ញាណ វិភាវី (Vipheavy Nhean) – Newsroom Cambodia

ក្រុមបាល់បោះរទេះជនពិការនារីទើបបង្កើតថ្មីក្នុងខេត្តសៀមរាប ផ្តល់សង្ឃឹមដល់ជនពិការក្នុងការលេងកីឡា

ញាណ វិភាវី (Vipheavy Nhean) — Fri, 29 Jan 2021 15:05:07 +0000

(សៀមរាប)៖ នារីៗពិការជាង១០នាក់កំពុងនៅលើរទេះដោយដៃម្ខាងបង្វិលកង់រទេះឱ្យទៅមុខ និងដៃម្ខាងទៀតត្រែះបាល់ដើម្បីបោះឱ្យគ្នាទៅវិញទៅមក។ សមាជិកនៃក្រុមបាល់បោះជនពិការនារីដែលមានឈ្មោះថា Siem Reap Eagle ទាំងនេះ កំពុងហាត់សមលេងបាល់បោះយ៉ាងស្វាហាប់។

ក្នុងសម្លៀកបំពាក់កីឡាអមដោយទឹកមុខស្រស់ស្រាយ កញ្ញា ប៊ិស គន្ធា សមាជិកក្រុមបាល់បោះនារីពិការ «Siem Reap Eagle» លើកឡើងថា ការចូលហាត់បាល់បោះបានជួយឲ្យមានកាយសម្បទាមាំមួន និងជាឱកាសមួយដែលកញ្ញាបានជួបអ្នកដទៃ និងបង្កើនមិត្តភាព។

កញ្ញាបានថ្លែងថា៖ «ពេលទៅហាត់យើងក៏អាចបានជួបមិត្តភក្ដិ បានឃើញគេឃើញឯងកុំឲ្យនៅតែផ្ទះ ហើយក្រែងលោវាជួយឲ្យមានសុខភាពល្អ យើងរុញរទេះទៅនេះទៅនោះចឹងទៅ ឲ្យវាយឺតសរសៃរជាជាងយើងនៅមួយកន្លែងអត់ធ្វើអីដែរ»។

កញ្ញា ប៊ិស គន្ធា មានជំងឺគ្រុនស្វិតជើងតាំងពីរៀននៅថ្នាក់ទី៣មកម្លេះ ឯដៃទាំងសងខាងវិញក៏មានសភាពទន់ខ្សោយ មិនអាចប្រើកម្លាំងបានដូចគេនោះទេ។ កញ្ញាមានការលំបាកក្នុងការបំលាស់ទី ដោយតម្រូវឲ្យមានគេចាំជួយជានិច្ច។ កញ្ញាបានឲ្យដឹងថាពីដំបូងកញ្ញាស្ទាក់ស្ទើរ មុននឹងសម្រេចចិត្តចូលហាត់ ដោយសារកត្តាកាយសម្បទារផង និងកត្តាជីវភាពផង។

កញ្ញានិយាយថា៖ «មុនដំបូងដែលគេទាក់ទងហៅទៅហាត់ ខ្ញុំថាអត់ទៅទេដោយសារខ្ញុំអត់មានសោហ៊ុយសម្រាប់ជិះទៅមកទេ ខ្ញុំខ្វះលុយដែរ តែគេប្រាប់ថាគេមានសាហ៊ុយសម្រាប់ធ្វើដំណើរ ដល់គាត់ប្រាប់ចឹង ខ្ញុំក៏ចេះតែដេកគិតទៅ ហើយក៏សម្រេចចិត្តទៅហាត់ជាមួយមិត្តភក្តិដែលស្គាល់ៗដែរ»។

ស្រ្តី វ័យ៣១ឆ្នាំរូបនេះបន្ថែមថា៖ «មិត្តភក្ដិក៏ចេះតែនិយាយលើកទឹកចិត្តយើងដែរទៅថាមិនពិបាកអីទេ ទៅក៏ខ្ញុំសម្រេចចិត្តទៅខ្លួនឯងសាកមើលទៅ។ ខ្ញុំទៅដំបូងក៏ខ្ញុំអត់អាចលើកបាល់បោះអីបានដូចគេដែរ តែពួកគាត់នៅតែលើកទឹកចិត្តខ្ញុំដែរ គាត់មិនបានថាឲ្យឈប់ទៅអីទេ មានតែថាអត់អីទេ ពួកគាត់ព្យាយាមនិយាយលើកទឹកចិត្តឲ្យខ្ញុំខំមកហាត់ទៀត»។

ជាមនុស្សដែលធ្លាប់តែមិនសូវមានមិត្តភក្តិ ហើយមិនចូលចិត្តទៅជួបគេឯង កញ្ញា ប៊ិស គន្ធា អះអាងថា កញ្ញាមិនមានអារម្មណ៍ឯការដូចមុនឡើយក្រោយពីបានចូលជាសមាជិកក្រុមនារីបាល់បោះ ចាប់តាំងពីខែធ្នូ ឆ្នាំ២០២០។ កញ្ញាថា កញ្ញានឹងបន្តលេងបាល់បោះតទៅទៀត ដើម្បីឲ្យគេស្គាល់ច្រើន ឲ្យគេដឹងថាជនពិការក៏អាចលេងកីឡាបាន។

«មនុស្សឥឡូវគាត់បានយល់ដឹងច្រើនថាកុំឲ្យរើសអើងជនពិការ។ ខ្ញុំសុំផ្ញើរទៅជនពិការទាំងអស់មិនថាបង ឬប្អូនទោះពិបាកយ៉ាងណាក៏ត្រូវស៊ូព្រោះថាយើងមានជីវិត យើងមានឱកាស យើងសំណាងដែលបានកើតមកបានឃើញពិភពលោកឥឡូវវាល្អយ៉ាងណាស្រស់យ៉ាងណាដែលគេចាប់ផ្ដើមបង្កើតអ្វីល្អៗសម្រាប់ជនពិការតទៀត ចង់ឲ្យពួកគាត់លើកទឹកចិត្តខ្លួនឯងដើម្បីនៅមើលចំណុចហ្នឹងទាំងអស់គ្នា»។

ក្រុមនារីបាល់បោះ Siem Reap Eagle ត្រូវបានបង្កើតឡើងក្នុងខែវិច្ឆិកា ឆ្នាំ២០២០ ដោយបានទទួលការជួយជ្រោមជ្រែងពីគណៈកម្មាធិការអន្តរជាតិនៃកាកបាទក្រហម (ICRC) នៅកម្ពុជា និងអង្គការ Soulcial Trust។ ក្រុមបាល់បោះនេះ គឺជាក្រុមបាល់បោះនារីពិការទី៣នៅក្នុងប្រទេសកម្ពុជា ដែលបច្ចុប្បន្នមានសមាជិកទាំងអស់ចំនួន១៦នាក់។ កីឡាការិនីទាំងអស់តែងជួបជុំ និងហ្វឹកហាត់រៀងរាល់ថ្ងៃសុក្រ ដល់ថ្ងៃអាទិត្យ នៅក្នុងបរិវេណវិហារកាតូលិក ICF Cambodia ក្នុងខេត្តសៀមរាប។

អ្នកនាង វ៉ាត ចាន់រ៉ា វ័យ៣២ឆ្នាំ ជាសមាជិកដំបូងគេបង្អស់របស់ក្រុម Siem Reap Eagle។ អ្នកនាងសម្រេចចិត្តហាត់បាល់បោះនេះ ព្រោះចង់ដឹងពីសមត្ថភាពរបស់អ្នកនាងថាអាចទៅបានកម្រិតណា តែបន្ទាប់ពីបានចូលលែងរួចហើយអ្នកនាងសង្កេតឃើញថាខ្លួនឯងពិតជាអាចលែងបានមែន។ អ្នកនាងបន្ថែមថា មិនតែប៉ុណ្ណោះ សុខភាពអ្នកនាងក៏មានការផ្លាស់ប្ដូរយ៉ាងគួរឲ្យកត់សម្គាល់ផងដែរ ដោយអ្នកនាងមានអារម្មណ៍ថាស្រលះខ្លួន ធូរសរសៃរ សន្លាក់ និងដកដង្ហើមបានស្រួលជាមុន។

កីឡាការិនីរូបនេះបញ្ជាក់ថា៖ «នៅពេលដែលខ្ញុំសាកល្បងទៅដំបូងខ្ញុំបានសាកជាមួយរទះរុញ ខ្ញុំខ្លាចបាល់ ខ្ញុំខ្លាចរទេះ តែដល់ពេលបានសាកជាមួយរទេះទៅខ្ញុំមានអារម្មណ៍ថាខ្ញុំជាមួយរទេះហ្នឹងគឺយើងដូចធ្លាប់ស្គាល់គ្នាអញ្ចឹង មានអារម្មណ៍ថាសប្បាយ ហើយមួយទៀតពេលហាត់ចាប់បាល់ហ្នឹង ខ្ញុំតាំងចិត្តថាឈប់ខ្លាចបាល់ ទោះបីជាបាល់ត្រូវចំក៏អត់ខ្លាចដែរ តាំងអារម្មណ៍ខ្លួនឯងចឹងទៅ ខ្ញុំមានអារម្មណ៍ថាខ្លួនឯងធ្វើបានចឹងខ្ញុំចេះតែបន្តៗទៅមុខ»។

អ្នកនាង វ៉ាត ចាន់រ៉ា រៀបរាប់បន្ថែមថា៖ «លើកទីមួយសម្រាប់ខ្ញុំដែលបង្វិលរទេះពិបាកខ្លាំងណាស់ ទម្រាំបានតែស្ទាត់ដៃបង្វិលរទេះនេះយូរដែរ ហើយលេងភាគច្រើនក្រឡាប់ ខ្លះអាចត្រូវខៀវមុខ បែកបាក់ធ្មេញអី ឈាមមាត់ជាដើម ដល់ពេលកន្លងមកយូរៗទៅ លេងលែងអីហើយ»។

កញ្ញា ណុប ស្រីលក្ខិ អ្នកគ្រប់គ្រងគម្រោងស្ដារលទ្ធភាពពលកម្មកាយសម្បទានៃ ICRC នៅកម្ពុជាលើកឡើងថា ICRC បានជួយឧបត្ថម្ភសម្ភារៈកីឡាជារទេះ និងបានបញ្ជូនគ្រូបង្វឹកមួយរូបពីខេត្តបាត់ដំបងដើម្បីបង្វឹកក្រុមកីឡាការិនីជារៀលរាល់សប្ដាហ៍ តាំងពីខែធ្នូកន្លងទៅ។

កញ្ញាបានបញ្ជាក់ដែរថា នាពេលអនាគត ក្រុមSiem Reap Eagle នឹងចូលជាសមាជិករបស់សហព័ន្ធបាល់បោះរទេះជនពិការកម្ពុជា (CWBF) ដើម្បីទទួលបានការទទួលស្គាល់ពីសាធារណៈជន និងមានឱកាសទៅចូលរួមប្រកួតប្រជែងទាំងក្នុងស្រុក និងលើឆាកអន្តរជាតិ។

លោក មុយ ស៊ឺ ហៅ Bel ជាកីឡាករក្នុងក្រុមបាល់បោះជនពិការជម្រើសជាតិ និងជាគ្រូបង្វឹករបស់ក្រុម Siem Reap Eagle បានឲ្យដឹងថា ក្រុម Siem Reap Eagle នេះចាប់ផ្ដើមបង្កើតក្នុងខែវិច្ឆិកា ឆ្នាំ២០២០ ដោយគ្រោងយកសមាជិកតែ១២នាក់ប៉ុណ្ណោះ តែរយៈពេលមិនដល់ពីរខែផង ក្រុមនេះមានសមាជិករហូតដល់ទៅ១៦នាក់ ហើយបច្ចុប្បន្ននេះនៅតែមានអ្នកមកចូលរួមជាបន្តបន្ទាប់។

លោក Bel មានប្រសាសន៍ដោយទឹកមុខរីករាយថា៖ «ពេលចាប់បង្កើតក្រុមដំបូង តាមរយៈការផ្សព្វផ្សាយរបស់ខ្ញុំហើយនិងអង្គការដែលគាំទ្រពួកយើង បានចាប់ផ្ដើមជំរុញបងប្អូនស្រ្តីខ្លះ ទោះបីគាត់ថា គាត់ធ្វើមិនកើតទេ ក៏យើងឲ្យគាត់ទៅមើលសិន ហើយឲ្យគាត់សាកជិះរទេះសិន អ្នកខ្លះមិនហ៊ានជិះទេខ្លាចក្រឡាប់ ដល់គាត់មើលគេយូរៗទៅឃើញគេលេងចឹង ដូចថាឃើញសិស្សច្បងលេងឲ្យមើលចឹងគាត់ក៏មានអារម្មណ៍ថាចង់សាកអីអញ្ចឹងទៅ។ ពេលបានសាកទៅក៏សប្បាយចិត្ត គាត់ក៏ពេញចិត្តនឹងចូលរួម»។

គ្រូបង្វឹករូបនេះបានបង្ហាញក្ដីរំពឹងយ៉ាងមុតមាំថា លោកនឹងបង្វឹកក្រុមនេះឲ្យមានសមត្ថភាពអាចទៅចូលរួមប្រកួតនៅក្រៅប្រទេសដូចក្រុមនៅបាត់ដំបង និងក្រុមនៅកំពង់ស្ពឺ។

លោក Bel និយាយថា៖ «ខ្ញុំចង់ឲ្យគាត់បញ្ចេញសមត្ថភាពរបស់គាត់ តាមពិតគាត់មានសមត្ថភាពហើយតែគាត់មិនបញ្ចេញចឹងចង់ឲ្យគាត់បញ្ចេញសមត្ថភាពរបស់គាត់ដើម្បីឲ្យសាធារណៈជនបានឃើញពីសមត្ថភាពរបស់គាត់ កុំឲ្យគេរើសអើងថាជនពិការមិនអាចធ្វើអ្វីបាន។ ខ្ញុំចង់ឲ្យពួកគាត់ក្លាហាន ព្រោះគ្មានអ្នកណាជួយយើងបានក្រៅពីយើងជួយខ្លួនឯងទេ»។

លោក Bel បានឲ្យដឹងទៀតថា ដោយសារបច្ចុប្បន្នក្រុម Siem Reap Eagle នៅមិនទាន់មានកន្លែងហាត់ផ្ទាល់ខ្លួននោះទេ លោកកំពុងតែស្វែងរកថាតើត្រូវទាក់ទងទៅស្ថាប័ន ឬអង្គការណាដើម្បីជួយសម្រួលដល់បញ្ហានេះ។ លោកចង់បានកន្លែងទីតាំងមួយក្នុងខេត្តសៀមរាបផ្ទាល់ខ្លួនដើម្បីបង្វឹកសមាជិកក្រុមបាល់បោះតាំងអស់ឲ្យមានសមត្ថភាពប្រាកដ។

ក្រុមកីឡាការិនីនៃក្រុមបាល់បោះលើកឡើងស្រដៀងគ្នាថា ពួកគេចង់សំណូមពរទៅខាងរដ្ឋាភិបាល ក៏ដូចជាក្រសួងពាក់ព័ន្ធឲ្យជួយគាំទ្រ និងជួយសម្រួលដល់ការហាត់របស់ពួកគាត់ទាំងទីតាំង ទាំងឧបករណ៍ សម្ភារៈ រទេះ និងការលើកទឹកចិត្តផ្សេងៗដើម្បីពួកគេមានទឹកចិត្តហាត់កាន់តែខ្លាំងថែមទៀត៕

តុលាការភ្នំពេញចេញដីកាកោះហៅអនុរដ្ឋលេខាធិការពីររូបឲ្យបំភ្លឺជុំវិញសំណុំរឿងឆបោក

ញាណ វិភាវី (Vipheavy Nhean) — Fri, 22 Jan 2021 06:18:55 +0000

អយ្យការអមសាលាដំបូងរាជធានីភ្នំពេញ នៅថ្ងៃទី២០ ខែមករានេះ បានចេញដីកាកោះហៅអនុរដ្ឋលេខាធិការពីររូប ឲ្យចូលខ្លួនបំភ្លឺពីបទឆបោកពាក់ព័ន្ធនឹងការលក់ទិញដី ក្នុងសង្កាត់ទួលសង្កែ រាជធានីភ្នំពេញ។

យោងតាមដីកាបង្គាប់ឱ្យចូលខ្លួនដាច់ដោយឡែកពីគ្នាចំនួន២ របស់លោក ឌុច សុខសារិន ចៅក្រមស៊ើបសួរសាលាដំបូងរាជធានីភ្នំពេញ ចុះថ្ងៃទី១១ ខែមករា ឆ្នាំ២០២១ បានបង្គាប់ឱ្យ លោក ឆែម ពេត អនុរដ្ឋលេខាធិការទីស្តីការគណៈរដ្ឋមន្ត្រី ចូលខ្លួនទៅសាលាដំបូងនៅថ្ងៃទី២៦ ខែមករា និងលោក មាស សាវឿន អនុរដ្ឋលេខាធិការក្រសួងយុត្តិធម៌ ចូលខ្លួននៅថ្ងៃទី៣ ខែកុម្ភៈ ខាងមុខ ពីបទឆបោក។

ដីការបង្គាប់ឲ្យចូលខ្លួនបំភ្លឺនេះធ្វើឡើងក្រោមបណ្តឹងរបស់លោក កាន រិទ្ធី ដែលបានប្តឹងពួកគេពីបទ «ឆបោក» ប្រព្រឹត្តនៅរាជធានីភ្នំពេញ កាលពីថ្ងៃទី២១ ខែតុលា ឆ្នាំ២០១៦ ពាក់ព័ន្ធនឹងការទិញលក់ដី២ហិចតា នៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

Newsroom Cambodia មិនអាចទាក់ទងសុំការបំភ្លឺពីលោក មាស សាវឿន និងលោក ឆែម ពេតបានទេ។

ក្នុងដីកាដដែលនេះបានបញ្ជាក់ថា ដើមបណ្ដឹងលោក កាន រិទ្ធី បានឲ្យដឹងថា លោក ឆែម ពេតបានណែនាំឲ្យខ្លួនទិញដីទំហំ២ហិចតាមួយកន្លែងពីលោក មាស សាវឿន ក្នុងតម្លៃ បួនលានដុល្លារអាមេរិក ដោយលោកបានបង់ប្រាក់ចំនួន៣ដងគិតជាទឹកប្រាក់សរុបចំនួន១សែនដុល្លារអាមេរិក។ ប៉ុន្តែបន្ទាប់ពីប្រគល់ប្រាក់ទាំង៣ដងរួចរាល់ លោក មាស សាវឿន មិនបាន រត់ឯកសារវាស់វែង និងផ្ទេរកម្មសិទ្ធមកឲ្យលោក កាន រិទ្ធី ឡើយ៕

លោកស្រីមូរ សុខហួរ ប្រកាសលើកពេលត្រឡប់ចូលស្រុកទៅថ្ងៃទី១៥ ខែមករា ឆ្នាំ២០២១

ញាណ វិភាវី (Vipheavy Nhean) — Tue, 05 Jan 2021 09:30:41 +0000

លោកស្រី មូរ សុខហួរ អនុប្រធានអតីតគណបក្សសង្គ្រោះជាតិប្រកាសលើកពេលធ្វើមាតុភូមិនិវត្តន៍នៅថ្ងៃទី២ ខែមករា ទៅថ្ងៃទី១៥ ខែមករា ឆ្នាំ២០២១ ដោយសារក្រុមហ៊ុនហោះហើរពន្យារពេល។

យោងតាមសេចក្ដីប្រកាសរបស់អតីតគណបក្សសង្គ្រោះជាតិចេញកាលពីថ្ងៃទី០២ មករា ឆ្នាំ២០២១ បញ្ជាក់ថា ក្រុមហ៊ុនអាកាសចរណ៍ Eva Airway ដែលលោកស្រី មូរ សុខហួរ គ្រោងជិះត្រូវផ្អាកការហោះហើរជាបណ្ដោះអាសន្នដោយសារបញ្ហាជម្ងឺកូវីដ-១៩។

សេចក្ដីប្រកាសដដែលនេះបានបញ្ជាក់ថា លោកស្រី មូរ សុខហួរ និងគណៈប្រតិភូអមដំណើរនឹងមកដល់ប្រលានយន្ដហោះអន្តរជាតិភ្នំពេញនៅថ្ងៃទី១៥ ខែមករា ឆ្នាំ២០២១ នៅវេលាម៉ោង៥ និង៣៥នាទីល្ងាច តាមជើងយន្តហោះSQ5008។

តាមរយៈការ Live ក្នុងបណ្ដាញសង្គមហ្វេសប៊ុកកាលពីថ្ងៃចន្ទកន្លងទៅ លោកស្រី មូរ សុខហួរ បាននិយាយថា សូមកុំឲ្យប្រជាពលរដ្ឋដែលជាសកម្មជនអតីតគណបក្សសង្គ្រោះជាតិទាំងអស់កុំមានការយល់ច្រឡំអំពីការពន្យារពេលត្រលប់ចូលប្រទេសរបស់លោកស្រី។

លោកស្រីបន្ថែមថា៖ «ខ្ញុំត្រូវត្រឡប់ទៅវិញ ទៅចូលរួមសុខរួមទុក្ខក្នុងពន្ធនាគារក្ដីក្រៅពន្ធនាគារក្ដីជាមួយបងប្អូនប្រជាពលរដ្ឋជាសកម្មជនយើងខ្ញុំ សកម្មជនយើងទាំងអស់គ្នាហ្នឹងពីព្រោះពាក់កណ្ដាលនគរមកបោះឆ្នោតគាំទ្រគណបក្សសង្គ្រោះជាតិ»។

លោកផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានអះអាងថា រាជរដ្ឋាភិបាលពុំមានវិធានការអ្វីចំពោះគម្រោងមាតុភូមិនិវត្តន៍របស់អ្នកដឹកនាំអតីតគណបក្សសង្គ្រោះជាតិនោះទេ។

លោកលើកឡើងថា៖ «រដ្ឋាភិបាលគឺអត់មានជាប់ពាក់ព័ន្ធនឹងសាច់រឿងហ្នឹងទេ រឿងមាតុភូមិនិវត្តន៍ហ្នឹងគឺគាត់ខ្លួនឯងមានកាតព្វកិច្ចឆ្លើយតបចំពោះតុលាការ។ ចំពោះរដ្ឋាភិបាលយើងមិនសូវយកចិត្តទុកដាក់ទេ រឿងទាំងអស់ហ្នឹងវាជាកាតព្វកិច្ចរបស់អ្នកទាំងអស់នោះទេ។»

លោកបន្តថា៖ «យើងអត់មានវិធានការអីចាត់ចែងទេ ពីព្រោះរឿងក្រុមហ្នឹងច្រើនភរពីរ បីដងហើយ។»

គួរបញ្ជាក់ផងដែរថា នេះជាលើកទីពីហើយដែលអ្នកដឹកនាំអតីតគណបក្សសង្គ្រោះជាតិពន្យាការធ្វើដំណើរមាតុភូមិនិវត្តន៍របស់ខ្លួន៕

Vox Pop: ពលរដ្ឋនិយាយថាពួកគេកំពុងព្យាយាមកាត់បន្ថយការប្រើប្រាស់ប្លាស្ទិកដើម្បីជួយទប់ស្កាត់ការបំពុល

ញាណ វិភាវី (Vipheavy Nhean) — Mon, 04 Jan 2021 03:37:46 +0000

ក្នុងរយៈពេលប៉ុន្មានឆ្នាំចុងក្រោយនេះ យុវជនកម្ពុជាចាប់ផ្ដើមងាកមកចាប់អារម្មណ៍ពីបញ្ហាបរិស្ថានដែលបង្កដោយសារសំរាមប្លាស្ទិក ជាពិសេសប្លាស្ទិកដែលប្រើប្រាស់បានតែម្ដងដូចជាប្រអប់ស្នោ ទុយោជ័រជាដើម។ បើតាមតួរលេខរបស់ក្រសួងបរិស្ថាន ថង់ប្លាស្ទិកប្រមាណ ១០ លានថង់ ត្រូវបានប្រើប្រាស់ជារៀងរាល់ថ្ងៃនៅក្នុងទីក្រុងភ្នំពេញ។

កាលពីថ្ងៃទី៣០ ខែធ្នូ ឆ្នាំ២០២០ Newsroom Cambodia បានសម្ភាសន៍យុវជនមួយចំនួនក្នុងរាជធានីភ្នំពេញពីការយល់ឃើញរបស់ពួកគេជុំវិញការប្រើប្រាស់ផលិតផលធ្វើពីប្លាស្ទិក។

យុវជនដែលត្រូវបានសម្ភាសន៍ដោយ Newsroom Cambodia បាននិយាយកាលពីពេលថ្មីនេះថា ពួកគេកំពុងព្យាយាមកាត់បន្ថយការប្រើប្រាស់ប្លាស្ទិកដើម្បីជួយទប់ស្កាត់ការបំពុល ពីព្រោះប្លាស្ទិចជាមូលហេតុធំមួយបង្កឲ្យមានការប៉ះពាល់ដល់បរិស្ថាន។ ក្នុងនោះ យុវជនមួយចំនួនបានផ្លាស់ប្ដូរមកប្រើប្រាស់ផលិតផលដែលមិនប៉ះពាល់បរិស្ថាន (Eco-friendly)។

លោកហៃ រដ្ឋរិទ្ធិយា

លោកហៃ រដ្ឋរិទ្ធិយា វ័យ២០ឆ្នាំ ជានិស្សិតឆ្នាំទី៤ នៃសាកលវិទ្យាល័យវិទ្យាសាស្រ្តសុខាភិបាលយល់ឃើញថា ផលិតផលធ្វើពីប្លាស្ទិកមានផលិតផលខ្លះដែលចាំបាច់ហើយផលិតផលខ្លះទៀតដូចជាទុយោជ័រ ឬកែវជ័រ គឺពុំចាំបាច់នោះទេ។

លោកបានថ្លែងថា ការប្រើប្លាស្ទិកធ្វើឲ្យប៉ះពាល់បរិស្ថានគួរសម ដោយសារផ្ទះរបស់លោកនៅជិតទន្លេ ដូច្នេះលោកតែងឃើញសំរាមអណ្ដែតតាមទឹកជាញឹកញាប់។

លោកបន្តថា៖ «សម្រាប់ខ្ញុំផ្ទាល់ដោយសារយើងជាមនុស្សធម្មតា មិនមែនជាបុគ្គលល្បីអីទេ ចឹងយើងអត់អាចផ្សព្វផ្សាយអីកើតទេ ប៉ុន្តែយើងអាចកាត់បន្ថយការប្រើប្រាស់ប្លាស្ទិក ប្រើកំប៉ុងទឹកដែកដែលប្រើប្រាស់ឡើងវិញបាន សម្រាប់ទុយោយើងឧស្សាហ៍ប្រើអាដដែលៗគ្រាន់តែលាងទឹកចេញឲ្យស្អាត។»

លោក ណាំង ខេវីន

លោក ណាំង ខេវីន វ័យ២១ឆ្នាំ ជានិស្សិតឆ្នាំទី៤នៃសាកលវិទ្យាល័យភូមិន្ទភ្នំពេញនិយាយថាផលិតផលប្លាស្ទិកប៉ះពាល់បរិស្ថានខ្លាំងព្រោះប្លាស្ទិកត្រូវការរយៈពេលយូរដើម្បីវារលាយ។

លោកថ្លែងថា៖ «ក្នុងនាមខ្ញុំជានិស្សិតមួយរូប ខ្ញុំអាចចូលរួមកាត់បន្ថយការប្រើប្រាស់ប្លាស្ទិក ខ្ញុំអាចប្រើខ្លួនឯងដើម្បីជាឧទាហរណ៍ឲ្យគេ ហើយណែនាំមិត្តភក្ដិក៏ដូចជាអ្នកនៅជុំវិញខ្លួនឲ្យកាត់បន្ថយការប្រើប្រាស់ប្លាស្ទិក។ ទោះបីជាខ្ញុំប្រាប់ទៅអត់បានទាំងអស់តែយ៉ាងហោចណាស់ក៏បានខ្លះដែរ។»

និស្សិតរូបនេះបន្ថែមថាបើគិតមកដល់ឥលូវ ខ្លួនកាត់បន្ថយការប្រើប្លាស្ទិកបានច្រើន។ បច្ចុប្បន្ននេះលោកកាត់បន្ថយអត់ប្រើកែវជ័រនោះទេ ភាគច្រើនលោកប្រើកំប៉ុងទឹកដែលប្រើបានរហូតដូចជាប្រើជាដបកែវជាដើម។

ព្រះតេជគុណ ឆែម វីដ

ព្រះតេជគុណ ឆែម វីដ និស្សិតឆ្នាំទី២ ផ្នែកអក្សរសាស្ត្រខ្មែរនៃសាកលវិទ្យាល័យភូមិន្ទភ្នំពេញបានលើកឡើងអំពីគុណវិបត្តិនៃការប្រើប្រាស់ប្លាស្ទិកនៅលើបរិស្ថាន។ ដោយឡែកព្រះអង្គក៏បានលើកឡើងអំពីគុណសម្បត្តិនៃការប្រើប្រាស់ប្លាស្ទិកដើម្បីរក្សាសុខមាលភាព អ្នកប្រើប្រាស់។

ព្រះសង្ឃមានសង្ឃដីកាថា៖ «បើយើងប្រើម្ដងហើយម្ដងទៀត វាអាចបង្កទៅជាមេរោគ ឬក៏ផលវិបាកដល់ប្រជាជន ឬក៏អ្នកគេប្រើក្រោយអត់មានបញ្ហាដូចជាឆ្លងជំងឺផ្សេងៗដូចជាបញ្ហាពេលបច្ចុប្បន្ននេះគឺជំងឺកូវីដអញ្ចឹង»។

សម្រាប់ការចោលសំរាមមិនត្រឹមត្រូវ ព្រះអង្គបានលើកឡើងថា វាអាចបង្កជាបញ្ហាជាច្រើនដូចជាធ្វើឲ្យដីនោះខូចជីជាតិ បំពុលបរិស្ថាន នឹងធ្វើឱ្យកខ្វក់នៅក្នុងមជ្ឈដ្ឋាននោះដែលនាំផលប៉ះពាល់ដល់ជីវិតដែលរស់នៅលើគោកផង និងក្នុងទឹកផង។

ព្រះអង្គបានបន្តថា សព្វថ្ងៃព្រះអង្គក៏បានប្រើដបទឹកជំនួសឱ្យការទិញទឹកសុទ្ធផងដែរព្រោះថាក្រៅពីជួយដល់បរិស្ថានវាក៏អាចជួយកាត់បន្ថយការចំណាយរបស់យើងផងដែរ។

កញ្ញា ម៉ៅ ស្រីពេជ្

ដូចគ្នានឹងយុវជនដទៃដែរ កញ្ញា ម៉ៅ ស្រីពេជ្រ និស្សិតឆ្នាំទី ២ ផ្នែកប្រព័ន្ធផ្សព្វផ្សាយ និងសារគមនាគមន៍នៃសាកលវិទ្យាល័យភូមិន្ទភ្នំពេញ បានលើកឡើងពីបញ្ហានៃការប្រើប្រាស់ប្លាស្ទិកមកលើបរិស្ថាន។ កញ្ញាបានលើកឡើងថា ជារៀងរាល់ថ្ងៃ ពេលដែលទៅផ្សារកញ្ញាតែងតែប្រើប្រាស់ថង់ក្រណាត់ជំនួសឱ្យថង់ប្លាស្ទិក និង ដបដែលអាចច្រកទឹកបានជំនួសឲ្យការទិញទឹកសុទ្ធ។

កញ្ញាបានបន្តថា៖ «វាគឺផ្ដើមចេញពីខ្លួនយើងផងដែរ នៅពេលដែលយើងប្រើចឹងទៅអ្នកផ្សេងទៀតពេលឃើញគឺអាចប្រើតាមយើង ដូចសព្វថ្ងៃឃើញមានហាងកាហ្វេជាច្រើនបានប្រើប្រាស់បំពង់បឺតផលិតពីបំពង់ឫស្សីក៏ដូចជាក្រដាសជំនួសឱ្យការប្រើប្រាស់ប្លាស្ទិក។»

លោក ប៊ូ ញ៉ឹប

លោក ប៊ូ ញ៉ឹប អាយុ២៨ឆ្នាំ សព្វថ្ងៃជានិស្សិតផ្នែកច្បាប់នៅសាកលវិទ្យាល័យវេស្ទើន បានប្រាប់អំពីការយល់ឃើញរបស់លោកចំពោះការប្រើប្រាស់ប្លាស្ទិកជាពិសេសប្លាស្ទិកដែលប្រើបានតែម្ដងថា៖ «យើងត្រូវយកវាទៅទុកក្នុងធុងសម្រាមជាដើម ឬយកទៅដុតចោល ព្រោះរបស់ប្លាស្ទិកហ្នឹង នៅពេលដែលយើងបោះចោលវាពាស់កាលអាចប៉ះពាល់ដល់បរិស្ថានហើយនៅពេលភ្លៀងមកវាអត់រលួយទៅតាមទឹកភ្លៀងនិងទេ ដូចជាកែវទឹកជ័រ ប្លាស្ទិក ឬថង់អីជាដើម ពេលដែលមានភ្លៀងធ្វើឱ្យមានទឹកដក់បង្កើតបានជាដង្កូវទឹក និងមានមេរោគធ្វើឱ្យប៉ះពាល់ដល់ពលរដ្ឋទូទៅ។»

ក្នុងពេលបច្ចុប្បន្ននេះលោកតែងតែប្រើរបស់បែប Eco-Friendly ដូចជាកន្រ្ដក បំពង់ដបជាដើម ព្រោះបើយើងចង់កាត់បន្ថយ ត្រូវចាប់ផ្ដើមពីបុគ្គលផ្ទាល់ខ្លួនតែម្ដងគឺយើងទាំងអស់គ្នា។ លោកលើកឧទាហរណ៍មួយមកបញ្ជាក់ថា៖ «នៅពេលដែលយើងទិញបាយហូប ឬដាក់បាយហូបពីផ្ទះទៅយើងត្រូវមានប្រអប់បាយសម្រាប់ខ្លួនឯង នេះទី១។ ទី២ នៅពេលដែលទៅផ្សារ យើងត្រូវមានកន្ដ្រកយូរដៃសម្រាប់ប្រើជាជាងប្រើថង់ប្លាស្ទិក។ ទី៣ ប្រសិនបើជាអាចពេលទៅណាមកណា យើងគួរមានដបទឹកក្ដៅមួយដាក់តាមខ្លួនហើយហូបទឹកក្ដៅនេះទៀតសោតធ្វើឱ្យយើងមានសុខភាពល្អ។»

ព្រះតេជគុណ ម៉ា វិឆាយ

ព្រះតេជគុណ ម៉ា វិឆាយ និស្សិតឆ្នាំទី៣ ផ្នែកទំនាក់ទំនងអន្ដរជាតិនៅសាកលវិទ្យាល័យបញ្ញាសាស្ដ្រកម្ពុជាមានទស្សនៈថា ការប្រើប្រាស់ថង់ផ្លាស្ទិកធ្វើឱ្យប៉ះពាល់ដល់បរិស្ថាន ខូចសោភ័ណ្ឌភាព និងសុខភាពរបស់មនុស្ស។

«ចំពោះការផ្លាស់ប្ដូរទម្លាប់ការប្រើប្រាស់ប្លាស្ទិកមកជាប្រើដបទឹក កន្ដ្រក ក្រណាត់យូរដៃជាដើមដែលយើងអាចប្រើបានរាល់ពេលជារឿងល្អ ប៉ុន្ដែពលរដ្ឋយើងពេញនិយមប្រើប្លាស្ទិចតាំងពីដើមមក ហេតុដូច្នេះមានការលំបាកក្នុងការផ្លាស់ប្ដូរទម្លាប់»។

ព្រះអង្គបានបន្ដទៀតថា ព្រះអង្គចង់ឃើញពលរដ្ឋទូទៅគ្រប់ស្រទាប់វណ្ណៈចូលរួមកាត់បន្ថយការប្រើប្រាស់ថង់ប្លាស្ទិកនៅគ្រប់តំបន់ដើម្បីបរិស្ថានស្អាតដោយឱ្យពួកគាត់យល់ពីតម្លៃនៃបរិស្ថាន មួយវិញទៀតព្រះអង្គជំរុញនិងលើកទឹកចិត្តដល់ពួកគាត់ក្នុងការប្រើដបបំពង់ទឹក កន្រ្ដក ឬរបស់ណាដែលប្រើប្រាស់បានយូរដោយជៀសវាងប្រើប្លាស្ទិក៕

លោក ហ៊ុន សែន ថា កម្ពុជានឹងទិញវ៉ាក់សាំងជម្ងឺកូវីដ១៩ដែលទទួលស្គាល់ពី WHO តែប៉ុណ្ណោះ

ញាណ វិភាវី (Vipheavy Nhean) — Tue, 29 Dec 2020 10:45:31 +0000

លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះប្រកាសថា កម្ពុជាត្រូវរងចាំរហូតមានការទទួលស្គាល់ជាក់លាក់ពីអង្គការសុខភាពពិភពលោក (WHO) ទើបអាចបញ្ជាទិញវ៉ាក់សាំងពីប្រទេសណាមួយបាន។

លោកនាយករដ្ឋមន្ត្រីប្រកាសដូចនេះក្នុងកិច្ចថ្លែងការណ៍ពិសេសពាក់ព័ន្ធនឹងការបិទបញ្ចប់ព្រឹត្តិការណ៍សហគមន៍ ២៨ វិច្ឆិកា នៅព្រឹកថ្ងៃទី២៩ ខែធ្នូ ឆ្នាំ២០២០។ លោកបន្ថែមថា ការទិញវ៉ាក់សាំងកូវីដ១៩យកមកកម្ពុជាមាន៣ច្រក គឺច្រកទី១ តាមរយៈខូវ៉ាក់ (COVAX) ច្រកទី២ តាមរយៈទំនាក់ទំនងជាមួយប្រទេសដៃគូ និងច្រកទី៣គឺតាមរយៈការចរចាដោយផ្ទាល់ជាមួយក្រុមហ៊ុន។ លោកថា ការទិញវ៉ាក់សាំងពីប្រទេសណាមួយ ត្រូវមានការទទួលស្កាល់ពីអង្គការសុខភាពពិភពលោក ដោយថា កម្ពុជាមិនអាចយកប្រជាជនទៅពិសោធន៍វ៉ាក់សាំងជាដាច់ខាត។

លោកនាយករដ្ឋមន្រ្តីបន្ថែមថា លោកមិនបានច្រានចោលការបញ្ជាទិញវ៉ាក់សាំងពីប្រទេសចិនដូចការលើកឡើងមួយចំនួននោះទេ។

លោកថា៖ «អ្នកខ្លះធ្វើអត្ថាធិប្បាយថាលោក ហ៊ុន សែន អត់និយាយដល់វ៉ាក់សាំងចិន ទាត់ចោលវ៉ាក់សាំងចិន ខ្ញុំមិនទាន់ទាត់ចោលទេ។ វ៉ាក់សាំងណាក៏ខ្ញុំអត់ទាន់និយាយដែរ»។

លោកថា៖ «ប្រសិនបើអង្គការសុខភាពពិភពលោកទទួលស្គាល់វ៉ាក់សាំងចិន យើងទិញពីចិន វាក៏ដឹកជញ្ជូនជិត វាមិនក៏ស្រួល?»។

លោកនាយករដ្ឋមន្រ្តី ហ៊ុន សែន បញ្ជាក់ថា គិតត្រឹមម៉ោង២រសៀលថ្ងៃចន្ទ រាជរដ្ឋាភិបាលកម្ពុជាបានទទួលថវិកាប្រមាណជាង៥៣លានដុល្លារ និងប្រាក់រៀលជាង៩ពាន់លានរៀល ពីសប្បុរសជនដើម្បីទិញវ៉ាក់សាំងប្រឆាំងជម្ងឺកូវីដ១៩ ហើយថា ការចាក់វ៉ាក់សាំងនេះគឺចាក់ដោយមិនយកប្រាក់ និងចាក់ដោយការស្ម័គ្រចិត្ត៕

Vox PoP: ទស្សនៈចម្រុះដោយអ្នកនៅភ្នំពេញអំពីព័ត៌មាននៅលើហ្វេសប៊ុក

ញាណ វិភាវី (Vipheavy Nhean) — Mon, 28 Dec 2020 04:31:08 +0000

បណ្តាញសង្គមហ្វេសប៊ុកបានក្លាយជាកន្លែងសម្រាប់ការចែកចាយព័ត៌មានយ៉ាងសំខាន់នៅប្រទេសកម្ពុជា ដែលក្នុងនោះមានទាំងព័ត៌មាន ដែលមានប្រភពច្បាស់លាស់ ក៏ដូចជាព័ត៌មានមិនពិត ដែលនេះជះឥទ្ធិពលមិនល្អដល់សង្គម។

យោងទៅតាមស្ថិតិ មនុស្សប្រមាណជិត ១០ លាននាក់ក្នុងចំណោមប្រជាជនសរុប ជាង ១៦ លាននាក់ សព្វថ្ងៃកំពុងប្រើ បណ្ដាញសង្គមហ្វេសប៊ុក។

កាលពីថ្ងៃពុធ ទី២៣ ខែធ្នូ ឆ្នាំ២០២០ Newsroom Cambodia បានធ្វើការសម្ភាសន៍ទៅលើប្រជាពលរដ្ឋមួយចំនួននៅក្នុងទីក្រុងភ្នំពេញអំពីព័ត៌មានដែលគាត់បានឃើញនៅលើបណ្ដាញសង្គមហ្វេសប៊ុក ហើយពួកគាត់ក៏បានផ្ដល់ជាមតិចម្រុះដូចតទៅ៖

អ្នកស្រី សុន រតនៈ

អ្នកស្រី សុន រតនៈ វ័យ៣៣ឆ្នាំ ជាអាជីវករមួយរូបបានឲ្យដឹងថា អ្នកស្រីតែងតែមើលព័ត៌មាននៅលើបណ្ដាញសង្គមហ្វេសប៊ុកជាញឹកញាប់ ហើយព័ត៌មានដែលអ្នកស្រីតាមដានភាគច្រើន ជាព័ត៌មានទាក់ទងនឹងការរកស៊ី និងព័ត៌មានពីជម្ងឺកូវីដ ១៩។

អ្នកស្រីបាននិយាយថា៖ «ព័ត៌មានទាក់ទងនឹងកូវីដហ្នឹង ក៏ឧស្សាហ៍មើលដែរ គេឆ្លងនៅថៃនៅអីចឹង យើងតាមដានគេទៅ។ ពេលខ្លះមានអារម្មណ៍ថាភ័យខ្លាចដែរ កូវីដចឹងយើងរកអត់បាន យើងជួលផ្ទះគេ ត្រូវបង់ធនាគារអីសព្វគ្រប់ទាំងអស់វាពិបាកណាស់ ហើយណាមួយគិតដល់កូនដែរ ត្រូវចូលរៀនខ្លាចតែមិនបានរៀន។»

ក្រៅពីចូលអានព័ត៌មានទាំងនោះ អ្នកស្រី សុន រតនៈបានបញ្ជាក់ថា ជានិច្ចជាកាល អ្នកស្រីក៏ធ្វើការចែករំលែកបន្តព័ត៌មានទាំងអស់នោះផងដែរ។

អ្នកស្រីថ្លែងថា៖ «ព័ត៌មានមួយចំនួនខ្ញុំស៊ែរត។ ព័ត៌មានពីកូវីដខ្ញុំស៊ែរត ពីគេបង្រៀនយើងរកស៊ីអីខ្ញុំស៊ែរត។ ក្នុងចិត្តខ្ញុំចេះតែចង់រៀនដែរ ចំពោះព័ត៌មានដែលគេបង្រៀនយើងរកស៊ី ហើយយើងស៊ែរទុកដើម្បីមើលថ្ងៃក្រោយ ដល់ពេលយើងចង់ដឹងថាគេរៀននៅណាអី នៅណា យើងចុចមើលផុសហ្នឹងវិញទៅ»។

អ្នកស្រីបានបន្តថា៖ «ចំពោះព័ត៌មានកូវីដ ខ្ញុំស៊ែរចង់ឲ្យប្រជាពលរដ្ឋបានដឹងទាំងអស់គ្នាថាជម្ងឺកូវីដបានកើនឡើងនៅក្នុងប្រទេសថៃ ឬប្រទេសកម្ពុជាយើង។ យើងស៊ែរចឹងទៅចង់ឲ្យមនុស្សមួយចំនួនដឹងហើយចេះការពារខ្លះចឹងទៅ»។

លោកឈាង ហ៊ាង

លោកឈាង ហ៊ាង វ័យ៦៤ឆ្នាំ ជាអ្នករត់កង់បីខ្មែរ បានមានប្រសាសន៍ថារូបលោកមិនសូវតាមដានព័ត៌មានលើបណ្ដាញសង្គមនោះទេ។ មួយវិញទៀតទោះបីជាលោកចុចចូលមើលព័ត៌មានទាំងនោះតែលោកមិនដែលចុចស៊ែរបន្តឡើយ។

លោកឈាង ហ៊ាងក៏បានឲ្យដឹងថាលោកមានការព្រួយបារម្ភដែរនៅពេលលោកមើលព័ត៌មានទាក់ទិននឹងការរីករាលដាលនៃជម្ងឺកូវីដ ១៩។

លោកនិយាយថា៖ «ពេលឃើញព័ត៌មានពីកូវីដកើនឡើងអី ខ្ញុំមានការព្រួយបារម្ភជួបវិបត្តិសេដ្ឋកិច្ច វាបាត់បង់ចំណូល ដូចថារាល់ដងធ្លាប់រកបានមួយថ្ងៃ៤ ទៅ៥ម៉ឺន នៅសល់១ម៉ឺន២ម៉ឺន ភ្ញៀវអត់មានចេញដើរម៉ង»។

យុវជនធឿន សុផានិត

យុវជនធឿន សុផានិត វ័យ១៧ឆ្នាំ ជាសិស្សថ្នាក់ទី១២ បានយល់ឃើញថាព័ត៌មាននៅលើបណ្ដាញហ្វេសប៊ុកព័ត៌មានខ្លះជាព័ត៌មានដែលល្អសម្រាប់អ្នកមើលអ្នកអានតែព័ត៌មាន ខ្លះទៀតជាព័ត៌មានបំផុសបំផុលដែលអាចបង្ករការយល់ច្រឡំដល់អ្នកអានបាន។

យុវជនរូបនេះបានក៏បញ្ជាក់ថាមុននឹងរូបលោកសម្រេចចិត្តស៊ែរព័ត៌មានបន្តនៅលើហ្វេសប៊ុក លោកតែងពិនិត្យមើលចំណងជើង(caption) ថាតើវាល្អ និងមានប្រយោជន៍រ ឬអត់។ លោកបន្តថាបើព័ត៌មានខ្លះដែលគេសរសេរអត់បង្ខូចឈ្មោះអ្នកដទៃ ទើបលោកចុចស៊ែរត តែបើព័ត៌មានខ្លះដែលសរសេរមកប្រើចំណងជើង(Caption)ធ្វើឲ្យអ្នកដទៃភ័យ ឬបំផុសបំផុល លោកមិនដែលស៊ែរបន្តទេ។

លោកបានលើកឡើងថា៖ «មុនពេលខ្ញុំស៊ែរព័តមានអីមួយគឺខ្ញុំមើលច្បាស់លាស់ណាស់ ខ្ញុំចូលមើលសិនថាគេសរសេរអ្វើខ្លះបានខ្ញុំចុចស៊ែរ។ ចឹងខ្ញុំគិតថាព័ត៌មានដែលខ្ញុំស៊ែរហ្នឹង អត់អីទេហើយអាចផ្សព្វផ្សាយដល់អ្នកនៅជុំវិញខ្លួនដូចជាហ្វេនក្នុងហ្វេសប៊ុកបាន។»

កញ្ញា ង៉ែត សុវណ្ណបូរមី

កញ្ញា ង៉ែត សុវណ្ណបូរមី ស្ថិតក្នុងវ័យ២០ឆ្នាំ ជានិស្សិតឆ្នាំទី៤នៃសាកលវិទ្យាល័យវិទ្យាសាស្ត្រសុខាភិបាល បាននិយាយថានាងចូលចិត្តតាមដានព័ត៌មាននៅក្នុងបណ្ដាញសង្គមហ្វេសប៊ុក និងតែងតែចែករំលែកបន្តនូវព័ត៌មានមួយចំនួនដែលនាងគិតថាមានប្រយោជន៍។

កញ្ញាយល់ឃើញថាថ្វីត្បិតតែព័ត៌មាន ក្នុងហ្វេសប៊ុកមានចំនួនច្រើន ក៏ពិតមែន តែព័ត៌មានទាំងអស់នោះមិនសុទ្ធតែជាព័ត៌មាន ល្អទាំងអស់ទេ ដោយវាអាស្រ័យលើព័ត៌មានដែលគេផុស និងអ្នកស៊ែរដែរថាតើពួកគេផុសក្នុងបំណងអ្វី ក្នុងបំណងបរិហារកេរ្តិ៍ ឬដើម្បីកំសាន្តឬចង់ចែករំលែកបន្ត។

និស្សិតឆ្នាំទី៤រូបនេះបានបន្ថែមថា៖ «មុននឹងសម្រេចចិត្តស៊ែរ ខ្ញុំមើលលើប្រភពព័ត៌មាន ឬអ្នកផុសព្រោះអីជួនកាលអ្នកផុសមានបំណងមិនល្អ fake accountអី អញ្ចឹងប្រសិនបើប្រភពព័ត៌មានអត់ច្បាស់លាស់ខ្ញុំក៏អត់ស៊ែរដែរដោយសារខ្លាចបង្ករជាជម្លោះប្ដឹងផ្ដល់អីតទៀត»។

កញ្ញាង៉ែត សុវណ្ណបូរមី បាននិយាយបន្តថា «បើព័ត៌មានទាក់ទងកូវីដ ខ្ញុំស៊ែរច្រើន។ កូវីដ យើងអាចនិយាយបានថាវាជាជម្ងឺសកលលោកចឹង ខ្ញុំស៊ែរព័ត៌មានទាក់ទងនឹងវាព្រោះខ្ញុំគិតថាក្នុងអាខោនហ្វេសប៊ុកខ្ញុំមានហ្វេនប្រហែល៣ពាន់នាក់ចឹង ខ្ញុំអាចចែករំលែកព័ត៌មានហ្នឹងទៅអ្នកទាំងអស់នោះទោះបីអត់បានទាំងអស់គ្នាតែគិតថាបានមួយភាគធំដែរ»។

«អាចនិយាយបានថាមាន ៥០០នាក់ដែលបានឃើញការស៊ែររបស់ខ្ញុំហើយអ្នកទាំងអស់នោះស៊ែរបន្តទៀតទៅ ចឹងយើងដឹងស្រាប់ហើយព័ត៌មានកូវីដ វាជាព័ត៌មានជម្ងឺសកលលោក យើងម្នាក់ៗគួរតែយល់ដឹងថាថ្ងៃនេះមានមនុស្សកើតប៉ុន្មាននាក់ហើយ ឆ្លងថែមប៉ុន្មាននាក់ហើយ តេស្តវិជ្ជមានប៉ុន្មាននាក់ អវិជ្ជមានប៉ុន្មាននាក់ហើយយើងគួរការពារខ្លួនឯងបែបមិចខ្លះ»។

យុវជន ភី ភារ៉ូ

យុវជន ភី ភារ៉ូ វ័យ ២១ឆ្នាំ ដែលជានិស្សិតឆ្នាំទី៣ នៅសាកលវិទ្យាល័យភូមិន្ទភ្នំពេញ ផ្នែកអក្សរសាស្រ្តខ្មែរ បានលើកឡើងអំពីបញ្ហាព័ត៌មានមិនពិតមួយចំនួន ដែលអ្នកសរសេរ អាចមានបំណងមកបោកបញ្ឆោតដើម្បីផលប្រយោជន៍ផ្ទាល់ខ្លួន។

ក្នុងការចែករំលែកព័ត៌មានបន្ត និស្សិតឆ្នាំទី ៣ ផ្នែកអក្សរសាស្ត្រខ្មែរមួយរូបនេះបានលើកឡើងថា៖ «ទី១ ខ្ញុំមើលទៅលើផេកសិន តើផេកហ្នឹងវាច្បាស់លាស់អត់ ហើយផេកហ្នឹងវាធ្លាប់មានសម្ភាសន៍ទៅមានទិដ្ធភាពពិតជាក់ស្តែង រឺអត់បានខ្ញុំស៊ែរ»។

«ជួនកាលដូចផេកមួយចំនួនចឹង គាត់ចេះតែរឿងខ្លះមិនពិត ក៏ផុស ហើយខ្ញុំអត់ហ៊ានស៊ែរបន្តទេ ព្រោះខ្លាចកាលណាយើងស៊ែរបន្ត យើងចូលរួមក្នុងការបោកបញ្ឆោតអ្នកលេងផ្សេងៗ»។

លោកបានបន្តថា៖ «ខ្ញុំស៊ែរតែព័ត៌មានណាដែលមានប្រយោជន៍សម្រាប់ជួយដល់សង្គម ចឹងបានខ្ញុំស៊ែរ។ ពេលដែលយើងស៊ែរទៅ លក្ខណៈថាយើងបានចែករំលែកនូវចំណេះដឹង ក៏ដូចជាផលប្រយោជន៍ហ្នឹងទៅកាន់អ្នកផ្សេងផងដែរ»៕

ក្រសួងការងារផ្អាកបញ្ជូនពលករទៅធ្វើការនៅប្រទេសថៃបណ្ដោះអាសន្ន

ញាណ វិភាវី (Vipheavy Nhean) — Tue, 22 Dec 2020 04:19:48 +0000

ក្រសួងការងារ និងបណ្ដុះបណ្ដាលវិជ្ជាជីវៈ បានសម្រេចផ្អាកបញ្ជូនពលករតាមរយៈអនុស្សារណៈនៃការយោគយល់ (MoU) និងពលករតាមរដូវកាល ទៅធ្វើការនៅប្រទេសថៃជាបណ្ដោះអាសន្ន បន្ទាប់ពីមានការរាតត្បាតជម្ងឺកូវីដ១៩ នៅខេត្តសាមុតសាខន ប្រទេសថៃ។

សេចក្ដីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ ចុះថ្ងៃទី២១ ខែធ្នូ ឆ្នាំ២០២០ បានអំពាវនាវដល់ពលករខ្មែរទាំងអស់ដែលកំពុងធ្វើការនៅប្រទេសថៃត្រូវគោរពតាមការណែនាំ និងចូលរួមសហការជាមួយអាជ្ញាធរថៃដើម្បីការពារ និងទប់ស្កាត់ការរីករាលដាលបន្តនៃជម្ងឺកូវីដ១៩។

តាមរយៈសេចក្ដីប្រកាសដដែលនេះ ក្រសួងការងារ និងបណ្ដុះបណ្ដាលវិជ្ជាជីវៈក៏បានហាមប្រាមពលករខ្មែរដែលស្នាក់នៅប្រទេសថៃកុំឲ្យផ្លាស់ប្ដូរទីកន្លែងស្នាក់នៅ ឬទីកន្លែងធ្វើការពីខេត្តមួយ ទៅខេត្តមួយទៀត និងត្រូវរក្សារអនាម័យ ពាក់ម៉ាស់ លាងដៃឲ្យបានជាប្រចាំទាំងនៅកន្លែងធ្វើការ និងកន្លែងស្នាក់នៅ។

ក្រសួងក៏បានបន្ថែមទៀតថា សម្រាប់ពលករដែលមានកិច្ចការចាំបាច់ត្រូវត្រលប់មកស្រុកកំណើតវិញ ដាច់ខាតត្រូវធ្វើដំណើរចូលប្រទេសកម្ពុជាតាមច្រកណាមួយក្នុងចំណោមច្រកអូរស្មាច់ ច្រកដូង ឬច្រកប៉ោយប៉ែត និងចាំបាច់ត្រូវធ្វើចត្តាឡីស័កចំនួន១៤ថ្ងៃ។

គួរបញ្ជាក់ផងដែរថា គិតមកត្រឹមថ្ងៃទី២១ ខែធ្នូ ឆ្នាំ២០២០នេះ នៅខេត្តសាមុតសាខននៃប្រទេសថៃ មានអ្នកឆ្លងជម្ងឺកូវីដ ១៩ ចំនួនជាង ៥០០នាក់ ហើយដែលក្នុងនោះភាគច្រើនជាប្រជាជនភូមាដែលមកធ្វើការនៅខេត្តនោះ៕

គ្រឹះស្ថានមីក្រូហិរញ្ញវត្ថុថានឹងបន្តរៀបចំឥណទានឡើងវិញ ដល់អតិថិជនរហូតដល់ពាក់កណ្ដាល ឆ្នាំ២០២១

ញាណ វិភាវី (Vipheavy Nhean) — Thu, 17 Dec 2020 08:27:07 +0000

គ្រឹះស្ថានមីក្រូហិរញ្ញវត្ថុ នឹងនៅតែបន្តរៀបចំឥណទានឡើងវិញឲ្យអតិថិជនដែលរងផលប៉ះពាល់ដោយសារការរីករាលដាលនៃជម្ងឺកូវីដ ១៩រហូតដល់ពាក់កណ្ដាលឆ្នាំ២០២១។

លោកកាំង តុងងី ប្រធានទំនាក់ទំនងសមាគមគ្រឹះស្ថានមីក្រូហិរញ្ញវត្ថុកម្ពុជាបានថ្លែងថា តាមរយៈសារាចរណ៍របស់ធនាគារជាតិដែលចេញកាលពីខែមីនាកន្លងទៅ បានអនុញ្ញាតឲ្យគ្រឹះស្ថានមីក្រូហិរញ្ញវត្ថុទាំងអស់រៀបចំឥណទានជូនអតិថិជនដែលប៉ះពាល់ជីវភាពដោយសារជម្ងឺកូវីដ ១៩ ដល់ត្រឹមចុងឆ្នាំ២០២០ ក៏ប៉ុន្តែមកទល់ពេលនេះឃើញថាអតិថិជនមួយចំនួននៅតែមានការលំបាកផ្នែកជីវភាព ជាពិសេសអតិថិជនក្នុងវិស័យទេសចរណ៍ សណ្ឋាគារ និងបដិសណ្ឋារកិច្ច។

លោកបានបន្តថា «យើងបានជជែកគ្នាក្នុងចំណោមសមាជិកយើងក៏ដូចជាជាមួយសមាគមធនាគារជាតិនៅកម្ពុជា និងធនាគារជាតិនៃកម្ពុជា យើងបានស្នើរសុំឲ្យផ្ដល់លក្ខខណ្ឌផ្លូវច្បាប់បន្ថែមទៀតដើម្បីយើងអាចបន្តរៀបចំឥណទានឡើងវិញដល់អតិថិជន អីចឹងខាងធនាគារជាតិនៃកម្ពុជា បានអនុម័តយល់ព្រមក្នុងការឲ្យគ្រឹះស្ថានហិរញ្ញវត្ថុទាំងអស់នៅកម្ពុជា រួមទាំងមីក្រូហិរញ្ញវត្ថុក៏ដូចជាធនាគារ នឹងអាចបន្តរៀបចំឥណទានឡើងវិញដល់អតិថិជនដែលរងផលប៉ះពាល់ដោយសារកូវីដ ១៩រហូតដល់ពាក់កណ្ដាលឆ្នាំ២០២១»។

លោកស្រីជា សិរី អគ្គនាយិការធនាគារជាតិនៃកម្ពុជា មិនអាចស្នើរសុំការបកស្រាយបានទេក្នុងសប្តាហ៏នេះ។

បើតាមទិន្នន័យដែលផ្ដល់ដោយសមាគមគ្រឹះស្ថានមីក្រូហិរញ្ញវត្ថុកម្ពុជា មានអតិថិជនជាង២៧ម៉ឺននាក់ ហើយដែលគ្រឹះស្ថានមីក្រូហិរញ្ញវត្ថុ បានអនុម័តរៀបចំឥណទានឡើងវិញជូនក្នុងរយៈពេល៨ខែ ដោយគិតចាប់ពីខែមិនា រហូតដល់ដំណាច់ខែវិច្ឆិកា ឆ្នាំ២០២០នេះ។

លោកកាំង តុងងី បានបន្ថែមថាកម្ចីដែលបានអនុគ្រោះសរុបគឺមានទំហំប្រហែល១៣០០លានដុល្លារអាមេរិក ដោយទិន្នន័យនេះ មិនបានរាប់បញ្ចូលកម្ចីដែលអនុគ្រោះដោយធនាគារនោះទេ គឺរាប់បញ្ចូលតែទិន្នន័យរបស់គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងគ្រឹះស្ថានឥណទានជនបទតែប៉ុណ្ណោះ។

កាលពីខែមិនា ឆ្នាំ២០២០កន្លងទៅ ធនាគារជាតិនៃកម្ពុជាបានចេញសារាចរណ៍ឲ្យគ្រឹះស្ថានមីក្រូហិរញ្ញវត្ថុយកចិត្តទុកដាក់លើអតិថិជនដែលប៉ះពាល់ជាក់ស្ដែងដោយសារជម្ងឺកូវីដ ១៩ និងរៀបចំឥណទានឡើងវិញជូនអតិថិជនក្នុងវិស័យអាទិភាពដូចជា វិស័យកាត់ដេរ សំណង់ ទេសចរណ៍ បដិសណ្ឋាកិច្ច ការដឹកជញ្ជូននិងឡូជីស្ទិក។

លោកសុខ វឿន អគ្គនាយកប្រតិបត្តិគ្រឹះស្ថានមីក្រូហិរញ្ញវត្ថុអិលអូអិលស៊ី (LOLC)បានឲ្យដឹងថាគ្រឹះស្ថានរបស់លោកបានរៀបចំឥណទានឡើងវិញជូនអតិថិជនប្រមាណ៥ម៉ឺននាក់ហើយ ដោយក្នុងនោះអតិថិជនមួយភាគធំ ស្ថិតក្នុងវិស័យវិស័យទេសចរណ៍ សណ្ឋាគារ ផ្ទះសំណាក់ និងការងារក្រៅប្រព័ន្ធដូចជាអ្នករត់ម៉ូតូឌុប កង់បី តាក់ស៊ីជាដើម។

លោកបានអះអាងថាគិតត្រឹមខែធ្នូ ឆ្នាំ២០២០នេះ អតិថិជនភាគច្រើនបានត្រលប់មកបង់កម្ចីតាមធម្មតាវិញ ប៉ុន្តែក៏មានអតិថិជនថ្មីមួយចំនួនតូចដែលគាត់ទើបតែស្នើរសុំរៀបចំឥណទានឡើងវិញ។

លោកលើកឡើងថា «យើងនៅតែបន្តរៀបចំឥណទានឡើងវិញតាមការណែនាំរបស់ធនាគារជាតិ យើងអាចបន្តដល់ខែមិថុនា ឆ្នាំ២០២១ ប្រសិនណាបើវាពិតជារងការប៉ះពាល់មែន»។

អ្នកស្រី សេង សុខណា វ័យ៣៣ឆ្នាំ បានឲ្យដឹងថា អ្នកស្រីបានស្នើសុំពន្យាការបង់កម្ចីទៅគ្រឹះស្ថានមីក្រូហិរញ្ញវត្ថុអម្រឹតកាលពីខែមេសា ដោយសារ ស្វាមីអ្នកស្រីដែលធ្វើការនៅឯប្រទេសថៃ ពុំអាចរកចំណូលបានគ្រប់គ្រាន់ដើម្បីផ្គត់ផ្គង់គ្រួសារ។

អ្នកស្រីបាននិយាយថា «គេពន្យាឲ្យខ្ញុំ៣ខែ ព្រោះអី កូវីដអីចឹង ខ្ញុំសុំឡើងតែការទៅគាត់ ក៏ព្រមសំណើខ្ញុំ ចឹងគាត់ក៏ឲ្យទៅ។ នេះដល់ពេលឥឡូវ គេឲ្យឡើងទាំងដើម ទាំងការវិញទៅ ប្រហែលឡើងយឺតទៀតហើយ ព្រោះអី (ប្ដីខ្ញុំ) រកលុយនៅថៃអត់សូវបាន ណាមួយអត់សូវមានការងារធ្វើ»។

អ្នកស្រីបានបន្តថា «ខ្ញុំសុំគាត់ដល់៦ខែ តែគេថាថ្នាក់លើឲ្យបានតែ៣ខែទេ អីចឹងខ្ញុំក៏ថា៣ខែ ក៏៣ទៅ។ ពេលគាត់ពន្យាអីចឹង ខ្ញុំក៏រាងធូរដែរ កាលហ្នឹងខ្ញុំនៅពោះធំផង»។

អ្នកស្រីម៉ន សុខយឿន វ័យ៤៩ឆ្នាំ ជាអាជីវករមួយរូបបានយកកម្ចីពីគ្រឹះស្ថានមីក្រូហិរញ្ញវត្ថុអម្រឹតក្នុងទំហំ៧ពាន់ដុល្លារអាមេរិក។

អ្នកស្រីបានឲ្យដឹងថាអ្នកស្រីមិនបានស្នើសុំរៀបចំឥណទានឡើងវិញឡើយ បើទោះបីជាការលក់ដូររបស់អ្នកស្រីមានការប៉ះពាល់ក្នុងអំឡុងពេលកូវីដក៏ដោយ។

អ្នកស្រីមានប្រសាសន៍ថា «ខ្ញុំអត់បានសុំពន្យាអីទេ ខ្ញុំគិតថាបើពន្យាទៅនៅតែជំពាក់គេដដែលអីចឹងយើងមានលទ្ធភាពទៅរួច ចេះតែទៅៗ គ្រាន់តែថាសុំពន្យាថ្ងៃបង់»។

អ្នកស្រីបន្តថា «ជួនកាលខ្ញុំតេសុំគាត់ បើខ្ញុំអាចសង្ឃឹមថាបានពីនេះ ពីនោះ កូនឲ្យខ្លះអ៊ីចឹងទៅ ខ្ញុំសុំគាត់យឺត៤ ៥ថ្ងៃ ទៅមួយអាទិត្យ ដល់ថ្ងៃយើងរកបង្គ្រប់ឲ្យគាត់ទៅ»។

អ្នកស្រីម៉ន សុខយឿន ក៏បានសម្ដែងការព្រួយបារម្ភពីស្ថានភាពជម្ងឺកូវីដ ១៩ ដែលធ្វើឲ្យប៉ះពាល់ដល់ការរកស៊ីរបស់អ្នកស្រីជាបន្តបន្ទាប់។

តំណាងគ្រឹះស្ថានមីក្រូហិរញ្ញវត្ថុអម្រឹត បាននិយាយថាគាត់រវល់ហើយមិនអាចឆ្លើយតបបានជាមួយ Newsroom Cambodia។

ការប្រលងសញ្ញាបត្រមធ្យមសិក្សាទុតិយភូមិត្រូវបានលើកទៅដើមឆ្នាំក្រោយ

ញាណ វិភាវី (Vipheavy Nhean) — Mon, 07 Dec 2020 15:43:40 +0000

ការប្រលងសញ្ញាបត្រមធ្យមសិក្សាទុតិយភូមិដែលគ្រោងនឹងធ្វើឡើងនៅ ថ្ងៃទី២១ និង២២ ខែធ្នូ ឆ្នាំ២០២០នេះ ត្រូវលើកទៅពាក់កណ្ដាលខែមករា ឆ្នាំ២០២១វិញ ដោយសារការរីករាលដាលនៃជម្ងឺកូវីដ-១៩ បន្ទាប់ពីព្រឹត្តិការណ៍សហគមន៍ ២៨ វិច្ឆិកា។

ក្រសួងអប់រំ យុវជន និងកីឡា បានប្រកាសដូច្នេះតាមរយៈសេចក្ដីប្រកាសមួយចុះថ្ងៃទី០៧ ខែធ្នូ ឆ្នាំ២០២០។ ក្រសូងក៏បានបន្ថែមដែរថា ចំពោះកាលបរិច្ឆេទច្បាស់លាស់នៃការប្រលង ក្រសួងនឹងជូនដំណឹងនៅពេលក្រោយទៀត។

គួរបញ្ជាក់ផងដែរថា គិតត្រឹមថ្ងៃទី០៦ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្ដអ្នកប៉ះពាល់ក្នុងព្រឹត្តិការណ៍ ២៨ វិច្ឆិកា សរុបទាំងអស់ចំនួន ១១ ៣០៥សំណាក ហើយដែលក្នុងនោះអ្នកវិជ្ជមានវីរុសកូវីដ១៩ថ្មីសរុបមានចំនួន ៣២នាក់៕

ញាណ វិភាវី (Vipheavy Nhean) – Newsroom Cambodia

តុលាការភ្នំពេញចេញដីកាកោះហៅអនុរដ្ឋលេខាធិការ​ពីររូបឲ្យបំភ្លឺជុំវិញសំណុំរឿងឆបោក

លោកស្រីមូរ សុខហួរ ប្រកាសលើក​ពេល​ត្រឡប់ចូលស្រុកទៅ​ថ្ងៃទី១៥ ខែមករា ឆ្នាំ២០២១