សំអាត អានីសា (Samat Anisa) – Newsroom Cambodia

ក្រសួងក្រើនរំលឹកដល់ពលរដ្ឋប្រុងប្រយ័ត្នចំពោះជំងឺកូវីដ-១៩ ក្រោយករណីឆ្លងកើនឡើង

សំអាត អានីសា (Samat Anisa) — Thu, 13 Jun 2024 12:52:35 +0000

ក្រសួងសុខាភិបាល ក្រើនរំលឹកដល់ប្រជាពលរដ្ឋ ប្រុងប្រយ័ត្នចំពោះជំងឺផ្តាសាយ និងជំងឺកូវីដ-១៩ បំប្លែងខ្លួន ក្រោយរកឃើញករណីឆ្លងកើនឡើង ក្នុងកំឡុងខែឧសភា និងដើមខែមិថុនា ឆ្នាំ២០២៤នេះ។

យោងតាមសេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី១២ ខែមិថុនា ឆ្នាំ២០២៤ បានឱ្យដឹងថា តាមរយៈប្រព័ន្ធតាមដានជំងឺផ្តាសាយ និងប្រព័ន្ធតាមដានជំងឺរលាកផ្លូវដង្ហើមធ្ងន់ធ្ងរ កម្ពុជាបានរកឃើញថាមានការកើនឡើងនូវជំងឺផ្តាសាយ និងជំងឺកូវីដ-១៩ បំប្លែងខ្លួន ក្នុងរយៈពេលជាង១ខែចុងក្រោយនេះ ខណៈជំងឺឆ្លងនេះ ក៏មាននិន្នាការកើនឡើងស្របគ្នានៅក្នុងបណ្តាប្រទេសជាច្រើននៅក្នុងតំបន់អាស៊ីប៉ាស៊ីហ្វិកខាងលិច និងបណ្តាប្រទេសជិតខាងកម្ពុជា។

ករណីនេះ ក្រសួងបានអំពាវនាវ និងក្រើនរំលឹកដល់ប្រជាពលរដ្ឋ ត្រូវយកចិត្តទុកដាក់ថែរក្សាសុខភាពផ្ទាល់ខ្លួន និងក្រុមគ្រួសារ ដើម្បីបង្ការនូវការឆ្លងរាលដាលនូវជំងឺផ្តាសាយ និងជំងឺកូវីដ-១៩ ជាលក្ខណៈទ្រង់ទ្រាយធំជាយថាហេតុ។

ជាមួយគ្នានេះ ក្រសួងសុខាភិបាល ក៏បានណែនាំឱ្យប្រជាពលរដ្ឋចូលរួមអនុវត្តនូវវិធានការបង្ការឱ្យបានម៉ឹងម៉ាត់ ដោយត្រូវប្រកាន់ខ្ជាប់នូវអនាម័យ ត្រូវខ្ទប់មាត់ដោយពាក់ម៉ាស ឬប្រើកន្សែងដៃនៅពេលក្អកកណ្តាស់ និងត្រូវចៀសវាងចូលរួមក្នុងទីប្រជុំជន ឬការធ្វើដំណើរ ប្រសិនបើមានអាការៈក្តៅខ្លួន ក្អក ពិបាកដកដង្ហើម ឬមានបញ្ហាសុខភាព។ លើសពីនេះ ក្រសួងថា ប្រសិនបើធ្វើតេស្តឃើញវិជ្ជមានកូវីដ-១៩ ត្រូវដាក់ខ្លួនឱ្យនៅដាច់ដោយឡែកពីសមាជិកគ្រួសារ រហូតដល់គ្មានរោគសញ្ញាជំងឺ។

ក្រសួងបានណែនាំបន្ថែមថា៖ «ប្រសិនបើមានរោគសញ្ញាគ្រុនក្តៅ ក្អក ឈឺក្បាល ហៀរសំបោរ ឬពិបាកដកដង្ហើម សូមស្វែងរកការពិគ្រោះយោបល់នៅមណ្ឌលសុខភាព ឬមន្ទីរពេទ្យឱ្យបានទាន់ពេលវេលា ឬទូរស័ព្ទមកកាន់លេខ១១៥ ដើម្បីទទួលបានការណែនាំ និងពិគ្រោះយោបល់»។

លោក កុយ វ៉ាន់នី អ្នកនាំពាក្យក្រសួងសុខាភិបាល មានប្រសាសន៍នៅថ្ងៃទី១៣ ខែមិថុនា ឆ្នាំ២០២៤នេះថា បើទោះបីជាជំងឺកូវីដ-១៩ លែងជាហានិភ័យធ្ងន់ធ្ងរក៏ដោយ ប៉ុន្តែប្រជាពលរដ្ឋនៅតែអាចប្រឈមនឹងការឆ្លង បើសិនខ្វះការប្រុងប្រយ័ត្ន និងការការពារ។

លោកថា៖ «ជំងឺកូវីដហ្នឹង វាស្រាលដូចផ្តាសាយមែន ប៉ុន្តែក៏នៅតែអាចមានឆ្លងដែរ ប៉ុន្តែហានិភ័យដែលអាចឆ្លងដល់[ស្លាប់បាត់បង់]អាយុជីវិតនោះ អត់មានលក្ខណៈហ្នឹងយើងរកឃើញទេ អត់មានឃើញការស្លាប់ដោយកូវីដឥឡូវហ្នឹងទេ»។

ជាមួយគ្នានេះដែរ លោកក៏បានណែនាំដល់ប្រជាពលរដ្ឋឱ្យប្រុងប្រយ័ត្នថែរក្សាសុខភាព និងការពារខ្លួនពីការឆ្លងជំងឺផ្សេងៗទៀត ក្រៅពីជំងឺផ្តាសាយ ដូចជា ជំងឺថ្លើម ជំងឺរលាកសួត និងជំងឺរបេងជាដើម។

លោក កុយ វ៉ាន់នី បញ្ជាក់ថា៖ «អ្នកណាផ្តាសាយ គាត់ក្អកមក[…] ទឹកកំហាកហ្នឹង ប្រសិនជាគាត់ផ្តាសាយហើយគាត់មានមេរោគរបេង ពេលហ្នឹងមេរោគរបេងនឹងអាចឆ្លងមកយើងអ្នកអត់ឈឺ»។

ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី លើកឡើងថា ជំងឺកូវីដ-១៩ នេះឆ្លងលឿនណាស់ ហើយការកើនឡើងនូវចំនួនអ្នកឆ្លងនេះ ក៏អាចបណ្តាលមកពីកត្តាអាកាសធាតុផងដែរ ដោយសារពេលនេះជារដូវវស្សា និងការប្រែប្រួលអាកាសធាតុ។

លោកថា៖ «ហើយ[អាកាសធាតុ]យើងតិចក្តៅ តិចភ្លៀង កន្លែងហ្នឹងហើយដែលធ្វើឱ្យយើងងាយស្រួលនឹងការទទួលឆ្លងពីជំងឺផ្សេងៗ ជាពិសេសវីរុសកូវីដនេះ»។

បើតាមរបាយការណ៍របស់ក្រសួងសុខាភិបាល គិតត្រឹមថ្ងៃទី១២ ខែមិថុនា ឆ្នាំ២០២៤ អ្នកឆ្លងជំងឺកូវីដ-១៩ មានចំនួនសរុប ១៣៩ ២៣៣ករណី ក្នុងនោះព្យាបាលជាសះស្បើយចំនួន ១៣៦ ១៤១ករណី និងស្លាប់សរុបចំនួន ៣ ០៥៦នាក់៕

មន្ទីរធម្មការខេត្ត៖ ចៅអធិការវត្តគិរីសាលវ័ន យល់ព្រមកែសម្រួលមហាកុដិឡើងវិញ ក្រោយរងការរិះគន់ថាសង់ឡើងដូចផ្ទះវីឡា

សំអាត អានីសា (Samat Anisa) — Fri, 10 May 2024 02:48:36 +0000

មន្ទីរធម្មការខេត្តកំពង់ចាម ឱ្យដឹងថា ចៅអធិការ និងគណៈកម្មការវត្តគិរីសាលវ័ន ហៅវត្តថ្មី បានយល់ព្រមកែសម្រួលមហាកុដិឡើងវិញ ទៅតាមរចនាបថខ្មែរ និងបែបប្រពៃណីព្រះពុទ្ធសាសនា ក្រោយ មហាជនបានរិះគន់នៅតាមបណ្តាញសង្គមថា សំណង់មហាកុដិនេះ សាងសង់ឡើងមានទម្រង់ដូចទៅនឹងផ្ទះវីឡា។

ជាការកត់សម្គាល់ក្នុងរយៈពេលប៉ុន្មានថ្ងៃចុងក្រោយនេះ មានការរិះគន់ជាបន្តបន្ទាប់នៅលើបណ្តាញសង្គមហ្វេសប៊ុក ជុំវិញសំណង់មហាកុដិនៅវត្តគិរីសាលវ័ន ហៅវត្តថ្មីនេះ ថាមានទម្រង់ដូចផ្ទះវីឡាទំនើប ក្រោយពីមហាកុដិនេះ បានសម្ភោធដាក់ឱ្យប្រើប្រាស់ និងធ្វើបុណ្យឆ្លង កាលពីថ្ងៃទី០១ ខែមីនា ឆ្នាំ២០២៤។

យោងតាមសេចក្តីប្រកាសព័ត៌មានរបស់មន្ទីរធម្មការ និងសាសនាខេត្តកំពង់ចាម ចុះថ្ងៃទី០៥ ខែមីនា ឆ្នាំ២០២៤ បានឱ្យដឹងថា តាមការពិនិត្យរបស់មន្ទីរធម្មការ សហការជាមួយជំនាញ និងអាជ្ញាធរពាក់ព័ន្ធ ឃើញថា សំណង់ មហាកុដិ នៅវត្តគិរីសាលវ័ន្ត ស្ថិតនៅភូមិទួលត្រាច ឃុំទ្រាន ស្រុកកំពង់សៀម ខេត្តកំពង់ចាម បានសាងសង់ខុសរចនាបថខ្មែរពិតមែន។

សេចក្តីប្រកាសព័ត៌មានដដែល បន្តថា សំណង់នេះ បានសាងសង់ឡើងចាប់តាំងពីឆ្នាំ២០១៨មក ដោយពុំមានការសុំច្បាប់អនុញ្ញាតសាងសង់នោះឡើយ ហើយការសាងសង់នោះដំបូងឡើយធ្វើតាមរចនាបថខ្មែរ ប៉ុន្តែក្រោយមក ព្រះចៅអធិការវត្ត និងជាង បានកែប្រែរចនាបទនេះ ខុសពីប្លង់ដើម នៅផ្នែកខាងមុខ។

ជាដំណោះស្រាយ មន្ទីរថា ព្រះគ្រូចៅអធិការ អាចារ្យ គណៈកម្មការវត្ត បានឯកភាពគ្នា កែសម្រួលមហាកុដិនេះឡើងវិញ ដោយយកគំរូរចនាបថខ្មែរ តាមបែបប្រពៃណីព្រះពុទ្ធសាសនា ហើយតទៅមុនទៀត គណៈសង្ឃវត្ត បេជ្ញាដឹកនាំទីអារាមនេះ ដោយអនុវត្តទៅតាមលក្ខខណ្ឌច្បាប់អនុញ្ញា ដោយមិនឱ្យមានបញ្ហាបែបនេះកើតឡើងទៀតឡើយ។

Newsroom Cambodia មិនអាចសុំសង្ឃដីកាបកស្រាយជុំវិញករណីនេះ ពីព្រះតេជគុណ ប៊ន ស្រឿន ព្រះគ្រូចៅអធិការវត្តគិរីសាលវ័ន បានទេ នៅថ្ងៃទី០៧ ខែមីនានេះ។ ប៉ុន្តែព្រះតេជគុណមានសង្ឃដីកាប្រាប់សារព័ត៌មានក្នុងស្រុកថា ការសាងសង់មហាកុដិនេះឡើង ក្នុងគោលបំណងបង្កើនភាពទាក់ទាញ និងទំនើបកម្ម ដោយពុំមានចេតនាណាមួយលុបបំបាត់ប្រពៃណីវប្បធម៌ និងរចនាបថខ្មែរនោះទេ។ ព្រះតេជគុណបន្តថា ការសាងសង់មហាកុដិនេះឡើង មិនមែនសម្រាប់តែជាទីសេនាសនៈសម្រាប់ព្រះសង្ឃគង់ស្នាក់អាស្រ័យនោះទេ ប៉ុន្តែជាកន្លែងសម្រាប់ទីសក្ការៈបូជា តម្កល់ព្រះពុទ្ធរូប បណ្ណាល័យ មានកន្លែងផ្សព្វផ្សាយព្រះធម៌ និងមានកន្លែងសម្រាប់ធ្វើវិបស្សនា ឬសមាធិ ថែមទៀត។

ព្រះអង្គមានសង្ឃដីកាថា៖ «ក្នុងគោលបំណងរបស់អត្មា អត់មានបំណងថាលុបបំបាត់ប្រពៃណីវប្បធម៌ ឬក៏រចនាបទខ្មែរទេ ហើយតែផ្ទុយទៅវិញ មានន័យថាជាការស្រឡាញ់ ប៉ុន្តែដូចអត្មាថាចឹង វារៀងលើសលុបពេក កន្លែងខ្លះវាធ្វើទៅដូចជាបែបទំនើប[…] ដល់ចឹងវាអាចប៉ះពាល់អារម្មណ៍បងប្អូនយើងមួយចំនួន ដែលគាត់ពុំបានដឹងពីបំណងដែលអត្មាធ្វើនេះ អីចឹងអត្មាសុំអធ្យាស្រ័យអភ័យទោសពីបងប្អូនអ្នករិះគន់ផងដែរ ដែលអត្មាបំណងធ្វើនេះ គឺយើងចង់ឱ្យវាស្អាត មានសោភ័ណ្ឌភាព ហើយវាជាទីទាក់ទាញ មកដល់ហើយចូលមកគឺគួរឱ្យជ្រះថ្លា»។

ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ គាំទ្រឱ្យមានការកែសម្រួលមហាកុដិនេះឡើងវិញ ដោយសារតែផ្នែកខាងមុខនៃមហាកុដិ សាងសង់ឡើងហាក់ដូចជា ម៉ូតផ្ទះវីឡាទំនើប ដែលមិនសាកសមនឹងសាងសង់នៅក្នុងវត្តអារាមឡើយ។ លោកបន្តថា ការសាងសង់កុដិដែលមានទម្រង់បែបផ្ទះវីឡានេះ អាចប៉ះពាល់ដល់វិស័យពុទ្ធសាសនា និងមុនមាត់របស់កម្ពុជា។ លោកថា៖ «បើធម្មជាតិខ្មែរយើងតាំងពីតកូនតចៅមក មិនដែលមានវត្តណាធ្វើផ្ទះវីឡានៅក្នុងវត្តទេ។ បើសម្រាប់ព្រះសង្ឃនៅតាមព្រះពុទ្ធសាសនា ព្រះសង្ឃមិនត្រូវមានទ្រព្យសម្បត្តិ ឬក៏អ្វីផ្សេងដែលជាការតាំងទ្រព្យសម្បត្តិអីច្រើនទេ ព្រះសង្ឃមានតែសុំសីលធម៌តែមួយមុខទេ»៕

កម្មកររោងចក្រ ML នៅក្រុងប៉ោយប៉ែតប្រមូលផ្ដុំតវ៉ាជាថ្មី ក្រោយថៅកែបើកប្រាក់ខែយឺតយ៉ាវជាញឹកញាប់

សំអាត អានីសា (Samat Anisa) — Thu, 25 Apr 2024 12:33:17 +0000

កម្មករកម្មការិនីប្រមាណជាង ៤០០នាក់ ធ្វើការនៅរោងចក្រកាត់ដេរសម្លៀកបំពាក់ អិម អិល(ML) បានម្រមូលផ្ដុំគ្នាជាថ្មីនៅមុខរោងចក្រ នាថ្ងៃទី២៥ ខែមេសា ឆ្នាំ២០២៤នេះ ដើម្បីតវ៉ាទាមទារប្រាក់ខែ ដោយសារមានការបើកប្រាក់ឈ្នួលយឺតយ៉ាវញឹកញាប់។

លោក គឹម តូនិច អះអាងជាកម្មករធ្វើការនៅរោងចក្រ ML បានឱ្យដឹងថា ពួកគាត់បានប្រមូលផ្តុំគ្នា តវ៉ានៅមុខរោងចក្រ អិមអិល អ៊ិនធីមេត អឹភែរឹល (ML Intimate Apparel) ដោយហេតុថា ក្រុមហ៊ុនបានលើកថ្ងៃបើកលុយឱ្យកម្មករជាងមួយខែមកហើយ គិតពីពាក់កណ្តាលខែមីនា មកដល់ពាក់កណ្តាលខែមេសានេះ។ លោកបន្តថា ក្រុមហ៊ុនបានលើកថ្ងៃបើកលុយឱ្យកម្មករជាច្រើនលើកច្រើនសារមកហើយ ដោយបានប្រើពាក្យដោះសារដដែលៗថាមកពីបញ្ហានេះ បញ្ហានោះ ដោយមិនមានការទទួលខុសត្រូវ។

លោក តូនិច និយាយថា៖ «ផលប៉ះពាល់ គឺប៉ះពាល់ដល់កម្មករគ្រប់គ្នា បញ្ហាធំគឺបង់អង្គការហ្នឹងតែម្តង បញ្ហាធំជាងគេ។ គាត់ជំពាក់អង្គការលើសថ្ងៃបើកលុយ តែលើសថ្ងៃបង់ គឺគេពិន័យចឹងហើយគាត់[កម្មករ]ត្អូញត្អែរគ្រប់គ្នាគ្រប់កម្មករទាំងអស់ មិនថាតែរូបខ្ញុំ រូបកម្មករដទៃទៀត»។

ប្រធានសហព័ន្ធសហជីពកំលាំងសាមគ្គីកម្មករកម្ពុជាប្រចាំរោងចក្រML លោក បាន វណ្ណៈ បានលើកឡើងថា មូលហេតុដែលកម្មករធ្វើកូដកម្ម ដោយសារតែខាងរោងចក្រសន្យាថា នឹងបើកប្រាក់ឈ្នួលឱ្យកម្មករនៅល្ងាចថ្ងៃទី២៤ ខែមេសា ម្សិលមិញនេះ ប៉ុន្តែបែរជាមិនគោរពសន្យា ជាហេតុធ្វើឱ្យកម្មករប្រមូលផ្តុំតវ៉ា។

លោក វណ្ណៈ បន្តថា ក្នុងអំឡុងពេលតវ៉ានោះ កម្មករបានស្នើឱ្យមានការដោះស្រាយវិវាទការងារនេះចំនួន ៣ចំណុច ក្នុងនោះមាន ទី១ ស្នើឱ្យក្រុមហ៊ុនបើកប្រាក់ខែ និងប្រាក់អត្ថប្រយោជន៍ផ្សេងៗឱ្យបានទៀងទាត់ ទី២ ស្នើឱ្យក្រុមហ៊ុនកុំមានការបន្ថែមម៉ោងលើសពីម៉ោង៦ល្ងាច ដោយការបន្ថែមម៉ោងត្រូវធ្វើឡើងដោយការស្ម័គ្រចិត្ត និងទី៣ ស្នើឱ្យក្រុមហ៊ុនជួយណែនាំដល់ប្រធានផ្នែកដែលជេរប្រមាថកម្មករកម្មការិនី។

ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តបន្ទាយមានជ័យ លោក នួន ស៊ីណា មានប្រសាសន៍ថា ជុំវិញវិវាទការងារនៅរោងចក្រ ML នេះ ក្រុមការងាររបស់មន្ទីរ បានទៅសម្របសម្រួលរកដំណោះស្រាយរួចហើយ ដោយខាងភាគីរោងចក្រ បានយល់ព្រមបើកប្រាក់ឈ្នួលជូនកម្មករ ហើយកម្មករក៏បានចូលធ្វើការវិញនៅព្រឹកថ្ងៃដដែលនេះ។

លោកបន្តថា៖« បើសិនជានិយោជិតគាត់មានបញ្ហាអីកើតឡើង គឺគាត់មិនបាច់ប្រជុំគ្នាទេ គាត់អាចដាក់ពាក្យមកមន្ទីរការងារ រឺក៏ផ្តល់ដំណឹងមកមន្ទីរការងារ ដើម្បីឱ្យបានដឹង គឺយើងខាងមន្ទីរការងារនឹងទៅដោះស្រាយ អាហ្នឹងដូចជាការដាក់ពាក្យបណ្តឹងចឹង ក្នុងករណីគាត់[កម្មករ]ធ្វើកូដកម្មចឹង វាធ្វើឱ្យប៉ះពាល់ទាំងសងខាង ទាំងខាងនិយោជក ក៏ដូចជាបងប្អូនកម្មករនិយោជិតដែរ ព្រោះថ្ងៃធ្វើកូដកម្ម គឺបងប្អូនកម្មករនិយោជិតគាត់មិនទទួលបាននូវប្រាក់ខែនៅថ្ងៃគាត់ធ្វើកូដកម្មនោះទេ»។

អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សរបស់អង្គការសង់ត្រាល់ លោក ឃុន ថារ៉ូ យល់ថា ការមិនបើកប្រាក់ឈ្នួលជូនកម្មករឱ្យបានទៀងទាត់ ជាការមិនគោរពច្បាប់ការងារ និងធ្វើឱ្យប៉ះពាល់ដល់ជីវភាពរបស់កម្មករនិយោជិត។

លោកថា៖ «បើយើងនិយាយអំពីគោលការណ៍ច្បាប់នេះ ជាការអនុវត្តមិនត្រឹមត្រូវរបស់និយោជក នេះជាកំហុសធ្ងន់ ចាត់ថ្នាក់ថាជាកំហុសធ្ងន់របស់និយោជក ខណៈពេលដែលមានការពន្យារពេលនៅក្នុងការបើកប្រាក់ឈ្នួលជូនកម្មករនិយោជិត ហើយវាមែនជាលើកទីមួយទេ នៅក្រុមហ៊ុនMLនេះ មានករណីរំលោភបំពានសិទ្ធិការងារច្រើនណាស់ ជាពិសេសទាក់ទងទៅនឹងការបញ្ឈប់ថ្នាក់ដឹកនាំសហជីព ការបន្តនូវការប្រើប្រាស់កិច្ចសន្យារយៈពេលខ្លី ហើយនិងទម្រង់នៃការធ្វើទុក្ខបុកម្នេញទៅដល់សកម្មជន និងថ្នាក់ដឹកនាំសហជីព»។

ជាមួយគ្នានេះដែរ លោក ឃុន ថារ៉ូ ក៏បានស្នើឱ្យក្រសួងការងារ ឬស្ថាប័នពាក់ព័ន្ធ ធ្វើអធិការរកិច្ចពិសេស នៅរោងចក្រ ML នេះ ដើម្បីឱ្យក្រុមហ៊ុនមានការគោរពតាមកាតព្វកិច្ចរបស់ខ្លួន។

កាលពីថ្ងៃទី៨ ខែវិច្ឆិកា ឆ្នាំ២០២៣ កម្មករធ្វើការនៅរោងចក្រកាត់ដេរសម្លៀកបំពាក់ អិម អិល(ML)នេះ បានប្រមូលផ្ដុំគ្នាតវ៉ានៅមុខរោងចក្រម្តងរួចមកហើយ ក្រោយពីរោងចក្របានពន្យាពេលបើកប្រាក់ឈ្នួលជូនកម្មករ។ ក្នុងការតវ៉ានៅពេលនោះ ពួកគេបានទាមទារឱ្យថៅកែបើកប្រាក់ខែឱ្យបានទៀងទាត់ ផ្ដល់ប្រាក់រង្វាន់ និងត្រូវអនុញ្ញាតឱ្យកម្មករសម្រាកថ្ងៃបុណ្យជាតិ ទៅតាមច្បាប់ស្តីពីការងារ៕

បទយកការណ៍៖ អាជីវករមុខអង្គរត្អូញត្អែរពីការធ្លាក់ចុះការលក់ដូរក្រោយអាជ្ញាធរអប្សរារៀបចំកែលម្អបរិវេណអង្គរជាថ្មី

សំអាត អានីសា (Samat Anisa) — Fri, 16 Feb 2024 07:43:50 +0000

នារសៀលថ្ងៃទី១៤ ខែមករា ក្នុងតូបលក់បាយម្ហូបមួយដែលមានភ្ញៀវ ៣ទៅ ៤ នាក់កំពុងបរិភោគអាហារថ្ងៃត្រង់ អ្នកស្រី សម្បត្តិ ឡាយ ជាអាជីវករលក់បាយម្ហូបនៅបរិវេណមុខប្រាសាទអង្គរវត្តតាំងពីឆ្នាំ១៩៩៨ លើកឡើងថា ការលក់ដូររបស់អ្នកស្រីមានការអន់ថយជាខ្លាំងចាប់តាំងពីពេលដែលអាជ្ញាធរជាតិអប្សរាចាប់ផ្តើមជីកប្រលាយ និងដាំកូនឈើមុខបរិវេណអង្គរមក។

និយាយទាំងទឹកមុខក្រៀមក្រំ ស្រ្តីវ័យ ៤៥ឆ្នាំរូបនេះបន្ថែមថា ការលក់ដូរមានការថយចុះពី៣០ម៉ឺន ទៅ៤០ម៉ឺនរៀលក្នុងមួយថ្ងៃ មកនៅត្រឹម៤ម៉ឺន ទៅ១០ម៉ឺនរៀលក្នុងមួយថ្ងៃ។

អ្នកស្រីនិយាយថា៖ «ខ្សោយណាស់ ពីមុនធ្លាប់លក់បានលុយ ឥឡូវលក់អត់បានលុយទេ វាអត់រហូត វាអត់ទាល់តែថ្ងៃណាបាន៤ទៅ១០ម៉ឺនទិញអត់គ្រប់វិញទេ ពិសេសត្រីអីសល់ចោល»។

អ្នកស្រី សម្បត្តិ ឡាយ ជាអាជីវករមួយរូបក្នុងចំណោមអាជីវករលក់ដូរម្ហូបអាហារមុខតំបន់អង្គរចំនួន២៩គ្រួសារ កំពុងជួបបញ្ហាភ្ញៀវធ្លាក់ចុះ ចាប់តាំងពីខែ មេសា ឆ្នាំ២០២៣មក បន្ទាប់ពីអាជ្ញាធរជាតិអប្សរារៀបចំតំបន់បរិវេណអង្គរ ដោយជីកប្រលាយ ចាក់ដី និងដាំកូនឈើ និងមិនអនុញ្ញាតឱ្យរថយន្តរបស់ភ្ញៀវទេសចរណ៍ចតលើផ្លូវ តាំងពីខែមេសា ឆ្នាំ២០២៣កន្លងមក។

អាជីវករទាំង២៩គ្រួសារនេះ ស្ថិតក្នុងចំណោមប្រជាពលរដ្ឋប្រមាណជិត ១ម៉ឺនគ្រួសារ ដែលរស់នៅជុំវិញតំបន់ឧទ្យានជាតិអង្គរ និងដែលត្រូវបានជូនដំណឹងឱ្យរុះរើចេញដោយស្ម័គ្រចិត្ត ហើយផ្លាស់ទៅកាន់ទីតាំងថ្មី បន្ទាប់ពីរដ្ឋាភិបាលអះអាងថា ការសាងសង់សំណង់ខុសច្បាប់នៅតំបន់អង្គរ នៅតែបន្តកើតមានឥតឈប់ឈរ ដែលអាចធ្វើឱ្យប៉ះពាល់ ទៅដល់រមណីយដ្ឋានអង្គរទាំងមូល។

អ្នកស្រី សម្បត្តិ ឡាយ បន្តថា៖ «បើសិនជាយើងលក់បាយក្រៅពីតំបន់អង្គរ យើងលក់អត់កើតទេ បើយើងលក់ឆ្ងាយពីតំបន់អង្គរ ភ្ញៀវទេសចរណ៍មិនមែនបានភ្ញៀវជនជាតិទេ បានភ្ញៀវជាតិខ្មែរយើងមកពីខេត្តគេទេ ដល់ហើយបងចេះតែលក់បាយ លក់ម្ហូប ដូចជាប្រហុកត្រីហ្នឹង ប៉ុន្តែបើឱ្យបងបានភ្ញៀវជនជាតិគឺអត់មានទេ»។

អ្នកស្រីអះអាងថា៖ «គេចង់ឱ្យយើងទៅនៅឱ្យឆ្ងាយ ឯរុនតាឯកហ្នឹង […] ឱ្យយើងទៅលក់បាយលក់អីនៅហ្នឹង តែយើងទៅលក់អត់កើត ហើយតូបខ្ញុំមាននៅហ្នឹងយូរហើយតាំងពី ៩០ [ឆ្នាំ១៩៩០] ជាង […] តូបខ្ញុំមានពីយូរហើយ ហើយរយៈពេលកាលដែលថាយើងនៅមកយើងចង់សុំមិនលក់នៅរុនតាឯកទេ សុំនៅលក់ទីតាំងតំបន់អង្គរ»។

ទីតាំងថ្មីដែលអាជ្ញាធរដាក់ឱ្យអាជីវករទៅទីតាំងថ្មីនោះគឺស្ថិតចំណុចនៅភូមិ រុនតាឯក ស្រុកបន្ទាយស្រី ដែលមានចម្ងាយប្រមាណ ៥គីឡូម៉ែត្រពីទីរួមខេត្តសៀមរាប។

អាជីវករលក់ដូរនៅតំបន់មុខអង្គវត្តម្នាក់ទៀត អ្នកស្រី សួង វណ្ណៈ បានឱ្យដឹងថា មួយរយៈពេលចុងក្រោយនេះ ការលក់ដូរមានការធ្លាក់ចុះបន្ទាប់ពីអាជ្ញាធរបានចុះរុះរើផ្លូវនៅកន្លែងដែលអ្នកស្រីកំពុងលក់ដូរ។

អ្នកស្រីរៀបរាប់ថា៖ «មួយថ្ងៃៗគេអត់ទាន់មកធ្វើអ៊ីចឹងអ៊ីលក់ដាច់ អ៊ីមានកន្លែងចតឡាន […] អាតាមចិញ្ចើមផ្លូវហ្នឹងហា៎ទាំងសងខាង យើងចតបានយើងលក់បានកើនលុយ […] ដំបូងគាត់ [អាជ្ញាធរ] ដាក់ឡានចូលមកក្នុងពីរថ្ងៃគត់ៗ ឡានអត់ឱ្យដាក់ក្នុងទេ ចិញ្ចើមផ្លូវក៏មិនឱ្យដាក់ដែរ គាត់ដាំដើមឈើទាំងអស់»។

អ្នកស្រីបន្ថែមថា អ្នកស្រីចង់បានទីតាំងជិតលក់ដូរមុខអង្គរដើម្បីផ្តល់ភាពងាយស្រួលដល់ភ្ញៀវទេសចរណ៍មកសម្រាកពិសារអាហារថ្ងៃត្រង់ និងដើម្បីអាចរកចំណូលចិញ្ចឹមកូនៗនិងសងធនាគារផង។

ស្រដៀងនឹងអ្នកលក់ម្ហូបខាងលើដែរ អ្នកស្រី ថេង គឹមបូ អាយុ៤៦ឆ្នាំ បានចាប់ផ្តើមលក់ដូរតាំងពីឆ្នាំ២០០០មក លើកឡើងដែរថា ការត្អូញត្អែរចំពោះការលក់ដូរធ្លាក់ចុះដោយសារតែការឈូសឆាយផ្លូវ និងដាំកូនឈើពីខាងអាជ្ញាធរដែលជាដើមហេតុធ្វើឱ្យការលក់ដូររបស់អ្នកស្រីមានការធ្លាក់ចុះខ្លាំង។

អ្នកស្រី គឹមបូ ត្អូញត្អែរថា៖ «លក់ដូរ លក់បាយអីហ្នឹង ទៅគ្រាន់បានចិញ្ចឹមកូនបានរៀនអីទៅមុខទៀត […] ប៉ុន្តែអត់ដាច់ក៏ដោយ ចេះតែសុំថាបាននៅលក់ នៅទីតាំងបរិវេណប្រាសាទអង្គរ បានឲ្យកូនចៅរស់ចិញ្ចឹមជីវិតផង ហើយនិងចិញ្ចឹមកូនរៀនបន្តទៅទៀត»។

ជុំវិញការត្អូញត្អែររបស់អាជីវករ លោក ឡុង កុសល អ្នកនាំពាក្យអាជ្ញាធរជាតិអប្សរាមានប្រសាសន៍ថា អាជីវករលក់ដូរបានស្ម័គ្រចិត្តចាកចេញពីតំបន់អង្គររួចហើយ ប៉ុន្តែនៅតែមានការបន្តលក់ដូរ ម៉្យាងតំបន់មុខអង្គរជាទីកន្លែងសាធារណៈដែលរដ្ឋមានតួនាទីថែរក្សាឱ្យមានសណ្តាប់ធ្នាប់ កុំឱ្យមានភាពរញ៉េរញ៉ៃ។

លោកបញ្ជាក់ថា៖ «ទីកន្លែងហ្នឹងជាទីកន្លែងសាធារណៈរបស់រដ្ឋ ជាដីសាធារណៈរបស់រដ្ឋដែលរដ្ឋមានតួនាទី ភារកិច្ចក្នុងការគ្រប់គ្រងថែរក្សាធ្វើឱ្យវាកាន់តែមានភាពល្អប្រសើរ។ នៅពេលដែលទីកន្លែងនេះរៀបចំបានប្រសើរសឹងតែទាំងអស់រួចរាល់ហើយ វានៅសល់តែប៉ុណ្ណឹងនាក់ តើគួររក្សាបន្តទីកន្លែងហ្នឹងឱ្យវាមានរញ៉េរញ៉ៃអ៊ីចឹងបន្តទៅទៀត ឬក៏យ៉ាងម៉េច»។

លោក ឡុង កុសល បានឆ្លើយតបនឹងការលើកឡើងរបស់ងាជីវករដែលស្នើសុំនៅលក់បន្តក្នុងតំបន់មុខអង្គរថា មិនមានកាអនុញ្ញាតឱ្យអាជីវករនៅលក់បន្តនោះទេ ដោយសារមានការសម្រេចឱ្យប្រជាជនរុះរើចេញពីតំបន់អង្គររួចហើយ។

លោកបញ្ជាក់ថា៖ «គាត់បានឯកភាពចំពោះមុខស្ថាប័នរដ្ឋថាគាត់នឹងចាកចេញទៅ ឱ្យរើតូបស្អីៗរបស់គាត់ ប៉ុន្តែគាត់បានរំលោភសេចក្តីទុកចិត្តរបស់គេ ទីមួយ។ ទីពីរគាត់បានបង្កនូវរូបភាពមិនជាគំរូរបស់គេដែរ […] តើមានភាពស្មើរភាពគ្នាដែរ ឬទេ?»។

ត្រលប់មក អ្នកស្រី សម្បត្តិ ឡាយ ដែលជាអាជីវករលក់បាយម្ហូបនៅខាងមុខតំបន់អង្គរវិញអះអាងថា គ្រួសារអ្នកស្រីយល់ព្រមរើផ្ទះចេញពីតំបន់អង្គរ ប៉ុន្តែអ្នកស្រីចង់មានកន្លែងលក់ដូរក្នុងតំបន់អង្គរដដែល។

អ្នកស្រីថា៖ «មិនមែនបងឃើញគេឱ្យទៅហើយយើងរឹងទទឹងថាមិនព្រមចេញពីកន្លែងនេះទេ យើងព្រមចេញផ្ទះហើយ តែតូបខ្ញុំសុំនៅក្នុងតំបន់នេះ ចែកខ្ញុំទៅណាក៏ខ្ញុំព្រម ខ្ញុំមិនមែនថារឹងនៅនេះ អត់មានរឹងទេ បើសិនកន្លែងណាក៏ដោយឱ្យតែរៀបស្អាតឱ្យ បើមិនរៀបក៏ដោយឱ្យតែចែក (ទីតាំង)ពួកខ្ញុំ វាស់តែទីតាំង ពួកខ្ញុំធ្វើតូបលក់បាយធម្មតា»៕

បទយកការណ៍៖ កសិដ្ឋានចិញ្ចឹមជ្រូកមួយចំនួនក្នុងខេត្តសៀមរាបប្រឈមនឹងការដួលរលំដោយសារតម្លៃជ្រូកធ្លាក់ចុះខ្លាំង

សំអាត អានីសា (Samat Anisa) — Mon, 22 Jan 2024 07:35:26 +0000

អ្នកស្រី សាន សាវ៉ូន ជាកសិករចិញ្ចឹមជ្រូកម្នាក់នៅក្នុងភូមិឃុនមោយ ឃុំកណ្តែក ស្រុកប្រាសាទបាគង ខេត្តសៀមរាប។ ក្នុងរយៈពេល១៣ឆ្នាំដែលអ្នកស្រីបើកកសិដ្ឋានចិញ្ចឹមជ្រូក អ្នកស្រីមិនដែលប្រឈមននឹងបញ្ហាតម្លៃជ្រូកធ្លាក់ចុះខ្លាំងដូចឆ្នាំនេះនោះទេ។ អ្នកស្រីនិយាយថា ក្នុងរយៈពេលប្រហែល៣ខែកន្លងមកនេះ កសិដ្ឋានចិញ្ចឹមជ្រូកស្ទើរតែទាំងអស់ ជួបការលំបាកក្នុងការចិញ្ចឹមជ្រូក ខណៈតម្លៃធ្លាក់ចុះខ្លាំង ហើយស្ទើរតែមិនមានឈ្មួញចុះមកទិញ ព្រោះតែវត្តមានសាច់ជ្រូកបង្កកនាំចូលរាប់តោន។

ស្រ្តីវ័យ៤២ឆ្នាំរូបនេះនិយាយថា៖ «ខាតតែមួយពេញទំហឹងហ្នឹងឯង ឧទាហរណ៍ របស់យើងធ្លាប់ចិញ្ចឹមត្រូវបានចំណេញ១០០០រៀល(ក្នុងមួយគីឡូ) ក៏ចូលដើម១០០០រៀល ទៅ១៥០០រៀលទៀត (ក្នុងមួយគីឡូ) […] ធ្លាក់ខ្លាំងណាស់ ធ្លាក់សឹងដល់ចំណុចសូន្យ បើសិនណាមិនមានជ្រូកនាំចូលមកពីគេហើយមិនមានសាច់បង្កក បើផ្គត់ផ្គង់តែនៅខ្មែរយើងក៏ជ្រូកខ្មែរយើងមិនដុនដាបដល់ថ្នាក់នេះដែរ»។

ប្រជាជនជាច្រើនគ្រួសារក្នុងខេត្តសៀមរាបដែលពឹងផ្អែកជីវភាពលើការចិញ្ចឹមជ្រូកដូចជាអ្នកស្រី សាវ៉ូន កំពុងប្រឈមនឹងការក្ស័យធនព្រោះតែតម្លៃជ្រូកធ្លាក់ថ្លៃខ្លាំង ដោយសារការនាំចូលសាច់ និងសាច់បង្កកពីក្រៅប្រទេសច្រើនពេក។

និយាយដោយមានសើចតិចៗផង អ្នកស្រី សាន សាវ៉ូន បន្ថែមថា ឈ្មួញដែលធ្លាប់មកចាប់ជ្រូកនៅកសិដ្ឋានរបស់អ្នកស្រីកាលពីមុន លែងទិញកន្លែងអ្នកស្រី ដោយពួកគេចាំយកជ្រូកនាំចូលមានតម្លៃថោកជាង និងដឹកមកដល់ទីតាំងរបស់ពួកគេស្រាប់។

កំពុងបាញ់ទឹកលាងទ្រុងជ្រូក អ្នកស្រី សាវ៉ូន ថ្លែងថា៖ «បើជ្រូកឡើងថ្លៃ ឈ្មួញចុះឡើងៗ ពិបាកតែយើងរកលក់មិនទាន់ទេ មួយខែ ឬកន្លះខែដឹងតែចូលមកមើលទ្រុងយើង ហើយល្មមៗបង្ខំឲ្យយើងលក់ហើយ ដល់ពេលជ្រូកចុះថោកអញ្ចេះតែទូរស័ព្ទឯងក៏មិនចង់លើកទៀត គេថាចាំទិញតែកុងស៊ីស្រួលជាង អត់ពិបាកមកចាប់តាមទ្រុងអស់ថ្លៃឈ្នួលឡានឈ្នួលអីទៀត បើកុងស៊ីគេដឹកឲ្យស្រាប់ៗ»។

ក្នុងរយៈពេលប៉ុន្មានឆ្នាំចុងក្រោយនេះ ការនាំចូលសាច់ពីក្រៅប្រទេស ជាពិសេសសាច់បង្កក មានចំនួនច្រើនៗ ដែលខ្លះមានទាំងសាច់ខូចគុណភាព និងមិនមានឯកសារនាំចូលជាដើម។ តួយ៉ាង កាលពីថ្ងៃទី៤ ខែធ្នូ ឆ្នាំ២០២៣ ក្រុមការងារអន្តរាគមន៍បង្រ្កាបបទល្មើសសត្វបានសហការជាមួយការិយាល័យផលិតកម្ម ចុះត្រួតពិនិត្យទីតាំងស្តុកសាច់បង្កកមួយកន្លែងស្ថិតក្នុងខណ្ឌសែនសុខ រាជធានីភ្នំពេញ បានរកឃើញសាច់បង្កកពុំទាន់មានឯកសារច្បាស់លាស់ចំនួនជិត៤០០ តោន ដែលរួមមានចុងស្លាបមាន់ គូទមាន់ សាច់មាន់កិន កោះមាន់ ជើងមាន់ សាច់ជ្រូក ជាដើម។ នេះបើយោងតាមសេចក្តីថ្លែងការណ៍របស់សមាគមអ្នកចិញ្ចឹមសត្វដែលចេញកាលពីថ្ងៃទី៦ ខែធ្នូ ឆ្នាំ២០២៣។

កំពុងដាក់បាយជ្រូកនៅរោងចិញ្ចឹមជ្រូកស្ថិតនៅស្រុកបន្ទាយស្រី ខេត្តសៀមរាប លោក ដួង សាម៉ុន កសិករចិញ្ចឹមជ្រូកម្នាក់ទៀតអះអាងថា កសិករចិញ្ចឹមជ្រូកនាំគ្នាថ្ងូរ និងចាប់ផ្តើមដួលបណ្តើរៗ បន្ទាប់ពីតម្លៃជ្រូកមានការធ្លាក់ចុះខ្លាំង ដោយសារសាច់បង្កកនាំចូលច្រើន។ កសិករដែលបានចិញ្ចឹមជ្រូកតាំងពីឆ្នាំ២០០៩រូបនេះបន្ថែមថា ចំនួនជ្រូករបស់លោកកាលពីមិនទាន់មានការធ្លាក់ថ្លៃមានរហូតដល់ជាងមួយរយក្បាល ប៉ុន្តែបច្ចុប្បន្នថយចុះសល់ត្រឹមមេ២០ក្បាល ដោយសារលក់ជ្រូកខាតរកលុយមិនបានគ្រប់គ្រាន់ផ្គត់ផ្គង់ចំណី។

លោកបន្ថែមថា សម្រាប់តម្លៃក៏ធ្លាក់ចុះពី១,០០០រៀលក្រោយជំងឺរាតត្បាតកូវីត១៩ មកនៅសល់ត្រឹម ៦,០០០រៀលក្នុងមួយគីឡូ។

លោក សាម៉ុន បន្តថា៖ «អានេះទ្រាំឡើងចូលអស់ទ្រាំហើយ ព្រោះខាតពេក ខាតឡើងៗចូលពីរឆ្នាំ បីឆ្នាំហើយ ហើយដល់វគ្គនេះតម្លៃខ្លាំងណាស់ ដាក់ចង់ដាច់សរសៃឈាមកសិករទៅហើយព្រោះជ្រូកវគ្គនេះនៅតែគីឡូ៦០ [៦០០០ រៀល] ៦២ [៦២០០ រៀល] ៦៣ [៦៣០០ រៀល] »។

លោក សាម៉ុន បន្ថែមថា ជាធម្មតាខែមករាជាខែដែលជ្រូកមានតម្លៃខ្ពស់ ប៉ុន្តែឆ្នាំនេះបែរជាមានការធ្លាក់ថ្លៃខ្លាំងទៅវិញ។

លោកនិយាយថា៖ «យើងយកដើមធនាគារមកធ្វើទាំងអស់ បើយើងបោះបង់គឺវាមិនកើត ទីមួយយើងខំធ្វើទ្រុងធ្វើអីដែរ ប៉ុន្តែបើនៅតែទីផ្សារនៅតែយ៉ាងនេះក៏នៅមិនបានដែរ […] កាលពីមុនតម្លៃអាចទប់ទល់បានវាមាន៨០ជាង ៧០ជាង ដល់ពេលវគ្គនេះ៦០ ៦៥»។

លោកចង់ឱ្យរដ្ឋាភិបាលជួយអន្តរាគមន៍ទប់ស្កាត់ការនាំចូលសាច់ និងសាច់បង្កកពីក្រៅប្រទេស ដើម្បីទប់តម្លៃសាច់ក្នុងស្រុកកុំឱ្យបន្តធ្លាក់ថ្លៃ។

លោកនិយាយថា៖ «ឱ្យរដ្ឋាភិបាលជួយកសិករ បើផុតពីនោះនឹងដួលអស់ហើយនៅមិនបានទេ ឱ្យជួយរកតម្លៃទីផ្សារជ្រូកឱ្យ សូមឱ្យរាជរដ្ឋាភិបាលជួយបិទសាច់បង្កក ខាងក្រសួងខាងអីជួយមើលកសិករផងបើមិនអញ្ជឹងមិនរស់ទេ ចំណាកស្រុកអស់ហើយ»។

ចំណែកអ្នកស្រី ខុប អ៊ន់ អាយុ២៩ឆ្នាំ ជាកសិករចិញ្ចឹមជ្រូកម្នាក់ទៀតនៅស្រុកបន្ទាយស្រីដែរនោះរៀបរាប់ថា អ្នកស្រីចាប់ផ្តើមចិញ្ចឹមជ្រូកតាំងពីឆ្នាំ២០២១មកដោយសារសាច់ជ្រូកនៅពេលនោះមានតម្លៃខ្ពស់។ អ្នកស្រីថា បន្ទាប់ពីការរាតត្បាតជំងឺកូវីដ១៩ រួមទាំងការនាំចូលសាច់បង្កកផងនោះ បានធ្វើឱ្យគ្រួសារអ្នកស្រីធ្លាក់ខ្លួនខាតបង់ខ្លាំង ព្រមទាំងជាប់បំណុលធនាគារស្ទើររើខ្លួនមិនរួច។

អ្នកស្រីនិយាយថា៖ «ពីមុនមកដល់ឥឡូវយ៉ាប់ខ្លាំង។ កាលពីមុនដំបូងទើបចិញ្ចឹម យើងចិញ្ចឹមតិច វាបានចំណេញ ដល់ពេលយើងចេះតែពង្រីកទ្រុង កាន់តែច្រើនទៅកាន់តែខាត […] ខាតរាល់ពេល ឲ្យតែពេលលក់ដឹងតែខាត»។

បន្ទាប់ពីកសិករចិញ្ចឹមជ្រូកត្អូញត្អែរពីការធ្លាក់ថ្លៃខ្លាំងក្នុងរយៈពេលប៉ុន្មានខែចុងក្រោយនេះ ក្រសួងពាណិជ្ជកម្ម និងក្រសួងកសិកម្ម កាលពីថ្ងៃទី១២ ខែមករា ឆ្នាំ២០២៤ បានចេញសេចក្តីប្រកាសអំពីវិធានការហាមឃាត់ការនាំចូលនូវគ្រឿងក្នុង និងបំណែកសាច់បង្កកជាបណ្តោះអាសន្នសម្រាប់រយៈពេលប្រាំមួយខែ។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លើកឡើងថា ការផ្អាកការនាំចូលសាច់បង្កកបានតែបណ្តោះអាសន្នប៉ុណ្ណោះដោយសារ ច្បាប់មិនអនុញ្ញាតឱ្យផ្អាកជាអចិន្ត្រៃយ៍ និងថា អាចបង្កឱ្យសាច់ឡើងថ្លៃ ធ្វើឱ្យមានអតិផរណា។

លោកបន្តថា ការផ្អាកនេះគឺទុកពេលដើម្បីឱ្យអ្នកចិញ្ចឹមក្នុងស្រុករៀបចំខ្លួនឡើងវិញ ប៉ុន្តែក្រសួងក៏បាន សម្របសម្រួលដើម្បីឱ្យអ្នកដែលទិញបំណែកសាច់បង្កកនាំចូលឱ្យជួយអ្នកផលិតក្នុងស្រុក ហើយក្រសួងបានព្យាយាមឱ្យអ្នកក្នុងស្រុកបង្កើនសមត្ថភាពផលិតសាច់បង្កកដើម្បីលក់ឱ្យទីផ្សារសាច់បង្កកផងដែរ។

លោកបញ្ជាក់ថា៖ «ជាធម្មតាច្បាប់ពាណិជ្ជកម្មរបស់យើងគឺយើងមិនអាចបិទទាំងស្រុងទេ បើសិនជាយើងធ្វើការបិទការនាំចូលរបស់ប្រទេសដទៃមកប្រទេសយើង គេក៏អាចបិទការនាំចេញប្រទេសយើងទៅប្រទេសដទៃដែរ ហើយនៅលើពិភពលោកគឺមិនមានគោលនយោបាយណាបិទការនាំចេញកសិផលពីប្រទេសណាមួយទេ»។

ត្រលប់មកអ្នកស្រី សាវ៉ូន ដែលជាកសិករចិញ្ចឹមជ្រូកដែលកំពុងប្រឈមនឹងការខាតបង់ និងជំពាក់បំណុលដោយសារតែតម្លៃជ្រូកធ្លាក់ចុះវិញ អ្នកស្រីបាននិយាយទាំងក្រៀមក្រំថា អ្នកស្រីតែបន្តចិញ្ចឹមរងចាំទីផ្សារជ្រូកឡើងថ្លៃមកវិញ ដោយសារគ្រួសារអ្នកស្រីពឹងផ្អែកទាំងស្រុងលើរបរនេះរាប់ឆ្នាំមកហើយ។

អ្នកស្រី សាវ៉ូន និយាយថា៖ «ខ្ញុំសំណូមពរឲ្យតែជ្រូកឡើងថ្លៃមកវិញមក គ្នាប្រជាជនមានកម្លាំងទឹកចិត្តឲ្យចិញ្ចឹមតទៅទៀត ដូចប្រជាជនមានអីក្រៅពីចិញ្ចឹមជ្រូកចិញ្ចឹមគោ បើអត់ឲ្យប្រជាជនចិញ្ចឹមជ្រូកចិញ្ចឹមគោ គ្នាទៅមានអី»៕

សហគមន៍នៅដែនជម្រកសត្វព្រៃព្រះរកាសុំអន្តរាគមន៍ពីអាជ្ញាធរពាក់ព័ន្ធនឹងការកាប់បំផ្លាញទ្រង់ទ្រាយធំ

សំអាត អានីសា (Samat Anisa) — Fri, 12 Jan 2024 02:51:16 +0000

សហគមន៍ជនជាតិដើមភាគតិចកួយស្នើអាជ្ញាធរពាក់ព័ន្ធអន្តរាគមន៍ចំពោះការកាប់បំផ្លាញព្រៃឈើទ្រង់ទ្រាយធំក្នុងដែនជម្រកសត្វព្រៃព្រះរកា ខេត្តព្រះវិហារ ដោយពួកគេបានរកឃើញឈើជាង៣០០ដើមត្រូវបានអារក្នុងឆ្នាំ២០២៣។

ក្នុងសារដែលបង្ហោះជាសេចក្ដីប្រកាសព័ត៌មានស្តីពីការបូកសរុបបទល្មើសធនធានធម្មជាតិក្នុងឆ្នាំ២០២៣លើទំព័រហ្វេសប៊ុករបស់សហគមន៍ជនជាតិដើមភាគតិចកួយ ចេញនៅថ្ងៃទី១០ ខែមករានេះបានឱ្យដឹងថា នៅតំបន់អូរស្ពង់ក្នុងដែនជម្រកសត្វព្រៃព្រះរកាមានការកាប់បំផ្លាញព្រៃឈើទ្រង់ទ្រាយធំ។

សារដដែលបន្ថែមថា៖ «បច្ចុប្បន្នតំបន់ដែលកំពុងបន្តកាប់បំផ្លាញយ៉ាងសកម្មមានលេខនិយាមការ X៖ 515731 Y៖1546629 ដែលមានម៉ាស៊ីនអារឈើយ៉ាងសកម្មប្រហែល១០គ្រឿង នៅតំបន់ អូរស្ពង់ ដែលជាតំបន់សក្ដានុពលចម្ការច្បោះរបស់បងប្អូនជនជាតិដើមភាគតិចយើងអាស្រ័យផល»។

សារជាសេចក្ដីប្រកាសព័ត៌មានដដែលបន្ដថា ក្នុងរយៈពេលពេញមួយឆ្នាំ២០២៣ តាមរយៈការចុះល្បាត ៥ដងបានរកឃើញមានគល់ឈើដែលត្រូវបានកាប់ផ្តួល អារជ្រៀកមានចំនួន ៣៦៦គល់ ក្ដារបន្ទះចំនួន ៣៤២បន្ទះ ឈើតាប់ចំនួន៣.២ម៉ែត្រគូប និងឈើប្រភេទសសរចំនួន២៧ដើម។

លោក ស៊ុត សាវន សមាជិកសហគមន៍ជនជាតិដើមភាគតិចកួយបានប្រាប់ Newsroom Cambodia ថា នៅថ្ងៃទី១០ និងទី១១ ខែមករានេះក៏មានករណីកាប់ឈើដែរ គឺក្រុមជនល្មើសមានគ្នាជាង២០នាក់បានអារឈើអស់៥ដើម ប្រដាប់ដោយរណារយន្ត៥គ្រឿង និងមានគោយន្ដ៤គ្រឿងនៅអូរតាមាក់។

សហគមន៍ជនជាតិដើមភាគតិចកួយភូមិប្រមេរុនៅដែនជម្រកសត្វព្រៃព្រះរកា បានស្នើសុំកិច្ចអន្តរាគមន៍ពីមន្ទីរបរិស្ថានខេត្តព្រះវិហារ និងអាជ្ញាធរពាក់ព័ន្ធ ជុំវិញការកាប់បំផ្លាញព្រៃឈើនេះ។

«យើងជាសហគមន៍សូមស្នើរសុំបន្ថែមដល់អង្គភាពប្រឆាំងបទល្មើសធនធានធម្មជាតិ និងលោកអភិបាលខេត្តដែលស្រលាញ់ចូលចិត្ដកំសាន្ដព្រៃឈើធម្មជាតិ សូមជួយចុះធ្វើអន្តរាគមន៍ តំបន់កាប់បំផ្លាញទ្រង់ទ្រាយធំក្នុងដែនជម្រកសត្វព្រៃព្រះរកានេះផង»។

Newsroom Cambodia បានព្យាយាមទាក់ទងលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ ប៉ុន្តែលោកបដិសេធមិនឆ្លើយតបតាមទូរស័ព្ទដោយថាបញ្ហានេះជារឿងដដែលៗ។

លោកបញ្ជាក់ថា៖ «អូ! អាហ្នឹងសួរដដែលៗពីរបីអង្គភាព [សារព័ត៌មាន] ហើយ។ អញ្ជើញមកមន្ទីរ[បរិស្ថាន] មកខ្ញុំជូនព័ត៌មានបង»។

លោក ហេង គឹមហុង នាយកប្រតិបត្តិសហគមបណ្តាញយុវជនកម្ពុជា(CYN) បានប្រាប់ថា រដ្ឋាភិបាល ឬមន្ត្រីពាក់ព័ន្ធគួរយកចិត្តទុកដាក់ និងដោះស្រាយករណីបទល្មើសព្រៃឈើនេះជាបន្ទាន់ ដើម្បីឲ្យដឹងថា បញ្ហានេះបន្តកើតឡើងដោយសារតែការអនុវត្តមិនបានត្រឹមត្រូវរបស់មន្ត្រី ឬក៏មកពីគោលនយោបាយនៅមានកម្រិត។

លោក ហេង គឹមហុង ថា៖ «រដ្ឋាភិបាលគួរតែគិតពិចារណាក្នុងការទប់ស្កាត់បទល្មើសធម្មជាតិ តទៅមុខទៀត គួរតែធ្វើការស៊ើបអង្កេតពីមន្ត្រីរបស់ខ្លួននៅមូលដ្ឋានថាហេតុអ្វីបានជារដ្ឋាភិបាល រដ្ឋមន្រ្តី ឬក៏នាយករដ្ឋមន្រ្តី បានដាក់ទិសដៅនៃការប្តេជ្ញាចិត្តម្តងហើយម្តងទៀតកាលពីអាណត្តិចាស់រហូតទៅដល់អាណត្តិថ្មី ប៉ុន្តែបទល្មើសនៅតែកើតមានឡើងអ៊ីចឹង»។

លោកបន្តថា៖ «បើសិនជារកឃើញថាគោលនយោបាយមានចំណុចខ្សោយត្រូវកែសម្រួលឡើងវិញជាបន្ទាន់តែបើគោលនយោបាយមានលក្ខណៈពេញលេញ ហើយការប្តេជ្ញារបស់រដ្ឋាភិបាលគ្រប់គ្រាន់ ប៉ុន្តែផ្ទុយទៅវិញមន្រ្តីមូលដ្ឋាននៅក្នុងដែននីមួយៗនឹងអត់មានការប្តេជ្ញាចិត្ត ចឹងប្រហែលជាត្រូវពិនិត្យ មើលក្នុងការធ្វើកំណែទម្រង់ទៅលើវិជ្ជាជីវៈហើយនឹងមន្រ្តីនឹងតែម្តងដើម្បីកុំឲ្យការប្តេជ្ញាចិត្តរបស់រដ្ឋចេះតែមាន តែផ្ទុយទៅវិញភាពនៃការអនុវត្តជាក់ស្តែងរបស់មន្រ្តីនឹងនៅតែបណ្តែតបណ្តោយធ្វេសប្រហែសបង្កឲ្យមានបទល្មើសជាច្រើនកើតមានឡើងបន្តទៅទៀត»។

រដ្ឋាភិបាលបានបង្កើតដែនជម្រកសត្វព្រៃព្រះរកាតាមរយៈអនុក្រឹត្យចុះថ្ងៃទី៩ ខែឧសភា ឆ្នាំ២០១៦ មានផ្ទៃដីទំហំ ៩០,៣៦១ហិកតា ស្ថិតស្រុកចំនួន៣ រួមមាន ស្រុកជាំក្សាន្ត ស្រុកត្បែងមានជ័យ និងស្រុកឆែប ខេត្តព្រះវិហារ។ ការបង្កើតដែនជម្រកសត្វព្រៃនេះគឺធ្វើឡើងក្នុងគោលបំណងថែទាំទីជម្រកសត្វព្រៃ និងប្រព័ន្ធអេកូឡូស៊ី ព្រមទាំងដើម្បីលើកកម្ពស់ការចូលរួមពីសហគមន៍មូលដ្ឋានក្នុងការអភិរក្សធនធានធម្មជាតិក្នុងតំបន់៕

យុវជនបង្ហាញគំនូរ និងរូបថតដើម្បីផ្លាស់ប្តូរគំនិតអំពីអំពើពុករលួយ

សំអាត អានីសា (Samat Anisa) — Mon, 18 Dec 2023 03:21:59 +0000

យុវជនដែលស្រលាញ់សិល្បៈគំនូរ និងការថតរូបបានដាក់បង្ហាញស្នាដៃរបស់ខ្លួន ក្រោមប្រធានបទ «អំពើពុករលួយ និងផលប៉ះពាល់» ក្នុងគោលបំណងចង់ឱ្យមានការកាត់បន្ថយអំពើពុករលួយ ។

ការដាក់តាំងរូបភាពនេះធ្វើឡើងក្នុងទិវាប្រឆាំងអំពើពុករលួយ ដែលបានរៀបចំឡើងដោយ អង្គការតម្លាភាពកម្ពុជា នៅថ្ងៃទី៨ ខែធ្នូ ឆ្នាំ២០២៣ នៅរាជធានីភ្នំពេញ ដើម្បីប្រារព្ធខួបនៃ ទិវាប្រឆាំងអំពើពុករលួយអន្តរជាតិ និងផ្សព្វផ្សាយឲ្យប្រជាជនបានដឹងពីអំពើពុករលួយក្នុងប្រទេសកម្ពុជា តាមរយៈការស្តាប់កិច្ចពិភាក្សានិងពិព័រណ៍រូបភាព។

លោក ភួង ខេមរា និស្សិតផ្នែកសារព័ត៌មានមកពីសាកលវិទ្យាល័យភូមិន្ទភ្នំពេញ និងជាយុវជនមួយរូបដែលបានដាក់តាំងរូបថតដែលមានរូបដៃកាន់លុយ និងកាន់ខ្សែ លើកឡើងថា រូបថតរបស់លោកគឺចង់បង្ហាញពីជំងឺសង្គមមួយ ដែលតែងប្រើប្រាស់លុយសូកប៉ាន់ដើម្បីទទួលបានតំណែង ឬផលប្រយោជន៍ណាមួយ។

លោកបន្ថែមថា៖ «មនុស្សមួយចំនួនក្នុងសង្គមតែងតែគិតថា មានលុយគឺមានអំណាចដែលជាខ្សែសណ្តោងពួកគេដើម្បីបានតួនាទី និងប្រយោជន៍។ ប៉ុន្តែអំពើមួយនេះបានបំបាក់ទឹកចិត្តអ្នកដែលមានសមត្ថភាពពិតប្រាកដ និងធ្វើឲ្យមានភាពអយុត្តិធម៌ក្នុងសង្គម»។

លោក ភួង ខេមរា

លោក ខេមរា សង្ឃឹមថា ក្រោយពីរូបភាពរបស់លោកត្រូវបានផ្សព្វផ្សាយឲ្យប្រជាជនបានឃើញនូវអត្ថន័យ និងគោលបំណងនៃរូបភាពមួយនេះ ប្រជាជនមួយចំនួនអាចនឹងឈប់ប្រព្រឹត្តអំពើពុករលួយ ប្រសិនបើគាត់ចង់ឲ្យមានការកែប្រែក្នុងសង្គម។

កញ្ញា វ៉េង ជីវៃ និស្សិតមកពីសាកលវិទ្យាល័យភូមិន្ទវិចិត្រសិល្បៈដែលបានដាក់បង្ហាញស្នាដៃគំនូររបស់ខ្លួនក្នុងទិវាប្រឆាំងអំពើពុករលួយដែរនោះនិយាយថា រូបគំនូររបស់នាងបង្ហាញពីដើមឈើដែលត្រូវបានដួលរលំព្រោះតែត្រូវដង្កូវស៊ីខាងក្នុង ដែលប្រៀបដូចជាសង្គមដែលអាចដួលរលំព្រោះអំពើពុករលួយ។

កញ្ញាថ្លែងថា៖ «នៅក្នុងតំបន់មួយប្រជាជន ឬនរណាម្នាក់ដែលគាត់គិតតែពីប្រយោជន៍របស់ខ្លួន ថ្ងៃណាមួយសង្គមនឹងវាគង់តែដួលរលំ […] ប្រៀបដូចជាដង្កូវហ្នឹងចឹង ដង្កូវវាតូចៗតែអាចបំផ្លាញដើមឈើធំបាន»។

ចំណែកលោក ចន សុវណ្ណឌី អតីតនិស្សិតមកពីសាកលវិទ្យាល័យភូមិន្ទវិចិត្រសិល្បៈដែលបានដាក់តាំងរូបគំនូរបង្ហាញពីរូបភាពមនុស្សដែលត្រូវបានទឹកប្រាក់បិទមាត់ និយាយថា រូបគំនូររបស់លោកចង់បង្ហាញថា មនុស្សម្នាក់អាចក្លាយជាធនធានមិនល្អបានព្រោះតែភាពលោភលន់។

លោក ចន សុវណ្ណឌី

លោក សុវណ្ណឌី បានថ្លែងថា៖ «គាត់មានចំណេះដឹងតែគាត់ប្រើចំណេះដឹងរបស់គាត់ទៅលើរឿងមិនល្អគឺជាការជះផលមិនល្អ បានន័យថាគាត់មានចំណេះដឹងហើយប៉ុន្តែគាត់ប្រើប្រាស់ចំណេះដឹងគាត់ដោយការលោភលន់បន្តិចបន្តួច អញ្ចឹងហើយធ្វើឲ្យធនធានគាត់ដែលខំកសាងត្រូវបានបាត់បង់ដោយសារតែរឿងប៉ុណ្ណឹង»។

កញ្ញា ឆាយ ពេជជេស៊ីកា សិស្សមកពីសាលាវ៉េស្ទឡាញន៍ ដែលបានដាក់បង្ហាញរូបគំនូរជញ្ជីងថ្លឹងបេះដូង និងទឹកប្រាក់និយាយថា រូបគំនូររបស់កញ្ញាបង្ហាញពីបេះដូងតំណាងឲ្យភាពស្មោះត្រង់ ឬបុគ្គលដែលប្រើប្រាស់ជំនាញ និងទេពកោសល្យដើម្បីប្រកបរបរផ្សេងៗ ហើយទឹកប្រាក់ដែលតំណាងឲ្យជនខិលខូចដែលធ្វើអំពើពុករលួយ។ កញ្ញាថា ក្នុងរូបភាពបង្ហាញថា ទឹកប្រាក់មានទម្ងន់ធ្ងន់ជាងបេះដូង។

កញ្ញា ឆាយ ពេជជេស៊ីកា

កញ្ញា ជេស៊ីកា បាននិយាយថា៖ «បើយើងដើរទៅសួរនរណាម្នាក់រវាងទឹកលុយនិងសេចក្តីស្មោះត្រង់ តើអ្នកនឹងយកមួយណា គឺគាត់ប្រាកដជាយកទឹកលុយហើយ […] ដោយសារទឹកលុយវាមានតម្លៃច្រើនជាង ធ្វើឲ្យគ្មានយុត្តិធម៍ទាល់តែសោះចំពោះអ្នកដែលគ្មានទឹកលុយ»។

ស្នាដៃគំនូរ និងរូបថតដែលត្រូវបានដាក់តាំងបង្ហាញក្នុងទិវាប្រឆាំងអំពើពុករលួយនោះមានចំនួន១៦ផ្ទាំង។ ក្នុងចំណោមរូបគំនូរ និងរូបថតទាំង១៦នោះ មានរូបភាពចំនួន៦ ដែលត្រូវបានគណៈកម្មការវាយតម្លៃ និងជ្រើសរើសជារូបល្អជាងគេ។

គួរបញ្ជាក់ថា ថ្ងៃទី៩ ខែធ្នូ មហាសន្និបាតនៃអង្គការសហប្រជាជាតិអនុម័តជា «ទិវាប្រឆាំងអំពើពុករលួយអន្តរជាតិ» ដោយសេចក្តីសម្រេចនេះត្រូវបានកំណត់នៅថ្ងៃទី៣១ ខែតុលា ឆ្នាំ២០០៣ ក្នុងគោលបំណងប្រឆាំងនិងទប់ស្កាត់អំពើពុករលួយ៕

Voxpop៖ ទស្សនៈនិស្សិតចំពោះការផ្ដល់អាហារូបករណ៍សម្រាប់ការសិក្សា

សំអាត អានីសា (Samat Anisa) — Thu, 02 Nov 2023 03:28:16 +0000

ជារឿយៗ គេតែងឮអំពីការផ្តល់អាហារូបករណ៍ដល់សិស្សនិស្សិតនៅតាមសាលារដ្ឋ និងឯកជនមួយចំនួនដោយអាចសិក្សាដោយមិនបង់ថ្លៃ។ អាហារូបករណ៍ភាគច្រើនគឺផ្តល់ដល់សិស្សនិស្សិតដែលរៀនពូកែ និងសិស្សនិស្សិតដែលក្រីក្រ។

ហើយថ្មីៗនេះ លោក ស សុខា រដ្ឋមន្រ្តីក្រសួងមហាផ្ទៃបានប្រកាសផ្តល់អាហារូបករណ៍ដល់សិស្ស-និស្សិតចំនួន៤០០កន្លែង ដោយមានថ្នាក់បរិញ្ញាបត្ររង-ថ្នាក់បរិញ្ញាបត្រ ចំនួន៣០០កន្លែង និងថ្នាក់បរិញ្ញាបត្រជាន់ចំនួន ១០០កន្លែង សម្រាប់ឆ្នាំសិក្សា២០២៣-២០២៤ ដែលបានសហការជាមួយវិទ្យាស្ថានខ្មែរជំនាន់ថ្មី។

Newsroom Cambodia បានសម្ភាសនិស្សិតចំនួន៦រូបដែលមកពីសាកលវិទ្យាល័យខុសៗគ្នាក្នុងរាជធានីភ្នំពេញ អំពីការយល់ឃើញរបស់ពួកគេចំពោះការផ្តល់អាហារូបករណ៍ដល់សិស្ស-និស្សិត៖

កញ្ញា កាំង លីហ្សា ជានិស្សិតឆ្នាំទី២ នៅសកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច បានលើកឡើងថា កញ្ញាគឺយល់ស្របថាអាហារូបករណ៍ពិតជាអាចជួយនិស្សិតយ៉ាងច្រើនខ្លាំងណាស់។

រូបភាព ៖ កញ្ញា កាំង លីហ្សា

កញ្ញាបានបន្តថា៖ «ការសិក្សានៅសាកលវិទ្យាល័យប្រៀបបានដូចជាការចាប់ផ្តើមថ្មីម្តងទៀត និងការទទួលបានអាហារូបករណ៍អាចសម្រួលបន្ទុកហិរញ្ញវត្ថុ ដោយសិស្សានុសិស្សអាចផ្តោតទៅលើការសិក្សាតែប៉ុណ្ណោះដោយមិនត្រូវការគិតពីបញ្ហាការចំណាយទៅលើការសិក្សា»។

លោក លីម គាសេង ជានិស្សិតឆ្នាំទី២ នៅសាកលវិទ្យាល័យអាមេរិកកាំងភ្នំពេញ មកពីក្រុងប៉ោយប៉ែត ខេត្តបន្ទាយមានជ័យ បាននិយាយថា អាហារូបករណ៍ប្រៀបដូចជារង្វាន់លើកទឹកចិត្តដល់សិស្សានុសិស្ស និងក៏ជាចំណែកមួយសំខាន់ជួយពួកគេបន្តការសិក្សាឲ្យបានកាន់តែខ្ពង់ខ្ពស់។

រូបភាព ៖ លោក លីម គាសេង

លោកបានបន្ថែមថា៖ «ខ្ញុំក៏និស្សិតអាហារូបករណ៍មួយរូបដែរ ហើយការផ្ដល់អាហារូបករណ៍គឺល្អណាស់ដល់សិស្សានុសិស្សរៀនថ្នាក់បរិញ្ញាបត្រខ្ពស់ទៅថ្ងៃមុខ»។

កញ្ញា ឡុង សេរីបូរីតា ជានិស្សិតឆ្នាំទី២ មកពីសាលា ខេមអេដ បានបញ្ចេញមតិថា អាហារូបករណ៍ ពិតជាជួយដល់ជីវភាពនិស្សិតខ្លាំងណាស់សម្រាប់ការសិក្សាបច្ចុប្បន្ន និងទៅថ្ងៃអនាគត។

រូបភាព ៖ កញ្ញា ឡុង សេរីបូរីតា

កញ្ញាបន្តថា៖ «អាហារូបករណ៍អាចជួយផ្នែកហិរញ្ញវត្ថុ ធ្វើឲ្យមាននិស្សិតចូលធ្វើការងារល្អបានច្រើន ទទួលបានកេរ្តិ៍ឈ្មោះជូនដល់ក្រុមគ្រួសារ និងអាចបន្តការសិក្សាបានខ្ពង់ខ្ពស់បន្ត»។

កញ្ញា ទឹម សុខជា ជានិស្សិតឆ្នាំទី១ផ្នែកព័ត៌មានវិទ្យានៅសាកលវិទ្យាល័យភូមិន្ទភ្នំពេញ មកពីខេត្តបាត់ដំបង បាននិយាយថា អាហារូបករណ៍ពិតជាសំខាន់ខ្លាំង ដែលជួយដល់ការសិក្សារៀនសូត្រថែមទាំងបានរៀននូវជំនាញដែលខ្លួនស្រលាញ់និងអាចសម្រេចក្តីស្រមៃរបស់ខ្លួន។

រូបភាព ៖ កញ្ញា ទឹម សុខជា

កញ្ញាបន្តបន្ថែមថា៖ «មានច្រើនទី១ផ្តល់ឱកាសឲ្យសិស្សានុសិស្សបានសិក្សារៀនសូត្របន្ត សិស្សដែលគាត់អត់មានធនធានលក្ខណ:ថាជួយបានច្រើនគឺសម្រួលបន្ទុកពេលយើងបង់ថ្លៃសាលាធ្វើឲ្យគាត់បន្តការសិក្សានៅជំនាញដែលគាត់ស្រលាញ់ ហើយវាអាចជាជ្រុងមួយជួយសម្រេចដល់អនាគតគាត់»។

កញ្ញា ឈួន សុផារី ជានិសិ្សតឆ្នាំទី១ នៃវិទ្យាសាស្រ្តពាណិជ្ជសាស្រ្ត មកពីភ្នំពេញបានលើកឡើងថា កញ្ញាក៏ជាសិស្សអាហារូបករណ៍មួយរូបដែរ។

កញ្ញាសុផារីបានលើកឡើងថា៖ «អាហារូបករណ៍បានផ្តល់ផលប្រយោជន៏ច្រើនដល់និសិ្សត អាចជួយផ្នែកហិរញ្ញវត្ថុ ធ្វើឲ្យមាននិស្សិតចូលធ្វើការងារល្អបានច្រើន»៕

លោកនាយករដ្ឋមន្ត្រី ហ៊ុន ម៉ាណែត ដឹកនាំគណៈប្រតិភូកម្ពុជា ទៅចូលរួមកិច្ចប្រជុំកំពូលអាស៊ាន-GCC នៅទីក្រុងរីយ៉ាដ

សំអាត អានីសា (Samat Anisa) — Tue, 31 Oct 2023 00:45:21 +0000

នាយករដ្ឋមន្រ្តី ហ៊ុន ម៉ាណែត បានដឹកនាំគណ:ប្រតិភូជាន់ខ្ពស់កម្ពុជា ចូលរួមកិច្ចប្រជុំកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ(ជីស៊ីស៊ី) នៅទីក្រុងរីយ៉ាដ នៃប្រទេសអារ៉ាប៊ីសាអូឌីត។

កិច្ចប្រជុំនេះបានធ្វើឡើង កាលពីថ្ងៃទី ២០ ខែតុលា ឆ្នាំ២០២៣ ក្នុងគោលបំណងពិនិត្យ និងកំណត់នូវទិសដៅអនាគត នៃទំនាក់ទំនងរវាងអាស៊ាននិងជីស៊ីស៊ី ព្រមទាំងបានធ្វើការផ្លាស់ប្តូរយោបល់ស្តីអំពីបញ្ហាតំបន់និងអន្តរជាតិផ្សេងៗ ដើម្បីជាការឆ្លើយតបទៅនឹងបញ្ហាប្រឈមរួម ប្រកបដោយប្រសិទ្ធភាព។ នេះបើយោងតាមសេចក្ដីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិ។

យោងតាមប្រភពដដែល នៅក្នុងកិច្ចប្រជុំនោះ មេដឹកនាំប្រទេសទាំងពីរបានសម្តែងនូវការពេញចិត្តចំពោះការរីកចម្រើននៃទំនាក់ទំនងទ្វេភាគីរវាងកម្ពុជា-អារ៉ាប៊ីសាអូឌីត។ ដែលត្រូវបានឆ្លុះបញ្ចាំងតាមរយ: ការសម្រេចបង្កើតស្ថានឯកអគ្គរាជទូតអារ៉ាប៊ីសាអូឌីតប្រចាំនៅរាជធានីភ្នំពេញ និងបានស្នើឲ្យភាគីទាំងពីរពិចារណារៀបចំចរចារកិច្ចព្រមព្រៀងនានា ជាពិសេស កិច្ចព្រមព្រៀងស្ដីពីការលើកលែងរឿងដែលបានជួបប្រទះសម្រាប់អ្នកកាន់លិខិតឆ្លងដែនការទូត និងលិខិតឆ្លងដែនផ្លូវការ។

ចំពោះសេចក្ដីប្រកាសព័ត៌មានដដែលបានបន្ថែមថា នាយករដ្ឋមន្ត្រីទាំងពីរ បានបង្ហាញការប្ដេជ្ញាចិត្តរួម ក្នុងការពង្រឹង និងពង្រីកទំនាក់ទំនងបន្ថែមទៀត ដោយបានឯកភាពលើទិសដៅនៃការបង្កើនយន្តការពិគ្រោះយោបល់រវាងក្រសួងការបរទេសទាំងពីរដើម្បីពិភាក្សាលើកិច្ចសហប្រតិបត្តិការលើវិស័យមួយចំនួនដូចជា វិស័យពាណិជ្ជកម្ម, វិនិយោគ, និងវិស័យផ្សេងៗទៀត។

ក្នុងឱកាសជួបសម្ដែងការគួរសមនោះ លោកអាប់ឌុលរ៉ាម៉ាន់ អាល់ម៉ាសាដ នាយកប្រតិបត្តិនៃមូលនិធិសូឌីសម្រាប់ការអភិវឌ្ឍ បានប្រាប់ពីបំណងផ្ដល់ហិរញ្ញប្បទានដល់បណ្តាប្រទេសកំពុងអភិវឌ្ឍនានា រួមទាំងកម្ពុជា ដើម្បីសម្រេចបាននូវការអភិវឌ្ឍប្រកបដោយចីរភាព ក្នុងវិស័យមួយចំនួនដូចជា វិស័យអប់រំ សុខាភិបាល គមនាគមន៍ ហេដ្ឋារចនាសម្ព័ន្ធ កសិកម្ម សន្តិសុខ និង បញ្ហាបម្រែបម្រួលអាកាសធាតុជាដើម៕

សំអាត អានីសា (Samat Anisa) – Newsroom Cambodia

ក្រសួងក្រើនរំលឹកដល់ពលរដ្ឋ​ប្រុងប្រយ័ត្ន​ចំពោះ​​ជំងឺ​កូវីដ-១៩​ ក្រោយករណីឆ្លងកើនឡើង​

កម្មករ​រោង​ចក្រ ML នៅក្រុង​ប៉ោយប៉ែត​​ប្រមូលផ្ដុំ​តវ៉ាជាថ្មី ក្រោយថៅកែបើកប្រាក់ខែយឺ​ត​យ៉ាវជាញឹកញាប់

យុវជន​បង្ហាញ​គំនូរ​ និង​រូបថត​ដើម្បី​ផ្លាស់ប្តូរ​គំនិត​អំពី​អំពើ​ពុករលួយ​

Voxpop៖​ ទស្សនៈនិស្សិត​​ចំពោះ​​ការ​​ផ្ដល់​​អាហា​​រូប​ករណ៍សម្រាប់​ការ​សិក្សា

លោកនាយករដ្ឋមន្ត្រី ហ៊ុន ម៉ាណែត ដឹកនាំគណៈប្រតិភូកម្ពុជា ទៅចូលរួមកិច្ចប្រជុំកំពូលអាស៊ាន-GCC នៅទីក្រុងរីយ៉ាដ

ក្រសួងក្រើនរំលឹកដល់ពលរដ្ឋប្រុងប្រយ័ត្នចំពោះជំងឺកូវីដ-១៩ ក្រោយករណីឆ្លងកើនឡើង

កម្មកររោងចក្រ ML នៅក្រុងប៉ោយប៉ែតប្រមូលផ្ដុំតវ៉ាជាថ្មី ក្រោយថៅកែបើកប្រាក់ខែយឺតយ៉ាវជាញឹកញាប់

យុវជនបង្ហាញគំនូរ និងរូបថតដើម្បីផ្លាស់ប្តូរគំនិតអំពីអំពើពុករលួយ

Voxpop៖ ទស្សនៈនិស្សិតចំពោះការផ្ដល់អាហារូបករណ៍សម្រាប់ការសិក្សា