លោកមិន ពៅអង្គុយនៅក្រោមអំពូលភ្លើងខណៈពេលដែលវាបញ្ចេញពន្លឺចាំងជាមួយនឹងក្តារខៀនក្រោមផ្ទះឈើប្រក់ក្បឿងដែលទ្រុឌទ្រោម ដោយទឹកមុខញញឹមជាមួយក្មេងពីរ បីនាក់ឈរនៅជុំវិញតុឈើចាស់ដែលជាថ្នាក់រៀនរបស់គាត់ នៅភូមិពោធិ៍អណ្តែត ឃុំព្រែកស្តី ស្រុកកោះធំ ខេត្តកណ្តាល។

បុរសម្នាក់មានវ័យជាង ៣០ឆ្នាំរូបនេះ ដែលពាក់អាវយឺតដៃខ្លីពណ៍ប្រផះ កំពុងបង្រៀនក្មេងៗ ក្នុងភូមិរបស់គាត់ជាយូរមកហើយ និងបានលើកទឹកចិត្តឱ្យក្មេងៗចូលចិត្តអានសៀវភៅក្នុងគោលបំណងឱ្យពួកគេផ្តោតលើការអប់រំ និងជៀសវាងការប្រើប្រាស់គ្រឿងញៀន។ ក្មេងៗទាំងនោះមកពីជិតៗផ្ទះរបស់គាត់ ហើយសប្បាយចិត្តពេលបានមករៀនម្តងៗ ព្រោះពួកគាត់អាចរំលឹកមេរៀន ហើយអាចលេងសើចសប្បាយជាមួយមិត្តភក្តិផងដែរ។

ខណៈដែលកូវីដ ១៩​​​ បានរាតត្បាតជិត ២ឆ្នាំមកហើយ បង្ខំឲ្យសាលារដ្ឋ និងសាលាឯកជនផ្អាកបង្រៀនផ្ទាល់ មករៀនតាមប្រព័ន្ធអនឡាញវិញ លោកមិន ពៅ​ ក៏បានជួយបង្រៀនក្មេងៗទាំងនោះខ្លះ បន្ទាប់ពីមានការបារម្ភខ្លាំងថាសិស្សជនបទដាច់ស្រយាល​គ្មានលុយក្នុងការទិញទូរសព្ទ័ ឬកុំព្យូទ័រ ដើម្បីរៀនតាមអនឡាននោះទេ គ្មានថវិកាបញ្ចូលលុយទូរសព្ទ័ដែរ និងគ្មានសេវាអ៊ិនធើណែត។

លោកបាននិយាយថា៖ «​ខ្ញុំមានការអាណិតក្មេងៗណាស់ មិនថាក្មេងម្នាក់ ពីរនាក់ រឺបីនាក់នោះទេ វាសឹងតែគ្រប់កន្លែង ប៉ុន្តែយើងមិនអាចជួយបានគ្រប់កន្លែងនោះទេ អ្វីដែលខ្ញុំអាចជួយបានក្មេងៗនៅជិតផ្ទះ ហើយខ្លះជាសាច់ញាតិ ដូចជាក្មួយៗ ប្អូនៗរបស់ខ្ញុំ និងនៅក្នុងភូមិជាមួយគ្នា។ ក្នុងអំឡុងកូវីដនេះ បានផ្អាកមិនអោយទៅរៀននៅសាលា ដោយប្តូរមករៀនតាមអនឡាញវិញ ហើយឃើញថាកាលនៅមិនទាន់កូវីដ ពួកគាត់រៀននៅសាលាផ្ទាល់ផង ការសិក្សារបស់គាត់នៅខ្សោយ ចុះទំរាំតាមអនឡាញនេះទៀត ត្រូវអោយពួកគាត់ចំនាយលុយទិញទូរសព្ទ៏»។

លោកមិន ពៅ ធ្លាប់ជាអ្នកសារព័ត៌មាន និងជាអ្នកវិភាគអស់រយៈពេលជាច្រើនឆ្នាំមកហើយនៅស្ថាប័នសម្លេងប្រជាធិបតេយ្យ (វីអូឌី) មុននឹងលាឈប់កាលពីពេលថ្មីៗនេះដើម្បីក្លាយជាអ្នកសារព័ត៌មានឯករាជ្យមួយរូប។ លោកមិន ពៅ ក៏ជាស្ថាបនិកមួយរូបនៃសម្ព័ន្ធអ្នកសារព័ត៌មានកម្ពុជា ឬហៅកាត់ថាខេមបូចា ផងដែរ។

អ្វីដែលជាបញ្ហារបស់ក្មេងៗដែលលោក មិន ពៅ បានមើលឃើញគឺជាបញ្ហាអ៊ិនធើណែត ដោយសារអត់មានសេវា ដោយត្រូវដើរទៅរកទីកន្លែងដែលសេវាទើបអាចប្រើបាន ពេលខ្លះក្មេងៗទាំងអស់នោះត្រូវដើរទៅខាងក្រោយផ្ទះ ក្រោមដើមឈើ ពេលខ្លះត្រូវអង្គុយហាលថ្ងៃទៀតក៏មានដែរ ពេលណាមានភ្លៀងធ្លាក់ខ្លាំង គឺបានធ្វើអោយគាត់ខកខានក្នុងការរៀនតែម្តង។

លោកបានរៀបរាប់ថា៖ «យើងឃើញថា ពេលដែលយើងប្រជុំម្តងៗ គឺពិបាកក្នុងការនិយាយផង ចុះទំរាំក្មេងៗវិញ ពេលខ្លះកំពុងរៀនៗស្រាប់តែមានភ្លៀងក៏មាន ស្រាប់តែដាច់សេវាអីធើណែតក៏មាន ហើយម្យ៉ាងទៀតការប្រើប្រាស់ទូរសព្ទ៏ដៃរបស់ពួកគាត់នៅមិនទាន់ចេះប្រើទៀត។ អ្វីដែលខ្ញុំជួបប្រទះ គឺខ្ញុំឃើញក្មួយរបស់ខ្ញុំ គាត់ឈររៀនហាលថ្ងៃ ព្រោះនៅទីនោះមានសេវា ពេលខ្លះគាត់ដើរចុះដើរឡើង ដើររកកន្លែងមានសេវាអ៊ិនធើណែត  ព្រោះកន្លែងដែលមានសេវាគឺវាមិនមែននៅក្នុងផ្ទះនោះទេ»។

លោកបាននិយាយថាការបង្រៀនរបស់លោកក៏ជួបមានបញ្ហាខ្លះដែរ​ពេលលោកមានធុរៈឡើងទៅភ្នំពេញ ពេលដែលមកវិញគាត់មិនហ៊ានក្នុងបង្រៀនក្មេងៗទេព្រោះគាត់ខ្លាចក្នុងការចម្លងកូវីដទៅក្មេងៗក្នុងករណីណាមួយដូចនេះ ធ្វើអោយក្មេងខកខានក្នុងរៀនក៏មានដែរ។

លោកបាននិយាយថា៖ «ផលលំបាកក្នុងការបង្រៀនទៅពួកគាត់គឺមិនសូវជាមានប៉ុន្មានទេ តែអ្វីដែលលំបាកនោះគឺការសំរេចគោលដៅក្នុងការអោយគាត់ចេះ ម្យ៉ាងទៀតពេលដែលខ្ញុំចុះឡើងភ្នំពេញម្តងៗ គឺមានការខកខានក្នុងការបង្រៀនពួកគាត់ខ្លះដែរ មិនអត់ទេ ហើយខ្ញុំក៏ខ្លាចក្នុងការនាំកូវីតទៅដល់គាត់ដែរ ពេលខ្លះខកខានរៀន២ ទៅ៣ថ្ងៃក៏មានដែរ ទាំងអស់នេះហើយដែរជាឧបសគ្គរបស់ខ្ញុំ បើនិយាយថាហត់នឿយនោះគឺសឹងតែគ្មានហើយសម្រាប់ខ្ញុំនោះ»។

លោកមិន ពៅបាននិយាយថា ការបង្រៀនរបស់លោកពិតជាតិចតួចណាស់ក្នុងការជួយពួកគាត់ តែបើសិនជាគាត់មិនបានធ្វើនោះទេ តើក្មេងៗទាំងនោះនឹងទៅជាយ៉ាង ទោះបីជាលោករវល់យ៉ាងណាក៏ដោយ ក៏លោកមិនដែលគិតថាបោះបង់ចោលដែរក្នុងពេលនេះ ព្រោះឪពុកម្តាយរបស់គាត់រវល់រកស៊ី មិនមានពេលគ្រប់គ្រាន់នៅជួយបង្រៀនក្មេងៗទាំងអស់នោះបាននោះទេ ដូចនេះមានតែលើកទឹកចិត្តពួកគាត់តាមរយះការងារនេះ។

ពេលខ្លះដើម្បីអោយគាត់មករៀន លោកបានរៀបចំការលេងល្បែងកំសាន្តសប្បាយ ហើយពេលខ្លះគាត់ក៏បានចំនាយថវិកាផ្ទាល់ខ្លួនរបស់គាត់អោយទៅក្មេងដែលបានធ្វើលំហាត់ល្អជាងគេ អានបានល្អនោះ នឹងត្រូវបានការលើកទឹកចិត្ត ធ្វើដូចនេះពួកគាត់នឹងមករៀនទៀងទាត់។

លោកមិន ពៅ បាននិយាយថា៖ «មិនថាតែការបង្រៀនទេ ពេលខ្លះខ្ញុំអោយលុយពួកគាត់ថែមទៀតផង អ្នកខ្លះអានបានល្អខ្ញុំអោយគាត់៥០០រៀល រឺ១០០០រៀន ក៏មានដែរ ព្រោះគាត់សប្បាយចិត្តពេលគាត់អានបានល្អហើយទទួលរង្វាន់ពីខ្ញុំទៀត»។

លោកមិន ពៅបាននិយាយថាបណ្ណាល័យរបស់លោកមានសៀវភៅជាង ២០០ ទៅ ៣០០ក្បាលសម្រាប់ក្មេងៗជាច្រើន  ដែលទទួលបានទទួលបានមកពីកូនរបស់មិត្តភក្តិគាត់ ហើយខ្លះទៀតបានមកពីអ្នកមកទស្សនាបណ្ណាល័យ។

លោកបាននិយាយថាក្មេងៗសំខាន់ណាស់គឺអនាគតរបស់គាត់ ពួកគាត់ជាអនាគតរបស់សង្គម បើពួកគាត់មិនបានទទួលការអប់រំអោយបានល្អនោះទេ ហើយឱពុកម្តាយមានតួនាទីសំខាន់ក្នុងការជួយលើកទឹកចិត្តគាត់ ជួយណែនាំដាស់តឿនក្នុងការរៀនសូត្រព្រោះពេលដែលមានបញ្ហា គឺគ្រួសារនេះ​ជាអ្នកប្រឈមមុនគេ។

ក្នុងទឹកមុខដ៏មាំរបស់លោកមិន ពៅ លោកបាននិយាយទាំងអួលដើមកថា៖ «​ក្មេងៗសំខាន់ណាស់គឺអនាគតរបស់គាត់ ព្រោះពួកគាត់ជាអនាគតរបស់ប្រទេសជាតិ អ្វីដែលពួកគាត់កំពុងជួបគឺបញ្ហាក្នុងការរៀនសូត្ររបស់គាត់ ហើយចំណែកឪពុកម្តាយត្រួវតែជួយលើកចិត្តកូន ព្រោះសាលានៅឆ្ងាយ មិនដឹងថាត្រូវចូលរៀនវិញនៅពេលណា»។​

«ពួកគាត់គួរមកវិនិយោគលើកូនខ្លះ កុំវិនិយោគតែការរកស៊ី ភ្លេចមើលកូននៅផ្ទះ កូនយើងពេលដែលយើងវិនិយោគខុស គឺឪពុកម្តាយត្រួវទឹកភ្នែក មិនថាតែរូបខ្ញុំទេ សូមអោយយុវជនដែលមានចំនេះដឹង រឺក៏ទំនេរពីធ្វើការ គួរជួយបង្រៀនរឺដាស់តឿនអោយកូន ក្មួយ រៀនសូត្រ នេះក៏ជាចំណែកមួយជួយសង្គមផងដែរ»៕

ជាមួយគ្នានឹងខ្យល់មូសុងនិរតីបក់ក្នុងល្បឿនពីមធ្យមទៅបង្គួរ សេចក្តីជូនដំណឹងខាងលើ ក៏បានបញ្ជាក់ថាតំបន់វាលទំនាបកណ្តាល បណ្តាខេត្តជាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមាមានពី ២៣អង្សារសេដល់ ២៦អង្សារសេ និងសីតុណ្ហភាពអតិបរមា មានពី ៣០អង្សារសេដល់ ៣៤អង្សារសេ។

ក្រសួងធនធានទឹក និងឧតុនិយម ក៏បានអំពាវនាវអោយប្រជាជនពរដ្ឋនៅតាមតំបន់ទំាងនោះ ធ្វើការប្រុងប្រយ័ត្នចំពោះខណៈដែលអាចនឹងមានភ្លៀងក្នុងកម្រិតពីតិច ទៅបង្គួរ លាយឡំទៅដោយ ផ្គរ រន្ទះ និងខ្យល់កន្រ្កាក់ និងនៅតាមបណ្តាតំបន់មាត់សមុទ្រ​ នៅលើផ្ទៃសមុទ្រនឹងអាចមានភ្លៀង លាយឡំនិងខ្យល់បក់ខ្លាំង នឹងរលកសមុទ្រខ្ពស់៕

សិក្ខាកាម Newsroom Cambodia អ្នកស្រីសុផាត​ មករា បានសម្ភាសន៏អតីតពលករខ្មែរទៅធ្វើការនៅប្រទេសកូរ៉េចំនួន ៥រូប ពីផលលំបាកក្នុងការរស់នៅ និងធ្វើការនៅប្រទេសកម្ពុជាក្រោយពីពួកគេត្រលប់មកពីប្រទេសកូរ៉េ វិញ។

លោកថន សីហា មានអាយុ៣១ ឆ្នាំ សព្វថ្ងៃលោកជានាយកប្រតិបត្តិក្រុមហ៊ុន We Strong Global ហើយជាអតីតពលករធ្វើការនៅប្រទេសកូរ៉េ បាននិយាយថា​ ការមករស់នៅប្រទេសកម្ពុជាវិញមានការជួបផលលំបាកជាច្រើន មិនត្រឹមតែការរស់នៅទេ សូម្បីតែការធ្វើ ឬរកស៊ីក៏ជួបផលលំបាកច្រើនដែរ។​

លោកបាននិយាយថា៖ «ប្រសិនជានិយាយពីផលលំបាកសំរាប់ការដែលវិលមករស់នៅកម្ពុជាវិញ គឺច្រើនណាស់ ប្រសិនជាកត់ក្នុងសៀវភៅវិញគឺមិនតិចជាង ២០០ទំព័រទេសំរាប់ផលលំបាក។ ផលលំបាកទី១សំរាប់ការរកស៊ីវិញ គឺថាយើងនៅក្មេងខ្ចី ខ្វះបទពិសោធ ខ្វះចំនេះដឹង ខ្វះដើមទុន ជាពិសេស ខ្វះធនធានក្នុងការចាប់ផ្តើមធ្វើការរកស៊ីតែម្តង។ សំរាប់ទី២វិញ គឺដើមទុន យើងគ្មានលទ្ធភាពក្នុងការចាប់ផ្តើម និងទុកបំរុងក្នុងការចាប់ផ្តើមអាជីវកម្ម ហើយម្យ៉ាងទៀតគឺការគ្រប់គ្រងបុគ្គលិកព្រោះនេះជាបញ្ហាដែលកើតឡើងមានសឹងតែរាល់ថ្ងៃដែលជាបញ្ហាដែលខ្ញុំជួប»។

លោកបានបន្តទៀតថា៖ «ជាក់ស្តែងដូចខ្ញុំកាលពីរស់ប្រទេសកូរ៉េ យើងគិតរឿងមួយ តែពេលដែលយើងមកដល់ខ្មែរ អ្វីដែលយើងគិតនោះគឺរឿងមួយផ្សេងទៀត ជាមួយនិងបរិបទថ្មីនៅកម្ពុជាគឺវាអាចនឹងមិនត្រូវទាំង ១០០ភាគរយឡើយ ដូច្នេះយើងត្រូវតែសិក្សាស្វែងយល់ជាមុន មុននឹងយើងចាប់ផ្តើមធ្វើវា»។

លោកថន សុបិន អាយុ៣១​ឆ្នាំ ម្ចាស់យីហោ Khmer Sarada អតីតពលករនៅប្រទេសកូរ៉េត្បូង បាននិយាយថា ការមករស់នៅ ប្រទេសកម្ពុជាវិញគឺជួបផលលំបាកជាច្រើន មិនថាចំពោះការរស់នៅ ឬការធ្វើការរកស៊ីនោះទេ។ ជាពិសេសរកស៊ីក្នុងសម័យការកូវីដនេះតែម្តង លោកថាមិនទាន់បាន ១ឆ្នាំផង មានតែការចំនាយ ហើយចំនូលវិញ គឺសឹងតែមើលមិនឃើញ។

លោកបាននិយាយថា៖ «សំរាប់ខ្ញុំការរស់នៅក្នុងប្រទេសកម្ពុជាវិញ មិនសូវជាលំបាកជាងការ រកស៊ីប៉ុន្មាននោះទេ ព្រោះវាជាប្រទេសកំណើតរបស់យើង គ្រាប់តែដំបូងៗ​ មិនទាន់ទម្លាប់បាន ផលលំបាកចំបងគឺការរកស៊ីតែម្តង»។

លោកបានបន្តទៀតថា៖ «អ្វីដែលខ្ញុំសប្បាយចិត្តក្នុងការមករស់នៅស្រុកខ្មែរ ដូចជាជិតផ្ទះយើង ខ្ញុំចង់ទៅផ្ទះពេលណាក៏បាន ហើយយើងអាចរៀនសូត្រពីអ្វីដែលថ្មីៗជាច្រើន ដូចជាការចាប់ផ្តើមរកស៊ីដោយខ្លួនបែបនេះ»។

លោកពេជ្រ ចិន្តា អាយុ២៦ ឆ្នាំ អតីតពលករធ្វើការនៅប្រទេសកូរ៉េត្បូង បាននិយាយថា ការត្រលប់មករស់នៅប្រទេសកំណើតវិញ គឺជួបផលលំបាកជាច្រើន ត្រង់ថា ធ្លាប់តែទទួលបានប្រាក់ខែពាន់ៗរាល់ខែ តែមកដល់វិញសូម្បីតែ ២០០ដុល្លា ក៏រកមិនចង់បានដែរ។

លោកបាននិយាយថា៖ «សំរាប់ខ្ញុំ អ្វីដែលជា ផលលំបាកបំផុតគឺ ការបាត់បង់ចំនូលដ៏ធំ មួយផ្នែករបស់ខ្ញុំ ចំណែកការរស់នៅវិញ វាមានការលំបាក ត្រង់ការធ្វើដំណើរ ។ ក្រោយមកពីកូរ៉េមក ខ្ញុំមករស់នៅ ខេត្តកំពង់ឆ្នាំង វាឆ្ងាយពីភ្នំពេញ ដូច្នេះខ្ញុំពិបាកក្នុងការធ្វើដំណើរទៅចុះឡើង តែបើខ្ញុំនៅកូរ៉េវិញ ខ្ញុំអាចធ្វើដំណើរចុះឡើងបានស្រួលដោយសារនៅកូរ៉េយើងមានរថភ្លើង ឡានក្រុង ហើយផ្លូវក៏ងាយស្រួលទៀត»។

លោកបានបន្តទៀតថា៖ «មិនថាខ្ញុំ​ ឬពលករផ្សេងទេ គឺចឹងត្រលប់ទៅកូរ៉េ វិញ ព្រោះនៅទីនោះយើងអាចធ្វើការទទួលប្រាក់ខែដូចមុន។ បើទោះបី យើងមានជំនាញខ្លះពីការធ្វើការនៅប្រទេសកូរ៉េក៏ដោយ តែចំនេះជំនាញរបស់យើងដូចជាមិនទាន់មានតំរួវ ដូចនៅកូរ៉េទេ»។

លោកសុខ រដ្ឋា អាយុ២៨ឆ្នាំ ជាអតីតពលករធ្វើការនៅប្រទេសកូរ៉េខាងត្បូង បាននិយាយថា ការមករស់ក្នុងប្រទេសកំណើតវិញវាប្រាដកជាជួបបញ្ហាហើយ តែយើងអាចរស់នៅបាន។

លោកនិយាយថា៖ «សម្រាប់ខ្ញុំការមករស់នៅប្រទេសកម្ពុជាវិញ វាមិនសូវជាមានផលលំបាកនោះទេ យើងធ្វើការខ្លះ រៀនខ្លះ និងជួយការងារសង្គមខ្លះ។ សម្រាប់ខ្ញុំ រស់នៅតាមក្តីសុបន្តិ ទោះបីមិនមានលុយចាយក៏ខ្ញុំសប្បាយចិត្តដែរ។ អ្វីដែលខ្ញុំលំបាកបំផុតការរកស៊ី»។​

កញ្ញាអ៊ូញ ស្រីមុំ អាយុ៣០ឆ្នាំ អ្នកលក់អចលនទ្រព្យនៅខ្មែរ អតីតពលករធ្វើការនៅកូរ៉េ បាននិយាយថា ការវិលត្រលប់មកកម្ពុជាវិញ បានជួបការលំបាកជាច្រើនមិនថាតែការរស់នៅ ឬការរកស៊ីនោះទេ។ ប៉ុន្តែអ្វីដែលកញ្ញាជួបលំបាកខ្លាំងជាងគេនោះគឺការរកស៊ីតែម្តង ព្រោះកញ្ញាបានបញ្ជាក់ថា ការត្រលប់មកវិញដូចជាការចាប់ផ្តើមធ្វើអ្វីៗថ្មីទាំងអស់។​​ កញ្ញាបានអះអាងថា​ ខែខ្លះ រកតែ ១០០ដុល្លាសឹងតែមិនបានផង ដូច្នេះវាពិតជាប៉ះដល់ជីវភាពរបស់កញ្ញាខ្លាំងមែនទែន។

កញ្ញាបានបន្តថា៖ «ចន្លោះខ្វះខាតមួយចំនួនដែលយើងមិនសូវបានយកចិត្តទុកដាក់នោះគឺ ការកំណត់គោលដៅអោយបានត្រឹមត្រូវ​ ព្រោះយើងគិតតែធ្វើការអោយគេ ដូច្នេះធ្វើអោយយើងភ្លេចគិតពីការទំនាក់ទំនងក្នុងសង្គមខ្មែររបស់យើង ដល់ពេលដែលយើងមកដល់អ្វីៗត្រូវចាប់ផ្តើមសារថ្មីម្តងទៀត»។

កញ្ញាក៏បានបន្តទៀតថា៖ «យើងជាមនុស្សថ្មីគេមិនសូវស្គាល់យើង នៅពេលដែលយើងមានគំរោង ឬការមានផលិតផលអ្វីសំរាប់លក់ទៅអោយគេនោះ គឺពិបាកលក់មែនទែន អាចនិយាយបានថាសម្រាប់ខ្ញុំទំនាក់ទំនងលក់ដូរនៅខ្មែរគឺពិបាក តែបើលក់ដូរអោយអ្នកនៅកូរ៉េគឺមានភាពងាយស្រួលជាង»។

កញ្ញាបន្តទៀតថា៖ «ខ្ញុំសូមលើកទឹកចិត្តដល់បងប្អូនដែលមានឱកាសចេញទៅធ្វើការនៅក្រៅប្រទេស សូមយកចិត្តទុកដាក់ និងប្រើប្រាស់វេលាអោយមានតំលៃ ត្រូវតែរក្សាទំនាក់ទំនងក្នុងស្រុកខ្មែរអោយបានច្រើន បើមិនដូច្នោះទេ យើងនឹងជួបបញ្ហាហិរញ្ញវត្ថុធ្ងន់ធ្ងរ ប្រសិនបើយើងមិនគិតគូរមុនពេលយើងត្រលប់មកវិញ ហើយអាចឈានទៅមានបញ្ហាបាក់ទឹកចិត្ត លេងចង់ធ្វើការថែមទៀតផង»៕

យោងតាមសេចក្តីណែនាំ​​​ដែលបានចេញផ្សាយនៅ​លើ​ទំព័រ​ហ្វេសប៊ុក​របស់​ក្រសួង​សុខា​ភិបាល​​​ នៅ​ថ្ងៃទី១២​ ខែកក្កដា​ ឆ្នាំ​២០២១​ បញ្ជាក់ថា​​អ្នកដែល​មាន​រោគសញ្ញាកូវីដ១៩​ ដូចជា​អស់កម្លាំង​ ឬហត់បន្តិចបន្ទួច​ ឬមិនស្រណុកក្នុងខ្លួន​ សម្រាប់​ការព្យាបាល គឺ​គ្រាន់​តែ​បរិភោគ​អាហារ​មាន​ជីវជាតិគ្រប់​គ្រាន់​ដូចជា​ សាច់​ បន្លែ​ ផ្លែឈើ​ ហើយត្រូវពិសារទឹកឱ្យបានច្រើ​ន​ និងសម្រាកឱ្យបានច្រើន។

សម្រាប់អ្នកមាន​ អាការៈ​ដូចជាក្តៅខ្លួន​ ឬឈឺក្បាល​ ឬឈឺបំពង់ក​ ឬឈឺសាច់ដុំ​ ឬឈឺសន្លាក់​ ចំពោះការព្យាបាលមនុស្សពេញវ័យ ឬ​កុមារ​ចាប់​ពី​៣០គីឡូក្រាម​ឡើ​ង​ ត្រូវប្រើ​ប៉ារ៉ាសេតាមុល​៥០០​មីលីក្រាម ៣ដងក្នុងមួយថ្ងៃ។​ កុមារដែលមានទំងន់​ចាប់ពី២០ រហូតដល់២៩គីឡូក្រាម​​ ត្រូវប្រើ​ប៉ារ៉ាសេតាមុល៣០០មីលីក្រាម ៣ដងក្នុងមួយថ្ងៃ។

ចំពោះអ្នកមានអាការ:តឹងច្រមុះ ឬផ្តាសាយ​ ឬហៀរសំបោរ​ ឬក្អក ​(មានស្លេស ឬ​គ្មានស្លេស)​ សម្រាប់ការព្យាបាលចំពោះមនុស្ស​ពេញវ័យ​ ឬកុមារអាយុចាប់ពី៦ឆ្នាំឡើងទៅ​ ត្រូវ​ប្រើ​ប្រូម៉ិចស៊ីន​ ៨មីលីក្រាម ៣ដងក្នុងមួយថ្ងៃ​ ឬសេទីរីហ្សុន​ ១០មីលីក្រាម​​ ១ដងក្នុងមួយថ្ងៃ។ សម្រាប់​មនុស្សពេលវ័យ​ ត្រូវប្រើថ្នាំគ្រាប់​ លៀនហ័រ​ ឈីងវីន​ (​Lanhua Qngwen Capsules) លេបចំនួន៤​គ្រាប់ក្នុង១ដង​ និងចំនួន៣ដងក្នុង១ថ្ងៃ។

យោងតាមការណែនាំរបស់ក្រសួងសុខាភិបាលដដែល​​ បានបញ្ជាក់ទៀត​ថា​សម្រាប់​​អ្នក​គ្មាន​រោគ​សញ្ញា​ដូចជា​ ក្អក​ ហៀរសំបោរ​ ឈឺបំពង់ក​ ពិបាកដកដង្ហើ​មកំដៅតិចជាង​ ឬស្មើ៣៧.៥​ ពុំចាំបាច់ប្រើឱសថទេ។

នៅក្នុងសេចក្តីណែនាំខាងលើក៏បានណែនាំពីគោលការណ៍អនុវត្តសម្រាប់អ្នកជំងឺកូវីដ១៩នៅតាមផ្ទះ​ផងដែរ​ គឺត្រូវដាក់ជំងឺឲ្យដាច់ដោយឡែកពីគ្រួសារ​ នៅក្នុង​បន្ទប់​ដែល​មាន​ខ្យល់​ចេញ​ចូល​ល្អ​ និងមានបន្ទប់ទឹកបង្គន់ខាងក្នុង​។ បរិភោគ​អាហារ​ និង​ប្រើប្រាស់​សម្ភារ:​បរិក្ខារ​ដាច់​ដោយ​ឡែក​ពីគ្រួសារ។  ខ្ចប់​សំណល់​ពី​ការប្រើប្រាស់ក្នុងស្បោងប្លាសស្ទិកឱ្យបានត្រឹមត្រូវ​ ដាក់ដាច់ដោយ​ឡែកពីសំរាមរបស់សមាជិកគ្រួសារដទៃទៀត​ ទុកឱ្យ​មាន​សុវត្ថិភាព​រយ:ពេល​៧​២​ម៉ោងមុននឹងយកទៅដាក់នៅកន្លែងប្រមូលសំរាម។

អ្នកជំងឺត្រូវពាក់ម៉ាសជាប់ជានិច្ច​ លាងដៃជាមួយអាល់កុល​ ឬលាងជាមួយ​សាប៊ូ និង​ទឹក​ជា​ប្រចាំ​ ត្រូវរក្សាគម្លាតពីសមាជិកគ្រួសារយ៉ាងតិច២ម៉ែត្របើ​ត្រូវពិភាក្សាគ្នា។

​ប្រសិនបើមានរោគសញ្ញាអាសន្នត្រូវឆាប់ទាក់ទងមកគ្រូពេទ្យដើម្បីព្យាបាល​ ដែល​មាន​អាការ​:​ដូចជា​ ហត់ ឬពិបាកដកដង្ហើម​ ឈឺទ្រូងខ្លាំង​ និងភ្លាមៗ វង្វេងស្មារតី​ បាត់មាត់បាត់ក​ បញ្ហា​ផ្លូវ​ចិត្ត​ធ្ងន់ធ្ងរ​។ អ្នកជំងឺត្រូវតាមដានសុខភាពផ្ទាល់ខ្លួន​ ដោយវាស់កំដៅរៀងរាល់ព្រឹក​ និងល្ងាច​ ថែរក្សា​​សុខភាពផ្លូវកាយ និងផ្លូវចិត្ត​ រក្សា​ទំនាក់ទំនងជាមួយគ្រូពេទ្យព្យាបាលតាមរយ:ទូរស័ព្ទ​ ឬ​ បណ្ដាញ​សង្គម​រាល់ថ្ងៃ​ ត្រូវបរិភោគអាហារដែលមានជីវជាតិគ្រប់គ្រាន់​ ហាមជក់បារី​ ផឹក​ស្រា​ ឬគ្រឿងស្រវឹងផ្សេងៗ។

ក្នុងសន្និសីទសារព័ត៌មាននៅ​ឯសាលារាជធានីភ្នំពេញនៅ​ព្រឹក​​ថ្ងៃ​ចន្ទ លោក ងី មានហេង ប្រធាន​មន្ទីរសុខាភិបាលរាជធានីភ្នំពេញ​​បញ្ជាក់​​​ថា តួលេខអ្នក​ដែល​បាន និង​កំពុង​សម្រាក​ព្យាបាលជំ​ងឺ​កូវីដ​១៩ នៅតាមផ្ទះក្នុងរាជធានីភ្នំពេញ មានចំនួន១,០៣៣ នាក់ ចំណែក​អ្នក​ដែល​ព្យាបាលជា​សះស្បើយមានចំនួន ២៦៨នាក់។ 

គិត​ត្រឹម​​ថ្ងៃទី១២ ខែកក្កដា​ ឆ្នាំ​២០២១​ នេះមានអ្នកឆ្ល​ងជំងឺកូវីដ​១៩​​​សរុបចំនួន​ ​៦២,៧០០នាក់​ អ្នកជាសះស្បើយ​​​ចំនួន​ ​៥៤,៤៨៩នាក់​ និង​មាន​​អ្នកស្លាប់ចំនួន៩៥៣នាក់​៕​

យោងតាមរបាយការណ៏របស់សហព័ន្ធស្រូវអង្ករកម្ពុជា ក្នុងឆមាសទី១​ ឆ្នាំ២០២១នេះ កម្ពុជាបាននាំចេញអង្ករទៅកាន់ទីផ្សារគោលដៅទាំ៤៩ នៅលើសកលលោក ក្នុងបរិមាណអង្ករសរុបចំនូន ២៨០៤៥០តោន ដែលគិតជាទឹកប្រាក់ចំនួន ២០២.៦៧លានដុល្លាសហរដ្ឋអាមេរិក។

ចំពោះទឹកប្រាក់នៃការនាំចេញក៏បានធ្លាក់ចុះចំនួន ២៣.៧២% ផងដែរ ដែលឆ្នាំ២០២០ ក្នុងឆមាសទី១ ទទូលបានទឹកប្រាក់ ២៦៥.៦៦លានដុល្លា មកត្រឹម២០២.៦៧លានដុល្លារក្នុងឆមាសទី១ ឆ្នាំ២០២១នេះ។ នេះយោងតាមរបាយការណ៌។

សហព័ន្ធអង្ករកម្ពុជាបានរៀបរាប់ថា ការធ្លាក់ចុះទាំងបរិមាណ និងតម្លៃគឺដោយសារតែជួបបញ្ហាប្រឈមការដឹកជញ្ជូន កង្វះសំបកកុងតែន័រ ជាពិសេសទៅកាន់ទីផ្សារសហគមន៏អឺរ៉ុប ធ្វើឱ្យតម្រូវការ និងតម្លៃលក់នាំចេញ នៅត្រឹមកំពង់ផែ​របស់អង្ករក្រអូបកម្ពុជា​ បានធ្លាក់ចុះយ៉ាងគំហុក។​

កម្ពុជាបាននាំអង្ករទៅកាន់ទីផ្សារនៅក្នុងឆមាសទី១ នៃឆ្នាំ២០២១នេះ គឺមានប្រទេសនាំមុខចំនួន៥ រួមមាន ប្រទេសចិន បារំាង ហ្កាប៊ុង ប្រទេសម៉ាឡេស៊ី និងប្រទេសហូឡង់ ហើយសំរាប់ប្រភេទអង្ករនាំចេញក្នុងឆមាសទី១ នៃឆ្នាំនេះ មានអង្ករក្រអូបប្រណិត អង្ករក្រអូបធម្មតា អង្ករសគ្រាប់វែង អង្ករចំហុយ អង្ករសរីរាង្គ អង្ករបាក់ និងអង្ករដំណើប។

សម្រាប់ខែមិថុនា ឆ្នាំ២០២១នេះ អង្ករដែលកម្ពុជានាំចេញមានចំនូន៤៧ ៤១៩តោន ដែលមានការកើនឡើង១៤.១% បើធៀបនឹងខែមិថុនាឆ្នាំមុន គិតជាទឹកប្រាក់ចំនួន៣៣.៦៩លានដុល្លារ ដែលក្នុងនោះ ទីផ្សារប្រទេសចិន និង​តំបន់ស្វយ័តមានចំនួន ២២ ៤៥៩ តោន គិតជាទឹកប្រាក់ ១៥.១៥លានដុល្លារ ដែលតួរលេខការនាំចេញទៅចិនមានកំនើន ១០២% បើធៀបទៅក្នុងខែមិថុនា ឆ្នាំ២០២០ដែលមានប្រមាណត្រឹម១១​ ១​២៤តោន៕

យោងតាមសេចក្តីប្រកាសក្រសូងវប្បធម៏ និងវិចិត្រសិល្ប: ក្រសួងបានទំនាក់ទំនង និងសហកាជាមួយស្ថានទូតកម្ពុជាប្រចាំប្រទេសថៃដើម្បីចុះស្រាវជ្រាវការសាងសង់ប្រាសាទនេះ បន្ទាប់ពីមានប្រតិកម្មខ្លាំងពីសាធារណជនកម្ពុជាតាមបណ្តាញសង្គមថា ថៃអាចទទួលបានផលប្រយោជន៍ពីប្រាសាទនេះក្នុងវិស័យទេសចរណ៌របស់ខ្លួន។

ក្នងសេចក្តីប្រកាសដដែលខាងលើ បានរៀបរាប់ថា តាមរយ:ការចុះស្រាយជ្រាវរបស់ស្ថានទូតកម្ពុជា ប្រចាំនៅប្រទេសថៃ ខ្លួនបានប្រមូលព័ត៏មានជាបឋមមួយចំនូន រួមមានថាសំណង់ប្រាសាទនេះ ជាសំណង់មួយក្នុងចំណោមសំណង់ប្រាសាទថ្មដទៃៗមានភាពចម្រុះគ្នា ជាទីប្រតិស្ឋាននៃព្រះពុទ្ធរូបសម្រាប់បូជា ធ្វើពីថ្មភក់នៅផ្នែកក្រៅ និងចាក់បេតុងបង្កប់ដែកពីខាងក្នុង។

«តាមរយ:ការបំភ្លឺ និងបង្ហាញឯកសារ ប្លង់ សំណង់នានា ព្រះចៅអធិការវត្តបានបញ្ចាក់ថា ការសាងសង់ប្រាសាទនេះ មិនបានលូចចម្លងប្លង់ ឬសាងសង់តាមរចនាបថស្ថាបត្យកម្មដូចគ្នាទៅនឹងប្រាសាទអង្គរវត្ត ឬប្រាសាទបុរាណណាមួយនៅក្នុងប្រទេសកម្ពុជាឡើយ ពោលគឺសាងសង់តាមគំរូសប្លង់ដោយខ្លួនឯង និងរចនាទៅតាមស្ថាបត្យកម្មប្រាសាទមួយចំនួនដែលមានក្នុងតំបន់នោះ»។

ក្រសួងបានអះអាងថា តំណាងអ្នកសម្របសម្រួលនៃគម្រោងស្ថាបនាប្រាសាទ បានស្វាគមន៏ក្នុងការទទួលស្នើឱ្យមន្រ្តីជំនាញផ្នែកស្ថាបត្យកម្មកម្ពុជាចុះពិនិត្យដោយផ្ទាល់បានក្នុងករណីមានការមន្ទិលសង្ស័យ៕

យោងតាមសេចក្តីសម្រចរបស់សាលារាជនីភ្នំពេញ​ ការផ្អាកនេះគឺដេីម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ១៩​ ហើយសន្តិសុខ​ បុគ្គលិក​  កម្មករ​  អាជីវករ​ អតិថិជន​ និងអ្នកពាក់ព័ន្ធទាំងអស់ត្រូវចូលរួមសហការជាមួយអាជ្ញាធរមូលដ្ឋាន​ ដេីម្បីទៅយកសំណាកវិភាគរកមេរោគ​ និងត្រូវធ្វេីចត្តាឡីស័ក​ឲ្យ​បានត្រឹមត្រូវតាមការណែនាំរបស់ក្រសួងសុខាភិបាល។

សេចក្តីប្រកាសដដែលបានហាមឃាត់រាល់ការចេញចូល​ និងការជួបជុំ​ ឬ​ ការប្រមូលផ្តុំមនុស្សក្នុងមូលដ្ឋានផ្សារបឹងកេងកង​ លេីកលែងករណីចំបាច់ដូចជា​ ការចេញចូល​ ក្នុងការជួបជុំក្នុងចំណោមអ្នកជាប់ពាក់ព័ន្ធ​នៅក្នុងទីតាំងកំណត់ដែលត្រូវផ្តល់សំណាក។ ការចេញចូល និងការជួបជុំរបស់បុគ្គលិកសុខាភិបាល​ ដេីម្បីអនុវត្តវិធានការសុខាភិបាល​។ ការចេញចូលនិងការជួបជុំរបស់គណ:កម្មការផ្សារ​ អាជ្ញាធរមានសមត្ថកិច្ច​ និងកម្លាំងគណ:បញ្ជាការឯកភាពរដ្ឋបាលគ្រប់លំដាប់ថ្នាក់​ ។

សន្តិសុខ​ បុគ្គលិក​ កម្មករ​ អាជីវករ​ អតិថិជន​ និងអ្នកពាក់ព័ន្ធ​ទាំងឡាយណាដែលមិនព្រមសហការទៅយកសំណាកវិភាគរកមេរោគកូវីដ១៩​ ឬ​ មិនអនុវត្តវិធានចត្តាឡីស័ក​ នឹងត្រូវប្រឈមមុខទៅនឹងការពិន័យអន្តការណ៍​ដែលបានកំណត់ដោយក្រសួងសុខាភិបាល​។ នេះយោងតាមសេចក្តីប្រកាសដដែល។ ក្រៅពីនេះ​ ក៏មានការពិន័យអន្តរការណ៍​ នឹងមិនអនុញ្ញាតឱ្យបន្តអាជីវកម្មលក់ដូរ​ ឬ​ ចេញ​ចូលមកបម្រេីរកាងាររបស់ខ្លួនឡេីយ​ បេីទោះបីជាផ្សារបេីកដំណេីរការឡេីងវិញក៏ដោយ​។

គួរបញ្ជាក់ថា​ នៅថ្ងៃទី២៩​ ខែមិថុនា​ ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ-១៩​ ចំនួន ​៧២៣នាក់​ អ្នកជាសះស្បេីយ​ថ្មីចំនួន​ ៧០៩នាក់​ និងអ្នកស្លាប់ថ្មីចំនួន​ ១៩នាក់។ 

ចំណែកអ្នកឆ្លងនៅទូទាំងប្រទេសជាង ១ឆ្នាំមកនេះ មានចំនួន​ ៤៩​ ២៥៥នាក់​ ដោយអ្នកជំងឺដែលព្យាបាលជាសះស្បើយ ៤៣​ ៤៧៣នាក់​ អ្នកស្លាប់សរុប ៥៧៥នាក់​ និងកំពុងសម្រាកព្យាបាល ២៤០៩នាក់៕

Q: តើលោកមើលឃើញយ៉ាងដែរចំពោះព្រឹត្តិការណ៍ថ្មីនៃដំណើរទស្សនៈកិច្ចរបស់លោកស្រី វីនឌី ស៊ើមែន (Wendy Sherman) អនុរដ្ឋមន្រ្តី ការបរទេសសហរដ្ឋអាមេរិកនៅកម្ពុជានាពេលនេះ?

A: ការធ្វើទស្សនកិច្ចរបស់ឧបការីអនុរដ្ឋមន្ត្រីក្រសួងការបរទេសរបស់អាមេរិកនេះ ទីមួយ បើយើងមើលទៅទិដ្ឋភាពរបស់រដ្ឋាភិបាលថ្មីមួយដែលកើតឡើងគេត្រូវការឲ្យមានដំណើរទស្សនកិច្ចទៅតាមប្រទេសនានា ដែលអាចជាមហាមិត្តសំខាន់ៗ ដែលមានរឿងត្រូវជជែកគ្នាសំខាន់ៗក្នុងពិភពលោក។

ប្រសិនបើយើងមើលពីអ្នកដឹកនាំនៅក្នុងតំបន់អាស៊ី ឬក៏អាស៊ានដូចគ្នាដែរ នៅពេលដែលមានមេដឹកនាំណាមួយឡើងថ្មីទើបជាប់ឆ្នោត ក៏គេត្រូវបញ្ជូនរដ្ឋមន្ត្រីការបរទេស ឬមន្ត្រីគណៈប្រតិភូក្រសួងការបរទេស ដើម្បីទៅជួបបង្ហាញខ្លួនជាមួយនឹងប្រទេសដទៃដើម្បីឲ្យគេស្គាល់សម្រាប់ទំនាក់ទំនងការទូត បាទនេះជារឿងទីមួយសំខាន់។

ក៏ប៉ុន្តែហេតុអ្វីក៏នៅក្នុងនឹង បានជាគេជ្រើសរើសកម្ពុជាក្នុងចំណោមប្រទេសទាំង៥ ដែលលោកស្រីបានមកធ្វើទស្សនកិច្ច? ហើយនេះជាសំនួរសំខាន់ដែលសាធារណជនគេផ្តោតការយកចិត្តទុកដាក់ ថាតើហេតុអ្វីបានជារើសយកប្រទេសខ្មែរ? ប្រទេសកម្ពុជាកំពុងស្ថិតនៅក្នុងការចោទប្រកាន់គ្នាទៅវិញទៅមករវាងមហាអំណាចចិន និងសហរដ្ឋអាមេរិកទៅលើបញ្ហាភូមិសាស្រ្តនយោបាយដោយរួមទាំងមានការចោទថាកម្ពុជាបានផ្តល់ទីតាំងវត្តមានកងយោធាចិននៅក្នុងប្រទេសដែលរាជរដ្ឋាភិបាលកម្ពុជាតែងតែបដិសេដថាវាជារឿងមិនពិត។

យើងឃើញថានៅក្នុងឆ្នាំកន្លងទៅនេះ រដ្ឋាភិបាលកម្ពុជាបានបង្ហាញនូវជាការការរើសអើង ឬក៏មានទំនាក់ទំនងជាអរិយភាពជាមួយគ្នា បានន័យថាមិនល្អជាមួយគ្នាជាច្រើនចំណុចដែលនៅក្នុងហ្នឹង គឺសំខាន់បំផុតរដ្ឋាភិបាលកម្ពុជាបានចោទសហរដ្ឋអាមេរិកថា នៅពីក្រោយការធ្វើបដិវត្តន៍ពណ៌ ដែលឈានរហូតដល់ការរំលាយគណបក្សសង្គ្រោះជាតិ ហើយការចោទប្រកាន់នេះក៏នៅតែមានការរុញទៅរុញមក មកដល់ពេលនេះដែរ។

យើងឃើញថានៅក្នុងឆ្នាំកន្លងមកហើយ រដ្ឋាភិបាលកម្ពុជាបានបង្ហាញនូវជំហរលម្អៀងហ្នឹងខ្លាំងមែនទែនទៅជាមួយនិងប្រទេសចិនដែលរហូតដល់ជាមហាមិត្តដែកថែប ហើយរហូតទៅដល់មានការសន្យាក្នុងការជួយគ្នាទៅវិញទៅមក មានការផ្លាស់ប្តូរនៅទស្សនៈកិច្ចកងទ័ពគ្នាទៅវិញទៅមក។

ត្រង់ចំណុចទាំងនេះហើយ ដែលជាចំណុចក្ដៅដែលធ្វើឲ្យកម្ពុជា ចង់មិនចង់បានត្រូវគេមើលឃើញថាកំពុងត្រូវបានមហាអំណាចទាំងពីរហ្នឹងយកធ្វើជាតំបន់ភូមិសាស្ត្រនយោបាយដែល ជាផ្នែកមួយនៃដំណើរទស្សនកិច្ចរបស់លោកស្រី អនុរដ្ឋមន្ត្រីក្រសួងការបរទេស មកកម្ពុជា។

Q: តើរដ្ឋាភិបាលកម្ពុជា គួរឆ្លើយតបបែបណា ដើម្បីស្រោចស្រង់ទំនាក់ទំនងការបរទេសជាមួយអាមរិក ខណៈកម្ពុជាបានចោទត្រង់ៗថា អាមេរិកអ្នកនៅពីក្រោយនៃការចង់ធ្វើការផ្តួលរំលំរដ្ឋាភិបាលលោកហ៊ុន សែន ពីសំណាក់ក្រុមបក្សប្រឆាំង?

A: បាទ! រឿងសំខាន់គឺជំហររបស់រដ្ឋាភិបាលកម្ពុជាខ្លួនឯងទេ ដែលត្រូវគិតថាតើយើងត្រូវឈរត្រង់ជំហរ ត្រង់ណាមួយដើម្បីផលប្រយោជន៍ជាតិរបស់ខ្លួន ហើយនិង ធ្វើម៉េចដើម្បីឲ្យ ការដឹកនាំប្រទេសនេះ វា ស្ថិតនៅតែឋិតនៅក្រោមជើងថាក្រោមរចនាសម្ព័ន្ធមួយដែលអនុវត្តទៅតាមអ្វីដែលបានចែងនៅក្នុងរដ្ឋធម្មនុញ្ញ ដូច្នេះប្រទេសកម្ពុជាដែលផ្អែក ទៅលើរដ្ឋធម្មនុញ្ញហ្នឹងគឺប្រទេសកម្ពុជាត្រូវជាប្រទេសអព្យាក្រិត្ស ដូច្នេះការសាងនូវទំនាក់ទំនងរវាងប្រទេសដែលជាមហាអំណាចនៅក្នុងប្លុកខាងឆ្វេង ឬខាងស្ដាំឬក៏សេរី និង កុម្មុយនិស្ត ហ្នឹងវានៅតែជាកត្តាសំខាន់មួយនៃនយោបាយការបរទេសរបស់កម្ពុជា។

ប្រសិនបើកម្ពុជាធ្វើ ឲ្យបាត់នូវទំនាក់ទំនងឬក៏ធ្វើឲ្យមានការរើសអើងពីជ្រុងខាងណាមួយនៃទំនាក់ទំនងរបស់មហា អំណាចហ្នឹងគឺបានន័យថាកម្ពុជាទីមួយកម្ពុជាក្បត់និងរដ្ឋធម្មនុញ្ញខ្លួនឯង ហើយទីពីរទៀតក៏វានឹងអាចធ្វើឲ្យបញ្ហាភូមិសាស្ត្រនយោបាយនឹងរុញស្ថានការណ៍នយោបាយរបស់កម្ពុជាឲ្យរុញទៅក្នុងជ្រោះកាន់តែជ្រៅ ក្នុងភាពគ្រោះថ្នាក់នឹងកាន់តែខ្ពស់ឡើងៗ។

ក្នុងនាមយើងជាប្រទេសតូចតាចមួយនេះគឺការសាងនូវទំនាក់ទំនងជាមួយនឹងប្រទេសជាមហាអំណាចទាំងអស់ឲ្យបានបានស្នើរភាពគ្នា វាជារឿងសំខាន់ ហើយក៏មិនត្រូវពឹងផ្អែកទៅលើគេច្រើនពេកដែរ ដោយពឹងផ្អែកទៅលើមួយ ហើយអោបមួយ ចោលមួយ រួចទៅធាក់មួយចោល នោះគឺគេគ្រាន់តែរុញប្រទេសយើងឲ្យឋិតនៅក្នុងស្ថានភាពមួយងាយរងគ្រោះ ដោយសារតែប្រទេសមហាអំណាចនីមួយៗ ហ្នឹងគឺនៅពេលណាដែលគេត្រូវការប្រើប្រទេសណាមួយធ្វើជាផលប្រយោជន៍របស់គេនោះគឺគេនឹងមិនខ្លាចនឹងធ្វើឲ្យប្រទេសធ្លាក់ចូលទៅក្នុងកណ្ដាប់ដៃរបស់គេ ដើម្បីឲ្យបានផលប្រយោជន៏ទៅដល់ប្រទេសមហាអំណាចនោះឡើយ។

Q: តើដើម្បីបង្ហាញពីភាពឯករាជ្យ អព្យាក្រឹត្ស និងអធិបតេយ្យភាពរបស់ខ្លួន អ្នកនយោបាយខ្មែរ គួរនាំគ្នាបន្តបង្កើនជម្លោះផ្ទៃក្នុងជាតិ ឬក៏គួរងាកមករកដំណោះស្រាយរួមដើម្បីប្រយោជន៍ទាំងមូល?

A: នៅក្នុងស្ថានភាពមួយ កាលណាប្រទេសនេះបាត់បង់ឯករាជ្យភាព ឬអព្យាក្រឹត គឺមួយផ្នែក គឺដោយសារតែជម្លោះផ្ទៃក្នុងរបស់ប្រទេសនិងខ្លួនឯង​ ហើយយើងឃើញថានៅក្នុងប្រវត្តិសាស្ត្រ តាំងពី ក្រោយសម័យអង្គរមកប្រទេសកម្ពុជាយើងនេះ គឺជនរងគ្រោះដោយជំងឺម្យ៉ាងគឺជំងឺលែងទុកចិត្តគ្នាឯង ហើយដើរពឹងគេអោយជួយ។នេះជាឧទាហណ៏មួយ ដែលយើងឃើញថា ចាប់តាំងពី ក្រោយសម័យអង្គរមក ក៏យើងឃើញថាកម្ពុជាបានស្ថិតនៅក្នុងគ្រោះមួយគឺគ្រោះនៃជម្លោះផ្ទៃក្នុងរបស់ខ្លួនឯង ហើយរហូតយើងឃើញថាមកដល់សព្វថ្ងៃនេះគឺខ្មែរយើងបានចំណាយពេលតិចតួចណាស់នៅក្នុង ការនាំចូលមកនូវវប្បធម៏ នៃការជជែកគ្នាក្នុងចំណោមខ្មែរគ្នាឯងក៏ប៉ុន្តែចំណាយពេលភាគច្រើន ដើរពឹងគេ ពឹងគេអោយជួយចេះ ជួយចុះក៏ដើម្បីអ្វី គឺដើម្បី តែមកសម្រាប់ធ្វើការយកប្រៀប ជាមួយនឹងខ្មែរគ្នាឯងតែប៉ុណ្ណឹងទេបាទ។

ហើយរឿងនេះ សព្វថ្ងៃនេះបញ្ហាវិបត្តិនយោបាយក្នុងស្រុក នេះវាមិនមែនជារឿងថ្មីសម្រាប់ពលរដ្ឋខ្មែរទេបើយើងមើលក្នុងប្រវត្តិសាស្ត្រចាប់តាំងពីក្រោយសម័យអង្គរ ក៏ឃើញថាយើងបានជាប់គាំងជាមួយនិងការប្រើពេលវេលាច្រើនដើម្បីពឹងបរទេសឲ្យជួយខ្លួនឯង ឲ្យជាជាងការរកពេលវេលាដើម្បីឲ្យខ្មែរ និងខ្មែរមានឱកាសអង្គុយជជែកគ្នាបាន។

Q: តើលោកបណ្ឌិត វាយតម្លៃយ៉ាងណាដែរ ចំពោះការបោះឆ្នោតឃុំសង្កាត់នៅពាក់កណ្តាលឆ្នាំ២០២២នេះ?

A: ខ្ញុំមើលឃើញមានច្រកពីរ ច្រកមួយទីមួយ យើងឃើញហើយថា គ.ជ.ប គណៈកម្មការជាតិសម្រាប់ការបោះឆ្នោតវានៅតែជាយន្តការមួយដែលមានសារៈ សំខាន់ ធ្វើឲ្យការបោះឆ្នោតមួយដែលប្រព្រឹត្តទៅ បានដោយសេរីនិងយុត្តិធម៌បាន អ្វីដែលយើងពលរដ្ឋខ្មែរមើលឃើញសព្វថ្ងៃនេះគឺយើងមិនទាន់បានផ្តល់ នូវការទុកចិត្តជាដុំកំភួនទៅឲ្យគណៈកម្មការជាតិសម្រាប់ការបោះឆ្នោតនាពេលបច្ចុប្បន្ននេះទេ ដោយសារតែយើងនៅយល់ឃើញថាគណៈកម្មការជាតិសម្រាប់ការបោះឆ្នោតនេះវានៅតែជាយន្តការមួយដែលបង្កើតឡើងដោយក្រុមគ្រប់គ្រងដោយគណបក្សកាន់អំណាច។

ប្រសិនបើមានការផ្លាស់ប្តូរ ណាមួយដើម្បីពិនិត្យមើលឡើងវិញពីសមាសភាពនៃគណៈកម្មការសមាជិកនៃយន្តការគណៈ កម្មការបោះឆ្នោតនោះអាហ្នឹងយើងអាចគិតថាយើងអាចរកមើលឃើញថាការបោះឆ្នោតនេះនិងមានការផ្លាស់ប្តូរមុខមាត់ បើមិនអ៊ីចឹងទេ គឺខ្ញុំមិនឃើញមិនមានការផ្លាស់ប្តូរជាដុំកំភួនអ្វីឡើយ នេះជាច្រកទីមូយដែលខ្ញុំមើលឃើញ។

ច្រកទីពីរ មកដល់ពេលនេះ ខ្ញុំមិនទាន់មើលឃើញថា តើខ្ញុំនឹងអាចមានការប្រកួតប្រជែងខ្ពស់ណាមួយនៅក្នុងការបោះឆ្នោតឃុំសង្កាត់នៅក្នុងពេលឆ្នាំ២០២២នេះទេ ប្រសិនបើមិនមានវត្តមានគណបក្ស ប្រឆាំងណាមួយដែលមានឥទ្ធិពល។ មកដល់ពេលនេះហាក់ដូចជាមិនទាន់ ឃើញមានក្រុមណាមួយដែលបង្ហាញកំលាំងឈានមុខ នៅក្នុងការឆ្ពោះទៅដណ្តើមយកជ័យជំនះនៅឡើយនោះទេ។

Q: តើលោកយល់ឃើញយ៉ាងណាសំរាប់បោះឆ្នោតជាតិ ២០២២-២០២៣ខាងមុខ  ចំពោះអវត្តមានរបស់ គណបក្សសង្គ្រោះជាតិ?

A: ឃើញថាមកដល់ពេលនេះ ក្រៅតែពី គណបក្សកាន់អំណាចនេះ គឺយើងមិនទាន់ឃើញមានគណបក្សណាមួយដែលអាចឈានមុខឬក៏មានឥទ្ធិពលខ្លាំងក្លាដូចអតីតគណបក្សសង្គ្រោះជាតិមុនពេលការរំលាយនៅឡើយទេ។ដូច្នេះសម្រាប់ការបោះឆ្នោតជាតិនៅក្នុងឆ្នាំ២០២២នេះ ប្រសិនបើមិនមានគណបក្សនយោបាយធំណាមួយមិនអាចចូលមកប្រកួតបានពេលនោះទេ ខ្ញុំយល់ឃើញថាជោគជ័យភ្លូកទឹកភ្លូកដីនឹងនៅតែបានទៅលើគណបក្សកាន់អំណាចដដែល ហើយបញ្ហាប្រជាធិបតេយ្យនៅក្នុងប្រទេសកម្ពុជាក៏វានៅតែជាល្បែងមួយដែលស្ថិតក្នុងភាពមិនច្បាស់លាស់ យើងដឹងហើយថាប្រសិនបើរដ្ឋាភិបាលកម្ពុជានេះ នៅតែបន្តក៏បំពេញតួនាទីជារដ្ឋាភិបាលឯកបក្សតទៅទៀតនោះ យើងមិនរំពឹងថាទិដ្ឋភាពនៃប្រជាធិបតេយ្យពិតប្រាកដមិនអាចកើតមានឡើងទេបាទ។

Q: តើលោកបណ្ឌិតមានសង្ឃឹមខ្លះទេ នៅនាទីចុងក្រោយ  ថាតើអាចកើតមាន គណបក្សសង្គ្រោះជាតិថ្មីដែររឺទេ?

A: បើយើងមើលពីទិដ្ឋភាពទូទៅអំពីវិបត្តិនយោបាយដែលកើតឡើងដែលក្លាយទៅ​ជាទិដ្ឋភាពនៃការមានអរិយភាពជាមួយគ្នារវាងគណបក្សកាន់អំណាចនិងគណបក្សសង្គ្រោះជាតិនេះគឺយើងសម្រាប់ខ្ញុំ ខ្ញុំនៅតែមើលឃើញថាវាជាទិដ្ឋភាពនយោបាយទេ វាមិនមែនជាទិដ្ឋភាពច្បាប់ ទោះបីរដ្ឋាភិបាលប្រកាសថាជាទិដ្ឋភាពច្បាប់ក៏ដោយ។

សម្រាប់ខ្ញុំខ្លួនឯង គឺខ្ញុំនៅតែមើលឃើញថាវាជាបញ្ហានយោបាយគឺដោយសារតែកម្លាំងនៃការប្រកួតប្រជែងវាហាក់ដូចជាចូលមកដល់កន្លែងមួយប្រកៀកគ្នាពេក ចឹងយើងអាចជានយោបាយមួយគឺធាក់ដៃគូឲ្យដួលមួយទៅ ដើម្បីរត់ប្រណាំងអោយដល់ទី ដូច្នេះនៅក្នុងការមើលឃើញរបស់ខ្ញុំគឺទោះបីក្នុងរូបភាពណាក៏ដោយ ប្រសិនបើគណបក្សកាន់អំណាច គាត់អនុញ្ញាតឲ្យគណបក្សសង្គ្រោះជាតិវិលមកវិញមកវិញនោះ ទាំងឈ្មោះទាំងអីទាំងអស់ហ្នឹងគឺគណបក្សកាន់អំណាច នឹងប្រឈមទៅនិងទិដ្ឋភាពបញ្ហាពីរធំៗ។

បើសិនជាឲ្យសង្គ្រោះជាតិវិលត្រឡប់មកវិញនោះគឺ វានឹងអាចធ្វើឲ្យមានបញ្ហាបង្ហាញយ៉ាងច្បាស់ថាជំហររបស់រដ្ឋាភិបាលប្រកាន់ថាការរំលាយគណបក្សសង្គ្រោះជាតិជាបញ្ហាផ្លូវច្បាប់នោះនឹងមិនអាចបន្តបង្ហាញនៃច្រកហ្នឹងបានទៀតទេបាទ ប្រសិនបើឲ្យសង្គ្រោះជាតិមកវិញនោះ។ ចឹងសរុបសេចក្ដីមកគឺទោះបីជាក្នុងតម្លៃណាក៏ដោយខ្ញុំមើលឃើញចំណុចណាមួយដែលគណបក្សកាន់អំណាចនឹងផ្តល់លទ្ធភាពឲ្យសង្គ្រោះជាតិវិលមកវិញទាំងរូបរាងទាំងឈ្មោះនោះទេ។

ក៏ប៉ុន្តែវានឹងអាចមាន ប្រសិនបើសង្គ្រោះជាតិគេគិតថាគេនឹងមានបំណងចង់វិលត្រឡប់មកយកសាកល្បងនូវប្រជាប្រិយភាពរបស់គេឡើងវិញហើយចាប់យកនូវអាសនៈឃុំសង្កាត់ដែលគេបានបាត់បង់ឡើងវិញដោយប្រើយុទ្ធសាស្ត្រណាមួយថាវាជាការបង្កើតបក្សថ្មីឬការចូលរួមជាមួយគណបក្សណាមួយនោះអាហ្នឹងវាអាច វាអាចនឹងកើតឡើងនៅក្នុងស្ថានភាពបែបហ្នឹងទេ ក៏ប៉ុន្តែការឲ្យមកចុះឈ្មោះសង្គ្រោះជាតិតែម្ដងខ្ញុំគិតថានឹងមិនអាចទៅរួចទេបាទ៕

យោងតាមសេចក្តីជូនដំណឹងរបស់ស្ថានទូតខ្មែរប្រចាំប្រទេសវៀតណាម ចេញ​នៅ​ថ្ងៃ​ទី៧ ខែមិថុនា ឆ្នាំ២០២១ បានជូនដំណឹងដល់​និសិ្សត សិក្ខាកាម យោធា នគរបាល និង​ប្រជាពលរដ្ឋខ្មែរដែល​កំពុងសិក្សាស្នាក់នៅវៀតណាម ឲ្យ​មាន​ការ​ប្រុងប្រយ័ត្ន​ចំពោះ​​ការឡើង​កម្តៅ​ខ្ពស់ និងមានព្យុះ​នៅសមុទ្រខាងកើត​ប្រទេសវៀតណាម។ ​

ក្នុងសេចក្តីជូនដំណឹងដដែលបានរៀបរាប់ថា៖ «​កាសែត Vietnam News ចេញផ្សាយ​នៅថ្ងៃទី៥ ខែមិថុនា ឆ្នាំ​២០២១ បានដកស្រង់ការលើកឡើង របស់​អគ្គនាយក​នៃ​អគ្គនាយកដ្ឋាន​ឧត្តុ​និយម និងជលសាស្រ្តនៃក្រសួងធនធានធម្មជាតិ និងបរិស្ថាន​វៀតណាម​ថា អំឡុង​ខែមិថុនា និងកក្កដា កម្តៅ​ក្តៅខ្លាំងអាចនឹងគ្របដណ្តប់ភាពខាងជើង រីឯភាគកណ្តាលនឹងមានកម្តៅ​ពី​ខែមិថុនា ដល់ខែសីហា ហើយតំបន់ខ្លះអាចក្តៅដល់​៤១ ដល់៤២​អង្សារសេ​។ ឆ្នាំ​នេះ​​មាន​ព្យុះ​ប្រ​មាណ​១២ ទៅ១៤ នឹងកើតមាននៅសមុទ្រខាងកើត ក្នុងនោះព្យុះប្រមាណពី៥ ទៅ​៧ នឹង​បោក​បក់​មក​ដី​គោកវៀតណាម​​»។

គួរបញ្ជាក់ថា ក្រៅពីការក្រើនរំឮកឲ្យប្រជាពលរដ្ឋខ្មែររស់នៅវៀតណាម មាន​ការប្រុង​ប្រយ័ត្ន​ចំពោះ​ការប្រែប្រួល​អាកាសធាតុ ហើយ​ក៏បាន​ឲ្យ​ប្រជាពលរដ្ឋថែររក្សាសុខភាព​ឱ្យបានល្អ ដើម្បី​ជៀសវាងការឆ្លងវីរុសកូវីដ​១៩ ទៅដល់សហគមន៍ដែលខ្លួនកំពុងរស់នៅ៕​

យោង​តាម​សេចក្ដី​ប្រកាស​ព័ត៌មាន​រួម​របស់អង្គការ​សមាគមដែលមានដូចជា សមាគម  បណ្ដាញ​យុវជនកម្ពុជា អង្គការអភិវឌ្ឍធនធានយុវជន និងស្ថាប័នសង្គមស៊ីវិល​ជាច្រើ​ន​ទៀត​សរុប​ចំនួន​១២​​ ចេញ​នៅ​ថ្ងៃ​ទី​១ ខែ​មិថុនា ឆ្នាំ​២០២១​នេះ បាន​ឱ្យ​ដឹង​ថា​ ការ​ប្រារព្ធ​ទិវា​បរិស្ថាន​​ពិភ​ព​លោក​តាម​អនឡាញ​នេះ ​នឹង​ធ្វើ​ឡើង​រយៈពេល​៤​ថ្ងៃ ​ចាប់​ពី​ថ្ងៃ​ទី១ ខែ​មិថុនា ដល់​ថ្ងៃ​ទី​៥ ខែ​មិថុនា។​

សេចក្តី​ប្រកាស​ព័ត៌មាន​ដដែល​បន្ថែម​ថា ​ការ​ប្រារព្ធ​ទិវា​បរិស្ថាន​ក្នុង​ឆ្នាំនេះ​​គោល​បំណង​​សំខាន់​​ចំនួន​៤​ ទី​មួយ​ដើម្បី​លើក​កម្ពស់​ការ​យល់​ដឹង​អំពីសារសំខាន់​បរិស្ថាន​ ធនធាន​ធម្មជាតិ​ និង​​ព្រៃ​ឈើ​​ទៅ​​ដល់​​យុវ​ជន​ និង​ប្រជា​ពល​រដ្ឋ​ទូ​ទៅ​ ទី​ពីរ​លើកទឹកចិត្ត បំផុស និង​ផ្ដល់​ឱកាស​ដល់​យុវជន​ដើម្បី​ចាប់​ផ្ដើម​ចូល​​រួម​ដោះ​ស្រាយ​បញ្ហា​បរិស្ថាន​ ទីបី​ជំរុញ​ឱ្យ​មាន​ការ​បើក​ទូ​លាយ​ និង​សហការ​គ្នា​រវាង​សាធារណជន​ និង​ភាគី​ពាក់​ព័ន្ធ​ ដើម្បី​បញ្ឈប់​បទ​ល្មើស​ និង​សកម្មភាព​នា​នា ដែល​បំផ្លាញ​ធន​ធាន​ធម្ម​ជាតិ​ និង​បរិស្ថាន​ និង​ទី​បួនស្នើឱ្យ​ក្រសួង​បរិស្ថាន​ និង​ស្ថាប័ន​ពាក់​ព័ន្ធ​ ជួយ​សម្រួល​ភាព​ងាយ​ស្រួល​ដល់​សាធារណជន​ក្នុង​ការ​ចូល​រួម​ការពារ​បរិស្ថាន ​និង​ធនធាន​ធម្មជាតិ​តាម​ច្បាប់​ដែល​បាន​កំណត់​។

សេចក្តីថ្លែងការណ៍នោះ​បញ្ជាក់​ថា៖ «ការយល់ដឹងពីសារៈសំខាន់របស់​បរិស្ថាន​ ធនធាន​ធម្មជាតិ និង​ព្រៃ​ឈើ ដល់យុវជន សាធារណៈជន ធ្វើ​ឱ្យពួកគេបាន​ចូលរួម​ប្រារព្ធ​ទិវា​បរិស្ថាន​ប្រកប​ដោយ​បរិយាប័ន្ន និងការទទួលខុសត្រូវ ក្នុងការរួមចំណែកការពារបរិស្ថាន និង​ការអភិរក្ស​ប្រកប​ដោយ​និរន្តរភាព»។

ក្រុម​សង្គម​ស៊ីវិល​ទាំង​១២​ក៏​បាន​បន្ថែម​ក្នុង​សេចក្តី​ថ្លែងការណ៍​ននោះ​ថា ការប្រារព្ធ​ទិវា​បរិស្ថាន​ពិភពលោក​ឆ្នាំ២០២១នេះ នឹងជំរុញទឹកចិត្ត បំផុសគំនិតដល់យុវជន​និង​អ្នក​ស្រឡាញ់​បរិស្ថានអាចសម្តែងក្តីកង្វល់ ឱ្យមានការដោះស្រាយបញ្ហាគំរាមគំហែងដល់បរិស្ថាន ធនធាន​ធម្មជាតិនិងព្រៃឈើ ដល់អ្នកមានកាតព្វកិច្ច។ នេះបើ​តាម​សេចក្តី​ប្រកាស​ព័ត៌មាន​ខាងលើ។

ពួកគេ​បញ្ជាក់ថា​៖ «កិច្ចសហប្រតិបត្តិការរវាង​សាធារណជន យុវជន និងអ្នកមានកាតព្វកិច្ច រួមគ្នាដើម្បីទប់ស្កាត់បទល្មើសព្រៃឈើនិងសកម្មភាពនានាដែលប៉ះពាល់បរិស្ថាន ដូចជា​ការ​ទន្ទ្រាន​យក​ដីព្រៃ និងការដឹកជញ្ជូនឈើក្នុងតំបន់ការពារធម្មជាតិ និង​បង្ក​ផល​ប៉ះពាល់ដ​ល់​សហគមន៍​ជនជាតិ​ដើម​ភាគតិចជាដើម»។

​អ្នក​សម្រប​សម្រួល​គម្រោង​​នៃ​សមាគម​បណ្ដាញ​យុវជន​កម្ពុជា លោក អូត​ ឡាទីន បាន​​ឲ្យ​ដឹង​ថា​ ការ​រៀប​ចំ​កម្ម​វិធី​ទិវា​បរិស្ថាន​តាម​ប្រព័ន្ធ​អន​ឡាញ​គឺ​ជា​ការ​បត់​បែន​ និង​ស្រប​តាម​កាលៈ​ទេសៈ​ជាក់​ស្ដែង​ខណៈ​កម្ពុជា​កំពុង​មាន​ការ​រីក​រាល​ដាល​នៃ​ជំងឺ​កូវីដ​១៩​៖ «ខ្ញុំ​យល់​ថា​ ការ​រៀប​ចំកម្មវិធី​ទិវា​បរិស្ថាន​ តាម​អន​ឡាញ​ក្នុង​ឆ្នាំ​នេះ​ គឺ​ជា​ការ​បត់​បែន​ខ្ពស់​ស្រប​តាម​ស្ថាន​ការណ៏​ជាក់​ស្ដែង​ នៃ​ការ​រីក​រាល​ដាល​ នៃ​ការ​ឆ្លង​វីរុស​កូវីត​-១៩​ដែល​យើង​មិន​អាច​ជួប​ជុំ​គ្នាបា​ន​» ។

លោក​បន្ត​ថា​ ការ​រៀប​ចំ​ទិ​វា​បរិស្ថាន​នេះ​គឺ​ជា​ការ​ចូល​រួម​ចំណែក​ក្នុង​ការ​ផ្សព្វ​ផ្សាយ​ ចំណេះ​ដឹង​អំពី​បរិស្ថាន​ ទៅ​កាន់​ប្រជា​ពលរដ្ឋ​ទូទៅ​ និង​លើក​ឡើង​ពី​ក្ដី​បារម្ភ​របស់​ពួក​គេ​ ជុំ​វិញ​ការ​បំពុល​បរិស្ថាន​ ការ​កាប់​បំផ្លាញ​ព្រៃឈើ​ និង​ជម្រុញ​ឱ្យ​មាន​ការ​អនុវត្ត​ច្បាប់​ប្រកប​ដោយ​ប្រសិទ្ធ​ភាព​ និង​បញ្ឈប់​ការ​ចោទ​ប្រកាន់​ទៅ​លើ​ក្រុម​សកម្មជន​ដែល​ការ​ពារ​ធន​ធាន​ធម្មជាតិ​ និង​បរិស្ថាន​រួម​ជា​មួយ​នឹង​ការ​បើក​ចំហរ​សេរី​ភាព​ដល់​សហគមន៍​មូល​ដ្ឋាន​ក្នុង​ការ​ចុះ​ល្បាត​ និង​ការ​ពារ​ព្រៃឈើ​ដែល​ជា​សម្បត្តិ​របស់​យើង​ទាំង​អស់​គ្នា​។

បើ​តាម​លោក​ អូត​ ឡា​ទីន​ ការ​ប្រារព្ធ​ទិវា​បរិស្ថាន​ពិភព​លោក​នេះ​ ត្រូវ​​បាន​រៀប​ចំ​ឡើង​តាំង​ពីឆ្នាំ​២០១២​មក​ម្ល៉េះ ប៉ុន្តែ​ពីរ​ឆ្នាំ​ចុង​ក្រោយ​នេះ ទិវាបរិស្ថានពិភពលោក​ត្រូវ​បាន​រៀប​ចំឡើង​​ដោយ​មិន​មាន​ការ​ជូប​ជុំនោះទេ ដោយសារតែ​​ស្ថាន​ភាព​កូវីដ​១៩​​មិនទា​ន់​មាន​ភាព​ធូរស្រាល​នៅ​ឡើយ​។

​​​Newsroom Cambodia មិន​អាច​សុំ​ការ​អធិ​ប្បាយ​ពី​លោក​ នេត ភក្រ្តា​ ​អ្នក​នាំ​ពាក្យ​ក្រសួង​បរិស្ថាន​បាន​ទេ ​​​​ដោយ​លោកប្រាប់​ថា ​លោក​កំពុងជាប់​ប្រជុំ​។

ក្រសួង​បរិស្ថានក៏​បាន​ចេញ​សេចក្តី​ជូន​ដំណឹង​មួយ​​​​​នៅ​ថ្ងៃ​ទី​៣១ ខែ​ឧសភា ឆ្នាំ​២០២១ បញ្ជាក់​ពី​ការ​​រៀប​ចំ​ប្រារព្ធ​ទិវា​បរិស្ថាន​ជាតិ​ និង​បរិស្ថាន​ពិភព​លោក​៥​មិថុនា​នេះ​ ក្រោម​ប្រធាន​បទ ​«ជីវៈ​ចម្រុះ​ និង​សុខភាព​មនុស្ស​» ដោយ​ប្រើប្រាស់​បណ្ដាញ​សង្គម​ទាំង​អស់​ដែល​ខ្លួន​មាន៕​