សេង សុខហ៊ុន (SENG SOKHUN) – Newsroom Cambodia

បទយកការណ៍៖ ទីផ្សារ និងទិន្នផលម្រេចកំពតបន្តធ្លាក់ចុះដោយសារបញ្ហាអាកាសធាតុ

សេង សុខហ៊ុន (SENG SOKHUN) — Thu, 13 Jun 2024 07:14:57 +0000

កំពុងបេះម្រេចបណ្ដើរជជែកជាមួយកសិករពីនេះពីនោះបណ្ដើរ លោក ងួន ឡាយ ដែលជាប្រធានសមាគមលើកកម្ពស់ម្រេចកំពត និងជាម្ចាស់ចំការម្រេចមួយកន្លែងនៅខេត្តកំពតនិយាយថា ទីផ្សារម្រេចកំពតកាន់តែថយចុះ បើប្រៀបធៀបទៅនឹងឆ្នាំ២០១៣-២០១៤។ លោកសម្គាល់ឃើញថា យុទ្ធសាស្ដ្រពង្រីកផ្ទៃដីដាំដុះហាក់បីដូចជាគ្មានប្រសិទ្ធភាព ដោយសារគ្មានលទ្ធភាពផ្គត់ផ្គង់។

លោកបន្តប្រាប់ដោយកំពុងសម្លឹងមើលទៅកាន់ចំការម្រេចរបស់លោកថា៖ «សណ្ឋានដីដាំដុះចាប់ផ្ដើមអស់ម្ដងបន្តិចៗ ផលិតផលដែលប្រមូលបានធ្វើខុសទីផ្សារដែលគេចង់បាន ចំណែកឯទំហំ ពណ៌វិញមិនចំគោលដៅ ជាពិសេសគ្មានតុល្យភាពក្នុងការចំណាយ។ ម្រេចប្រមាណ១៧ម៉ឺនគុម្ព ត្រូវបានបំផ្លាញដោយអាកាសធាតុ និងចំការជាច្រើនកន្លែងត្រូវបោះបង់ចោល មូលហេតុខ្វះការគ្រប់គ្រង»។

លោក ងួន ឡាយ ប្រធានសមាគមលើកកម្ពស់ម្រេចកំពត និងជាម្ចាស់ចំការម្រេចមួយកន្លែងនៅខេត្តកំពត

ម្រេចកំពតត្រូវបានចុះបញ្ជីនៅក្រសួងមហាផ្ទៃ នៅឆ្នាំ២០០៨ ហើយចុះបញ្ជីសម្គាល់ម៉ាកម្រេចកំពតនៅក្រសួងពាណិជ្ជកម្មនៅថ្ងៃទី២ មេសា ឆ្នាំ២០១០។ ហើយនៅឆ្នាំ២០១៦ ម្រេចកំពតត្រូវបានទទួលស្គាល់ដោយសហភាពអ៊ឺរ៉ុប។

កាលពីឆ្នាំ២០០៨នៃការចាប់ផ្ដើមបង្កើតសមាគមម្រេច ទីផ្សារ និងទិន្នផលកើនឡើងជាលំដាប់ដោយសារសមាគមចំណាយតិច ប្រមូលផលបានច្រើន មានការចុះកុងត្រាជាពាណិជ្ជករក្រៅប្រទេស មានបចេ្ចសថែទាំដំណាំ និងមានប្រភពទឹកផ្គត់ផ្គង់គ្រប់គ្រាន់។ ប៉ុន្តែចាប់តាំងពីមានវិបត្តិកូវីដ១៩ ទីផ្សារម្រេចជួបបញ្ហាប្រឈមជាច្រើន ហើយរហូតដល់បច្ចុប្បន្ន ទីផ្សារ និងទិន្នផលម្រេចកាន់តែថយដោយសារបញ្ហាអាកាសធាតុ រហូតធ្វើឱ្យកសិករទាំងខ្នាតតូច និងមធ្យមមួយចំនួនសម្រេចចិត្តបោះបង់ផ្ទៃដីដាំដំណាំជាច្រើនហិកតា។

លោក ងួន ឡាយ បន្ថែមថា បច្ចុប្បន្នសមាគមលើកកម្ពស់ម្រេចកំពតមាន៣៨០គ្រួសារ និងផ្ទៃដី២៤០ហិចតា។ លោកថា កសិករដែលដាំម្រេចនៅកំពតប្រមាណ៣០-៤០គ្រួសារ បានបោះបង់អាជីវកម្មរបស់ពួកគេដោយសារ ប្រឈមនឹងទីផ្សារ បរិស្ថាន អាកាសធាតុ និងគ្មានទឹកផ្គត់ផ្គង់ដំណាំ។

លោកបន្ថែមថា៖ «កសិករតូចៗក៏ងាប់ កសិករធំៗក៏ងាប់ចឹងហា ហើយតែងាប់ម្រេចដឹងតែបោះបង់ចោលហើយ ព្រោះឥឡូវមិនដូចពីមុនទេ កាលឆ្នាំ២០១០-២០១៣ អ្នកវិនិយោគគេចូលមកវិនិយោគដើម្បីពង្រីងផ្ទៃដីបង្កើតទិន្នផលផ្គត់ផ្គង់ទីផ្សារ តែមកដល់ពេលឥឡូវនេះ ការពង្រឹងក៏គ្មានលទ្ធភាពពង្រឹង កុំថាឡើយពង្រឹងតែពង្រីកក៏គ្មានលទ្ធភាពពង្រីកដែរ»។

សមាគមលើកកម្ពស់ម្រេចកំពតមានទីតាំងស្ថិតនៅភូមិអង្គរជ័យ ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។ សមាគមនេះ គឺជាគម្រោងនាំមុខការការពារការសម្គាល់ភូមិសាស្រ្តទំនិញរបស់ក្រសួងពាណិជ្ជកម្ម សហការជាមួយក្រសួង ឧបត្ថម្ភដោយភ្នាក់ងារបារាំងសម្រាប់ការអភិវឌ្ឍ ក្នុងគោលបំណងការពារ និងផ្សព្វផ្សាយម្រេចកំពត។

របាយការណ៍របស់សមាគមលើកម្ពស់ម្រេចកំពតបង្ហាញថា ម្រេចកំពតត្រូវបាននាំចេញចំនួន១០៣តោនក្នុងឆ្នាំ២០២៣។ បើធៀបទៅនឹងឆ្នាំ២០២២ ថយចុះចំនួន១១ភាគរយ។

កសិករកំពុងប្រមូលផលម្រេច

លោកស្រី លី ឃ្លាំង ជាម្ចាស់ចំការម្រេចម្នាក់ទៀតបានប្រាប់ញូវស៍រូមខេមបូឌាថា លោកស្រីបានដាំម្រេចអស់រយៈពេលជាង១០ឆ្នាំមកហើយ ក្នុងទំហំ៤ហិចតា ដោយមួយឆ្នាំប្រមូលផលម្ដង។

លោកស្រីប្រាប់ថា៖ «តម្លៃទីផ្សារឡើងចុះអត់ទៀង ជួនណាឈ្មួញមកទិញបាន១ម៉ឺនជាង ឬ២ម៉ឺន បើយើងនាំចេញខ្លួនឯងបាន១០$ និងទុកលក់ឱ្យជនបរទេសខ្លះដែលមកដល់ចំការផ្ទាល់ បាន១៥$ដែរ»។

លោកស្រីបន្ថែមទៀតថា ឆ្នាំទៅប្រមូលបានជាង១តោន ប៉ុន្តែឆ្នាំនេះអត់បានដោយសារអាកាសធាតុរាំងស្ងួតពេក។

អ្នកស្រី ទូច ផែ អាជីវករលក់ម្រេចនៅខេត្តកំពត ប្រាប់ញូវស៍រូមខេមបូឌាថា ម្រេចពេលខ្លះលក់ដាច់ច្រើន ពេលខ្លះលក់អត់ដាច់។ អ្នកស្រីថា ម្រេចខ្ចីក្នុង១ថ្ងៃលក់បាន១០គីឡូ ហើយសម្រាប់ម្រេចទុំពេលណាមានជនបរទេសមកលក់ដាច់បានច្រើន។

អ្នកស្រីប្រាប់ថា៖ «ម្រេចឆ្នាំនឹងឡើងថ្លៃតម្លៃនាំចូល ម្រេចស ៣ម៉ឺន ម្រេចក្រហម៣ម៉ឺនជាង តម្លៃលក់ចេញវិញបាន៦ម៉ឺន ឬ៦ម៉ឺនជាង បើទិញចូល២ម៉ឺន លក់វិញបាន៣-៤ម៉ឺន។ វាមិនទៀង»។

អ្នកស្រីបន្តថាប្រសិនបើតម្លៃនាំចូលចុះថយជាងមុនបន្តិចដើម្បីងាយស្រួលក្នុងការលក់ចេញហើយក៏ចង់ឱ្យទីផ្សារម្រេចកំពតមានការរីកចម្រើនជាងមុនផងដែរ។

កញ្ញា អៀង លីលី អាជីវករនៅផ្សារសាមគ្គីទីរួមខេត្តកំពត ដែលបានបន្តអាជីពនេះពីម្ដាយ អស់រយៈពេលជាងដប់ឆ្នាំហើយនោះ ប្រាប់ Newsroom Cambodia ថា ម្រេចបច្ចុប្បន្ននាំចូលកំពុងឡើងថ្លៃ ហើយនៅពេលដែលតម្លៃម្រេចឡើងថ្លៃហួសពេក ពេលខ្លះមិនអាចយកមកលក់បាន។ កញ្ញាបន្តថា ម្រេចដែលកញ្ញាលក់នាំចូលពីចម្ការម្រេចកំពតដែលអ្នកភូមិយកមកចែកចាយដល់ក្នុងផ្សារ។

កញ្ញានិយាយថា៖ «គេប្រមូលតាមចម្ការគេយកមកលក់ឱ្យយើង អីចឹងគេយកមកលក់ឱ្យយើង យើងក៏អត់បានទៅទិញដល់ចម្ការគេដែរ។ គេមកចូលផ្សារមួយថង់បានដប់គីឡូប្រាំគីឡូតាមហ្នឹងអីចឹងទៅ»។

កញ្ញាបន្ថែមថា កញ្ញាចង់ឱ្យប្រជាជនទូទៅយល់ថា ម្រេចកំពតមានតម្លៃថ្លៃ ព្រោះវាខុសពីម្រេចខេត្តដទៃ ដោយសារវាមានគុណភាពល្អ និងហិរ។

កញ្ញានិយាយថា៖ «ចង់ឱ្យគេយល់ថាម្រេចកំពតខុសពីម្រេចកំពង់ចាម ម្រេចរតនគីរីអីចឹង ដោយសារតម្លៃវាខុសគ្នាពេក ដល់ពេលអ្នកទិញគេឆ្ងល់ថាម៉េចក៏ម្រេចកំពតវាថ្លៃជាងខ្លាំងម្ល៉េះ ដូចខ្ញុំអ្នកលក់ខ្ញុំតែងតែប្រាប់គេ ធម្មតាម្រេចកំពតគឺវាថ្លៃ វាហិរជាងអីចឹងគុណភាពវាល្អជាង»។

កញ្ញាប្រាប់ទៀតថា ចង់ឱ្យម្រេចកំពតមានភាពល្បីល្បាញដោយសារម្រេចកំពតមានគុណភាពល្អ មានគេទទួលស្គាល់ច្រើនទាំងភ្ញៀវជាតិនិងអន្តរជាតិ។

លោក តេង វ៉ាន់ធឿន ប្រធានការិយាល័យមន្ទីរកសិកម្មនៅខេត្តកំពតប្រាប់ថា ម្រេចកំពតជាម្រេចដែលដាំដុះដោយប្រើប្រាស់ជីសរីរាង្គ (ជីលាយមកគោ និងអាចម៍ប្រចៀវ) មានការត្រួតពិនិត្យសណ្ឋានដីប្រកបដោយបច្ចេកទេស និងស្តង់ដា ជាពិសេសបានចុះកិច្ចសន្យាទិញ លក់ រវាងអ្នកលក់ និងអ្នកទិញផងដែរ។

លោកបន្តថា ម្រេចកំពតបាននាំចេញទៅក្រៅប្រទេសចំនួន២០ជាងប្រទេសដែលក្នុងនោះមានម្រេចខ្មៅ តម្លៃ ១៥ដុល្លារក្នុងមួយគីឡូក្រាម ក្រហម ២៥ដុល្លារក្នុងមួយគីឡូក្រាម និងស ២៨ដុល្លារក្នុងមួយគីឡូក្រាម។ ម្រេចដែលល្បីល្បាញជាងគេមាននៅខេត្តកំពត ៤ស្រុក និងខេត្តកែបមាន២ស្រុក។

លោកបន្ថែមថា៖ «ទិន្នផលនៅក្នុងឆ្នាំ២០២៤នេះមានការថយចុះដោយសារបញ្ហអាកាសធាតុ។ កាលសម័យកូវីដឆ្នាំ២០១៩-២០២០ គ្រប់ដំណាំទាំងអស់តែងតែមានផលប៉ះពាល់ ប៉ុន្ដែចំពោះម្រេចកំពតមិនមានផលប៉ះពាល់ទេ ដោយសារមូលហេតុអី ម្រេចយើងពេលដាំត្រូវមានផលិតកម្មចុះកិច្ចសន្យាទិញលក់រវាងសហភាពអ៊ឺរ៉ុប និងប្រទេសដទៃ»។

បើតាម លោក តេង វ៉ាន់ធឿន ប្រសិនបើកសិករមានបញ្ហាប្រឈម ខាងមន្ទីរតែងតែចាត់មន្រ្តីជំនាញ ឬការិយាល័យដែលជាសេនាធិការទៅជួយដោះស្រាយ ព្រមទាំងមាន វគ្គបណ្ដុះបណ្ដាលបច្ចេកទេសថែទាំដំណាំម្រេចទៅកាន់សហគមន៍ផង។

ការនាំចេញម្រេចកម្ពុជាគ្រប់ប្រភេទទៅក្រៅប្រទេសក្នុងរយៈពេល៨ខែ ឆ្នាំ២០២៣ ប្រមាណ ៥០០០តោន ថយចុះជាង៣០ភាគរយ បើធៀបនឹង៨ខែក្នុងឆ្នាំ២០២២។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

ម្ចាស់ចំការម្រេចដូចជាលោក ងួន ឡាយ រំពឹងថា ម្រេចនឹងមានតម្លៃថ្លៃជាងមុន ហើយស្ថានភាពនៃការដាំដុះនឹងបានប្រសើរ មុននឹងអ្នកដាំម្រេចសម្រេចចិត្តថាបោះបង់ដំណាំនេះនាពេលខាងមុខ៕

បទយកការណ៍៖ រដ្ឋាភិបាលផ្តល់សេវាលិខិតថ្កោលទោសតាមប្រព័ន្ធឌីជីថល ខណៈពលរដ្ឋចង់បានការសម្រួលបន្ថែម

សេង សុខហ៊ុន (SENG SOKHUN) — Wed, 15 May 2024 03:48:28 +0000

នៅព្រឹកថ្ងៃទី៧ខែឧសភា ពលរដ្ឋប្រមាណជា៤០នាក់កំពុងឈរតម្រង់ជួររង់ចាំទទួលលិខិតថ្កោលទោសដែលពួកគេបានដាក់ពាក្យស្នើសុំដោយផ្ទាល់ និងតាមរយៈអនឡាញពីនាយកដ្ឋានថ្កោលទោស។

ពលរដ្ឋដែលមករងចាំយក និងមកធ្វើលិខិតថ្កោលទោសខ្លះឈរ និងខ្លះទៀតអង្គុយ ដោយមានទឹកមុខមិនសូវសប្បាយចិត្តដោយសារការរងចាំយូរ ហើយទីកន្លែងធ្វើលិខិតថ្កោលទោសបណ្តោះអាសន្នដែលស្ថិតក្នុងសណ្ឋាគារកាំបូឌីយ៉ាណាមានទំហំមិនសូវធំទូលាយ។

កំពុងអង្គុយរងចាំធ្វើលិខិតថ្កោលទោសនៅនាយកដ្ឋានលិខិតថ្កោលទោស លោក ម៉ៅ លាភ ជាមេធាវីមួយរូបនៅរាជធានីភ្នំពេញលើកឡើងថា លោកបានស្នើសុំលិខិតថ្កោលទោសចំនួនពីរដងរួចមកហើយ ដោយប្រើសេវារហ័សចំនួន១២ថ្ងៃ ដើម្បីយកទៅប្រកបរបរជាមេធាវី។ លោកថា ដំណើរការផ្តល់សេវាលិខិតថ្កោលទោសតាមប្រព័ន្ធឌីជីថលមានភាពយឺតយ៉ាវជាងធ្វើដោយផ្ទាល់ ដោយសារមន្រ្ដីដែលពិនិត្យការស្នើសុំតាមឌីជីថលមានវ័យចាស់។

និយាយដោយសើចបន្តិចផង លោកបន្ថែមថា៖ «និយាយរួមទៅបើការងាររបស់គាត់ធ្វើលឿនការងារតាមអនឡាញលឿនជាង យើងគ្រាន់តែមកយកឯកសារដែលតម្រូវមានសៀវភៅគ្រួសារ និងអត្តសញ្ញាណបណ្ណទៀតហើយ បន្ទាប់មកគ្រាន់តែផ្ដិតមេដៃគាត់ពិនិត្យឯកសារម្ដងទៀតហើយ»។

កាលពីថ្ងៃទី៦ ខែកុម្ភៈ ឆ្នាំ២០២៣ ក្រសួងយុត្តិធម៌បានដាក់ឱ្យដំណើរការសេវាព្រឹត្តិបត្រថ្កោលទោស តាមប្រព័ន្ធឌីជីថលដំណាក់កាលទី១ ហើយនៅថ្ងៃទី២ ខែឧសភា ឆ្នាំ២០២៤ ក្រសួងបានដាក់ឱ្យដំណើរការសេវានេះក្នុងដំណាក់កាលទី២ ដើម្បីបង្កើនភាពងាយស្រួល និងឆាប់រហ័សបន្ថែមទៀតដល់សាធារណៈជន ដោយភ្ជាប់ឯកសារមួយចំនួនតាមអនឡាញ ព្រមទាំងអាចទូទាត់ប្រាក់សេវាតាមប្រព័ន្ធអេឡិចត្រូនិច។ ក្រោយការដាក់ឱ្យប្រើប្រាស់ ពលរដ្ឋដែលទទួលសេវានេះមួយចំនួនយល់ថាមានភាពប្រសើរ ខណៈពលរដ្ឋខ្លះដូចជាលោក ម៉ៅ លាភ យល់ថា ហាក់មានភាពយឺតយ៉ាវជាងមុន។

លោក ស៊ុន វិសាល បុគ្គលិកធនាគារឯកជនមួយកន្លែង នៅរាជធានីភ្នំពេញ ប្រាប់ Newsroom Cambodia ថា ការធ្វើលិខិតថ្កោលទោសតាមប្រព័ន្ធឌីជីថលប្រើពេលវេលាតិចជាង និងរហ័សជាងការមកដាក់ពាក្យស្នើសុំដោយផ្ទាល់។

លោកបន្តថា៖ «ការធ្វើលិខិតតាមអនឡាញចំណេញពេលច្រើន បើសិនណាសរសេរខុសយើងអាចលុបសរសេរសារជាថ្មីបាន។ ចំពោះផលលំបាក គឺវាមិនទាន់គ្រប់ជ្រុងជ្រោយមិនដឹងថាយើងត្រូវមកបង់លុយផ្ទាល់ ឬក៏មកបញ្ជូនឯកសារច្បាប់ដើមទេត្រូវឱ្យយើងមកកន្លែងផ្ទាល់»។

លោកបន្ថែមទៀតថា ចំពោះមន្រ្តីដែលបម្រើសេវាលិខិតថ្កោលទោសគួរជួយផ្តល់ព័ត៌មានបន្ថែមនៅកន្លែងស្នើសុំលិខិតថ្កោលទោសដល់អ្នកដែលមកផ្ទាល់ ដោយសារតែអ្នកដែលមកធ្វើដំបូងគឺពួកគេមិនសូវដឹង និងសូវយល់អំពីរបៀបសរសេរ។

កញ្ញា លឹម សមនា និស្សិតនៅសាកលវិទ្យាល័យបញ្ញាសាស្រ្ត ដែលកំពុងរងចាំធ្វើលិខិតថ្កោទោសដែរនោះលើកឡើងថា ការធ្វើលិខិតថ្កោលតាមប្រព័ន្ធឌីថលមានភាពងាយស្រួល និងរហ័សជាង ប៉ុន្ដែដោយសារកញ្ញាមិនបានដឹងក៏មកផ្ទាល់។

កញ្ញាបន្តថា៖ «បើទោះបីជាខ្ញុំធ្វើលិខិតផ្ទាល់ក៏ពិតមែន តែខ្ញុំឃើញថាការធ្វើលិខិតតាមប្រព័ន្ធឌីជីថលមានភាពងាយស្រួល និងរហ័សជាង គឺយើងគ្រាន់តែយកឯកសារដែលចំបាច់មកជាមួយហើយចាំតែខាងមន្រ្តីពិនិត្យ បើត្រឹមត្រូវទាំងអស់គាត់នឹងហៅទៅយកបង្កាន់ដៃ»។

ការធ្វើព្រឹត្តិបត្រថ្កោលទោស តម្រូវឱ្យមានទម្រង់ស្នើសុំព្រឹត្តិបត្រថ្កោលទោស ប្រវត្តិរូបសង្ខេប១ សន្លឹក ស្នាមមេដៃសាមីខ្លួន បណ្ណសម្គាល់ខ្លួន សិស្ស និស្សិត (បើនៅរៀន) សេចក្តីចម្លងសំបុត្របញ្ជាក់កំណើត និងសៀវភៅស្នាក់នៅច្បាប់ដើម ព្រមទាំងថតចម្លងមួយច្បាប់ផង។ ចំពោះជនបរទេស ត្រូវថតចម្លងលិខិតឆ្លងដែន មានសុពលភាព១ច្បាប់ និងទិដ្ឋាការចូលមកប្រទេសកម្ពុជា ១ច្បាប់។

លោក ជួន ហ៊ាន អនុប្រធានការិយាល័យទទួលព្រឹត្តិបត្រថ្កោលទោស និងជនបរទេស ប្រាប់ Newsroom Cambodia ថា ការបង្កើតនិតិវិធីស្នើសុំព្រឹត្តិបត្រផ្កោលទោសតាមអនឡាញ គឺដើម្បីផ្តល់ភាពងាយស្រួលដល់ប្រជាពលរដ្ឋ។

លោកបន្តថា៖ «កាលពីមុនគាត់មកយកពាក្យ ហើយបំពេញពាក្យ បន្ទាប់មកដាក់ពាក្យ ហើយគាត់ឡើងមកដក អាហ្នឹងវាច្រើនសារអីចឹងហាស។ ដំណាក់កាលទី២នេះ ក្រសួងឱ្យប្រជាពលរដ្ឋអាចដាក់ពាក្យ បង់លុយពីផ្ទះមក មិនចាំបាច់មកដល់នាយកដ្ឋាននោះទេ ចាំពេលមកដក ចាំកាន់សំបុត្រកំណើតមកដក»។

លោកបន្ថែមថា ក្រសួងយុត្តិធម៌បានជូនដំណឹងដល់ប្រជាពលរដ្ឋឱ្យទាញយកកម្មវិធីដែលមានឈ្មោះថា CR-MOJ ពី APP Store សម្រាប់ប្រព័ន្ធ IOS ឬពីPlay store សម្រាប់ប្រព័ន្ធ Android ដោយអនុវត្តតាមការណែនាំក្នុងកម្មវិធី ហើយគាត់អាចដាក់ពាក្យ សរសេរព័ត៌មាន ពាក់ព័ន្ធនឹងខ្លឹមសារសំបុត្រកំណើត និងអាប់ឡូតសៀវភៅគ្រួសារ សៀវភៅស្នាក់នៅ។

លោកថា បច្ចុប្បន្ន ប្រជាពលរដ្ឋមិនទាន់មានការយល់ដឹងទៅលើការទទួលសេវាលើប្រព័ន្ធឌីជីថលទាំងអស់ទេ ដោយសារពលរដ្ឋទទួលសេវានៅនឹងកន្លែងផ្ទាល់ និងមានតាមប្រព័ន្ធឌីជីថលដំណាក់កាលទី១ផង និងដំណាក់កាលទី២ផង។ លោកថា នៅក្នុង App មានជម្រើសដែលអាចឱ្យប្រជាពលរដ្ឋដាក់ពាក្យពីផ្ទះមកក៏បាន ឬអាចយកឯកសារមកបង់ផ្ទាល់ក៏បាន។

លោកបញ្ជាក់ថា៖ «នៅក្នុងកម្មវិធីហ្នឹង ប្រសិនបើគាត់បង់លុយពីផ្ទះ គាត់អាចចុចបង់ប្រាក់តាមអេស៊ីលីដា ឬអ៊ីវីសា គាត់អាច Pay (បង់លុយ) បានហើយ។ ប៉ុន្តែមួយជំហានទៀត គាត់ដាក់ពាក្យហើយ ប៉ុន្តែគាត់មកផ្ទាល់ដើម្បីយកវិក្ក័យបត្រទៅឱ្យស្ថាប័នគាត់ប្រើប្រាស់ អញ្ចឹងគាត់ចុចថា Cash [លុយ] នៅពេលហ្នឹងគេដាក់ឱ្យគាត់ជា Cash [លុយ] ហើយគាត់អាចមកបង់ផ្ទាល់ បន្ទាប់មកគាត់ Submit [បញ្ជូន] ធម្មតា ប៉ុន្តែគាត់ត្រូវមកបង់ផ្ទាល់ និងចាំទទួលយកវិក្ក័យបត្រ»។

ការធ្វើព្រឹត្តបត្រថ្កោលទោសនៅកម្ពុជា គឺក្នុងគោលបំណងបញ្ជាក់ភាពស្អាតស្អំ ឬគ្មានទោស ដើម្បីយកទៅប្រើប្រាស់តាមតម្រូវការរបស់ប្រជាពលរដ្ឋ។ ចំណែកដំណើរការព្រឹត្តិបត្តិវិញ សម្រាប់ការបកប្រែព្រឹត្តិបត្រថ្កោលទោសលេខ៣ ជាភាសាបរទេសមានពីរប្រភេទគឺ សេវាធម្មតា និងសេវាឆាប់រហ័ស។ ចំពោះសេវាធម្មតា មានតម្លៃសេវា ៤០,០០០ រៀល ហើយរយៈពេលធ្វើ ២០ថ្ងៃ (ថ្ងៃធ្វើការ) និងសុពលភាពចំនួន ៣ខែ។ ចំណែកសេវាឆាប់រហ័ស មានតម្លៃសេវា ៦០,០០០ រៀល ហើយរយៈពេលធ្វើ ១២ថ្ងៃ (ថ្ងៃធ្វើការ) និងមានសុពលភាពចំនួន ៣ខែ។

លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្ដិភាព (PDP-Center) ប្រាប់ញូវស៍ខេមបូឌាតាមរយៈបណ្តាញសង្គមតេឡេក្រាមថា ការធ្វើលិខិតថ្កោលទោសតាមប្រព័ន្ធឌីជីថលជារឿងមួយសំខាន់ដែលធ្វើឱ្យប្រជាពលរដ្ឋមានភាពងាយស្រួល ឆាប់រហ័ស និងមានការវិវត្តរីកចម្រើនមួយដែលអាចកាត់បន្ថយអំពើពុករលួយ។

លោកបន្តទៀតថា៖ «អ្វីដែលគួរតែធ្វើទន្ទឹមគ្នានឹងការធ្វើតាមប្រព័ន្ធអនឡាញនេះក៏គួរតែមានក្រុមជំនួយការបច្ចេកទេសដែលអាចជួយទាន់ពេលវេលាអាចជួយពួកគាត់ដើម្បីឱ្យគាត់អាចដំណើរការធ្វើបាន។ ប្រសិនបើឧបមាថាមានបញ្ហាកន្លែងណាមាន Hot line អាចខលសួរទាន់ពេលវេលា កុំឱ្យមានតែ Hot line ប៉ុន្ដែខលអត់បាន»។

លោកបន្ថែមថា តាមរយៈសេចក្ដីណែនាំផ្សេងៗ ការខលសួរនាំពីសំណាក់ប្រជាពលរដ្ឋពេលដែលមានចម្ងល់ ឬជជែកតាមរយៈប្រព័ន្ធឌីជីថលដើម្បីទទួលបាននូវព័ត៌មានលម្អិតជាការជាល្អប្រសើរសម្រាប់ពលរដ្ឋដែលមានតម្រូវការ។

លោកបន្ថែមទៀតថា៖ «ប្រសិនបើក្រសួងយុត្តិធម៌អាចធ្វើបែបនេះបានខ្ញុំគិតថាវាជារឿងមួយល្អ ហើយសង្ឃឹមថាទៅអនាគតគឺយើងនឹងមិនមានភាពស្មុគស្មាញច្រើនក្នុងការធ្វើលិខិតស្នាម ឬលិខិតថ្កោលទោស»៕

កម្រងរូបភាព៖ មុខរបរដាំ និងលក់បន្លែនៅរាជធានីភ្នំពេញ

សេង សុខហ៊ុន (SENG SOKHUN) — Mon, 06 May 2024 02:13:18 +0000

អ្នកស្រី ទួន ម៉ើ ជាអ្នកដាំ និងលក់បន្លែ នៅភូមិកំរៀង សង្កាត់ព្រៃវែង ខណ្ឌដង្កោ រយៈពេល៣០ឆ្នាំមកហើយ។ អ្នកស្រីមានកូនចំនួន៥នាក់។ ជារៀងរាល់ថ្ងៃចាប់ពីម៉ោង៣ទៀបភ្លឺ អ្នកស្រីតែងតែក្រោកទៅបេះបន្លែដើម្បីលក់។ អ្នកស្រីចាប់ផ្ដើមលក់ចាប់ពីម៉ោង ៦ព្រឹករហូតដល់ម៉ោង ១១ថ្ងៃត្រង់។

ខាងក្រោមនេះគឺជាកម្រងរូបភាពនៃសកម្មភាពមុខរបរដាំ និងលក់បន្លែរបស់អ្នកស្រី ទួន ម៉ើ ៖

អ្នកស្រី ទួន ម៉ើ កំពុងបេះបន្លែ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អ្នកស្រី ទួន ម៉ើ រៀបបន្លែដាក់រទះ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អ្នកស្រី ទួន ម៉ើ និងស្វាមីកំពុងជញ្ជូនបន្លែ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អ្នកស្រី ទួន ម៉ើ កំពុងរៀបចំបន្លែ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អតិថជនអ្នកស្រី ទួន ម៉ើ មកទិញបន្លែ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អតិថិជនឱ្យលុយថ្លៃបន្លែទៅអ្នកស្រី ទួន ម៉ើ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

អតិថិជនបន្ដមកទិញបន្លែពីអ្នកស្រី ទួន ម៉ើ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

ចម្ការបន្លែរបស់អ្នកស្រី ទួន ម៉ើ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

ជីលាមកគោសម្រាប់ដាំដំណាំ នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

ស្វាមីរបស់អ្នកស្រី ទួន ម៉ើ កំពុងថែទាំរោងបន្លែថ្មី នៅថ្ងៃទី២៦ ខែមេសា ឆ្នាំ២០២៤។ (រូបភាព៖សេង សុខហ៊ុន)

សកម្មជន និងសង្គមស៊ីវិលទទូចឱ្យរដ្ឋាភិបាលបើកសិទ្ធិសេរីភាពនិងគាំទ្រសកម្មភាពការពារបរិស្ថាន

សេង សុខហ៊ុន (SENG SOKHUN) — Fri, 03 May 2024 08:58:13 +0000

ភ្នំពេញ៖ កាលថ្ងៃទី០២ ខែឧសភា ឆ្នាំ២០២៤ សកម្មជនបរិស្ថាន អ្នកការពារព្រៃឈើ និងអង្គការសង្គមស៊ីវិល បានស្នើឲ្យរដ្ឋាភិបាលនិងអាជ្ញាធរមូលដ្ឋានបើកលំហសិទ្ធិសេរីភាព និងគាំទ្រសកម្មភាពការពារបរិស្ថានរបស់ពួកគេ។ នៅក្នុងកិច្ចពិភាក្សាមួយក្នុងកម្មវិធីទិវាសេរីភាពសារព័ត៌មានពិភពលោកលើកទី៣១ ក្នុងរាជធានីភ្នំពេញ ពួកគេលើកឡើងថា អាជ្ញាធរមូលដ្ឋានតែងតែហាមឃាត់ និងសួរនាំច្រើន ថែមទាំងគំរាមគំហែង[ពាក្យសម្ដី ហិង្សា អាវុធ] រាល់ពេលដែលក្រុមសកម្មជនបរិស្ថាន និងសង្គមស៊ីវិលមានសកម្មភាពចុះទៅព្រៃឬល្បាតព្រៃម្ដងៗ។ កិច្ចពិភាក្សានេះ ក៏បានផ្តោតសំខាន់លើសារៈសំខាន់ និងតួនាទីរបស់អ្នកសារត៌មានក្នុងការរាយការណ៍ពីបញ្ហាបរិស្ថានផងដែរ។

លោក ហេង គីមហុង នាយកប្រតិបត្តិនៃសមាគមបណ្ដាញយុវជនកម្ពុជា(CYN)ថ្លែងថា សារព័ត៌មានបានចួលរួមចំណែកផ្សព្វផ្សាយពីបញ្ហាបរិស្ថានដូចជាការកាប់បំផ្លាញព្រៃឈើ និងការធ្វើអាជីវកម្មរ៉ែមាសខុសច្បាប់ជាដើម។ លោក ស្នើសុំឱ្យក្រសួងជំរុញឱ្យមន្ត្រីចុះអធិការកិច្ច ដើម្បីបង្ក្រាបបទល្មើសធនធានធម្មជាតិ និងមានយន្តការចំពោះការធ្វេសប្រហែសរបស់មន្ត្រីចំពោះមុខងារខ្លួន។

លោកបន្តថា៖«យើងធ្វើការទៅលើបរិស្ថានគ្រាន់យើងចង់ឱ្យមានបរិស្ថានស្អាតរួមគ្នាហើយមានព្រៃឈើមួយប្រកបដោយនិរន្តរភាពយ៉ាងពិតប្រាកដ»។

លោក ហេង គីមហុង បន្តថាអ្នកសារព័ត៌មានឯករាជ្យមានសារៈសំខាន់ក្នុងការជួយអង្គការសង្គមស៊ីវិលដើម្បីរាយការណ៍ព័ត៌មានពីបញ្ហាដែលត្រូវបានលាក់កំបាំងពីភ្នែកសាធារណជន។

អ្នកស្រី ទិព្វ ភារុណ ពលរដ្ឋជនជាតិដើមភាគតិចពូនង ខេត្តមណ្ឌលគិរី បានថ្លែងពីបញ្ហាដែលកើតឡើងក្នុងសហគមន៍អ្នកស្រីយ៉ាងដូច្នេះ៖ «ចំពោះជនជាតិដើមភាគតិចដែលកំពុងមានបញ្ហានៅពេលដែលក្រសួងបរិស្ថានចាប់ផ្ដើមដកហូតដីដោយមិនបានសិក្សាច្បាស់លាស់។ កន្លងទៅយើងឃើញថាអ្នកដែលកាប់បំផ្លាញព្រៃឈើធំៗ យើងអត់ទាន់បានឃើញថាក្រសួងដកហូតទេ តែក្រសួង ឬមន្ទីរដែលកំពុងអនុម័តនោះ បានចាប់ជនជាតិដើមភាគតិចដែលក្រីក្រ ដែលគ្នាធ្វើចម្ការតិចតួច»។

លោកស្រីបញ្ជាក់ថាជនជាតិដើមភាគតិច ស្រឡាញ់និងអាចការពារព្រៃឈើបានល្អដោយសារ ជនជាតិដើមភាគតិច បានស្គាល់ភូមិសាស្ត្រច្បាស់លាស់៖ «កន្លែងណាដែលមានជនជាតិដើមភាគតិចយើងឃើញថាកន្លែងនឹងធ្វើស្រែចម្ការមែនប៉ុន្តែនៅតែទុកព្រៃឈើជាបន្តបន្ទាប់ ប៉ុន្តែកន្លែងណាដែលមានក្រុមហ៊ុនឬមានអ្នកជំនាន់ស្រុកមកថ្មីៗគឺកាប់បំផ្លាញព្រៃឈើជាហូរហែរ»។

យ៉ាងណាក៏ដោយ លោក ខ្វៃ អាទិត្យា អនុរដ្ឋលេខាធិការក្រសួងបរិស្ថានបានបដិសេធចំពោះការលើកឡើងថារដ្ឋាភិបាលមានភាពអសកម្មក្នុងការការពារព្រៃឈើនៅកម្ពុជា។

លោកថ្លែងថា៖ «គ្រប់ខេត្តដែលជាតំបន់ការពារព្រៃឈើរបស់យើង២១កន្លែង ២១ខេត្តនេះយើងបាននិងកំពុងអនុវត្តក្ដៅកគុក»។

បើតាមលោក ខ្វៃ អាទិត្យា អាជ្ញាធរបានបង្រាបបទល្មើសយ៉ាងសកម្ម ក្នុងនោះនៅខេត្តពោធិ៍សាត់អាជ្ញាធរបានបញ្ជូនជនល្មើសទៅតុលាការចំនួន១៨ករណី ចំណែកឯខេត្តស្ទឹងត្រែងក៏បានបញ្ជូនមនុស្ស១០នាក់ទៅតុលាការផងដែរ៕

Q&A៖ ការគោរពសិទ្ធិមនុស្សនៅកម្ពុជានៅមានកម្រិតនៅឡើយ

សេង សុខហ៊ុន (SENG SOKHUN) — Tue, 02 Apr 2024 03:21:26 +0000

កម្ពុជាបានផ្ដល់សច្ចាប័នជាច្រើនទាំងថ្នាក់ជាតិ និងថ្នាក់អន្តរជាតិ រួមមានសេចក្ដីប្រកាសជាសាកលស្ដីពីកិច្ចព្រមព្រៀងសន្ដិភាពទីក្រុងប៉ារីស សិទ្ធិពលរដ្ឋ សិទ្ធិនយោបាយ សិទ្ធិសេដ្ឋកិច្ច សិទ្ធិសង្គមកិច្ច សិទ្ធិវប្បធម៌ និងរដ្ឋធម្មនុញ្ញដែលជាច្បាប់កំពូលរបស់កម្ពុជា។

ខាងក្រោមនេះគឺជាកិច្ចសម្ភាសរវាងលោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ជាមួយ កញ្ញា សេង សុខហ៊ុន ជាសិក្ខាកាមសារព័ត៌មានមកពីញូសន៍រូមខេមបូឌា ( Newsroom Cambodia)។

Q: ជម្រាបសួរលោក អំ សំអាត!

A: បាទជម្រាបសួរ!

Q: សំណួរដំបូងដែលនាងខ្ញុំចង់សួរតើការគោរពសិទ្ធិមនុស្សជាអ្វី?

A: បើយើងនិយាយអំពីការគោរពសិទ្ធិមនុស្សបានន័យថាជាការចេះអត់ឱន ការចេះឱ្យតម្លៃផ្ដល់តម្លៃទៅលើបុគ្គលគ្រប់រូប គោរពនូវសេចក្ដីថ្លៃថ្នូរ និងការគោរពគ្នាទៅវិញទៅមក។

Q: តើការគោរពសិទ្ធិមនុស្សនៅកម្ពុជាមានស្ថានភាពបែបណា?

A: បើយើងនិយាយអំពីការគោរពសិទ្ធិមនុស្សនៅក្នុងប្រទេសកម្ពុជាយើងវាមិនទាន់មានលក្ខណៈល្អប្រសើរទាំងអស់នោះទេ ពីព្រោះយើងឃើញហើយថាបញ្ហាសិទ្ធិមនុស្សនេះនៅកម្ពុជាយើងមានការរំលោភសិទ្ធិជាច្រើនជាពិសេសការរំលោភទៅលើសេរីភាព និងសិទ្ធិជាមូលដ្ឋានរបស់ពលរដ្ឋ។ ហើយកន្លងមកយើងថាបញ្ហាសិទ្ធិមនុស្ស ការរំលោភសិទ្ធិមនុស្សនៅតែបន្ដកើតមានសម្រាប់កម្ពុជាអញ្ចឹងហើយបានជាមានការរិះគន់ជាច្រើនថា សេរីភាពសិទ្ធិមនុស្សនៅកម្ពុជានេះនៅមានកម្រិតទាបមានន័យថាការធ្លាក់ចុះ។

Q: តើមានអង្គការចំនួនប៉ុន្មានដែលធ្វើការងារទៅលើការគោរពសិទ្ធិមនុស្សនៅកម្ពុជា?

A: បើយើងនិយាយអំពីអង្គការក្រៅរដ្ឋាភិបាលដែលធ្វ់ទៅលើបញ្ហាសិទ្ធិមនុស្សនៅកម្ពុជាយើងឃើញថាមានចំនួនតិចទេបើធៀបជាមួយនឹងអង្គការ និងសមាគមដែលបានចុះបញ្ជីនៅក្នុងប្រទេសកម្ពុជាយើងជាង៤ពាន់អង្គការ/សមាគម យើងឃើញថាមានតិចតួចបំផុតដែលធ្វើការទៅលើវិស័យសិទ្ធិមនុស្ស។ អង្គការដែរធ្វើទៅលើវិស័យសិទ្ធិមនុស្ស ឬលទ្ធិប្រជាធិបតេយ្យនេះភាគច្រើនគេចាត់ទុកថាប្រឆាំង។

Q: តើមានបញ្ហាប្រឈមបែបណាខ្លះក្នុងការអនុវត្តការងាររបស់អង្គការការពារសិទ្ធិមនុស្សនៅកម្ពុជា?

A: បើយើងនិយាយអំពីអង្គការដែលធ្វើការការពារសិទ្ធិមនុស្សនៅកម្ពុជាមានការប្រឈមច្រើន ទី១ គឺការលាបពណ៌ទៅលើអង្គការ ឬក៏បុគ្គលដែលធ្វើការអង្គការលើអង្គការសង្គមស៊ីវិលនៅកម្ពុជានឹងជាអ្នកប្រឆាំង។ ទី២ គឺកិច្ចសហការរវាងអង្គការសង្គមជាមួយនឹងអាជ្ញាធរហាក់ដូចជាមិនមានភាពមិនល្អ ហើយទី៣គឺបុគ្គលដែលធ្វើការទាក់ទងនឹងអង្គការសង្គមរងនូវគម្លាតការគំរាមកំហែង និងការបំភិតបំភ័យគ្រប់រូបភាពជាពិសេសគឺថ្មីៗនេះបុគ្គលិកអង្គការសិទ្ធិមនុស្សត្រូវបានជាប់បណ្ដឹងពីតុលាការផងដែរ។

Q: តើការគោរពសិទ្ធិមនុស្សផ្ដល់អត្ដប្រយោជន៍បែបណាខ្លះដល់កម្ពុជា?

A: បាទ! ការពិតទៅអង្គការសិទ្ធិមនុស្សដែលយើងធ្វើការគោរពសិទ្ធិមនុស្សនៅប្រទេសកម្ពុជាគឺជាដៃគូអភិវឌ្ឍន៍របស់រដ្ឋាភិបាល ប៉ុន្ដែអង្គការសិទ្ធិមនុស្សដែលយើងធ្វើការនេះអភិវឌ្ឍទៅលើផ្នែកសិទ្ធិមនុស្សក្នុងនាមប្រទេសដែលកាន់លទ្ធិប្រជាធិបតេយ្យសេរីពហុបក្សបើសិនឱ្យមានការគោរពសិទ្ធិមនុស្សឱ្យមានល្អ កម្ពុជាយើងនឹងមានផលចំណេញច្រើនអាចនឹងសហគមន៍អន្តរជាតិទទួលស្គាល់ពេញលេញ ហើយនឹងអាចទទួលនូវជំនួញអភិវឌ្ឍផ្សេងៗ។ ដោយសារបញ្ហាសិទ្ធិមនុស្សហើយដែលយើងឃើញថា កន្លងមកមានការផ្ដាច់ការពិគ្រោះពន្ធ EBA ២០% ហើយនឹងទាក់ទង GSPរបស់សហរដ្ឋអាមេរិក គឺការអនុគ្រោះពន្ធពាណិជ្ជកម្មនឹងនៅមិនទាន់មានការបន្តគឺលក្ខខណ្ខរបស់គេនឹងសុំឱ្យស្ដារឡើងវិញនៃសិទ្ធិមនុស្ស និងលទ្ធិប្រជាធិបតេយ្យ។

Q: តើរដ្ឋាភិបាល និងភាគីពាក់ព័ន្ធត្រូវចូលរួមសកម្មភាពបែបណាខ្លះទើបធ្វើឱ្យការគោរពសិទ្ធិមនុស្សនៅកម្ពុជាមានភាពប្រសើរឡើង?

A: ខ្ញុំយល់ឃើញថាប្រទេសយើងបានផ្ដល់សច្ចាប័នច្រើនទៅលើបទដ្ឋានអន្តរជាតិស្ដីពីសិទ្ធិមនុស្ស អញ្ចឹងរដ្ឋាភិបាលត្រូវតែមានកាតព្វកិច្ចទី១ គឺការគោរព គឺធ្វើម៉េចឱ្យមានការគោរពទៅលើបញ្ហាសិទ្ធិមនុស្ស។ ទី២ការពារ បានន័យថា បើមានការរំលោភបំពានទៅលើបញ្ហាសិទ្ធិមនុស្សរដ្ឋាភិបាលត្រូវចាត់វិធានការដើម្បីធ្វើការការពារ។ ទី៣ គឺការបំពេញបន្ថែម បើសិនជាពលរដ្ឋមិនទាន់យល់ដឹងអំពីបញ្ហាសិទ្ធិមនុស្សពុំបានគ្រប់គ្រាន់រដ្ឋត្រូវមានការផ្សព្វផ្សាយ ការអប់រំដើម្បីឱ្យពលរដ្ឋមានការយល់ដឹងហើយច្បាប់ដែលត្រូវបង្កើតឡើងធ្វើយ៉ាងម៉េចត្រូវស្របតាមបទដ្ឋានអន្តរជាតិដើម្បីជំរុញនិងការពារឱ្យពលរដ្ឋហ៊ានអនុវត្តសិទ្ធិរបស់ខ្លួនឱ្យពេញលេញ។

Q: ជាចុងក្រោយតើលោកមានអ្វីជាការបន្ថែមពាក់ព័ន្ធនឹងការគោរពសិទ្ធិមនុស្សនៅកម្ពុជា?

A: ទី១ទាមទារឱ្យគ្រប់ភាគីរាជរដ្ឋាភិបាលមានកាតព្វកិច្ចមុនគេនៅក្នុងការធានាក្នុងការអនុវត្តសិទ្ធិ គោរពសិទ្ធិទៅលើពលរដ្ឋ និងការពារនៅក្នុងការអនុវត្តសិទ្ធិរបស់ពលរដ្ឋ។ ទី២ អង្គការសង្គមស៊ីវិលជួយចូលរួមជំរុញធ្វើម៉េចឱ្យមានការគោរព និងអនុវត្តសិទ្ធិឱ្យបានពេញលេញ។ ទី៣ ភាគីដែលពាក់ព័ន្ធ អ្នកជំនាញ ឬក៏ក្រុមប្រឹក្សាសិទ្ធិមនុស្សអង្គការសហប្រជាជាតិអាចជួយបន្ថែមដើម្បីជំរុញឱ្យរដ្ឋាភិបាលមានការលើកកម្ពស់ទៅលើបញ្ហាសិទ្ធិមនុស្ស ជំរុញឱ្យមានយន្ដការក្នុងការពារ ក៏ដូចជាអនុវត្តសិទ្ធិរបស់ពលរដ្ឋឱ្យបានពេញលេញ។

Q: ចាស អរគុណច្រើនសម្រាប់ការផ្ដល់បទសម្ភាស។

A: បាទ!៕

ក្រសួងធម្មការហាមមិនឱ្យលេងល្បែងងាយបង្កគ្រោះថ្នាក់នៅគ្រប់វត្តអារាមក្នុងពិធីបុណ្យចូលឆ្នាំខ្មែរ

សេង សុខហ៊ុន (SENG SOKHUN) — Fri, 22 Mar 2024 06:24:05 +0000

ក្រសួងធម្មការ និងសាសនាណែនាំគ្រប់វត្តអារាមទាំងអស់មិនឱ្យលេងល្បែងស៊ីសង និងល្បែងផ្សេងៗដែលងាយបង្កគ្រោះថ្នាក់ក្នុងអំឡុងពេលចូលឆ្នាំថ្មីប្រពៃណីជាតិខ្មែរ។

ក្នុងសេចក្ដីណែនាំរបស់ក្រសួងធម្មការស្ដីពីការរៀបចំពិធីបុណ្យចូលឆ្នាំថ្មីប្រពៃណីជាតិ ចេញនៅថ្ងៃទី២០ ខែមីនា ឆ្នាំ២០២៤ បញ្ជាក់ថា ក្នុងអំឡុងពិធីបុណ្យចូលឆ្នាំថ្មីខ្មែរខាងមុខនេះ នៅតាមបណ្ដាវត្តអារាមទាំងអស់មិនត្រូវលេងល្បែងណាដែលបង្កឱ្យមានគ្រោះថ្នាក់ គឺត្រូវងាកមកលេងល្បែងប្រជាប្រិយខ្មែរ។

ក្រសួងបន្ថែមថា៖ «គ្រប់វត្តអារាមមិនត្រូវឱ្យមានការលេងល្បែងដែលអាចបង្កឱ្យមានគ្រោះថ្នាក់ដូចជា បាញ់ទឹក ជះទឹក ប៉ាតម្សៅ ល្បែងស៊ីសង និងគ្រឿងផ្ទុះជាដើម»។

ក្រសួងបញ្ជាក់ទៀតថា៖ «គ្រប់វត្តអារាមរៀបចំលេងល្បែងប្រជាប្រិយនានាដូចជា ចោលឈូង បោះអង្គញ់ ទាញព្រ័ត្រ លាក់កន្សែង ដណ្ដើមស្លឹកឈើ […] និងរបាំប្រជាប្រិយខែ្មរដូចជា រាំវង់ រាំក្បាច់ សារ៉ាវ៉ាន់ ឡាំលាវ ឆៃយ៉ាំ ត្រុដិជាដើម ហើយរាល់ការលេងល្បែង និងរបាំប្រជាប្រិយឱ្យត្រឹមត្រូវតាមក្បួនខ្នាតលក្ខណៈប្រពៃណីជាតិខ្មែរ និងប្រកបដោយសុវត្ថិភាព»។

ក្រសួងបន្ថែមថា គ្រប់វត្តអារាមមានការសហការរៀបចំតុបតែងសម្អាត និងប្រារព្ធពិធីបុណ្យតាមប្រពៃណីជាតិខ្មែរ និងត្រូវដាក់តាំងព្រះឆាយាលក្ខណ៍ សម្ដេចព្រះមហាសង្ឃរាជ ទេព វង្ស ផងដែរ។

ញូសន៍រូមខេមបូឌា (Newsroom Cambodia) មិនអាចទាក់ទងសុំការបន្ថែមពីលោក សេង សុមុនី អ្នកនាំពាក្យក្រសួងធម្មការ និងសាសនាបានទេ។

គួរបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរនៅឆ្នាំនេះ នឹងប្រារព្ធឡើងរយៈបេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤៕

សង្គមស៊ីវិល និងពលរដ្ឋប្រារព្ធទិវាអន្តរជាតិនារីដោយជំរុញឱ្យរដ្ឋាភិបាលលើកកម្ពស់សិទ្ធិស្រ្តី

សេង សុខហ៊ុន (SENG SOKHUN) — Sun, 10 Mar 2024 03:59:41 +0000

អង្គការសង្គមស៊ីវិល និងពលរដ្ឋប្រមាណជា៥០០នាក់ ជួបជុំគ្នានៅទីលានប្រជាធិបតេយ្យ កាលពីថ្ងៃទី៨ ខែមិនា ដើម្បីរំឮកទិវាអន្តរជាតិនារី ដោយមានការទាមទារឱ្យរដ្ឋាភិបាលអាណត្តិថ្មីគោរពសិទ្ធិស្រ្តី និងដោះលែងសកម្មជនទាំងអស់ដែលកំពុងជាប់ឃុំនៅពន្ធធនាគារ។

ការប្រារព្ធទិវាអន្តរជាតិនារី លើកទី១១៣ នៅទីលានប្រជាធិបតេយ្យ នាព្រឹកថ្ងៃទី៨ ខែមិនាឆ្នាំ២០២៤ ធ្វើឡើងក្រោមប្រធានបទ «ធានាសិទ្ធិសេរីភាពស្ត្រី និងក្មេងស្រីដើម្បីស្ថិរភាពសេដ្ឋកិច្ច និងយុត្តិធម៌សង្គម»។ ក្រុមតំណាងអង្គការដែលធ្វើការផ្នែកផ្សេងៗគ្នា បានលើកឡើងពីបញ្ហាប្រឈមក្នុងវិស័យរបស់ពួកគេ ពាក់ព័ន្ធនឹងសិទ្ធិមនុស្ស សិទ្ធិការងារ និងការចោទប្រកាន់ និងចាប់ខ្លួនសកម្មជនផ្សេងៗ។

លោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជាថ្លែងក្នុងកម្មវិធីនោះថា ការប្រារព្ធទិវានារីអន្តរជាតិនេះឡើងដើម្បីអបអរទិវានេះដោយទទួលបាននូវការខិតខំប្រឹងប្រែងពីវីរៈភាពស្រី្ដ ពង្រឹងសាមគ្គីភាពរវាងអង្គការសង្គមស៊ីវិល សហគមសហជីព និងកិច្ចសហប្រតិបត្តិការរវាងក្រសួងពាក់ព័ន្ធដៃគូក្នុងការធានាបាននូវសិទ្ធិរបស់ស្រ្តី ក្មេងស្រី ដើម្បីស្ថិរភាពសង្គម និងសង្គមយុត្តិធម៌ និងដើម្បីបើកឱកាសឱ្យមានការចូលរួមជាសាធារណៈក្នុងការលើកកម្ពស់តម្រូវការឆ្លើយតបសមភាពយេនឌ័រឱ្យមានប្រសិទ្ធភាព។

លោកស្រីបន្ថែមទៀតថា៖ «ពួកយើងសង្ឃឹមថា មានដំណោះស្រាយទាំងអស់នឹងចំនួន៣ចំណុច ទី១ ភាគីពាក់ព័ន្ធសាធារណៈជនកម្មករនិយោជិតបានស្វែងយល់អំពីបញ្ហាប្រឈមរបស់ស្ដ្រី ក្មេងស្រី ជាពិសេសអ្នកការពារសិទ្ធិមនុស្ស។ ទី២ ភាគីពាក់ព័ន្ធ សាធារណៈជន កម្មករនិយោជិតមានឱកាសក្នុងការជួបជុំបណ្ដាញដែលបានលើកឡើងអំពីបញ្ហាប្រឈមដែលប្រទះសព្វថ្ងៃ និងអនុវត្តសិទ្ធិសេរីភាព រួមទាំងតម្រូវការ និងអនុសាសន៍សំខាន់ៗចំនួន១៦ចំណុច។ ទី៣ បញ្ហាដែលបានលើកឡើងនៅទិវានេះ ត្រូវបានពិចារណា ឬត្រូវបានដោះស្រាយ និងបង្កើតឱ្យមានគោលនយោបាយឱ្យមានការចូលរួមនូវការអនុវត្តជាពិសេសសំណាក់រាជរដ្ឋាភិបាល»។

កញ្ញា មាន លីសា សមាជិកចលនាមាតាធម្មជាតិ បានលើកពីចំណាប់អារម្មណ៍ក្នុងទិវានារីអន្តរជាតិថា ស្រ្ដីត្រូវបានគេដាក់សម្ពាធគ្រប់បែបយ៉ាង ប៉ុន្ដែស្រ្ដីនៅតែក្រោកឈរជំនះទាមទារពីការរើសអើង ស្រ្ដីទាមទារឱ្យមានការគោរពសិទ្ធិមនុស្សជាពិសេសស្ដ្រីត្រូវបានលើកទឹកចិត្តឱ្យចូលរួមគ្រប់សកម្មភាពដែលបម្រើប្រយោជន៍ដល់សង្គម និងប្រទេសជាតិ ពិសេសកូនចៅជំនាន់ក្រោយ។

កញ្ញាបញ្ជាក់ថា៖ «សកម្មភាពតស៊ូមតិមិនមែនជាបទឧក្រិដ្ឋទេ»។

ក្នុងការប្រារព្ធទិវានារីអន្តរជាតិនោះ គេឃើញមានខាងតំណាងស្ថានទូត និងអង្គការជាតិ និងអន្តរជាតិជាច្រើនបានចូលរួមផងដែរ។

កញ្ញា សំ សីម៉ា និង កញ្ញា វ៉ាយ ឡាង ជាយុវជនស្ម័គ្រចិត្តនៅអង្គការកម្មវិធីអភិវឌ្ឍធនធានយុវជន (YRDP) បានថ្លែងពីតម្រូវការទាំង១៦ចំណុចស្ដីពីសិទ្ធិសេរីភាពរបស់ស្ដ្រី និងជំរុញឱ្យរដ្ឋាភិបាលពន្លឿនការទប់ស្កាត់អំពើហិង្សាក្នុងគ្រួសារ ការផ្ដល់សេវាគាំពារសង្គមដល់ស្រី្ដមានផ្ទៃពោះ កុមារ និងស្ដ្រីមានពិការភាព ពង្រឹងគុណភាពអប់រំនៅសាលារដ្ឋ និងផ្ដល់អាហាររូបករណ៍ថ្នាក់ឧត្តមសិក្សា។

កាលពីថ្ងៃទី៧ ខែមីនា ឆ្នាំ២០២៤ មុនមួយថ្ងៃនៃទិវានារីអន្តរជាតិ លោកនាយករដ្ឋមន្រ្តី ហ៊ុន ម៉ាណែត បានថ្លែងក្នុងវីដេអូមួយថា វត្តមានស្ត្រីកម្ពុជាពិតជាសំខាន់ក្នុងការជួយសម្រួលជីវភាពគ្រួសារ និងកំណើនសេដ្ឋកិច្ចសង្គម។ លោកបន្តថា រដ្ឋាភិបាលកម្ពុជាបាននឹងកំពុងរៀបចំដាក់ចេញនូវគោលនយោបាយជាតិស្ដីពីសមភាពយេនឌ័រ គោលនយោបាយគាំទ្រដល់សហគ្រិនស្រ្ដី គោលនយោបាយត្រួតពិនិត្យបន្ថែមទៅលើប្រព័ន្ធគាំពារសង្គម គោលនយោបាយដោះស្រាយបញ្ហាគម្លាតយេនឌ័រលើវិស័យឌីជីថល និងលើកកម្ពស់ស្រ្ដីក្នុងវិស័យផ្សេងៗនិងក្នុងគ្រួសារផងដែរ៕

រដ្ឋាភិបាលណែនាំអាជ្ញាធរមូលដ្ឋានពង្រឹងការបម្រើប្រជាពលរដ្ឋ

សេង សុខហ៊ុន (SENG SOKHUN) — Tue, 05 Mar 2024 09:00:09 +0000

រដ្ឋាភិបាលកម្ពុជាបានណែនាំអាជ្ញាធរមូលដ្ឋាន និងកងកម្លាំងមានសមត្ថកិច្ចឱ្យបម្រើពលរដ្ឋប្រកបដោយទំនួលខុសត្រូវ និងដោះស្រាយបញ្ហានៅតាមមូលដ្ឋានឱ្យបានទាន់ពេលវេលា។

ក្នុងសេចក្ដីណែនាំរបស់រដ្ឋាភិបាលស្ដីពី «ការពង្រឹង និងលើកកម្ពស់ប្រសិទ្ធភាពក្នុងការបំពេញការងាររបស់ក្រុមការងាររាជរដ្ឋាភិបាលចុះមូលដ្ឋាន» ចេញកាលពីថ្ងៃទី ១ ខែ មីនា ឆ្នាំ ២០២៤ ឱ្យដឹងថា រាជធានី ខេត្ត ដែលមិនទាន់រៀបចំក្រុមការងារថ្នាក់មូលដ្ឋាន ត្រូវជំរុញចាត់តាំងឱ្យរួចរាល់យ៉ាងយូរត្រឹមខែមីនា ឆ្នាំ២០២៤ និងរាយការណ៍អំពីការចាត់តាំងមកទីស្ដីការគណៈរដ្ឋមន្រ្ដីនៅដើមខែមេសា។ ចំណែកអភិបាលនៃគណៈអភិបាលជាអនុប្រធានអចិន្រ្ដៃយ៍ក្រុមការងារ ត្រូវពិនិត្យនិងរៀបចំឡើងវិញ កែសម្រួលផ្លាស់ប្ដូរក្រុមការងារ ប្រជុំ ចុះបំពេញការងារតាមមូលដ្ឋាន ធ្វើរបាយការណ៍ ប្រមូលទិន្នន័យ និងបំពេញការងារផ្សេងៗទៀតតាមការស្នើសុំពីក្រុមការងារ ។

សេចក្ដីណែនាំនេះបញ្ជាក់ទៀតថា៖ «ក្រុមការងាររាជរដ្ឋាភិបាលចុះតាមមូលដ្ឋានគ្រប់លំដាប់ថ្នាក់ ត្រូវខិតខំយកចិត្តទុកដាក់ចុះតាមមូលដ្ឋានដែលក្រុមការងារនីមួយៗទទួលខុសត្រូវ ដើម្បីសហការផ្សព្វផ្សាយជំរុញការអនុវត្តនូវកម្មវិធីនយោបាយ យុទ្ធសាស្រ្តបញ្ចកោណដំណាក់កាលទី១ កម្មវិធីគោលនយោបាយជាអាទិភាពទាំង៦ និងវិធានការជាគន្លឹះរបស់រាជរដ្ឋាភិបាល ព្រមទាំងពង្រឹងកិច្ចសហការជមរុញការដោះស្រាយឆ្លើយតបបញ្ហាប្រឈមនានារបស់ប្រជាពលរដ្ឋនៅមូលដ្ឋានឱ្យបានទាន់ពេលវេលា និងមានប្រសិទ្ធភាព»។

លោក ប៉ែន បូណា រដ្ឋមន្រ្ដីប្រតិភូអមនាយករដ្ឋមន្ដ្រី និងជាប្រធានអង្គភាពអ្នកនាំពាក្យរាជរដ្ឋាភិបាលបានប្រាប់ញូវស៍រូមខេមបូឌា (Newsroom Cambodia) ថា រដ្ឋាភិបាលកម្ពុជាតែងតែបង្កើតក្រុមការងារចុះតាមមូលដ្ឋានដើម្បីបម្រើ និងដោះស្រាយទុក្ខលំបាក និងសំណូមពររបស់ពលរដ្ឋ។

លោកបានថ្លែងថា៖ «សមាជិករាជរដ្ឋាភិបាលទាំងអស់តាំងពីថ្នាក់ជាតិដល់ថ្នាក់ក្រោមជាតិ ធ្វើការបម្រើប្រជាពលរដ្ឋដោះស្រាយសំណូមពរ ទុក្ខលំបាកប្រជាពលរដ្ឋ»។

លោកបន្ថែមថា៖ «ឥឡូវនេះទោះបីជារដ្ឋាភិបាលយើងមានអ្នកបន្ដវេនថ្មី ប៉ុន្ដែគោលការណ៍ចុះជាប់បម្រើប្រជាពលរដ្ឋនៅតាមមូលដ្ឋានហ្នឹងនៅតែគោរព ហើយនិងជំរុញបង្កើនល្បឿនជានិច្ច ដើម្បីធ្វើយ៉ាងម៉េចបម្រើប្រជាពលរដ្ឋឱ្យកាន់តែល្អប្រសើរពីមួយអាណត្តិទៅមួយអាណតិ្ត»។

លោក មាស នី អ្នកសិក្សាពីការវិវត្តសង្គម និងជាអ្នកវិភាគនយោបាយប្រាប់ញូវស៍រូមខេមបូឌា ថា ការណែនាំអាជ្ញាធរមូលដ្ឋានពង្រឹងការបម្រើប្រជាពលរដ្ឋ គឺដើម្បីជាការលើកស្ទួយប្រជាប្រិយភាពរបស់រដ្ឋាភិបាល។ លោកបន្តថា តាមរយៈលទ្ធផលការបោះឆ្នោតកាលពីឆ្នាំ ២០១៣-២០១៧ បញ្ហានៃការធ្លាក់ចុះប្រជាប្រិយភាពរបស់រដ្ឋាភិបាល គឺមានមួយផ្នែកបណ្តាលមកពីភាពអសកម្មរបស់មន្រ្ដីដែលបម្រើការជួររដ្ឋាភិបាលដែលធ្វើការឱ្យគណបក្ស។

លោកបន្ដថា៖ «ពីដើមមកយើងឃើញមានការបង្កើតក្រុមការងារច្រើនណាស់ ប៉ុន្ដែទីបំផុតវានៅតែអត់ដើរឱ្យមាននិរន្ដភាព។ មួយប្រាវទៅបាត់ទៅ ឬក៏មិនមានប្រសិទ្ធភាពតែម្ដង»។

លោកបន្ថែមថា ប្រសិនបើយន្តការនេះបង្កើតឱ្យមានការត្រួតពិនិត្យឱ្យបានច្បាស់លាស់ ដោយឱ្យមន្ដ្រីរាជការបំពេញកាតព្វដោយឯករាជ្យ ហើយរដ្ឋាភិបាលទទួលបានព័ត៌មានពិត នោះនឹងមានប្រសិទ្ធភាព៕

Vox Pop៖ ទស្សនៈរបស់និស្សិតទៅលើទីផ្សារការងារនៅកម្ពុជាក្រោយពេលបញ្ចប់ការសិក្សា

សេង សុខហ៊ុន (SENG SOKHUN) — Fri, 01 Mar 2024 11:36:08 +0000

ភ្នំពេញ៖ គោលបំណងសំខាន់របស់និស្សិតភាគច្រើន គឺរំពឹងថាក្រោយពេលទទួលបានការសិក្សារៀនសូត្រច្រើន និស្សិតទាំងនោះនឹងទទួលបានការងារល្អ និងប្រាក់ខែខ្ពស់ ជាពិសេស ពួកគេចង់បានការងារដែលខ្លួនស្រឡាញ់ និងអាចយកជំនាញដែលខ្លួនបានរៀនសូត្រកន្លងមកយកទៅប្រើប្រាស់ក្នុងវិស័យការងារ។ និស្សិតទាំងនោះ សង្ឃឹមថាពួកគេនឹងមានលទ្ធភាពចិញ្ចឹមខ្លួនឯង មានភាពជាម្ចាស់ការ និងក្លាយជាបង្គោលដែលអាចផ្គត់ផ្គង់គ្រួសារ។

Newsroom Cambodia បានសម្ភាសនិស្សិតមួយចំនួនមកពីភ្នំពេញ និងបណ្ដាខេត្តនានាក្នុងប្រទេសដែលកំពុងបន្ដការសិក្សា និងរស់នៅរាជធានីភ្នំពេញ អំពីការយល់ឃើញទៅលើទីផ្សារការងារនៅកម្ពុជាក្រោយបញ្ចប់ការសិក្សា។

លោក សូត្រ សំបូរ អាយុ ២០ឆ្នាំ ជានិស្សិតនៅសាកលវិទ្យាល័យភូមិន្ទភ្នំពេញជំនាញគ្រប់គ្រងពាណិជ្ជកម្មអន្តរជាតិ លើកឡើងថាទីផ្សារការងារគឺមានសម្រាប់និស្សិតដែលខិតខំប្រឹងប្រែងរៀនសូត្រ និងបណ្ដុះបណ្តាលសមត្ថភាពរបស់ខ្លួនទៅលើជំនាញនីមួយៗដែលខ្លួនជ្រើសរើស។

លោកបញ្ជាក់ថា៖ «ប្រសិនបើយើងខិតខំប្រឹងប្រែងរៀនកាន់តែច្រើនឲ្យបានកាន់តែស៊ីជម្រៅ ជំនាញនឹងរត់មករកយើង ហើយសំខាន់យើងមានសមត្ថភាពធ្វើវាអត់»។

លោក សូត្រ សំបូរ

លោក សុខុម ច័ន្ទរិទ្ធ អាយុ ២៦ឆ្នាំ ជានិស្សិតនៅវិទ្យាស្ថានភាសាបរទេសជំនាញទំនាក់ទំនងវិជ្ជាជីវៈ(Professional Communication) លើកឡើងថា និស្សិតដែលបញ្ចប់ការសិក្សាត្រូវប្រឹងរកការងារតាមប្រព័ន្ធអនឡាញ ឬវេបសាយដែលបានបង្ហោះអំពីការងារទៅតាមផ្នែក ឬតួនាទីនីមួយៗដែលនិស្សិតចង់ធ្វើ។

លោកបញ្ជាក់ថា៖ «ភាគច្រើនលោក[ស្វែង]រក[ការងារ]តាមវេបសាយច្រើនជាងព្រោះដោយសារតែនៅតាមហាង ក្រុមហ៊ុន ស្ថាប័នផ្សេងៗ ភាគច្រើនទាល់តែយើងមានប្រវត្តិការងារនិងបទពិសោធន៍ការងារហើយ យើងអាចដាក់ប្រវិត្តរូបអីចឹងទៅ»។

លោកបន្ថែមថា៖ «លោកមានក្ដីបារម្ភច្រើនចំពោះទីផ្សារការងារនៅកម្ពុជាដោយសារមិនសូវមានភាពទូលំទូលាយហើយដោយសារប្រទេសយើងស្ថិតនៅក្នុងប្រទេសកំពុងអភិវឌ្ឍន៍ដល់ពេលចឹង គឺយើងព្យាយាម រកសង្វាសខ្លួនឯង ចឹងខ្ញុំគិតថាវាពិតហើយវាផ្ដល់ផលវិបាកសម្រាប់យើងនិងសម្រាប់ សិស្ស ផ្សេងៗ»។

លោក សុខុម ច័ន្ទរិទ្ធ

កញ្ញា សន បញ្ញា អាយុ២០ នៅវិទ្យាស្ថានបច្ចេកទេសកម្ពុជាជំនាញគីមីចំណីអាហារ លើកឡើងពីទស្សនៈថាក្រោយពេលបញ្ជប់ការសិក្សាលើជំនាញដែលគាត់រៀនគឺមានទីផ្សារក្នុង [ស្រុក] ដោយសារកម្ពុជាត្រូវការអ្នកមានបទពិសោធក្នុងជំនាញកែច្នៃអាហារនិងនាំអាហារទៅក្រៅប្រទេស។

កញ្ញាប្រាប់ថា៖«ខ្ញុំគិតថាល្អសម្រាប់មុខវិជ្ជាខ្ញុំកំពុងរៀននិងដោយសារតែយើងត្រូវការកែច្នៃច្រើនខ្ញុំឥឡូវរៀនខាងគីមីចំណីអាហារ ចឹងហើយប្រទេសយើង ត្រូវការអ្នកដែលមានបទពិសោធ ក្នុងការធ្វើកែច្នៃផលិតផលក្នុងស្រុក។ ដើម្បីបម្រើការក្នុងស្រុកផង ដើម្បីនាំចេញផង ដោយសារខ្ញុំឃើញភាគច្រើននៅក្រៅស្រុកអត់មានផលិតផលខ្មែរប៉ុន្មានទេ»។

កញ្ញា សន បញ្ញា

លោក ពឿន ប៉ូលីស អាយុ ២២ឆ្នាំ ជានិស្សិតនៅវិទ្យាស្ថានភាសាបរទេស ជំនាញភាសាអង់គ្លេសលើកឡើងថា ទីផ្សារនៅកម្ពុជាមានភាពទូលំទូលាយ តែទាមទារឲ្យមានការកែសម្រួលឲ្យកាន់តែល្អប្រសើរជាងកាលពីមុន។ លោកបន្ដថា ទាក់ទងនឹងប្រាក់បៀវត្ស ប្រាក់កម្រៃនិងអត្តប្រយោជន៍ ដែលទទួលបានពីការងារគឺតិចតួចនៅឡើយ។ លោកបន្តថា សម្រាប់ទីផ្សារការងារមានការប្រកួតប្រជែងមិនស្មើគ្នា ប្រកាន់បក្សពួកច្រើន និងមិនផ្ដោតទៅលើសមត្ថភាពរបស់និស្សិតទេ។

លោកបញ្ជាក់ថា៖ «ទៅធ្វើការ គឺបានតែប្រាក់ខែតែប៉ុណ្ណឹងឯង អត់មានទាក់ទងនឹងការធានារ៉ាប់រងទៅលើសុខភាព ឬក៏ទៅលើគ្រួសាររបស់គាត់គឺអត់មានអីទាំងអស់»។

លោកបន្ថែមថា៖ «បើយើងចង់ធ្វើការនេះ ទាល់យើងស្គាល់គ្នា។ បើយើងអត់ស្គាល់គ្នាគឺថាកន្លែង នឹង គឺយើងអត់អាចចូលសោះម៉ង»។

លោក ពឿន ប៉ូលីស

អគ្គិសនីកម្ពុជា សម្រេចផ្តល់ថាមពលអគ្គិសនីកម្លាំងធំដល់ពលរដ្ឋ សម្រាប់ពេលពិធីបុណ្យតាមគេហដ្ឋាន

សេង សុខហ៊ុន (SENG SOKHUN) — Tue, 27 Feb 2024 10:53:16 +0000

ភ្នំពេញ៖ អគ្គិសនីកម្ពុជា សម្រេចផ្តល់ថាមពលអគ្គិសនីកម្លាំងធំដល់ពលរដ្ឋក្នុងពេលពិធីបុណ្យផ្សេងៗតាមការស្នើសុំរបស់ពលរដ្ឋ។ នេះបើយោងតាមសេចក្តីជូនដំណឹងរបស់អគ្គិសនីកម្ពុជាដែលNewsroom ទទួលបាននៅថ្ងៃទី២៦ ខែកុម្ភៈ។

យោងតាមសេចក្ដីជូនដំណឹង ចេញកាលពីថ្ងៃទី២១ ខែកុម្ភៈ ឆ្នាំ២០២៤នេះ បញ្ជាក់ថាដើម្បីជួយសម្រួលដល់តម្រូវការប្រើប្រាស់អគ្គិសនីកម្លាំងធំ ក្នុងការប្រារព្ធពិធីផ្សេងៗនៅតាមគេហដ្ឋានរបស់ពលរដ្ឋ អគ្គិសនីកម្ពុជា ផ្តល់ការប្រើប្រាស់ដល់ 3ph x 100Aឬ 70kVA (ចេញពីខ្សែបណ្ដាញចែកចាយសាធារណៈ)។ សេចក្ដីជូនដំណឹងដដែលបន្ថែមថា ពលរដ្ឋដែលមានបំណងស្នើសុំ ការប្រើប្រាស់អគ្គិសនី កម្លាំងធំ ក្នុងរយៈពេលខ្លី អាចស្នើសុំតាម EDG App ឬតាមបណ្ដាសាខារបស់អគ្គិសនីឲ្យបាន យ៉ាងហោច១៥ថ្ងៃមុនពេលត្រូវការប្រើប្រាស់។ ក្នុងករណីមានពិធីបុណ្យសព ពលរដ្ឋអាចស្នើសុំបានភ្លាមៗ ហើយថ្លៃថាមពលប្រើប្រាស់ត្រូវកត់ក្នុងវិក្កយបត្រ។

សេចក្ដីជូនដំណឹងបញ្ជាក់ថា៖ «ការចំណាយលើការដំឡើងនាឡិកាស្ទង់ ឌីសុងទ័រនិងបរិក្ខាផ្សេងៗសម្រាប់ការប្រើប្រាស់ជាបណ្ដោះអាសន្នក្នុងអំឡុងពេលប្រារព្ធពិធី និងការប្រចាំការថែរក្សាចរន្តជាបន្ទុករបស់អគ្គិសនីលើកលែងតែខ្សែបណ្ដាញនិងគ្រឿងបរិក្ខាអគ្គិសនីចាប់ពីក្រោមឌីសុងទ័ររបស់អគ្គិសនីកម្ពុជាជាបន្ទុករបស់អតិថិជន»៕

សេង សុខហ៊ុន (SENG SOKHUN) – Newsroom Cambodia

បទយកការណ៍៖ ទីផ្សារ និងទិន្នផលម្រេចកំពតបន្តធ្លាក់ចុះដោយសារ​បញ្ហា​អាកាសធាតុ​

បទយកការណ៍៖ រដ្ឋាភិបាល​ផ្តល់​សេវាលិខិតថ្កោលទោស​តាមប្រព័ន្ធឌីជីថល ខណៈពលរដ្ឋចង់​បាន​ការ​សម្រួល​បន្ថែម​

កម្រងរូបភាព៖ មុខរបរដាំ និង​លក់បន្លែនៅរាជធានីភ្នំពេញ

សកម្មជន និងសង្គមស៊ីវិលទទូចឱ្យរដ្ឋាភិបាលបើកសិទ្ធិសេរី​ភាពនិងគាំទ្រ​សកម្មភាពការពារ​បរិស្ថាន​ ​

Q&A៖ ការគោរពសិទ្ធិមនុស្សនៅកម្ពុជា​នៅ​មានកម្រិត​នៅឡើយ

សង្គមស៊ីវិល និងពលរដ្ឋ​ប្រារព្ធទិវា​អន្តរជាតិនារីដោយជំរុញ​ឱ្យ​រដ្ឋាភិបាល​​លើកកម្ពស់​សិទ្ធិ​ស្រ្តី​

រដ្ឋាភិបា​ល​ណែនាំ​​អាជ្ញាធរ​​​មូលដ្ឋាន​​​ពង្រឹង​ការ​​​​បម្រើ​ប្រជាពលរដ្ឋ​

Vox Pop៖ ទស្សនៈ​របស់​និស្សិត​ទៅ​លើ​ទីផ្សា​រ​ការងារ​នៅ​កម្ពុជា​ក្រោ​យ​ពេល​បញ្ចប់​ការ​សិក្សា

អគ្គិសនី​កម្ពុជា សម្រេចផ្តល់​ថាមពល​អគ្គិសនីកម្លាំង​ធំដល់ពលរដ្ឋ​ សម្រាប់​ពេល​ពិធី​បុណ្យ​តាម​គេហដ្ឋាន​