សេន តុលា (Sen Tola) – Newsroom Cambodia

ក្រសួងសុខាភិបាលអនុញ្ញាតឱ្យប្រើវ៉ាក់សាំង Sinopharm covid-19 របស់ចិន សម្រាប់លក្ខខណ្ឌបន្ទាន់

សេន តុលា (Sen Tola) — Thu, 04 Feb 2021 07:42:48 +0000

ក្រសួងសុខាភិបាលនៅថ្ងៃព្រហស្បតិ៍នេះបាន ចេញសេចក្ដីអនុញ្ញាតមួយ ដោយសម្រេចឱ្យប្រើប្រាស់វ៉ាក់សាំង ឈ្មោះ Sinopharm Covid-19 ដែលជាវ៉ាក់សាំងការពារជំងឺកូវីដ១៩នាំមកពីប្រទេសចិន ក្នុងលក្ខខណ្ឌនៃការប្រើប្រាស់បន្ទាន់។

ក្នុងសេចក្ដីអនុញ្ញាតរបស់ក្រសួងសុខាភិបាល ចេញដោយរដ្ឋមន្រ្តីក្រសួងសុខាភិបាល លោក ម៉ម ប៊ុនហេង នភថ្ងៃទី០៤ ខែមករា ឆ្នាំ ២០២១នេះ បញ្ជាក់ថា៖ «ក្រសួងសុខាភិបាលនៃព្រះរាជាណាចក្រកម្ពុជា អនុញ្ញាតឲ្យប្រើប្រាស់នូវវ៉ាក់សាំង Sinopharm Covid-19 ដែលផលិតដោយវិទ្យាស្ថាន Beijing Institute of Biological Products Co,Ltd នៃសាធារណរដ្ឋប្រជាមានិតចិន ក្នុងលក្ខខណ្ឌនៃការប្រើប្រាស់បន្ទាន់ (Emergency Use Authorization) ដោយអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ១៩ របស់រាជរដ្ឋាភិបាល»។

គិតមកត្រឹមថ្ងៃព្រហស្បតិ៍ ទី០៤ ខែកុម្ភ: ឆ្នាំ២០២១ នេះ កម្ពុជារកឃើញអ្នកឆ្លងជំងឺកូវីដ១៩ថ្មីចំនួន០១ នាក់ ដែលជាអ្នកដំណើរមកពីប្រទេសគុយវ៉ែត និងជាសះស្បើយចំនួន០៤នាក់។ អ្នកឆ្លងសរុបមានចំនួន៤៦៧នាក់ ជាសះស្បើយចំនួន៤៥១នាក់ ហើយអ្នកកំពុងសម្រាកព្យាបាលមានចំនួន១៦នាក់៕

លោក ហ៊ុន សែន ថា ប្រេងឆៅដែលកម្ពុជាផលិតបានជាង១ខែនេះ មានកម្រិតទាបនៅឡើយ

សេន តុលា (Sen Tola) — Mon, 01 Feb 2021 08:38:58 +0000

លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះថ្លែងថា ប្រេងឆៅដែលកម្ពុជាបានផលិតក្នុងរយៈពេលជាងមួយខែមកនេះ មានកម្រិតទាបនៅឡើយ ដោយសារផលិតបានត្រឹមតែ៧០០០ ទៅ៧៥០០បារ៉ែល ឬស្មើនឹងជាង១លានលីត្រតែប៉ុណ្ណោះក្នុងមួយថ្ងៃ។

លោកនាយករដ្ឋមន្រ្តី ហ៊ុន សែន ថ្លែងបែបនេះក្នុងពិធីសម្ពោធការបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាខែង និងដាក់ឲ្យដំណើរការរោងចក្រប្រព្រឹត្តកម្មទឹកស្អាតចំការមក នៅថ្ងៃទី១ ខែកុម្ភៈ ឆ្នាំ២០២១។ លោកបញ្ជាក់ថា ប្រេងឆៅដែលកម្ពុជាកំពុងដំណើរផលិតជាមធ្យមបាន៧០០០ ទៅ៧៥០០បារ៉ែលក្នុងមួយថ្ងៃនេះ គឺជាចំនួនដែលតូចខ្លាំង ហើយលោកថា ចំនួននេះមិនអាចមានឥទ្ធិពលដល់សេដ្ឋកិច្ចជាតិបាននោះទេ។

លោកបញ្ជាក់ថា៖ «គឺជាទំហំតូចណាស់ វាមិនទាន់ជះឥទ្ធិពលទៅផ្នែកសេដ្ឋកិច្ចទេ ប៉ុន្តែយ៉ាងណាក៏ដោយវាជាការចាប់ផ្ដើមមួយដ៏ល្អនៃដំណើរការឧស្សាហកម្មប្រេង»។

លោកបានបន្ថែមថាសម្រាប់តម្លៃប្រេងបើស្ថិតក្នុងរង្វង់៥៥ដុល្លារអាមេរិកក្នុងមួយបារ៉ែល នោះចំណូលរបស់កម្ពុជាក្នុងមួយឆ្នាំគឺទទួលមិនបានដល់៣០លានដុល្លារនោះទេ។

លោកថា៖ «អីចឹងវាមិនបានស្មើជាមួយនិងចំណូលមិនមែនសារពើពន្ធ ទៅលើទិដ្ឋាការនៃទេសចរក្នុងមួយលាននាក់ផង និងមិនទាន់ពឹងផ្អែកលើបញ្ហាប្រេងបានទេ»។

កាលពីថ្ងៃទី២៩ ខែធ្នូ ឆ្នាំ២០២០ រដ្ឋាភិបាលបានប្រកាសពីការទទួលបានតំណក់ប្រេងដំបូងនៅកម្ពុជា។ លោកនាយករដ្ឋមន្រ្តី ហ៊ុន សែន នាពេលនោះប្រកាសថា នេះជាការចាប់ផ្ដើមមួយជំហានដំបូងដ៏សំខាន់សម្រាប់កម្ពុជាឆ្ពោះទៅបង្កើតបាននូវសមត្ថភាពជាតិ និងខឿនឧស្សាហកម្មប្រេងកាត ឧស្ម័ន និងថាមពលនៅកម្ពុជា។ លោកបន្ថែមថា ចំណូលបានពីប្រេងនឹងយកទៅអភិវឌ្ឍន៍វិស័យអប់រំ និងសុខាភិបាល។

យោងតាមការផ្សាយរបស់សារព័ត៌មានរ៉យទ័រ រដ្ឋាភិបាលកម្ពុជាមានភាគហ៊ុន៥% ក្នុងការបណ្តាក់ទុនជាមួយក្រុមហ៊ុន KrisEnergy និងថា កម្ពុជានឹងទទួលបានប្រមាណជា៥០០លានដុល្លារ ជាថ្លៃពន្ធ និងផ្សេងៗ៕

វ៉ាក់សាំងការពារជំងឺកូវីដ១៩ ចំនួន៦០ម៉ឺនដូស នឹងត្រូវបញ្ជូនមកកម្ពុជាក្នុងខែកុម្ភ:ឆ្នាំ២០២១នេះ

សេន តុលា (Sen Tola) — Mon, 01 Feb 2021 07:42:31 +0000

លោកនាយករដ្ឋមន្រ្តី ហ៊ុន សែន នៅព្រឹកថ្ងៃចន្ទនេះប្រកាសថា វ៉ាក់សាំងការពារជំងឺកូវីដ១៩ ចំនួន៦០ម៉ឺនដូសនឹងត្រូវបញ្ជូនពីប្រទេសចិនមកកាន់កម្ពុជាក្នុងអំឡុងខែកុម្ភ: ឆ្នាំ២០២១នេះ។

លោកនាយករដ្ឋមន្រ្តី ហ៊ុន សែន ថ្លែងបែបនេះក្នុងពិធីសម្ពោធការបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាខែង និងដាក់ឲ្យដំណើរការរោងចក្រប្រព្រឹត្តកម្មទឹកស្អាតចំការមក នៅថ្ងៃទី១ ខែកុម្ភៈ ឆ្នាំ២០២១។ លោកលើកឡើងថា កម្ពុជាត្រូវត្រៀមវ៉ាក់សាំងចំនួន២០លានដូសសម្រាប់មនុស្ស១០លាននាក់ ដែលកាត់បន្ថយពី៨០ភាគរយមកនៅត្រឹម៦០ ទៅ៧០ភាគរយ ដែលកាលពីមុនត្រូវការ២៦លានដូសសម្រាប់១៣លាននាក់។

លោកបន្ថែមថា ក្នុងចំណោមជំនួយវ៉ាក់សាំងកូវីដ១៩ ចំនួន១លានដូសរបស់ចិន ៦០ម៉ឺនដូស នឹងមកដល់កម្ពុជាក្នុងខែកុម្ភៈនេះ ហើយនឹងបន្តមកដល់កម្ពុជាបន្តបន្ទាប់ទៀត។ លោកថា ក្រៅពីនោះមានជំនួយពីកូវ៉ាក់ (COVAX) និងប្រទេសមួយចំនួនទៀតដែលកម្ពុជាកំពុងស្នើសុំ និងបញ្ជាទិញ ដែលនឹងមកជាបន្តបន្ទាប់ផងដែរ។

លោកបញ្ជាក់ថា៖ «ជើងទី១ នឹងមកដល់៦០ម៉ឺនដូស បន្ទាប់ទៅនឹងបំពេញបន្ថែម។ បន្ទាប់ទៅយើងនឹងទទួលពីកូវ៉ាក់ (COVAX) ដែលជារបស់អង្គការសុខភាពពិភពលោកចំនួន៧លានដូស បន្ថែមលើនេះយើងទិញតាមរយៈកូវ៉ាក់ ចំនួន១លានដូសទៀត អញ្ចឹងយើងបាន៩លានដូសហើយ ពិតមែនតែមិនទាន់ដល់ដៃ តែគម្រោងរបស់យើងមាន»។

លោកនិយាយថា៖ «យើងនឹងទទួលពីអូស្រ្តាលីចំនួន៣លានដូស ដែលអូស្រ្តាលី សម្រេចផ្តល់ថវិកាចំនួន២៨លានដុល្លារអាមេរិកដល់កម្ពុជា សម្រាប់រយៈពេល ២០២០-២០២៣ តាមរយៈគំនិតផ្តួចផ្តើមទទួលបានវ៉ាក់សាំងកូវីដ១៩ ដែលកញ្ចប់ដំបូងនឹងទទួលបាននៅពាក់កណ្តាលឆ្នាំ២០២១»។

លោកបានបន្តថា ជំនួយឥតសំណងនេះនឹងជួយឱ្យកម្ពុជាអាចទទួលបានវ៉ាក់សាំងដែលអាចប៉ាន់ស្មានថាជួយដល់មនុស្ស១,៥លាននាក់ ដែលស្មើនឹង៣លានដូស ប្រសិនបើបូកសរុបទាំងអស់ទៅបាន១១លានដូស នៅខ្វះ៩លានដូទៀត។

លោកនាយករដ្ឋមន្រ្តីក៏បានបន្ថែមថា លោកក៏បានសរសេរលិខិតទៅនាយករដ្ឋមន្ត្រីចិនដើម្បីសុំ វ៉ាក់សាំងបន្ថែមទៀត រួមទាំងស្នើសុំពីប្រទេសឥណ្ឌាផងដែរ៕

ភ្ញៀវទេសចរអន្តរជាតិនៅកម្ពុជាធ្លាក់ចុះ ៨០% ដោយសារជំងឺកូវីដ ១៩

សេន តុលា (Sen Tola) — Thu, 28 Jan 2021 09:07:12 +0000

រដ្ឋមន្រ្តីក្រសួងទេសចរណ៍ថ្លែងថា អ្នកទេសចរណ៍អន្តរជាតិ៨០% និងអ្នកទេសចរណ៍ជាតិ២០%បានធ្លាក់ចុះចាប់តាំងពីដើមខែមករា ឆ្នាំ២០២០ មកដល់ពេលបច្ចុប្បន្ននេះ ដោយសារតែការរីករាលដាលនៃជំងឺកូវីដ១៩។

លោក ថោង ខុន រដ្ឋមន្រ្តីក្រសួងទេសចរណ៍ថ្លែងបែបនេះក្នុងសិក្ខាសាលារវាងអន្តរក្រសួងមួយស្ដីពីកម្មវិធីវេទិកាអេកូទេសចរណ៍លើកទី២ កាលពីថ្ងៃទី២៧ ខែមករា ក្នុងខេត្តសៀមរាប។ លោកលោកឡើងថា ដោយសារតែវិបត្តិ ជំងឺកូវីដ១៩ បានធ្វើឱ្យចំនួនភ្ញៀវទេសចរដែលមកលេងប្រទេសកម្ពុជាធ្លាក់ចុះជាខ្លាំងគួរឲ្យកត់សម្គាល់ ដោយលោកថា ចំនួនភ្ញៀវទេសចរអន្តរជាតិដែលមកលេងប្រទេសកម្ពុជាថយចុះ៨០% ។

លោកបានថ្លែងថា៖ «ស្ថិតក្នុងបរិយាការណ៍ប្រឈមខាងលើ ដែលធ្វើឱ្យកម្ពុជាទទួលបានភ្ញៀវទេសចរអន្តរជាតិត្រឹមតែប្រមាណ១.៣១លាននាក់ ក្នុងឆ្នាំ២០២០ ថយចុះ៨០%ធៀបនឹងឆ្នាំ២០១៩»។

លោកបានបន្ថែមថា បើទោះជាចំនួនភ្ញៀវទេសចរណ៍អន្តរជាតិមានការថយចុះខ្លាំង ប៉ុន្តែចំនួនភ្ញៀវផ្ទៃក្នុង ឬក្នុងស្រុកបានបង្ហាញពីសញ្ញានៃការងើបឡើងវិញ ដោយចំនួនភ្ញៀវទេសចរក្នុងស្រុកមានប្រមាណជា៩លាននាក់ ហើយបានចុះត្រឹមតែ២០%តែប៉ុណ្ណោះ។

លោក មិន ពិសាល គ្គុទេសក៍ទេសចរណ៍ ភាសាអង់គ្លេស និងបារាំងបានប្រាប់ Newsroom Cambodia តាមរយ:បណ្ដាញសង្គមហ្វេសប៊ុកនៅថ្ងៃទី២៨ ខែមករានេះថា ចាប់តាំងពីកំណើនភ្ញៀវទេសចរអន្តរជាតិបានធ្លាក់ចុះ

តាំងតែពីដើមខែមករា ឆ្នាំ២០២០មក លោកមានផលពិបាកយ៉ាងច្រើនដែលទាក់ទងទៅនឹងការរស់នៅ ហិរញ្ញវត្ថុ និងការចិញ្ចឹមជីវិតប្រចាំថ្ងៃ។

លោករៀបរាប់ថា៖ «ជួនកាលដល់ថ្នាក់លក់ដី លក់របស់របរដែលយើងធ្លាប់ទិញពីមុនមក គឺយើងលក់អស់ហើយដើម្បីផ្គត់ផ្គង់ជីវិតប្រចាំថ្ងៃ ពីព្រោះតែឥលូវយើងអត់មានចំណូល អត់មានភ្ញៀវទេសចរ ចំណូលបាត់បង់អស់រលីង»។

វិបត្តិកូវីដ១៩បានធ្វើឱ្យសកលលោកទាំងមូលមានភាពលំបាក និងរងនូវវិបត្តិសេដ្ឋកិច្ចយ៉ាងធ្ងន់ធ្ងរហើយក៏បានធ្វើឱ្យប្រទេសកម្ពុជាក៏ត្រូវរងផលប៉ះពាលយ៉ាងទម្ងន់ផងដែរ។ ប្រជាជនត្រូវបាត់បង់ការងារដោយសារតែជំងឺផ្លូវដង្ហើមមួយនេះ ហើយក៏បានធ្វើឱ្យវិស័យស្នូលជាច្រើន ជាពិសេសវិស័យទេសចរណ៍របស់ប្រទេសម្ពុជា ត្រូវរងវិបត្តិយ៉ាងធ្ងន់ធ្ងរ៕

វិស័យទេចរណ៍ត្រូវការពេល ២ទៅ ៣ឆ្នាំដើម្បីអាចវិលមកស្ថានភាពដើម ខណៈវិស័យកសិកម្មព្យាករណ៍ថានឹងមានកំណើនខ្ពស់

សេន តុលា (Sen Tola) — Thu, 28 Jan 2021 02:44:34 +0000

វិស័យទេសចរណ៍នៅកម្ពុជា ដែលជាវិស័យស្នូលមួយនៃសេដ្ឋកិច្ចរបស់ប្រទេស អាចត្រូវការពេលវេលាប្រមាណជា ២ ទៅ៣ឆ្នាំទៀត ទើបអាចវិលត្រឡប់មកស្ថានភាពដូចដើម បន្ទាប់ពីមនុស្សរាប់ពាន់នាក់បានបាត់បង់ការងារ និងចំណូលក៏បាត់បង់ ដោយសារតែរងផលប៉ះពាល់ដោយការរាលដាលនៃជំងឺកូវីដ ១៩។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១ បានសរសេរថាវិស័យសេវាកម្ម ឬវិស័យទេសចរណ៍នេះតែម្ដងនឹងមានកំណើនអត្រាទាបត្រឹមតែ ៣,៦% ប៉ុណ្ណោះសម្រាប់ឆ្នាំ២០២១នេះ ហើយប្រសិនបើប្រៀបធៀបនឹងកំណើនអត្រាអវិជ្ជមានត្រឹម - ៣,០% ក្នុងឆ្នាំ២០២០។

ខ្លឹមសារដដែលនេះក៏បានសរសេរបន្ថែមដែរថាសម្រាប់វិស័យសណ្ឋាគារ និងភោជនីយដ្ឋាន កំណើនវិជ្ជមានត្រូវបានរំពឹងថានឹងមានឡើងវិញ ប៉ុន្តែស្ថិតក្នុងកម្រិតទាបតែប៉ុណ្ណោះ ដោយសារធ្លាក់ការចុះលទ្ធភាពក្នុងការធ្វើដំណើរកំសាន្ត ហើយសម្រាប់វិស័យនេះ ទាំងមូលក៏ត្រូវការពេលវេលារហូត ២ ទៅ៣ឆ្នាំទើបអាចងើបទៅរកស្ថានការណ៍ដូចកាលមុន មិនទាន់មានជំងឺកូវីដបានឡើងវិញ។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១នោះក៏បានសរសេរបន្ថែមដែរថាកម្ពុជាអាចប្រឈមនឹងការប្រកួតប្រជែងខ្ពស់ដោយសារគ្រប់បណ្ដារប្រទេសដែលជាគោលដៅទេសចរណ៍ដទៃទៀតគេ ក៏មានវិធានការដើម្បីត្រៀមខ្លួនក្នុងស្រូបទាញភ្ញៀវទេសចរបន្ទាប់ពីស្ថានភាពនៃជំងឺកូវីដបានធូរស្រាលផងដែរ។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១ក៏បាននិយាយផងដែរថា វិស័យកសិកម្មក្នុងឆ្នាំនេះត្រូវបានធ្វើការប៉ានស្មានបានថានឹងអាចមានអត្រាកំណើនរហូតដល់ ១,៦% នៅក្នុងឆ្នាំ២០២១នេះ ពីកំណើន ០,៩% ក្នុងឆ្នាំ២០២០កន្លងទៅនេះក៏ដោយសារមានកំណើននៃការដំាដំណាំ ចិញ្ជឹមសត្វ និងនេសាទ។

ទន្ទឹមនេះនៅក្នុងខ្លឹមសារសង្ខេបមួយនេះក៏បានលើកសរសេរឡើងថាវិស័យដំណាំត្រូវបានព្យាករណ៍ដែលថាអាចនឹងមានកំណើនខ្ពស់ជាងឆ្នាំ២០២០ នេះក៏ដោយសារកំណើនផលិតខាងកសិកម្ម និងស្របពេលថ្លៃ និងមានតំរូវការខាងក្រៅច្រើន៕

ព្រះសង្ឃក្នុងវត្តវិសុទ្ធិមគ្គខេត្តសៀមរាបគោរពវិន័យយ៉ាងតឹងរ៉ឹងបែបព្រះពុទ្ធសាសនាសុទ្ធ

សេន តុលា (Sen Tola) — Wed, 27 Jan 2021 06:27:22 +0000

(សៀមរាប)៖ វត្តវិសុទ្ធិមគ្គជាវត្តមួយស្ថិតនៅក្នុងភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប មានព្រះសង្ឃជាង១២០អង្គ មានផ្ទៃដីប្រមាណ១០០ហិកតា ព័ទ្ធដោយព្រៃឈើក្រាស់ឃ្មឹក ត្រជាក់ត្រឈឹងត្រឈៃ និងមានស្ទឹងព័ទ្ធជុំវិញប្រៀបបាននឹងកសិណនៅអង្គរ។

វត្តនេះកសាងឡើងក្នុងព.សឆ្នាំ២៥៥១ ដែលមានលោកគ្រូ សាន សប្បាយ ជាចៅធិការវត្ត។ ក្នុងទំហំផ្ទៃដីដ៏ធំ មានកុដិជាងមួយរយសម្រាប់ព្រះសង្ឃដាច់ដោយឡែកពីគ្នា វត្តវិសុទ្ធិមគ្គជាវត្តមួយគោរពព្រះពុទ្ធសាសនាសុទ្ធ មិនមានការអុជធូប ដាក់បាយសី ឬស្រោចទឹកនោះទេ។

ព្រះសង្ឃដែលគង់នៅក្នុងវត្តវិសុទ្ធិមគ្គប្រកាន់បទប្បញ្ញត្តិយ៉ាងតឹងរ៉ឹង ម៉ឹងម៉ាត់ ដោយមិនអនុញ្ញាតឲ្យព្រះសង្ឃប្រើប្រាស់ទូរស័ព្ទដៃទំនើប មិនពាក់ស្បែកជើង និងមិនកាន់បច្ច័យជាដើម។

ឧបាសិកា ជួន គីមឡេង ដែលមានតួនាទី រៀបចំបង្អែម បានរៀបរាប់ថា ព្រះសង្ឃនៅក្នុងវត្ត វិសុទ្ធិមគ្គ កាន់វិន័យល្អប្រៀបបាននឹងទៅនឹងសម័យព្រះពុទ្ធ។

«ព្រលឹមលោកចេញនិមន្តបិណ្ឌបាត្រ គោះជួងម៉ឺង លោកនិមន្តបិណ្ឌបាត្រមួយអង្គៗ ដូចជំនាន់ព្រះពុទ្ធចឹង លោកនិមន្តមកទាំងអស់ទាំង១០០អង្គមកទទួលបិណ្ឌបាត្រ តើកូនជ្រះថ្លាប៉ុណ្ណា ហើយលោកពេលឆាន់អត់ឮសូរ ដូចយាយតាប្រកែកគ្នាទេ យាយតាប្រកែកខ្លះព្រោះនូវធម្មជន ហើយចុះលោក លោកនូវធម្មជន ប៉ុន្តែនូវធម្មជនជាន់ខ្ពស់យើងនិយាយអីចេះទៅ។ វត្តណាមិនកាន់វិន័យ កាន់វិន័យ កូនចូលទៅដឹងហើយ មិនចាំថាយាយនិយាយទេ ច្បាស់ជាលោកមកសួរញោមអញ្ចេះញោមអញ្ចុះទៅ កូនអញ្ចេះកូនអញ្ចុះទៅ ប៉ុន្តែលោកអត់» ។

ឧបាសិកា ហៀង ធឿន អាយុ៨១ឆ្នាំ ដែលស្នាក់នៅក្នុងវត្តវិសុទ្ធិមគ្គរយៈពេល១១ឆ្នាំ មានប្រសាសន៍ថា ព្រះសង្ឃក្នុងវត្តវិសុទ្ធិមគ្គប្រតិបត្តិនូវវិន័យបានយ៉ាងល្អ គឺមិនពាក់ស្បែកជើង មិនប្រើប្រាស់ទូរស័ព្ទ និងមិនកាន់បច្ច័យ។

ខណៈពេលដែលកំពុងសាងសង់កុដិតូចៗជាមួយនឹងព្រះសង្ឃអង្គផ្សេង និងកូននេន ព្រះតេជគុណ ឈ្លន់ សៅ ព្រះជន្ម៣០ព្រះវស្សា មានសង្ឃដីកាថា មូលហេតុដែលព្រះតេជគុណមកវត្តនេះដោយសារវត្តវិសុទ្ធិមគ្គកាន់ព្រះពុទ្ធសាសនាសុទ្ធសាធ ព្រះសង្ឃក៏ជ្រះថ្លាមកកាន់វត្តវិសុទ្ធិមគ្គនេះ។

«ដោយសារតែអ្នកបួសយើងគឺយកវិន័យសិរសាពីព្រះពុទ្ធសាសនាចំៗ អីចឹងវាត្រូវនឹងសេចក្ដីជ្រះថ្លារបស់អាត្មាទៅថាវត្តនេះគឺជាវត្តមួយដែលមានសិរសាព្រះពុទ្ធសាសនាច្បាស់លាស់ចឹង មិនមែនតែវត្តនេះទេ នៅមានវត្តផ្សេងៗទៀត តែអធ្យាស្រ័យអាត្មាស្រលាញ់វត្តនេះទៅ ត្រង់ខ្លួនឯងនៅសៀមរាបផង ជិតផងក៏ជ្រះថ្លាក្នុងការបដិបត្តិនូវធម៌ នូវវិន័យ»។

លោក សេង សុមុនី អ្នកនាំពាក្យក្រសួងធម្មការ និងសាសនា បានប្រាប់ Newsroom Cambodiaនៅថ្ងៃទី២៦ ខែមករាថា សព្វថ្ងៃក្នុងប្រទេសកម្ពុជាមានវត្តជាង៥០០០ ប៉ុន្តែមិនទាន់មានទិន្នន័យច្បាស់លាស់អំពីវត្តដែលកាន់ព្រះពុទ្ធសាសនាសុទ្ធសាធនោះទេ។

លោកលើកឡើងដូច្នេះថា៖ «តួរលេខហ្នឹងយើងរាប់ក្នុងព្រះពុទ្ធសាសនាមានពីរ ទីមួយសាសនាបែបគន្ថធុរៈ គឺលោករៀនបាលី រៀនសំស្ក្រឹត មុខវិជ្ជាទូទៅ ក្រសួងអប់រំអីចឹង។ មួយទៀតគឺវិបស្សនាធុរៈ ដែលក្មួយថាតឹងរ៉ឹងហ្នឹងគឺវិបស្សនាធុរៈ ហើយមានមណ្ឌលរបស់លោក មណ្ឌលធំកណ្តាលហ្នឹងនៅភ្នំអដ្ឋរស្សនេះ មជ្ឈឹមមនុស្ស លោកបើកសាខាតាមខេត្ត ទាំង២៥រាជធានីខេត្តហ្នឹង ហើយនៅក្នុងខេត្តនីមួយៗលោកមានវត្តច្រើន ប៉ុន្មានវត្តដែលប្រតិបត្តិបន្តទៅទៀត»៕

កម្ពុជាស្នើសុំវ៉ាក់សាំងការពារជំងឺអុតក្តាមពីចិនបន្ទាប់ពីមានគោស្លាប់រាប់ពាន់ក្បាលឆ្នាំមុន

សេន តុលា (Sen Tola) — Wed, 27 Jan 2021 03:09:31 +0000

រដ្ឋមន្រ្តីក្រសួងកសិកម្ម លោក វេង សាខុន បាននិយាយនៅថ្ងៃអង្គារ ទី២៧ ខែមករា ឆ្នាំ២០២១នេះថា កម្ពុជាបានស្នើសុំវ៉ាក់សាំងការពារជំងឺអុតក្តាមពីប្រទេសចិនដើម្បីចាក់សត្វគោបន្ទាប់ពីមានការស្លាប់រាប់ពាន់ក្បាលដោយសារជំងឺនេះកាលពីឆ្នាំ២០២០ ហើយបានវាយតម្លៃទំហំជំងឺអុតក្ដាមថាមានលក្ខណៈទ្រង់ទ្រាយធំ។

លោកវេង សាខុន បាននិយាយប្រាប់ Newsroom Cambodia ថាសត្វគោចំនួន ៤២៥២១ ក្បាលនៅទូទាំងប្រទេសកម្ពុជា បានឆ្លងជំងឺអុតក្ដាម ហើយចំនួន ៤១៧៦៤ក្បាលបានព្យាបាលជាសះស្បើយ និងគោចំនួនដែល ១០៥៧ក្បាល បានស្លាប់។

លោកវេង សាខុន បាននិយាយថានេះជាបញ្ហាប្រឈម ហើយខាងក្រសួងកសិកម្មមិនមានធនធានថវិកាគ្រប់គ្រាន់ដើម្បីទិញវ៉ាក់សាំង ដូច្នេះក៏បានស្នើសុំពីប្រទេសចិន។

«ព្រួយបារម្ភហើយ បានខ្ញុំស្នើសុំវ៉ាក់សាំងពីប្រទេសចិនហើយគេឱ្យមក ១០ម៉ឺនដូស ឥលូវកំពុងតែបញ្ជូនមកមិនទាន់។ ដល់ធនធានថវិកាយើង វាមានមិនគ្រប់គ្រាន់ដល់ចឹងទៅវាជួបបញ្ហាប្រឈម ប៉ុន្តែមកដល់ពេលឥលូវនេះ វាបានធូរស្បើយច្រើនហើយ»។

លោកបានរៀបរាប់បន្តថា បញ្ហាទឹកជំនន់ដែលបានលិចលង់កន្លងទៅនោះ វាបានបង្កបង្កើតជាជំងឺអុតក្ដាម ហើយនៅពេលដែលទឹកជំនន់វាបានឡើងលិចស្មៅ ហើយបានស្រកទៅវិញក៏បង្កបានសត្វល្អិតតូចៗ ដល់ពេលសត្វគោស៊ី ក៏កើតឆ្លងជំងឺអុតក្ដាមនេះតែម្ដង។ លោកក៏បានវាយតម្លៃដែលថាទំហំនៃកើតជំងឺអុតក្ដាមក្នុងឆ្នាំ២០២០កន្លងទៅ គឺមានលក្ខណៈទ្រង់ទ្រាយធំ។

លោកបាននិយាយថា៖ «ភាគច្រើនពាក់ព័ន្ធនឹងអនាម័យនៅតាមជនបទ យើងមិនគិតដល់រឿងបញ្ហាគ្រប់គ្រងទេ ដល់ពេលគោឈឺហើយ ងាប់ហើយបានភ្ញាក់ផ្អើល។ រដូវវស្សាវាកើត ហើយដោយសារស្ថានភាពទឹក បូកជាមួយខ្យល់ បានកើតអុតក្ដាមនេះឯង»៕

ក្រសួងសុខាភិបាលប្រកាសឱ្យអ្នករៀបចំពិធីរៀបការ ឬកម្មវិធីផ្សេងៗមានភ្ញៀវត្រឹម៥នាក់មួយតុ

សេន តុលា (Sen Tola) — Tue, 26 Jan 2021 08:31:26 +0000

ក្រសួងសុខាភិបាលនៅថ្ងៃអង្គារ ទី២៦ ខែមករា ឆ្នាំ២០២១នេះ បានណែនាំឲ្យរៀបចំការប្រារព្ធកម្មវិធីបុណ្យ កម្មវិធីរៀបអាពាហ៍ពិពាហ៍ ឬកម្មវិធីផ្សេងៗ ត្រូវកំណត់ចំនួនភ្ញៀវដែលដាក់ឱ្យអង្គុយក្នុងមួយតុត្រឹមតែ៥នាក់ប៉ុណ្ណោះ។

ក្នុងសេចក្តីណែនាំរបស់ក្រសួងសុខាភិបាលបានបញ្ជាក់ថា នេះជាការទប់ស្កាត់ការចម្លងវីរុសកូវីដ១៩នៅកម្ពុជា តាមរយៈកំណត់ចំនួនភ្ញៀវដែលដាក់ឱ្យអង្គុយក្នុងមួយតុត្រឹមតែ៥នាក់ និងត្រូវតែមានការរក្សាគម្លាតសុវត្ថិភាពបុគ្គលឱ្យយ៉ាងតិច១.៥ម៉ែត្រឡើងទៅពីបុគ្គលម្នាក់ទៅបុគ្គលម្នាក់ រាល់ការប្រារព្ធកម្មវិធីបុណ្យ កម្មវិធីរៀបអាពាហ៍ពិពាហ៍ ឬកម្មវិធីផ្សេងៗ។

ក្នុងសេចក្តីណែនាំរបស់ក្រសួងសុខាភិបាលដដែលបញ្ជាក់ថា ការចេញសេចក្តីណែនាំនេះ គឺដោយសារកន្លងមកការអនុវត្តវិធានការការបារក្នុងកម្មវិធីនានានៅមានកម្រិតទាបនៅឡើយ។

ក្រសួងក៏បានណែនាំឲ្យអាជ្ញាធរនៅបណ្តាខេត្តរាជធានីទាំងនោះ ឲ្យម្ចាស់កម្មវិធី និងអ្នកចូលរួមទាំងអស់អនុវត្តវិធានការសុខាភិបាល ដូចជាការបំពាក់ម៉ាស៊ីនវាស់កម្តៅស្វ័យប្រវត្តិ ដាក់អាល់កុល ឬជែលលាងដៃនៅគ្រប់ច្រកចូល ដាក់បង្ហាញស្លាកសញ្ញាណែនាំឲ្យពាក់ម៉ាស និងណែនាំឲ្យអាជ្ញាធរថ្នាក់ក្រោមជាតិតាមដាន និងណែនាំម្ចាស់កម្មវិធី និងអ្នកចូលរួមឲ្យបានម៉ឺងម៉ាត់ជាដើម៕

ដោយត្រូវរ៉ូវជាមួយតាក់ស៊ីថៃ ពលករចំណាកស្រុករាប់ពាន់នាក់រត់ចេញពីថៃបន្ទាប់ពីការផ្ទុះឡើងនៃកូវីដ ១៩

សេន តុលា (Sen Tola) — Mon, 25 Jan 2021 14:59:50 +0000

ខណៈដែលប្រទេសថៃបានដាក់ប្រទេសរបស់ខ្លួនក្នុងគ្រាអាសន្នដោយសារតែការឆ្លងជំងឺកូវីដ ១៩ ហើយចេះតែមានការកើនឡើងនោះ ពលករខ្មែរដែលធ្វើការនៅប្រទេសថៃ ចំនួន ៣៣៦៦នាក់ បានលួចរត់មកកម្ពុជា ដោយបានត្រូវរ៉ូវគ្នាជាមួយតាក់ស៊ីថៃដែលបានជួយពង្វាង ពីសមត្ថកិច្ចថៃ យកមកទំលាក់នៅក្បែរព្រំដែន ហើយពួកគេក៏បាននាំគ្នាដើរក្នុងព្រៃបន្ត។

លោកសឿម ប៊ុនរិទ្ធិ អភិបាលរងខេត្តបាត់ដំបង បាននិយាយនៅក្នុងសន្និសីទសារព័ត៌មាន នៅរាជធានីភ្នំពេញ នៅថ្ងៃទី២៥ ខែមករា ឆ្នាំ២០២១នេះថា ពលករដែលបានត្រឡប់មកពីថៃវិញតាមច្រករបៀង សរុបទាំងអស់មានចំនួន ៣៣៦៦នាក់ ហើយសំណាកដែលទទួលបានគឺមាន ៣២៧២នាក់។

ក្នុងនោះមានអវិជ្ជមានចំនួន ៣២៦៤នាក់ វិជ្ជមានចំនួន ១៧នាក់ កំពុងសម្រាក់ព្យាបាលនៅមន្ទីពេទ្យខេត្តមានចំនួន៩នាក់ ជាសះស្បើយមាន ៩នាក់ ហើយអ្នកដែលបានបញ្ចប់ការធ្វើចត្តាឡីស័ក្គមាន ២១០២នាក់ ដែលបានត្រឡប់ទៅផ្ទះវិញ។ នេះយោងតាមលោកលោកសឿម ប៊ុនរិទ្ធិ។

លោកសឿម ប៊ុនរិទ្ធិ ក៏បានបញ្ជាក់ដែរថា សម្រាប់លទ្ធផលខាងលើនេះ ជាលទ្ធផលសម្រាប់ថ្ងៃទី២៤ ខែមករា ឆ្នាំ២០២១នោះទេ ដោយសារលទ្ធផលក្នុងថ្ងៃទី២៥ ខែមករា ឆ្នាំ២០២១នេះ មិនទាន់ចេញនៅឡើយ ហើយពលករ ដែលចូលមកខេត្តបាត់ដំបង មិនមែនជាប្រជាពលរដ្ឋនៅក្នុងខេត្តនេះទាំងអស់នោះទេ គឺមានអ្នកខេត្តផ្សេងៗផងដែរ។

លោកបាននិយាយថា៖ «មូលហេតុដែលពលករចេះតែត្រឡប់មកពីប្រទេសថៃនោះ គឺដោយសារតែការលួចរត់តាមរយៈការត្រូវរ៉ូវគ្នាជាមួយរថយន្តតាក់ស៊ីខាងថៃ ហើយពួកគាត់ក៏បានជួយពង្វាង ពីសមត្ថកិច្ចខាងគាត់ និងបានដឹកមកទំលាក់ទៅ ប្រហែល២០ ទៅ៣០គីឡូអី ឱ្យដើរមកនៅក្បែរព្រំដែនហើយពួកគេក៏បាននាំគ្នាដើរកាត់ព្រៃមក»។

លោកបាននិយាយថា «បើទោះជាមានរឿងបែបនេះ ក៏អាជ្ញាធរខាងខេត្តបាត់ដំបងនៅតែបន្តធ្វើការយកចិត្តទុកដាក់ ហើយក៏បានយករថយន្តទៅដឹកពលករខ្មែរដែលបានលួចរត់ទាំងនោះមកមណ្ឌលដើម្បីឱ្យពួកគេធ្វើចត្តាឡីស័ក្គ» ។

លោកបានបន្តថាពលករខ្មែរដែលនៅប្រទេសថៃបានលួចរត់មកជារៀងរាល់ថ្ងៃ ហើយពេលខ្លះចន្លោះពី ៣០ នាក់ ទៅ១០០នាក់ ហើយថ្ងៃខ្លះរត់មក៦០ ទៅ១០០នាក់។

«អាជ្ញាធរថៃក៏គេហាមឃាត់ដែរ តែធ្វើមិចបើពួកគាត់ចេះតែលួចរត់មកចឹង ហើយដល់សួរគាត់ទៅ អ្នកខ្លះថា នឹកស្រុក អ្នកខ្លះថានឹកកូនគាត់ អ្នកខ្លះទៀតថាមានធុរៈ ខ្លះមា្ដយឪពុកឈឺ ចឹងក៏ចេះតែមក»៕

អាជីវកម្មនៅតំបន់ប្រាសាទអង្គរវត្តប្រឈមនឹងភាពមិនប្រាកដប្រជាបន្ទាប់ពីការធ្លាក់ចុះនៃភ្ញៀវទេសចរដោយសារតែកូវីដ

សេន តុលា (Sen Tola) — Mon, 25 Jan 2021 04:12:49 +0000

ខេត្តសៀមរាប៖ អាជីវករ និងអ្នករត់ម៉ូតូកង់បីនៅតំបន់ប្រាសាទអង្គរវត្ត ខេត្តសៀមរាប បាននិយាយថាពួកគាត់បានរងផលប៉ះពាល់ដោយការធ្លាក់ចុះនៃភ្ញៀវទេសចរ បន្ទាប់ពីការផ្ទុះឡើងនៃជំងឺ ១៩ ដែលបានវាយលុកប្រទេសកម្ពុជាកាលពីដើមឆ្នាំ២០២០។

លោកស ឡៃ អាយុ៤៨ឆ្នាំ ជាអ្នករត់កង់បីនៅក្នុងតំបន់អង្គរបានប្រាប់ថា ប្រាក់ចំណូលរបស់លោកពីមុនមានចន្លោះពី១០ដុល្លារ ទៅដល់ ៧០ដុល្លារ ក្នុងមួយថ្ងៃ ក៏ប៉ុន្តែបច្ចុប្បន្ននេះ បានត្រឹម ៥០០០រៀល ហើយពេលខ្លះ បាន៣ម៉ឺន ទៅ៤ម៉ឺនរៀល។

លោកលើកឡើងដូច្នេះថា៖ «កាលភ្ញៀវមាននៅ ចំណូលយ៉ាងតិចក៏១០ដុល្លារដែរ បើអាខ្ពស់បំផុតមិនអាចប្រាកដទេ ដូចថា ២០-៣០ដុល្លារ ជួនកាលបានដល់ទៅ ៧០ដុល្លារអីទៅ បើយកភ្ញៀវទៅដាក់ទន្លេ ឬតាមហាងអីទៅអញ្ចឹង យើងបានច្រើនតាមហ្នឹងទៅជាពិសេសភ្ញៀវបរទេស។ បើឥឡូវនិយាយអោយត្រង់ទៅជួនកាលបានប្រាំពាន់ ហើយថ្ងៃណាក៏អត់ទៅ បើហេងបាន ៣ទៅ៤ម៉ឺន»។

លោកបានបន្ថែមថា៖ «បើផ្គត់ផ្គង់គ្រួសារទៅ គឺទៅអត់រួចទេ ទាល់តែមានប្រពន្ធជួយរកនេះខ្លះ នោះខ្លះ តែប្រពន្ធពូនៅតែផ្ទះមើលតែកូន តែពូមានម្តាយនៅក្រៅប្រទេសផងដែរ គាត់អោយមួយខែ ១០០ដុល្លារគ្រាន់ជួយទប់ខ្លះក្នុងពេលកូវីដអញ្ចឹង»។

«ពិបាកនិយាយវាខុសប្លែកគ្នាឆ្ងាយណាស់ ហើយក្នុងមួយថ្ងៃទៅលើម្ហូបតិចបំផុតក៏ត្រឹម ៣ម៉ឺនដែរ ឥឡូវទិញម្ហូបត្រឹម៣ពាន់ ហូបពីរនាក់ប្តីប្រពន្ធទៅ និយាយទៅវាពិបាកណាស់ មិនហ៊ានស៊ីចាយអីទេ ពិបាករកលុយមិនបានតែម្តងបើអាកាលផ្ទុះកូវីដដំបូង គឺស្ងាត់ឈឹងតែម្តង អត់មាននរណាមកទេ»។

អ្នកស្រីឡាយ លី អាយុ ៣៦ឆ្នាំ។ រូបភាព៖ កេត អ៊ីយាន

អ្នកស្រីឡាយ លី អាយុ ៣៦ឆ្នាំ ជាអ្នកលក់វត្ថុអនុស្សាវរីយ៍នៅជិតប្រាសាទអង្គរវត្តបានប្រាប់ថាពីមុនអ្នកស្រី រកប្រាក់ចំណូលបានពី ៤ម៉ឺន ទៅ១០ម៉ឺនរៀលក្នុងមួយថ្ងៃ បច្ចុប្បន្នរកបានតិចតួច ចំណេញបានតិចតួចស្ទើរតែមិនអាចផ្គត់ផ្គង់ជីវភាពព្រោះត្រូវចំណាយលើម្ហូបអាហារ ការរៀនសូត្ររបស់កូន និងត្រូវបង់ការ ប្រាក់នៅធនាគារជាដើម។

អ្នកស្រីបានលើកឡើងថា៖ «ខ្ញុំលក់នៅនេះយូរហើយ តែនៅខាងក្នុង ៦-៧ឆ្នាំហើយ លក់តែអាហ្នឹងឯង កាលមុនកូវីដ មួយថ្ងៃបានប្រហែលជា ៤-១០ម៉ឺនអត់ទៀងទេ តែថ្ងៃនេះអត់។ ផ្គត់ផ្គង់អត់គ្រប់គ្រាន់ទេ ព្រោះវាចំណេញតិចតួចលក់បាន ៦-៧ម៉ឺនយកទៅទិញឥវ៉ាន់វិញ សល់តែបន្តិចបន្តួចគ្រាន់ទុកអោយកូនហូបអោយរួចមួយថ្ងៃ សឹងតែមិនរួច»។

«ប៉ះព៉ាល់តែមែនទែនតែម្តង ដូចជាពួកខ្ញុំលក់អញ្ចឹងមានការជំពាក់អង្គការអីអញ្ចឹង ហើយត្រូវការបង់អោយគេរាល់ខែ ដល់ពេលអញ្ចឹងទៅវាពិបាកណាស់ ដូចការរៀនសូត្ររបស់កូន វាត្រូវរៀនគួរ រៀនអង់គ្លេស អញ្ជឹងយើងត្រូវការចំណាយដល់ពេលអត់បានអញ្ចឹងវាពិបាក»។

លោកប៊ុន យូរឆៃលៀង អាយុ ៣៨ឆ្នាំ។ រូបភាព៖ វឌ្ឃនៈ វណ្ណសក្តិ

លោកប៊ុន យូរឆៃលៀង អាយុ ៣៨ឆ្នាំ ជាអ្នករត់កង់បីបាននិយាយថាប្រាក់ចំណូលពីមុន និងបច្ចុប្បន្នខុសគ្នា ឆ្ងាយហើយឥឡូវនេះរកបានតែ២ម៉ឺនរៀល ទៅ៣ម៉ឺនរៀលប៉ុណ្ណោះក្នុងមួយថ្ងៃ ជួនកាលក៏អត់បាន។

លោកបានលើកឡើងថា៖ «ខុសគ្នាឆ្ងាយណាស់ប្អូន កាលនៅភ្ញៀវបរទេសហើយអត់មានកូវីដ យើងរកបានម៉ូយស្រួល ឲ្យតែចេញរកដឹងតែបាន ប៉ុន្តែឥឡូវ ទោះបីយើងប្រឹងចេញរកប៉ុណ្ណានៅតែរកអត់បានដូចមុនទេ ដោយសារយើងអត់មានភ្ញៀវបរទស អាចបានជា ៨-១០ម៉ឺន តែឥឡូវបានតែ ២ម៉ឺន ៣ម៉ឺន ជួនកាលសឹងតែអត់សោះតែម្តង»។

លោកបន្ថែមថាចំណូលអត់គ្រប់ដោយសារតែគាត់ជំពាក់គេដែរ ហើយមានការពិបាកក្នុងការសន្សំសងគេ ដូចជាប៉ុន្មានខែមុន គាត់បានសុំពន្យារសងលុយគេ ព្រោះតែអត់មានលទ្ធភាពសង អញ្ចឹងទៅគេឲ្យបង់តែការ។

«ពេលបង់តែការអញ្ចឹងទៅវាខាតយើងវិញ។ មុនធ្លាប់ឲ្យគ្រូសារគាត់ចេញលក់ដូរតិចតួច តែពេលលក់ទៅវាអត់ដាច់ ព្រោះឥឡូវគេចេញលក់ច្រើន នៅពេលបាត់បង់ទេសចរណ៍ទៅ គាត់អត់មានអីធ្វើ គាត់ចេញលក់ដូចយើងដែរ ដល់ពេលយូរៗទៅវាពិបាកអត់មានពីណាមើលកូន អញ្ចឹងទៅអោយគាត់មើលកូនយើងចេញរកតែឯងទៅ តែជួនកាលខ្វះខាតអីម៉ែឪគាត់ផ្ញើរមកខ្លះទៅ»។

លោក ង៉ូវ សេងហាក់ ប្រធានមន្ទីរទេសចរណ៍ខេត្តសៀមរាបបានប្រាប់ Newsroom Cambodia យ៉ាងខ្លីថា ភ្ញៀវទេសចរនឹងចាប់ផ្តើមមកកម្សាន្តវិញនៅពេលដែលស្ថានភាពជំងឺកូវីដមានភាពប្រសើរឡើង។

«បើសភាពការណ៍កូវីដប្រសើរ ភ្ញៀវនឹងត្រឡប់មកវិញ ដល់ពេលកូវីដអីចឹង យើងដឹងថាស្ថានភាពវាដោយសារជំងឺកូវីដ ការហោះហើរក៏អត់មានដែរ មកសៀមរាបអីចឹង»។

Newsroom Cambodia មិនអាចសុំការអធិប្បាយពីលោក តុប សុភ័ក អ្នកនាំពាក្យក្រសួងទេសចរណ៍ ដោយ ទូរស័ព្ទហៅជាច្រើនដង ប៉ុន្តែគ្មានអ្នកទទួល។

យោងទៅតាមរបាយការណ៍របស់ក្រសួងទេសចរណ៍ ចំនួនភ្ញៀវទេសចរណ៍ក្នុងឆ្នាំ២០១៩ មានប្រមាណជាជាង ៦លាននាក់ កើនឡើង៨ភាគរយប្រៀបធៀបឆ្នាំ២០១៨ ក៏ប៉ុន្តែក្នុងឆ្នាំ ២០២០ ភ្ញៀវទេសចរណ៍សរុបមានត្រឹមតែជាង ១លាននាក់ប៉ុណ្ណោះ ពោលគឺមានការធ្លាក់ចុះជិត៨០ភាគរយ។ នេះយោងតាមស្ថិតិផ្លូវការ៕

ខណៈកូវីដវាយលុក ការធ្វើឱ្យវត្ថុអនុស្សាវរីយ៍ពីដូងជាប្រភពចំណូលថ្មីសម្រាប់អ្នកភូមិក្នុងខេត្តសៀមរាប

សេន តុលា (Sen Tola) — Sat, 23 Jan 2021 05:12:46 +0000

ស្រុកអង្គធំ ខេត្តសៀមរាប៖ កាលពីដំបូងឡើយ អ្នកស្រីសំ សំភាស់ គ្រាន់តែចង់កែច្នៃផ្លែដូងធ្វើជារបស់លេងសម្រាប់កូនគាត់នៅក្នុងភូមិមួយនៃស្រុកអង្គធំ ខេត្តសៀមរាប តែប៉ុណ្ណោះ ហើយការច្នៃប្រឌិតរបស់គាត់ក៏បានចាប់ផ្តើមទទួលបានការចាប់អារម្មណ៍ពីអ្នកទេសចរដែលបានឆ្លងកាត់។

វត្ថុអនុស្សាវរីយ៍សត្វក្រពើធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

ជាមួយនឹងការមកដល់នៃជំងឺរាតត្បាតកូវីដ១៩ ដែលបានប៉ះពាល់ដល់ជីវភាពរស់នៅរបស់ប្រជាជនរាប់ម៉ឺននាក់ ការធ្វើរូបជាសិល្បៈចេញពីផ្លែដូងសម្រាប់ភ្ញៀវទេសចរ បានក្លាយជាប្រភពចំណូលថ្មីសម្រាប់អ្នកស្រីសំ សំភាស់ និងគ្រួសារដទៃទៀតនៅភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប ដែលភាគច្រើនប្រកបរបរជាកម្មករសំណង់។

អ្នកស្រីសំ សំភាស់ អាយុ ២៩ឆ្នាំ បាននិយាយថាគំនិតនៃការច្នៃប្រឌិតនេះគឺប្តីគាត់បានឃើញគេធ្វើនៅប្រទេសថៃនៅពេលគាត់ធ្វើជាពលករចំណាកស្រុកនៅប្រទេសថៃកាលពីដើមឆ្នាំ២០២០។

ទឹកមុខញញឹមដែលបង្កប់ទៅដោយក្ដីរីករាយ និងការស្វាគមន៍ អ្នកស្រី សំ សំភាស់ បាននិយាយថា «មុនដំបូងប្ដីរបស់ខ្ញុំគាត់ទៅថៃ មិនដឹងថាគាត់ឃើញឯណោះ ឬក៏យ៉ាងណាទេ ដល់ពេលគាត់ត្រឡប់មកវិញ ឃើញផ្លែដូងក៏ធ្វើតាមគេដាក់ឱ្យកូនលេងទៅ»។

ដោយសម្តីរដឺនៗបន្ដិចផងនោះ អ្នកស្រីសំ សំភាស់បានបន្តថា «ប៉ុន្តែកាលធ្វើលើកនោះមិនបានស្អាតអ្វីទេដោយសារមិនទាន់លាបថ្នាំ ហើយកូនឈប់លេងហើយក៏វាចោលទៅ ស្រាប់តែពេលក្រោយកូនក៏វាទារលេងម្ដងទៀត ក៏ធ្វើឱ្យវាម្ដងទៀតទៅ តែលើកនេះលាបពណ៌ហើយក៏ចេះតែច្នៃដាក់ជើងផងអីផង ហើយក៏ស្រាប់តែអ្នកស្រុកឃើញក៏មកសុំរៀនបន្តក៏ចេះ បានដាក់លក់ ហើយកាលនោះលក់ដាច់សម្បើម»។

អ្នកស្រីសំ សំភាស់បានរៀបរាប់ថាកាលដើមឡើយ គឺមានតែគ្រួសារគាត់តែប៉ុណ្ណោះដែលចេះពីរបៀបនៃការកែច្នៃផ្លែដូងចេញជារូបសត្វនេះមុនគេ ហើយក៏ត្រូវបានអ្នកស្រុកដឹង ក៏បានមកសុំរៀនបន្ត ហើយរហូតមកដល់ក្នុងពេលបច្ចុប្បន្ននេះ អ្នកស្រីថាឱ្យតែមានអ្នកចង់រៀន គឺគាត់រីករាយក្នុងការបង្ហាត់បង្រៀនដោយមិនកំណាញ់នោះទេ។

វត្ថុអនុស្សាវរីយ៍សត្វទន្សាយធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

អ្នកស្រីបាននិយាយផងដែរថាមុខរបរនេះជារបរបន្ទាប់បន្សំរបស់គាត់ដែលអាចជួយសម្រួល
ទៅដល់ការចំណាយម្ហូបប្រចាំថ្ងៃបាន។ អ្នកស្រីបានបន្ថែមថារូបសត្វមួយអ្នកស្រីលក់បាន១៥០០០៛ ប៉ុន្ដែបើមានគេកម្ម៉ង់ច្រើន អ្នកស្រីលក់ក្នុងមួយរូបតែ ១២០០០៛តែប៉ុណ្ណោះ ហើយក៏ មិនសូវជាបានចំណេញច្រើននោះទេ ដោយសារត្រូវចំណាយទៅលើការទិញក្រដាសកាសែតមករុំពីលើ។

អ្នកស្រីបានបន្ថែមថាក្នុងមួយថ្ងៃ គាត់ផលិតបានមួយរូបដោយសារតែអ្នកស្រីរវល់និងកិច្ចការផ្ទះខ្លាំងពេក ប៉ុន្តែជួនពេលខ្លះ ទំនេរ ក៏បាន ០៤រូបទៅ ប្រសិនបើមានគេកម្ម៉ង់អ្នកស្រីអាចធ្វើបានរហូតដល់ទៅជាង១០ក្នុងមួយថ្ងៃ ហើយមិនលក់ដាច់រាល់ថ្ងៃនោះទេ ជួនកាល មួយអាទិត្យ ឬមួយខែ ទើបមានការកម្ម៉ង់ម្ដង។

របរធ្វើដូងទៅជាវត្ថុអនុស្សាវរីយ៍ មានជារូបសត្វឱម៉ាល់ ក្រពើ ទន្សាយ និងមេអំបៅផងដែរនោះ បានពង្រីកដល់ចំនួនប្រហែល ៤ ឬ ៥ គ្រួសារហើយនៅក្នុងភូមិនេះ ដែលនេះបានបង្កឲ្យមានការលំបាកក្នុងការស្វែងរកដូងមកធ្វើ។

អ្នកស្រីបាននិយាយថា៖ «ចាប់តាំងតែពីអ្នកភូមិចេះធ្វើដែរមក ពិបាករកផ្លែដូងមកធ្វើខ្លាំងណាស់ ប្រសិនបើចង់រក មានតែទៅភូមិឆ្ងាយៗ ទើបបានហើយត្រូវទិញទៀតទើបបាន»។

«កាលមុនគេយកដុតចោល តែឥលូវចាប់តាំងពីគេដឹងមក ផ្លែដូងសណ្ដមួយត្រូវចំណាយ ៥០០៛ទិញមកទើបបាន ជួនណា គេមិនយកលុយទេ តែយើងយកមកធ្វើលក់ដែរ ក៏ជូនលុយគេខ្លះៗទៅ»។

អង្គុយលើកៅអីហើយនិយាយលឺៗ អ្នកស្រី ហាវ សារុំ អាយុ ៥៤ឆ្នាំ ដែលជាអ្នកភូមិរស់នៅភូមិក្បែរនោះក៏បាន
និយាយបន្ថែមថាកាលពីគាត់នៅក្មេងៗ គាត់មិនដែលធ្លាប់ឃើញការច្នៃផ្លែដូងធ្វើជារូបសត្វបែបនេះនោះទេ ហើយកាលមុន គ្រាន់តែយកមកធ្វើជាអុសដុតបបរបាយជ្រូកតែប៉ុណ្ណោះ។

«ខ្ញុំស្ងើចសរសើរថាវាល្អដែលគេមានគំនិតបែបនេះ បើខ្ញុំមិនដឹងយកធ្វើអ្វីមានតែយកទៅដុតបបរបាយជ្រូក។ មិនបាច់ទៅធ្វើការស្រុកគេ ក៏អាចយកលក់បានលុយស្រួល ហើយវាអាចជួយទៅលើបរិស្ថានបានច្រើនដែរណា»។

នៅក្រោមដំបូលផ្ទះប្រក់ក្បឿង ហើយអង្គុយចាក់រូបមានទឹកមុខផ្ចង់អារម្មណ៍នឹងការងារតែបង្កប់ដោយក្ដីរាក់ទាក់ អ្នកស្រីសំ ទូច អាយុ ៤២ឆ្នាំ ដែលជាអ្នកភូមិម្នាក់ទៀត ហើយបាន ចេះការច្នៃផ្លែដូងបន្តពីប្អូនស្រីគាត់។

គាត់បានរៀបរាប់ថាកាលដើមឡើយគាត់គ្រាន់តែធ្វើឱ្យកូនគាត់លេងតែប៉ុណ្ណោះ តែដល់មាន អ្នកធ្វើដំណើរឃើញ ក៏បានចុះមកសួរ និងសុំទិញ សុំថត។ ចាប់តាំងតែពីពេលនោះមក របរច្នៃដូងរបស់អ្នកស្រីសំ ទូច ក៏ចេះតែល្បីតៗគ្នារហូតដល់មានអ្នកខ្លះកម្ម៉ង់ឱ្យធ្វើតែម្ដងទៅ។

អ្នកស្រីបាននិយាយថា៖ «ថាទៅវាមិនបានចំណេញចំណូលអ្វីប៉ុន្មាននោះទេ ដូចថាយើងរករបស់បានដូចជាដូងអីចេះតែចង់ធ្វើទៅ បើទោះបីជាយើងរកចំណូលអ្វីមិនបានច្រើនក៏យើងចាត់ទុកថាយើងរួចថ្លៃម្ហូបមួយពេលដែរ។ មានអ្នកឆ្ងាយៗ មកទិញដែលភាគច្រើនជាភ្ញៀវទេសចរ ហើយក៏មានអ្នកកម្ម៉ង់មកពីឆ្ងាយដែលតែភាគច្រើនមិនសូវជាចំណេញទេ ដោយសារការចំណាយទៅលើការវិចខ្ចប់ច្រើន»។

លោក ខុង ឆន អាយុ ៦១ឆ្នាំ ដែលជាមេឃុំ ឃុំលាងដៃ បាននិយាយថាអ្នកចេះកែច្នៃផ្លែងដូងជារូបសត្វនេះមានត្រឹមតែ ៥គ្រួសារ ក្នុង៨ភូមិ ហើយលោកក៏បានរៀបរាប់បន្តថា អាជ្ញាធរក្នុងឃុំក៏មានការគាំទ្រ និងលើកទឹកចិត្ត សរសើរពួកគេដែលមានគំនិតក្នុងការច្នៃប្រឌិត ដោយលោកបានជួយផ្សព្វផ្សាយដែរដើម្បីមានការគាំទ្រ រួមមានការលើកឡើងក្នុងអង្គប្រជុំក្រុមប្រឹក្សាឃុំជាដើម ឲ្យមានកាទិញយកទៅលំអរ៕

សវនាការកាត់ក្តីអតីតសកម្មជនគណបក្សសង្រ្គោះជាតិចំនួន ៦១នាក់ បានចាប់ផ្តើម និង បន្តនៅថៃ្ងទី២៨ ខែមករា

សេន តុលា (Sen Tola) — Fri, 15 Jan 2021 04:54:23 +0000

សាលាដំបូងរាជធានីភ្នំពេញ នៅថ្ងៃទី១៤ ខែមករា ឆ្នាំ២០២១ បានបើកសវនាការកាត់ក្តីអតីតសកម្មជនគណបក្សសង្រ្គោះជាតិចំនួន៦១នាក់ ពីបទរួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ហើយនឹងបន្តសវនាការនេះនៅថ្ងៃទី២៨ ខែមករា ឆ្នាំ២០២១។

ជនជាប់ចោទចំនួន១១នាក់ប៉ុណ្ណោះបានបង្ហាញខ្លួនក្នុងសវនាការកាលពីថ្ងៃទី១៤ ខែមករា ឆ្នាំ២០២១។ នេះបើយោងទៅតាមគណនីហ្វេសប៊ុករបស់អ្នកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជាដែលបានចូលឃ្លាំមើលសវនាការនោះ។

សវនាការកាត់ក្តីទៅលើអតីតសកម្មជនគណបក្សសង្គ្រោះជាតិនេះនឹងត្រូវបន្តទៅថ្ងៃទី២៨ ខែមករា ឆ្នាំ២០២១ វេលាម៉ោង ៨:៣០ នាទីព្រឹក។ នេះយោងទៅតាមទំព័រហ្វេសប៊ុករបស់មជ្ឈមណ្ឌលសិទ្ធិមនុស្សនៃកម្ពុជា។

នៅក្នុងថ្ងៃបើកសវនាការនេះ មានវត្តមានកងកម្លាំងប៉ូលីសជាច្រើន ហើយបានដាក់បំរាមយ៉ាងតឹងរ៉ឹង ដោយមិនអនុញ្ញាតឲ្យអ្នកកាសែត សាច់ញាតិសកម្មជនអតីតគណបក្សសង្រ្គោះជាតិ ឈរនៅក្បែរតុលាការនោះទេ ដោយឲ្យពួកគេឈរនៅខាងក្នុងស្តាតអូឡាំពិក។

កងកម្លាំងដេញអ្នកកាសែត សាច់ញាតិសកម្មជនអតីតគណបក្សសង្រ្គោះជាតិ ឲ្យពួកគេឈរនៅខាងក្នុងស្តាតអូឡាំពិក។ រូបភាព៖ Newsroom Cambodia

អ្នកស្រី ព្រំ ចន្ថា ភរិយាអតីតសកម្មជនគណបក្សសង្រ្គោះជាតិ លោក កាក់ កុម្ភារ បានប្រាប់អ្នកសារព័ត៌មានកាលពីថ្ងៃទី១៤ ខែមករា ឆ្នាំ២០២០១ថា ប្តីរបស់គាត់ត្រូវបានចាប់ខ្លួនកាលពីថ្ងៃទី៣១ ខែឧសភា ឆ្នាំ២០២០ ពីបទរួមគំនិតក្បត់ និងញុះញង់ឲ្យប្រព្រឹត្តបទល្មើសជាអាទិ៍ ខណៈដែលប្តីរបស់គាត់គ្រាន់តែបញ្ចេញមតិ ហើយមិនធ្លាប់ធ្វើអ្វីសោះក្រោយពីការរំលាយគណបក្ស។

អ្នកស្រីបានលើកឡើងដូច្នេះថា៖ «គ្រាន់តែបញ្ចេញមតិ ហើយតាំងពីរំលាយគណបក្សមក ប្តីខ្ញុំអត់ដែលធ្វើអីសោះ»។

អ្នកស្រីបន្តថា៖ «ធម្មតាប្រពន្ធមានសិទ្ធិឡើងស្តាប់អ្នកទោសផ្សេងៗ ហេតុអីស្តាប់បាន រឿងអីអ្នកទោសនយោបាយស្តាប់អត់បាន?»។

កញ្ញា សេង ធារី មេធាវីដែលមានសញ្ជាតិខ្មែរ-អាមេរិកាំង និងជាជនជាប់ចោទមួយរូបក្នុងសំណុំរឿងនោះ បាននិយាយនៅមុខតុលាការថា សវនាការនេះគឺមិនគួរហៅថាជាអង្គសវនាការទេ ព្រោះនេះគឺជាឆាកល្ខោនដែលគេសម្តែងឡើងដើម្បីបំផ្លាញយុត្តិធម៌។

កញ្ញាបានលើកឡើងថា៖ «កុំហៅអង្គសវនាការ នេះជាឆាកល្ខោនទាំងស្រុង ជាឆាកល្ខោន ជាការសម្តែង បំផ្លាញយុត្តិធម៌ បង្កាច់យុត្តិធម៌ឲ្យជូរចត់។ សុទ្ធតែតួឯកកំពុងសម្តែង សម្តែងជាតួអង្គចៅក្រម ជាព្រះរាជអាជ្ញា»។

កញ្ញាសេង ធារី ឱបអ្នកគាំទ្របន្ទាប់ពីចាកចេញពីតុលាការនៅថ្ងៃទី ១៤ ខែមករាឆ្នាំ ២០២១។ រូបភាព៖ Newsroom Cambodia

អ្នកស្រី រ៉ូណា ស្មីត អ្នករាយការណ៍ពិសេសប្រចាំប្រទេសកម្ពុជា បានថ្លែងមួយថ្ងៃមុនការបន្តបើកសវនាការថា អ្នកស្រីមានការព្រួយបារម្ភទៅលើការជំនុំជម្រះនេះពីព្រោះចំនួនជនជាប់ចោទមានច្រើន ហើយត្រូវកាត់ក្តីរួមគ្នា ដែលធ្វើឲ្យការទទួលបានភាពយុត្តិធម៌របស់ពួកគេប្រឈមនឹងហានិភ័យ។

អ្នកស្រីក៏មានការព្រួយបារម្ភទៅលើជនជាប់ចោទមួយចំនួនដែលត្រូវបានកាត់ទោសកំបាំងមុខ ទោះជាពួកគេព្យាយាមត្រឡប់មកកម្ពុជាដើម្បីចូលរួមក្នុងសវនាការក៏ដោយ។ នេះបើយោងទៅតាមទំព័រហ្វេសប៊ុករបស់អ្នកស្រីអ្នករាយការណ៍ពិសេសប្រចាំប្រទេសកម្ពុជា។

អ្នកស្រីបានលើកឡើងថា៖ «ខ្ញុំបាននឹងកំពុងតាមដានយ៉ាងដិតដល់នូវវិធានការផ្លូវច្បាប់ និងតុលាការដែលបានចាត់តាំងលើ សមាជិក និងអ្នកគាំទ្រមួយចំនួនរបស់គណបក្សសង្រ្គោះជាតិដែលត្រូវបានរំលាយ។ មានជនជាប់ចោទចំនួន៦០នាក់ ត្រូវបានជំនុំជម្រះរួមគ្នានៅថ្ងៃនេះ ដែលធ្វើឲ្យសិទ្ធិបុគ្គរបស់ពួកគេក្នុងការទទួលបានការជំនុំជម្រះក្តីប្រកបដោយយុត្តិធម៌ ត្រូវប្រឈមនឹងហានិភ័យ»។

«លើសពីនេះទៅទៀត ខ្ញុំនៅមានកង្វល់ផងដែរ អំពីជនជាប់ចោទមួយចំនួនដែលត្រូវបានកាត់ទោសកំបាំងមុខ បើទោះជាពួកគេបានព្យាយាមវិលត្រឡប់មកប្រទេសកម្ពុជាវិញ ដើម្បីចូលរួមក្នុងការជំនុំជម្រះក្តីនេះក៏ដោយ»។

អ្នកស្រីក៏បានស្នើទៅដល់រដ្ឋាភិបាលកម្ពុជា ឲ្យគោរពសិទ្ធិទទួលបានការជំនុំជម្រះប្រកបដោយយុត្តិធម៌ដល់បុគ្គលទាំងនេះ ដូចដែលមានចែងក្នុងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយដែលប្រទេសកម្ពុជាជារដ្ឋភាគី។

«ខ្ញុំសូមលើកទឹកចិត្តដោយស្មើភាពគ្នាឲ្យអាជ្ញាធរជួយសម្រួលដល់ការវិលត្រលប់របស់បុគ្គលទាំងនេះដោយសុវត្ថិភាព និងអនុញ្ញាតឲ្យពួកគេចូលរួមសវនាការ និងការពារក្តីរបស់ខ្លួននៅក្នុងតុលាការ»។

គួររំលឹកថា គណបក្សសង្រ្គោះជាតិត្រូវបានរំលាយកាលពីខែវិច្ឆិកា ឆ្នាំ២០១៧ មុនពេលបោះឆ្នោតជ្រើសតាំងតំណាងរាស្ត្រឆ្នាំ២០១៨ ហើយអតីតសម្មជនគណបក្សសង្រ្គោះជាតិជាង១២០នាក់ត្រូវបានចោទពីបទរួមគំនិតក្បត់ជាតិ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ទាក់ទងនឹងការប្រកាសវិលត្រឡប់របស់លោក សម រង្ស៊ី កាលពីឆ្នាំ២០១៩៕

កសិករមួយចំនួននៅកំពង់ធំថាទិន្នផលស្រូវធ្លាក់ចុះព្រោះគ្រោះរាំងស្ងួតអូសបន្លាយយូរ

សេន តុលា (Sen Tola) — Wed, 13 Jan 2021 02:16:55 +0000

ប្រជាកសិករមួយចំនួនរស់នៅស្រុកតាំងគោក ខេត្តកំពង់ធំ ត្អូញត្អែរពីទិន្នផលស្រូវធ្ងន់ឬស្រូវវស្សា ធ្លាក់ចុះជាងឆ្នាំមុន ដោយសារគ្រោះរាំងស្ងួតនៅឆ្នាំនេះបានអូសបន្លាយរយៈពេលយូរ។

កំពុងឱនច្រូតស្រូវយ៉ាងញាប់ដៃញាប់ជើង ដើម្បីប្រមូលផលស្រូវសម្រាប់បម្រុងទុកជាស្បៀងនិងសម្រាប់លក់ អ្នកស្រី ចិន ផល្លី អាយុ៥៣ឆ្នាំ ជាកសិករនៅភូមិទួលពភ្លា ឃុំស្រឡៅ ស្រុកតាំងគោក ឱ្យដឹងថា ឆ្នាំនេះ គាត់បានដាំដុះស្រូវវស្សា លើផ្ទៃដីចំនួន៤ហិកតា ដោយទទួលបានទិន្នផលស្រូវចំនួន២តោនកន្លះក្នុងមួយហិកតា។

https://vodkhmer.news/2021/01/12/farmers-in-kompong-thom-province-said-their-rice-was-decrease-cause-of-long-dry-season/

មូលនិធិ Clooney ដើម្បីយុត្តិធម៌អំពាវនាវឲ្យកម្ពុជាធានាថាការកាត់ក្ដីលើកញ្ញា សេង ធារី ប្រកបដោយ យុត្តិធម៌

សេន តុលា (Sen Tola) — Tue, 12 Jan 2021 09:05:43 +0000

មូលនិធិ Clooney ដើម្បីយុត្តិធម៌ (CFJ) នៅថ្ងៃចន្ទនេះ បានអំពាវនាវឲ្យកម្ពុជាធានាថាការកាត់ក្ដីលើ មេធាវីផ្នែកសិទ្ធិមនុស្សជនជាតិខ្មែរអាមេរិកាំង គឺកញ្ញា សេង ធារី ប្រកបដោយការគោរពសិទ្ធិ និងយុត្តិធម៌។

កញ្ញា សេង ធារី គឺជាមេធាវីមួយរូប ដែលមានឈ្មោះនៅក្នុងបញ្ជីមន្ត្រី និងអ្នកគាំទ្រគណបក្សប្រឆាំងជាច្រើននាក់ផ្សេងទៀតនាក់ ដែលត្រូវបានកោះហៅឲ្យចូលទៅបំភ្លឺនៅតុលាការភ្នំពេញ ពីបទរួមគំនិតក្បត់និងញុះញង់។

ក្នុងសេចក្តីប្រកាសព័ត៌មានរបស់មូលនិធិដើម្បីយុត្តិធម៌ (The Clooney foundation for justice) ចេញនៅថ្ងៃទី១១ ខែមករា ឆ្នាំ២០២១នេះបញ្ជាក់ថា អង្គការដែលជាដៃគូរបស់ខ្លួន គឺមជ្ឈមណ្ឌលច្បាប់របស់អាមេរិកសម្រាប់សិទ្ធិមនុស្ស (American Bar Association Center for Human Rights) នឹងឃ្លាំមើលដំណើរការកាត់ក្ដីទៅលើ កញ្ញា សេង ធារី ដែលនឹងប្រព្រឹត្តទៅនៅក្នុងប្រទេសកម្ពុជា នៅថ្ងៃទី១៤ ខែមករា ឆ្នាំ២០២១នេះ។

នៅក្នុងសេចក្ដីប្រកាសព័ត៌មាននោះបន្ថែមថា អ្នកស្រី សេង ធារីធ្លាប់ជាអ្នករិះគន់ឥតឈប់ឈរចំពោះលោកនាយករដ្ឋមន្រ្តី ហ៊ុន សែន ហើយកញ្ញា រួមទាំងមនុស្ស៤០ នាក់ផ្សេងទៀតត្រូវបានចោទពីបទសមគំនិតក្នុងការក្បត់ជាតិ និងញុះញង់ ដែលត្រូវផ្ដន្ទាទោសដាក់ពន្ធនាគាររហូតដល់១២ឆ្នាំ។

នៅក្នុងសេចក្ដីប្រកាសនោះបញ្ជាក់ថា៖ «ខាងអាជ្ញាធរនូវមិនទាន់ប្រាប់ព័ត៌មានលម្អិតពីការចោទប្រកាន់កញ្ញាច្បាស់លាស់នៅឡើយទេ ប៉ុន្តែការចោទប្រកាន់អាចផ្អែកលើថា កញ្ញា សេង ធារី មានទំនាក់ទំនងជាមួយមេដឹកនាំគណបក្សប្រឆាំងលោក សម រង្ស៊ី ដែលជាជនជាប់ចោទម្នាក់របស់គណបក្សសង្គ្រោះជាតិដែលត្រូវបានរំលាយចោលកាលកន្លងទៅ»។

ក្នុងលិខិតដដែលនេះក៏បានស្រង់សម្ដីរបស់កញ្ញា សេង ធាវី ដែលថា៖ «កញ្ញាគ្មានសម្ព័ន្ធភាពជាមួយគណបក្សសង្គ្រោះជាតិដូចការចោទប្រកាន់របស់អាជ្ញាធរនោះទេ»។

ការជំនុំជម្រះការចោទប្រកាន់លើកញ្ញា សេង ធារី ធ្វើឡើងម្ដងទៀតចំពេលមានការបង្រ្កាបថ្មីលើអ្នកដែលជាប់ពាក់ព័ន្ធនឹងគណបក្សសង្រ្គោះជាតិ។

មូលនិធិ Clooney ដើម្បីយុត្តិធម៌ បញ្ជាក់ក្នុងសេចក្តីប្រកាសព័ត៌មាននោះថា៖ «ច្បាប់ញុះញង់របស់កម្ពុជាត្រូវតែត្រូវបានលុបចោល ឬធ្វើកំណែទម្រង់។ មូលនិធិ Clooney ដើម្បីយុត្តិធម៌ក៏អំពាវនាវឱ្យប្រទេសកម្ពុជាធានាថា រាល់ការកាត់ក្តីណាមួយលើកញ្ញា សេង ធារី ត្រូវគោរពសិទ្ធិទទួលបានការជំនុំជម្រះដោយយុត្តិធម៌ និងសេរីភាពក្នុងការបញ្ចេញមតិ»។

Newsroom Cambodia មិនអាចទាក់ទងសុំការអត្ថាធិប្បាយពីលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានទេ។

ចំណែកលោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ថាកំពុងជាប់ប្រជុំ។

កាលពីថ្ងៃទី២០ ខែតុលា ឆ្នាំ២០២០ តុលាការបានកោះហៅមនុស្សមួយក្រុមដាក់ក្នុងបញ្ជីរួមមានចំនួន៤៦នាក់ ក្នុងនោះមានកញ្ញា សេង ធារី ផង ឲ្យចូលទៅសវនាការនៅថ្ងៃទី២៦ ខែវិច្ឆិកា ឆ្នាំ២០២០ ពីបទរួមគំនិតក្បត់ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម។ ហើយនៅថ្ងៃទី១៤ ខែមករា ឆ្នាំ២០២១នេះ គឺជាការកោះហៅឲ្យចូលសវនាការជាលើកទី២៕

Vox Pop: ពលរដ្ឋខ្លះមិនពេញចិត្តចំពោះការផ្លាស់ប្តូរទីតាំងសត្វស្វាចេញពីតំបន់អង្គរ ហើយ សំណូមពរឲ្យអាជ្ញាធរមានដំណោះស្រាយប្រសើរជាងនេះ

សេន តុលា (Sen Tola) — Sat, 09 Jan 2021 05:08:11 +0000

ពលរដ្ឋមួយចំនួន ដែលត្រូវបានសម្ភាសន៍ដោយ Newsroom Cambodia បាននិយាយថាពួកគេមានការស្រងាកចិត្តដោយសារការផ្លាស់ទីលំនៅរបស់សត្វស្វាចេញពីតំបន់ប្រាសាទអង្គរវត្ត ដោយនិយាយថាវាជាផ្នែកមួយនៃធម្មជាតិដែលមនុស្សរស់នៅជាមួយសត្វស្វា ហើយអាជ្ញាធរគួរតែមានដំណោះស្រាយល្អជាងនេះ។

ស្វាដែលនៅជុំវិញប្រាសាទអង្គរ ក្នុងខេត្តសៀមរាប ត្រូវបានជាបញ្ហាក្នុងការជជែកដេញដោយយ៉ាងខ្លាំងក្នុងប៉ុន្មានសប្តាហ៏នេះ បន្ទាប់ពីអាជ្ញាធរជាតិអប្សរាបានសម្រេចយកស្វាកាចចេញពីតំបន់ប្រាសាទ ដោយយល់ឃើញថាសត្វស្វាទាំងនោះ បានដណ្តើមចំណី និងបានបង្កហានិភ័យជាច្រើន ក៏ដូចជាធ្វើឲ្យខាតបង់ទ្រព្យសម្បត្តិភ្ញៀវទេសចរផងដែរ។

ខាងក្រោមនេះគឺជាការលើកទ្បើងរបស់ពលរដ្ឋមួយចំនួននៅរាជធានីភ្នំពេញដែលបានធ្វើកិច្ចសម្ភាសន៍ជាមួយ Newsroom Cambodia។

កញ្ញាចាប ចាន់ធា

កញ្ញាចាប ចាន់ធា អាយុ២៨ឆ្នាំ បានឱ្យដឹងថា ស្វាជាសត្វស្លូតក្នុងចំណោមសត្វ ដែលអាចរស់នៅចុះសម្រុងជាមួយមនុស្សបាន ហើយធម្មតាប្រាសាទមានលក្ខណៈធម្មជាតិ ដូច្នេះធម្មជាតិត្រូវការមានសត្វអមមកជាមួយដើម្បីជួយលំអង។ ស្វាមិនអាចទៅប៉ះពាល់មនុស្សខ្លាំងណាស់ណាទេ បើសិនជាមុនុស្សមិនទៅធ្វើអីពួកវាមុន។

កញ្ញាបាននិយាយថា «សត្វអ្វីក៏ដោយ ក៏វាមានភាពកាចសាហាវ ធម្មតាទោះបីខ្ងុំស្រទ្បាញ់ឆ្កែ ក៏មានសត្វឆ្កែមួយចំនួនកាចដែរ។ ចំណែកស្វា ក៏ដូចតែគ្នា បើនិយាយទៅ យើងប្រៀបធៀបជាមួយមនុស្ស មនុស្សយើងមានសម្បញ្ញៈ តែចំពោះសត្វស្វាវិញ គឺមិនសូវមានទេ ពេលខ្លះវាអាចជ្រុលជ្រួសខាំយើង ប៉ុន្តែវាមិនអាចបណ្តាលឲ្យយើងស្លាប់ទេ»។

កញ្ញាបានញ្ជាក់ទៀតថា ពេលខ្លះមនុស្សមិនគួរមើលឃើញតែមួយជ្រុង វាយតម្លៃស្វាទាំងអស់ទេ យើងមើលទៅ តើស្វាណាកាច យើងចាប់វា ឬក៏បង្រៀនវាទៅ ព្រោះអីសត្វនឹង អាចបង្រៀនវាបាន មិនមែនសត្វស្វាមកបំផ្លាញប្រាសាទទេ មកពីប្រសាទកសាងយូរ វាមានភាពបាក់បែកខ្លះ។

កញ្ញាចាប ចាន់ធាបានបន្តថាបើយើងឲ្យចំណីស្វាគ្រប់គ្រាន់ វាមិនមកកញ្ឆក់ឥវ៉ាន់យើងទេ ហើយទុកវាឱ្យនៅដូចជួយលំអងប្រាសាទ និងជួយទាក់ទាញទេសចរម្យ៉ាងដែរ។

កុមារាអ៊ុន សិរីវណ្ណណុប (កណ្តាល)

កុមារាអ៊ុន សិរីវណ្ណណុប អាយុ១៥ឆ្នាំ បានឲ្យដឹងថា សត្វស្វានៅតាមប្រាសាទមើលទៅគួរឲ្យស្រលាញ់ និងគួរឱ្យចាប់អារម្មណ៍ ដល់ភ្ញៀវបរទេសពេលបានឃើញស្វានៅតាមប្រាសាទធ្វើឲ្យគេចង់មកទស្សនាទៀត។

អ៊ុន សិរីវណ្ណណុប បាននិយាយថា ស្វាធ្លាប់រកខាំពីមុនដែរ ក៏ប៉ុន្តែមិនចង់ឱ្យយកស្វាចេញពីប្រាសាទទេ ព្រោះចំនួនសត្វស្វាវាមានតិច ភ្ញៀវទេសចរណ៍ខ្លះគេចង់មកមើល ឬថតស្វាផងដែរ។

ព្រះនាម ថៈរៈមុន្នី គីមសាង

ព្រះនាម ថៈរៈមុន្នី គីមសាង ព្រះជន្ម២៧ឆ្នាំ សព្វថ្ងៃរៀននៅពុទ្ធិកសកលវិទ្យាល័យព្រះសីហមុនីរាជា ផ្នែកបរិស្ថានវិទ្យាបានប្រាប់ឲ្យដឹងថា ស្វាជាសត្វដ៍ល្អ និងឆ្លាតមួយ សម្រាប់ការទាក់ទាញភ្ញៀវទេសចរមកទស្សនា ជួយជម្រុញវិស័យទេសចរណ៍ ផ្តល់ចំណូលដល់អាជ្ញាធរ និងប្រជាពលរដ្ឋផងដែរ។

ព្រះនាម ថៈរៈមុន្នី គីមសាងបានបន្តថាការយកសត្វស្វាចេញពីប្រាសាទបាយ័ន្តមិនមែនជាដំណោះស្រាយល្អទេ អាជ្ញាធរត្រូវមានវិធីសាស្ត្រល្អជាងនេះ ដូចជានៅប្រទេសថៃ គេមានសត្វស្វាច្រើន ហេតុអ្វីគេក៏មិនយកវាចេញ។ សត្វស្វាមានសារធាតុពីធម្មជាតិមួយ គឺមានភាពរពិលរប៉ូច សម្បីតែចរិកមនុស្ស មនុស្សខ្លះកើតមកមានចរិកឈ្លើយ ចរិករពិលរប៉ូចដែរ យើងមិនអាចទៅកែប្រែចរិកមនុស្សបានទេ ប៉ុន្តែយើងអាចបង្រៀនបាន ស្វាក៏ដូចគ្នា។

«សត្វស្វា វាជាសត្វមួយដែលមានសញ្ញា ក៏ដូចវិញ្ញាណអត់ដូចមនុស្សទេ ធម្មតារបស់មនុស្សយើងវាមានធម្មវិញ្ញាណនៃការគិត រកភាពខុសត្រូវ ប៉ុន្តែសត្វស្វាវាអត់មានធម្មសញ្ញានៃការគិតទេ»។

លោកបានបន្ថែមថា «គំនិតរបស់អាត្មាផ្ទាល់ បរទេស ពួកគាត់ចូលចិត្តរបស់អ្វីដែលធម្មជាតិ ចូលចិត្តសត្វច្រើនជាងខ្មែរយើង បរទេសគេចូលចិត្តថែរក្សាសត្វច្រើន ហើយខ្មែរយើងគាត់មិនថែរក្សាទេ គាត់ចូលចិត្តបាញ់សម្លាប់យកសត្វហូប ហើយជួនកាលយកសត្វហ្នឹងទៅលក់ទៅឱ្យបរទេសជាច្រើន»។

លោកបងបញ្ជាក់ថា «ការយកសត្វស្វាចេញពីប្រាសាទបាយ័ន្តគឺអាជ្ញាធរមិនចេះដោះស្រាយបញ្ហា ដោយសារអ្វីរឿងតូចមួយទេ បើសិនជាសត្វស្វាកាច យើងអាចយកវាទៅបង្រៀន រកវិធីសាស្ត្រមួយដើម្បីកែស្វាហ្នឹងទៅ ឧទាហរណ៍ការយកសត្វស្វាចេញទៅកន្លែងផ្សេងទៀត អាចមាន ជនដែលនៅខាងក្រៅដូចជាសហគមន៍ផ្សេងៗ ឬមានជនខិលខូចគាត់នឹងបាញ់សម្លាប់សត្វយកទៅហូប»។

កញ្ញា រ៉ង រក្សា

កញ្ញា រ៉ង រក្សា អាយុ ១៨ឆ្នាំ បានប្រាប់ថា កញ្ញាចង់ឲ្យទុកស្វាទាំងនេះនៅតាមប្រាសាទ ព្រោះបើយើងថែរក្សាបានល្អ បរទេសនឹងកោតសរសើរថាយើងថែរក្សាមើលថែវាបានល្អ ហើយគួរតែរកមធ្យោបាយផ្សេងក្រៅពីការចាប់ចេញពីប្រាសាទ បើសិនជាវាពិតជាខាំភ្ញៀវមែន។

«ខ្ញុំគិតថាដល់ពេលជនជាតិ ឬជនបរទេសមកមើលអីចឹង មានលក្ខណៈសរសើរប្រទេសយើង ថារក្សាសត្វបានល្អ ចេះស្រលាញ់សត្វ និងស្រលាញ់ប្រទេសជាតិចឹង»។

កញ្ញាបានបន្ថែមថា «ខ្ញុំគ្រាន់តែចង់សំណូមពរទៅអាជ្ញាធរឱ្យរក្សាសត្វនៅហ្នឹង ទោះបីជាវាខាំ ឬយ៉ាងម៉េចក៏ដោយ គ្រាន់តែចង់ឱ្យរក្សាសត្វទុកនៅហ្នឹង ពេលភ្ញៀវទេសចរណ៍គេមកចឹងទៅ គេអាចសរសើរប្រទេសកម្ពុជាដែលរក្សាសត្វទុកបានល្អ ទោះបីវាខាំចឹង យើងអាចរកវិធីផ្សេងបាន»។

Vox Pop: ទស្សនៈពលរដ្ឋលើប្រធានបទស្រ្តីកាន់តំណែងជាអ្នកដឹកនាំ

សេន តុលា (Sen Tola) — Thu, 31 Dec 2020 04:52:36 +0000

តួនាទីជាមេដឹកនាំ ឬក៏ជាអ្នកគ្រប់គ្រងក្នុងស្ថាប័នណាមួយ ប្រហែលមិនមានការកំណត់អំពីយេនឌ័រទេ ហើយសមត្ថភាពដឹកនាំរបស់មនុស្សម្នាក់ៗគួរតែពឹងផ្អែកលើភាពខ្លាំង និងលក្ខណៈបុគ្គលរបស់ពួកគេ ដូច្នេះការងារធំៗ និងលំបាក មិនមែនមានតែបុរសអាចធ្វើបាននោះទេ។ នេះបើយោងតាមបទសម្ភាសន៍ជាមួយមនុស្សមួយចំនួន។

ស្ដ្រីក៏មានសមត្ថភាពក្នុងការគ្រប់គ្រង និងដោះស្រាយបញ្ហាលំបាកបានដែរ ហើយម្យ៉ាងវិញទៀត ស្ដ្រីក៏ជាអ្នករួមចំណែកក្នុងការកសាងប្រទេស និងអភិវឌ្ឍន៍ប្រទេសឲ្យមានការរីកចម្រើនផងដែរ។

នៅខាងក្រោមនេះ ជាការយល់ឃើញរបស់សាធារណជនចំពោះស្ដ្រីជាអ្នកដឹកនាំក្នុងស្ថាប័នរដ្ឋ និងឯកជនណាមួយ៖

កញ្ញា ឡុង ចរិយា អាយុ ២០ឆ្នាំ ជានិស្សិតឆ្នាំទី៤ មុខជំនាញវិទ្យាសាស្ត្រសេដ្ឋកិច្ច នៃសាកលវិទ្យាល័យសេដ្ឋកិច្ច និងហិរញ្ញវត្ថុ បានប្រាប់ Newsroom Cambodia ថា ស្ដ្រីកាន់តំណែងធំៗ ក្នុងស្ថាប័នរដ្ឋ ឬក៏ឯកជនណាមួយគឺគួរឲ្យកោតសរសើរ ចំពោះភាពរឹងមាំ ភាពម្ចាស់ការលើខ្លួនឯង មានទំនួលខុសត្រូវខ្ពស់ ដែលអាចដឹកនាំ និងគ្រប់គ្រងមនុស្សជាច្រើននាក់បាន។ នេះបានសរបញ្ជាក់ថា មិនមែនមានតែមនុស្សប្រុសទេដែលអាចដឹកនាំបាន។

កញ្ញាបានបន្ថែមថា ការផ្ដល់ឱកាស និងឃោសនាស្ដ្រីក្នុងការធ្វើការងាររអ្វីមួយ គឺមិនទាន់មានលក្ខណៈគ្រប់គ្រាន់នៅឡើយទេ ហើយបុរសតែងតែមានអទិភាពច្រើនជាងស្ដ្រី។

កញ្ញាថា៖ «ខ្ញុំនៅតែបន្តគាំទ្រ និងចង់ឲ្យមានស្ដ្រីជាអ្នកដឹកនាំបន្ថែម ហើយនឹងមានការជំរុញស្ដ្រីឲ្យមានភាពជាអ្នកដឹកនាំ និងមានភាពជឿជាក់ជាងមុនទៀត»។

កញ្ញា ចេង រដ្ឋា អាយុ២៥ឆ្នាំ យល់ឃើញថា ប្រសិនបើស្ដ្រីជាអ្នកដឹកនាំ វាជារឿងល្អមួយ ដោយសារពួកគេក៏មានសិទ្ធិគ្រប់គ្រាន់ និងចំណេះដឹងក្នុងការប្រកួតប្រជែងជាមួយបុរសផងដែរ។

កញ្ញានិយាយថា នៅក្នុងប្រទេសកម្ពុជាមានផលលំបាកសម្រាប់ស្ដ្រីក្នុងការតែងតាំង ឬតំឡើងឋាន: ដោយសារគេមិនពុំសូវឱ្យតម្លៃ និងគាំទ្រស្ដ្រីជាអ្នកដឹកនាំ។ មួយវិញទៀត ពួកគេគិតថាស្រ្តីមានភាពទន់ខ្សោយ និងឆាប់ភ័យខ្លាច។

លោក ហួន សុវត្ថិ អាយុ ២៨ឆ្នាំ មានតួនាទីជាទាហាន ហើយលោកបានយល់ឃើញថា ស្ដ្រីជាអ្នកដឹកនាំជារឿងល្អដែរ។ ប៉ុន្តែស្ដ្រីត្រូវមានភារកិច្ចច្រើន ពួកគាត់ត្រូវមើលថែគ្រួសារ និងការងារ វាគឺជារឿងពិបាកសំរាប់ស្ដ្រី។

ការឡើងតំណែង និងការលើកទឹកចិត្តសម្រាប់ស្ដ្រី និងបុរសមានលក្ខណៈស្មើគ្នា ពីព្រោះវាអាស្រ័យទៅលើការខិតខំប្រឹងប្រែងធ្វើការ និងសមិទ្ធផលការងារ។

លោក សុខ ចាន់ផល អាយុ ៣២ឆ្នាំ មានតួនាទីជាប្រធានផ្នែកគណនេយ្យ និងហិរញ្ញវត្ថុ បាននិយាយថា ប្រសិនបើមានស្ដ្រីជាអ្នកដឹកនាំជារឿងល្អ ពីព្រោះស្ដ្រីមានការគ្រប់គ្រងល្អ មិនមានភាពលំអៀង និងមានភាពម៉ត់ចត់ខ្ពស់។

លោកបន្តថា «ការឡើងតំណែង និងការជំរុញទឹកចិត្ត វាអាស្រ័យទៅលើស្ថានភាពរបស់ស្ថាប័នដូចគ្នា ប្រសិនបើស្ថាប័នណាឯករាជ្យ មិនមានភាពបក្សពួក ឬខ្សែ នោះស្រី្តមិនពិបាកអីក្នុងការក្លាយជាអ្នកដឹកនាំឡើយ ឲ្យតែពួកគេមានសមត្ថភាពហើយ នឹងអាចមានឱកាសច្រើនជាងបុរសថែមទៀតផង» ។

លោកបានបន្ថែមថា គាត់នៅបន្តគាំទ្រ និងលើកស្ទួយទៅលើស្រ្តី ប្រសិនណាមានស្រ្តីជាអ្នកដឹកនាំបន្ថែមទៀត ហើយលោកក៏មានការជំរុញចង់ឱ្យស្ដ្រីមានការប្រឹងប្រែងប្រើប្រាស់សមត្ថភាពឲ្យបានច្រើន។

លោក សុន រស្មី អាយុ ២១ឆ្នាំ មុខជំនាញ ភាសាវិទ្យា នៅសាកលវិទ្យាល័យភូមិន្ទភ្នំពេញ លើកឡើងថា វាជារឿងល្អប្រសើរ នៅពេលដែលស្ដ្រីជាអ្នកដឹកនាំ ពីព្រោះវាបានជះឥទ្ធិពលឲ្យសង្គមខ្មែរមានការអភិវឌ្ឍ និងរីកចម្រើន។

លោកបាននិយាយថា៖ «ក្នុងប៉ុន្មានទសវត្សរ៍ចុងក្រោយនេះ ប្រទេសកម្ពុជាបានផ្ដល់ឱកាស និងលើកតម្កើងស្រ្តីបានច្រើនក្នុងការចូលរួមសកម្មភាពដឹកនាំសង្គម ហើយខ្ញុំនៅតែមានការគាំទ្រ និងបន្តលើកទឹកចិត្តឱ្យស្រ្តីមានឱកាសក្នុងការដឹកនាំ និងកិច្ចការផ្សេងៗក្នុងសង្គម» ។

លោកសំណូមពរឱ្យសង្គមខ្មែរលុបបំបាត់ការរើសអើងលើស្ដ្រី ហើយងាកមកជំរុញ និងលើកទឹកចិត្តស្រ្តីឱ្យក្លាយជាបុគ្គលសំខាន់ក្នុងការជួយដឹកនាំ និងអភិវឌ្ឍសង្គម ពីព្រោះស្រ្តីក៏មានសិទ្ធិសេរីភាពស្មើគ្នាដូចភេទដទៃទៀតដែរ៕

Vox Pop: អ្នកបើកបរកង់បីខ្មែរត្អូញត្អែរពីបញ្ហាប្រាក់ចំណូលធ្លាក់ចុះ ដោយសារកំណើនកង់បីឥណ្ឌា

សេន តុលា (Sen Tola) — Mon, 28 Dec 2020 08:30:09 +0000

អ្នកបើកបរកង់បីខ្មែរមួយចំនួនត្អូញត្អែរថា ពួកគេកំពុងតែជួបបញ្ហាប្រាក់ចំណូលធ្លាក់ចុះ ដោយសារប្រជាជនខ្មែរងាកមកធ្វើដំណើរដោយកង់បីឥណ្ឌា ឬ ការប្រើប្រាស់បច្ចេកវិទ្យាលើទូរស័ព្ទដៃសម្រាប់ស្វែងរកមធ្យោបាយធ្វើដំណើរជំនួសវិញ។

ក្រុមសិក្ខាកាមរបស់ Newsroom Cambodia បានសម្ភាសន៍អ្នករត់កង់បីខ្មែរមួយចំនួន អំពីការកើនឡើងនៃចំនួនកង់បីឥណ្ឌានៅកម្ពុជា។

លោក សុខ លាភ អាយុ ៣២ឆ្នាំ មកពីខេត្ត ត្បូងឃ្មុំ ដែលជាអ្នកប្រកបមុខរបរបើកបរកង់បីខ្មែរ រយៈពេល៣ឆ្នាំ បានប្រាប់ Newsroom Cambodia ថា សព្វថ្ងៃនេះ ប្រាក់ចំណូលដែលរកបានពីការបើកបរកង់បីមានការធ្លាក់ចុះជាខ្លាំង ដោយសារតែការវាយលុករបស់កង់បីឥណ្ឌាក្នុងទីផ្សារ និងការរាលដាលវីរុសកូវីដ១៩ ក្នុងប្រទេសកម្ពុជា។ លោកបន្ថែមថា ពេលខ្លះក្នុងមួយថ្ងៃមិនមានអ្នកដំណើរធម្មតាមកជិះកង់បីរបស់លោកទេ ដោយសារតែពួកគេគិតថាតម្លៃកង់បីខ្មែរថ្លៃជាងកង់បីឥណ្ឌា។

លោកថា៖ «កាលពីមុនក្នុងមួយថ្ងៃ ខ្ញុំរកបាន២០ ទៅ៣០ដុល្លារ តែតាំងពីមានជម្ងឺកូវីដមក ខ្ញុំរកបានត្រឹមតែ៥ ទៅ១០ដុល្លារ ហើយបច្ចុប្បន្នប្រជាជនខ្មែរច្រើនតែជិះកង់បីឥណ្ឌាទៀត កាន់តែពិបាករកជាងមុន»។

លោក សុខ លាភ

លោក ប្រាក់ វុទ្ធី អាយុ៦០ ឆ្នាំ មកពីខេត្តកំពង់ស្ពឺ ជាអ្នកប្រកបមុខរបរបើកបរកង់បីខ្មែរ រយៈពេល៥ឆ្នាំ និយាយថា កាលពីមុនលោកអាចរកប្រាក់ចំណូលបានពី ៨០,០០០ ដល់ ៩០,០០០រៀល ក្នុងមួយថ្ងៃ។ បច្ចុប្បន្ននេះ លោករកបានត្រឹមតែ១០,០០០រៀល ក្នុងមួយថ្ងៃ ហើយពេលខ្លះសឹងតែរកមិនបានប្រាក់ចំណូលទៀតផង។

លោកនិយាយថា៖ «រាល់ថ្ងៃនេះ រកស៊ីចិញ្ចឹមខ្លួនឯងមិនចង់រស់ផង គ្រួសារនៅស្រុកមិនដែលបានផ្ញើអីឲ្យទេ ដោយសាររកពុំសូវបាន»។

លោក សុខ ធី មានអាយុ៤៧ឆ្នាំ បានប្រកបមុខរបររត់កង់បីខ្មែរអស់រយៈពេលជាង ២០ឆ្នាំមកហើយ ប្រាប់ថា បច្ចុប្បន្ននេះអ្នកធ្វើដំណើរតែងតែប្រើប្រាស់បច្ចេកវិទ្យាលើទូរស័ព្ទដៃសម្រាប់ស្វែងរកមធ្យោបាយធ្វើដំណើរ ហើយភាគច្រើន កង់បីឥណ្ឌា មានការតភ្ជាប់ប្រព័ន្ធបច្ចេកទេសជាមួយក្រុមហ៊ុនមធ្យោបាយធ្វើដំណើរ។

លោកថា៖ «ភ្ញៀវភាគច្រើនជាជនបរទេសដែលជិះកង់បីខ្មែរ តែដោយសារឥឡូវនេះមានបញ្ហាជំងឺកូវីដ១៩ ទើបធ្វើឲ្យកំណើនភ្ញៀវបរទេសធ្លាក់ចុះ ចឹងហើយវាកាន់តែពិបាករកលុយទៀត»។

លោក វ៉ាន់ នី

លោក វ៉ាន់ នី អាយុ៥៥ឆ្នាំ ដែលប្រកបរបរកង់បីរយៈពេល១៥ឆ្នាំ បាននិយាយថា ប្រាក់ចំណូលដែលលោករកបានសព្វថ្ងៃនេះ ត្រូវយកមកផ្គត់ផ្គង់ជីវភាពគ្រួសារ ដូចជាថ្លៃជួលផ្ទះ ការសិក្សារបស់កូន និងចំណាយផ្សេងៗទៀត។

លោកបន្តថា៖ «ខ្ញុំមិនមានអ្វីសំណូមពរទេ គ្រាន់តែចង់អោយអ្នកធ្វើដំណើរជួយជិះកង់ខ្មែរ និងបន្តគាំទ្រកង់ខ្មែរទៀត ហើយតម្លៃកង់បីខ្មែរ និងកង់បីឥណ្ឌាក៏មិនមានភាពខុសគ្នាដែរ»៕

សាលារាជធានីហាមមិនឲ្យប្រារព្ធពិធីបុណ្យណូអែល និងឆ្លងឆ្នាំដោយសារជំងឺកូវីដ១៩

សេន តុលា (Sen Tola) — Thu, 24 Dec 2020 09:28:24 +0000

សាលារាជធានីភ្នំពេញហាមមិនឲ្យប្រារព្ធពិធីបុណ្យណូអែល និងឆ្លងឆ្នាំសកលឆ្នាំនេះ ដោយសារបារម្ភពីស្ថានភាពជំងឺកូវីដ១៩។ នេះបើតាមការបញ្ជាក់ពីអ្នកនាំពាក្យសាលារាជធានី។

លោក ម៉េត មាសភក្ដី អ្នកនាំពាក្យសាលារាជធានីភ្នំពេញប្រាប់ Newsroom Cambodia តាមប្រព័ន្ធទំនាក់ទំនងតេឡេក្រាម (Telegram) នៅថ្ងៃទី២៤ ខែធ្នូ ឆ្នំា២០២០នេះថា ពិធីបុណ្យណូអែល និងចូលឆ្នាំសកលខាងមុខនេះ មិនអនុញ្ញាតឱ្យប្រារព្ធនោះទេ។ លោកថា ការហាមឃាត់នេះគឺដោយសារតែបញ្ហានៃស្ថានភាពជំងឺកូវីដ១៩។

លោកសរសេរយ៉ាងខ្លីថា៖ «ត្រូវនាំគ្នាអនុវត្តតាមសេចក្ដីណែនាំរបស់ក្រសួងសុខាភិបាលជាចាំបាច់»។

យ៉ាងណាក្តី លោក ឃួង ស្រេង អភិបាលរាជធានីភ្នំពេញបានប្រាប់សារព័ត៌មានថ្មីៗកាលពីថ្ងៃទី២៣ ខែធ្នូនេះថា នៅថ្ងៃបុណ្យណូអែល និងបុណ្យចូលឆ្នាំសកលខាងមុខនេះ សាលារាជធានីភ្នំពេញបានបង្គាប់ឲ្យអាជ្ញាធរគ្រប់ខណ្ឌទាំង១៤ក្នុងរាជធានីភ្នំពេញ ត្រៀមត្រួតពិនិត្យមើលស្ថានភាពនៅគ្រប់មូលដ្ឋាន និងណែនាំដល់ពលរដ្ឋកុំមានការជួបជុំគ្នាលើសពី២០នាក់ឡើងទៅ។ លោកក៏បានបញ្ជាក់ថា មានការហាមពលរដ្ឋមិនឲ្យមានការជួបជុំ ដូចជាការប្រគំតន្ត្រី និងពិធីធំៗនៅតាមសាធារណៈអាចមានហានិភ័យឆ្លងជំងឺកូវីដ១៩។

លោក ហួត ណារិន ប្រធានព្រះវិហាគ្រឹស្ត ប៊ីសប ហួតណារិន វូដទឹកល្អក់ ប្រាប់ Newsroom Cambodia នៅថ្ងៃទី២៤ ខែធ្នូនេះថា លោកសាទរនឹងវិធានការ ដោយថា ជាផ្នែកមួយក្នុងការចូលរួមចំណែកទប់ស្កាត់ការរីករាលដាលជំងឺកូវីដ១៩។

លោកបានបន្ថែមថា បើទោះបីជាមិនមានការអនុញ្ញាតឲ្យមានការជួបជុំតាមទីសាធារណ:ក៏ពិតមែន ក៏ប៉ុន្តែអ្នកដែលជាគ្រិស្តបរិស័ទទាំងអស់អាចប្រារព្ធពិធីបុណ្យណូអែលនេះនៅតាមគេហដ្ឋានរបស់ពួកគេរៀងៗខ្លួនបាន ដោយគោរព និងអនុវត្តនូវវិធានការនៃការការពាររបស់ក្រសួងសុខាភិបាល។

លោកនិយាយ៖ «សម្រាប់ខ្ញុំមិនមានអ្វីជាបព្ហានោះទេ នូវសេចក្ដីសម្រេចរបស់សាលារាជធានីភ្នំពេញ ខ្ញុំមានតែសប្បាយចិត្តទៅវិញនោះទេ»។

បច្ចុប្បន្នកម្ពុជាមានអ្នកឆ្លងជំងឺកូវីដ១៩ ចំនួន៣៦៣នាក់ ក្នុងនោះជាសះស្បើយចំនួន៣៥១នាក់ ចំណែកអ្នកជំងឺនៅសល់១២នាក់ទៀត កំពុងបន្តព្យាបាលនៅមន្ទីពេទ្យមិត្តភាពខ្មែរ-សូវៀត៕

គណបក្សប្រជាធិបតេយ្យមូលដ្ឋានជំរុញឲ្យក្រសួងអប់រំ យកលទ្ធផលប្រលងឆមាសមកគិតជានិទ្ទេសវិញ

សេន តុលា (Sen Tola) — Thu, 17 Dec 2020 09:06:33 +0000

គណបក្សប្រជាធិបតេយ្យមូលដ្ឋាន (គបម) បានលើកឡើងនៅថ្ងៃព្រហស្បតិ៍ ទី១៧ ខែធ្នូ ឆ្នាំ២០២០នេះថា ក្រសួងអប់រំ យុវជន និងកីឡា គប្បីយកលទ្ធផលនៃការប្រលងឆមាសទី១ និងឆមាសទី២ យកមកគិតជានិទ្ទេសវិញ សម្រាប់លទ្ធផលប្រលងសញ្ញាបត្រមធ្យមសិក្សាបឋមភូមិ (ឌីប្លូម) និងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០១៩-២០២០។

គបម បានសរសេរក្នុងសេចក្ដីថ្លែងការណ៍របស់ខ្លួនថា៖ «ក្រសួងអប់រំ យុវជន និងកីឡា គប្បីយកលទ្ធផលនៃការប្រលងឆមាសទី១ និងឆមាសទី២ យកមកគិតជានិទ្ទេសវិញដែលជាករណីពិសេសបំផុត ការធ្វើបែបនេះ គឺជាការជំរុញ និងលើកទឹកចិត្តទៅដល់សិស្សក្នុងការខិតខំរៀនសូត្រ និងធានាគុណភាពងអប់រំដែលក្រសួងបានព្យាយាមកែទម្រង់កន្លងមក»។

ក្រសួងអប់រំ យុវជន និងកីឡា បានប្រកាសកាលពីថ្ងៃទី១៦ ខែធ្នូ ឆ្នាំ២០២០ថា បានសម្រេចឲ្យបេក្ខជនដែលបានចុះឈ្មោះទាំងអស់ជាប់ស្ថាពរ ដោយគ្មានការកំណត់និទ្ទេស ក្រោយពីមានសំណើពីលោកនាយករដ្ឋមន្រ្តី ហ៊ុន សែន ដើម្បីប្រយុទ្ធប្រឆាំងនឹងការរីកដាលនៃជំងឺកូវីដ១៩។

អ្នកនាំពាក្យរបស់ក្រសួងអប់រំ យុវជន និងកីឡា លោក រស់ សុវាចា បានប្រាប់ Newsroom Cambodia នៅថ្ងៃទី១៧ ខែធ្នូ ឆ្នាំ២០២០នេះតាមរយ:ប្រព័ន្ធទំនាក់ទំនងតេឡេក្រាមថា ក្រសួងគ្រាន់តែគោរពតាមអនុសាសន៍របស់លោកនាយករដ្ឋមន្រ្តី ដើម្បីបន្តចូលរួមគ្រប់គ្រង ទប់ស្កាត់ និងបង្ការការរីករាលដាលនៃកូវីដ១៩តែប៉ុណ្ណោះ។

លោកបាននិយាយថា៖ «ក្រសួងអប់រំនឹងចេញសេចក្ដីជូនដំណឹងជាផ្លូវការដើម្បីបញ្ជាក់លម្អិត និងបង្ហាញពីទិដ្ឋភាពពាក់ព័ន្ធផ្សេងជូនសិស្សានុសិស្ស អាណាព្យាបាល និងមហាជនឱ្យបានច្បាស់នៅពេលក្រោយបន្ទាប់»៕

អាជីវករតូចតាចនៅខេត្តកំពង់ធំ ត្អូញត្អែរពីផលប៉ះពាល់ជីវភាព ដោយសារជំងឺកូវីដ ១៩

សេន តុលា (Sen Tola) — Mon, 14 Dec 2020 15:08:41 +0000

(ខេត្តកំពង់ធំ)៖ អ្នកលក់ដូរក្រៅប្រព័ន្ធមួយចំនួននៅក្នុងផ្សាររំលង ក្នុងស្រុកតាំងគោក ខេត្តកំពង់ធំ កាលពីពេលថ្មីៗនេះ បានត្អូញត្អែរថា អាជីវកម្មពួកគាត់ទទួលរងផលប៉ះពាល់យ៉ាងខ្លាំង បន្ទាប់ពីមានការឆ្លងរាលដាលនៃជំងឺកូវីដ-១៩ ចូលដល់ក្នុងសហគមន៍ ដែលពេលនេះបានចម្លងដល់មនុស្ស ៤០នាក់ហើយ។

https://cambonomist.com/news/small-vendors-bemoan-income-drop-as-covid-spreads-into-community/