សួស ធីតា (Sours Thida) – Newsroom Cambodia

ក្រសួងសេដ្ឋកិច្ច៖ ថវិកា៤០% ពីការលក់លេខយានយន្ដពិសេសនឹងចូលកាកបាទក្រហមកម្ពុជា

សួស ធីតា (Sours Thida) — Mon, 12 Oct 2020 03:18:50 +0000

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ក្នុងរបាយការណ៍កាលពីពេលថ្មីៗនេះថា ថវិកា៤០ភាគរយពីការលក់លេខយានយន្ដពិសេសផ្ទាល់ខ្លូន នឹងត្រូវយកមកចូលមូលនិធិកាត់បន្ថយភាពក្រីក្ររបស់កាកបាទក្រហមកម្ពុជា ដែលជាផ្នែកមួយនៃវិធានការពង្រឹងកៀរគរចំណូលមិនមែនសារពើពន្ធក្នុងអំឡុងពេលវិបត្តិជំងឺកូវីដ ១៩។

យោងតាមរយៈរបាយការណ៍ស្ដីពីលទ្ធផលនៃការអនុវត្តថវិកាឆមាសទី១ និងលទ្ធផលប៉ាន់ស្មាននៃការអនុវត្តថវិកាឆ្នាំ២០២០ របស់ក្រសួងសេដ្ឋកិច្ច និងហិរញ្ញវត្ថុបញ្ជាក់ថា នេះគឺជាគោលការណ៍ពីលោកនាយករដ្ឋមន្រ្ដី ហ៊ុន សែន ចុះថ្ងៃទី៣ ខែមេសា ឆ្នាំ២០២០។

របាយការណ៍នោះបានបន្ថែមថា៖ «រីឯប្រាក់ដែលនៅសេសសល់បង់ចូលថវិការដ្ឋ និងដកមួយចំនួនសម្រាប់ការពង្រឹងយន្តការនៃការប្រមូលចំណូល។ ការប៉ាន់ស្មានចំណូលថ្មីនេះ អាចបង់ចូលថវិការដ្ឋប្រមាណ៩,០០០ លានរៀល ហើយចំណូលនេះមិនមានគ្រោងក្នុងច្បាប់ហិរញ្ញវត្ថុទេ»។

គួររំលឹកផងដែរថា ចាប់ពីដើមឆ្នាំ២០២០ រហូតមកដល់បច្ចុប្បន្ន ក្រសួងសាធារណការ និងដឹកជញ្ជូនបានប្រកាសថា រកបានចំណូលប្រមាណ៦លានដុល្លារ ចូលជាថវិការដ្ឋក្នុងរយៈពេល៩ខែ តាមរយៈការលក់ស្លាកលេខយានយន្ដពិសេសផ្ទាល់ខ្លួន៕

ដោយសារជំងឺកូវីដ ចំណូលរដ្ឋពីការនាំចូលយានយន្តថយចុះ៣១,៥ ភាគរយ

សួស ធីតា (Sours Thida) — Mon, 12 Oct 2020 02:29:45 +0000

ការរីករាលដាលជាសកលនៃជម្ងឺកូវីដ ១៩ បានធ្វើឲ្យចំណូលពីការនាំចូលយានយន្ត និងគ្រឿងចក្រ ថយចុះ ៣១,៥% ពិន្ទុភាគរយ ក្នុងឆ្នាំ២០២០នេះ ធៀបនឹងរយៈពេលដូចគ្នាឆ្នាំមុន គ្រាដែលការនាំចូលរថយន្ដបានថយចុះ២៦,៨ភាគរយនៅឆមាសទី១។ នេះយោងតាមរបាយការណ៏ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះ។

ចំណូលគយ និងរដ្ឋាករអនុវត្តបានចំនួន ៤ ៩៦០ ៤៥៥ លានរៀល ឬស្មើនឹង ៤២,៦% នៃច្បាប់ហិរញ្ញវត្ថុ គឺទាបជាង ២២,៥ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០១៩ ដែលអនុវត្តបាន៦៥,១% នៃច្បាប់ហិរញ្ញវត្ថុ។ បើគិតជាសាច់ប្រាក់ ចំណូលគយ និងរដ្ឋាករបានថយចុះ ១៦,២% ធៀបនឹងរយៈពេលដូចគ្នាក្នុងឆ្នាំ២០១៩។

របាយការណ៍ បានបញ្ជាក់ថា «ការថយចុះនៃចំណូលនេះ គឺបណ្ដាលមកពីការផ្ទុះឡើង និងការរីករាលដាលជាសកលនៃជម្ងឺកូវីដ ១៩ ដែលបង្កអោយមានផលប៉ះពាល់ធ្ងន់ធ្ងរដល់សេដ្ឋកិច្ច ការរាំងស្ទះដល់ខ្សែច្រវាក់ផ្គត់ផ្គង់ទំនិញ និងការធ្លាក់ចុះតម្រូវការមុខទំនិញមួយចំនួនជាពិសេសយានយន្ត ដែលជាប្រភពចំណូលគយដ៏សំខាន់»៕

ខេមបូចាបង្ហាញការបារម្ភពីការរិតត្បិតសេរីភាពសារព័ត៌មានក្រោយលោក សុវណ្ណ រិទ្ធី ត្រូវបានកាត់ទោស

សួស ធីតា (Sours Thida) — Tue, 06 Oct 2020 08:37:47 +0000

(ភ្នំពេញ)៖ បន្ទាប់ពីលោក សុវណ្ណ រិទ្ធី អតីតនិពន្ធនាយក TVFB ត្រូវបានដោះលែងក្រោមការព្យួរទោសពីបទ «ញុះញង់ឲ្យមានចលាចលក្នុងសង្គម» ក្រោយជាប់ឃុំអស់រយៈពេលជាង៥ខែ សម្ព័ន្ធអ្នកសារព័ត៌មានកម្ពុជា (ខេមបូចា) បានសម្តែងការព្រួយបារម្ភលើសេរីភាពសារព័ត៌មាន និងថា នេះជាការគំរាមកំហែងដល់ការបន្តប្រើប្រាស់សេរីភាពអ្នកសារព័ត៌មានដែលកំពុងបំពេញវិជ្ជាជីវៈ។

ការចេញសេចក្តីព្រួយបារម្ភរបស់ខេមបូចា ធ្វើឡើងបន្ទាប់ពីសាលាដំបូងរាជធានីភ្នំពេញបើកសវនាការជំនុំជម្រះ ដោយសម្រេចផ្ដន្ទាទោសអតីតអគ្គនាយកសារព័ត៌មាន TVFB រូបនេះដាក់ពន្ធនាគាររយៈពេល១៨ខែ។ ចៅក្រមបានប្រកាសដោះលែងលោក សុវណ្ណ រិទ្ធី មកត្រឹមការអនុវត្តទោសទោសក្នុងពន្ធនាគារតែ៥ខែ ២៨ ថ្ងៃ ហើយទោសសេសសល់គឺត្រូវព្យួរ។

ក្នុងសេចក្ដីប្រកាសព័ត៌មានរបស់សម្ព័ន្ធអ្នកសារព័ត៌មានកម្ពុជា (ខេមបូចា) ចេញនៅថ្ងៃទី៥ ខែតុលា ឆ្នាំ២០២០ នេះបញ្ជាក់ថា ខេមបូចាសម្ដែងការព្រួយបារម្ភក្រោយពេលសាលាដំបូងរាជធានីភ្នំពេញបានប្រើក្រមព្រហ្មទណ្ឌកាត់ទោសឲ្យលោក សុវណ្ណ រិទ្ធី អតីតនិពន្ធនាយកសារព័ត៌មាន TVFB មានទោសជាប់ពន្ធនាគារ១៨ខែ ទោះបីជាទោសនេះត្រូវបានប្រកាសព្យួរ។

«សម្ព័ន្ធអ្នកសារព័ត៌មានកម្ពុជា (ខេមបូចា) ស្វាគមន៍ការប្រកាសដោះលែងលោក សុវណ្ណ រិទ្ធី អោយមានសេរីភាពឡើងវិញ។ ទោះជាយ៉ាងណា ខេមបូចាមានការខកចិត្តចំពោះការកំណត់អោយលោក សុវណ្ណ រិទ្ធី មានទោសដាក់ពន្ធនាគាររហូតដល់ទៅ១៨ខែ»។

ខេមបូចាបន្ថែមថា ករណីរបស់លោក សុវណ្ណ រិទ្ធី គឺជាករណីទី១ ដែលអ្នកយកព័ត៌មានត្រូវបានកាត់ឲ្យមានទោសក្នុងអំឡុងពេលដែលគាត់រាយការណ៍ពីកូវីដ១៩ ហើយថា នេះបង្ហាញពីការគំរាមកំហែងដល់ការបន្តប្រើប្រាស់សេរីភាពអ្នកសារព័ត៌មានដែលកំពុងបំពេញវិជ្ជាជីវៈផេ្សងទៀត ដែលកំពុងរាយការណ៍ពីការរាលដាលជំងឺកូវីដ១៩។

សេចក្តីប្រកាសព័ត៌មានរបស់ខេមបូចាដដែល បានស្រង់សម្តីរបស់នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ណុប វី ថា៖ «លោក សុវណ្ណ រិទ្ធី គ្រាន់តែបានប្រើប្រាស់តួនាទីរបស់គាត់ជាអ្នកសារព័ត៌មានម្នាក់ ដោយស្រង់សម្ដីរបស់ប្រភពមកផ្សព្វផ្សាយ ដូច្នេះការដាក់ទោសលើអ្នកសារព័ត៌មានដោយប្រើប្រាស់ក្រមព្រហ្មទណ្ឌគឺនៅតែជាការគំរាមកំហែង និងបង្កើតអោយមានការភ័យខ្លាចដល់អ្នកសារព័ត៌មានផ្សេងទៀត ហើយឆ្លុះបញ្ចាំងថាច្បាប់ស្ដីពីរបបសារព័ត៌មានមិនត្រូវបានយកមកអនុវត្ត»។

ខេមបូចាក៏បានអំពាវនាវ និងស្នើសុំឲ្យតុលាការទម្លាក់ចោលបទចោទប្រកាន់ទាំងឡាយប្រឆាំងអ្នកសារព័ត៌មានផ្សេងទៀត និងអំពាវនាវទៅដល់ក្រសួងព័ត៌មានផ្ដល់ជូនឡើងវិញនូវអាជ្ញាប័ណ្ណមជ្ឈមណ្ឌលផ្សព្វផ្សាយ TVFB ជូនដល់លោក សុវណ្ណ រិទ្ធីដើម្បីឲ្យគាត់អាចបន្តអាជីពជាអ្នកសារព័ត៌មានបានជាបន្តទៀត។

លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញ បដិសេធមិនធ្វើអត្ថាធិប្បាយ ដោយប្រាប់ថារវល់ប្រជុំ។

ចាប់ពីខែមេសាមក យ៉ាងហោចណាស់មានអ្នកសារព័ត៌មានចំនួន៣នាក់ ត្រូវបានចាប់ខ្លួនដោយសារការបង្ហោះសារលើបណ្តាញសង្គមហ្វេសប៊ុក ការសរសេរ ឬការរាយការណ៍តាមបណ្តាញសង្គមមួយនេះ។ ក្នុងនោះមានលោក សុវណ្ណ រិទ្ធី លោក សុខ ឧត្តម ដែលជាអ្នកសារព័ត៌មាននៅខេត្តកំពង់ឆ្នាំង និងចុងក្រោយ គឺលោក រស់ សុឃិត ចាងហ្វាងសារព័ត៌មានជាតិខ្មែរ៕

កម្ពុជាបានចំណូលប្រមាណ៦លានដុល្លារ ពីការលក់ស្លាកលេខពិសេស ខណៈដាក់ចេញប័ណ្ណបើកបរអន្ដរជាតិលើកដំបូង

សួស ធីតា (Sours Thida) — Sun, 04 Oct 2020 14:47:25 +0000

ភ្នំពេញ៖ រដ្ឋមន្រ្ដីក្រសួងសាធារណការ និងដឹកជញ្ជូន លោក ស៊ុន ចាន់ថុល បានប្រកាសថា រកបានចំណូលប្រមាណ៦លានដុល្លារ ចូលជាថវិការរដ្ឋក្នុងពេល៩ខែ តាមរយៈការលក់ស្លាកលេខយានយន្ដពិសេសផ្ទាល់ខ្លួន ខណៈដែលកម្ពុជាដាក់ចេញប័ណ្ណបើកបរអន្ដរជាតិជាលើកដំបូង។

រូបភាពស្លាកលេខពិសេសលើគេហទំព័រក្រសួងសាធារណការ និងដឹកជញ្ជូន

ថ្លែងក្នុងពិធីសម្ពាធដាក់ឲ្យដំណើរការជាផ្លូវការប្រព័ន្ធស្វ័យប្រវត្តិកម្មផ្ទេរកម្មសិទិ្ធយានជំនិះ និងមណ្ឌលផ្ដល់សេវាសាធារណៈថ្មី នាថ្ងៃទី ៣០ ខែកញ្ញា ឆ្នាំ២០២០ នៅផ្សារទំនើបជីបម៉ុងណូរ៉ូម៉ល លោក ស៊ុន ចាន់ថុល មានប្រសាសន៍ថាថវិកានេះគឺចាប់រាប់ពីដើមខែមករា ដល់ខែកញ្ញា។

លោកបន្ថែមថា៖ «ក្នុងរយៈពេល៩ខែនេះ ក្រសួងបានលក់ស្លាកលេខរថយន្ដផ្ទាល់ខ្លូនជាង ២,០០០ គ្រឿងដោយប្រមូលបានជាង ៦លានដុល្លារ។»

ឆ្លៀតក្នុងឱកាសនោះ លោក ក៏បាននិយាយផងដែរថា៖ «ការដាក់លក់ស្លាកលេខពិសេសផ្ទាល់ខ្លួននេះ គឺជាការឆ្លើយតបទៅនឹងតម្រូវការរបស់ប្រជាពលរដ្ឋអ្នកប្រើប្រាស់រថយន្ដ។ ការដាក់ដំណើរនេះ គឺជាមធ្យោបាយបង្កើតនូវប្រាក់ចំណូលដែលនឹងជួយទ្រទ្រង់ដល់សេដ្ឋកិច្ចជាតិ។»

នៅថ្ងៃដដែលនោះដែរ លោករដ្ឋមន្រ្ដី ក៏បានធ្វើការណែនាំពីប័ណ្ណបើកបរអន្ដរជាតិ ដោយបានប្រកាសថាវាគឺជាថ្ងៃដំបូងដែលកម្ពុជាចាប់ផ្ដើមដាក់ចេញប័ណ្ណបើកបរអន្ដរជាតិដែលអ្នកបើកបរអាចប្រើប្រាស់ដើម្បីបើកបរក្នុង ៩៩ប្រទេស៕

អ្នកសារព័ត៌មានត្អូញត្អែរពីផលលំបាកក្នុងការទទួលព័ត៌មានអំឡុងពេលរាលដាលជំងឺកូវីដ១៩

សួស ធីតា (Sours Thida) — Tue, 29 Sep 2020 08:29:32 +0000

(ភ្នំពេញ)៖ ក្នុងទិវាអន្ដរជាតិសម្រាប់សិទិ្ធទទួលព័ត៌មានជាសកល ឆ្នាំ២០២០ អ្នកធ្វើការពាក់ព័ន្ធនឹងវិស័យសារព័ត៌មាននាំគ្នាលើកឡើងអំពីផលវិបាកក្នុងការទទួលបានព័ត៌មានពីមន្រ្តីរដ្ឋាភិបាល។

នៅថ្ងៃទី ២៨ ខែកញ្ញា ឆ្នាំ២០២០នេះ អង្គការយូណេស្កូ ប្រចាំកម្ពុជា បានប្រារព្ធទិវាអន្ដរជាតិសម្រាប់សិទិ្ធទទួលព័ត៌មានជាសកល ពាក់ព័ន្ធនឹងសិទិ្ធទទួលព័ត៌មាននៅពេលមានវិបត្តិ ក្រោមពាក្យស្លោកមួយឃ្លា «សិទ្ធិទទួលព័ត៌មាន៖ សង្គ្រោះជីវិត កសាងទំនុកចិត្ត នាំមកនូវក្ដីសង្ឃឹម!»។

ក្នុងកម្មវិធីនេះមានការបង្ហាញពីតួនាទីសំខាន់នៃការទទួលបានព័ត៌មានក្នុងការជួយសង្គ្រោះជីវិត និងកាត់បន្ថយផលប៉ះពាល់នៃវិបត្តិដូចជាការរាតត្បាតនៃជំងឺកូវីដ-១៩ នាពេលបច្ចុប្បន្ន និងក្នុងការរៀបចំគោលនយោបាយប្រកបដោយចីរភាព។

លោក ណុប វី នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា (CamboJA) បានថ្លែងក្នុងកិច្ចពិភាក្សានៃការប្រារព្ធទិវានេះ ដោយលើកឡើងអំពីឧបសគ្គ និងបញ្ហាប្រឈមរបស់អ្នកសារព័ត៌មានក្នុងការទទួលបានព័ត៌មានអំឡុងពេលនៃការរាតត្បាតជំងឺកូវីដ១៩។

លោកបញ្ជាក់ថា៖ «កាលពីខែមេសាយើងបានរៀបចំកិច្ចសហការជាមួយអង្គការយូណេស្កូក្នុងការស្ទង់មតិ។ ជាលទ្ធផលបង្ហាញថា៨០ភាគរយនៃការស្ទង់មតិឃើញថា អ្នកសារព័ត៌មានជួបបញ្ហាលំបាកក្នុងការធ្វើបទសម្ភាសន៍ជាមួយអ្នកជំនាញផ្នែកសុខាភិបាលក៏ដូចជាភ្នាក់ងារមន្រ្ដីរាជរដ្ឋាភិបាល ទាក់ទងនឹងជំងឺកូវីដ១៩»។

លោក ណុប វី បានបន្តថា ទាក់ទងនឹងព័ត៌មានរសើបដែលមន្រ្ដីរដ្ឋាភិបាលមានការប្រុងប្រយ័ត្នក្នុងការឆ្លើយតប និងពន្យារពេលផ្ដល់ព័ត៌មានដែលធ្វើឲ្យអ្នកសារព័ត៌មានខកខានក្នុងការចុះផ្សាយជូនប្រជាពលរដ្ឋ។

អំឡុងពេលរាតត្បាតជំងឹកូវីដ១៩ ៩៤ភាគរយនៃអ្នកសារព័ត៌មានភាគច្រើនពឹងផ្អែកលើសេចក្ដីថ្លែងការណ៍របស់រាជរដ្ឋាភិបាលក្នុងការទទួលបានព័ត៌មាន។ តាមការស្ទង់មតិ៦២ភាគរយនៃអ្នកសារព័ត៌មានពឹងផ្អែកលើប្រព័ន្ធផ្សព្វផ្សាយរបស់រដ្ឋ។ ការស្ទង់មតិចុងក្រោយនេះបង្ហាញថា ៥៨ភាគរយនៃអ្នកសារព័ត៌មាន គឺព្រួយបារម្ភនិងខ្លាចរអារពីការចោទប្រកាន់ផ្នែកផ្លូវច្បាប់ពីព័ត៌មានដែលគាត់យកមកផ្សព្វផ្សាយ។ នេះបើតាមការថ្លែងរបស់លោក ណុប វី។

អ្នកនាង ឡុង គីមម៉ារីតា អ្នកសារព័ត៌មានកាសែតភ្នំពេញប៉ុស្ដិ៍ ក៏បានប្រាប់ Newsroom អំពីផលលំបាករបស់ខ្លួនដែរថា៖ «អំឡុងពេលផ្ទុះនៃជំងឺកូវីដ១៩ដំបូង គឺធ្វើឲ្យអ្នកសារព័ត៌មានពិបាកចុះទៅសម្ភាសន៍ និងទាក់ទងប្រភពផ្ទាល់។ បញ្ហាខ្លះដែលហួសពីសេចក្ដីថ្លែងការណ៍គឺពិបាកស្វែងរកប្រភព និងរកព័ត៌មានដែលគេព្យាយាមលាក់បាំង»។

អ្នកនាងបន្ថែមថា មន្រ្ដីរាជរដ្ឋាភិបាលក៏ដូចជាមន្រ្ដីសាធារណៈ គួរតែបន្ទន់ឥរិយាបថជាមួយការស្វាគមអ្នកសារព័ត៌មាន ដោយកុំចាត់ទុកអ្នកកាសែតជាសត្រូវ ព្រោះរាល់សំនួរគឺដើម្បីផ្ដល់ជាព័ត៌មានមួយជាក់លាក់ជូនដល់ប្រជាពលរដ្ឋ និងសង្គមជាតិ។

ឆ្លើយតបទៅនិងការលើកឡើងខាងលើ លោក មាស សុភ័ណ្ឌ អ្នកនាំពាក្យក្រសួងព័ត៌មានបានថ្លែងក្នុងកិច្ចពិភាក្សាថា កន្លងមកក្រសួងព័ត៌មាន និងក្រសួងមហាផ្ទៃមានការប្រកាសរួមមួយស្ដីពីការបង្កើតមន្រ្ដីអ្នកនាំពាក្យថ្នាក់ក្រោមជាតិ បន្ថែមលើអ្នកនាំពាក្យថ្នាក់ជាតិ។

«រាជរដ្ឋាភិបាលកម្ពុជាបានយកចិត្តទុកដាក់បំផុត ដោយបានរៀបចំការផ្ដល់ព័ត៌មានទៅអ្នកសារព័ត៌មានតាមរយៈការបង្កើតអង្គភាពអ្នកនាំពាក្យរាជរដ្ឋាភិបាលដោយមានស្មើភាព ពីគ្រប់ស្ថាប័នភាគីពាក់ព័ន្ធ និងការបើកសន្និសីទសារព័ត៌មានរៀងរាល់សប្ដាហ៍។»

ចំណែកលោក លី សូវ៉ាន់ អ្នកនាំពាក្យក្រសួងសុខាភិបាល ថ្លែងក្នុងកិច្ចពិភាក្សានោះដែរថា៖ «ទាក់ទងនឹងព័ត៌មានរសើប ដោយសារតែព័ត៌មានមិនទាន់ច្បាស់ការណ៍ ដូច្នេះយើងមិនអាចបញ្ចេញបានទេ។ ប៉ុន្តែប្រសិនបើករណីដែលព័ត៌មានច្បាស់ហើយ យើងនឹងធ្វើសេចក្ដីប្រកាសតាមរយៈក្រសួងសុខាភិបាលជូនដល់សាធារណជន និងអ្នកសារព័ត៌មាន»។

ក្នុងកិច្ចពិភាក្សានោះក៏បានលើកឡើងថា អំឡុងពេលរាតត្បាតជំងឺកូវីដ១៩នេះ មិនត្រឹមតែអ្នកសារព័ត៌មានទេដែលប្រឈមនឹងបញ្ហាក្នុងការទទួលបានព័ត៌មាន ប៉ុន្តែស្រ្ដី ជនជាតិភាគតិច និងជនពិការ ក៏ជួបបញ្ហាក្នុងការទទួលបានព័ត៌មានផងដែរ៕

តើការរំលោភបំពានលើស្រ្ដីពិតជាបណ្ដាលមកពីកត្តាស្លៀកពាក់ ឬយ៉ាងណា?

សួស ធីតា (Sours Thida) — Thu, 24 Sep 2020 07:37:46 +0000

ករណីរំលាភសេពសន្ថវៈលើស្រ្ដី និងកុមារីក្នុងសង្គមខ្មែរបច្ចុប្បន្នមានការកើនឡើងគួរឲ្យព្រួយ។ ទន្ទឹមនឹងនោះ មានការលើកឡើងថា ការស្លៀកពាក់ស៊ិចស៊ីជាមូលហេតុដែលនាំឲ្យមានការរំលោភ។

ក្នុងករណីរំលោភមួយដែលធ្វើឲ្យប្រជាពលរដ្ឋភ្ញាក់ផ្អើលខ្លាំងនោះ គឺករណីរំលោភសម្លាប់ក្មេងស្រីអាយុ១៤ឆ្នាំម្នាក់នៅក្នុងបន្ទប់ជួលនៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី០១ ខែកញ្ញា ឆ្នាំ២០២០ កន្លងទៅនេះ។ ជនរងគ្រោះត្រូវបានឃាតករដែលជាអ្នកជិតខាងអារ ក សម្លាប់រួចរំលោភតាមក្រោយ ខណៈពេលម្ដាយជនរងគ្រោះបានទៅផ្សារវេលាម៉ោង ៣:១៥ រសៀល។

ករណីរំលោភខាងលើ ជនសង្ស័យបានសារភាពពីគ្រប់សកម្មភាពដែលខ្លួនបានប្រព្រឹត្ត ហើយចម្លើយសារភាពនេះក៏ស៊ីសង្វាក់ជាមួយភស្តុតាងទាំងអស់នៅកន្លែងកើតហេតុ ដែលបានដកហូតយកមករក្សាទុកផងដែរ។ នេះបើតាមការបញ្ជាក់របស់នាយកប្រតិបត្តិអង្គភាពការពារកុមារ តាមរយៈបណ្ដាញសង្គមហ្វេសប៊ុក។

ករណីរំលោភកុមារីនេះ បានបង្កើតជាចម្ងល់ថា តើការស្លៀកពាក់ពិតជាកត្តាធ្វើឲ្យមានការរំលោភពិតមែន ឬយ៉ាងណា?

បន្ទាប់ពីមានការចោទជាចម្ងល់ហើយក្នុងនោះ កញ្ញា បុណ្យ រចនា នាយិកាអង្គការក្លាហាន បានលើកឡើងថា ទស្សនៈដែលលើកឡើងថាការស្លៀកពាក់ខ្លីជាមូលហេតុនៃការរំលោភ គឺការខុសឆ្គងដែលមិនបានឆ្លុះបញ្ចាំងឬសគល់បញ្ហាអោយពិតប្រាកដទេ។

«ការលើកឡើងនេះធ្វើអោយស្ថានភាពបញ្ហានេះកាន់តែដុនដាមថែមមួយកម្រិតទៀត ពីព្រោះវាជាការរំលោភបំពានសិទ្ធិសេរីភាពរបស់ស្រ្ដីក្នុងការសម្រេចចិត្តការស្លៀកពាក់»។

ចំណែកអ្នកស្រី មួង កញ្ញា ប្រធានគម្រោងរបស់អង្គការនារីដើម្បីសន្តិភាព (Women Peace Maker) និងជាម្ចាស់គម្រោងជួយដល់ស្រ្ដីនៅតាមសហគមន៍ លើកឡើងថា ស្រ្ដីមួយចំនួននៅខ្វះខាតចំណេះដឹង និងភាពក្លាហានដើម្បីរកសិទ្ធិសេរីភាពរបស់ខ្លួននៅពេលជួបប្រទះបញ្ហា ដោយសារបារម្ភអំពីភាពអសោចកេរ្ដិ៍ ជាជាងការនិយាយចេញមក។

អ្នកស្រីបានស្នើទៅគ្រប់ភាគីពាក់ព័ន្ធឲ្យបញ្ឈប់ការបន្ទោសជនរងគ្រោះថារងការរំលោភបំពានដោយសារការស្លៀកពាក់។

«ស្នើសុំបញ្ឈប់ការបន្ទោសទៅលើជនរងគ្រោះដោយសារគាត់ស្លៀកខ្លី ដើរលេងយប់ នៅពេលគាត់ទទួលរងការបៀតបៀនផ្លូវភេទ ដោយមិនដាក់គំនាបលើស្រ្ដី»។

អ្នកស្រី មួង កញ្ញា បន្ថែមថា កម្ពុជាមានច្បាប់ពាក់ព័ន្ធនឹងអំពើហិង្សាក្នុងគ្រួសារ ប៉ុន្តែអ្នកស្រីថាច្បាប់នេះចែងទូលាយ ដោយមិនបានពន្យល់អំពីការបៀតបៀន ហើយនៅពេលជនរងគ្រោះគួរធ្វើដូចម្តេចនៅពេលដែលពួកគេជួបបញ្ហាជាដើម។

«ពេលខ្លះឃើញក្នុងច្បាប់បានចែងថា ភាគីរំលោភអាចសងសំណងជាទឹកប្រាក់ដែលធ្វើឲ្យអ្នកប្រព្រឹត្តគិតថាយកលុយសងគេទៅបានហើយ ដូច្នេះច្បាប់គួរតែពង្រឹងឱ្យមានការយល់បន្ថែមទៅលើសង្គមទូទៅទាំងមូលដោយមានការបន្ថែមឱ្យពេញលេញ»។

ទន្ទឹមនឹងការកើតមានការរំលោភសេពសន្ថវៈ និងការប្រទាំងប្រទើសគ្នាលើការយល់ឃើញពាក់ព័ន្ធនឹងការស្លៀកពាក់របស់ស្រ្តីរងគ្រោះ កាលពីថ្ងៃទី១ ខែសីហា ឆ្នាំ២០២០ រដ្ឋាភិបាលក៏បានបង្កើតសេចក្តីព្រាងច្បាប់ថ្មីមួយស្តីពីសណ្តាប់ធ្នាប់សាធារណៈ ដោយក្នុងសេចក្តីព្រាងច្បាប់ដែលមាន៨ជំពូក និង៤៣មាត្រានោះ បានចែងអំពីការហាមឃាត់ស្រ្តីមិនឲ្យស្លៀកពាក់ស៊ិចស៊ីជ្រុលហួសហេតុ។

ក្នុងសេចក្ដីព្រាងច្បាប់នោះបានចែងថា ស្រ្ដីត្រូវបានហាមឃាត់ការស្លៀកពាក់ខ្លីពេក រហូតខើចលើខើចក្រោម ការស្លៀកពាក់ស្ដើងលេចកេរ្តិ៍ភេទ ឬការស្លៀកពាក់បង្ហាញផ្នែកខ្លះនៃកេរ្តិ៍ភេទ បុរសមិនត្រូវដោះអាវឱ្យខ្លួនទទេនៅទីសាធារណៈ ឬស្លៀកតែខោទ្រនាប់ដើម្បីបង្ហាញកេរ្តិ៍ខ្មាស។ រដ្ឋាភិបាលអះអាងថា គោលបំណងនៃសេចក្តីព្រាងច្បាប់នេះគឺដើម្បីរក្សាប្រពៃណីជាតិ និងសេចក្ដីថ្លៃថ្នូររបស់ប្រជាពលរដ្ឋ។

អ្នកស្រី មួង កញ្ញា លើកឡើងថា ការចេញសេចក្ដីព្រាងច្បាប់ថ្មីស្ដីពីសណ្ដាប់ធ្នាប់សាធារណៈ គឺកាន់តែក្លាយជាគំនាបសង្គមខ្លាំងទៅលើស្រ្តីខ្មែរ ដែលលោកស្រីថា នេះជាការបិទសិទ្ធិសេរីភាពទៅលើពួកគេ។ លោកស្រីបន្តថា គំនាបនេះអាចក្លាយជាបញ្ហាប៉ះពាល់ដល់សុខភាពផ្លូវចិត្តរបស់ស្រ្តីផងដែរ។

លោកស្រីក៏បានសំណូមពរទាក់ទងនឹងសេចក្ដីព្រាងច្បាប់ថ្មីនេះថា៖ «ក្រសួងពាក់ព័ន្ធ ឬច្បាប់ណាមួយគួរពិចារណាឡើងវិញ ដើម្បីកែសម្រួលចំណុចដែលទាក់ទងនឹងសេរីភាពនៃការស្លៀកពាក់ដើម្បីឱ្យស្រ្ដីមានសិទ្ធិសេរីភាពពេញលេញបង្ហាញពីសេរីភាព និងអារម្មណ៍របស់គាត់»។

អ្នកនាំពាក្យក្រសួងកិច្ចការនារីប្រាប់ Newsroom Cambodia ដោយសុំមិនបញ្ចេញឈ្មោះថា ករណីរំលោភដែលជនរងគ្រោះត្រូវបានគេចោទថាមកពីការស្លៀកពាក់ គឺគ្រាន់តែជាលេសរបស់ជនប្រព្រឹត្តតែប៉ុណ្ណោះ។

ក្នុងនោះលោកបានមានប្រសាសន៍ថា៖ «ការចោទប្រកាន់រឿងស្លៀកពាក់ខ្លីហ្នឹងគឺគ្រាន់តែជាលេសទេ ព្រោះការចោទប្រកាន់អីអស់ហ្នឹងសុទ្ធតែជាការយល់ឃើញរបស់មហាជនទេ ដូច្នេះតុលាការគេធ្វើតាមច្បាប់ដែលបានចែង»។ បើតាមរបាយការណ៍សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) ករណីរំលោភសេពសន្ថវៈមានចំនួន៩៣ករណី គិតពីខែមករា ដល់សីហា ឆ្នាំ២០២០នេះ ក្នុងនោះជនរងគ្រោះមានចំនួន៩៨នាក់។ បើធៀបនឹងឆ្នាំ២០១៩ ករណីរំលោភសរុបមានចំនួន១២៨ករណី ហើយក្នុងនោះជនរងគ្រោះមានចំនួន១៣៤នាក់៕

ជំនន់ទឹកភ្លៀង បង្កការខូចខាតដល់ដំណាំរាប់ពាន់ហិចតានៅខេត្តពោធិ៍សាត់

សួស ធីតា (Sours Thida) — Wed, 23 Sep 2020 08:22:30 +0000

ជំនន់ទឹកភ្លៀងបានបង្កការខូចខាតដល់ដំណាំកសិកម្មជាច្រើនហិចតា ប៉ះពាល់លំនៅដ្ឋាន និងរចនាសម្ព័នមួយចំនួន ខណៈដែលប្រជាជនរាប់រយគ្រួសារ ក៏ត្រូវបានជម្លៀសចេញដើម្បីរកទីទួលសុវត្តិភាពផងដែរ នៅក្នុងខេត្តពោធិ៍សាត់។នេះបើយោងតាមរបាយការណ៏ទឹកជំនន់ ចេញដោយអាជ្ញាធរខេត្តកាលពីថ្ងៃទី២១ ខែកញ្ញា ឆ្នាំ២០២០នេះ។

របាយការណ៍ដដែលបានបង្ហាញបន្ថែមថា រយៈពេលត្រឹម២ថ្ងៃចុងក្រោយនេះ ផលដំណាំប្រមាណ ៦០០ហិចតា ក្នុងខេត្តពោធិ៍សាត់ ត្រូវបានលិចលង់ ហើយផលដំណាំទាំងនោះ មានចំនួន៣១៨,៥ហិកតា នៅស្រុកវាលវែង ក្នុងឃុំប្រម៉ោយ ឃុំអន្លង់រាប ឃុំក្រពើពីរ និងឃុំអូរសោម។

នៅក្នុងពោធិ៍សាត់ មានការលិចផលដំណាំស្រូវចំនួន៨២៤ហិកតា និងនៅក្នុងស្រុកកណ្ដៀង មានការប៉ះពាល់ស្រូវស្រាល ចំនួន២៨៣ហិកតា។នេះបើយោងតាមរបាយដដែល។

ស្ថានភាពទឹកជំនន់នៅខេត្តពោធិ៍សាត់ រូបភាពដោយ៖ ក្រសួងធនធានទឹក និងឧតុនិយម

ក្រុងចំនួន៤ នៅខេត្តពោធិ៍សាត់ រួមមាន ក្រុងពោធិ៍សាត់ ស្រុកវាលវែង ស្រុកកណ្ដៀង ស្រុកភ្នំក្រវាញ ក៏បានរងការប៉ះពាល់ទៅលើហេដ្ឋារចនាសម្ព័ន្ធ ដែលបង្ខំឲ្យអោយប្រជាជនចំនួន១៨០គ្រួសារ ត្រូវជម្លៀសដើម្បីរកទីទួលសុវត្តិភាព។

សរុបមកត្រឹមថ្ងៃ២១ ខែកញ្ញា ឆ្នាំ២០២០ ទឹកជំនន់បានបំផ្លាញស្ពានចំនួន៤ និងផ្លូវចំនួន២០ខ្សែ នៅក្នុងក្រុង និងស្រុកចំនួន៤ នៃខេត្តពោធិ៍សាត់។

លោក កែវ វ័យ ប្រធានធនធានទឹក និងឧតុនិយមខេត្តពោធិ៍សាត់ បានផ្តល់បទសម្ភាសដល់ Newsroom Cambodia កាលពីថ្ងៃអង្គារ ទី២២ ខែកញ្ញា ឆ្នាំ២០២០ថា ស្ថានភាពទឹកនៅខេត្តពោធិ៍សាត់ មានលក្ខណៈធូរស្បើយច្រើន បើទោះកម្រិតទឹកនៅក្នុងក្រុង ជិតដល់កំរិតនឹងប្រកាសអាសន្នក្តី។

លោកបានបន្តថា៖ «កម្ពស់ទឹកស្ទឹងនៅភ្នំក្រវាញស្រកជាង២ម៉ែត្រ បើធៀបនឹងពេលមុនមានរយៈកម្ពស់៦,១២សង់ទីម៉ែត្រ ដែលបច្ចុប្បន្ននៅសល់៣,៥៦សង់ទីម៉ែត្រ រីឯក្រុងពោធិ៍សាត់មានរយៈកម្ពស់៥,៤៥សង់ទីម៉ែត្រ បច្ចុប្បន្នស្រក៥ហ៊ុន នៅត្រឹម៥,៤០សង់ទីម៉ែត្រ»។

គួរបញ្ជាក់ផងដែរថា ស្ថានភាពកម្ពស់ទឹកខេត្តពោធិ៍សាត់ក្នុងឆ្នាំនេះ គឺមានសភាពទឹកធំជាងបើប្រៀបធៀបទៅនឹងឆ្នាំមុន ដោយសារតែជន់ស្ទឹងទាំងបីផ្នែកខាងលើជាហេតុបណ្ដាលឲ្យជន់លិចមកក្រុងពោធិ៍សាត់ខ្លាំង។ នេះបើយោងតាមការរៀបរាប់របស់លោក កែវ វ័យ៕

លោក ម៉ែន លី ឡើងស្នងការកំពង់ធំ ជំនួសស្នងការចាស់ដែលមានរឿងអាស្រូវ

សួស ធីតា (Sours Thida) — Tue, 22 Sep 2020 04:47:46 +0000

ភ្នំពេញ៖ លោក ម៉ែន លី បានឡើងកាន់តំណែងស្នងការខេត្តកំពង់ធំជាផ្លូវការ កាលពីថ្ងៃទី២១ ខែកញ្ញា ឆ្នាំ២០២០នេះ ជំនួសលោក អ៊ុក កុសល ដែលបានអស់តំណែងនេះ ក្រោយត្រូវបានគេរកឃើញថា បានប្រព្រឹត្តអំពើប្រទូស្តកេរខ្មាសលើមន្រ្តីជាស្រ្តីនគរបាលរបស់ខ្លួន។

កាលពីខែសីហា ឆ្នាំ២០២០ មានពាក្យបណ្តឹងមកលើលោក អ៊ុក កុសល ថាបានបំពានកេរ្តិ៍ខ្មាស លើមន្ត្រីជាស្ត្រី ជាច្រើននាក់ ហើយក្រោយការស៊ើបអង្កេតដោយក្រសួងមហាផ្ទៃ គាត់ត្រូវបានគេដកដំណែងជាស្នងការ ហើយក៏ត្រូវបានបន្ថយឋានន្តរសក្តិពីថ្នាក់ឧត្តមសេនីយ៍ទោ (ផ្កាយ២) មកជាវរសេនីយ៍ឯក (សក្តិ៥) វិញផងដែរ។ នេះបើយោងតាមការផ្សាយរបស់សារព័ត៏មាន VoD។

គួររំលឹកថា ក្រុមអង្គការសង្គមស៊ីវិល ក៏បានសម្ដែងការមិនពេញចិត្តនឹងការដកតែដំណែងលោក អ៊ុក កុសល ពីស្នងការខេត្តកំពង់ធំ ហើយបានជំរុញឲ្យបញ្ជូនសំណុំរឿងនេះ ទៅតុលាការ ពីព្រោះករណីនេះ ជាបទល្មើសព្រហ្មទណ្ឌ។

នៅក្នុងពិធីប្រកាសផ្ទេរផ្លួវការក្នុងខេត្តកំពង់ធំ លោក នេត សាវឿន អគ្គស្នងការនគរបាលជាតិ បានស្នើឱ្យស្នងការថ្មី គឺលោក ម៉ែន លី អតីតស្នងការឧត្តរមានជ័យ អនុវត្តតាមសំដីរបស់លោកអភិបាលខេត្ត គឺត្រូវសហការ និងគោរព ឲ្យបានម៉ឺងម៉ាត់បំផុត។នេះបើយោងតាមទំព័រហ្វេសប៊ុកផ្លូវការក្រសួងមហាផ្ទៃ។

ដោយយោងតាមទំព័រហ្វេសប៊ុកដដែល លោក នេត សាវឿន បាននិយាយដូច្នេះថា «ជម្រុញឲ្យស្នងការថ្មី ត្រូវរួមគ្នាគិត រួមសហការគ្នា គិតពីបញ្ហាប្រយោជន៍ជាតិជាធំ ដើម្បីស្ដារកិត្តិយសនិងបំរើប្រជាពលរដ្ឋជាធំ។»

លោក ម៉ែន លី បានបដិសេធធ្វើអត្ថាធិប្បាយពេល Newsroom Cambodia ទូរស័ព្ទទៅកាលពីថ្ងៃទី២១ ខែកញ្ញាឆ្នាំ២០២០ ហើយ លោក អ៊ុក កុសល ក៏មិនអាចទាក់ទងបានដែរ៕

With safety measures in place, students and teachers return to tackle Covid-19 and national exams

សួស ធីតា (Sours Thida) — Sun, 20 Sep 2020 04:30:22 +0000

With national exams looming for ninth- and 12th-graders, students said they are past ready to shelve online learning and return to their classrooms.

Grade nine and 12 students returned to school in early September under strict guidelines from the Ministry of Education, Youth, and Sport, with officials juggling the need for test preparation with health and safety concerns.

“I call on all teachers and especially school officials to continue following the Standard Operating Procedures for hygiene to prevent the spread of Covid-19 and to ensure our students’ safety from the virus,” said Hang Chuon Naron, Minister of Education, Youth and Sport, referring to the ministry’s book of regulations.

State exams, postponed indefinitely in August, are a milestone in every high-school student’s career. Test scores influence university admissions and future employment opportunities. But distance learning comes with many challenges, and teachers and students say they have struggled in the new environment.

“If school remains closed, my hopes for the national exam will not be very high,” said Leang Titnita, a grade 12 student at Bak Touk High School in Phnom Penh. “Studying online is very difficult. I am always sleepy and lazy, and it’s difficult to concentrate on learning. But at school, I can study with friends and we can help explain the lessons to each other.”

Khieu Kannara, a grade 12 Khmer literacy teacher in Phnom Penh at Sisowath High School, had similar experiences. It was not uncommon, she said, for poor internet connections to disrupt online classes, and many students struggled with attendance.

“There was little hope for this year’s exam because of Covid-19,” she said. “Some of the students have not studied during the break, and we cannot control them all.”

The entrance gate at Bak Touk High School is now equipped with disinfectant spray as part of measures against Covid-19. (Vuth Chandara)

Schools nationwide are reopening in three phases. Phase 1 began in late August with the opening of about 20 “high-standard” private schools in Phnom Penh, Siem Reap, and Battambang. All are required to follow health and safety measures outlined by MoEYS, including fever checks, mandatory hand washing, social distancing and limited classroom sizes, among other measures.

Phase 2 began September 7 with the return of ninth and 12th graders, who will now sit for national exams on November 30 and December 21, respectively.

The third phase, for other grades and schools with minimum standards, has not yet been announced.

Only four provinces — Kratie, Stung Treng, Ratanakkiri and Mondulkiri — will reopen all grades because the risk of Covid-19 transmission is very low, according to Education Ministry spokesman Ros Soveacha.

At Bak Touk High School, sinks have been installed for hand washing (Vuth Chandara)

So far, said Leang Titnita, the 12th-grader at Bak Touk High, her campus has done well instituting the government’s new procedures.

“The school has three separate entrances to keep social distancing among students and staff,” she said. “The teachers’ entrance is the main one in the middle, while both side doors are for ninth- and 12th-grade students.”

Her classmates are doing well, too.

“My classmates are very careful,” she said. “Everyone carries alcohol and hand sanitizer around with them, they all wear their masks and spray alcohol on their tables and chairs before sitting down.”

For Yi Puththeary, a 12th-grade math teacher at Sisowath High, getting back to the classroom has once again upturned her schedule, after having adjusted to the demands of distance learning. But the reorganization is well worth it, she said.

“I’m worried about the spread of the virus,” she said. “But the upcoming grade nine and 12 national examinations are more important.”

អង្គការ សង្គមស៊ីវិល ជំរុញឲ្យបន្តករណីអតីតស្នងការកំពង់ធំ ទៅតុលាការ

សួស ធីតា (Sours Thida) — Mon, 14 Sep 2020 09:57:22 +0000

ភ្នំពេញ៖ ក្រុមអង្គការសង្គមស៊ីវិល បានសម្ដែងការមិនពេញចិត្តនឹងការដកតែដំណែងលោក អ៊ុក កុសល ពីស្នងការខេត្តកំពង់ធំ ពីបទប្រព្រឹត្តអំពើបៀតបៀនកេរខ្មាស លើមន្រ្តីនគបាលជាស្រ្តី ហើយបានជំរុញឲ្យបញ្ជូនសំណុំរឿងនេះ ទៅតុលាការ ពីព្រោះករណីនេះ ជាបទល្មើសព្រហ្មទណ្ឌ។

នាយករងទទួលបន្ទុកឃ្លាំមើល និងការពារសិទ្ធិមនុស្សអង្គការលីកាដូ លោក អំ សំអាត បាននិយាយថា ការដកឋានន្តរសក្តិនេះ មិនទាន់សាកសម នោះទេ ព្រោះនេះគ្រាន់ជាវិធានការរដ្ឋបាលនគរបាលជាតិប៉ុណ្ណោះ។

លោក អំ សំអាត បាននិយាយដូច្នេះថា៖ «ប៉ុន្តែបើយោងទៅតាមបណ្ដឹងរបស់ជនរងគ្រោះ សំណុំរឿងនេះទាក់ទងនឹងបទល្មើសព្រហ្មទណ្ឌប្រទូស្ដកេរខា្មស ដែលត្រូវបញ្ចូនទៅតុលាការដើម្បីអនុវត្តតាមផ្លូវច្បាប់បន្តទៀត»។

លោក បានបន្តថាសមត្ថកិច្ចគួរណាអនុវត្តតាមផ្លូវច្បាប់ ដើម្បីជាគំរូដល់អ្នកក្រោយផងដែរ។

នាយិកាអង្គការក្លាហាន កញ្ញា បុណ្យ រចនា បានលើកឡើងថាករណីខាងលើគួរបញ្ជូនសំណុំរឿងទៅតុលាការដើម្បីរកយុត្តិធម៌ដល់ជនរងគ្រោះ។

នាយិការូបនេះបានបន្តថា៖ «ជនរងគ្រោះបានរងគ្រោះរួចហើយ កិត្តិយស និងកេរ្តិ៍ឈ្មោះបានខូចខាត ហើយពេលសាធារណជន បានឃើញពាក្យបណ្ដឹងនោះ អ្វីដែលជនរងគ្រោះ ចង់បានគឺយុត្តិធម៌។ ការដែលមិនបញ្ជូនពាក្យបណ្ដឹងទៅតុលាការវិញទេ ដែលធ្វើអោយជនរងគ្រោះខូចកេរ្តិ៍ឈ្មោះ ស្របពេលដែល ជនប្រព្រឹត្តរូចខ្លួនពីសំណាញ់ច្បាប់»។

នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បាននិយាយថា ការខកខាន មិនបន្តនិតីវិធីតទៀតទៅតុលាការ បង្ហាញពីភាពអយុត្តិធម៌នៅក្នុងសង្គម។

លោកស្រី បានបន្ថែមថា៖ «ជាក់ស្ដែងករណីនេះចូលជាបទល្មើសព្រហ្មទណ្ឌ ចែងក្នុងមាត្រា២៤៦ បទប្រទូស្ដកេរខា្មស ដែលមានស្ថានទម្ងន់ទោសរហូតការជាប់ពន្ធធនាគារពី១ ទៅ៣ឆ្នាំ»។

លោកស្រី ចក់ សុភាព បាននិយាយបន្តថា៖ «ប៉ុន្តែពេលទទួលថាក្រសួងបានបញ្ចប់នីតិវិធីត្រឹមការវិន័យផ្នែករដ្ឋបាល បង្ហាញអោយឃើញពីការប្រាសចាក មើលស្រាលទៅលើនីតិវិធីច្បាប់ក្រមព្រហ្មទណ្ឌ និងនីតិវិធីដែលមានជាធរមានក្នុងប្រព័ន្ធយុត្តិធម៌»។

Newsroom Cambodia មិនទាន់អាចទាក់ទងសុំការអត្ថាធិប្បាយពីមន្ត្រីនគរបាលស្ត្រីជាជនរងគ្រោះបានទេ។

ការហៅទូរស័ព្ទទៅលោក អ៊ុក កុសល និងលោក ខៀវ សុភ័ក្រ អ្នកនាំពាក្យក្រសួងមហាផ្ទៃ មិនមានអ្នកលើកទេ នៅថ្ងៃទី១៤ ខែកញ្ញា ឆ្នាំ២០២០នេះ៕

Vox Pop: តើកូវីដ១៩ ប៉ះពាល់ប្រជាពលរដ្ឋក្នុងសេដ្ឋកិច្ចក្រៅប្រព័ន្ធដូចម្តេចខ្លះ?

សួស ធីតា (Sours Thida) — Thu, 10 Sep 2020 04:46:08 +0000

ជំងឺកូវីដ១៩ បានរាំងស្ទះដំណើរការអភិវឌ្ឍសេដ្ឋកិច្ចរបស់ប្រទេស និងប្រជាជនកម្ពុជា ចាប់តាំងពីបានផ្ទុះឡើងដំបូងនាដើមឆ្នាំ២០២០។ ដោយឡែក ពលរដ្ឋដែលប្រកបរបបក្នុងវិស័យសេដ្ឋកិច្ចក្រៅប្រព័ន្ធ ក៏បានរងផលប៉ះពាល់ពីជំងឺកូវីដ១៩ នេះដែរ។

ពលរដ្ឋមួយចំនួនប្រកបរបរក្នុងវិស័យសេដ្ឋកិច្ចក្រៅប្រព័ន្ធនៅរាជធានីភ្នំពេញ បានបញ្ជាក់ប្រាប់សិក្ខាកាមរបស់ Newsroom Cambodia ពីទស្សនៈរបស់ពួកគាត់ ចំពោះផលប៉ះពាល់ដោយសារកូវីដ១៩ ដូចខាងក្រោមនេះ។

….

អ្នកស្រីហេង (អង្គុយកណ្តាល)

អ្នកស្រីហេង អាយុ៥០ឆ្នាំ អ្នកលក់សៀវភៅ និងកាសែតនៅជាប់របងវិទ្យាល័យបឹងកេងកង បាននិយាយថា អ្នកស្រីផ្ទាល់បានទទួលរងផលប៉ះពាល់ធ្ងន់ធ្ងរណាស់ពីការរីករាលដាលនៃជំងឺកូវីដ១៩។

អ្នកស្រីនិយាយថា៖ «តាំងពីកូវីដចូលមក ខ្ញុំលក់ធ្លាក់ចុះទាំងស្រុង គឺលក់មិនដាច់ទេដោយសារតែគេបិទសាលា និងកន្លែងធ្វើការ»។

អ្នកស្រីបន្តថា៖ «ពេលកូវីដនេះ មួយថ្ងៃខ្ញុំអាចរកចំណូលបាន ជួនកាលថ្ងៃខ្លះ ពីរ ទៅបីម៉ឺន ជួនកាលបានតែបួន ប្រាំពាន់ ក៏មានដែរ»។

អ្នកស្រីបាននិយាយថា អ្នកស្រីពុំដែលបានទទួលប្រាក់ឧបត្ថម្ភអ្វីនោះទេពីរដ្ឋាភិបាល។

អ្នកស្រីថា៖ «ខ្ញុំអត់ដែលបានអីនឹងគេទេប័ណ្ណក្រីក្រអីក៏អត់ដែលបានដែរ»។ ជាចុងក្រោយ អ្នកស្រីបាន សំណូមពរទៅកាន់លោកនាយករដ្ឋមន្ត្រី ហ៊ុន សែនឲ្យបើកដំណើរការសាលាឡើងវិញ ព្រោះអតិថិជនរបស់អ្នកស្រីភាគច្រើន គឺជាសិស្សានុសិស្ស។

….

អ្នកស្រី ចាន់ណា

អ្នកស្រី ចាន់ណា វ័យ៣០ឆ្នាំ មុខរបរជាអ្នកលក់សៀវភៅនៅជាប់របងសាលាបឋមសិក្សាដូនពេញ បាននិយាយថា ផលប៉ះពាល់ចំពោះខ្លួនអ្នកស្រី គឺមិនមានអ្វីធ្ងន់ធ្ងរនោះទេ គ្រាន់តែប៉ះពាល់ចំណូលមួយភាគតូចប៉ុណ្ណោះ។ ចំពោះការចុះជួយអន្តរាគមន៍របស់រដ្ឋាភិបាល អ្នកស្រីបាននិយាយថាគាត់ពុំសូវដឹងនោះទេ ដោយហេតុថា ពេលព្រឹកចេញមកលក់ដូរ យប់ទើបបានត្រលប់មកផ្ទះវិញ។

អ្នកស្រី ចាន់ណា មិនមានជាសំណូមពរច្រើនទេ ប៉ុន្តែសុំត្រឹមឲ្យពង្រឹងវិធានការណ៍អនាម័យនៅពេលបើកដំណើរការ

សាលារៀនឡើងវិញ។

….

លោក ជួន វិចិត្រ

បុរសស្ថិតក្នុងវ័យ៣៣ឆ្នាំកំពុងសម្រាកនៅលើកង់បីឥណ្ឌា រង់ចាំភ្ញៀវនៅក្បែរសួនវត្តបុទុម លោក ជួន វិចិត្រ មកពីព្រែកឯង បាននិយាយថា កូវីដ១៩ បានផ្តល់ផលវិបាកបំផុតទៅដល់អ្នកក្រ។

ចំពោះរូបគាត់ផ្ទាល់ កូវីដ១៩ បានធ្វើឲ្យធ្លាក់ចំណូលរបស់គាត់រហូតដល់៨០ភាគរយ ប៉ះពាល់ដល់ចំណូលគ្រួសារផ្ទាល់ នេះបើប្រៀបទៅនឹងស្ថានភាពមុនការផ្ទុះរីករាលដាលជម្ងឺ។

លោកបានបន្ថែមថា មកទល់ពេលនេះមិនមានវត្តមានអាជ្ញាធរពាក់ព័ន្ធចុះសាកសួរ និងផ្តល់ការឧបត្ថម្ភនៅឡើយទេ។ ស្របគ្នានោះដែរ លោក ជួន វិចិត្រ បានមានសេចក្ដីត្រេកអរនៅពេលក្រសួងអប់រំប្រកាសបើកសាលាវិញសម្រាប់កម្រិតមធ្យមសិក្សាបឋមភូមិ និងទុតិយភូមិនាខែកញ្ញា ព្រោះមួយផ្នែកនៃភ្ញៀវរបស់លោក គឺជាសិស្សានុសិស្ស។

លោកបាននិយាយដូច្នេះថា៖ «ចង់ឲ្យមានការបើកជើងហោះហើរវិញដែរ ដើម្បីមានភ្ញៀវទេសចរណ៍តែក៏បារម្មណ៍ពីសុវត្ថិភាព ព្រោះមិនទាន់មានវ៉ាក់សាំងទេ ខ្ញុំចង់ឲ្យប្រជាជនទាំងអស់មានសុវត្ថិភាពជាជាងបានតែប្រយោជន៍ប្រាក់ចំណូលផ្ទាល់ខ្លួនខ្ញុំ»។

….

លោក សុជាតិ

នៅក្រោមកម្ដៅព្រះអាទិត្យនារសៀលម៉ោង៣ លោក សុជាតិ មានវ័យ ៣៦ឆ្នាំ មកពីខេត្តព្រៃវែងមានមុខរបរជាអ្នករត់កង់បីខ្មែរកំពុងឈររង់ចាំភ្ញៀវចេញពីសណ្ឋាគារ ហើយបាននិយាយថា ផលប៉ះពាល់ពីកូវីដ១៩ទៅលើសេដ្ឋកិច្ចក្រៅប្រព័ន្ធ គឺធ្វើឲ្យការរកស៊ីពិបាកនៅពេលបិទជើងហោះហើរចេញចូលភ្ញៀវបរទេស។

ថ្វីត្បិតតែស្ថានភាពឥឡូវមានភាពប្រសើរជាងមុនក៏ដោយ លោកបាននិយាយថា ផលប៉ះពាល់លើចំណូល គឺមានការថយចុះពីមួយថ្ងៃ២០ ទៅ ៣០ដុល្លារ នៅត្រឹម១០ដុល្លារ ក្នុងមួយថ្ងៃ។

លោកសុជាតិបាននិយាយថាគាត់មិនមាន ប័ណ្ណក្រីក្រនោះទេ ហើយក៏អត់បានទទួលជំនួយអ្វីដែរ។

….

អ្នកស្រីស្រស់

អ្នកស្រី ឈ្មោះស្រស់ ក្នុងវ័យ ៤០ឆ្នាំ ជាអ្នកលក់កាហ្វេនៅជាប់របងសាកលវិទ្យាភូមិន្ទវិចិត្រសិល្បៈក្នុងរាជធានីភ្នំពេញ ក៏បានបង្ហាញទស្សនៈមិនខុសគ្នាពីប្រជាពលរដ្ឋដទៃទៀតដែរ។

អ្នកស្រីបាននិយាយថា ជំងឺកូវីដ១៩នៅកម្ពុជាប្រសើរជាងនៅបរទេស ព្រោះពុំមានការឆ្លងច្រើន និងពុំមានអ្នកស្លាប់ឡើយ។

អ្នកស្រីបាននិយាយថា ការលក់ដូរមានការធ្លាក់ចុះ ក្នុងរង្វង់៣០ភាគរយ ដោយហេតុថាអតិថិជនរបស់អ្នកស្រីភាគច្រើនជាសិស្ស និស្សិត។

អ្នកស្រី ស្រស់ បាននិយាយថា៖ «ដោយសារឥលូវសិស្សឈប់អស់ហើយលក់មិនទាន់បានដូចមុនទេ សំខាន់គឺសិស្ស ពេលណាសិស្សចូលចឹងទៅ ការលក់វាឡើងវិញ»។

….

អ្នកស្រី ធឿន

មិនខុសគ្នាពីអ្នកស្រីស្រស់ប៉ុន្មានទេ អ្នកស្រី ធឿន ក្នុងវ័យ៣៤ឆ្នាំមកពីស្រុកកោះធំខេត្តកណ្តាល ប្រកបរបរលក់ចេកអាំងនៅម្តុំផ្សាររាត្រីរាជធានីភ្នំពេញ បានបង្ហាញថា ជំងឺកូវីដ១៩នៅកម្ពុជា មានលក្ខណៈល្អប្រសើរច្រើនក្នុងរយៈពេល២សប្តាហ៍ចុងក្រោយនេះដែលអាចឲ្យគាត់លក់ដូរបានដូចធម្មតា។

អ្នកស្រី ហាក់មិនមានការព្រួយបារម្ភទេព្រោះនៅមានម៉ូយមកជួយទិញជាប្រចាំដែរ គ្រាន់តែមិនបានចំណូលច្រើនដូចមុនទាំងស្រុងនោះទេ។

អ្នកស្រីបញ្ជាក់ថា៖ «ខ្ញុំនៅលក់បានគួរសម គ្រាន់តែវាមិនបានច្រើនដូចមុនទេ ព្រោះមានម៉ូយៗគេធ្លាប់ហូបខ្ញុំឆ្ងាញ់គេនៅមកជួយទិញ»។ អ្នកស្រីក៏បានប្រាប់ឲ្យ ដឹងដែរថា កន្លងមកគាត់មិនដែលបានទទួលជំនួយពីរដ្ឋាភិបាលទេ ប៉ុន្តែធ្លាប់មានសប្បុរសជននានាបានចុះមកចែកជាអង្ករ ទឹកត្រី ទឹកស៊ីអ៊ីវ អោយគាត់ និងអាជីវករដទៃទៀត។

….

លោក ឡៃ

ក្រឡេកមកមើលលោក ឡៃ ក្នុងវ័យ៤៩ឆ្នាំ ជាអ្នកធាក់ស៊ីក្លូមួយរូបនៅមុខសារមន្ទីរជាតិ មកពីខេត្តព្រៃវែង បច្ចុប្បន្នស្នាក់នៅសមាគមស៊ីក្លូវត្តកោះ។ លោកបានត្អូញត្អែរពីភាពខ្វះខាតយ៉ាងខ្លាំងក្នុងជីវភាព ព្រោះមុខរបររបស់លោកពឹងអាស្រ័យទាំងស្រុងលើភ្ញៀវទេសចរបរទេសដែលមកលេងនៅកម្ពុជា។

មានថ្ងៃខ្លះ លោករកមិនបានសូម្បីតែមួយរយរៀល ហើយការរស់នៅរាល់ថ្ងៃ ពឹងផ្អែកលើជំនួញពីសប្បុរសជន ហើយដោយសារជើងហោះហើរត្រូវបានផ្អាកដំណើរការអស់ ពុំមានភ្ញៀវទេសចរមកកំសាន្តទៀតនោះទេ។

ដូចនេះលោកបានសំណូមពរឲ្យរដ្ឋាភិបាលកម្ពុជា ដំណើរការជើងហោះហើរឡើងវិញក្នុងពេលឆាប់ៗនេះ ដើម្បីឲ្យលោកអាចរកចំណូលបានខ្លះ ក្នុងការផ្គត់ផ្គង់ជីវភាព៕