សោម ស្រីពេជ្រ (Som Sreypich) – Newsroom Cambodia

ក្មេងៗបន្តលក់នៅតំបន់អង្គរវត្តដើម្បីជីវភាពគ្រួសារ

សោម ស្រីពេជ្រ (Som Sreypich) — Sat, 01 Jan 2022 11:49:48 +0000

កុមារីឈ្មោះនាង សម្បុរស្រអែមអង្គុយបត់ជើងលើស្មៅ ដៃកាន់កញ្រ្ចែញពោរពេញទៅដោយផ្លែចំបក់ក្បែរកង់សំណព្វរបស់ខ្លួនទាំងទឹកមុខអស់សង្ឃឹម ខណៈរងចាំភ្ញៀវទេសចរនាចំណតរថយន្តនៅខាងមុខប្រាសាទអង្គរវត្ត។

កុមារីនាង មានអាយុ ១៤ឆ្នាំ ហើយកំពុងជួយគ្រួសាររបស់នាងដែលជួបវិបត្តិដែលបណ្តាលមកពីជំងឺរាតត្បាតកូវីដ១៩។ នាងជាក្មេងម្នាក់ក្នុងចំណោមក្មេងតូចៗប្រមាណ ២០នាក់ ដែលលក់ឥវ៉ាន់ដល់ភ្ញៀវទេសចរក្នុងតំបន់អង្គរវត្ត បើទោះជាមានហាមឃាត់ដោយអាជ្ញាធរអប្សរាក៏ដោយ។ ម្ដាយរបស់នាងមានផ្ទុកមេរោគអេដស៍ ហើយឪពុករបស់នាងបានស្លាប់ក្នុងគ្រោះថ្នាក់ចរាចរណ៍ជាច្រើនឆ្នាំមកហើយ។

កុមារីនាង

កុមារីនាង ដែលត្រូវបានដាក់ឈ្មោះតែមួយម៉ាត់ក្នុងអត្ថបទនេះដើម្បីការពារអត្តសញ្ញាណគាត់។ នាងមានបងប្អូនបីនាក់ បងប្រុសរបស់នាងបានរៀបការហើយបានផ្លាស់ចេញពីគ្រួសារ។ ប្អូនប្រុសម្នាក់ជាប់ពន្ធនាគារនៅខេត្តសៀមរាបជាងមួយឆ្នាំហើយជុំវិញការវាយតប់គ្នាមួយ។

ដោយសារការលក់វត្ថុអនុស្សាវរីយ៍នៅអង្គរត្រូវបានហាមឃាត់ កុមារត្រូវបង្ខំចិត្តលក់ ផលិតផលរបស់ពួកគេដោយលាក់នៅក្នុងថង់ប្លាស្ទិកខ្មៅ។ បើឆ្មាំអាជ្ញាធរអប្សរាចាប់បាន ឥវ៉ាន់នឹងត្រូវរឹបអូស។

ជីវិតគឺមានការលំបាកសម្រាប់កុមារដែលលក់នៅអង្គរ ខណៈដែលពួកគេព្យាយាមលៃពេលនៃការកប្រាក់ចំណូលដើម្បីផ្គត់ផ្គង់គ្រួសាររបស់ពួកគេជាមួយនឹងការទៅសាលារៀន។ ពួកគេលកឥវ៉ាន់់ដូចជាវត្ថុអនុស្សាវរីយ៍ អាហារ ផ្លែឈើ និងគ្រាប់ផ្លែឈើ ដើម្បីជួយសម្រួលដល់ជីវភាពគ្រួសារ។ បើរៀនពេលល្ងាច គេលក់ពេលព្រឹក។

កុមារីនាង បាននិយាយថា៖ «ពេលដល់ម៉ោងចេញទៅផ្ទះខ្ញុំប្រញាប់ជិះទៅផ្ទះ ហើយផ្លាស់ប្តូរសម្លៀកបំពាក់ និងជិះមកលក់នៅម្ដុំមុខអង្គរវិញរហូតដល់ម៉ោងប្រាំល្ងាច»។

ក្នុងពេលបិទក្រុងសៀមរាប កុមារីនាងមិនអាចលក់នៅអង្គរបានទេ។ ផ្ទុយទៅវិញ នាងបានបេះផ្សិតទៅលក់នៅក្នុងភូមិរបស់នាង។

កុមារីជាអតីតអ្នករើសអេតចាយនៅអង្គរ ហើយបានចាប់ផ្តើមលក់គ្រាប់ចំបក់នៅអាយុ ៧ឆ្នាំ។ នាងជាសិស្សថ្នាក់ទី៥ នៅចំពេលសាលារបស់នាងត្រូវបិទទ្វារដោយសារវិបត្តិកូវីដ-១៩។

«ដើម្បីរៀនអនឡាញបានយ៉ាងហោចណាស់ក៏ត្រូវមានទូរស័ព្ទស្មាតហ្វូនមួយគ្រឿងដែរ តែគ្រួសារខ្ញុំក្រហើយម៉ែប្រើទូរស័ព្ទអិនចុចពិលហ្នឹង»។

អ្នកផ្ទះកុមារីរូបនេះមិនមានទូរស័ព្ទទំនើប ដូចនេះនាងមិនអាចរៀនតាមប្រព័ន្ធអនឡាញបានដូចក្មេងដទៃនោះទេ។ បើគិតមកទល់ពេលនេះប្រមាណជាងពីរឆ្នាំហើយ ប្អូនស្រីនៅតែរៀនថ្នាក់ទី៥ដដែល មិនអាចឡើងថ្នាក់បានដូចគេឡើយ ខណៈពេលដែលមិត្តរួមថ្នាក់ផ្សេងទៀតនឹងត្រូវឡើងថ្នាក់ទី៧ក្នុងពេលឆាប់ៗនេះ។

សាលារបស់នាងត្រូវបានបើកឲ្យចូលរៀនវិញនៅកំឡុងខែតុលា ហើយកុមារីត្រូវចំណាយពេល ៤០នាទីធ្វើដំណើរទៅសាលាដោយជិះកង់។

កុមារីរូបនេះបានបន្តថា៖ «ទោះបីខ្ញុំរៀនមិនពូកែដូចគេ ប៉ុន្តែខ្ញុំមិនដែលមានចិត្តគិតថាចង់បោះបង់ការសិក្សាឡើយ។ កាលរៀនថ្នាក់ទី២ ខ្ញុំធ្លាប់ត្រួតថ្នាក់ម្ដងដោយសារមិនបានទៅប្រឡងឆមាស»។

កុមារីបានរំលឹកថាការត្រួតថ្នាក់នោះ ដោយសារតែមិនបានទៅប្រឡងឆមាសព្រោះថ្ងៃប្រឡងត្រូវជាថ្ងៃបុណ្យសពឪពុកខ្លួន។

ស្រដៀងគ្នានេះដែរ កុមារីនាថ អាយុ ១១ឆ្នាំ ជាសិស្សរៀនថ្នាក់ទី៤ ដែលគ្រួសាររបស់នាងមានជីវភាពលំបាក តែទោះបីជាយ៉ាងណាក្តីកុមារីរូបនេះនៅតែស្រឡាញ់ការសិក្សា និងមានក្តីសង្ឃឹមចង់បន្តរៀនរហូតដល់ចប់។

នាថក៏ត្រូវបានដាក់ឈ្មោះតែមួយម៉ាត់ក្នុងអត្ថបទនេះផងដែរដើម្បីការពារអត្តសញ្ញាណគាត់។ ក្រៅពីការសិក្សា នាថតែងដើរលក់ខ្សែដៃអង្កាំដែលនាងទិញអង្កាំពីគេរួចយកមកចាក់ដោយខ្លួនឯង។ កុមារីរូបនេះដើរលក់ខ្សែដៃតាំងពីឆ្នាំ២០១៦ តាំងពីគេមិនទាន់រៀបចំទីតាំងមុខអង្គរឲ្យបានរៀបរយ មិនទាន់ដាំដើមឈើនៅមុនផ្លូវចូលអង្គរមកម្លេះ។

កុមារីនាថ និងម្តាយ

នាងបាននិយាយថា៖ «កាលគេបិទខ្ទប់តំបន់ក្រហមមិនឱ្យចេញមកក្រៅបានខ្ញុំមិនអាចលក់ដូរបានដូចរាល់ដងទេ តែខ្ញុំនៅផ្ទះអានសៀវភៅនិងស្វ័យសិក្សា»។

នាថបានរៀបរាប់អំពីជីវិតបណ្ដើរ ហូរទឹកភ្នែកបណ្ដើរ ដោយសារតែរំជួលចិត្តនឹកអាណិតដល់ម្ដាយដែលរមែងត្រូវឪពុកនាងប្រើអំពើហិង្សា។ លើសពីនេះទៅទៀត ក្នុងគ្រួសារមានភាពមិនចុះសម្រុងគ្នា ឪពុកធ្លាប់លើកដៃចង់វ៉ៃព្រមទាំងប្រើពាក្យសំដីខ្លាំងៗគំហកដាក់នាងទៀតផង។

ម្ដាយកុមារីនាថ អាយុ ៤៨ឆ្នាំ ហើយក្នុងសំលៀកបំពាក់អាវពណ៌បៃតងមានតួនាទីជាអ្នកបោសសំអាតនៅតំបន់អង្គរ។

អ្នកស្រីបានពោលថា៖ «ខាងអាជ្ញាធរអប្សរាគេបានហាមមិនអោយក្មេងៗលក់ដូរយូរណាស់ហើយ ការលក់របស់កូនខ្ញុំនេះគឺលក់ដោយការលួចលាក់ទេ គេមិនឱ្យក្មេងៗលក់នោះទេ តែសម្រាប់មនុស្សធំដែលមានតូបលក់ គឺគេរៀបកន្លែងសម្រាប់ឱ្យលក់»។

អ្នកស្រីបាននិយាយទៅកាន់កូនគាត់ថា «ប្រសិនជាខាងអាជ្ញាធរអប្សរាគេចាប់ កូនឯងប្រាប់គេទៅពូអើយ! ខ្ញុំលក់នេះគឺដើម្បីយកលុយទៅរៀនទេពូ»។

អ្នកស្រីធ្វើការបានប្រាក់ត្រឹមតែ ១៣០ដុល្លារក្នុងមួយខែ។ ពីរនាក់ម្ដាយកូននៅពេលខ្វះខាត គឺខ្ចីបុលគេ ហើយនៅពេលបើកលុយក៏សងគេវិញទៅ។ បច្ចុប្បន្ននេះគាត់លក់ដូរមួយថ្ងៃកាត់មួយថ្ងៃកោរ លក់ដាច់បំផុតបាន ២ម៉ឺនរៀលទៅ ៤ម៉ឺនរៀល ហើយលុយដែលកូនគាត់លក់បានគាត់យកមកទុកចាត់ចែងនិងឱ្យកូនទៅរៀន។

លោកឡុង កុសល អ្នកនាំពាក្យអាជ្ញាធរជាតិអប្សារាបាននិយាយថាមិនមានកូនក្មេងលក់នៅតំបន់អង្គរនោះទេ។

«ក្នុងពេលបច្ចុប្បន្នមិនមានទេក្មេងៗដែលលក់របស់វត្ថុអនុស្សាវរីយ៍រញ៉េរញ៉ៃអីហ្នឹងទេ ខ្ញុំនិយាយនៅក្នុងតំបន់អង្គរ យើងត្រូវដឹងថាកុមារមានភារកិច្ចត្រូវការរៀនសូត្រ»។

ដោយមិនសំដៅលើកុមារ លោកបាននិយាយថាអ្នកលក់គ្រប់ប្រភេទ និងគ្រប់វ័យដែលលក់រញ៉េរញ៉ៃបង្កផលលំបាក និងបង្កើតអនាធិបតេយ្យដែលមើលទៅជារូបភាពអាក្រក់ ជាពិសេសវាបង្កើតនូវអារម្មណ៏ធុញថប់ទៅដល់ភ្ញៀវទេសចរណ៍ទាំងភ្ញៀវជាតិ និងភ្ញៀវអន្តរជាតិ។

លោកបានលើកឡើងថាវាជាកង្វះការយល់ដឹងរបស់ឳពុកម្តាយ ឬអាណាព្យាបាលដែលបណ្តោយឱ្យកុមារទាំងនោះមកលក់ដូរដើម្បីក្តោបក្ដាប់ឱកាសរកផលចំណេញមិនសូវយកចិត្តទុកដាក់លើការសិក្សា ដែលបណ្ដាលឱ្យប៉ះពាល់ដល់អនាគតកុមារទាំងនោះទៅវិញទេ។

លោកឡុង កុសល បានបន្តថា៖ «សម្រាប់យើងលើកទឹកចិត្តគាត់ឱ្យទៅបន្តការរៀនសូត្រ ពីព្រោះកន្លងមកខាងអាជ្ញាធជាតិអប្សារាបានអនុវត្តហើយនូវកិច្ចការងារពង្រឹងចំណេះដឹងរបស់ពួកគាត់តាមរយៈការធ្វើយ៉ាងណាឱ្យគាត់ងាកត្រឡប់ទៅរកការសិក្សា»។

លោកទៀ សីហា អភិបាលខេត្តសៀមរាប បានបញ្ជាក់ផងដែរថា អាជ្ញាធរខេត្តបានដឹងអំពីរឿងនេះហើយក៏ធ្លាប់សម្របសម្រួលផងដែរ តែនេះគឺជាសិទ្ធ និងកិច្ចការការពាររបស់អាជ្ញាធរជាតិអប្សរាទេ។

លោកបានមានប្រសាសន៍ថា៖ «រឿងនេះ គឺជាការសម្រេចរបស់អាជ្ញាធរជាតិអប្សរា» ។

អភិបាលរងខេត្តសៀមរាប លោកលី សំរិទ្ធ បាននិយាយថាការងារនេះ ជាសមត្ថកិច្ចរបស់អាជ្ញាធរជាតិអប្សរា ហើយមកទល់ពេលនេះពុំទាន់មានវិធានការ ឬក៏ជាជំនួយអ្វីដល់ក្មេងៗលក់វត្ថុអនុស្សាវរីយ៍ទាំងនោះឡើយ៕

Kids Continue to Sell At Angkor Wat to Survive

សោម ស្រីពេជ្រ (Som Sreypich) — Sat, 01 Jan 2022 10:49:42 +0000

Families hit hard by the pandemic continue to send their kids to sell trinkets to tourists at the temples of Angkor, in breach of a long-standing ban, as they struggle to juggle studies with survival.

Full story here: https://kiripost.com/stories/kids-continue-to-sell-at-angkor-wat-to-survive

Q&A: ការលើកស្ទួយវប្បធម៌នៃការចែករំលែកក្នុងបរិបទជំងឺកូវីដ១៩របស់គម្រោង Local4local

សោម ស្រីពេជ្រ (Som Sreypich) — Wed, 01 Dec 2021 10:21:03 +0000

ចាប់តាំងពីកម្ពុជាមានផ្ទុះជំងឺកូវីដ១៩ពីដើមឆ្នាំ២០២០មក យើងឃើញថាប្រជាពលរដ្ឋជាច្រើនរងផលប៉ះពាល់ដល់ជីវភាពរស់នៅរបស់ពួកគេ ជាពិសេសប្រជាពលរដ្ឋដែលមានជីវភាពក្រីក្រ។ ខណៈដែលប្រជាពលរដ្ឋក្រីក្រជាច្រើនរងផលប៉ះពាល់ខ្វះខាតស្បៀងអាហារអំឡុងពេលជំងឺកូវីដ១៩នេះ គេឃើញមានយុវជនមួយក្រុមបង្កើតគម្រោង Local4local ដើម្បីប្រមូលគ្នាបរិច្ចាគជាអាហារ និងរបស់របរប្រើប្រាស់ផ្សេងៗ ដល់ប្រជាពលរដ្ឋដែលខ្វះខាតនៅរាជធានីភ្នំពេញ។

លោក តាំង ហួងហាវ ស្ថាបនិកគម្រោង Local4local បានផ្តល់កិច្ចសម្ភាសន៍ដល់សិក្ខាកាម Newsroom Cambodia អំពីការលើកស្ទួយវប្បធម៌នៃការចែករំលែកក្នុងបរិបទជំងឺកូវីដ១៩ របស់គម្រោង Local4local។

លោក តាំង ហួងហាវ ស្ថាបនិកគម្រោង Local4local

ស្រីពេជ្រ៖ តើគម្រោង local4local គឺជាអ្វី ?

ហួងហាវ៖ គម្រោង local4local គឺជាគម្រោងមួយដែលផ្ដល់អាហារ និងរបស់របរផ្សេងៗទៀតទៅដល់អ្នកនៅតាមផ្លូវ ដូចជាអ្នករត់ស៊ីក្លូតាមផ្លូវ អ្នករើសសំរាមជាដើម បើនិយាយជាគោលដៅគឺជំរុញទៅលើការចែករំលែក គឺជំរុញវប្បធម៌នៃការចែករំលែកមិនថាតិចក្តីមិនថាច្រើនក្តី គឺគាត់អាចបរិច្ចាគបានទាំងអស់។

ស្រីពេជ្រ៖ តើគម្រោង Local4local បានបង្កើតឡើងនៅពេលណា?

ហួងហាវ៖ គម្រោងរបស់យើងគិតមកដល់ឥឡូវបង្កើតឡើងបានចូលជិតប្រាំបីខែហើយ មកដល់សព្វថ្ងៃនិង local4local បានចែកជាអាហារក្ដៅបានប្រហែលជាពីរម៉ឺនប្រាំពីរពាន់កញ្ចប់ ហើយបានជួយដល់ គ្រួសារដែលនៅតំបន់ក្រហមតាមរយៈអង្គការផ្សេងៗក្នុងនឹងមានគ្រឿងផ្សេងៗដូចជា ត្រីខ មី អង្ករ ដែលរៀបចំជាកញ្ចប់ៗ និងពេលដែលនៅតំបន់ក្រហមប្រហែលជិតប្រាំបីរយគ្រួសារ។

ស្រីពេជ្រ៖ តើធុងសហគមន៍ចល័តគឺជាអ្វី ?

ហួងហាវ៖ ធុងសហគមន៍ចល័តគឺជាមធ្យោបាយមួយដែលសម្រាប់អ្នកមានដាក់អ្នកខ្វះដក គឺជាធុងសប្បុរសមួយដែលមានរបស់របរផ្សេងៗដូចជាម្ហូប ខោអាវ របស់របរស្ងួត ដូចជាត្រីខមីអីផ្សេងៗគឺគាត់អាចបរិច្ចាគបាន ហើយអ្នកដែលគេខ្វះខាតនៅតាមដងផ្លូវគឺគាត់អាចបើកធុងនឹងដើម្បីយករបស់របរនិងអាហារក្នុងធុងនឹង ហើយធុងសហគមន៍ចល័តគឺជាធុងសប្បុរសនៅលើស៊ីក្លូ ដែលយើងតាំងពាក្យស្លោកមួយថា «អ្នកមានដាក់អ្នកខ្វះដក» ។

ស្រីពេជ្រ៖ តើធុងសហគមន៍ចល័តមានប៉ុន្មានទីតាំង?

ហួងហាវ៖ ឥឡូវនេះធុងសហគមន៍ចល័តមានទីតាំងរហូតដល់ ១០ កន្លែង ដែលចេញដំណើរពីម៉ោង ៩:៣០ ឬ ១០:៣០ និងម៉ោង ៤:០០ ឬ ៥:០០ ទៅតាមកន្លែងដូចជាតាមមាត់ទន្លេ ផ្សារថ្មី ផ្សាររាត្រី វត្តបុទុម និងកន្លែងផ្សេងៗទៀតជាដើម។

ស្រីពេជ្រ៖ តើយើងអាចបរិច្ចាគអ្វីបានខ្លះក្នុងធុងសហគមន៍ចល័ត?

ហួងហាវ៖ ធុងសហគមន៍ចល័តដែលមានទីតាំង ១០ កន្លែងធំៗនឹង គឺយើងអាចបរិច្ចាគជារបស់ក្ដៅដូចជាបាយកញ្ចប់ដូចជាម្ហូបអាហារផ្សេងៗ ភាគច្រើនពួកគាត់ក៏អាចបរិច្ចាគជាមីត្រីខ និងអាចបរិច្ចាកជារបស់របរផ្សេងៗទៀតដែលអាចបរិភោគដូចជាគាត់បរិច្ចាគជានំកញ្ចប់នំប៉័ងអីក៏មានដែរ កុំឲ្យតែរបស់នឹងមានសភាពខូចខាតឬមានក្លិនស្អុយឬក៏ហួសថ្ងៃកំណត់ គឺមិនអាចបរិច្ចាគក្នុងធុងសហគមន៍ចល័តបានទេ។ ហើយមួយរយៈក្រោយនេះមានបងប្អូនជាច្រើននាក់ដែលគាត់នៅតាមខេត្តដូចនៅសៀមរាប កំពង់សោម អ្នកខ្លះគាត់ផ្ញើជាខោអាវផ្សេងៗជាច្រើនដើម្បីចែកជូនអ្នកនៅតាមដងផ្លូវមានទាំងខោអាវប្រុសខោអាវស្រី។

ស្រីពេជ្រ៖ តើគម្រោង Local4local នឹងមានបង្កើតជាគម្រោងអ្វីបន្ថែមទៀតទេនៅថ្ងៃអនាគត?

ហួងហាវ៖ នៅពេលអនាគតទៅគម្រោង Local4local ចង់ពង្រីកបន្ថែមទៀត ដែលយើងមានគម្រោងប្រាំ។ ទីមួយគឺយើងមានគម្រោង ពង្រីកធុងសហគមន៍ចល័តទៅតាមកន្លែងផ្សេងៗទៀតនៅរាជធានីភ្នំពេញ បើមានការគាំទ្រពីបងប្អូនតាមរយៈការរៃអង្គាស និងថវិកាផ្សេងៗទៀតដើម្បីបន្តគម្រោងនឹង ហើយក៏មានគម្រោងបន្តធ្វើនៅតាមខេត្តនានាដូចជាសៀមរាបអីនឹង។ ហើយពួកគាត់នៅខេត្តក៏បានសួរមកខ្ញំថាទៅខេត្តគាត់ថ្ងៃណា ហើយខ្ញុំប្រាប់គាត់ដែរព្រោះស៊ីក្លូឥឡូវមានតែនៅភ្នំពេញទេ ហើយបើថាទៅខេត្តខ្ញុំបានផ្ដល់យោបល់មួយទៅគាត់ថា បើសិនជាយើងធ្វើធុងសហគមន៍ចល័តដែរប៉ុន្តែមិនមែនលើស៊ីក្លូគឺនៅលើរ៉ឺម៉កអីចឹងទៅ ដែលគោលដៅយើងគឺយើងចែករំលែកទៅដល់ពួកគាត់ដូចគ្នា។

ហើយគម្រោងទីពីរ គឺយើងសង្ឃឹមថានឹងមានស្ថានីយន៍ Local4local ដែលជាកន្លែងសម្រាប់ពួកគាត់អាចបរិច្ចាគបានមានទីកន្លែងច្បាស់លាស់ដើម្បីបរិច្ចាគជារបស់របរនិងគ្រឿងផ្សេងៗហើយអ្នកនៅតាមដងផ្លូវឬអ៊ំស៊ីក្លូអាចមកយករបស់របរនៅស្ថានីយ របស់ Local4local បាន។

ហើយគម្រោងទីបី គឺអាចមានជាការប្រកួតគំនូរផ្សេងៗដែលយើងបានរួមសហការជាមួយ Prudential Cambodia ដែលឥឡូនឹងគឺយើងមានពិព័រណ៍គំនូរស៊ីក្លូនាពេលអនាគត ហើយការប្រកួតនឹងគឺយើងមានគម្រោងខ្លះៗចង់ធ្វើស៊ីក្លូនាពេលអនាគតទាំងអស់នឹងទៅជាស៊ីក្លូមែនទែនដែលយើងអាចថាជាស៊ីក្លូអង្គុយ ឬក៏ស៊ីក្លូផ្សេងៗទៀត ហើយមានជាគំនិតច្នៃប្រឌិតមានជាគំនូរ ហើយមានសិល្បករសិល្បការិនីច្រើនមែនទែនដែលគាត់បានចូលរួមបញ្ចេញជាគំនិតជាយោបល់តាមរយៈគំនូររបស់គាត់គូរចេញជារូបរាង អាចធ្វើជារូបរាងពិតប្រាកដដែលមានដំណើរការនៅលើផ្លូវ។

ហើយគម្រោងទីបួន គឺយើងនឹងមានការពង្រីកក្រុមយុវជនស្ម័គ្រចិត្តដែលឥឡូវយើងមាន១២នាក់ យើងនឹងសង្ឃឹមថានឹងមានការចូលរួមជាច្រើនទៀត រួមនិងការធ្វើជាស៊ីក្លូ tours។ ការធ្វើជាស៊ីក្លូ tours ឧទាហរណ៍ថាជិះស៊ីក្លូទៅផឹកកាហ្វេ ជិះស៊ីក្លូទៅមើលពិព័រណ៍គំនូរឬសិក្ខាសាលាផ្សេងៗ ហើយការជិះស៊ីក្លូនឹងមិនមែនដូចដែលយើងជិះទៅមើលវិមានឯករាជ្យមើលវត្តភ្នំដដែលៗទេគឺយើងរកវិធីណាដើម្បីមានទាំងគំនិតថ្មីៗ ដែលជាការងារមួយជូនទៅដល់អ៊ំស៊ីក្លូ ព្រោះឥឡូវហ្នឹងមានចំនួនថយចុះពីមួយឆ្នាំទៅមួយឆ្នាំដោយសារកំណើននៃរ៉ឺម៉កធុកធុល ហើយយើងសង្ឃឹមថានឹងអាចផ្ដល់ការងារ និងប្រាក់ចំណូលជួយពួកគាត់បន្តទៅថ្ងៃអនាគតទៀត។

ហើយគម្រោងទីប្រាំ គឺជាគម្រោងមួយដែលខ្ញុំចង់ឲ្យក្រុមហ៊ុន Grab ឲ្យគាត់ដាក់បញ្ចូលស៊ីក្លូក្នុងកម្មវិធី Grabដែលមានឈ្មោះថា ក្រេបស៊ីក្លូ (Grab Cyclo) អីចឹងទៅអាចមានមធ្យោបាយមួយអាចផ្ដល់ជាការងារជូនដល់អ៊ំស៊ីក្លូ ហើយសម្រាប់អ្នកដែលចង់ជិះស៊ីក្លូពួកគេអាចមានមធ្យោបាយមួយសម្រាប់ហៅស៊ីក្លូជិះកម្សាន្តផ្សេងៗ ទាំងអស់នឹងគឺដូចគេនិយាយថាមិនត្រឹមតែឲ្យត្រីទៅពួកគាត់ទេ តែយើងឱ្យជាការងារមួយផ្ដល់ជាកម្រៃសម្រាប់ឲ្យពួកគាត់មានការងារធ្វើហើយជួយទ្រទ្រង់ទៅដល់ជីវភាពពួកគាត់ទៀត ហើយទាំងអស់នេះគឺជាគម្រោងធំៗទាំងប្រាំរបស់ Local4local។

ស្រីពេជ្រ៖ អរគុណសម្រាប់ការផ្តល់កិច្ចសម្ភាស។

ហួងហាវ៖ បាទអរគុណ៕

Voxpop: ការយល់ឃើញរបស់ប្រជាពលរដ្ឋលើតម្លៃប្រេងសាំងឡើងថ្លៃ

សោម ស្រីពេជ្រ (Som Sreypich) — Thu, 18 Nov 2021 03:13:08 +0000

តម្លៃប្រេងសាំងនៅកម្ពុជាបាននិងកំពុងហក់ឡើងថ្លៃយ៉ាងខ្លាំង ក្នុងរយៈពេលប៉ុន្មានខែចុងក្រោយនេះ ខណៈកម្ពុជាប្រកាសបើកប្រទេសឡើងវិញក្រោយបានផ្អាកវិស័យជាច្រើនដោយសារការរាតត្បាតជំងឺកូវីដ១៩។ តម្លៃសាំងកាលពីសប្តាហ៍មុនគឺប្រេងសាំងធម្មតាមានតម្លៃដល់ទៅ ៤,៥៥០រៀលក្នុងមួយលីត្រ ចំណែកសាំងស៊ុបពែរឡើងដល់ ៥,០៥០ រៀលក្នុងមួយលីត្រ។ បញ្ហាតម្លៃប្រេងសាំងឡើងថ្លៃនេះមិនមែនតែក្នុងកម្ពុជាទេ ប៉ុន្តែនៅតាមបណ្តាប្រទេសក្នុងតំបន់អាស៊ាន និងប្រទេសមួយចំនួននៅលើពិភពលោកក៏ជួបប្រទះបញ្ហានេះផងដែរ។

Newsroom Cambodia បានសម្ភាសន៍ប្រជាពលរដ្ឋ ចំនួន៥នាក់អំពីការយល់ឃើញ និងការលំបាកលើបញ្ហាតម្លៃប្រេងសាំងឡើងថ្លៃក្នុងពេលបច្ចុប្បន្ននេះ។

ហ៊ួ ស្រីលីន

កញ្ញា ហ៊ួ ស្រីលីន ជានិស្សិតនៅសកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ចបានបង្ហាញពីផលប៉ះពាល់ដល់រូបនាង និងជីវភាពក្នុងគ្រួសារដោយសារតែតម្លៃសាំងឡើងថ្លៃខ្លាំងពេក។

កញ្ញា ស្រីលីន បានប្រាប់ Newsroom Cambodia ថា៖ «ការឡើងថ្លៃសាំងនាពេលបច្ចុប្បន្ននេះ វាជះឥទ្ធិពលប៉ះពាល់ដល់រូបនាងខ្ញុំ និងក្រុមគ្រួសារដោយសារតែសាំងឡើងថ្លៃទៅ ត្រូវចំណាយច្រើនទៅលើការចាក់សាំងរាល់ថ្ងៃនឹង ហើយសង្គមយើងជំងឺកូវីដ១៩ ទើបរួចផុតប៉ុន្តែវាមិនមែនទាំងស្រុងទេ អីចឹងហើយសេដ្ឋកិច្ចនៅក្នុងគ្រួសារនៅមានកំរិត តាំងពីពេលមានជំងឺកូវីដ១៩មកយើងរកអីអត់សូវបាន អីចឹងដល់ពេលឡើងថ្លៃទៅវាពិបាកដែរ»។

កញ្ញា ស្រីលីន បានបន្ថែមទៀតថា៖ «ហើយចំពោះខ្ញុំជាអ្នកដែលមិនទាន់មានការងារធ្វើវារឹតតែជាបញ្ហាដោយសារខ្ញុំត្រូវការជិះម៉ូតូទៅណាទៅណី ខ្ញុំត្រូវចំណាយទៅលើថ្លៃសាំងនៅពេលដែលខ្ញុំមិនមានចំណូលវាជាបញ្ហាធ្ងន់ធ្ងរសម្រាប់ខ្ញុំ»។

ណេត វណ្ណា

លោក ណេត វណ្ណា អាយុ ៤៧ឆ្នាំ មានមុខរបរជាអ្នករត់ម៉ូតូឌុបនៅផ្សារច្បារអំពៅបាននិយាយថា៖ «និយាយទៅសាំងឡើងថ្លៃនេះវាប៉ះពាល់ខ្លាំងដែរនឹង ព្រោះធម្មតាចង់ឱ្យតែសាំងចុះថោកទេ ដូចពួកខ្ញុំជាអ្នករត់ម៉ូតូឌុបអីចឹងរកមួយថ្ងៃមិនបានចំណូលសឹងតែពីរម៉ឺនបីម៉ឺន [រៀល] ផងហើយសាំងឡើងថ្លៃទៅទៀត ចំណែកអ្នកជិះជួនកាលឲ្យថោកដដែលដល់អីចឹងទៅវាប៉ះពាល់ខ្លាំង»។

លោក វណ្ណា បានសំណូមពរទៅរដ្ឋាភិបាលថា៖ «សាំងឡើងថ្លៃនេះខ្ញុំចង់សំណូមពរឲ្យរដ្ឋាភិបាលធ្វើយ៉ាងម៉េចជួយអោយសាំងធ្លាក់ចុះត្រឹមមួយលីត្របីពាន់ [រៀល] ជាងបានហើយ ប៉ុណ្ណឹងវាអាចដោះស្រាយជីវភាពបាន បើចំណូលមួយថ្ងៃរកបានតែពីរម៉ឺន [រៀល] អីនឹង សឹងតែពិបាករកផងតាំងពីមានកូវីដមក»។

ឆៃ មុត

លោក ឆៃ មុត អាយុ២២ឆ្នាំ ជាអ្នកលក់ភេសជ្ជៈតាមដងផ្លូវមួយកន្លែងបានប្រាប់ Newsroom Cambodian ថា ៖ «សាំងឡើងថ្លៃនេះមានភាពលំបាកសម្រាប់ខ្ញុំក្នុងការចំណាយទៅលើថ្លៃសាំង ផ្ទះរបស់ខ្ញុំនៅឆ្ងាយរហូតដល់ផ្សារគរគី ហើយសាំងឡើងថ្លៃជិតដល់ប្រាំពាន់ [រៀល] ឥឡូវហើយនឹង ហើយផ្ទះខ្ញុំនៅឆ្ងាយខ្ញុំត្រូវការប្រើសាំងច្រើនមួយថ្ងៃមួយលីតជាងទៅពីរលីត្រឯណោះ »។

វន គីមសួរ

កញ្ញា វន គីមសួរ អាយុ២១ឆ្នាំ ជាបុគ្គលិកផ្នែកលក់នៅផ្សារទំនើបអ៊ីអនម៉លសែនសុខស៊ីធី បាននិយាយថា៖ «ចំពោះបញ្ហាការឡើងថ្លៃសាំងសម្រាប់ខ្ញុំផ្ទាល់វាពិបាកដោយសារកន្លែងធ្វើការឆ្ងាយពីផ្ទះ ដូច្នេះការចំណាយទៅលើថ្លៃសាំងគឺអស់ច្រើនហើយនៅពេលដែលចំណាយសាំងច្រើន ស្របពេលដែលសាំងកំពុងតែឡើងថ្លៃទៀតដែលធ្វើឲ្យការចំណាយរបស់ខ្ញុំរឹតតែច្រើនទៅតាមនឹងទៀត»។

កញ្ញា គីមសួរ បានបន្ថែមទៀតថា៖ « បើសិនជាយើងគ្រាន់តែសម្លឹងទៅលើបញ្ហារបស់ខ្លួនឯងយើងគិតថាយើងជាអ្នករងគ្រោះដោយសារយើងត្រូវចំណាយច្រើនជាងមុនអីជាដើម ក៏ប៉ុន្តែបើសិនជាយើងយល់ដឹងពីដើមចមថាហេតុអ្វីសាំងឡើងថ្លៃហើយយើងមើលទៅលើទំនោរពិភពលោកថាស្រុកទេសជិតខាងយើងវាយ៉ាងម៉េចដែរនោះ យើងនឹងយល់ថាបញ្ហាទាំងអស់នឹងគឺវាកើតមានជាសកលលោកវាមិនមែនជាអ្វីដែលរដ្ឋាភិបាលឬអ្នករកស៊ីសាំងនឹងគាត់ធ្វើដោយចិត្តឯងនោះទេ»។

ឡាញ់ វឌ្ឍនសាល

លោក ឡាញ់ វឌ្ឍនសាល អាយុ២១ឆ្នាំ ជាអ្នករចនាក្រាហ្វិកនៅក្រុមហ៊ុនឯកជនមួយ បាននិយាយថា ៖ «បញ្ហាសាំងឡើងថ្លៃនេះ វាពិតជាជះឥទិ្ធពលដល់ជីវភាពរបស់ខ្ញុំណាស់ ពោលគឺបញ្ហាកូវីដត្រូវបានដោះស្រាយឲ្យមានការបើកប្រទេសក៏ពិតមែន ប៉ុន្តែជីវភាពរបស់ខ្ញុំវាមិនទាន់មានការកើនឡើងសមស្របនឹងការចំណាយនៅឡើយទេ ហើយបញ្ហាការកកស្ទះក៏បានកើតឡើងមកយ៉ាងខ្លាំង បន្ទាប់ពីការបើកប្រទេសឲ្យមកធម្មតាវិញ អីចឹងការចំណាយសាំងក៏អស់ច្រើន»៕

ក្រសួងសុខាភិបាលដាក់ឱ្យប្រើប្រាស់ឱសថ Molnupiravir សម្រាប់ព្យាបាលជំងឺកូវីដ១៩ ក្នុងលក្ខខណ្ឌបន្ទាន់

សោម ស្រីពេជ្រ (Som Sreypich) — Fri, 05 Nov 2021 09:14:35 +0000

អ្នកនាំពាក្យក្រសួងសុខាភិបាលនៅថ្ងៃទី៤ ខែវិច្ឆិកា ឆ្នាំ២០២១ នេះ លើកឡើងថា ឱសថឈ្មោះថា Molnupiravir អាចប្រើប្រាស់សម្រាប់ព្យាបាលជំងឺកូវីដ១៩ ក្នុងលក្ខខណ្ឌបន្ទាន់នៅកម្ពុជា។

យោងតាមវីដេអូឃ្លីបមួយដែលអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បង្ហោះលើគណនី YouTube របស់លោកស្រីកាលពីថ្ងៃទី៤ ខែវិច្ឆិកា ឆ្នាំ២០២១ បានបញ្ជាក់ថា ឱសថ Molnupiravir គឺជាឱសថសម្រាប់ព្យាបាលអ្នកជំងឺកូវីដ១៩។ លោកស្រីបន្ថែមថា ការដាក់ឲ្យប្រើប្រាស់ឱសថ Molnupiravir នេះ គឺដោយសារសង្កេតឃើញថាឱសថនេះមានគុណភាព តាមរយៈការសិក្សាស្រាវជ្រាវ ក៏ដូចជាការព្យាបាលកន្លងមកនេះនៅបណ្ដាប្រទេសធំៗមួយចំនួន។

ក្នុងវីដេអូឃ្លីបដែលលោកស្រីបានផ្តល់សម្ភាសន៍ឲ្យទូរទស្សន៍ ហើយត្រូវបានបង្ហោះលើគណនីយូធូបរបស់លោកស្រីដដែល លោកស្រីបន្ថែមថា ការដាក់ឲ្យប្រើប្រាស់ឱសថនេះក្នុងលក្ខខណ្ឌបន្ទាន់ គឺដើម្បីជួយសង្គ្រោះអាយុជីវិតរបស់អ្នកជំងឺកូវីដ១៩បន្ថែមទៀត ជាពិសេសអ្នកជំងឺដែលអាចមានការវិវឌ្ឍទៅរកភាពធ្ងន់ធ្ងរ ហើយការប្រើប្រាស់ឱសថ Molnupiravir នេះគឺប្រើប្រាស់រយៈពេល៥ថ្ងៃ។

លោកស្រីបញ្ជាក់ថា៖ «តាមរយៈការសិក្សាក៏បានបង្ហាញដែរថា ឱសថនេះជួយកាត់បន្ថយបាននូវហានិភ័យនៃការសម្រាកពេទ្យ ក៏ដូចជាហានិភ័យនៃការស្លាប់បាត់បង់ជីវិតដោយសារជំងឺកូវីដ១៩បានទៅដល់៥០% សម្រាប់អ្នកជំងឺដែលគេស្រាវជ្រាវទៅរកឃើញថាធ្វើរោគវិនិច្ឆ័យថ្មីៗថាគាត់មានជំងឺកូវីដ១៩»។

លោកស្រីបន្ថែមថា៖ «ឱសថនេះប្រើប្រាស់សម្រាប់តែក្នុងអំឡុងពេលដែលមានភាពអាសន្នសុខភាពសាធារណៈរបស់យើងទេចាស៎! ហើយការប្រើប្រាស់នេះទៀតក៏មានការប្រើប្រាស់តាមដានព្យាបាល ហើយក៏ស្ថិតក្រោមការវាយតម្លៃឱ្យត្រឹមត្រូវរបស់ក្រុមគ្រូពេទ្យពួកយើង»។

លោកស្រីបានលើកឡើងបន្ថែមថា កម្ពុជាគឺខិតខំគ្រប់លទ្ធភាពទាំងអស់ដើម្បីស្រាវជ្រាវរបៀបព្យាបាលថ្មីៗថែមទៀតជាពិសេសស្រាវជ្រាវនូវឱសថ ឬឧបករណ៍ផ្សេងៗទៀតដែលអាចជួយ ដើម្បីប្រើប្រាស់ក្នុងការព្យាបាលជំងឺកូវីដ១៩នៅប្រទេសកម្ពុជា៕

អាណាព្យាបាលមួយចំនួនស្វាគមន៍ឲ្យកូនអាយុ៥ឆ្នាំចាក់វ៉ាក់សាំងកូវីដ ខណៈមួយចំនួននៅស្ទាក់ស្ទើរ

សោម ស្រីពេជ្រ (Som Sreypich) — Mon, 01 Nov 2021 13:20:54 +0000

ក្រសួងសុខាភិបាលប្រកាសចាក់វ៉ាក់សាំងកូវីដ១៩ (ស៊ីណូវ៉ាក់) ដូសទី១ និងដូសទី២ដល់កុមារអាយុ៥ឆ្នាំ នៅទូទាំងប្រទេស ខណៈអាណាព្យាបាលមួយចំនួនស្វាគមន៍ឲ្យកូនចាក់ និងមួយចំនួននៅស្ទាក់ស្ទើរ។

ក្នុងសេចក្តីជូនព័ត៌មានរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ចេញកាលពីថ្ងៃទី៣០ ខែតុលា ឆ្នាំ២០២១បញ្ជាក់ថា គ.វ.ក-១៩ នឹងផ្តល់ការចាក់វ៉ាក់សាំងកូវីដ-១៩ ដូសទី១ និងដូសទី២ ដោយប្រើប្រាស់វ៉ាក់សាំងស៊ីណូវ៉ាក់ ជូនដល់កុមារអាយុ៥ឆ្នាំ នៅរាជធានី-ខេត្តទាំង២៥។ យុទ្ធនាការនេះនឹងចាប់ផ្តើមពីថ្ងៃទី០១ ខែវិច្ឆិកា ឆ្នាំ២០២១ ដែលគម្លាតរវាងដូសទី១ និងដូសទី២ គឺ២៨ថ្ងៃ។

ចំពោះគ្រប់កុមារដែលមានអាយុ៥ឆ្នាំដែលត្រូវទៅចាក់វ៉ាក់សាំងកូវីដ-១៩ ត្រូវភ្ជាប់មកជាមួយ ឯកសារមួយចំនួនដូចជា សំបុត្រកំណើត ឬសំបុត្របញ្ជាក់កំណើត ឬសៀវភៅគ្រួសារ ឬសៀវភៅស្នាក់នៅ ឬលិខិតឆ្លងដែន និងបណ្ណសំគាល់ខ្លួនមន្ត្រីរាជការ ឬបណ្ណសំគាល់មន្ត្រីជាប់កិច្ចសន្យារបស់ឪពុកម្តាយ (ចំពោះកូនចៅមន្ត្រីរាជការថ្នាក់ជាតិ)។

ក្រោយពីការបើកយុទ្ធការចាក់វ៉ាក់សាំងកូវីដ-១៩ ដល់កុមារដែលមានអាយុ៥ឆ្នាំ ក្នុងថ្ងៃដំបូងគេឃើញមានឪពុកម្តាយមួយចំនួនបាននាំកូនៗរបស់ទៅទទួលការចាក់វ៉ាក់សាំងកូវីដ-១៩ ហើយក៏មានការបញ្ចេញមតិរបស់ឪពុកម្តាយកុមារដែលមានអាយុ៥ឆ្នាំ ទៅលើការចាក់វ៉ាក់សាំងកូវីដ-១៩ នេះផងដែរ។

លោក ធឹប វិបុល បាននាំកូនទៅទទួលការចាក់វ៉ាក់សាំងកូវីដ-១៩ រួចរាល់ហើយកាលពីព្រឹកថ្ងៃច័ន្ទនេះបាននិយាយថា៖ «ខ្ញុំពិតជាសប្បាយចិត្តដែលកូនបានចាក់វ៉ាក់សាំងរួចព្រោះក្មេងៗត្រូវទៅសាលារៀន ហើយពួកគេនៅតូចមិនសូវជាអនុវត្តវិធានការសុខាភិបាលបានពេញលេញទេ ពេលបានចាក់វ៉ាក់សាំងហើយខ្ញុំមានទំនុកចិត្តឲ្យកូនទៅរៀននៅសាលាវិញ»។

អ្នកស្រី ស៊ឹម ចាន់ដាវី បានលើកឡើងថា៖ «ខ្ញុំមានគម្រោងយកកូនទៅចាក់វ៉ាក់សាំងដែរ ក៏ប៉ុន្តែប្រហែលជាចាំដល់ជុំទីពីរសិន ព្រោះឥឡូវគាត់នៅខ្វះ២-៣ខែទៀត ទើបគ្រប់អាយុ ៥ឆ្នាំគត់»។ ទន្ទឹមនឹងនេះ អ្នកស្រីបានបញ្ជាក់ថា អ្នកស្រី និងក្រុមគ្រួសារសុទ្ធតែបានចាក់វ៉ាក់សាំងការពារជំងឺកូវីដ-១៩រួចមកហើយ ដូចនេះអ្នកស្រីចង់ឲ្យកូនអ្នកស្រីបានចាក់ដើម្បីការពារសុខភាពខ្លួនគាត់ និងអ្នកនៅជុំវិញខ្លួន។

សម្រាប់អ្នកស្រី ផល្លា បានបង្ហាញការស្ទាក់ស្ទើដោយសារកូនត្រូវចាក់វ៉ាក់សាំងស៊ីណូវ៉ាក់។

អ្នកស្រីនិយាយថា៖ «មិនចង់ឲ្យកូនចាក់វ៉ាក់សាំងស៊ីណូវ៉ាក់ទេ បើសិនជានៅមន្ទីរពេទ្យឯកជនមានវ៉ាក់សាំងសម្រាប់ក្មេង ខ្ញុំយកទៅចាក់នៅខាងឯកជនវិញ តែប្រសិនបើអត់មានទេមានតែនាំកូនចាក់របស់រដ្ឋនឹងហើយ» ។

អ្នកស្រីបន្ថែមថា កូនរបស់អ្នកស្រីត្រូវចូលរៀននៅសាលានាថ្ងៃអង្គារនេះ ដូច្នេះអ្នកស្រីបារម្ភ ដោយសារមិនទាន់បានចាក់វ៉ាក់សាំង។

អ្នកស្រីបញ្ជាក់ថា៖ «តែទោះបីជាចាក់ហើយក៏មិនសូវមានទំនុកចិត្តដែរ ដោយសារទើបតែចាក់ភ្លាមៗអ៊ីចឹង វ៉ាក់សាំងមិនទាន់ដុះអង់ទីគ័រដែរ»។

គិតត្រឹមថ្ងៃទី៣១ ខែតុលា ឆ្នាំ២០២១ ការចាក់វ៉ាក់សាំងកូវីដ១៩ ក្នុងក្របខណ្ឌសរុបទូទាំងប្រទេស ចំពោះកុមារអាយុ ៦ ឆ្នាំដល់ ១១ ឆ្នាំសរុបចំនួន ១,៩២០,៥៩៩ និងការចាក់វ៉ាក់សាំងជូនយុវវ័យអាយុ ១២ឆ្នាំដល់ ១៧ឆ្នាំសរុបចំនួន ១,៧៨៨,៨០២៕

រដ្ឋបាលខណ្ឌដង្កោអំពាវនាវឱ្យពលរដ្ឋតាមសណ្តស្ទឹងព្រែកត្នោតប្រុងប្រយ័ត្នពីទឹកដែលកំពុងហក់ឡើងខ្ពស់

សោម ស្រីពេជ្រ (Som Sreypich) — Mon, 25 Oct 2021 06:15:50 +0000

រដ្ឋបាលខណ្ឌដង្កោនៅថ្ងៃចន្ទនេះ បានអំពាវនាវឱ្យប្រជាពលរដ្ឋដែលរស់នៅតាមសណ្តស្ទឹងព្រែកត្នោត ត្រៀមសម្ភារ និងតាមដានស្ថានភាពទឹកជំនន់ជាប្រចាំ ជៀសវាងការបាត់បង់សម្ភារ និងអាយុជីវិតដែលអាចកើតមានដោយសារកម្ពស់ទឹកស្ទឹងព្រែកត្នោតកំពុងហក់ឡើងខ្ពស់ជាបន្តបន្ទាប់។

យោងតាមសេចក្តីជូនដំណឹងស្តីពីការត្រៀមបង្កាទឹកជំនន់ស្ទឹងព្រែកត្នោតជាយថាហេតុ ចេញនៅថ្ងៃទី២៥ ខែតុលា ឆ្នាំ២០២១ រដ្ឋបាលខណ្ឌដង្កោជូនដំណឹងដល់ប្រជាពលរដ្ឋដែលរស់នៅជាប់សណ្តស្ទឹងព្រែកត្នោត រួមមានសង្កាត់ដង្កោ សង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ ត្រូវត្រៀមសម្ភារ និងបន្តតាមដានស្ថានភាពទឹកជាប្រចាំជៀសវាងហានិភ័យដែលបង្កឱ្យខូចខាតទ្រព្យសម្បត្តិ និងអាយុជីវិត។

សេចក្តីជូនដំណឹងនោះបញ្ជាក់ថា៖ «ដោយសារបច្ចុប្បន្នស្ថានភាពទឹកស្ទឹងព្រែកត្នោតបានហក់ឡើងជាបន្តបន្ទាប់ បណ្តាលមកពីជំនន់ផ្នែកខាងលើធ្វើឱ្យទឹកស្ទឹងព្រែកត្នោត ក្នុងភូមិសាស្ត្រខណ្ឌដង្កោ មានកម្ពស់ដល់កម្រិតត្រូវប្រុងប្រយ័ត្នខ្ពស់»។

ក្នុងសេចក្តីជូនដំណឹងនោះបានបន្ថែមថា រដ្ឋបាលខណ្ឌដង្កោសហការជាមួយក្រសួងធនធានទឹក និងឧតុនិយម បន្តតាមដានដោយយកចិត្តទុកដាក់ខ្ពស់បំផុត នូវស្ថានភាពទឹក ដើម្បីជម្រាបជូនប្រជាពលរដ្ឋឱ្យបានជ្រាបជាបន្តបន្ទាប់៕

កម្ពុជាលុបចោលបម្រាមជើងហោះហើរពីម៉ាឡេស៊ី ឥណ្ឌូនេស៊ី និងហ្វីលីពីន

សោម ស្រីពេជ្រ (Som Sreypich) — Sat, 23 Oct 2021 15:19:23 +0000

ក្រសួងសុខាភិបាលនៅថ្ងៃទី២៣ ខែតុលា ឆ្នាំ២០២១ បានប្រកាសលុបចោលបម្រាមផ្អាកជាបណ្តោះអាសន្ននូវជើងហោះហើរត្រង់ពីប្រទេសម៉ាឡេស៊ី ឥណ្ឌូនេស៊ី និងហ្វីលីពីន ជាផ្នែកនៃការបើកប្រទេសជាតិឡើងវិញជាជំហានៗ។

សេចក្តីប្រកាសព័ត៌មានបានបញ្ជាក់ថាការលុបចោលបម្រាមនេះ «ដើម្បីចូលរួមចំណែកការបើកដំណើរការឡើងវិញនូវសកម្មភាពសេដ្ឋកិច្ច និងសង្គម ជាជំហានៗលើគ្រប់វិស័យតាមគន្លងប្រក្រតីភាពថ្មី រួមទាំងការស្តារឡើងវិញនូវវិស័យដឹកជញ្ជូនតាមផ្លូវអាកាស និងកិច្ចសហប្រតិបត្តិការក្នុងវិស័យនេះដែលនឹងចូលជាធរមានចាប់ពីថ្ងៃចុះហត្ថលេខាតទៅ»។

យោងតាមក្រសួងសុខាភិបាល ស្ថានភាពជំងឺកូវីដ-១៩ នៅកម្ពុជាមានករណីឆ្លងសរុបចំនួន ១១៧,៦៤៤នាក់ ហើយករណីឆ្លងថ្មីនៅថ្ងៃទីទី២៣ ខែតុលា ឆ្នាំ២០២១ មានចំនួន ១៤៤នាក់ ករណីជាសះស្បើយថ្មីចំនួន ២៧៥នាក់ ករណីស្លាប់ថ្មីចំនួន ១០នាក់ និងករណីនាំចូលពីក្រៅប្រទេសថ្មីចំនួន ៣២នាក់៕

ក្រសួងសុខាភិបាលប្រកាសចាក់វ៉ាក់សាំងដល់ពលរដ្ឋវ័យចាស់ ស្រ្តីមានផ្ទៃពោះ ស្រ្តីបំបៅកូន អ្នកជាសះស្បើយពីជំងឺផ្សេងៗ

សោម ស្រីពេជ្រ (Som Sreypich) — Tue, 19 Oct 2021 15:48:31 +0000

ក្រសួងសុខាភិបាលនៅថ្ងៃទី១៩ ខែតុលា ឆ្នាំ២០២១ បានប្រកាសផ្តល់ការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋដែលមានវ័យចាស់ ស្រ្តីមានផ្ទៃពោះ ស្រ្តីបំបៅកូនដោយទឹកដោះ អ្នកជាសះស្បើយពីជំងឺផ្សេងៗ រួមទាំងជំងឺកូវីដ-១៩ និងអ្នកមានជំងឺប្រចាំកាយ។

សេចក្តីជូនព័ត៌មានក្រសួងសុខាភិបាល គណៈកម្មការចំពោះកិច្ចចាក់វ៉ាក់សាំងកូវីដ-១៩ (គ.វ.ក-១៩) បាននិយាយថាអ្នកដែលបានស្លាប់កន្លងមកដោយសារកូវីដ១៩ ភាគច្រើនជាអ្នកដែលមិនបានចាក់វ៉ាក់សាំង ដូចនេះដើម្បីកាត់បន្ថយសភាពធ្ងន់ធ្ងរ និងកាត់បន្ថយជាអតិបរមានូវអត្រាស្លាប់ដែលបណ្តាលមកពីជំងឺនេះ ប្រជាពលរដ្ឋគួរចាក់វ៉ាក់សាំង។

«សូមអំពាវនាវដល់ប្រជាពលរដ្ឋទាំងអស់ស្ម័គ្រចិត្តទៅចាក់វ៉ាក់សាំងកូវីដ-១៩ ដោយបងប្អូនអញ្ជើញទៅពិគ្រោះជាមួយគ្រូពេទ្យនៅតាមទីតាំងចាក់វ៉ាក់សាំងកូវីដ-១៩ ដែលស្ថិតនៅជិតទីសំណាក់របស់បងប្អូនឱ្យបានគ្រប់ៗគ្នា»។

គ.វ.ក-១៩ ក៏បានណែនាំបន្ថែមដល់ប្រធានមន្ទីរសុខាភិបាល រាជធានី-ខេត្តត្រូវធ្វើសេចក្តីជូនដំណឹងទៅគ្រប់ទីតាំងចាក់វ៉ាក់សាំងកូវីដ-១៩ ទាំងអស់ឱ្យផ្ដល់ការចាក់វ៉ាក់សាំងកូវីដ-១៩ ជូនដល់ក្រុមគោលដៅ រួមមាន ពលរដ្ឋវ័យចាស់ ស្ត្រីមានផ្ទៃពោះ ឬបំបៅកូនដោយទឹកដោះ អ្នកជាសះស្បើយពីជំងឺកូវីដចាប់ពី៤ខែឡើង ឬអ្នកជាសះស្បើយពីជំងឺផ្សេងៗ និងអ្នកមានជំងឺប្រចាំកាយ ប៉ុន្តែមានស្ថានភាពនឹងនរ ឱ្យមានភាពរលូននៅគ្រប់ទីតាំងចាក់វាក់សាំងទាំងអស់៕

រាជរដ្ឋាភិបាលចេញសារាចរទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ

សោម ស្រីពេជ្រ (Som Sreypich) — Thu, 14 Oct 2021 02:49:06 +0000

រដ្ឋាភិបាលកម្ពុជា នៅថ្ងៃទី១២ ខែតុលា ឆ្នាំ២០២១ បានចេញសារាចរណែនាំ ឲ្យទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ ទាំងនៅទីក្រុង និងនៅតាមបណ្តាខេត្ត។

សារាចរនោះបញ្ជាក់ថា ដោយសារទំនើបកម្មបណ្តាលឱ្យមានការបាត់បង់ ការវាយបំផ្លិចបំផ្លាញ ការធ្វើឱ្យខូចខាតតាមគ្រប់រូបភាពជាបន្តបន្ទាប់ ចំពោះសំណង់អគារដែលស្ថិតក្នុងតំបន់បេតិកភណ្ឌទីក្រុង តាមបណ្តារាជធានី ខេត្ត ដែលជាសម្បត្តិបេតិកភណ្ឌជាតិដ៏មានតម្លៃ ហើយមានការប្រឈមនឹងហានិភ័យ និងស្ថិតក្រោមការគំរាមកំហែងខ្ពស់ដោយការអភិវឌ្ឍ។

ក្នុងសារាចរបានបញ្ជាក់ថា ដើម្បីឲ្យការងារអភិរក្សតំបន់បេតិកភណ្ឌទីក្រុងដែលមានសំណង់អគារសាសនា សំណង់សាធារណៈ សំណង់ឯកជន ភូមិដ្ឋាន និងផ្ទះបុរាណ ស្របតាមច្បាប់ស្តីពីកិច្ចការពារបេតិកភណ្ឌវប្បធម៌ រាជរដ្ឋាភិបាលហាមឃាត់ចំពោះការកែប្រែ ការប្តូររូបរាងខាងក្រៅ ឬធ្វើឱ្យខូចខាតសោភ័ណភាពចំពោះសំណង់នៃតំបន់បេតិកភណ្ឌទីក្រុង និងទប់ស្កាត់ការវាយកម្ទេច និងបំផ្លិចបំផ្លាញសំណង់វប្បធម៌ ប្រវត្តិសាស្ត្រ សំណង់បុរាណ និងសំណង់អគារបេតិកភណ្ឌ ដើម្បីការពារឱ្យបានគង់វង្ស។

រាជរដ្ឋាភិបាលបានណែនាំបន្ថែមថា៖ «បញ្ឈប់ជាបន្ទាន់ចំពោះការបំផ្លាញអគារបេតិកភណ្ឌក្នុងតំបន់ការពារនិងក្រៅតំបន់ការពារ ដោយផ្តោតលើយុទ្ធសាស្រ្ត គោលនយោបាយ និងផែនទីចង្អុលបង្ហាញ ដើម្បីជំរុញការអភិរក្ស និងការអភិវឌ្ឍទីក្រុងបេតិកភណ្ឌប្រកបដោយនិរន្តរភាព»។

ក្នុងសារាចរដដែលក៏បានបានណែនាំថា រាល់សំណង់អគារបេតិកភណ្ឌដែលនឹងត្រូវធ្វើការជួសជុល កែប្រែរូបរាង ឬវាយកម្ទេចចោល ត្រូវស្នើសុំការពិនិត្យ និងសម្រេចពីក្រសួងវប្បធម៌ និងវិចិត្រសិល្បៈ និងអាជ្ញាធរពាក់ព័ន្ធជាមុនសិន៕

សោម​ ស្រីពេជ្រ​ (Som Sreypich) – Newsroom Cambodia