ប៉ិច ស្រីពេជ្រ (Pech Sreypich) – Newsroom Cambodia

បទយកការណ៍៖ ពលរដ្ឋមួយចំនួនត្រៀមខ្លួនទៅបោះឆ្នោត ខណៈមួយចំនួនរងចាំមើលឯករាជ្យភាពរបស់គ.ជ.ប

ប៉ិច ស្រីពេជ្រ (Pech Sreypich) — Mon, 28 Nov 2022 03:38:54 +0000

កម្ពុជានឹងរៀបចំការបោះឆ្នោតថ្នាក់ជាតិនៅថ្ងៃទី២៣ ខែកក្កដា ឆ្នាំ២០២៣ខាងមុខ ខណៈគណបក្សកាន់អំណាចតែមួយគឺគណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែនកំពុងដឹកនាំប្រទេសដោយឯកបក្ស ក្រោយគណបក្សប្រឆាំងដ៏ធំ គឺគណបក្សសង្គ្រោះជាតិត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧។

បុរសសម្បុរស្រអែម សក់រួញ មានពុកមាត់វែង លោក សេង ឌីម៉ង់ ជាពលរដ្ឋរស់នៅរាជធានីភ្នំពេញ បានឱ្យដឹងថា លោកចង់ឱ្យការបោះឆ្នោតនាពេលខាងមុខនេះប្រព្រឹត្តទៅដោយសេរី ត្រឹមត្រូវ និងមានការចូលរួមពីគ្រប់ភាគីទាំងពលរដ្ឋ និងគណបក្សនយោបាយធំតូចទាំងអស់ ដើម្បីប្រកួតប្រជែងឱ្យបានស្មើគ្នាចំពោះមុខច្បាប់។

លោក សេង ឌីម៉ង់

លោកបញ្ជាក់ថា៖ «ជាពិសេសហ្នឹងគឺសេរីភាពសម្ដែងមតិរបស់ប្រជាពលរដ្ឋទូទៅកុំឱ្យមានការរឹតត្បិត កុំឱ្យមានការចាប់ចង មានការធ្វើទុក្ខបុកម្នេញ ដែលស្របទៅនឹងសេចក្ដីថ្លែងការណ៍ជាសកលស្ដីពីសន្ធិមនុស្សដែលនៅមាត្រា១៩ហ្នឹង គឺពលរដ្ឋមានសិទ្ធិបញ្ចេញមតិតាមអ្វីដែលខ្លួនចង់បាន ហើយឱ្យមានយុត្តិធម៌ហ្នឹងសូមឱ្យមានការចូលរួមពីអង្គការជាតិនិងអន្តរជាតិនានា»។

បុរសវ័យ៤៤ឆ្នាំរូបនេះបន្តថា ចង់ឱ្យការបោះឆ្នោតប្រកបដោយនយោបាយអព្យាក្រឹត្យមិនប្រកាន់បក្សពួក ពលរដ្ឋត្រូវមានសិទ្ធិស្មើគ្នា និងមិនមានការរើសអើងឡើយ។

លោក សេង ឌីម៉ង់ បន្ថែមទៀតថា អាណត្តិមុន និងអាណត្តិនេះមិនខុសគ្នាពេកទេ ដោយសារ គ.ជ.ប នៅដដែល ប៉ុន្តែលោកថា លោកចាំមើលថា តើ គ.ជ.ប មានការផ្លាស់ប្ដូររបៀបធ្វើការរបស់ខុសពីអាណត្តិមុនដែរ ឬអត់។

ដោយនិយាយមួយៗ លោក សេង ឌីម៉ង់ មានប្រសាសន៍ថា៖ «ប្រសិនបើ គ.ជ.ប មិនឯករាជ្យទេ តើការដំណើរការបោះឆ្នោតហ្នឹងប្រព្រឹត្តទៅដោយសេរី និងត្រឹមត្រូវដែរឬទេ? ទី១។ ទី២ធ្វើម៉េចយើងដឹងថា គ.ជ.ប ឯករាជ្យ មិនឯករាជ្យ»។

លោកបន្តថា លោកបានត្រៀមខ្លួនចំពោះការបោះឆ្នោតថ្នាក់ជាតិឆ្នាំ២០២៣ខាងមុខរួចរាល់ហើយ ប៉ុន្តែលោកមិនទាន់ប្រាកដថានឹងទៅ ឬក៏អត់នោះទេ។

ក្រោយពីគណបក្សសង្រ្គោះជាតិដែលជាគណបក្សប្រឆាំងដ៏ធំបំផុតនៅកម្ពុជាត្រូវបានរំលាយ កាលពីថ្ងៃទី១៦ ខែវិច្ឆិកា ឆ្នាំ២០១៧ គេឃើញស្ថានភាពនយោបាយមានការប្រែប្រួលយ៉ាងខ្លាំង រួមទាំងគណៈកម្មាធិការជាតិរៀបចំការបោះឆ្នោត (គ.ជ.ប) ក៏មានមន្រ្តីដែលមកពីគណបក្សប្រឆាំងលាឈប់អស់ផងដែរ។ ការណ៍នេះធ្វើឱ្យមានការលើកឡើងពីសំណាក់ប្រជាពលរដ្ឋអំពីអព្យាក្រឹត្យភាពរបស់ គ.ជ.ប និងពីលទ្ធផលនៃការបោះឆ្នោតថ្នាក់ជាតិនៅឆ្នាំ២០២៣ខាងមុខ។

អ្នកស្រី ស៊ុម សុភាព

អ្នកស្រី ស៊ុម សុភាព អាយុ៣៨ឆ្នាំ ជាអាជីវករលក់ដូរ បានលើកឡើងស្រដៀងគ្នាដែរថា អ្នកស្រីគិតថាការបោះឆ្នោតថ្នាក់ជាតិខាងមុខ មិនទាន់សេរី និងត្រឹមត្រូវនោះទេ ប្រសិនបើ គ.ជ.ប មិនឯករាជ្យ។ អ្នកស្រីថា អ្នកស្រីនឹងទៅបោះឆ្នោត ប្រសិនបើ គ.ជ.ប មានភាពឯករាជ្យ និងមានគ្រប់គណបក្សចូលរួម។

អ្នកស្រីមានប្រសាសន៍បន្តថា៖ «បើសិនជា គ.ជ.ប ឯករាជ្យខ្ញុំនឹងទៅ តែបើអត់ឯករាជ្យទេខ្ញុំគឺអត់ទៅទេ អត់បានទៅបោះទេ ប៉ុន្តែនឹងចូលរួមធ្វើជាពលរដ្ឋឯកត្តនាម»។

អាជីវករម្នាក់ទៀត អ្នកស្រី សឿង គន្ធា អាយុ ៤៣ឆ្នាំ បានឱ្យដឹងថា អ្នកស្រីគិតថាការបោះឆ្នោតថ្នាក់ជាតិឆ្នាំ២០២៣ វាអាចល្អប្រសើរខ្លះ ប៉ុន្តែមិនល្អប្រសើរទាំងអស់នោះទេ។ អ្នកស្រីថា អំឡុងការបោះឆ្នោតឃុំសង្កាត់ កាលពីឆ្នាំ២០២២ អ្នកស្រីបានទៅបោះឆ្នោត និងទទួលបានមេដឹកនាំដែលខ្លួនពេញចិត្ត។

អ្នកស្រី សឿង គន្ធា

ទោះយ៉ាងណាអ្នកស្រីថា អ្នកស្រីចង់ឱ្យ គ.ជ.ប បង្កើនភាពឯករាជ្យរបស់ខ្លួនសម្រាប់ការបោះឆ្នោតនៅឆ្នាំ២០២៣ខាងមុខ។

អ្នកស្រីនិយាយថា៖ «សម្រាប់ គ.ជ.ប នៅបច្ចុប្បន្នហ្នឹងខ្ញុំគិតឃើញថា គ.ជ.ប ហាក់បីដូចមិនទាន់បានយល់ដឹងអំពីតួនាទីកាតព្វកិច្ចខ្លួនឯងទេ គ.ជ.ប តើគាត់មានបានរៀននៅច្បាប់បោះឆ្នោតហើយនៅ? ចឹងហាស សួរមើលតើ គ.ជ.ប ឯករាជ្យ ឬទេ?»។

អ្នកស្រី សឿង គន្ធា បន្ថែមថា អ្នកស្រីចង់ឱ្យយុវជនទាំងអស់ចូលរួមបោះឆ្នោតដើម្បីរើសមេដឹកនាំដែលពួកគេពេញចិត្ត។

អ្នកស្រីបាននិយាយថា៖ «ខ្ញុំសង្ឃឹមថាយុវជនទាំងអស់និងព្យាយាមយល់ដឹងស្គាល់អំពីតួនាទីនិងកាតព្វកិច្ចរបស់ខ្លួនបោះឆ្នោតជ្រើសរើសមេដឹកនាំ ដែលខ្លួនពេញចិត្តស្របទៅតាមច្បាប់»។

កញ្ញា គឹម ធារៈ

កំពុងអង្គុយឱ្យចំណីព្រាបនៅមាត់ទន្លេរាជធានីភ្នំពេញ កញ្ញា គឹម ធារៈ អាយុ ៣៥ឆ្នាំ ជាបុគ្គលិកក្រុមហ៊ុនមួយ បានឱ្យដឹងថា ក្នុងនាមជាពលរដ្ឋខ្មែរ ជាពលរដ្ឋល្អម្នាក់ ត្រូវមានកាតព្វកិច្ចទៅបោះឆ្នោត។ កញ្ញាបន្តដោយជឿជាក់ថា ការបោះឆ្នោតអាណត្តិក្រោយនេះ នឹងមានភាពរលូនទៅមុខ។

កញ្ញា គឹម ធារៈ បន្ថែមថា៖ «សម្រាប់ខ្ញុំ ខ្ញុំសប្បាយចិត្តដោយសារយើងធម្មតា យើងជាពលរដ្ឋខ្មែរ យើងត្រូវបំពេញកាតព្វកិច្ចជាពលរដ្ឋល្អ យើងត្រូវទៅបោះឆ្នោតជ្រើសរើសតំណាងរាស្រ្តដែលយើងពេញចិត្ត»។

លោក វណ្ណៈ ហុងលី

លោក វណ្ណៈ ហុងលី អាយុ ១៧ឆ្នាំ ជាសិស្ស កំពុងអង្គុយក្រោមម្លប់ឈើនៅមុខវាំង បានរៀបរាប់ថា លោកទើបតែគ្រប់អាយុ និងបានទៅចុះឈ្មោះបោះឆ្នោតរួចរាល់ហើយ ដោយលោកនឹងទៅបោះឆ្នោតនៅឆ្នាំ២០២៣ ដើម្បីបំពេញកាតព្វកិច្ចជាពលរដ្ឋល្អ។ លោកបន្តថា ការបោះឆ្នោតនាពេលខាងមុខ និងប្រព្រឹត្តទៅយ៉ាងរលូនមិនមានឧបសគ្គឡើយ ដោយសារប្រទេសមានសន្តិភាពពេញលេញ។

លោក វណ្ណៈ ហុងលី និយាយថា៖ «ខ្ញុំចង់ឱ្យប្រជាពលរដ្ឋដែលមានអាយុលើសពី ១៨ឆ្នាំ ចូលរួមបោះឆ្នោតឱ្យបានទាំងអស់គ្នា ដើម្បីបំពេញកាតព្វកិច្ចរបស់ខ្លួនដើម្បីក្លាយជាពលរដ្ឋល្អ និងដើម្បីសុខសន្តិភាពរបស់ប្រទេសនាពេលអនាគត»។

ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីខែមិថុនា ឆ្នាំ២០១៧ គណបក្សសង្គ្រោះជាតិទទូលបានសំឡេងគាំទ្រជាង៤០ភាគរយ និងមានក្រុមប្រឹក្សាឃុំសង្កាត់ជាង៥ពាន់។

ប៉ុន្តែក្រោយពេលដែលគណបក្សនេះត្រូវបានតុលាការកំពូលរំលាយ ដោយចោទពីបទក្បត់ជាតិ កាលពីខែវិច្ឆិកា ឆ្នាំ២០១៧ គណបក្សកាន់អំណាចបានប្រមូលយកអាសនៈរបស់គណបក្សសង្គ្រោះជាតិចែកឱ្យគណបក្សផ្សេងទៀត ហើយគណបក្សប្រជាជនកម្ពុជាទទួលបានច្រើនជាងគេ និងក្តោបក្តាប់អាសនៈទាំង១២៥អាសនៈនៅក្នុងរដ្ឋសភាដោយឯកបក្សរហូតដល់បច្ចុប្បន្ន។

ក្រោយពីការរំលាយគណបក្សសង្គ្រោះជាតិសមាជិកបីរូបរបស់ គ.ជ.ប ដែលជាកូតាមកពីបក្សជំទាស់ បានលាលែងពីតំណែងរបស់ខ្លួន។ អ្នកទាំងបីរូបមាន លោក គួយ ប៊ុនរឿន អនុប្រធានគ.ជ.ប លោក រ៉ុង ឈុន និង លោកស្រី តែ ម៉ានីរ៉ុងជាសមាជិក។

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ប្រាប់ Newsroom Cambodia ថា គ.ជ.ប កំពុងតែរៀបចំពិនិត្យបញ្ជីនិងចុះឈ្មោះបោះឆ្នោតជូនដល់ប្រជាពលរដ្ឋដែលមានអាយុ ១៨ឆ្នាំឡើងទៅ និងការងារបន្ត គឺ គ.ជ.ប កំពុងដាក់ជូននៅគណបក្សនយោបាយ អង្គការមិនមែនរដ្ឋាភិបាលនិងភាគីពាក់ព័ន្ធឱ្យចូលរួមជាមតិយោបល់ លើបទបញ្ជា និងនីតិវិធីនៃការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ខាងមុខនេះ។

លោក ហង្ស ពុទ្ធា បានបន្តថា គ.ជ.ប បានត្រៀមលក្ខណៈរួចរាល់នូវសម្ភារៈបច្ចេកទេស សេវានិងចំនួនការិយាល័យបោះឆ្នោតនៅតាមឃុំសង្កាត់ទូទាំងប្រទេស ហើយការជ្រើសរើសមន្រ្តីបំរើការបោះឆ្នោតនៅតាមការិយាល័យ ក៏ត្រៀមលក្ខណៈក្នុងការជ្រើសរើសផងដែរ។

ឆ្លើយតបនឹងមន្ទិលពាក់ព័ន្ធនឹងឯករាជ្យភាពរបស់ គ.ជ.ប លោក ហង្ស ពុទ្ធា ថ្លែងថា៖ «ឯករាជ្យភាពរបស់ គ.ជ.ប គឺត្រូវផ្អែកទៅលើអី ហើយអ្នកដែលមានយោបល់នោះនិយាយហ្នឹង ផ្អែកទៅលើអី ចឹងសូមជម្រាបថា ឯករាជ្យភាពរបស់ គ.ជ.ប គឺផ្អែកទៅលើច្បាប់ជាធរមាន។ គ.ជ.ប កើតចេញពីសភាដែលបានអនុម័តសម្រេចជាក្រុម គ.ជ.ប នេះឡើង។ អ៊ីចឹងចំពោះមតិទាំងឡាយណាដែលយល់យ៉ាងណានោះ គ្រាន់តែជាមតិដោយឡែក ហើយក៏មិនមែនជាមតិភាគច្រើននៅក្នុងសង្គមប្រជាធិបតេយ្យក្នុងប្រទេសកម្ពុជានោះទេ»។

លោកថ្លែងបន្តថា៖ «ឯករាជ្យរបស់ គ.ជ.ប កំពុងតែស្ថិតនៅជាគោលការណ៍ជាបទបញ្ជា និងនីតិវិធីសម្រាប់ការគ្រប់គ្រោងនិងបំរើសេវាកម្មបោះឆ្នោតនៅទូទាំងប្រទេស អ៊ីចឹង គ.ជ.ប អត់ធ្វើយ៉ាងម៉េចទៀតទេ គ.ជ.ប កំពុងតែអនុវត្តប្រកបដោយឯករាជ្យភាពរបស់ខ្លួន»។

ក្រោយការរំលាយគណបក្សសង្គ្រោះជាតិដែលមានអ្នកគាំទ្រជិត៥០ភាគរយ គេឃើញមជ្ឈដ្ឋានជាតិ និងអន្តរជាតិជាច្រើនបានរិះគន់កម្ពុជាថាកំពុងធ្វើឱ្យប្រជាធិបតេយ្យនៅកម្ពុជាដើរថយក្រោយ។ ប្រទេសប្រជាធិបតេយ្យធំៗជាច្រើនមិនបានដាក់អ្នកសង្កេតការណ៍របស់ខ្លួនដើម្បីឃ្លាំមើលការបោះឆ្នោតថ្នាក់ជាតិកាលពីឆ្នាំ២០១៨ និងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីឆ្នាំ២០២១កន្លងទៅ និងឈប់ផ្តល់ជំនួយដល់ គ.ជ.ប។

លោក សំ គន្ធាមី នាយកប្រតិបត្តិអង្គការនិចហ្វិចលើកឡើងថា បទបញ្ជានីតិវិធីពាក់ព័ន្ធនឹងការបោះឆ្នោតមិនទាន់បានកែប្រែ ឬធ្វើវិសោធនកម្មនៅឡើយ ហើយសំណើគណបក្សនយោបាយដែលបានស្នើសុំកែសម្រួល ក៏មិនទាន់បានបង្ហាញលទ្ធផលដែរ។ លោកបន្តថា បើសិនជានៅមានបញ្ហាទៅលើបទបញ្ជានីតិវិធីចាស់ច្រើនដដែល វាអាចមានភាពមិនប្រក្រតីច្រើននៅពេលបោះឆ្នោត។

លោកបន្ថែមថា៖ «អាហ្នឹងគណបក្សនយោបាយគេមើលសម្លឹងទៅឃើញចឹង គឺឃើញការងាររបស់ គ.ជ.ប អត់ឯករាជ្យដោយសារការបោះឆ្នោតឆ្នាំ២០២២ កន្លងមក គឺមានបញ្ហាច្រើនរឿង គ.ជ.ប ហើយគណបក្សហ្នឹង ភាគីពាក់ព័ន្ធហ្នឹង មានដាក់បណ្ដឹងអីទៅគណបក្សវិញ»។

លោក សំ គន្ធាមី បន្ថែមថា រឿងសេរីភាពយុត្តិធម៌នេះមិនអាចវាយតម្លៃមុនបាននោះទេ ដោយអាស្រ័យលើសិទ្ធិពលរដ្ឋ និងសិទ្ធិនយោបាយ។ លោកថា ប្រសិនបើមានការរិតត្បិតសិទ្ធិសេរីភាពអ្នកនយោបាយ សិទ្ធិនយោបាយ និងសិទ្ធិពលរដ្ឋ នោះនឹងធ្វើឱ្យប៉ះពាល់ដល់ដំណើរការបោះឆ្នោតដោយសេរី ត្រឹមត្រូវ និងយុត្តិធម៌។

ងាកមកលោក សេង ឌីម៉ង់ ដែលជាពលរដ្ឋកំពុងរស់នៅរាជធានីភ្នំពេញវិញ លោកបានបញ្ជាក់ថា៖ «ខ្ញុំនឹងទៅបោះឆ្នោត បើស្ថាប័ន គ.ជ.ប តុលាការ អាជ្ញាធរ មានឯករាជ្យ និងអព្យាក្រឹត្យភាព»៕

អ្នកសារព័ត៌មានឯករាជ្យរងការគំរាមកំហែងពីអាជ្ញាធរ

ប៉ិច ស្រីពេជ្រ (Pech Sreypich) — Sun, 30 Oct 2022 14:07:43 +0000

អ្នករាយការណ៍ព័ត៌មានឯករាជ្យនៅកម្ពុជាប្រឈមការរឹតត្បិតជាបន្តបន្ទាប់ និងពុំទាន់អាចប្រើប្រាស់សេរីភាពខ្លួនបានពេញលេញនៅឡើយទេ ដោយរងការរំខាន និងគំរាមកំហែងពីសំណាក់ក្រុមមន្ត្រីអាជ្ញាធរ នៅខណៈពេលចុះយកព័ត៌មាន ជាពិសេសគឺព័ត៌មានដែលរសើបខ្លាំង។ នេះបើតាមអ្នកជំនាញផ្នែកប្រព័ន្ធផ្សព្វផ្សាយ។

អ្នកស្រី ឆន សុគន្ធា នាយិកានាយកដ្ឋានអភិវឌ្ឍន៍ប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យលើកឡើងថា៖ «យើងឃើញថាពីមួយឆ្នាំទៅមួយឆ្នាំ ចំនួនអ្នកដែលគាត់ហ៊ានរាយការណ៍ពីព័ត៌មានរសើប បញ្ហានយោបាយ បញ្ហាដីធ្លី បញ្ហាធនធានធម្មជាតិកាន់តែមានចំនួនតិចទៅៗ»។

អ្នកស្រីបានលើកឧទាហរណ៍អំពីករណីចាប់ឃាត់ខ្លួនអ្នកសារព័ត៌មានVODចំនួន៥នាក់ ដែលបានចុះទៅយកព័ត៌មាននៅតំបន់ឈូសឆាយភ្នំតាម៉ៅ។

អ្នកស្រីថា៖ «យើងក្រឡេកមើលថា មូលហេតុអ្វីបានជាចំនួនអ្នកសារព័ត៌មានដែលគាត់ហ៊ានរាយការណ៍ព័ត៌មានរសើបមានចំនួនកាន់តែតិចទៅៗ […] អ្នកសារព័ត៌មានឯករាជ្យយើងច្រើនឃើញថាមានបញ្ហាការធ្វើទុក្ខបុកម្នេញ ការចាប់ ការចោទប្រកាន់ជាដើម។ ខ្ញុំលើកឧទាហរណ៍ជាក់ស្តែង ថ្មីៗនេះ បុគ្គលិកខាងVOD នៅពេលពួកគាត់ទៅយកព័ត៌មានពាក់ព័ន្ធនឹងរឿងភ្នំតាម៉ៅ ពួកគាត់ត្រូវបានឃាត់ខ្លួន១ថ្ងៃពេញ»។

ជុំវិញបញ្ហានេះ អ្នកស្រីឆៃ ច័ន្ទរិទ្ធីសូលីដា រដ្ឋលេខាធិការក្រសួងព័ត៌មាន បានលើកឡើងអំពីករណីនេះថាអ្នកសារព័ត៌មានគួរតែត្រឡប់ទៅអានច្បាប់អ្នកសារព័ត៌មាន និងក្រមសីលធម៌វិជ្ជាជីវៈរបស់ខ្លួនឡើងវិញ។

អ្នកស្រីថា៖ «អ្នកសារព័ត៌មាន និងនិពន្ធនាយកទាំងអស់ឱ្យតែបានគោរពទៅតាមវិជ្ជាជីវៈនេះ ខ្ញុំជឿជាក់ណាស់ថាមិនមានរឿងអីកើតឡើង ឬពិរុទ្ធដែលបងប្អូនបានលើកឡើងនោះទេ»។

អ្នកស្រីបន្ថែមថា៖ «បើយើងអនុវត្តន៍តែក្រោមវិជ្ជាជីវៈរបស់យើង គ្មានទោសទេ»។

ក្រុមអ្នកសារព័ត៌មានបានលើកអំពីបញ្ហាព្រឈមពីសំណាក់អាជ្ញាធរ បានធ្វើការឃាត់ខ្លួន សម្លុតឱ្យលុបរូបថត និងវីឌីអូដែលថតបាន និងដកហូតយកកាមេរ៉ារបស់ពួកគេដែលចុះទៅយកព័ត៌មាន បើទោះបីជាខ្លួនបំពេញទៅតាមក្រមសីលធម៌វិជ្ជាជីវៈអ្នកសារព័ត៌មានក្តី។

កញ្ញា ប៉ា សុខេង អ្នកសារព័ត៌មានវិទ្យុសំឡេងប្រជាធិបតេយ្យ (VOD) លើកឡើងថា៖ «ពេលខ្ញុំចុះទៅយកព័ត៌មានកូដកម្មនៅណាហ្គាវើល៍ ខ្ញុំបានបំពេញទៅតាមអ្វីដែលខ្ញុំបានរៀនសូត្រមក ខ្ញុំបានរក្សាគម្លាតត្រឹមត្រូវ […] ខ្ញុំថតរូប និងវីឌីអូ ហើយមានអាជ្ញាធរមួយក្រុមធំ គឺពួកគាត់មកប្រាប់ខ្ញុំថា ត្រូវតែលុបវីឌីអូ និងរូបដែលថតបាន»។

គួរបញ្ជាក់ផងដែរថា ការជជែកដេញដោលខាងលើនេះធ្វើឡើងក្នុងសិក្ខាសាលាមួយនៃសន្និសីទថ្នាក់ជាតិស្ដីពីការអភិវឌ្ឍប្រព័ន្ធផ្សព្វផ្សាយ នៅសណ្ឋាគារសុខាភ្នំពេញ កាលពីព្រឹកថ្ងៃទី២៧ ខែតុលា ឆ្នាំ២០២២៕

លោកកើត សារ៉ាយនិយាយអំពីការតស៊ូក្នុងជីវិតនៅក្មេង ភាពជាសកម្មជន និងបញ្ហាសង្គម

ប៉ិច ស្រីពេជ្រ (Pech Sreypich) — Tue, 25 Oct 2022 15:09:27 +0000

លោកកើត សារ៉ាយ បានចាប់កំណើតក្នុងគ្រួសារកសិករមានជីវភាពលំបាកមួយ នៅភូមិសំរោង ឃុំសំរោង ស្រុកសូត្រនិគម ខេត្តសៀមរាប។ ជាកូនប្រុសពៅក្នុងចំណោមបងប្អូនប្រុសស្រី៦នាក់ មានម្តាយប្រកបរបរជាអ្នកធ្វើស្រែ ហើយឪពុកប្រកបរបរជាអាចារ្យរៀបចំពិធីសពផង និងជាគ្រូថ្នាំបុរាណខ្មែរផង។

លោកបានរំឭកពីស្ថានភាពគ្រួសារខ្លួនថា៖ «បើនិយាយពីជីវភាពនោះគឺលំបាកណាស់ ផ្ទះខ្ទមតូច ជាពិសេសខ្យល់ម្តងៗ ឬភ្លៀងម្តងៗ បងភ័យបំផុតគឺខ្លាចតែរលំ ហើយជញ្ជាំងធ្វើពីធាងដូង»។

អំពីប្រវត្តិសិក្សាវិញ ឪពុកម្តាយលោកសារ៉ាយ បានបញ្ជូនលោកចូលរៀននៅសាលាបឋមសិក្សាសំរោង។ រៀនដល់ត្រឹមថ្នាក់ទី៤ ដោយស្រឡាញ់ជាប់ចិត្តនឹងម្លប់ព្រះពុទ្ធសាសនា ទើបសុំម្តាយទៅនៅបម្រើព្រះសង្ឃ ហើយក្រោយមកក៏បានបួសរៀនបន្ត។

និយាយបណ្តើរ សើចបណ្តើរ នៅពេលរំឭកដល់រឿងពីកុមារភាព លោកថា៖ «ថ្ងៃមួយមានគេមកបញ្ចាំងកុននៅវត្ត ហើយបងទៅមើលកុននៅវត្ត ហើយក៏ដេកលក់។ ពេលភ្ញាក់ឡើងបាត់មនុស្សអស់រលីង ដល់អ៊ីចឹងទៅអត់ហ៊ានមកផ្ទះ ខ្លាចខ្មោចក៏ទៅដេកមុខកុដិលោកក្រញ៉ង់ៗជាមួយឆ្កែ។ ក្រោយពីភ្ញាក់ឡើង លោកក៏ហៅ ឱ្យទៅហូបបាយអីទៅ ហើយក៏មានអារម្មណ៍ថាចង់នៅវត្ត»។

លោកកើត សារ៉ាយ

ក្រោយមកទៀតភិក្ខុសារ៉ាយ បានបន្តមកគង់នៅវត្តខ្នាចរមាស ស្រុកបវេល ខេត្តបាត់ដំបង និងបានបញ្ចប់ថ្នាក់បាក់ឌុបបាលីសំស្ក្រឹត ហើយបន្តការសិក្សានៅមហាវិទ្យាល័យនីតិសាស្ត្រ។

អំឡុងខែកញ្ញា ឆ្នាំ២០២០ ក្រោយបន្តការសិក្សានៅមហាវិទ្យាល័យបានត្រឹមឆ្នាំទី២ ភិក្ខុ កើត សារ៉ាយ ក៏ត្រូវបានគេចាប់ផ្សឹកទាំងពាក់កណ្តាលអធ្រាត្រ ហើយបញ្ជូនទៅឃុំខ្លួននៅពន្ធនាគារព្រៃសរ អស់រយៈពេល១ឆ្នាំ ២ខែ ដោយស្ថិតក្រោមបទចោទញុះញង់បង្កឱ្យមានភាពវឹកវរដល់សន្តិសុខសង្គម។

ភិក្ខុកើត សារ៉ាយ បានប្តូរពីគ្រងស្បង់ចីវរ មកជាស្លៀកសម្លៀកបំពាក់អ្នកទោសវិញ បន្ទាប់ពីត្រូវមន្ត្រីសង្ឃចាប់បង្ខំឱ្យផ្សឹកទាំងគ្មានកំហុស ហើយបញ្ជូនទៅឃុំភ្លាមៗ ក្រោយព្រះសង្ឃអង្គនេះបានធ្វើបាតុកម្មសម្តែងមតិស្នើឱ្យអាជ្ញាធរដោះលែងលោករ៉ុង ឈុន ឱ្យមានសេរីភាព។

លោកចាត់ទុកថា ការឃុំខ្លួនលោកគឺជារឿងដ៏គួរឱ្យភ័យខ្លាច និងតក់ស្លុតជាខ្លាំង ដោយមិននឹកស្មានថា ជាជនជាតិខ្មែរតែមួយ តែគ្មានមេត្តាធម៌ចំពោះឈាមជ័ររបស់ខ្លួន។

លោកជ្រួញចិញ្ចើម ហើយថ្លែងអំពីអារម្មណ៍ពិត គ្រាដែលត្រូវគេចាប់ខ្លួននាពេលនោះថា៖ «យើងមិននឹកស្មានថាបងប្អូនខ្មែរតែមួយ មានគ្នាតែ ១៥ ទៅ ១៦លាននាក់ បើធៀបជាមួយប្រទេសជិតខាងថៃ មានឡើង៨០លាននាក់ ហើយយើងនៅតែស្អប់គ្នាមិនស្រឡាញ់គ្នាកើត គ្រាន់តែធ្វើកិច្ចការងារសង្គម ហើយត្រូវចាប់យកទៅដាក់គុក»។

លោកបរិយាយពីតថភាពពេលនោះថា៖ «សារជាតិដែលគេចាប់ដាក់គុកគឺគួរឱ្យខ្លាច ដូចជាគុំយើង ឃោរឃៅម៉ង។ កាលពីបងនៅជាលោកគេចាប់បងផ្សឹកទាំងយប់។ បន្ទាប់ពីផ្សឹកពីអ្នកបួសហើយ គេព័ទ្ធដៃដាក់ខ្នោះ។ ពេលផ្សឹកនោះ លោក[សម្តេចសង្ឃ]និយាយពាក្យសម្តីមកគឺឃោរឃៅ»។

លោកនិយាយត្រាប់តាមថា៖ «ពេលមកដល់គឺ លោកថា មិនបាច់និយាយជាមួយពួកអាអស់នឹងទេ ឥលូវហែងសឹកខ្លួនឯង ឬឱ្យគេចាប់ផ្សឹក»។

ដកដង្ហើមធំ និងភ្ជាប់មកជាមួយទឹកមុខក្រៀមក្រំបង្ហាញពីអារម្មណ៍ឈឺចាប់ លោកប្រាប់ Newsroom អំពីជីវិតក្នុងពន្ធនាគារថា មានរឿងរ៉ាវគ្រប់រសជាតិរួមទាំងសោកសៅ និងរីករាយផងដែរ។ លោកបញ្ជាក់ថា៖ «រឿងដែលសោកសៅនោះគឺ បាយគឺអន់ជាងបាយជ្រូកទៅទៀត សម្លស្អុយ បើសម្លស្ពៃវិញគឺស្លទាំងឬស ទាំងដង្កូវ ប៉ុន្តែនៅក្នុងគុកបើមានលុយវិញគឺដូចស្តេច មានលុយចង់គុយទាវក៏បាន បាយឆាក៏បាន និយាយរួមបើសិនជាចង់មានឡេលាបក៏បាន ក្រែងតែអត់លុយ»។

លោកញញឹមហើយនិយាយថា ការជាប់ពន្ធនាគាររបស់លោកដោយគ្មានកំហុសនេះ គឺគ្មានអ្វីចម្លែកទេ ខណៈពេលដែលខ្លួនកំពុងតែរស់នៅក្នុងសង្គមមួយដែលពុំអាចផ្តល់នូវយុត្តិធម៌ពេញលេញ ដល់ពលរដ្ឋបាននៅឡើយ។

លោកសើចបែបចំអកហើយថា៖ «ការពិតទៅវាជាដំណើរមួយ ឬរឿងនិទានមួយដែលគេគូសវាសស្រេចហើយថា តួចិត្តល្អត្រូវដើរទៅ ត្រូវជួបអី វាមិនមែនជារឿងប្រឌិតទេ ដូច្នេះទាំងអស់គ្នាមិនអាចបដិសេធវាទេ។ ដូចគ្នាដែរ នៅពេលដែលអ្នកធ្វើកិច្ចការងារមួយនៅក្នុងសង្គមមួយដែលអត់មានច្បាប់ទំលាប់ ដែលមានមេដឹកនាំមិនត្រឹមត្រូវ មានមន្ត្រីពុករលួយ លោភលន់ ជិះជាន់ ធ្វើបាប។ អាហ្នឹងគឺជាសត្យានុម័ត នៅពេលដែលអ្នកឯងធ្វើ គឺជៀសមិនរួចទេ ពីការធ្វើបាប ចាប់ចង ចាប់ដាក់គុក ឬស្លាប់»។

លោកបន្តថា៖ «ប៉ុន្តែគិតត្រលប់មកវិញ សត្វតិរិច្ឆានរស់បែបសភាវគតិ មនុស្សរស់បែបការអភិវឌ្ឍខ្លួនទៅរកអ្វីថ្មីៗ។ សត្វតិរិច្ឆានកាន់តែវាយកាន់តែខ្លាច មនុស្សអត់ទេ មនុស្សកាន់តែវាយកាន់តែរកមធ្យោបាយដើម្បីតបត»។

រីឯមូលហេតុដែលរុញច្រានលោកមកក្លាយជាសកម្មជនសង្គម គឺដោយសារកាលពីកុមារភាព លោកស្អប់ខ្ពើមអំពើហិង្សាក្នុងគ្រួសារ បន្ថែមពីនេះលោកសេពគប់ជាមួយមិត្តភក្តិដែលធ្វើកិច្ចការងារតស៊ូតទល់នឹងភាពអយុត្តិធម៌នៅក្នុងសង្គមផង និងជាពិសេសគឺទទួលបានការបណ្តុះពីសំណាក់គ្រូដែលមានស្មារតីជាតិនិយម។

លោកបញ្ជាក់ថា៖ «យើងរៀនហ្នឹង មិនមែនដើម្បីរកការងារធ្វើ ហើយមានលុយចាយសុខស្រួលនោះទេ គោលការណ៍របស់អ្នករៀន គឺរៀនដើម្បីឱ្យយល់ ដឹងខុស ដឹងត្រូវ ហើយចែករំលែកអំពីខុស និងត្រូវ ទៅមនុស្សដទៃទៀតដែលមិនទាន់ដឹង ហើយគោលដៅគឺដើម្បីកសាងសង្គមមួយដែលសន្តិភាពពិតប្រាកដ»។

«នៅពេលយើងចង់ផ្លាស់ប្តូរអ្វីមួយ រឿងទីមួយដែលអ្នកត្រូវគិត ភាពលំបាកគឺយើងនឹងត្រូវជួបហើយ»

ឆ្លើយតបនឹងសំនួរថា តើនរណាដែលតែងតែជួយជ្រំជ្រេញលោកពីក្រោយ? លោកនិយាយមួយៗ ហើយច្បាស់ៗប្រកបដោយទំនុកចិត្តថា «នៅពីក្រោយខ្នងរបស់បង គឺអទិទេព។ អទិទេពទីមួយគឺជាខ្លួនឯង ខ្លួនឯងជាអ្នកផ្តល់កម្លាំងចិត្តដល់ខ្លួនឯង។ នៅពេលធ្វើការងារ បងរំពឹងទៅលើសេចក្តីល្អដែលបងធ្លាប់ធ្វើ។ ពេលដែលយើងទន្ទេញនូវសេចក្តីល្អ វាផុសចេញមកនូវភាពជឿជាក់ ទោះជានឹងត្រូវគេយកកាំបិតមករកចាក់សម្លាប់ក្តី»។

«ដរាបណាយើងជាអ្នកមុន មិនត្រួសត្រាយផ្លូវ សួរថាតើអ្នកក្រោយគ្នាផ្លូវឯណាសម្រាប់ដើរ»

«ដរាបណា អ្នកគ្រប់គ្នាឃើញបងមិនពាក់ស្បែកជើង ដរាបនោះគឺឆន្ទៈបងមិនប្រែប្រួលឡើយ នេះជាការតស៊ូមតិមួយបែបអហិង្សា ហើយបងចង់បង្ហាញពីសញ្ញានៃការលះបង់ ថាចង់ផ្លាស់សង្គមទៅបានទាល់តែយើងលះបង់ និងមួយទៀតជាតឹកតាងចំពោះការប្តេជ្ញាចិត្តរបស់ខ្លួនឯង»

លោកថា៖ «ដរាបណាសង្គមកម្ពុជាអត់មានយុត្តិធម៌ ដរាបនោះខ្ញុំអត់ពាក់ស្បែកជើងទេ»។

លោកផ្តាំផ្ញើទៅយុវជនបញ្ញាវ័នខ្មែរគ្រប់ៗរូបមានសាមគ្គីភាព ចេះស្រឡាញ់គ្នា ចេះគោរពគ្នា។ ហើយដើម្បីផ្លាស់ប្តូរសង្គមទៅបាន យុវជនត្រូវផ្លាស់ខ្លួនឯងឱ្យប្រសើរជាមុនសិន។ លោកពោលថា៖ «នៅពេលយើងចង់ផ្លាស់អ្វីមួយ គឺត្រូវយកខ្លួនឯងជារូបមន្តនៃការសាកល្បង ផ្លាស់ប្តូរខ្លួនឯងជាមុនសិន»។
ក្រោយត្រូវបានដោះលែង នៅបច្ចុប្បន្ន លោកសារ៉ាយ ជាប្រធានសមាគមនសម្ព័ន្ធនិស្សិតបញ្ញាវន្តខ្មែរ ដែលបង្កើតឡើងដើម្បីចង់ចងក្រងសិស្សនិស្សិតឱ្យចេះគិតគូរលើបញ្ហាជាតិ និងចូលរួមឈឺឆ្អាលដោះស្រាយនូវបញ្ហាសង្គមជាតិ។

តាមរយៈរបាយការណ៍វាយតម្លៃពីសិទ្ធិនយោបាយ និងសិទ្ធិពលរដ្ឋ ដោយអង្គការឃ្លាំមើលសេរីភាពពិភពលោក Freedom House ឆ្នាំ២០២១ កម្ពុជាបានធ្លាក់ចុះ ១ពិន្ទុមកនៅលេខ ២៤ លើ១០០ពិន្ទុ ដែលបង្ហាញថាកម្ពុជាជាប្រទេស មិនសេរី។ នៅក្នុងតំបន់ ពិន្ទុសេរីភាពកម្ពុជា អន់ជាងមីយ៉ាន់មា ថៃ ប្រ៊ុយណែ និងម៉ាឡេស៊ីជាដើម ហើយគ្រាន់បើជាងឡាវ និងរៀតណាម៕

Vox pop: ទស្សនៈរបស់សិស្សថ្នាក់ទី១២លើការពន្យារពេលការប្រឡងបាក់ឌុបឆ្នាំ២០២២

ប៉ិច ស្រីពេជ្រ (Pech Sreypich) — Mon, 03 Oct 2022 03:28:43 +0000

កាលពីថ្ងៃទី១៣ ខែកញ្ញា ឆ្នាំ២០២២ រដ្ឋមន្រ្តីក្រសួងអប់រំ យុវជន និងកីឡា បានប្រកាសជូនដំណឹងស្តីពីការពន្យារពេលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២១-២០២២ ដែលគ្រោងរៀបចំនៅថ្ងៃទី២១ និងទី២២ ខែវិច្ឆិកា ឆ្នាំ២០២២ ទៅថ្ងៃទី០៥ និងទី០៦ ខែធ្នូ ឆ្នាំ២០២២ វិញ។

Newsroom Cambodia នៅថ្ងៃទី២៩ និងថ្ងៃទី៣០ ខែកញ្ញា ឆ្នាំ២០២២នេះ បានសម្ភាសន៍សិស្សថ្នាក់ទី១២ចំនួន៥រូបអំពីការយល់ឃើញរបស់ពួកគេទាក់ទងទៅនឹងការពន្យារពេលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២១-២០២២។

យុវតី សាមឿន រត្នវិភាវី

យុវតី សាមឿន រត្នវិភាវី អាយុ ១៧ឆ្នាំ ជាសិស្សថ្នាក់ទី១២ ផ្នែកវិទ្យាសាស្រ្តសង្គម នៃវិទ្យាល័យជាស៊ីមបឹងកេងកង ប្រាប់ Newsroom Cambodia ថា ការពន្យារពេលប្រឡងបាក់ឌុប គឺមានទាំងគុណសម្បត្តិ និងគុណវិបត្តិ។

វិភាវីបញ្ជាក់ពីគុណសម្បត្តិនៃការពន្យារពេលនេះថា៖ «ការពន្យារពេលប្រឡងអាចឱ្យពួកខ្ញុំរៀនបន្ថែមទៀត ដោយសារតែកាលពីថ្នាក់ទី ១០និង១១ គ្រូមួយចំនួនគាត់មិនបានបង្រៀនបានពេញលេញទេ អ៊ីចឹងទៅពួកខ្ញុំមិនសូវមានគ្រឹះ ដោយសារតែបង្រៀនតាមរយៈអនឡាញ ហើយការពន្យារពេលនេះក៏ជាឱកាសមួយសម្រាប់ឲ្យពួកខ្ញុំអាចយកពេលទៅរៀនក្រៅម៉ោងបន្ថែមដើម្បីឱ្យពួកខ្ញុំកាន់តែមានភាពជឿជាក់លើសមត្ថភាពបានខ្លាំងជាងមុន ជាពិសេសនោះគឺមានពេលវេលាច្រើនជាមួយមិត្តភក្តិផងដែរ»។

យុវតីរូបនេះក៏បានបញ្ជាក់អំពីគុណវិបត្តិដែរថា៖ «ការពន្យារពេលយូរធ្វើឱ្យអ្នកខ្លះគាត់អាចបោះបង់ការសិក្សាចំពោះអ្នកដែលគាត់មិនសូវមានជីវភាពធូរធារ ដល់ពេលអ៊ីចឹងទៅគាត់បោះបង់ការសិក្សាទៅគាត់អាចនឹងខកខានក្នុងការចូលសាកលវិទ្យាល័យអីផ្សេងៗ»។

យុវជន សារីម បញ្ញាសាស្រ្ត

យុវជន សារីម បញ្ញាសាស្រ្ត អាយុ១៨ឆ្នាំ ជាសិស្សថ្នាក់ទី១២ ផ្នែកវិទ្យាសាស្រ្តពិតនៃវិទ្យាល័យជាស៊ីមបឹងកេងកង បានលើកឡើងថា ការពន្យារពេលប្រឡងបាក់ឌុបនេះគឺជារឿងល្អ។

បញ្ញាសាស្រ្តបញ្ជាក់ថា៖ «ការពន្យារពេលប្រឡងនេះ ខ្ញុំគិតថាល្អម៉្យាងដែរ ព្រោះអីសិស្សយើងអាចបានរៀនបន្ថែម ព្រោះអីថាក្នុងអំឡុងខែ១១ហ្នឹង មានកម្មវិធីបុណ្យអុំទូក ឈប់ច្រើនថ្ងៃអត់សូវបានរៀន។ អំឡុងពេលជិតប្រឡងអ៊ីចឹងគឺ វាមានបញ្ហាទាក់ទងជាមួយ និងភ្លៀងធ្លាក់អញ្ចឹងទៅ វាធ្វើឱ្យមានការពិបាកក្នុងការធ្វើដំណើរទៅរៀន ឬទៅប្រឡង ហើយការពន្យារពេលហ្នឹងគឺវាល្អដែរ សម្រាប់ឱ្យយើងងាយស្រួលធ្វើដំណើរ»។

យុវជន សែម ចាន់សុភ័ក្ដ្រ

យុវជន សែម ចាន់សុភ័ក្ដ្រ ជាសិស្សថ្នាក់ទី១២នៃសាលាប៊ែលធីអន្ដរជាតិសាខាទី៧ បាននិយាយថា ការពន្យារពេលការប្រឡងបាក់ឌុបនេះ គឺជាផលប្រយោជន៍ទូទៅសម្រាប់សិស្សទី១២ ដែលកំពុងត្រៀមប្រឡងនៅឆ្នាំនេះ។

សុភ័ក្រ្ត និយាយថា៖ «ផលប្រយោជន៍ទីមួយនោះគឺពួកយើងអាចត្រៀមទន្ទេញមេរៀនដែលត្រូវទន្ទេញដូចជាជីវ: និងប្រវត្ដិដែលជាមុខវិជ្ជាសំខាន់នៃការប្រឡង។ ហើយទីពីរ ពួកយើងអាចត្រៀមពេលវេលាក្នុងការធ្វើលំហាត់ដូចជា គណិត រូប គីមី ជាពិសេសគឺគណិត។ ហើយទីបី ពួកយើងអាចសិក្សាពីកម្រិតស្តង់ដារបស់បាក់ឌុប។ ហើយទីបួនគឺ យើងអាចត្រៀមលក្ខណ:ទុកជាមុន ដល់ពេលប្រឡងយើងទៅដោយមិនមានការភ័យព្រួយបារម្ភ។ ហើយទីប្រាំ គឺយើងអាចមានពេលវេលាក្នុងការរៀនគួរបន្ថែមដើម្បីបង្កើនចំណេះដឹងក្នុងការប្រឡង»។

យុវជន ថោង គីមហាក់

យុវជន ថោង គីមហាក់ អាយុ១៨ឆ្នាំ ជាសិស្សថ្នាក់ទី១២ ថ្នាក់វិទ្យាសាស្ត្រពិត មកពីវិទ្យាល័យព្រះយុគន្ធរបានប្រាប់ Newsroom Cambodia ថា ការពន្យារពេលប្រឡងបាក់ឌុបនេះគឺល្អហើយពុំមិនមានផលប៉ះពាល់អ្វីទេ។

យុវជនរូបនេះបញ្ជាក់ថា៖‍‍ «ពេលពន្យារពេលចឹងទៅយើងមានពេលក្នុងការរៀនគួរបន្ថែម ហើយយើងបានរៀនបន្ថែមពីមេរៀនផ្សេងដែលយើងអត់សូវយល់»។

យុវជន លាប ប៊ុនរ៉ានីនមករា

យុវជន លាប ប៊ុនរ៉ានីនមករា អាយុ២១ឆ្នាំដែលជាសិស្សថ្នាក់ទី១២ ថ្នាក់វិទ្យាសាស្រ្តសង្គម មកពីវិទ្យាល័យជាស៊ីមបឹងកេងកងបានប្រាប់ Newsroom Cambodia ថាការពន្យារពេលប្រឡងបាក់ឌុបនេះគឺល្អសម្រាប់សិស្សទាំងអស់ដែលរៀបបានតិចក្នុងអំឡុងការរីករាលដាលជំងឺកូវីដ។

យុវជនរូបនេះលើកឡើងថា៖ «ការពន្យារពេលប្រឡងនេះគឺល្អសម្រាប់សិស្សទី១២ទាំងអស់ដើម្បីឱ្យគាត់រៀនបានច្រើនជាងមុន‍»៕

ប៉ិច ស្រីពេជ្រ (Pech Sreypich) – Newsroom Cambodia

បទយកការណ៍៖ ពលរដ្ឋមួយចំនួន​ត្រៀម​ខ្លួន​ទៅបោះឆ្នោត ខណៈមួយចំនួន​​​រងចាំ​មើល​ឯករាជ្យភាព​របស់​​គ.ជ.ប

អ្នកសារព័ត៌មានឯករាជ្យរងការគំរាមកំហែងពីអាជ្ញាធរ

លោកកើត សារ៉ាយនិយាយអំពីការតស៊ូក្នុងជីវិតនៅក្មេង ភាពជាសកម្មជន និងបញ្ហាសង្គម

Vox pop: ទស្សនៈរបស់សិស្សថ្នាក់ទី១២លើការពន្យារពេលការប្រឡងបាក់ឌុប​ឆ្នាំ២០២២

បទយកការណ៍៖ ពលរដ្ឋមួយចំនួនត្រៀមខ្លួនទៅបោះឆ្នោត ខណៈមួយចំនួនរងចាំមើលឯករាជ្យភាពរបស់គ.ជ.ប

Vox pop: ទស្សនៈរបស់សិស្សថ្នាក់ទី១២លើការពន្យារពេលការប្រឡងបាក់ឌុបឆ្នាំ២០២២