីការដាក់នូវវិធានការរដ្ឋបាលជាបណ្តោះអាសន្ន សម្រាប់បម្រាមគោចរដើម្បីទប់ស្កាត់ ការឆ្លងរាលដាលនៃជម្ងឺកូវីដ១៩ ក្នុងភូមិសាស្ត្រខេត្តសៀមរាប ត្រូវទុកជានិរាករណ៍»។

បើតាមសេចក្តីប្រកាសព័ត៌មានរបស់ក្រសួងសុខាភិបាល ស្ថានភាពជម្ងឺកូវីដ១៩ ក្នុងប្រទេសកម្ពុជាសម្រាប់ថ្ងៃទី១៩ ខែតុលា ឆ្នាំ២០២១ មានករណីឆ្លងសរុបចំនួន១១,៧២០១ ករណីឆ្លងថ្មីចំនួន១៦៦ ករណីជាសះស្បើយចំនួន១១,១៦៩០ ករណីស្លាប់ មានចំនួន២,៦៩៣ និងករណីនាំចូលពីក្រៅប្រទេសចំនួន១,៩៤៣០៕