Vannsak Wathnak – Newsroom Cambodia

ព្រះសង្ឃក្នុងវត្តវិសុទ្ធិមគ្គខេត្តសៀមរាបគោរពវិន័យយ៉ាងតឹងរ៉ឹងបែបព្រះពុទ្ធសាសនាសុទ្ធ

Vannsak Wathnak — Wed, 27 Jan 2021 06:27:22 +0000

(សៀមរាប)៖ វត្តវិសុទ្ធិមគ្គជាវត្តមួយស្ថិតនៅក្នុងភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប មានព្រះសង្ឃជាង១២០អង្គ មានផ្ទៃដីប្រមាណ១០០ហិកតា ព័ទ្ធដោយព្រៃឈើក្រាស់ឃ្មឹក ត្រជាក់ត្រឈឹងត្រឈៃ និងមានស្ទឹងព័ទ្ធជុំវិញប្រៀបបាននឹងកសិណនៅអង្គរ។

វត្តនេះកសាងឡើងក្នុងព.សឆ្នាំ២៥៥១ ដែលមានលោកគ្រូ សាន សប្បាយ ជាចៅធិការវត្ត។ ក្នុងទំហំផ្ទៃដីដ៏ធំ មានកុដិជាងមួយរយសម្រាប់ព្រះសង្ឃដាច់ដោយឡែកពីគ្នា វត្តវិសុទ្ធិមគ្គជាវត្តមួយគោរពព្រះពុទ្ធសាសនាសុទ្ធ មិនមានការអុជធូប ដាក់បាយសី ឬស្រោចទឹកនោះទេ។

ព្រះសង្ឃដែលគង់នៅក្នុងវត្តវិសុទ្ធិមគ្គប្រកាន់បទប្បញ្ញត្តិយ៉ាងតឹងរ៉ឹង ម៉ឹងម៉ាត់ ដោយមិនអនុញ្ញាតឲ្យព្រះសង្ឃប្រើប្រាស់ទូរស័ព្ទដៃទំនើប មិនពាក់ស្បែកជើង និងមិនកាន់បច្ច័យជាដើម។

ឧបាសិកា ជួន គីមឡេង ដែលមានតួនាទី រៀបចំបង្អែម បានរៀបរាប់ថា ព្រះសង្ឃនៅក្នុងវត្ត វិសុទ្ធិមគ្គ កាន់វិន័យល្អប្រៀបបាននឹងទៅនឹងសម័យព្រះពុទ្ធ។

«ព្រលឹមលោកចេញនិមន្តបិណ្ឌបាត្រ គោះជួងម៉ឺង លោកនិមន្តបិណ្ឌបាត្រមួយអង្គៗ ដូចជំនាន់ព្រះពុទ្ធចឹង លោកនិមន្តមកទាំងអស់ទាំង១០០អង្គមកទទួលបិណ្ឌបាត្រ តើកូនជ្រះថ្លាប៉ុណ្ណា ហើយលោកពេលឆាន់អត់ឮសូរ ដូចយាយតាប្រកែកគ្នាទេ យាយតាប្រកែកខ្លះព្រោះនូវធម្មជន ហើយចុះលោក លោកនូវធម្មជន ប៉ុន្តែនូវធម្មជនជាន់ខ្ពស់យើងនិយាយអីចេះទៅ។ វត្តណាមិនកាន់វិន័យ កាន់វិន័យ កូនចូលទៅដឹងហើយ មិនចាំថាយាយនិយាយទេ ច្បាស់ជាលោកមកសួរញោមអញ្ចេះញោមអញ្ចុះទៅ កូនអញ្ចេះកូនអញ្ចុះទៅ ប៉ុន្តែលោកអត់» ។

ឧបាសិកា ហៀង ធឿន អាយុ៨១ឆ្នាំ ដែលស្នាក់នៅក្នុងវត្តវិសុទ្ធិមគ្គរយៈពេល១១ឆ្នាំ មានប្រសាសន៍ថា ព្រះសង្ឃក្នុងវត្តវិសុទ្ធិមគ្គប្រតិបត្តិនូវវិន័យបានយ៉ាងល្អ គឺមិនពាក់ស្បែកជើង មិនប្រើប្រាស់ទូរស័ព្ទ និងមិនកាន់បច្ច័យ។

ខណៈពេលដែលកំពុងសាងសង់កុដិតូចៗជាមួយនឹងព្រះសង្ឃអង្គផ្សេង និងកូននេន ព្រះតេជគុណ ឈ្លន់ សៅ ព្រះជន្ម៣០ព្រះវស្សា មានសង្ឃដីកាថា មូលហេតុដែលព្រះតេជគុណមកវត្តនេះដោយសារវត្តវិសុទ្ធិមគ្គកាន់ព្រះពុទ្ធសាសនាសុទ្ធសាធ ព្រះសង្ឃក៏ជ្រះថ្លាមកកាន់វត្តវិសុទ្ធិមគ្គនេះ។

«ដោយសារតែអ្នកបួសយើងគឺយកវិន័យសិរសាពីព្រះពុទ្ធសាសនាចំៗ អីចឹងវាត្រូវនឹងសេចក្ដីជ្រះថ្លារបស់អាត្មាទៅថាវត្តនេះគឺជាវត្តមួយដែលមានសិរសាព្រះពុទ្ធសាសនាច្បាស់លាស់ចឹង មិនមែនតែវត្តនេះទេ នៅមានវត្តផ្សេងៗទៀត តែអធ្យាស្រ័យអាត្មាស្រលាញ់វត្តនេះទៅ ត្រង់ខ្លួនឯងនៅសៀមរាបផង ជិតផងក៏ជ្រះថ្លាក្នុងការបដិបត្តិនូវធម៌ នូវវិន័យ»។

លោក សេង សុមុនី អ្នកនាំពាក្យក្រសួងធម្មការ និងសាសនា បានប្រាប់ Newsroom Cambodiaនៅថ្ងៃទី២៦ ខែមករាថា សព្វថ្ងៃក្នុងប្រទេសកម្ពុជាមានវត្តជាង៥០០០ ប៉ុន្តែមិនទាន់មានទិន្នន័យច្បាស់លាស់អំពីវត្តដែលកាន់ព្រះពុទ្ធសាសនាសុទ្ធសាធនោះទេ។

លោកលើកឡើងដូច្នេះថា៖ «តួរលេខហ្នឹងយើងរាប់ក្នុងព្រះពុទ្ធសាសនាមានពីរ ទីមួយសាសនាបែបគន្ថធុរៈ គឺលោករៀនបាលី រៀនសំស្ក្រឹត មុខវិជ្ជាទូទៅ ក្រសួងអប់រំអីចឹង។ មួយទៀតគឺវិបស្សនាធុរៈ ដែលក្មួយថាតឹងរ៉ឹងហ្នឹងគឺវិបស្សនាធុរៈ ហើយមានមណ្ឌលរបស់លោក មណ្ឌលធំកណ្តាលហ្នឹងនៅភ្នំអដ្ឋរស្សនេះ មជ្ឈឹមមនុស្ស លោកបើកសាខាតាមខេត្ត ទាំង២៥រាជធានីខេត្តហ្នឹង ហើយនៅក្នុងខេត្តនីមួយៗលោកមានវត្តច្រើន ប៉ុន្មានវត្តដែលប្រតិបត្តិបន្តទៅទៀត»៕

អាជីវកម្មនៅតំបន់ប្រាសាទអង្គរវត្តប្រឈមនឹងភាពមិនប្រាកដប្រជាបន្ទាប់ពីការធ្លាក់ចុះនៃភ្ញៀវទេសចរដោយសារតែកូវីដ

Vannsak Wathnak — Mon, 25 Jan 2021 04:12:49 +0000

ខេត្តសៀមរាប៖ អាជីវករ និងអ្នករត់ម៉ូតូកង់បីនៅតំបន់ប្រាសាទអង្គរវត្ត ខេត្តសៀមរាប បាននិយាយថាពួកគាត់បានរងផលប៉ះពាល់ដោយការធ្លាក់ចុះនៃភ្ញៀវទេសចរ បន្ទាប់ពីការផ្ទុះឡើងនៃជំងឺ ១៩ ដែលបានវាយលុកប្រទេសកម្ពុជាកាលពីដើមឆ្នាំ២០២០។

លោកស ឡៃ អាយុ៤៨ឆ្នាំ ជាអ្នករត់កង់បីនៅក្នុងតំបន់អង្គរបានប្រាប់ថា ប្រាក់ចំណូលរបស់លោកពីមុនមានចន្លោះពី១០ដុល្លារ ទៅដល់ ៧០ដុល្លារ ក្នុងមួយថ្ងៃ ក៏ប៉ុន្តែបច្ចុប្បន្ននេះ បានត្រឹម ៥០០០រៀល ហើយពេលខ្លះ បាន៣ម៉ឺន ទៅ៤ម៉ឺនរៀល។

លោកលើកឡើងដូច្នេះថា៖ «កាលភ្ញៀវមាននៅ ចំណូលយ៉ាងតិចក៏១០ដុល្លារដែរ បើអាខ្ពស់បំផុតមិនអាចប្រាកដទេ ដូចថា ២០-៣០ដុល្លារ ជួនកាលបានដល់ទៅ ៧០ដុល្លារអីទៅ បើយកភ្ញៀវទៅដាក់ទន្លេ ឬតាមហាងអីទៅអញ្ចឹង យើងបានច្រើនតាមហ្នឹងទៅជាពិសេសភ្ញៀវបរទេស។ បើឥឡូវនិយាយអោយត្រង់ទៅជួនកាលបានប្រាំពាន់ ហើយថ្ងៃណាក៏អត់ទៅ បើហេងបាន ៣ទៅ៤ម៉ឺន»។

លោកបានបន្ថែមថា៖ «បើផ្គត់ផ្គង់គ្រួសារទៅ គឺទៅអត់រួចទេ ទាល់តែមានប្រពន្ធជួយរកនេះខ្លះ នោះខ្លះ តែប្រពន្ធពូនៅតែផ្ទះមើលតែកូន តែពូមានម្តាយនៅក្រៅប្រទេសផងដែរ គាត់អោយមួយខែ ១០០ដុល្លារគ្រាន់ជួយទប់ខ្លះក្នុងពេលកូវីដអញ្ចឹង»។

«ពិបាកនិយាយវាខុសប្លែកគ្នាឆ្ងាយណាស់ ហើយក្នុងមួយថ្ងៃទៅលើម្ហូបតិចបំផុតក៏ត្រឹម ៣ម៉ឺនដែរ ឥឡូវទិញម្ហូបត្រឹម៣ពាន់ ហូបពីរនាក់ប្តីប្រពន្ធទៅ និយាយទៅវាពិបាកណាស់ មិនហ៊ានស៊ីចាយអីទេ ពិបាករកលុយមិនបានតែម្តងបើអាកាលផ្ទុះកូវីដដំបូង គឺស្ងាត់ឈឹងតែម្តង អត់មាននរណាមកទេ»។

អ្នកស្រីឡាយ លី អាយុ ៣៦ឆ្នាំ។ រូបភាព៖ កេត អ៊ីយាន

អ្នកស្រីឡាយ លី អាយុ ៣៦ឆ្នាំ ជាអ្នកលក់វត្ថុអនុស្សាវរីយ៍នៅជិតប្រាសាទអង្គរវត្តបានប្រាប់ថាពីមុនអ្នកស្រី រកប្រាក់ចំណូលបានពី ៤ម៉ឺន ទៅ១០ម៉ឺនរៀលក្នុងមួយថ្ងៃ បច្ចុប្បន្នរកបានតិចតួច ចំណេញបានតិចតួចស្ទើរតែមិនអាចផ្គត់ផ្គង់ជីវភាពព្រោះត្រូវចំណាយលើម្ហូបអាហារ ការរៀនសូត្ររបស់កូន និងត្រូវបង់ការ ប្រាក់នៅធនាគារជាដើម។

អ្នកស្រីបានលើកឡើងថា៖ «ខ្ញុំលក់នៅនេះយូរហើយ តែនៅខាងក្នុង ៦-៧ឆ្នាំហើយ លក់តែអាហ្នឹងឯង កាលមុនកូវីដ មួយថ្ងៃបានប្រហែលជា ៤-១០ម៉ឺនអត់ទៀងទេ តែថ្ងៃនេះអត់។ ផ្គត់ផ្គង់អត់គ្រប់គ្រាន់ទេ ព្រោះវាចំណេញតិចតួចលក់បាន ៦-៧ម៉ឺនយកទៅទិញឥវ៉ាន់វិញ សល់តែបន្តិចបន្តួចគ្រាន់ទុកអោយកូនហូបអោយរួចមួយថ្ងៃ សឹងតែមិនរួច»។

«ប៉ះព៉ាល់តែមែនទែនតែម្តង ដូចជាពួកខ្ញុំលក់អញ្ចឹងមានការជំពាក់អង្គការអីអញ្ចឹង ហើយត្រូវការបង់អោយគេរាល់ខែ ដល់ពេលអញ្ចឹងទៅវាពិបាកណាស់ ដូចការរៀនសូត្ររបស់កូន វាត្រូវរៀនគួរ រៀនអង់គ្លេស អញ្ជឹងយើងត្រូវការចំណាយដល់ពេលអត់បានអញ្ចឹងវាពិបាក»។

លោកប៊ុន យូរឆៃលៀង អាយុ ៣៨ឆ្នាំ។ រូបភាព៖ វឌ្ឃនៈ វណ្ណសក្តិ

លោកប៊ុន យូរឆៃលៀង អាយុ ៣៨ឆ្នាំ ជាអ្នករត់កង់បីបាននិយាយថាប្រាក់ចំណូលពីមុន និងបច្ចុប្បន្នខុសគ្នា ឆ្ងាយហើយឥឡូវនេះរកបានតែ២ម៉ឺនរៀល ទៅ៣ម៉ឺនរៀលប៉ុណ្ណោះក្នុងមួយថ្ងៃ ជួនកាលក៏អត់បាន។

លោកបានលើកឡើងថា៖ «ខុសគ្នាឆ្ងាយណាស់ប្អូន កាលនៅភ្ញៀវបរទេសហើយអត់មានកូវីដ យើងរកបានម៉ូយស្រួល ឲ្យតែចេញរកដឹងតែបាន ប៉ុន្តែឥឡូវ ទោះបីយើងប្រឹងចេញរកប៉ុណ្ណានៅតែរកអត់បានដូចមុនទេ ដោយសារយើងអត់មានភ្ញៀវបរទស អាចបានជា ៨-១០ម៉ឺន តែឥឡូវបានតែ ២ម៉ឺន ៣ម៉ឺន ជួនកាលសឹងតែអត់សោះតែម្តង»។

លោកបន្ថែមថាចំណូលអត់គ្រប់ដោយសារតែគាត់ជំពាក់គេដែរ ហើយមានការពិបាកក្នុងការសន្សំសងគេ ដូចជាប៉ុន្មានខែមុន គាត់បានសុំពន្យារសងលុយគេ ព្រោះតែអត់មានលទ្ធភាពសង អញ្ចឹងទៅគេឲ្យបង់តែការ។

«ពេលបង់តែការអញ្ចឹងទៅវាខាតយើងវិញ។ មុនធ្លាប់ឲ្យគ្រូសារគាត់ចេញលក់ដូរតិចតួច តែពេលលក់ទៅវាអត់ដាច់ ព្រោះឥឡូវគេចេញលក់ច្រើន នៅពេលបាត់បង់ទេសចរណ៍ទៅ គាត់អត់មានអីធ្វើ គាត់ចេញលក់ដូចយើងដែរ ដល់ពេលយូរៗទៅវាពិបាកអត់មានពីណាមើលកូន អញ្ចឹងទៅអោយគាត់មើលកូនយើងចេញរកតែឯងទៅ តែជួនកាលខ្វះខាតអីម៉ែឪគាត់ផ្ញើរមកខ្លះទៅ»។

លោក ង៉ូវ សេងហាក់ ប្រធានមន្ទីរទេសចរណ៍ខេត្តសៀមរាបបានប្រាប់ Newsroom Cambodia យ៉ាងខ្លីថា ភ្ញៀវទេសចរនឹងចាប់ផ្តើមមកកម្សាន្តវិញនៅពេលដែលស្ថានភាពជំងឺកូវីដមានភាពប្រសើរឡើង។

«បើសភាពការណ៍កូវីដប្រសើរ ភ្ញៀវនឹងត្រឡប់មកវិញ ដល់ពេលកូវីដអីចឹង យើងដឹងថាស្ថានភាពវាដោយសារជំងឺកូវីដ ការហោះហើរក៏អត់មានដែរ មកសៀមរាបអីចឹង»។

Newsroom Cambodia មិនអាចសុំការអធិប្បាយពីលោក តុប សុភ័ក អ្នកនាំពាក្យក្រសួងទេសចរណ៍ ដោយ ទូរស័ព្ទហៅជាច្រើនដង ប៉ុន្តែគ្មានអ្នកទទួល។

យោងទៅតាមរបាយការណ៍របស់ក្រសួងទេសចរណ៍ ចំនួនភ្ញៀវទេសចរណ៍ក្នុងឆ្នាំ២០១៩ មានប្រមាណជាជាង ៦លាននាក់ កើនឡើង៨ភាគរយប្រៀបធៀបឆ្នាំ២០១៨ ក៏ប៉ុន្តែក្នុងឆ្នាំ ២០២០ ភ្ញៀវទេសចរណ៍សរុបមានត្រឹមតែជាង ១លាននាក់ប៉ុណ្ណោះ ពោលគឺមានការធ្លាក់ចុះជិត៨០ភាគរយ។ នេះយោងតាមស្ថិតិផ្លូវការ៕

ខណៈកូវីដវាយលុក ការធ្វើឱ្យវត្ថុអនុស្សាវរីយ៍ពីដូងជាប្រភពចំណូលថ្មីសម្រាប់អ្នកភូមិក្នុងខេត្តសៀមរាប

Vannsak Wathnak — Sat, 23 Jan 2021 05:12:46 +0000

ស្រុកអង្គធំ ខេត្តសៀមរាប៖ កាលពីដំបូងឡើយ អ្នកស្រីសំ សំភាស់ គ្រាន់តែចង់កែច្នៃផ្លែដូងធ្វើជារបស់លេងសម្រាប់កូនគាត់នៅក្នុងភូមិមួយនៃស្រុកអង្គធំ ខេត្តសៀមរាប តែប៉ុណ្ណោះ ហើយការច្នៃប្រឌិតរបស់គាត់ក៏បានចាប់ផ្តើមទទួលបានការចាប់អារម្មណ៍ពីអ្នកទេសចរដែលបានឆ្លងកាត់។

វត្ថុអនុស្សាវរីយ៍សត្វក្រពើធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

ជាមួយនឹងការមកដល់នៃជំងឺរាតត្បាតកូវីដ១៩ ដែលបានប៉ះពាល់ដល់ជីវភាពរស់នៅរបស់ប្រជាជនរាប់ម៉ឺននាក់ ការធ្វើរូបជាសិល្បៈចេញពីផ្លែដូងសម្រាប់ភ្ញៀវទេសចរ បានក្លាយជាប្រភពចំណូលថ្មីសម្រាប់អ្នកស្រីសំ សំភាស់ និងគ្រួសារដទៃទៀតនៅភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប ដែលភាគច្រើនប្រកបរបរជាកម្មករសំណង់។

អ្នកស្រីសំ សំភាស់ អាយុ ២៩ឆ្នាំ បាននិយាយថាគំនិតនៃការច្នៃប្រឌិតនេះគឺប្តីគាត់បានឃើញគេធ្វើនៅប្រទេសថៃនៅពេលគាត់ធ្វើជាពលករចំណាកស្រុកនៅប្រទេសថៃកាលពីដើមឆ្នាំ២០២០។

ទឹកមុខញញឹមដែលបង្កប់ទៅដោយក្ដីរីករាយ និងការស្វាគមន៍ អ្នកស្រី សំ សំភាស់ បាននិយាយថា «មុនដំបូងប្ដីរបស់ខ្ញុំគាត់ទៅថៃ មិនដឹងថាគាត់ឃើញឯណោះ ឬក៏យ៉ាងណាទេ ដល់ពេលគាត់ត្រឡប់មកវិញ ឃើញផ្លែដូងក៏ធ្វើតាមគេដាក់ឱ្យកូនលេងទៅ»។

ដោយសម្តីរដឺនៗបន្ដិចផងនោះ អ្នកស្រីសំ សំភាស់បានបន្តថា «ប៉ុន្តែកាលធ្វើលើកនោះមិនបានស្អាតអ្វីទេដោយសារមិនទាន់លាបថ្នាំ ហើយកូនឈប់លេងហើយក៏វាចោលទៅ ស្រាប់តែពេលក្រោយកូនក៏វាទារលេងម្ដងទៀត ក៏ធ្វើឱ្យវាម្ដងទៀតទៅ តែលើកនេះលាបពណ៌ហើយក៏ចេះតែច្នៃដាក់ជើងផងអីផង ហើយក៏ស្រាប់តែអ្នកស្រុកឃើញក៏មកសុំរៀនបន្តក៏ចេះ បានដាក់លក់ ហើយកាលនោះលក់ដាច់សម្បើម»។

អ្នកស្រីសំ សំភាស់បានរៀបរាប់ថាកាលដើមឡើយ គឺមានតែគ្រួសារគាត់តែប៉ុណ្ណោះដែលចេះពីរបៀបនៃការកែច្នៃផ្លែដូងចេញជារូបសត្វនេះមុនគេ ហើយក៏ត្រូវបានអ្នកស្រុកដឹង ក៏បានមកសុំរៀនបន្ត ហើយរហូតមកដល់ក្នុងពេលបច្ចុប្បន្ននេះ អ្នកស្រីថាឱ្យតែមានអ្នកចង់រៀន គឺគាត់រីករាយក្នុងការបង្ហាត់បង្រៀនដោយមិនកំណាញ់នោះទេ។

វត្ថុអនុស្សាវរីយ៍សត្វទន្សាយធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

អ្នកស្រីបាននិយាយផងដែរថាមុខរបរនេះជារបរបន្ទាប់បន្សំរបស់គាត់ដែលអាចជួយសម្រួល
ទៅដល់ការចំណាយម្ហូបប្រចាំថ្ងៃបាន។ អ្នកស្រីបានបន្ថែមថារូបសត្វមួយអ្នកស្រីលក់បាន១៥០០០៛ ប៉ុន្ដែបើមានគេកម្ម៉ង់ច្រើន អ្នកស្រីលក់ក្នុងមួយរូបតែ ១២០០០៛តែប៉ុណ្ណោះ ហើយក៏ មិនសូវជាបានចំណេញច្រើននោះទេ ដោយសារត្រូវចំណាយទៅលើការទិញក្រដាសកាសែតមករុំពីលើ។

អ្នកស្រីបានបន្ថែមថាក្នុងមួយថ្ងៃ គាត់ផលិតបានមួយរូបដោយសារតែអ្នកស្រីរវល់និងកិច្ចការផ្ទះខ្លាំងពេក ប៉ុន្តែជួនពេលខ្លះ ទំនេរ ក៏បាន ០៤រូបទៅ ប្រសិនបើមានគេកម្ម៉ង់អ្នកស្រីអាចធ្វើបានរហូតដល់ទៅជាង១០ក្នុងមួយថ្ងៃ ហើយមិនលក់ដាច់រាល់ថ្ងៃនោះទេ ជួនកាល មួយអាទិត្យ ឬមួយខែ ទើបមានការកម្ម៉ង់ម្ដង។

របរធ្វើដូងទៅជាវត្ថុអនុស្សាវរីយ៍ មានជារូបសត្វឱម៉ាល់ ក្រពើ ទន្សាយ និងមេអំបៅផងដែរនោះ បានពង្រីកដល់ចំនួនប្រហែល ៤ ឬ ៥ គ្រួសារហើយនៅក្នុងភូមិនេះ ដែលនេះបានបង្កឲ្យមានការលំបាកក្នុងការស្វែងរកដូងមកធ្វើ។

អ្នកស្រីបាននិយាយថា៖ «ចាប់តាំងតែពីអ្នកភូមិចេះធ្វើដែរមក ពិបាករកផ្លែដូងមកធ្វើខ្លាំងណាស់ ប្រសិនបើចង់រក មានតែទៅភូមិឆ្ងាយៗ ទើបបានហើយត្រូវទិញទៀតទើបបាន»។

«កាលមុនគេយកដុតចោល តែឥលូវចាប់តាំងពីគេដឹងមក ផ្លែដូងសណ្ដមួយត្រូវចំណាយ ៥០០៛ទិញមកទើបបាន ជួនណា គេមិនយកលុយទេ តែយើងយកមកធ្វើលក់ដែរ ក៏ជូនលុយគេខ្លះៗទៅ»។

អង្គុយលើកៅអីហើយនិយាយលឺៗ អ្នកស្រី ហាវ សារុំ អាយុ ៥៤ឆ្នាំ ដែលជាអ្នកភូមិរស់នៅភូមិក្បែរនោះក៏បាន
និយាយបន្ថែមថាកាលពីគាត់នៅក្មេងៗ គាត់មិនដែលធ្លាប់ឃើញការច្នៃផ្លែដូងធ្វើជារូបសត្វបែបនេះនោះទេ ហើយកាលមុន គ្រាន់តែយកមកធ្វើជាអុសដុតបបរបាយជ្រូកតែប៉ុណ្ណោះ។

«ខ្ញុំស្ងើចសរសើរថាវាល្អដែលគេមានគំនិតបែបនេះ បើខ្ញុំមិនដឹងយកធ្វើអ្វីមានតែយកទៅដុតបបរបាយជ្រូក។ មិនបាច់ទៅធ្វើការស្រុកគេ ក៏អាចយកលក់បានលុយស្រួល ហើយវាអាចជួយទៅលើបរិស្ថានបានច្រើនដែរណា»។

នៅក្រោមដំបូលផ្ទះប្រក់ក្បឿង ហើយអង្គុយចាក់រូបមានទឹកមុខផ្ចង់អារម្មណ៍នឹងការងារតែបង្កប់ដោយក្ដីរាក់ទាក់ អ្នកស្រីសំ ទូច អាយុ ៤២ឆ្នាំ ដែលជាអ្នកភូមិម្នាក់ទៀត ហើយបាន ចេះការច្នៃផ្លែដូងបន្តពីប្អូនស្រីគាត់។

គាត់បានរៀបរាប់ថាកាលដើមឡើយគាត់គ្រាន់តែធ្វើឱ្យកូនគាត់លេងតែប៉ុណ្ណោះ តែដល់មាន អ្នកធ្វើដំណើរឃើញ ក៏បានចុះមកសួរ និងសុំទិញ សុំថត។ ចាប់តាំងតែពីពេលនោះមក របរច្នៃដូងរបស់អ្នកស្រីសំ ទូច ក៏ចេះតែល្បីតៗគ្នារហូតដល់មានអ្នកខ្លះកម្ម៉ង់ឱ្យធ្វើតែម្ដងទៅ។

អ្នកស្រីបាននិយាយថា៖ «ថាទៅវាមិនបានចំណេញចំណូលអ្វីប៉ុន្មាននោះទេ ដូចថាយើងរករបស់បានដូចជាដូងអីចេះតែចង់ធ្វើទៅ បើទោះបីជាយើងរកចំណូលអ្វីមិនបានច្រើនក៏យើងចាត់ទុកថាយើងរួចថ្លៃម្ហូបមួយពេលដែរ។ មានអ្នកឆ្ងាយៗ មកទិញដែលភាគច្រើនជាភ្ញៀវទេសចរ ហើយក៏មានអ្នកកម្ម៉ង់មកពីឆ្ងាយដែលតែភាគច្រើនមិនសូវជាចំណេញទេ ដោយសារការចំណាយទៅលើការវិចខ្ចប់ច្រើន»។

លោក ខុង ឆន អាយុ ៦១ឆ្នាំ ដែលជាមេឃុំ ឃុំលាងដៃ បាននិយាយថាអ្នកចេះកែច្នៃផ្លែងដូងជារូបសត្វនេះមានត្រឹមតែ ៥គ្រួសារ ក្នុង៨ភូមិ ហើយលោកក៏បានរៀបរាប់បន្តថា អាជ្ញាធរក្នុងឃុំក៏មានការគាំទ្រ និងលើកទឹកចិត្ត សរសើរពួកគេដែលមានគំនិតក្នុងការច្នៃប្រឌិត ដោយលោកបានជួយផ្សព្វផ្សាយដែរដើម្បីមានការគាំទ្រ រួមមានការលើកឡើងក្នុងអង្គប្រជុំក្រុមប្រឹក្សាឃុំជាដើម ឲ្យមានកាទិញយកទៅលំអរ៕

Vox Pop: ទស្សនៈចំពោះការបង្កើតច្បាប់រៀបអាពាហ៍ពិពាហ៍សម្រាប់អ្នកស្រលាញ់ភេទដូចគ្នា

Vannsak Wathnak — Mon, 28 Dec 2020 09:07:17 +0000

អ្នកស្រលាញ់ភេទដូចគ្នាក្នុងប្រទេសកម្ពុជានៅតែប្រឈមនឹងការរើសអើង បើទោះបីជាអ្នកស្រលាញ់ភេទដូចគ្នាត្រូវបានទទួលស្គាល់ដោយថ្នាក់ដឹកនាំកំពូលៗរបស់កម្ពុជា ថាមានសិទ្ធិស្មើគ្នាដូចប្រជាពលរដ្ឋជាទូទៅក្តី។

ក្នុងឆ្នាំ២០០៤សម្តេចព្រះបរមរតនកោដ្ឋនរោត្តមសីហនុក៏បានគាំទ្រចំពោះអ្នកស្រលាញ់ភេទដូចគ្នា បន្ទាប់ពីទ្រង់ទតទូរទស្សន៍ចុះផ្សាយអំពីការរៀបអាពាហ៍ពិពាហ៍ក្នុងរដ្ឋកាលីហ្វ័រញ៉ា សហរដ្ឋអាមេរិក។លោកនាយករដ្ឋមន្រ្តី ហ៊ុន សែន កាលពីឆ្នាំ២០១២ក៏បានស្នើកុំឲ្យមានការរើសអើងចំពោះសហគមន៍អ្នកស្រលាញ់ភេទដូចគ្នា បន្ទាប់ពីដឹងថា កូនស្រីចិញ្ចឹមរបស់លោកក៏ជាអ្នកស្រលាញ់ភេទដូចគ្នា។

មិនតែប៉ុណ្ណោះការផ្តល់សិទ្ធិរៀបអាពាហ៍ពិពាហ៍ស្របច្បាប់សម្រាប់អ្នកស្រលាញ់ភេទដូចគ្នា ក៏ត្រូវបានថ្នាក់ដឹកនាំនយោបាយលើកយកមកពិភាក្សាផងដែរ។

ខាងក្រោមនេះ គឺជាការយល់ឃើញរបស់ប្រជាពលរដ្ឋមួយចំនួន លើការរៀបអាពាហ៍ពិពាហ៍ស្របច្បាប់របស់អ្នកស្រលាញ់ភេទដូច៖

លោក រឹទ្ធិ បូរីស វ័យ១៨ឆ្នាំ និស្សិតដែលត្រៀមប្រឡងចូលរៀននៅសាកលវិទ្យាល័យនីតិសាស្រ្ត និងវិទ្យាសាស្រ្តសេដ្ឋកិច្ច ប្រាប់Newsroom Cambodia ថា ការស្រលាញ់ភេទដូចគ្នាមានការកើនឡើងច្រើនជារៀងរាល់ឆ្នាំនៅកម្ពុជា ហើយថា លោកគាំទ្រឲ្យអ្នកស្រលាញ់ភេទដូចគ្នា អាចរៀបការបានដោយស្របច្បាប់។

«ខ្ញុំគិតថាវាគួរតែមានច្បាប់ ហើយមិនគួរឲ្យមានការរើសអើងគ្នាទេ ហើយក្តីស្រលាញ់រវាង ស្រី និងស្រី ប្រុស និងប្រុស ក៏ជាការស្រលាញ់មួយដែរ។នៅលោកខាងលិច និងអឺរ៉ុបឃើញមានការអនុញ្ញាត និងគាំទ្រឲ្យមានសិទ្ធិអ្នកស្រលាញ់ភេទដូចគ្នា ហើយអាចរៀបការនឹងគ្នាបាន ចឹងមិនខុសពីកម្ពុជា ក៏គួរតែអនុញ្ញាតដើម្បីឲ្យមានការឃើញពីសិទ្ធិពួកគេ»។

លោក រឹទ្ធិ បូរីស

ចំណែកលោក សូ វាសនា ហៅដេវិត វ័យ២៥ឆ្នាំ កំពុងធ្វើការងារនៅស្ថានប័នឯកជនមួយប្រាប់ Newsroom Cambodia ថា កម្ពុជាគួរតែបង្កើតនិងគួរតែឲ្យមានច្បាប់សម្រាប់អ្នកស្រលាញ់ភេទដូចគ្នា។

«អ្វីដែលពួកគាត់ធ្វើមិនបានធ្វើឲ្យអាប់ឱនអ្វីទាំងអស់។ វាគឺជាធម្មជាតិរបស់ពួកគាត់ គាត់ត្រូវតែស្រលាញ់អីចឹង។ ខ្ញុំគិតថាវាមិនបានផ្ទុយពីធម្មជាតិនោះទេដែលពួកគាត់ស្រលាញ់គ្នា ហើយវាជាចំណង់ចំណូលចិត្តមួយដែលកើតពីធម្មជាតិ»។

កញ្ញា កែ ស្រីអូន វ័យ២៦ឆ្នាំដែលកំពុងធ្វើការក្នុងស្ថានប័នឯកជនមួយប្រាប់ថា៖ «យើងត្រូវតែមានសិទ្ធិឲ្យពួកគេ មិនថានរណានោះទេ។ និយាយរួមគឺត្រូវឲ្យសិទ្ធិគាត់ទាំងអស់គ្នា មិនថាជាសិទ្ធិក្នុងរូបភាពបែបណានោះទេ គ្រាន់តែថាត្រូវបែងចែកឲ្យដាច់រវាងអ្នកស្រលាញ់ភេទដូចគ្នា និងផ្ទុយគ្នា។ បើសិនជាយើងមានសិទ្ធិ អាហ្នឹងយើងដូចជាលើកទឹកចិត្ត និងឲ្យតម្លៃគាត់»។

លោក ខៀវ សម្បត្តិ អ្នកស្រលាញ់ភេទដូចគ្នា អាយុ៣៧ឆ្នាំ កំពុងដើរលេងជាមួយភរិយានៅលើសួនច្បារព្រះបរមរាជវាំងលើកឡើងថា៖ «ខ្ញុំចង់ឲ្យមានការបង្កើតច្បាប់អាពាហ៍ពិពាហ៍ដល់អ្នកស្រឡាញ់ភេទដូចគ្នា ដូចនៅប្រទេសគេ គេមានច្បាប់ បើខ្មែរមានដឹងតែល្អ»។

ឆ្លើយតបទៅនឹងការបង្កើតច្បាប់នេះអាចជះឥទ្ធិពលដល់កំណើនប្រជាជននិងការបន្តពូជនោះលោក អឿន ស៊ាងហេង ដែលជានិស្សិតឆ្នាំទី២នៃសាកលវិទ្យាល័យ PPIU យល់ថា៖ «វាគួរតែជះឥទ្ធិពលទៅលើការបន្តពូជព្រោះប្រទេសរបស់យើងកំពុងតែត្រូវការធនធានមនុស្ស ក៏ដូចជាការបន្តពូជឲ្យបានកាន់តែច្រើន ព្រោះថាបើប្រជាជនបង្កបង្កើនកាន់តែច្រើន សេដ្ឋកិច្ចអាចនឹងលឿន។ បើប្រជាជនច្រើនការងារក៏មានច្រើន កម្លាំងអ្នកជួយការងារក៏មានច្រើន កន្លែងការងារក៏មានច្រើន ក៏ដូចជាមានអ្នកចេះដឹងច្រើន»។

លោក អឿន ស៊ាងហេង

ចំណែកលោក ខៀវ សម្បត្តិ លើកឡើងថា៖ «វាមិនអីទេ ដោយសារការស្រឡាញ់ភេទដូចគ្នាភាគច្រើនគឺវាតិចជាងអ្នកស្រឡាញ់ភេទផ្ទុយគ្នា»។

យុវជន បូរីស លើកឡើងថា៖ «ជាការពិតការស្រលាញ់ភេទដូចគ្នារវាងប្រុស និងប្រុសវាមិនអាចបន្តពូជបានទេ។ ប៉ុន្តែប្រសិនបើវិស័យសុខាភិបាលយើងមានបច្ចេកទេសដើរលឿន នោះផ្នែកការបន្តពូជខ្ញុំគិតថានៅតែអាច។ យើងមើលឃើញថាគេអាចចាក់អរម៉ូនចិញ្ចឹមកូនក្នុងកែវបានដោយមិនចាំបាច់មានការរួមភេទនោះទេ។»

ពួកគេមួយចំនួនក៏បានបង្ហាញពីការយល់ឃើញថា ប្រសិនបើកម្ពុជាមានច្បាប់រៀបអាពាហ៍ពិពាហ៍សម្រាប់អ្នកស្រលាញ់ភេទដូចគ្នា នោះការរើសអើងនឹងមានការកាត់បន្ថយ។

លោក អឿន ស៊ាងហេង លើកឡើងថា៖ «ចំពោះការកាត់បន្ថយគឺបានកើតឡើងហើយព្រោះយើងបានប្រកាសទទួលស្គាល់ហើយថាគាត់មានសិទ្ធិពេញលេញ»។

ចំណែកលោក បូរីស យល់ថា៖ « ប្រសិនបើយើងមានច្បាប់អាពាហ៍ពិពាហ៍សម្រាប់ពួកគាត់ នោះខ្ញុំគិតថា វានឹងលែងមានពាក្យអ្នកនេះស្រលាញ់ភេទដូចគ្នាទៀតហើយ។ ហើយខ្ញុំគិតថា ការរើសអើងក៏បាត់ ព្រោះបើពួកគេមានសមមាត្រក្នុងការទទួលបានសិទ្ធិស្មើគ្នា»៕

ក្រសួងទេសចរណ៍ បើកវគ្គបណ្តុះបណ្តាលភាសាចិនដោយឥតគិតថ្លៃដើម្បីជំរុញវិស័យទេសចរណ៍

Vannsak Wathnak — Thu, 24 Dec 2020 06:31:46 +0000

ក្រសួងទេសចរណ៍ប្រកាសបើកវគ្គបណ្តុះបណ្តាលភាសាចិនកម្រិតមូលដ្ឋានសម្រាប់វិស័យទេសចរណ៍ដោយឥតគិតថ្លៃ តាមប្រព័ន្ធអនឡាញ ដើម្បីចូលរួមជំរុញ និងលើកកម្ពស់ការអភិវឌ្ឍធនធានមនុស្សក្នុងវិស័យទេសចរណ៍ ជាពិសេសដើម្បីផ្តល់នូវជំនាញភាសា។

យោងតាមសេចក្តីជូនដំណឺងរបស់ក្រសួងទេសចរណ៍ ដែលបានបង្ហោះលើទំព័រហ្វេសប៊ុករបស់ខ្លួនកាលពីថ្ងៃទី២៣ ខែធ្នូ បញ្ជាក់ថា ក្រោមកិច្ចសហការជាមួយវិទ្យាស្ថាន ខុងជឺ នៃរាជបណ្ឌិត្យសភាកម្ពុជា ក្រសួងទេសចរណ៍បានសម្រេចបើកវគ្គបណ្តុះបណ្តាលភាសាចិនដោយឥតគិតថ្លៃដល់បុគ្គលិកបម្រើការងារក្នុងវិស័យទេសចរណ៍ ដូចជាយុវជន សិស្ស និសិ្សត និងសាធារណជន ដែលមានបំណងអភិវឌ្ឍសមត្ថភាពលើជំនាញនេះ។

វគ្គបណ្តុះបណ្តាលខាងនេះនឹងចាប់ផ្តើមសិក្សា ចាប់ពីថ្ងៃទី៤ ខែមករា ឆ្នាំ២០២១ តទៅ៕

កម្ពុជា-ថៃ ព្រមព្រៀងបើកច្រកព្រំដែនឡើងវិញបន្ទាប់ពីបិទមួយរយៈដោយសារកូវីដ១៩

Vannsak Wathnak — Mon, 21 Dec 2020 07:32:44 +0000

រដ្ឋបាលខេត្តបន្ទាយមានជ័យ និងខេត្តបាត់ដំបង រួមជាមួយនឹងខេត្តស្រះកែវ ប្រទេសថៃ បានសម្រេចបើកដំណើរការច្រកព្រំដែនវិញ បន្ទាប់ពីបានបិទមួយរយៈដោយសារជំងឺកូវីដ១៩ ដោយការសម្រេចនោះបានធ្វើឡើង ក្នុងកិច្ចប្រជុំរវាងកម្ពុជានិងថៃ កាលពីថ្ងៃទី១៧ ខែធ្នូ ២០២០។

យោងតាមទំព័រហ្វេសប៊ុករបស់រដ្ឋបាលខេត្តបន្ទាយមានជ័យ ផ្សាយនៅថ្ងៃទី១៧ ខែធ្នូ ឆ្នាំ២០២០នេះបញ្ជាក់ថា ការបើកដំណើរការច្រកព្រំដែន គឺក្នុងគោលបំណងចង់ជំរុញឲ្យមានដំណើរការសេដ្ឋកិច្ចក្នុងតំបន់ឡើងវិញ នៅតាមច្រកទ្វារព្រំដែនកម្ពុជា ថៃ ក្នុងភូមិសាស្រ្តខេត្តបាត់ដំបង ខេត្តបន្ទាយមានជ័យ និងខេត្តស្រះកែវនៃព្រះរាជាណាចក្រថៃ និងផ្ដោតសំខាន់ទៅលើការបន្ធូរបន្ថយច្បាប់ស្ដីពីការគ្រប់គ្រងស្ថានការក្នុងគ្រាអាសន្ននៅក្នុងប្រទេសថៃ ដើម្បីសម្រួលដល់ប្រជាពលរដ្ឋក្នុងការចូលទៅធ្វើការ និងប្រកបអាជីវកម្មបានវិញ។

ទំព័រហ្វេសប៊ុកដដែលបន្ថែមថា ខាងភាគីថៃបានឯកភាពចំពោះការចូលទៅលក់ដូរជាធម្មតា ប៉ុន្តែត្រូវធ្វើចត្តាឡីស័ករយៈពេល១៤ថ្ងៃ ចំពោះអាជីវករដែលចូលទៅលក់រយៈពេលយូរចាប់ពី៣ ទៅ៤ខែ។ ដោយឡែកចំពោះករណីអ្នកចេញព្រឹកមកល្ងាចវិញ ទាំងទៅផ្សាររោងក្លឿ និងធ្វើការតាមព្រំដែននោះ ភាគីទាំង៣ពុំទាន់មានការឯកភាពនោះទេសុំពិភាក្សាបន្ត នឹងស្នើសុំគោលទៅប្រមុខរាជរដ្ឋាភិបាលនៃប្រទេសទាំង២សិន៕

តម្លៃប្រេងឥន្ធនៈនឹងធ្លាក់ចុះក្នុងតម្លៃខ្ពស់បំផុតត្រឹម៣,៣១០៛/លីត្រ ចាប់ពីពាក់កណ្តាលខែធ្នូ

Vannsak Wathnak — Thu, 17 Dec 2020 14:02:29 +0000

ក្រសួងចំនួនបីបានចេញប្រកាសរួម សម្រេចទម្លាក់តម្លៃប្រេងឥន្ធនៈចាប់ពីថ្ងៃទី១៦ ដល់ថ្ងៃទី៣១ ខែធ្នូ ឆ្នាំ២០២០ ដោយលក់រាយក្នុងតម្លៃខ្ពស់បំផុតត្រឹម៣,៣១០៛/លីត្រ ដើម្បីជួយសម្រួលដល់ជីវភាពប្រជាពលរដ្ឋ។

ការសម្រេចនេះធ្វើឡើងក្នុងប្រកាសអន្តរក្រសួងលេខ១៧២ពណ.អវក.ប្រក ចុះថ្ងៃទី២២ ខែមិថុនា ឆ្នាំ២០១៨ របស់ក្រសួងសេដ្ធកិច្ច និងហិរញ្ញវត្ថុ និងក្រសួងពាណិជ្ជកម្ម និងក្រសួងរ៉ែ និងថាមពល ស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា និងយោងតាមការព្រមព្រៀងលើរូបមន្តកំណត់តម្លៃជាមួយក្រុមហ៊ុនប្រេងឥន្ទនៈ ដែលប្រកបអាជីវកម្មនៅកម្ពុជា និងការប្រែប្រួលតម្លៃលើទីផ្សារក្នុងតំបន់ និងអន្តរជាតិ។

ក្នុងសេចក្តីប្រកាសនោះបញ្ជាក់ថា ផ្អែកតាមតម្លៃមធ្យមប្រេងឥន្ធនៈលើទីផ្សារអន្តរជាតិ ថ្លៃលក់រាយប្រេងឥន្ធនៈចាប់ពីថ្ងៃទី១៦ ដល់ថ្ងៃទី៣១ ខែធ្នូ ឆ្នាំ២០២០ នឹងត្រូវលក់៣,៣១០៛/លីត្រ សម្រាប់សាំងធម្មតា និង៣,០១០៛/លីត្រ សម្រាប់ប្រេងម៉ាសូត ប៉ុន្តែស្របតាមការរៀបរាប់ខាងលើតម្លៃលក់រាយប្រេងឥន្ធនៈ នឹងត្រូវចុះមកត្រឹម៣,១៥០៛/លីត្រសម្រាប់សាំងធម្មតា និង២,៨៥០៛/លីត្រសម្រាប់ប្រេងម៉ាសូត៕

ក្រសួងមហាផ្ទៃជូនដំណឹងដល់មន្ត្រីឲ្យចូលធ្វើការវិញ ក្រោយបញ្ចប់ការធ្វើចត្តាឡីស័ក និងតេស្តអវិជ្ជមាន៣ដង

Vannsak Wathnak — Tue, 15 Dec 2020 15:25:17 +0000

ក្រសួងមហាផ្ទៃនៅថ្ងៃអង្គារនេះ បានជូនដំណឹងដល់មន្ត្រីគ្រប់ជាន់ថ្នាក់ដែលបម្រើការងារនៅទីស្តីការក្រសួងមហាផ្ទៃឲ្យចូលបម្រើការងារជាធម្មតាវិញ ក្រោយពេលបានបញ្ចប់ការធ្វើចត្តាឡីស័ក និងទទួលបានលទ្ធផលអវិជ្ជមានពីបានធ្វើរោគវិនិច្ឆ័យជំងឺកូវីដ១៩ លើកទី៣រួចរាល់។

យោងតាមបទបញ្ជារបស់ក្រសួងមហាផ្ទៃ លេខ០០២ បបជ ចុះថ្ងៃទី៧ ខែធ្នូ ឆ្នាំ២០២០ ស្តីពីការផ្អាកការចូលមកបំពេញការងារជាបណ្តោះអាសន្ន ចំពោះមន្ត្រីរាជការដែលបម្រើការងារក្នុងបរិវេណទីស្តីការក្រសួងមហាផ្ទៃ។

យោងតាមការផ្សាយលើទំព័រ Facebook ផ្លូវការរបស់ក្រសួងមហាផ្ទៃនៅថ្ងៃទី១៥ ខែធ្នូ ឆ្នាំ២០២០នេះបញ្ជាក់ថា ថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារមួយចំនួន ដែលបានប៉ះពាល់ដោយផ្ទាល់ និងដោយប្រយោលក្នុង «ព្រឹត្តិការណ៍សហគមន៍ ២៨ វិច្ឆិកា» បានបញ្ចប់ការធ្វើចត្តាឡីស័ក និងតេស្តអវិជ្ជមាននៃវីរុសកូវីដ១៩លើកទី៣នេះរួចរាល់ និងអាចអនុញ្ញាតឲ្យចេញ-ចូលបម្រើការងារក្នុងបរិវេណទីស្តីការក្រសួងមហាផ្ទៃវិញបានជាធម្មតា។

ដោយឡែកក្រសួងបានបញ្ជាក់ថា ចំពោះថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ដែលបានធ្វើរោគវិនិច្ឆ័យរកវីរុសកូវីដ១៩ លើកទី២រួចរាល់ ត្រូវបន្តធ្វើចត្តាឡីស័កឱ្យបានត្រឹមត្រូវ និងហ្មត់ចត់បំផុត ស្របតាមគោលការណ៍ណែនាំរបស់ក្រសួងសុខាភិបាល។

ជាមួយគ្នានោះផងដែរ អគ្គនាយកប្រធានអង្គភាពចំណុះក្រសួងមហាផ្ទៃទាំងអស់ ត្រូវអនុវត្តវិធានការការពារជំងឺកូវី១៩ឱ្យបានត្រឹមត្រូវ និងហ្មត់ចត់តាមគោលការណ៍ណែនាំរបស់ក្រសួងសុខាភិបាល ជាពិសេសការពាក់ម៉ាស់ ការលាងសម្អាតដៃឱ្យបានញឹកញាប់ និងការរក្សាគម្លាតសុវត្ថិភាពបុគ្គល៕

អាជីវករនៅភ្នំពេញត្អូញត្អែរធ្លាក់ចំណូល ក្រោយផ្ទុះមេរោគកូវីដជាសហគមន៏

Vannsak Wathnak — Mon, 14 Dec 2020 13:58:59 +0000

អាជីវករមួយចំនួននៅរាជធានីភ្នំពេញ បានធ្វើត្អូញត្អែរអំពីការធ្លាក់ចុះនៃចំណូលរបស់ខ្លួនពី ការប្រកបរបរលក់ដូរចិញ្ចឹមជីវិត ដោយសារតែប៉ះពាល់ដោយការផ្ទុះឡើងជាសហគមន៏នូវមេរោគកូវីដ១៩។

អ្នកស្រី ខ្វាន់ចន្ទ័ តម្រាពៅ ដែលជាស្ត្រីមេម៉ាយរស់នៅជាមួយនឹងកូន៣នាក់ ហើយកំពុងប្រកបរបរលក់បន្លែចល័តនៅក្នុងផ្សារដើមគរ បានប្រាប់ Newsroom Cambodia ថា អ្នកស្រី និងអាជីវករដ៍ទៃទៀត មានការបារម្មណ៍យ៉ាងខ្លាំងចំពោះការរាតត្បាតនៃជម្ងឺនេះ ដែលជះឥទ្ធិពលអវិជ្ជមានជាច្រើនដល់អាជីវកម្មរបស់ពួកគាត់។

អ្នកស្រីបាននិយាយថា៖ «ដល់កូវីដដងនេះវេទនាណាស់លោក អត់មានលុយចំណូល កូនរៀនអង្គការ អត់មានលុយឲ្យផ្ទះជួល»។

អ្នកផ្ទុកជំងឺកូវីដ ១៩ ដែលបានរកឃើញវិជ្ជមានបន្ទាប់ពីពាក់ព័ន្ធនឹង «ព្រឹត្តិការណ៏សហគមន៏ ២៨ វិច្ឆិកា» មានចំនួន៤០នាក់ ខណៈដែលក្រសួងមហាផ្ទៃ សាលារៀនមួយចំនួន កន្លែងហាត់កីឡា និងផ្សារមួយចំនួន ត្រូវបានបិទបណ្តោះអាសន្ន ដើម្បីការពារការរីករាលដាលកាន់តែខ្លាំង។

អ្នកស្រីបានត្អូញត្អែរថាការលក់ដូរត្រូវបានធ្លាក់ចុះ ដែលបណ្តាលឲ្យមានការខ្វះខាតថវិកា ក្នុងការផ្គត់ផ្គង់ទៅដល់ជីវភាពគ្រួសាររបស់គាត់ផ្ទាល់ ហើយបានជំរុញឲ្យគាត់មានការព្រួយបារម្មណ៍ជាខ្លាំងចំពោះទីជម្រកជ្រោកកោន និងការសិក្សាកូនៗរបស់គាត់ផងដែរ ដែលរូបគាត់ផ្ទាល់ជាអ្នកទទួលបន្ទុកតែម្នាក់ឯង។

អ្នកស្រី ផៃ ធារី អាជីវករលក់ដូរបន្លែដូចគ្នានេះដែរ បានសម្តែងការភ័យខ្លាច និងមិនពេញចិត្តចំពោះការបង់ថ្លៃកន្លែងលក់ដូរ ពេញថ្លៃដោយមិនមានការអនុគ្រោះ ឬបញ្ចុះតម្លៃឡើយ ទោះបីជម្ងឺកូវីដ ១៩ បានរាតត្បាតនិងប៉ះពាល់ដល់អាជីវកម្មរបស់គាត់ក៍ដោយ។

អ្នកស្រីបានបន្តថា ចំណូលដែលបានមកស្តួចស្តើងនោះត្រូវបានបែងចែកទៅជួយជីវភាពគ្រួសារផង និងបង់ថ្លៃកន្លែងធ្វើអាជីវកម្មផង ដែលនាំឲ្យគាត់មានភាពលំបាកជាខ្លាំងមួយកម្រិតទៀត។

អ្នកស្រី សូរ សាអង ដែលជាអាជីវករលក់ដូរចំណីអាហារនៅក្បែររមណីយដ្ធានវត្តភ្នំ បានលើកឡើងអំពីការឡើងថ្លៃនៃតម្លៃទំនិញ ដែលបណ្តាលមកពីឈ្មួញកណ្តាលតម្លើងតម្លៃស្រេចតែការនឹកឃើញរបស់ពួកគេចង់បាន។

អ្នកស្រីបន្តទៀតថា នៅពេលដែលមានការកើនឡើងនូវចំនួននៃការឆ្លងទៅដល់មនុស្សក្នុងប្រទេស វាបានធ្វើឲ្យការលក់ដូរមានភាពស្ងាត់ជ្រងំ ទោះបីជាបានដាក់អាល់កុលសម្រាប់លាងដៃសម្លាប់មេរោគក៍ដោយ ក៍មិនមានអតិថិជនច្រើនកុះករដូចពីមុនឡើយ។

គាត់បានបន្ថែមថា៖ «វាទូទៅទាំងពិភពលោកទៅហើយ វាមិនមានតែប្រទេសខ្មែរទេ គ្រាន់តែបញ្ហាចំបង យើងខ្លាំងបំផុតគឺសេដ្ធកិច្ចតែម្តង ហើយអាជ្រួលច្របល់កូវីដអញ្ជឹងហើយ ឥវ៉ាន់វាឡើងថ្លៃដែរ ដូចថាឥវ៉ាន់ឈ្មួញកណ្តាលហ្នឹងវាមិនថេរ អាយើងពិបាកសេដ្ធកិច្ចហើយ ឥវ៉ាន់វាឡើងចុះតាមតែគេថាទៀត»៕

Vannsak Wathnak – Newsroom Cambodia

ព្រះសង្ឃក្នុងវត្តវិសុទ្ធិមគ្គខេត្តសៀមរាបគោរពវិន័យយ៉ាងតឹងរ៉ឹងបែប​ព្រះ​ពុទ្ធសាសនា​សុទ្ធ

ខណៈកូវីដវាយលុក ការធ្វើឱ្យវត្ថុអនុស្សាវរីយ៍ពីដូងជាប្រភពចំណូលថ្មីសម្រាប់អ្នកភូមិក្នុងខេត្តសៀមរាប

Vox Pop: ទស្សនៈចំពោះការបង្កើតច្បាប់រៀបអាពាហ៍ពិពាហ៍សម្រាប់អ្នកស្រលាញ់ភេទដូចគ្នា

ក្រសួងទេសចរណ៍ បើកវគ្គបណ្តុះបណ្តាលភាសាចិន​ដោយឥតគិតថ្លៃ​ដើម្បី​ជំរុញ​វិស័យ​ទេសចរណ៍​

កម្ពុជា-ថៃ ព្រមព្រៀងបើកច្រកព្រំដែនឡើងវិញ​បន្ទាប់ពីបិទមួយរយៈដោយសារកូវីដ១៩