ស៊ាម សុភា (Seam Sophea) – Newsroom Cambodia

ព្រះមហាក្សត្រ និងសម្តេចម៉ែ យាងពីពិនិត្យព្រះរាជសុខភាពនៅទីក្រុងប៉េកាំង ប្រទេសចិនវិញ

ស៊ាម សុភា (Seam Sophea) — Tue, 06 Apr 2021 06:56:39 +0000

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងសម្តេចម៉ែ ព្រះមហាក្សត្រី នរោត្តម មុនីនាថ សីហនុ បានយាងពីទីក្រុងប៉េកាំង ប្រទេសចិនមកប្រទេសកម្ពុជាវិញហើយ នៅរសៀលថ្ងៃចន្ទ។

យោងតាមសារបង្ហោះលើទំព័រហ្វេសប៊ុកផ្លូវការរបស់លោកនាករដ្ឋមន្រ្តីហ៊ុន សែន នៅរសៀលថ្ងៃចន្ទបញ្ជាក់ថា លោក និងភរិយារបស់លោក បានអញ្ជើញទទួលព្រះរាជដំណើរយាងនិវត្តន៍របស់ព្រះមហាក្សត្រ និងសម្តេចម៉ែ យាងពីទីក្រុងប៉េកាំង ប្រទេសចិន នៅរសៀលថ្ងៃទី៥ ខែមេសា ឆ្នាំ២០២១នេះ។

គួរំឮកថា ព្រះមហាក្សត្រ និងព្រះមហាក្សត្រី បានយាងទៅទីក្រុងប៉េកាំង ប្រទេសចិនកាលពីថ្ងៃទី១ ខែមីនា ឆ្នាំ២០២១ គិតត្រឹមរសៀលម្សិលមិញនេះគឺមានចំនួន៣៥ថ្ងៃ ដើម្បីពិនិត្យព្រះរាជសុខភាព៕

ក្រសួងធម្មការបញ្ជាឲ្យវាយរគាំង និងទូងស្គរតាមវត្តអារាមដើម្បីទប់ស្កាត់ការរីករាលដាលជំងឺកូវីដ១៩

ស៊ាម សុភា (Seam Sophea) — Wed, 24 Mar 2021 02:04:18 +0000

ក្រសួងធម្មការ និងសាសនានៅថ្ងៃទី២៣ ខែមីនានេះ បានចេញសារាចណែនាំអំពី ការវាយគង ជួង រគាំង ទូងស្គរ តាមវត្តអារាមនីមួយក្នុងប្រទេសកម្ពុជា ដើម្បីទប់ស្កាត់ការរីករាលដាលនៃជំងឺកូវីដ ១៩ ក្នុងសហគមន៍នៃព្រឹត្តការណ៍ ២០កុម្ភៈ។

សារាចរណែនាំ ដែលចេញផ្សាយដោយក្រសួងធម្មការ និងសាសនា បញ្ជាក់ថា ដោយសារតែស្ថានភាពជំងឺកូវីដ១៩ មានការរាតត្បាតក្នុងសហគមន៍កាន់តែធ្ងន់ធ្ងរឡើង ក្រសួងបានបញ្ជាឲ្យប្រធានមន្ទីធម្មការ និងសាសនារាជធានី ខេត្ត សហការជាមួយព្រះមេគណ និងព្រះអនុគណ ណែនាំទៅគ្រប់វត្តអារាមទាំងអស់នៅទូទាំងប្រទេសកម្ពុជាឱ្យវាយគង រគាំង ជួង ទូងស្គរ ព្រមៗគ្នា។

សារាចរដដែលបន្ថែមថា៖ «ដើម្បីជាសញ្ញាផ្សព្វផ្សាយព័ត៌មានដល់ប្រជាពលរដ្ឋ ពុទ្ធបរិស័ទ ឱ្យបង្កើនការប្រុងប្រយ័ត្ន ដោយអនុវត្តនូវវិធានការ ៣ការពារ និង ៣កុំ របស់ប្រមុខរាជរដ្ឋាភិបាល និងតាមការណែនាំរបស់ក្រសួងសុខាភិបាល»។

ចំពោះការវាយគង រគាំង ជួង ទូងស្គរនេះ ត្រូវធ្វើឡើងក្នុងមួយថ្ងៃ ប្រាំដង តាមពេលវេលាដែលបានកំណត់ដូចជា លើកទី១ នៅម៉ោង ៥:០០ នាទីព្រឹក លើកទី២ នៅម៉ោង ១១:០០ នាទីព្រឹក លើកទី៣ នៅម៉ោង ២:០០ នាទីរសៀល លើកទី៤ នៅម៉ោង ៥:០០ នាទីល្ងាច និងលើកទី៥ នៅម៉ោង ៨:០០ នាទីយប់ ហើយត្រូវធ្វើជាប្រចាំរហូតដល់ចប់ព្រឹត្តិការណ៍ ២០កុម្ភៈ ៕

ក្នុងរយៈពេលមួយថ្ងៃមានមនុស្សពីរនាក់ស្លាប់ដោយសារជំងឺកូវីដ១៩ នៅកម្ពុជា

ស៊ាម សុភា (Seam Sophea) — Sat, 20 Mar 2021 04:21:11 +0000

នៅថ្ងៃសុក្រទី១៩ ខែមីនា កម្ពុជាមានអ្នកបាត់បង់អាយុជីវិតដោយសារជំងឺកូវីដ១៩ ចំនួន២នាក់ ម្នាក់ជាស្រ្តីអាយុ៦២ឆ្នាំ និងម្នាក់ទៀតជាបុរសអាយុ៤៦ឆ្នាំ។ នេះបើតាមសេចក្ដីប្រកាសព័ត៌មានរបស់ក្រសួងសុខាភិបាល។

សេចក្ដីប្រកាសរបស់ក្រសួងសុខាភិបាល ចេញផ្សាយកាលពីល្ងាចថ្ងៃទី១៩ ខែមីនា បានឱ្យដឹងថា មានស្រ្តីជនជាតិខ្មែរម្នាក់ទៀតហើយបានទទួលមរណៈភាព ដោយសារជំងឺកូវីដ ១៩ នៅឯមន្ទីរពេទ្យមិត្តភាពខ្មែរ-សូវៀត នៅវេលាម៉ោង ១១ និង ៤៥នាទីព្រឹក ។

សេចក្ដីប្រកាសដដែលបានបន្ថែមថា៖ «ស្រ្តីវ័យ៦២ឆ្នាំរូបនេះ បានចូលសម្រាកព្យាបាលនៅមជ្ឈមណ្ឌលជាតិកំចាត់រោគរបេង នៅថ្ងៃទី១០ មីនា ឆ្នាំ២០២១ ដោយសាររកឃើញមានវិជ្ជមានកូវីដ១៩ ដោយមានលទ្ធផលវិភាគទទួលបានពីវិទ្យាស្ថានប៉ាស្ទ័រកម្ពុជានៅថ្ងៃដដែល»។

ចំណែកសេចក្ដីប្រកាសព័ត៌មានមួយទៀតរបស់ក្រសួងសុខាភិបាល ចេញនៅថ្ងៃទី១៩ ខែមីនា ដដែលបញ្ជាក់ថា បុរសជនជាតិខ្មែរ អាយុ៤៦ឆ្នាំ មានអាសយដ្ឋាននៅសង្កាត់បឹងសាឡាង ខណ្ឌទួលគោក រាជធានីភ្នំពេញ បានស្លាប់បាត់បង់អាយុជីវិតដោយសារជំងឺកូវីដ ១៩ នាថ្ងៃទី១៩ ខែមីនា ឆ្នាំ២០២១ វេលាម៉ោង ១៥ និង៣០នាទីរសៀល។

សេចក្ដីប្រកាសព័ត៌មាននោះបញ្ជាក់ថា៖ «ការពិនិត្យសុខភាព និងការថតសួត បានបង្ហាញថា គាត់មានរលាកសួតទាំងសងខាងធ្ងន់ធ្ងរក្រោយពេលក្រុមគ្រូពេទ្យបានព្យាយាមព្យាបាលបុរសខាងលើនេះដោយប្រើប្រាស់ម៉ាស៊ីនជំនួយដង្ហើម ដាក់ទុយោក្នុងបំពង់ខ្យល់ និងជំនួយការផ្ដល់អុកស៊ីហ្សែនជាដើម តែជាអកុសល ក្រុមជួយសង្គ្រោះនៅតែមិនអាចសង្គ្រោះអាយុជីវិតបុរសរូបនេះបានឡើយ»។

គួរបញ្ជាក់ថា ស្រ្តីដែលមានអាយុ៦២ឆ្នាំ ស្លាប់ដោយសារជំងឺកូវីដ១៩ គឺជាភរិយារបស់អ្នកចម្រៀងជើងចាស់ ហួរ ឡាវី និងជាម្តាយរបស់ កញ្ញា វី ឌីណែត តារាចម្រៀងប្រចាំផលិតកម្មហង្សមាស ដែលកញ្ញាកំពុងសម្រាកព្យាបាលជំងឺកូវីដ១៩ផងដែរ។

កញ្ញា វី ឌីណែត តារាចម្រៀងប្រចាំផលិតកម្មហង្សមាស បានបង្ហាញសំណេរលើបណ្ដាញសង្គមហ្វេសប៊ុកក្រោយពេលដឹងថាម្ដាយរបស់ខ្លួនបានបាត់បង់អាយុជីវិតដូច្នេះថា៖ «ខ្ញុំលែងមានម៉ាក់ហៅហើយ សូមម៉ាក់ទៅឱ្យបានសុខ ម៉ាក់កុំបារម្ភណាកូននឹងនៅមើលថែប៉ា និងអ្នកផ្ទះយើង កូននឹងរឹងមាំ»។

ជាមួយគ្នានោះដែរ លោក ហួរ ឡាវី ឪពុកបង្កើតរបស់កញ្ញា វី ឌីណែត ក៏បានរៀបរាប់សារ ចំពោះការបាត់បង់ភរិយារបស់ខ្លួនលើបណ្ដាញសង្គមហ្វេសប៊ុកដូចនេះថា៖ «អូនអើយសូមអូនវិលត្រឡប់មកផ្ទះវិញមក ប្តីអង្គុយចាំមើលផ្លូវប្រពន្ធទាំងទឹកភ្នែក តស៊ូឡើងអូន សាធុ សាធុ សាធុ»។

កាលពីថ្ងៃទី១១ ខែមីនា ឆ្នាំ២០២១ មានបុរសជនជាតិខ្មែរម្នាក់អាយុ៥០ឆ្នាំ រស់នៅសង្កាត់ចាក់អង្រែ ខណ្ឌមានជ័យ ដោយសារជំងឺកូវីដ១៩៕

កងទ័ពកម្ពុជាម្នាក់ទៀតវិជ្ជមានកូវីដ ១៩ ក្រោយចាក់វ៉ាក់សាំងបង្ការលើកទី២

ស៊ាម សុភា (Seam Sophea) — Fri, 19 Mar 2021 03:29:54 +0000

កងទ័ពកម្ពុជាម្នាក់ទៀតហើយបានឆ្លងជំងឺកូវីដ ១៩ ក្រោយពេលទទួលបានការចាក់វ៉ាក់សាំងបង្ការជំងឺកូវីដរួចរាល់ជាលើកទី២ នៅឯមន្ទីពេទ្យព្រះកេតុមាលា កាលពីថ្ងៃពុធ ទី១៧ ខែមីនា ឆ្នាំ២០២១។

យោងតាមប្រសាសន៍របស់លោក ទៀ បាញ់ រដ្ឋមន្ត្រីក្រសួងការពារជាតិកម្ពុជា ដែលបានប្រាប់ Newsroom
Cambodia នៅថ្ងៃព្រហស្បតិ៍ ទី១៧ មីនា គិតមកទល់នឹងពេលនេះមានកងទ័ពចំនួន ៤នាក់ហើយ
ដែលបានឆ្លងជំងឺកូវីដ ១៩ ។ ហើយសុខភាពរបស់ពួកគេទាំងអស់នោះនូវមានសភាពល្អធម្មតា។

បុរសជាកងទ័ពគឺជាជនទីបួន ដែលមានវិជ្ជមានជំងឺកូវីដ ១៩ ក្រោយពេលចាក់វ៉ាក់សាំងការពារជំងឺកូវីដ ១៩ ស៊ីណូហ្វាមរបស់ប្រទេសចិនជាលើកទី២ រួចមក។ លោក ទៀ បាញ់ បានបន្ថែមថា៖ «ក្នុងចំណោមហ្នឹង គឺវា អឺ..គាត់នុងឯង រាប់ទាំងគាត់ហ្នឹង គឺវាបួន»។

លោកវង់ ឡៃ មេភូមិក្រពើហាកើត ក្នុងក្រុងតាខ្មៅ បានមានប្រសាសន៍ថា លោកបានដឹងរឿងនេះ គាត់គឺជាអ្នកជិតខាង ហើយគាត់ត្រូវបានពេទ្យយកទៅហើយ។

គូសបញ្ជាក់ផងដែរថា ចាប់តាំងពីថ្ងៃបើកយុទ្ធនាការចាក់វ៉ាក់សាំងការពារជំងឺកូវីដ ១៩ ពីថ្ងៃទី ១០កុម្ភៈ
ដល់ថ្ងៃទី ១៥មីនា ឆ្នាំ២០២១ ដល់ថ្នាក់ដឹកនាំ នាយទាហាន នាយទាហានរង និងពលទាហានបណ្តាកងឯកភាពទ័ព និងកងកម្លាំងប្រដាប់អាវុធនៅតំបន់ព្រំដែន កើនដល់ចំនួន ១០៩.១៥៣នាក់ ខណៈចាក់លើក ទី២ បានចំនួន ៤៩.០១២នាក់ នេះបើតាមការចេញផ្សាយដោយក្រសួងការពារជាតិ៕

ភ្ញៀវទេសចរជិះទូកកម្សាន្តធ្លាក់ចុះដោយសារការីករាលដាលជំងឺកូវីដ១៩

ស៊ាម សុភា (Seam Sophea) — Thu, 18 Mar 2021 05:30:53 +0000

អ្នកប្រកបរបររកស៊ីដឹកភ្ញៀវទេសចរជិះទូកលេងកម្សាន្តនៅតាមដងទន្លេសាប និងទន្លេមេគង្គក្នុងរាជធានីភ្នំពេញ បានត្អូញត្អែរអំពីការបាត់បង់ភ្ញៀវទេសចរមកជិះទូកកម្សាន្ត ដោយសារការផ្ទុះឆ្លងរាលដាលជំងឺកូវីដ១៩ ក្នុងសហគមន៍ជាលើកទីបី។

លោក រិន ណារ៉ាន់ ម្ចាស់ទូកទេសចរណ៍ឈ្មោះចំការស្នេហ៍បានប្រាប់សារព័ត៌មាន Newsroom Cambodia ឱ្យដឹងកាលពីល្ងាចថ្ងៃទី១៧ ខែមីនា ឆ្នាំ២០២១នេះថា ក្រោយមានការផ្ទុះឡើងនៃជំងឺកូវីដ១៩ក្នុងសហគមន៍ជាលើកទីបីមក កំណើនភ្ញៀវទេសចរជាតិ និងអន្តរជាតិមកជិះទូកលេងកម្សាន្តបានថយចុះជាខ្លាំង បើធៀបទៅនឹងព្រឹត្តិការណ៍សហគមន៍មុនៗ ។

លោកបញ្ជាក់ថា៖ «បើសិនជាភ្ញៀវជាតិយើង គឺថយតាមព្រឹត្តិការណ៍ ពេលណារាងបានធូរស្បើយមានការកើនឡើងវិញ ពេលណាស្ថានការណ៍ធ្ងន់ធ្ងរគឺស្ងាត់ ដូចដំណាក់កាលចុងក្រោយនេះ ថ្ងៃទី២០ កុម្ភៈហ្នឹង គឺស្ងាត់មែនទែនតែម្ដង»។

ព្រះតេជគុណ យាន សុខគីម ជាព្រះសង្ឃមួយអង្គគង់ក្នុងវត្តឧណ្ណាលោម រាជធានីភ្នំពេញ មានសង្ឃដីកាថា ជាញឹកញាប់ព្រះសង្ឃអង្គចូលចិត្តនិមន្តជិះទូកលេងកម្សាន្ត មុនពេលការផ្ទុះឡើងនៃជំងឺកូវីដ១៩ ក្នុងសហគមន៍ជាលើកទីបី ។ ប៉ុន្តែព្រះអង្គថា ក្រោយការផ្ទុះការឆ្លងជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈមក លោកម្ចាស់ សុខគីម បានកាត់បន្ថយការនិមន្តជិះទូកកម្សាន្តដូចសព្វដង ដោយសារព្រះអង្គព្រួយបារម្ភចំពោះការរីករាលដាលក្នុងសហគមន៍នេះ។

ព្រះអង្គបានលើកឡើងថា៖ «កូណាអង្គុយគិតដែរថា បើថា បើឆ្លងសហគមន៍អីចឹងប្រហែលជាមិនមែនតិចទេ ប្រហែលអាចនឹងបែកទៅច្រើនៗទៀត ចេះតែអង្គុយបារម្ភ»។ គិតត្រឹមថ្ងៃព្រហស្បតិ៍ ទី១៧ ខែមីនា ឆ្នាំ២០២១នេះ ព្រឹត្តិការណ៍ឆ្លងក្នុងសហមគន៍ ២០កុម្ភៈ មានចំនួន២៦ថ្ងៃហើយ ដែលក្នុងនោះអ្នកឆ្លងសរុបមានចំនួន៩៩០នាក់ អ្នកព្យាបាលជាសះស្បើយមានចំនួន៣៤០នាក់ នេះបើតាមការចេញផ្សាយរបស់ក្រសួងសុខាភិបាលកម្ពុជា៕

រដ្ឋបាលខេត្តក្រចេះផ្អាកការរៀបចំកម្មវិធីមង្គលការ ពិធីបុណ្យ និងពិធីជួបជុំផ្សេងៗ ជាវិធានការរាំងខ្ទប់កូវីដ

ស៊ាម សុភា (Seam Sophea) — Tue, 16 Mar 2021 08:33:11 +0000

រដ្ឋបាលខេត្តក្រចេះ បានជម្រាបជូនសាធារណជន និងបងប្អូនប្រជាពលរដ្ឋក្នុងខេត្តទាំងអស់ឲ្យផ្អាកជាបណ្ដោះអាសន្ននូវការរៀបចំកម្មវិធីមង្គលការ ពិធីបុណ្យ និងពិធីជួបជុំផ្សេងៗ នៅថ្ងៃទី១៥ ខែមីនា ឆ្នាំ២០២១។

យោងលើសេចក្ដីជូនដំណឹងរបស់រដ្ឋបាលខេត្តក្រចេះបានឱ្យដឹងថាដូច្នេះថា «ស្ថិតក្នុងស្ថានភាពបែបនេះ រដ្ឋបាលខេត្តក្រចេះ សូមធ្វើការផ្អាកជាបណ្ដោះអាសន្ននូវការរៀបចំពិធីអាពាហ៍ពិពាហ៍ ពិធីបុណ្យ និងពិធីជួបជុំផ្សេងៗ ដែលមានលក្ខណៈប្រមូលផ្ដុំមនុស្សច្រើននៅតាមមូលដ្ឋានក្រុង ស្រុក ឃុំ សង្កាត់ និងភូមិទូទាំងខេត្ត
ចាប់ពីថ្ងៃជូនដំណឹងនេះតទៅ»។

លិខិតដដែលបានបន្ថែមថា រដ្ឋបាលខេត្តនឹងបើកឱ្យដំណើរការជាធម្មតាឡើងវិញ នៅពេលដែលស្ថានភាពព្រឹត្តការណ៍សហគមន៍ ២០កុម្ភៈ ត្រូវបានបញ្ចប់ នឹងមានការជូនដំណឹងជាថ្មីពីរដ្ឋបាលខេត្តនេះផ្ទាល់។

«ដោយសារទូទាំងប្រទេសមានការរីករាលដាល ដូច្នេះហើយដើម្បីជាវិធានការ យើងរាំងខ្ទប់ឱ្យហើយទៅ
កុំឱ្យវាកើតហើយទើបទៅព្យាបាល វាពិបាក» នេះជាសំដីលោក វ៉ា ថន អភិបាលខេត្តក្រចេះ ថ្លៃងប្រាប់ Newsroom Cambodia។

«បើសិនជាគាត់យល់ដឹង វាត្រូវតែការហ្អើយ ព្រោះកូនដល់វេលាហ្អើយ គ្រាន់តែសម្រួលតូចតាចទៅ យើងចាំជួបលៀងពេលក្រោយអីទៅក៏វាមិនខុសអីដែរ» ។

លោកក៏បានបន្ថែមថា ក្នុងករណីដែលមិនអាចចៀសវាងបានសម្រាប់បងប្អូនប្រជាពលរដ្ឋក្នុងការប្រារព្ធកម្មវិធីផ្សេងៗ បងប្អូនអាចធ្វើជាលក្ខណៈទ្រង់ទ្រាយតូច ឬលក្ខណៈគ្រួសារ ហើយចាំរៀបចំធំដុំឡើងវិញនៅពេលស្ថានភាពកូវីដ ១៩ វិលមករកសភាពធម្មតាវិញក៏បាន។

សេចក្ដីជូនដំណឹងដដែលនោះក៏បានបន្ថែមថា «រដ្ឋបាលខេត្តក្រចេះ សង្ឃឹមយ៉ាងមុតមាំថា សាធារណជន
និងបងប្អូនប្រជាពលរដ្ឋទាំងអស់ យោគយល់ អធ្យាស្រ័យ និងសូមចូលរួមអនុវត្តដោយស្មារតីទទួលខុសត្រូវខ្ពស់»។

គួរំឮកដែរថា គិតត្រឹមថ្ងៃទី១៦ ខែមីនា ឆ្នាំ២០២១នេះ អ្នកឆ្លងសរុបក្នុងព្រឹត្តិការណ៍សហគមន៍ ២០កុម្ភៈ មានចំនួន ៩១៥នាក់ និងអ្នកដែលបានជាសះស្បើយមានចំនួន ៣១៩នាក់។ នេះយោងតាមក្រសួងសុខាភិបាល៕

សម្តេចព្រះមហាសង្ឃរាជ និងសម្តេចព្រះសង្ឃនាយកនៃព្រះរាជាណាចក្រកម្ពុជា ទទួលចាក់វ៉ាក់សាំងបង្ការជំងឺកូវីដ ១៩

ស៊ាម សុភា (Seam Sophea) — Fri, 12 Mar 2021 09:06:58 +0000

សម្តេចមហាសង្ឃរាជាធិបតីទេព វង្ស និងសម្តេចព្រះមហាសុមេធាធិបតីនន្ទ ង៉ែត បានយាងដឹកនាំ
សម្តេចព្រះសង្ឃនាយករង សម្តេចព្រះសង្ឃ និងព្រះរាជាគណៈគ្រប់ឋានានុក្រម ចាក់វ៉ាក់សាំងបង្ការជំងឺកូវីដ ១៩ នៅមន្ទីរពេទ្យកាល់ម៉ែត នៅថ្ងៃទី១១ ខែមីនា ឆ្នាំ២០២១។

យោងទៅលើគេហទំព័រហ្វេសប៊ុកផ្លូវការរបស់លេខាធិការដ្ឋានគណៈសង្ឃនាយក សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិតទេព វង្ស សម្តេចព្រះមហាសង្ឃរាជ និងសម្តេចព្រះមហាសុមេធាធិបតី កិត្តិឧទ្ទេសបណ្ឌិតនន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា ព្រមទាំងសម្តេចព្រះសង្ឃនាយករង សម្តេចព្រះសង្ឃ និងព្រះរាជាគណៈគ្រប់ឋានានុក្រម យាងនិងនិមន្តចាក់វ៉ាក់សាំងបង្ការជំងឺកូវីដ ១៩។

នេះគឺជាលើកដំបូងហើយចាប់តាំងពីវ៉ាក់សាំងរបស់ចិនស៊ីណូហ្វាម (Sinopharm) និងវ៉ាក់សាំងអាស្ត្រា
ហ្សេណេកា (Astra Zeneca) របស់ចក្រភពអង់គ្លេស បានមកដល់ប្រទេសកម្ពុជា ដែលសម្តេចព្រះមហាសង្ឃរាជនិងសម្តេចព្រះសង្ឃនាយកនៃព្រះរាជាណាចក្រកម្ពុជា និមន្តយាងមកទទួលចាក់វ៉ាក់សាំងនេះ៕

Voxpop: គុណសម្បត្តិ និងគុណវិបត្តិរបស់សិស្សវិទ្យាល័យជុំវិញការសិក្សាតាមអនឡាញ

ស៊ាម សុភា (Seam Sophea) — Thu, 11 Mar 2021 11:05:13 +0000

ការរាតត្បាតនៃជំងឺកូវីដ១៩ បានបង្ខំឱ្យប្រព័ន្ធអប់រំនៅកម្ពុជាចាំបាច់ត្រូវបន្តការសិក្សាពីចម្ងាយ និងការសិក្សាតាមប្រព័ន្ធអេឡិចត្រូនិច ឬអនឡាញ។ ក៏ប៉ុន្តែការសិក្សាតាមអនឡាញនេះធ្វើឱ្យសិស្សានុសិស្សមួយចំនួនហាក់មានភាពលំបាកជាខ្លាំងក្នុងការក្រេបជញ្ជក់យកចំណេះដឹងពីសំណាក់លោកគ្រូ អ្នកគ្រូ។

នៅថ្ងៃទី១១ ខែមីនា ឆ្នាំ២០២១ សិក្ខាកាមសារព័ត៌មាន Newsroom Cambodia បានសម្ភាសន៍សិស្សានុសិស្ស និងនិស្សិតមួយចំនួនអំពីការយល់ឃើញទៅលើ «ការសិក្សាតាមប្រព័ន្ធអេឡិចត្រូនិច ឬអនឡាញ ថាតើមានផលលំបាក និងផលចំណេញអ្វីខ្លះតាមរយៈការសិក្សាពីចម្ងាយនេះ»។

សិស្សានុសិស្ស និងនិស្សិត ដែលត្រូវបានសម្ភាសដោយសារព័ត៌មាន Newsroom Cambodia បានលើកឡើងអំពីការសិក្សាតាមប្រព័ន្ធអេឡិចត្រូនិច ឬអនឡាញនេះផ្សេងៗពីគ្នា។

ឆេង សាវតី

យុវតី ឆេង សាវតី ជាយុវសិស្សវិទ្យាល័យមួយស្ថិតនៅជាយក្រុងភ្នំពេញមួយ វតី មានដើមកំណើតនៅឃុំតាម៉ៅ ស្រុកព្រែកប្រសព្វ ខេត្តក្រចេះ។ ទៅថ្ងៃអនាគត វតីចង់ក្លាយទៅជាវិជ្ជបណ្ឌិតដែលមានក្រមសីលធម៌ និងមានវិជ្ជាជីវៈច្បាស់លាស់ម្នាក់ តាមរយៈការជ្រើសរើសសិក្សាផ្នែកវិទ្យាសាស្ត្រពិត។ សាវតី យល់ឃើញថា រវាងការសិក្សាផ្ទាល់នៅសាលា និងសិក្សាតាមប្រព័ន្ធអេឡិចត្រូនិច ឬអនឡាញ គឺសិក្សានៅសាលាផ្ទាល់មានភាពល្អប្រសើរជាង ព្រោះងាយស្រួលសួរគ្រូនៅពេលដែលមិនយល់ពីមេរៀន ។

យុវតី រូបនេះក៏បានបន្ថែមថា៖ «លោកគ្រូអ្នកគ្រូត្រូវពន្យល់មួយៗ បង្រៀនធ្វើយ៉ាងណាឱ្យសិស្សដែលរៀនខ្សោយទៅជាមធ្យម មធ្យមទៅល្អបង្គួរ ល្អបង្គួរទៅល្អ ល្អទៅល្អឥតខ្ចោះ»។ ជាមួយគ្នានោះដែរ វតីចង់ឱ្យលោកគ្រូអ្នកគ្រូដាក់កិច្ចការផ្ទះឱ្យសិស្សធ្វើជារៀងរាល់ថ្ងៃ ដើម្បីពង្រឹងសមត្ថភាពរបស់សិស្ស កំឡុងពេលសិក្សាតាមប្រព័ន្ធអេឡិចត្រូនិច ឬអនឡាញនេះ»។

ជាសំណូមពរ សាវតី ចង់ឱ្យក្រសួងអប់រំ បើកឱ្យមានការប្រឡងសញ្ញាបត្រទុតិយភូមិ ឬបាក់ឌុប និងមាននិទ្ទេសធម្មតាឡើងវិញក្នុងឆ្នាំសិក្សា២០២១ខាងមុខនេះ ព្រោះដើម្បីងាយស្រួលដាក់អាហាររូបករណ៍ និងដឹងពីសមត្ថភាពរបស់ខ្លួនផងដែរ។

ស៊ឺយ សុជា

ស៊ឺយ សុជា ជាយុវសិស្សវិទ្យាល័យព្រះស៊ីសុវត្ថិ រាជធានីភ្នំពេញ សុជា មានដើមកំណើតនៅស្រុកស្ទោង ខេត្តកំពង់ធំ ហើយបច្ចុប្បន្នយុវសិស្សរូបនេះស្នាក់នៅជាមួយបងប្អូនក្បែរសាលារបស់គេផ្ទាល់ ទៅថ្ងៃអនាគត យុវសិស្សរូបនេះចង់ក្លាយជាអ្នកព័ត៌មានវិទ្យាមានឥទ្ធិពលក្នុងប្រទេសកម្ពុជាម្នាក់ តាមរយៈការជ្រើសរើសសិក្សាផ្នែកវិទ្យាសាស្ត្រពិត។

យុវសិស្សរូបនេះលើកឡើងថា ការពារការឆ្លងជំងឺកូវីដ១៩ ជារឿងសំខាន់បំផុត កំឡុងពេលសិក្សាតាមអនឡាញ ព្រោះការទៅរៀនផ្ទាល់នៅសាលាយើងតែងតែមានការពិក្សាជាមួយមិត្តភក្តិ ដែលជាហេតុធ្វើឱ្យមានការប្រមូលផ្តុំគ្នាច្រើន ។

សុជាបន្ថែមថា៖ «ចំណេញពេលវេលាច្រើន និងកាត់បន្ថយចំណាយទៅលើការជិះកង់បី ឬ Pass App»។

យុវជនដែលមានសម្បុរស្រអែម រាងខ្ពស់ស្រឡះរូបនេះ បានចូលរួមជាគំនិតដូចនេះថា ប្រសិនបើយើងចង់ឱ្យការរៀនតាមអនឡាញមានប្រសិទ្ធភាព៖ «យើងត្រូវតែស្វែងរកកន្លែងដែលសម្បូរអ៊ីនធឺណេត ព្យាយាមស្តាប់គ្រូពន្យល់ដោយយកចិត្តទុកដាក់ និងស្វែងរកកន្លែងណាដែលមិនមានសម្លេងរំខាន»។

ភឿន ផាន់នី

កញ្ញា ភឿន ផាន់នី ជានិស្សិតថ្នាក់ឆ្នាំមូលដ្ឋាននៃសាកលវិទ្យាល័យមួយក្នុងរាជធានីភ្នំពេញ។ និស្សិតរូបនេះមានដើមកំណើតក្នុងឃុំចំបក់ ស្រុកព្រែកប្រសព្វ ខេត្តក្រចេះ ទៅថ្ងៃអនាគត ផាន់នី ចង់ក្លាយទៅជាគ្រូបង្រៀនលើមុខវិជ្ជាភាសាខ្មែរម្នាក់ ។

មានសម្បុរស្រអែម កែវភ្នែកធំៗ ផាន់នី គឺជានិស្សិតថ្មីថ្មោងម្នាក់ទើបប្រឡងជាប់សញ្ញាបត្របាក់ឌុប ឬសញ្ញាបត្រទុតិយភូមិ ដោយក្រសួងតម្រូវឱ្យជាប់ដោយស្វ័យប្រវត្តិ និងមិនមាននិទ្ទេស។ តាមរយៈការសិក្សានៅថ្នាក់មហាវិទ្យាល័យកន្លងមក និស្សិតរូបនេះក៏ធ្លាប់ត្រូវបានគេរើសអើង និងមិនសូវឱ្យតម្លៃពីសំណាក់មិត្តភក្តិមួយចំនួនខ្លះផងដែរ។

កញ្ញា ភឿន ផាន់នី យល់ឃើញដូចទៅនឹងអ្វីដែលយុវសិស្ស ឆេង សាវតី លើកឡើងដែរ ដែលថា នៅក្នុងឆ្នាំ២០២១ ខាងមុខនេះ «ខ្ញុំចង់ឃើញក្រសួងបើកឱ្យមានការប្រឡងថ្នាក់ជាតិជាធម្មតាឡើងវិញ»។

សេត ស៊ីរ៉ា

កញ្ញា សេត ស៊ីរ៉ា ជានិស្សិតឆ្នាំទី២ នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច សិក្សាលើជំនាញរដ្ឋបាលអប់រំ។ ស៊ីរ៉ា ជានិស្សិតប្រឡងជាប់សញ្ញាបត្របាក់ឌុប មុនមួយឆ្នាំនៃការអនុញាតិឱ្យសិស្សទាំងអស់សិក្សាក្នុងឆ្នាំ ២០២០-២០២១ ជាប់ដោយស្វ័យប្រវត្តិ ។

យុវនិស្សិត សេត ស៊ីរ៉ា យល់ឃើញថា តាមរយៈក្រសួងអប់រំ អនុញ្ញាតឱ្យសិស្សថ្នាក់ទី១២ទាំងអស់ ជាប់ដោយស្វ័យប្រវត្តិ និងគ្មាននិទ្ទេសបែបនេះ វាជាផលវិជ្ជមានសម្រាប់សិស្សានុសិស្សមួយចំនួនផងដែរដូចជា មិនខាតពេលវេលាច្រើន អាចមានឱកាសក្នុងការរៀនបន្តទៀតជាដើម។

បន្ថែមពីការយល់ឃើញរបស់ស៊ីរ៉ា យុវនិស្សិតរាងស្តើង សម្បុរសណ្ដែកបាយរូបនេះក៏បានជជំរុញលើកទឹកចិត្តប្អូនៗសិស្សានុសិស្សជំនាន់ក្រោយគិតគូរលើមុខជំនាញ ឬចំណង់ដែលខ្លួនចង់បន្តសិក្សានៅថ្នាក់មហាវិទ្យាល័យផងដែរ។

កញ្ញាលើកឡើងថា៖ «ការជ្រើសរើសជំនាញហ្នឹង វាជារឿងមួយដ៏សំខាន់ក្នុងការសិក្សាសម្រាប់សិស្សនិស្សិតជៀសវាងការមានវិប្បដិសារីនៅថ្ងៃក្រោយ»៕

Q & A: ការកែប្រែវិបត្តិជំងឺកូវីដ១៩ទៅជាឱកាស តាមរយៈការបង្រៀនសិស្សតាមអនឡាញ

ស៊ាម សុភា (Seam Sophea) — Fri, 05 Mar 2021 08:08:53 +0000

លោកម្ចាស់ព្រឿង ថូយ ជាអតីតសមណសិស្សនៃពុទ្ធិកវិទ្យាល័យព្រះសុរាម្រឹត (ក្រុងភ្នំពេញ) ដែលបានបញ្ចប់ថ្នាក់មធ្យមសិក្សាទុតិយភូមិកាលពីឆ្នាំ២០១៥។ លោកម្ចាស់បានជាប់អាហារូបករណ៍និមន្តទៅសិក្សាផ្នែកព្រះពុទ្ធសាសនា នៅពុទ្ធិកមហាវិទ្យាល័យសិង្ហបុរី (Buddhist College of Singapore) ប្រទេសសិង្ហបុរី កាលពីចុងឆ្នាំ២០១៦។

សព្វថ្ងៃនេះលោកម្ចាស់ ព្រឿង ថូយ គង់នៅវត្តឧណ្ណាលោម រាជធានីភ្នំពេញ។ ហើយក៏កំពុងជួយបង្រៀនភាសាអង់គ្លេសថ្នាក់ដំបូង (Headway for Beginner) ដល់ប្អូនៗដែលមករៀនផ្ទាល់ និងរៀនតាមប្រព័ន្ធអនឡាញ (Online) ។

Q: តើមានកត្តាអ្វីខ្លះជំរុញទឹកចិត្តលោកគ្រូ ក្នុងការចែករំលែកចំណេះដឹង ក៏ដូចជាបង្រៀនលើបណ្ដាញសង្គម ក្នុងបរិបថកូវីដ១៩នេះ?

A: ការបង្រៀន គឺជាកិច្ចការដែលខ្ញុំករុណាស្រឡាញ់។ ហើយកត្ដាដែលជំរុញឱ្យខ្ញុំករុណាចែករំលែក និងបង្រៀននៅលើបណ្ដាញសង្គម។ ទីមួយ ជាពេលដែលខ្ញុំករុណាមានវិស្សមកាល សម្រាកពីការសិក្សាផ្ទាល់ខ្លួន។ ទីពីរ ដោយយល់ឃើញថា ពេលនេះជាពេលដែលប្អូនៗសិស្សានុសិស្សខ្មែរយើងមានពេលវេលាច្រើនសិក្សានៅលើអនឡាញ ព្រោះពួកគាត់ត្រូវបានណែនាំឱ្យរៀនពីចម្ងាយនៅផ្ទះដោយខ្លួនឯងក្នុងអំឡុងពេលកូវីដនេះ។ ម្យ៉ាងវិញទៀត ឆ្លៀតក្នុងឱកាសដែលយើងមិនអាចចេញទៅក្រៅបានច្រើន ដូចនេះការផ្ដល់ចំណេះដឹង និងរៀនសូត្រតាមបណ្ដាញសង្គម ឬអ៊ីនធឺណេតនេះគឺជាឱកាស និងជាវិធីសាស្ត្រមួយដ៏សំខាន់ដែលយើងគួរមាន។ ទាំង៣ខាងលើនេះ ជាកត្ដាចម្បងជំរុញទឹកចិត្តឱ្យខ្ញុំករុណាបើកបង្រៀន និងចែករំលែកនៅលើបណ្ដាញសង្គមរហូតមកដល់សព្វថ្ងៃនេះ។

Q: តើវាមានផលប្រយោជន៍ និងផលលំបាកអ្វីខ្លះចំពោះលោកគ្រូក្នុងការបង្រៀនតាមប្រព័ន្ធអនឡាញ?

A: និយាយអំពីផលប្រយោជន៍ គឺខ្ញុំករុណាមិនទទួលបានអ្វីនោះទេ។ ព្រោះថ្នាក់រៀនដែលករុណាកំពុងបង្រៀននេះ គឺផ្ដល់ជូនដោយមិនគិតថ្លៃទេ។ តែវាជារឿងមួយដែលខ្ញុំករុណា សប្បាយចិត្ត ព្រោះឃើញមានប្អូនៗជាច្រើន មានការចាប់អារម្មណ៍នៅក្នុងការរៀនសូត្រ ដោយពួកគាត់មិនទុកពេលវេលាចោល។ នៅពេលដែលគាត់ខំប្រឹងរៀន មិនថារៀននៅថ្នាក់ផ្ទាល់ ឬរៀនតាមអនឡាញក៏ដោយ គាត់នឹងទទួលបានចំណេះដឹងដូចគ្នា។ ចំណែកភាពលំបាកដែលករុណាមាន នៅពេលដែលបង្ហាត់អនឡាញនោះមានមួយចំនួនដូចជា ការឆ្លើយឆ្លងជាមួយសិស្ស ឬអ្នកសិក្សា ព្រោះយើងនៅឆ្ងាយពីគ្នា។ ហើយការបង្រៀនត្រូវចំណាយពេលច្រើន ទាំងពេលបង្រៀន និងចប់ម៉ោង ដោយយើងត្រូវចំណាយពេលចែករំលែក និងឆ្លើយសំណួរមួយចំនួនដែលសិស្សសាកសួរមកទៀត។ ភាពលំបាកមួយទៀតនោះ ដោយសារថ្នាក់ដែលខ្ញុំករុណាបង្រៀននេះជាថ្នាក់បង្រៀនទូទៅ ដូច្នេះសិស្សដែលចូលរៀនមានកម្រិតនៃការយល់ដឹងផ្សេងគ្នា ដែលជាហេតុអ្វីឱ្យលំបាកក្នុងការចែករំលែកឱ្យបានតាមតម្រូវការរបស់ពួកគាត់។

Q. បើតាមការសង្កេត និងការយល់ឃើញរបស់លោកគ្រូ តើសិស្សដែលរៀនតាមប្រព័ន្ធអនឡាញអាចចាប់បានកម្រិតណា ហើយអ្វីជាបញ្ហាដែលពួកគាត់តែងប្រឈម?

A: សម្រាប់ករុណាដែលជាអ្នកបង្រៀនផ្ទាល់យល់ថា សិស្សដែលរៀនតាមអនឡាញទទួលបានចំណេះដឹងមិនខុសទៅនឹងអ្វីដែលពួកគាត់មករៀននៅក្នុងថ្នាក់នោះទេ។ ព្រោះអ្វីដែលជាការបង្រៀន គឺយើងផ្ដល់ឱ្យដូចគ្នា ឬល្អជាងការមករៀនផ្ទាល់ខ្លះផងក៏មាន។ តែអ្វីដែលជាបញ្ហាសម្រាប់ពួកគាត់នោះ ទីមួយ គឺប្រព័ន្ធអ៊ីនធឺណេត។ សិស្សមួយចំនួនរស់នៅតាមបណ្ដាខេត្ត ហើយសិស្សខ្លះនៅឆ្លាយពីទីប្រជុំជនដែលធ្វើឱ្យសេវាទូរស័ព្ទមិនសូវល្អ។ មួយទៀត ការមិនចូលរួមពីឪពុកម្ដាយ ដែលពេលខ្លះពួកគាត់អាចរវល់ជួយកិច្ចការងារផ្ទះជាដើម។ ហើយការផ្ដោតអារម្មណ៍ក៏ជាភាពលំបាកមួយផងដែរសម្រាប់សិស្សដោយច្រើន ព្រោះនៅផ្ទះអាចនឹងមានសំឡេង ឬរឿងមួយចំនួនធ្វើឱ្យរំខាន ហើយពួកគាត់មិនអាចផ្ដោតអារម្មណ៍បានល្អ។

Q. តាមការយល់ឃើញរបស់លោកគ្រូក្នុងសម័យកូវីដ១៩នេះ តើក្រសួងគួរតែមានវិធីសាស្ត្រដូចម្ដេច ដើម្បីឱ្យការបង្រៀនដល់សិស្សានុសិស្សមានប្រសិទ្ធភាពខ្ពស់?

A: យើងត្រូវដឹងថា ដើម្បីឱ្យគុណភាពអប់រំតាមប្រព័ន្ធអនឡាញនេះមានប្រសិទ្ធភាព ការចូលរួមពីសំណាក់អាណាព្យាបាលគឺជារឿងមួយដែលមិនអាចខ្វះបាន។ ជាពិសេស ទៅលើប្អូនៗដែលនៅក្មេងមិនទាន់អាចប្រើប្រាស់ និងគ្រប់គ្រងការប្រើប្រាស់ប្រព័ន្ធអ៊ីនធឺណេតនេះបានល្អនៅឡើយ។ រឿងនេះវាក៏ទាក់ទងទៅនឹងការអភិវឌ្ឍ និងភាពជឿនលឿននៃប្រទេសរបស់យើងផងដែរ។

Q: ក្នុងនាមលោកគ្រូជាគ្រូបង្រៀនមួយអង្គបានបណ្ដុះបណ្ដាលប្អូនៗសិស្សានុសិស្សជាច្រើនកន្លងមក តើអ្វីជាគោលបំណងធំបំផុតរបស់លោកគ្រូចំពោះយុវជនខ្មែរទៅថ្ងៃខាងមុខ?

A: ដូចដែលបានប្រគេនមកពីខាងដើមហើយថា ការបង្ហាត់បង្រៀន ឬចែករំលែកគឺជាកិច្ចការងារដែលខ្ញុំករុណាចូលចិត្ត។ ហើយក៏ជាអ្វីដែលខ្ញុំករុណាយល់ថា វាពិតជាសំខាន់ផងដែរសម្រាប់ប្រទេសជាតិទាំងមូលរបស់យើង។ គោលបំណងរបស់ខ្ញុំករុណានោះគឺប្អូនៗ និងប្រជាពលរដ្ឋខ្មែរគ្រប់រូបស្រឡាញ់ការសិក្សា និងខិតខំប្រឹងប្រែងក្នុងការសិក្សាដើម្បីទទួលបានចំណេះដែលអាចយកទៅធ្វើ ឬបម្រើជាប្រយោជន៍សម្រាប់ខ្លួនពួកគាត់ផ្ទាល់ គ្រួសារ និងសង្គមជាតិរបស់យើងឱ្យមានការរីកចម្រើនរុងរឿង និងសុខសន្តិភាព។

Q: ជាចុងក្រោយតើលោកម្ចាស់មានជាសំណូមពរអ្វីជូនទៅអាណាព្យាបាលក្នុងការយកចិត្តទុកដាក់ជាមួយកូនៗរបស់ពួកគាត់?

A: សូមឱ្យមាតាបិតាទាំងអស់របស់ប្អូនៗសិស្សានុសិស្សជំរុញលើកទឹកចិត្ត និងធ្វើការតាមដានការសិក្សារបស់កូនៗតាមដែលអាចធ្វើបាន។ ហើយសហការជាមួយក្រសួងអប់រំ និងលោកគ្រូអ្នកគ្រូដើម្បីជួយដល់ដំណើរការនៃការសិក្សារបស់ប្អូនៗ។ យើងដឹងហើយថា ការសិក្សាតែងមានភាពលំបាក តែយើងនឹងទទួលបានរឿងល្អៗជាច្រើនពេលដែលយើងមានចំណេះដឹង។ ដូចសុភាសិតមួយថា «ការអប់រំមានឬសល្វីង ប៉ុន្តែមានផ្លែផ្អែម»។ ដូច្នេះយើងត្រូវបន្តសិក្សារៀនសូត្រ ដើម្បីអភិវឌ្ឍន៍ខ្លួន។ ហើយជាពិសេសយកឱកាសនៃសម័យកូវីដនេះ ដើម្បីរៀនសូត្រពីបច្ចេកវិទ្យា និងភាពជឿនលឿននៃពិភពលោក។ បើយើងអាចគ្រប់គ្រង និងប្រើឱកាសនេះបានល្អ ថ្ងៃអនាគតយើងនឹងទទួលបានភាពរុងរឿងជាច្រើននៅក្នុងជីវិត។

Q: អរព្រះគុណលោកម្ចាស់សម្រាប់ការផ្តល់សម្ភាសន៍៕

លោក ហ៊ុន សែន និងភរិយា ចាក់វ៉ាក់សាំងការពារជំងឺកូវីដ១៩អាស្ត្រាហ្សេណេកា

ស៊ាម សុភា (Seam Sophea) — Thu, 04 Mar 2021 07:30:55 +0000

លោកនាយករដ្ឋមន្ត្រីហ៊ុន សែន និងភរិយា លោកស្រី ប៊ុន រ៉ានី នៅថ្ងៃព្រហស្បតិ៍នេះ បានចាក់វ៉ាក់សាំងការពារជំងឺកូវីដ១៩ អាស្ត្រា ហ្សេណេកា (Astra Zeneca) របស់ចក្រភពអង់គ្លេស បន្ទាប់ពីអាយុរបស់អ្នកទាំងពីរមិនអាចចាក់វ៉ាក់សាំងស៊ីណូហ្វាមបាន។

យោងតាមទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ផ្សាយផ្ទាល់ (Live) នៅថ្ងៃព្រឹកថ្ងៃទី៤ ខែមីនា ឆ្នាំ២០២១ បានឱ្យឃើញថា មានថ្នាក់ដឹកនាំជាន់ខ្ពស់ជាច្រើននាក់ផ្សេងទៀតក៏បានមកទទួលការចាក់វ៉ាក់សាំងនៅព្រឹកនេះ ក្នុងនោះមានដូចជារដ្ឋមន្ត្រីក្រសួងសុខាភិបាលលោក ម៉ម ប៊ុនហេង រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា ជាដើម នៅមន្ទីរពេទ្យកាល់ម៉ែត។

វ៉ាក់សាំងការពារជំងឺកូវីដ១៩ អាស្ត្រា ហ្សេណេកា (Astra Zeneca) គឺជាវ៉ាក់សាំងទីពីរហើយបន្ទាប់ពីវ៉ាក់សាំង Sinopharm របស់ប្រទេសចិន ដែលរដ្ឋាភិបាលកម្ពុជាដាក់ឱ្យដំណើរការចាក់លើក្រុមមនុស្សងាយរងគ្រោះជាអាទិភាព ក្នុងនោះមានដូចជាក្រុមគ្រូពេទ្យ ទាហ៊ាន អ្នកសារព័ត៌មានជាដើម។

គួរបញ្ជាក់ដែរថា វ៉ាក់សាំងការពារជំងឺកូវីដ១៩ អាស្ត្រា ហ្សេណេកា (Astra Zeneca) គឺអាចចាក់បានទៅលើក្រុមមនុស្សដែលមានអាយុលើស ៦០ឆ្នាំ។ ចំណែកឯវ៉ាក់សាំង Sinopharm វិញ គឺអាចចាក់បានចំពោះក្រុមមនុស្សចន្លោះអាយុចាប់ពី១៨ រហូតដល់៥៩ឆ្នាំ តែប៉ុណ្ណោះ៕

វ៉ាក់សាំង Astrazeneca ជាង៣សែនដូស ជាជំនួយរបស់អង្គការ WHO បានមកដល់កម្ពុជា

ស៊ាម សុភា (Seam Sophea) — Wed, 03 Mar 2021 03:10:25 +0000

វ៉ាក់សាំងការពារជំងឺកូវីដ១៩ អាស្ត្រា ហ្សេណេកា (Astra Zeneca) ដែលជាជំនួសពីមជ្ឈមណ្ឌលកូវ៉ាក់ (COVAX Facility) ចំនួន៣២៤,០០០ដូស បានមកដល់ព្រលានយន្តហោះកម្ពុជា នៅថ្ងៃរាត្រីថ្ងៃទី២ ខែមីនានេះ ។

យោងតាមទំព័រហ្វេសប៊ុកផ្លូវការណ៍របស់លោកនាយករដ្ឋមន្ត្រី ហ៊ុន សែន ផ្សាយនៅថ្ងៃទី២ ខែមីនា ឆ្នាំ២០២១ បានឱ្យដឹងថា វ៉ាក់សាំងកូវីដ-១៩ (Astra Zeneca) ជំហានទី១ ពីមជ្ឈមណ្ឌលកូវ៉ាក់ ដែលជាជំនួយរបស់អង្គការសុខភាពពិភពលោក (WHO) បានមកដល់ប្រទេសកម្ពុជា នៅរាត្រីថ្ងៃអង្គារនេះ ។

លោក ហ៊ុន សែន បានសរសេរបន្ថែមថា៖ «នេះគឺការជឿទុកចិត្ត និងដោយយោងលើកិច្ចសហប្រតិបត្តិការល្អរវាងរាជរដ្ឋាភិបាលកម្ពុជា និងសហគមន៍អន្តរជាតិក្នុងការប្រយុទ្ធនឹងការឆ្លងរាលដាលនៃជំងឺកូវីដ១៩ នាពេលកន្លង»។

វ៉ាក់សាំងកូវីដ១៩ អាស្ត្រា ហ្សេណេកា (Astra Zeneca) ជាវ៉ាក់សាំងរបស់ចក្រភពអង់គ្លេស ដែលផលិតនៅប្រទេសឥណ្ឌា និងត្រូវបានទទួលស្គាល់ដោយអង្គការ WHO កាលពីពេលថ្មីៗ។

កម្ពុជាទើបទទួលបានវ៉ាក់សាំង ស៊ីណូវ៉ាក់ (Sinovac) ដែលជាជំនួយពីប្រទេសចិន ក្នុងជំហានទី១ កាលពីដើមខែកុម្ភៈ ចំនួន៦០ម៉ឺនដូស និងជំហានទី២ ទើបតែប្រកាសថានឹងបញ្ជូនមកកម្ពុជា ចំនួន៤០ម៉ឺនដូសទៀត៕

ព្រះមហាក្សត្រ និងសម្តេចម៉ែ យាងទៅប្រទេសចិនដើម្បីពិនិត្យព្រះរាជសុខភាព

ស៊ាម សុភា (Seam Sophea) — Mon, 01 Mar 2021 11:30:09 +0000

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តមមុនិនាថ សីហនុ ព្រះវររាជមាតាជាតិខ្មែរ បានយាងទៅទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាព នៅព្រឹកថ្ងៃចន្ទ ទី១ ខែមីនា ឆ្នាំ២០២១នេះ។

បើតាមទំព័រហ្វេសប៊ុកផ្លូវការរបស់លោកហ៊ុន សែន នាយករដ្ឋមន្ត្រីនៃប្រទេសកម្ពុជា លោកបានអញ្ជើញចូលរួមថ្វាយព្រះរាជដំណើររបស់ព្រះមហាក្សត្រ និងសម្តេចម៉ែយាងទៅទីក្រុងប៉េកាំង ប្រទេសចិន។

លោកហ៊ុន សែន ក៏បានថ្វាយព្រះពរដល់ព្រះមហាក្សត្រ និងសម្តេចម៉ែឲ្យព្រះអង្គទ្រង់ប្រកបដោយព្រះពលានុភាពខ្លាំងក្លា ព្រះបញ្ញាញាណវាងវៃ ព្រះរាជសុខភាពល្អបរិបូណ៌ ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំ ដល់ប្រជានុរាស្ត្រគ្រប់រូប រស់នៅក្នុងសុខសន្តិភាព តរៀងទៅ។

សូមរំឮកថា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រខ្មែរ និងព្រះមហាក្សត្រី នរោត្តម មុនីនាថ សីហនុ បានយាងទៅកាន់រដ្ឋធានីប៉េកាំង ប្រទេសចិន ដើម្បីពិនិត្យព្រះរាជសុខភាព តាមវេជ្ជបញ្ជារបស់ក្រុមគ្រូពេទ្យចិន។ នេះបើយោងតាមទំព័រហ្វេកប៊ុក Press OCM អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្រ្តី៕

ចៅអធិការវត្តចន្ទរង្សីកែង និងមន្ត្រីសង្ឃខេត្តក្រចេះសង់សាលារៀនមួយខ្នងនៅតំបន់ដាច់ស្រយាល

ស៊ាម សុភា (Seam Sophea) — Mon, 01 Mar 2021 06:41:39 +0000

ចៅអធិការវត្តកែង និងមន្ត្រីសង្ឃខេត្តក្រចេះ សាងសង់សាលាបឋមសិក្សាមួយអគារនៅតំបន់ដាច់ស្រយាល ក្នុងខេត្តក្រចេះរួចរាល់ជាស្ថាពរ សម្រាប់សិស្សចំនួន៦០នាក់។

បើតាមថេរៈដីកាលោកម្ចាស់សិរីបាលលោ យាន សំណាង បានប្រាប់សិក្ខាកាមសារព័ត៌មាន Newsroom Cambodia ថា សាលារៀននេះស្ថិតនៅភូមិរលំព្នៅ ឃុំសោប ស្រុកព្រែកប្រសព្វ ខេត្តក្រចេះ ចាប់ផ្ដើមកសាងនៅថ្ងៃ២៦ ខែវិច្ឆិកា ឆ្នាំ២០១៨ ដែលគ្រោងបញ្ចប់រួចរាល់ (អំឡុងខែមីនា ឆ្នាំ២០២០) ប៉ុន្តែមកដល់ពេលនេះមិនទាន់ពិធីសម្ពោធ និងឆ្លងនៅឡើយទេ ដោយសារការរីករាលដាលជំងឺកូវីដ១៩។ ព្រះអង្គបន្ថែមថា មូលហេតុនៃការផ្ដើមកសាងសាលារៀននេះគឺកាលពីឆ្នាំ២០១៨ លោកម្ចាស់សិរីបាលោ យាន សំណាង បានចុះទៅទីតាំងនេះផ្ទាល់ បានឃើញក្មេងៗរៀនលើសាលាឆទានក្នុងភូមិ។

ព្រះអង្គក៏បានបន្ថែមថា៖ «អាត្មាភាពបាននាំសម្ភារៈសិក្សាទៅចែកក្មេងៗកាលពីពាក់កណ្ដាលឆ្នាំ២០១៨ បានឃើញថាក្មេងៗនៅទីនោះក្រាបរៀនលើសាលាឆទាន ដែលជាកន្លែងពុទ្ធសាសនិកជនបានកសាងសម្រាប់ភូមិដាច់ស្រយាលរបស់ពួកគេ»។

ព្រះអង្គក៏បានអំពាវនាវដល់សប្បុរសជនទាំងអស់ ជួយចូលរួមកសាងសាលាដល់ក្មេងៗនៅតាមទីជនបទផង ព្រោះនៅមានក្មេងៗតាមជនបទជាច្រើន ដែលចង់សិក្សារៀនសូត្រ ហើយការជួយពួកគេនោះ ក៏ជាការចូលរួមលើកម្ពស់វិស័យអប់រំនៅកម្ពុជា ជាពិសេសតាមតំបន់ដាច់ស្រយាល ណាមួយក៏ស្របតាមព្រះពុទ្ធដីកាថា ធម្មទានឈ្នះអស់ទានទាំងពួង។

ព្រះអង្គក៏មានសារចុងក្រោយថា៖ «សូមផ្តាំទៅប្អូនៗសិក្សានុសិស្សទាំងអស់ សូមប្រឹងប្រែងរៀនសូត្រដើម្បីអាចជួយខ្លួនឯង និងសង្គមជាតិបានមានតែការរៀនទេ ទើបអាចធ្វើឱ្យរួចចាកពីភាពអវិជ្ជា និងភាពក្រីក្របាន»។

មកដល់ពេលនេះ Newsroom Cambodia មិនអាចសុំធ្វើការបន្ថែមពីលោកនាយកសាលាបឋមសិក្សានោះបានទេ ដោយសារមិនមានការឆ្លើយតប និងពិបាកក្នុងការទាក់ទង។

គួរបញ្ជាក់ដែរថា សាលាបឋមសិក្សារខាងលើនេះ ចំណាយទឹកប្រាក់សរុបប្រមាណ ៧៣,២០០,០០០រៀល (១៨,៣០០ដុល្លា) ហើយសមិទ្ធផលសម្រេចបានរួមមាន សាលាបីបន្ទប់ បន្ទប់ទឹក២ អណ្ដូងទឹក១ ដងទង់ជាតិ១ និងចាក់ដីក្នុងទីធ្លាសាលាសរុបប្រមាណជា៧០ឡានធំៗ៕