ប្រជាកសិករមួយចំនួនរស់នៅស្រុកតាំងគោក ខេត្តកំពង់ធំ ត្អូញត្អែរពីទិន្នផលស្រូវធ្ងន់ឬស្រូវវស្សា ធ្លាក់ចុះជាងឆ្នាំមុន ដោយសារគ្រោះរាំងស្ងួតនៅឆ្នាំនេះបានអូសបន្លាយរយៈពេលយូរ។
កំពុងឱនច្រូតស្រូវយ៉ាងញាប់ដៃញាប់ជើង ដើម្បីប្រមូលផលស្រូវសម្រាប់បម្រុងទុកជាស្បៀងនិងសម្រាប់លក់ អ្នកស្រី ចិន ផល្លី អាយុ៥៣ឆ្នាំ ជាកសិករនៅភូមិទួលពភ្លា ឃុំស្រឡៅ ស្រុកតាំងគោក ឱ្យដឹងថា ឆ្នាំនេះ គាត់បានដាំដុះស្រូវវស្សា លើផ្ទៃដីចំនួន៤ហិកតា ដោយទទួលបានទិន្នផលស្រូវចំនួន២តោនកន្លះក្នុងមួយហិកតា។
