ក្រសួងអប់រំ – Newsroom Cambodia

មន្ត្រីបក្សភ្លើងទៀនម្នាក់ ការពារភាពស្អាតស្អំ ក្រោយក្រសួងអប់រំដកឈ្មោះចេញពីក្របខ័ណ្ឌ

ហាន ណូយ (Han Noy) — Mon, 12 Jun 2023 07:54:09 +0000

ប្រធានក្រុមការងារគណបក្សភ្លើងទៀនម្នាក់នៅខេត្តបន្ទាយមានជ័យ លោក ស៊ិន វុត្ថា បានច្រានចោលចំពោះការដែលក្រសួងអប់រំ យុវជន និងកីឡា លុបឈ្មោះលោកចេញក្របខណ្ឌគ្រូបង្រៀន ក្រោមហេតុផលថាលោកធ្វើខុសវិជ្ជាជីវៈជាមន្ត្រីរាជការ។

ការលើកឡើងរបស់ប្រធានគណបក្សប្រឆាំងនៅខេត្តបន្ទាយមានជ័យរូបនេះ ធ្វើឡើងក្រោយក្រសួងអប់រំ បានលុបឈ្មោះលោកចេញពីក្របខណ្ឌក្រសួងអប់រំ ក្រោមហេតុផលថា ប្រព្រឹត្តខុសនឹងវិជ្ជាជីវៈមន្ត្រីរាជការ កាលពីថ្ងៃទី០៨ ខែមិថុនា ឆ្នាំ២០២៣ ។

លោក ស៊ិន វុត្ថា បានឱ្យដឹងថា រូបលោក ជាគ្រូបង្រៀនកម្រិតឧត្តមនៅវិទ្យាល័យសិរីសោភ័ណ ខេត្តបន្ទាយមានជ័យ តាំងពីឆ្នាំ២០០៧មកម្ល៉េះ ហើយនៅក្នុងឆ្នាំ២០២១ លោកក៏បានចូលប្រឡូកក្នុងវិស័យនយោបាយជាមួយគណបក្សភ្លើងទៀន។ លោកបន្តថា ក្នុងពេលថ្មីៗនេះ ខាងមន្ត្រីអប់រំខេត្ត បានហៅរូបលោកទៅជជែក និងបញ្ចុះបញ្ចូលលោកឱ្យចូលរួមជីវភាពនយោបាយជាមួយគណបក្សកាន់អំណាច ប៉ុន្តែលោកបានបដិសេធ ហើយក្រោយមកក៏ស្រាប់តែក្រសួងអប់រំ ចេញលិខិតលុបឈ្មោះលោកចេញពីក្របខ័ណ្ឌរដ្ឋនេះតែម្តង។

លោកថា៖ «ជារឿងអយុត្តិធម៌សម្រាប់ខ្ញុំដែលមានការរើសអើង បើសិនជាវាពាក់ព័ន្ធជាមួយរឿងនយោបាយ ហើយខ្ញុំខ្លួនឯងបានចូលរួមនយោបាយតាមបែបស្របច្បាប់ តាមបែបលទ្ធិប្រជាធិបតេយ្យដើម្បីទាញកម្ពុជាឱ្យដើរផ្លូវកាន់តែល្អប្រសើររីកចម្រើន»។

ប្រធានក្រុមការងារគណបក្សភ្លើងទៀនខេត្តបន្ទាយមានជ័យ លោក ស៊ិន វុត្ថា បានឱ្យដឹងទៀតថា ក្រោយការលុបឈ្មោះនេះ រូបលោកនឹងដាក់លិខិតទៅមន្ទីរអប់រំខេត្តបន្ទាយមានជ័យ ដើម្បីសុំការបញ្ជាក់ពីមូលហេតុឱ្យបានច្បាស់លាស់។

អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា និងប្រធានមន្ទីរអប់រំ យុវជន និងកីឡាខេត្តបន្ទាយមានជ័យ លោក ឈូ ប៊ុនរឿង បានបដិសេធអត្ថាធិប្បាយបន្ថែមជុំវិញករណីនេះ ដោយស្នើឱ្យមើលទៅតាមសេចក្តីប្រកាសរបស់ក្រសួងវិញ។

នាយកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ថ្លែងថា ប្រសិនបើក្រសួងលុបឈ្មោះមន្ត្រីរាជការចេញពីក្របខណ្ឌ ដោយមិនបានបញ្ជាក់ពីមូលហេតុ និងមិនបានបញ្ជាក់ពីកំហុសឆ្គង តាមលក្ខន្តិកៈស្តីពីមន្ត្រីរាជការច្បាស់លាស់ទេ នោះអាចនឹងប៉ះពាល់ដល់សិទ្ធិរបស់ប្រជាពលរដ្ឋ។

លោកថា៖ «ខ្ញុំមានការសោកស្តាយដែរ ពីព្រោះបើសិនជាការបញ្ចប់ក្របខណ្ឌមន្ត្រីរាជការ ដោយសារតែពួកគាត់ចូលរួមជីវភាពនយោបាយ ជាពិសេសអ្នកដែលចូលរួមជីវភាពនយោបាយជាមួយគណបក្សប្រឆាំង ហើយត្រូវបានលុបឈ្មោះចេញពីក្របខណ្ឌមន្ត្រីរាជការ ដោយមិនមានមូលហេតុច្បាស់លាស់ ហើយមិនមានកំហុសឆ្គងតាមលក្ខន្តិកៈស្តីពីមន្ត្រីរាជការទេ អាហ្នឹងវាជាការប៉ះពាល់សម្រាប់ការអនុវត្តសិទ្ធិរបស់ពលរដ្ឋ ពីព្រោះពលរដ្ឋនីមួយៗ មានសិទ្ធិនៅក្នុងការចូលរួមជីវភាពនយោបាយនៃគណបក្សនយោបាយណាមួយ»។

បើតាមអ្នកនាំពាក្យគណបក្សភ្លើងទៀន លោក គឹមសួរ ភិរិទ្ធ មន្ត្រីរាជការដែលជាសមាជិកគណបក្សប្រឆាំងមួយនេះ ត្រូវបានបណ្តេញចេញពីមុខតំណែងពីក្របខណ្ឌរដ្ឋ ជាបន្តបន្ទាប់ មកទល់ពេលនេះ ប៉ុន្តែលោកពុំទាន់បានដឹងពីចំនួនជាក់លាក់នៅឡើយទេ៕

ព្រះសង្ឃ និងយុវជន រៃអង្គាសថវិកាដើម្បីជួយសាលារៀននៅតំបន់ដាច់ស្រយាលក្នុងខេត្តកំពង់ធំ

លោក ឃាង សុខមាន (Kheang Sokmean) — Mon, 13 Mar 2023 09:49:00 +0000

ព្រះសង្ឃ និងយុវជនមួយចំនួន បានរៃអង្គាសថវិកា និងសម្ភារសិក្សា ដើម្បីជួយដល់សិស្សានុសិស្សនៅសាលារៀនបឋមសិក្សាព្រៃដុំ នៅក្នុងស្រុកបារាយណ៍ ខេត្ដកំពង់ធំ ដែលកំពុងជួបការលំបាក និងខ្វះខាតខ្លាំង។

ព្រះតេជគុណ សន វ៉ាឃីម ព្រះជន្ម៣១ឆ្នាំ គង់នៅវត្ដមហាមន្រ្ដី រាជធានីភ្នំពេញ មានសង្ឃដីកាថា មូលហេតុដែលព្រះអង្គរៃអង្គាសថវិកា និងសម្ភារសិក្សា ទៅជួយសាលាបឋមសិក្សាព្រៃដុំ ដោយសារតែព្រះអង្គបានមើលឃើញពីទុក្ខលំបាករបស់សិស្ស ដូចជា គ្មានសម្ភារសិក្សាគ្រប់គ្រាន់ ខណៈសាលារៀននេះមិនមានរបងផងដែរ។

ព្រះតេជគុណបន្តថា ព្រះអង្គក៏ធ្លាប់ជាសិស្សរៀននៅសាលាបឋមសិក្សានោះ និងធ្លាប់ឆ្លងកាត់ភាពលំបាកជាច្រើនក្នុងអំឡុងពេលសិក្សា ដូចជា ត្រូវដើរកាត់វាលស្រែ និងគ្មានសម្ភារប្រើប្រាស់សម្រាប់ការសិក្សា ជាដើម ទើបព្រះអង្គមានគំនិតរៃអង្គាសមូលនិធិនេះឡើង ដើម្បីជាការជួយដល់សិស្សានុសិស្សនៅសាលានោះបានរៀនសូត្រ។ ក្រៅពីនោះ ព្រះអង្គក៏ចង់ផ្សារភ្ជាប់តម្លៃព្រះពុទ្ធសាសនាជាមួយនឹងសង្គម ជាពិសេសមេរៀនអប់រំរបស់ព្រះពុទ្ធសាសនាទៅដល់សិស្សានុសិស្សនៅសាលានោះផងដែរ។

ព្រះតេជគុណបន្តថា៖ «ដោយសារខ្លួនឯងជាសិស្សក្រីក្រលំបាកមួយរូប ជួបប្រទះនឹងការខ្វះខាត ដើរទៅរៀនផ្លូវឆ្ងាយ ដល់ពេលបានបួសរៀនសូត្រទៅ ក៏នឹកឃើញបុព្វហេតុថាការលំបាកក្នុងការរៀនសូត្រមិនស្រួលទេ។ ដើម្បីបន្ធូរដល់ការរៀនសូត្ររបស់សិស្សានុសិស្ស មានតែការជួយចែកសៀវភៅ ក៏ដូចជាការចុះអប់រំ។ ការចុះចែកនេះ ក៏អាត្មាផ្សារភ្ជាប់នឹងការណែនាំពីបញ្ហាសុខភាព អនាម័យ និងការចេះថែរក្សាបរិស្ថានផងដែរ»។

ព្រះតេជគុណ សន វ៉ាឃីម មានសង្ឃដីកាបន្តទៀតថា ការចុះចែកសម្ភារសិក្សានេះមិនមែនទើបតែនឹកឃើញភ្លាមចុះធ្វើភ្លាមនោះទេ គឺព្រះអង្គបានគ្រោងទុកជាយូរឆ្នាំមកហើយ ក្នុងគោលបំណងទៅជួយដល់សិស្សនៅស្រុកកំណើត ស្របពេលសាលារៀនមួយនេះកំពុងខ្វះខាតច្រើន ទើបព្រះអង្គប្រមូលគ្នាដែលជាអតីតសិស្សផង និងអ្នកដែលធ្លាប់រស់នៅតំបន់ដាច់ស្រយាលមួយនេះហើយមានជីវភាពធូរធារផង ដើម្បីជួយដល់សាលាបឋមសិក្សាព្រៃដុំនេះ។

ព្រះតេជគុណបន្ដថា៖ «តំបន់អស់ហ្នឹងមិនសូវជាធូរធារប៉ុន្មានទេ អ៊ីចឹងយើងជួយឧបត្ថម្ភជីវិត ដូចជា ការរៀនសូត្ររបស់ហ្នឹងឯងឱ្យប្រសើរឡើង និងលក្ខណៈលើកទឹកចិត្ដដល់កូនក្មួយដែលគាត់ខំប្រឹងរៀនឱ្យកាន់តែប្រឹងបន្ដទៀត។ អាត្មាចង់បំបាត់ទ្រឹស្ដីដែលអ្នកស្រុកអ្នកភូមិគាត់តែងតែគិតអវិជ្ជមានថា “រៀនបានអីហូប រៀនមិនបានអីស៊ីទេ” បានជាអាត្មាចង់ពន្យល់អាណាព្យាបាលអំពីអត្ថប្រយោជន៍ក្នុងការរៀនសូត្រផងដែរ»។

សាលាបឋមសិក្សាព្រៃដុំ ស្ថិតនៅភូមិព្រៃដុំ ឃុំចើងដើង ស្រុកបារាយណ៍ ខេត្ដកំពង់ធំ និងមានគ្រូបង្រៀនចំនួន៩នាក់ នៅប្រចាំការ និងមានសិស្សានុសិស្សចាប់ពីថ្នាក់ទី១ ដល់ថ្នាក់ទី៦ ចំនួន១៦៥នាក់។ កម្មវិធីសប្បុរសធម៌នេះបានប្រព្រឹត្ដទៅនៅថ្ងៃទី៨ ខែមីនា ឆ្នាំ២០២៣។

ស្រដៀងគ្នានេះដែរ យុវជន សួន កុសល ប្រធានសមាគមកំណាព្យកូនខ្មែរ មានប្រសាសន៍នៅរសៀលថ្ងៃពុធនេះថា រូបលោកចូលរួមកម្មវិធីសប្បុរសធម៌នេះ ដោយសារតែក្ដីស្រឡាញ់ និងចង់ជួយចែករំលែកអ្វីដែលខ្លួនមានខ្លះៗទៅដល់សិស្សដែលកំពុងសិក្សានៅសាលាបឋមសិក្សាព្រៃដុំ។ លោកបន្តថា ការចូលរួមសកម្មភាពសប្បុរសធម៌នេះ ក៏ជាការជួយគ្នាក្នុងគ្រាលំបាក ហើយលោកបានអំពាវនាវដល់សប្បុរសជននានាចូលរួមក្នុងកម្មវិធីចែកសម្ភារសិក្សាដល់សិស្សនៅតំបន់ដាច់ស្រយាលនេះផងដែរ។

លោកបន្ដថា៖ «នេះជាអ្វីដែលខ្ញុំស្រឡាញ់ និងចូលចិត្ដធ្វើនូវកម្មវិធីសប្បុរសធម៌នេះ»។

កាលពីខែមេសា ឆ្នាំ២០២២ លោកនាយករដ្ឋមន្ត្រី ហ៊ុន សែន ក្នុងពិធីបិទសន្និបាតបូកសរុបការងារ ឆ្នាំសិក្សា២០២០-២០២១ និងលើកទិសដៅការងារឆ្នាំសិក្សា២០២១-២០២២ ជំរុញឱ្យបន្តពង្រឹងប្រព័ន្ធអប់រំ និងបន្តធានានូវសេវាអប់រំដែលមានគុណភាពប្រកបដោយសមធម៌ និងបរិយាបន្ន ព្រមទាំងលើកកម្ពស់ឱកាសការសិក្សាពេញមួយជីវិតសម្រាប់ទាំងអស់គ្នា និងដោះស្រាយបញ្ហាខ្វះខាតក្នុងការសិក្សារៀនសូត្ររបស់សិស្ស-និស្សិត។

នាយកសាលាបឋមសិក្សាព្រៃដុំ លោក កេត ឆែម បានលើកឡើងថា សាលាបឋមដែលរូបលោកកំពុងដឹកនាំនេះ កំពុងជួបបញ្ហាខ្វះខាតច្រើន ដូចជា សម្ភារសិក្សាសម្រាប់សិស្ស របងសាលា និងខ្វះការផ្គត់ផ្គង់អាហារូបត្ថម្ភសម្រាប់សិស្ស ជាដើម។ លោកបន្ដថា ប្រជាពលរដ្ឋភាគច្រើននៅតំបន់ដាច់ស្រយាលនេះ មានជីវភាពក្រីក្រ ដូច្នេះពួកគាត់ពុំមានលទ្ធភាពគ្រប់គ្រាន់ក្នុងការទំនុកបម្រុងសម្រាប់ឱ្យកូនៗរបស់ពួកគាត់បានសិក្សានោះទេ។

លោកបន្ដថា៖ «សិស្សមាន១៦៥នាក់ទេ ព្រោះវាជាភូមិតូចនៅក្នុងព្រៃ ដាច់ពីគេ។ ខ្ញុំចង់បានដំបូង គឺសម្ភារសិក្សាសិស្សហ្នឹងឯង ដូចជា សៀវភៅ ប៊ិក និងកង់ ព្រោះពួកគេនៅឆ្ងាយពីសាលា ត្រូវដើរមករាល់ថ្ងៃ។ នេះជាអ្វីដែលខ្ញុំចង់បានមុនគេ ព្រោះអាណិតពួកគាត់ណាស់»។

ជាមួយគ្នានេះដែរ នាយកសាលារូបនេះក៏បានបង្ហាញក្តីត្រេកអរនូវការដែលព្រះសង្ឃ និងយុវជននាំគ្នាមកជួយឧបត្ថម្ភដល់សាលារៀនដែលកំពុងខ្វះខាតខ្លាំងមួយនេះ។ យ៉ាងណា លោកក៏បានស្នើដល់សប្បុរសជនទាំងអស់បន្តជួយដល់សាលារៀន និងសិស្សនៅក្នុងសាលាបឋមសិក្សានេះ ទៅតាមលទ្ធភាព ដើម្បីជួយជំរុញឱ្យវិស័យអប់រំនេះឱ្យកាន់តែល្អប្រសើរឡើង។

លោកបន្តថា៖ «ពេលលំបាកអ៊ីចឹង យើងមិនអាចដកប្រាក់ខែគ្រូបង្រៀនបានទេ ព្រោះពួកគាត់ពឹងលើប្រាក់ខែដែរ អ៊ីចឹងវាមានតែសប្បុរសជនទេ ដែលអាចជួយឧបត្ថម្ភដល់សាលាខ្ញុំបាន ដើម្បីជំរុញឱ្យសិស្សានុសិស្សបានរៀនឱ្យបានពេញលេញតទៅមុខទៀត»។

រដ្ឋធម្មនុញ មាត្រា៦៨ ចែងថា រដ្ឋាភិបាលត្រូវផ្ដល់ការអប់រំកម្រិតបឋមសិក្សា និងមធ្យមសិក្សា ដោយឥតគិតថ្លៃ ដល់ប្រជាពលរដ្ឋទាំងអស់ ហើយម្នាក់ៗត្រូវបន្តការសិក្សាជាមូលដ្ឋានយ៉ាងហោចណាស់ត្រឹមថ្នាក់ទី៩ ហើយរដ្ឋត្រូវមានកាតព្វកិច្ចជួយផ្សព្វផ្សាយ និងលើកតម្កើងសាលាបាលី និងពុទ្ធិកសិក្សា។

អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍ថា លោកចង់ឱ្យយុវជន និងពលរដ្ឋយកគំរូតាមរាល់សកម្មភាពសប្បុរសធម៌បែបនេះ មិនថាក្នុងវិស័យអប់រំនេះទេ គឺរួមទាំងកិច្ចការងារសង្គមនានាផងដែរ។

លោកបន្តថា៖ «វាជារឿងល្អ វាជាកិច្ចការងារទាំងអស់គ្នា ក្នុងការរួមចំណែកក្នុងកិច្ចការសង្គម ជាពិសេសវិស័យអប់រំតែម្ដង។ ខ្ញុំគាំទ្ររាល់សកម្មភាពទាំងអស់ហ្នឹង»។

ស្រដៀងគ្នានេះដែរ អ្នកនាំពាក្យក្រសួងធម្មការ និងសាសនា លោក សេង សុមុនី បានថ្លែងថា លោកចង់ឱ្យមានសកម្មភាពបែបនេះឱ្យកាន់តែច្រើនថែមទៀត ក្នុងការផ្សារភ្ជាប់ព្រះពុទ្ធសាសនាទៅនឹងវិស័យអប់រំ មិនថាតែព្រះសង្ឃទេ ពលរដ្ឋទូទៅក៏អាចចូលរួមធ្វើសកម្មភាពសប្បុរសធម៌បានដែរ។ លោកថា សកម្មភាពនេះបានជួយទៅដល់សិស្សានុសិស្សនៅតាមសាលានៅតំបន់ដាច់ស្រយាល អាចមានលទ្ធភាពក្នុងការសិក្សា ហើយអត្រាក្នុងការបោះបង់ការសិក្សាក៏ត្រូវបានកាត់បន្ថយច្រើនផងដែរ។

លោកបន្ដថា៖ «ខ្ញុំត្រេកអរនៅពេលដែលមានព្រះសង្ឃ លោកបានចូលរួមកិច្ចការងារសង្គមបែបនេះ ហើយក៏ជាការផ្សារភ្ជាប់រវាងព្រះពុទ្ធសាសនានិងវិស័យអប់រំផងដែរ»។

ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានបង្ហាញការគាំទ្រចំពោះសកម្មភាពមនុស្សធម៌បែបនេះ និងជំរុញឱ្យមានសកម្មភាពបែបនេះឱ្យបានកាន់តែច្រើនបន្ថែមទៀត ដើម្បីជួយដល់វិស័យអប់រំនៅកម្ពុជាឱ្យមានភាពល្អប្រសើរ។

អ្នកស្រីបន្តថា៖ «យើងចង់ឱ្យមានការជួយគ្នាទៅវិញទៅមកបែបនេះ។ បើព្រះសង្ឃមានមនសិការជួយដល់ប្រជាពលរដ្ឋ សិស្សានុសិស្សក្រីក្រ គឺខ្ញុំស្វាគមន៍។ យើងនឹងជួយលើកទឹកចិត្ដដល់ពលរដ្ឋឱ្យចេះជួយគ្នាក្នុងគ្រាក្របែបនេះ ទើបគេហៅថាជាការប្រពៃ»។

របាយការណ៍របស់ក្រសួងអប់រំ យុវជន និងកីឡា ចេញផ្សាយក្នុងខែមីនា ឆ្នាំ២០២២ ឱ្យដឹងថា សាលាបឋមសិក្សានៅកម្ពុជា បានកើនឡើងចំនួន១២៧សាលារៀនបន្ថែមទៀត ដែលនាំឱ្យសាលារៀនសរុបមានចំនួន៧ ៨៤៣សាលា សម្រាប់ឆ្នាំសិក្សា២០២០-២០២១៕

យុវតីដែលស្ម័គ្រចិត្តបង្រៀនមិត្តរួមថ្នាក់ក្នុងខេត្តព្រះសីហនុកំពុងទទួលបានការគាំទ្រនៅលើបណ្ដាញសង្គម

លោក ឃាង សុខមាន (Kheang Sokmean) — Mon, 27 Feb 2023 07:31:43 +0000

យុវតីដែលមកពីគ្រួសារក្រីក្រនៅខេត្តព្រះសីហនុម្នាក់ កំពុងទាក់ទាញការចាប់អារម្មណ៍ពីសាធារណជន តាមរយៈឃ្លីបវីដេអូរបស់នាងត្រូវបានគេចែកចាយជាបន្តបន្ទាប់នៅលើបណ្តាញសង្គម ទាក់ទងសកម្មភាពនៃការបង្រៀនសិស្សជំនួសគ្រូបន្ទុកថ្នាក់ ពេលគ្រូអវត្តមាន ដែលកត្តានេះត្រូវគេចាត់ទុកថាជាគំរូដល់សិស្សដទៃទៀតគួរពង្រឹងសមត្ថភាពឱ្យគ្រប់គ្រាន់ ដើម្បីផ្តល់ឱកាសសម្រាប់ខ្លួនឯងផង និងជួយដល់សិស្សរួមថ្នាក់ផ្សេងទៀតផង។

កញ្ញា ណុប គន្ធា ដែលមានវ័យទើប១៦ឆ្នាំនៅឡើយ នៅពេលនេះ នាងកំពុងដើរតួជាគ្រូបង្រៀនផង និងជាសិស្សឆ្នើមប្រចាំថ្នាក់ទី៨សេ ផង។ ជាកូនទី២ នៅក្នុងគ្រួសារដែលមានបងប្អូន៣នាក់ គន្ធា និយាយថា រូបគេតែងតែចំណាយពេលបង្រៀនមិត្ដរួមថ្នាក់របស់ខ្លួន ក្នុងគោលបំណងចែករំលែកគ្នាជាប្រចាំ។ មួយវិញទៀត នេះអាចរាប់បានជាការពង្រឹងសមត្ថភាពខ្លួនឯងបន្ថែមផង និងជួយគ្រូពេលអវត្តមាន ដូចជាប្រជុំម្ដងម្កាល ជាដើម។

ប្រភពបន្ដថា៖ «ខ្ញុំចង់ក្លាយជាធនធានមួយសម្រាប់សង្គមជាតិ និងឱ្យយុវជនផ្សេងទៀតកុំចំណាយពេលធ្វើរឿងឥតប្រយោជន៍ ដោយមកផ្ដោតលើការសិក្សាវិញ»។

គន្ធា បន្ដថា បើនិយាយពីជីវភាពមិនសូវជាធូរធារប៉ុន្មាននោះទេ ប៉ុន្ដែដោយសារក្តីស្រឡាញ់ការសិក្សា ទោះបីយ៉ាងណាក៏ត្រូវខំប្រឹងដែរ។ បើតាម ណុប គន្ធា មុខវិជ្ជាដែលខ្លួនតែងតែបង្រៀនដល់មិត្ដរួមថ្នាក់ គឺពិជគណិត ជាមុខវិជ្ជាដែលខ្លួនពូកែជាងគេ។ យ៉ាងណា យុវតីរូបនេះបានបង្ហាញក្ដីស្រមៃថា ខ្លួនចង់ក្លាយជាគ្រូបង្រៀនម្នាក់ ដើម្បីបន្ដសកម្មភាព និងផ្ដល់ចំណេះដឹងដល់យុវជនក្នុងសង្គមសម្រាប់ថ្ងៃអនាគត។

យុវតី ណុប គន្ធា អាយុ១៦ឆ្នាំ រៀនថ្នាក់ទី៨ នៃវិទ្យាល័យវាលរេញ ពេលបង្រៀនមិត្តរួមថ្នាក់ ស្ថិតនៅភូមិវាលមាស ឃុំវាលរេញ ស្រុកព្រៃនប់ ខេត្ដព្រះសីហនុ។ (ផ្ដល់ឱ្យ)

ប្រភពបន្ដថា៖ «ខ្ញុំចង់ក្លាយជាគ្រូបង្រៀន ពីព្រោះសង្គមយើងកំពុងខ្វះធនធានមនុស្ស។ ខ្ញុំបង្រៀនពួកគាត់ ពេលថ្ងៃណាខ្ញុំរវល់ ពួកគាត់អាចជួយបង្រៀនជំនួសខ្ញុំបាន»។

កាលពីថ្ងៃទី២១ ខែមករា ឆ្នាំ២០២៣ មន្ទីរអប់រំ យុវជន និងកីឡា ខេត្ដព្រះសីហនុ បានបង្ហោះរូបភាពជាឃ្លីបវីដេអូ ដែលបង្ហាញពីសកម្មភាពនៃការបង្រៀនរបស់យុវតី ណុប គន្ធា ទៅដល់មិត្ដរួមថ្នាក់ ហើយឃ្លីបវីដេអូនោះកំពុងទទួលបានការចាប់អារម្មណ៍ពីមហាជន និងសរសើរពីការលះបង់របស់នាង។

វិទ្យាល័យវាលរេញ ដែលស្ថិតនៅភូមិវាលមាស ឃុំវាលរេញ ស្រុកព្រៃនប់ ខេត្ដព្រះសីហនុ គឺជាវិទ្យាល័យមួយដែលគេចាត់ទុកថាជាគ្រឹះស្ថានសិក្សាមានស្តង់ដារ និងបរិស្ថានល្អ។ កញ្ញា ណុប គន្ធា ឱ្យដឹងថា រាល់ថ្ងៃ រូបគេត្រូវធ្វើដំណើរមកសាលារៀនដោយម៉ូតូ ក្នុងចម្ងាយផ្លូវប្រមាណ១គីឡូម៉ែត្រ។

របាយការណ៍របស់ក្រសួងអប់រំ យុវជន និងកីឡា បានបង្ហាញថា នៅក្នុងឆ្នាំសិក្សា២០២១-២០ ២២ អត្រាសិស្សដែលបោះបង់ការសិក្សានៅកម្រិតមធ្យមសិក្សាទុតិយភូមិ ឬកម្រិតវិទ្យាល័យ មានប្រមាណ ១៨,៥% និងអត្រាត្រួតថ្នាក់ ១,១%។

ចំណែកអត្រាសិស្សបោះបង់ការសិក្សានៅកម្រិតមធ្យមសិក្សាបឋមភូមិ ឬកម្រិតអនុវិទ្យាល័យ មានចំនួន ១៦,៦% និងអត្រាសិស្សត្រួតថ្នាក់មាន ១,២%។ ចំណែកមន្ត្រីជាន់ខ្ពស់ក្រសួងអប់រំ បញ្ជាក់ថា ការបោះបង់ការសិក្សារបស់សិស្សនេះ គឺបណ្ដាលមកពីកត្តាបុគ្គល និងកត្តាមួយចំនួនទៀតដែលរួមផ្សំ។

នាយកវិទ្យាល័យវាលរេញ ក្រុងព្រះសីហនុ លោក ងៀម ស៊ីតារា លើកឡើងថា យុវតី គន្ធា គឺជាមនុស្សម្នាក់មានអត្ដចរិតស្លូតបូត និងឧស្សាហ៍ព្យាយាមក្នុងការសិក្សា ទោះបីជាជីវភាពមិនសូវជាធូរធារក៏ដោយ បញ្ហានេះមិនមែនជាឧបសគ្គដល់នាងឡើយ។

លោកបន្តថា ក្រោយពីសាលាបានរៀបចំកម្មវិធីមួយដែលតម្រូវឱ្យសិស្សរៀនពូកែ ត្រូវបង្រៀនមិត្ដរួមថ្នាក់រៀនមិនសូវពូកែ លោកក៏បានមើលឃើញពីសកម្មភាពរបស់យុវតីវ័យ១៦ឆ្នាំរូបនេះ ជាសិស្សល្អ ដោយបានបង្រៀនមិត្ដរួមថ្នាក់ ទើបលោកសម្រេចឱ្យយុវតីនេះបន្ដបង្រៀនបន្ថែមទៀត។

លោកបន្ដថា៖ «ខ្ញុំសប្បាយចិត្ដនៅពេលឃើញកូនៗបានក្លាយជាធនធានមនុស្សដ៏សំខាន់សម្រាប់សង្គមជាតិ។ ខ្ញុំចង់ឱ្យយុវជនផ្សេងទៀត យកគន្ធាធ្វើជាគំរូសម្រាប់អភិវឌ្ឍន៍ខ្លួនឯង»។

ណុប គន្ធា កើតក្នុងគ្រួសារដែលមានជីវភាពមិនសូវជាធូរធារប៉ុន្មាន រូបគេបានត្អូញត្អែថា នៅចំពោះមុខនេះ អ្វីដែល គន្ធា បារម្ភបំផុតនោះ គឺខ្លាចរៀនមិនបានចប់ចុងចប់ដើម។ ដោយឱពុកជាទាហានចូលនិវត្តន៍ និងជាជនដែលមានពិការភាពដោយសារបានបន្សល់ស្លាកស្នាមតាំងពីសម័យសង្រ្គាមមកផង យុវតីរូបនេះលើកឡើងថា សព្វថ្ងៃនេះ គឺមានតែម្ដាយម្នាក់គត់ដែលជាអ្នករកចំណូលដើម្បីផ្គត់ផ្គង់គ្រួសារ តាមរយៈការលក់ដូរបន្តិចបន្តួចនៅនឹងផ្ទះ។

កញ្ញាបន្តថា៖ «ខ្ញុំខ្លាចតែខ្ញុំរៀនអត់ចប់ថ្នាក់ទី១២ ព្រោះគ្រួសារខ្ញុំអត់សូវធូរធារអីប៉ុន្មានទេ។ តែខ្ញុំចប់ថ្នាក់ទី១២ មិនដឹងថាខ្ញុំអាចរៀនបន្ដបានអត់? ខ្ញុំព្រួយបារម្ភចំណុចអស់ហ្នឹង»។

ដោយឡែក អ្នកស្រី ផាន់ សុខុម ដែលមានវ័យ៥២ឆ្នាំទៅហើយ និងមានកូនក្នុងបន្ទុកចំនួន៣នាក់ ឱ្យដឹងថា ណុប គន្ធា គឺជាកូនទី៣ នៅក្នុងគ្រួសារ និងជាសិស្សដែលរៀនពូកែនៅក្នុងថ្នាក់ទៀតផង។ អ្នកស្រីបន្ថែមថា តាំងពីកុមារភាព គន្ធា មិនដែលធ្វើឱ្យឱពុកម្តាយពិបាកចិត្តព្រោះតែឥរិយាបថរបស់នាងនោះឡើយ។ ជាកូនស្រីដែលតែងស្តាប់បង្គាប់ ការទូន្មានជាដរាប។ ជាងនេះទៀត ក្នុងនាមជាឪពុកម្តាយមានតែបារម្ភទៅវិញ នៅពេលដែលឃើញកូនប្រឹងរៀនសូត្រ ដោយមិនយកពេលទំនេរសម្រាប់ធ្វើកិច្ចការដែលគ្មានប្រយោជន៍ដូចក្មេងដទៃទៀត។

បើតាមអ្នកស្រី ផាន់ សុខុម ដោយមើលឃើញពីការប្រឹងប្រែងរបស់កូន បើទោះជាត្រូវលំបាកដោយការខ្វះមុខខ្វះក្រោយបែបណាក្តី ក៏អ្នកស្រីក្នុងនាមជាបង្អែកដ៏ធំក្នុងគ្រួសារសម្រាប់រកចំណូល ក៏ត្រូវប្តេជ្ញាឱ្យកូនរៀន និងសម្រេចក្តីសុបិនរបស់គេដែរ។

អ្នកស្រីបន្ដថា៖ «ខ្ញុំបានរៀបចំកម្មវិធីនេះ ដើម្បីជំរុញឱ្យសិស្សៗប្រឹងរៀន និងចេះចែករំលែកគ្នា។មិនមែនយើងខ្វះគ្រូទេបង គ្រាន់ពេលខ្លះពួកគាត់ជាប់ប្រជុំអ៊ីចឹងទៅ ដើម្បីត្រៀមពេលអវត្ដមានគ្រូ។ ខ្ញុំសង្ឃឹមថា យុវជនផ្សេងអាចក្លាយជាធនធានល្អសម្រាប់សង្គមជាតិយើង»។

ប្រធានមន្ទីរអប់រំ យុវជន និងកីឡា ខេត្តព្រះសីហនុ អ្នកស្រី អ៊ុច សោភា ថ្លែងថា សកម្មភាពទាំងអស់នេះជាការមើលឃើញរបស់មន្ទីរអប់រំខេត្ដ ក្នុងគោលបំណងចង់ឱ្យយុវជនចេះជួយគ្នា និងចែករំលែកចំណេះដឹងឱ្យគ្នាទៅវិញទៅមក។

អ្នកស្រីបន្តថា ការអនុញ្ញាតឱ្យយុវតី ណុប គន្ធា បង្រៀនជំនួសគ្រូបន្ទុកថ្នាក់នេះ មិនមែនមានន័យថា សាលាខ្វះគ្រូទេ ប៉ុន្តែនេះជាការបង្កើតសកម្មភាពសម្រាប់សិស្សដែលរៀនពូកែ ជួយសិស្សដែលមានការយល់ដឹងមិនទាន់បានទូលំទូលាយ។ មិនតែប៉ុណ្ណោះ ការអនុវត្តដូច្នេះ ក៏ជាផ្តល់ឱកាសសម្រាប់សិស្សទទួលបាននូវបទពិសោធ មុននឹងឈានទៅរកជំនាញមួយដ៏ពិតប្រាកដសម្រាប់ថ្ងៃអនាគតបន្ត។

អ្នកស្រីបន្តថា៖ «ចង់ឱ្យយុវជនផ្សេងទៀតគួរតែអភិវឌ្ឍខ្លួនដូចយុវតី គន្ធា នេះដែរ។ អ្នកស្រីបានបញ្ជាក់ថា មិនមែនគ្រូបង្រៀននៅវិទ្យាល័យហ្នឹងខ្វះគ្រូទេ គឺមានគ្រប់គ្រាន់ តែពេលខ្លះគ្រូបង្រៀនអាចរវល់ប្រជុំ និងមានកម្មវិធីផ្សេងៗទៀត ទើបខាងមន្ទីរបានរៀបចំកម្មវិធីសិស្សបង្រៀនសិស្សនេះឡើង ណាមួយវាក៏បង្កើតចំណេះដឹងពួកគាត់បន្ថែមទៀតដែរ»។

ឆ្លើយតបរឿងនេះ អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បញ្ជាក់ថា ក្នុងនាមស្ថាប័នអប់រំ ពិតជាមានចិត្តសោមនស្ស ពេលដែលឃើញយុវជនចេះជួយគ្នា តាមរយៈការចែករំលែកចំណេះដឹងបែបនេះ ហើយនេះក៏ជាការបង្កើនឱ្យមានធនធានមនុស្សកាន់តែច្រើននៅក្នុងសង្គម។ ប្រភពដដែលបន្ថែមថា សព្វថ្ងៃនេះ កម្ពុជាកំពុងត្រូវការធានមនុស្សបែបនេះច្រើនទៀត ហេតុនេះ យុវជនគួរពង្រឹងសមទ្ធភាពរបស់ខ្លួនបន្ថែមទៀត ក្រៅពីជួយខ្លួនហើយ ក៏អាចជួយដល់សិស្សផ្សេងទៀតដែរ។

លោកបន្ដថា៖ «ខ្ញុំសប្បាយចិត្ដ ក្នុងនាមជាក្រសួងអប់រំ ពេលឃើញយុវជនរីកចម្រើនដូច្នេះ។ ខ្ញុំសង្ឃឹមថា ពួកគាត់នឹងក្លាយជាធនធានមនុស្សដ៏ល្អ»។

ចំណែកប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយយ៉ាវី មានប្រសាសន៍ថា ក្នុងនាមជាអង្គការសង្គមស៊ីវិល សាទរចំពោះសកម្មភាពរបស់សិស្សដូចយុវតី ណុប គន្ធា នេះជាដើម។ ប៉ុន្តែលោកស្រីនៅតែទទូចឱ្យយុវជនដែលមានសមត្ថភាព និងធនធានចំណេះដឹង គួរបន្តជួយអភិវឌ្ឍប្រទេស ដោយផ្អែកលើគោលការណ៍ និងមនសិការជាតិជាមូលដ្ឋាន។

លោកស្រីបន្ដថា៖ «ខ្ញុំគាំទ្រគ្រប់សកម្មភាពរបស់យុវជនក្នុងវិស័យអប់រំ។ តែកុំអាងច្រើន ខ្លួនរៀនបានខ្ពស់ ហើយមិនបានយកមកបម្រើសង្គមជាតិ អាហ្នឹងក៏វាមិនល្អដែរ។ រៀនចប់ឪបណ្ឌិតក៏ដោយ ក៏គ្មានបានការអីដែរ»។ វិលមករកយុវតី ណុប គន្ធា ឯណេះវិញ បើទោះជានៅពេលនេះ គន្ធា អះអាងថា រូបគេជាសិស្សដែលរៀនបាននិទ្ទេសអេ និងជាសិស្សដែលពូកែជាងគេនៅក្នុងថ្នាក់ក្តី ក៏ក្តីបារម្ភថាអាចនឹងរៀនមិនចប់ចុងចប់ដើមព្រោះតែជីវភាព នៅតែដក់ជាប់នៅក្នុងអារម្មណ៍របស់នាងជានិច្ច៕

អង្គការផ្នែកប្រព័ន្ធផ្សព្វផ្សាយរួមគ្នាបញ្ជ្រាបអក្ខរកម្មព័ត៌មានទៅដល់ពលរដ្ឋ

ទួក ពិសិដ្ឋ (Touk Piseth) — Fri, 17 Feb 2023 10:30:07 +0000

ក្រុមអង្គការដែលធ្វើការក្នុងវិស័យប្រព័ន្ធផ្សព្វផ្សាយ បានជួបជុំគ្នាដើម្បីបង្កើនកិច្ចសហការក្នុងគោលដៅបញ្រ្ជាបចំណេះដឹងផ្នែក អក្ខរកម្មប្រព័ន្ធផ្សព្វផ្សាយ និងព័ត៌មាន ទៅដល់ប្រជាពលរដ្ឋឱ្យកាន់តែទូលំទូលាយបន្ថែមទៀតក្នុងយុគសម័យឌីជីថលថ្មីនេះ។

អ្នកសម្របសម្រួលគម្រោង នៃអង្គការ ឌីដាប់បល់យូ អាកាដេមី (DW Akademie) ប្រចាំប្រទេសកម្ពុជា លោក ស ច័ន្ទដារ៉ា បានប្រាប់ថា នេះជាលើកទី២ហើយ ដែលអង្គការ DW Akademie បានរៀបចំជំនួបជាមួយអង្គក្រៅរដ្ឋាភិបាល ព្រមទាំងមានតំណាងក្រសួងអប់រំ យុវជន និងកីឡា។ ជំនួបនេះ គឺដើម្បីពិភាក្សាគ្នាផ្ដោតលើចំណេះដឹងផ្នែកប្រព័ន្ធផ្សព្វផ្សាយ។ ប្រភពបន្តថា ចំណេះដឹងទាំងនោះ រួមមាន ការចេះបែងចែកព័ត៌មានពិត និងក្លែងក្លាយ ការចេះសរសេរព័ត៌មាន និងសុវត្ថិភាពប្រព័ន្ធឌីជីថល ជាដើម។ មួយវិញទៀត លោកថា សន្និសីទលើកទី២នេះ គឺជាផ្នែកមួយ ដើម្បីរៀបចំផែនការបណ្តុះបណ្តាលជំនាញទាំងនេះបន្តទៀតទៅដល់ប្រជាពលរដ្ឋទូទៅនៅទូទាំងប្រទេសកម្ពុជា ក្នុងគោលដៅដើរឱ្យទាន់យុគសម័យបច្ចេកវិទ្យាថ្មីនេះ។

លោកបន្តថា៖ «[សន្និសីទនេះ] វាអាចជាបណ្តាញមួយឱ្យយើងដឹងពីផែនទីរួមមួយចុះនៅក្នុងខេត្តនេះខេត្តនោះ អ្នកណាធ្វើអី!បើសិនជាយើងមានផែនទីរួមមួយ យើងស្រួលធ្វើ ស្រួលអនុវត្តគម្រោង ស្រួលសហការគ្នាទៀត។ អ៊ីចឹងការងារចំគោលដៅ ហើយមានប្រសិទ្ធភាព ចៀសវាងគម្រោងណាមួយជាន់គ្នាអ៊ីចឹងទៅ ជារួម!»។

ការជួបជុំគ្នានេះធ្វើឡើងនៅថ្ងៃទី៧ ខែកុម្ភៈ ឆ្នាំ២០២៣ ដោយមានអ្នកចូលរួមភាគច្រើនជាយុវជនសរុបជាង៤០នាក់ ដែលរៀបចំឡើងដោយអង្គការ DW Akademie រយៈពេលមួយព្រឹក ក្នុងរាជធានីភ្នំពេញ។ ក្នុងកម្មវិធីនោះ គឺមានការដាក់បង្ហាញសកម្មភាព និងផែនការនាពេលកន្លមក លើការចែករំលែកចំណេះដឹងផ្នែក អក្ខរកម្មប្រព័ន្ធផ្សព្វផ្សាយ និងព័ត៌មានរបស់សា្ថប័នក្រៅរដ្ឋាភិបាលចំនួន៣ រួមមាន អង្គការមណ្ឌលព័ត៌មានស្រ្តីកម្ពុជា (WMC), មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM), សមាគមយុវជនខ្មែរ (KYA) រួមទាំងមានការចូលរួមពីតំណាងរបស់ក្រសួងអប់រំ យុវជន និងកីឡា ផងដែរ។

អ្នកស្រី គឹម សិទ្ធី ជាមន្រ្តីប្រព័ន្ធផ្សព្វផ្សាយ នៃអង្គការមណ្ឌលព័ត៌មានស្រ្តីកម្ពុជា (WMC) ដែលបានចូលរួមក្នុងកិច្ចពិភាក្សានេះ មានប្រសាសន៍ថា អក្ខរកម្មប្រព័ន្ធផ្សព្វផ្សាយ និងព័ត៌មាន ដើរតួនាទីយ៉ាងសំខាន់សម្រាប់ប្រជាពលរដ្ឋគ្រប់ៗរូប ជាពិសេសក្នុងយុគសម័យដែលបណ្តាញសង្គមកំពុងតែមានការរីកចម្រើនយ៉ាងឆាប់រហ័សបែបនេះ។ អ្នកស្រីបន្តថា អ្នកប្រើប្រាស់បណ្តាញសង្គមមួយចំនួនមិនទាន់បានយល់ដឹងឱ្យបានច្បាស់ពីអ្វីជាព័ត៌មានពិត និងក្លែងកា្លយនោះទេ ដែលនាំឱ្យពួកគេបានចែករំលែកព័ត៌មានក្លែងក្លាយជាច្រើនទៅកាន់អ្នកផ្សេងៗទៀតជាបន្តបន្ទាប់ ដែលអាចបង្កផលប៉ះពាល់ដល់សង្គមជាតិ។

អ្នកស្រីបន្តថា៖ «នៅពេលដែលប្រជាពលរដ្ឋរបស់យើង គាត់បែងចែកមិនដាច់រវាងព័ត៌មានពិត ព័ត៌មានក្លែងក្លាយ វាអាចប៉ះពាល់ ទី១ បង្កអសន្តិសុខក្នុងសង្គមរបស់យើង។ ពេលដែលឃើញពត៌មាន ឱ្យតែគេPost គាត់Like គាត់Share[ចែករំលែកបន្ត]។ អ៊ីចឹងវាបង្កភាពហានិភ័យនៅក្នុងសង្គមរបស់យើង»។

អ្នកស្រីបន្ថែមថា៖ «មួយទៀត គឺគាត់បង្កហានិភ័យដល់ខ្លួនគាត់ផ្ទាល់ គាត់ឃើញពត៌មានហ្នឹង មិនដឹងថាពិត [ឬ] មិនពិតផងគាត់ចេះតែ Post។ ដោយសារឥឡូវរដ្ឋាភិបាលមានចំណាត់ការលើអ្នកដែល Share [ចែករំលែក] ព័ត៌មានមិនពិត ក៏មានទោសដែរ»។

ជាមួយគ្នានេះ យុវជន ក្រេក សៅបញ្ញាស៊ី វ័យ២0ឆ្នាំ ប្រាប់ថា នេះជាលើកទីមួយហើយដែលខ្លួនបានចូលរួមសកម្មភាពជួបជុំគ្នាមួយនេះ ដោយថា ពិតជាសំខាន់សម្រាប់យុវជនជំនាន់ក្រោយដូចជារូបលោក។ យុវជនរូបនេះថា កម្មវិធីមួយនេះក៏បានភ្ជាប់ទំនាក់ទំនងគ្នាចំពោះអ្នកធ្វើការក្នុងវិស័យប្រព័ន្ធផ្សព្វផ្សាយបានមួយចំណែកផងដែរ។ ម្យ៉ាងទៀត លោកថា សន្និសីទនេះបានផ្តល់ចំណេះដឹងដល់រូបលោកពីការចេះបែងចែកព័ត៌មានពិត និងក្លែងក្លាយ ជាពិសេសបានជំរុញឱ្យលោកចេះតាមដានព័ត៌មានដែលមានប្រយោជន៍នៅលើបណ្តាញសង្គមនានា។ បន្ថែមលើនេះ លោកបានជំរុញឱ្យយុវជនផ្សេងទៀត ជាពិសេសយុវជនដែលធ្វើការលើប្រព័ន្ធផ្សព្វផ្សាយ គួរចំណាយពេលចូលរួមវគ្គបណ្តុះបណ្តាលដែលផ្តោតលើចំណេះដឹងផ្នែកប្រព័ន្ធផ្សព្វផ្សាយនេះឱ្យបានកាន់ច្រើនបន្ថែមទៀត។

លោកបន្តថា៖ «តាមពិតអាហ្នឹងវា [អក្ខរកម្មប្រព័ន្ធផ្សព្វផ្សាយ និងព័ត៌មាន] សំខាន់ទាំងអស់គ្នា គ្រាន់ថាយុវជនសំខាន់ជាងគេ ដោយសារទី១ យល់ដឹងព័ត៌មាន គាត់ជាអ្នកបង្កើត[ព័ត៌មាន] ហើយក៏គាត់ជាអ្នកចែករំលែកព័ត៌មានទាំងអស់ហ្នឹងដែរ។ អ៊ីចឹងបានន័យថា វាសំខាន់សម្រាប់ពួកគាត់ ក្នុងការយល់ដឹងថាពត៌មានហ្នឹងវាគួតែ Deliver [បញ្ជូនបន្ត] បែបណា! គួរតែសរសេរបែបណា! បញ្ចេញបញ្ចូលបែបណាដើម្បីផ្សព្វផ្សាយ»។

ចំណែកអនុប្រធាននាយកដ្ឋាន នៃនាយកដ្ឋានបច្ចេកវិទ្យាព័ត៌មាន ក្រសួងអប់រំ យុវជន និងកីឡា អ្នកស្រី សេង ស៊ីណែត បានសាទរចំពោះការរៀបចំឱ្យមានជំនួបរវាងក្រុមដែលកំពុងធ្វើការលើការអប់រំផ្នែកប្រព័ន្ធផ្សព្វផ្សាយនេះឡើង។ អ្នកស្រីលើកឡើងថា ក្រសួងអប់រំបានសហការជាមួយអង្គការ DW Akademie ចាប់តាំងពីឆ្នាំ២០១៥ ដោយផ្តោតលើការអប់រំផ្នែកប្រព័ន្ធផ្សព្វផ្សាយ ទៅកាន់សិស្សានុសិស្ស និងគ្រូបង្រៀន ដើម្បីឱ្យពួកគេទទួលបានចំណេះដឹងបន្ថែមទៀត។

អ្នកស្រីបន្តថា៖ «យើងមានឱកាសចែករំលែកអ្វីដែលក្រសួង ស្ថាប័ន ក៏ដូចជាដៃគូរមួយចំនួនដែលគាត់បានធ្វើការក្នុងការងារតែមួយ។ វាជាវេទិការួមមួយសម្រាប់យើងបានស្គាល់គ្នា ការងារផ្សេងៗគ្នា ប៉ុន្តែក្នុងគោលដៅតែមួយគត់ គឺលើកកម្ពស់អក្ខរកម្មប្រព័ន្ធផ្សព្វផ្សាយ និងព័ត៌មានទៅដល់គោលដៅយុវជន ក៏ដូចជា Target audience [ក្រុមគោលដៅ] ផ្សេងៗគ្នា របស់អ្នកធ្វើការក្នុងវិស័យនេះ»។

កាលពីថ្ងៃទី១៥ ខែកុម្ភៈ ឆ្នាំ២០២២ ក្រសួងអប់រំ យុវជន និងកីឡា បានចេញសេចក្តីប្រកាសដាក់ឱ្យប្រើប្រាស់ជាផ្លូវការសៀវភៅ «អក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មាន» សម្រាប់ប្រើប្រាស់នៅតាមគ្រឹះស្ថាន បណ្ដុះបណ្ដាលគ្រូ គ្រឹះស្ថានឧត្ដមសិក្សា និងនៅតាមសាលារៀនចំណេះទូទៅ និងបច្ចេកទេស។

បើតាមអ្នកស្រី សេង ស៊ីណែត សៀវភៅស្តីពី អក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មាន នេះ គឺជាយន្តការមួយជំរុញឱ្យយុវជនបានយល់ដឹងកាន់តែស៊ីជម្រៅបន្ថែមទៀតពីចំណេះដឹងទូទៅផ្នែកប្រព័ន្ធផ្សព្វផ្សាយ ដែលនេះជាការបញ្ជ្រាបការយល់ដឹងទៅដល់យុវជនជំនាន់ក្រោយក្នុងវិស័យអប់រំ ដែលក្រសួងអប់រំបានធ្វើនាពេលកន្លងមកនេះ។

អ្នកស្រីបន្តថា៖ «សៀវភៅនេះ វាដើរតួនាទីសំខាន់ ឱ្យពួកគាត់ចេះវិភាគ ចេះវែកញែក ចេះចែករំលែកព័ត៌មានដែលប្រកបដោយសារប្រយោជន៍ មិនឱ្យចាញ់បោកអ្នកដែលមានជនឱកាសនិយមផ្សេងៗ ដែលអាចទាក់ទងធ្វើការបោកប្រាស់បាន តាមរយៈប្រព័ន្ធអនឡាញ»។

បើតាមក្រសួងអប់រំ យុវជន និងកីឡា បានឱ្យនិយមន័យ អក្ខរកម្មប្រព័ន្ធផ្សព្វផ្សាយ និងព័ត៌មាន (Media and Information Literacy) គឺសំដៅដល់សំណុំនៃចំណេះដឹង ជំនាញ អាកប្បកិរិយា ដែលជួយកសាងសមត្ថភាពប្រជាពលរដ្ឋអាចប្រើប្រាស់បណ្តាញសង្គម ប្រកបដោយសុវត្ថិភាព ការទទួលខុសត្រូវ និងភាពឈ្លាសវៃ។

ឌីដាប់បល់យូ អាកាដេមី (DW Akademie) គឺជាអង្គការរបស់ប្រទេសអាល្លឺម៉ង់សម្រាប់ការអភិវឌ្ឍប្រព័ន្ធផ្សព្វផ្សាយអន្តរជាតិ។ អង្គការនេះគាំទ្រប្រព័ន្ធផ្សព្វផ្សាយសេរី និងតម្លាភាព ដោយពង្រឹងគុណភាព និងសមត្ថភាពផ្នែកប្រព័ន្ធផ្សព្វផ្សាយ ហើយបានចូលរួមយ៉ាងសកម្មនៅក្នុងប្រទេសកម្ពុជា ដើម្បីអភិវឌ្ឍប្រព័ន្ធផ្សព្វផ្សាយរយៈពេលប្រមាណ១០ឆ្នាំមកហើយ។

បើតាមលោក ស ច័ន្ទដារ៉ា បានឱ្យដឹងថា នៅកម្ពុជា មានអង្គការជាតិ និងអន្តរជាតិ មួយចំនួនបានចូលជារួមជាមួយ DW Akademie លើកិច្ចការប្រព័ន្ធផ្សព្វផ្សាយរួចមកហើយ រួមមានដូចជា អង្គការយូណេស្កូ (UNESCO), ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID), អង្គការមណ្ឌលព័ត៌មានស្រ្តីកម្ពុជា (WMC), មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងសមាគមយុវជនខ្មែរ (KYA) ជាដើម។

ប្រភពដដែលបន្តថា គោលដៅបន្ទាប់នឹងមានការប្រមូលផ្តុំអង្គការផ្សេងៗទៀតដែលមានចំណាប់អារម្មណ៍ និងកំពុងធ្វើសកម្មភាពទៅលើផ្នែកអក្ខរកម្មប្រព័ន្ធផ្សព្វផ្សាយ ឱ្យបានជួបជុំពិភាក្សាគ្នាដើម្បីជំរុញឱ្យផែនការនៃការបណ្តុះបណ្តាលស្តីពី អក្ខរកម្មប្រព័ន្ធផ្សព្វផ្សាយ និងព័ត៌មាន កាន់តែមានប្រសិទ្ធភាពបន្ថែមទៀត។

ក្រសួងអប់រំ – Newsroom Cambodia

មន្ត្រីបក្សភ្លើងទៀនម្នាក់ ការពារភាពស្អាតស្អំ ក្រោយ​ក្រសួងអប់រំ​ដកឈ្មោះចេញពីក្របខ័ណ្ឌ

ព្រះសង្ឃ និងយុវជន រៃអង្គាសថវិកាដើម្បីជួយសាលារៀននៅតំបន់ដាច់ស្រយាលក្នុងខេត្តកំពង់ធំ

យុវតីដែលស្ម័គ្រចិត្តបង្រៀនមិត្តរួមថ្នាក់ក្នុងខេត្តព្រះសីហនុកំពុងទទួលបានការគាំទ្រនៅលើបណ្ដាញសង្គម

អង្គការផ្នែកប្រព័ន្ធផ្សព្វផ្សាយរួមគ្នាបញ្ជ្រាបអក្ខរកម្មព័ត៌មានទៅដល់ពលរដ្ឋ

មន្ត្រីបក្សភ្លើងទៀនម្នាក់ ការពារភាពស្អាតស្អំ ក្រោយក្រសួងអប់រំដកឈ្មោះចេញពីក្របខ័ណ្ឌ