Brief – Newsroom Cambodia

ក្មេងស្រីអាយុ១៦ឆ្នាំម្នាក់ទៀតនៅខេត្តស្វាយរៀងឆ្លងជំងឺផ្ដាសាយបក្សី

រិន សុធារ័ត្ន (Rin Sothearoth) — Sun, 04 Aug 2024 04:00:45 +0000

ក្រសួងសុខាភិបាលប្រកាសពីការរកឃើញជំងឺផ្ដាសាយបក្សីប្រភេទហាស់៥អ៊ិន១(H5N1) មួយករណីទៀត លើក្មេងស្រីអាយុ១៦ឆ្នាំ រស់នៅខេត្តស្វាយរៀងកាលពីថ្ងៃទី៣ ខែសីហា ឆ្នាំ២០២៤។

យោងតាមសេចក្ដីប្រកាសព័ត៌មានក្រសួងសុខាភិបាល ចេញថ្ងៃទី៣ ខែសីហា ឆ្នាំ២០២៤ បានឱ្យដឹងថា ក្មេងស្រីអាយុ១៦ឆ្នាំត្រូវបានបញ្ជាក់ថា វិជ្ជមានវីរុសផ្ដាសាយបក្សី ប្រភេទហាស់៥អ៊ិន១ (H5N1) ពីវិទ្យាស្ថានជាតិសុខាភិបាលសាធារណៈនិងវិទ្យាស្ថានប៉ាស្ទ័រ នៅថ្ងៃទី៣ ខែសីហា ឆ្នាំ២០២៤ ស្ថិតនៅភូមិចំការលាវ ឃុំព្រៃគគីរ ស្រុកចន្រ្ទា ខេត្តស្វាយរៀង។

សេចក្ដីប្រកាសព័ត៌មានដដែលបន្តថា ស្ថានភាពក្មេងស្រីបច្ចុប្បន្នមានសភាពធ្ងន់ធ្ងរ និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។

សេចក្ដីប្រកាសព័ត៌មានបញ្ជាក់ថា៖ «តាមការសាកសួរបង្ហាញថា ប្រហែល ០៤ថ្ងៃមុនចាប់ផ្ដើមឈឺនៅផ្ទះអ្នកជិតខាង និងនៅផ្ទះក្មេងស្រីមានមាន់ទាងាប់ចំនួន ០៩ក្បាល ហើយបានយកមកធ្វើម្ហូបបរិភោគ ក្មេងស្រីបានប៉ះពាល់និងកាន់មាន់ងាប់ »។

បើតាមសេចក្ដីប្រកាសព័ត៌មាន ក្រសួងសុខាភិបាលកំពុងសហការជាមួយក្រសួង ស្ថាប័ន និងភាគីពាក់ព័ន្ធ ដើម្បីស្រាវជ្រាវរកជំងឺផ្ដាសាយបក្សី ស្វែងរកប្រភពចម្លង ស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លង ព្រមទាំងចែកជូនឱសថតាមីហ្លូ (Tamiflu) ដល់អ្នកប៉ះពាល់ និងយុទ្ធនាការអប់រំសុខភាពប្រជាពលរដ្ឋនៅក្នុងភូមិផងដែរ។

ក្រសួងក្រើនរំឮកដល់ប្រជាពលរដ្ឋឱ្យប្រុងប្រយ័ត្នជំងឺផ្ដាសាយបក្សីនេះ ព្រោះជំងឺនេះនៅតែបន្តគំរាមកំហែងសុខភាពប្រជាពលរដ្ឋ។ ប្រសិនបើមានអាការៈក្ដៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិធ្លាប់ប៉ះពាល់ជាមួយមាន់ទាឈឺ ឬស្លាប់ក្នុងអំឡុង ១៤ថ្ងៃ មុនថ្ងៃចាប់ផ្ដើមមានរោគសញ្ញា សូមកុំជួបជុំ ឬទីប្រជុំជនដែលមានមនុស្សច្រើន ស្វែងរកការពិគ្រោះយោបល់ ពិនិត្យព្យាបាលនៅតាមមូលដ្ឋានសុខាភិបាល ដែលនៅជិតលោកអ្នកបំផុត។

សេចក្ដីប្រកាសព័ត៌មានបន្ថែមថា៖ « វិធានការបង្ការ៖ សូមលាងដៃឱ្យបានញឹកញាប់ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះពាល់ជាមួយសត្វបក្សី ដាក់កុមារនៅឆ្ងាយពីសត្វបក្សី និងដាក់សត្វបក្សីនៅឱ្យឆ្ងាយពីកន្លែងរស់នៅ កុំបរិភោគសត្វបក្សីឈឺឬងាប់ និងរាល់សត្វបក្សីដែលធ្វើបរិភោគត្រូវចំអិនឱ្យបានឆ្អិនល្អ»៕

និយ័តករទូរគមនាគមន៍កម្ពុជាអំពាវនាវឱ្យអ្នកប្រើប្រព័ន្ធទូរស័ព្ទទាំងអស់រាយការណ៍ពីករណីមិនប្រក្រតី

ហៀង រ៉ូណា (Heang Rona) — Fri, 02 Aug 2024 02:50:16 +0000

និយ័តករទូរគមនាគមន៍កម្ពុជាអំពាវនាវឱ្យអ្នកប្រើប្រាស់ប្រព័ន្ធទូរស័ព្ទទាំងអស់ រាយការណ៍ជាបន្ទាន់ក្នុងករណីក្រុមហ៊ុនទូរស័ព្ទកាត់ផ្ដាច់ដំណើរការលេខទូរស័ព្ទចល័តរបស់អ្នកប្រើប្រាស់ដែលនៅមានសុពលភាពប្រើប្រាស់ និងកាត់ទឹកប្រាក់ពីគណនីរបស់អតិថិជនខុសពីគម្រោងតម្លៃ និងលក្ខណ្ឌបានផ្សាយពាណិជ្ជកម្ម។

ក្នុងសេចក្តីជូនដំណឹងរបស់និយ័តករទូរគមនាគមន៍កម្ពុជា (ន.ទ.ក) ចេញនៅថ្ងៃទី៣១ ខែកក្កដា ឆ្នាំ២០២៤ បញ្ជាក់ថា ក្នុងពេលថ្មីៗនេះ ន.ទ.ក រកឃើញភាពមិនប្រក្រតី និងបានផាកពិន័យប្រតិបត្តិករទូរស័ព្ទចល័តមួយចំនួនពាក់ព័ន្ធនឹងការកាត់ផ្ដាច់ដំណើរការលេខទូរស័ព្ទចល័តរបស់អ្នកប្រើប្រាស់ដែលកំពុងនៅមានសុពលភាពប្រើប្រាស់ ហើយដាក់លក់លេខទូរស័ព្ទទាំងនោះជាថ្មី និងការកាត់ទឹកប្រាក់ពីគណនីរបស់អតិថិជនខុសពីគម្រោងតម្លៃ និងលក្ខណ្ឌនៃសេវារ៉ូមីងដែលបានផ្សាយពាណិជ្ជកម្ម។

និយ័តករទូរគមនាគមន៍កម្ពុជាអំពាវនាវដល់អ្នកប្រើប្រាស់ឱ្យរាយការណ៍ទៅខ្លួនក្នុងករណី លេខទូរស័ព្ទចល័តត្រូវបានកាត់ផ្តាច់ដំណើរការ ឬដាក់លក់ជាថ្មី។ ទឹកប្រាក់ក្នុងគណនីលេខទូរស័ព្ទចល័តត្រូវបានកាត់ ខុសពីតារាងតម្លៃ និងលក្ខខណ្ឌនៃសេវា។ ការកាត់ទឹកប្រើពេលភ្ជាប់គម្រោង ឬសេវាណាមួយដោយមិនមានការយល់ព្រមពីអ្នកប្រើប្រាស់ និងការមិនទទួលបានដំណោះស្រាយណាមួយសមស្របពីប្រតិបត្តិករទូរស័ព្ទចល័តលើបណ្តឹងតវ៉ារបស់អ្នកប្រើប្រាស់។

និយ័តករទូរគមនាគមន៍កម្ពុជាបញ្ជាក់ក្នុងសេចក្តីជូនដំណឹងនោះ តាមន័យដើមថា៖ «ដើម្បីជំរុញការប្រកួតប្រជែងស្របច្បាប់ និងស្មោះត្រង់ និងការការពារផលប្រយោជន៍អ្នកប្រើប្រាស់ ន.ទ.ក សូមអំពាវនាវដល់អ្នកប្រើប្រាស់សេវាទូរស័ព្ទចល័តទាំងអស់រាយការណ៍មក ន.ទ.ក តាមរយៈលេខទូរស័ព្ទ ៦៧៨៩ រៀងរាល់ម៉ោងធ្វើការ ឬផ្ញើសារមកកាន់អ៊ីមែល infor@trc.gov.kh»។

Newsroom Cambodia បានព្យាយាមទាក់ទងសុំការអត្ថាធិប្បាយបន្ថែមពីនិយ័តករទូរគមនាគមន៍កម្ពុជា តែមិនមានការឆ្លើយតប។

គូរបញ្ជាក់ថា និយ័តករទូរគមនាគមន៍កម្ពុជាបានចេញសេចក្ដីណែនាំស្រដៀងគ្នានេះ កាលពីថ្ងៃទី១៤ ខែសីហា ឆ្នាំ២០២៣ ស្ដីពីទឹកប្រាក់ក្នុងគណនីនៃលេខទូរស័ព្ទត្រូវបានកាត់ ខុសពីតារាងតម្លៃ និងលក្ខខណ្ឌនៃសេវាដែលបានផ្សព្វផ្សាយពាណិជ្ជកម្ម រួមជាមួយនឹងការភ្ជាប់គម្រោង ឬកញ្ចប់សេវាទូរស័ព្ទចល័ត ឬសេវាតម្លៃណាមួយ ដែលធ្វើឱ្យមានការកាត់ទឹកប្រាក់ដោយមិនមានការយល់ព្រមជាមុនពីអ្នកប្រើប្រាស់ និងការមិនទទួលបានដំណោះស្រាយសមស្របណាមួយ ពីប្រតិបត្តិករទូរស័ព្ទចល័តលើបណ្ដឹងតវ៉ារបស់អ្នកប្រើប្រាស់៕

ក្រសួងសុខាភិបាលរំឭកជាថ្មីដល់ប្រជាពលរដ្ឋប្រុងប្រយ័ត្នវីរុសផ្ដាសាយបក្សី H5N1

អឹប ខេណែត (Oeb Khenet) — Fri, 02 Aug 2024 02:31:55 +0000

ក្រសួងសុខាភិបាលក្រើនរំឭកជាថ្មីដល់ប្រជាពលរដ្ឋឱ្យប្រុងប្រយ័ត្នលើជំងឺផ្ដាសាយបក្សី ប្រភេទហាស់៥ អ៊ិន១ (H5N1) ក្រោយរកឃើញវិជ្ជមានវីរុសផ្ដាសាយបក្សីលើក្មេងប្រុសអាយុ ៤ឆ្នាំម្នាក់ទៀត កាលពីថ្ងៃទី៣០ ខែកក្កដា ឆ្នាំ២០២៤។

យោងសេចក្ដីប្រកាសព័ត៌មានរបស់ក្រសួងសុខាភិបាល ចេញកាលពីថ្ងៃទី០១ ខែសីហា ឆ្នាំ២០២៤នេះ បង្ហាញថា ក្មេងប្រុសអាយុ ៤ឆ្នាំម្នាក់ត្រូវបានបញ្ជាក់ថា វិជ្ជមានវីរុសផ្ដាសាយបក្សី ប្រភេទហាស់៥ អ៊ិន១ (H5N1) ពីវិទ្យាស្ថានសុខាភិបាលសាធារណៈ និងវិទ្យាស្ថានប៉ាស្ទ័រ កាលពីថ្ងៃទី៣០ ខែកក្កដា ឆ្នាំ២០២៤ ស្ថិតក្នុងភូមិជ្រុងពពេល ឃុំម្រាម ស្រុករមាសហែង ខេត្ដស្វាយរៀង។

សេចក្ដីប្រកាសព័ត៌មានដដែលបន្ថែមថា ស្ថានភាពក្មេងប្រុសបច្ចុប្បន្នបានធូរស្រាល និងកំពុងទទួលបានការថែទាំពីក្រុមគ្រូពេទ្យយ៉ាងយកចិត្ដទុកដាក់។

សេចក្ដីប្រកាសព័ត៌មានបញ្ជាក់ថា៖ «តាមការសាកសួរបង្ហាញថា ប្រហែល១២ថ្ងៃមុនចាប់ផ្ដើមឈឺ នៅក្នុងផ្ទះអ្នកជំងឺ មានមាន់ទាងាប់ចំនួនច្រើនក្បាល និងជាហូរហែ ហើយបានយកមកធ្វើម្ហូបបរិភោគ ក្មេងប្រុសបានប៉ះពាល់ និងកាន់មាន់ងាប់ ព្រមទាំងចូលចិត្ដលេងជាមួយមាន់ទា»។

បើតាមសេចក្ដីប្រកាសព័ត៌មាន ក្រសួងសុខាភិបាលកំពុងសហការជាមួយក្រសួង ស្ថាប័ន និងភាគីពាក់ព័ន្ធ ដើម្បីស្រាវជ្រាវរកប្រភពចម្លង និងស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លងបន្តទៅក្នុងសហគមន៍ និងផ្ដល់ឱសថតាមីហ្លូ (Tamiflu) ដល់អ្នកប៉ះពាល់ជិតស្និទ្ធ។

ក្នុងរយៈពេលប៉ុន្មានខែចុងក្រោយនេះ មានករណីឆ្លងជំងឺផ្តាសាយបក្សីជាបន្តបន្ទាប់ ដែលភាគច្រើនកើតលើកុមារ។

ក្រសួងបានក្រើនរំឭកដល់ប្រជាពលរដ្ឋឱ្យប្រុងប្រយ័ត្នលើជំងឺផ្ដាសាយបក្សីប្រភេទនេះ ព្រោះជំងឺនេះនៅតែបន្តគំរាមកំហែងសុខភាពប្រជាពលរដ្ឋ ។ ក្រសួងណែនាំឱ្យទៅពិគ្រោះយោបល់ និងពិនិត្យព្យាបាលនៅមូលដ្ឋានសុខភាពនៅជិតបំផុត បើមានអាការៈក្ដៅខ្លួន ក្អក ហៀរសំបោរ ឬពិបាកដកដង្ហើម ក្រោយមានប្រវត្ដិប៉ះពាល់ជាមួយមាន់ទាឈឺ ឬងាប់ក្នុងអំឡុងពេល១៤ថ្ងៃ មុនថ្ងៃចាប់ផ្ដើមមានរោគសញ្ញា។

សេចក្ដីប្រកាសព័ត៌មាននេះបន្ថែមថា៖ «វិធានការបង្ការ៖ សូមលាងដៃឱ្យបានញឹកញាប់ ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះជាមួយបក្សី ដាក់កុមារនៅឆ្ងាយពីសត្វបក្សី និងដាក់សត្វបក្សីនៅឱ្យឆ្ងាយពីកន្លែងរស់នៅ កុំបរិភោគសត្វបក្សីឈឺឬងាប់ និងរាល់សត្វបក្សីដែលធ្វើសម្រាប់បរិភោគត្រូវចំអិនឱ្យឆ្អិនល្អ»។

គួរបញ្ជាក់ថា ជំងឺផ្ដាសាយបក្សី H5N1 ជាធម្មតាចម្លងពីបក្សីទៅបក្សី ប៉ុន្តែវាក៏អាចចម្លងពីបក្សីទៅមនុស្សបានដែរ តាមរយៈការប៉ះពាល់ជិតស្និតជាមួយបក្សីឈឺ ឬងាប់។ ជំងឺនេះកើតលើមនុស្សជាជំងឺធ្ងន់ធ្ងរ ដែលតម្រូវឱ្យព្យាបាលនៅមន្ទីរពេទ្យទាន់ពេលវេលា៕

ក្រសួងព័ត៌មានតម្រូវឱ្យការផ្សាយពាណិជ្ជកម្មគ្រឿងស្រវឹងសុំការអនុញ្ញាតពីក្រសួង

ជីម ឆៃលន់ (Chim Chhailun) — Thu, 01 Aug 2024 03:17:57 +0000

ក្រសួងព័ត៌មានតម្រូវឱ្យការផ្សាយពាណិជ្ជកម្មផលិតផលគ្រឿងស្រវឹងសុំការអនុញ្ញាតពីក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងមុននឹងផ្សព្វផ្សាយ។

តាមរយៈប្រកាសស្ដីពីការកំណត់អំពីបែបបទ នីតិវិធី និងវិធានក្នុងការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងរបស់ក្រសួងព័ត៌មានចេញនៅថ្ងៃទី២៣ ខែកក្កដា ឆ្នាំ២០២៤ បានឱ្យដឹងថា ការផ្សាយពាណិជ្ជកម្មផលិតផលគ្រឿងស្រវឹងត្រូវគោរពទៅតាមគោលការណ៍ដែលកំណត់ដោយក្រសួងព័ត៌មាន។

គោលការណ៍ដែលត្រូវបានកំណត់ក្នុងប្រកាសទាំងនោះរួមមាន មិនអនុញ្ញាតផ្សាយពាណិជ្ជកម្ម ឃោសនា និងការផ្សព្វផ្សាយលក់គ្រឿងស្រវឹងដោយយកទស្សនិកជនឱ្យទទួលទានគ្រឿងស្រវឹង នៅលើឆាកកម្មវិធីនានា។ មិនអនុញ្ញាតឱ្យផ្សាយគ្រឿងស្រវឹងផ្ដោតលើគោលដៅអនីតិជន និង/ឬយកអនីតិជនមកផ្សាយ។ មិនអនុញ្ញាតឱ្យផ្សាយលក់គ្រឿងស្រវឹងនៅចន្លោះម៉ោង១៨ ដល់ម៉ោង២០ តាមស្ថានីយទូរទស្សន៍ ឬវិទ្យុគ្រប់ប្រភេទ លើកលែងតែការផ្សាយដោយបង្ហាញតែរូបសញ្ញា ឬឈ្មោះផលិតផលគ្រឿងស្រវឹង។

ប្រកាសដដែលបន្ថែមថា ពាណិជ្ជកម្មផ្សាយគ្រឿងស្រវឹងត្រូវមានចម្ងាយមិនតិចជាង២០០ម៉ែត្រ ជាពិសេសនៅជុំវិញបរិវេណទីតាំងមួយចំនួនដូចជា គ្រឹះស្ថានសិក្សា គ្រឹះស្ថានសុខាភិបាល គ្រឹះស្ថានសាសនា រមណីយដ្ឋានវប្បធម៌ប្រវត្តិសាស្រ្ត និងអាកាសយានដ្ឋានអន្តរជាតិ។ ការបង្ហាញពីការទទួលទានគ្រឿងស្រវឹង ជាលក្ខខណ្ឌតម្រូវឱ្យសង្គមទទួលស្គាល់ ឬសម្រាប់ជោគជ័យក្នុងសង្គម ឬមោទនភាពជាតិត្រូវបានហាមឃាត់ និងត្រូវគោរពអ្នកមានតំណម រួមមានអ្នកកាន់សាសនា វប្បធម៌ អ្នកមានជំងឺ និងស្រ្តីមានផ្ទៃពោះ។

គួរបញ្ជាក់ថា កាលពីឆ្នាំ២០២៣ កម្ពុជាជាប្រទេសឈរលើលេខរៀងទី៣ ដែលមានប្រជាជនផឹកគ្រឿងស្រវឹងច្រើនជាងគេក្នុងតំបន់អាស៊ានបន្ទាប់ពីឡាវ និងវៀតណាម។ នេះបើតាមរបាយការណ៍របស់ Wisevoter៕

ក្រសួងសុខាភិបាលហាមឃាត់ការចែកចាយឧបករណ៍បរិក្ខាពេទ្យឈ្មោះ Neoplast-S

ភួង សុធីនី (Phuong Sothiny) — Thu, 01 Aug 2024 02:22:16 +0000

ក្រសួងសុខាភិបាលប្រកាសហាមឃាត់ការចែកចាយ ឬលក់ឧបករណ៍បរិក្ខាពេទ្យឈ្មោះ Neoplast-S គ្មានលេខបញ្ជិកាពីក្រសួងសុខាភិបាល។

យោងតាមសេចក្តីជូនដំណឹងរបស់ក្រសួងសុខាភិបាលនាថ្ងៃទី៣១ ខែកក្កដា ឆ្នាំ២០២៤ បានប្រកាសហាមឃាត់ការចែកចាយ ឬលក់ឧបករណ៍បរិក្ខារពេទ្យឈ្មោះ Neoplast-S គ្មានលេខបញ្ជិកាពីក្រសួងសុខាភិបាល ដែលមានលក្ខណៈស្រដៀងនឹងឧបករណ៍បរិក្ខារពេទ្យដែលកំពុងចែកចាយដោយក្រុមហ៊ុន DKSA (Cambodia) Ltd. ដែលស្របតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ។

សេចក្តីជូនដំណឹងបន្ថែមថា ក្នុងប្រទេសកម្ពុជារាល់ការចរាចរណ៍ឱសថ និងផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទ ត្រូវមានលេខបញ្ជិកាពីក្រសួងសុខាភិបាល។

សេចក្តីជូនដំណឹងបញ្ជាក់ថា៖ «អនុលោមតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថតម្រូវឱ្យរាល់ការចរាចរឱសថ និងផលិផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទ ក្នុងព្រះរាជាណាចក្រកម្ពុជា ត្រូវមានលេខបញ្ជិកាពីក្រសួងសុខាភិបាល»។

ក្រសួងសុខាភិបាលក៏បានអំពាវនាវឱ្យប្រជាពលរដ្ឋមានការប្រុងប្រយ័ត្ន និងត្រួតពិនិត្យលេខបញ្ជិកាមុននឹងទិញផលិតផលបង្ការ និងព្យាបាលជំងឺ។

សេចក្តីជូនដំណឹងបន្ថែមថា៖ «សូមប្រជាពលរដ្ឋមុននឹងទិញឱសថ ឬផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទត្រូវពិនិត្យមើលលបត្របញ្ជិកា ដែលមានបិទលើសំបកវេចខ្ចប់ ហើយលតាបត្រដែលត្រឹមត្រូវ គឺមានពីរផ្នែក ១.ផ្នែកខាងលើមានឈ្មោះក្រុមហ៊ុន ២.ផ្នែកខាងក្រោមមានលេខបញ្ជិកាដូចមានគំរូភ្ជាប់មកជាមួយ។»

ក្រសួងសុខាភិបាលក៏បានលើកទឹកចិត្តដល់ប្រជាពលរដ្ឋឱ្យមានការប្រុងប្រយ័ត្នចំពោះការប្រើប្រាស់ផលិផលផ្នែកសុខាភិបាលដែលគ្មានលេខបញ្ជិកា ព្រោះផលិតផលមិនមានស្តង់ដាធានាគុណភាព សុវត្ថិភាព និងប្រសិទ្ធភាព ដែលអាចប៉ះពាល់ដល់សុខភាព និងអាចគ្រោះថ្នាក់ដល់ជីវិតផង។

ក្រសួងសុខាភិបាលក៏បានបង្ហាញភាពខុសគ្នារវាងផលិតដែលមានលេខបញ្ជិកា និងផលិផលដែលមិនស្គាល់អត្តសញ្ញាណ ដែលភាពខុសគ្នាលើទំហំប្រអប់ លតាបត្រ ពណ៌ប្រអប់ លេខបាកូដ ការដាក់របៀបប្រើប្រាស់ ការរចនាផ្នែកខាងក្រោម/ភាសា ចំណុះនៅក្នុងប្រអប់ និងផ្ទៃប្រអប់ខាងក្នុង។

គួរបញ្ជាក់ថាក្រសួងសុខាភិបាលក៏ជូនដំណឹងស្រដៀងគ្នា កាលពីថ្ងៃទី៦ ខែមិថុនា ឆ្នាំ២០២៤ ពីការហាមឃាត់ការចែកចាយ ឬលក់ផលិតផលជំនួយសុខភាពឈ្មោះ Mentopas គ្មានលេខបញ្ជិកាពីក្រសួងសុខាភិបាលដែលមានលក្ខណៈស្រដៀងគ្នានឹងផលិតផលជំនួយសុខភាពដែលកំពុងចែកចាយដោយក្រុមហ៊ុន DKSH (Cambodia) Ltd.៕

អាជ្ញាធរកំចាត់មីនណែនាំឱ្យប្រយ័ត្នចំពោះសំណល់ជាតិផ្ទុះអំឡុងពេល និងក្រោយទឹកជំនន់

ចឹង លីលី (Choeng Lily) — Fri, 26 Jul 2024 04:04:32 +0000

អាជ្ញាធរកំចាត់មីនកម្ពុជាណែនាំឱ្យអ្នកពាក់ព័ន្ធប្រុងប្រយ័ត្នខ្ពស់ចំពោះមីន និងសំណល់ជាតិផ្ទុះពីសង្គ្រាមដែលអាចហូរមកជាមួយទឹកជំនន់ដោយសារការច្រោះដីពីតំបន់មានមីន និងសំណល់ជាតិផ្ទុះពីសង្គ្រាម។

យោងតាមសេចក្តីជូនដំណឹងរបស់អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ចេញនៅថ្ងៃទី២៤ ខែកក្កដា ឆ្នាំ២០២៤ ខណៈដែលខេត្តមួយចំនួនកំពុងរងឥទ្ធិពលទឹកភ្លៀង និងអាចបង្កជាទឹកជំនន់ មីន និងសំណល់ជាតិផ្ទុះពីសង្គ្រាមមួយចំនួនអាចត្រូវបានប្រទះឃើញដោយសារការហូរច្រោះដី ឬហូរតាមខ្សែទឹកផ្សេងៗ ដែលអាចបង្កគ្រោះថ្នាក់ដល់អាយុជីវិតពលរដ្ឋ។

ប្រធានអាជ្ញាធរមីនណែនាំដល់ប្រតិបត្តិករបោសសម្អាតមីន គណៈកម្មាធិការជាតិគ្រប់គ្រងគ្រោះមហន្តរាយ ក្រសួងអប់រំ និងអគ្គស្នងការដ្ឋាននគរបាលជាតិ ចូលរួមផ្សព្វផ្សាយដល់ពលរដ្ឋឱ្យប្រុងប្រយ័ត្នខ្ពស់ចំពោះមីន និងសំណល់ជាតិផ្ទុះដែលអាចហូរមកជាមួយទឹកជំនន់។ ណែនាំឱ្យពលរដ្ឋរាយការណ៍ទៅអាជ្ញាធរមូលដ្ឋានជាបន្ទាន់ ប្រសិនបើប្រទះឃើញមីន និងសំណល់ជាតិផ្ទុះពីសង្គ្រាម។

អាជ្ញាធរមីនក៏បានណែនាំឱ្យរៀបចំខ្លឹមសារផ្សព្វផ្សាយ និងអប់រំពីគ្រោះថ្នាក់បង្កដោយមីន និងសំណល់ជាតិផ្ទុះក្នុងពេល និងក្រោយទឹកជំនន់។ ឆ្លើយតបឱ្យបានទាន់ពេលក្នុងការប្រមូលយកទៅកម្ទេចចោល ពេលពលរដ្ឋរាយការណ៍។ ដាក់ស្លាកសញ្ញាសម្គាល់ជាបន្ទាន់តាមតំបន់សង្ខ័យមានមីន និងសំណល់ជាតិផ្ទុះដែលអាចហូរតាមទឹក និងដីល្បាប់ ដើម្បីទប់ស្កាត់កុំឱ្យប្រជាពលរដ្ឋចូលទៅស្នាក់នៅ។

តាមរបាយការណ៍ស្ដីពីគ្រោះថ្នាក់ដោយសារយុទ្ធភណ្ឌគ្រឿងផ្ទុះឆ្នាំ២០២៤ ចេញដោយអាជ្ញាធរមីន គិតចាប់ពីខែមករា ដល់ខែឧសភា ឆ្នាំ២០២៤ មានជនរងគ្រោះ៣០នាក់ កើនឡើង៥៨ភាគរយ បើធៀបនឹងឆ្នាំ២០២៣ មានជនរងគ្រោះ១៦នាក់៕

ពលរដ្ឋនៅខេត្តរតនគិរី១៧នាក់ពុលផ្សិត

ចឹង លីលី (Choeng Lily) — Thu, 25 Jul 2024 03:26:08 +0000

ក្រសួងសុខាភិបាលណែនាំឱ្យប្រុងប្រយ័ត្នពីការបរិភោគផ្សិត ក្រោយមានពលរដ្ឋចំនួន១៧នាក់បានពុលផ្សិតនៅខេត្តរតនគិរី កាលពីថ្ងៃទី២១ ខែកក្កដានេះ។

ក្នុងសេចក្ដីប្រកាសព័ត៌មានរបស់ក្រសួងសុខាភិបាលផ្សាយនៅថ្ងៃទី២៣ ខែកក្កដា ឆ្នាំ២០២៤ បញ្ជាក់ថា ប្រជាពលរដ្ឋនៅខេត្តរតនគិរីចំនួន១៧នាក់បានពុលផ្សិត ក្នុងនោះមានស្រី៤នាក់ កំពុងទទួលការព្យាបាលនៅមណ្ឌលសុខភាព និងមន្ទីរពេទ្យ បន្ទាប់ពីមានរោគសញ្ញារាក ចុកពោះ ក្អួត នៅភូមិឡុំ ឃុំប៉ក់ញៃ ស្រុកអូរយ៉ាដាវ ខេត្តរតនគិរី។

ក្រសួងសុខាភិបាលបន្ថែមថា ក្នុងចំណោមផ្សិតរាប់ពាន់ប្រភេទ មានផ្សិតប្រហែល១០០ប្រភេទដែលភាគច្រើនបណ្ដាលឱ្យពុលនៅពេលបរិភោគ។

ដើម្បីចៀសវាងពីការពុលផ្សិត ឬបង្កគ្រោះថ្នាក់ផ្សេងៗ ក្រសួងសុខាភិបាលបានណែនាំឱ្យសួរចាស់ៗ ឬអ្នកដែលស្គាល់ច្បាស់ថាផ្សិតនោះមិនធ្លាប់ពុលពីមុនមក។ ចំពោះផ្សិតដែលពុលនោះត្រូវប្រាកដថាចំអិនបានត្រឹមត្រូវ នឹងឆ្អិនល្អមុននឹងបរិភោគ ហើយប្រកាន់ខ្ជាប់នូវអនាម័យ លាងដៃនឹងសាប៊ូមុននឹងចាប់កាន់អាហារ។

សេចក្តីប្រកាសព័ត៌មានរបស់ក្រសួងសុខាភិបាលបញ្ជាក់ថា៖ «រោគសញ្ញានៃការពុលផ្សិតអាចកើតឡើងក្រោយពេលបរិភោគរយៈពេល ២ម៉ោង ទៅ៦ម៉ោង ឬច្រើនថ្ងៃ ដែលមានដូចជាចុកពោះ រាក បែកញើស រីកប្រស្រីភ្នែក ដង្ហើមញាប់ ឬពិបាកដកដង្ហើម ឡេះឡះ រហូតដល់អាចស្លាប់ក្នុងរយៈពេលណាមួយ ទៅតាមប្រភេទផ្សិតពុលដែលមានកម្រិតជាតិពុលខុសៗគ្នា។ ជាតិពុលខ្លះប៉ះពាល់ដល់ប្រព័ន្ធប្រសាទ តម្រងនោម ឬថ្លើម ជួនកាលច្រើនថ្ងៃ ឬច្រើនសប្ដាហ៍បន្ទាប់ពីបរិភោគ»។

ក្រសួងបានណែនាំដល់អ្នកពុលត្រូវប្រញាប់ស្វែងរកការជួយសង្រ្គោះបន្ទាន់ដែលនៅជិតផ្ទះបំផុត ហើយស្ថានភាពអ្នកពុលត្រូវនៅក្រោមការត្រួតពិនិត្យរបស់គ្រូពេទ្យជាចាំបាច់៕

ក្រសួងសុខាភិបាលហាមឃាត់ការទទួលទានស្រាថ្នាំ៣ប្រភេទផ្ទុកសារធាតុ SILDENAFIL

រិន សុធារ័ត្ន (Rin Sothearoth) — Thu, 25 Jul 2024 02:25:25 +0000

ក្រសួងសុខាភិបាលជូនដំណឹងដល់សាធារណជនពីការហាមឃាត់ការចែកចាយ លក់ ឬទទួលទានស្រាថ្នាំចំនួន៣ប្រភេទ ដែលមានផ្ទុកសារធាតុ SILDENAFIL ធ្វើឱ្យប៉ះពាល់ធ្ងន់ធ្ងរដល់សុខភាពរ និងអាចបង្កគ្រោះថ្នាក់ដល់អាយុជីវិត។

ក្នុងសេចក្ដីជូនដំណឹងរបស់ក្រសួងសុខាភិបាលចេញថ្ងៃទី២៤ ខែកក្កដា ឆ្នាំ២០២៤ បញ្ជាក់ថា ស្រាថ្នាំចំនួនបីប្រភេទដែលត្រូវហាមឃាត់ មានដូច Royal Health Wine EST:2005 ចំណុះ 500ml ស្រាថ្នាំ Royal Health Wine EST:2005 ចំណុះ 100ml និងស្រាសុខភាពធម្មជាតិ CHL ចំណុះ 150ml ផលិតដោយសិប្បកម្មផលិតស្រាថ្នាំនៃក្រុមហ៊ុនធានឆាវជៀវយៀក អ៊ីមផត អិចផត ឯ.ក ស្ថិតនៅភូមិជប់ ឃុំកណ្ដៀងរាយ ស្រុកស្វាយទាប ខេត្តស្វាយរៀង។

ក្រសួងបន្ថែមថា ស្រាថ្នាំទាំងបីប្រភេទនេះមានផ្ទុកសារធាតុ SILDENAFIL (សារធាតុបង្កើនផ្លូវភេទ) កម្រិតខ្ពស់ ដែលអាចធ្វើឱ្យប៉ះពាល់ធ្ងន់ធ្ងរដល់សុខភាពរបស់អ្នកទទួលទាន និងអាចបង្កគ្រោះថ្នាក់ដល់អាយុជីវិត។

សេចក្ដីជូនដំណឹងដដែលបន្តថា មន្រ្តីជំនាញនៃក្រសួងសុខាភិបាល បានសហការជាមួយអង្គភាព និងអាជ្ញាធរពាក់ព័ន្ធចុះធ្វើនិយ័តកម្មនៅសិប្បកម្មផលិតស្រាថ្នាំរបស់ក្រុមហ៊ុនធានឆាវជៀវយៀក អ៊ីមផត អិចផត ឯ.ក នៅខេត្តស្វាយរៀង និងទីតាំងលក់ស្រាថ្នាំស្ថិតនៅរាជធានីភ្នំពេញ ដោយបានចាត់វិធានការតាមផ្លូវច្បាប់ចំពោះជនពាក់ព័ន្ធ៕

រដ្ឋមន្រ្តីមហាផ្ទៃណែនាំអភិបាលរាជធានី-ខេត្តគាំទ្រការបង្កើតមណ្ឌលបន្សាបគ្រឿងញៀនដើម្បីសង្គ្រោះជនរងគ្រោះ

ចឹង លីលី (Choeng Lily) — Sun, 14 Jul 2024 09:38:34 +0000

រដ្ឋមន្រ្តីក្រសួងមហាផ្ទៃ លោក ស សុខា ណែនាំឱ្យអភិបាលរាជធានី-ខេត្តគាំទ្រ និងទាក់ទាញវិនិយោគបង្កើតមណ្ឌលបន្សាបគ្រឿងញៀន ដើម្បីសង្គ្រោះជនរងគ្រោះ និងបណ្តុះបណ្តាលពួកគេឱ្យចេះប្រកបរបរចិញ្ចឹមជីវិតក្រោយពេលចូលសហគមន៍វិញ។

ទំព័រហ្វេសប៊ុកក្រសួងមហាផ្ទៃ ផ្សាយនៅថ្ងៃទី១១ ខែមិថុនា ឆ្នាំ២០២៤ លោក ស សុខា រដ្ឋមន្រ្តីក្រសួងមហាផ្ទៃបានលើកឡើងថា ការវិនិយោគបង្កើតមណ្ឌលបន្សាបគ្រឿងញៀននឹងពិបាកលេចចេញជារូបរាង ប្រសិនបើអ្នកវិនិយោគរំពឹងខ្ពស់តែលើប្រាក់ចំណេញហើយ មិនមានការសម្បទានគាំទ្រពីរដ្ឋ។

លោក ស សុខា បានលើកឡើងថា៖ «ការបង្កើតមណ្ឌលព្យាបាល បន្សាប និងស្ដារនីតិសម្បទាអ្នកញៀនគ្រឿងញៀន គឺជាការផ្ដល់ដំណោះស្រាយប្រកបដោយប្រសិទ្ធភាព ដើម្បីស្រោចស្រង់ និងសង្គ្រោះជនរងគ្រោះ ពីព្រោះយន្តការនេះមានភាគរយខ្ពស់បំផុតក្នុងការប្រែក្លាយជនរងគ្រោះឱ្យផ្ដាច់បានដោយជោគជ័យពីគ្រឿងញៀន និងថែមទាំងទទួលបានការអប់រំ និងបណ្ដុះបណ្ដាលជំនាញវិជ្ជាជីវៈ ដើម្បីប្រើប្រាស់ និងប្រកបរបរចិញ្ចឹមជីវិត ក្រោយពីការធ្វើសមាហរណ៍ចូលទៅក្នុងសហគមន៍វិញ»។

ទំព័រហ្វេសប៊ុករបស់ក្រសួងមហាផ្ទៃបន្ថែមថា លោក ស សុខា ក៏បានលើកឡើងអំពីការជួញដូរគ្រឿងញៀនរបស់ឧក្រិដ្ឋជនថា កន្លងទៅសមត្ថកិច្ចបង្ក្រាបបានត្រឹមកម្រិតរាប់សិបគីឡូ ឬត្រឹមរយគីឡូ ប៉ុន្តែក្នុងរយៈពេលកន្លះឆ្នាំ២០២៤នេះ មានដល់ទៅជាង ៥ពាន់គីឡូ។

គិតពីខែមករា ដល់ឧសភាឆ្នាំ២០២៤នេះ មន្ទីរប្រឆាំងបទល្មើសគ្រឿងញៀនបង្ក្រាបបានគ្រឿងញៀនចំនួន ៤.៧១តោន កើន២៩ភាគរយក្នុ ងរយៈពេលដូចគ្នាពីឆ្នាំ២០២៣៕

សង្គមស៊ីវិល និងយុវជនគ្រោងរំឮកវិញ្ញាណក្ខន្ធបណ្ឌិតកែម ឡី នៅស្តុបបូកគោ

ហៀង រ៉ូណា (Heang Rona) — Tue, 09 Jul 2024 10:25:17 +0000

ក្រុមសង្គមស៊ីវិល និងយុវជននឹងជួបជុំគ្នានៅស្តុបបូកគោនៅព្រឹកថ្ងៃទី១០ ខែកក្កដានេះ ដើម្បីរំឮកវិញ្ញាណក្ខន្ធ និងរំឮកដឹងគុណចំពោះវិរភាពរបស់លោកបណ្ឌិតកែម ឡី ដែលត្រូវបានខ្មាន់កាំភ្លើងបាញ់សម្លាប់កាលពី៨ឆ្នាំមុន។

យោងតាមសេចក្ដីប្រកាសព័ត៌មានស្ដីអំពីការរំលឹកវិញ្ញាណក្ខន្ធលោកបណ្ឌិត កែម ឡី ខួបលើកទី៨ ចេញនៅថ្ងៃទី៨ ខែកក្កដា ឆ្នាំ២០២៤ បញ្ជាក់ថា ក្រុមសមាគម អង្គការ សហជីព ដែលធ្វើការក្នុងវិស័យសិទ្ធិការងារ វិស័យអ្នកប្រកបរបរសេដ្ឋកិច្ចក្រៅប្រព័ន្ធ សិទ្ធិមនុស្ស ប្រជាធិបតេយ្យ បរិស្ថាន និងយុវជន នឹងជួបជុំនៅស្តុបបូកគោ ដើម្បីជួបជុំក្នុងការរៀបចំពិធី។

សេចក្តីប្រកាសព័ត៌មានដដែលបន្ថែមថា កម្មវីធីរំឮកវិញ្ញាណក្ខខន្ធលោកបណ្ឌិត កែម ឡី នឹងធ្វើឡើងនៅថ្ងៃទី១០ ខែកក្កដា ឆ្នាំ២០២៤ នៅវេលាម៉ោង ៨៖០០ ព្រឹក មានទីតាំងជួបជុំគ្នា នៅស្តូបបូកគោនៅទីដែលខ្មាន់កាំភ្លើងបានបាញ់សម្លាប់លោកបណ្ឌិត កែម ឡី អ្នកស្រាវជ្រាវការអភិវឌ្ឍសង្គម និងជាអ្នកវិភាគនយោបាយ កាលពីថ្ងៃទី១០ ខែកក្កដា ឆ្នាំ២០១៦។

សេចក្តីប្រកាសព័ត៌មានបញ្ជាក់តាមន័យដើមថា៖ «ការជួបជុំនេះធ្វើឡើងក្នុងស្មារតីសាមគ្គីភាព និងអហិង្សា ដើម្បីភាពអង់អាចក្លាហានរបស់លោកបណ្ឌិត កែម ឡី ក្នុងបេសកកម្មនិយាយការពិត និងលើកស្ទួយឱ្យប្រជាពលរដ្ឋខ្មែរមានសកម្មភាពតាមដានក្នុងកិច្ចការងារសង្គម នយោបាយ តាមរយៈការចូលស្ដាប់ រៀនវិភាគថ្លឹងថ្លែង ព្រមទាំងអនុវត្តសេរីភាពរបស់ខ្លួនដូចមានចែងក្នុងរដ្ឋធម្មនុញ្ញ»។

គួរបញ្ជាក់ថា លោកបណ្ឌិត កែម ឡី ជាអ្នកវិភាគនយោបាយឯករាជ្យ ត្រូវបានឃាតករ បាញ់សម្លាប់ចំនួនបីគ្រាប់នៅក្នុងស្តារម៉ាត របស់ស្ថានីយចាក់សាំងកាល់តិច ស្តុបបូកគោកាលពីថ្ងៃទី១០ ខែកក្កដា ឆ្នាំ២០១៦៕

ក្មេងស្រីអាយុ៥ឆ្នាំម្នាក់ឆ្លងជំងឺផ្តាសាយបក្សី H5N1 ពីប្អូនប្រុសអាយុ៣ឆ្នាំ

ធី ស្រីរ័ត្ន (Thy Sreyroth) — Tue, 09 Jul 2024 09:56:41 +0000

ក្រសួងសុខាភិបាលបានប្រកាសថា មានក្មេងស្រីអាយុ៥ឆ្នាំម្នាក់ទៀតនៅខេត្តតាកែវបានកើតជំងឺផ្តាសាយបក្សីប្រភេទហាស់៥អិន១ (H5N1)ដោយសាររស់នៅផ្ទះជាមួយនឹងប្អូនប្រុសជីដូនមួយអាយុ៣ឆ្នាំដែលបានកើតជំងឺនេះកាលពីថ្ងៃទី៥ ខែកក្កដា ឆ្នាំ២០២៤។

យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី៨ ខែកក្កដា ឆ្នាំ២០២៤បានឱ្យដឹងថា នៅថ្ងៃទី៧ ខែកក្កដា ឆ្នាំ២០២៤ មានក្មេងស្រីអាយុ៥ឆ្នាំម្នាក់ទៀតនៅខេត្តតាកែវបានកើតជំងឺផ្តាសាយបក្សី ប្រភេទហាស់៥អ៊ិន១(H5N1) បន្ទាប់ពីបានរស់នៅផ្ទះជាមួយនឹងប្អូនប្រុសជីដូនមួយអាយុ៣ឆ្នាំដែលមានកើតជំងឺនេះកាលពីថ្ងៃទី៥ ខែកក្កដា ឆ្នាំ២០២៤កន្លងទៅ។

បើតាមសេចក្តីប្រកាសព័ត៌មាន អាជ្ញាធរកំពុងអង្កេតស្រាវជ្រាវយ៉ាងសកម្មលើការកើតឡើងនូវជំងឺផ្តាសាយបក្សី និងធ្វើការឆ្លើយតបទៅតាមវិធីសាស្ត្រ និងពិធីសារបច្ចេកទេស បន្តការស្វែងរកប្រភពចម្លង ទាំងលើសត្វ និងមនុស្ស និងបន្តស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លងបន្តទៅអ្នកដទៃទៀតក្នុងសហគមន៍ ព្រមទាំងចែកជូនឱសថតាមីហ្លូ (Tamiflu) ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតមានហេតុខាងលើ។

ក្រសួងបញ្ជាក់ក្នុងសេចក្តីប្រកាសទៀតថា៖«សូមក្រើនរំលឹកដល់បងប្អូនប្រជាពលរដ្ឋទាំងអស់គ្នា សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋយើង ហើយក៏សូមជម្រាបដល់បងប្អូន ប្រសិនបើមានអាការៈក្តៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬស្លាប់ក្នុងអំឡុងពេល១៤ថ្ងៃ មុនថ្ងៃចាប់ផ្តើមមានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន និងត្រូវស្វែងរកការ ពិគ្រោះយោបល់ និងការពិនិត្យព្យាបាលនៅតាមមូលដ្ឋានសុខាភិបាល ដែលនៅជិតលោកអ្នកបំផុតឱ្យបាន ឆាប់ទាន់ពេលវេលា»។

កាលពីថ្ងៃទី៥ ខែកក្កដា ឆ្នាំ២០២៤ ក្មេងប្រុសអាយុ៣ឆ្នាំម្នាក់នៅខេត្តតាកែវបានកើតជំងឺផ្តាសាយប្រភេទនេះដោយសារអ្នកផ្ទះបានយកមាន់ទាងាប់មកធ្វើម្ហូបបរិភោគ ហើយក្មេងប្រុសបានប៉ះពាល់និងកាន់មាន់ងាប់។ បច្ចុប្បន្នស្ថានភាពអ្នកជំងឺបានធូរស្រាល និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ៕

បុរស២នាក់រស់នៅខេត្តកំពង់ឆ្នាំង និងឧត្តរមានជ័យស្លាប់ដោយសារបរិភោគត្រីក្រពត

ធី ស្រីរ័ត្ន (Thy Sreyroth) — Tue, 09 Jul 2024 06:01:34 +0000

ក្រសួងសុខាភិបានៅថ្ងៃអង្គារនេះប្រកាសថា បុរសពីរនាក់រស់នៅខេត្តកំពង់ឆ្នាំង និងខេត្តឧត្តរមានជ័យបានស្លាប់ដោយសារការបរិភោគត្រីក្រពត។

យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី៨ ខែកក្កដា ឆ្នាំ២០២៤ បានឱ្យដឹងថា នៅថ្ងៃទី៧ ខែកក្កដា ឆ្នាំ២០២៤ មានបុរសម្នាក់នៅខេត្តឧត្តរមានជ័យបានស្លាប់ បន្ទាប់ពីបរិភោគត្រីក្រពត ហើយនៅថ្ងៃទី៨ ខែកក្កដា ឆ្នាំ២០២៤ មានបុរសម្នាក់បន្ថែមទៀត នៅខេត្តកំពង់ឆ្នាំងបានស្លាប់ បន្ទាប់ពីបរិភោគត្រីក្រពតផងដែរ។

បើតាមសេចក្តីប្រកាស ក្រសួងសុខាភិបាលសហការជាមួយក្រសួងកសិកម្ម រុក្ខាប្រមាញ់និងនេសាទអំពាវនាវ និងក្រើនរំឮកដល់ពលរដ្ឋគ្រប់រូប ត្រូវបន្តប្រុងប្រយ័ត្ន ចៀសវាងការបរិភោគត្រីក្រពតដែលមានជាតិពុល ពីព្រោះជាតិពុលនៅក្នុងខ្លួនត្រី អាចបណ្តាលឱ្យមានជំងឺធ្ងន់ធ្ងរ ឬស្លាប់។

ក្រសួងបញ្ជាក់ក្នុងសេចក្តីប្រកាសទៀតថា៖ «ក្រសួងសុខាភិបាលសូមលើកទឹកចិត្ត ឱ្យបងប្អូនពលរដ្ឋគ្រប់រូបអនុវត្តតាមដំបូន្មានខាងលើ និងសូមបន្តផ្សព្វផ្សាយសារអប់រំនេះដល់ក្រុមគ្រួសារ សាច់ញាត្តិ មិត្ត ដើម្បីការពារអ្នកនិងក្រុមគ្រួសារ ចៀសផុតពីការឈឺ និងស្លាប់ដោយសារការបរិភោគត្រីក្រពតដែលមានជាតិពុលទាំង៥ប្រភេទនេះ»។

កាលពីថ្ងៃទី៥ ខែកក្កដា មនុស្សចំនួន៧នាក់ រស់នៅខេត្តកំពង់ឆ្នាំង បានពុលត្រីក្រពត ប៉ុន្តែពួកគេត្រូវបានបញ្ជូនទៅសង្គ្រោះទាន់ពេលវេលា។

បើតាមក្រសួងសុខាភិបាល នៅកម្ពុជាមានត្រីក្រពតចំនួន៩ប្រភេទ ក្នុងនោះ៥ប្រភេទមានជាតិពុល រួមមាន ត្រីក្រពតភ្នែកក្រហម ត្រីក្រពតអុចធំ ត្រីក្រពតកូសាំងស៊ីន ត្រីក្រពអុចបៃតង និងត្រីក្រពតហ្លូវៀធីលីស។ ជាតិពុលរបស់ត្រីក្រពតទាំង៥ប្រភេទនេះ មានកម្រិតជាតិពុលនៅក្នុងខ្លួនត្រីខ្ពស់បំផុតនៅក្នុងរដូវត្រីពង។

សម្រាប់រោគសញ្ញាពុលមានដូចជា ក្នុងរយៈពេលពី២០នាទី ទៅ២ម៉ោង មានរមាស់ចាក់ៗនៅបបូរមាត់ ឈឺក្បាល វិលមុខ រមាស់ចាក់ៗក្នុងអវៈយវៈ ពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្លឹកចុងដៃចុងជើង ក្អួត រាក ល្ហិតល្ហៃ រឹងថ្គាម ឬអាចបណ្ដាលឱ្យស្លាប់៕

នាយកដ្ឋានប្រឆាំងបទលើ្មសបច្ចេកវិទ្យាប្រាប់ពលរដ្ឋឱ្យប្រយ័ត្នចំពោះការសាកថ្ម ឬប្រើគ្រឿងអេឡិចត្រូនិចសាធារណៈ

ហេង ស៊ីម៉ី (Heng Simey) — Tue, 09 Jul 2024 03:07:12 +0000

នាយកដ្ឋានប្រឆាំងបទលើ្មសបច្ចេកវិទ្យា ប្រាប់ឱ្យប្រជាពលរដ្ឋប្រុងប្រយ័ត្នចំពោះការប្រើប្រព័ន្ធសាកថ្ម ឬគ្រឿងអេឡិចត្រូនិចផ្សេងៗនៅទីកន្លែងសាធារណៈដែលមិនមានប្រភពច្បាស់លាស់ ដើម្បីចៀសវាងការលួច និងប្រើប្រាស់ទិន្នន័យពីជនអនាមិក។

យោងតាមសារដែលបង្ហោះលើទំព័រហ្វេសប៊ុករបស់នាយកដ្ឋានប្រឆាំងបទលើ្មសបច្ចេកវិទ្យាកាលពីថ្ងៃទី៧ ខែកក្កដា ឆ្នាំ២០២៤ បញ្ជាក់ថា ជូស៍ ជេឃីង (Juice Jacking) ជាបច្ចេកទេសដែលជនអនាមិកប្រើប្រាស់ដើម្បីចូលមើល និងលួចទិន្នន័យពីឧបករណ៍អេឡិចត្រូនិចដោយប្រើប្រាស់ប្រព័ន្ធសាកថ្ម ឬភ្ជាប់ទៅនឹងឧបករណ៍អេឡិចត្រូនិចផ្សេងៗក្នុងទីសាធារណៈ ឬឧបករណ៍អេឡិចត្រូនិចគ្មានប្រភពច្បាស់លាស់។

នាយកដ្ឋានប្រឆាំងបទលើ្មសបច្ចេកវិទ្យាបន្ថែមថាគោលបំណងនៃការប្រើប្រាស់បច្ចេកទេសនេះ គឺដើម្បីលួចព័ត៌មានផ្ទាល់ខ្លួន ដុចជាអ៊ីមែល អ៊ីនឌឺណិត ឯកសារ រូបភាព និងវីដេអូ។ លួចព័ត៌មានហិរញ្ញវត្ថុ ដូចជាគណនីធនាគារ ឬព័ត៌មានផ្សេងៗពាក់ព័ន្ធនឹងសេវាហិរញ្ញវត្ថុ និងដំឡើងមេរោគ (Malware)ដើម្បីត្រួតពិនិត្យឧបករណ៍របស់អ្នកប្រើប្រាស់នៅពេលក្រោយ។

ដើម្បីចៀងវាងបញ្ហាខាងលើ នាយកដ្ឋានប្រឆាំងបទលើ្មសបច្ចេកវិទ្យាអំពាវនាវឱ្យអ្នកប្រើប្រាស់កន្លែងសាកថ្ម ឬភ្ជាប់ជាមួយគ្រឿងអេឡិចត្រូនិចដែលជឿជាក់បាន និងមកពីក្រុមហ៊ុនដែលទទួលស្គាល់។ អនុវត្តការការពារ និងចាក់សោរឧបករណ៍ទូរស័ព្ទ ចៀសវាងការភ្ជាប់ឧបករណ៍អេឡិចត្រូនិចទៅនឹងកន្លែងសាកថ្ម ឬគ្រឿងអេឡិចត្រូនិចផ្សេងៗនៅទីសាធារណៈ និងប្រើខ្សែសាកមានតួនាទីសាកថ្មតែប៉ុណ្ណោះ។

ព្រឹត្តិការណ៍បាល់ទាត់បណ្ឌិត កែម ឡី ត្រូវបានរំសាយដោយសារម្ចាស់ទីតាំងបារម្ភអាជ្ញាធរសួរនាំ

អឹប ខេណែត (Oeb Khenet) — Mon, 08 Jul 2024 13:03:25 +0000

គណៈកម្មការរៀបចំព្រឹត្តិការណ៍បាល់ទាត់បណ្ឌិត កែម ឡី បានសម្រេចរំសាយព្រឹត្តិការណ៍បាល់ទាល់ដែលគ្រោងធ្វើឡើងនៅថ្ងៃទី៧ ខែកក្កដា បន្ទាប់ពីម្ចាស់ទីតាំងដែលបានជួលសុំបញ្ឈប់ដោយជូនដំណឹងថា ព្រឹត្តិការណ៍នេះមិនមានការអនុញ្ញាតពីអាជ្ញាធរ។

យោងតាមសេចក្តីជូនដំណឹងស្ដីពីការរំសាយព្រឹត្តិការណ៍ប្រកួតបាល់ទាត់បណ្ឌិតកែម ឡី លើកទី៣ ចេញកាលពីថ្ងៃទី៦ ខែកក្កដា ឆ្នាំ២០២៤ បញ្ជាក់ថា គណៈកម្មការរៀបចំសម្រេចរំសាយព្រឹត្តិការណ៍ប្រកួតបាល់ទាត់លើកទី៣ ក្រោមប្រធានបទ «កីឡាបង្ហាញពីការរួបរួម និងស្មារតី កែម ឡី» ដោយសារម្ចាស់ទីតាំងឈប់ជួលឱ្យ។

សេចក្តីជូនដំណឹងដដែលបញ្ជាក់ថា៖ «ទីតាំងដែលគណៈកម្មការរៀបចំបានកក់រួចនោះក៏បានជូនដំណឹងពីការបញ្ចប់នៃការជួលទីតាំងមកគណៈកម្មការរៀបចំវិញ ក្រោមហេតុផល គណៈកម្មការមិនមានលិខិតអនុញ្ញាតពីអាជ្ញាធរ»។

លោក ម៉ើ ចាន់ដារ៉ា តំណាងគណៈកម្មការរៀបចំប្រាប់ Newsroom Cambodia នៅថ្ងៃចន្ទនេះថា ព្រឹត្តិការណ៍ប្រកួតបាល់ទាត់នេះត្រូវបានរំសាយ ដោយសារម្ចាស់តារាងមិនព្រមជួលឲ្យ ព្រោះខ្លាចមានបញ្ហាជាមួយអាជ្ញាធរនៅពេលពួកលោកថ្លែងសារទាក់ទងនឹងការស្វែងរកយុត្តិធម៌ជូនបណ្ឌិត កែម ឡី។

លោកថ្លែងថា៖ «យើងមានការបញ្ជាក់ពីម្ចាស់តារាងមកវិញថា មិនអាចជួលតារាងឱ្យពួកយើងបានទេ ដោយសារតែគាត់ខ្លាច នៅពេលគាត់ជួលតារាងជួលអី ឱ្យយើងប្រកួត នៅពេលដែលយើងថ្លែងសារផ្សេងៗ ថ្លែងសុន្ទរកថានូវការទាមទារ សារផ្សេងៗទាក់ទងនឹងការស្វែងរកយុត្តិធម៌ជូនបណ្ឌិត កែម ឡី នឹងមានអាជ្ញាធរផ្សេងៗមកធ្វើការសួរនាំ»។

លោកបន្ថែមថា តាមច្បាប់ស្ដីពីការធ្វើបាតុកម្មដោយសន្តិវិធី ការជួបជុំនៅកន្លែងឯកជនបិទជិត មិនតម្រូវឱ្យមានការអនុញ្ញាតពីអាជ្ញាធរទេ។

លោកនិយាយថា៖ «ទូទៅយើងសង្កេតឃើញថាការធ្វើសកម្មភាពនៅកន្លែងឯកជនដែលមានការបិទជិត យើងមានជួលសេវាផ្សេងៗ យើងមិនតម្រូវឲ្យមានច្បាប់ ការអនុញ្ញាតពីអាជ្ញាធរពាក់ព័ន្ធណាមួយទេ។ ណាមួយសកម្មភាពរបស់យើងបើយើងគិតពីច្បាប់ស្ដីពីការធ្វើបាតុកម្មដោយសន្តិវិធី យើងមិនដល់ចំនួនមនុស្សដែលយើងត្រូវធ្វើការសុំច្បាប់នោះឡើយ ដោយសារតែយើងគ្រោងជួបជុំគ្នាតែ១២០នាក់»។

លោកបន្ថែមថា ការរៀបចំព្រឹត្តិការណ៍នេះឡើងក្នុងគោលបំណងដើម្បីរំឭកខួប៨ឆ្នាំនៃឃាតកម្មលើលោកបណ្ឌិត កែម ឡី និងបន្តវីរភាពបណ្ឌិត កែម ឡី ពង្រឹងសាមគ្គីភាពរវាងអង្គការសង្គមស៊ីវិល សារព័ត៌មាន សហគមន៍ សាធារណជន និងយុវជន និងលើកកម្ពស់ការយល់ដឹងអំពី អំពើនិទណ្ឌភាពទៅកាន់សាធារណជន។

លោកបញ្ជាក់ថា៖ «គោលបំណងនៃការប្រព្រឹត្តបាល់ទាត់នេះ ទីមួយយើងចង់រំឭកពីវីរភាពរបស់លោកបណ្ឌិត កែម ឡី ផ្សារភ្ជាប់ទៅនឹងការទាត់បាល់ ដោយសារឆ្នាំមុនយើងក៏បានធ្វើការទាត់បាល់រំឭកខួបលោកបណ្ឌិតផងដែរ។ ហើយទីពីរយើងចង់ផ្ញើសារទៅភាគីពាក់ព័ន្ធដើម្បីឱ្យពួកគាត់អាចបន្តការស្វែងរកយុត្តិធម៌ជូនបណ្ឌិត កែម ឡី […] ឱ្យយើងអស់ចិត្តបានថា ឃាតករត្រូវទទួលទោសពីការបាញ់សម្លាប់លោកបណ្ឌិតកែម ឡី អស់មួយជីវិតហ្នឹង ពិតជាឃាតករពិតដែលបានបាញ់សម្លាប់លោកមែន»។

គួរបញ្ជាក់ថា លោកបណ្ឌិតកែម ឡី ជាអ្នកស្រាវជ្រាវការអភិវឌ្ឍសង្គម និងជាអ្នកវិភាគនយោបាយឯករាជ្យនៅកម្ពុជា។ លោកត្រូវបានឃាតករបាញ់ចំនួនបីគ្រាប់បណ្តាលឱ្យស្លាប់នៅក្នុងស្តារម៉ាតរបស់ស្ថានីយចាក់សាំងកាល់តិច (Caltex) ស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦៕

ក្រសួងសុខាភិបាលណែនាំឱ្យប្រុងប្រយ័ត្នបន្ថែមក្រោយក្មេងប្រុសអាយុ៣ឆ្នាំម្នាក់ឆ្លងជំងឺផ្តាសាយបក្សី

ភួង សុធីនី (Phuong Sothiny) — Mon, 08 Jul 2024 05:02:08 +0000

ក្រសួងសុខាភិបាលប្រាប់ឱ្យពលរដ្ឋប្រុងប្រយ័ត្នបន្ទាប់ពីមានក្មេងប្រុសអាយុ៣ឆ្នាំម្នាក់បានឆ្លងជំងឺផ្តាសាយបក្សីប្រភេទហាស់៥អ៊ីន១ (H5N1) កាលពីថ្ងៃទី៥ ខែកក្កដា ឆ្នាំ២០២៤ នៅស្រុកគីវីវង្ស ខេត្តតាកែវ។

បើតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី៦ ខែកក្កដា ឆ្នាំ២០២៤នេះបញ្ជាក់ថា ក្មេងប្រុសអាយុ៣ឆ្នាំម្នាក់ រស់នៅក្នុងភូមិពោធិ៍ ឃុំប្រាសាទជាន់ជុំ ស្រុកគីរីវង្ស ខេត្តតាកែវ មានផ្ទុកវីរុសជំងឺផ្តាសាយបក្សី ប្រភេទហាស់៥អ៊ីន១ (H5N1) ដែលត្រូវបានបញ្ជាក់ដោយវិទ្យាស្ថានជាតិសុខភាពសាធារណៈ និងវិទ្យាស្ថានប៉ាស្ទ័រនៅថ្ងៃទី៥ ខែកក្កដា ឆ្នាំ២០២៤។

សេចក្តីប្រកាសព័ត៌មានដដែលបន្ថែមថា កេ្មងប្រុសនោះបានបរិភោគម្ហូបដែលធ្វើពីមាន់ទាងាប់ និងប៉ះពាល់មាន់ងាប់មុនពេលអ្នកជំងឺឈឺ១០ថ្ងៃ។

សេចក្តីប្រកាសព័ត៌មានបញ្ជាក់៖ «បច្ចុប្បន្នស្ថានភាពអ្នកជំងឺបានធូរស្រាល និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។ តាមការសាកសួរបង្ហាញថា ប្រហែល១០ថ្ងៃមុនចាប់ផ្តើមឈឺនៅភូមិមានមាន់ទាងាប់ ហើយនៅផ្ទះអ្នកជំងឺបានយកមកធ្វើម្ហូបបរិភោគ ក្មេងប្រុសបានប៉ះពាក់ និងកាន់មានងាប់»។

ក្រសួងសុខាភិបាលបានចាត់ក្រុមឆ្លើយតបបន្ទាន់គ្រប់ជាន់ថ្នាក់ដែលសហការណ៍ជាក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន និងអាជ្ញាធរគ្រប់ជាន់ថ្នាក់ដើម្បីស្រាវជ្រាវលើជំងឺផ្តាសាយបក្សី ឆ្លើយតបជាបន្ទាន់ ចែកជូនឱសថតាមីហ្លូ (Tamiflu) ដល់អ្នកប៉ះពាល់ជិតស្និទ្ធ និងយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតហេតុ។

ក្រសួងសុខាភិបាលក៏បានក្រើនរំឮកដល់ប្រជាពលរដ្ឋទាំងអស់ឱ្យយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច និងអំពាវនាវដល់ដល់ប្រជាជនឱ្យពិគ្រោះយោបល់ និងពិនិត្យជាមួយក្រុមគ្រូពេទ្យដែលនៅជិតបំផុត។

ជំងឺផ្តាសាយបក្សីជាជំងឺដែលមានឆ្លងពីសត្វបក្សីឈឺទៅសត្វផ្សេងទៀត ប៉ុន្តែវាមានការឆ្លងពីបក្សីទៅមនុស្សផងដែរ តាមរយៈការប៉ះពាល់ជាមួយបក្សីងាប់ ឬឈឺ។ ផ្តាសាយបក្សីកើតលើមនុស្សជាជំងឺធ្ងន់ធ្ងរដែលត្រូវមានការព្យាបាលទាន់ពេលវេលា។ ការឆ្លងជំងឺផ្តាសាយបក្សីពីមនុស្សម្នាក់ទៅម្នាក់ជាករណីកម្រ ប៉ុន្តែបើមានអាចជាករណីបំប្លែងខ្លួន និងឆ្លងដូចជំងឺផ្តាសាយតាមរដូវកាល។

គួរបញ្ជាក់ថាបើករណីឆ្លងចុងក្រោយក្នុងខែ កក្កដាឆ្នាំ២០២៤ មានករណីឆ្លងជំងឺផ្តាសាយបក្សីចំនួន៦១ករណីដែលក្នុងនោះស្លាប់៤០នាក់ បើគិតចាប់ពីឆ្នាំ២០០៥ ដែលរាយការណ៍ករណីឆ្លងជំងឺផ្តាសាយបក្សីដំបូងនៅប្រទសកម្ពុជា៕

ក្រសួងសុខាភិបាលរំឮកពលរដ្ឋពីការបរិភោគត្រីក្រពតដែលអាចប៉ះពាល់ដល់ជីវិត

ចិត្ត ស្រីយ៉ា (Chet Sreyya) — Mon, 08 Jul 2024 04:50:33 +0000

ក្រសួងសុខាភិបាលក្រើនរំឮកប្រជាពលរដ្ឋពីការពុលដោយបរិភោគត្រីក្រពត ក្រោយកើតមានករណីមនុស្ស៧នាក់ពុលត្រីក្រពតកាលពីពេលថ្មីៗនេះនៅខេត្តកំពង់ឆ្នាំង។

បើតាមសេចក្ដីប្រកាសព័ត៌មានរបស់ក្រសួងសុខាភិបាល កាលពីថ្ងៃទី៦ ខែកក្កដា ឆ្នាំ២០២៤បញ្ជាក់ថា ក្រោយបរិភោគត្រីក្រពត មនុស្សចំនួន៧នាក់មានអាការៈធ្ងន់ធ្ងរ ដែលត្រូវបញ្ជូនទៅសង្រ្គោះបន្ទាន់នៅមន្ទីរពេទ្យ។ បើតាមក្រសួង បច្ចុប្បន្នអ្នកជំងឺទាំង៧នាក់មានសភាពធូរស្រាល។

ក្រសួងសុខាភិបាលបញ្ជាក់ក្នុងសេចក្តីប្រកាសព័ត៌មាននោះថា៖ «សូមបងប្អូនប្រជាពលរដ្ឋ កុំបរិភោគត្រីក្រពតដែលមានជាតិពុល ពីព្រោះជាតិពុលនៅក្នុងខ្លួនត្រីអាចបណ្ដាលឱ្យមានជំងឺធ្ងន់ធ្ងរ ឬស្លាប់។ ជាតិពុលនៅក្នុងខ្លួនត្រីក្រពតមិនអាចកំចាត់ចោលបានទេ ទោះបីជាបានចំអិន ឬដាក់ឱ្យកកក៏ដោយ»។

ក្រសួងសុខាភិបាលបន្ថែមថា រោគសញ្ញាពុលដែលកើតឡើងក្រោយបរិភោគត្រីក្រពត៥ប្រភេទនេះមានដូចជា ក្នុងរយៈពេលពី២០នាទី ទៅ២ម៉ោង មានរមាស់ចាក់ៗនៅបបូរមាត់ ឈឺក្បាល វិលមុខ រមាស់ចាក់ៗក្នុងអវៈយវៈ ពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្លឹកចុងដៃចុងជើង ក្អួត រាក ល្ហិតល្ហៃ រឹងថ្គាម ឬអាចបណ្ដាលឱ្យស្លាប់។

ក្រសួងសុខាភិបាលបានឱ្យដឹងថា វិធីសង្រ្គោះភ្លាមក្រោយពីពុល អាចធ្វើបានតាមរយៈធ្វើឱ្យក្អួត (ប្រសិនបើអាចធ្វើទៅបាន) ដែលអាចជួយបញ្ចេញជាតិពុលពីក្នុងខ្លួនបានមួយចំណែក ហើយអ្នកពុលនោះត្រូវប្រញាប់ស្វែងរក ការជួយសង្រ្គោះបន្ទាន់នៅតាមមូលដ្ឋានសុខាភិបាលដែលនៅជិតបំផុត៕

សាលារាជធានីត្រៀមរថយន្តក្រុងជាង៤០០គ្រឿងដឹកពលរដ្ឋទៅស្រុកកំណើតក្នុងថ្ងៃចូលឆ្នាំ

ប៉ោក លក្ខិណា (Pouk Leakhena) — Thu, 04 Apr 2024 01:21:19 +0000

រដ្ឋបាលរាជធានីភ្នំពេញត្រៀមរថយន្តក្រុងសាធារណៈចំនួន៤៥៥គ្រឿងដើម្បីដឹកប្រជាពលរដ្ឋទៅស្រុកកំណើតក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ដោយមិនគិតកម្រៃ។

សេចក្តីជូនដំណឹងដោយរដ្ឋបាលរាជធានីភ្នំពេញនៅថ្ងៃទី៤ ខែមេសា ឆ្នាំ២០២៤ បញ្ជាក់ថា រដ្ឋបាលរាជធានីនឹងរៀបចំរថយន្តក្រុង ៤៥៥គ្រឿងសម្រាប់ផ្តល់សេវាដឹកជញ្ជូនសាធារណៈដោយមិនតម្រូវឱ្យបង់ប្រាក់រយៈពេល ៦ថ្ងៃ ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ ដើម្បី សម្រួលដល់ការចំណាយរបស់ប្រជាពលរដ្ឋក្នុងការធ្វើដំណើរទៅលេងស្រុកកំណើតក្នុងពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខ។

រដ្ឋបាលរាជធានីភ្នំពេញបន្ថែមថា៖ «សម្រាប់សេវាដឹកជញ្ជូនប្រជាពលរដ្ឋនៅក្នុងរាជធានីភ្នំពេញ ប្រើប្រាស់រថយន្តក្រុងចំនួន ៦០គ្រឿង។ សម្រាប់សេវាដឹកជញ្ជូនប្រជាពលរដ្ឋ ដែលនឹងធ្វើដំណើរពីរាជធានីភ្នំពេញទៅតាមបណ្តាខេត្ត និងពីបណ្តាខេត្តត្រឡប់មករាជធានីភ្នំពេញវិញប្រើប្រាស់រថយន្តក្រុង ៣៩៥គ្រឿង»។

ពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំនេះ មានរយៈពេល៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤៕

ក្រសួងធម្មការហាមមិនឱ្យលេងល្បែងងាយបង្កគ្រោះថ្នាក់នៅគ្រប់វត្តអារាមក្នុងពិធីបុណ្យចូលឆ្នាំខ្មែរ

សេង សុខហ៊ុន (SENG SOKHUN) — Fri, 22 Mar 2024 06:24:05 +0000

ក្រសួងធម្មការ និងសាសនាណែនាំគ្រប់វត្តអារាមទាំងអស់មិនឱ្យលេងល្បែងស៊ីសង និងល្បែងផ្សេងៗដែលងាយបង្កគ្រោះថ្នាក់ក្នុងអំឡុងពេលចូលឆ្នាំថ្មីប្រពៃណីជាតិខ្មែរ។

ក្នុងសេចក្ដីណែនាំរបស់ក្រសួងធម្មការស្ដីពីការរៀបចំពិធីបុណ្យចូលឆ្នាំថ្មីប្រពៃណីជាតិ ចេញនៅថ្ងៃទី២០ ខែមីនា ឆ្នាំ២០២៤ បញ្ជាក់ថា ក្នុងអំឡុងពិធីបុណ្យចូលឆ្នាំថ្មីខ្មែរខាងមុខនេះ នៅតាមបណ្ដាវត្តអារាមទាំងអស់មិនត្រូវលេងល្បែងណាដែលបង្កឱ្យមានគ្រោះថ្នាក់ គឺត្រូវងាកមកលេងល្បែងប្រជាប្រិយខ្មែរ។

ក្រសួងបន្ថែមថា៖ «គ្រប់វត្តអារាមមិនត្រូវឱ្យមានការលេងល្បែងដែលអាចបង្កឱ្យមានគ្រោះថ្នាក់ដូចជា បាញ់ទឹក ជះទឹក ប៉ាតម្សៅ ល្បែងស៊ីសង និងគ្រឿងផ្ទុះជាដើម»។

ក្រសួងបញ្ជាក់ទៀតថា៖ «គ្រប់វត្តអារាមរៀបចំលេងល្បែងប្រជាប្រិយនានាដូចជា ចោលឈូង បោះអង្គញ់ ទាញព្រ័ត្រ លាក់កន្សែង ដណ្ដើមស្លឹកឈើ […] និងរបាំប្រជាប្រិយខែ្មរដូចជា រាំវង់ រាំក្បាច់ សារ៉ាវ៉ាន់ ឡាំលាវ ឆៃយ៉ាំ ត្រុដិជាដើម ហើយរាល់ការលេងល្បែង និងរបាំប្រជាប្រិយឱ្យត្រឹមត្រូវតាមក្បួនខ្នាតលក្ខណៈប្រពៃណីជាតិខ្មែរ និងប្រកបដោយសុវត្ថិភាព»។

ក្រសួងបន្ថែមថា គ្រប់វត្តអារាមមានការសហការរៀបចំតុបតែងសម្អាត និងប្រារព្ធពិធីបុណ្យតាមប្រពៃណីជាតិខ្មែរ និងត្រូវដាក់តាំងព្រះឆាយាលក្ខណ៍ សម្ដេចព្រះមហាសង្ឃរាជ ទេព វង្ស ផងដែរ។

ញូសន៍រូមខេមបូឌា (Newsroom Cambodia) មិនអាចទាក់ទងសុំការបន្ថែមពីលោក សេង សុមុនី អ្នកនាំពាក្យក្រសួងធម្មការ និងសាសនាបានទេ។

គួរបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរនៅឆ្នាំនេះ នឹងប្រារព្ធឡើងរយៈបេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤៕

ក្រសួងសាធារណការហាមការបំពាក់ស៊ីផ្លេ និងភ្លើងយានយន្តខុសបច្ចេកទេស

ណឺ មិនា (Neu Minea) — Thu, 21 Mar 2024 02:40:27 +0000

ក្រសួងសាធារណការ និងដឹកជញ្ជូន ហាមឃាត់ការបំពាក់ស៊ីផ្លេ និងភ្លើងបំភ្លឺ ឬភ្លើងលម្អផ្សេងៗក្រៅពីការកំណត់លក្ខណៈបច្ចេកទេសរបស់យានយន្ត។

ក្នុងសេចក្តីជូនដំណឹងរបស់ក្រសួងសាធារណការ និងដឹកជញ្ជូន ចេញនៅថ្ងៃទី១៩ ខែមីនា ឆ្នាំ២០២៤ បានយោងមាត្រា២៨ និង៣០ នៃច្បាប់ស្តីពីចរាចរណ៍ផ្លូវគោក ដោយបញ្ជាក់ថា ការប្រើប្រាស់ស៊ីផ្លេគឺក្នុងគោលបំណងទប់ស្កាត់អនាធិបតេយ្យដែលប៉ះពាល់ដល់សណ្តាប់ធ្នាប់សង្គម និងបង្កឱ្យមានគ្រោះថ្នាក់ជាយថាហេតុ។

សេចក្តីជូនដំណឹងដដែលបន្ថែមថា៖ «យានយន្តគ្រប់ប្រភេទប្រើប្រាស់ស៊ីផ្លេតែនៅពេលថ្ងៃដើម្បីឱ្យដំណឹងដល់អ្នកប្រើប្រាស់ដទៃទៀត និងជៀសវាងគ្រោះថ្នាក់ជាយថាហេតុ។ នៅពេលយប់ត្រូវជំនួសដោយការស៊ីផ្លេមកហ្វាកូតឆ្លាស់គ្នា សម្រាប់ឱ្យដំណឹងដើម្បីចៀសវាងគ្រោះថ្នាក់ និងសុំជែង។ ត្រូវប្រើរយៈពេលខ្លីក្នុងការស៊ីផ្លេគឺមិនយូរជាងការចាំបាច់ឡើយលើកលែងតែមានការប្រកាសអាសន្ន ហើយសំឡេងស៊ីផ្លេត្រូវកំណត់ពី៩០dB(A) ទៅ១០៥dB(A)។ ចំណែកស៊ីផ្លេខ្យល់ ត្រូវបានហាមឃាត់ដូចជានៅទីក្រុង ទីប្រជុំជន និងមន្ទីពេទ្យ«។

ក្រសួងសាធារណការបន្ថែមថា ការបំពាក់សញ្ញាសូរសព្ទ [សំឡេងរំខាន] ភ្លើងបំភ្លឺ ឬភ្លើងលម្អផ្សេងៗក្រៅពីការកំណត់របស់យានយន្តត្រូវបានហាមឃាត់»។

សេចក្តីជូនដំណឹងរបស់ក្រសួងសាធារណការធ្វើឡើងបន្ទាប់ពីលោកនាយករដ្ឋមន្រ្តី ហ៊ុន ម៉ាណែត បញ្ជាឱ្យត្រួតពិនិត្យពីលក្ខណៈបច្ចេកទេសស៊ីផ្លេរថយន្ត ដើម្បីទប់ស្កាត់ភាពអនាធិបតេយ្យតាមដងផ្លូវ និងហានិភ័យសម្រាប់ការធ្វើដំណើរ ក្រោយផ្ទុះសកម្មភាពយុវជន និងកុមាររាំលេងតាមដងផ្លូវទៅតាមចង្វាក់ស៊ីផ្លែបែបភ្លេងរបស់រថយន្តធំៗ៕

អាជ្ញាធរជាតិព្រះវិហារផ្អាកការឡើងប្រាសាទប្រាង្គរយៈពេល១៧ថ្ងៃដើម្បីជួសជុល

ហុង សេងលី (Hong Sengly) — Thu, 21 Mar 2024 02:19:22 +0000

អាជ្ញាធរជាតិព្រះវិហារ ប្រកាសផ្អាកការឡើងទស្សនាប្រាសាទប្រាង្គ ឬប្រាសាទធំក្នុងតំបន់កោះកេរ សម្រាប់ភ្ញៀវទេសចរណ៍ជាតិ និងអន្តរជាតិ ដើម្បីជួសជុលជណ្តើរឈើចាស់ទ្រុឌទ្រោមរយៈពេល១៧ថ្ងៃ។

យោងតាមសេចក្តីជូនដំណឹងសី្តពី «ការផ្អាកជាបណ្តោះអាសន្នការឡើងទស្សនាប្រាសាទប្រាង្គនៅក្នុងរមណីយដ្ឋានប្រាសាទកោះកេរ» ចេញផ្សាយនៅថ្ងៃទី២០ ខែមីនា ឆ្នាំ២០២៤នេះ បញ្ជាក់ថា អាជ្ញាធរជាតិព្រះវិហារកំពុងជួសជុលជណ្តើរឈើឡើងលើប្រាសាទប្រាង្គ ឬប្រាសាទធំ ដែលមានសភាពចាស់ទ្រុឌទ្រោមដើម្បីសុវត្ថិភាពភ្ញៀវទេសចរមកទស្សនាលើប្រាសាទ។

សេចក្តីជូនដំណឹងដដែលបន្ថែមថា អាជ្ញាធរជាតិព្រះវិហារ នឹងផ្អាកជាបណ្តោះអាសន្នការឡើងទស្សនាប្រាសាទប្រាង្គ ចាប់ពីថ្នាក់ទី៥ ដល់ថ្នាក់ទី៧ ចាប់ពីថ្ងៃទី ២០ មីនា ដល់ថ្ងៃទី៥ ខែមេសា ឆ្នាំ២០២៤ ខាងមុននេះ។

អាជ្ញាធរជាតិព្រះវិហារបញ្ជាក់ក្នុងសេចក្តីជូនដំណឹងនោះថា៖ «ក្រុមការងារបានជួសជុលជជណ្តើរថ្នាក់ទី១ ដល់ថ្នាក់ទី៤ រួចរាល់ ដោយឡែកចាប់ពីថ្នាក់ទី៥ ដល់ថ្នាក់ទី៧ ដោយទីតាំងមិនអំណោយផលសម្រាប់ការរៀបចំជណ្តើរចល័តសម្រួលដល់ការទស្សនាជូនភ្ញៀវ»។

ប្រាសាទប្រាង្គ មានរាងជាពីរ៉ាមីត៧ជាន់ កម្ពស់៣៥ម៉ែត្រស្ថិតក្នុងខេត្តព្រះវិហារ។ ប្រាសាទនេះបានចូលជាបេតិកភណ្ឌវប្បធម៌ពិភពលោក កាលពីថ្ងៃទី១៧ ខែកញ្ញា ឆ្នាំ២០២៣៕

Brief – Newsroom Cambodia

​ក្មេង​ស្រី​អាយុ​​១៦​ឆ្នាំម្នាក់ទៀត​​​​នៅ​ខេត្តស្វាយរៀង​ឆ្លង​​ជំងឺ​ផ្ដា​សាយ​បក្សី​

ក្រ​សួង​សុខាភិបាល​​​រំឭក​ជាថ្មី​​ដល់​ប្រជាពលរដ្ឋ​​ប្រុង​ប្រយ័ត្ន​​​វីរុស​ផ្ដាសាយបក្សី​ H5N1​

ក្រសួងព័ត៌មាន​​តម្រូវ​ឱ្យ​ការ​ផ្សាយ​ពាណិជ្ជកម្ម​​​គ្រឿង​ស្រវឹង​​សុំ​​ការ​អនុញ្ញាត​ពី​ក្រសួង​

ក្រសួងសុខាភិបាលហាមឃាត់ការចែកចាយឧបករណ៍បរិក្ខាពេទ្យឈ្មោះ Neoplast-S

អាជ្ញាធរកំចាត់មីន​ណែនាំ​ឱ្យ​ប្រយ័ត្ន​​ចំពោះ​​សំណល់ជាតិផ្ទុះ​អំឡុង​ពេល​ និង​ក្រោយ​ទឹក​ជំនន់​​

ពលរដ្ឋ​​នៅ​​ខេត្តរតនគិរី​១៧​នាក់​​ពុលផ្សិត​​​

ក្រសួង​សុខាភិបាល​​​ហាម​ឃាត់​ការ​​​ទទួល​ទាន​ស្រា​ថ្នាំ​៣​ប្រភេទ​​​​​ផ្ទុក​សារធាតុ​ SILDENAFIL​

សង្គមស៊ីវិល និងយុវជនគ្រោង​រំឮកវិញ្ញាណក្ខន្ធ​​បណ្ឌិតកែម ឡី​ នៅ​ស្តុបបូកគោ​

ក្មេង​ស្រី​អាយុ​៥​ឆ្នាំ​ម្នាក់​ឆ្លង​​ជំងឺ​ផ្តាសាយ​បក្សី​ H5N1 ពីប្អូន​ប្រុស​អាយុ​៣ឆ្នាំ

បុរស​២​នាក់​រស់នៅ​ខេត្តកំពង់ឆ្នាំង និង​ឧត្តរមានជ័យ​ស្លាប់​ដោយសារ​​​​បរិភោគ​ត្រីក្រពត

​ព្រឹត្តិការណ៍បាល់ទាត់បណ្ឌិត កែម ឡី ​ត្រូវបានរំសាយ​ដោយសារម្ចាស់​​ទីតាំង​​បារម្ភ​អាជ្ញាធរសួរនាំ

ក្រសួង​សុខាភិបាល​ណែនាំឱ្យប្រុងប្រយ័ត្នបន្ថែម​ក្រោយ​ក្មេងប្រុសអាយុ៣ឆ្នាំម្នាក់ឆ្លងជំងឺផ្តាសាយបក្សី

ក្រសួងសុខាភិបាល​រំឮកពលរដ្ឋ​ពីការបរិភោគត្រីក្រពត​ដែលអាចប៉ះពាល់​ដល់ជីវិត​

សាលារាជធានីត្រៀមរថយន្តក្រុងជាង​៤០០​គ្រឿង​ដឹក​ពលរដ្ឋទៅស្រុកកំណើត​ក្នុង​ថ្ងៃ​ចូល​ឆ្នាំ​

ក្រសួង​សាធារណការហាមការបំពាក់​ស៊ីផ្លេ និងភ្លើង​យានយន្ត​ខុស​បច្ចេកទេស​

អាជ្ញាធរ​ជាតិព្រះវិហារផ្អាកការឡើង​ប្រាសាទ​ប្រាង្គរយៈពេល​១៧ថ្ងៃ​ដើម្បីជួសជុល​