អ្នកនាំពាក្យក្រសួងសុខាភិបាល អំពាវនាវដល់សាធារណជនឱ្យប្រុងប្រយ័ត្ន ជំងឺកូវីដ១៩ ពិសេសវីរុសបម្លែងប្រភេទថ្មីដែលតា និងអាល់ហ្វា ដោយភ្ជាប់នឹងការព្រមានថា កម្ពុជាកំពុងប្រឈមទៅនឹងការដើរហួសបន្ទាត់ក្រហមបើនៅតែមិន មានការទទួលខុសត្រូវរៀងៗខ្លួនក្នុងការការពារទេនោះ។
យោងតាមសារដែលលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ផ្ញើទៅកាន់ក្រុមអ្នកសារព័ត៌មានក្នុងបណ្តាញសង្គមតេឡេក្រាម កាលពីថ្ងៃទី១៧ ខែកក្កដានេះ លោកស្រី ឱ វណ្ណឌីន បានអំពាវនាវដល់បុគ្គល គ្រួសារ យកចិត្តទុកដាក់ការពារខ្លួនជាមួយជំងឺកូវីដ១៩ ជៀសវាងការដើរហួសបន្ទាត់ក្រហមដែលអាចបង្កជាសោកនាដកម្មដោយសារជំងឺកូវីដ១៩។
លោកស្រីបញ្ជាក់ថា៖ « សុំឱ្យបងប្អូនយើងងាកមករកការការពាររៀងៗខ្លួនឱ្យបានហ្មត់ចត់ឡើងវិញ កុំបន្ធូរបន្ថយឱ្យសោះបើយើងមិនចង់ឃើញសោកនាដកម្មសុខភាពសាធារណ: ដែលវាអាចនឹងទៅហួសបន្ទាត់ក្រហមនោះទេ»។
តាមរយៈសារអំពាវនាវដដែលលោកស្រីលើកឡើងពីវីរុសបម្លែងថ្មីប្រភេទដែលតា និងពិសេសប្រភេទអាល់ហ្វា ថាកំពុងមានការរាតត្បាតយ៉ាងខ្លាំងស្ទើគ្រប់ខេត្តក្រុង។
លោកស្រីលើកឡើងថា៖ «អ្វីដែលសំខាន់នាពេលនេះទោះជាដែលតា ឬអាល់ហ្វា យើងត្រូវតែរួមគ្នាការពារព្រោះបច្ចុប្បន្ននេះអាល់ហ្វាក៏កំពុងតែចរាចរខ្លាំងក្លាទៅសឹងគ្រប់ខេត្ត-ក្រុងទៅហើយ រីឯអ្នកស្លាប់ក៏មានជារៀងរាល់ថ្ងៃ»។
គិតត្រឹមថ្ងៃចន្ទ ទី១៩ ខែកក្កដានេះ កម្ពុជាមានអ្នកឆ្លងជមងឺ កូវីដ១៩សរុបចំនួន៦៧,៩៧១ អ្នកនិងមានអ្នកស្លាប់សរុបចំនួន១១២៨នាក់៕
