វ៉ាន់នី ទេវី (Vanny Tevy) – Newsroom Cambodia

ខេត្តមួយចំនួននៅកម្ពុជានឹងបន្តចុះត្រជាក់ខ្លាំងចាប់ពីថ្ងៃទី២០ ដល់២៦មករា

វ៉ាន់នី ទេវី (Vanny Tevy) — Wed, 20 Jan 2021 09:04:06 +0000

ក្រសួងធនធានទឹកបានប្រកាសនៅថ្ងៃទី១៩ ខែមករា ឆ្នាំ២០២១នេះថា ចាប់ពីថ្ងៃទី២៣ ដល់២៦ ខែមករាតំបន់ជាប់ជួរភ្នំដងរែក និងខ្ពង់រាបឦសានបន្តចុះត្រជាក់នៅសីណ្ហភាពអប្បបរមាពី១៣-១៨អង្សាសេ។

ក្រសួងធនធានទឹកបានបញ្ជាក់ក្នុងសេចក្តីប្រកាសព័ត៌មានរបស់ខ្លួនថា ការប្រឈមនឹងអាកាសធាតុធ្លាក់ចុះទាបនេះ គឺដោយសារកម្ពុជាកំពុងរងឥទ្ធិពលជ្រលងសម្ពាធខ្ពស់ និងខ្យល់មូសុងឦសានចុះខ្សោយចាប់ពីថ្ងៃទី២០ ដល់២២ខែមករា ឆ្នាំ២០២១ និងទទួលឥទ្ធិពលកម្រិតសម្ពាធទាបខ្សោយ។

យុវតី ពិសី អាយុ១៧ឆ្នាំជាអាជីវករលក់ខោអាវជជុះនៅផ្សារបឹងកេងកង រាជធានីភ្នំពេញ បានប្រាប់ Newsroom Cambodia ថា ស្ថិតក្នុងអាកាសធាតុចុះត្រជាក់បែបនេះសូមឲ្យប្រជាជនកម្ពុជាទាំងអស់ត្រូវការពារសុខភាពអោយបានល្អជៀសវាងកើតជំងឺផ្តាសាយ ពិសេសកុមារ និង មនុស្សចាស់ត្រូវពាក់ខោអាវឲ្យបានក្រាស់ៗ និងញ៉ាំអាហារដែលក្តៅ។

ចំណែកអ្នកស្រី វិសាល អាយុ៣៣ឆ្នាំ ជាអាជីវករលក់ដូរនៅផ្សារបឹងកេងកងបានប្រាប់ Newsroom Cambodia ដែរថា ក្នុងអំឡុងពេលអាកាសធាតុចុះត្រជាក់ សូមប្រជាជន កម្ពុជាទាំងអស់ត្រូវពាក់ខោអាវឲ្យបានក្រាស់ៗ ដើម្បីការពារពីភាពត្រជាក់ និងត្រូវញ៉ាំទឹកក្តៅឲ្យបានច្រើនប្រចាំថ្ងៃ។

ដូចគ្នានេះដែរ យុវតី ធារ៉ា អាយុ១៧ឆ្នាំជាអាជីវករលក់អាវជជុះនៅមុខសាលាបឹងកេងកងលើកឡើងដែរថា អាកាសធាតុចុះត្រជាក់បែបនេះ បងប្អូនប្រជាជនដែលរស់នៅប្រទេស កម្ពុជាទាំងមូលត្រូវពាក់ខោអាវ វែងៗដើម្បីទប់ទល់នឹងអាកាសធាតុត្រជាក់ និងញ៉ាំអាហារក្តៅៗឲ្យបានទៀងទាត់៕

គ្រឹះស្ថានសិក្សាឯកជនបើកដំណើរការឡើងវិញបន្ទាប់ពីបិទរាប់សប្តាហ៍ដោយសារកូវីដ១៩

វ៉ាន់នី ទេវី (Vanny Tevy) — Mon, 04 Jan 2021 14:34:48 +0000

គ្រឹះស្ថានសិក្សាឯកជន បានបើកដំណើរការឡើងវិញ នៅថ្ងៃច័ន្ទ ទី៤ ខែមករា ឆ្នាំ២០២១នេះ ក្រោយពីបិទរាប់សប្តាហ៍មកហើយដោយសារតែការផ្ទុះឡើងនៃជណងឺកូវីដ១៩ នាចុងឆ្នាំមុន។

ការឆ្លងរាលដាលចូលដល់សហគមន៍នៃជំងឺកូវីដ១៩ ឬដែលរដ្ឋាភិបាលហៅថាជា «ព្រឹត្តិការណ៍សហគមន៍ ២៨ វិច្ឆិកា» បានបណ្តាលឲ្យក្រសួងអប់រំ យុវជន និងកីឡា ផ្អាកដំណើរការសាលារៀនមួយរយៈ ដើម្បីការពារសុវត្ថិភាពរបស់សិស្សានុសិស្ស ។ សិស្ស-និស្សិតទាំងអស់ត្រូវបន្តការសិក្សាពីចម្ងាយ តាមប្រព័ន្ធអេឡិចត្រូនិច ឬប្រព័ន្ធអនឡាញ។

សិស្ សកួច ករុណា រៀនថ្នាក់ទី ១១ បានលើកឡើងថា រៀននៅសាលាល្អជាងរៀនតាមអនឡាញ ព្រោះរៀនតាមអនឡាញ មិនសូវមានពេលសួរនាំគ្រូដូចរៀននៅសាលា ហើយអ៊ីនធើណែតក៏ដាច់ៗមិនសូវច្បាស់។

ចំណែកសិស្សដាវុធ សុវណ្ណារី រៀនថ្នាក់ទី១២ បាននិយាយដូច្នេះថា៖ «មករៀននៅសាលាល្អជាង ព្រោះបានជួបមិត្តភ័ក្រ្ត និងរៀនពីលោកគ្រូអ្នកគ្រូបានច្បាស់លាស់ជាងតាមអនឡាញ»។

សម្រាប់គ្រឹះស្ថានសិក្សាចំណេះទូទៅសាធារណៈ នឹងបើកបវេសនកាលឡើងវិញនៅថ្ងៃទី ១១ ខែមករា ឆ្នាំ២០២១។ នេះបើតាមក្រសួងអប់រំយុវជន និងកីឡា ដែលបានប្រកាសកាលពីថ្ងៃទី២៩ ខែធ្នូ ឆ្នាំ២០២០។

អ្នកនាំពាក្យក្រសួងអប់រំយុវជន និងកីឡា លោក រស់ សុវាចា បានលើកឡើងថាថ្វីត្បិតតែឲ្យបើកដំណើរការក៏ពិតម៉ែន ប៉ុន្តែសាលាត្រូវបន្តអនុវត្តគោលការណ៍ប្រតិបត្តិស្តង់ដា (SOP) សម្រាប់ដំណើរការសាលារៀនឡើងវិញក្នុងបរិបទកូវីដ១៩ និងរក្សាគម្លាតសុវត្ថិភាពសង្គម និងបុគ្គល។

ចំពោះការប្រើវិធីសាស្ត្រណា ដើម្បីតាមដានការអនុវត្តតាមគោលការណ៍យ៉ាងណានោះ លោកមិនបានឆ្លើយតបនឹងសំណួររបស់ Newsroom Cambodia នោះទេ។

គួររំលឹកផងដែរថា កាលពីថ្ងៃទី២៨ ខែវិច្ឆិកា ឆ្នាំ២០២០ កន្លងទៅនេះ អ្នកឆ្លងកូវីដ ១៩ បានកើនឡើងដល់ទៅ ១៤នាក់ ហើយរដ្ឋាភិបាល បានអោយបិទស្ថាប័ន និងហាងលក់ទំនិញដែលជាប់ពាក់ព័ន្ធ៕

ក្រសួងអប់រំប្រកាសឲ្យគ្រឹះស្ថានអប់រំបើកដំណើរការឡើងវិញ

វ៉ាន់នី ទេវី (Vanny Tevy) — Wed, 30 Dec 2020 02:53:41 +0000

ក្រសួងអប់រំបានប្រកាសថា គ្រឹះស្ថានសិក្សាចំណេះដឹងទូទៅឯកជនសាធារណៈទាំងអស់អាចដំណើរការឡើងវិញបានចាប់ពីថ្ងៃជូនដំណឹងនៅថ្ងៃទី២៩ ខែធ្នូ ឆ្នាំ២០២០នេះតទៅ។

ការប្រកាសនេះគឺបានធ្វើឡើងពីបន្ទាប់ពីការប្រកាសបិទបញ្ចប់‌‌ ‌«ព្រឹត្តិការណ៍សហគមន៍២៨វិច្ឆិកា» ដោយលោកនាយករដ្ឋមន្រ្តីហ៊ុន សែន កាលពីថ្ងៃអង្គារ៍ ទី២៩ ខែធ្នូ ឆ្នាំ២០២០។ ក្រសួងក៏បានសម្រេចយកថ្ងៃទី១១ ខែមករា ឆ្នាំ២០២១ ដើម្បីបើកបវេសនកាលថ្មីផងដែរសម្រាប់សាលារដ្ឋ។

ក្រសួងអប់រំបានបន្តទៀតថា សម្រាប់គ្រឹះស្ថានសិក្សាចំណេះដឹងសាធារណៈទាំងអស់ត្រូវបន្តអនុវតន៍តាមគោលការណ៍ប្រតិបត្តិស្តង់ដាសម្រាប់ដំណើរការសាលារៀនឡើងវិញក្នុងបរិបទជំងឺ កូវីត១៩ និងរក្សាគម្លាតរក្សាសុវត្តិភាពសង្គម៕

ក្រសួងសុខាភិបាលហាមឃាត់មន្ទីរពេទ្យឯកជនពីការព្យាបាលអ្នកជំងឺកូវីដ១៩

វ៉ាន់នី ទេវី (Vanny Tevy) — Tue, 29 Dec 2020 05:11:02 +0000

ក្រសួងសុខាភិបាលកាលពីថ្ងៃទី២៥ ខែធ្នូ ឆ្នាំ២០២០ បានហាមឃាត់មន្ទីរពេទ្យឯកជនទាំងអស់ពីការព្យាបាលអ្នកជំងឺកូវីដ១៩ ហើយជំរុញឲ្យបញ្ជូនអ្នកសង្ស័យថាមានជំងឺកូវីដ១៩មកមន្ទីពេទ្យបង្អែករដ្ឋ នៅទូទាំងខេត្ត និងមន្ទីរពេទ្យមិត្តភាព ខ្មែរសូវៀតជាបន្ទាន់។

រដ្ឋមន្រ្តីក្រសួងសុខាភិបាល លោកម៉ម ប៊ុនហេង បានបញ្ជាក់ក្នុងលិខិតជូនដំណឹងដល់ម្ចាស់សេវាពិនិត្យព្យាបាលឯកជនទាំងអស់ថា៖ «មិនអនុញ្ញាតឲ្យធ្វើការពិនិត្យ និងព្យាបាលអ្នកជំងឺដែលសង្ស័យថាជាជំងឺកូវីដ១៩ នៅតាមកន្លែងពិនិត្យព្យាបាលអ្នកជំងឺឯកជនរបស់ខ្លួនឡើយ»។

លិខិតនោះបានបន្តទៀតថា មន្ទីរពេទ្យឯកជនទាំងអស់ត្រូវសហការជាមួយក្រសួងសុខាភិបាលក្នុងការចូលរួមការការពារជំងឺកូវីត ១៩ ដោយផ្សព្វផ្សាយអំពីវិធីការពារពីជំងឺតាមរយៈការបិទក្រដាស់ព័ត៌មានពីវិធីការពារខ្លួននៅតាមមន្ទីរពេទ្យឯកជនទាំងអស់៕

ក្រសួងប្រៃសនីយ៍ប្រកាសឲ្យអ្នកប្រើប្រព័ន្ធតេឡេក្រាម ប្រយ័ត្នពីការវាយប្រហាររបស់ Hacker

វ៉ាន់នី ទេវី (Vanny Tevy) — Fri, 18 Dec 2020 04:25:42 +0000

ក្រសួងប្រៃសនីយ៍ និងទូរគមន៍នៅសប្តាហ៍នេះ បានប្រកាសឲ្យអ្នកប្រើប្រាស់បណ្តាញសង្គមតេឡេក្រាម (Telegram) ឲ្យមានការប្រុងប្រយ័ត្នចំពោះឧក្រិដ្ឋជន (hacker) ដែលបានធ្វើសកម្មភាពក្លែងបន្លំជានរណាម្នាក់ដើម្បីបញ្ជូនមេរោគតាមសារតេឡេក្រាម ដែលអាចលួចយកទិន្នន័យ និងឯកសារផ្សេងៗរបស់អ្នកប្រើដោយស្វ័យប្រវត្តិ។

យោងតាមទំព័រហ្វេសប៊ុកផ្លូវការរបស់ក្រសួងប្រៃសនីយ៍ និងទូរគមន៍ បានផ្សព្វផ្សាយកាលពីថ្ងៃទី១៥ ខែធ្នូ ឆ្នាំ២០២០នេះ បញ្ជាក់ថា ក្រុមការងារបច្ចេកទេសបានសង្កេត ឃើញមានការបញ្ជូនសារតាមប្រព័ន្ធតេឡេក្រាម ដោយក្លែងបន្លំធ្វើជាថ្នាក់ដឹកនាំក្នុងជួររដ្ឋាភិបាល ឬនរណាម្នាក់។ នៅពេលដែលអ្នកប្រើប្រាស់ចុកលើសារនោះ មេរោគនឹងស្រូបយកទិន្នន័យ និងលេខសម្ងាត់កម្មវិធីផ្សេងៗ ព្រមទាំងបញ្ជាមាស៊ីនថតរូប ឬឧបករណ៍ថតសំឡេងដើម្បីលួច យកព័ត៌មានរបស់ជនរងគ្រោះ បន្ទាប់មកទៀតឧក្រិដ្ឋជននឹងយកអត្តសញ្ញាណជនគ្រោះទៅបោក បញ្ឆោតអ្នកដទៃផ្សេងទៀត។

ក្រសួងប្រៃសនីយ៍បានបន្ថែមដោយក្រើនរំឮកដល់អ្នកប្រើប្រាស់ប្រព័ន្ធតេឡេក្រាមទាំងអស់ ឲ្យមានការប្រុងប្រយ័ត្ន ដោយពុំត្រូវចុចលើតំណរភ្ជាប់ដែលពុំមានប្រភពច្បាស់លាស់ និងត្រូវជៀសវាងការផ្តល់លេខសម្ងាត់គណនីឲ្យទៅនរណាម្នាក់ ឬឃើញមានករណីសង្ស័យលើគណនីតេឡេក្រាមណាមួយមិនប្រក្រតី ត្រូវចុកប្លុកជាបន្ទាន់៕

ក្រសួងមហាផ្ទៃប្រកាសឲ្យអ្នកប្រើប្រាស់អ៊ីនធឺណេត ប្រុងប្រយ័ត្នចំពោះមេរោគក្នុងបណ្តាញសង្គម Facebook

វ៉ាន់នី ទេវី (Vanny Tevy) — Wed, 09 Dec 2020 14:57:16 +0000

នាយកដ្ឋានព័ត៌មានវិទ្យានៃក្រសួងមហាផ្ទៃ ប្រកាសឲ្យអ្នកប្រើប្រាស់អ៊ីនធឺណេត ប្រុងប្រយ័ត្នចំពោះករណីចម្លងមេរោគក្នុងបណ្តាញទំនាក់ទំនងសង្គម Facebook ដែលអាចលួចយកលេខសម្ងាត់ ឬរូបភាព ឬវីដេអូរបស់អ្នកប្រើប្រាស់។

បើតាមទំព័រហ្វេសប៊ុករបស់នាយកដ្ឋានព័ត៌មានវិទ្យានៃក្រសួងមហាផ្ទៃផ្សព្វផ្សាយកាលពីថ្ងៃទី៨ ខែធ្នូនេះបញ្ជាក់ថា ក្រុមការងារបច្ចេកទេសរបស់ក្រសួងបានសង្កេតឃើញមានករណីចម្លងមេរោគក្នុងបណ្តាញទំនាក់ទំនងសង្គម Facebook ដែលមានឈ្មោះថា «BIST DU ESIMVIDEO?» ឬជាភាសាខ្មែរមានន័យថា «តើបុគ្គលក្នុងវីដេអូនេះពិតជាអ្នកមែនទេ?»។ ទំព័រហ្វេសប៊ុកនាយកដ្ឋានព័ត៌មានវិទ្យានៃក្រសួងមហាផ្ទៃបន្ថែមថា មេរោគនេះត្រូវបានចែករំលែកតាមរយៈសារ Messenger នៃគណនីមួយទៅកាន់គណនី ផ្សេងមួយទៀត និងស្ទើរពាសពេញគណនីក្នុងស្រទាប់យុវវ័យកម្ពុជា។

នាយកដ្ឋានព័ត៌មានបន្ថែមថា មេរោគនេះ ពីដំបូងសង្កេតឃើញមានការផ្ញើសារភ្ជាប់ជាមួយតំណរភ្ជាប់វីដេអូ ពីគណនីអនាមិកដែលបង្ហាញខ្លឹមសារថា «តើបុគ្គលក្នុងវីដេអូនេះ ពិតជាអ្នកមែនទេ?» និងករណីមួយចំនួនជាមិត្តភ័ក្តិ ឬបុគ្គលដែលម្ចាស់គណនីស្គាល់។ តំណរភ្ជាប់នោះមើលទៅហាក់ដូចជារូបភាព ឬវីដេអូ YouTube ដូច្នេះដែរ ហើយនៅពេលដែលអ្នកប្រើប្រាស់ចុចលើរូបភាព ឬវីដេអូក្នុងកម្មវិធីសារ MESSENNGER តំណរ ភ្ជាប់នោះនឹងនាំអ្នកទៅកាន់គេហទំព័រមេរោគដែលមានសមត្ថភាពលួចយកលេខសម្ងាត់គណនីបណ្តាញសង្គមរបស់អ្នក ឬចម្លងរោគទៅគណនីរបស់អ្នកប្រើប្រាស់។

នាយកដ្ឋានព័ត៌មានដដែលបញ្ជាក់តាមន័យដើមថា៖ «បន្ទាប់ពីលួចគណនីជនរងគ្រោះ មេរោគនេះនឹងធ្វើការទាញយករូបភាពជនគ្រោះដាក់បញ្ចូលក្នុងរូបភាព ឬវីដេអូអាសអាភាស ឬវីដេអូផ្សេងៗដោយប្រើប្រាស់បច្ចេក វិទ្យា DEEPFAKE ហើយធ្វើការចែករំលែកបន្តទៅកាន់មិត្តភក្តិដែលមានក្នុងគណនីដោយស្វ័យប្រវត្តិ។ សកម្មភាពបន្លំលួចគណនីដូចរៀបរាប់ខាងលើនឹងបន្តពីគណនីមួយទៅគណនីមួយយ៉ាងលឿន»។

នាយកដ្ឋានព័ត៌មានវិទ្យាបានបានបន្ថែមដោយក្រើនរំឮកដល់អ្នកប្រើបណ្តាញទំនាក់ទំនងសង្គមឲ្យមានការប្រុងប្រយ័ត្ន ដោយពុំត្រូវចុចលើតំណរភ្ជាប់ដែលពុំមាន ប្រភពច្បាស់លាស់ និងត្រូវជៀសវាងការផ្តល់លេខសម្ងាត់គណនីឲ្យទៅនរណាម្នាក់ ឬត្រូវ អង្កេតមើលអាសយដ្ឋានគេហទំព័រមុនវាយបញ្ចូលលេខសម្ងាត់៕