ផន ចន្ទ្រា (Phorn Chantrea) – Newsroom Cambodia

បទយកការណ៍៖ បណ្ណាល័យ សួន បញ្ញា ជំរុញការអានបន្ថែមក្នុងសហគមន៍មួយនៅខេត្តបាត់ដំបង

ផន ចន្ទ្រា (Phorn Chantrea) — Mon, 29 Jan 2024 03:20:35 +0000

កាលពីឆ្នាំ២០១៨ កញ្ញា យ៉ែម បញ្ញា បានបង្កើតបណ្ណាល័យតូចមួយដោយមានឈ្មោះថា បណ្ណាល័យ សួន បញ្ញា ដែលមានទីតាំងស្ថិតនៅ ភូមិកំប៉ូវ ឃុំភ្នំសំពៅ ស្រុកបាណន់ ខេត្តបាត់ដំបង។

កំពុងអង្គុយក្នុងបរិវេណបណ្ណាល័យ ស្ថាបនិកបណ្ណាល័យសួនបញ្ញា វ័យ៣៨ឆ្នាំរូបនេះ និយាយថា៖ «បណ្ណាល័យសហគមន៍ជាផ្នែកមួយក្នុងការជួយដល់យុវជននៅជនបទហ្នឹង គាត់អាចមានកម្លាំងក្នុងការរកមធ្យោបាយក្នុងការអាន [សៀវភៅ] បាន»។

បណ្ណាល័យសួនបញ្ញាត្រូវបានបង្កើតឡើងក្នុងគោលបំណងចង់ឱ្យក្មេងៗក្នុងសហគមន៍អាចរៀនបន្ថែមបន្ទាប់ពីទំនេរពីការសិក្សា ដូចជាថ្ងៃចុងសប្តាហ៍ ហើយក្មេងៗដែលមកអានសៀវភៅនៅទីនេះអាចខ្ចីសៀវភៅទៅអាននៅផ្ទះបានដោយសេរី។

កញ្ញា យ៉ែម បញ្ញា បន្ថែមថា យុវជនក្នុងសហគមន៍របស់កញ្ញាតែងខ្វះខាតបណ្ណាល័យ និងសៀវភៅសម្រាប់អានដើម្បីបង្កើនចំណេះ។

កញ្ញាលើកឡើងថា៖ «បណ្ណាល័យនៅតាមសាលាមិនសូវជាសម្បូរ ក៏នៅតាមជនបទមានតែសៀវភៅទាក់ទងនឹងកម្មវិធីសិក្សា ចឹងយើងឃើញថាមានការខ្វះខាតទាក់ទងនឹងសៀវភៅចំណេះដឹងទូទៅ[—] ដូច្នេះជាផ្នែកមួយក្នុងការជួយយុវជននៅជនបទអាចរកមធ្យោបាយក្នុងការអានបាន»។

បណ្ណាល័យ សួន បញ្ញា ត្រូវបានបង្កើតឡើងក្នុងទីធ្លាផ្ទះរបស់ឪពុកម្តាយកញ្ញាបញ្ញាផ្ទាល់ ដែលដំបូងឡើយគឺសាងសង់ឡើងដោយប្រើប្រាស់ឈើ។ តែក្រោយមកកញ្ញាបានស្វែងរកធនធានគាំទ្ររហូតដល់បង្កើតបានជាកូនផ្ទះមួយដែលសាងសង់ដោយថ្មដែលមានសភាពប្រសើរជាងមុន និងអាចឱ្យអ្នកអានមានទីធ្លាអង្គុយអានបាន។

កញ្ញា ធឿន សុភា និស្សិតរៀននៅសាកលវិទ្យាល័យបាត់ដំបង កំពុងអានសៀវភៅរឿងនិទានឱ្យក្មេងៗក្នុងភូមិស្តាប់ ជាមួយកាយវិការយ៉ាងរស់រវើកធ្វើឱ្យក្មេងៗផ្ទុះសំណើចម្តងៗផង។

ជានិស្សិតរៀននៅសាកលវិទ្យាល័យបាត់ដំបង និងជាអ្នកប្រើប្រាស់បណ្ណាល័យនេះផ្ទាល់ផងនោះ កញ្ញាលើកឡើងថា ការបង្កើតបណ្ណាល័យនេះអាចផ្តល់ផលប្រយោជន៍ដល់យុវជននៅក្នុងសហគមន៍ដោយរួមបញ្ចូលជាមួយចំណេះដឹង និងពេលវេលាជួបជុំគ្នាផងដែរ។

កញ្ញាបន្ថែមថា៖ «ការបង្កើតបណ្ណាល័យនៅក្នុងសហគមន៍នេះគឺថាល្អ ព្រោះអាចឱ្យក្មេងបានអាន សម្រាប់អ្នកដែលមិនសូវចេះ ក៏អាចចេះបានដែរ ព្រោះថាមានការបង្រៀន មានយុវជននៅនឹងចឹងហើយក្មេងមកមួយអាទិត្យម្ដងចឹងកាន់តែល្អ ព្រោះយើងជួយបង្រៀនគាត់បន្ថែម ហើយខ្ញុំគិតថាជួយឱ្យក្មេង ជ្រាបពីបណ្ណាល័យតាំងពីតូចទៅ អាចជួយឱ្យពួកគាត់ចេះអាន ចេះសរសេរកាន់តែទូលំទូលាយ»។

ការបង្កើតបណ្ណាល័យសហគមន៍នេះឡើង គឺបានផ្តល់ប្រយោជន៍ដល់សហគមន៍ទាំងមូល ជាពិសេសសិស្សានុសិស្សដែលមិនមានលទ្ធភាពក្នុងការទិញសៀវភៅ ហើយមិនមានទីតាំងណាមួយស្ងប់ស្ងាត់ក្នុងការអានសៀវភៅ។

ចំណែកកញ្ញា ប៉ិច លីដា អាយុ ២២ឆ្នាំ ជាអ្នកស្ម័គ្រចិត្តនៅបណ្ណាល័យសួន បញ្ញា និងជាអ្នកធ្លាប់ប្រើប្រាស់បណ្ណាល័យនេះផ្ទាល់បានប្រាប់ Newsroom Cambodia ថា បណ្ណាល័យសហគមន៍នេះ បានផ្តល់ឱកាសក្នុងការបង្កើនចំណេះដឹង និងអាចអានសៀវភៅដែលខ្លួនមិនមានសមត្ថភាពក្នុងការទិញមកអានបាន។

ថ្វីត្បិតតែបណ្ណាល័យសហគមន៍នេះបង្កើតឡើងសម្រាប់សាធារណៈជន ជាពិសេសប្រជាជនក្នុងសហគមន៍នេះផ្ទាល់ក្តី តែប្រជាជនក្នុងសហគមន៍នោះមិនសូវបានងាកមកចាប់អារម្មណ៍ក្នុងការអានសៀវភៅទេ ដូច្នេះការខ្ចីសៀវភៅពីបណ្ណាល័យនេះគឺនៅមានកម្រិតទាបនៅឡើយ។

កញ្ញា ប៉ិច លីដា បន្តថា៖ «អ្នកដែលចង់ខ្ចីសៀវភៅអានអាចមកខ្ចីអានបាន តែមិនសូវមានមនុស្សមកខ្ចីនោះឡើយ។ បណ្ណាល័យសហគមន៍ពិតជាសំខាន់ណាស់ ព្រោះវាជួយដល់យុវជនទទួលបានចំណេះដឹងជាច្រើន ពីការអានសៀវភៅពីបណ្ណាល័យសហគមន៍បន្ទាប់ពីការរៀននៅសាលា» ។

ការបង្កើតបណ្ណាល័យគឺមិនមានភាពងាយស្រួលឡើយ ជាពិសេសបណ្ណាល័យនៅតាមសហគមន៍ ដែលទាមទារជាច្រើនផ្នែកដើម្បីឱ្យបណ្ណាល័យដែលបង្កើតនោះអាចដំណើរការទៅមុខបាន។

កញ្ញា យ៉ែម បញ្ញា ក៏បានរៀបរាប់ទាំងរអាក់រអួលទាក់ទងនឹងឧបសគ្គនៃការបង្កើតបណ្ណាល័យសួន បញ្ញា នេះឡើងថា៖ «ពាក់កណ្តាលឆ្នាំ ២០១៨ ខ្ញុំចាប់ផ្តើមសាងសង់បណ្ណាល័យដោយប្រើប្រាស់ប្រាក់សន្សំ ហើយសម្ភារៈជាឈើពីម៉ាក់ប៉ា រួមទាំងទីធ្លាផ្ទះរបស់គាត់»។

កញ្ញាបន្ថែមថា បញ្ហាថវិកា ធនធានមនុស្ស នៅតែជាបញ្ហាប្រឈមដែលបណ្ណាល័យ សួន បញ្ញា កំពុងជួបប្រទះក្នុងពេលបច្ចុប្បន្ន ដែលធ្វើឱ្យការរីកដុះដាលនៃបណ្ណាល័យនេះមានសភាពយឺត ហើយជាពិសេសបណ្ណាល័យនេះស្ថិតក្នុងការបិទដំណើរការតាំងពីការរីករាលដាលជំងឺកូវីដ១៩មក។

យ៉ាងណាមិញ បណ្ណាល័យ សួន បញ្ញា ក៏បានទទួលការគាំទ្រពីយុទ្ធនាការមួយ ដែលមានជំនួយជាសៀវភៅ ការរកនូវយុទ្ធសាស្រ្តក្នុងការធ្វើឱ្យបណ្ណាល័យនេះមានការអភិវឌ្ឍ ក៏ដូចជាការចូលរួមផ្សព្វផ្សាយអំពីបណ្ណាល័យនេះដែរ។

កាលពីថ្ងៃទី០៦ ខែមករា ឆ្នាំ២០២៤ យុទ្ធនាការ «សៀវភៅមួយ សហគមន៍មួយ» បានរៀបចំដំណើរទស្សនៈកិច្ចទៅកាន់បណ្ណាល័យ សួន បញ្ញា ក្នុងគោលបំណងជួយឱ្យបណ្ណាល័យនេះអាចដំណើរការឡើងវិញក្រោយពេលបិទខ្ទប់អំឡុងពេលកូវីដ១៩។

យុទ្ធនាការនេះ បានចូលរួមចំណែកជាច្រើនក្នុងការធ្វើឱ្យបណ្ណាល័យសហគមន៍មានដំណើរការយ៉ាងរលូន ហើយបានផ្តល់ជាប្រយោជន៍ជាច្រើនសម្រាប់សិស្សានុសិស្សដែលរស់នៅទីតាំងនោះ។

លោក សុខ ឡាក់ សហស្ថាបនិកយុទ្ធនាការ សៀវភៅមួយ សហគមន៍មួយបានប្រាប់ Newsroom Cambodia ថា គោលដៅនៃយុទ្ធនាការនេះគឺដើម្បីជួយបង្កើនទម្លាប់ក្នុងការអាន និងមានបញ្ហាគោលផ្សេងទៀតដែលយុទ្ធនាការនេះព្យាយាមដោះស្រាយដោយបូកបញ្ចូលជាមួយកម្មវិធីជួយគាំទ្រដល់បណ្ណាល័យសហគមន៍តាមបណ្តាខេត្តក្រុង។

លោកលើកឡើងថា៖ «គោលដៅដែលចង់ដោះស្រាយនោះគឺ ទម្លាប់ក្នុងការអាន ដែលយើងព្យាយាមដោះស្រាយហ្នឹងទាក់ទងនឹងយុវជន»។

លោកបានបន្ថែមថា ៖ «បញ្ហាមួយទៀតដែលកើតឡើងគឺ បញ្ញាជម្ងឺអូទីសឹម ដែលឪពុកម្តាយដែលអត់សូវមានទម្លាប់ក្នុងការអានមានភាពធ្វេសប្រហែស ទុកឱ្យកូនគាត់ទៅលេងទូរស័ព្ទ ដូច្នេះយុទ្ធនាការនេះមានគោលដៅចង់បណ្តុះយុវជនដែលមានកូនឱ្យបង្កើនទម្លាប់ក្នុងការអានដើម្បីដោះស្រាយបញ្ហាទាំងអស់ហ្នឹង»។

លោកក៏បានសង្កេតឃើញពីសកម្មភាព និងសក្តានុពលរបស់បណ្ណាល័យ សួន បញ្ហា ដែលបានអនុវត្តជាច្រើនឆ្នាំមកហើយ តែបានអាក់ខានសកម្មភាពអំឡុងពេលកូវីដ ១៩ ហេតុដូចនេះទើបយុទ្ធនាការ សៀវភៅមួយ សហគមន៍មួយ បានមកដល់ទីតាំងនៃបណ្ណាល័យនេះផ្ទាល់ក្នុងគោលបំណងឱ្យបើកដំណើរការបណ្ណាល័យនេះឡើងវិញ។

លោក សុខ ឡាក់ ក៏បានលើកឡើងពីមូលហេតុដែលនាំឱ្យមានយុទ្ធនាការនេះឡើងដែរថា៖ «យុវជនយើងមានបញ្ហាជាច្រើន បញ្ហាទាំងធនធានមនុស្ស បញ្ហាទាំងគុណភាពការងារ បញ្ហាទាំងការគិត បញ្ហាប្រឈមនឹងការរកការងារធ្វើ ការរៀនហ្នឹង ចឹងយើងចង់ចូលរួមចំណែកមួយតូចក្នុងការដោះស្រាយបញ្ហាទាំងអស់នេះ»។

បណ្ណាល័យលក្ខណៈជាសហគមន៍មានសភាពតូច តែពោរពេញទៅដោយសៀវភៅនៅផ្នែកខាងក្នុង ជាប្រភពនៃចំណេះដឹង ដែលសិស្សានុសិស្សអាចប្រើប្រាស់ជាផលប្រយោជន៍ពីបណ្ណាល័យសហគមន៍នោះ។

លោក សុខ ឡាក់ ក៏បានគូសបញ្ជាក់ផងដែរថា៖ «បណ្ណាល័យសហគមន៍បើកជាសាធារណៈ ដូច្នេះអ្នកដែលនៅជុំវិញភូមិអាចទៅប្រើប្រាស់សេវាកម្មបណ្ណាល័យទាំងអស់នឹង ដែលជាលក្ខណៈពិសេសរបស់បណ្ណាល័យសហគមន៍»។

ក្នុងថ្ងៃដដែលនៃយុទ្ធនាការ សៀវភៅមួយ សហគមន៍មួយនេះ លោក ទឹម ម៉ានី អាយុ៧៨ឆ្នាំ ជាអ្នកនិពន្ធសៀវភៅ ក៏បានអញ្ជើញមកចែករំលែកទាក់ទងនឹងវិធីសាស្រ្តអានសៀវភៅចូលរួមប្រកួតប្រជែងការអាន។

លោក ទីម ម៉ានី បានលើកឡើងថា ការងាកមកអានសៀវភៅគឺជាភារកិច្ចរបស់យុវជនគ្រប់រូប ព្រោះចំណេះដឹងគឺកើនឡើងក្រោយពីការអាន ទោះបីអានតិចក្តីច្រើនក្តី ក៏ទទួលបានផលវិជ្ជមាន ហើយកុំព្យាយាមខ្ជះខ្ជាយពេលវេលាលើទូរស័ព្ទច្រើន។

លោកលើកឡើងថា៖ «សំខាន់ឱ្យសិស្សបានអានបានមើលសៀវភៅ មិនមែនលោកគ្រូហាមផ្ដាច់មិនឱ្យលេងទូរសព្ទ កុំព្យូទ័រទេ យើងចង់ឱ្យគាត់ងាកមកអានសៀវភៅវិញ»។

លោកបន្ថែមដែរថា យុវជនមួយចំនួនចាប់ផ្តើមបាត់បង់ការប្រើប្រាស់អក្សរសាស្រ្តខ្មែរដែលនាំគ្នាងាកទៅរកការប្រើប្រាស់សំនៀងអង់គ្លេស ដែលនាំឱ្យប៉ះពាល់ដល់វប្បធម៌ជាតិខ្មែរ។

លោកបាននិយាយថា៖ «ព្រោះអក្សសាស្រ្តខ្មែរយើងកំពុងតែលុតចុះបន្តិចម្ដងៗដោយសារកូនខ្មែរមួយចំនួនគាត់ចូលចិត្ត សរសេរអក្សរខ្មែរជាភាសារបរទេស អង់គ្លេស ហើយជាសំនៀងខ្មែរខុស ព្រោះអនាគតទៅអាចខ្លាចដូចជាប្រទេសមួយចំនួនដែលសម័យបារាំងកាន់កាប់ គាត់បន្ថែមសក់បន្ថែមអីទៅក្លាយជារបស់បារាំង ដូច្នេះយើងចង់ឱ្យខ្មែរសរសេរខ្មែរឱ្យត្រូវនឹងអក្ខរាវិរុទ្ធដែលមានវចនានុក្រម សម្ដេច ជួន ណាត លោកជាប្រធានបាទសុំអរគុណកូន»។

ក្តីស្រមៃរបស់កញ្ញា យ៉ែម បញ្ញា បានក្លាយជាការពិត ក្រោយពីការខិតខំរបស់កញ្ញា ដែលព្យាយាមបង្កើតបណ្ណាល័យនេះឡើងសម្រាប់សហគមន៍របស់កញ្ញាផ្ទាល់ ទោះបីជាបណ្ណាល័យនេះបច្ចុប្បន្នមិនមានអ្នកឧបត្ថម្ភច្រើនក្តី។

កញ្ញាចង់ឃើញយុវជនជំនាន់ក្រោយអាចបង្កើតបណ្ណាល័យសហគមន៍ ដែលជាចំណែកមួយធំជួយដល់សហគមន៍ខ្លួន ដែលជាចំណុចក្នុងការអភិវឌ្ឍចំណេះដឹងរបស់យុវជនគ្រប់រូប។

កញ្ញាបាននិយាយថា៖ «ខ្ញុំចង់ឱ្យមានអ្នកបន្តវេនការងារហ្នឹងបន្ថែមទៀត អត់ចង់មានតែខ្ញុំ ដោយធ្វើយ៉ាងណាបណ្តុះយុវជនផ្សេងទៀតអាចយកគំនិតហ្នឹងមិនថាក្នុងភូមិទេគឺអ្នកផ្សេងៗទៀត»៕

បទយកការណ៍៖ អ្នកស្រឡាញ់ភេទដូចគ្នានៅកម្ពុជានៅតែបន្តរងការរើសអើង

ផន ចន្ទ្រា (Phorn Chantrea) — Thu, 11 Jan 2024 03:42:58 +0000

នៅក្នុងច្បាប់អន្តរជាតិ មនុស្សម្នាក់ៗមានសិទ្ធិស្មើគ្នាក្នុងការជ្រើសរើសដៃគូជីវិត ជ្រើសរើសមនុស្សដែលខ្លួនស្រឡាញ់ មិនថាភេទដូចគ្នា ឬផ្ទុយគ្នា ហើយការស្រលាញ់ភេទដូចគ្នាក៏មិនមែនជាកំហុស។

កំពុងផ្តល់សម្ភាសន៍ដល់អ្នកសារព័ត៌មានយុវជន សុទ្ធ ពៅ សំណាង សកម្មជនការពារសិទ្ធិអ្នកស្រឡាញ់ភេទដូចគ្នាលើកឡើងថា អ្នកស្រលាញ់ភេទដូចគ្នានៅកម្ពុជា នៅតែបន្តរងការរើសអើងទាំងនៅសាលារៀន កន្លែងធ្វើការ ក្នុងសង្គម និងតាមបណ្តាញអ៊ីនធឺណិត។

សំឡេងរបស់សំណាងហាក់ប្តូរបន្តិច នៅពេលរៀបរាប់អំពីការរើសអើងដែលកើតមានលើអ្នកស្រលាញ់ភេទដូចគ្នា។ សកម្មជនរូបនេះបន្តថា៖ «ការរើសអើងនៅក្នុងសាលា ឧទាហរណ៍មួយចំនួន គ្រូមួយចំនួនរើសអើងយើង មិនសូវសប្បាយរីករាយជាមួយយើង ហើយពេលខ្លះគ្រូមួយចំនួនមានវិន័យ ប្រុសមានភេទកំណើតប្រុសត្រូវស្លៀកខោ ស្រីត្រូវស្លៀកសំពត់ មួយទៀតប្រុសមិនអាចទុកសក់វែងបានទេត្រូវកាត់សក់អ៊ីចឹងទៅ អ៊ីចឹងអាហ្នឹងនៅមើលឃើញរូបភាពនិងនៅក្នុងស្រុកខ្មែរ»។

បើទោះបីជាសហគមន៍អ្នកស្រលាញ់ភេទដូចគ្នាត្រូវបានលើកស្ទួយដោយអង្គការសង្គមស៊ីវិលមួយចំនួនក៏ដោយ ប៉ុន្តែច្បាប់សម្រាប់ការពារនៅមិនទាន់មានគ្រប់គ្រាន់ ហើយការរើសអើង និងការមើលងាយនៅតែកើតមានសម្រាប់អ្នកស្រលាញ់ភេទដូចគ្នា ដូចជាសំណាង។

សំណាង ដែលមានអាយុ២៦ឆ្នាំ បន្ថែមថា ការទទួលស្គាល់ផ្នែកសង្គមមានភាពប្រសើរ ដោយសារពួកគេអាចបង្ហាញភាពជាខ្លួនឯងបាន។

ខែន គឹមហុង អ្នកស្រលាញ់ភេទម្នាក់ទៀតលើកឡើងដែរថា ការស្រឡាញ់ភេទដូចគ្នាគឺការស្រឡាញ់ភេទតែមួយ ដូចជាប្រុសស្រឡាញ់ប្រុស ស្រីស្រឡាញ់ស្រី ប៉ុន្តែការស្រឡាញ់ភេទដូចមិនតម្រូវឱ្យយើងកែរភេទទៅជាមនុស្សស្រីឬក៏ជាប្រុសនោះទេ។

គឹមហុងថា៖ «បញ្ហាប្រឈមរបស់ពួកយើងមានរឿងច្រើន ដូចជាឳពុកម្ដាយ បងប្អូន និងមនុស្សជុំវិញខ្លួន ប៉ុន្តែពួកយើងនឹងប្រឹងជំនះនៅបញ្ហានេះ»។

អ្នកស្រលាញ់ភេទដូចគ្នាម្នាក់ទៀត គុយ ធីតា ស្ថាបនិក Lovelsdiversity ថា ស្ថានភាពអ្នកស្រលាញ់ភេទដូចគ្នានៅកម្ពុជាមានភាពប្រសើរឡើងបើធៀបនឹងកាលពីមុន តែនៅតែមានចន្លោះខ្វះខាត។

ធីតានិយាយថា៖ « បើយើងប្រៀបធៀបកាលពីដប់ឆ្នាំមុនឬក៏ប្រាំឆ្នាំមុនយើងឃើញថាស្ថានភាពសេរីភាព ការទទួលស្គាល់មានការកើនឡើងប៉ុន្តែនៅតែអត់ទាន់គ្រប់គ្រាន់ អ្នកស្រឡាញ់ភេទដូចគ្នានៅតែទទួលរងនូវការរើសអើងជាប្រចាំថ្ងៃ»។

ធីតា បានឲ្យដឹងថា បញ្ហាដែលអ្នកស្រលាញ់ភេទដូចគ្នាតែងតែជួបប្រទះមាន ៣ធំៗគឺទាក់ទងនឹងបញ្ហាគ្រួសារ ដែលគ្រួសារមួយចំនួនមិនទទួលស្គាល់ការស្រលាញ់ភេទដូចគ្នា និងបង្ខុំឲ្យមានការកែប្រែខ្លួន បង្ខំឲ្យផ្តាច់ទំនាក់ទំនងជាមួយភេទដូចគ្នានិងឲ្យទៅរៀបការជាមួយភេទខុសគ្នាវិញ។ បញ្ហាទីពីរ គឺក្នុងវិស័យអប់រំ និងកន្លែងការងារ ដោយពួកគាត់មិនត្រូវបានទទួលស្គាល់និងផ្តល់សិទ្ធិមនុស្សធម្មតា ក្នុងនោះ មានដូចជាការរើសអើងនៅសាលារៀន ឬរើសអើងពេលសម្ភាសន៍ការងារ។ ចំណែកបញ្ហាទីបី គឺមិនមានការការពារដោយច្បាប់ពេញលេញ ដូចជាមិនមានច្បាប់អនុញាតិឲ្យអ្នកស្រលាញ់ភេទដូចគ្នាបានចុះអ៊ីតាវិលជាដើម។

រដ្ឋាភិបាលកម្ពុជាថា ចំនួនអ្នកស្រឡាញ់ភេទដូចគ្នាមានជាង៣៣,០០០ នាក់ និងប្រហែល ៥,000 គូ។យ៉ាងណាមិញច្បាប់នៅមិនទាន់ទទួលការរៀបការរបស់ពួកគាត់ ជារឿងស្របច្បាប់នៅឡើយទេ។ នេះបើយោងតាមការចុះផ្សាយរបស់ខ្មែរថាមស៍ ឆ្នាំ២០១៩។

ឡុង ម៉ាឡែន ជាអ្នកស្រលាញ់ភេទដូចគ្នាម្នាក់ទៀតលើកឡើងដែរថា ស្ថានភាពអ្នកស្រលាញ់ភេទដូចគ្នានៅកម្ពុជាមានភាពប្រសើរឡើងបើធៀបនឹងរយៈពេលប៉ុន្មានឆ្នាំមុន ប៉ុន្តែនៅតែមិនទាន់មានភាពទូលំទូលាយនៅឡើយ។

ម៉ាឡែន បានឲ្យដឹងថាមនុស្សមួយចំនួននៅមិនទាន់ដឹងថាអ្វីជា LGBTQ នៅឡើយ ជាពិសេសអ្នកនៅសហគមន៍ជនបទ។

ម៉ាឡែននិយាយថា៖ «សហគមន៍គាត់ដើរតួយ៉ាងសំខាន់ដែរក្នុងការជួយជំរុញទៅលើការស្វែងយល់ និងទទួលស្គាល់ LGBT ព្រោះថាគ្រួសាររបស់អ្នកស្រលាញ់ភេទដូចគ្នាគឺគាត់ទទួលសម្ពាធពីសហគមន៍ ហើយដល់ពេលចឹងគ្រួសារគាត់ផ្តល់សម្ពាធដល់សមាជិក LGBT បន្តទៀត»។

ម៉ាឡែន បន្ថែមដោយសង្ឃឹមថា រដ្ឋាភិបាលនឹងជួយជំរុញឲ្យមានការស្វែងយល់ពីអ្នកស្រលាញ់ភេទដូចគ្នាក្នុងសង្គម ដើម្បីឲ្យការស្រលាញ់ភេទដូចគ្នានេះក្លាយទៅជារឿងធម្មតា។ ម៉ាឡែនថា រដ្ឋាភិបាលមិនគួរទុកតួនាទីផ្សព្វផ្សាយពីការស្រលាញ់ភេទដូចគ្នាទាំងស្រុងទៅឲ្យ អង្គការក្រៅរដ្ឋាភិបាល ឬក្រុមអ្នកស្រលាញ់ភេទដូចគ្នាធ្វើទាំងស្រុងឡើយ ព្រោះពួកគាត់ក៏ជាប្រជាជនទូទៅម្នាក់ ដែលគួរតែទទួលបានការការពារដូចគ្នា។

ត្រលប់មកយុវជន សុទ្ធ ពៅសំណាង វិញ សំណាងចង់ឱ្យសង្គមទទួលយកភាពចម្រុះនៃក្តីស្រលាញ់ ដូចការទទួលយកភាពចម្រុះនៃជាតិសាសន៍ដែរ។

សំណាងនិយាយថា៖ «សង្គមទទួលយកភាពចម្រុះនៃអាយុ ភាពចម្រុះនៃសញ្ជាតិមានសញ្ជាតិខ្មែរ ចិន ចាម វៀតណាម និងភាពចម្រុះនៃពណ៌សម្បុរ ប៉ុន្តែហេតុអ្វីសង្គមមិនអាចបើកចិត្តទទួលនូវភាពចម្រុះនៃក្តីស្រឡាញ់បាន»៕

ក្រសួងសុខាភិបាលអំពាវនាវឱ្យឈប់ប្រើប្រាស់គ្រឿងស្រវឹងដោយសារអាចបណ្តាលឱ្យមានបញ្ហាសុខភាពធ្ងន់ធ្ងរ

ផន ចន្ទ្រា (Phorn Chantrea) — Thu, 11 Jan 2024 02:37:09 +0000

ក្រសួងសុខាភិបាលអំពាវនាវដល់សាធារណជន ជាពិសេសយុវវ័យជៀសវាងការប្រើប្រាស់គ្រឿងស្រវឹងដោយសារវាអាចបណ្តាលឱ្យមានផលវិបាកសុខភាពធ្ងន់ធ្ងរ។

បើតាមសេចក្ដីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី៩ ខែមករាឆ្នាំ២០២៤ បានឱ្យដឹងថាការប្រើប្រាស់គឿងស្រវឹងផ្ដល់ផលវិបាកយ៉ាងធ្ងន់ធ្ងរដល់សុខភាព សេដ្ឋកិច្ច និងសង្គមជាពិសេសសមាជិកគ្រួសារ មិត្តរួមការងារ និងអ្នកដទៃផងដែរ។

ក្រសួងសុខាភិបាលបានបន្តថា៖ «ភស្តុតាងថ្មីៗរបស់អង្គការសុខភាពពិភពលោកបង្ហាញថា មិនមានកម្រិតសុវត្ថិភាពនៃការប្រើប្រាស់គ្រឿងស្រវឹងនោះទេ ហើយគ្រប់ផលិតផលគ្រឿងស្រវឹងសុទ្ធតែបង្កផលប៉ះពាល់ដល់សុខភាព សូមកុំប្រើប្រាស់គ្រឿងស្រវឹងនៅពេលបើកបរ ឬកំពុងបញ្ជាគ្រឿងម៉ាស៊ីនផ្សេងៗ ពេលកំពុងមានផ្ទៃពោះ និងបំបៅកូនដោយទឹកដោះ ឬអ្នកមានបញ្ហាសុខភាពផ្សេងៗ»។

ក្រសួងក្រសួងសុខាភិបាលបន្ថែមថា គ្រឿងស្រវឹងបង្កឱ្យមានផលប៉ះពាល់ ដូចជាជម្ងឺក្រិនថ្លើម មហារីក (មាត់ បំពង់ក បំពង់អាហារ ថ្លើម ពោះវៀនធំ សុដន់ ឈាម ប្រព័ន្ធភាពស៊ាំចុះខ្សាយ អសម្ថភាពផ្លូវភេទ ជម្ងឺបេះដូង សរសៃឈាម (ខួរក្បាល) បញ្ហាផ្លូវចិត្ត ខ្សោយសាច់ដុំ ឆ្អឹង លើសជាតិអាស៊ីត ខ្លាញ់ សម្ពាធឈាម ជាតិស្ករ ធ្វើឱ្យកូនលូតលាស់មិនប្រក្រតី ហើយអាចវិវត្តទៅរកផលវិបាក និងស្លាប់មុនអាយុ។

សេចក្ដីប្រកាសព័ត៌មានដដែលបានបន្តថា៖ «ជាតិអាល់កុលក្នុងផលិតផលគ្រឿងស្រវឹងប៉ះពាល់ដល់សុខភាពអ្នកប្រើប្រាស់ភ្លាមៗ និងរយៈពេលយូរ។ ក្នុងរយៈពេលតែ២ទៅ៣នាទីតែប៉ុណ្ណោះ ជាតិអាល់កុលអាចជ្រាបចូលដល់ខួរក្បាល ហើយអាចបង្ករោគសញ្ញា ទៅតាមកំហាប់ ការចាប់ផ្ដើមនិយាយច្រើន ចលនាអន់ថយ គំហើញថយចុះ និងក្អួតចង្អោរឬបាត់បង់ស្មារតី ហើយការទទួលគ្រឿងស្រវឹងច្រើនពេកអាចបង្កឱ្យសន្លប់ ប្រឈមនឹងជម្ងឺឆ្លង ដូចជាជម្ងឺអេដស៍ និងជម្ងឺផ្សេងៗទៀត» ។

ក្រសួងបន្ថែមថា លើសពីនេះទៀត វាអាចបណ្ដាលឱ្យយុវវ័យឈានទៅរកការប្រើប្រាស់គ្រឿងញៀន និងថ្នាំជក់ ដែលប្រាសចាកពីសីលធ៌មសង្គម។ទន្ទឹមគ្នានេះដែរគ្រឿងស្រវឹងបង្កឱ្យមានផលប៉ះពាល់ ដូចជាអំពើហឹង្សា ការប្រព្រឹត្តបទឧក្រិដ្ឋ ជម្លោះបុគ្គល ការចំណាយថវិកាទៅលើការទិញគ្រឿងស្រវឹង ការព្យាបាលសុខភាព គ្រោះថ្នាក់ចរាចរណ៍ និងខាតបង់ផ្សេងៗ។

ក្រសួងអំពាវនាវដល់សាធារណជន ជាពិសេសយុវវ័យជៀសវាងការប្រើប្រាស់ ហើយចំពោះអ្នកដែលមិនធ្លាប់ប្រើប្រាស់សូមកុំសាកល្បង ដោយឡែកអ្នកដែលកំពុងប្រើប្រាស់គ្រឿងស្រវឹង គួរកាត់បន្ថយឱ្យបានជាអតិបរមា ដើម្បីសុខភាពរបស់អ្នកនិងមនុស្សជាទីស្រឡាញ់។

ក្រសួងសុខាភិបាលបន្ថែមថា៖ «អាជ្ញាធរមូលដ្ឋាន គ្រួសារ សាលារៀន និងសហគមន៍ ចូលរួមបង្កើតបរិយាកាសកាត់បន្ថយការប្រើប្រាស់គ្រឿងស្រវឹង ដូចជាការអប់រំ ផ្សព្វផ្សាយ ឱ្យបានទូលំទូលាយ និងលើកទឹកចិត្តគាំទ្រអ្នកប្រើប្រាស់គ្រឿងស្រវឹងឱ្យលះបង់ការប្រើប្រាស់គ្រឿងស្រវឹង។ សូមស្ថាបន័ផ្សេងទៀតចូលរូមគាំទ្រននិងទប់ស្កាត់ការប្រើប្រាស់ផលិតផលគ្រឿងស្រវឹង តាមរយៈការឆ្លើយតបពហុវិស័យដោយផ្ដោតលើការរៀបចំលិខិតបទដ្ឋានគតិយុត្តពាក់ព័ន្ធផ្សេងៗ ក្នុងការជំរុញការផ្លាស់ប្ដូរឥរិយាបថបុគ្គល គ្រួសារ សហគមន៍ ឱ្យជ្រើសរើសទម្លាប់រស់នៅដោយគ្មានផលិតផលគ្រឿងស្រវឹង»៕

រដ្ឋាភិបាលកំណត់យកថ្ងៃ២៩ ធ្នូ ជាទិវាសន្តិភាពនៅកម្ពុជាជាថ្ងៃឈប់សម្រាកផ្លូវការ

ផន ចន្ទ្រា (Phorn Chantrea) — Sun, 07 Jan 2024 06:51:22 +0000

រដ្ឋាភិបាលកំណត់យកថ្ងៃ២៩ធ្នូ ជាទិវាសន្តិភាពនៅកម្ពុជា និងជាបុណ្យជាតិដែលមានការឈប់សម្រាកជាផ្លូវការ ខណៈអ្នកវិភាគចង់ឱ្យរដ្ឋាភិបាលប្រកាន់យកការអនុវត្តបែបសន្តិភាព គ្មានអំពើហិង្សាដូចការបង្កើតទិវានេះ។

បើតាមមាត្រា១នៃអនុក្រឹត្យចេញកាលពីថ្ងៃទី១ ខែមករា ឆ្នាំ២០២៤ស្តីពីទិវាសន្តិភាពនៅកម្ពុជា សម្រេចថា ត្រូវបានកំណត់យកថ្ងៃទី២៩ ខែធ្នូ ជារៀងរាល់ឆ្នាំ ជាទិវាសន្តិភាពនៅកម្ពុជា ជាការឆ្លើយតបនឹងបំណងប្រាថ្នារបស់ប្រជាជនកម្ពុជាស្រលាញ់សន្តិភាព ស្អប់ខ្ពើមសង្គ្រាម និងជាការរំឮកដល់ការសម្រេចបាននូវការបញ្ចប់សង្គ្រាមទាំងស្រុងជាដើម។

លោកបណ្ឌិត មាស នី ជាអ្នកសិក្សាពីការវិវត្តសង្គម និងជាអ្នកវិភាគនយោបាយមួយរូបយល់ថា ទិវាសន្តិភាពនេះមានន័យថាគូភាគីទាំងឡាយដែលស្ថិតនៅក្នុងសង្គមគឺត្រូវតែឈ្នះទាំងអស់គ្នា និងមានសុទ្ធចិត្តទាំងអស់គ្នា ទើបអាចទទួលយកថាជាទិវាជាតិនយោបាយឈ្នះឈ្នះរបស់ភាគីទាំងសងខាងពេញចិត្តទាំងអស់គ្នា។

លោកបន្តទៀតថា៖ «ប៉ុន្តែសម្រាប់ទិវាឈ្នះឈ្នះរដ្ឋាភិបាលប្រកាសនេះខ្ញុំក៏មិនទាន់យល់ដែរប្រសិនបើគេចង់និយាយថានេះជាទិវាឈ្នះឈ្នះរបស់គណបក្សកាន់អំណាច អាហ្នឹងវាត្រូវរបស់គាត់ហើយ ព្រោះថាគាត់ឈ្នះរហូតគាត់មិនដែលចាញ់ទេណា ប៉ុន្តែយើងយកមកនិយមន័យទិវាឈ្នះឈ្នះមកដាក់នៅក្នុងទិដ្ឋភាពនៃការបង្រួបបង្រួមជាតិ ហើយនិងការរកឯកភាពជាតិ នោះអាទិវាឈ្នះឈ្នះនេះវាមិនសូវត្រូវទេនៅក្នុងបរិបទនេះទេបាទ»។

លោកបានបន្ថែមថា៖«ហើយក៏មានពិធីមួយចំនួនដែលវាស្ថិតនៅក្នុងភាពចម្រូងចម្រាស់ហើយពលរដ្ឋទូទៅក៏មិនទាន់ទទួលយកគ្រប់គា្នវាជាទិវារបស់ជាតិទេ វាជាទិវាដែលបង្កើតឡើងដោយគណបក្សនយោបាយ ក្នុងនឹងសូម្បីតែទិវារំឮកថ្ងៃ៧មករានឹងក៏យើងនៅមិនទាន់ចុះសម្រុងគ្នានៅឡើយអំពីការទាញទិវានឹងមកដាក់ក្នុងបេះដូង ថាវាជាទិវារបស់ជាតិទាំងអស់ទេ គេនៅរិះគន់នៅឡើយ ហើយខ្ញុំសង្កេតឃើញថាទិវាឈ្នះឈ្នះនេះវាជារូបភាពនយោបាយជាជាងការបង្រួបបង្រួមជាតិ»។

លោកបន្តទៀតថា ប្រសិនបើនិយាយអំពីទិវា២៣តុលា គឺមិនខុសគ្នាពីអ្វីដែលគណបក្សកាន់អំណាចបានអះអាងថាបើគ្មានថ្ងៃ៧មករាទេក៏គ្មានសព្វថ្ងៃដែរ ហើយ ប្រសិនបើមិនមានកិច្ចព្រមព្រៀងទីក្រុងប៉ារីសទេ កម្ពុជាក៏មិនមានសន្តិភាពដូចរាល់ថ្ងៃដែរ។

លោកបន្ថែមថា៖ «ប្រហែលជាយើងឈ្លោះគ្នាហើយច្បាំងគ្នាទាល់តែខ្ទេចរឿងខ្លួនហើយក៏មិនដឹងថារស់ឬក៏នៅដែរបាទ សម្រាប់ខ្ញុំថ្ងៃ២៣តុលាវានៅតែជាគុណតម្លៃខ្ពស់សម្រាប់អ្វីដែលកម្ពុជាមានសព្វថ្ងៃបាទ ហើយទោះបីជាគណបក្សនយោបាយគាត់អបអរសន្តិភាព ខ្ញុំក៏គិតថាសន្តិភាពនេះមិនអាខកើតឡើងប្រសិនបើគ្មាន អើ២៣តុលាបាទ»។

លោក ឯម សុវណ្ណារ៉ា សាស្រ្តាចារ្យផ្នែកវិទ្យសាស្រ្តនយោបាយយល់ថា ការបង្កើតទិវាសន្តិភាពនៅកម្ពុជានេះ មិនមានអ្វីជាការទាស់ខុសនោះទេ។ ប៉ុន្តែលោកថា អាជ្ញាធរគួរតែប្រកាន់គោលការណ៍សន្តិភាព ចៀសវាងអំពើហិង្សាផ្សេងៗ។

លោកបន្ថែមថា៖ «ន័យវាសំខាន់គឺចង់ឲ្យពលរដ្ឋបណ្ដុះការស្រឡាញ់គ្នានៅក្នុងសន្តិភាព តែបើខ្ញុំបញ្ជាក់ថាអ្នកអនុវត្តច្បាប់ អាជ្ញាធររដ្ឋអំណាចនេះគួរប្រកាន់គោលការណ៍សន្តិភាព បង្ក្រាបបាតុកម្មបង្ក្រាបអីអានេះជាកិច្ចការមួយប្រាស់ចាកពីគោលការណ៍សន្តិភាព»។

ចាប់តាំងពីឆ្នាំ២០២០មក រដ្ឋាភិបាលបានសម្រេចលុបចោលថ្ងៃ២៣ តុលា លែងឱ្យមានការឈប់សម្រាកជាសាធារណៈ។ ២៣ តុលា តែងត្រូវបានប្រារព្ធឡើងដើម្បីរំឮកដល់កិច្ចព្រមព្រៀងសន្តិភាពទីក្រុងប៉ារីសក្នុងការបញ្ចប់សង្គ្រាមស៊ីវិលនៅកម្ពុជា ហើយភាគីហត្ថលេខីតម្រូវឱ្យរដ្ឋាភិបាលកម្ពុជាគោរពសិទ្ធិមនុស្ស និងប្រជាធិបតេយ្យ៕

ក្មេងស្រីអាយុ ៤ឆ្នាំម្នាក់កើតជម្ងឺផ្ដាសាយបក្សី H5N1

ផន ចន្ទ្រា (Phorn Chantrea) — Mon, 18 Dec 2023 15:10:02 +0000

ក្រសួងសុខាភិបាល បានជម្រាបសាធារណជនឱ្យបានជ្រាបថា មានអ្នកជម្ងឺផ្ដាសាយបក្សី១ករណីទៀត កើតលើកុមារីអាយុ៤ឆ្នាំម្នាក់នៅខេត្តកំពត ដែលមានវិជ្ជមានវីរុសផ្ដាសាយបក្សី (H5N1) នេះបើតាមការបញ្ជាក់ពីវិទ្យាស្ថានសុខភាពសាធារណៈនិងវិទ្យាស្ថានប៉ាស្ទ័រ។

តាមសេចក្ដីប្រកាសព័ត៌មានរបស់ក្រសួងសុខាភិបាលបានឱ្យដឹងថា កាលពីថ្ងៃទី២៤ ខែវិច្ឆិកា ឆ្នាំ២០២៣ មានកុមារីអាយុ៤ឆ្នាំម្នាក់បានឆ្លងជម្ងឺផ្ដាសាយបក្សីប្រភេទH5N1 នៅ ភូមិត្រពាំងឬស្សី ឃុំដំណាក់សុក្រំ ស្រុកដងទង់ ខេត្តកំពតដែលមានផ្ទះក្បែរស្ត្រីអាយុ២១ឆ្នាំដែលមានករណីឆ្លងជម្ងឺផ្ដាសាយបក្សី H5N1។

តាមសេចក្ដីប្រកាសដដែលបានបន្ថែមថា «តាមក្រុមឆ្លើយតបន្ទាន់ចម្រុះថ្នាក់ជាតិនិងថ្នាក់ក្រោមជាតិនៃក្រសួងសុខាភិបាល និងអាជ្ញាធរពាក់ព័ន្ធថា កុមារីនេះនាងបានកាន់មាន់ងាប់និងចាប់ផ្ដើមឈឺនៅថ្ងៃទី២៣ខែ វិច្ឆិកា ឆ្នាំ២០២៣ ដោយមានរោគសញ្ញាផ្លូវដង្ហើម ដូចជាគ្រុនក្ដៅ ពិបាកដកដង្ហើម ក្អក និងចេញកន្ទួលក្រហម ហើយកុមារីនេះកំពុងទទួលការព្យាបាលពីដោយឱសថតាម៊ីហ្លូ(Tamiflu)»។

ក្រសួងសុខាភិបាលបានបន្តទៀតថា នេះជាករណីវិជ្ជមានវីរុសផ្ដាសាយបក្សី H5N1 ហើយក្មេងស្រីនេះត្រូវបានបញ្ជូនមកព្យាបាលបន្តនៅមន្ទីរពេទ្យខេត្តកំពតនៅថ្ងៃទី២៥ ខែវិច្ឆិកា ឆ្នាំ២០២៣ បច្ចុប្បន្នកំពុងទទួលការព្យាបាលនិងថែទាំយ៉ាងយកចិត្តទុកដាក់ពីក្រុមគ្រូពេទ្យ។

តាមសេចក្ដីប្រកាសដដែលបានបន្ថែមទៀតថា «ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិនិងកំពុងសហការជាមួយក្រសួងកសិកម្ម រុក្ខាប្រមាញ់និងនេសាទ និងក្រសួងបរិស្ថាន អាជ្ញាធរគ្រប់លំដាប់ថ្នាក់ ប៉ូលីស និងដៃគូរខាងលើ បន្តអង្កេតស្រាវជ្រាវយ៉ាងសកម្មលើការកើតឡើងនូវជម្ងឺផ្ដាសាយបក្សីប្រភេទទាំងពីរដែលបានកើតឡើង និងធ្វើការឆ្លើយតបទៅតាមវិធីសាស្ត្រ និងពិធីសារបច្ចេកទេសបន្តការស្វែងរកប្រភពឆ្លង ទាំងសត្វ ទាំងមនុស្ស និងបន្តស្វែងរកករណីសង្ស័យនិងអ្នកប៉ះពាល់ដើម្បីកាត់បន្ថយការឆ្លងទៅអ្នកដទៃទៀតក្នុងសហគមន៍ ព្រមទាំងចែកជូនឱសថតាម៊ីហ្លូ(Tamiflu) ដល់អ្នកប៉ះពាល់ ជិតស្និត និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិកើតហេតុខាងលើ»។

ក្រសួងសុខាភិបាលបានបន្ថែមថា ជម្ងឺផ្ដាសាយបក្សី H5N1 ជាជម្ងឺមួយដែលជាធម្មតាចម្លងរវាងសត្វបក្សីឈឺ ទៅបក្សីផ្សេងទៀត ហើយជួនកាលវាឆ្លងពីបក្សីទៅមនុស្សតាមរយៈការប៉ះពាល់ជិតស្និតជាមួយបក្សីឈឺឬងាប់។ជម្ងឺផ្ដាសាយបក្សីលើមនុស្សជាជម្ងឺធ្ងន់ធ្ងរ ត្រូវព្យាបាលនៅបម្ទីរពេទ្យទាន់ពេលវេលា ទោះបីវាមិនឆ្លងពីមនុស្សទៅមនុស្ស តែវាអាចបម្លែងខ្លួនដូចនិងជម្ងឺផ្ដាសាយ តាមរដូវកាលផងដែរ។

តាមសេចក្ដីប្រកាសខាងលើបានបន្តថា «ក្រសួងសុខាភិបាល សូមក្រើនរំលឹកជាថ្មីម្ដងទៀតដល់ពលរដ្ឋទាំងអស់សុំយកចិត្តទុកដាក់ប្រុងប្រយ័ត្នល់ជម្ងឺផ្ដាសាយបក្សី ព្រោះជម្ងឺនេះនៅតែបន្តគំរាមកំហែងដល់សុខភាពពលរដ្ឋ ហើយសូមជម្រាបថា បើសិនមានអាការៈក្ដៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិប៉ះពាល់ជាមួយមាន់ ទាឈឺឬងាប់ក្នុងអំឡុងពេល ១៤ថ្ងៃ មុនថ្ងៃមានរោគសញ្ញា សូមមេត្តាកុំទៅជួបជុំកន្លែងឬទីប្រជុំជនដែលមានមនុស្សច្រើន និងត្រូវស្វែងរកការពិគ្រោះយោបល់និងពិនិត្យព្យាបាលនៅតាមមូលដ្ឋានដែលនៅជិតបំផុត»។

ក្រសួងសុខាភិបាលបានបន្ថែមថា វិធានការអប់រំរបស់រាជរដ្ឋាភិបាល រួមមាន លាងដៃឱ្យបានញឹកញ៉ាប់ជាមួយនិងសាប៊ូ និងទឹកមុនពេលបរិភោគអាហារ និងបន្ទាប់ពីប៉ះពាល់ជាមួយបក្សី ដាក់កុមារឱ្យឆ្ងាយនិងដាក់បក្សីឱ្យឆ្ងាយពីកន្លែងរស់នៅ កុំបរិភោគបក្សីឈឺឬងាប់៕

ភ្ញៀវទេសចរណ៍មកលេងរមណីយដ្ឋានភ្នំទឹកធំអំឡុងពេលបុណ្យអ៊ុំទូកនៅខេត្តកំពត

ផន ចន្ទ្រា (Phorn Chantrea) — Mon, 18 Dec 2023 14:58:09 +0000

នៅក្នុងខេត្តកំពត មានរមណីយដ្ឋានជាច្រើន ប៉ុន្តែមានរមណីយដ្ឋានមួយដែលទើបតែចាប់ផ្ដើមអភិវឌ្ឃន៍ និងកសាងនៅអំឡុង ខែមករា ឆ្នាំ២០២៣ ដោយព្រះចៅធិការវត្តភ្នំរាប ឈ្មោះ ភិក្ខុសង្ឃ សុត ដាវី ដែលមានទីតាំងស្ថិតនៅភូមិអន្លង់ថ្ងាន់ ឃុំឬស្សីស្រុកខាងកើត ស្រុកកំពង់ត្រាច ខេត្តកំពត (ជាប់ព្រំប្រទល់ កម្ពុជា វៀតណាម) ហើយមានភ្ញៀវទេសចរណ៍មកកំសាន្តច្រើននៅអំឡុងពេលបុណ្យអ៊ុំទូក។

លោក ពៅ មុត នាយរងប៉ុស្តិ៍នគរបានឬស្សីស្រុកបាននិយាយថា ទោះបីជារមណីយដ្ឋានទើបតែកសាងមែន តែមានភ្ញៀវទេសចរណ៍មកកំសាន្ត មិនថាថ្ងៃបុណ្យន ឬសៅរ៍ អាទិត្យទេ តែងតែមានអ្នកមកលេងជាហូរហែរនៅរមណីយដ្ឋាននេះ ភាគច្រើនអ្នកដែលមកលេងរមណីយដ្ឋាននេះគេមកលេងជាលក្ខណៈគ្រួសារ នាំប្រពន្ធកូនទៅលេង ក៏ត្រឡប់ទៅវិញ។

លោកបានបញ្ជាក់ថា៖ «មានភ្ញៀវមកលេងច្រើននៅថ្ងៃទី២៥ ២៦ ២៧នេះ ហើយការមកលេងនេះបានផ្ដល់ផលប្រយោជន៍ជាច្រើនដល់អ្នកភូមិ និងកាត់បន្ថយការធ្វើកម្មករចំណាកស្រុក គេបង្កើតឡើងក្នុងអំឡុង២០២៣ ហើយមានភ្ញៀវកំសាន្តច្រើនពេលថ្ងៃបុណ្យនិង សៅរ៍ អាទិត្យ ក្រៅពីនឹងមិនសូវមានទេ ហើយគាត់សង្ឃឹមជឿជាក់នឹងមានភ្ញៀវទេសចរណ៍មកទស្សនាច្រើន ដើម្បីឱ្យប្រជាពលរដ្ឋនៅភូមិនេះបានប្រកបមុខរបរលក់ដូរបានចំណូលផ្គត់ផ្គង់គ្រួសារ»។

លោកបានបន្ថែមទៀតថា ខ្ញុំសង្ឃឹមថារដ្ឋាភិបាលនិងជួយធ្វើផ្លូវប៉េតុងនៅរមណីយដ្ឋាននេះ សម្រាប់ការធ្វើដំណើរមកកំសាន្តរបស់ភ្ញៀវទេសចរណ៍ និងដើម្បីឱ្យរមណីយដ្ឋាននេះល្បីដូចរមណីយដ្ឋានផ្សេងៗទៀត៕

ក្រសួងរកឃើញឱសថក្លែងក្លាយ ៦មុខកំពុងចែកចាយនៅលើទីផ្សារអនឡាញ

ផន ចន្ទ្រា (Phorn Chantrea) — Mon, 18 Dec 2023 14:43:59 +0000

ក្រសួងសុខាភិបាលបានប្រកាសកាលពីពេលថ្មីៗនេះថា មន្រ្តីជំនាញនាយកដ្ឋានឱសថបានរកឃើញឱសថ ក្លែងក្លាយចំនួន៦មុខ ដែលកំពុងចរាចរនៅលើទីផ្សារអនឡាញ( Online) ស្ថិតនៅក្នុងកំពង់ចាម។

តាមសេចក្ដីជូនព័ត៌មានខាងលើបានឱ្យដឹងថា នៅថ្ងៃទី២៩ ខែវិច្ឆិកា ឆ្នាំ២០២៣ មន្ត្រីជំនាញនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាងនៃក្រសួងសុខាភិបាល សហការពីមន្ត្រីនានានៃរដ្ឋបាលខេត្តកំពង់ចាម ដោយបានការសម្របសម្រួលពីតំណាងអយ្យការអមសាលាដំបូងខេត្តកំពង់ចាម បានចុះបង្រ្កាបទីតាំងលក់ឱសថតាមអនឡាញ នៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម។

បច្ចុប្បន្នអជ្ញាធរបានបញ្ចូនជនសង្ស័យ ដែលវេចខ្ចប់ និងលក់ឱសថក្លែងក្លាយ ទៅសាលាដំបូងខេត្តកំពង់ចាម ដើម្បីបន្តនីតិវិធីច្បាប់។

ក្រសួងសុខាភិបាលបានបន្ថែមថា៖ «នៅទីតាំងខាងលើសមត្ថកិច្ចចម្រុះបានរកឃើញមានឧបករណ៍សម្រាប់ការវេចខ្ចប់ និងឱសថក្លែងក្លាយចំនួន ៦មុខមានសារធាតុសកម្មមិនត្រឹមត្រូវតាមឱសថដើមឡើយ មានដូចជា ១. NUTRIENT CALCIUM Tablet ២. NUTRIENT CALIUM Capsule ៣. NUTRIENT ANTACID Tablets ៤. SYMPTOMS ៥. CONSTIPAION និង៦.ថ្នាំបន្តក់ភ្នែក EYE PLUS»។

តាមសេចក្ដីជូនព័ត៌មានដដែលបន្តថា យោងតាមលទ្ធផលវិភាគគុណភាពរបស់មជ្ឈមណ្ឌលពិសោធន៍សុខាភិបាលបាលបានបញ្ជាក់ថាឱសថ NUTRIENT CALCIUM Tablet មានផ្ទុកសារធាតុសកម្មឱសថ Diclofenac Sodium និង NUTRIENT CALIUM Capsule មានផ្ទុកសារធាតុ Betamethasone ដែលមានផលប៉ះពាល់ធ្ងន់ធ្ងរដល់សុខភាព និងឈានដល់ការបាត់បង់អាយុជីវិតរបស់អ្នកប្រើប្រាស់ក្នុងករណីប្រើប្រាស់រយៈពេលយូរ។

ក្រសួងសុខាភិបាលបានបន្ថែមទៀតថា៖ «អនុលោមតាមច្បាប់ស្ដីពីការគ្រប់គ្រងឱសថ និងដើម្បីធានាបាននូវសុវត្ថិភាពដល់អ្នកប្រើប្រាស់ ក្រសួងសុខាភិបាលជម្រាបជូនពីវិធានការ និងការណែនាំដូចទៅ សូមសាធារណជនបញ្ឈប់ការទិញឱសថខាងលើ និងផលិតផលបំប៉នសុខភាព ឬអាហារបំប៉នសុខភាពគ្រប់ប្រភេទ តាមបណ្ដាញសង្គម ដូចជា Facebook, Tiktok, Telegram និង Youtube ព្រោះឱសថ និងផលិតផលទាំងនោះពុំអាចធានាបាននូវគុណភាព និងសុវត្ថិភាពឡើយ»។

ក្រសួងសុខាភិបាលបានបន្តទៀតថា ដើម្បីជៀសវាងការខាតបង់ថវិកាផ្ទាល់ខ្លួន និងប៉ះពាល់សុខភាពទៀតនោះ សូមសាធារណជនទិញឱសថ និងផលិតផលបំប៉នសុខភាព ឬអាហារបំប៉នសុខភាព ដែលមានលេខទិដ្ឋាការ និងបញ្ជិកាពីក្រសួងសុខាភិបាលពីឱសថស្ថាន ឬឱសថរងស្ថានដែលស្របច្បាប់៕

កម្មកររោងចក្រ ML នៅប៉ោយប៉ែតតវ៉ាជាថ្មីក្រោយថៅកែពន្យារពេលបើកប្រាក់ខែ

ផន ចន្ទ្រា (Phorn Chantrea) — Thu, 09 Nov 2023 02:37:51 +0000

កម្មកររោងចក្រកាត់ដេរសម្លៀកបំពាក់ ML នៅតំបន់សេដ្ឋកិច្ចពិសេសប៉ោយប៉ែតជិត៤០០នាក់ បានតវ៉ាទាមទារឱ្យថៅកែបើកប្រាក់ខែទៀងទាត់ ផ្ដល់ប្រាក់រង្វាន់ និងឱ្យសម្រាកថ្ងៃបុណ្យជាតិ បន្ទាប់ពីក្រុមហ៊ុនពន្យារពេលបើកប្រាក់បៀវត្សជាញឹកញាប់។

លោក គឹម តូនិច តំណាងកម្មករក្នុងការតវ៉ានោះបានប្រាប់ Newsroom Cambodia ថា នៅព្រឹកថ្ងៃទី៨ វិច្ឆិកានេះថា ក្រុមកម្មករបានទៅប្រមូលម្ដុំគ្នាមុខរោងចក្រអឹមអិល អ៊ិនធីមេត អឹភែរឹល (ML Intimate Apparel) ដោយសារថៅកែរោងចក្រនេះលើកថ្ងៃបើកប្រាក់ខែកម្មករពីថ្ងៃទី៨ ខែវិច្ឆិកា ទៅថ្ងៃទី១០ ខែវិច្ឆិកា។

លោកបានបន្តថា ក្រុមកម្មករក៏បានទាមទារឱ្យថៅកែរោងចក្របើកប្រាក់រង្វាន់សម្រាប់ការធ្វើការពេញលេញ និងស្នើឱ្យរោងចក្រអនុញ្ញាតឱ្យសម្រាកនៅថ្ងៃបុណ្យជាតិ ដោយកន្លងមករោងចក្រនេះតម្រូវឱ្យកម្មករធ្វើការនៅថ្ងៃបុណ្យ និងលើកថ្ងៃសម្រាកទៅថ្ងៃផ្សេង។

លោក តូនិច បានប្រាប់ថា ខាងរោងចក្រព្រមបើកប្រាក់ខែ និងប្រាក់រង្វាន់ជូនកម្មករបន្ទាប់ពីមានការសម្របសម្រួលពីអភិបាលរងប៉ោយប៉ែត។

លោកនិយាយថា៖ «គាត់ [អភិបាលរងប៉ោយប៉ែត] ចូលទៅប្រជុំជាមួយខាងនិយោជកមួយភ្លែត គាត់ចេញមកវិញគាត់បកស្រាយមកថាក្រុមហ៊ុនគាត់ព្រមបើកលុយឱ្យល្ងាចហ្នឹង ហើយឱ្យយើងរំសាយទៅ បើសិនជាក្រុមហ៊ុនមិនបើកឱ្យល្ងាចហ្នឹងទេចាំយើងមានវិធានការស្អែកបន្តទៀត»។

ចំណែកអ្នកស្រី ស សាវឿន ជាកម្មកររោងចក្រ ML ដែលបានចូលរួមការតវ៉ានោះបានប្រាប់ថា កាលពីថ្ងៃបុណ្យភ្ជុំបិណ្ឌកន្លងទៅ ខាងរោងចក្របានលើកពេលសម្រាក និងកាត់លុយរង្វាន់លើតួនាទីរបស់អ្នកស្រី។

លោកស្រី សាវឿន ថា៖ «គេឱ្យលុយតួនាទីលើម៉ាស៊ីន១០ដុល្លារក្នុងមួយខែ។ ដល់ខែភ្ជុំថ្ងៃបុណ្យថ្ងៃទាន ខាងក្រុមហ៊ុនអត់ឱ្យពួកខ្ញុំឈប់ទេ លើកថ្ងៃឱ្យពួកខ្ញុំឈប់ ដល់ពេលហើយកាត់លុយតួនាទីពួកខ្ញុំ អ៊ីចឹងរាល់ដងអត់ដែលកាត់ទេ ឈប់៤ថ្ងៃទៅ៥ថ្ងៃ១អាទិត្យអីអត់ដែលកាត់ទេ តែលើកនេះកាត់លុយតួនាទីពួកខ្ញុំអស់រលីង […] ហើយពួកខ្ញុំទាមទារលុយប្រាក់ខែផង លុយប្រាក់ខែពន្យារពួកខ្ញុំច្រើនដងពេក»។

ចំណែកឯលោក តឹក សុខជា ជាកម្មកររោងចក្រ ML ម្នាក់ទៀតប្រាប់ថា រោងចក្រ ML បានពន្យារពេលបើកប្រាក់ខែពីរដងមកហើយ។

លោក តឹក សុខជា៖ «គាត់លើកម្ដងហើយ កាលភ្ជុំយើងមិនបើកពីរដង ថ្ងៃទី២២[ខែតុលា] និងថ្ងៃទី៨ [វិច្ឆិកា] គាត់ពន្យារដល់ថ្ងៃទី២៥ អ៊ីចឹងកម្មករអត់មាត់ទេ កម្មករគាត់ធម្មតា ដល់ពេលថ្ងៃទី៨ [វិច្ឆិកា]នេះត្រូវបើក គាត់ថាទាល់តែថ្ងៃទី១០បានបើកឱ្យ អ៊ីចឹងកម្មករអត់ព្រមត្រង់ហ្នឹង»។

រដ្ឋបាលរបស់រោងចក្រ ML លោក ងួន ស៊ីវត្ថា ប្រាប់ថា រោងចក្រ ML បានដោះស្រាយបញ្ហាបើកប្រាក់ខែជូនកម្មករយឺតរួចរាល់ហើយ។

លោក ងួន ស៊ីវត្ថា ថា៖ «យើងដោះស្រាយហើយអស់ហើយទាក់ទងជាមួយអាលុយដែលយើងបើកយឺតឱ្យគាត់ [កម្មករ]។ តាមពិតទៅយើងមានបញ្ហាតិចតួចទាក់ទងចរន្តសាច់ប្រាក់ ប៉ុន្តែដោយសង្កេតឃើញពួកគាត់អ៊ីចឹងទៅ យើងបានរៀបចំ ខាងគណៈគ្រប់គ្រងគាត់បានព្យាយាមទាក់ទងទៅខាងលើហ្នឹងគឺរៀបចំហើយអស់ហើយតើ យើងបើកទាន់ពេលវេលារបស់គាត់ធម្មតាតើថ្ងៃហ្នឹង»។

លោក ងួន ស៊ីវត្ថា បានច្រានចោលចំពោះការលើកឡើងថាមិនផ្ដល់ប្រាក់អត្ថប្រយោជន៍ជូនកម្មករ ហើយលោកថា រោងចក្របានផ្ដល់ឱ្យកម្មករត្រឹមត្រូវតាមច្បាប់កំណត់។

ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តបន្ទាយមានជ័យ លោក នួន ស៊ីណា បានឱ្យដឹងថា រោងចក្រ ML មានបញ្ហាបង្វិលលុយយឺត ហើយបានពន្យារថ្ងៃបើកប្រាក់ខែដល់កម្មករពីថ្ងៃទី៨ វិច្ឆិកា ទៅថ្ងៃទី១០ វិច្ឆិកាវិញ ធ្វើឱ្យកម្មករមិនសុខចិត្តហើយផ្ទុះកូដកម្មដោយមានកូដករប្រមាណ៤៦០បានចូលរួម។ លោកបន្តថា បន្ទាប់ពីមានការសម្របសម្រួល និងតាមដានពីអាជ្ញាធរ ភាគីរោងចក្របានបើកប្រាក់ខែឱ្យកម្មករទាំងអស់ចំនួន៥៧០នាក់រួចហើយនៅល្ងាចថ្ងៃទី៨ វិច្ឆិកា។

លោក នួន ស៊ីណា បានបញ្ជាក់ថា គ្មានការកាត់ប្រាក់អត្ថប្រយោជន៍របស់កម្មករទេ ហើយលោកបានស្នើកម្មកររាយការណ៍ទៅមន្ទីរការងារក្នុងករណីដែលនាយកជកកាត់ប្រាក់អត្ថប្រយោជន៍ណាមួយ។

ជុំវិញការតវ៉ានេះ លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សរបស់អង្គការសង់ត្រាល់លើកឡើងថា កន្លងមកមានការផ្ទុះការតវ៉ានៅរោងចក្រ ML ជាច្រើនដង ដោយសារការរំលោភសិទ្ធិការងារ។

លោក ឃុន ថារ៉ូ ថា៖ «នៅក្រុមហ៊ុន ML នេះមានបញ្ហាច្រើនណាស់ មិនមែនតែបញ្ហាការមិនបើកប្រាក់ឈ្នួលឱ្យបុគ្គលិកកម្មករនិយោជិតទេ វាមានករណីរំលោភសិទ្ធិការងារធ្ងន់ធ្ងរ រួមទាំងការបញ្ឈប់ថ្នាក់ដឹកនាំសហជីព លក្ខខណ្ឌការងារអាក្រក់ ហើយកន្លងមកហ្នឹងគឺមិនមែនជាលើកទីមួយទេដែលកម្មករគាត់ផ្ទុះការតវ៉ាទាមទារ»។

លោក ឃុន ថារ៉ូ បានបន្ថែមថា នៅរោង ML មានការមិនគោរពលក្ខខណ្ឌការងារ ដូចជាការមិនឱ្យកម្មករឈប់សម្រាក និងការធ្វើទុកបុកម្នេញលើថ្នាក់ដឹកនាំសហជីព ដោយបានបណ្ដេញប្រធានសហជីពចេញពីការងារជាដើម៕

Q&A: ផលវិបាកនៃការប្រើប្រាស់គ្រឿងញៀន

ផន ចន្ទ្រា (Phorn Chantrea) — Fri, 03 Nov 2023 09:00:34 +0000

គ្រឿងញៀន កំពុងតែជាបញ្ហាប្រឈមខ្លាំងមួយសម្រាប់ក្នុងសង្គមកម្ពុជា។ ស្ទើតែរៀងរាល់ថ្ងៃគេតែងឃើញមានការបង្រ្កាបអ្នកជួញដូរ និងប្រើប្រាស់គ្រឿងញៀនជាច្រើនករណី ប៉ុន្តែការជួញដូរ និងប្រើប្រាស់នៅតែបន្តកើតមាន ខណៈគ្រឿងញៀនជះឥទ្ធិពលអាក្រក់ដល់ការរីកចម្រើនរបស់ប្រទេស។

ខាងក្រោមនេះគឺ ជាកិច្ចសម្ភាសន៍ផ្ទាល់រវាងឧត្ដមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ជាមួយកញ្ញា ផន ចន្ទ្រា សិក្ខាកាមមកពីញូសន៍រូមខេមបូឌា (Newsroom Cambodia)៖

Q: ជម្រាបសួរលោកឧត្ដមសេនីយ៍ មាស វីរិទ្ធ!

A: បាទជម្រាបសួរ!

Q: តើការប្រើប្រាស់គ្រឿងញៀននៅកម្ពុជាក្នុងពេលបច្ចុប្បន្នមានស្ថានភាពបែបណាដែរ?

A: បច្ចុប្បន្នកំពុងរីករាលដាលដល់ស្រទាប់យុវវ័យ ជាពិសេសយុវជនដែលមានអាយុក្នុងចន្លោះពី១៨ទៅ៣៥ឆ្នាំ ហើយការសេពគ្រឿងញៀននេះវាមានលក្ខណៈជាច្រើនប្រភេទនៃគ្រឿងញៀន ប៉ុន្តែយើងបានធ្វើការកត់សម្គាល់ភាគច្រើនអ្នកប្រើប្រាស់ដែលមានមុខរបរជាកម្មករ ឬក៏ជាអ្នកមិនមានការងារធ្វើពិតប្រាកដ ឬក៏អ្នកធ្វើកិច្ចការងារធ្ងន់ ហើយពាក់ព័ន្ធទៅនឹងមុខរបរពេលរាត្រី ដូចជាបម្រើការកំសាន្តសប្បាយ អ្នកបើកបររថយន្តធុនធំទាំងដឹកទំនិញ ឬក៏ដឹកកម្មករ។

អ៊ីចឹងគាត់ប្រើប្រាស់ប្រភេទមេតង់ពីតាមីន នៅក្នុងរូបភាពជក់ មេតង់ពីតាមីនអាយ និងគ្រាប់ ឯសារធាតុញៀនផ្សេងទៀតដូចជាហេរូអ៊ីន ប្រើប្រាស់ដោយចាក់ ប៉ុន្តែមានមនុស្សតិចដែលបានប្រើប្រាស់ប្រភេទហេរូអ៊ីនចាក់បញ្ចូលតាមសសៃឈាម គឺយើងសង្កេតឃើ់ញថាមានអ្នកមកទទួលសេវាបន្សាបព្យាបាលសារធាតុញៀនហេរូអ៊ីននេះ ប៉ុន្មានក្នុងរង្វង់ពី៧០ទៅ៨០នាក់សម្រាប់អ្នកដែលមកទទួលសេវា អាចមានអ្នកមិនមកទទួលសេវាព្យាបាលអាចមានច្រើនតែមិនលើសពី១០០០នាក់ទេនៅក្នុងរាជធានីភ្នំពេញ។

ហើយប្រភេទថ្នាំញៀនមួយទៀតនោះ គឺប្រភេទគ្រឿងញៀនដែលគេប្រើប្រាស់នៅតាមកន្លែងកំសាន្តសប្បាយ មានដូចជាថ្នាំអ៊ិចស្តាស៊ីដែលគេហៅថា MDMA ឬ MVA ឬក៏ MDEA ដែលទាំងអស់និងគេហៅថាថ្នាំញៀនប្រភេទអ៊ិចស្តាស៊ីស និងគ្រឿងញៀនមួយមុខទៀតនោះគឺប្រភេទកេតាមីន ដែលគេហៅក្រៅថាម្សៅK អានឹងគេប្រើប្រាស់នៅកន្លែងសប្បាយហើយក៏សង្កេតឃើញថាមានការប្រើប្រាស់ថ្នាំញៀនទាំងពីរមុខនេះក៏មានលាយផ្សំជាមួយមេតង់ពីតាមីនដែរ។

ដោយសារមេតំហ្វេតាមីនវាជាសារធាតុញៀនមួយដែលធ្វើឲ្យអ្នកប្រើប្រាស់ហ្នឹងយល់ច្រឡំថាមិនធ្វើឲ្យងងុយគេង ថាវាមានកម្លាំង ថាវានឹងមិនចាំបាច់ហូប ប៉ុន្តែការប្រើប្រាស់យូរទៅវានឹងធ្វើឲ្យញៀន ហើយអ្នកញៀនទាំងអស់ទោះបីថ្នាំញៀនប្រភេទណាក៏ដោយ គាត់នឹងក្លាយជាទាសករថ្នាំញៀនរហូតដែលគេហៅថាញៀន។

Q: តើការប្រើប្រាស់គ្រឿងញៀនបច្ចុប្បន្នមានការកើនឡើង ឬថយចុះ?

A: នៅពេលបច្ចុប្បន្ននេះរាជរដ្ឋាភិបាលដាក់ចេញដាក់នូវផែនការប្រយុទ្ធប្រឆាំងគ្រឿងញៀនខុសច្បាប់ចំនួន៨លើកជាប់គ្នាហើយ និងត្រៀមអនុវត្តបន្តទៀតអាចនឹងទី៩ អ៊ីចឹងទេចំនួនអ្នកប្រើប្រាស់គ្រឿងញៀនមកដល់ពេលនេះគឺស្ថិតនៅក្នុងស្ថានភាពមួយ នឹងមិនមានការកើនឡើង តែក៏មិនមានសញ្ញាណាមួយបង្ហាញអំពីការថយចុះដែរ។ អ៊ីចឹងទាមទារឲ្យយើងទាំងអស់គ្នាខិតខំសហការគ្នា រួមដៃគ្នាធ្វើការប្រយុទ្ធប្រឆាំងជាពិសេសទប់ស្កាត់កុំឲ្យមានការប្រើប្រាស់គ្រឿងញៀនឡើងវិញ ឬក៏រីករាលដាលនៃការប្រើប្រាស់គ្រឿងញៀនចំពោះអ្នកដែលមិនស្ថិតនៅក្រោមឥទ្ធិពលគ្រឿងញៀន ឬក៏អ្នកដែលញៀនគ្រឿងញៀន បានសេចក្ដីថា អ្នកដែលមិនដែលប្រើកុំឲ្យគាត់ក្លាយខ្លួនទៅជាអ្នកប្រើ តាមរយៈការអូសទាញ អ៊ីចឹងអានេះជាចំណុចសំខាន់មួយ។

ប៉ុន្តែតាមតួលេខដែលអាជ្ញាធរជាតិប្រយុទ្ធប្រឆាំងគ្រឿងញៀនទទួលបាន មានចំនួនអត់លើសពីពីរម៉ឺននាក់ ហើយក៏មិនឃើញមានថយចុះក្រោមមួយម៉ឺនប្រាំបីពាន់នាក់ដែរ។ នេះជាចំនួនអ្នកញៀនគ្រឿងញៀនដែលយើងមានស្ថិតិមានការគ្រប់គ្រង មានការជូនជាដំណឹងពីមូលដ្ឋាន។ ប៉ុន្តែវាអាចមានចំនួនអ្នកប្រើប្រាស់ដែលគេអត់ដឹងអាចមានលើសចំនួនពី២ម៉ឺននាក់ និងអាច២ម៉ឺនាក់គុណ២ ឬគុណ៣ អាស្រ័យទៅលើថា តើនៅក្នុងមូលដ្ឋានហ្នឹង ក្នុងចំណោមអ្នកប្រើប្រាស់គ្រឿងញៀនមានបីនាក់គេរាយការណ៍មកតែម្នាក់ក៏មិនដឹងឬមួយក៏យ៉ាងម៉េច ហ្នឹងវាអាស្រ័យទៅលើអ្នកនៅមូលដ្ឋានទេដែលដឹង ឬក៏អាណាព្យាបាលទេដែលដឹង។

បើសិនឥឡូវហ្នឹងយើងត្រៀមបង្កើតប្រព័ន្ធ App មួយដើម្បីទទួលព័ត៌មាន យើងកំពុងតែរៀបចំ តិចទៀត ប្រហែលជាសប្ដាហ៍ក្រោយ Hot line និងApp មួយទទួលព័ត៌មានមួយវាមានមួយជាប្រព័ន្ធទូរស័ព្ទរាយការណ៍ ហើយ App មួយទៀតអ្នកជំនាញកំពុងតែកសាង ហើយនិងរកឈ្មោះដើម្បីដាក់។

Q: តើគ្រឿងញៀនបង្កគ្រោះថ្នាក់ដល់អ្នកប្រើប្រាស់ដូចម្ដេចខ្លះ?

A: ជារួមគ្រឿងញៀនបង្កគ្រោះថ្នាក់ទៅដល់អ្នកប្រើប្រាស់ទាំងសុខភាពផ្លូវចិត្ត និងសុខភាពផ្លូវកាយ គ្រោះថ្នាក់សុខភាពផ្លូវចិត្តធ្វើឲ្យវង្វេងវង្វាន់ស្មារតី ប៉ះពាល់ទៅលើប្រព័ន្ធសសៃប្រសាទឬក៏ប៉ះពាល់ប្រព័ន្ធផ្លូវចិត្តរបស់បុគ្គលដែលប្រើប្រាស់ ដោយសារឥទ្ធិពលរបស់សារធាតុញៀននឹង វាមានភាពទាក់ទាញខ្ពស់ ហើយនាំឲ្យអ្នកប្រើប្រាស់ងាយវង្វេងវង្វាន់ដោយសារឥទ្ធិពលរបស់វា។

ហើយមួយទៀតកាលណាប្រើប្រាស់យូរៗទៅ វានឹងធ្វើឲ្យប៉ះពាល់ដល់សុខភាពរូបកាយ អ៊ីចឹងដំបូងវាធ្វើឲ្យប្រែប្រួលផ្លូវចិត្ត និងដំណាក់កាលចុងក្រោយវាធ្វើឲ្យប៉ះពាល់ដល់រូបកាយ ដូចជាការចុះស្គមស្គាំង ឬក៏កើតជម្ងឺឈឺថ្កាត់ទៅលើសរីរាង្គផ្សេងៗ ដែលបង្កឡើងដោយការប្រើប្រាស់គ្រឿងញៀន អ៊ីចឹងគ្រឿងញៀនផ្ដល់ផលអាក្រក់ធ្វើឲ្យមនុស្សវង្វេងផ្លូវចិត្ត ឬក៏ភាន់ភាំងវិញ្ញាណ ក្រោមឥទ្ធិពលនៃសារធាតុញៀននៅពេលដែលគេប្រើប្រាស់។

Q: តើផលវិបាកអ្វីខ្លះដែលកើតមានលើសង្គម ដែលបណ្ដាលពីការប្រើប្រាស់គ្រឿងញៀន?

A: អ្វីដែលកើតឡើងក្នុងសង្គមគឺការខ្ជះខ្ជាយថវិកា និងការបង្កអំពើហិង្សានៅក្នុងគ្រួសារ អំពើហិង្សានៅក្នុងសហគមន៍ និងនៅក្នុងមូលដ្ឋាន ហើយបង្កឲ្យមានប៉ះពាល់ទៅលើសុខភាពផ្ទាល់ខ្លួន ហើយវាជះឥទ្ធិពល។ កាលណាអ្នកហ្នឹងប្រើប្រាស់គ្រឿងញៀនគឺត្រូវតែទិញ ហើយគ្រឿងញៀនគេផលិតមកថោក ប៉ុន្តែដោយសារភាពទាក់ខ្ពស់ និងចំណុចអូសទាញអារម្មណ៍ទៅលើអ្នកប្រើប្រាស់ ធ្វើឲ្យបុគ្គលក្លាយទៅជាអ្នកញៀន អ៊ីចឹងត្រូវតែអាស្រ័យវាមួយថ្ងៃយ៉ាងតិចមួយដង យូរទៅមួយថ្ងៃពីរដង យូរទៅមួយថ្ងៃបីដង យូរទៅមួយថ្ងៃប៉ុន្មានដងក៏បានដែរពេលដែលស៊ាំនឹងសារធាតុញៀន។

អ៊ីចឹងគាត់ត្រូវចំណាយលុយទិញ មួយថ្ងៃគាត់ប្រើប្រាស់អស់ប៉ុន្មាន ឧទាហរណ៍ថាពីរម៉ឺន ចុះបើពីរថ្ងៃអស់បួនម៉ឺន ចុះបើមួយថ្ងៃបីលើកអស់ប្រាំមួយម៉ឺន ចុះពេលគាត់ស៊ាំនិងសារធាតុញៀនប្រើម៉ានក៏បាន ចឹងមានលុយម៉ានក៏អស់ ហើយគាត់មិនអាចផលិតលុយបានទេ។ គាត់ត្រូវធ្វើសកម្មភាពផ្សេងៗដើម្បីបានលុយដើម្បីបានទៅទិញថ្នាំញៀន ដូចជា ឆបោក លួចទ្រព្យសម្បត្តិក្នុងផ្ទះ បោកប្រាស់មិត្តភក្តិ បោកប្រាស់ឪពុកម្ដាយ លួចរបស់របរពីក្នុងផ្ទះយកទៅលក់ហើយយូរទៅអស់របស់របរក្នុងផ្ទះ ទៅលួចអ្នកជិតខាងអស់ពីលួចអ្នកជិតខាង គាត់ទៅធ្វើសកម្មភាពផ្សេងៗផ្ទុយនឹងច្បាប់ អ៊ីចឹងវាធ្វើឲ្យអសន្តិសុខនៅក្នុងមូលដ្ឋាន អ៊ីចឹងមូលដ្ឋានមិនមានសន្តិសុខ មិនមានសណ្ដាប់ធ្នាប់ ហើយខ្លួនឯងមិនមានការអភិវឌ្ឍទេ ពីព្រោះថាអ្វីៗ និងធនធានដែលមាន គឺយកទៅបម្រើអ្នកជួញដូរគ្រឿងញៀន។

Q: តើការព្យាបាលអ្នកញៀនគ្រឿងញៀនអាចធ្វើឡើងតាមវីធីណាខ្លះ?

A: បច្ចុប្បន្នហ្នឹងមានវិធីជាច្រើនពាក់ព័ន្ធទៅនឹងការព្យាបាល។ ចំណុចដែលសំខាន់ខ្ញុំបានលើកឡើងហើយថាការប្រើប្រាស់គ្រឿងញៀនធ្វើឲ្យប៉ះពាល់ដល់សុខភាពផ្លូវចិត្ត គឺថាក្រសួងសុខាភិបាលគេមាននាយកដ្ឋានមួយនាយកដ្ឋានបំពានសុខភាពផ្លូវចិត្តនឹងបំពានគ្រឿងញៀន អ៊ីចឹងវានៅក្នុងចង្កោមគ្រូពេទ្យផ្នែកចិត្តសាស្រ្ត ដែលមានលទ្ធភាពក្នុងការព្យាបាល អ៊ីចឹងគេព្យាបាលដោយផ្អែកទៅលើរោគសញ្ញាញៀន រួចហើយគេប្រើប្រាស់ថ្នាំដែលមានឥទ្ធិពលគ្របដណ្ដប់ទៅលើរោគសញ្ញាញៀនទាំងអស់នឹង ដូចជា ជម្ងឺបាក់ទឹកចិត្ត ជម្ងឺធ្វើឲ្យប្រព័ន្ធសសៃប្រសាទខុសប្រក្រតី អ៊ីចឹងគេប្រើប្រាស់ថ្នាំព្យាបាលទៅតាមរោគសញ្ញានឹង វាអាស្រ័យទៅលើគ្រូពេទ្យដែលគាត់ធ្វើការពិនិត្យជម្ងឺទៅលើអ្នកញៀននឹង ហើយគេផ្ដល់ថ្នាំព្យាបាលទៅតាមនោះ។

ដោយឡែកចំពោះពពួកញៀនប្រភេទហេរូអ៊ីន អានឹងគេព្យាបាលដោយឱសថផ្សេង អ៊ីចឹងមានឱសថព្យាបាលផ្សេងៗគ្នាក្នុងការព្យាបាល ប៉ុន្តែទាមទារពេលវេលាវែងឆ្ងាយដើម្បីធ្វើឲ្យគាត់អាចមានអាការៈជាប្រក្រតី ហើយអាចបំភ្លេចការប្រើប្រាស់គ្រឿងញៀនបាន ហើយចំណុចសំខាន់ធ្វើយ៉ាងណាក្នុងការព្យាបាលជាហើយ អ្នកញៀននោះមិនលាប់ទៅប្រើប្រាស់ថ្នាំញៀនឡើងវិញនោះគឺជាប្រសិទ្ធភាពមួយ។

ការព្យាបាល និងវិធីសាស្រ្តព្យាបាល និងថ្នាំព្យាបាល វាអាស្រ័យទៅលើប្រភេទគ្រឿងញៀនដែលគេប្រើ អាស្រ័យទៅលើវិធីសាស្ត្រដែលគេប្រើប្រាស់គ្រឿងញៀននឹងទៀត ថាតើគេប្រើប្រាស់ដោយចាក់ ដោយជក់ ដោយលេប ឬមធ្យោបាយយ៉ាងមិច ហើយនិងមួយទៀតអាស្រ័យទៅលើភាពសុទ្ធនៃគ្រឿងញៀនដែរ ព្រោះគ្រឿងញៀនវាមានភាពសុទ្ធរបស់វា ប្រសិនបើគេប្រើប្រាស់ថ្នាំញៀនដែលមានភាពសុទ្ធកម្រិតខ្ពស់ នឹងធ្វើឲ្យគេឆាប់ញៀននិងក្លាយខ្លួនជាអ្នកញៀនខ្លាំង ចឹងការព្យាបាលវាទាមទារពេលវេលាទៅតាមនិងដែរ ហើយមិនត្រឹមតែប៉ុណ្ណោះវាក៏អាស្រ័យទៅបរិស្ថានដែលនៅជុំវិញ។

ប្រសិនបើបរិស្ថានជុំវិញនឹង សំបូរអ្នកប្រើប្រាស់ថ្នាំញៀនយូរឬឆាប់មនុស្សភាគច្រើនងាយធ្លាក់ខ្លួនតាមរយៈការអូសទាញផ្សេងៗទៅជាអ្នកប្រើប្រាស់ថ្នាំញៀនទៅតាមនិងដែរ ចឹងបរិស្ថានជុំវិញក៏ជាកត្តាមួយជំរុញឲ្យអ្នកប្រើប្រាស់ថ្នាំញៀននឹង គាត់ស្ថិតនៅក្នុងស្ថានភាពធ្ងន់ធ្ងរ ស្ថិតនៅក្នុងស្ថានភាពកណ្ដាល ឬក៏ស្ថិតនៅក្នុងស្ថានភាពណាមួយ។ ប៉ុន្តែទោះជាយ៉ាងណាឲ្យតែពាក្យថាញៀនគឺដឹងតែធ្ងន់ មានកម្រិតធ្ងន់នៅក្នុងហ្នឹងទៀត អត់មានថាកម្រិតស្រាលអីទេ តើញៀនហើយគឺធ្ងន់ធ្ងរហើយធ្ងន់ធ្ងរមានកម្រិតធ្ងន់លេខមួយ ធ្ងន់លេខពីរ លេខបី ប៉ុន្តែនៅតែធ្ងន់អ៊ីចឹង។

Q: តើរដ្ឋាភិបាលមានយុទ្ធសាស្ត្របែបណាខ្លះ ដើម្បីទប់ស្កាត់និង ដោះស្រាយបញ្ហាគ្រឿងញៀននៅកម្ពុជា?

A: បច្ចុប្បន្នមានយុទ្ធសាស្ត្រចំនួន៥។ ទី១កាត់បន្ថយតម្រូវការគ្រឿងញៀន បានសេចក្ដីថាធ្វើយ៉ាងណាឲ្យប្រជាពលរដ្ឋ ឬបុគ្គលគ្រប់រូប បដិសេធមិនត្រូវការគ្រឿងញៀន។

ទី២ការកាត់បន្ថយការផ្គត់ផ្គង់គ្រឿងញៀន ធ្វើយ៉ាងណាឲ្យមន្ត្រីអនុវត្តច្បាប់ មន្ត្រីដែលមានការពាក់ព័ន្ធក្នុងការបង្ក្រាបនឹង ទប់ស្កាត់កុំឲ្យកើតមានការដាំដុះ ការផលិត កែច្នៃ ការកែច្នៃផលិត ការចរាចរ ការរក្សាទុក ការជួញដូរនៅលើទីផ្សារ។ តែកាលណាមានអ្នកផ្គត់ផ្គង់ វាធ្វើឲ្យមានអ្នកជួញដូរ កាលណាមានអ្នកជួញដូរគាត់ត្រូវធ្វើសកម្មភាពអូសទាញ ជាពិសេសយុវជន ឬក៏អ្នកដែលមិនធ្លាប់ មិនធ្លាប់ស្គាល់តាមមធ្យោបាយផ្សេងៗឲ្យមកប្រើប្រាស់គ្រឿងញៀន។ អ៊ីចឹងយុទ្ធសាស្រ្តទី២ហ្នឹងគឺកាត់បន្ថយការផ្គត់ផ្គង់គ្រឿងញៀន។

យុទ្ធសាស្រ្តទី៣ គឺការខិតខំលើកកម្ពស់ប្រសិទ្ធភាពព្យាបាលស្ដារនីតិសម្បទា អ៊ីចឹងបានសេចក្ដីថាបើមានអ្នកញៀនគ្រឿងញៀនត្រូវខិតខំជួយគាត់ព្យាបាលស្ដារនីតិសម្បទាគាត់ឲ្យមានភាពប្រក្រតី ហើយធ្វើដើម្បីធ្វើសមាហរន្តកម្មពួកអ្នកជាសះស្បើយទៅក្នុងសហគមន៍វិញ។

ហើយចំណុចទី៤ហ្នឹង ពង្រឹងប្រសិទ្ធភាពអនុវត្តច្បាប់ បានសេចក្ដីថាធ្វើម៉េចពង្រឹង និងលើកកម្ពស់ប្រសិទ្ធភាពការងារអនុវត្តច្បាប់ គឺត្រូវធ្វើការបណ្ដុះបណ្ដាលបំពាក់ជំនាញ និងបំពាក់បទពិសោធន៍ទៅដល់នគរបាលយុត្តិធម៌ ដើម្បីឲ្យគាត់ចេះ និងមានសមត្ថភាព ដើរទាន់ទៅនឹងសភាពការគ្រឿងញៀនដែលមានការវិវត្តប្រែប្រួលពីមួយថ្ងៃទៅមួយថ្ងៃ។

ហើយយុទ្ធសាស្ត្រទី៥ បង្កើន និងលើកកម្ពស់កិច្ចសហប្រតិបត្តិការអន្តរជាតិ ដោយសារបញ្ហាគ្រឿងញៀនមិនមានអ្នកណាមួយទទួលបានជោគជ័យទេក្នុងការប្រយុទ្ធប្រឆាំងគ្រឿងញៀន ទោះបីប្រទេសមហាអំណាចក៏ដោយ ត្រូវតែមានកិច្ចសហការគ្នាទៅវិញទៅមក ដើម្បីមានប្រសិទ្ធភាព។ មកដល់ពេលនេះមិនទាន់មានប្រទេសណាមួយដែលមានបទពិសោធក្នុងការរៀបចំវិធីសាស្ត្រទប់ស្កាត់កុំឲ្យមានការរីករាលដាលនៃការប្រើប្រាស់គ្រឿងញៀននៅក្នុងប្រទេសរៀងៗខ្លួនៗ និងមានប្រសិទ្ធភាព គឺមិនទាន់មានទេ ទោះជាប្រទេសដែលមានសាសនាតឹងរ៉ឹងក៏ដោយ។

Q: ច៎ា! សូមអរគុណលោកឧត្ដមសេនីយ៍ មាស វីរិទ្ធ!

A: បាទ! អរគុណ៕

Voxpop: ទស្សនៈពលរដ្ឋលើការបើកដំណើរការស្ពានកោះពេជ្រ-កោះនរា

ផន ចន្ទ្រា (Phorn Chantrea) — Sat, 28 Oct 2023 02:50:27 +0000

រដ្ឋបាលរាជធានីភ្នំពេញបានបើកដំណើរការស្ពានកោះពេជ្រ-កោះនរាឱ្យពលរដ្ឋឆ្លងកាត់បណ្ដោះអាសន្ន នៅល្ងាចថ្ងៃទី២៣ ខែតុលា ឆ្នាំ២០២៣ ក្នុងបំណងកាត់បន្ថយការកកស្ទះចរាចរណ៍នៅការដ្ឋានសាងសង់ស្ពានអាកាសព្រះមុនីវង្ស។

ញូវស៍រូមខេមបូឌា(Newsroom Cambodia) បានសម្ភាសន៍ប្រជាពលរដ្ឋមួយចំនួន នៅម្ដុំស្ពានកោះពេជ្រ-កោះនរា អំពីការយល់ឃើញរបស់ពួកគេជុំវិញការបើកឱ្យដំណើរការស្ពាននេះ។

លោក ជា យាត អាយុ ៣០ឆ្នាំ ជាបុគ្គលិកនៅស្ថានីយប្រេងឥន្ធនៈ រស់នៅតំបន់អ្នកលឿងបានប្រាប់ញូវស៍រូមខេមបូឌា (Newsroom Cambodia) ថា ការបើកដំណើរការស្ពាននេះវាមានភាពងាយស្រួលសម្រាប់លោកក្នុងការធ្វើដំណើរទៅមក។

លោក ជា យាត

លោកបានបន្ថែមថា៖ «ពីមុនពេលខ្ញុំជិះម៉ូតូពីផ្ទះមកធ្វើការ ខ្ញុំជិះកាត់ស្ពានច្បារអំពៅ វាប្រើរយៈពេលយូរ តែពេលគេបើកស្ពានកោះនរានេះ ធ្វើឱ្យខ្ញុំមានភាពងាយស្រួលក្នុងការធ្វើដំណើរបានលឿនជាងមុន ពីផ្ទះទៅកន្លែងធ្វើការ និងពីកន្លែងធ្វើការទៅផ្ទះ ជាពិសេសចំណេញពេលពេលវេលា និងការចំណាយប្រចាំថ្ងៃ»។

អ្នកស្រី រស់ សាវឿន អាយុ៣៥ឆ្នាំ រស់នៅសង្កាត់វាលស្បូវ ជាបុគ្គលិកម្នាក់ធ្វើការនៅសាលារៀនឯកជនមួយនៅម្តុំកោះនរា បាននិយាយថា ការបើកដំណើរការស្ពាននេះវាល្អ ព្រោះវាកាត់បន្ថយការស្ទះបានច្រើនជាងមុន។

លោកស្រី រស់ សាវឿន

អ្នកស្រីបានបន្តថា៖ «ការបើកដំណើរការស្ពានឃើញថាល្អ ព្រោះពីមុនវាពិបាកក្នុងការធ្វើដំណើរស្ទះខ្លាំង តែពេលគេបើកស្ពាននេះវាកាត់បន្ថយការស្ទះជាងមុន ហើយខ្ញុំសប្បាយចិត្តពេលដែលរដ្ឋាភិបាលបើកឱ្យធ្វើដំណើរឆ្លងកាត់ស្ពាននេះ»។

លោក កឹម បញ្ញា

លោក កឹម បញ្ញា អាយុ ៣០ឆ្នាំ ជាម្សាស់ហាងបញ្ចាំមួយកន្លែងនៅរាជធានីភ្នំពេញយល់ឃើញថា ការបើកដំណើរការស្ពានកោះនរាគឺល្អ ដោយលោកសង្កេតឃើញថាស្ពាននេះជួយបន្ថយដល់ការកកស្ទះចរាចរណ៍នៅម្ដុំស្ពានច្បារអំពៅ។

លោកបានបន្ថែមថា៖ «វាជួយច្រើនដែរបង ជួយគឺថាប្រជាពលរដ្ឋដែលគាត់រស់នៅខាងស្ពានខាងកោះនរាក៏ល្អដែរ តាំងពីការធ្វើដំណើរ អាចនិយាយបានថាអចលនទ្រព្យគាត់ក៏ល្អប្រសើរដែរ»។

អ្នកស្រី ណា វួចលាង ជាស្ត្រីមេផ្ទះដែលបានមកលេងនៅកោះនរាថា គ្មានអ្វីស្រួលជាងការមានស្ពានប្រើទេ វាជួយសម្រួលដល់ការធ្វើដំណើររបស់ប្រជាជនព្រោះធ្វើដំណើរបានលឿន។

អ្នកស្រី ណា វួចលាង

អ្នកស្រីបន្តថា៖ «ពេលធ្វើពេលស្ពានហើយស្រួលជិះមក ហើយលឺក្មេងៗនិយាយថាស្រួល ដល់ពេលមកដល់ស្រួលមែន អ៊ីចឹងក៏ហួសមកលេងនៅនិងតែម្តង»។

លោក យឿន ស អាយុ ៤៣ឆ្នាំ ជាអ្នកលក់នំនិងភេសជ្ជៈ បាននិយាយថា ការបើកស្ពានកោះពេជ្រ-កោះនរានេះ គឺល្អ មិនមានការកកស្ទះចរាចរណ៍ និងស្ពាននេះមានសោភ័ណ្ឌភាព។

លោក យឿន ស

លោកបានបន្ថែមថា៖ «ផ្ដល់ប្រយោជន៍ច្រើនណាស់ ណាមួយពូមកលក់ហ្នឹងរាល់ថ្ងៃលក់រញ៉េរញ៉ៃពេញហ្នឹងលក់អត់បាន មកលក់នៅហ្នឹងពូលក់បាន មួយថ្ងៃ១០ម៉ឺនជាង ២០ម៉ឺន […] លក់ដាច់ ល្ងាចឡើងមនុស្សច្រើនមែនទែន គេដើរលេង ស្ពានហ្នឹងល្អមែនទែន ស្អាត»។

អ្នកស្រី សឹម សារ៉ា អាយុ៤០ឆ្នាំ ជាអ្នកមើលថែទាំក្មេងក្នុងសាលាមួយម្តុំស្ពានកោះនរាថា វាជារឿងដ៏ល្អមួយជាពិសេសសម្រាប់ប្រជាពលរដ្ឋដែលរស់នៅម្តុំច្បារអំពៅ អាចជិះទៅក្នុងក្រុងបានលឿនជាងមុន។

អ្នកស្រី សឹម សារ៉ា 

អ្នកស្រីបានបន្តថា៖ «វាមានភាពងាយស្រួលសម្រាប់ប្រជាជនរស់នៅក្បែរហ្នឹងគាត់អាចប្រកបអាជីវកម្មដូចជាលក់ដូរអីបានច្រើនជាងមុន បង្កើននូវចំណូលសម្រាប់ពួកគាត់ថែមបានមួយកម្រិតទៀត ហើយបង្កើតស្ពាននៅកន្លែងហ្នឹងអាចឱ្យប្រជាពលរដ្ឋមកលេងបានច្រើន»៕

អគ្គនាយកដ្ឋានពន្ធធានាគារដាក់ពាក្យបណ្ដឹងប្រធានស្ដីទីគណបក្សខ្មែរក្រោកពីបទល្មើសច្បាប់គណបក្សនយោបាយ

ផន ចន្ទ្រា (Phorn Chantrea) — Wed, 25 Oct 2023 11:30:22 +0000

អគ្គនាយកដ្ឋានពន្ធធានាគារ ក្រសួងមហាផ្ទៃ បានដាក់ពាក្យបណ្ដឹង លើបុគ្គលឈ្មោះ សុខ សុវណ្ណវឌ្ឍនាសាប៊ុង (William Guang) និងមាស សុភ័ក្រ្ត ប្រធានស្ដីទីគណបក្សខ្មែរក្រោកពីបទល្មើសច្បាប់ស្ដីពីវិសោធនកម្មគណបក្សនយោបាយ និងបទបញ្ជាផ្ទៃក្នុងធានារគារទៅកាន់អយ្យការអមសាលាដំបូងរាជធានីភ្នំពេញ។

តាមលិខិតបំភ្លឺពីអគ្គនាយកដ្ឋានពន្ធធានាគារកាលពីថ្ងៃទី១៦ ខែតុលា ឆ្នាំ២០២៣បានឲ្យដឹងថាការបង្ហោះសារសម្លេងរបស់ពិរុទ្ធជនឈ្មោះសុខ សុវណ្ណវឌ្ឍនាសាប៊ុង នៅលើបណ្ដាញសង្គមនិងចែកចាយតគ្នា ពីមណ្ឌលកែប្រែទី១អគារ«ក»។

លិខិតបំភ្លឺដដែលបានបន្ថែមថា៖ «តាមការស្រាវជ្រាវពីមន្ត្រីជំនាញទូរគមនាគមន៍ សារសម្លេងត្រូវបានបញ្ចេញតាមទូរសព្ទអចល័ត (ជាប់ជញ្ជាំង)សម្រាប់ជនឃុំឃាំងប្រើប្រាស់ស្របច្បាប់កាលពីម៉ោង១៥:៤៧នាទី ថ្ងៃទី១២ ខែតុលា ឆ្នាំ២០២៣ទៅកាន់ឈ្មោះមាស សុភ័ក្ត្រ ប្រធានស្ដីទីគណបក្សខ្មែរគ្រោក និងត្រូវបានឈ្មោះនេះថតទុកពេលសន្ទនា ហើយយកទៅបង្ហោះក្នុងគណនី តិចតុក(Tiktok)កាលពីថ្ងៃទី១៦ តុលា ២០២៣»។

នាយកដ្ឋានពន្ធធានាគារបានជម្រាបជូនសាធារណជន និងបណ្ដាញព័ត៌មានថា ដោយទង្វើនេះជាសកម្មភាពល្មើសច្បាប់គណបក្សនយោបាយ មាត្រាទី២ ឆ្នាំ២០១៧និងល្មើសបទបញ្ជាផ្ទៃក្នុង អគ្គនាយកដ្ឋានបានចាត់វិធានការចាំបាច់ ត្រូវដាក់ពាក្យបណ្ដឹងពីករណីប្រើប្រាស់សារសម្លេង និងរូបភាពទណ្ឌិតជាប់ទោសមជ្ឈឹម ដើម្បីជាប្រយោជន៍របស់ គណបក្សខ្លួនទៅកាន់សាលាដំបូងរាជធានីភ្នំពេញ។

ហើយបានដាក់ពិន័យជនជាប់ឃុំឈ្មោះ សុខ សុវណ្ណវឌ្ឍនាសាប៊ុង (William Guang) មិនឲ្យប្រើទូរសព្ទអចល័ត និងមិនអនុញ្ញាតឲ្យញ្ញាតិសួរសុខទុក្ខរយៈពេលពីរសប្ដាហ៍៕

ក្រសួងសុខាភិបាលប្រាប់ពីវិធីបង្ការនិងព្យាបាលជម្ងឺភ្នែកក្រហម

ផន ចន្ទ្រា (Phorn Chantrea) — Wed, 25 Oct 2023 11:00:36 +0000

ក្រសួងសុខាភិបាល បានជម្រាបជូនដំណឹងដល់សាធារណជនពីការរកឃើញករណីឆ្លងជម្ងឺភ្នែកក្រហម កំពុងកើតថ្មីនៅបណ្ដាខេត្តមួយចំនួននៃប្រទេសកម្ពុជា គិតត្រឹមថ្ងៃទី ១៨ ខែតុលា ឆ្នាំ២០២៣នេះហើយបានប្រាប់ពីរោគសញ្ញា និងវិធីបង្ការពីជម្ងឺនេះ។

តាមសេចក្ដីប្រកាសព័ត៌មានខាងលើរបស់ក្រសួងសុខាភិបាល នៅថ្ងៃទី១៩ ខែតុលា ឆ្នាំ ២០២៣ បានឲ្យដឹង ថាក្រុមឆ្លើយតបបន្ទាន់ក្រសួងសុខាភិបាលបានចុះតាមដាន និងផ្ដល់ការព្យាបាល អប់រំបង្ការការឆ្លង ដើម្បីទប់ស្កាត់ការឆ្លងបន្ត ព្រោះជម្ងឺនេះបណ្ដាលមកពីវីរុសនិងបាក់តេរី ហើយវាឆ្លងលឿនណាស់ពីមនុស្សម្នាក់ទៅមនុស្សម្នាក់ទៀត។

ក្រសួងសុខាភិបាលបន្ថែមថា៖ «រោគសញ្ញាឆ្លងជម្ងឺភ្នែកក្រហមមាន នៅផ្នែកសនៃភ្នែកឡើងពណ៌ផ្កាឈូក ឬក្រហម ហើមត្របកភ្នែក នៅពេលព្រឹកហូរទឹកភ្នែកច្រើន រកាំភ្នែក រមាស់ភ្នែក រលាក ក្រហាយភ្នែក អាចម៍ភ្នែកមានពណ៌ខ្ទុះនិងឈឺគ្រាប់ភ្នែក វាបង្កដោយវីរុសនិងបាក់តេរីហើយឆ្លងលឿនណាស់ពីមនុស្សម្នាក់ទៅមនុស្សម្នាក់ទៀត ប៉ុន្តែយើងអាចកាត់បន្ថយការកើតជម្ងឺភ្នែកក្រហមនិងការចម្លងទៅអ្នកដទៃដោយការលាងឲ្យដៃស្អាត»។

ក្រសួងសុខាភិបាលបានបន្ថែមទៀតថា សម្រាប់បុគ្គលមិនទាន់កើតជម្ងឺភ្នែកក្រហម ត្រូវលាងដៃឲ្យបានញឹញាប់មុននិងក្រោយប៉ះពាល់និងប្រើប្រាស់របស់របរអ្នកជម្ងឺ ចៀសវាងការប៉ះពាល់ភ្នែក ដោយដៃមិនស្អាត និងប៉ះពាល់ផ្ទាល់ជាមួយអ្នកជម្ងឺភ្នែកក្រហម រក្សាគម្លាតឲ្យឆ្ងាយព្រោះវីរុសនិងបាក់តេរីនេះឆ្លងដោយសារការក្អកនិងកណ្ដាស់ ហើយដើម្បីបង្ការកុំឲ្យមានជម្ងឺភ្នែកក្រហម យើងត្រូវបោះចោលរបស់របរដែលអ្នកជម្ងឺបានប្រើ ដូចជា គ្រឿងសម្អាងភ្នែក ទឹកបន្តក់ភ្នែក…….ជាដើម។

សេចក្ដីប្រកាសដែលបានបន្ថែមថា៖«បុគ្គលមានជម្ងឺភ្នែកក្រហមត្រូវ លាងដៃឲ្យបានញ្ញឹកញាប់ ជាមួយសាប៊ូ ឬទឹកក្ដៅឧណ្ហៗ ចៀសវាងការប៉ះ ឬញីភ្នែក និងប្រើដៃស្អាត សម្អាតជុំវិញភ្នែកដោយប្រើក្រណាត់ស្អាត បោះចោលសំឡីនិងក្រណាត់ដែលប្រើរួច ឬបោកសម្អាតជាមួយសាប៊ូ កុំប្រើថ្នាំបន្តក់ភ្នែកតែមួយ សម្រាប់ភ្នែកឈឺនិងភ្នែកមិនឈឺ បោកសំលៀកបំពាក់ និងរបស់ប្រើប្រាស់បន្ទាប់ពីកាន់របស់ប្រឡាក់ទាំងនេះ ហើយកុំចែករំលែករបស់របរផ្ទាល់ខ្លួនទៅអ្នកដទៃ មិនត្រូវប្រើអាងហែលទឹក និងត្រូវសម្រាកពីការងារ ឬសាលារៀនចៀសវាងការចម្លងទៅអ្នកដទៃ»។

ក្រសួងសុខាភិបាលបន្ថែមថា ការថែទាំនិងព្យាបាលករណីជម្ងឺនេះភាគច្រើនគឺស្រាល ការឆ្លងនឹងជាសះស្បើយក្នុងរយៈពេលពី ៧ទៅ១៤ថ្ងៃ ដោយមិនចាំបាច់ព្យាបាលនិងប្រើរយៈពេលខ្លី។ករណីខ្លះការរលាកភ្នែកដោយវីរុសត្រូវការព្យាបាលរយៈពេល ពី២ទៅ៣សប្ដាហ៍ ឬច្រើនជាងនេះដើម្បីជាសះស្បើយ គ្រូពេទ្យអាចផ្ដល់ថ្នាំបន្តក់ភ្នែក ដែលជួយកាត់បន្ថយផលវិបាក ការឆ្លង និងការរីករាលដាលដល់អ្នកដទៃ ហើយក្រសួងនឹងបន្តធ្វើការជូនដំណឹងដល់ពលរដ្ឋ អំពីព័ត៌មានទាក់ទងនិងការអប់រំសុខភាពបន្ថែមទៀត៕

ការស្លាប់របស់សំបូរជាការបាត់បង់ធំបំផុតក្នុងវិស័យទេសចរណ៍

ផន ចន្ទ្រា (Phorn Chantrea) — Wed, 25 Oct 2023 10:54:22 +0000

សំបូរជាដំរីដែលមានវ័យចំណាស់ជាងគេនិងជាវីរជនបម្រើវិស័យទេសចរណ៍ បានស្លាប់ដោយសារជម្ងឺនៅ ស្រុកសែនមនោរម្យ ខេត្តមណ្ឌលគីរី ក្នុងអាយុ៦៣ឆ្នាំ។

តាមភ្នាក់ងារជំនួយអាមេរិក បាននិយាយថាសំបូរត្រូវបានផ្លាស់ទីលំនៅពីភ្នំពេញទៅមណ្ឌលគីរី ដែលជាផ្ទះចូលនិវត្តន៍របស់វា ហើយវារស់នៅទីនោះបានរយៈពេលជិត១០ឆ្នាំ ក្រោមការគ្រប់គ្រងរបស់អង្គការថែរក្សារសត្វស្រុក។

USAID បានបន្ថែមថា៖ «សំបូរ ជាដំរី ដែលមានវ័យចំណាស់ជាងគេនៅកម្ពុជាមានអាយុ៦៣ឆ្នាំ និងរួចផុតពីរបបខ្មែរក្រហម តែវាបានស្លាប់នៅខេត្តមណ្ឌលគីរីដែលជាទីកន្លែងចូលនិវត្តន៍របស់វា។

«ទោះជាសំបូរស្លាប់តែប្រជាជនកម្ពុជានិងភ្ញៀវទេសចរណ៍ជាច្រើននៅចងចាំអនុស្សាវរីយ៍ល្អៗរបស់វា ព្រោះវាបានបម្រើវិស័យទេសចរណ៍ក្នុងស្រុករយៈពេលជាយូរមុនពេលចូលនិវត្តន៍នឹងជាវីរជននៃវិស័យទេសចរណ៍នៅកម្ពុជា»៕

ជប៉ុននឹងផ្ដល់ជំនួយឥតសំណងជិត១០លានដុល្លារដើម្បីគាំទ្រក្នុងការវាស់វែង និងចុះបញ្ជីដីធ្លី

ផន ចន្ទ្រា (Phorn Chantrea) — Wed, 25 Oct 2023 01:51:48 +0000

ជប៉ុននឹងផ្ដល់ជំនួយឥតសំណងជិត១០លានដុល្លារសហរដ្ឋអាមេរិកដល់កម្ពុជា ដើម្បីគាំទ្រដល់ការវាស់វែង និងការចុះបញ្ជីដីធ្លីតាមរយៈការដំឡើងស្ថានីយ៍វាស់វែងអចិន្ត្រៃយ៍ដោយផ្កាយរណប។

តាមសេចក្ដីប្រកាសព័ត៌មានរបស់ក្រសួងការបរទេសកម្ពុជាចេញនៅថ្ងៃទី២៤ ខែតុលា ឆ្នាំ២០២៣ លោក សុខ ចិន្ដាសោភា រដ្ឋមន្ត្រីការបរទេស និងលោក អូណូ អាតស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា នឹងចុះហត្ថលេខារួមគ្នានៅថ្ងៃទី២៦ ខែតុលា នៅទីស្ដីការក្រសួងការបរទេស ស្ដីពីការផ្ដល់ហិរញ្ញសប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់ប្រមាណជា ៩.៧លានដុល្លារ ដើម្បីអនុវត្តគម្រោងសម្រាប់ការកសាងបណ្ដាញស្ថានីយវាស់វែងអចិន្ត្រៃដោយផ្កាយរណបទូទាំងប្រទេស។

តាមសេចក្ដីប្រកាសព័ត៌មានដដែលបន្ថែមថា គោលបំណងនេះគឺដើម្បីពន្លឿនការអង្កេតវាស់វែងសុរិយោដី ព្រមទាំងពង្រឹងសេវារដ្ឋបាលពាក់ព័ន្ធការចុះបញ្ជីដីធ្លី ដោយការដំឡើងស្ថានីយ៍វាស់វែងអចិន្ត្រៃយ៍ដោយផ្កាយរណប៕

អាជ្ញាធរខេត្តកំពង់ស្ពឺផ្អាកចរាចរណ៍រថយន្តដឹកទំនិញធុនធ្ងន់លើកំណាត់ផ្លូវជាតិលេខ៣ដោយសារទឹកជំនន់

ផន ចន្ទ្រា (Phorn Chantrea) — Tue, 17 Oct 2023 02:23:24 +0000

មន្ទីរសារធារណការ និងដឹកជញ្ជូនខេត្តកំពង់ស្ពឺជូនដំណឹងដល់ពលរដ្ឋជាម្ចាស់រថយន្តដឹកទំនិញធុនធ្ងន់ទាំងអស់ឱ្យផ្អាកការធ្វើចរាចរណ៍ជាបណ្ដោះអាសន្នលើកំណាត់ផ្លូវជាតិលេខ៣ចន្លោះគ.ម៤៧ ដល់៤៨ និង៥១ ដល់៥២ ស្ថិតនៅឃុំស្នំក្រពើ ខេត្តកំពង់ស្ពឺ ដោយសារជំនន់ទឹកភ្លៀង។

ក្នុងសេចក្តីជូនដំណឹងរបស់មន្ទីរសារធារណការខេត្តកំពង់ស្ពឺចេញកាលលពីថ្ងៃទី១៥ ខែតុលា ឆ្នាំ២០២៣បញ្ជាក់ថា កាលពីថ្ងៃ១៥ ខែតុលា ឆ្នាំ២០២៣ ដោយស្ថានភាពទឹកភ្លៀងនៅរដូវវស្សាឆ្នាំនេះបានធ្លាក់ច្រើន បង្កឲ្យមានជំនន់ទឹកភ្លៀង ដែលអាចបង្កឲ្យមានផលប៉ះពាល់ដល់មនុស្ស សត្វ និងហេដ្ឋារចនាសម្ព័ន្ធ ផ្លូវថ្នល់-ស្ពានជាយថាហេតុ មន្ទីរសារណការសូមធ្វើការផ្អាកចររាចរណ៍រថយន្តធុនធ្ងន់គ្រប់ប្រភេទ។

តាមសេចក្ដីជូនដំណឹងដដែលបានបន្ថែមថា៖ «ដោយស្ថានភាពទឹកភ្លៀងនៅរដូវវស្សាឆ្នាំនេះបានធ្លាក់ច្រើន បង្កឲ្យមានជំនន់ទឹកភ្លៀងដែលអាចបង្កឲ្យមានផលប៉ះពាល់ដល់មនុស្ស សត្វ និងហេដ្ឋារចនាសម្ព័ន្ធ ផ្លូវថ្នល់-ស្ពាន ជំនន់ទឹកភ្លៀងបានកំពង់ជនឡើងជាហេតុបណ្ដាលឲ្យលិចកំណាត់ផ្លូវជាតិលេខ៣ ចន្លោះគ.មលេខ៤៧ ដល់៤៨ និងគ.មលេខ៥១ ដល់៥២ នៅឃុំស្នំក្រពើ ស្រុកគងពិសី ខេត្តកំពង់ស្ពឺ»។

សេចក្ដីជូនដំណឹងដដែលបានបន្ថែមថា ដោយស្ថានភាពនេះធ្វើឲ្យផ្លូវថ្នល់មិនអាចទ្រទម្ងន់រថយន្តដឹកទំនិញធុនធ្ងន់បាន មន្ទីរសារធារណការខេត្តកំពង់ស្ពឺសូមផ្អាកចររាចរណ៍រថយន្តដឹកទំនិញធុនធ្ងន់ទាំងអស់លើកំណាត់ផ្លូវជាតិលេខ៣ និងសូមឲ្យប្រជាពលរដ្ឋជាម្ចាស់រថយន្តដឹកទំនិញធុនធ្ងន់ទាំងអស់ដែលធ្វើចរាចរណ៍ពីភ្នំពេញទៅកំពត វាងតាមផ្លូវជាតិលេខ១២២ឆ្ពោះទៅផ្លូវជាតិលេខ២ ឬវាងតាមផ្លូវ១៤៣ទៅផ្លូវលេខ៤១ សម្រាប់ទិសដៅពីកំពតទៅភ្នំពេញជាបណ្ដោះអាសន្នសិន ចាប់ពីថ្ងៃជូនដំណឹងនេះតទៅ រហូតមានការជូនដំណឹងជាថ្មី៕

ក្រសួងសុខាភិបាលអំពាវនាវកុំឱ្យពលរដ្ឋជឿការលក់ផលិតផលតាមអនឡាញដែលគ្មានប្រភពច្បាស់លាស់

ផន ចន្ទ្រា (Phorn Chantrea) — Tue, 17 Oct 2023 02:13:34 +0000

ក្រសួងសុខាភិបាលបានអំពាវនាវដល់សាធារណៈជនកុំឲ្យជឿលើការផ្សាយពាណិជ្ជកម្មលើប្រព័ន្ធអនឡាញ ដូចជាផលិតផលបំប៉នសុខភាព ឱសថសម័យ ឱសថបុរាណ គ្រឿងសម្អាង គ្លីនិក និងពហុព្យាបាលមួយចំនួនដែលគ្មានការអនុញ្ញាត។

បើតាមសេចក្ដីប្រកាសព័ត៌មានរបស់ក្រសួងសុខាភិបាល ចេញកាលពីថ្ងៃទី១២ ខែតុលា ឆ្នាំ២០២៣ បញ្ជាក់ថា ក្រសួងបានសម្គាល់ឃើញថាការផ្សាយពាណិជ្ជកម្មតាមអនឡាញពីការលក់ផលិតផលបំប៉នសុខភាព ថ្នាំសម័យ ថ្នាំបុរាណ គ្រឿងសម្អាង គ្លីនិក និងពហុព្យាបាលមួយចំនួនគ្មានការអនុញ្ញាតដែលធ្វើឲ្យប៉ះពាល់ដល់សុខភាពធ្ងន់ធ្ងរ។

តាមសេចក្ដីប្រកាសព័ត៌មានដដែលបន្ថែមថា៖ «ក្រសួងសុខាភិបាលអំពាវនាវដល់សាធារណជន មិនត្រូវជឿ ឬទិញផលិតផល បំប៉នសុខភាព ឱសថសម័យ ឱសថបុរាណ គ្រឿងថែរក្សាសម្រស់ និងបន្ទប់ពិគ្រោះជម្ងឺ គ្លីនិក ពហុព្យាបាលឯកជន ដែលគ្មានប្រភពច្បាស់លាស់និងគ្មានការអនុញ្ញាតពីក្រសួងសុខាភិបាល»។

ក្រសួងសុខាភិបាលបន្ថែមថា ចំពោះអាជីវករលក់ផលិតផល បំប៉នសុខភាព ឱសថ គ្រឿងសម្អាង បន្ទប់ពិគ្រោះជម្ងឺ គ្លីនិក ត្រូវគោរពច្បាប់រាល់ការផ្សព្វផ្សាយ ចែកចាយ ឬលក់ផលិតផលទាំងនេះ ត្រូវមានលេខបញ្ចិកា (NOTIFICATION) និងមានការអនុញ្ញាតពីក្រសួង។

ក្រសួងសុខាភិបាលបន្ថែមទៀតថា៖ «គណៈវិជ្ជាជីវៈសុខាភិបាលនីមួយៗ ត្រូវពង្រឹងច្បាប់ស្ដីពីការគ្រប់គ្រងប្រកបដោយវិជ្ជាជីវៈ នឹងពង្រឹងសីលធ៌មវិស័យសុខាភិបាលឲ្យបានច្បាស់លាស់ និងចូលរួមទប់ស្កាត់ការផ្ដល់សេវាសុខាភិបាលដោយគ្មានការអនុញ្ញាត និងការផ្សព្វផ្សាយពាណិជ្ជកម្មក្នុងក្របខណ្ឌវិជ្ជាជីវៈសុខាភិបាលដោយគ្មានមូលដ្ឋានច្បាស់លាស់បំផ្លើសការពិតដែលធ្វើឲ្យពលរដ្ឋយល់ច្រឡំ» ។

ក្រសួងសុខាភិបាលសង្ឃឹមថា អាជីវករ អ្នកប្រកបវិជ្ជាជីវៈសុខាភិបាលនិងអាជ្ញាធរពាក់ព័ន្ធចូលរួមទប់ស្កាត់ភាពអសកម្មទាំងនេះ ដើម្បីជៀសវាងការប៉ះពាល់និងបង្កគ្រោះថ្នាក់ដល់សុខុមាលភាពពលរដ្ឋកម្ពុជា៕

ផន ចន្ទ្រា (Phorn Chantrea) – Newsroom Cambodia

បទយកការណ៍៖ បណ្ណាល័យ​​ សួន បញ្ញា ជំរុញការអាន​បន្ថែម​ក្នុង​សហគមន៍​មួយនៅ​ខេត្តបាត់​ដំបង​

បទយកការណ៍៖ អ្នក​ស្រ​ឡាញ់​ភេទ​ដូច​គ្នា​​នៅកម្ពុជានៅ​តែបន្ត​រងការរើសអើង

រដ្ឋា​ភិបាល​កំ​ណត់​យក​ថ្ងៃ​២៩ ​ធ្នូ​ ជាទិវា​សន្តិ​ភាព​នៅ​កម្ពុជា​ជាថ្ងៃឈប់​សម្រាក​​ផ្លូវ​ការ​

ក្មេង​ស្រី​អាយុ​ ៤ឆ្នាំ​ម្នាក់​កើត​ជម្ងឺ​ផ្ដាសាយប​ក្សី​ H5N1

ភ្ញៀវ​ទេសចរណ៍​​មក​លេង​រមណីយ​ដ្ឋាន​ភ្នំ​ទឹក​ធំ​អំ​ឡុង​ពេល​បុណ្យ​អ៊ុំ​ទូក​នៅ​ខេត្ត​កំពត

ក្រសួងរកឃើញ​ឱសថ​ក្លែង​ក្លាយ ​៦​មុខ​កំពុង​ចែក​ចាយ​នៅ​លើ​ទី​ផ្សារ​​អន​ឡាញ​

កម្មកររោងចក្រ ML នៅប៉ោយប៉ែតតវ៉ា​ជាថ្មីក្រោយថៅកែពន្យារពេលបើកប្រាក់ខែ

Q&A: ផល​វិបាក​នៃ​ការ​ប្រើ​ប្រាស់​គ្រឿង​ញៀន

Voxpop: ទស្សនៈ​ពលរដ្ឋ​លើ​ការ​បើក​ដំណើរការ​ស្ពាន​កោះពេជ្រ-​កោះ​នរា​