លោក រស់ សុវាចា អ្នកនាំពាក្យក្រសួងអប់រំ យុវជន​និងកីឡាបានរៀបរាប់ប្រាប់ Newsroom Cambodia ថា កម្មវិធីសិក្សានេះមានគោលបំណងដើម្បីបន្តលើកកម្ពស់សុខភាពផ្លូវចិត្តតាមសាលាបឋមសិក្សា និងវិទ្យាល័យ​។

លោកបន្តទៀតថា «មេរៀននេះមានសារៈសំខាន់ណាស់សម្រាប់សិស្សានុសិស្សគ្រប់ភូមិសិក្សាក្នុងការសិក្សារៀនសូត្រសម្រាប់ជាចំណេះដឹងដើម្បីយកទៅអនុវត្តក្នុងការថែទាំសុខភាពរបស់ពួកគេឱ្យបានគ្រប់ជ្រុងជ្រោយនៅក្នុងជីវិតប្រចាំថ្ងៃក៏ដូចជាសម្រាប់អនាគតរបស់ពួកគេ រស់នៅប្រកបដោយសុខភាពល្អទាំងផ្លូវកាយ ផ្លូវចិត្តនិងសង្គម»។

លោក រស់ សុវាចា បានអះអាងថា លើសពីនេះទៅទៀត ការអប់រំផ្លូវភេទក៏មានសារៈសំខាន់សម្រាប់ឱ្យសិស្សស្វែងយល់ពីជំងឺដែលពាក់ព័ន្ធដើម្បីចេះការពារខ្លួនពីជំងឺផ្សេងៗ កាត់បន្ថយហានិភ័យនានាពីការរួមភេទ និងចេះជ្រើសរើសវិធីការពារកុំឱ្យមានកូនតាមមិនតាមប្រាថ្នាក្រោយពេលរៀបការ។

លោកបន្ថែមទៀតថាក្រសួងអប់រំ យុវជន និងកីឡា បានណែនាំគ្រឹះស្ថានសិក្សាទំាងអស់ឱ្យអនុវត្តកម្មវិធីសិក្សារួមទាំងសុខភាពផ្លូវភេទឱ្យបានពេញលេញដើម្បីចូលរួមពង្រឹងសមត្ថភាពសិស្សានុសិស្សឱ្យក្លាយជាពលរដ្ឋសាកលដែលមានចរិយាសម្បទា វិជ្ជាសម្បទា បំណិន​សម្បទា និងគុណតម្លៃ ឆ្លើយតប នឹងបរិបទជាតិតំបន់ និងពិភពលោក។

លោក ប៉ុក ពិសិទ្ធ អាយុ២៣ ជាគ្រូបង្រៀនមធ្យមសិក្សានៅវិទ្យាល័យសម្ដេច ប៊ុន រ៉ានី ហ៊ុន សែន វាលតូច ខេត្តត្បូងឃ្មុំ បាននិយាយថាកម្មវិធីសិក្សានេះមានសារៈសំខាន់ ព្រោះថាវាជាផ្នែកមួយដែលបានចូលរួមឱ្យយុវវ័យបច្ចុប្បន្នក៏ដូចជាសិស្សានុសិស្សដែលកំពុងសិក្សា ជាពិសេសសិស្សថ្នាក់ទី៩ ទី១០ ទី១១ និងទី១២ ឱ្យមានការយល់ដឹងទូលំទូលាយពាក់ព័ន្ធនឹងបញ្ហាសុខភាពផ្លូវចិត្តរបស់ពួកគាត់ និងមួយទៀតនោះ គឺផ្លូវភេទរបស់ពួកគាត់ផងដែរ ដោយសារតែបច្ចុប្បន្នបញ្ហាទាំងនេះកំពុងតែចោទជាបញ្ហាខ្លាំងចំពោះ។

លោក ប៉ុក ពិសិទ្ធ បានមានប្រសាស៍ទៀតថាបញ្ហាសុខភាពគឺជាផលវិបាកមួយផ្នែកដែលផ្ដល់ផលអវិជ្ជមានលើសិស្សានុសិស្ស រួមមានការបាក់ទឹកចិត្ត មិនសូវមានភាពក្លាហាន និងមិនមានជំនឿលើខ្លួនឯង ដូច្នេះកម្មវិធីនេះគឺប្រៀបបាននឹងជួយ «បំភ្លឺផ្លូវ» ក៏ដូចជាកែប្រែ បណ្ដុះគំនិតរបស់ពួកគាត់ឱ្យមានការកែប្រែខ្លួនឯងឱ្យប្រសើរជាងមុន

លោកក៏បានបន្ថែមទៀតថា កម្មវិធីនេះមានភាពសំខាន់ សម្រាប់មនុស្សគ្រប់រូបស្ថិតក្នុងកាលៈទេសៈបែបណា វណ្ណៈបែបណា ការងារបែបណាក៏ដោយ។

«ជាពិសេសផ្លូវចិត្ត គឺសំខាន់ កាលណាដែលផ្លូវចិត្តយើងនឹងនរ សុខភាពរឹងមាំ ការរស់នៅរបស់យើង ការប្រកបការងារផ្សេងៗយើងអាចទទួលបានភាពជោគជ័យទៅតាមហ្នឹងដែរ»។

កញ្ញា ងួន សុវី អាយុ ១៨ឆ្នាំ ជាសិស្សរៀនថ្នាក់ទី១២នៃវិទ្យាល័យ​កោះសូទិន បានលើកឡើងប្រាប់Newsroom Cambodia ថា ការដាក់ឱ្យមានកម្មវិធីសិក្សាសុខភាពផ្លូវចិត្ត និងផ្លូវភេទ ក្នុងកម្មវិធីសិក្សា មានសារៈសំខាន់ណាស់សម្រាប់សិស្សានុសិស្សទាំងស្រី ទាំងប្រុសដែលអាចឱ្យសិស្សសិក្សាស្វែងយល់ពីបញ្ហាសុខភាពផ្លូវចិត្ត ថាតើការរៀនរបស់ខ្លួនឯងទទួល ឫចាប់បានច្រើនប៉ុណ្ណា ទទួលបានចំណេះដឹងធំទូលាយច្រើន ឫអត់ និងរងសម្ពាធពីខាងក្រៅយ៉ាងដូចម្ដេចខ្លះ។

កញ្ញា ងួន សុវីបាននិយាយថា ចំណែកសុខភាពផ្លូវកាយវិញ អាចឱ្យសិស្សានុសិស្សស្វែងយល់ពីសុខភាពខ្លួនឯងថា ក្នុងខណៈពេលដែលមានជំងឺប្រចាំកាយ គួរតែទទួលបានការថែទាំសុខភាពដូចម្ដេចខ្លះ។

កញ្ញាបានបញ្ជាក់ថា «សិស្សមួចំនួនដែលត្រចៀកស្ដាប់មិនសូវបាន គាត់ត្រូវការឧបករណ៍ជំនួយ ឫក៏ការយកចិត្តទុកដាក់ពីគ្រូ»។

កញ្ញា ងួន សុវី បាននិយាយថា « សិស្សស្រីមិនត្រូវទៅកន្លែងដែលស្ងាត់ៗ ឫក៏មានប្រុសៗច្រើន មិនគួរស្និតស្នាលជាមួយគ្រូប្រុសៗខ្លាំងពេក ដែលអាចឈានដល់មានករណីរំលោភក៏ថាបាន»។

លោក ជា សុខហេង អាយុ ១៨ឆ្នាំ ជាសិស្សកំពុងសិក្សាថ្នាក់ទី១២ នៃវិទ្យាល័យទួលអំពិល បានប្រាប់ Newsroom Cambodia ថា ការដាក់ឱ្យមានកម្មវិធីសុខភាពផ្លូវចិត្ត និងផ្លូវភេទ ថាជាកម្មវិធីល្អព្រោះអាចធ្វើឱ្យសិស្សក្មេងៗយល់ដឹងច្រើនពីបញ្ហានេះ និងចេះគិតគូរបានដិតដល់ទាំងសុខភាពផ្លូវកាយ ទាំងផ្លូវចិត្ត ជាពិសេសរួមទាំងផ្លូវភេទដែលភាគច្រើននាពេលបច្ចុប្បន្នកំពុងតែបង្ហាញឱ្យឃើញពីការរួមភេទនៅវ័យក្មេងៗផងដែរ។

លោកបានបញ្ជាក់ថា «ដោយសារឥឡូវអត្រាក្មេងៗ ដែលប្រព្រឹត្តិរឿងនេះ ដោយមិនបានទាន់រៀបការ ក៏ច្រើនដែរ»៕

ក្រសួងសុខាភិបាលបានលើកឡើងថា ទោះបីជាលទ្ធផលធ្វើតេស្តលើកទី១អវិជ្ជមានកូវីដ១៩ទាំងអស់គ្នា ប៉ុន្តែក្រសួងបានឱ្យមនុស្សទាំង ៨៤០នាក់នោះធ្វើចត្តាឡីស័កខ្លួនឯងរយៈពេល១៤ថ្ងៃសិន និងត្រឡប់មកធ្វើតេស្តវិញចំនួន ០៣ដងទៀត តាមកាលបរិច្ឆេទកំណត់នៅវិមានមិត្តភាពនៃទីស្តីការគណរដ្ឋមន្រ្តី។

ក្រសួងបានអះអាងថានឹងបន្តស្រាវជ្រាវរកអ្នកដែលប៉ះពាល់ដើម្បីយកសំណាកមកធ្វើតេស្តបន្តបន្ទាប់ទៀត ខណៈដែល មិនមានអ្នកជាសះស្បើយនៅថ្ងៃទី០៥ ខែវិច្ឆិកា ឆ្នាំ២០២០នេះ។

ក្នុងដំណើរទស្សនកិច្ចនៅប្រទេសកម្ពុជារបស់រដ្ឋមន្រ្តីការបរទេស និងពាណិជ្ជកម្មប្រទេសហុងគ្រីរូបនេះ កាលពីថ្ងៃទី០៣ ខែវិច្ឆិកា ឆ្នាំ២០២០ ក៏មានអ្នកសារព័ត៌មានមួយចំនួនផងដែរ ដែលត្រូវបានធ្វើតេស្ត និងដាក់ក្នុងចត្តាឡីស័ក។

អ្នកថតរូបព័ត៍មានម្នាក់កំពុងនៅក្នុងចត្តាឡីស័ក ហើយដែលសុំនិយាយមិនបញ្ចេញឈ្មោះ បានប្រាប់ Newsroom Cambodia ថាលោកមិនបានប៉ះពាល់ជាមួយ នឹងលោករដ្ឋមន្រ្តីការបរទេសហុងគ្រីនោះទេ ហើយបានស្ថិតនៅគម្លាតរវាង៣ ទៅ៤ម៉ែត្រ ព្រមទាំងបានពាក់ម៉ាស់ការពារ និងលាងសម្អាតដៃបន្ទាប់ពីចប់កម្មវិធីផងដែរ។

លោកបានបន្តទៀតថា បន្ទាប់ពីទទួលដំណឹងថារដ្ឋមន្រ្តីការបរទេសហុងគ្រីផ្ទុកវីរ៉ុសកូវីដ ១៩នៅប្រទេសថៃ លោកក៏បានទៅពិនិត្យនៅវិទ្យាស្ថានជាតិសុខភាពសាធារណៈនៃក្រសួងសុខាភិបាលកាលពីថ្ងៃទី០៤ ខែវិច្ឆិកា ឆ្នាំ២០២០ ដោយលទ្ធផលតេស្តលើកទី១ គឺអវិជ្ជមាន។

លោកបានបញ្ជាក់បន្ថែមថា «រាល់ថ្ងៃ ក៏ខ្ញុំធ្វើចត្តាឡីស័កក្នុងបន្ទប់ជួលមួយកន្លែងក្នុងរាជធានីភ្នំពេញដែរ»។

គិតត្រឹមថ្ងៃទី០៦ ខែវិច្ឆិកា ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ-១៩សរុបចំនួន ២៩២នាក់ ក្នុងនោះបានព្យាបាលជាសះស្បើយទាំងអស់ចំនួន ២៨៦នាក់ និងចំនួន០៦នាក់ទៀតកំពុងសម្រាកព្យាបាលនៅមន្ទីរពេទ្យ៕

យោងតាមក្រសួងសុខាភិបាល បុរស អាយុ៣៤ឆ្នាំ មានអាសយដ្ឋានស្នាក់នៅភូមិតាស្គរ ឃុំសារិកាកែវ ស្រុកល្វាឯម ខេត្តកណ្ដាល និងបុរសអាយុ២៣ឆ្នាំ មានអាសយដ្ឋានស្នាក់នៅស្រុកបាកាន ខេត្តពោធិ៍សាត់។

បុរសទាំងពីរនាក់នេះ បានធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង បានមកដល់កម្ពុជានៅថ្ងៃទី២៦ ខែតុលា ឆ្នាំ២០២០ ជាមួយអ្នករួមដំណើរជាមួយចំនួន ៣៧នាក់ផ្សេងទៀត។

ក្រសួងបាននិយាយថា អ្នកជំងឺទាំង០២ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ចំណែកអ្នករួមដំណើរជាមួយចំនួន ៣៧នាក់ ផ្សេងទៀតដែលលទ្ធផលអវិជ្ជមានកូវីដ ១៩នោះត្រូបានដាក់ឱ្យធ្វើចត្តាឡីស័កចំនួន១៤ថ្ងៃ។

គិតត្រឹមថ្ងៃទី២៨ ខែតុលា ឆ្នាំ២០២០នេះ កម្ពុជាបានរកឃើញអ្នកឆ្លងជំងឺកូវីដ ១៩សរុបចំនួន ២៩០នាក់ ក្នុងនោះបានព្យាបាលជាសះស្បើយទាំងអស់ចំនួន ២៨៣នាក់ និងចំនួន០៧នាក់ទៀតកំពុងសម្រាកព្យាបាលនៅមន្ទីរពេទ្យ៕

អ្នកស្រី​ លី ឌីវា ដែល​មាន​វ័យ​៣១​ឆ្នាំ ប្រាប់​ Newsroom Cambodia នៅ​ថ្ងៃ​ទី​១៩ ខែ​តុលា​ថា គ្រួសារ​អ្នកស្រី មាន​សមាជិក​៦នាក់​ ដោយ​ប្រកប​របរ​នេសាទ​ដើម្បី​ចិញ្ចឹម​ជីវិត។ និយាយបណ្តើរ រៀប​រាប់​ពីការ​ខ្វះ​ខាត​ជីវភាព​ដោយ​សារ​​ប្រាក់​ចំណូល​ពី​នេសាទ​កាន់​តែ​តិច​​ដោយ​​​ទឹក​មុខ​ស្រពាប់​ស្រពោន​បណ្តើរ​ថា ទឹកទន្លេ​ក្នុង​ពេល​បច្ចុប្បន្ន​ឡើងចុះៗ ធ្វើឲ្យ​​អ្នកស្រី​ពិបាកនិងរកត្រី​ ហើយ​ថា ពេលខ្លះដាក់មងបានត្រី១-២ យក​លក់​បាន​លុយ​១ម៉ឺន ទៅ២ម៉ឺនរៀល ដើម្បីផ្គត់ផ្គង់គ្រួសារ។ 

អ្នកស្រី​​បន្ថែម​ថា មូលហេតុ​នៃ​ការ​រកត្រី​មិន​បាន និង​ធ្លាក់​ចុះខ្លាំង​ គឺ​ដោយ​សារ​អាកាស​ធាតុ​ប្រែប្រួល​ខ្លាំង ភ្លៀង​រាល់ថ្ងៃ និង​ដោយសារ​មានការ​បិទ​ទឹក​ពី​ប្រទេស​លើ​ទន្លេ​មេគង្គ ព្រមទាំង​សំរាម​ប្លាស្ទិក​ផ្សេងៗ។ 

«ណាមួយទឹកត្រូវបានគេបិតពីខាងលើដោយសម្រាប់ផលិតចេញជាកម្លាំងអគ្គិសនីទើបធ្វើអោយទឹកមិនសូវឡើងជាហេតុធ្វើឲ្យផលនេសាទធ្លាក់ចុះ»។

អ្នកស្រី​បាន​បន្ត​ពី​បញ្ហា​សំរាម​​ថា៖ «ពេល​យើង​ដាក់​មងម្តងៗ​វា​ជាប់​ថង់​ច្រើន ដែល​ជា​ថង់​ចំណី​អាហារ​ដែល​គេ​បោះចោ​ល​ក្នុង​ទន្លេ វាជាប់​តែ​អានឹង យើង​ហត់​នឹង​ដោះវា​ណាស់»។

អ្នកស្រី លី ឌីវា ជា​អ្នក​នេសាទ​មួយ​រូប ​ក្នុង​ចំណោម​អ្នក​នេសាទ​ជាច្រើន​ទៀត ដែល​បាន​បង្ហាញ​ក្តី​បារម្ភ​អំពី​បញ្ហាជី​វភាព​គ្រួសារ និង​ត្អូញត្អែរ​ពី​ការជួប​ប្រទះ​ផល​លំបាក​នៃ​ការនេសាទ​នៅ​​ឆ្នាំនេះ ដោយសារ​​​បញ្ហាទឹកទន្លេ និង​អាកាសធាតុប្រែប្រួល។

ចំណែក​លោក សុះ រ៉សាត​ ដែល​មានអាយុ​៣៨​ឆ្នាំ កំពុង​អង្គុយលើទូក​​លុ​ញកន្ទក់​សម្រាប់ធ្វើជានុយត្រី​ នៅ​ភូមិចុងកោះ សង្កាត់ជ្រោយចង្វារ ខណ្ឌជ្រោយ​ចង្វារ រាជធានីភ្នំពេញ ប្រាប់​ថា លោក​បាន​មក​រស់នៅ និង​ប្រកប​របរ​ជា​អ្នក​នេសាទ​តាំង​ពី​អាយុ១១ឆ្នាំមក​ម្ល៉េះ។ លោក​បន្ត​ថា ​ពី​មុន​លោក​រក​ចំណូល​បាន​៤​ម៉ឺន​រៀល​ក្នុង​មួយ​ថ្ងៃ ប៉ុន្តែលោក​ថា បច្ចុប្បន្ន​លោក​រក​ចំណូល​បាន​ត្រឹម​តែ​​១​ម៉ឺន​ ទៅ​២​ម៉ឺន​រៀល​ប៉ុណ្ណោះ ដោយសារ​បណ្ដាលមក​ពី​ភ្លៀងទឹ​ក​ជន់​ខុស​រដូវ​ឡើង​ដោយ​បង្ខំ។​

«ប្រសិនបើ​ទឹកឡើង​ដោយ​ធម្មជាតិ វា​អាច​រក​ត្រីបា​ន​ជាង​មុន ដល់​ពេល​ជន់​ទឹក​ភ្លៀង​បាត់​ត្រី​បាត់​អី​អស់»​។

មិនមែន​តែអ្នកស្រី ឌី លីវា និង​លោក សុះ រ៉សាត​ នោះ​ទេ​ដែល​ ត្អូញត្អែរ​ពី​ផល​លំបាក​នៃ​ការ​ថយ​​ចុះ​ផល​នេសាទ​​​ឆ្នាំនេះ​ដោយសារ​​បញ្ហា​ទឹកទន្លេ និង​អាកាស​ធាតុ​ប្រែប្រួល​ ចំណែក​លោក ពូក គ្រី អាយុ៣១ឆ្នាំ ដែល​មាន​​មុខរបរ​​​ជា​អ្នកនេសាទ​ដែរ​នោះ​​ក៏​បាន​លើកឡើង​ដែរ​ថា នៅ​ឆ្នាំ​នេះ​ទឹ​កតូច ដូច្នេះ​ហើយ​ការនេសា​ទ​ត្រីរ​បស់​លោកមិនសូវបានផលនោះទេ។

លោកនិយាយថា​៖ «ឆ្នាំ​ហ្នឹង​កំសត់​ជាង​រាល់ឆ្នាំ រាល់ឆ្នាំ​គ្រាន់​តិច តែ​ឆ្នាំនេះ​ទឹ​ក​វា​តូច ទឹក​វាឡើង​បាន​តិច ទឹ​ក​វាតូចវាអត់សូវមានត្រីទេ តែទឹកធំទៅ ត្រីវាចេញពីបឹងពីអីមកខ្លះ»។

លោកបន្ថែម​ថា ក្នុងមួយថ្ងៃៗ​បើដូច​ពេ​លមុនៗ លោក​អាច​រក​ចំណូល​បាន​ពី​៥ម៉ឺន ទៅ៨ម៉ឺន​រៀល​ ប៉ុន្តែ​​ឥលូ​វ​លោក​ថា​​រកមិនបានដូច​មុន​នោះ​ទេ។​

លោក វេង សាខុន រដ្ឋមន្រ្តី​ក្រសួង​កសិកម្ម រុក្ខាប្រមាញ់​ និង​នេសាទ ប្រាប់ Newsroom Cambodia ថា មូលហេតុដែលផលនេសាទធ្លាក់ចុះគឺដោយសារទន្លេមេគង្គទឹកតូច ជា​ហេតុធ្វើ​ឲ្យ​ទិន្នផល​ត្រី​តិច​នៅ​ឆ្នាំ​នេះ។ លោក​បន្ត​ថា ត្រី​នាំចូល​ពី​ប្រទេស​ជិត​ខាង​ ក៏ដូចជា​ប្រទេស​អូស្ត្រាលី និង​អាឡាស្កា ជា​មធ្យម​មាន​១០២,០០០តោន ទៅ​១០៤,០០0​តោន​ក្នុង​មួយ​ឆ្នាំៗ។

លោកថ្លែងថា៖ «ត្រីក្នុងស្រុកមិនអាចផ្គត់ផ្គង់គ្រប់ទេ ខាងក្រសួងកំពុងជំរុញ​លើ​ការចិញ្ចឹម។ បើ​បាន​៤០០​ពាន់​តោន-៥០០​ពាន់តោន គឺ​ធានា​លើ​ការផ្គត់ផ្គង់​ក្នុង​ស្រុក​គ្រប់គ្រាន់»។

លោក ហែម ឧត្តម ជា​អ្នក​ពិគ្រោះយោ​បល់​ឯករាជ្យ​ផ្នែក​អភិបាល​កិច្ច​ធនធាន​ធម្មជាតិ​បាន​ប្រាប់ Newsroom Cambodia ថា ពាក់ព័ន្ធ​នឹង​បញ្ហា​នៃ​ការលើក​ឡើង​របស់​ប្រជា​នេសាទ​ដែល​រកត្រី​មិនបាន អាច​​​បណ្ដាល​មក​​ពី​ចំនួន​អ្នក​នេសាទ​​កើនឡើង ការប្រែប្រួល​នៃ​លំហូរ​ទន្លេ ឬ​ក៏​ប្រព័ន្ធ​អេកូឡូស៊ី​ទន្លេ​មាន​ការផ្លាស់ប្ដូរ និង​ការប្រើប្រាស់ទឹកក្នុងការ​ទាញយកថាមពលអគ្គីសនី​​​ដើម្បីរ​ក្សា​ទឹក​ទុក​ក្នុង​ទំនប់​វារី​អគ្គីសនី​តាម​បរិមាណ​ដែលត្រូវការ​ និង​ការ​នេសាទ​ខុសច្បាប់​​ជាដើម​។

លោក​បញ្ជាក់​​ថា៖ «មូលហេតុ​ដែល​ទឹក​តូច​បណ្ដាល​ឱ្យ​ប្រជានេសាទ​រកត្រី​មិន​បាន ដោយសារ​តែ​មាន​ការពាក់ព័ន្ធ​ជាមួយ​ហ្នឹង​ការប្រើប្រាស់​ទឹក​ក្នុង​ការ​ទាញ​យក​ថាមពល​អគ្គីសនី​​​ដើម្បី​រក្សា​ទឹក​ទុក​ក្នុង​ទំនប់​វារី​អគ្គីសនី​តាម​បរិមាណ​ដែល​ត្រូវ​ការ»។

លោកបញ្ជាក់ថា៖ «ការនេសាទ​​មួយ​​ចំនួ​ន​​ធ្វើ​ឲ្យបាត់បង់​នូវ​ប្រភេទ​ត្រីសំ​ខាន់​ ដូច​ជា​ប្រភេទ​ត្រី ប៉ាវ៉ា ត្រីប៉ាសេអ៊ី ត្រីត្រសក់ ត្រីក្របី ចំណែក​ត្រីដែ​លនៅ​ស​ល់​ក៏​ពិបាក​រស់​ដែរ​ដោយសារ​ផល​ប៉ះពាល់​នៃ​ការប្រែប្រួលនៃ​បរិស្ថាន​ទន្លេផង និង​សកម្មភាព​បំពុល​ទន្លេ​ដូចជា ការចោល​នៃ​សំរាម​ប្លាស្ទិក រោងចក្រ​ឧស្សាហកម្ម​មួយ​ចំនួន​បង្ហូរ​កាក​សំណល់ សារធាតុ​គីមី​ក៏​ជា​កត្តារួ​មចំ​ណែក​​ផង​ដែរ»។

លោក​បន្ថែម​ថា ប្រសិនបើរដ្ឋាភិបាលគិតទៅលើគោលនយោបាយអភិវឌ្ឍ​ម៉ាក្រូ​សេដ្ឋកិច្ច​ដែល​ផ្ដោត​លើ​វិស័យ​ឧស្សាហកម្ម​ខ្នាតធំ ​ដូចជា​រោងចក្រ​ថាមពល ទំនប់វារី​អគ្គិសនី ប្រព័ន្ធសេ​ដ្ឋកិច្ច​ពិសេស ប៉ុន្តែ​ធ្វើឱ្យប៉ះពាល់​ដល់​​ការនេសាទ​​រប​ស់​​ពួកគាត់ រដ្ឋាភិបាល​គួរ​តែ​ពិចារណា​ទៅ​លើ​មីក្រូ​សេដ្ឋកិច្ច ដោយ​​រក្សា​នូវ​អ្វី​ដែ​លមា​នស្រាប់។

លោកថា៖ «គួរ​តែ​កុំ​យក​ការអភិវឌ្ឍ​មួយ​មក​ជំនួស​អាមួយ​ គួរតែ​សាងសង់​អ្វី​មួយ​ពី​លើ​អ្វី​មួយ​ផ្សេង​ទៀត។ យើង​គួរ​តែ​សម្រួល​ដល់​អ្នក​នេសាទ​ឱ្យ​មាន​ផលិតភាព និង​ផលិតផល​ច្រើន​ជាង​មុន មាន​ភាព​ទំនើប និង​ស្តង់ដារ​ខ្ពស់​ជាង​មុន ដើម្បី​ទៅ​ប្រកួត​ប្រជែង​ជាមួយ​ទីផ្សារ​ ជាជាង​ធ្វើ​ឱ្យ​ប៉ះពាល់​ដល់​ពួក​គាត់»៕​

បើ​តាម​សេចក្ដី​ប្រកាស​របស់​ក្រសួង​សុខាភិបាល​​ចេញ​នៅ​​ថ្ងៃ​ទី២៧ ខែតុលា ឆ្នាំ២០២០ បញ្ជាក់​​ថា ស្រ្តីជនជាតិបារាំង អាយុ២៣ឆ្នាំរូបនេះ ស្នាក់​នៅ​ក្នុង​សណ្ឋាគារ​មួយ​ក្នុង​រាជធានី​ភ្នំពេញ បាន​ធ្វើ​ដំណើរ​មក​ពី​ប្រទេស​បារាំង បន្ត​ជើងហោះហើរ​នៅ​ប្រទេស​សិង្ហបុរី។ ជើង​​ហោះ​ហើរ​នោះ​មាន​​អ្នកដំណើរ​រួម​ជាមួយ​សរុបចំនួន​១០៨នាក់ បានមកដល់កម្ពុជានៅថ្ងៃទី២៥ ខែ​តុលា ឆ្នាំ២០២០ ដោយលទ្ធផលធ្វើតេស្ត​វត្ថុ​សំណាក​របស់​បុគ្គល​នេះ​គឺ​វិជ្ជមាន​វីរុស​កូវីដ​១៩ ។

សេចក្តី​ប្រការ​ព័ត៌មាន​ដដែល​បន្ថែម​ថា ​បច្ចុប្បន្ន​​អ្នក​​ជំងឺ​​កំពុង​​សម្រាក​​ព្យាបាល​​​នៅ​​មន្ទីរពេទ្យ​មិត្តភា​ព​​ខ្មែរ-​សូវៀត ចំណែក​អ្នក​រួម​ដំណើរ​ជាមួយ​ចំនួន ១០៧​នាក់​ទៀត​ដែល​លទ្ធផល​អវិជ្ជ​មាន​កូវីដ​១៩​នោះ​ត្រូវ​​បាន​ដាក់​ឱ្យ​ធ្វើ​ចត្តា​ឡីស័ក​ចំនួ​ន​១៤ថ្ងៃ។

គិត​ត្រឹម​ម៉ោង​០៧:០០នាទីព្រឹកថ្ងៃទី២៧ ខែតុលា ឆ្នាំ២០២០នេះ កម្ពុជា​បាន​រក​ឃើញ​អ្នក​ឆ្លង​ជំងឺ​កូវីដ​១៩​សរុប​ចំនួន​២៨៨នាក់ ក្នុងនោះ​បាន​ព្យាបាល​ជា​សះស្បើយ​ទាំងអស់​ចំនួន ២៨៣​នាក់ និង​ចំនួន​៥នាក់​ទៀត​កំពុង​សម្រាក​ព្យាបាល​នៅ​មន្ទីរពេទ្យ៕

ការ​អំពាវ​នាវ​នេះ​ ធ្វើ​ឡើង​ក្នុង​ពិធី​ជួប​សំណេះ​សំណាល​​ជាមួយ​ប្រជាពលរដ្ឋ​ដែល​រងគ្រោះ​ដោយ​ទឹក​ជំនន់ ក្នុង​ខេត្ត​បន្ទាយ​មានជ័យ។  លោក​នាយករដ្ឋមន្រ្តី​ ហ៊ុន សែន​ លើកឡើងថា​៖ «ខ្ញុំ​អំពាវនាវ​សូម​កុំ​ឱ្យ​មាន​ការរឹបអូស​ទ្រព្យសម្បត្តិ ផ្ទះស​ម្បែង ដីធ្លី​របស់​ប្រជាពលរដ្ឋ​នៅ​ក្នុង​ដំណាក់កាល​កូវីដ និង​នៅ​ក្នុង​ដំណាក់កាល​នៃ​គ្រោះ​ទឹ​​កជំនន់ សម្រាប់​អ្នក​ដែល​ប៉ះពាល់»។

ទន្ទឹម​នោះ លោក​ក៏​បាន​ព្រមាន​ដល់​អ្នក​ដែល​ធ្វើ​សកម្មភាព​ផ្សេងៗដោយ​​បង្កើត​ជា​ចលនា​ដកប្រាក់​ទាំងអស់​ពី​ធនាគារ​ និង​ចលនា​ប្រកាស​កុំ​ឲ្យ​ពលរដ្ឋ​សងលុយ​ធនាគារ​ជាដើម ដែល​លោក​ថា សកម្មភាពទាំង​​នេះ​​អាច​ធ្វើឱ្យធនាគារ​ស្រុក​ខ្មែរ​ដួល​រលំ។​

អ្នកស្រី យ៉េត វណ្ណនី អ្នកធ្វើស្រែចម្ការនៅខេត្តត្បូងឃ្មុំ ​ដែល​មាន​អាយុ​៤៥​ឆ្នាំ ប្រាប់ Newsroom Cambodia ពីផលលំបាកនៃ​ការ​រង​ផល​ប៉ះពាល់​ដោយ​ទឹក​ជំនន់​ថា ​ទឹកជំនន់​ទឹក​ភ្លៀង ធ្វើឱ្យ​ខូចខាត​ស្តែ​ចម្ការ​របស់​អ្នកស្រី​​​គ្រប់មុខ។ អ្នកស្រី​បន្ត​ថា  ខណៈ​ពេល​អ្នកស្រី​កំពុង​ចាប់ផ្ដើម​សាប​កូន​ថ្នាំ ភ្ជួររាស់ដី​រួចរាល់​អស់ ទឹក​ក៏​ឡើ​ង លិច ធ្វើឱ្យ​ការប្រមូល​ផល​ត្រូវ​ពន្យារ​ពេល​ក្នុង​ការប្រមូល  ហើយ​ពេល​ដែល​ទឹកស្រក​ទៅ​វិញ​អស់ ត្រូវធ្វើឡើង​វិញ​ម្ដង​ទៀត ដែល​ត្រូវ​ចំណាយ​ទុន​២ដង​។

អ្នកស្រីបន្ថែម​​ថា ក្នុងដំណើរការធ្វើ​ស្រែ​ចម្ការ​នេះ អ្នកស្រី​បាន​ខ្ចី​លុយ​ពី​ធនាគារ​ចំនួន​២,០០០​ដុល្លារ​ដើម្បីធ្វើដើទុន ដោយ​ក្នុង​មួយខែ​ត្រូវ​បង់​ទាំង​ការ និង​ដើម​ទៅ​ធនាគារ​វិញ​ចំនួន​១៥០,០០០​រៀល។

អ្នកស្រី​ថា៖ «ខាង​ធនាគារ​មិនមាន​ការបន្ធូរ​បន្ថយ​ឡើយ គឺ​យក​ដូច​សព្វ​ដង»។

ចំណែក​អ្នកស្រី វណ្ណ ឌី អាយុ​៣០ឆ្នាំ ជា​អ្នក​​លក់ដូរ​​​ រស់នៅ​ផ្ទះ​បង់​រំលោះក្នុ​ង​បុរីកួរ​ស្រូវ បាន​ប្រាប់ Newsroom Cambodia ថា ខណៈ​ពេល​ដែល​មាន​ទឹកជំនន់​ទឹក​ភ្លៀង​ ធ្វើឱ្យ​ មុខរបរ​រកស៊ី​ខាត​បង់​ លក់​មិន​កើត និង​គ្មាន​អ្នក​មក​ទិញ ដោយសារ​ទឹក​លិច​ចូល​ដល់​ក្នុង​ផ្ទះ។

អ្នកស្រីបញ្ជាក់​ថា៖ «ជា​ធម្មតា​មុខ​របរ​រកស៊ី​ រក​បាន​បង្វិល​ទៅ​បង្វិល​មក​ដើម្បី​បង់​ផ្ទះ នៅ​ពេល​ដែល​ជួប​បញ្ហា​បែប​នេះ​គឺ​វា​គាំង​គ្រប់​កន្លែង»។  ​

យ៉ាងណាក្តី​អ្នកស្រីមិន​អាច​ប្រាប់​ពី​ចំនួន​លុយ​ដែល​បាន​ខ្ចី​ពី​ធនាគារ​ថា​ប៉ុន្មាន​​នោះ​ទេ  ដោយ​គ្រាន់​តែ​ប្រាប់​ថា ក្នុង​មួយ​ខែ​ត្រូវ​បង់​ចំនួន​ប្រហែល​ជា​១ពាន់​ដុល្លារអាមេរិក។

ចាប់​ពី​ដើម​ខែ​តុលា​មក​ ប្រទេស​កម្ពុជា​ទទួល​រង​ឥទ្ធិ​ពល​ព្យុះ​ពី​ប្រទេស​វៀត​ណាម បណ្តាល​ឲ្យ​​មាន​ភ្លៀង​ធ្លាក់​ខ្លាំង បង្ក​ជា​ទឹក​ជំនន់​នៅរាជធានី​​ខេត្ត​​ប្រមាណជាច្រើន​​ នៅ​ទូទាំង​ប្រទេស។

បើ​តាម​របាយការណ៍របស់​​គណៈកម្មាធិការ​ជាតិ​គ្រប់គ្រង​គ្រោះមហន្តរាយ​ចេញ​នៅ​ថ្ងៃ​ទី​២០ ខែ​តុលា​នេះ​បញ្ជាក់​​ថា គិត​ចាប់ពី​ថ្ងៃទី០១ ខែកញ្ញា ដល់​ថ្ងៃទី២០ ខែតុលា ឆ្នាំ២០២០ រាជធានី​-ខេត្ត​ចំនួន១៩របស់​កម្ពុជា បាន​រង​ការ​ប៉ះពាល់​ដោយសារ​ជំនន់​ទឹកភ្លៀង ក្នុង​នោះមាន​អ្នក​ស្លាប់​ចំនួន៣៤នាក់ និង​ប៉ះពាល់​ជាង​មួយ​ម៉ឺន​គ្រួសារ​៕​ 

អង្គការយូនីសេហ្វ បានបញ្ជាក់​ក្នុងសេចក្តីប្រកាសព័ត៍មាននៅថ្ងៃទី១៤ ខែតុលា ឆ្នាំ២០២០នេះថា សម្ភារអនាម័យសំខាន់ៗក៏ត្រូវបាន​ចែក​ជូន​សាលាមត្តេយ្យ និងសាលាបឋមសិក្សាទាំង ១១,៥០០កន្លែង នៅទូទាំងប្រទេស និងកំពុងរួមចំណែកផ្ដល់ឲ្យសាលាមធ្យមសិក្សាទាំង ១,៧៧១ កន្លែងក្នុងប្រទេសកម្ពុជា។

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងពិធីមួយក្នុងខេត្តសៀមរាបថា កម្ពុជាស្វាគមន៍ចំពោះការឧបត្ថម្ភបន្ថែមពីសហភាពអឺរ៉ុបដល់សាលារៀន និងសិស្សានុសិស្សនៅទូទាំងប្រទេសក្នុងពេលដ៏សែនពិបាកនេះ។

លោកស្រី ខាមិន ម៉ូរ៉េណូ ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា មានប្រសាសន៍ថា ការអប់រំគឺជាសិទ្ធិមនុស្សមូលដ្ឋាន និងជាសសរគ្រឹះមួយសម្រាប់ការអភិវឌ្ឍរបស់ប្រទេសកម្ពុជា ហើយអឺរ៉ុបមានមោទនភាពក្នុងការគាំទ្រយុទ្ធនាការរបស់ក្រសួងដើម្បីបើកសាលារៀនទ្បើងវិញប្រកបដោយសុវត្ថិភាពនៅទូទាំងប្រទេស៕

កញ្ញា វ៉ង ស្រីម៉ៃ ​និស្សិតឆ្នាំទី២ឯកទេស សង្គមកិច្ច​នៃ​សាកល​វិទ្យាល័យ​ភូមិន្ទ​ភ្នំពេញ​មណ្ឌល២ ប្រាប់ Newsroom Cambodia នៅ​ថ្ងៃ​ទី​១២ ខែ​តុលា នេះ​ថា​ ​បន្ទប់​​ដែល​កញ្ញា​​ជួល​នៅ​ម្តុំ​​លូ​ប្រាំ សង្កាត់បឹង​ទំពុន ខណ្ឌ​ស្ទឹង​មាន​ជ័យ តែង​លិចចូល​ដល់​បន្ទប់​​ត្រឹម​ជង្គង់ រាល់​ពេល​មាន​ភ្លៀង​ធំម្តងៗ។ ​​កញ្ញា​បន្ត​ថា រាល់​ពេល​លិច​ធ្វើ​ឲ្យទទឹក​​សម្ភារៈផ្សេងៗ  និង​ធ្វើ​ឲ្យ​បន្ទប់​ទឹក​ស្ទះ​ប្រើ​ការ​មិន​បាន​។

«ពេលខ្ញុំ​បរិភោគ​វិញ​ពិបាក​នៅ​ក្នុង​ការ​ធ្វើម្ហូប​ដាំបាយ​ លាង​ចាន​ ហើយ​ពេល​ខ្លះ​ម៉ូតូ​របស់​ខ្ញុំ​ដែល​ដាក់​នៅ​ក្នុង​បន្ទប់​នោះ​ត្រូ​​វ​បាន​ទឹក​ចូល​នៅ​ក្នុង​បំពង់​ស៊ីម៉ាំង​។ ហើយ​មាន​ពេល​ខ្លះ​ក៏​ខ្ញុំ​ឃើញ​មាន​សត្វ​តូច​ល្អិត​ចូល​ទៅ​ក្នុង​បន្ទប់ ដែល​ធ្វើ​ឲ្យ​ខ្ញុំ​​ខ្លាច​មិន​ហ៊ាន​គេង  ចំណែក​ក្លិន​ទឹក​ដែល​ហូរ​ចូល​ក្នុង​បន្ទប់​វិញ គឺ​ស្អុយ​ហើយ​ពណ៌​ឡើង​ខ្មៅ»។

និស្សិតម្នាក់ទៀតដែលមករស់នៅក្នុង​រាជធានី​ភ្នំពេញ​រយៈពេល​៣ឆ្នាំ​មក​ហើយ​នោះ​ គឺ​កញ្ញា បាង វណ្ណា ជា​និស្សិត​ឆ្នាំទី៣​ផ្នែក​គីមី​វិទ្យា​នៃ​សាកល​វិទ្យាល័យ​ភូមិន្ទ​ភ្នំពេញ​មណ្ឌល​១​បាន​ប្រាប់ Newsroom Cambodia ថា កញ្ញា​ខាន​ទៅ​រៀន​ និង​ទៅ​ធ្វើការ​ប្រហែល​ជា​ពីរ​បី​ថ្ងៃ​ហើយ ដោយសារ​តែ​​មិនអាច​ធ្វើ​ដំណើរ​​បាន ដោយសារ​ទឹក​លិច​ខ្ពស់​ពេក កញ្ញា​បាន​រៀបរាប់​បន្ត​ទៀត​ថា កញ្ញា​មិន​ដែល​ជួប​ប្រទះ​នឹង​បញ្ហា​នេះ​​ទេ​នៅពេលដែល​កញ្ញា​មក​រស់​នៅ​រាជធានី​ភ្នំពេញ​ក្នុង​រយៈពេល​​៣ឆ្នាំ​នេះ ។

ចំណែកឯកញ្ញា នា ស្រីលីស និស្សិត​ផ្នែកធនាគារ​នៅ​វិទ្យាស្ថានសេដ្ឋកិច្ច និង​ហិរញ្ញវត្ថុ ដែល​​​ស្នាក់​នៅបន្ទប់​ជួល​ម្តុំទួល​សង្កែ​ ​ប្រាប់ Newsroom Cambodia ថា នៅ​ពេល​ដែល​មាន​ភ្លៀង​លិច​ចូល​ដល់​ក្នុង​ផ្ទះ​ម្តងៗ តែង​បណ្តាល​ឲ្យខូច​ខាត​សម្ភារៈ​​មួយ​ចំនួន​ ដោយសារ​ភ្លៀង​ហូរ​លឿន​ខ្លាំង​រើ​មិនទាន់។

កញ្ញា​បញ្ជាក់ថា៖ «វាលិចភ្លាមៗ ពេល​ខ្លះទៀត​នៅ​ពេល​ដែល​មាន​ភ្លៀង​លិច​យើង​មិន​បាន​នៅ​ផ្ទះ គឺ​វាបា​ន​បង្ក​ឲ្យ​ខូចខាត​របស់​ផ្សេង​ដែល​មាន​នៅ​ក្នុ​ងផ្ទះ​ដូចជា អង្ករ និង​របស់​ប្រើប្រាស់​មួយ​ចំនួន​ទៀត​អីចឹង»។

កញ្ញាបានបន្តថា​ ពេល​លិច​ម្តងៗ កញ្ញា​ត្រូវ​ប្រឈម​នឹង​ភាព​លំបាក​ទាំង​ការ​​បរិភោគ​​បាយ មិនមាន​កន្លែងគេង ហើយ​ទឹក​លិច​ចូល​មាន​ក្លិន​ស្អុយ។

ក្នុង​រយៈពេល​ប៉ុន្មាន​ថ្ងៃ​ចុង​ក្រោយ​នេះ ប្រទេស​កម្ពុជា​ទទួល​រង​ឥទ្ធិ​ពល​ព្យុះ​ពី​ប្រទេស​វៀត​ណាម បណ្តាល​ឲ្យ​​មាន​ភ្លៀង​ធ្លាក់​ខ្លាំង បង្ក​ជា​ទឹក​ជំនន់​នៅ​ខេត្ត​​ប្រមាណជា​១០​នៅ​ទូទាំង​ប្រទេស។

ក្រសួងធនធានទឹក និងឧតុនិយម ក៏​បាន​ចេញ​សេចក្តី​ជូន​ដំណឹង​មួយ​​នៅ​ថ្ងៃទី១៣ ខែតុលា ​នេះ អំពាវ​នាវឲ្យ​ប្រជាពលរដ្ឋ​​បន្ត​ការ​ប្រុង​ប្រយ័ត្ន​ ដោយ​បញ្ជាក់​ថា ព្យុះ​ទី១៦ ឈ្មោះ ណាង​កា (Nangka​) និង​ព្យុះ​ទី១៧ ឈ្មោះ សូ​ដែល (Saudel​) ​​មាន​កម្លាំង​ខ្លាំង នឹង​មាន​ឥទ្ធិពល​លើ​ផ្នែក​ខ្លះ​នៃ​ប្រទេស​វៀតណាម រួច​បន្ថយឥទ្ធិពល​ជាបន្តបន្ទាប់ ដោយ​បន្ត​ឆ្លងកាត់​ចូល​ប្រទេស​កម្ពុជាតាម​ខេត្តរតនគិរី ចាប់ពី​ថ្ងៃទី១៨​-១៩ ខែតុលា ក្នុង​កម្លាំង​ជា​វិសម្ពាធ និង​សម្ពាធ​ទាប៕​

ជំនួយនេះនឹងត្រូវផ្ដល់តាមរយៈអង្គការមិនមែន​រដ្ឋាភិបាលជំនាញ ដែលមានឈ្មោះថា United States Pharmacopeia សម្រាប់រយៈពេល២ឆ្នាំ (២០២០-២០២២)។ នេះបើយោងតាមការប្រកាសព័ត៍មានរបស់ស្ថានទូតអូស្រ្តាលីប្រចាំកម្ពុជា។

ជំនួយរបស់អូស្រ្តាលី​នឹងជួយមន្ទីរពិសោធន៍ជាតិគ្រប់គ្រងគុណភាព​នៃផលិតផលវិជ្ជសាស្រ្តរបស់កម្ពុជា លើកកម្ពស់ប្រព័ន្ធគ្រប់គ្រងគុណភាពរបស់កម្ពុជា យុទ្ធសាស្រ្ត និងផែនការប្រតិបត្តិការមន្រទីពិសោធន៍ជាតិ ព្រមទាំងបង្កើនការធ្វើតេស្ត និងរាយការណ៍អំពីផលិតផលវេជ្ជសាស្រ្តក្លែងក្លាយនិ ងអន់គុណភាព។

លោក Pablo Kang ឯកអគ្គរាជទូតអូស្ត្រាលីប្រចាំកម្ពុជាបានមានប្រសាសន៍ថា៖ «មន្ទីរពិសោធន៍ជាតិគ្រប់គ្រងគុណភាព មានសារៈសំខាន់ក្នុងការការពារ​ប្រឆាំងនឹងផលិតផលវេជ្ជសាស្រ្តក្លែងក្លាយ និងអន់គុណភាព»។

លោកបានបន្តថា ការជួយឧបត្ថម្ភមន្ទីរពិសោធន៍ជាតិគ្រប់គ្រងគុណភាពផលិតផលវេជ្ជសាស្រ្តរបស់កម្ពុជានេះ គឺដើម្បីត្រៀមលក្ខណៈទទួលបានការទទួលស្គាល់គុណភាពពីអង្គការសុខភាពពិភពលោក។

ជំនួយអូស្រ្តាលីនេះ ជាជំនួយចុងក្រោយបន្ថែមទៅលើជំនួយ​៥០លានដុល្លាអូស្រ្តាលី ដែលកំពុងគាំទ្រដល់គម្រោងលើកកម្ពស់សមធម៌ និងគុណភាពសុខាភិបាល៕

រដ្ឋបាលខេត្តសៀមរាប បានជូនដំណឹងដល់ប្រជាពលរដ្ឋដែលរស់នៅ ឬសាងសង់រំលោភលើដីចំណីផ្លូវ ឲ្យធ្វើការរុះរើចាប់ពីថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី២ ខែតុលា ឆ្នាំ២០២០ ហើយក៏បានប្រកាសថានឹងគ្មានសំណងអ្វីនោះឡើយ។

លោក នួន ពុទ្ធារ៉ា បាននិយាយប្រាប់ Newsroom Cambodia ដូច្នេះថា «ក្នុងកាលកំណត់ឲ្យរុះរើហ្នឹង​មកទល់ថ្ងៃនេះ ភាគច្រើនពួកគាត់ (ប្រជាពលរដ្ឋ) សហការរុះរើបានច្រើនហើយតែមិនទាំងស្រុង​ នៅខ្លះទៀតមានការយឺតយ៉ាវព្រោះប៉ុន្មានថ្ងៃនេះវាមានភ្លៀង»។

លោក នួន ពុទ្ធារ៉ា មិនបាននិយាយពីចំនួនប្រជាពលរដ្ឋដែលបានរុះរើហើយនោះទេ ហើយបានរៀបរាប់ថាតាមផែនការគ្រឿងចក្រត្រូវចាប់ផ្តើមធ្វើនៅថ្ងៃទី៧ ខែកញ្ញា ឆ្នាំ២០២០នេះ ប៉ុន្តែលោកថានឹងនៅបន្តមើលតាមស្ថានភាពជាក់ស្តែងសិន។

លោកបាននិយាយថាការសាងសង់ផ្លូវទាំងនេះមិនបានរំលោភលើដីឯកជននោះឡើយ ពោលគឺធ្វើតែនៅលើដីផ្លូវសាធារណៈតែប៉ុណ្ណោះហើយ ការប៉ះពាល់វិញ ភាគច្រើនគឺប៉ះរបង និងសំយាបផ្ទះ ពីព្រោះប្រជាពលរដ្ឋមួយចំនួនបានសាងសង់ចូលដីផ្លូវ តាំងពីយូរមកហើយ។

លោកបានមានប្រសាសន៏ថា៖ «វាមានប៉ះពាល់ដល់ប្រជាពលរដ្ឋមួយចំនួនដែរ ប៉ុន្តែជារួមប្រជាពលរដ្ឋសាទរ ហើយនាំគ្នាសហការ ចុះរុះរើតាំងពីពេលជូនដំណឹងរហូតមកដល់ពេលនេះ»។

លោកសោម លីន ជាអ្នកលក់ដូរ និងជាប្រជាពលរដ្ឋមួយរូបដែលរស់នៅភូមិតាភុល ឃុំស្វាយដង្គំ ស្រុកសៀមរាប ខេត្តសៀមរាប បានរៀបរាប់ទាំងសកម្មភាពកំពុងរើតូបលក់ឥវ៉ាន់ទាំងភ្លៀងរលឹមថា លោកមិនមានបញ្ហាចំពោះរឿងដែលអាជ្ញាធរឲ្យរុះរើ នោះទេពីព្រោះថា ការរុះរើនេះធ្វើឡើងចំពោះប្រជាពលរដ្ឋគ្រប់គ្នា។

លោកបានបន្ថែមថាបើទោះបីជាប៉ះពាល់ចូលប្លង់រឹងបន្តិចបន្តួចក្តី ក៏នៅតែមិនមែនជាបញ្ហាព្រោះឲ្យតែបានផ្លូវធ្វើដំណើរ ហើយបង្កលក្ខណៈងាយស្រួលដល់ការរកស៊ីទៅ គឺវាល្អណាស់ទៅហើយ។

លោក សោម លីនបាននិយាយថា៖​​ «អត់អីទេព្រោះជាតម្រូវការតែប៉ុណ្ណឹងទៅហើយវាស្មើភាពគ្នា ណាមួយមិនមែនប៉ះតែខ្ញុំផង អ្នកតូចអ្នកធំអីវាទៅទាំងអស់ហ្នឹង»៕

កម្មវិធី I AM A SINGER គឺជាកម្មវិធីប្រឡងចម្រៀងដ៏ល្បីនៅបរទេស ជាពិសេសនៅប្រទេសកូរ៉េខាងត្បូង និងប្រទេសចិន ហើយកម្មវិធី I AM A SINGER CAMBODIA បានចូលមកកម្ពុជាក្នុងឆ្នាំ២០១៦ ដោយមានតារាចម្រៀង ដួង វីរៈសិទ្ធ ជាម្ចាស់ពានរដូវកាលទី១។

កញ្ញា វី ឌីណែត ដែលជាកូនស្រីបង្កើតរបស់តារាចម្រៀងជើងចាស់ ហួ ឡាវី បាននិយាយតាមហ្វេសប៊ុកដូច្នេះថា​ «ជាដំបូងនាងខ្ញុំ និងលោកគ្រូ សូមអរគុណយ៉ាងខ្លាំងសំរាប់ការផ្ញើសារគាំទ្រពីសំណាក់បងប្អូន លោកតា លោកយាយ អ៊ុំ ពូ មីង ទូទាំងប្រទេស និងfansជាទីស្រលាញ់របស់នាងខ្ញុំទាំងអស់ដែលអាចធ្វើអោយក្ដីស្រម៉ៃរបស់នាងខ្ញុំក្លាយជាការពិត»។

កញ្ញា វី ឌីណែត បានបន្តថា «អ្វីដែលនាងខ្ញុំប៉ង អ្វីដែលនាងខ្ញុំខំព្យាយាមមកជាច្រើនសារហើយនោះ ពេលនេះក៏ទទួលបានហើយ នាងខ្ញុំពិតជារំភើបចិត្តខ្លាំងណាស់ នាងខ្ញុំនឹងព្យាយាមបន្តទៅមុខទៀតនឹងអ្វីថ្មីៗជូនដល់បងប្អូនទាំងអស់ទស្សនាជាបន្តបន្ទាប់»៕

ក៏ប៉ុន្តែការមកដល់នៃប្រើប្រាស់កម្មវិធីទូរសព័្ទសម្រាប់កក់មធ្យោបាយធ្វើដំណើរក្នុងរយៈពេលប៉ុន្មានឆ្នាំចុងក្រោយនេះ និងជំងឺរាតត្បាតកូវីដ ១៩ បានធ្វើឲ្យចំណូល របស់បុរសដែលមានវ័យ៦០ឆ្នាំនេះ ធ្លាក់ចុះយ៉ាងខ្លាំង។

ម៉ោងប្រហែល១រសៀល ថ្ងៃរាងបែរបន្តិច ក្នុងសម្លៀកបំពាក់ពណ៌ទឹកសណ្តែក មានទឹកមុខស្រស់បស់ ខណៈកំពុងតែអង្គុយរង់ចាំភ្ញៀវនៅលើកង់បីក្រោមម្លប់ឈើក្នុងសួនច្បារមុខបណ្ណាល័យជាតិក្នុងរាជធានីភ្នំពេញ លោក ស៊ី សាវឿន បាននិយាយដូច្នេះថា៖ «វាប៉ះពាល់ច្រើនដែរ នាំឲ្យកាត់បន្ថយការជិះកង់បីខ្មែរហ្នឹងហើយ…..ដូចថាកាត់បន្ថយអ្នកជិះ៨០ភាគរយ មានតែ២០ភាគរយប៉ុណ្ណោះដែលជិះ»។

គួររលឹកថា ក្រុមហ៊ុនដឹកជញ្ជូនមួយចំនួន រួមមាន PassApp, Grab, Itsumo, Wego,  បានចាប់ផ្តើមមានវត្តមាននៅក្នុងប្រទេសកម្ពុជាក្នុងរយៈពេលប្រហែលជាបីឆ្នាំចុងក្រោយនេះ ដោយផ្តល់ជូននូវសេវាកម្មដែលមានតម្លែថោកជាងកង់បីធម្មតា ហើយនិងអាចហៅជិះបានងាយស្រួលតាមរយៈកម្មវិធីទូរស័ព្ទ។

ដោយយល់ថាមានវ័យចំណាស់ មិនចង់ផ្លាស់ប្តូរ និងក៏មិនចង់ជំពាក់បំណុលពីការទិញកង់បីទំនើប ចំណូលរបស់លោក ស៊ី សាវឿន ពេលនេះ ថ្ងៃខ្លះ អាចរកបានត្រឹម១ម៉ឺន៥ពាន់រៀលប៉ុណ្ណោះ ជាចំនួនដែលមិនអាចផ្គត់ផ្គង់ជីវភាពគ្រួសារលោកបានគ្រប់គ្រាន់នោះទេ។ ពីមុន គាត់អាចរកបាន ពី៨ ទៅ១០ម៉ឺនរៀល ក្នុងមួយថ្ងៃ។

លោកបានបញ្ជាក់យ៉ាងដូច្នេះថា៖ «រត់ថ្ងៃខ្លះមានគេហៅដឹកអីវ៉ាន់ អាចបាន៤-៥ម៉ឺនទៅ ជួនកាលអត់ បាន២ម៉ឺន ឬ១ម៉ឺនប្រាំអី ទៅក្នុងមួយថ្ងៃ»។

ចំណែកចៅទាំងពីររបស់លោក ស៊ី សាវឿននៅឯខេត្តព្រៃវែងឯណោះវិញ មានអាយុ៣ឆ្នាំ និង៧ឆ្នាំ ដែលម្ដាយពួកគេបានស្លាប់ដោយគ្រោះថ្នាក់ចរាចរណ៍ និងឪពុកបានយកប្រពន្ធថ្មី ហើយផ្ញើលុយកាតព្វកិច្ចចិញ្ចឹមកូន ១០ម៉ឺនរៀលក្នុងមួយខែ។

លោក ស៊ី សាវឿន បាននិយាយថា លុយនេះមានចំនួន តិចណាស់ សម្រាប់ចំណាយក្នុងមួយខែៗ ហើយពេលខ្លះ លោកក៏ចង់ប្ដូរមុខរបរបនេះដែរ តែលោកថាមិនដឹងនឹងមានការងារអ្វីធ្វើក្រៅពីនេះ ម្យ៉ាងវ័យរបស់លោកក៏កាន់តែចាស់ទៅហើយ។

ចំណែកលោក  ឡូត ស៊ីផូ មានវ័យ៤៨ឆ្នាំ ខណៈកំពុងអង្គុយលើម៉ូតូឌុបរបស់គាត់ រង់ចាំអ្នកដំណើរនៅម្ដុំវត្តភ្នំ  លោកក៏បានរៀបរាប់មិនខុសគ្នាពីនេះប៉ុន្មានដែរ។

លោកថាបច្ចុប្បន្ននេះ របររត់ម៉ូតូឌុប មិនសូវរកចំណូលបានច្រើនទេ ចាប់តាំងពីមានការកក់កង់បីតាមកម្មវិធីទូរសព្ទ័មក។ លោកត្រូវប្រកបរបរមួយផ្សេងទៀត គឺជាអ្នកវេចអន្សមលក់ ដែលអាចរកចំណូលបានច្រើនជាងម៉ូតូឌុប ដែលគ្រាន់នឹងទប់ទល់ការចំណាយ។

លោកថា ការរត់ម៉ូតូក្នុងមួយថ្ងៃអាចរកបាន១ ឬ២ម៉ឺនរៀលប៉ុណ្ណោះ  គ្រាន់កាត់បន្ថយជីវភាពដែលខ្វះខាត និងសម្រាប់ដោះទល់មួយថ្ងៃៗ។ លោកបន្ថែមថាការរកចំណូលបានតិចតួច អាចនឹងនាំឲ្យលោកបោះបង់អាជីពនេះទៅជាអ្នកវេចនំអន្សមវិញផងដែរ។

លោកមុំ សុភ័ណ មានវ័យ៥០ឆ្នាំ ជាអ្នករត់រម៉ក នៅមុខព្រះបរមរាជរាំង បានរៀបរាប់ថាលោកមិនមែនជាអ្នករត់កងបីខ្មែរនេះជាប្រចាំនោះទេ  ការងារនេះគឺធ្វើនៅពេលទំនេរម្ដងម្កាលក្រៅពីការងារលក់ដូរនៅផ្ទះ។

ក៏ដូចអ្នកផ្សេងទៀតដែរ លោកថាក្រោយមានកំណើននៃការប្រើប្រាស់កម្មវិធីទូរសព្ទ័ដើម្បីកក់រម៉កកង់បីរួចមក ចំណូលពីមុខរបរនេះក៏រកបានកាន់តែតិចទៅ។

លោកមុំ សុភ័ណ បាននិយាយថា៖ «អ្នករករបរនេះ ទោះរកបានប៉ុន្មានក៏មិនសល់ដែរ បានត្រឹមម៉ារស់ៗ»។ ហើយប្រសិនបើចំណូលនៅតែរកបានតិច លោកថាក៏អាចនឹងបោះបង់មុខរបរនេះដែរ។

ទាក់ទិននឹងបញ្ហានេះ លោក តូច ចាន់នី អគ្គនាយកបច្ចេកទេស និងជាអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា  បានសុំមិនធ្វើការបកស្រាយទៅលើបញ្ហានេះដោយថា ជាប់រវល់ប្រជុំ។

ចំណែកលោក វន់ ពៅ ប្រធានសមាគមន៍ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA) បានថ្លែងថា នៅក្នុងសម័យបច្ចុប្បន្នគឺតម្រូវឲ្យរត់រម៉កទាំងអស់ដើរឲ្យទាន់បច្ចេកវិទ្យាទំនើបទើបអាចរកចំណូលបានច្រើន បើពុំដូចនោះទេពួកគេមិនអាចរកបានដូចអ្នកចេះបច្ចេកវិទ្យានោះឡើយ។

លោកបន្ថែមថា រដ្ឋាភិបាលគួរតែមានកម្មវិធីមួយដែលមានការអភិរក្សរម៉កខ្មែរ ឲ្យមានដំណើរការល្អដូចរម៉កឥណ្ឌាដែរ។ លោកចង់ឲ្យមានការអភិរក្សរម៉កកង់បីខ្មែរ ដូចទៅនឹងការអភិរក្សស៊ីក្លូ នៅក្នុងក្រុងភ្នំពេញបច្ចុប្បន្ន ព្រោះរម៉កកង់បីខ្មែរគឺត្រូវបានច្នៃប្រឌិតដោយខ្មែរ ដែលអាច ប្រើប្រាស់ក្នុងវិស័យទេសចរណ៍ដើម្បីដឹកភ្ញៀវទស្សនាក្នុងទីក្រុងភ្នំពេញ និងកន្លែងផ្សេងទៀត ម្យ៉ាងដើម្បីបង្កើនចំណូលដល់ពួកគាត់៕

ក្នុង​​ករណី​រំលោភ​មួយ​ដែល​ធ្វើ​ឲ្យ​ប្រជាពលរដ្ឋ​ភ្ញាក់​ផ្អើល​ខ្លាំង​នោះ ​គឺ​​ករណី​រំលោភ​សម្លាប់​ក្មេងស្រី​អាយុ​១៤​​ឆ្នាំ​ម្នាក់​នៅ​​ក្នុង​​បន្ទប់​​ជួល​​នៅ​សង្កាត់​ចោមចៅ​២ ខណ្ឌ​ពោធិ៍​សែន​ជ័យ​ ​រាជ​ធា​នី​​ភ្នំ​ពេញ​ កាល​​ពី​​ថ្ងៃ​​ទី​០១​ ​ខែ​កញ្ញា​ ឆ្នាំ​២០២០​ ​កន្លង​ទៅ​នេះ​។ ​ជន​រង​គ្រោះ​​ត្រូវ​​បាន​​ឃាតករ​​​ដែល​​​ជា​អ្ន​ក​ជិត​​ខាង​​អារ​ ក ​​សម្លាប់​​រួច​​រំលោភ​​តាម​​ក្រោយ​​ ​ខណៈពេល​​ម្ដាយ​​ជន​​រង​គ្រោះ​​បាន​​ទៅ​​ផ្សារ​វេលា​​ម៉ោង ៣:១៥ រសៀល។​​​

​ករណី​រំលោភ​ខាង​លើ​​ ជនសង្ស័យ​បាន​សារភាព​ពី​គ្រប់​ស​កម្មភាព​ដែល​ខ្លួន​បាន​ប្រព្រឹត្ត ហើយ​ចម្លើយ​សារភាព​នេះ​ក៏​ស៊ី​សង្វាក់​ជាមួយ​ភស្តុតាង​​ទាំងអស់​នៅ​កន្លែង​កើតហេតុ ដែល​បាន​ដក​ហូត​យក​មក​រក្សា​ទុ​ក​ផង​ដែរ។ នេះ​​បើ​​តាម​​ការ​បញ្ជាក់​​របស់​​នាយក​​ប្រ​តិបត្តិអង្គ​ភាព​​ការ​ពារ​កុមារ​ តាម​រយៈ​​​បណ្ដាញ​​សង្គម​​ហ្វេស​​ប៊ុក​។​

​ករណី​​​រំលោភ​កុមារី​នេះ ​បាន​បង្កើត​ជាចម្ងល់​​​​​ថា ​​តើ​​​ការ​​ស្លៀក​​​ពាក់​​ពិត​​ជា​​​​កត្តា​​​​ធ្វើ​​​ឲ្យ​​​មាន​​​ការ​​រំលោ​ភ​​​​ពិតមែន​ ​​ឬ​យ៉ាងណា​?

បន្ទាប់​​ពី​​មាន​​ការ​​ចោទ​​ជា​​ចម្ងល់​​ហើយ​​ក្នុង​​នោះ​​ កញ្ញា​ បុណ្យ រចនា នាយិកាអង្គការក្លាហាន បានលើក​ឡើង​ថា ទស្សនៈ​ដែល​លើក​ឡើង​ថា​ការ​ស្លៀក​ពាក់​ខ្លី​​ជា​មូល​ហេតុ​នៃ​ការ​រំលោភ គឺការ​​ខុស​ឆ្គង​​ដែល​មិន​បាន​​ឆ្លុះបញ្ចាំង​ឬស​គល់​បញ្ហា​អោយ​ពិត​ប្រាកដ​ទេ។

«ការ​លើក​ឡើង​នេះ​​ធ្វើ​អោយ​ស្ថាន​ភាព​បញ្ហា​នេះ​កាន់​តែ​ដុន​ដាម​ថែម​មួយ​កម្រិត​ទៀត ពី​ព្រោះ​វាជា​ការ​​រំលោភ​បំពាន​សិទ្ធិ​សេរីភាព​របស់​ស្រ្ដី​ក្នុង​ការ​សម្រេច​ចិត្ត​ការ​ស្លៀក​ពាក់»។

ចំណែក​អ្នក​​ស្រី​ ​​មួង​​ កញ្ញា​ ​​​​ប្រធា​នគម្រោង​​​​​របស់​​​​​អង្គ​ការ​​នារី​​​ដើម្បី​​សន្តិភាព​​ ​(Women​ ​Peace​ ​Maker)​ ​និង​​​ជា​​​ម្ចាស់​​គម្រោង​​​ជួយ​​ដល់​​​ស្រ្ដី​​នៅ​​តាម​​​សហគមន៍ ​លើកឡើង​ថា ​ស្រ្ដី​​​មួយ​​​ចំនួ​ន​​​នៅ​​​ខ្វះ​​ខាត​​​ចំ​ណេះ​​ដឹ​ង​​ និង​​​​ភាព​​​ក្លាហាន​​​​ដើម្បី​​​រក​​សិទ្ធិ​​​សេរីភាព​​​របស់​​​ខ្លួន​​​នៅ​​ពេល​​​ជួ​​ប​​​ប្រទះ​ប​ញ្ហា​​ ​ដោយសារ​​​​បារម្ភអំ​​​ពី​ភាព​​អសោច​​កេរ្ដិ៍ ជា​​​ជាង​​ការ​និយាយ​​​​ចេញ​​មក​។

​​​អ្នកស្រី​​បាន​​​ស្នើ​​​ទៅគ្រប់ភាគី​​​ពាក់​ព័ន្ធ​​​​ឲ្យ​បញ្ឈប់​ការ​បន្ទោស​ជន​រងគ្រោះ​​ថា​​រង​ការ​រំលោភ​បំពាន​ដោយសារ​ការ​ស្លៀក​ពាក់។​

«​ស្នើ​​សុំ​​​​បញ្ឈប់​​ការ​បន្ទោស​​ទៅ​​លើ​​​ជន​​រង​គ្រោះ​ដោយ​សារ​​គាត់​​ស្លៀក​ខ្លី ដើរ​លេង​​យប់​​ នៅ​ពេល​​​គាត់​​ទទួល​​រង​​ការ​បៀត​​បៀន​​ផ្លូវ​ភេទ ដោយ​​មិន​​​ដាក់​​គំនាប​​លើ​​ស្រ្ដី»។

​អ្នកស្រី មួង កញ្ញា បន្ថែម​ថា កម្ពុជា​មាន​ច្បាប់​ពាក់ព័ន្ធនឹង​អំពើ​ហិង្សាក្នុង​គ្រួសារ​ ប៉ុន្តែ​អ្នកស្រី​ថា​ច្បាប់​នេះ​ចែង​ទូលាយ​ ដោយ​​មិន​​បាន​​ពន្យល់​​​អំពី​​​ការ​បៀត​បៀន​​ ហើយនៅ​ពេល​ជន​រង​គ្រោះ​​គួរ​ធ្វើ​ដូច​ម្តេច​នៅ​ពេល​ដែល​ពួកគេ​ជួ​ប​​បញ្ហា​ជាដើម។ ​​ ​

«ពេលខ្លះ​ឃើញ​ក្នុង​ច្បាប់បាន​ចែង​​ថា​​ ​​ភាគី​​រំលោភ​អាច​​​សង​​សំណង​​​​ជា​ទឹក​ប្រាក់​​ដែល​​ធ្វើ​​​ឲ្យ​អ្នក​ប្រព្រឹត្ត​​​​គិត​​​ថា​​យក​​លុយ​​​សង​​គេ​ទៅ​​បាន​​ហើយ ដូច្នេះ​​​​ច្បា​ប់​​​គួរ​​តែ​​​ពង្រឹង​​​ឱ្យ​មាន​​ការ​​យល់​បន្ថែម​ទៅ​​លើ​​សង្គម​ទូទៅ​​ទាំងមូល​ដោយ​មាន​​ការ​បន្ថែម​​​​​​ឱ្យ​​​ពេញ​​លេញ»។

ទន្ទឹម​នឹង​ការ​កើត​មាន​ការ​រំលោភ​សេព​សន្ថវៈ និង​ការ​ប្រទាំង​ប្រទើស​គ្នា​លើ​ការ​យល់​ឃើញ​ពាក់​ព័ន្ធនឹងការ​ស្លៀកពាក់របស់​ស្រ្តី​រងគ្រោះ កាល​​ពី​ថ្ងៃ​ទី​១​ ខែសីហា​ ឆ្នាំ​២០២០ រដ្ឋាភិបាល​ក៏​បាន​បង្កើត​សេចក្តី​ព្រាង​ច្បាប់​ថ្មី​មួយ​ស្តី​ពី​សណ្តាប់​ធ្នាប់​សាធារណៈ ដោយ​ក្នុង​សេចក្តី​ព្រាង​ច្បាប់​ដែល​មាន​៨ជំ​ពូក​​ និង​៤៣​មាត្រា​នោះ​ បាន​ចែង​អំពី​ការ​ហាម​ឃាត់​ស្រ្តី​មិនឲ្យ​ស្លៀក​ពាក់​ស៊ិចស៊ី​ជ្រុល​ហួស​ហេតុ។

ក្នុង​សេចក្ដី​​ព្រាង​​ច្បាប់នោះ​​​បាន​​ចែង​​ថា​​ ស្រ្ដី​ត្រូវ​បាន​ហាមឃាត់​ការស្លៀក​ពាក់​ខ្លី​ពេក​ រហូត​ខើច​លើ​ខើច​ក្រោម ការស្លៀកពាក់​ស្ដើង​លេច​កេរ្តិ៍​ភេទ ឬ​ការស្លៀកពាក់​បង្ហាញ​ផ្នែក​ខ្លះ​នៃ​កេរ្តិ៍​ភេទ បុរស​មិន​ត្រូវ​ដោះអាវ​ឱ្យ​ខ្លួន​ទទេ​នៅ​ទី​សាធារណៈ ឬ​ស្លៀកតែ​ខោ​ទ្រនាប់​ដើម្បី​បង្ហាញ​កេរ្តិ៍​ខ្មាស។​ រដ្ឋាភិបាល​អះអាងថា គោល​​បំណង​​​នៃ​​សេចក្តី​​ព្រាង​​​ច្បាប់​​​នេះ​​គឺ​​ដើម្បី​​រ​ក្សា​​ប្រ​ពៃ​ណី​ជាតិ​ ​និង​​សេចក្ដី​​ថ្លៃ​ថ្នូរ​​របស់​​ប្រជា​ពល​រដ្ឋ​។

អ្នក​ស្រី មួង កញ្ញា លើកឡើង​ថា ការ​ចេញ​សេចក្ដី​ព្រាង​ច្បាប់​ថ្មី​ស្ដីពី​សណ្ដាប់​ធ្នាប់​សាធារណៈ គឺ​​កាន់​តែ​​ក្លាយ​​ជា​​គំនាប​​សង្គម​​ខ្លាំង​​ទៅ​​លើ​ស្រ្តី​ខ្មែរ​ ដែលលោក​ស្រី​ថា ​​នេះ​​​ជា​​ការ​បិទ​​​សិទ្ធិ​​សេ​រី​ភាព​​ទៅ​​លើ​​ពួក​គេ​។​ លោក​ស្រី​​បន្ត​ថា​ គំនាប​​នេះ​​អាច​​ក្លាយ​​ជា​​បញ្ហា​​ប៉ះ​ពាល់​ដល់​​សុខ​ភាព​​ផ្លូវ​ចិត្ត​​​របស់​ស្រ្តី​​ផង​​ដែរ​។​

​​​លោកស្រី​ក៏​បាន​​​​សំ​ណូម​ពរ​​​ទាក់​ទង​​នឹង​​សេចក្ដី​​ព្រាង​ច្បាប់​​ថ្មី​​​នេះ​ថា​​៖ «ក្រសួង​​ពាក់​ព័ន្ធ ​ឬ​​​ច្បាប់​​ណា​មួយ​​គួរ​​ពិចារណា​​ឡើង​​វិញ ​ដើម្បី​​កែ​សម្រួល​​ចំណុច​​​​​ដែល​ទាក់ទង​​នឹង​​សេរីភាព​​នៃ​​ការ​ស្លៀក​ពាក់​ដើម្បី​​ឱ្យ​​​​ស្រ្ដី​មាន​​សិទ្ធិ​សេរីភាព​​ពេញ​លេញ​បង្ហាញ​ពី​​សេរីភាព និង​អារម្មណ៍​របស់​គាត់»។

អ្នក​នាំ​ពាក្យ​​ក្រ​សួង​កិច្ច​ការ​នារី​ប្រាប់​ Newsroom Cambodia ដោយ​សុំ​មិន​បញ្ចេញ​ឈ្មោះ​​​​ថា​ ករណី​​រំ​លោ​ភ​​​ដែល​​​ជន​​រង​គ្រោះត្រូវ​​បាន​​គេ​​ចោទ​​ថា​​មក​​​​ពី​​ការ​ស្លៀក​​ពាក់​ គឺ​គ្រាន់​​តែ​​ជា​​លេស​របស់​​ជន​​ប្រ​ព្រឹត្ត​តែប៉ុណ្ណោះ។

ក្នុង​នោះ​លោក​បាន​មាន​ប្រសាសន៍​ថា​​៖ «ការ​ចោទ​ប្រកាន់​រឿង​ស្លៀក​ពាក់​ខ្លី​ហ្នឹង​គឺ​គ្រាន់​តែ​ជា​លេស​ទេ​ ព្រោះ​​ការ​ចោទ​ប្រកាន់​អី​អស់​ហ្នឹង​សុទ្ធ​តែ​ជា​ការ​យល់​ឃើញ​របស់​មហា​ជន​ទេ ដូច្នេះ​តុលាការ​គេ​ធ្វើ​តាម​ច្បាប់​ដែលបាន​ចែង​​»។​​​​ បើ​តាម​របាយការណ៍​​សមា​គម​ការ​ពារ​​​សិទ្ធិ​​មនុស្ស​ និង​អភិវឌ្ឍ​ន៍​​នៅ​​កម្ពុជា​ (ADHOC) ករណី​រំ​លោភ​​​​​​សេព​សន្ថវៈ​មាន​ចំ​នួន​៩៣​ករណី​  ​គិត​ពី​ខែ​មករា ​ដល់​សីហា ​ឆ្នាំ​២០២០​នេះ​ ក្នុង​នោះ​ជន​រង​គ្រោះ​​មាន​​ចំ​នួន​៩៨​នាក់​។​ បើ​​ធៀប​​នឹង​ឆ្នាំ​២០១៩ ករណី​រំលោ​ភ​សរុប​មាន​​ចំ​នួន​១២៨​​ករណី​ ហើយ​ក្នុង​​នោះ​​​ជន​​រង​គ្រោះ​​មាន​​ចំ​នួន​​១៣៤​​នាក់​៕

ឈានដល់ក្នុងវ័យ៦៨​ឆ្នាំហើយ ​ក្នុងពេលបច្ចុប្បន្ននេះ ការរើសអើងនេះនៅតែមានបន្តមកលើ​អ្នកស្រលាញ់​ភេទ​ដូច​គ្នា លោកផេង សាញ់ ក៏បានច្នៃ​ធ្វើ​ក្រមាមាន​​ពណ៌​ជា​​ឥន្ទធនូ ដែលជាពណ៌តំណាងឱ្យភាពចម្រុះនៃអ្នកស្រលាញ់ភេទដូចគ្នា នៅជុំវិញពិភពលោក។

លោក​ បានមាន​​ប្រសាសន៍​ក្នុងកិច្ចសម្ភាសន៍ដូច្នេះថា៖ ​«​គោល​បំណង​ខ្ញុំ​នៃ​ការ​បង្កើត​ក្រមា​៦​ពណ៌​នេះ​ឡើង ​ដើមី្ប​បង្ហាញ​ថា​ក្រុម​មនុស្ស​ស្រលាញ់​ភេទ​ដូច​គ្នា ​ក៏​រស់​នៅ​ក្នុង​ភព​ផែនដី​នេះ​ដែរ ​យើង​គួរ​តែ​ផ្តល់​សិទ្ធិ​ និង​ឲ្យ​តម្លៃ​ឲ្យ​ដូច​អ្នក​ស្រលាញ់​ភេទ​ផ្ទុយ​គ្នា​»​។

តាំងតែវ័យកុមារមកម្ល៉េះ លោក ផេង សាញ់ តែងតែចូលចិត្តលេងល្បែងបែបក្មេងប្រុសៗ ស្លៀកពាក់បែបក្មេងប្រុស និងចូលចិត្តសាងភាពស្និទ្ធស្នាលជាមួយក្មេងស្រី។

លោកបានបន្ដទៀតថា នៅពេលរៀបការក្នុងសម័យសង្គមរាស្រ្តនិយម គ្រួសាររបស់លោក ពុំបានដឹងថាគាត់ជាបុគ្គលដែលស្រឡាញ់ភេទដូចគ្នានោះទេ ហើយការរៀបការនោះគឺដោយសារតែប្រពៃណីតម្រូវឲ្យគាត់មានគ្រួសារ បំពេញមុខមាត់ឲ្យគ្រួសារ ក្នុងនាមជាកូនស្រីនៅពេលនោះ។

អាពាហ៍ពិពាហ៍របស់លោកផេង សាញ់ និងស្វាមីគាត់ក៏បានឈានដល់ទីបញ្ចប់ ហើយពួកគាត់ក៏មានកូនមួយផងដែរ។

គាត់ក៏បានចាប់ផ្ដើមបង្ហាញទំនាក់ទំនងរបស់គាត់ជាមួយស្រីដូចគ្នា ទៅកាន់គ្រួសារ និងសង្គមបានដឹងនៅរវាងឆ្នាំ ១៩៨២ នៅពេលដែលគាត់មានអាយុប្រហែលជា៣០ឆ្នាំ ដែលពេលនោះគាត់ទទួលបាននូវការរើសអើងយ៉ាងខ្លាំងពីសំណាក់ក្រុមគ្រួសាររបស់គាត់ផងដែរ។

គាត់បានមានប្រសាសន៍ថា៖ ‌‌«ពេលនោះ ម៉ែឳ បងប្អូន អត់ថាជាប្ដីប្រពន្ធនឹងគ្នាទេ គេថាពួកម៉ាក ឯបងប្រុសវិញមិនមើលខ្ញុំផង»។

សព្វ​ថ្ងៃ​​រស់​នៅ​ក្នុង​ភូមិ​ព្រែក​បង្កង ​ឃុំ​ព្រែក​តា​កូវ ​ស្រុក​ខ្សាច់​កណ្តាល​ ខេត្ត​កណ្តាល​ លោកផេង សាញ់​ រស់នៅជាមួយកូនរបស់គាត់ បន្ទាប់ពីប្រពន្ធរបស់គាត់បានទទួលអនិច្ចកម្មកាលពីបីឆ្នាំមុន។

លោក ក៏​បាន​បង្កើត​មុខ​របរ​ត្បាញ​ក្រមា​ធម្មតានៅឆ្នាំ២០០៩​ ហើយបន្ទាប់​មក​បាន​ច្នៃ​មកជា​ក្រមា​៦​ពណ៌​ នៅ​ឆ្នាំ​២០១៧​។ ក្រមា​ទាំង​នោះ​ត្រូវ​បាន​ត្បាញ​ឡើង​ដោយ​អ្នក​ភូមិ​រស់​នៅ​ក្នុង​តំបន់​នោះ​។

​សកម្ម​ជន​ការ​ពារ​សិទ្ធិ​អ្នក​ស្រលាញ់​ភេទ​ដូច​គ្នា​បាននិយាយថា​ ស្ថាន​ភាព​នៃការ​ស្រលាញ់​ភេទ​ដូច​គ្នា​ ​មាន​ភាព​វិជ្ជ​មាន​ជា​ច្រើនក្នុង​រយៈ​ពេល​ចុង​ក្រោយនេះ ​ពីព្រោះអ្នកខ្លះ​កាន់​តែ​មាន​ភាព​ក្លាហាន​ក្នុង​ការ​បង្ហាញ​មុខជាសាធារណៈ និងមាន​ការ​គាំ​ទ្រ​ពី​គ្រួសារ ​ក៏​ដូច​ជា​សង្គម​ទាំង​មូលដែរ។

ការការពារ និងគាំពារពី​អង្គការ​ជាតិ ​និង​អន្តរ​ជាតិក៏ជាកត្តាចូលរួមចំណែកធ្វើឲ្យប្រសើរឡើងផងដែរ​។

សកម្ម​ជន​ការ​ពារ​សិទ្ធិ​អ្នក​ស្រលាញ់​ភេទ​ដូច​គ្នា លោក​គុយ ធីតា​ ដែលមានភេទតាមជីវសាស្រ្តជាស្រី អាយុ​ ២៩ឆ្នាំ បាននិយាយដូច្នេះថា៖ ​«​តែយ៉ាងណាក៏នៅតែ​​មាន​បញ្ហា​ប្រឈម​ជា​ច្រើន​ដែលអ្នក​ស្រលាញ់​ភេទ​ដូច​គ្នាជួបប្រទះ  និង​ត្រូវដោះ​ស្រាយដែរ»។​

​លោក គុយ ធីតា ​បានយល់ថា ​របរ​ត្បាញ​ក្រមា​ឥន្ទធនូនេះ ជា​មុខ​របរ​​ដែល​សុចរិត ហើយ ​ ​ផ្ដល់​​ការ​ងារ​ដល់​អ្នក​ស្រលាញ់​ភេទ​ដូចគ្នា​ដទៃ​ទៀតដែរ​។

​​លោក​បាន​បញ្ជាក់​ទៀត​ថា៖​ «​វា​មិន​ត្រឹម​តែ​ជួយ​ដល់​ការ​រក​ប្រាក់​ចំណូល ​និង​ជួយ​ឲ្យសេដ្ឋកិច្ច​មាន​ភាព​ប្រសើរ​ឡើង​ទេ ​ថែម​ទាំង​លើក​កម្ពស់​ដល់សិទ្ធិ​អ្នក​ស្រលាញ់​ភេទ​ដូចគ្នា​តាម​យៈ​ក្រមា​ឥន្ទធនូ​នេះ​ផង​ដែរ​»​។

អ្នកស្រី សុភ័ណ លីនណា អាយុ ២៧ ឆ្នាំ ជាអ្នកត្បាញក្រមាឥន្ទធនូម្នាក់ បានសម្ដែងនូវអារម្មណ៍សប្បាយរីករាយពេលដែលបានចូលរួមធ្វើក្រមាឥន្ទធនូនេះឡើង និងចង់ចូលរួមលើកកម្ពស់សិទ្ធិអ្នកស្រឡាញ់ភេទដូចគ្នា។

គាត់បាននិយាយថា៖ «ក្រមាឥន្ទធនូមើលទៅស្អាត​ ហើយសម្គាល់ពីក្ដីស្រឡាញ់នៃអ្នកស្រឡាញ់ភេទដូចគ្នា»។​

គាត់បានបន្ថែមថា​ ការត្បាញក្រមាឥន្ទធនូនេះ ពិតជាបានលើកកម្ពស់សិទ្ធិអ្នកស្រឡាញ់ភេទដូចគ្នា ហើយបើទោះបីជាគាត់មិនមែនជាអ្នកស្រឡាញ់ភេទដូចគ្នា និងមុខរបរនេះបានផ្ដល់កម្រៃតិចតួចសម្រាប់ផ្គត់ផ្គង់គ្រួសារគាត់ក៏ដោយ ក៏គាត់សប្បាយចិត្ត នឹងត្បាញក្រមាឥន្ទធនូនេះដែរ។

ក្រឡេកមកមើលមុខរបររបស់លោក ផេង សាញ់ វិញ គឺបាន​ជួប​បញ្ហា​ជា​ច្រើន ​ដូច​ជា​ភាព​រាំង​ស្ទះ​នៃ​ទី​ផ្សារ​ និង​ការ​លក់​ចេញ​ ដែលត្រូវលក់ឲ្យអស់ប្រមាណ ​២០០០​ក្រមា ​ទើប​អាច​​បាន​​ប្រាក់​ចំណេញ។ ​

ផល​វិបាក​ដ៏​ធំ​នោះ​ បើយោងតាមលោក ផេង សាញ់ គឺមកពីជំងឺកូវីត ​១៩ ដែល​បាន​ធ្វើ​ឲ្យ​អតិថិជន​សម្រេច​ចិត្ត​ផ្អាក​ការ​ទិញ​ក្រោយ​ពី​កម្ម៉ង់​ក្រមា ធ្វើ​ឲ្យគាត់​សល់​ជាង​១០០០​ក្រមាដែល​លក់​មិន​ចេញ​។​

លើសពី​នេះ​ លោកក៏បាន​លើកពី​ផល​វិបាក​មួយ​ចំនួន​ទៀត​ដូច​ជា​ខ្វះ​ខាត​ថវិកា​សម្រាប់​អ្នក​ត្បាញ​ ហើយ​មនុស្ស​ភាគ​ច្រើន​ឲ្យតម្លៃ​ ក្រមា​របស់​គាត់​ត្រឹមតែ ​១០០០​ ទៅ ​២០០០​រៀល​​ ដែលតាមពិត ​ក្រមា​មួយ​ត្រូវ​ចំណាយ​ពេល​យ៉ាង​តិច​២​ថ្ងៃ ​ក្នុង​ការ​ផលិត ​ថែម​ទាំង​ពិបាក​រក​អ្នក​ត្បាញ​ដោយ​សារ​ទទួល​បាន​កម្រៃ​ទាបទៀតផង​៕

ក្រសួងការងារ និងបណ្តុះបណ្តាលវិជ្ជាជីវៈ បាននិយាយក្នុងសេចក្តីប្រកាសព័ត៏មានថា ក្រុមប្រឹក្សាជាតិប្រាក់ឈ្នួលអប្បបរមា ដែលជាយន្តការត្រីភាគីមានរដ្ឋាភិបាល សហជីព និង និយោជក បានឯកភាពគ្នា ជាឯកច្ឆន្ទគាំទ្រប្រាក់ឈ្នួលក្នុង១ខែ ១៩០ដុល្លារដដែល ដូចឆ្នាំ២០២០ ដោយឡែកការដំឡើង២ដុល្លារ គឺបានពីនាយករដ្ឋមន្ត្រី។

ក្រសួងបាននិយាយក្នុងសេចក្តីប្រកាសព័ត៏មានដូច្នេះថា៖ «យោងរបាយការណ៏របស់…រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ …ហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចបន្ថែមទឹកប្រាក់ចំនួន២ (ពីរ) ដុល្លារអាម៉េរិក លើទឹកប្រាក់ចំនួន ១៩០ (មួយរយកៅសិប) ដុល្លារអាម៉េរិក‍»។

ក្រសួងបានបន្តថា៖ «ដូច្នេះចាប់ពីថ្ងៃទី១ ខែមករា ឆ្នាំ២០២១ កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង នឹងមានប្រាក់ឈ្នួលអប្បបរមាចំនួន ១៩២ (មួយរយកៅសិបពីរ) ដុល្លារអាមេរិក ក្នុងមួយខែ ចំពោះកម្មករនិយោជិតពេញសិទ្ធិ និងចំនួន ១៨០ (មួយរយប៉ែតសិបប្រាំពីរ) ដុល្លារអាម៉េរិក ក្នុងមួយខែ ចំពោះកម្មករនិយោជិតសាកល្បង»។

លោក អាត់ ធន់ ប្រធានសហភាពការងារកម្ពុជា បាននិយាយថាការកើនឡើងប្រាក់ឈ្នួល២ដុល្លារនេះគឺវា «តិចតួច» ដែលធ្វើឲ្យកម្មករនិយោជិត មិនអាចដោះស្រាយនូវជីវភាពពួកគាត់បានទេ ចំពេលដែអតិផរណាមាប្រហែល៣ភាគរយ។

លោក អាត់ ធន់ បាននិយាយដូច្នេះថា៖ «បានន័យថាពួកគាត់នៅតែពិបាករស់នៅដដែល ព្រោះជាចំនួនដែលទាបមែនទែន»។

លោកបានបន្តទៀតថា ខាងសហជីព បានស្នើទៅក្រសួងការងារឲ្យដំឡើងចំនួន១២,៣៥ដុល្លារដល់កម្មករនិយោជិត ប៉ុន្តែមិនបានជោគជ័យ ហើយបានអះអាងថាកម្មករមិនពេញចិត្តនឹងការដំឡើងលើកនេះទេ។

លោក អាត់ ធន់ បានអះអាងដូច្នេះថា៖ «ពួកគាត់ទាមទារឲ្យមានការតំឡើងខ្ពស់ជាងនេះបន្តិច។ ជាទូទៅប្រាក់ឈ្នួលតិច ប្រសិនបើរដ្ឋាភិបាលអាចបញ្ចុះតម្លៃថ្លៃទឹក ថ្លៃភ្លើង អាហារហូបចុក និងសម្ភារៈផ្សេងៗ គិតថាវាជាការល្អ ប៉ុន្តែបើរាល់ទំនិញនៅតែថ្លៃដដែល ហើយប្រាក់ឈ្នួលតិច វាមិនអាចធ្វើអ្វី ឫអាចជួយអ្វីបានឡើយ»។

អ្នកនាងស្រេង សុខខុន អាយុ ៣៤ឆ្នាំ កម្មការីរោងចក្រកាត់ដេរឈ្មោះ សាង ហ្វូ បានលើកសំណូមពរកុំឲ្យមានការឡើងថ្លៃឈ្នួលផ្ទះនៅឆ្នាំក្រោយពីព្រោះតែប្រាក់ឈ្នួលនឹងកើនតែ២ដុល្លារ។

អ្នកនាងស្រេង សុខខុនបាននិយាយថា៖ «ខ្ញុំសំណូមពរកុំឲ្យមានការកើនឡើងនូវតម្លៃថ្លៃផ្ទះជួល អាហារហូបចុក ថ្លៃទឹក ថ្លៃភ្លើងបន្តទៀត ណាមួយរោងចក្រមួយចំនួនត្រូវបានបិទ កម្មករគ្មានការងារធ្វើទេ»។

គាត់បានបន្តថា៖ «សម្រាប់កម្មករទាំងអស់មិនមានការពិតចិត្តទេ ព្រោះរាល់ដង ការតំឡើងប្រាក់ឈ្នួលធ្លាប់តែតំឡើងច្រើន ឥឡូវមកបន្ថែមត្រឹម២ដុល្លារ គឺវាវេទនាណាស់»៕

ការលិចទឹក បង្កផលវិបាក​យ៉ាង​ខ្លាំង​ចំពោះប្រជាជន ​និង​ធ្វើឱ្យប៉ះពាល់យ៉ាងខ្លាំងដល់ជីវភាពរស់នៅ ​ព្រមទាំងមានបញ្ហាសុខភាពផ្សេងៗ។

សំណួរ​ទាំង​៣​នេះ ត្រូវ​បាន​សួរ​ទៅ​កាន់​ប្រជាពលរដ្ឋ​ដែល​រស់​នៅ​តំបន់​ដែលប៉ះពាល់​ដោយ​ការ​លិច​ទឺក​៖​

១.​តើ​មាន​ផល​ប៉ះ​ពាល់​អ្វី​ខ្លះ​ចំពោះ​ការ​លិច​ទឹក​?​

២.​​​​​តើ​យល់​ឃើញ​យ៉ាង​ណា​ចំពោះ​បញ្ហា​ទាំង​នេះ​? ហើយ​ស្ថានភាព​នេះ​មាន​ជា​រៀង​រាល់​ឆ្នាំ​ ឫ​យ៉ាង​ដូច​ម្ដេច​ដែរ​?​

៣.​តើ​អ្នក​មាន​សំណូមពរ​ទៅ​កាន់​សាលា​ក្រុង​ ឫមន្រ្តី​ពាក់ព័ន្ធ​អ្វី​ខ្លះ​?​

….

កញ្ញាស្រី មាស អាយុ២៦ឆ្នាំ មុខរបរជាអ្នកលក់ដូរ នៅម្ដុំវត្តសន្សំកុសល

«ផលវិបាក​នៅ​ពេល​មាន​ភ្លៀង​ធ្លាក់​ម្ដងៗ​ មាន​ការ​លំបាក​ខ្លាំង​ដោយ​សារ​ការ​ស្ទះ​លូ​​ដែល​ធ្វើ​​ឲ​្យទឹក​ច្រាល​ឡើង​បង្ក​ឲ្យ​មាន​​ក្លិន​ស្អុយ​ ប៉ះពាល់​ដល់​បរិស្ថាន​ និង​សុខភាព​ខ្លាំង​មែន​ទែន ​ហើយ​ក៏​មាន​ការ​ប៉ះពាល់​ដល់​ការ​រកស៊ី​របស់​ខ្ញុំដែរ​»។

«អ្នក​ដំណើរ​ធ្លាប់​តែ​ឆ្លង​កាត់​តំបន់​នេះ​មក​មិន​រួច​ ធ្វើ​ឲ្យ​អីវ៉ាន់​របស់​ខ្ញុំ​អេ លក់​មិន​ដាច់​»។

«ខ្ញុំយល់ឃើញថាមូលហេតុបណ្ដាលឲ្យមានបញ្ហានេះ បណ្ដាលមកពីការទុកដាក់សំរាមរបស់ប្រជាពលរដ្ឋមិនមានការវេចខ្ចប់ត្រឹមត្រូវ និងទាក់ទងជាមួយបញ្ហាប្រព័ន្ធស្ទះលូ ហើយស្ថានភាពកើតឡើងរៀងរាល់ឆ្នាំ ប៉ុន្តែសម្រាប់ឆ្នាំនេះ លិចខ្លាំងជាងរាល់ដង»។

«ជាចុងក្រោយ ខ្ញុំសំណូមពរទៅកាន់ប្រជាពលរដ្ឋ ចេះទុកដាក់សម្រាមឲ្យបានត្រឹមត្រូវ និងមន្ត្រីពាក់ព័ន្ធធ្វើការស្តារប្រព័ន្ធលូឡើងវិញ»។

….

លោក ភាង វិបុល អាយុ ២៥ឆ្នាំ មុខឮរបរជាអ្នករត់ តាក់ស៊ី នៅម្ដុំផ្សារដើមគ

«ផលវិបាក​នៃ​ការ​លិច​ទឹក​ធ្វើ​​ឲ​ខ្ញុំ​ពិបាក​ក្នុង​ការ​ធ្វើដំណើរ​ទៅ​យក​ម៉ូយ​ វា​អាច​បណ្ដាល​​ឲ​ទឹក​ចូល​ក្នុង​រថយន្ត​ដែល​ជា​បញ្ហា​ឆ្លង​ដល់​ចរន្ត​អគ្គិសនី ​បណ្តាល​ឱ្យ​រថយន្ត​ខូចខាត​ពេល​រកស៊ី​ ភ្ញៀវ​ក៏​មាន​ការ​ធ្លាក់​ចុះ​»។

​​«ចំពោះ​ស្ថានភាព​ទាំង​នេះ​ បណ្ដាល​មក​ពី​ការ​ចោល​សំរាម​ពាស​វាល​ ពាស​កាល​របស់​ប្រជាពលរដ្ឋ​ ដែល​ឆ្លង​កាត់​ និង​លក់​ដូរ​នៅ​តំបន់​ផ្សារ​ដើមគរ​ ដូច្នេះ​ពេល​ភ្លៀង​ធ្លាក់​ ធ្វើ​ឲ​្យសំរាម​ហូរ​ទៅ​ក្នុង​លូ​ ទើប​បណ្ដាល​អោយ​លូ​ស្ទះ​ ទឹកហូរ​មិនទាន់​ ហើយ​បញ្ហា​នេះ​តែង​តែ​កើត​មាន​រាល់​ពេល​ភ្លៀង​ខ្លាំង​»។​

«ខ្ញុំ​មាន​សំណូមពរ​ទៅ​កាន់​សាលាក្រុង​ និងអាជ្ញាធរ​ជួយ​ដោះស្រាយ ​ដោយ​មាន​ការ​បូម​លូ​ និង​សម្អាត​សំរាម​ក្នុង​ការ​ទប់ស្កាត់​ កុំ​​ឲ្យស្ទះ​»។

….

លោកចាន់ ប៊ុនហេង អាយុ ៥២ឆ្នាំ មុខរបរជាអ្នករត់កង់បីឥណ្ឌា ម្ដុំផ្សារដើមគ

«ចំពោះ​ផល​វិបាក​នៃ​ភ្លៀង​លិច​គឺ​ធ្វើ​​ឲ្យ​អ៊ំ​មិន​បាន​រត់​រ៉ឺម៉ក​ទេ​ ព្រោះ​តែ​ភ្លៀង​លិច​ផ្លូវ​ អញ្ចឹង​​ត្រូវ​រង់​ចាំ​ទាល់​តែ​ទឹក​ស្រក​អស់ បាន​រត់​វិញ​ ដោយ​សារ​ខ្លាច​ប៉ះពាល់​ដល់​គ្រឿង​ម៉ាស៊ីន​ដែរ​»។

«​សម្រាប់​អ៊ំ​យល់​ឃើញ​ថា​ ឲ្យ​តែ​ពេល​ភ្លៀង​មក​លិច​ អាច​បណ្ដាល​មក​ពី​បញ្ហា​ស្ទះ​លូ​ និង​បញ្ហា​សំរាម​ គ្មាន​ទំនុក​បម្រុង​ក្នុង​ការ​កាយ​សំរាម​ចេញ​ពី​មាត់​លូ​»។

«​សម្រាប់អ៊ំ អ៊ំ​មិន​ដឹង​ថា​សំណូមពរ​បែប​ណា​ទេ ព្រោះ​ថា​អ្នក​ដែល​ចុះមក​ ​ក៏​ឃើញ​ស្រាប់​ហើយ​តាំង​តែ​ពី​កូវីដ​មក អ៊ំ​ក៏​រក​មិន​សូវ​បាន​ដែរ​»។

….

កញ្ញា​យង់​ ដា​​​​លីន​​​​​ អាយុ​​ ២៨ឆ្នាំ​ អ្នកលក់ដូរ​ នៅ​ម្តុំ​បឹងទំពន់​

«ចំពោះ​អ្នក​លក់​ដូរ​ដូច​ជា​ខ្ញុំ​ វា​មាន​ផលលំបាក​ខ្លាំង​ណាស់​ព្រោះ​បង្កឱ្យ​មាន​កខ្វក់​បរិស្ថាន​ ឬ​កខ្វក់​មុខ​ផ្ទះ​ខ្ញុំ​ ធ្វើ​ឱ្យ​​អ្នក​ទិញ​គាត់​មក​មើល​ឃើញ​ថា​មាន​ភាព​កខ្វក់​អញ្ចឹង​ គាត់​អត់​ហ៊ាន​ញ៉ាំ​របស់​យើង​អញ្ចឹង​​។​ នៅ​ម្តុំ​នេះ​ឲ្យ​តែ​មាន​ភ្លៀង​ គឺ​លិច​ហ្មង​ វា​លិច​រាល់​ឆ្នាំ​»​​​។​

«សំណូមពរ​ឱ្យ​មន្ត្រី​ដែល​ពាក់ព័ន្ធ​​​នៅ​កន្លែង​នេះ​ ឱ្យ​ពួ​ក​គាត់​ជួយ​សម្អាត​លូ​ កុំ​ឱ្យ​បង្កលិច​ថ្ងៃ​ក្រោយ​​ទៀត​​អញ្ចឹង​»។

….

អ្នកស្រី​​​ ​ទួន​ សុផាត​ អាយុ៦៨​ អ្នក​លក់​ភេសជ្ជៈ ម្ដុំ​ផ្សារ​ដើមគ​​

«វា​ប៉ះពាល់​ខ្ញុំ​លក់ដូរ ​រកស៊ី​ ពេល​ភ្លៀង​មក​អណ្តែត​អាធុង​ទឹក​ហ្នឹង​។​ ឡាន​គេ​បើក​មក​ត្រឹម​នេះ​ៗ​ (ចង្កេះ)​ វា​លិច​ វា​​ពិបាក​ហ្មង​ និយាយ​រួម​ពិបាក​ហ្មង»។

«​ទឹកស្អុយ​អណ្តែត​មក​ទាល់​តែ​អស់​វិញ​ទៅ​ ខ្ញុំ​មិន​ដឹង​ដែរ​ អត់​ចេះ​អត់​ដឹង​ទេ​កន្លែង​ហ្នឹង​​ បើ​ភ្លៀង​តិច​វា​អត់​លិច​ទេ​កូន​ តែ​បើ​ភ្លៀង​ធំបាន​លិច​។ មាន​តែ​សំណូម​ពរ​ធ្វើ​ម៉េច​កុំ​ឱ្យ​តែ​ភ្លៀង​មក​លិច​អញ្ចឹង​ទៅ​ណា​កូន​ រៀប​ចំ​ឱ្យ​បាន​ប្រជាជន​រកស៊ី​ស្រួល​បួល​ វា​អរ​ណាស់​ហើយ​»។