សាន ម៉ាលីនណា (San Malinna) – Newsroom Cambodia

ការថែរក្សា និងការអភិរក្សអង្គរ ជាកាតព្វកិច្ចរបស់កូនខ្មែរទាំងអស់គ្នា

សាន ម៉ាលីនណា (San Malinna) — Thu, 15 Dec 2022 09:32:54 +0000

លោកស្រី ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅព្រឹកថ្ងៃពុធនេះ បានមានប្រសាសន៍ថា ការថែរក្សា និងការអភិរក្សអង្គរ ជាកាតព្វកិច្ចរបស់កូនខ្មែរទាំងអស់គ្នា។

ថ្លែងក្នុងការបើកព្រឹត្តិការណ៍ បុណ្យរំលឹកគុណអង្គរ និងរាប់បាត្រព្រះសង្ឈចំនួន ១៣០ អង្គ នៅខេត្តសៀមរាម នាថ្ងៃទី១៤ ខែធ្នូ ឆ្នាំ២០២២ ថាយើងត្រូវប្រឹងប្រែងទ្វេរឡើង ដើម្បីអភិវឌ្ឍ ការពារនូវសន្តិភាព ស្ថិរភាពសង្គម។

លោកស្រី បញ្ជាក់ថា៖ «ក្នុងនាមជាអ្នកជំនាន់ក្រោយ យើងត្រូវបង្កើនការខិតខំប្រឹងប្រែងទ្វេរឡើង ដើម្បីអភិវឌ្ឍប្រទេសយើង ការពារឱ្យបានដាច់ខាតនូវនាវាសន្តិភាព ស្ថិរភាពសង្គម និងផ្តល់ឱ្យជាតិរបស់យើងនូវកិត្តិនាមរបស់ខ្លួនឡើងវិញ។ បេតិកភណ្ឌអង្គរនឹងមិនត្រូវបានបំភ្លេចឡើយ ចំណែកឯការថែរក្សា និងការអភិរក្សអង្គរ ជាកាតព្វកិច្ចរបស់កូនខ្មែរទាំងអស់គ្នា។

គួរបញ្ជាក់ផងដែរថា កម្មវិធីបើកព្រឹត្តិការណ៍ បុណ្យរំលឹកគុណអង្គរ និងរាប់បាត្រព្រះសង្ឈចំនួន ១៣០ អង្គ រៀបចំឡើងក្នុងគោលបំណងដើម្បីរំលឹកគុណអង្គព្រះមហាក្សត្រគ្រប់ព្រះអង្គ និងបុព្វការីជនដែលបានកសាង ថែរក្សាប្រាសាទទាំងអស់នៅក្នុងរមណីយដ្ឋានអង្គរ ដោយបានផ្តល់អត្ថប្រយោជន៍ជាច្រើនដល់ជាតិមាតុភូមិតាំងពីដើមរហូតដល់បច្ចុប្បន្ននេះ ។ ជាពិសេស បានបង្ហាញអំពីសក្តានុពលទេសចរណ៍របស់កម្ពុជាទៅកាន់ឆាកអន្តរជាតិ ក្នុងការលើកស្ទួយពាក្យស្លោក កម្ពុជា ព្រះរាជាណាចក្រអច្ឆរិយៈ និងធ្វើឱ្យកាន់តែប្រាកដឡើងនូវពាក្យស្លោក អរគុណសន្តិភាព ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

កម្លាំងប្រឆាំងគ្រឿងញៀន បង្ក្រាបករណីរក្សាទុក ជួញដូរដោយខុសច្បាប់នូវសារធាតុញៀន

សាន ម៉ាលីនណា (San Malinna) — Mon, 12 Dec 2022 10:25:57 +0000

កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលស្រុករវៀង បានបង្ក្រាបករណីរក្សាទុក ជួញដូរដោយខុសច្បាប់នូវសារធាតុញៀន កាលពីថ្ងែទី ១០ ខែធ្នូ ឆ្នាំ ២០២២។

នៅថ្ងៃទី០៨ ខែធ្នូ ឆ្នាំ២០២២ វេលាម៉ោង១៥និង៣០នាទី នៅចំណុចព្រៃបារាំង ស្ថិតក្នុងភូមិរំចេក ឃុំរមណីយ ស្រុករវៀង ខេត្តព្រះវិហារ សមត្ថកិច្ចបានឃាត់ខ្លួនជនសង្ស័យឈ្មោះ លាស់ វីត ភេទប្រុស អាយុ៣២ឆ្នាំ មុខរបរ ជាងសិប្បកម្ម ស្នាក់នៅបណ្តោះអាសន្នភូមិអូរពោធិ៍ ឃុំរមណីយ ស្រុករវៀងខេត្តព្រះវិហារ។ ក្នុងនោះបានដកហូតវត្ថុតាង ក្រាមពណ៌សថ្លាសង្ស័យជាសារធាតុញៀន ចំនួន០១កញ្ចប់, ម៉ូតូចំនួន ០១ គ្រឿង ម៉ាក CB ពណ៌ក្រហម ទូរស័ព្ទចំនួន ០២ គ្រឿង។

ផ្អែកតាមចម្លើយសារភាពរបស់ឈ្មោះ លាស់ វីត និងការស្រាវជ្រាវស៊ើបអង្កេតរបស់សមត្ថកិច្ចជំនាញនៅថ្ងៃទី០៩ ខែឆ្នាំដដែល វេលាម៉ោង ១០និង៣០នាទី នៅចំណុចព្រៃពពេល ស្ថិតក្នុងភូមិត្រពាំងទន្ទឹម ឃុំរមណីយ ស្រុករវៀង ខេត្តព្រះវិហារ សមត្ថកិច្ចបានបន្តស្រាវជ្រាវឈានទៅឃាត់ខ្លួនជនសង្ស័យឈ្មោះ សុគុណ សំណាង ហៅ ម៉ាប់ ភេទប្រុស អាយុ២៨ឆ្នាំ មុខរបរមិនពិតប្រាកដ រស់នៅភូមិភ្នំដែក ឃុំរមណីយ ស្រុករវៀង ខេត្តព្រះវិហារ ដកហូតវត្ថុតាង ក្រាមពណ៌សថ្លាសង្ស័យជាសារធាតុញៀន ចំនួន ២១ កញ្ចប់ ម៉ូតូចំនួន ០១ គ្រឿង ម៉ាក MSLAZ ទូរស័ព្ទដៃចំនួន ០១ គ្រឿង។

ផ្អែកតាមចម្លើយសារភាពរបស់ឈ្មោះ សុគុណ សំណាង ហៅ ម៉ាប់ និងការស្រាវជ្រាវស៊ើបអង្កេតរបស់សមត្ថកិច្ចជំនាញ នៅថ្ងៃខែឆ្នាំដដែល វេលាម៉ោង១២និង៣០នាទី នៅចំណុចបន្ទប់ជួល (រំដេង) ស្ថិតក្នុងភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារ បានបន្តឃាត់ខ្លួនជនសង្ស័យចំនួន ០៤ នាក់ បន្ថែមទៀត។

ក្នុងនោះបានដកហូតវត្ថុតាង ក្រាមពណ៌សថ្លាសង្ស័យជាសារធាតុញៀន ចំនួន ០១ កញ្ចប់, ថ្នាំគ្រាប់ពណ៌ផ្កាឈូកប្រភេទ (WY) ចំនួន ២០៨ គ្រាប់, ជញ្ជីងថ្លឹងគ្រឿងញៀនចំនួន ០១ គ្រឿង និងទូរស័ព្ទចំនួន ០៣ គ្រឿង។

បច្ចុប្បន្ន ជនសង្ស័យទាំង ០៦នាក់ និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តចាត់ការបន្តតាមនីតិវិធី៕

យុវជន១៥ក្រុមដាក់បង្ហាញស្នាដៃជាគម្រោងពាក់ព័ន្ធនឹងការផ្លាស់ប្តូរសង្គមដោយភាពវិជ្ជមាន

សាន ម៉ាលីនណា (San Malinna) — Mon, 21 Nov 2022 03:10:49 +0000

យុវជនឆ្នើមចំនួន១៥ក្រុមនៃកម្មវិធីជំនាន់ថ្មី ដាក់បង្ហាញស្នាដៃដែលជាគម្រោងពាក់ព័ន្ធនឹងការផ្លាស់ប្តូរសង្គមប្រកបដោយភាពវិជ្ជមាន និងដែលកំពុងអនុវត្តនៅក្នុងសហគមន៍ជាច្រើននៅទូទាំងប្រទេស។

កម្មវិធីជំនាន់ថ្មី (New Future Generation) គឺជាកម្មវិធី សម្រាប់យុវជនកម្ពុជានៅទូទាំងប្រទេសសម្រាប់ប្រែក្លាយសក្តានុពលរបស់ពួកគេឲ្យទៅជាសកម្មភាព និងសមិទ្ធផលជាក់លាក់។ កម្មវិធីនេះមានការគាំទ្រពីអង្គការយូនីសេហ្វប្រចាំកម្ពុជា។

ការដាក់តាំងបង្ហាញស្នាដៃរបស់ក្រុមយុវជនក្នុងកម្មវិធីជំនាន់ថ្មីនេះធ្វើឡើងក្នុងពេលដែលអង្គការអន្តរជាតិយូនីសេហ្វប្រចាំកម្ពុជា និងក្រសួងពាក់ព័ន្ធ ប្រារព្ធទិវាកុមារពិភពលោកនៅរាជធានីភ្នំពេញកាលពីថ្ងៃទី ១៨ ខែវិចិ្ឆកា ឆ្នាំ២០២២ ដែលជាខួបត្រូវបានអនុម័តលើអនុសញ្ញាស្តីពីសិទិ្ធកុមារកាលពីថ្ងៃទី ២០ ខែវិច្ឆិកា ឆ្នាំ១៩៨៩។

កញ្ញា រស ពេជ្រពុទិ្ធកា

កញ្ញា រស ពេជ្រពុទិ្ធកា ប្រធានគម្រោង UNITELL ដែលជាគម្រោងបង្កើតសារសំឡេង ឬហៅថា Podcast ដែលនិយាយអំពីបញ្ហាប្រឈមរបស់និស្សិតក្នុងអំឡុងពេល និងក្រោយការបញ្ចប់ការសិក្សា បានប្រាប់មក Newsroom Cambodia ថា កញ្ញាបានមើលឃើញពីបញ្ហារបស់និស្សិតក្នុងការចាប់ក្តីស្រម៉ៃផ្សេងៗទើបកញ្ញាបានបង្កើតគម្រោង UNITELL នេះឡើង។

កញ្ញាថា៖ «នៅក្នុងកម្មវិធី New Generation Future នេះគឺខ្ញុំជា project lead ទៅលើ project ឈ្មោះថា UNITELL មកពីពាក្យ២ គឺ university and tell។ tell គឺរឿងរ៉ាវអីដែល សិស្ស និស្សិតចង់លើកឡើង ធ្វើក្នុងការសម្រេចក្តីស្រមៃរបស់គាត់ផ្សេងៗគ្នា។»

កញ្ញាក៏បន្ថែមថា គម្រោងរបស់កញ្ញាមានការចែករំលែកព័ត៌មាន និងបទពិសោធន៍ផ្សេងៗតាមរយៈវីដេអូក្នុងនោះក៏មានការលើកឡើងពីសុខភាពផ្លូវចិត្តរបស់និស្សិតផងដែរ។

កញ្ញាថា៖ «កន្លងមកអីដែលយើងបានធ្វើគឺយើងមានចែករំលែកព័ត៌មានបទពិសោធន៍ទៅតាមឡាយតាមរយៈBlog វីដេអូដែលយើងធ្វើផងដែរ មានeventផ្សេងៗអី eventអាចមានប្រភេទខុសគ្នាពេលខ្លះយើងនិយាយពី ការផ្លាស់ប្ដូរការសិក្សាផ្សេងៗ ពេលខ្លះនិយាយ mental health[សុខភាពផ្លូវចិត្ត] ចឹងទៅ មិនមែន directly [ផ្ទាល់] ជួយគាត់ម៉ងទេ ប៉ុន្តែយើងមាន content [មាតិការ] ជាច្រើនដាក់ឱ្យគាត់ explore [ស្វែងយល់] បើសិនជាគាត់មានសំណួរអី គាត់អាចសួរ ជាមួយពួកយើងបាន ហើយពូកយើងនឹងជួយឆ្លើយ»។

ទន្ទឹមនឹងនេះយុវសិស្ស លី សុគន្ធបញ្ញា អាយុ១៦ឆ្នាំ ជាសិស្សថ្នាក់ទី១២ មកពីសាលាឯកជន «Linger» និងជាអ្នកដឹកនាំគម្រោង Eco bee ដែលជាគម្រោងដែលផ្តោតការការពារសត្វឃ្មុំ និងបរិស្ថាន បាននិយាយថា ដោយសារតែការចាប់អារម្មណ៍នឹងសត្វឃ្មុំ និងសកម្មភាពទាក់ទងនឹងបរិស្ថាន ស្របពេលដែលអង្គការ UNICEF ជ្រើសរើសសិស្សចូលរួមក្នុងកម្មវិធីជំនាន់ថ្មី ទើបជាឱកាសអាចឱ្យក្រុមរបស់កញ្ញាបង្រៀនសិស្សដទៃបាន។

យុវសិស្សនេះថា៖ «គម្រោងមានឈ្មោះថា Eco bee មកពីពាក្យ ecosystem ជាមួយនឹងពាក្យ Bee ហើយគម្រោងរបស់ខ្ញុំគឺចាប់ផ្ដើមតាំងពីយូរហើយគឺខ្ញុំមានចំណាប់អារម្មណ៍ទាក់ទងទៅនឹងសត្វឃ្មុំតាំងពីខ្ញុំអាយុ១៦ឆ្នាំមកម៉្លេះ ប៉ុន្តែដោយសារខ្ញុំអត់ទាន់មានឱកាសសិក្សាពីវាហើយខ្ញុំក៏ទុករហូតទៅពេលដែល UNICEF New Generation ចាប់ផ្ដើម ខ្ញុំក៏បានចាប់ផ្ដើមយកឱកាសដើម្បី research [ស្រាវជ្រាវ] ហើយយកអ្វីដែលខ្ញុំបានយល់ដឹងយកទៅបង្រៀនសិស្សដទៃទៀត»។

បញ្ញាបន្តថា កញ្ញាបានចុះទៅខេត្តកោះកុងដើម្បីសិក្សាស្រាវជ្រាវពីសត្វឃ្មុំនៅកម្ពុជា ហើយក៏បានចូលទៅខេត្តសៀមរាប ខេត្តកំពង់ចាមដើម្បីធ្វើសិក្ខាសាលាដល់សិស្សសាលារដ្ឋដើម្បីឲ្យគាត់យល់ពីសត្វឃ្មុំនៅក្នុងប្រទេសកម្ពុជា។

យុវជន ប៉ូ សុវណ្ណរាជ អាយុ១៦ឆ្នាំជាសមាជិកក្នុងគំរោង Eco bee នេះបានលើកថាឡើង លោកចង់យកបញ្ហាផេ្សងៗក្នុងប្រទេសកម្ពុជាភ្ជាប់ជាមួយការផ្សព្វផ្សាយព័ត៌មានដើម្បីអាចជាចំណែកជួយដល់រដ្ឋាភិបាល។

យុវជននេះថា៖ «សម្រាប់ខ្ញុំផ្ទាល់គិតថា ការយល់ដឹងទាក់ទងទៅនឹងបញ្ហាប្រទេសកម្ពុជាកាន់តែច្រើន អាចជាប់ផ្សព្វផ្សាយព័ត៌មានទាំងអស់នោះទៅដល់ប្រទេសដែលខ្ញុំស្គាល់ដូចជាពេលដែលខ្ញុំចង់ធ្វើអ្វីមួយជាមួយនឹងសត្វឃ្មុំនៅក្នុងប្រទេសកម្ពុជា នៅថ្ងៃអនាគតខ្ញុំអាចយករឿងនេះទៅជួយរដ្ឋាភិបាលបានផងដែរ»។

លោក ឈឹម នព្វន្ត

មិនខុសគ្នាប៉ុន្មាន លោក ឈឹម នព្វន្ត ជានិស្សិតឆ្នាំទី១ ជំនាញគ្រប់គ្រងពាណិជ្ជកម្មនៃសាកលវិទ្យាល័យអាមេរិកាំងភ្នំពេញ (AUPP) និងជាអ្នកបង្កើតគម្រោងដែលមានឈ្មោះថា មាគ៌ា ដែលជាគម្រោងភ្ជាប់សិស្សជាមួយនឹងឱកាសដើម្បីអភិវឌ្ឍន៍ខ្លួនឯង បានលើកឡើងថា លោកមើលឃើញយុវជនភាគច្រើនខ្វះខាតជំនាញទន់ ទើបធ្វើឱ្យលោកសម្រេចចិត្តបង្កើតគម្រោងនេះឡើង។

លោកថា៖ «យើងឃើញថាកូនសិស្សភាគច្រើននៅពេលដែលយើងរៀនចប់ហើយ នៅពេលដែលគាត់ចូលធ្វើការ គឺពួកគាត់ខ្វះនូវជំនាញទន់ ដែលមិនអាចធ្វើឱ្យការងាររបស់គាត់ទទួលបានជោគជ័យ ព្រោះរៀននៅក្នុងបានបង្ហាញតែ Theories [ទ្រឹស្តី] ទេ មិនទាន់បាន Practice [អនុវត្ត] នោះទេ»។

នព្វន្ត បានបន្ថែមថា លោកចង់ភ្ជាប់សិស្សនៅជនបទឱ្យមានភាពស្មើគ្នា ដើម្បីជាឱកាសឱ្យពួកគេអាចអភិវឌ្ឍន៍ខ្លួនឯងបាន។

លោកថា៖ «ពេលដែលពួកខ្ញុំចុះទៅជនបទគឺពួកខ្ញុំអត់មានអីទាំងអស់ ដោយសារតែនៅខាងជនបទ សូម្បី Projector ក៏អត់មាន internet អ្នកខ្លះក៏អត់មាន អ្នកខ្លះអត់មានទូរសព្ទទៀត។ ពេលត្រូវប្រើទូរសព្ទគឺត្រូវចែកគ្នាមួយក្រុម ៣-៤ នាក់ចែកគ្នាមើលទៅ។ បញ្ហាដែលខ្ញុំគិតថាសំខាន់គឺជាផ្នត់គំនិតមួយរបស់មនុស្សដែលរស់នៅក្នុងជនបទជាមួយអ្នកដែលរស់នៅទីក្រុង អ្នករស់នៅទៅក្រុងអាចបើកចិត្ត សិទ្ធិឱ្យកូនសិស្ស កូនរបស់គាត់ប្រឡូកក្នុងកម្មវិធីដើម្បីទទួលបានបទពិសោធន៍»។

ស្នាដៃគម្រោងរបស់យុវជនទាំង១៥ក្រុមដែលដាក់បង្ហាញក្នុងកម្មវិធីនេះ ភាគច្រើនផ្តោតលើបច្ចេកវិទ្យា បរិស្ថាន ការអប់រំ សិល្បៈ សុខភាព សុវត្ថិភាពចំណីអាហារជាដើម៕

មន្ត្រីនិយាយថា ការចាប់ខ្លួនទាំងអស់មិនពាក់ព័ន្ធនឹងការងារសារព័ត៌មានទេ

សាន ម៉ាលីនណា (San Malinna) — Sun, 30 Oct 2022 13:49:02 +0000

រដ្ឋលេខាធិការនៃក្រសួងព័ត៌មាន លោកស្រី ឆៃ ច័ន្ទរិទ្ធីសូលីដា បានលើកឡើងថា អ្នកសារព័ត៌មានមិនអាចប្រើងាររបស់ខ្លួននៅពេលដែលត្រូវបានខាងសមត្ថកិច្ចឃាត់ខ្លួននោះទេ ដោយលោកស្រីបានលើកឡើងថា «វាជារឿងបុគ្គល»។

អង្គការសិក្សាវិទ្យាសាស្ត្រអប់រំ និងវប្បធម៌នៃអង្គការសហប្រជាជាតិ (UNESCO) សហការជាមួយក្រសួងព័ត៌មានបានរៀបចំសន្និសីទថ្នាក់ជាតិលើកទីមួយស្ដីពីការអភិវឌ្ឍប្រព័ន្ធផ្សព្វផ្សាយ ការកសាងភាពជាដៃគូសម្រាប់ការអភិវឌ្ឍប្រព័ន្ធផ្សព្វផ្សាយ ដោយមានការអញ្ជើញចូលរួមពីសំណាក់រដ្ឋមន្ត្រីក្រសួងព័ត៌មានលោកខៀវ កាញារីទ្ធ ស្ថាប័នពាក់ព័ន្ធ និងអ្នកសារព័ត៌មានដែលមកពីស្ថាប័ននានានៅក្នុងប្រទេសកម្ពុជានៅសណ្ឋាគារសុខាភ្នំពេញកាលពីថ្ងៃទី២៧ ខែតុលា ឆ្នាំ២០២២។

អំឡុងពេលសន្និសីទថ្នាក់ជាតិខាងលើមានការចូលរួមពីសំណាក់រដ្ឋលេខាធិកាក្រសួងព័ត៌មានលោកស្រីច័ន្ទរិទ្ធីសូលីដា ក្នុងនាមជាវាគ្មិនក្នុងកិច្ចពិភាក្សាក្រោមប្រធានបទ «សារព័ត៌មានជាប្រយោជន៍សាធារណៈនៅក្នុងប្រទេសកម្ពុជា» លោកស្រីបានឆ្លើយនឹងសំណួរមួយចំនួនផងដែរ ទាក់ទងសិទ្ធិសេរីភាព បញ្ហាមួយចំនួនរបស់អ្នកសារព័ត៌មានបច្ចុប្បន្ន។

លោកស្រីបានឆ្លើយតបទៅនឹងសំណួរដែលបានចោទសួរ ដោយលោកស្រីបានបញ្ជាក់ថា អ្នកសារព័ត៌មានត្រូវគោរពដាច់ខាតតាមការណែនាំរបស់មន្ត្រីតាមតំបន់នៅពេលដែលចុះយកព័ត៌មាន។

លោកស្រីបាននិយាយថា៖ «កាលណាយើងទៅយកព័ត៌មាននៅកន្លែងដែលមន្ត្រីសាធារណៈឬក៏មន្ត្រីជំនាញដែលគេបំពេញបេសកម្មការងារ យើងត្រូវគោរពដាច់ខាតនូវបទបញ្ជា របៀបរបប ការអនុញ្ញាត មិនអនុញ្ញាត វាគឺជាសិទ្ធិរបស់មន្ត្រីជំនាញកំពុងប្រតិបត្តិការ»។

លោកស្រីបានបន្តទៀតថា៖ «បើសិនជាមានរឿងកើតឡើងនៅតាមបណ្ដាសាធារណៈ ខ្ញុំឧទាហរណ៍នៅពេលដែលយើងប្រឆាំង ឬមិនគោរពទៅតាមរបៀបរបបដែលចុះទៅយកព័ត៌មានដែលមន្ត្រីសាធារណៈ ឬក៏មន្ត្រីជំនាញដែលគេបំពេញបេសកម្មនោះហើយយើងធ្វើខុសមានការឃាត់ខ្លួនអីជាដើម អ៊ីចឹងសូមកុំឱ្យផ្សាយថាអ្នកសារព័ត៌មានត្រូវបានឃាត់ខ្លួន មិនមែនទេ គឺបុគ្គលនោះត្រូវបានឃាត់ខ្លួនដោយសារមូលហេតុអីហើយគាត់មានមុខរបរអាជីពអី ឧទាហរណ៍ជាអ្នកសារព័ត៌មានជាដើម»។

លោកស្រីបានប្រសាសន៍ថា៖ «ប្អូនដែលមើលសារព័ត៌មានអាគាំង (អាមេរិក) ឬក៏ការផ្សព្វផ្សាយព័ត៌មានអន្តរជាតិទេ ខ្ញុំលើកពីគេទៅចុះ ខ្ញុំឧទាហរណ៍ករណីឃាតកម្មមួយ អ្នកសារព័ត៌មានចង់ដឹងណាស់ ចូលទៅយកព័ត៌មានអ្នកស្លាប់ថាយ៉ាងម៉េច ពេលខ្លះយើងផ្សាយមិនទាំងដឹងពីក្រមសីលធម៌ វីជ្ជាជីវៈរបស់ខ្លួនក្នុងការយកព័ត៌មាន មិនដឹងថារូបភាពយកមុំណាផងមកទាំងកាកទាំងគោកក៏មានដែរ អញ្ជឹងចំណុចនេះឯងកាលណាមានឃាតកម្មគឺគេត្រូវព័ទ្ធខ្សែក្រហមហើយមានន័យថាម៉េច ការពារមិនឱ្យអ្នកសារព័ត៌មាន ឬសាធារណៈជន ឬក៏បងប្អូនសាច់ញាតិណាចូលមកទីកន្លែងណាដែលគេហាមឃាត់»។

លោកស្រីបានបន្ថែមថា៖ «នៅភ្នំតាម៉ៅក៏ដូចគ្នា អ្វីដែលខ្ញុំឃើញក៏ដូចគ្នាអញ្ចឹងកន្លែងណាដែលគេហាមឃាត់ យើងជំនួសទៅដោយសន្តិសុខឬកងអន្តរាគមន៍ដែលការពារព្រោះគេកំពុងធ្វើការដូចខ្ញុំលើកមិញចឹងគ្នាធ្វើការឈរហាលក្ដៅ ហាលភ្លៀង ហើយប៉ុន្មានម៉ោងយើងយល់អារម្មណ៍នៅពេលដែលគេកំពុងបំពេញការងារ ចឹងនៅពេលដែលបំពេញការងារវាតែងមានអារម្មណ៍ខ្លះហើយ ហើយគឺជាបុគ្គលម្នាក់ទេ ចឹងយើងកុំយកទិដ្ឋភាពទាំងមូលមកវៃអួ ចឹងទេឱ្យច្បាស់អ្នកសារព័ត៌មាននៅពេលដែលមានការរំលោភបំពានថាអ្នកណា បុគ្គលមួយណាត្រូវលើកឱ្យច្បាស់មិនមែនអង្គភាពមួយទាំងមូលជាអ្នករំលោភបំពាន»។

គួរបញ្ជាក់ផងដែរថា កាលពីខែសីហាកន្លងទៅមានការឃាត់ខ្លួនអ្នកសារព័ត៌មានវិទ្យុសំឡេងប្រជាធិបតេយ្យ (VOD) ចំនួន៥រូប ទាក់ទងនឹងការចុះយកព័ត៌មាននៅតំបន់ឈូសឆាយភ្នំតាម៉ៅ។ ក្នុងកិច្ចពិភាក្សាដដែលនោះលោកស្រីបានឆ្លើយបង្វែរសំណួរទាក់ទងទៅនឹងករណីឃាតកម្មទៅវិញ៕

ពីក្មេងក្រីក្រ ធ្លាប់បោះបង់ការសិក្សា ក្លាយជាបុគ្គលគំរូនៅក្នុងសង្គម

សាន ម៉ាលីនណា (San Malinna) — Fri, 21 Oct 2022 08:31:04 +0000

ជាក្មេងដែលមានប្រវត្តិបោះបង់ការសិក្សាដោយសារតែគ្រួសារមានជីវភាពក្រីក្រ និងធ្លាប់បួសជាព្រះសង្ឃ ត្រឡប់មកតស៊ូរៀនវិញរហូតដល់ចប់ថ្នាក់បរិញ្ញាបត្រ និងក្លាយជាប្រធានសមាគមន៍បណ្ដាញយុវជនកម្ពុជា (CYN)។

កើតនៅឆ្នាំ១៩៨៨ លោកអ៊ុល វ៉ាន់ ជាកូនកសិករមកពីខេត្តស្វាយរៀង ដែលមានបងប្អូនប្រុសចំនួន ៤នាក់ ហើយលោកជាកូនច្បងក្នុងគ្រួសារ។ ឪពុកជាអ្នកឡើងត្នោត ចិញ្ចឹមសត្វ និងលេងភ្លេងខ្មែរ រីឯម្ដាយជាអ្នកលក់ដូរស្ករត្នោតដើម្បីរកចំណូលផ្គត់ផ្គង់គ្រួសារ។

លោកវ៉ាន់ បានលើកឡើងថា៖ «ខ្ញុំគឺជាអ្នកស្វាយរៀង មែនទែនទៅខ្ញុំកើតនៅឆ្នាំ១៩៨៨ បើគិតមកដល់ពេលបច្ចុប្បន្នខ្ញុំមានអាយុ៣៤ឆ្នាំ។ ខ្ញុំមានបងប្អូនបង្កើតបួននាក់ ខ្ញុំជាកូនទីមួយ អត់មានស្រីទេ»។

លោកបានបន្ថែមថា៖ «ឪពុកម្ដាយខ្ញុំមែនទែនទៅជាកសិករ បច្ចុប្បន្នគាត់នៅរស់រានមានជីវិតនៅឡើយទេ។ ក្រៅពីធ្វើស្រែចម្ការ ម្ដាយរបស់ខ្ញុំគាត់គឺជាអ្នកលក់ដូរនៅក្នុងស្រុក គាត់លក់ស្ករត្នោត។ ឪពុករបស់ខ្ញុំពីមុនគាត់គឺជាអ្នកឡើងត្នោត ឥឡូវគាត់រាងចាស់មកចិញ្ចឹមសត្វ លេងភ្លេងបុរាណ»។

លោកវ៉ាន់ ធ្លាប់បានសិក្សានៅក្នុងសាលារហូតមកដល់ថ្នាក់ទី៩ ក៏ប៉ុន្តែត្រូវបោះបង់ការសិក្សាមួយខែមុនការប្រលងថ្នាក់ទី៩ ដោយសារគ្រួសារមានជីវភាពខ្វះខាត ហើយលោកក៏សម្រេចចិត្តបួសជាព្រះសង្ឃរយៈពេល ៣ឆ្នាំ ពីឆ្នាំ២០០៥ ដល់ឆ្នាំ២០០៨។ ដោយលោកយល់ឃើញថាមានតែការបួសរៀនទេទើបអាចបន្តការសិក្សាបាន។

លោកអ៊ុល វ៉ាន់ក្នុងបទសម្ភាសន៍របស់ជាមួយ Newsroom Cambodia។ រូបភាព៖ សាន ម៉ាលីនណា

លោកវ៉ាន់ បានលើកឡើងទាំងអួលដើមកថា៖ «ខ្ញុំជាអ្នកដែលចង់រៀន មែនទែនទៅបើទោះបីជាគ្រួសារខ្ញុំខ្វះខាតកាលនោះ ហើយខ្ញុំមើលឃើញថាមានតែការបួសរៀនទេ ទើបខ្ញុំអាចបន្តការរៀនសូត្របាន»។

«ពេលខ្លះខ្ញុំអត់បាយហូបទេ ពេលដែលខ្ញុំទៅរៀនអ៊ីចឹងមកវិញគេហូបបាយអស់ ពេលខ្លះបាយផ្អូម ហើយពេលខ្លះហូបទឹកហើយដេកទៅ»។

នៅអំឡុងពេលដែលលោកជាព្រះសង្ឃ ដោយសារតែចង់សិក្សារៀនសូត្រ ទើបធ្វើឱ្យលោកសម្រេចចិត្តផ្លាស់ប្ដូរទីកន្លែងពីខេត្តមួយទៅខេត្តមួយដើម្បីបន្តការរៀនសូត្ររបស់ខ្លួន។ ក្រៅតែជាសិស្សពូកែមុខវិជ្ជាភាសាខ្មែរយុវជនរូបនេះ ក៏ឆ្លៀតរៀនទាំងផ្នែកភាសាបាលី រួមទាំងភាសាអង់គ្លេសផងដែរ។ នៅពេលទំនេរពីការរៀនសូត្រលោកក៏បានជួយកិច្ចការក្នុងវត្ត ព្រមទាំងជួយបង្រៀនភាសាអង់គ្លេសទៅកាន់ព្រះសង្ឃ និងមិត្តភក្តិផ្សេងទៀត ដែលទទួលបានជាថវិកាតិចតួចដើម្បីចំណាយទៅលើការសិក្សារបស់ខ្លួន។

លោកវ៉ាន់ បានលើកឡើងថា៖ «ខ្ញុំសិក្ខមកវិញរួចបន្តការសិក្សាបំពេញវិជ្ជាថ្នាក់ទី៩ ទី១០ អ៊ីចឹងខ្ញុំរៀនថ្នាក់ទី១០ តែត្រូវមកប្រលងថ្នាក់ទី៩វិញ ដើម្បីយកសញ្ញាបត្រឌីប្លូម (មធ្យមសិក្សាទុតិយភូមិ)។ ខ្ញុំសំណាងល្អខ្ញុំអាចមានឱកាសទៅរៀនភាសាអង់គ្លេសក្រៅម៉ោង កាលនោះដើរទៅរៀន អ៊ីចឹងបានបានទុនជាភាសាអង់គ្លេសដែលខ្ញុំអាចប្រើដើម្បីបង្រៀនអ្នកដទៃទៀត ខ្ញុំបានលុយ មែនទែនទៅខ្ញុំបង្រៀនព្រះសង្ឃ ហើយបង្រៀនអ្នកនៅវត្តដែលជាមិត្តដូចគ្នានោះ គាត់ឧបត្ថមម្នាក់មួយម៉ឺនរៀល ព្រះអង្គគាត់ក៏បានជួយដែរមួយម៉ឺន អ៊ីចឹងខ្ញុំបានលុយហ្នឹងដើម្បីផ្គត់ផ្គង់ការរៀនសូត្រខ្ញុំនៅថ្នាក់វិទ្យាល័យ»។

នៅឆ្នាំ២០១០ លោកវ៉ាន់ បានបញ្ចប់ការសិក្សាថ្នាក់វិទ្យាល័យ និងបានជាប់អាហារូបករណ៍ចំនួនពីរ គឺភាសាអង់គ្លេសសម្រាប់ការអប់រំ និងអាហារូបករណ៍ផ្នែកគ្រប់គ្រង តែដោយសារតែកត្តាពេលវេលាមិនអំណោយផលទើបធ្វើឱ្យលោក វ៉ាន់ សម្រេចចិត្តបោះបង់អាហារូបករណ៍ផ្នែកគ្រប់គ្រង។

លោកបានលើកឡើងថា៖ «ដល់ឆ្នាំ២០១០ខ្ញុំប្រលងជាប់បាក់ឌុប ហើយនៅ២០១០ ខែ១០ ខ្ញុំក៏ឡើងមករៀននៅភ្នំពេញ ខ្ញុំទទួលបានអាហារូបករណ៍ពីរសាលា ថ្នាក់បរិញ្ញាបត្រខ្ញុំរៀនភាសាអង់គ្លេសសម្រាប់ការអប់រំមួយ ហើយខ្ញុំរៀនគ្រប់គ្រង ក៏ប៉ុន្តែខ្ញុំរៀនគ្រប់គ្រងបានត្រឹមឆ្នាំទីពីរទេ ខ្ញុំក៏បោះបង់ការរៀនបរិញ្ញាបត្រគ្រប់គ្រងវិញដោយសារតែខ្ញុំរៀនភាសាអង់គ្លេសសម្រាប់ការអប់រំ គឺតម្រូវឱ្យខ្ញុំរៀនពេញម៉ោង រៀនពីចន្ទដល់សៅរ៍ អ៊ីចឹងខ្ញុំអត់មានពេលសម្រាប់រៀនថ្នាក់មួយទៀត ខ្ញុំក៏បញ្ឈប់ត្រឹមឆ្នាំទីពីរ»។

ជីវិតថ្មីនៅលើទឹកដីសកលវិទ្យាល័យអ្វីៗហាក់មានការប្រែប្រួលស្ទើតែមួយរយប៉ែតសិបឌឺក្រេ លោកវ៉ាន់ ដែលធ្លាប់ជាគ្រូបង្រៀនភាសាអង់គ្លេស បានប្រែក្លាយទៅជាអ្នករត់ម៉ូតូឌុបដើម្បីរកចំណូលផ្គត់ផ្គង់ការចំណាយរបស់ខ្លួននៅទីក្រុងភ្នំពេញ។

លោកវ៉ាន់ បានលើកឡើងថា៖ «ខ្ញុំមកភ្នំពេញ ខ្ញុំមកនៅជាមួយពូមីងគាត់ជាអ្នកធ្វើការរោងចក្រនៅតាខ្មៅ ហើយអ៊ីចឹងខ្ញុំចាប់ផ្ដើមជីវិតថ្មីពីគ្រូបង្រៀនមកជាអ្នករត់ម៉ូតូឌុប។ ខ្ញុំឆ្លៀតពេលចេញពីរៀននៅមហាវិទ្យាល័យម៉ោង ៤ល្ងាច ៥ល្ងាចអ៊ីចឹង ខ្ញុំរត់ម៉ូតូឌុបពីម៉ោង៤ ដល់ម៉ោង៧យប់ ពេលខ្លះដល់ម៉ោង៨ ម៉ោង៩យប់»។

លោកបានបន្តថា៖ «ខ្ញុំមានម៉ូតូមួយគ្រឿង ម្ដាយខ្ញុំគាត់លក់ស្ករត្នោត១២ពាង ហើយថែមមាសមួយជីទៀត ហើយមាសមួយជីហ្នឹងខ្ចីគេទៀត»។

ក្រៅតែពីការងារជាអ្នករត់ម៉ូតូឌុប លោកវ៉ាន់ ក៏ធ្លាប់ធ្វើជាអ្នកស្ម័គ្រចិត្តនៅតាមអង្គការនានា និងធ្វើជាគ្រូបង្រៀនផ្នែកភាសាអង់គ្លេសនៅសាលាឯកជនទាំងក្រៅម៉ោង និងពេញម៉ោង។ ដោយការតស៊ូព្យាយាមមិនរុញរា លោកវ៉ាន់ ទទួលបានភាពជោគជ័យជាបន្តបន្ទាប់នៅក្នុងជីវិតការងាររបស់ខ្លួន រហូតក្លាយជាប្រធានសមាគមន៍បណ្ដាញយុវជនកម្ពុជា (CYN)នៅឆ្នាំ២០១៩សម្រាប់អណត្តិ៤ឆ្នាំ គឺពីឆ្នាំ២០២០ដល់ឆ្នាំ២០២៣។

ក្រោមការដឹកនាំរបស់លោកវ៉ាន់ បណ្ដាញយុវជនកម្ពុជា ក៏បានសម្រេចបាននូវចំណុចសំខាន់ៗជាច្រើនដូចជា ការចូលរួមចំណែកកសាងសមត្ថភាពយុវជន និងពលរដ្ឋពាក់ព័ន្ធនឹងសិទ្ធិមនុស្ស ជំនាញជាពលរដ្ឋសកម្ម កម្មវិធីផ្លាស់ប្ដូរបទពិសោធន៍ទស្សនៈកិច្ច កម្មវិធីទាក់ទងនឹងការការពារធនធានធម្មជាតិ យុត្តិធម៌សង្គម និងសិទ្ធិការងារជាដើម

លើសពីនេះលោកក៏បានសង្កត់ធ្ងន់ផងដែរថា បណ្ដាញយុវជនកម្ពុជាក៏បានចូលរួមចំណែកបង្កើតសាមគ្គីភាព កិច្ចសហប្រតិបត្តិការក្នុងចំណោមដៃគូជាយុវជន និងអង្គការសង្គមស៊ីវិលផ្សេងទៀតជាច្រើនផងដែរ។

«រដ្ឋាភិបាល ជាពិសេសខាងអាជ្ញាធរ តែងតែតាមដានឃ្លាំមើល ការអនុវត្តន៍ការងាររបស់បណ្ដាញយុវជនកម្ពុជាដែរដោយសារគាត់យល់ថាសកម្មភាពរបស់យើង (បណ្ដាញយុវជនកម្ពុជា) ជាសកម្មភាពពាក់ព័ន្ធទៅហ្នឹងគណបក្សនយោបាយ»។ នេះជាការលើកឡើងរបស់លោកវ៉ាន់អំពីបញ្ហាប្រឈមដែលបានជួបប្រទះកន្លងមក។

លោកក៏បានបន្ថែមទៀតថា៖ «ប៉ុន្តែធាតុពិតយើងធ្វើការដោយឈរលើគោលការណ៍សិទ្ធិមនុស្ស ឈរលើគោលការណ៍ប្រជាធិបតេយ្យ ដោយយើងតម្កល់នូវប្រយោជន៍ជាតិ ប្រយោជន៍សង្គមជាធំ។ អ៊ីចឹងហើយបើទោះបីជាយើងមានគោលការច្បាស់ក៏ដោយ បានចុះបញ្ជីការរួចក៏ដោយ ដោយសារតែបញ្ហានយោបាយ អាជ្ញាធរគាត់នៅតែតាមដានឃ្លាំមើលទៅលើសកម្មភាពការងាររបស់យើង។

«សឹងថាឱ្យតែចេញទៅសហគមន៍ដល់កន្លែងការងារ គឺមានអាជ្ញាធរទៅដល់ហើយ គាត់ស្វាគមន៍ គាត់ថតរូប គាត់ទាមទារការជូនដំណឹង បញ្ជីវត្តមានអ្នកចូលរួម ដែលយើងយល់ថាបញ្ហាទាំងអស់ហ្នឹងគឺជាការរឹតត្បិតសិទ្ធិសេរីភាពជាមូលដ្ឋានរបស់អង្គការសង្គមស៊ីវិល របស់ប្រជាពលរដ្ឋ»។

ជាមួយគ្នានេះដែរ លោកវ៉ាន់ក៏បានលើកទឹកឱ្យយុវជន សិស្ស និស្សិត មានការតស៊ូព្យាយាមរៀនសូត្រ ជំនះការលំបាក មានភាពស្មោះត្រង់ មានទំនួលខុសត្រូវចំពោះតួនាទីរបស់ខ្លួន ហើយនិងមានទំនាក់ទំនងល្អជាមួយសង្គម និងមនុស្សជុំវិញខ្លួន។

លោកបានលើកឡើងថា៖ «ក្នុងនាមជាយុវជនមួយរូប និងក្នុងនាមបណ្ដាញយុវជនកម្ពុជា ខ្ញុំសូមលើកទឹកចិត្តឱ្យប្អូនៗ យុវជន ក្មេងៗ សិស្ស និស្សិតទាំងអស់ ដែលគាត់មានការលំបាក ឬក៏មានការប្រឈមអ្វីមួយ នៅក្នុងការរៀនក្ដី ក្នុងជីវិតក្ដី ក្នុងជីវភាពក្ដី ក្នុងជីវិតការងារអីក្ដី គឺសូមកុំបោះបង់ការតស៊ូ ការខិតខំប្រឹងប្រែង ភាពស្មោះត្រង់ ការមានទំនាក់ទំនងល្អជាមួយអ្នកជុំវិញ ជាមួយនឹងសង្គម ជាពិសេសគឺការទទួលខុសត្រូវរបស់យើងនៅក្នុងតួនាទីរបស់យើង»។

លោកបានបន្តថា៖ «ខ្ញុំលើកទឹកចិត្តឱ្យប្អូនៗយុវជន ត្រូវតែចូលរួមក្នុងការងារសង្គម ទោះបីជាការងារស្ម័គ្រចិត្តក្ដី ជាកម្មវិធីរៀនសូត្រក្ដីដើម្បីយើងទទួលបានឱកាសរៀនសូត្រ និងមានឱកាសឈ្វេងយល់ពីសង្គមខាងក្រៅថាតើនៅក្នុងសង្គមហ្នឹង មានរឿងអ្វីកើតឡើង បញ្ហាអ្វីខ្លះ ដែលយើងត្រូវតែយល់ដឹងក្នុងនាមជាពលរដ្ឋម្នាក់នៅក្នុងប្រទេស»។

គួរបញ្ជាក់ផងដែរថា សមាគមបណ្តាញយុវជនកម្ពុជា ហៅកាត់ថា (ប.យ.ក) ត្រូវបានបង្កើតឡើងក្នុងឆ្នាំ ២០០៩ ពីបណ្តាញយុវជន និស្សិត និងយុវជនជនបទដែលមានគោលបំណងបង្កើនការចូលរួមរបស់យុវជន និងការចូលរួមរបស់ពលរដ្ឋនៅក្នុងប្រទេសកម្ពុជា។ ប.យ.ក បានបង្កើតឡើងក្នុងគោលបំណងដើម្បីផ្តល់នូវការចែករំលែកជំនាញ និងឱកាស បង្កើតចំណេះដឹង ដល់ក្រុមយុវជនជាសមាជិក និងសកម្មជន ក៏ដូចជាបង្កើតបណ្តាញ ដើម្បីដាក់បញ្ហាយុវជនទៅតាមបរិបទនយោបាយ។ (នេះបើយោងតាមគេហទំព័ររបស់សមាគមបណ្តាញយុវជនកម្ពុជា (CYN) )៕

Voxpop: ទស្សនៈប្រជាពលរដ្ឋលើការផ្អាកព្រះរាជពិធីបុណ្យអុំទូកឆ្នាំ២០២២

សាន ម៉ាលីនណា (San Malinna) — Mon, 03 Oct 2022 09:44:51 +0000

នៅថ្ងៃទី១៥ ខែកញ្ញា ឆ្នាំ២០២២ លោកនាយករដ្ឋមន្រ្តី ហ៊ុន សែន បានប្រកាសផ្អាកការប្រារព្ធព្រះរាជពិធីបុណ្យអុំទូកនៅរាជធានីភ្នំពេញ ដោយលើកមូលហេតុថា ដោយសារការរាតត្បាតជំងឺកូវីដ១៩មិនទាន់បិទបញ្ចប់ទាំងស្រុង ហើយកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ដែលនឹងត្រូវរៀបចំឡើងដំណាលគ្នានឹងថ្ងៃបុណ្យអុំទូក។

ការប្រកាសផ្អាកការប្រារព្ធព្រះរាជពិធីបុណ្យអំទូក អកអំបុក សំពះព្រះខែ និងបណ្តែតប្រទីបនេះ ធ្វើឡើងតែនៅរាជធានីភំ្នពេញប៉ុណ្ណោះ សម្រាប់នៅតាមបណ្តាខេត្តនានាទូទាំងប្រទេស គឺអាចប្រព្រឹត្តទៅបានតាមការរៀបចំរបស់ថ្នាក់ខេត្ត ដើម្បីបង្កភាពសប្បាយរីករាយជូនប្រជាពលរដ្ឋ ក៏ដូចជាបង្កើនបរិយាកាសទេសចរណ៍ និងផ្តល់ឱកាសក្នុងការរកប្រាក់ចំណូលជូនប្រជាពលរដ្ឋ ។

Newsroom Cambodia បានសម្ភាសន៍ប្រជាពលរដ្ឋខ្មែរចំនួន៦រូប ដែលរស់នៅរាជធានីភ្នំពេញ អំពីការយល់ឃើញរបស់ពួកគាត់ចំពោះការផ្អាកព្រះរាជពិធីបុណ្យអំទូក អកអំបុក សំពះព្រះខែ និងបណ្តែតប្រទីបនៅរាជធានីភំ្នពេញក្នុងឆ្នាំ២០២២នេះ។

អ្នកស្រី សីង អាយុ ៣៥ឆ្នាំ ជាស្រ្តីមេផ្ទះ ដែលកំពុងដើរកម្សាន្តតាមមាត់ទន្លេ បានលើកឡើងថា អ្នកស្រីចង់ឱ្យមានការប្រារព្ធពិធីបុណ្យអុំទូក ប្រសិនបើគ្មានបញ្ហាអ្វីមួយ ដើម្បីកុំឱ្យបាត់បង់អត្តសញ្ញាណជាតិ។

អ្នកស្រី សីង

អ្នកស្រីបញ្ជាក់ថា៖ «បើតាមចិត្តផ្ទាល់ ឥលូវនេះទឹកក៏ឡើងរាងខ្លាំង រដ្ឋាភិបាលបានប្រកាសផ្អាកការអុំទូក អ៊ីចឹងអត់ទាន់ថាអីដែរ ព្រោះមិនសូវដឹងច្បាស់ តែប្រហែលជារដ្ឋាភិបាលអាចទុកលុយដើម្បីជួយប្រជាពលរដ្ឋ ដែលខ្វះខាត ឬ ថាទឹកជន់នៅតាមខេត្តផ្សេងៗ បានលុយហ្នឹងជួយអ្នកដែលអត់»។

អ្នកស្រីបន្ថែមទៀតថា៖ «តែបើគ្មានបញ្ហាទឹកជំនន់នៅស្រុកខ្មែរទេ បើអាចបន្តការប្រារព្ធពិធីបុណ្យនេះ ដើម្បីកុំឱ្យបាត់អត្តសញ្ញាណជាតិរាល់ឆ្នាំ»។

យុវជន មីង ហេង

យុវជន មីង ហេង អាយុ ១៨ឆ្នាំ ជានិស្សិត និងធ្វើការនៅក្រុមហ៊ុនមួយ យល់ថា ខ្លួនព្រួយបារម្ភខ្លាចបាត់បង់វប្បធម៌ជាតិ ប៉ុន្តែក៏ពេញចិត្តនឹងការសម្រេចចិត្តឱ្យមានការប្រារព្ធពិធីបុណ្យនៅតាមខេត្តដដែល។

យុវជនរូបនេះបញ្ជាក់ថា៖ «ហ្នឹងជាកម្មវិធីរបស់ជាតិប្រារព្ធតាំងពីដើមមក នៅសុខៗផ្អាកអីចឹង អាចថាបំបាត់វប្បធម៌របស់យើង ហើយនៅតាមខេត្តប្រារព្ធធម្មតា ប្រហែលជាគាត់រក្សាសុវត្ថិភាពឱ្យយើង»។

អ្នកស្រី ឃុល ស្រី

អ្នកស្រី ឃុល ស្រី អាយុ៦០ឆ្នាំ រស់នៅ ភ្នំពេញ ជាអាជីវករលក់ម្ជូរនៅសួនមាត់ទន្លេបានយល់ស្របទៅនឹងការផ្អាកពិធីបុណ្យអុំទូក ដោយអ្នកស្រីគិតថាជាការសម្រេចចិត្តរបស់រាជរដ្ឋាភិបាលការពារពីភាពរញ៉េរះញ៉ៃមុនពេលប្រជុំអាស៊ាន។

អ្នកស្រីបញ្ជាក់ថា៖ «សម្តេចផ្អាកបុណ្យអុំទូក យើងមានតែស្របទៅតាមគំនិតរបស់លោក ព្រោះក្នុងរយៈពេលត្រឹមតែ៣ថ្ងៃ ណាមួយកុំឱ្យលក់ដូររញ៉េរញ៉ៃប៉ះពាល់ការប្រជុំអាស៊ាននាពេលខាងមុខ និងសមត្ថកិច្ចពិបាកធ្វើការ។

អ្នកស្រីបានបន្ថែមទៀតថា៖ «អត់អុំទូកចឹងលក់ស្រួលជាងអុំទូក ថ្ងៃអុំទូកមនុស្សច្រើនពិបាកលក់ ភ្ញៀវមើលមិនឃើញ គេរវល់មើលអ្នកអុំទូក ហើយក៏សប្បាយចិត្តម្យ៉ាង បាននៅផ្ទះធ្វើកិច្ចការផ្ទះ»។

យុវតី យឿន សុវណ្ណសីងហារីហ្សា អាយុ១៦ឆ្នាំ ជាសិស្សនៅវិទ្យាល័យស៊ីសុវត្ថិ និយាយថា ខ្លួនមានទម្លាប់ជួយគ្រួសារលក់ភេសជ្ជៈនៅពេលទំនេរពីការសិក្សា។ យុវតីរូបនេះបារម្ភ ពីអាជីវកម្មរបស់គ្រួសារ ប៉ុន្តែក៏បង្ហាញការសប្បាយចិត្ត ព្រោះអាចមានពេលជាមួយគ្រួសារច្រើននៅពេលផ្អាកការប្រារព្ធពិធីបុណ្យនេះ។

យុវតីរូបនេះបញ្ជាក់ថា៖ «ម៉ាក់ប្រហែលអត់បើកតូប ព្រោះអត់សូវមានអ្នកទិញ លក់តែបន្តិចក៏បិទតូបវិញ តែក៏ល្អដែលម៉ាក់មានពេលជុំគ្រួសារ ហើយឥលូវកូវីដក៏នៅតែមានអាចប៉ះពាល់ខ្លះដែរ ព្រោះប្រជាជនមកពីខេត្តផ្សេងៗមិនសូវលាងដៃជាមួយអាកុល និងពាក់ម៉ាស់»។

យុវជន និន ម៉ាណែត

យុវជន និន ម៉ាណែត អាយុ ២១ឆ្នាំ ជាសិស្សថ្នាក់ទី១២ នៅវិទ្យាល័យជាស៊ីមបឹងកេងកង បានសម្តែងការពេញចិត្ត និងលើកឡើងថា នេះគឺជារឿងល្អ។

យុវជនរូបនេះបញ្ជាក់ថា៖ «វាជារឿងល្អ ព្រោះនៅក្នុងបរិបទកូវីដយើងត្រូវការពារទុកមុន ខ្លាចមានការឆ្លង ហើយយើងក៏អត់ដឹងដែរថានឹងមានរឿងអ្វីកើតឡើងនោះទេ ហើយណាមួយកូវីដនៅតែមានយើងត្រូវតែការពារខ្លួន»។

យុវតី ពេជ្រ ស្រីលក្ខណ៍

យុវតី ពេជ្រ ស្រីលក្ខណ៍ អាយុ១៧ឆ្នាំ ជាសិស្សថ្នាក់ទី១២ នៅវិទ្យាល័យជាស៊ីមបឹងកេងកង ក៏បានយល់ស្របទៅនឹងការសម្រេចចិត្តរបស់រដ្ឋាភិបាលផងដែរ។

យុវតីរូបនេះបញ្ជាក់ថា៖ «វាជារឿងមួយដ៏ល្អសម្រាប់ប្រទេសយើងដែរ មួយទៀតឥឡូវនេះមានភ្លៀងធ្លាក់ខ្លាំងដូចជាទឹកជំនន់ វាអាចបង្កបញ្ហាដល់ការប្រារព្ធពិធីបុណ្យនេះ»។

គួរបញ្ជាក់ផងដែរថា ព្រះរាជពិធីបុណ្យអំទូក អកអំបុក សំពះព្រះខែ និងបណ្តែតប្រទីប ជាព្រះរាជពិធីប្រពៃណីមួយរបស់ខ្មែរដែលតែងតែប្រារព្ធធ្វើឡើងនៅក្នុងអំឡុងខែវិច្ឆិកា។ តែក្នុងរយៈពេលប៉ុន្មានឆ្នាំចុងក្រោយនេះ ព្រះរាជពិធីនេះត្រូវបានផ្អាកជាអន្លើដោយយោងទៅតាមស្ថានភាពលំបាកដែលបណ្តាលមកពីការឆ្លងរីករាលដាលខ្លាំងនៃជំងឺកូវីដ១៩ និងទឹកជំនន់៕

លោក ហ៊ុន សែន ប្រកាសបង្កើនបណ្ណក្រីក្រដល់ប្រជាជនរងផលប៉ះពាល់ពីជំងឺកូវីដ និងអតិផរណា

សាន ម៉ាលីនណា (San Malinna) — Mon, 03 Oct 2022 09:38:42 +0000

លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានប្រកាសបង្កើនការផ្តល់បណ្ណក្រីក្រដល់ប្រជាជនដែលទទួលរងផលប៉ះពាល់ពីជំងឺកូវីដ១៩ និងអតិផរណានៅកម្ពុជា។

ថ្លែងក្នុងពិធីប្រគល់សញ្ញាបត្រជូនដល់និស្សិតវិទ្យាស្ថានវ៉ាន់ដានៅព្រឹកថ្ងៃទី៣ ខែតុលា ឆ្នាំ២០២២នេះ លើកឡើងថា លោកកំពុងរៀបចំបណ្ណក្រីក្រចំនួនពី៣ ទៅ៤ម៉ឺនបន្ថែមទៀត សម្រាប់ផ្តល់ជនប្រជាជនក្រីក្រ។

លោក ហ៊ុន សែនបញ្ជាក់ថា៖ «ខ្ងុំកំពុងតែរៀបចំ និងរកវិធីបង្កើនចំនួនគ្រូសារមួយចំនួនដែលមានផលប៉ះពាល់ចេញពីកូរីដផង និងអតិផរណាផង។ បន្ថែមគ្រួសារខ្លះថែមទៀត ៣ ទៅ ៤ ម៉ឺនបន្ថែមទៀត […] ដោយប្រជាពលរដ្ឋទទូលបានលុយពិតប្រាកដ ធ្វើបណ្ណធ្វើអីឱ្យគាត់រួចហើយ គាត់ទៅយកពីធនាគារ។ ឯអ្នកមានផ្ទៃពោះទៅពិនិត្យគេឱ្យលុយមកផ្ទះ ពេលឆ្លងទន្លេគេឱ្យលុយទៀត ឆ្លងទន្លេរួចគេឱ្យ១០ដងទៀតទាល់តែកូនអាយុ២ឆ្នាំ»។

លោក ហ៊ុន សែន បន្ថែមទៀតថា លោកនៅតែបន្តចែកបណ្ណក្រីក្រនេះបន្ថែមដល់ប្រជាពលរដ្ឋដែលជួបការលំបាក។

គូរបញ្ជាក់ផងដែរថា បណ្ណក្រីក្រគឺសំដៅដល់ ការប្រើប្រាស់សេវាថែទាំសុខភាពដោយឥតបង់ថ្លៃនៅមូលដ្ឋានសុខាភិបាលសាធារណៈ។ នេះបើយោងតាមគោលការណ៍ណែនាំស្តីពី កញ្ចប់តាវកាលិក និងយន្តការទូទាត់អ្នកផ្តល់សេវារបស់មូលនិធិសមធម៌សម្រាប់គ្រួសារក្រីក្រ របស់ក្រសួងសុខាភិបាល៕

សាន ម៉ាលីនណា (San Malinna) – Newsroom Cambodia

ការថែរក្សា និងការអភិរក្សអង្គរ ជាកាតព្វកិច្ចរបស់កូនខ្មែរទាំងអស់គ្នា

កម្លាំង​ប្រឆាំង​គ្រឿងញៀន​ ​បង្ក្រាប​ករណី​រក្សា​ទុក​ ជួញដូរ​ដោយ​ខុសច្បាប់​នូវ​សារធាតុ​ញៀន​

មន្ត្រី​និយាយ​ថា ការ​ចាប់​ខ្លួន​ទាំង​អស់​មិន​ពាក់ព័ន្ធ​នឹង​ការងារ​សារព័ត៌មាន​ទេ

ពីក្មេងក្រីក្រ ធ្លាប់បោះបង់ការសិក្សា ក្លាយជាបុគ្គលគំរូនៅក្នុងសង្គម

Voxpop: ទស្សនៈប្រជាពលរដ្ឋលើការផ្អាកព្រះរាជពិធីបុណ្យអុំទូកឆ្នាំ​​២០២២

លោក ហ៊ុន សែន ប្រកាស​បង្កើន​បណ្ណ​ក្រីក្រ​​​ដល់​ប្រជាជន​​​​រង​ផល​ប៉ះពាល់​ពីជំងឺ​​កូវីដ និង​អតិផរណា

កម្លាំងប្រឆាំងគ្រឿងញៀន បង្ក្រាបករណីរក្សាទុក ជួញដូរដោយខុសច្បាប់នូវសារធាតុញៀន

មន្ត្រីនិយាយថា ការចាប់ខ្លួនទាំងអស់មិនពាក់ព័ន្ធនឹងការងារសារព័ត៌មានទេ

Voxpop: ទស្សនៈប្រជាពលរដ្ឋលើការផ្អាកព្រះរាជពិធីបុណ្យអុំទូកឆ្នាំ២០២២

លោក ហ៊ុន សែន ប្រកាសបង្កើនបណ្ណក្រីក្រដល់ប្រជាជនរងផលប៉ះពាល់ពីជំងឺកូវីដ និងអតិផរណា