រិន សុធារ័ត្ន (Rin Sothearoth) – Newsroom Cambodia

បទយកការណ៍៖ សហគមន៍នេសាទព្រែកត្នោត ជួយការពារនិរន្តរភាពព្រៃកោងកាង និងជីវៈចម្រុះ

រិន សុធារ័ត្ន (Rin Sothearoth) — Tue, 17 Sep 2024 12:11:13 +0000

កំពត៖ សំឡេងរលកទឹកសមុទ្រ អមជាមួយខ្យល់បកតិចៗ លោក អ៊ុក សុវណ្ណរិទ្ធ ប្រធានសហគមន៍នេសាទព្រែកត្នោត ដែលកំពុងអង្គុយក្នុងទីស្នាក់ការនៅខេត្តកំពត ឲ្យដឹងថា មុនពេលបង្កើតសហគមន៍នេះ ប្រជាពលរដ្ឋ ព្រមទាំងរូបលោកផ្ទាល់មិនមានការយល់ដឹងទំនាក់ទំនងរវាងព្រៃកោងកាង និងជីវៈចម្រុះនោះទេ។ លោក អ៊ុក សុវណ្ណរិទ្ធ សំដៅដល់ ផលប៉ះពាល់នៃការកាប់បំផ្លាញព្រៃកោងកាង និងសារៈសំខាន់នៃការការពារព្រៃកោងកាងសម្រាប់ជីវៈចម្រុះ។

មានសម្បុរខ្មៅស្រអែម អមជាមួយទឹកមុខយ៉ាងមាំ លោក អ៊ុក សុវណ្ណរិទ្ធថ្លែងថា៖ «ការបង្កើតសហគមន៍ដើម្បីការពារធនធានធម្មជាតិ និងការពារដើម្បីកុំឱ្យមានការនេសាទខុសច្បាប់ អ្នកដែលមានឧបករណ៍ធំៗគាត់មកធ្វើការនេសាទដល់ដែនទឹករាក់ដែលមានជម្រៅ ២ទៅ៣ម៉ែត្រ ហើយសម្បូរទៅដោយស្មៅ»។

លោក អ៊ុក សុវណ្ណរិទ្ធ ប្រធានសហគមន៍នេសាទព្រែកត្នោត ថ្ងៃសៅរិ៍ ទី០៧ កញ្ញា ឆ្នាំ២០២៤ ខេត្តកំពត (រូបភាពដោយ៖ ជីម ឆៃលន់)

សហគមន៍នេសាទព្រែកត្នោតនេះ បាននិងកំពុងចូលរួមការពារនិរន្តរភាពព្រៃកោងកាង បន្ទាប់ពីធនធានធម្មជាតិនៅតំបន់នេះឈានទៅរកការផុតពូជ ដោយសារប្រជាពលរដ្ឋមួយចំនួនកាប់បំផ្លាញ ក្រោមរូបភាពយកទៅធ្វើអូសដុត និង កាប់ព្រៃដើម្បីនេសាទត្រី។ តាំងពីឆ្នាំ២០១៦ រហូតមកដល់ឆ្នាំ២០២០ សហគមន៍នេះបានដាំដើមកោងកាងបានប្រហែលពីរម៉ឺនដើម។

ស្ថិតក្នុងទំហំផ្ទៃដី ១,១៦៨ហិកតា សហគមន៍នេសាទព្រែកត្នោត ជាកន្លែងការពារព្រៃកោងកាងពីការកាប់បំផ្លាញរបស់ប្រជាពលរដ្ឋ និងជាកន្លែងដែលត្រូវបានដាំដុះដើមកោងកាងឡើងវិញ។ បន្ថែមពីនេះ សហគមន៍នេះ ក៏ជាកន្លែងអភរិក្សធនធាន និងជីវៈចម្រុះសមុទ្រយ៉ាងច្រើន ដូចជា ផ្កាថ្ម ស្មៅសមុទ្រ ពិសេសប្រភេទសត្វសមុទ្រកម្រៗ ដូចជាផ្សោតពណ៌ផ្កាឈូក ផ្សោតក្បាលត្រឡោក ជ្រូកទឹក ត្រីសេះ និងអណ្តើកសមុទ្រផងដែរ។

សហគមន៍នេសាទព្រែកត្នោត ថ្ងៃសៅរិ៍ ទី០៧ កញ្ញា ឆ្នាំ២០២៤ ខេត្តកំពត (រូបភាពដោយ៖ ជីម ឆៃលន់)

ប្រធានសហគមន៍នេសាទព្រែកត្នោត លោក អ៊ុក សុវណ្ណរិទ្ធ បានប្រាប់ថា សហគមន៍មិនអនុញ្ញាតឱ្យមានការនេសាទនៅក្នុងដែនអភិរក្សនោះទេ ទោះបីជាប្រើប្រាស់ឧបករណ៍ស្របច្បាប់ក៏ដោយ ព្រោះជាកន្លែងសម្រាប់ត្រីពង។

លោកថ្លែងថា៖ «កាលណាបើមិនបង្កើតសហគមន៍ការពារនោះទេ គឺទូកអូសរលើងអស់ ហើយពេលណាអស់ស្មៅហើយ គឺបាត់ជម្រកជីវៈចម្រុះដូចជា ផ្កាថ្ម ស្មៅសមុទ្រ សត្វសមុទ្រដូចជាផ្សោត ល្មិច ឃើញអ៊ីចឹងមិនមែនមានតែឈ្មោះមួយនឹងទេ តែយើងហៅតែអណ្តើកៗ វាមានល្មិចក្បាលធំ ល្មិចព្រុយបី ល្មិចប្រផះ ល្មិច»។

លោក អ៊ុក សុវណ្ណរិទ្ធ បញ្ជាក់ថាបទល្មើសនេសាទ បំពានលើដែនអភិរក្ស គឺជាបញ្ហាប្រឈមមួយដែលសហគមន៍បានជួបប្រទះ។ សហគមន៍មានសិទ្ធិគ្រប់គ្រង ការពារ និងអាស្រ័យផល។

លោក សុខ ចាន់ណា ជាប្រជាពលរដ្ឋ និងជាគណៈកម្មការសហគមន៍នេសាទព្រែកត្នោត លើកឡើងថា កាលពីមុននៅក្នុងសហគមន៍នេសាទព្រែកត្នោតនេះមានដើមកោងកាងច្រើន ប៉ុន្តែក្រោយមកមានការថយចុះដោយការកាប់បំផ្លាញ់របស់ប្រជាពលរដ្ឋនៅក្នុងតំបន់នេះ។ ក៏ប៉ុន្តែលោកថា បច្ចុប្បន្នសហគមន៍បានសហការណ៍ជាមួយប្រជាពលរដ្ឋ អង្គការក្រៅរដ្ឋាភិបាល និងអ្នកពាក់ព័ន្ធផ្សេងទៀត ដោយបានដាំដើមកោងកាងឡើងវិញ នៅក្នុងតំបន់ដែលធ្លាប់មានការកាប់បំផ្លាញ។

លោកថ្លែងថា៖ «ព្រៃកោងកាងពីមុនមានច្រើនតែឥឡូវវាសិករិចរិលដោយសារមនុស្សហងអីហងដ៏ចឹងវាថយដែរ ហើយវាមានកំណើនកើនឡើងវិញដោយសារអង្គការ និងសហគមម៍ចូលរួមច្រើនក្នុងការដាំស្ដារឡើងវិញ»។

លោក សុខ ចាន់ណា ប្រជាពលរដ្ឋ និងជាគណៈកម្មសហគមន៍នេសាទព្រែកត្នោត ថ្ងៃសៅរិ៍ ទី០៧ កញ្ញា ឆ្នាំ២០២៤ ខេត្តកំពត (រូបភាពដោយ៖ ជីម ឆៃលន់)

សហគមន៍នេសាទព្រែកត្នោតមានទីតាំងស្ថិតនៅភូមិ ព្រែកត្នោត ឃុំព្រែកត្នោត ក្រុងបូកគោ ខេត្តកំពត។ បើតាមប្រកាសស្ដីពីការចុះបញ្ជីសហគមន៍នេសាទ សហគមន៍នេះ ត្រូវបានបង្កើតឡើងនៅឆ្នាំ ២០០៤ និងត្រូវបានទទួលស្គាល់ពីក្រសួង កសិកម្ម រុក្ខាប្រមាញ់ និងនេសាទនៅឆ្នាំ២០១១។

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ថ្លែងថារដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទកំពុងធ្វើការយ៉ាងសកម្មទៅលើការនេសាទខុសច្បាប់ទាំងនៅក្នុងសហគមន៍ព្រៃកត្នោត និងសហគមន៍ផ្សេងៗដើម្បីការពារធនធានជលផលនៅក្នុងធម្មជាតិ។ កញ្ញាថា ជាលទ្ធផលទិន្នផលត្រីនៅឆ្នាំ២០២៣បានកើនឡើង ៥% បើធៀបទៅនឹងឆ្នាំ២០២២។

កញ្ញាថ្លែងថា៖ «គោលដៅគឺដើម្បីធ្វើយ៉ាងណាបង្ក្រាបការនេសាទខុសច្បាប់ទាំងនៅក្នុងសហគមន៍ព្រែកត្នោតក៏ដោយ ទាំងនៅក្នុងទីកន្លែងផ្សេងទៀតក៏ដោយធ្វើឡើងដោយម៉ត់ចត់»។

កញ្ញាបន្ថែម ក្រសួងមានដៃគូរសហការដើម្បីទំលាក់ជម្រកត្រីសិប្បនិ្នមិត្ត ដើម្បីស្ដារឡើងវិញនូវប្រព័ន្ធអេកូឡូស៊ី ទាក់ទាញឱ្យមាននូវសត្វកម្រឡើងវិញ ជួយកាត់បន្ថយទូកនេសាទខុសច្បាប់ដែលប្រើឧបករណ៍អូស ដែលបង្កការខូចខាតធនធានជលផលនៅក្រោមបាតសមុទ្រផងដែរ។

លោក ហេង គឹមហុង ប្រធានប្រតិបត្ដិនៃសមាគមបណ្ដាញយុវជនកម្ពុជាលើកឡើងថា ការជំរុញឱ្យសហគមន៍មូលដ្ឋានក្នុងការការពារ និងការអភិរក្សធនធានធម្មជាតិនឹងអាចធានាបានប្រសិទ្ធិភាពការងារ និងនិរន្តភាពនៃធនធានទាំងនោះ។

លោកថា៖ «តំបន់ព្រៃឈើ តំបន់អភិរក្ស តំបន់ផ្សេងៗដែលមានអត្ដសញ្ញាណច្បាស់លាស់នឹងវាតែងតែជំរុញឱ្យមានការបង្កើតសហគមន៍មូលដ្ឋានដើម្បីចូលរួម ព្រោះថាសហគមន៍មូលដ្ឋាននឹងគឺជាអ្នកចូលរួមការពារយ៉ាងមានប្រសិទ្ធិភាពជាមួយអាជ្ញាធរជំនាញ ហើយពួកគេក៏ជាអ្នកអាស្រ័យផង និងជាអ្នកធានានូវ គេហៅថាការឱ្យមាននិរន្តភាពធនធានទាំងនេះបានដែរ»។

លោកបន្តថា អាជ្ញាធរពាក់ព័ន្ធគប្បីគាំទ្រដល់សហគមន៍តាមរយៈការផ្ដល់មូលនិធិ បច្ចេកទេស និងស្មារតីដល់គណកម្មការសហគមន៍ក្នុងការការពារ ដើម្បីរក្សាបានផលប្រយោជន៍រយៈពេលវែង។

សហគមន៍នេសាទព្រែកត្នោត មិនត្រឹមតែជាកន្លែងការពារព្រៃកោងកាង និងជីវៈចម្រុះប៉ុណ្ណោះទេ សហគមន៍នេះក៏ជាតំបន់កំសាន្តលំហែអារម្មណ៍បែបធម្មជាតិផងដែរ។

ស្រ្ដីវ័យ ៤៣ឆ្នាំ កំពុងឈរលើស្ពានដែលកំពុងមានខ្យល់បក់ខ្លាំងៗអ្នកស្រី ស្រី តូច និយាយទាំងទឹកមុខរីករាយលាយជាមួយការសើចតិចៗផងនោះថា អ្នកស្រីចូលចិត្ដបរិយាកាសសមុទ្រដែលមានខ្យល់ធម្មជាតិ។

អ្នកស្រីរំលេចពីទិដ្ឋភាពថ្ងៃលិចដែលមើលពីសហគមន៍នេះយ៉ាងដូច្នេះថា៖ «ចាប់អារម្មណ៍ជាងគេគឺទេសភាព ហើយនិងខ្យល់ត្រជាក់ ថ្ងៃលិចឡើងទំនង»។

ស្រដៀងគ្នានេះដែរ កញ្ញា លីម ភាន អាយុ ១៦ឆ្នាំ មានស្រុកកំណើតនៅក្រុងបូកគោ ដែលមកលេងកំសាន្ដជាមួយមិត្ដភក្ភិនៅសហគមន៍នេះនិយាយថា កញ្ញាចាប់អារម្មណ៍ថ្ងៃលិចជាងគេ មិនតែប៉ុណ្ណោះថែមទាំងមានដើមកោងកាង ទឹកសមុទ្រ ស្ពានសម្រាប់អង្គុយលេងផងដែរ។

កញ្ញាបន្ថែមថា តំបន់ទេសចរណ៍នៅសហគមន៍នេសាទព្រែកត្នោតនេះនឹងធ្វើឱ្យខេត្តរបស់កញ្ញាមានភាពល្បីល្បាញ និងមានភ្ញៀវទេសចរណ៍មកលេងច្រើនដែលជាប្រភពចំណូលដ៏សំខាន់សម្រាប់ប្រជាពលរដ្ឋនៅតំបន់នេះ។

កញ្ញាបន្ថែមថា៖ «ជួយឱ្យខេត្ដយើងល្បី ហើយមានអ្នកភ្ញៀវទេសចរណ៍មកច្រើនចឹងក៏ផ្ដល់ចំណូលឱ្យយើងច្រើនដែរ»។

កញ្ញា លីម ភាន អ្នកមកលេងកំសាន្ដនៅសហគមន៍នេសាទព្រែកត្នោត ថ្ងៃសៅរិ៍ ទី០៧ កញ្ញា ឆ្នាំ២០២៤ ខេត្តកំពត (រូបភាពដោយ៖ ជីម ឆៃលន់)

ចំណែកលោក សោ ភីត អាយុ ២៩ឆ្នាំ ដែលមកនេសាទបែបលំហែនៅក្នុងតំបន់សហគមន៍នេសាទព្រែកត្នោតនេះនិយាយថា ការនេសាទរបស់លោកមិនមានការហាមឃាត់ទេ ព្រោះលោកនេសាទដើម្បីតែហូប និងជាការកំសាន្ដប៉ុណ្ណោះ។ ហើយលោកយល់ថា ការបង្កើតសហគមន៍នេះជារឿងមួយល្អសម្រាប់ប្រជាពលរដ្ឋរស់នៅទីនេះ និងអ្នកទេសចរណ៍មកកំសាន្ដ។

លោកថា៖ «វាល្អសម្រាប់ប្រជាពលរដ្ឋដែលរស់នៅទីនេះ ទាំងអ្នកមកពីចំងាយ អ៊ីចឹងវាស្អាត មិនដូចសមុទ្រកន្លែងខ្លះ ហើយណាមួយមានខ្ចុសសម្រាប់ភ្ញៀវអង្គុយលេងមើលទេសភាពអ៊ីចឹងទៅ»។

លោក សោ ភីត អ្នកមកនេសាទក្នុងសហគមន៍នេសាទព្រែកត្នោត ថ្ងៃសៅរិ៍ ទី០៧ កញ្ញា ឆ្នាំ២០២៤ ខេត្តកំពត (រូបភាពដោយ៖ ជីម ឆៃលន់)

ប្រធានសហគមន៍ លោក អ៊ុក សុវណ្ណរិទ្ធ និយាយថាទោះបីជាការស្ម័គ្រចិត្ដ គ្មានប្រាក់ខែ គ្មានពេលធ្វើការងារផ្សេងក៏ដោយក៏លោកនៅតែបន្តការងារនេះ ព្រោះដើម្បីប្រយោជន៍រួមរបស់ប្រជាពលរដ្ឋ និងធនធានធម្មជាតិនៅទីនេះ៕

អ្នកឃ្លាំមើលសង្គមចង់ឃើញវិធានការច្បាប់លើអ្នកចេញផ្លាកលេខខ.ម. និងអ្នកប្រើប្រាស់ដែលមិនត្រឹមត្រូវ

រិន សុធារ័ត្ន (Rin Sothearoth) — Tue, 03 Sep 2024 06:24:11 +0000

អ្នកឃ្លាំមើលសង្គម ជំរុញឱ្យមានការចាត់វិធានការទៅលើអ្នកដែលចេញផ្លាកលេខ ខ.ម. ទៅឱ្យអ្នកដែលមិនមានសិទ្ធិក្នុងការប្រើប្រាស់ និងជនបរទេស ព្រមទាំងជនស៊ីវិលដែលកំពុងប្រើប្រាស់ផ្លាកលេខនេះដោយមិនត្រឹមត្រូវ។

ការជំរុញនេះធ្វើឡើងបន្ទាប់ពីអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិ កាលពីថ្ងៃទី៣០ ខែសីហា ឆ្នាំ២០២៤នេះ បានចេញសេចក្តីជូនដំណឹងជាថ្មីទៀតអំពីការប្រើប្រាស់ផ្លាកលេខចរាចរខេមរភូមិន្ទ ឬ ខ.ម.។

ក្នុងសេចក្តីជូនដំនឹងនោះបញ្ជាក់ថា ក្នុងមួយរយៈពេលចុងក្រោយនេះ បានកើតមាននូវបាតុភាពមួយចំនួនដែលធ្វើឱ្យប៉ះពាល់ដល់សង្គម ដូចជាគ្រោះថ្នាក់ចរាចរណ៍ បុគ្គលអ្នកប្រើប្រាស់ផ្លាកលេខខ.ម.មួយចំនួនមានភាពក្រអឺតក្រទមមិនសក្តិសមជាមន្ត្រីយោធា ធ្វើឱ្យមានការវាយតម្លៃ និងទទួលការរិះគន់ពីសាធារណជន ជាពិសេសប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល។

សេចក្តីជូនដំណឹងដដែលបន្ថែមថា អ្នកប្រើប្រាស់យានយន្តពាក់ផ្លាកលេខចរាចរខេមរភូមិន្ទទាំងអស់ ត្រូវតែជានាយទាហានដែលមានសិទ្ធិពេញលេញ ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ។

សេចក្តីជូនដំណឹងបញ្ជាក់ថា៖ «ការប្រើប្រាស់យានយន្តដាក់ផ្លាកលេខចរាចរខេមរភូមិន្ទ ត្រូវស្របតាមការកំណត់របស់ក្រសួងការពារជាតិ ចំពោះក្រុមហ៊ុនសហការវិនិយោគវិស័យការពារជាតិនានា ក៏ត្រូវបានអនុវត្តដូចគ្នា។ ក្នុងករណីដែលអនុវត្តការប្រើប្រាស់ផ្ទុយពីខ្លឹមសារខាងលើ អគ្គនាយកដ្ឋានសម្ភារៈបច្ចេកទេស ក្រសួងការពារជាតិ នឹងចាត់វិធានការច្បាប់ជាធរមាន»។

Newsroom Cambodia មិនអាចសុំការអត្ថាធិប្បាយពីលោក ឈុំ សុជាត រដ្ឋលេខាធិការ និងជាអ្នកនាំពាក្យក្រសួងការពារជាតិបានទេ គិតត្រឹមថ្ងៃអង្គារនេះ។

លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លើកឡើងថា ការបើកបរយានយន្តពាក់ផ្លាកលេខខេមរភូមិន្ទដោយជនបរទេស ឬជនដែលមិនមានសិទ្ធិក្នុងការប្រើប្រាស់ផ្លាកលេខខេមរភូមិន្ទមានជារឿយៗ ប៉ុន្តែមិនទាន់ឃើញមានវិធានការមានប្រសិទ្ធភាពនៅឡើយ។

លោកថ្លែងថា៖« លើកនេះ ខ្ញុំសង្ឃឹមថានឹងមានវិធានការពីក្រសួងការពារជាតិ នៅក្នុងការបំបាត់ឲ្យខានតែបានចំពោះអ្នកដែលគ្មានសិទ្ធិក្នុងការប្រើប្រាស់ផ្លាកលេខខេមរភូមិន្ទ ជាពិសេសអ្នកដែលប្រើប្រាស់ផ្លាកលេខនេះហើយប្រព្រឹត្តមិនគប្បី ដែលនាំឲ្យខូចខាត និងប៉ះពាល់ដល់តម្លៃកងទ័ព ក៏ជាក្រសួងការពារជាតិ រឿងនេះគឺសំខាន់»។

លោក យ៉ង គឹមអេង បន្ថែមថា សម្រាប់អ្នកចេញផ្លាកលេខខេមរភូមិន្ទឱ្យទៅអ្នកដែលគ្មានសិទ្ធិក្នុងការប្រើប្រាស់ផ្លាកលេខនេះ ក៏ត្រូវតែមានវិធានការផ្លូវច្បាប់ផងដែរ។

លោកថ្លែងបន្ថែមថា៖ «ក្រសួងការពារជាតិគួរតែមានការផាកពិន័យ និងដាក់ទោសទណ្ឌទៅលើអ្នកដែលចេញផ្លាកលេខខេមរភូមិន្ទទៅដល់អ្នកដែលមិនមានសិទ្ធិក្នុងការប្រើប្រាស់ផ្លាកលេខនេះ ដូចជាជនបរទេស ជនស៊ីវិល ដើម្បីកុំឲ្យមានករណីកើតឡើងដដែលៗទៀត »។

ចំណែកលោកបណ្ឌិត មាស នី អ្នកសិក្សាពីការវិវត្តសង្គមលើកឡើងដែរថា លោកគាំទ្រទៅលើចំណាត់ការរបស់ក្រសួងការពារជាតិ ប៉ុន្តែលោកព្រួយបារម្ភចំពោះការចេញសេចក្ដីក្រើនរំឮកជាច្រើនលើក ច្រើនសារ ប៉ុន្តែមិនមានការផ្លាស់ប្ដូរ។

លោកបន្ថែមថា ការប្រើប្រាស់រថយន្តដែលបំពាក់ផ្លាកលេខ ខ.ម. ក្នុងសកម្មភាពផ្ដេសផ្ដាស ឬក៏ប្រើដោយជនបរទេស ឬមនុស្សដែលមិនមានតួនាទី អាចធ្វើឱ្យខូចកិត្តិយសកងទ័ព។

លោកថ្លែងថា៖ «ខ្ញុំគាំទ្រទៅលើវិធានការ ដើម្បីរក្សានូវតម្លៃរបស់កងយោធា ដោយឱ្យមានការអនុវត្តច្បាប់។ កាលណាយើងគ្រាន់តែថាៗ តែយើងមិនធ្វើ គឺធ្វើឱ្យពលរដ្ឋសើច ហើយកាលណាពលរដ្ឋសើចចំអកទៅ នាំឱ្យមានការខឹងសម្បាររវាងពលរដ្ឋ និងរដ្ឋាភិបាលទៀត ហើយប៉ូលីសចរាចរណ៍ សមត្ថកិច្ចនៅតាមផ្លូវ គឺមានកាតព្វកិច្ចក្នុងការត្រួតពិនិត្យ អ៊ីចឹងបើមានឡានពាក់ផ្លាកលេខខេមរភូមិន្ទ ត្រួតពិនិត្យមើលទៅ មានឯកសារត្រឹមត្រូវដែរទេ»។

គួរបញ្ជាក់ថា កាលពីថ្ងៃទី២៨ ខែកុម្ភៈ ឆ្នាំ២០២៤ ក្រសួងការពារជាតិក៏បានចេញសេចក្ដីជូនដំណឹងស្រដៀងគ្នានេះដែរ ទាក់ទងនឹងការចាត់វិធានការដល់ អ្នកប្រើប្រាស់ផ្លាកលេខខេមរភូមិន្ទមួយចំនួនដែលមានភាពក្រអឺតក្រទមមិនសក្តិសមជាមន្ត្រីយោធា ធ្វើឱ្យមានការវាយតម្លៃ និងទទួលការរិះគន់ពីសាធារណជន ជាពិសេសប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល។

នៅតាមបណ្តាញសង្គម ជារឿយៗតែងមានការចែករំលែកអំពីរូបភាព និងវីដេអូគ្រោះថ្នាក់ចរាចរណ៍ និងជនបរទេសបើកបររថយន្តដែលមានពាក់ផ្លាកលេខខេមរភូមិន្ទ។ តួយ៉ាងនៅខេត្តព្រះសីហនុ កាលពីថ្ងៃទី១២ ខែកុម្ភៈ ឆ្នាំ២០២៤ ក៏មានករណីបុរសជនជាតិចិនបើករថយន្ត LEXUS GS300 ពណ៌ខ្មៅ ពាក់ផ្លាកលេខខេមរភូមិន្ទបានបង្កឱ្យមានគ្រោះថ្នាក់ចរាចរណ៍៕

បទយកការណ៍៖ ពលរដ្ឋប៉ះពាល់ពីគម្រោងព្រែកជីកហ្វូណនបារម្ភថាមិនអាចទទួលសំណងសមរម្យ

រិន សុធារ័ត្ន (Rin Sothearoth) — Tue, 03 Sep 2024 02:58:37 +0000

កំពុងអង្គុយលើគ្រែឈើក្រោមផ្ទះជាប់ការដ្ឋានព្រែកជីកហ្វូណនតេជោ ក្នុងភូមិជ័យឧត្តម២ ឃុំសំរោងធំ ស្រុកកៀនស្វាយ ខេត្តកណ្តាល លោក លឹម តុងអេង ជាម្ចាស់ដីនិងផ្ទះដែលប្រឈមនឹងការបាត់បង់ទាំងស្រុងដោយសារគម្រោងសាងសង់ព្រែកជីក។

បុរសវ័យ៧៥ឆ្នាំរូបនេះបន្ថែមថា លោកបានមករស់នៅផ្ទះ និងដីចម្ការប្រហែលជា៥ហិកតានេះ តាំងពីក្រោយរបបខ្មែរក្រហមមកម្ល៉េះ។ លោកថា មកដល់ពេលនេះ លោកមិនទាន់ដឹងពីទំហំនៃសំណងនៅឡើយ ហើយលោកបារម្ភថារដ្ឋាភិបាលមិនមានសំណងសមរម្យសម្រាប់រូបលោក។

លោក តុងអេង និយាយទាំងបង្កប់ភាពសោកសៅថា៖ «ជីកព្រែកដែលប៉ះពាល់ហ្នឹង ខ្ញុំមានអារម្មណ៍ថាភ័យព្រួយ ខ្លាចតែរដ្ឋមិនឱ្យសំណងហ្នឹងច្រើន អ៊ីចឹងទៅខ្ញុំអត់មាន ដូចថាអត់មានលុយយកទៅទិញកន្លែងនៅផ្សេងទៀតហ៎ា»។

លោក លឹម តុងអេង ពលរដ្ឋររងផលប៉ះពាល់ពីគម្រោងព្រែកជីកហ្វូណន។ (រូបភាព៖ រិន សុធារ័ត្ន)

លោក លឹម តុងអេង គឺជាពលរដ្ឋម្នាក់ក្នុងចំណោមប្រជាជនសរុបប្រមាណ ១លាន៦សែននាក់ដែលរស់នៅអមសងខាងព្រែកជីកនេះ និងស្ថិតក្នុងចំណោមពលរដ្ឋ១៥០០គ្រួសារដែលរងផលប៉ះពាល់ពីគម្រោងនេះ ហើយមិនទាន់ទទួលបានព័ត៌មានជាក់លាក់ជុំវិញសំណង។ រដ្ឋាភិបាលអះអាងថាពលរដ្ឋរងផលប៉ះពាល់ទាំងអស់នឹងទទួលបានសំណងសមរម្យ ក៏ប៉ុន្តែអ្នកឃ្លាំមើលសង្គមបារម្ភពីតម្លាភាពនៃការផ្តល់សំណង។

ព្រែកជីកហ្វូនណនតេជោ ត្រូវបានបើកសម្ពោធនៅថ្ងៃទី៥ ខែសីហា ឆ្នាំ២០២៤ និងឆ្លងកាត់ខេត្តចំនួន៤ រួមមានខេត្តកណ្តាល ខេត្តតាកែវ ខេត្តកំពត និងខេត្តកែប។ ព្រែកនេះ មានប្រវែងសរុបប្រមាណជា១៨០គីឡូម៉ែត្រ ដោយមានទីតាំងចាប់ពីព្រែកតាកែវ ឆ្លងកាត់ព្រែកតាឯក ចូលតាមព្រែកតាហ៊ីង និងបន្តដល់សមុទ្រខេត្តកែប។

លោក ឌឹម ម៉ិច ពលរដ្ឋរងផលប៉ះពាល់ពីគម្រោងព្រែកជីកហ្វូណន។ (រូបភាព៖ រិន សុធារ័ត្ន)

កំពុងអង្គុយក្រោមសំយ៉ាបផ្ទះដែលមានម៉ាស៊ីនកិនទឹកអំពៅមួយផង លោក ឌឹម ម៉ិច ពលរដ្ឋម្នាក់ទៀតដែលរងផលប៉ះពាល់ពីគម្រោងព្រែកជីកស្ថិតក្នុងឃុំជាមួយលោក តុងអេង ដែរលើកឡើងថា លោកប្រកបរបរលក់ដូរចាប់ហួយនៅទីតាំងនេះ តាំងពីមុនឆ្នាំ២០០០មក។ លោកថា លោកមិនមានដីច្រើនទេ ហើយកន្លែងដែលលោកកំពុងរស់នៅបច្ចុប្បន្នក៏អំណោយផលដល់ការប្រកបរបររកស៊ី ដែលអាចផ្តល់ចំណូលបានប្រមាណជា៨០ម៉ឺនរៀលក្នុងមួយថ្ងៃ ពីការលក់ស្រា ទឹកអំពៅ តែជ្រក់ កាហ្វេ ជាដើម។

លោកបន្ថែមថា លោករីករាយដែលរដ្ឋាភិបាលអភិវឌ្ឍន៍ ប៉ុន្តែលោកមានការបារម្ភខ្លាចថា លោកមិនមានកន្លែងសម្រាប់ស្នាក់នៅបន្ទាប់ពីលោកចាកចេញពីកន្លែងនេះ។

បុរសវ័យ ៥៧ឆ្នាំរូបនេះបាននិយាយទាំងទឹកមុខក្រៀមក្រំថា ដោយសាតែមិនដឹងពីសំណងច្បាស់លាស់ ទើបធ្វើឱ្យពលរដ្ឋដូចជារូបលោកមានកង្វល់។

លោកបានលើកឡើងថា៖ «ទី១ គេមិនប្រាប់ពីចំនួនគេយក ទី២ គេមិនប្រាប់តម្លៃទេ អ៊ីចឹងកង្វល់របស់ប្រជាពលរដ្ឋអត់ដឹងអាតម្លៃនឹងហ៎ា»។

ស្រដៀងនឹងលោកតុងអេងដែរ លោក ឌឹម ម៉ិច បន្ថែមថា ក្នុងគម្រោងតែ១០០ម៉ែត្រទេ ហើយដីរបស់លោកមាន ៨០ម៉ែត្រ បើរដ្ឋយកម្ខាង៥០ម៉ែត្រ លោកអាចមានដីសល់ខ្លះសម្រាប់រស់នៅ។

កំពុងអង្គុយក្រោមផ្ទះឈើចាស់ទ្រុឌទ្រោមដែលមាន៣គ្រួសាររស់ជុំគ្នា លោក វង មេត្តា ពលរដ្ឋដែលរងផលប៉ះពាល់ពីព្រែកជីកម្នាក់ទៀតនិយាយទាំងអស់សង្ឃឹមថា ដីរបស់លោកបានប៉ះពាល់ទាំងអស់ ទាំងដីផ្ទះ និងដីចំការ ប៉ុន្តែមិនទាន់មានភាគីខាងណាបញ្ជាក់អំពីសំណងនៅឡើយ។

លោកបន្ថែមថា ប្រសិនបើលោកត្រូវចាកចេញពីទីនេះ នោះចំណូលរបស់លោកដែលបានមកពីរបរធ្វើស្រែចម្ការ និងកិនស្រូវ នឹងត្រូវបាត់បង់។

លោកបន្តថា៖ «រាល់ថ្ងៃម្នាក់ៗគ្មានអារម្មណ៍រកស៊ី ធ្វើការអីទេ ព្រោះខ្វាយខ្វល់រឿងផលប៉ះពាល់។ ខ្ញុំស្នើសុំរដ្ឋាភិបាលជួយផ្ដល់សំណងឲ្យបានសមរម្យ ព្រោះពេលចាកចេញពីផ្ទះនេះទៅ សូម្បីស្លឹកគ្រៃមួយគល់ក៏មិនអាចយកទៅបានដែរ»។

ពលរដ្ឋដែលផ្តល់សម្ភាសន៍ដល់ Newsroom Cambodia លើកឡើងថា ក្រោយពេលព្រែកជីកត្រូវបានបើកការដ្ឋានសាងសង់ អាជ្ញាធរមកសួរនាំពលរដ្ឋថាឯកភាព ឬអត់ និងសួរពីផលប៉ះពាល់ចង់បានសំណងបែបណា។

នៅអមសងខាងគម្រោងព្រែកជីកនោះ គេឃើញមានស្នាមបាញ់ថ្នាំពណ៌ក្រហមជារង្វង់មូលនៅតាមដើមឈើ ដែលពលរដ្ឋអះអាងថា នៅពេលដែលអាជ្ញាធរបានបាញ់ថ្នាំទាំងនោះពេលចុះមកវាស់វែង ដែលវាស់ពីម្ខាងទៅម្ខាងអមសងខាងព្រែក មានចម្ងាយប្រមាណជា៥០០ម៉ែត្រ ប៉ុន្តែពលរដ្ឋមិនច្បាស់ថាការបាញ់ថ្នាំពណ៌ទាំងនោះមានគោលបំណងបែបណាជាក់លាក់នៅឡើយ។

ថ្លែងក្នុងបាឋកថាស្ដីពី «សក្ដានុពលនៃព្រែកជីកហ្វូណនតេជោសម្រាប់ការអភិវឌ្ឍកម្ពុជា» កាលពីថ្ងៃទី ១៤ ខែសីហា ឆ្នាំ២០២៤ លោក ស៊ុន ចាន់ថុល លើកឡើងថា រដ្ឋាភិបាលបានចេញអនុក្រឹត្យបង្កកដីដែលនៅជុំវិញគម្រោងព្រែកជីកហ្វូណននោះទាំងអស់ ដោយសារខ្លាចឯកជនទិញដីដែលនៅជាប់គម្រោង។ ក្នុងនោះ ១០០ម៉ែត្រព្រែកជីក ២០០ម៉ែត្រសងខាងព្រែកសម្រាប់ធ្វើផ្លូវ។ ហើយដីមួយចំនួននឹងបង្កកបន្ថែមទៀតដែលមានជម្រើសបីសម្រាប់បង្កក ទីមួយ ១៦០ម៉ែត្រ ទីពីរ ៣០០ម៉ែត្រ និង៣៥០ម៉ែត្រ។

អនុភូមិជ័យឧត្ដម២ លោក សុខ អូន និយាយថា អាជ្ញាធរបានចុះវាស់វែង និងបាញ់ថ្នាំដើម្បីដាក់ចំណាំបណ្ដោះអាសន្នប៉ុណ្ណោះ មិនទាន់យកជាផ្លូវការទេ។

លោកបញ្ជាក់ថា៖ «គេ [រដ្ឋាភិបាល] អត់មានប្រាប់យើងទេ អត់មានប្រាប់យើងរឿងសំណងផលប៉ះពាល់ហ្នឹងយើងទេ អត់មានអ្នកណាដឹងទាំងអស់ ហើយសំណងរដ្ឋាភិបាលលោកបានប្រកាសប្រាប់ហើយ ថាគិតគូរហើយៗ នៅតែគេចុះមកវាស់វែង ហើយគេរុញជាកញ្ចប់ៗតែម្ដង»។

Newsroom Cambodia មិនអាចសុំការអធិប្បាយពីអភិបាលខេត្ដកណ្ដាល លោក គួច ចំរើន បានទេ។

បើតាមក្រុមប្រឹក្សាអភិវឌ្ឍកម្ពុជា ផ្ទះប្រជាពលរដ្ឋជាង១៥០០ខ្នង និងដីស្រែជិត៣ម៉ឺនហិកតា រងផលប៉ះពាល់ពីគម្រោងព្រែកជីកហ្វ៊ូណនតេជោនេះ។

គណៈកម្មការទន្លេមេគង្គ (MRC) បានផ្ញើសារតបនឹងសំណួររបស់ Newsroom Cambodia កាលពីថ្ងៃទី៣០ ខែសីហា ឆ្នាំ២០២៤នេះថា រាល់គម្រោងធំៗទាំងអស់នៅក្នុងអាងទន្លេមេគង្គ រួមទាំងគម្រោងនានានៅតាមដៃទន្លេ គួរតែត្រូវបានវាយតម្លៃសម្រាប់ផលប៉ះពាល់ឆ្លងដែនដែលអាចកើតមាន។

គណៈកម្មការទន្លេមេគង្គបន្ថែមថា រហូតមកដល់ពេលនេះ ខ្លួនមិនទាន់ទទួលបានឯកសារបន្ថែមណាមួយពីកម្ពុជា ទាក់ទងនឹងផលប៉ះពាល់ឆ្លងដែននៃព្រែកជីកហ្វូណនតេជោនៅឡើយទេ ប៉ុន្តែគណៈកម្មការនៅតែទំនាក់ទំនងជិតស្និទ្ធជាមួយកម្ពុជា ហើយត្រៀមខ្លួនដើម្បីពិនិត្យឯកសារបន្ថែមទៀតដែលមាននាពេលខាងមុខ។

គណៈកម្មការទន្លេមេគង្គបន្ថែមថា៖ «បន្ទាប់ពីការដាក់ស្នើគម្រោងព្រែកជីកហ្វ៊ូណនពីប្រទេសកម្ពុជា និងសំណើ និងកង្វល់ពីប្រទេសសមាជិកផ្សេងទៀត ដូចដែលបានបង្ហាញនៅក្នុងកិច្ចប្រជុំគណៈកម្មាធិការចម្រុះ MRC កាលពីខែមិថុនាកន្លងទៅថ្មីៗនេះ គណៈកម្មការកំពុងពិនិត្យ ហើយនឹងផ្តល់យោបល់ដល់ប្រទេសសមាជិក ដើម្បីនាំយកព័ត៌មានបន្ថែមអំពីគម្រោងតាមរយៈការសង្ខេបបច្ចេកទេស និងដំណើរទស្សនកិច្ច ការផ្លាស់ប្តូរបទពិសោធន៍ជាមួយព្រែកជីកស្រដៀងគ្នាផ្សេងទៀត ការត្រួតពិនិត្យរួមគ្នា និងការវាយតម្លៃផលប៉ះពាល់ឆ្លងដែនបន្ថែមទៀតនៅពេលមានការស្នើសុំ»។

ក្នុងពេលចុះទៅពិនិត្យទីតាំងគម្រោងផ្លូវនាវាចរណ៍ «ព្រែកជីកហ្វូណនតេជោ» កាលពីថ្ងៃទី២៦ ខែសីហា ឆ្នាំ២០២៤ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍកម្ពុជា ប្រាប់ក្រុមអ្នកសារព័ត៌មានថា ពលរដ្ឋដែលរងផលប៉ះពាល់ដោយគម្រោងព្រែកជីកហ្វូណននឹងត្រូវទទួលបានសំណងទៅតាមតម្លៃទីផ្សារជាក់ស្តែង។

បើតាមលោក ស៊ុន ចាន់ថុល ការសាងសង់ព្រែកជីកនេះនឹងត្រូវជីកថ្មីទាំងស្រុងត្រឹមតែ៧គីឡូម៉ែត្រប៉ុណ្ណោះនៅក្នុងខេត្តកែបដើម្បីភ្ជាប់ទៅសមុទ្រ។ ចំណែកព្រែកប្រវែង ១៣៥ គីឡូម៉ែត្រដែលមានស្រាប់ គឺគ្រាន់តែដើម្បីពង្រីកឱ្យធំ ហើយ៣៨គីឡូម៉ែត្រផ្សេងទៀតមានចំណុចខ្លះកោងខ្លាំង ដែលគ្រាន់តែត្រូវការជីកតម្រង់បន្ថែមប៉ុណ្ណោះ។

លោកបណ្ឌិត មាស នី អ្នកស្រាវជ្រាវពីការវិវត្តសង្គមលើកឡើងថា ពាក្យថាសំណងសមរម្យនៅប្រទេសកម្ពុជា មិនមានគោលការណ៍ចែងជាក់លាក់ ច្បាស់លាស់ថា សំណងសមរម្យនឹងបែងចែកយ៉ាងណានោះទេ។ លោកថា មូលហេតុនេះទើបនាំឱ្យប្រជាពលរដ្ឋដែលរងផលប៉ះពាល់ពីការអភិវឌ្ឍតែងមានក្ដីបារម្ភ ទោះបីរដ្ឋាភិបាលសន្យាថានឹងផ្ដល់សំណងសមរម្យជូនពួកគាត់ក៏ដោយ។

លោកមានប្រសាសន៍ថា៖ «ប៉ុន្តែរឿងឱ្យហើយនៅតែមានអ្នកខ្លះមិនសប្បាយចិត្ដ វាមានរឿងពីរ ទី១ គឺសំណងនឹងមិនសមស្របនឹងការបាត់បង់ ហើយទី២ អាចនឹងបញ្ហាខ្លះដែលអ្នកដែលចាត់ចែងលើហ្នឹង [សំណង] មិនបានបង្ហាញតម្លាភាព ប៉ុន្តែឆ្លៀតយកផលចំណេញក្នុងដំណើរការនៃការផ្ដល់ហ្នឹង [សំណង]»។

ចំណែកលោក យ៉ង់ គីមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលើកឡើងថា ដើម្បីឱ្យប្រជាពលរដ្ឋទទួលបានសំណងសមរម្យ រដ្ឋាភិបាលគួរតែបង្កើតឱ្យមានគណៈកម្មការត្រួតពិនិត្យ និងដោះស្រាយ ព្រមទាំងភាគីពាក់ព័ន្ធដូចជាសង្គមស៊ីវិល ឬសហគមន៍នៅកន្លែងនោះ ដើម្បីតាមដានដំណើរការនៃការដោះស្រាយ។ លោកថា រដ្ឋាភិបាលមិនត្រូវយកលក្ខខណ្ឌទៅដាក់ឱ្យប្រជាពលរដ្ឋ ប៉ុន្តែត្រូវស្វែងរកបញ្ហារួមដើម្បីដោះស្រាយ។

លោកថា៖ «បទពិសោធន៍នៃការដោះស្រាយកន្លងមកហ្នឹង គឺតែងតែយកលក្ខខណ្ឌរបស់រដ្ឋហ្នឹងយកទៅដាក់ឱ្យពលរដ្ឋ ដែលអ៊ីចឹងហើយដែលពលរដ្ឋហ្នឹងពិបាកនឹងទទួល ប៉ុន្តែអត់បានស្វែងរកដំណោះស្រាយ ស្វែងយល់ពីបញ្ហាពីគ្នាទៅវិញទៅមក»៕

កម្រងរូបភាព៖ តម្បាញក្រមាខ្មែរនៅកោះសូទិន ខេត្តកំពង់ចាម

រិន សុធារ័ត្ន (Rin Sothearoth) — Fri, 30 Aug 2024 12:27:59 +0000

ខេត្តកំពង់ចាម៖ លោកស្រី ប៊ុង ចាន់ធី វ័យ៤៥ឆ្នាំ ចេះត្បាញតាំងពីអាយុ១២ឆ្នាំមកម៉្លេះ ដោយសារអ្នកស្រីធំធាត់ឡើងនៅក្នុងគ្រួសារអ្នកតម្បាញ។ ដើមឡើយលោកស្រីគ្រាន់តែជួយត្បាញ ជាមួយគ្រួសារ និងស៊ីឈ្នួលត្បាញតែប៉ុណ្ណោះ។ នៅភូមិក្រពើគម ឃុំពាមព្រធ្នេះ ស្រុកកោះ សូទិន ខេត្តកំពង់ចាមនេះ លោកស្រីមានជួលអ្នកតម្បាញ២នាក់ផ្សេងទៀត ដោយត្បាញបាន៨ទៅ១០ក្រមាក្នុងមួយថ្ងៃ។ ក្រមាខ្មែរដែលលោកស្រីត្បាញមានពីរប្រភេទគឺ ក្រម៉ាប្រើប្រាស់ប្រចាំថ្ងៃ និងក្រមាសំរាប់បង់ក។ ក្រោយត្បាញរួចបាន២ទៅ៣កី មានឈ្មួញមកយកទៅលក់បន្តនៅតាមប្រព័ន្ធអ៊ីនធឺណេត។

អ្នកស្រីទួន អ៊ុក វ័យ៥៣ឆ្នាំ ជាអ្នកស៊ីឈ្នួលតម្បាញ នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

ឧបករណ៍កីតម្បាញដែលច្នៃធ្វើដោយខ្លួនឯង នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

អំបោះ ប្រើសម្រាប់ការត្បាញក្រមា នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

លោកស្រី ប៊ុង ចាន់ធី យកអំបោះដែលឱ្យបាយរួចយកទៅហាលថ្ងៃ នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

ខ្នាល់ដែលបានខាលរួចដោយរហាត់ នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

ត្រល់នៅលើក្រមាដែលត្បាញដោយដៃនៅលើកីតម្បាញ នៅឃុំពាមព្រធ្នេះ ស្រុកកោះសូទិន ខេត្តកំពង់ចាម ថ្ងៃទី១៩ ខែសីហា ឆ្នាំ២០២៤។ (រូបភាព៖ រិន សុធារ័ត្ន)

Q&A: យុវជនគួរធ្វើការងារស្ម័គ្រចិត្តដើម្បីបង្កើនបទពិសោធន៍ជាក់ស្តែង

រិន សុធារ័ត្ន (Rin Sothearoth) — Wed, 07 Aug 2024 03:31:40 +0000

យុវជនខ្មែរបច្ចុប្បន្ន មានការយល់ដឹងកាន់ច្រើនអំពីការងារស័្មគ្រចិត្តដូចជានៅតាមអង្គការ និងស្ថាប័នជាតិ-អន្តរជាតិនានា ដើម្បីអភិវឌ្ឍចំណេះដឹងខ្លួនឯង ក៏ដូចជាចូលរួមកសាងសង្គមជាតិឱ្យមានភាពរីកចម្រើន។ យុវជនខ្មែរមួយចំនួនដែលកំពុងស្ថិតនៅក្នុងវ័យសិក្សា មើលឃើញថា ការងារស្ម័គ្រចិត្ត មិនថានៅក្នុងវិស័យអប់រំ វិស័យនយោបាយ ការការពារធនធានធម្មជាតិ ឬកិច្ចការងារនៅក្នុងសហគមន៍ក្តី គឺសុទ្ធសឹងធ្វើឱ្យចំណេះដឹងរបស់ខ្លួនកាន់តែទូលំទូលាយ។

ខាងក្រោមនេះគឺជាកិច្ចសម្ភាសរវាងលោក ម៉ន សុគឿន នាយកប្រតិបត្តិអង្គការយុវសន្តិភាព និងកញ្ញា រិន សុធារ័ត្ន សិក្ខាកាមញូវសន៍រូមខេមបូឌា (Newroom Cambodia)៖

Q: ជម្រាបសួរលោក ម៉ន សុគឿន!

A: បាទ ជម្រាបសួរ!

Q: ជាដំបូងនាងខ្ញុំចង់ដឹងថា តើការងារស្ម័គ្រចិត្តជាអ្វី?

A: ជាទូទៅនៅស្រុកយើងការងារស្ម័គ្រចិត្តភាគច្រើនយើងផ្ដោតទៅលើការហាត់រៀនសូត្រការងារកសាងចំណេះដឹង ពិសោធន៍របស់យើង។ ការងារភាគច្រើននៅស្រុកយើងការងារស្ម័គ្រចិត្តដែលមិនបានទទួលនូវថ្លៃឧបត្ថម្ភ ជាលុយជាកាក់ហ្នឹងច្រើនទេ យើងប្រៀបធៀបនឹងស្រុកគេទទួលបាន គេហៅ Unpaid Work ឬ Paid Work អ៊ីចឹងវាអាស្រ័យទៅលើស្ថាប័នទេ មានន័យថាយើងមកធ្វើការងារដើម្បីរៀនសូត្រ កសាងចំណេះដឹង ទំនាក់ទំនង យើងបាននូវបទពិសោធន៍ ដើម្បីឱ្យយើងបានអនុវត្តនូវទ្រឹស្ដីដែលយើងរៀននៅសាលារៀននោះ យកទ្រឹស្ដីមកអនុវត្តនៅកន្លែងធ្វើការថាវាខុសគ្នាយ៉ាងម៉េច។

Q: តើការងារស្ម័គ្រចិត្តកើតឡើងតាំងពីពេលណាមក?

A: ការងារស្ម័គ្រចិត្តមានតាំងពីដើមមក មានតាំងពីយូរណាស់មកហើយ វាមិនសំខាន់ទៅលើការងារដែលយើងធ្វើតាមស្ថាប័នទេ ការងារស្ម័គ្រចិត្តយើងមើលនៅក្នុងសហគមន៍យើងស្ម័គ្រចិត្តជួយគ្នាពេលទៅវត្តគេធ្វើវិហារមានដែលអ្នកភូមិនាំគ្នាមកធ្វើការងារកសាងវិហារឯណា គ្រាន់តែគិតវាថាជាបុណ្យ តាមពិតទៅជាការងារស្ម័គ្រចិត្ត យើងនាំគ្នាទៅជីកប្រឡាយជីកអីហ្នឹងដែលកសាងផ្លូវនៅភូមិយើងគឺការងារស្ម័គ្រចិត្ត។ អ៊ីចឹងវាមានយូរណាស់មកហើយ វាមិនមែនទើបតែមានទេស្ម័គ្រចិត្តអ៊ីចឹងទេ គ្រាន់ថាពីដើមឡើយគេអាចហ្នឹងប្រើពាក្យយ៉ាងម៉េចក៏យើងមិនច្បាស់ដែរ ក៏ប៉ុន្តែអ្វីដែលសំខាន់នោះគឺវាមានតាំងពីយូរលង់ណាស់មកហើយដែលមនុស្សចេះជួយគ្នានៅក្នុងសហគមន៍ ឬពីកន្លែងមួយទៅរៀនការងារកន្លែងមួយទៀតស្វែងយល់ពីគ្នា។

Q: តើយុវជនបែបណា អាយុប៉ុន្មានអាចចូលរួមធ្វើការងារស្ម័គ្រចិត្ត?

A: រឿងដែលល្អបំផុតគឺអាចចាប់តាំងពីគាត់អាចចេះយល់ដឹងបាន […] តាំងពីបឋមសិក្សា គាត់អាចយល់ដឹងបានដែលយើងអាចនិយាយជាមួយគាត់បានវាគ្រាន់តែជារបៀបដែលគាត់រៀនដែលគាត់ចេះធ្វើការងារស្ម័គ្រចិត្ត វាអាចផ្សារភ្ជាប់នូវភាពរីករាយ ជួយគេ យើងត្រូវការលើកសរសើរគាត់ ឬក៏ផ្ដល់រង្វាន់អីឱ្យគាត់អ៊ីចឹង ដើម្បីឱ្យគាត់រៀនសូត្ររស់នៅក្នុងសង្គម តែ concept (គំនិត) ហ្នឹងមែនទៅជាទ្រឹស្តីអ្នកឯងទៅហ្នឹងការងារស្ម័គ្រចិត្តទេ តែបង្រៀនក្មេងវាជ្រាបតាមអ៊ីចឹង។

ក្មេងៗឃើញនៅជប៉ុនការអប់រំគេបញ្ចូលកម្មវិធី សីលធម៌ សុជីវធម៌ ការងារស្ម័គ្រចិត្តអីហ្នឹងធ្វើដោយមិនប្រាប់ថាអាហ្នឹងជាការងារស្ម័គ្រចិត្តទេ ឱ្យគាត់ចេះជួយ ពន្យល់ក្មេងអាហ្នឹងការងារស្ម័គ្រចិត្ត គ្នាម៉េចយល់ ឯងនឹងទទួលបានបទពិសោធន៍ជីវិតទៅធ្វើការងារអនាគតក្មេងម៉េចចេះ តែបង្រៀនក្មេងឱ្យរៀនហាត់ពត់លត់ដំពីតូចទៅឱ្យចេះ អ៊ីចឹងផ្នែកមួយនៃការងារស្ម័គ្រចិត្ត។

Q: ដើម្បីធ្វើការងារស្ម័គ្រចិត្តបាន តើយុវជនគួរត្រៀមខ្លួនបែបណាខ្លះ?

A: ការងារស្ម័គ្រចិត្តដែលយើងគួរត្រៀមខ្លួនត្រៀមអីខ្លះនៅពេលយើងចាប់ផ្ដើមចាប់អាជីព ដល់ពេលយើងចាប់ផ្ដើមចូលដល់វ័យ វាខុសគ្នាអ្នកខ្លះគេសម្រួចការងារស្ម័គ្រចិត្តតាំងពីតូចតាំងពីគាត់ចាប់ផ្ដើមចូលវិទ្យាល័យ អនុវិទ្យាល័យគាត់ដឹងស្រឡាញ់អីគាត់ទៅហ្នឹងហើយ។ អ៊ីចឹងនៅពេលគាត់ចាប់ផ្ដើមសម្រួចគាត់ទៅមុខធ្វើការងារសម្រួចអ៊ីចឹងហើយ ប៉ុន្ដែដល់ពេលធំឡើងគាត់ចូលដល់វិទ្យាល័យគាត់ចាប់ផ្ដើមសម្រួចការងារគាត់។ គាត់ធ្វើការងាររឿងផ្នែកការអភិវឌ្ឍសហគមន៍ ឬក៏ការងារច្បាប់ អ៊ីចឹងគាត់ចាប់ផ្ដើមថាតើការងារស្ម័គ្រចិត្តរបស់គាត់ត្រូវរៀបចំយ៉ាងម៉េច ហើយឱ្យស៊ីគ្នាជាមួយមុខវិជ្ជាដែលគាត់រៀន ថាតើចូលជ្រើសរើសស្ថាប័នណាដែលស្ម័គ្រចិត្តឱ្យស៊ីគ្នា ត្រូវមានបង្កើតទំនាក់ទំនងម៉េចជាមួយអ្នកជុំវិញគាត់ដែលធ្វើការក្នុងវិស័យដូចៗស្រដៀងគាត់ ដើម្បីឱ្យគាត់រៀនហ្នឹងទទួលបានបទពិសោធន៍ច្រើនអំពីការងារទាំងអស់ហ្នឹង។

Q: តើការងារស្ម័គ្រចិត្តមានសារៈសំខាន់ ឬអត្ថប្រយោជន៍អ្វីខ្លះដល់យុវជន?

A: ការងារស្ម័គ្រចិត្តនេះវាផ្ដល់ប្រយោជន៍ បើពាក្យខ្ញុំនិយាយវាមិនអាចកាត់ថ្លៃបានពីព្រោះយើងរៀននៅសាលាវាគ្រាន់តែជាទ្រឹស្ដីទេ ប៉ុន្តែប្រសិនបើយើងបានរៀបចំខ្លួនយើង ហើយយើងកំពុងរៀនបណ្ដើរហើយយើងអនុវត្តទៀត វាធ្វើឱ្យយើងទទួលបាននូវចំណេះដឹងទ្វេរដង។ ទ្រឹស្ដីក៏បាន ការអនុវត្តក៏បាន ហើយមកដល់កន្លែងការងារយើងនឹងទទួលបាននូវមេរៀនថ្មីៗ ឮអំពីទ្រឹស្ដីដែលយើងកំពុងតែរៀន ពីព្រោះទ្រឹស្ដីរបស់យើងរៀនគឺវាទូលំទូលាយប៉ុន្តែនៅពេលដែលការអនុវត្ត យើងទៅរៀនសូត្រនៃការស្ម័គ្រចិត្តនៅកន្លែងមួយ យើងនឹងជួបអ្នកដឹកនាំបែបមួយទៅ។ ការងារក្នុងវិស័យមួយទៅផ្សេងៗពីគ្នាហើយយើងអាចរៀនសូត្រពីទម្លាប់ទាំងអស់ហ្នឹង បានទាំងទំនាក់ទំនងបានទាំងបទពិសោធន៍ថ្មីៗបានចំណេះដឹងថ្មីៗធ្វើឱ្យយើងមានគំនិតផ្ដួចផ្ដើមថ្មីៗបន្ថែមទៀត។

Q: តើអ្នកស្ម័គ្រចិត្តជាទូទៅបានប្រាក់ឧបត្ថម្ភដែររឺទេ?

A: អាស្រ័យទៅលើស្ថាប័នទេ ស្ថាប័នខ្លះគាត់មានថវិកាគាត់ឱ្យ តែអត់ទេគាត់អត់មានលុយទេតែមិនមែនអស់លុយហើយយើងអត់ចង់មកទេ។ ខ្ញុំលើកទឹកចិត្តឱ្យចូលរួមពីព្រោះពេលយើងទៅរៀនពីគេ គេមានផ្ទះឱ្យយើងនៅយើងគ្រាន់ទេឆ្លៀតមករៀនហ្នឹង ចុះយើងទៅរៀននៅសាលាយើងចំណាយលុយផង រណបផង លន់តួផងទៅសុំគេរៀន ចុះហេតុអីគ្រាន់កន្លែងមួយដែលយើងរៀនហើយម៉េចមិនមករៀន ពីព្រោះជាបន្ទុកទៅដល់ថ្នាក់គ្រប់គ្រងរបស់យើង ការងារស្ម័គ្រចិត្តយើងបន្ទុកដល់គេ គេចំណាយពេលវេលាមកបង្រៀនយើង […] អ៊ីចឹងការងារស្ម័គ្រចិត្តវាអាចមានលុយ អត់លុយ ហើយក៏មានករណីយើងទៅបង់លុយសុំគេធ្វើការកន្លែងហ្នឹងដែរ។

Q: ជាចុងក្រោយ លោកមានជាសារអ្វីទៅកាន់យុវជនពាក់ព័ន្ធនឹងការធ្វើការងារស្ម័គ្រចិត្ត?

A: ខ្ញុំលើកទឹកចិត្តឱ្យយុវជនយើង ចាំបាច់ចាប់ពីឆ្នាំទីមួយ ឬក៏ចាប់ផ្ដើមចូលរៀននៅវិទ្យាល័យក៏បាន យកឱកាសដែលពេលទំនេរខ្លះទៅចូលធ្វើការងារស្ម័គ្រចិត្តនៅក្នុងសាលារៀន នៅក្នុងភូមិ នៅក្នុងសហគមន៍របស់យើង ឬក៏នៅតាមស្ថាប័នណាក៏ដោយដែលអាចទៅរៀនហើយមានឱកាសបានបង្ហាញ គឺអ្វីដែលនៅក្នុងដំណាក់កាលនោះគេចង់និយាយថា ត្រូវលក់ខ្លួនយើង។

លក់ខ្លួនយើងមិនមែនសំដៅលើលក់ខ្លួនទេ គឺលក់ការខំប្រឹងប្រែង ត្រូវលក់ខ្លួនយើងដូចប្អូនឯងអ៊ីចឹង ត្រូវចេះលក់ខ្លួនឯងចូលទៅ Event (កម្មវិធី) គេ បង្ហាញថាខ្លួនយើងជានរណាពេលដែលគេដាក់មកអ្វីដែលយើងមិនយល់ត្រូវតែលើកដៃនិយាយ យូរទៅយើងហ្នឹងក្លាយទៅជាមនុស្សដែលលេចធ្លោរនៅក្នុងចំណោមមនុស្សរាប់រយនាក់។

អ៊ីចឹងយើងលក់ខ្លួនលក់នៅក្នុង Social media (បណ្ដាញសង្គម) លក់គំនិតលក់ទស្សនៈវិស័យលក់យុទ្ធសាស្រ្តដល់ការយល់ឃើញរបស់យើងដែលរួមចំណែកទៅហ្នឹងការអភិវឌ្ឍសង្គមមិនមែនលក់ Drama ទេ គេនឹងឃើញយើងពីព្រោះនៅក្នុងសង្គមនេះគេនឹងមើលយើងគេមើលមនុស្សតាមរយៈទំនាក់ទំនងសង្គមហ្នឹងឯង។

Q: អរគុណលោកម៉ន សុគឿន សម្រាប់ការផ្តល់បទសម្ភាស!

A: បាទ! អរគុណ៕

ក្មេងស្រីអាយុ១៦ឆ្នាំម្នាក់ទៀតនៅខេត្តស្វាយរៀងឆ្លងជំងឺផ្ដាសាយបក្សី

រិន សុធារ័ត្ន (Rin Sothearoth) — Sun, 04 Aug 2024 04:00:45 +0000

ក្រសួងសុខាភិបាលប្រកាសពីការរកឃើញជំងឺផ្ដាសាយបក្សីប្រភេទហាស់៥អ៊ិន១(H5N1) មួយករណីទៀត លើក្មេងស្រីអាយុ១៦ឆ្នាំ រស់នៅខេត្តស្វាយរៀងកាលពីថ្ងៃទី៣ ខែសីហា ឆ្នាំ២០២៤។

យោងតាមសេចក្ដីប្រកាសព័ត៌មានក្រសួងសុខាភិបាល ចេញថ្ងៃទី៣ ខែសីហា ឆ្នាំ២០២៤ បានឱ្យដឹងថា ក្មេងស្រីអាយុ១៦ឆ្នាំត្រូវបានបញ្ជាក់ថា វិជ្ជមានវីរុសផ្ដាសាយបក្សី ប្រភេទហាស់៥អ៊ិន១ (H5N1) ពីវិទ្យាស្ថានជាតិសុខាភិបាលសាធារណៈនិងវិទ្យាស្ថានប៉ាស្ទ័រ នៅថ្ងៃទី៣ ខែសីហា ឆ្នាំ២០២៤ ស្ថិតនៅភូមិចំការលាវ ឃុំព្រៃគគីរ ស្រុកចន្រ្ទា ខេត្តស្វាយរៀង។

សេចក្ដីប្រកាសព័ត៌មានដដែលបន្តថា ស្ថានភាពក្មេងស្រីបច្ចុប្បន្នមានសភាពធ្ងន់ធ្ងរ និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។

សេចក្ដីប្រកាសព័ត៌មានបញ្ជាក់ថា៖ «តាមការសាកសួរបង្ហាញថា ប្រហែល ០៤ថ្ងៃមុនចាប់ផ្ដើមឈឺនៅផ្ទះអ្នកជិតខាង និងនៅផ្ទះក្មេងស្រីមានមាន់ទាងាប់ចំនួន ០៩ក្បាល ហើយបានយកមកធ្វើម្ហូបបរិភោគ ក្មេងស្រីបានប៉ះពាល់និងកាន់មាន់ងាប់ »។

បើតាមសេចក្ដីប្រកាសព័ត៌មាន ក្រសួងសុខាភិបាលកំពុងសហការជាមួយក្រសួង ស្ថាប័ន និងភាគីពាក់ព័ន្ធ ដើម្បីស្រាវជ្រាវរកជំងឺផ្ដាសាយបក្សី ស្វែងរកប្រភពចម្លង ស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លង ព្រមទាំងចែកជូនឱសថតាមីហ្លូ (Tamiflu) ដល់អ្នកប៉ះពាល់ និងយុទ្ធនាការអប់រំសុខភាពប្រជាពលរដ្ឋនៅក្នុងភូមិផងដែរ។

ក្រសួងក្រើនរំឮកដល់ប្រជាពលរដ្ឋឱ្យប្រុងប្រយ័ត្នជំងឺផ្ដាសាយបក្សីនេះ ព្រោះជំងឺនេះនៅតែបន្តគំរាមកំហែងសុខភាពប្រជាពលរដ្ឋ។ ប្រសិនបើមានអាការៈក្ដៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិធ្លាប់ប៉ះពាល់ជាមួយមាន់ទាឈឺ ឬស្លាប់ក្នុងអំឡុង ១៤ថ្ងៃ មុនថ្ងៃចាប់ផ្ដើមមានរោគសញ្ញា សូមកុំជួបជុំ ឬទីប្រជុំជនដែលមានមនុស្សច្រើន ស្វែងរកការពិគ្រោះយោបល់ ពិនិត្យព្យាបាលនៅតាមមូលដ្ឋានសុខាភិបាល ដែលនៅជិតលោកអ្នកបំផុត។

សេចក្ដីប្រកាសព័ត៌មានបន្ថែមថា៖ « វិធានការបង្ការ៖ សូមលាងដៃឱ្យបានញឹកញាប់ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះពាល់ជាមួយសត្វបក្សី ដាក់កុមារនៅឆ្ងាយពីសត្វបក្សី និងដាក់សត្វបក្សីនៅឱ្យឆ្ងាយពីកន្លែងរស់នៅ កុំបរិភោគសត្វបក្សីឈឺឬងាប់ និងរាល់សត្វបក្សីដែលធ្វើបរិភោគត្រូវចំអិនឱ្យបានឆ្អិនល្អ»៕

ក្រសួងសុខាភិបាលហាមឃាត់ការទទួលទានស្រាថ្នាំ៣ប្រភេទផ្ទុកសារធាតុ SILDENAFIL

រិន សុធារ័ត្ន (Rin Sothearoth) — Thu, 25 Jul 2024 02:25:25 +0000

ក្រសួងសុខាភិបាលជូនដំណឹងដល់សាធារណជនពីការហាមឃាត់ការចែកចាយ លក់ ឬទទួលទានស្រាថ្នាំចំនួន៣ប្រភេទ ដែលមានផ្ទុកសារធាតុ SILDENAFIL ធ្វើឱ្យប៉ះពាល់ធ្ងន់ធ្ងរដល់សុខភាពរ និងអាចបង្កគ្រោះថ្នាក់ដល់អាយុជីវិត។

ក្នុងសេចក្ដីជូនដំណឹងរបស់ក្រសួងសុខាភិបាលចេញថ្ងៃទី២៤ ខែកក្កដា ឆ្នាំ២០២៤ បញ្ជាក់ថា ស្រាថ្នាំចំនួនបីប្រភេទដែលត្រូវហាមឃាត់ មានដូច Royal Health Wine EST:2005 ចំណុះ 500ml ស្រាថ្នាំ Royal Health Wine EST:2005 ចំណុះ 100ml និងស្រាសុខភាពធម្មជាតិ CHL ចំណុះ 150ml ផលិតដោយសិប្បកម្មផលិតស្រាថ្នាំនៃក្រុមហ៊ុនធានឆាវជៀវយៀក អ៊ីមផត អិចផត ឯ.ក ស្ថិតនៅភូមិជប់ ឃុំកណ្ដៀងរាយ ស្រុកស្វាយទាប ខេត្តស្វាយរៀង។

ក្រសួងបន្ថែមថា ស្រាថ្នាំទាំងបីប្រភេទនេះមានផ្ទុកសារធាតុ SILDENAFIL (សារធាតុបង្កើនផ្លូវភេទ) កម្រិតខ្ពស់ ដែលអាចធ្វើឱ្យប៉ះពាល់ធ្ងន់ធ្ងរដល់សុខភាពរបស់អ្នកទទួលទាន និងអាចបង្កគ្រោះថ្នាក់ដល់អាយុជីវិត។

សេចក្ដីជូនដំណឹងដដែលបន្តថា មន្រ្តីជំនាញនៃក្រសួងសុខាភិបាល បានសហការជាមួយអង្គភាព និងអាជ្ញាធរពាក់ព័ន្ធចុះធ្វើនិយ័តកម្មនៅសិប្បកម្មផលិតស្រាថ្នាំរបស់ក្រុមហ៊ុនធានឆាវជៀវយៀក អ៊ីមផត អិចផត ឯ.ក នៅខេត្តស្វាយរៀង និងទីតាំងលក់ស្រាថ្នាំស្ថិតនៅរាជធានីភ្នំពេញ ដោយបានចាត់វិធានការតាមផ្លូវច្បាប់ចំពោះជនពាក់ព័ន្ធ៕

ប្រធានក្រុមការងារបក្សកែទម្រង់កម្ពុជាខេត្តសៀមរាបត្រូវបានចាប់ខ្លួនដោយគ្មានមូលហេតុ

រិន សុធារ័ត្ន (Rin Sothearoth) — Mon, 22 Jul 2024 08:56:51 +0000

សមត្ថកិច្ចខេត្តសៀមរាបចាប់ខ្លួនសមាជិកគណៈកម្មការអចិន្ត្រៃយ៍ និងជាប្រធានក្រុមការងារគណបក្សកែទម្រង់កម្ពុជាខេត្តសៀមរាប លោក ប៉ែន វុទ្ធី ដោយមិនទាន់ដឹងអំពីមូលហេតុ។ នេះបើតាមសេចក្តីថ្លែងការណ៍របស់គណបក្សកែទម្រង់កម្ពុជា។

ក្នុងសេចក្ដីថ្លែងការណ៍របស់គណបក្សកែទម្រង់កម្ពុជាចេះនៅថ្ងៃទី២១ ខែកក្ដដា ឆ្នាំ២០២៤បានឲ្យដឹងថា លោក ប៉ែន វុទ្ធី សមាជិកគណៈកម្មការអចិន្ត្រៃយ៍ និងជាប្រធានក្រុមការងារគណបក្សត្រូវបានអាជ្ញាធរមានសមត្ថកិច្ចចាប់ខ្លួននៅក្បែរផ្សាររាត្រីក្នុងសង្កាត់ស្វាយដង្គុំ ក្រុងសៀមរាប កាលពីយប់ថ្ងៃទី១៩ ខែកក្កដា ឆ្នាំ២០២៤។ សេចក្ដីការណ៍ដដែលបន្ថែមថា ក្រុមការងារគណបក្សពុំទាន់ទទួលបានដំណឹងពីអាជ្ញាធរមានសមត្ថកិច្ចថា ការចាប់ខ្លួននេះពាក់ព័ន្ធនឹងបទល្មើសអ្វី ហើយគេក៏មិនដឹងឃុំខ្លួនគាត់នៅទីណាដែរ។

លោក អ៊ូ ចាន់រ័ត្ន សហស្ថាបនិកគណបក្សកែទម្រង់កម្ពុជា បានប្រាប់ Newsroom Cambodia នៅថ្ងៃចន្ទនេះថា លោកនៅមិនទាន់បានដឹងមូលហេតុនៅពីក្រោយការចាប់ខ្លួនលោក ប៉ែន វុទ្ធីនៅឡើយទេ។

លោក អ៊ូ ចាន់រ័ត្ន ថ្លែងថា៖ «ខ្ញុំអត់ទាន់ដឹងរឿងអីនៅពីក្រោយហ្នឹងទេ ព្រោះមកដល់ពេលនេះមិនមានអីខុសពី កាលដែលយើងចេញសេចក្ដីថ្លែងការណ៍នោះទេ ដឹងតែចាប់ខ្លួន មកដល់ពេលនេះអត់មានព័ត៌មានទេ»។

លោកបន្ថែមថា អាជ្ញាធរមិនអនុញ្ញាតឱ្យអ្នកដែលទៅជាមួយលោក ប៉ែន វុទ្ធីថតរូបនៃការចាប់ខ្លួនលោក ប៉ែន វុទ្ធីនោះទេ ប្រសិនបើថតអាចឈានទៅដល់មានការចាប់ខ្លួន។

លោកបានថ្លែងបន្ថែមថា៖ «ទីមួយយើងថតមិនបានទេអ្នកដែលទៅជាមួយគាត់ ដើរជាមួយគាត់គេហាមមិនឲ្យថត តែថតគេអាចនឹងចាប់ខ្លួនអ្នកដែលទៅជាមួយគ្នា។ ហើយទី២ក្រោយដែលចាប់ខ្លួនហើយយើងបានបញ្ជូនមនុស្សទៅកាន់ស្នងការ ខាងស្នងការថាគេអត់បានឃើញទេ គេអត់ដឹងទេហើយគេថាប្រហែលជានៅសាលាក្រុង ហើយពេលទៅដល់សាលាក្រុង សាលាក្រុងគេថាគេអត់បានទទួលមនុស្សទេ ចឹងយើងទៅដល់ប៉ុស្ដិ៍សង្កាត់ ហើយទៅដល់សង្កាត់គេថា គេចាប់បញ្ជូនមកភ្នំពេញហើយ មកភ្នំពេញដោយសារអីយើងអត់ដឹង គេយកទៅដាក់កន្លែងណាយើងអត់ដឹង»។

Newsroom Cambodia មិនអាចសុំការបំភ្លឺពីស្នងការខេត្តសៀមរាប

Newsroom Cambodia មិនអាចសុំការបំភ្លឺពីសមត្ថកិច្ចដែលទទួលទូរស័ព្ទនៅស្នងការខេត្តសៀមរាបបានទេនៅថ្ងៃទី២២នេះ ដោយខាងស្នងការបានប្រាប់ថាឲ្យរងចាំការបំភ្លឺពីមេរបស់គាត់។ ចំណែកប្រធានលេខាធិការដ្ឋានសាលាដំបូងខេត្តសៀមរាប លោក យិន ស្រាង សុំមិនអត្ថាធិប្បាយតាមទូរស័ព្ទ ដោយប្រាប់ឲ្យទម្លាក់សំណួរតាមតេលេក្រាម ប៉ុន្តែមិនឃើញលេខតេលេក្រាមរបស់លោកលើបណ្តាញសង្គមតេលេក្រាម៕

អភិបាលខេត្តតាកែវ៖ លែងមានការដាក់តាំងប៉ាណូផ្សព្វផ្សាយនៅតាមដងផ្លូវនិងលើចិញ្ចើមផ្លូវសាធារណៈទៀតហើយ

រិន សុធារ័ត្ន (Rin Sothearoth) — Fri, 19 Jul 2024 11:27:13 +0000

ភ្នំេពេញ៖ មួយសប្តាហ៍ក្រោយ អភិបាលខេត្តតាកែវ ចេញសេចក្តីជូនដំណឹងអំពីការរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងគ្រប់ប្រភេទនៅក្នុងខេត្តតាកែវ អាជ្ញាធរបញ្ជាក់ថាខេត្តនេះលែងមានការដាក់តាំងប៉ាណូផ្សព្វផ្សាយនៅតាមដងផ្លូវនិងលើចិញ្ចើមផ្លូវសាធារណៈទៀតហើយ។ នេះបើតាមការបញ្ជាក់ពីលោក លោក វុី សំណាង អភិបាលខេត្តតាកែវ។

អភិបាលខេត្តតាកែវ លោក វុី សំណាង បញ្ជាក់ថាមិនមានផ្ទាំងស្រាបៀរណាមួយនៅសល់ទេក្នុងនោះកន្លែងខ្លះអាជ្ញាធរជាអ្នកចុះទៅរុះរើដោយផ្ទាល់ ហើយកន្លែងខ្លះអាជីវករជាអ្នករុះរើដោយខ្លួនឯង។

លោកបញ្ជាក់ថា យុទ្ធនាការនៃការរុះរើនេះមិនមានការបដិសេធពីម្ចាស់ក្រុមហ៊ុន រឺអាជីវករណាមួយឡើយ ហើយផែនការអភិវឌ្ឍន៍សំរាប់ខេត្តតាកែវនៅតែមានជាបន្តបន្ទាប់។

លោកបន្តទៀតថា៖ «មានរឿងពីរដែលយើងត្រូវពិចារណា។ ទី១ទាក់ទងកន្លែងខ្លះត្រូវមើលថាវាប៉ះពាល់សណ្ដាប់ធ្នាប់សាធារណៈ គឺអាជ្ញាធរគាត់ធ្វើដោយផ្ទាល់ ទី២កន្លែងខ្លះដែលយើងត្រូវចំណាយថវិកាច្រើនគឺជូនដំណឹងទៅឱ្យម្ចាស់ក្រុមហ៊ុនគាត់ធ្វើការទំលាក់ដោយខ្លួនគាត់»។

រដ្ឋបាលខេត្តតាកែវ បានកំណត់ឲ្យម្ចាស់អាជីវករ ភោជនីយដ្ឋាន អាហារដ្ឋាន ភេសជ្ជដ្ឋាន និងក្រុមហ៊ុនចែកចាយស្រាបៀរ និងគ្រឿងស្រវឹងគ្រប់ប្រភេទដែលបានដាក់តាំងប៉ាណូផ្សព្វផ្សាយនៅតាមដងផ្លូវនិងលើចិញ្ចើមផ្លូវសាធារណៈ ត្រូវធ្វើការរុះរើចេញជាបន្ទាន់ ក្នុងរយៈពេល ០១សប្ដាហ៍គិតតាំងពីថ្ងៃទី១២មក។ នេះបើយោងតាមសេចក្ដីជូនដំណឹងរដ្ឋបាលខេត្តតាកែវចេញថ្ងៃទី១២ ខែកក្ដដា ឆ្នាំ២០២៤។

លោក លួង ហៃ ជាអ្នកលក់ភេសជ្ជៈគ្រប់មុខម្នាក់ នៅសង្កាត់រការ ក្រុងដូនកែវ ខេត្តតាកែវ បានប្រាប់ Newroom Cambodia ថាស្លាកស្រាបៀរ រឺផ្ទាំងប៉ាណូគឺត្រូវបានរុះរើទាំងអស់ ដោយមានអាជ្ញាធរជាអ្នកចុះមកផ្ទាល់ដើម្បីធ្វើការរុះរើស្លាក រឺផ្ទាំងប៉ាណូទាំងនោះ។ ចំណែកការលក់ដូរស្រាបៀរ លោកថានៅដំណើរការធម្មតា។

លោកថ្លែងថា៖ « ឡូវគេរើអស់ហើយនៅតែដែកដែលដាក់ប៉ាណូទទេហ្នឹង[…] អាជ្ញាធរគេមកម៉ង់ អាជ្ញាធរក្រុងគេដើររុះដើររើគ្រប់ទីគ្រប់កន្លែងពេញមួយក្រុង មិនថាផ្ទះអ្នកណា មិនថាទីកន្លែងណា មិនថាប៉ាណូណាឱ្យតែពាក់ព័ន្ធលើស្រាបៀរ មិនថាស្រាបៀរប្រភេទអីទេឱ្យតែស្រាបៀរគេរើទាំងអស់[…]»។

លោកបន្ថែមថា៖ «លក់ដូរធម្មតាគេអត់បិទគេអត់ឃាត់ទេ អ្នកហូប អ្នកផឹកក៏នៅធម្មតា គ្រាន់តែគេអត់ឱ្យដាក់ផ្លាកផ្សាយពាណិជ្ជកម្មតែប៉ុណ្ណឹងទេ»។

អ្នកស្រី ពៅ មួយស៊ីម ជាអាជីវករម្នាក់ទៀត នៅឃុំចំបក់ ស្រុកបាទី ខេត្តតាកែវ លើកឡើងថាអាជ្ញាធរបានចុះមករុះរើដោយផ្ទាល់ ក្នុងនោះឆ័ត្រដែលមានស្លាកសញ្ញាស្រាបៀរត្រូវបាញ់ថ្នាំព៌ណលុបបំបាត់ស្លាកស្រាបៀរ និងមានការរុះរើផ្ទាំងប៉ាណូស្របៀរ។ ក៏ប៉ុន្តែអ្នកស្រីថា ខ្លួនមិនបានទទួលដំណឹងពីការរុះរើនោះទេ។

អ្នកស្រីនិយាយថា៖ «ខាងអាជ្ញាធរគេមករុះរើម៉ង់ គេអត់មានតាំងប្រាប់យើងទៀត[…] ឆ្ងល់គេរុះអី មើលទៅដំបូល អុញគេកំពុងរុះស្លាក[…] សូម្បីតែឆ័ត្ររបស់ស្រាបៀរក៏គេឱ្យបាញ់លុបរូបស្រាបៀរដែរ។ សម្រាប់ការលក់គឺនៅធម្មតាទេអូន ហើយនៅឃុំច្របក ស្រុកបាទី រុះរើអស់ហើយអូនឃើញគេដើរបកគ្រប់កន្លែង»។

លោក យ៉ង់ គីមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បានប្រាប់ Newsroom Cambodia ថាការរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងនានានៅខេត្ត និងរាជធានី គឺជាការល្អប្រសើរ។ លោកថា ការធ្វើបែបនេះគឺគិតគូរអំពី សង្គម យុវជន និងស្រ្ដី ជាពិសេសក្នុងការបំបាត់អំពើហិង្សា និងគ្រោះថ្នាក់ចរាចរណ៍ផ្សេងៗ។

លោកថ្លែងថា៖ «យើងដឹងហើយថាយុវ័យរបស់យើងគឺជាំក្រដាសស។ បើសិនយើងថ្ងៃណាក៏ឃើញផ្ទាំងផ្សាយពាណិជ្ជកម្មស្រា ថ្ងៃណាក៏ផ្សាយពាណិជ្ជកម្មស្រាបៀរ ថាតើយុវជននឹងក្លាយទៅជាអ្នកប្រមឹក រឺក៏ក្លាយទៅជាយុវជនសរសរទ្រូងដែលមានចំណេះដឹងសំរាប់កសាងជាតិមាតុភូមិទៅថ្ងៃក្រោយ»។

បើយើងចង់ឱ្យយុវជនជាទំពាំងស្នងឫស្សី ទំពាំងដ៏ល្អសំរាប់ស្នងឫស្សី ឬក៏ជាអ្នកកសាងច្នៃប្រឌិតអភិវឌ្ឍជាតិទៅថ្ងៃអនាគត ផ្ទាំងផ្សាយពាណិជ្ជកម្មស្រាគួរតែដកចេញ ហើយបើយើងទុកបែបនឹងកុំមកបន្ទោសយុវជនថាយុវជនពាលាអាវ៉ាសែ យុវជនមិនកើត យុវជនមិនគិតគូរអំពីជោគវាសនាអនាគត[…]»។

លោក យ៉ង់ គីមអេង កោតសរសើរដល់អាជ្ញាធរតាមខេត្តមួយចំនួនដែលបានទំលាក់ផ្លាកសញ្ញាស្រាបៀរគ្រប់ប្រភេទនៅខេត្តមួយចំនួន និងសំណូមពរឱ្យអាជ្ញាធរខេត្តដែលមិនទាន់ទំលាក់គួរតែអនុវត្តន៍ដូចខេត្តតាកែវដែរ។

លោកបន្ថែមថា៖ «[…]ការទំលាក់ផ្ទាំងផ្សាយពាណិជ្ជកម្មនេះជារឿងមួយសំខាន់ ហើយសង្ឃឹមថាអាជ្ញាធរខេត្ត និងស្រុកដទៃទៀតនឹងបន្តធ្វើដូចគ្នា ដើម្បីគិតគូរពីសុខភាពសាធារណៈដើម្បីលើកកំពស់សុខុមាលភាពសង្គមក៏ដូចជាការគិតគូរដល់ការអភិវឌ្ឍសេដ្ឋកិច្ចពីព្រោះថា កាលណាមនុស្សប្រើប្រាស់គ្រឿងស្រវឹងច្រើនគឺជាឧបសគ្គដល់ការអភិវឌ្ឍសេដ្ឋកិច្ច[…]»៕

ពលរដ្ឋរំឮកខួប៨ឆ្នាំនៃឃាតកម្មលើបណ្ឌិត កែម ឡី ដោយទាមទារឱ្យមានការដោះលែងអ្នកទោសមនសិការ

រិន សុធារ័ត្ន (Rin Sothearoth) — Thu, 11 Jul 2024 03:46:00 +0000

នៅព្រឹកថ្ងៃទី១០ កក្កដា ឆ្នាំ២០២៤ ដែលត្រូវជាខួប៨ឆ្នាំនៃការធ្វើឃាតលោកបណ្ឌិត កែម ឡី ក្រុមយុវជន ប្រជាពលរដ្ឋ និងសង្គមស៊ីវិលប្រមាណជា១០០នាក់ បានជួបជុំគ្នារំឮកវិញ្ញាណក្ខន្ធដើម្បីទាមទារយុត្តិធម៌ជូនលោកបណ្ឌិត កែម ឡី និងសកម្មជនជាច្រើនទៀតដែលកំពុងជាប់ឃុំ។

នៅព្រឹកនោះ ក្រុមយុវជនខ្លះដើរពីទីតាំងផ្សេងៗគ្នា ដោយមានស្លៀកស ចងក្រណាត់ខ្មៅនៅដើមដៃ ដើរដោះស្បែកជើង ខ្លះកាន់រូបថត និងបដា តម្រង់ទៅកាន់ការ៉ាសសាំងស្តុបបូកគោ ជាទីដែលលោកបណ្ឌិត កែម ឡី ត្រូវបានបាញ់សម្លាប់កាលពី៨ឆ្នាំមុន។ អ្នកដែលចូលដែលមានពញរះសង្ឃផង បានសូត្រមន្ត ដាក់កម្រងផ្កា និងផ្កាឈូកដើម្បីឧទ្ទិសកុសលជូនវិញ្ញាក្ខន្ធរបស់លោកបណ្ឌិត កែម ឡី។

អ្នកចូលរួមក៏បានថ្លែងសារនានា ជាពិសេសទាមទារឱ្យមានការរកឃាតករពិតដែលធ្វើឃាតលោកបណ្ឌិត កែម ឡី និងទាមទារឱ្យមានការដោះលែងលោក កើត សារ៉ាយ ប្រធានសមាគមសម្ពន្ធនិស្សិតបញ្ញវន្តខ្មែរ ព្រមទាំងដោះលែងសកម្មជនបរិស្ថាន អ្នកទោសមនសិការផ្សេងៗទៀត។

ព្រះតេជគុណ ស្រ៊ុន សុភឿក ជានិស្សិតឆ្នាំទី៤ជំនាញរដ្ឋបាលសាធារណៈ មានសង្ឃដីការថា ព្រះអង្គចូលរួមរំឮកខួប៨ឆ្នាំរបស់លោកបណ្ឌិត កែម ឡី ដើម្បីទាមទារឱ្យមានការដោះលែងលោកកើត សារ៉ាយ និងមិនទទួលស្គាល់ការចោទប្រកាន់ទៅលើសកម្មជនមាតាធម្មជាតិដែលត្រូវបានអាជ្ញាធរចាប់ខ្លួនកាលពីថ្ងៃទី២ កក្កដា ឆ្នាំ២០២៤កន្លងទៅនេះ។

ព្រះតេជគុណបន្ថែមថា៖ «ពេលណាដែលប្រជាពលរដ្ឋ ឬក៏ញាតិញោមគាត់រងទុក្ខនូវភាពអយុត្តិធម៌ ឆ្នាំងបាយរបស់គាត់ត្រូវបានបែក អីចឹងព្រះសង្ឃមិនអាចអង្គុយស្ងៀមបានទេ ក្នុងនាមជាព្រះសង្ឃ ព្រោះព្រះសង្ឃរាល់ថ្ងៃរស់ដោយសារពុទ្ធបរិស័ទ បានបាយដោយសារពុទ្ធបរិស័ទ នៅពេលណាដែលពុទ្ធបរិស័ទជួបទុក្ខរងគ្រោះ សួរថាព្រះសង្ឃអាចសិងស្រណុក ដេកលក់គងអន្ទាក់ខ្លាកើតអត់ គឺអត់បានទេយើងត្រូវចូលរួមឈឺឆ្អាលទាំងអស់ ហើយបញ្ហាទាំងអស់នេះដែលគាត់យកសាច់ស្រស់ ឈាមស្រស់យកមកបូជាមិនមែនដើម្បីតែខ្លួនគាត់ មិនមែនដើម្បីតែកូនចៅគាត់ មិនមែនដើម្បីតែគ្រួសារគាត់ទេក៏ប៉ុន្ដែគាត់ធ្វើនេះដើម្បីជាតិមាតុភូមិដើម្បីប្រជាជនទាំងមូល»។

ព្រះអង្គពិតជាមានការឈឺចាប់យ៉ាងខ្លាំងទៅលើភាពអយុត្តិធម៌ក្នុងសង្គមដែលធ្វើឱ្យបាត់បង់នូវធនធានមនុស្ស និងលើកទឹកចិត្តឱ្យយុវជនគ្រប់រូបក្លាហានក្នុងការនិយាយការពិត»។

កញ្ញា ឡុង សុខលីន និស្សិតផ្នែកនីតិសាស្រ្ត ឆ្នាំទី៤ បានគូរឆ្នូតលើមាត់បង្ហាញពីការបំបិទសិទ្ធិសេរីភាពបញ្ចេញមតិ លើកឡើងថា សកម្មជនចលនាមាតាធម្មជាតិ សកម្មជនចលនាដីធ្លីដែលបានប្រើប្រាស់សិទ្ធិរបស់ខ្លួនក្នុងការតស៊ូមតិបែរជាត្រូវបានអាជ្ញាធរ និងតុលាការចោទប្រកាន់ថាក្បត់ជាតិ បង្កភាពអសន្តិសុខ និងញុះញង់ទៅវិញ។

កញ្ញានិយាយថា៖ «ការកាត់ក្តីគឺអយុត្តិធម៌ធ្ងន់ធ្ងរណាស់ទៅដល់សកម្មជននឹងអ្នកការពារសិទ្ធិមនុស្សដែលគាត់ការពារបរិស្ថានបែរជាត្រូវបានចោទប្រកាន់ជារឿងរួមគំនិតក្បត់ ការប្រមាថអង្គព្រះមហាក្សត្រជាដើម ដែលមិនមែនជាការពិតរាល់ភស្តុតាងដែលលើកបង្ហាញនៅក្នុងសវនការដែលមិនមានស្ថានទម្ងន់ទោសអ្វីដែលត្រូវចោទប្រកាន់អ្នកទោសទាំងនោះ»។

កញ្ញាស្នើឱ្យរដ្ឋាភិបាល និងអ្នកពាក់ព័ន្ធបើកលំហសេរីភាពសម្រាប់ពលរដ្ឋឡើងវិញ។

កញ្ញាបញ្ជាក់ថា៖ «សូមស្នើទៅដល់តុលាការ អាជ្ញាធរ និងរាជរដ្ឋាភិបាលជាដើម ឱ្យបើកលំហនូវសិទ្ធិសេរីភាពរបស់ប្រជាពលរដ្ឋដែលនិយាយពីបញ្ហាបរិស្ថាន បញ្ហាសិទ្ធិមនុស្ស បញ្ហាក្នុងសង្គម និងរឿងនយោបាយ ដែលសុទ្ធតែជាសិទ្ធិរបស់មនុស្សគ្រប់គ្នាដែលមានចែងនៅក្នុងរដ្ឋធម្មនុញ្ញ ដូច្នេះសូមបើកលំហសិទ្ធិទាំងអស់នេះឱ្យដូចអ្វីដែលបានចែងក្នុងរដ្ឋធម្មនុញ្ញ និងឱ្យដូចអ្វីដែលចែងមានឈ្មោះថាជាលទ្ធិប្រជាធិបតេយ្យ»។

លោក រ៉ុង ឈុន ទីប្រឹក្សាគណបក្សកម្លាំងជាតិលើកឡើងថា ករណីឃាតកម្មលើបុគ្គលសកម្ម និងល្បីជាច្រើន ដូចជាលោក ជា វិជ្ជា លោក ឈុត វុទ្ធី លោក កែម ឡី ព្រមទាំងអ្នកសិល្បករផ្សេងៗមកដល់ពេលនេះ មិនទាន់ឃើញមានការចាប់ខ្លួនឃាតករពិត និងអ្នកពាក់ព័ន្ធយក មកផ្តន្ទាទោសនៅឡើយ។

លោកបន្តទៀតថា៖ «ចំពោះសេរីភាពបើយើងចាប់គិតឆ្នាំ២០១៧ ក្រោយពីរំលាយគណបក្សសង្រ្គោះជាតិ គឺមានការធ្លាក់ចុះយ៉ាងគំហុកមកដល់ពេលនេះ ហើយការចាប់សកម្មជននយោបាយ ក៏ដូចជាសកម្មជនសង្គមមេសហជីពនៅតែបន្ត ជាពិសេសថ្មីៗនេះដែលចាប់ក្រុមយុវជនបរិស្ថានជារឿងមួយភ្ញាក់ផ្អើល ហើយឃើញថាអន្តរជាតិមានការប្រតិកម្មខ្លាំង»។

លោក អំ សំអាត ជានាយកទទួលបន្ទុកកិច្ចការទូរទៅនៃអង្គការការពារសិទ្ធិមនុស្សលីកាដូលើកឡើងថា ការរំឮកវិញ្ញាណក្ខន្ធលោក បណ្ឌិត កែម ឡី ដើម្បីនឹករឮក និងឧទ្ទិសកុសលជូនលោក ដើម្បីជាព្រលឹងយុវជន ក៏ដូចជាប្រជាពលរដ្ឋជានិមិត្តរូបនៃសេរីភាពក្នុងការបញ្ចេញមតិ។ លោកថា កម្មវិធីនេះ ក៏ជាការសំណូមពរដល់អាជ្ញាធរ និងតុលាការឱ្យផ្តល់យុត្តិធម៌ពេញលេញសម្រាប់លោកបណ្ឌិត កែម ឡី ជាពិសេស គឺជំរុញឱ្យមានការស៊ើបអង្កេតទៅលើសំណុំរឿងរបស់លោក។

លោក អំ សំអាត បានបន្តថា៖ «រឿងលោកបណ្ឌិត កែម ឡី ដែលយើងប្រារព្ធខួប ៨ឆ្នាំនៃការបាញ់សម្លាប់គាត់ ទី១គឺជាការរំឮកវិញ្ញាណក្ខន្ធសំរាប់គាត់ដើម្បីឧទ្ទិសឱ្យគាត់បានទៅកាន់សុគតិភព ទី២គឺយើងនៅតែចងចាំនូវវីរភាពជាស្នាដៃរបស់គាត់ […] ជានិមិត្តរូបនៃសេរីភាពក្នុងការបញ្ចេញមតិរបស់លោកបណ្ឌិត កែម ឡី ទី៣ទាមទារឱ្យអាជ្ញាធរក៏ដូចជាតុលាការផ្ដល់យុតិ្តធម៌ពេញលេញសំរាប់លោកបណ្ឌិត កែម ឡី»។

លោកបណ្ឌិត កែម ឡី ជាអ្នកវិភាគអំពីបញ្ហាសង្គម និងនយោបាយដ៏ល្មីឈ្មោះមួយរូប។ លោកត្រូវបានឃាតករបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦។ អាជ្ញាធរបានចាប់ខ្លួន និងការទោសខ្មាន់កាំភ្លើងម្នាក់ ឈ្មោះ អឿត អាង ហៅ ជួប សម្លាប់ ដែលអះអាងថា ខ្លួនសម្លាប់លោក កែម ឡី ដោយសារលោក កែម ឡី ជំពាក់លុយ៣០០០ដុល្លារ។

ក្រោយការកាត់ទោស អឿង អាង ទាំងមជ្ឈដ្ឋានជាតិ និងអន្តរជាតិ បានបង្ហាញការមន្ទិលសង្ស័យ ថា អឿត អាង មិនមែនជាឃាតករពិត។ ពួកគេតែងជំរុញឱ្យរដ្ឋាភិបាលកម្ពុជាបើកការស៊ើបអង្កេតឡើងវិញដើម្បីស្វែងរកយុត្តិធម៌ជូនលោកបណ្ឌិត កែម ឡី។

លោក ប៉ែន បូណា អ្នកនាំពាក្យរដ្ឋាភិបាលបដិសេធមិនធ្វើអត្ថាធិប្បាយ ដោយប្រាប់ឱ្យទៅសួរក្រសួងយុត្តិធម៌។

លោក ជិន ម៉ាលីន អ្នកនាំពាក្យក្រសួងយុត្តិធម៌មិនឆ្លើយតបនឹងសំណួររបស់ Newsroom Cambodia តាមរយៈបណ្តាញសង្គមតេឡេក្រាម។

ក្រោយការបាញ់សម្លាប់លោកបណ្ឌិត កែម ឡី អស់រយៈពេល៨ឆ្នាំហើយដែលក្រុមសង្គមស៊ីវិល និងអ្នកឃ្លាំមើលសង្គម នយោបាយ បានចាត់ទុកថា មិនទាន់មានពន្លឺយុត្តិធម៌៕

Vox Pop៖ ទស្សនៈពលរដ្ឋលើការប្រើប្រាស់ Cool App ដែលកម្ពុជាទើបបង្កើតលើកដំបូង

រិន សុធារ័ត្ន (Rin Sothearoth) — Wed, 03 Jul 2024 03:52:58 +0000

មួយរយៈចុងក្រោយនេះ មានការជជែកគ្នាច្រើនពីសាធារណជនតាមរយៈបណ្តាញទំនាក់ទំនងសង្គម និងមជ្ឈដ្ឋាននានាអំពី Cool App ក្រោយពេលប្រធានព្រឹទ្ធសភា លោក ហ៊ុន សែន បានប្រកាស នៅលើទំព័រហ្វេសប៊ុក និងតេឡេក្រាមផ្ទាល់ខ្លួនពីវត្តមាននៃ App មួយនេះ។ Cool App នេះ គឺជាកម្មវិធីបណ្តាញទំនាក់ទំនងសង្គមឆាត (Chat) ដំបូងរបស់កម្ពុជា ដែលត្រូវបានបង្កើតឡើងតាមលក្ខណៈស្តង់ដារអន្តរជាតិដូចទៅនឹង Telegram និងWhat App។ នេះបើតាមការអះអាងរបស់ប្រធានព្រឹទ្ធសភា លោក ហ៊ុន សែន កាលពីថ្ងៃទី២១ ខែមិថុនា ឆ្នាំ២០២៤កន្លងទៅ។

Newsroom Cambodia បានសម្ភាសប្រជាពលរដ្ឋចំនួន៧នាក់ ដែលរស់នៅក្នុងរាជធានីភ្នំពេញជុំវិញការយល់ឃើញចំពោះការប្រើប្រាស់ Cool App ថ្មីនេះ។

លោក ប្រាក់ សុថេព្វ មានអាយុ២២ឆ្នាំ មកពីខេត្តបាត់តំបង ជានិស្សិតឆ្នាំទី៣ ដេប៉ាតេម៉ង់គីមីវិទ្យា នៅសាកលវិទ្យាល័យ ភូមិន្ទភ្នំពេញ (RUPP) ថ្លែងថាខ្លួនមានមោទនភាពចំពោះ Cool App នេះ។ លោកថា កម្មវិធីនេះមានសារៈសំខាន់ ហើយប្រជាជនកម្ពុជាអាចប្រើប្រាស់ដោយទុកចិត្តបាន ដោយសារកម្មវិធីនេះ ត្រូវបានបង្កើតឡើងដោយក្រុមអ្នកជំនាញបច្ចេកទេសរបស់កម្ពុជាផ្ទាល់។

លោក សុថេព្វនិយាយថា៖ «សម្រាប់ Cool App ហ្នឹងខ្ញុំគិតថាល្អប្រសើរសម្រាប់ប្រជាជនខ្មែរដោយសារតែ App ហ្នឹងជា App របស់ខ្មែរយើង។ ហើយមួយទៀតខ្ញុំគិតថា App ហ្នឹងវាផ្តល់ផល ប្រយោជន៍ច្រើនសម្រាប់យើង ក្នុងនាមយើងជាកូនខ្មែរយើងគួរតែជួយគាំទ្រអ្វីៗដែលខ្មែរយើងអ្នកបង្កើត ទើបវាមានភាពរីកចម្រើន ហើយApp ហ្នឹងដូចតាមខ្ញុំឮគេនិយាយថា App ហ្នឹងប្រើមានសុវត្ថិភាពខ្ពស់»។

លោក ប្រាក់ សុថេព្វ មានអាយុ២២ឆ្នាំ មកពីខេត្តបាត់តំបង ជានិស្សិតឆ្នាំទី៣ ដេប៉ាតេម៉ង់គីមី នៅសាកលវិទ្យាល័យ ភូមិន្ទភ្នំពេញ (RUPP)។ (រូបភាព៖ ដាញ់ បូរ៉ាត់)

ចំណែកកញ្ញា រួម ឆាដា មានអាយុ២២ឆ្នាំ ជានិស្សិតឆ្នាំទី៣ ផ្នែកច្បាប់ នៅសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច (RULE) បានរៀបរាប់ដោយទឹកមុខរីករាយ និងបង្ហាញការគាំទ្រចំពោះ Cool App នេះ។ កញ្ញាបានប្រើប្រាស់ App នេះរួចហើយ និងបានដឹងថាពីភាពសាមញ្ញ ភាពងាយស្រួល និងភាពជឿជាក់ដែលApp នេះដល់អ្នកប្រើប្រាស់បាន។ កញ្ញា ចង់ឃើញមានការគាំទ្រ Cool App នេះកាន់តែច្រើនបន្ថែមទៀត។

កញ្ញាឆាដាលើកឡើងថា៖ «[…] សម្រាប់ខ្ញុំ Cool App នេះ វាៗ ងាយស្រួលប្រើប្រាស់ ហើយទាក់ទងនឹង Security (សុវត្ថិភាព) ក៏វាអាចធានាពីឯកជនភាពរបស់យើងបានល្អដែរ ហើយទំនាក់ទំនងក៏វាដើរលឿន រហ័ស ការផ្ញើរូបភាពនេះក៏ច្បាស់អត់មានកាត់ទំហំមេ(Megabyte ឬ MB)ធំទេ»។

កញ្ញាបន្ថែមថា៖ «ខ្ញុំសប្បាយរីករាយមែនទែន ហើយក៏មានមោទនភាពផងដែរ ដែលកូនខ្មែរគាត់អាចបង្កើតនូវ App(អេប) មួយ […] សូម្បីតែប្រធានព្រឹទ្ធសភា សម្តេចតេជោ ក៏គាត់ជួយជ្រោមជ្រែងលើកទឹកចិត្ត។ ហើយ App មួយនេះ ខ្ញុំសូមអំពាវនាវដល់សាធារណជនទាំងអស់ចូលរួមគាំទ្រសមិទ្ធផលរបស់ខ្មែរ ហើយ App នេះគឺមិនមានការធ្វើឱ្យលេចធ្លាយនូវឯកជនភាពរបស់យើងទេ»។

កញ្ញា រួម ឆាដា មានអាយុ២២ឆ្នាំ ជានិស្សិតឆ្នាំទី៣ ផ្នែកច្បាប់ នៅសាកលវិទ្យាល័យភូមិន្ទនីតិសាស្រ្ត និងវិទ្យសាស្រ្តសេដ្ឋកិច្ច (RULE)។ (រូបភាព៖ ហេង ស៊ីម៉ី)

លោកវី មានអាយុ៣៤ឆ្នាំ បម្រើការជាមន្រ្តីរាជការក្នុងក្រសួងមួយនៃស្ថាប័នរដ្ឋ អស់រយៈពេលជិត១១ឆ្នាំមកហើយ។ បន្ទាប់ពីលោកបាន ដោនឡូត Cool App និងដំឡើងដើម្បីប្រើប្រាស់រួចហើយ លោកយល់ឃើញថា Cool App មានដំណើរការល្អ បើធៀបទៅនឹងកម្មវិធីផ្សេងៗទៀតដែលលោកធ្លាប់បានដំឡើងនៅក្នុងទូរស័ព្ទអាយហ្វូន (iPhone) របស់លោក។

លោកអះអាងថា៖ «ទី១ការDownload (ដោនឡូត) និងInstall (ដំឡើង) គឺអត់មានការលំបាកទេ មានការងាយស្រួលបើធៀបជាមួយនឹង Program (កម្មវិធី) [Applications] របស់អាយហ្វូន (iPhone) ផ្សេងដែលទើបបង្កើតដំបូងហ្នឹងមានភាពងាយស្រួលជាង។ ហើយទី២ នៅពេលដែលយើង Set Up (ដំឡើង) Register Account (ចុះឈ្មោះគណនី) អីហ្នឹងក៏អត់មានការលំបាកដែរ ព្រោះវាមានភាពងាយស្រួលគ្រាន់តែយើងផ្ញើលេខទៅតាម Instruct (ណែនាំ) គេទៅគេផ្ញើលេខកូដមកលឿនៗ យើងអាច Register ប្រើបានតែម្តង»។

ប៉ុន្តែលោកវីបានសង្កត់ធ្ងន់ថា Cool App មិនទាន់មានលក្ខណៈល្អប្រសើរគ្រប់ជ្រុងជ្រោយនោះទេ ព្រោះវាមិនទាន់ឆ្លើយតបគ្រប់លក្ខខណ្ឌដែលលោកចង់បាននៅឡើយ។

លោកបន្ថែមថា៖ «[…] តែការប្រើសង្កេតឃើញថាមិនទាន់លឿនដូចតេឡេក្រាម (Telegram) ទេ វារៀង Slow (យឺតយ៉ាវ) អ៊ីនធឺរណេត (Internet) អីហ្នឹងបាទ រៀង Slow ហើយផលវិបាកមួយទៀត ត្រង់ថាតេឡេក្រាមទូរស័ព្ទមួយអាច Add (បន្ថែម) Account (គណនី) បានច្រើនតែ Cool App អត់ទាន់បានទេ អ៊ីចឹងបើចង់បាន២ Account ៣ Account ទាល់តែយើងមានទូរស័ព្ទ២ឬ៣ដែរ។ បាទក៏ប៉ុន្តែបើយើងប្រើនៅលើកុំព្យូទ័រ យើងអាចដោនឡូតប្រើនៅលើកុំព្យូទ័របាន ក៏មានភាពងាយស្រួលដែរ»។

លោកថា៖«[…] អានេះខ្ញុំគិតថា ការយល់ឃើញរបស់ពលរដ្ឋយើងជាទូទៅ ការយល់ឃើញរួម ទី១សុវត្ថិភាព (Security) ហ្នឹងក៏មិនទាន់មានការជឿជាក់១០០ភាគរយដែរ យើងក៏រៀងនៅមានមន្ទិលដែរ ទាក់ទងនឹងសុវត្ថិភាព Data (ទិន្នន័យ) ឯកជនភាពរបស់យើង យើងខ្លាចបែកធ្លាយអីចឹង[…]»។

ចំណែក កញ្ញា កេត ម្លិសមុនីពេជ្រ មានអាយុ១៨ឆ្នាំ មកពីខេត្តកណ្តាល ដែលបច្ចុប្បន្នរស់នៅក្នុងទីក្រុងភ្នំពេញ ជានិស្សិតឆ្នាំទី១ ផ្នែកព័ត៌មានវិទ្យា (IT) នៅសាកលវិទ្យាល័យភូមិន្ទភ្នំពេញ យល់ថា Cool App នេះ មិនទាន់មានលក្ខណៈរលូននៅឡើយទេ ប៉ុន្តែអាចទទួលយកបានក្នុងការប្រើប្រាស់។

កញ្ញា ម្លិសមុនីពេជ្រលើកឡើងថា៖ «ខ្ញុំយល់ថាវានៅមានកម្រិតដោយសារតែការចូល Log In ប្រើប្រាស់ដំបូងវាមានបញ្ហាច្រើន វាដំណើរការយឺតហើយវាមានបញ្ហាខ្លះទៅលើ Android Link (ការភ្ជាប់ Android) ចឹងទៅ Cool App នៅមានកម្រិត។ ប៉ុន្តែនៅពេលដែលយើងចូលប្រើប្រាស់ហើយ គឺវាអាចយកជាការបានដោយសារវាដំណើរការអីធម្មតាស្រួលទេ គ្រាន់ថាវាមានបញ្ហានៅពេល Setting (ការកំណត់) ប្រើដំបូង»។

ទោះយ៉ាងណា កញ្ញា ម្លិសមុនីពេជ្រ នៅតែបង្ហាញការសាទរចំពោះការបង្កើត Cool App នេះដែលត្រូវបានបង្កើតឡើងដោយក្រុមអ្នកជំនាញបច្ចេកវិទ្យាព័ត៌មានកម្ពុជា។

កញ្ញាពេជ្របន្ថែមថា៖ «[…]តាមបទពិសោធន៍ខ្ញុំប្រើប្រាស់ ខ្ញុំគិតថា Cool App ល្អ។ និយាយរួមទៅយើងអាចប្រើប្រាស់បានទំនាក់ទំនងគ្នាងាយស្រួល ហើយវាជារបស់ខ្មែរយើងសុទ្ធតែម្តង»។

កញ្ញា កេត ម្លិសមុនីពេជ្រ មានអាយុ១៨ឆ្នាំ មកពីខេត្តកណ្តាល ជានិស្សិតឆ្នាំទី១ ផ្នែកព័ត៌មានវិទ្យា (IT) នៅសាកលវិទ្យាល័យភូមិន្ទភ្នំពេញ។ (រូបភាព៖ រិន សុធារ័ត្ន)

ព្រះសង្ឃ ម៉ៅ វណ្ណា មានព្រះជន្ម៣០វស្សា មកពីខេត្តស្ទឹងត្រែង ខណៈបច្ចុប្បន្ន ព្រះអង្គគង់នៅវត្តឧណ្ណាលោមក្នុងរាជធានីភ្នំពេញ មានសង្ឃដីកាថាការបង្កើត Cool App ដោយក្រុមអ្នកបច្ចេកទេសព័ត៌មានវិទ្យាកម្ពុជានេះជារឿងល្អ ប៉ុន្តែព្រះអង្គចង់ឱ្យមានការពង្រឹងគុណភាពបន្ថែមដើម្បីប្រកួតប្រជែងជាមួយបរទេសបាន។ ព្រះអង្គ ស្នើឱ្យប្រជាជនកម្ពុជាចូលរួមចែករំលែកអំពីផលិតផលក្នុងស្រុករបស់ខ្លួនឱ្យគេស្គាល់កាន់តែច្រើនបន្ថែមទៀត។

ព្រះអង្គម៉ៅ វណ្ណា មានសង្ឃដីកាថា៖ «អាត្មាយល់ឃើញថាការបង្កើតហ្នឹង ប្រសិនបើខាងIT កូនខ្មែរបង្កើតបាន App មួយពិតជាល្អប្រសើរ ប៉ុន្តែចង់ឱ្យពង្រឹងបន្ថែមទៀតក្នុងការប្រើប្រាស់ដើម្បីឱ្យទាន់សម័យ ណាមួយសម័យឥឡូវជាសម័យឌីជីថលទាំងការរកស៊ីទាំងការអីវាទូលំទូលាយហា អាហ្នឹងយើងខ្វះមិនបានទេអាហ្នឹង យើងត្រូវការប្រកួតប្រជែងជាមួយខាងប៉ែកអ៊ឺរ៉ុបដែរ អឺរ៉ុបវាខ្លាំងៗដោយសារខាងហ្នឹង ការរកស៊ីរបស់គេក៏ទូលំទូលាយ»។

ព្រះអង្គវណ្ណាបន្ថែមថា៖«មានបំណងថាចង់ឱ្យបងប្អូនខ្មែរ Shareឱ្យបានច្រើនដើម្បីឱ្យគេទទួលស្គាល់បានច្រើនដោយសារតែយើង Cool App ហ្នឹងយើងប្រើជាផ្លូវការ […] ឱ្យដឹងពីស្នាដៃកូនខ្មែរយើង»។

ព្រះអង្គ ម៉ៅ វណ្ណា មានព្រះជន្ម៣០វស្សា មកពីខេត្តស្ទឹងត្រែង ដែលបច្ចុប្បន្នព្រះអង្គគង់នៅវត្តឧណ្ណាលោមក្នុងរាជធានីភ្នំពេញ។ (រូបភាព៖ រិន សុធារ័ត្ន)

និស្សិតស្រីម្នាក់ទៀត មកពីខេត្តព្រៃវែង កញ្ញាពក ម៉ារី មានអាយុ ២១ឆ្នាំ សិក្សាផ្នែកគណិតវិទ្យាស្ថិតិ នៅសាកលវិទ្យាល័យភូមិន្ទភ្នំពេញ (RUPP)។ កញ្ញាបានដឹងរួចហើយអំពី Cool App តាមរយៈ
បណ្តាញសង្គមហ្វេសប៊ុក តែកញ្ញាមិនទាន់បានដោនឡូតយកមកប្រើប្រាស់នៅឡើយទេ។

ទោះមិនទាន់បានប្រើ Cool App នេះក៏ដោយ កញ្ញាម៉ារី មានការភ្ញាក់ផ្អើល និងមិននឹកស្មានថាកម្ពុជាមាន App អាចប្រើប្រាស់បានដូចបរទេសដែរ។

កញ្ញាម៉ារីនិយាយថា៖ «ចំពោះ App ថ្មីហ្នឹង ខ្ញុំចំណាប់អារម្មណ៍ដំបូងខ្ញុំមានអារម្មណ៍ថា WOW! ខ្មែរយើងអាចបង្កើតកម្មវិធីហ្នឹងដែលប្រើប្រាស់ដូចនឹងកម្មវិធីបរទេសដូចជាតេឡេក្រាម ឬក៏ឆាតអីចឹង។ តែខ្ញុំអត់ដឹងថាប្រើទៅវាងាយស្រួលប៉ុណ្ណាអត់ទាន់ដឹងទេ គ្រាន់តែមុខងារវាដូចកម្មវិធីអស់ហ្នឹងដែរ ហើយចំណាប់អារម្មណ៍បន្ទាប់ ខ្ញុំអាចនឹងសាកល្បងវានៅពេលណាមួយចឹង តែឥឡូវអត់ទាន់បានទេ»។

ទន្ទឹមនឹងការចង់ដោនឡូតប្រើប្រាស់ Cool App នៅពេលខាងមុខនេះ កញ្ញាម៉ារី ក៏បានបង្ហាញពីក្តីបារម្ភ និងអារម្មណ៍ស្ទាក់ស្ទើរ ចំពោះបញ្ហាសុវត្ថិភាពនៃព័ត៌មានផ្ទាល់់ខ្លួនអាចបែកធ្លាយផងដែរ។

កញ្ញា ពក ម៉ារី មានអាយុ ២១ឆ្នាំ សិក្សាផ្នែកគណិតវិទ្យាស្ថិតិ នៅសាកលវិទ្យាល័យភូមិន្ទភ្នំពេញ (RUPP)។ (រូបភាព៖ រិន សុធារ័ត្ន)

ចំណែកលោក សំ សឿន មានអាយុ៣០ឆ្នាំ កំពុងរស់នៅក្នុងសង្កាត់ទឹកល្អក់១នៃរាជធានីភ្នំពេញ និងជាអ្នកបម្រើការងារនៅអង្គការភាពញញឹមនៃកុមារ(PSE)។ លោកបានដឹង និងគំាទ្រ Cool App នេះ ព្រោះជាស្នាដៃរបស់កម្ពុជាផ្ទាល់ ប៉ុន្តែលោកក៏ចង់ឱ្យក្រុមអ្នកផលិតខិតខំកែលម្អកម្មវិធីនេះឱ្យកាន់តែប្រសើរផងដែរ។

លោក សំ សឿន លើកឡើងថា៖ «[…]ខ្ញុំគាំទ្រយ៉ាងពេញទំហឹងព្រោះថាApp នេះជា App របស់ស្នាដៃកូនខ្មែរ ហើយវាក៏ជាឯកជនភាពមួយដើម្បីយើងប្រើនៅក្នុង[ចំណោម]ប្រជាពលរដ្ឋកម្ពុជា នៅក្នុងប្រទេសដើម្បីមានសុវត្ថិភាព ហើយក៏ដូចជាធ្វើនូវអាជីវកម្មអីផ្សេងៗក្នុងនេះបានវាទូលំទូលាយ។ ហើយមួយទៀតខ្ញុំក៏ចង់សំណូមពរឱ្យខាងApp ឱ្យមានការលក្ខណៈ Update ឱ្យវាមានកាន់តែទូលំ ទូលាយ ហើយឱ្យកាន់វាល្អដើម្បីប្រជាពលរដ្ឋយើងប្រើទៅកាន់តែមានភាពងាយស្រួល ប្រៀបធៀបទៅដូចហ្វេសប៊ុកដែរ»។

លោក សំ សឿន បានចែករំលែកពីបទពិសោធន៍ ក្រោយលោកបានប្រើប្រាស់ Cool App នេះ ក្នុងនោះលោកលើកឡើងទាំងចំណុចល្អ និងភាពខ្វះខាតដែលត្រូវការកែលម្អ។

លោក សំ សឿនថា៖«ចំពោះផលវិជ្ជមានគឺលក្ខណៈថាជាភាពងាយស្រួលមួយដូចបណ្តាញសង្គមមួយដែលយើងអាចចូលលេងបានដូចជាហ្វេសប៊ុកដែរ ប៉ុន្តែវាអត់សូវជាទូលំទូលាយច្រើនទេដោយសារអីប្រជាពលរដ្ឋយើងអត់ទាន់ងាកមកប្រើច្រើន។ ហើយគុណវិបត្តិនោះវាអត់សូវទូលំទូលាយដូចហ្វេសប៊ុកបាទសម្រាប់Media ក៏ដូចជាប្រព័ន្ធវីដេអូដូចជាផុស(Post)ទៅវាអត់ទាន់Smoothទេបាទ វានៅErrorម្តងម្កាលអ៊ីចឹងហា៎។ ហើយមួយទៀតចង់លើកទឹកចិត្តឱ្យពលរដ្ឋប្រើច្រើនទៅ ហើយខាងអ្នកដែលបង្កើតហ្នឹងឱ្យមានការកែលម្អឱ្យដូចហ្វេសប៊ុកទៅ គឺប្រសិនបើល្អប្រជាពលរដ្ឋយើងចូលលេងច្រើនដែរ»។

ចំណែកលោកជួន សំណាង មានអាយុ៣៦ឆ្នាំ ជាអាជីវករលក់ដូរ រស់នៅសង្កាត់ព្រែកប្រា ក្នុងរាជធានីភ្នំពេញ បានកោតសរសើរដោយមិនស្ទាក់ស្ទើរពី Cool App ដែលជាស្នាដៃរបស់កម្ពុជានេះ ។

លោកជួន សំណាងអះអាងថា៖«ខ្ញុំគិតថាល្អ បាទល្អៗខ្លាំងដែលប្រទេសកម្ពុជាយើងដែលមានដែលបានបង្កើតនូវ Cool App ដំបូងរបស់ប្រទេសកម្ពុជារបស់យើង។ Cool App នេះ ការប្រើប្រាស់ងាយស្រួលក្នុងការទំនាក់ទំនងនិយាយបាទ»។

លោកជួន សំណាង មានអាយុ៣៦ឆ្នាំ ជាអាជីវករលក់ដូរ រស់នៅសង្កាត់ព្រែកប្រា ក្នុងរាជធានីភ្នំពេញ។ (រូបភាព៖ រិន សុធារ័ត្ន)

គួរបញ្ជាក់ថាកម្មវិធី Cool App ដែលមានមុខងារជាច្រើនដូចជា Chat និង Call បូករួមទាំង Video Call ផងនោះ ត្រូវបានបង្កើតឡើងក្រោមស្នាដៃ ក្រុមអ្នកជំនួញបច្ចេកទេសរបស់កម្ពុជាជាច្រើននាក់ ដែលជាអ្នកជំនាញផ្នែកបច្ចេកវិទ្យាព័ត៌មាន(IT)។ ខណៈកម្មវិធីនេះបានចំណាយពេលជាង៣ឆ្នាំដើម្បីបង្កើតឱ្យចេញជារូបរាងឡើង គិតតាំងពីឆ្នាំ២០២១មកម្ល៉េះ និងបានដាក់ឱ្យដំណើរការនៅលើ App Store និង Play Store នៅឆ្នាំ២០២៤នេះ។ នេះបើយោងតាមទំព័រហ្វេសប៊ុក និងតេឡេក្រាមរបស់ លោក ហ៊ុន សែន៕

រិន សុធារ័ត្ន (Rin Sothearoth) – Newsroom Cambodia

បទ​យកការណ៍៖ សហគមន៍នេសាទព្រែកត្នោត ជួយការពារនិរន្តរភាពព្រៃកោងកាង និងជីវៈចម្រុះ

បទយកការណ៍៖ ពលរដ្ឋ​ប៉ះពាល់ពីគម្រោងព្រែកជីកហ្វូណន​បារម្ភថា​​​មិន​​អាច​ទទួល​​​សំណង​​សមរម្យ​

កម្រងរូបភាព៖ តម្បាញ​ក្រមា​ខ្មែរ​នៅកោះសូទិន​ ខេត្ត​កំពង់​ចាម

Q&A: យុវជន​គួរ​ធ្វើការងារស្ម័គ្រចិត្ត​​​​​ដើម្បីបង្កើនបទពិសោធន៍​​ជាក់ស្តែង​

​ក្មេង​ស្រី​អាយុ​​១៦​ឆ្នាំម្នាក់ទៀត​​​​នៅ​ខេត្តស្វាយរៀង​ឆ្លង​​ជំងឺ​ផ្ដា​សាយ​បក្សី​

ក្រសួង​សុខាភិបាល​​​ហាម​ឃាត់​ការ​​​ទទួល​ទាន​ស្រា​ថ្នាំ​៣​ប្រភេទ​​​​​ផ្ទុក​សារធាតុ​ SILDENAFIL​

ប្រធាន​ក្រុម​ការងារ​បក្ស​កែ​ទម្រង់​កម្ពុជា​ខេត្ត​សៀមរាប​​ត្រូវ​បាន​ចាប់​ខ្លួន​ដោយ​គ្មាន​មូលហេតុ​

ពលរដ្ឋរំឮកខួប៨ឆ្នាំនៃឃាតកម្ម​លើ​បណ្ឌិត កែម ឡី ដោយ​ទាមទារ​ឱ្យ​មាន​ការដោះ​លែង​អ្នក​​ទោស​មន​សិការ