ស៊ុន លួត (Sun Lout) – Newsroom Cambodia

Q&A: ការប្រើប្រាស់ប្រព័ន្ធផ្សព្វផ្សាយនៅកម្ពុជា

ស៊ុន លួត (Sun Lout) — Mon, 06 Dec 2021 10:39:14 +0000

Newsroom Cambodia បានសម្ភាសន៍អ្នកស្រី សាក់ កន្និកា មន្រ្តីតស៊ូមតិផ្នែកសិល្បៈនៃអង្គការកម្មវិធីអភិវឌ្ឍន៍យុវជនហៅកាត់ថា YRDP។ អ្នកស្រីបានផ្ដល់បទសម្ភាសដល់សិក្ខាកាម Newsroom Cambodia លោក ស៊ុន លួត អំពីការប្រើប្រាស់ប្រព័ន្ធផ្សព្វផ្សាយនៅកម្ពុជា។

Q: ជម្រាបសួរអ្នកស្រី,

A: ចា៎! ជម្រាបសួរ។

Q: ខ្ញុំសូមសួរអ្នកស្រីថា តើអ្វីទៅជាប្រព័ន្ធផ្សព្វផ្សាយ?

A: សម្រាប់ខ្ញុំ ប្រព័ន្ធផ្សព្វផ្សាយបើហៅជាភាសាអង់គ្លេស (Media) គឺជាច្រក ឬកម្មវិធីផ្សេងៗនៃពត៌មាន កម្មវិធីកម្សាន្ដ ការធ្វើទីផ្សារ ឬមាតិកាផ្សេងៗទៀតត្រូវបានចែកចាយ ដូចជាទស្សនាវដ្ដី កាសែត និងផ្ទាំងបដាជាដើម ដោយសារតែសម័យទំនើបប្រព័ន្ធផ្សព្វផ្សាយ បានផ្លាស់ប្ដូរពីវិទ្យុ និងទូរទស្សន៍មកលើ អ៊ីនធឺណិត ឬប្រើប្រាស់ប្រព័ន្ធផ្សព្វផ្សាយដូចជាហ្វេសប៊ុកដើម្បីចែកចាយគំនិតផ្សេង។

Q: អ្នកស្រី តើអ្នកប្រើប្រព័ន្ធផ្សព្វផ្សាយមានប៉ុន្មានភាគរយដែរ?

A: តាមការសិក្សាកន្លងមក អ្នកប្រើប្រាស់ប្រព័ន្ធផ្សព្វផ្សាយនៅកម្ពុជាមានប្រមាណជា៩០% នៃអ្នកប្រើទាំងក្មេងជំទង់ និងវ័យចំណាស់។

Q: អ្នកស្រីតើប្រព័ន្ធផ្សព្វផ្សាយ និងប្រព័ន្ធផ្សព្វផ្សាយសង្គមវាមានលក្ខណ: ដូចគ្នាឬក៏ខុសគ្នាដែរ?

A: បើនិយាយអំពីប្រព័ន្ធផ្សព្វផ្សាយ ឬប្រព័ន្ធផ្សព្វផ្សាយសង្គមវាខុសគ្នា។ សម្រាប់អ្វីដែលខ្ញុំមើលឃើញ ប្រព័ន្ធផ្សព្វផ្សាយគឺសំដៅទៅលើការទាក់ទងជាមួយនឹងហ្វេសប៊ុក ទូរទស្សន៍ ឬវិទ្យុ ឬក៏កម្មវិធីផ្សព្វផ្សាយមួយចំនួន។ ប៉ុន្ដែបើនិយាយពីប្រព័ន្ធផ្សព្វផ្សាយសង្គម ខ្ញុំមើលឃើញថាវាជាប្រភេទវែបសាយមួយចំនួន ឬក៏កម្មវិធីដែលធ្វើឱ្យយើងបង្កើតមាតិការ ឬក៏កម្មវិធីអីសម្រាប់ធ្វើការចែករំលែកព័ត៌មាន ឬក៏ចំណេះដឹង និងទស្សន:អីផ្សេងជាដើម។ នេះជាការយល់ឃើញរបស់ខ្ញុំ។

Q: តើអ្នកស្រីយល់យ៉ាងណាដែរចំពោះការប្រើប្រាស់ប្រព័ន្ធផ្សព្វផ្សាយនៅកម្ពុជា?

A: សម្រាប់ការយល់ឃើញរបស់ខ្ញុំចំពោះប្រើប្រាស់ប្រព័ន្ធផ្សព្វផ្សាយនៅកម្ពុជានាពេលបច្ចុប្បន្ននេះ យើងមើលឃើញថាហាក់បីដូចជាមានសក្កានុពល ឬក៏មានឥទ្ធិពលខ្លាំងទៅលើប្រជាពលរដ្ឋ ឬយុវជននៅកម្ពុជា ដោយសារតែបរិបទនៃជំងឺកូវីដ-១៩ផងនោះ មិនថាទាំងការរៀន និងការទំនាក់ទំនងការងារ ភាគច្រើនគឺប្រព័ន្ធផ្សព្វផ្សាយ និងប្រព័ន្ធទំនាក់ទំនងសង្គមជាចម្បង។

Q: អ្នកស្រីគិតថាប្រព័ន្ធផ្សព្វផ្សាយនៅកម្ពុជាមានភាពល្អប្រសើរហើយឬនៅ?

A: បើនិយាយអំពីប្រព័ន្ធផ្សព្វផ្សាយនៅកម្ពុជាខ្ញុំមើលឃើញថានៅមិនទាន់មានលក្ខណៈល្អប្រសើរនៅឡើយទេ ព្រោះការដើរឱ្យទាន់ភាពជឿនលឿននៃបច្ចេកវិទ្យា ឬក៏ប្រព័ន្ធផ្សព្វផ្សាយក្នុងសង្គមនៅក្នុងប្រទេសកម្ពុជារបស់យើងនៅមានកម្រិត ជាពិសេសគឺខ្វះខាតទាក់ទងនៃក្រមសីលធម៌នៃការប្រើប្រាស់ពិត។

Q: តើលោកស្រីគិតមកដល់បច្ចុប្បន្នការប្រើប្រាស់ប្រព័ន្ធផ្សព្វផ្សាយមានផលប៉ះពាល់ដល់យុវជនខ្លាំងដែរទេ?

A: ពិតណាស់ទាក់ទងជាមួយនឹងការប្រើប្រាស់ប្រព័ន្ធផ្សព្វផ្សាយនាពេលបច្ចុប្បន្ន វាពិតជាមានផលប៉ះពាល់ខ្លាំងមែនទែនសម្រាប់យុវជន។ យើងមើលឃើញថានៅលើបណ្ដាញទំនាក់ទំនងសង្គមមានការចែករំលែកគ្រប់រូបភាព មិនថាទាំងចំណេះដឹង មិនថាជាការបំពុល តាមរយៈការផ្សព្វផ្សាយផលិតផល ការចែករំលែករូបភាពអាសអាភាស ក៏ដូចជាសារមួយចំនួនដែលពោរពេញទៅដោយហិង្សារផងដែរ។ ការសាបព្រួសនូវព័ត៌មានដែលមិនពិត ក៏ជាការរួមចំណែកបង្កឱ្យមានភាពវិលវល់ក្នុងការទទួលយកនូវចំណេះដឹងដែលមានភាពមិនប្រាកដប្រជា ឬក៏ភាពមិនត្រឹមត្រូវសម្រាប់ខ្លួនគាត់។

ពេលខ្លះយុវជនពិបាកនូវក្នុងការបែងចែកថា តើព័ត៌មានមួយណាដែលត្រឹមត្រូវ ឬមិនត្រឹមត្រូវសម្រាប់ពួកគាត់យកជាអំណេះអំណាង ឬក៏ទុកចិត្តបាន ហើយស្ថានភាពមួយវិញទៀត ការបំពុលតាមរយៈរូបភាពអវិជ្ជមាន និងសារហិង្សារ ឬក៏រូបភាពអាសអាភាសមួយចំនួនបានធ្វើឱ្យយុវជនក្លាយទៅជាក្រុមមួយដែលវង្វេងជាមួយនឹងភាពភ្លើតភ្លើន និងការសប្បាយអត់សូវខ្វល់ពីប្រទេសជាតិ ឬក៏ដូចជាប្រយោជន៍រួមសម្រាប់សង្គមខ្លួនឯង ហើយយើងឃើញថាផលទាំងអស់នោះដែលកើតឡើងតាមរយៈប្រព័ន្ធផ្សព្វផ្សាយសង្គមដែលកំពុងតែមានឥទ្ធិពលនៅពេលបច្ចុប្បន្ននេះ។

Q: សម្រាប់លោកស្រីផ្ទាល់ តើមានយន្ដការបែបណាខ្លះដើម្បីកាត់បន្ថយផលប៉ះពាល់នៃការប្រើប្រាស់ប្រព័ន្ធផ្សព្វផ្សាយសង្គមនេះ?

A: សម្រាប់ខ្ញុំយល់ឃើញថា ដើម្បីកាត់បន្ថយផលប៉ះពាល់នៃការប្រើប្រាស់នូវប្រព័ន្ធផ្សព្វផ្សាយសង្គមនេះ ត្រូវមានការចូលរួមចំណែកគ្រប់គ្នា ជាពិសេសភាគីដែលពាក់ព័ន្ធជាអាទិ៍យើងឃើញថា មានក្រសួងព័ត៌មាន ក្រុមអ្នកសារព័ត៍មាន ឬក៏ស្ថាប័នសារព័ត៌មានដែលធ្វើការទាក់ទងជាមួយវិស័យសារព័ត៌មាន គួរចូលរួមនូវការបណ្ដុះនៃក្រមសីលធម៌វិជ្ជាជីវៈទៅកាន់អ្នកសារព័ត៌មានអ្នកផ្សព្វផ្សាយ។

អ្នកប្រើប្រាស់ក្នុងនោះក៏ត្រូវតែរួមចំណែកការគ្រប់គ្រងទៅលើការប្រើប្រាស់ប្រព័ន្ធផ្សព្វផ្សាយសង្គមដែលចែករំលែកនូវព័ត៌មានមិនពិត ឬក៏រូបភាពដែលប៉ះពាល់ទៅដល់ក្រមសីលធម៌ និងវិជ្ជាជីវៈ ឬក៏ប៉ះពាល់ទៅដល់សតិរបស់យុវជន ឬកុមារនោះគួរតែមានការអន្ដរាគមន៍ទៅបញ្ហាទាំងអស់នេះ។

បើនិយាយអំពីតួនាទីរបស់ប្រជាពលរដ្ឋវិញ ក្នុងនាមយើងជាយុវជន ឬក៏ក្នុងនាមយើងជាពលរដ្ឋសកម្ម គប្បីឱ្យដឹងឱ្យស្គាល់តើអ្វីទៅជាព័ត៌មានពិត ឬព័ត៌មានមិនពិត ហើយជៀសវាងនូវក្នុងការដែរចែករំលែកនូវព័ត៌មានដែលមិនពិតតៗគ្នា ឬក៏ព័ត៌មានដែលមានបង្កប់នូវរូបភាពហិង្សា ព្រោះវាបានជះឥទ្ធិពលដល់មិត្តរបស់យើងក្នុងសង្គមនៅពេលដែលគាត់បានឃើញរូបភាពទាំងអស់នោះ វាដក់ជាប់នូវរូបភាពហិង្សា និងចំណេះដែលមិនពិតហ្នឹងទៅកាន់ពួកគាត់។

Q: លោកស្រីមានអនុសាសន៍អ្វីដើម្បីឱ្យប្រព័ន្ធផ្សព្វផ្សាយនៅកម្ពុជាមានភាពប្រសើរឡើង?

A: សម្រាប់ខ្ញុំ ដើម្បីឱ្យប្រព័ន្ធផ្សព្វផ្សាយនៅកម្ពុជាមានភាពល្អប្រសើរឡើងវិញ ទីមួយត្រូវចេញពីខ្លួនយើងម្នាក់ៗ ត្រូវចេះប្រើប្រាស់ឱ្យបានត្រឹមត្រូវ កុំចេះតែបង្ហោះរូបភាពណាមួយដែលមិនល្អ ឬព័ត៌មានណាដែលមិនពិតចេញទៅតាមប្រព័ន្ធផ្សព្វផ្សាយទេ។ យើងត្រូវបង្ហោះពាក់ព័ន្ធទៅនឹងចំណេះដឹងល្អៗពាក់ព័ន្ធទៅនឹងសង្គមជាតិ មួយទៀតខ្ញុំគិតថា គឺពាក់ព័ន្ធទៅនឹងច្បាប់ ប្រសិនបើបុគ្គលណាមួយដែលប្រើប្រព័ន្ធផ្សព្វផ្សាយធ្វើឱ្យបំពុលសង្គម ត្រូវទទួលខុសត្រូវចំពោះមុខច្បាប់។ នេះជាគំនិតខ្ញុំ។

Q: បាទ! អគុណអ្នកស្រីកន្និកា។
A: ចា៎! អរគុណ៕

Voxpop: ទស្សនៈសិស្សថ្នាក់ទី១២លើការពន្យារពេលប្រឡងមធ្យមសិក្សាទុតិយភូមិ

ស៊ុន លួត (Sun Lout) — Fri, 19 Nov 2021 02:42:50 +0000

ក្រសួងអប់រំ យុវជន និងកីឡា កាលពីថ្ងៃទី៣ ខែវិច្ឆិកា បានប្រកាសលើកពេលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលគ្រោងធ្វើនៅថ្ងៃទី២៧ ខែធ្នូ ឆ្នាំ២០២១ ទៅដើមឆ្នាំ២០២២វិញ ដោយបញ្ជាក់ថា ដើម្បីទុកឱកាសជូនសិស្សថ្នាក់ទី១២មានពេលវេលាបន្ថែមសម្រាប់រៀនសូត្រត្រៀមប្រឡង។

Newsroom Cambodia នៅថ្ងៃទី១៦ ខែវិច្ឆិកានេះ បានសម្ភាសន៍យុវជន យុវតីខ្មែរចំនួន៥រូប ដែលជាអ្នកត្រៀមប្រឡងសញ្ញាបត្រមធ្យមសិក្សាទុតិយភូមិថ្នាក់ទី១២ ខាងមុខ ដោយសិស្សខ្លះគាំទ្រចំពោះការពន្យាពេលនេះ ចំណែកឯសិស្សខ្លះចង់ប្រឡងឱ្យបានឆាប់។

ថុល បញ្ញា

យុវជន ថុល បញ្ញា អាយុ ១៨ឆ្នាំ ជាសិស្សថ្នាក់ទី១២ នៃវិទ្យាល័យ ហ៊ុនសែនប៊ុនរ៉ានីផ្សារដើមថ្កូវបានលើកឡើងថា លោកចង់ឲ្យមានការប្រឡងឱ្យបានឆាប់។

លោកថា៖ «សម្រាប់ខ្លួនខ្ញុំផ្ទាល់មានអារម្មណ៍ថា សប្បាយរីករាយ ព្រោះមានពេលបានយូរក្នុងការមើលសៀវភៅ និងរៀនបន្ថែមទៀតបង តែក៏មិនសូវសប្បាយចិត្តខ្លាំងណាស់ដែរបង ព្រោះថាមិនចង់លើកពេលយូរពេកចង់ប្រឡងឲ្យបានឆាប់ៗ បើយូរពេកទឹកចិត្តក្នុងការប្រឡងវាមិនសូវមានច្រើនទៅតាមហ្នឹងបង»។

យុវតី មួន សុធារី អាយុ ១៨ឆ្នាំ ជាសិស្សថ្នាក់ទី១២ នៃវិទ្យាល័យ សំរោងពន្លៃ មកពីខេត្តតាកែវ បានលើកឡើងថា កញ្ញាពេញចិត្តដែលក្រសួងពន្យាពេលប្រឡើងនេះ ព្រោះជាពេលដែលកញ្ញាអាចបន្តមើលមេរៀនដើម្បីត្រៀមប្រឡងបានលទ្ធផលល្អ។

កញ្ញាលើកឡើងថា៖ «សម្រាប់ខ្ញុំដែលបានឃើញសេចក្តីប្រកាសលើកការប្រឡងរបស់ក្រសួងដល់ថ្ងៃទី២៧វិញ ខ្ញុំយល់ថា ជាការមួយដែលល្អសម្រាប់ពួកខ្ញុំជាសិស្សទី១២ ក្នុងការត្រៀមខ្លួនឲ្យមានគោលជំហរជាងមុន មិនសូវភ័យ ហើយមានពេលវេលាច្រើនដើម្បីមើលមេរៀនត្រៀម ហើយសង្ឃឹមថាដល់ថ្ងៃប្រឡងចេញលទ្ធផលមកសមនឹងតម្លៃនៃពេលវេលាដែលក្រសួងបានផ្តល់ឲ្យ ហើយទទួលបានលទ្ធផលល្អទាំងអស់គ្នា»។

យុវតី ឆែម ស៊ីណា អាយុ ១៨ឆ្នាំ ជាសិស្សថ្នាក់ទី១២ នៃវិទ្យាល័យ សុខអានទន្លេបាទី មកពីខេត្តតាកែវ បានប្រាប់ Newsroom Cambodia ថា កញ្ញាគាំទ្រឱ្យមានការពន្យាពេលប្រឡងនេះ ដែលអាចឱ្យកញ្ញាមានពេលសម្រាប់ត្រៀមបានល្អ។

កញ្ញាលើកឡើងថា៖ «ការលើកពេលវេលាទៅប្រឡងថ្ងៃទី២៧វិញវាល្អ ព្រោះអាចឲ្យសិស្សមានពេលវេលាវែងជាងមុនក្នុងការត្រៀមខ្លួនប្រឡង»។

ព្រះតេជគុណ ហយ ផាន

ព្រះតេជគុណ ហយ ផាន ព្រះជន២២វស្សា ជាសិស្សថ្នាក់ទី១២ (ក) នៅព្រះសុរាម្រិតលោកមានសង្ឃដីការថា ការណ៍ដែរក្រសួងអប់រំយុវជននិងកីឡាបើកឱ្យមានការប្រឡងថ្នាក់ទី១២ នៅថ្ងៃទី២៧ ខែធ្នូឆ្នាំ២០២១ខាងមុខនេះ លោកមិនទាន់មានទំនុកចិត្តលើខ្លួនឯងចំពោះការប្រឡងនោះទេ។

ព្រះអង្គលើកឡើងថា៖ «សម្រាប់អាត្មាផ្ទាល់រៀងភ័យដោយសារតែការរៀនសូត្រអត់បានពេញលេញព្រោះរៀនតាមអនឡាញវាមិនដូចយើងរៀននៅក្នុងថ្នាក់ផ្ទាល់ទេ បើប្រឡងថ្ងៃខាងមុខអាត្មាគិតថានឹងអាចធ្លាក់ច្រើន»។

ឆុំ ចាន់ណា

យុវតី ឆុំ ចាន់ណា អាយុ ១៨ ឆ្នាំរៀននៅវិទ្យាល័យ សន្ធម៉ុកបាននិយាយថា កញ្ញាចង់ប្រឡងឆាប់ៗ ជាងការលើកថ្ងៃប្រឡង ទោះបីជារៀនតាមអនឡាញក៏ដោយ។

កញ្ញាលើកឡើងថា៖ «ខ្ញុំបានត្រៀមចិត្តរួចហើយទោះវាជាប់ ឬធ្លាក់ក៏ទទួលយកដែរសម្រាប់ខ្ញុំនៅតែចង់ប្រឡងដដែល»។

ដា នាថ

យុវតី ដា នាថ អាយុ ១៩ ឆ្នាំរៀនវិទ្យាល័យព្រែកកបាស ខេត្តព្រៃវែង បានប្រាប់ Newsroom Cambodia ថា កញ្ញាចង់ឱ្យមានការប្រឡងឱ្យកាន់តែឆាប់ដើម្បីងាយស្រួលក្នុងការជ្រើសរើសមុខវិជ្ជារៀននៅសាកលវិទ្យាល័យ។

កញ្ញាលើកឡើងថា៖ «សម្រាប់នាងខ្ញុំចង់ប្រឡងឆាប់ៗដើម្បីឱ្យដឹងថាជាប់ ឬធ្លាក់ងាយស្រួលសម្រចចិត្តរើសមុខវិទ្យាចូលរៀនសាកលវិទ្យាល័យបន្តទៀត។ ខ្ញុំជឿជាក់លើខ្លួនឯង ៧០%៨០%នឹងជាប់ ហើយក៏អត់ភ័យខ្លាចអីដែរ»៕

ក្រសួងយុត្តិធម៌ណែនាំសាលាដំបូង និងអយ្យការតាមរាជធានីខេត្តឲ្យពន្លឿននីតិវិធីសំណុំរឿង

ស៊ុន លួត (Sun Lout) — Sat, 30 Oct 2021 14:02:30 +0000

ក្រសួងយុត្តិធម៌បានចេញសេចក្ដីណែនាំនៅថ្ងៃទី២៥ ខែតុលា ឆ្នាំ២០២១ ឱ្យសាលាដំបូង និងអយ្យការអមរាជធានី ខេត្ត ពន្លឿននីតិវិធីនៅក្នុងសំណុំរឿង និងដើម្បីរួមចំណែកដោះស្រាយភាពចង្អៀតណែនក្នុងពន្ធនាគារ។

តាមរយៈសេចក្ដីណែនាំដដែលនេះ ក្រសួងយុត្តិធម៍បានគូសបញ្ជាក់ថានៅក្នុយរយៈពេលជាង១ឆ្នាំ គឺចាប់ពីថ្ងៃទី១៨ ខែឧសភា ឆ្នាំ ២០២០ រហូតដល់ថ្ងៃទី១៧ ខែមិថុនា ឆ្នាំ២០២១ នៃការ

អនុវត្តយុទ្ធនាការដោះស្រាស្រាយសំណុំរឿងរបស់សាលាដំបូងរាជធានី ខេត្ត ជាលទ្ធផលឃើញថា ទាំងសំណុំរឿងព្រហ្មទណ្ឌដែលកកស្ទះ ទាំងសំណុំរឿងព្រហ្មទណ្ឌដែលចូលថ្មីជាច្រើនត្រូវបានតុលាការចាត់ការបានយ៉ាងឆាប់រហ័ស ស្របតាមនីតិវិធីច្បាប់ ហើយបានចូលរួមចំណែកក្នុងការកាត់បន្ថយភាពចង្អៀតណែនក្នុងពន្ធនាគារបានមួយកម្រិត។

ក្រសួងបានលើកឡើងថា «ក្រសួងយុត្តិធម៌ពិនិត្យឃើញថានៅក្នុ្ងងរយៈពេល១ឆ្នាំ ១ ខែនៃការអនុវត្តយុទ្ធនាការខាងលើ(….) ជាលទ្ធផលឃើញថា ទាំងសំណុំរឿងព្រហ្មទណ្ឌដែលកកស្ទះ ទាំងសំណុំរឿងព្រហ្មទណ្ឌដែលចូលថ្មីជាច្រើនត្រូវបានតុលាការចាត់ការបានយ៉ាងឆាប់រហ័ស ស្របតាមនីតិវិធីច្បាប់ ហើយបានចូលរួមចំណែកក្នុងការកាត់បន្ថយភាពចង្អៀតណែនក្នុងពន្ធនាគារបានមួយកម្រិត»។

ដើម្បីចូលរួមចំណែកដោះស្រាយភាពចង្អៀតណែនក្នុងពន្ធនាគារ ពិសេសក្នុងបរិបទនៃការឆ្លងរាលដាលនៃជំងឺកូវិដ-១៩ ក្រសួងយុត្តិយុត្តិធម៍ក៏បានធ្វើការណែនាំជាថ្មីដល់សាលាដំបូងរាជធានី ខេត្ត ឱ្យបន្តអនុវត្តគោលការណ៍ណែនាំដែលត្រូវបានកំណត់នៅក្នុងសេចក្តីណែនាំ ចុះថ្ងៃទី១៨ ខែឧសភា ឆ្នាំ២០២០ ដែលក្រសួងយុត្តិធម៍សូមរំលឹកឡើងវិញអំពីខ្លឹមសារសំខាន់ៗឡើងវិញ។

នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត បានយល់ឃើញថាសេចក្ដីណែនាំរបស់ក្រសួងយុត្តិធម៌នេះជារឿងល្អមួយដើម្បីជួយកាត់បន្ថយភាពចង្អៀតណែននៅក្នុងពន្ធនាគារ តែលោកយល់ថាគួរតែលើកលែងចំពោះជនដែលជិតផុតទោសផងដែរ។

លោកលើកឡើងថា៖ «គួរតែពិនិត្យលទ្ធភាពក្នុងការដោះលែងនៅក្រៅឃុំទៅលើជនក្រៅឃុំបណ្ដោះអាសន្នរង់ចាំសវនាការដូចជាស្ដ្រីដែលមានផ្ទៃពោះ កូនដែលតាមម្ដាយ អនីតិជន ជនដែរមានជំងឺរាំរៃ សកម្មជនការពារបរិស្ថាន សកម្មជនការពារសិទ្ធិមនុស្ស និងអង្គការសង្គមស៊ីវិលនានាទៅតាមលទ្ធភាព»។

បន្ថែមពីនេះ លោកក៏បានលើកឡើងថាសាលាដំបូងរាជធានីខេត្ត និងអយ្យការអមសាលាដំបូងរាជធានីខេត្តគួរតែអនុវត្តតួនាទីរបស់ខ្លួន និងភារកិច្ចជាអចិន្ត្រៃយ៍ក្នុងការពន្លឿននីតិវិធីកុំចាំតែក្រសួងយុត្តិធម៌ ឬក៏មានការក្រើនរំលឹកណែនាំពីក្រសួងយុត្តិធម៍ និងត្រូវមានតម្លាភាពមានវិជីវៈផងដែរទើបអាចពន្លឿននៅនីតិវិធីនឹងបានល្អ៕

ស៊ុន លួត (Sun Lout) – Newsroom Cambodia

Q&A: ការប្រើប្រាស់ប្រព័ន្ធផ្សព្វផ្សាយនៅកម្ពុជា

Voxpop: ទស្សនៈ​សិស្សថ្នាក់ទី១២លើ​ការពន្យារ​ពេលប្រឡងមធ្យម​សិក្សា​ទុតិយភូមិ

ក្រសួងយុត្តិធម៌ណែនាំសាលាដំបូង និងអយ្យការតាមរាជធានីខេត្តឲ្យពន្លឿននីតិវិធីសំណុំរឿង

Voxpop: ទស្សនៈសិស្សថ្នាក់ទី១២លើការពន្យារពេលប្រឡងមធ្យមសិក្សាទុតិយភូមិ