Economy – Newsroom Cambodia

បញ្ហាប្រឈមនៅតែមានសម្រាប់អាជីវករខេត្តសៀមរាប បើទោះជាប្រទេសបើកដំណើរការឡើងវិញក៏ដោយ

លន់ អុីនជី (Lun Inchy) — Mon, 27 Dec 2021 02:39:46 +0000

សៀមរាប៖ អាជីវករមួយរូបអង្គុយយ៉ាងស្រងូតស្រងាត់លើគ្រែលក់ស្ពៃជ្រក់ និងក្តាមប្រៃ រងចាំមើលអ្នកមកទិញម្ហូប ហើយកាលពីពេលថ្មីៗនេះ មិនសូវមានអ្នកមកទិញច្រើននោះ បន្ទាប់ពីមានការរាតត្បាត ជំងឺកូវីដ១៩មក ទោះបីមានការបើកប្រទេស និងផ្សារគ្រប់ទីកន្លែងកាលពីខែវិច្ឆិកាក៏ដោយ។

អ្នកស្រីទេរ នឿន អាយុ ៤៦ឆ្នាំ ជាអាជីវករលក់ស្ពៃជ្រក់ និងក្តាមប្រៃ នៅផ្សារលើរយៈពេល ៤ឆ្នាំ ហើយអ្នកស្រីត្រូវទទួលរ៉ាប់រងចិញ្ចឹមកូនចំនួន ៣នាក់។ គាត់បានពោលទាំងទឹកភ្នែក និងអួលដើមកថា៖ «ប្ដីខ្ញុំបានស្លាប់ចោល ៣ឆ្នាំហើយ កូនប្រុសបងរៀន ទី១២ឈប់រៀនដោយអត់លទ្ធភាព និងទប់ទល់លែងកើត កូននៅរៀនពីរនាក់ដែរ ខ្ញុំត្រូវរកម្នាក់ឯងឲ្យកូនបានរៀនត»។

ក្នុងបទសម្ភាសន៍ថ្មីៗនេះជាមួយអាជីវករតូចៗក្នុងខេត្តសៀមរាប ខេត្តដែលពឹងផ្អែកខ្លាំងលើវិស័យទេសចរណ៍ ពួកគាត់បាននិយាយថាបានរងផលប៉ះពាល់យ៉ាងធ្ងន់ធ្ងរដោយសារកូវីដ ហើយទោះបីជាមានការបើកដំណើរការឡើងវិញក៏ដោយ ក៏នៅតែជួបការលំបាក ជាពិសេសការព្រួយបារម្ភថ្មីអំពីមេរោគអូមីក្រុង។

បើយោងតាមអាជីវករនៅតាមទីផ្សារក្នុងក្រុងនិងនៅតំបន់អង្គរបានឲ្យដឹងថា ពួកគាត់នៅតែមានការលំបាកទោះបីជាបើកប្រទេសឡើងវិញក៏ដោយ ព្រោះភ្ញៀវទេសចរណ៍ហាក់នៅមានកម្រិតដែលធ្វើឲ្យការរកចំណូលពួកគាត់នៅមិនទាន់គ្រប់គ្រាន់សម្រាប់ផ្គត់ផ្អង់គ្រួសារ។

អ្នកស្រីទេស នឿន

អ្នកស្រីទេស នឿនបានបន្តទាំងកំសត់ថា មុនសម័យកូវីដ គាត់មានលទ្ធភាពរស់នៅបាន មានលទ្ធភាពឲ្យកូនរៀនបាន ក៏ប៉ុន្តែពេលកំឡុងពេលកូវីដ គាត់មិនរកចំណូលបាននោះទេ ហើយរកលុយឲ្យកូនសឹងមិនបានទៅរៀន អត់បានលក់ គេបិទផ្សារ ជាប់កន្លែងឃុំកូវីដម្ភៃថ្ងៃ ហើយបន្ទាប់ពីហ្នឹងលក់តែបន្លែនៅផ្លូវ៦០ម៉ែត្រ។

«ពេលខ្លះ ប៉ូលីសដេញ ហើយរត់ទៅលក់តាមផ្លូវថ្នល់ម្តង»។

អ្នកស្រីបាននិយាយថាទើបតែបានមកលក់នៅផ្សារបានមួយខែជាង មួយថ្ងៃចំណាយពីរម៉ឺនរៀនសម្រាប់កូន

ទុក ១៥០ដុល្លារ សម្រាប់បង់កន្លែងជួលមួយខែៗ។

អ្នកស្រីទេស នឿន «រាល់ថ្ងៃនេះនៅលំបាកខ្លាំងដោយត្រូវដោះស្រាយថ្លៃតូប ហើយកូនពីរនាក់ត្រូវចូលរៀនហើយទិញខោអៅ សៀវភៅគ្រប់មុខដែលត្រូវទទួលបន្ទុកតែម្នាក់ឯង»។

អ្នកស្រីបានសម្តែងការព្រួយបារម្ភចំពោះជំងឺកូវីដអូមីក្រុងថ្មីដោយក្តីអស់សង្ឃឹម ព្រោះបើមានទៀតគាត់ប្រឈមមុខនឹងការគ្មានចំណូល និងគ្មានអីហូបដូចមុនទៀត។

អ្នកស្រីទេរ នឿន៖«ខ្ញុំសុំសំណូមពរឲ្យរាជរដ្ឋាភិបាលជួយឧបត្ថម្ភឲ្យកូនពីរនាក់ហ្នឹងបានរៀន ខ្ញុំគ្មានចង់បានអ្វីច្រើនទេ គ្រាន់តែចង់ឲ្យកូនបានរៀន»។

ស្រដៀងគ្នាផងដែរ អ្នកស្រី ឈ្មោះដា នី អាយុ៤២ឆ្នាំ ជាអាជីវករលក់ចេកអាំង នៅលើរ៉ីម៉កម៉ូតូ ម្តុំមន្ទីរពេទ្យកុមារអង្គរ បានលើកឡើងថា កាលមុនកូវីដគឺអ្នកស្រីរកចំណូលមានភាពល្អប្រសើរក្នុងមួយថ្ងៃបាន ៣ម៉ឺនរៀល តែមកដល់ឥឡូវបានត្រឹមតែ ១ម៉ឺនប៉ុណ្ណោះ។

អំឡុងពេលកូវីដមានសភាពពិបាក គ្មានលទ្ធភាពបង់ការប្រាក់ធនាគារ ព្រោះលក់មិនដាច់ រួមទាំង មានការ

បិទខ្ទប់ទៀត។

អ្នកស្រីដា នី

លោកស្រី និយាយបណ្តើរប្រែចេកអាំងបណ្តើរថា «ពេលកូវីដពីរឆ្នាំហ្នឹង បើខាតមិនបាច់និយាយទេ ហើយបើយើង លក់អត់ដាច់មានជាប់លុយធនាគារ មិនមានអ្វីដើម្បីផ្គត់ផ្គង់កូនរៀនដូច្នេះបានឲ្យកូនឈប់រៀន។ កាលកូវីដហ្នឹង លក់រហូតអត់ឈប់ទេ មកលក់រាល់ថ្ងៃ ប៉ុន្ដែពេលបិទខ្ទប់អត់បានមក ព្រោះគេបិទមកអត់កើត នៅនេះក៏គេបិទនៅនោះក៏គេបិទ គេបិទខេត្តសៀមរាបទាំងមូលតែម្តង »។

លោកស្រីបង្ខំចិត្តឲ្យកូនឈប់រៀនដើម្បីឲ្យកូនជួយរកចំណូលផ្គត់ផ្គង់គ្រួសារ ព្រោះគ្មានលទ្ធភាពបង់ការប្រាក់ធនាគារឡើយ។

អ្នកលក់ចេកអាំងរូបនេះបន្ថែមទាំងទឹកមុខស្រពាប់ស្រពោនថា «បើថានិយាយរឿងពិបាកនិយាយមិនចេញទេ ជំពាក់ធនាគារ សុំគេបង់តែការហ្នឹង យើងយកលុយធនាគារយកមកធ្វើផ្ទះ ទិញដីនៅរកស៊ីអីចឹងណាមួយប្រាក់ចំណូលពីកូនផង ហើយឥលូវដល់ថ្ងៃទៀតហើយគ្មានលទ្ធភាពបង់មិនបានឲ្យគេទេ រកមិនបានតែម្តងរកត្រឹមបានតែការប្រាក់សម្រាប់បង់ធនាគារ លក់មួយថ្ងៃទាល់ល្ងាច អីចឹងកូនសុំឈប់រៀនហើយ កូនសុំទៅធ្វើការនៅប៉ោយប៉ែតដើម្បីទៅរកលុយបង់លុយធនាគារព្រោះមិនចង់ឲ្យលក់ផ្ទះលក់សម្បែងសងគេ»។

បន្ទាប់ពីបើកប្រទេសឡើងចំណូលអ្នកស្រីមានការល្អប្រសើរជាងអំឡុងពេលកូវីដ ព្រោះបានចំណូលច្រើនជាងអំឡុងពេលកូវីដ ប៉ុន្ដែចំណូលនៅតែមិនដូចមុនកូវីដទេ។

អ្នកស្រីបន្តទៀតថា «ព្រួយបារម្ភណាស់អំពីជំងឺកូវីដ-១៩ បម្លែងខ្លួនថ្មីអូមីក្រុង ចាំតែមើលទៅណាស់អូន ឲ្យតែយើងចេះការពារអីចឹងទៅ មានពាក់ម៉ាស់មានអាកុលតាមខ្លួន បើយើងលក់ដូរធ្វើម៉េចយើងការពារបានល្អអាជំងឺហ្នឹងក៏មិនអាចចូលមកស្រុកយើងកើត ហើយណាមួយយើងក៏បានចាក់វ៉ាក់សាំងដែរ»។

អ្នកស្រី ម៉េ ស្រ៊ីម អាយុ៤២ឆ្នាំ មានកូន៣នាក់ ស្រី២ប្រុស១ ជាអ្នកកោះធំ ដែលលក់នៅតំបន់អង្គរតូចខេត្តសៀមរាបរយៈពេលជាងដប់ឆ្នាំ ទីលំនៅបច្ចុប្បន្ននៅខេត្តសៀមរាបតែម្តង។

អ្នកស្រីអង្គុយលើកៅអីជ័រ ក្តោបដៃ និយាយដោយទឹកមុខស្រងូតស្រងាត់ថា៖«មុនពេលដែលមានកូវីដ ខ្ញុំអាចលក់បានម៉ាហូបៗ ឬក៏នៅសល់តិចតួច ទុកគ្រាន់បង់ឲ្យអង្គការដែលគាត់ជំពាក់បំណុលគេ និងឲ្យកូនរៀនសូត្រ។»

អ្នកស្រី ម៉េ ស្រ៊ីម

តែនៅពេលកំឡុងពេលកូវីដនោះអ្នកស្រីមិនអាចរកចំណូលនបាននោះទេ អ្នកស្រីយកដៃអេះស្មាបណ្តើរនិយាយបណ្តើរថា៖ «នៅក្នុងរយៈពេលពីរឆ្នាំអំឡុងពេលកូវីដនេះខ្ញុំរកបានខ្លះអត់ខ្លះព្រោះពេលនោះ គាត់នៅតំបន់ក្រហមហើយគាត់មិនអាចមកលក់បាន គេបិទខ្ទាប់កន្លះខែទើបគាត់អត់មានអ្វីហូប ទោះបីគេបើកឲ្យលក់វិញថ្ងៃខ្លះខ្ញុំមកលោកទាំងអត់បានចំណូលអ្វីទាំងអស់ ព្រោះលក់អត់ដាច់សូម្បីតែមួយ ថ្ងៃខ្លះលក់ដាច់បានត្រឹមតែ១ម៉ឺន ២ម៉ឺនរៀល តែទោះបីជាយ៉ាងណាក៏ខ្ញុំខំរកលុយដើម្បីបង់ការប្រាក់សម្រាប់លុយចងការគេនិងទុកខ្លះសម្រាប់កូនរៀនអនឡាញផង»។

បន្ទាប់ពីមានការបើកប្រទេសឡើងវិញ និងមានភ្ញៀវទេសចរមកទស្សនានៅប្រាសាទអង្គរវត្តអ្នកស្រីបានឲ្យដឹងថាគាត់អាចលក់បានប្រាំពីរទៅប្រាំបីម៉ឺនរៀលដែលធ្វើឲ្យគាត់អាចផ្គត់ផ្គង់គ្រួសារគាត់បានឡើងវិញអាចឲ្យកូនរៀនបាន។

អំឡុងពេលផ្ទុះខ្លាំងលោកស្រី និងស្វាមីក៏បានទៅធ្វើការនៅភ្នំពេញជាអ្នកសម្អាតបន្ទប់សណ្ឋាគារនិងស្វាមីធ្វើជាកម្មករសំណង់ ដោយការធ្វើការនៅភ្នំពេញជាមួយស្វាមីអ្នកស្រីមានការលំបាកនិងបែកពីកូននិងចៅរបស់គាត់គាត់ក៏សម្រេចចិត្តថាមកនៅសៀមរាបវិញដើម្បីជុំគ្រួសារ ដោយអ្នកស្រីបាននិយាយថា៖«ទោះមានរឿងអ្វីក៏បាននៅជុំគ្រួសារដែរ សុខចិត្តនៅជុំគ្នាកុំឲ្យព្រាត់កូនព្រាត់ចៅ។»

អ្នកស្រីនិយាយដោយទឹកមុខស្លេកស្លាំងនិងការភ័យខ្លាចថា៖ «បារម្ភខ្លាចប្រសិនបើមានមេរោគបម្លែងថ្មីអូមីក្រុងចូលមកកម្ពុជាដែលអាចបណ្ដាលឲ្យមានការបិទប្រទេសសារជាថ្មី ខ្ញុំព្រួយបារម្ភខ្លាំងដោយសារតែយើងអត់មានមុខរបរ និងលុយសម្រាប់ផ្គត់ផ្គង់គ្រួសារនិងត្រូវបង់អង្គការទៀត»។

អ្នកស្រីសៀន អូន អាយុ៥៩ឆ្នាំ ជាអាជីវករលក់ផ្លែឈើនៅមុខផ្សារលើធំថ្មី កំពុងអង្គុយនៅលើកៅអីជ័រ នៅខាងមុខដងផ្លូវពោរពេញទៅដោយឡាន ម៉ូតូ ក្នុងខេត្តសៀមរាប បានលើកឡើងទាំងទឹកមុខក្រៀមក្រំអំពីចំណូលប្រចាំថ្ងៃរបស់គាត់។

អ្នកស្រីសៀន អូន

អ្នកស្រីបានលើកឡើងថា ការលក់មុនពេលកូវីដបាន១លានជាងក្នុងមួយថ្ងៃ ប៉ុន្តែនៅពេលដែលកូវីដផ្ទុះខ្លាំងគេមិនឱ្យលក់ទេហើយមានពេលខ្លះរហូតដល់ដាច់បាយគ្មានអ្វីហូប ហើយអ្នកស្រីត្រូវនៅលក់ដាច់យប់មានពេលខ្លះទាល់ភ្លឺទៀតក៏មានដែរ។ បញ្ហាប្រឈមខ្លាំងរបស់អ្នកស្រីគឺអត់បាយគ្មានអ្វីហូបដោយមិនបានលក់ដូរអ្វីទាំងអស់ រហូតមកទាល់ពេលនេះទោះបីប្រទេសបានបើកឡើងវិញក៏ដោយក៏អ្នកស្រីលក់មិនដាច់ដែរ ដោយមួយថ្ងៃលក់បានតែ៣ទៅ១០ម៉ឹនរៀលតែប៉ុណ្ណោះ។

លោក គី សេរីវុឌ្ឍន៍ ប្រធាននៃមជ្ឍមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិតសភាកម្ពុជាបានប្រាប់ Newsroom Cambodiaថាវិស័យទេសចរណ៍គឺជាតួនាទីស្នូលមួយក្នុងការស្តារសេដ្ឋកិច្ចក៏ប៉ុន្តែអ្វីដែលជំរុញឲ្យទេសចរមានការដំណើរការខ្លាំងជាងនេះ វាត្រូវការជំនាញវិជ្ជាជីវៈនិងការរៀបចំវិស័យទេសចរឲ្យបានល្អ។ «ចឹងយើងសង្កេតឃើញថាមានការរៀបចំហេដ្ឋារចនាសម្ព័ន្ធបានល្អប្រសើរហើយ រដ្ឋាភិបាលបានធ្វើផ្លូវនៅក្រុងព្រះសីហនុនិងខេត្តសៀមរាប មួយកន្លែងៗចំនួន៣៨គម្រោងឯណោះ»។

បន្ថែមលើសពីនេះទៀត លោកបានបន្តថារចនាសម្ព័ន្ធលក់ដូរតាមឆ្នេរក៏មានលក្ខណៈល្អប្រសើរ ហើយមើលទៅលើស្ថានភាពនៃការផ្តល់មគ្គុទេសទេសចរណ៍ សហគមន៍ទេសចរណ៍ការលក់ផលិតផលនៅមានកម្រិតនៅឡើយចឹងហើយទាមទារឲ្យមានការពង្រឹងនិងជំរុញបន្ថែមទៀតដើម្បីឲ្យវិស័យទេសចរណ៍ដើរជាតួនាទីស្នូលក្នុងការទាញកំណើនសេដ្ឋកិច្ចបន្ទាប់ពីវិបត្តិកូវីដ១៩។

អ្នកសេដ្ឋកិច្ចរូបនេះក៏បានបន្តទៀតថា៖ «ជាមួយគ្នាផងដែរ វិស័យកសិកម្មសម្រាប់ផ្គត់ផ្គង់លើទេសចរណ៍ក៏ដើរតួនាទីសំខាន់ណាស់គឺកសិកម្មសិរីរាង្គដែលភ្ញៀវទេសចរហ៊ានចំណាយលុយយ៉ាងសម្បើមដើម្បីទទួលទានអាហារដែលគ្មានសារធាតុគីមី ទទួលទានអាហារមានវិជ្ជាជីវៈខ្ពស់ អនាម័យ ជាមួយការផ្តល់សេវាទេសចរណ៍ដ៏ល្អ សេវាបម្រើភោជនីយដ្ឋានដ៏ល្អមានការបណ្តុះបណ្តាលវិជ្ជាជីវៈ ដូច្នេះការបណ្តុះបណ្តាលវិជ្ជាជីវៈមានតួនាទីសំខាន់ក្នុងការជំរុញវិស័យនេះផងដែរ។»

លោកគី សេរីវុឌ្ឍន៍បាននិយាយថា៖«លោកមិនអាចនិយាយបានទេថាពេលណាទើបសេដ្ឋកិច្ចកម្ពុជាអាចដូចកាលពីមុនកូវីដឡើងវិញបាន ព្រោះជំងឺកូវីដវាអត់ប្រាកដច្បាស់ ចឹងពេលដែលជំងឺកូវីដអស់ ហើយការធ្វើដំណើរបើកឡើងវិញហ្នឹង ទើបអាចនិយាយបាន បើមិនមានភាពច្បាស់លាស់នៃជំងឺកូវីដទេយើងមិនអាចនិយាយបានទេ។»

លោកទៀ សីហា អភិបាលខេត្តសៀមរាបបានប្រាប់ Newsroom Cambodia ថាក្នុងអន្តរកាលកំពុងផ្ទុះកូវីដ-១៩ នៅពេលនោះ រដ្ឋបាលខេត្តបានចេញវិធានការមួយចំនួនដើម្បីកាត់ផ្ដាច់ជំងឺរាតត្បាតកូវីដ-១៩ ឈានទៅដល់ការបិទខ្ទប់ដែលបែងចែកជាតំបន់ក្រហម លឿនទុំ បៃតង។

«ចំពោះការបិទខ្ទប់នៅក្នុងតំបន់ក្រហមនានា វាធ្វើឲ្យមានការប៉ះពាល់ដល់អាជីវកម្មចំពោះពុកម៉ែបងប្អូន ដែលប្រកបមុខរបរ មិនត្រឹមតែប៉ះពាល់តែវិស័យទេសចរណ៍ ឬមួយប្រតិបត្តិទេសចរណ៍នោះទេ ប៉ុន្ដែប៉ះពាល់ដល់ការលក់ដូរផ្សេងៗ គឺត្រូវបានផ្អាកទាំងស្រុងក្នុងតំបន់ក្រហម វាធ្វើឲ្យមានផលលំបាកប៉ះពាល់ដល់ប្រជាពលរដ្ឋតែម្ដង»។

លោកអភិបាលខេត្តបានបន្តថា «រដ្ឋបាលខេត្តក៏បានជួយពាក់ព័ន្ធការបិទខ្ទប់នេះ ជួយទី១គឺការចែកស្បៀងឲ្យបានគ្រប់ៗគ្នា ថ្វីត្បិតថាមានការយឺតយ៉ាវក៏ដោយ បង្កើតជាអេប(App)ដែលសំណមពរបងប្អូន រត់រម៉កនិងកង់បីជួយដឹងជញ្ចូនស្បៀង បើកជាផ្សារតូចៗដែលអាចទិញតាមលទ្ធភាព ហើយចំពោះអ្នកដែលខ្លះខាតមែនទែន គឺតាមចៅសង្កាត់ មេឃុំគឺផ្ដល់ព័ត៌មានដល់រដ្ឋបាលខេត្ត ហើយយើងបានរៀបចំស្បៀងអាហារចំពោះគាត់ផង»។

យ៉ាងណាមិញ តំបន់ផ្សារ និងតំបន់ប្រាសាទ មានផលប៉ះពាល់ច្រើនដោយសារមានការរឹតបន្ទឹង ដែលធ្វើឲ្យប៉ះពាល់ដល់ជីវភាពខ្លាំង ប៉ុន្ដែរដ្ឋបាលខេត្តក៏បានដាក់វិធានការរៀបចំថ្មី រក្សាគម្លាត និងដាក់វេនឲ្យអាជីវករលក់ ដើម្បីដោះស្រាយជីវភាពពួកគាត់់ផងដែរ។

លោកបានមានប្រសាសន៍បន្ថែមថា «តំបន់ផ្សារ និងតំបន់ប្រាសាទ គឺមានផលប៉ះពាល់ច្រើន យើងចាត់វិធានការមួយ គឺការចុះសម្អាតផ្សារ ដូចជាដាក់គម្លាត ដាក់វេនលក់ជូនបងប្អូនប្រជាពលរដ្ឋដែលលក់ដូរនៅក្នុងផ្សារគឺមួយអាទិត្យមួយចំហៀង ហើយមួយអាទិត្យមួយទៀតចំហៀងទៀត ហើយយើងក៏បើកផ្សារបណ្ដុះអាសន្ននៅផ្សារកុងទីន័រដល់អ្នកលក់ដូរ ដែលត្រូវឆ្លាស់គ្នាមួយអាទិត្យម្ដង ទោះបីដោះស្រាយបញ្ហាពួកគាត់មិនពេញលេញ ប៉ុន្ដែក៏ដោះស្រាយជីវភាពពួកគាត់បានខ្លះៗដែរ»។

ប្រជាពលរដ្ឋអាចបើកអាជីវកម្មឡើងវិញ មកដល់បច្ចុប្បន្ននេះផ្សារទាំងអស់ត្រូវបើកឡើងវិញ ដោយមានរក្សាគម្លាត ស្កេន QR code តំបន់អង្គរត្រូវបានបើកឡើងវិញ ដូច្នេះជីវៈភាពរបស់ប្រជាពលរដ្ឋជាពិសេសអ្នកលក់ដូរបានប្រសើរជាងមុនខ្លាំងណាស់ ឥឡូវនេះបើកស្ទើរតែ៥០ភាគរយនៅសណ្ឋាគារ និងផ្ទះសំណាក់។ នេះយោងតាមលោកអភិបាលខេត្ត។

លោកក៏បាននិយាយថាសៀមរាបនឹងមានការចាប់ផ្តើមចាក់វ៉ាក់សាំងដូសទី៣ជូនប្រជាពលរដ្ឋនៅដើមខែមករានេះផងដែរ៕

Challenges Remain for Siem Reap Businesses Despite the Country Reopening

លន់ អុីនជី (Lun Inchy) — Mon, 27 Dec 2021 01:44:03 +0000

Siem Reap businesses say they are still struggling for survival despite the country reopening, and face fresh fears with the emergence of Omicron

Full story here: https://kiripost.com/stories/challenges-remain-for-siem-reap-businesses-despite-the-country-reopening

រដ្ឋាភិបាលនឹងចំណាយថវិកាជាតិចំនួន ៨,៥ ពាន់លានដុល្លារដើម្បីស្តារសេដ្ឋកិច្ច និងប្រយុទ្ធប្រឆាំងនឹងកូវីដ

សំបាន ច័ន្ទដារ៉ា (Samban Chandara) — Wed, 27 Oct 2021 01:04:16 +0000

រដ្ឋាភិបាលកម្ពុជាបានអនុម័តច្បាប់ថវិកាជាតិសម្រាប់ចំណាយក្នុងឆ្នាំ២០២២ ចំនួនរង្វង់ ៣៤,៧ ទ្រីលានរៀល ឬស្មើនឹងប្រមាណ ៨,៥ ពាន់លានដុល្លារអាមេរិក ដែលកើនជាងឆ្នាំ២០២១ ចំនួន ៨,៤%។

យោងតាមសេចក្តីព្រាងច្បាប់ស្តីពីការគ្រប់គ្រងហិរញ្ញវត្ថុដែលជាលទ្ធផលនៃសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី២២ ខែតុលា ឆ្នាំ២០២១ រដ្ឋាភិបាលកម្ពុជាបានគ្រោងចំណាយថវិកាជាតិសរុបឱ្យស្ថិតនៅក្នុងរវង្វង់ចំនួន ៣៤,៧ ទ្រីលានរៀល ឬស្មើនឹងប្រមាណ ៨,៥ ពាន់លានដុល្លារអាមេរិក ដែលស្មើនឹង ២៧,៩៥% នៃផលិតផលក្នុងស្រុកសរុប (ផ.ស.ស.) ដែលកើនឡើងចំនួន ៨,៤% បើធៀបនឹងច្បាប់ថវិកាជាតិឆ្នាំ២០២១ ។

សេចក្តីព្រាងច្បាប់ដដែលបានបន្តថា រដ្ឋាភិបាលកម្ពុជាគ្រោងនឹងប្រមូលចំណូលក្នុងថវិការដ្ឋឱ្យបានចំនួន ២៥,៦ ទ្រីលានរៀល ឬស្មើនឹង ៦,៣ ពាន់លានដុល្លារអាមេរិក ដែលស្មើនឹង ២០,៦១% នៃ ផ.ស.ស. កើនឡើង ១៩,៣% បើធៀបនឹងច្បាប់ថវិកាជាតិឆ្នាំ២០២១ ។

ដើម្បីបង្គ្រប់គម្រោងចំណាយចំនួន ៨,៥ ពាន់លានដុល្លារអាមេរិក រដ្ឋាភិបាលក៏គ្រោងនឹងខ្ចីបុលពីបរទេសដែលជាដៃគូអភិវឌ្ឍន៍ចំនួន ១៦០០ លានSDR ឬស្មើនឹង ២,២៦០ ពាន់លានដុល្លារអាមេរិកផងដែរ ដែលកើនឡើងចំនួន ១០០ លានSDR បើធៀបនឹងឆ្នាំ២០២១។

«សេចក្តីព្រាងច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២១…ត្រូវរៀបចំឡើងនៅក្នុងបរិការណ៍ដែលប្រទេសកម្ពុជាកំពុងស្ថិតនៅកណ្តាលនៃវិបត្តិកូវីដ១៩ នៅឡើយ បន្ទាប់ពីព្រឹត្តិកាណ៍សហគមន៍ ២០កុម្ភៈ ២០២១ និងការបន្តរីករាលដាលនៃមេរោគកូរ៉ូណាបំប្លែងថ្មីជាបន្តបន្ទាប់ ដែលបានបង្កឱ្យមានផលប៉ះពាល់អវិជ្ជមានធ្ងន់ធ្ងរដល់សុខភាព សង្គម សេដ្ឋកិច្ច និងជីវភាពបរស់នៅរបស់ប្រជាពលរដ្ឋព្រមទាំងកំពុងដាក់សម្ពាធធ្ងន់ធ្ងរមកលើថវិកាជាតិ»។

សេចក្តីប្រកាសព័ត៌មានដដែលបានគូសបញ្ជាក់ថា ថវិកាជាតិឆ្នាំ២០២២ នេះ ជាថវិកាសម្រាប់បន្តប្រយុទ្ធប្រឆាំងនឹងជំងឺកូវីដ១៩ និងកសាងសមត្ថភាពដើម្បីរស់នៅតាមគន្លងប្រក្រតីភាពថ្មីជាមួយជំងឺកូវីដ១៩ ព្រមទាំងទ្រទ្រង់ដល់ដំណើរការរបស់រដ្ឋកុំឱ្យរាំងស្ទះ ហើយនិងការស្តារជីវភាពប្រជាជន រួមផ្សំនឹងការស្តារកិច្ចអភិវឌ្ឍន៍សង្គម សេដ្ឋកិច្ចកម្ពុជា ក្នុងន័យជុំរុញកំណើនសេដ្ឋកិច្ចជាតិឡើងវិញ ។

ជុំវិញបញ្ហានេះ លោកគី សេរីវឌ្ឍន៍ អ្នកស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជា បានគូសបញ្ជាក់ថា ទំហំទឹកប្រាក់ចំនួន ៨,៥ ពាន់លានដុល្លារ ដែលជាកញ្ចប់ថវិកាដែលរដ្ឋាភិបាលគ្រោងចំណាយគឺដើម្បីជុំរុញដល់កំណើនសេដ្ឋកិច្ចជាតិក្រោយវិបត្តិកូវីដ១៩។

លោកបានបន្តថា៖ «ដោយសារកញ្ចប់ថវិកាចំណូលពន្ធរដ្ឋមានតែ ៦ ពាន់លានជាង ដូច្នេះកញ្ចប់ថវិកានេះ វាប្រើប្រាស់សម្រាប់តែចំណាយចរន្ត អ៊ីចឹងហើយ សម្រាប់ការចំណាយមូលធនបន្ថែម ដែលរដ្ឋាភិបាលជុំរុញការអភិវឌ្ឍន៍ទៅលើវិស័យហេដ្ឋារចនាសម្ព័ននេះ នៅមានការខ្វះខាត ទើបត្រូវការកម្ចីថវិកាពីក្រៅប្រទេស» ។

ជុំវិញបញ្ហាដែលកម្ពុជាកើនប្រាក់កម្ចីពីបរទេសនៅឆ្នាំ ២០២២ នោះ លោកគី សេរីវឌ្ឍន៍បានយល់ឃើញថា បើគេនិយាយពីបំណុលសាធារណៈ គេត្រូវធៀបជាមួយនឹងចំណូលជាតិ ដែលក្នុងឆ្នាំ ២០២១ នេះ បំណុលរបស់កម្ពុជាមានត្រឹមតែ ៣០% ប៉ុណ្ណោះ ហើយកម្ពុជានៅមានលទ្ធភាពខ្ចីបន្ថែមទៀត។

គួររម្លឹកថា កាលពីពាក់កណ្តាលឆ្នាំ២០២១ រដ្ឋាភិបាលកម្ពុជាបានប៉ាន់ស្មានពីទំហំសេដ្ឋកិច្ចកម្ពុជាថាមានកំណើនក្នុងអត្រា ២,៤% ដែលប្រហាក់ប្រហែលនឹងការព្យាករណ៍របស់ស្ថាប័នអន្តរជាតិធំៗ ក្នុងរង្វង់ ២,០% ។

ក្នុងការប្រយុទ្ធប្រឆាំងនឹងជំងឺកូវីដ១៩ កន្លងទៅនេះ រដ្ឋាភិបាលកម្ពុជាអាចចំណាយថវិកាក្នុងរង្វង់ ១ពាន់លានដុល្លារអាមេរិក កើនឡើងខ្លាំងពីការរំពឹងទុកពីដើមឆ្នាំត្រឹម ៣០លានដុល្លារ៕

ក្រសួងសេដ្ឋកិច្ចដាក់ឲ្យដំណើរការប្រព័ន្ធស្នើសុំលិខិតបញ្ជាក់ ដើម្បីសម្រួលការធ្វើចត្តាឡីស័កសម្រាប់អ្នកដំណើរ

លន់ អុីនជី (Lun Inchy) — Mon, 18 Oct 2021 07:27:05 +0000

ក្រសួងសេដ្ឋកិច្ច និងហិរញ្ញវត្ថុ នឹងដាក់ដំណើរការឡើងវិញនូវប្រព័ន្ធស្នើសុំលិខិតបញ្ជាក់លើការធានា និងការអញ្ជើញសម្រាប់អ្នកដំណើរ ជាវិនិយោគិន បុគ្គលជំនាញបច្ចេកទេស និងក្រុមគ្រួសារចូលក្នុងប្រទេសកម្ពុជាចាប់ពីថ្ងៃទី១៨ ខែតុលា ឆ្នាំ២០២១ ដើម្បីគាំទ្រ និងសម្រួលដល់របបនៃការធ្វើចត្តាឡីស័ក។

តាមសេចក្តីប្រកាសព័ត៌មានរបស់ក្រសួងសេដ្ឋកិច្ច ចេញថ្ងៃទី១៧ ខែតុលា ឆ្នាំ២០២១ ការដាក់ដំណើរការនូវប្រព័ន្ធស្នើសុំលិខិតទាំងពីរឡើងវិញនេះ ដើម្បីគាំទ្រ និងសម្រួលដល់ការអនុវត្តសេចក្តីជូនដំណឹងរបស់ក្រសួងសុខាភិបាល ចេញថ្ងៃទី១៦ ខែតុលា ឆ្នាំ២០២១ ស្តីពីលក្ខខណ្ឌធ្វើដំណើរការអនុវត្តវិធានសុខាភិបាល និងការធ្វើចត្តាឡីស័កសម្រាប់អ្នកដំណើរចូលកម្ពុជា ស្របតាមគន្លងប្រក្រតីភាពថ្មី។ ការដាក់ដំណើរការប្រព័ន្ធស្នើសុំលិខិតបញ្ជាក់លើការធានានេះ ជាការសហការជាមួយក្រសួងសុខាភិបាល គណៈកម្មាធិការទី២នៃគណៈប្រចាំការនៃគណៈកម្មាធិការប្រយុទ្ធនឹងជំងឺកូវីដ១៩ និងក្រសួង-ស្ថាប័នពាក់ព័ន្ធ។

ក្នុងសេចក្តីប្រកាសព័ត៌មានដដែលបានបន្ថែមថា យន្តការនេះធ្វើឡើងលើថ្នាលផ្លាល់ប្តូរទិន្នន័យកម្ពុជា (CamDX) តាមរយៈគេហទំព័រ www.registrationservices.gov.kh។ វិនិយោគិន បុគ្គលជំនាញបច្ចេកទេស និងក្រុមគ្រួសារត្រូវតែមានការធានា ឬអញ្ជើញពីដៃគូរក្នុងស្រុកដែលជានីតិបុគ្គលស្របច្បាប់ មានការចុះបញ្ជី និងបង់ពន្ធត្រឹមត្រូវនៅកម្ពុជា។ ចំពោះលិខិតបញ្ជាក់ទាំងពីរនេះមានទម្រង់ឌីជីថល និងមានសុពលភាព៣០ថ្ងៃអាចប្រើប្រាស់បានតែ១ដងគត់។

ក្រសួងសេដ្ឋកិច្ចក៏បានបញ្ជាក់ផងដែរថា៖ «សម្រាប់ព័ត៌មានបន្ថែមពាក់ព័ន្ធនឹងការប្រើប្រាស់ប្រព័ន្ធ ក៏ដូចជាការដាក់ពាក្យស្នើសុំលិខិតបញ្ជាក់លើការធានា និងអញ្ជើញ សាធារណៈជនអាចទាញយកឯកសារណែនាំ (User Manual) និងដាក់ពាក្យស្នើរសុំតាមរយៈគេហទំព័រ www.registrationservices.gov.kh និងទាក់ទងមកក្រុមការងារគាំទ្រប្រព័ន្ធនៅរៀងរាល់ម៉ោងធ្វើការ តាមរយៈលេខទូរស័ព្ទទាន់ហេតុការណ៍ ០៩២ ៨៨៨ ២៩៦ ឬអ៊ីម៉ែល vagi@mef.gov.kh»៕

រដ្ឋាភិបាលថានឹងកែលម្អឆ្នេរភក់សមុទ្រកែបឲ្យទៅជាឆ្នេរខ្សាច់កម្សាន្តស្អាត

គង់ រស្មី (Kong Raksmey) — Thu, 19 Aug 2021 15:03:42 +0000

គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក) បានប្រកាសកាលពីថ្ងៃទី ២២ ខែកក្កដា ឆ្នាំ ២០២១ ថានឹងកែលម្អឆ្នេរភក់ ឲ្យទៅជាឆ្នេរខ្សាច់កម្សាន្តសាធារណៈកម្រិតខ្ពស់ប្រវែង ២៧០០ ម៉ែត្រ ចាប់ពីផ្សារក្តាម ទៅដល់ព្រៃកោងកាង ស្ថិតនៅភូមិថ្មី សង្កាត់ព្រៃធំ ក្រុងកែប។

សេចក្តីប្រកាសដដែលបានបញ្ចាក់ទៀតថា គម្រោងនេះនឹងមានការរៀបចំកែលម្អឆ្នេរខ្សាច់កម្សាន្តសាធារណៈកម្រិតខ្ពស់តាមបណ្តោយឆ្នេរសមុទ្រ ដែលមានប្រវែងទទឹងយ៉ាងតិច ៣០ម៉ែត្រ និង បណ្តោយប្រវែង ២៧០០ម៉ែត្រ ដោយការរៀបចំគ្រឹះ និងចាក់ខ្សាច់សល្អ។

រូបគំរោងចេញដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា

ការកែលម្អក៏នឹងមានការចំសួនច្បារសាធារណៈ និងដាំដើមឈើនៅលើដីចំណីរឆ្នេរសមុទ្រដែលមានទទឹងប្រវែង ៥០ម៉ែត្រ ដោយការរៀបចំគ្រឹះ និងចាក់ដីមានជីជាតិល្អសម្រាប់សួនច្បារ និង ការដាំដើមឈើ។ នេះយោងតាមសេចក្តីប្រកាសដដែល។

សេចក្តីប្រកាសដដែលបានបន្តថា ថវិកាសម្រាប់គំរោងនេះគឺជាការចូលរួមរបស់ម្ចាស់ដីនៅជាប់ឆ្នេរសមុទ្រ ជាថ្នូរនឹងការទទួលបានដីប្រវែង ៥០ម៉ែត្រ បន្តពីព្រំដីកម្មសិទ្ធិឆ្ពោះទៅសួនច្បារ៕

Q & A យល់ដឹងអំពីការចំណាកស្រុកប្រកបដោយសុវត្ថិភាព

គង់ រស្មី (Kong Raksmey) — Sun, 15 Aug 2021 15:27:59 +0000

ប្រជាជនកម្ពុជារាប់លាននាក់បានធ្វើចំណាកស្រុកដើម្បីស្វែងរកការងារធ្វើដើម្បីជីវិតប្រសើរ ហើយពួកគាត់ខ្លះ ក៏បានទទួលរងនូវការរំលោភបំពាន និងការកេងប្រវ័ញ្ចផងដែរ។ នេះយោងតាមលោកសារុន កី ប្រធានប្រតិបត្តិគម្រោងសិទ្ធិការងារ របស់អង្គការវីវើល ជីវីស៊ី (WeWorld GVC) ជាអង្គការក្រៅរដ្ឋាភិបាលដែលធ្វើការការពារពលករចំណាកស្រុក ជាពិសេសស្ត្រី និងកុមារ។

លោកសារុន កី បានផ្តល់បទសម្ភាសន៍ជាសំណួរ ចំលើយដល់សិក្ខាកាម Newsroom Cambodia កញ្ញាគង់ រស្មី អំពី ការយល់ដឹងបន្ថែមអំពីការចំណាកស្រុកប្រកបដោយសុវត្ថិភាព ទោះបីស្ថិតក្នុងកាលៈទេសៈណាក៍ដោយ ជាពិសេសស្ត្រី និងកុមារ។

លោកសារុន កី

Q: តើលោកយល់យ៉ាងណាដែលចំពោះការចំណាកស្រុកនៅក្នុងប្រទេសកម្ពុជា?

A: ការធ្វើចំណាកស្រុករកការងារ គឺជាកត្តាជម្រុញយ៉ាងសំខាន់នៃកំណើនសេដ្ឋកិច្ច និងការកាត់បន្ថយភាពក្រីក្រទាំងនៅក្នុងប្រទេសកំណើត និងប្រទេសគោលដៅនៅក្នុងបណ្តាប្រទេសអាស៊ាន។ក្រសួងការងារ និងបណ្តុះបណ្តាលវិជ្ជាជីវៈ ប៉ាន់ប្រមាណថា ប្រជាជនកម្ពុជាជាងមួយលាននាក់ធ្វើការក្រៅ ប្រទេស ដូចជាប្រទេសថៃ ម៉ាឡេស៊ី កូរ៉េ និងជប៉ុន។ ទោះបីជាជនចំណាកស្រុកកម្ពុជាមិនមែនជាក្រុមដែលមានចំនួនច្រើនជាងគេក៏ដោយ ក៏ពួកគេជាក្រុមដែលងាយរងគ្រោះជាងគេក្នុងចំណោមជនចំណាកស្រុកមកពីបណ្តាប្រទេសអាស៊ាន។

ដោយសារតែខ្វះព័ត៌មាន ការផ្តល់សេវារបស់រដ្ឋាភិបាលកម្ពុជានៅមានកម្រឹត (រួមទាំងស្ថានទូតកម្ពុជាប្រចាំប្រទេសថៃ) ការត្រួតពិនិត្យមិនបានដិតដល់ចំពោះទីភ្នាក់ងារជ្រើសរើសពលករ និងនិយោជក និងទំនោរស្ទាក់ស្ទើរក្នុងការទាក់ទងអាជ្ញាធរដើម្បីជួយជនចំណាកស្រុកកម្ពុជាភាគច្រើនដែលទទួលរងនូវការរំលោភបំពាន និងការកេងប្រវ័ញ្ច។

ដោយសារការចំណាយខ្ពស់ រយៈពេលយូរ និងភាពស្មុគស្មាញក្នុងការឆ្លងកាត់បណ្តាញទ្វេភាគី ដែលមានស្រាប់សម្រាប់ការធ្វើចំណាកស្រុក ពួកគេភាគច្រើនត្រូវបានជួលឱ្យធ្វើការក្នុងស្ថានភាពមិនប្រក្រតី។

Q: តើអ្វីជាបញ្ហាប្រឈមនៃជនចំណាកស្រុក ដែលពួកគាត់បានជួបប្រទះ?

A: ដោយសារតែការរីករាលដាលនៃជំងឺកូវិដ ១៩ ពលករចំណាកស្រុកកម្ពុជារាប់ម៉ឺននាក់ ភាគច្រើននៅក្នុងប្រទេសថៃ បានបាត់បង់ការងារ ហើយបង្ខំចិត្តវិលត្រឡប់មកស្រុកកំណើតទាំងគ្មានប្រាក់ ដោយសារតែអត់មានការងារធ្វើ និងការរឹតបន្តឹងរបស់រដ្ឋាភិបាលថៃ ដើម្បីទប់ស្កាត់ការរីករាលដាល។

Q: តើធ្វើយ៉ាងណាដើម្បីធ្វើការចំណាកស្រុកប្រកបដោយសុវត្ថិភាព?

A: បើអ្នកចង់ធ្វើចំណាកស្រុកទៅក្រៅប្រទេស អ្នកត្រូវទៅដោយស្របច្បាប់ បើមិនដូច្នោះទេ អ្នកអាចនឹងមានគ្រោះថ្នាក់។ វិធីសំខាន់តែមួយគត់ដើម្បីកាត់បន្ថយគ្រោះថ្នាក់ទាំងនោះ គឺការធ្វើចំណាកស្រុកដោយស្របច្បាប់ហើយដើម្បីធ្វើចំណាកស្រុកប្រកបដោយសុវត្ថិភាពអ្នកត្រូវមានអាយុ ១៨ ឆ្នាំឡើងទៅ ទៅកាន់មន្ទីរការងារ និងបណ្ដុះបណ្ដាលវិជ្ជាជីវៈក្នុងខេត្តព្រះអ្នករស់នៅ ដើម្បីពិភាក្សាជាមួយនឹងមន្ត្រីមជ្ឈមណ្ឌលការងារ អំពីការធ្វើចំណាកស្រុកប្រកបដោយសុវត្ថិភាព។

ប្រើប្រាស់សេវាក្រុមហ៊ុនជ្រើសរើសពលករ ដែលណែនាំដោយមន្ទីរការងារ និងបណ្ដុះបណ្ដាលវិជ្ជាជីវៈ។ មន្ទីរការងារអាចដឹងថាក្រុមហ៊ុនជ្រើសរើសពលករមួយណាដែលល្អ ត្រឹមត្រូវ មិនបោកប្រាស់។

ធ្វើលិខិតឆ្លងដែន។ លិខិតឆ្លងដែនគឺជាឯកសារអត្តសញ្ញាណមួយដ៏សំខាន់សម្រាប់ពលករចំណាកស្រុកទាំងឡាយ ដូច្នេះអ្នកត្រូវទៅធ្វើលិខិតឆ្លងដែនជាដាច់ខាតមុននឹងសម្រេចចិត្តធ្វើចំណាកស្រុក។

សម្របសម្រួលជាមួយក្រុមហ៊ុនជ្រើសរើសពលករស្របច្បាប់ដើម្បីប្រាកដថាអ្នកមានឯកសារគ្រប់គ្រាន់ អ្នកត្រូវមានឯកសារដូចជា សំបុត្រធ្វើដំណើរ កាតពលករកម្ពុជាធ្វើការក្រៅប្រទេស លិខិតអនុញ្ញាតឲ្យធ្វើការងារ លិខិតឆ្លងដែន ទិដ្ឋាការការងារ កិច្ចសន្យាការងារ។

ទទួលការបណ្ដុះបណ្ដាលអំពីការធ្វើចំណាកស្រុកដោយសុវត្ថិភាព មុនពេលចេញដំណើរទៅធ្វើការនៅក្រៅប្រទេស អ្នកគួរទទួលបាននូវវគ្គបណ្ដុះបណ្ដាលអំពីការធ្វើចំណាកស្រុកដោយសុវត្ថិភាព ពីភ្នាក់ងាររកការងារឱ្យធ្វើរបស់អ្នក។

Q: យើងបានដឹងហើយថា ស្ត្រី និងកុមារមានបញ្ហាប្រឈមខ្លាំង តើលោកគិតថា តើត្រូវធ្វើយ៉ាងណាដើម្បី កាត់បន្ថយបញ្ហានេះទៅលើស្ត្រី?

A: ជាការពិតណាស់ហើយថាស្ត្រី និងកុមារ គឺជាជនងាយរងគ្រោះចំពោះការធ្វើចំណាកស្រុក ប្រសិនបើការធ្វើចំណាកស្រុករបស់ពួកគាត់ ដោយមិនស្របច្បាប់។ ដូច្នេះដើម្បីកាត់បន្ថយហានិភ័យ សម្រាប់ស្ត្រីនិងកុមារ ស្ត្រីទាំងឡាយដែលមានបំណងធ្វើចំណាកស្រុក ដាច់ខាតត្រូវតែប្រាកដថា ធ្វើចំណាកស្រុកដោយស្របច្បាប់ ដោយមានឯកសារគ្រប់គ្រាន់។ ពីព្រោះនៅពេលដែលពួកគេទៅដោយស្របច្បាប់ ដោយសុវត្ថិភាព មានន័យថាពួកគេនឹងទទួលបាននូវសេវាផ្សេងៗដែលអាជ្ញាធរថៃ ក៏ដូចជានិយោជក នឹងផ្ដល់ឱ្យ ក្នុងពេលដែលពួកគាត់ស្នាក់នៅ និងធ្វើការនៅតាមក្រុមហ៊ុននៅក្នុងប្រទេសថៃនោះ។

Q: តើអ្វីជាសំណូមពរ និងជាសារចុងក្រោយរបស់បងទៅកាន់ អ្នកដែលកំពុងអាន អំពីការធ្វើចំណាកស្រុក ក៍ដូចជាការការពារខ្លួន?

A: ចំពោះយោបល់របស់ខ្ញុំ និងជាសារចុងក្រោយរបស់ខ្ញុំ ខ្ញុំសូមផ្ដាំផ្ញើថាប្រជាពលរដ្ឋទាំងឡាយដែលមានបំណងធ្វើចំណាកស្រុកទៅធ្វើការងារក្រៅប្រទេស ដាច់ខាតត្រូវតែទៅដោយស្របច្បាប់ មានន័យថាមានឯកសារគ្រប់គ្រាន់ដូចដែលបានរៀបរាប់ខាងលើ៕

បទយកការណ៍៖ ជីវភាពអ្នកសេដ្ឋកិច្ចក្រៅប្រព័ន្ធកាន់តែទាល់ច្រក ខណៈតម្លៃប្រេងឥន្ធនៈបន្តកើនឡើងក្នុងវិបត្តិកូវីដ

មាស មល្លិកា (Meas Molika) — Thu, 29 Jul 2021 07:48:05 +0000

នាថ្ងៃត្រង់បើកថ្ងៃចែស លាយខ្យល់បក់តិចៗផង នាថ្ងៃព្រហស្បតិ៍សមជាថ្ងៃមានមនុស្សអ៊ូអរដោយអ្នកដំណើរទៅមកច្រើនតាមដងផ្លូវ។ មានកង់បីសារីថ្មីដែលគេនិយមហៅថា Passapp បរចុះឡើងគ្មានអ្នកដំណើរដើម្បីរកភ្ញៀវ អ្នករត់កង់បីខ្លះទៀតសំចតនៅតាមរបងសាលា និងផ្ទះគេនៅក្នុងបុរីពិភពថ្មី និងខ្លះទៀតចតសរសៀរតាមចិញ្ចើមផ្លូវ។

បុរសវ័យកណ្តាល់ជាង ពាក់អាវពណ៌លឿងឆ្នូតសដៃវែង កំពុងអង្គុយសំកុកលើរ៉ឺម៉កកង់បីខ្មែរ ហើយនិយាយជាមួយមិត្តរួមវិស័យដឹកអ្នកដំណើរដូចគ្នា។ ខុសពីគាត់ មិត្តរបស់គាត់មានម៉ូតូកង់បីដែលគ្រប់គ្នាស្គាល់ថាជាកង់បីឥណ្ឌានោះ។ កំពុងតែនិយាយគ្នា ស្រាប់តែកង់បីឥណ្ឌាបរចេញទៅ នៅសល់តែបុរសវ័យជាងពាក់កណ្តាល សម្បុរសណ្តែកបាយ ជាមួយសក់រួញអង្គារដីពណ៌ខ្មៅរូបនេះ មិនចេញម៉ូតូកង់បីខ្មែររបស់ខ្លួនទៅណាដូចកង់បីឯទៀតទេ។ ដោយឡែកលោកបែរជាចុចទូរស័ព្ទចុះឡើង ហាក់កំពុងឆែកមើលទូរស័ព្ទដៃខ្លួនបណ្តើរដែលទំនងជាកំពុងទន្ទឹងរងចាំនរណាខលមក រីឯភ្នែកទាំងគូឆ្លៀតរំពៃរកមនុស្សម្នាឆ្លងកាត់ទីនោះក្រែងមានអ្នកហៅដើម្បីជិះ។

បុរសម្នាក់នោះគឺជាអ្នកប្រកបរបររត់កង់បីខ្មែរដើម្បីចិញ្ចឹមជីវិត ដែលតែងចាំម៉ូយនៅម្តុំបរិវេណបុរីពិភពថ្មី ផ្សារឈូកមាស។ លោកមានឈ្មោះថា សុខ វណ្ណនី ជាអ្នកស្រុកខេត្តបាត់ដំបង លោកបានប្រាប់ Newsroom Cambodia ថា លោកចិញ្ចឹមជីវិតលើសេវាដឹកជញ្ជូនអាស្រ័យទោចក្រយានតាំងពីឆ្នាំ១៩៩១ មកម្ល៉េះ បើគិតមកទល់ឆ្នាំ២០២១នេះអស់រយ:ពេល៣០ឆ្នាំមកហើយ។

លោកសុខ សុវណ្ណនី

លោកបានត្អូញត្អែរពីបញ្ហាខ្សត់ភ្ញៀវដឹក ក្នុងរយ:ពេល២ ទៅ៣ ថ្ងៃនេះ ហើយលោកបាននិយាយថា មកទល់ថ្ងៃត្រង់នេះ រកបានតែលុយចំនួន ៧០០០រៀលប៉ុណ្ណោះពីការដឹកអតិថិជនបានតែម្នាក់តាំងពីព្រឹកមក។ ខណ:ដែលម៉ូតូរបស់លោក វណ្ណនីជាប្រភេទម៉ូតូដែលអាចចាក់បានតែប្រេងស៊ុបពែតែប៉ុណ្ណោះដែលជាប្រភេទប្រេងកំពុងមានតម្លៃឡើងដល់ ៤៦០០រៀលក្នុងមួយលីត្រ លើសពីតម្លៃប្រភេទប្រេងឥន្ធន:ដទៃទៀត ដោយប្រេងសាំងធម្មតាមានតម្លៃស្មើ៤១០០ រៀលក្នុងមួយលីត្រ លោកមិនបានតំឡើងថ្លៃដឹកពីភ្ញៀវរបស់លោកនោះទេ។

ហេតុបែបនេះ បានធ្វើឱ្យលោកនិយាយទាំងជ្រួញចិញ្ចើមចេញជាផ្នត់ៗ ដោយទឹកមុខតានតឹងផងថា ៖ «តម្លៃធម្មតា ធ្លាប់យកប៉ុនណាយកប៉ុណ្ណឹង អត់ហ៊ានឡើងថ្លៃផង។ ហើយរាល់ថ្ងៃអត់មានទេ! អត់មានម៉ូយដឹក រកពីរ បី ថ្ងៃហើយ អត់ម៉ូយអ្នកជិះ! ហើយសាំងឡើងថ្លៃ ប្រសិនបើមានម៉ូយដឹក ក៏នៅតែយកតម្លៃដដែល អត់បានឡើង (តម្លៃ) ទេ»។

គាត់បានអះអាងថា រកបានអតិថិជនកាន់តែតិចទៅៗ ដោយភ្ញៀវរបស់គាត់ភាគច្រើនខ្លាចឆ្លងកូវីដ និងចាប់ផ្តើមលែងសូវហ៊ានធ្វើដំណើរទៅក្រៅញឹកញាប់ដូចកាលពីមុន។

បុរសដែលមានគ្រួសារក្នុងបន្ទុកចំនួន ៤នាក់ ជាមួយកូនតូចៗ២នាក់ បានអះអាងថាលោកត្រូវចំណាយលើថ្លៃប្រេងស៊ុបពែ ៤៦០០រៀលក្នុង១លីត្រ ជាអចិន្រ្តៃយ៍ទោះបីជាមួយថ្ងៃនោះមិនទទួលបានភ្ញៀវដឹកសូម្បីតែម្នាក់ក៏ដោយ ។

«អត់មានភ្ញៀវ ១ថ្ងៃ១លីត្រ ! គ្រាន់តែជិះទៅនឹងមកកន្លះលីត្របាត់ហើយទៅឈូកវ៉ា (ទីតាំងផ្ទះជួលរបស់លោក វណ្ណនី) ជួនកាលបានតែមកហើយ ល្ងាចឡើងទៅវិញ» នេះជាសម្តីដែលលោក វណ្ណនី អង្គុយលើកង់បីរបស់ខ្លួនផ្ទាល់។

«កាន់តែស្ងាត់ទៅៗ ហើយ! បើឥណ្ឌាគេតផាសអ៊ែប (Pass app) គេមានខ្លះ។ ហើយយើងអត់មានតផាសអ៊ែប (Pass app) នឹងគេទេ។ សំខាន់គ្មានម៉ូយ បើម៉ូយអត់តេ (ខល) អត់ហើយ។ ឥឡូវម៉ូយអត់មានដើរទៅណាទេ គេខ្លាចកូវីដ […] តែយើងខ្លាចដែលធ្វើម៉េចបើយើងត្រូវតែមករក បើអត់រក អត់ (ចំណូល) ! កាន់តែយ៉ាប់ទៅៗហើយ…មួយថ្ងៃបានលុយ ៧០០០ (រៀល) ធ្វើអីគ្រប់? ចាក់តែសាំង!»។

លោកបានបញ្ជាក់ថាទោះបីជាក្រោយការបិទខ្ទប់ទីក្រុង លោកនៅតែពិបាកក្នុងការរកអ្នកដំណើរជិះកង់បីរបស់លោកជាខ្លាំងដោយយល់ថាមនុស្សម្នាមិនសូវហ៊ានចេញក្រៅច្រើនដូចសព្វមួយដង ហើយតម្លៃប្រេងស៊ុបពែឡើងថ្លៃបែបនេះទៀត រឹតតែមិនអាចរកផលចំណេញពីការដឹកភ្ញៀវបានបន្ថែមទៅទៀត។ អ្នកមកពីខេត្តបាត់ដំបងរូបនេះបានរៀបរ៉ាប់ទាំងក្តីអស់សង្ឃឹមថា៖ «ហើយឥឡូវឈប់រត់ម៉ូតូកង់បីទៅរកអី? យើងអត់មានតម្រិះវិជ្ជាក្នុងខ្លួន ហើយរត់ម៉ូតូឡើងចង់ស្លាប់ទៅវិញហើយ»។

ប្រជាពលរដ្ឋខ្មែរជាពិសេសអ្នកប្រកបរបរជាអ្នកសេដ្ឋកិច្ចក្រៅប្រព័ន្ធ បានសម្តែងការព្រួយបារម្ភក្នុងការទ្រាំទ្រជីវភាពរបស់ខ្លួនក្នុងគ្រាលំបាកចំពេលទំនិញកំពុងឡើងថ្លៃ ដើរទទឹមគ្នានឹងពេលតម្លៃប្រេងឥន្ធន:នៅប្រទេសកម្ពុជា ចាប់ផ្តើមកើនឡើងនៅថ្ងៃទី១៦ ខែកក្កដា ឆ្នាំ២០២១ ដោយតម្លៃប្រេងសាំងធម្មតាឡើងដល់ ៤១០០រៀល/លីត្រ ប្រេងស៊ុបពែថ្លៃ ៤៦៤០រៀល/លីត្រ និង ប្រេងម៉ាស៊ូតថ្លៃ ៣៦៥០រៀល/លីត្រ។

ក្រឡេកមកមើលអ្នករត់កង់បីឥណ្ឌា ដែលប្រើប្រាស់កម្មវិធីអនឡាញក្នុងការរកភ្ញៀវដឹកវិញម្តង ដែលកំពុងអង្គុយសំកុកចាំភ្ញៀវនិងការហៅចូលរបស់អតិថិជនតាមទូរស័ព្ទដៃក្នុងកង់បីរបស់ខ្លួន បានបញ្ជាក់ថាទោះបីជាកង់បីឥណ្ឌាល្បីថាមិនចាក់សាំងក្តី ប៉ុន្តែកង់បីប្រភេទនេះនៅតែត្រូវការចាក់ទាំងប្រេងសាំងធម្មតា និងហ្គាសទើបអាចដំណើរការបាន។

លោកចន្ទ ពិសី អាយុ៤០ឆ្នាំ ដែលជាអ្នកចាប់របររត់កង់បីឥណ្ឌាក្នុងរយ:ពេល ២ឆ្នាំចុងក្រោយនេះបានប្រាប់ទាំងភ្នែកក្រហមចេញសរសៃ ដោយនឿយហត់ថា៖ «វាប៉ះពាល់ហើយ ដោយសារអី វាអត់មានមនុស្សដើរទេ រាល់ថ្ងៃអត់មានភ្ញៀវទេ បើរយ:ពេលតាំងពីព្រឹកដល់ស្មើនេះ […] បើនិយាយពី Booking Pass app [ការកក់] វិញ អត់រកអាលីញ អត់មានភ្ញៀវរក ដល់អញ្ចឹងពិបាកដែរ ព្រោះអីណាមួយសាំងក៏ឡើងថ្លៃ ហ្គាសក៏ថ្លៃ ប៉ុន្តែពួកខ្ញុំប្រើហ្គាសទេ ប៉ុន្តែហ្គាសក៏ថ្លៃដែរ។ […] ប៉ុន្តែឥឡូវឡើងមែនទែនអត់ចុះទេ ណាមួយសម័យនេះអត់មានមនុស្សទៀត។ ដល់អញ្ចឹង ពួកខ្ញុំពិបាកខ្លាំងម៉ងហ៎ា ប៉ុន្តែយើងមិនដឹងធ្វើយ៉ាងម៉េចទេអានឹង»។

តម្លៃហ្គាសកាលពីមុនត្រឹមតែ ១២០០រៀលតែប៉ុណ្ណោះ ប៉ុន្តែនាពេលថ្មីៗនេះចាប់តាំងពីតម្លៃប្រេងសាំងឡើងដល់ ៤១០០រៀល មក ថ្លៃហ្គាសដែលលោកចាក់ក៏មានការកើនឡើងដូចគ្នាដែរ ពោលហក់ដល់ចន្លោះពី ២០០០ ទៅ ២២០០រៀលក្នុងមួយលីត្រ។ នេះជាការបញ្ជាក់ផ្ទាល់ពីលោកពិសី។

លោកពិសី បាននិយាយថាលោកនឹងផ្លាស់ប្តូររបរនេះ ទៅរកការដឹកជញ្ជូនទំនិញអនឡាញវិញព្រោះលោកគិតថាមិនអាចទប់ទល់ការចំណាយថ្លៃបង់កង់បីនេះឱ្យក្រុមហ៊ុនបាន ស្របពេលដែលអតិថិជនក៏ស្រុតចុះខ្លាំងជាលំដាប់ គួបផ្សំនឹងការឡើងថ្លៃហ្គាស និងសាំងថែមទៀត។ លោកបានបន្តថាមានតែបង្ខំចិត្តទាំងដែលកាលពីមុនលោកធ្លាប់លក់រ៉ឺម៉កកង់បីខ្មែរចោល ហើយប្តូរមកបញ្ចាំកង់បីឥណ្ឌា ប៉ុន្តែលោកមិននឹកស្មានថាមានវិបត្តិកូវីដ ទន្ទឹមនឹងការតំឡើងថ្លៃសាំងផងនោះការខិតខំរកចំណូលលើកង់បីឥណ្ឌាបែបឌីជីថលនេះ ត្រូវបាត់បង់នាពេលឆាប់ៗនេះ។

អ្នកស្រីស្រី អូន ដែលជាអ្នកលក់បន្លែនៅផ្សារអូរឬស្សី បានពន្យល់ពីបញ្ហាថ្លៃសាំងឡើងថ្លៃដែលធ្វើឱ្យប៉ះពាល់ដល់ការលក់បន្លែរបស់អ្នកស្រីធ្លាក់ចុះខ្លាំង ព្រមទាំងធ្វើឱ្យអ្នកស្រីបង្ខំចិត្តដំឡើងតម្លៃបន្លែដែលធ្លាប់លក់ក្នុងតម្លៃសមរម្យរហូតដល់ពេលនេះបរិមាណនៃការលក់ចេញចេះតែថយចុះទៅៗ ដោយអតិថិជនមានការរអ៊ូរទាំពីការរកចំណូលមិនសូវបានហើយបន្លែឡើងថ្លៃទៀត។

«សាំងឡើងថ្លៃ ប្រេងឡើងថ្លៃ អ្នកភ្ជួរដីឱ្យយើងក៏ឡើងថ្លៃ។ ឧទាហរណ៍ថា ១ម៉ោង ៤ម៉ឺន (រៀល) ឥឡូវឡើង ៥ ម៉ឺន (រៀល) »។

អ្នកស្រីស្រី អូន

អ្នកស្រីបានបន្តថា ដោយត្រាក់ទ័រសម្រាប់ប្រើក្នុងការភ្ជួរដីដាំដំណាំប្រើប្រេងម៉ាស៊ូត ដោយកាលពីមុនអ្នកស្រីចំណាយទ្វេដងដល់ ៩ម៉ឺនរៀលក្នុងមួយកាន ដោយកាលពីមុនវាមានតម្លៃ ៧ម៉ឺនរៀល ក្នុងមួយកានដែលកើនឡើងប្រមាណជា ២ម៉ឺនរៀល ឬ ៥ដុល្លារ។ ហើយថ្លៃឈ្នួលកម្មករករឡើងថ្លៃទទឹមគ្នាដែរ គឺមានការឡើងគុណ នឹង២ដង បើធៀបទៅនឹងថ្លៃឈ្នួលដាំដំណាំកាលពីមុនត្រឹម ១៥០០០រៀល ឡើងដល់ ៣០០០០រៀល។

អ្នកស្រីបានយល់ថាការលក់ដូរបន្លែរបស់អ្នកស្រីមិនមានផលចំណេញនោះទេ គឺបានតែមួយហូបតែប៉ុណ្ណោះក្នុងកាល:ទេស:ថ្លៃសាំងឡើងនេះ។ «គ្មានដែលគិតថាឱ្យសល់ (ប្រាក់) ទេ! រាល់ថ្ងៃនេះ! បើថាស៊ីមិនឱ្យជំពាក់គេ នៅតែជំពាក់គេទៀត»។

លោក កៀត សាយ ដែលជាអ្នកលក់ទឹកអំពៅនៅទល់មុខផ្សារអូរឬស្សីបានប្រាប់ Newsroom Cambodia ថាការលក់មានការថយចុះគួរឱ្យកត់សម្គាល់បើធៀបនឹងការលក់នៅ២ ទៅ៣ ខែមុន។ លោកយល់ថានេះប្រហែលមកពីសេដ្ឋកិច្ចកំពុងធ្លាក់ចុះ ហើយលោកក៏បានត្អូញត្អែរពីការឡើងថ្លៃសាំងដែរថា ៖ «មិនងាយទេ ហើយយើងត្រូវការសាំង ហើយសាំងឡើងម្លឹងៗ»។

លោក និងភរិយាក៏បានអំពាវនាវឱ្យរាជរដ្ឋាភិបាលទម្លាក់ថ្លៃសាំងក្នុងពេលប្រទេសកំពុងជួបវិបត្តិសេដ្ឋកិច្ចកំឡុងពេលជំងឺកូវីដ-១៩ បន្តវាយលុក។ ទាំងលោកសាយ ព្រមទាំងភរិយាបាននិយាយព្រមគ្នាថា៖ «កាលលើកមុនបានគាត់ (លោកនាយករដ្ឋមន្រ្តី)ស្រែកទៅ បានចុះ (ចុះថ្លៃសាំង) ខ្លះ។ ឥឡូវឡើងដល់ ៤០ជាងជិត ៥០ (៤០០០ ជិត៥០០០ រៀល) ហើយ។ ដល់ពេលទៅណាមកណាក៏ពិបាកដែរ សាំងឡើងថ្លៃ»។

លោកកៀត សាយ

ដោយម៉ាស៊ីនកិនអំពៅ និងម៉ូតូភ្ជាប់នឹងធុងអំពៅសុទ្ធតែត្រូវការប្រើប្រាស់ប្រេងសាំង អ្នកប្របករបរសេដ្ឋកិច្ចក្រៅប្រព័ន្ធដោយធ្វើការលក់អំពៅចល័តទីតាំងចុះឡើងរអ៊ូថាការលក់ចាប់ផ្តើមខាតចំណូលច្រើន ស្របពេលដែលតម្លៃប្រេងសាំងឡើងថ្លៃដូចគ្នានោះ ហើយការលក់អំពៅក្នុងមួយកែវ ២០០០រៀល ដែលជាតម្លៃយូរមកហើយក៏មិនបានដំឡើងតាមថ្លៃសាំងនោះទេ។

លោកវន់ ពៅ ជាប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ បានបញ្ជាក់ពីផលប៉ះពាល់ធ្ងន់ធ្ងរដល់អ្នកប្រកបរបរសេដ្ឋកិច្ចក្រៅប្រព័ន្ធនៅកម្ពុជាថា ផ្នែកដែលប៉ះពាល់ខ្លាំងជាងគេចំពោះអ្នកសេដ្ឋកិច្ចក្រៅប្រព័ន្ធ មានដូចជាអ្នកលក់ដូរតូចតាច មានអ្នកលក់ចំណីអាហារតាមរទេះ អ្នកលក់បន្លែ ព្រមទាំងអ្នកប្របករបរផ្នែកវិស័យដឹកជញ្ជូនដូចជា អ្នករត់ម៉ូតូឌុប កង់បី តាក់ស៊ី ជាដើមត្រូវប៉ះពាល់ដោយផ្ទាល់។

សព្វថ្ងៃអ្នកប្រកបរបរក្នុងសេដ្ឋកិច្ចក្រៅប្រព័ន្ធមានជាង ៨លាននាក់ ដែលស្មើនឹងជាង ៨០% ក្នុងចំណោមកម្លាំងពលកម្មនៃប្រជាជនកម្ពុជាជាង ១០លាននាក់ ក្នុងប្រទេស។ នេះយោងតាមលោក វន់ ពៅ ដដែលបានបញ្ជាក់ប្រាប់ Newsroom Cambodia តាមទូរស័ព្ទដៃកាលពីថ្ងៃទី២៤ កក្កដា។

«អ្នកដែលប្រកបរបរតូចតាច ស្ថានភាពកូវីដ ប្រាក់ចំណូលធ្លាក់ចុះស្ទើរតែដល់កម្រិតសូន្យ អ្នកមួយចំនួនដល់កម្រិតសូន្យទៅហើយ។ ហើយឥឡូវប្រេងឥន្ធន:ឡើង (តម្លៃ) ថែមទៀតនោះ វាជាបញ្ហាធ្ងន់ធ្ងរមែនទែនសម្រាប់ប្រជាពលរដ្ឋខ្មែរ មិនថាមុខរបរតូចឬមុខរបរធំទេ គឺប៉ះពាល់ទាំងអស់ ជាពិសេសអ្នកប្រកបរបរសេដ្ឋកិច្ចក្រៅប្រព័ន្ធ ពីព្រោះប្រាក់ចំណូលបានតិចហើយ អត់មានតុល្យភាពទៅនឹងតម្លៃសាំងដែលយើងត្រូវចំណាយទៅវិញទេ»។

លោកបណ្ឌិតគី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា បានផ្ញើសារជាសំឡេងតាម Telegram ថាការឡើងថ្លៃប្រេងឥន្ទន:នេះ ជាកត្តាមួយដែលរុញច្រានឱ្យសេដ្ឋកិច្ចកាន់តែធ្លាក់ចុះបន្ថែមទៀត ដោយហេតុថា មានការកាត់បន្ថយការធ្វើដំណើរ និងការបង្កើនការចំណាយលើថ្លៃប្រេងច្រើនដែលជាហេតុនាំឱ្យមានការកាត់បន្ថយការចំណាយលើទំនិញផ្សេងៗ។

«ការឡើងថ្លៃប្រេងហ្នឹងគឺជាការធ្វើឱ្យមានអតិផរណា (ការកើនឡើងនៃថ្លៃទំនិញ ឬសេវាកម្មទូទៅក្នុងទីផ្សារ ក្នុងពេលជាក់លាក់ណាមួយ) ខណ:ពេលដែលសកម្មភាពសេដ្ឋកិច្ចនានាត្រូវបានកាត់បន្ថយដោយសារវិបត្តិកូវីដ»។

អ្នកនាំពាក្យក្រសួងពាណិជ្ជកម្ម លោកស៊ាង ថៃ បានឆ្លើយតបតាម Telegram បានរំឮកពីបញ្ហាថ្លៃសាំងកើនឡើងកាលពី ៦ ទៅ ៧ឆ្នាំមុន ហើយដំណោះស្រាយពេលនោះគឺ ក្រសួងពាណិជ្ជកម្មរួមជាមួយក្រសួងរ៉ែ និងថាមពល បានបើកកិច្ចប្រជុំជាមួយក្រុមហ៊ុននាំចូលប្រេងទាំងអស់នៅកម្ពុជា ដោយចង់ឲ្យតម្លៃប្រេងក្នុងប្រទេសឡើងចុះតាមទីផ្សារអន្តរជាតិ។ ដើម្បីដោះស្រាយបញ្ហានោះ ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល បានអញ្ជើញក្រុមហ៊ុននាំចូលប្រេងទាំងអស់នៅកម្ពុជា មកប្រជុំ ពិភាក្សារកដំណោះស្រាយ គឺចង់ឲ្យតម្លៃប្រេងក្នុងប្រទេសរលាស់ ឡើងចុះតាមទីផ្សារអន្តរជាតិ។

«រហូតមកដល់ពេលនេះ ប្រេងឥន្ទន:ដែលប្រើប្រាស់នៅក្នុងប្រទេសកម្ពុជា សុទ្ធតែនាំចូលពីបរទេសទាំងអស់ ដូច្នេះតម្លៃលក់រាយប្រេងឥន្ធន: គឺវាអាស្រ័យទាំងស្រុងទៅនឹងថ្លៃប្រេងលើទីផ្សារអន្តរជាតិ»។

«ដើម្បីសម្រួលដល់ការលំបាករបស់ប្រជាពលរដ្ឋ សម្ដេចតេជោនាយករដ្ឋមន្ត្រី បានសម្រេចបញ្ចុះពន្ធចំនួន ២សេនដុល្លាក្នុងសាំងមួយលីត្រ ហើយក្រុមហ៊ុនប្រេងក៏ជួយសម្ដេចតេជោ ដោយបញ្ចុះតម្លៃ ២សេនដុល្លាក្នុងសាំងមួយលីត្រដូចគ្នាដែរ។ បានន័យថា ប្រជាពលរដ្ឋទូទាំងប្រទេស ពេលចាក់សាំងមួយលីត្រ ត្រូវបានទទួលការជួយពីរាជរដ្ឋាភិបាល ចំនួន ៤សេនដុល្លារ»។ នេះជាសំដីលោក ស៊ាង ថៃ ដែលបានប្រាប់ Newsroom Cambodia។

សេចក្តីប្រកាសស្តីពីថ្លៃលក់រាយប្រេងឥន្ធន:នៅតាមស្ថានីយ៍ ដែលចេញផ្សាយដោយក្រសួងពាណិជ្ជកម្មកាលពីថ្ងៃទី១៦ ខែកក្កដា ២០២១ កន្លងទៅនេះបានបញ្ជាក់ថា តម្លៃលក់រាយប្រេងឥន្ធន:ចាប់ពីថ្ងៃទី១៦ ដល់ទី៣១ កក្កដានេះត្រូវលក់ក្នុងតម្លៃ ៤៦៥០ រៀល/លីត្រ សម្រាប់ប្រេងធម្មតា និង ៣៨១០ រៀល/លីត្រ សម្រាប់ប្រេងម៉ាស៊ូត ដែលជាតម្លៃមធ្យមតាមទីផ្សារអន្តរជាតិ។ ក្រោយពីលោកនាយករដ្ឋមន្រ្តី ហ៊ុន សែន សម្រេចបញ្ចុះថ្លៃប្រេងឥន្ធន:លក់រាយចំនួន ៤ សេនដុល្លារ/លីត្រ តម្លៃសាំងប្រេងធម្មតាលក់ចេញក្នុងតម្លៃ ៤១០០ រៀល/លីត្រ និង ៣៦៥០ រៀល/លីត្រសម្រាប់ប្រេងម៉ាស៊ូត៕

បុគ្គលិកតវ៉ាឲ្យក្រុមហ៊ុនព្រលានយន្តហោះសៀមរាបដោះស្រាយ ក្រោយត្រូវបានបញ្ឈប់ដោយសារវិបត្តិកូវីដ

មេង គ្រុយពន្លក (Meng Kroypunlok) — Wed, 28 Jul 2021 15:48:55 +0000

បុគ្គលិកជាង ១០០នាក់ កាលពីពេលថ្មីៗនេះបានស្នើរឲ្យក្រុមហ៊ុនព្រលានយន្តហោះនៅខេត្តសៀមរាប ឈ្មោះ VINCI/ CAMS/ SCA និងអាជ្ញាធរអាកាសចរស៊ីវិលព្រមទាំងមន្ទីរ និងក្រសួងការងារ ជួយដោះស្រាយបញ្ហាក្រោយពួកគាត់ត្រូវបានបញ្ឈប់ពីការងារដោយសារវិបត្តិជំងឺកូវីដ។

តាមរយៈទំព័រហ្វេសបុករបស់បុគ្គលិកម្នាក់ឈ្មោះហួរ សុខសំណាង (Hour Soksamnang) បានលើកឡើងថា តាមរបាយការណ៍ប្រាក់ចំណូលរបស់ក្រុមហ៊ុនមិនបានខាតទេ នឹងមានតែចំណេញ ហើយបានអះអាងថា ការបញ្ឈប់នេះគឺជាគឺជាអំពើអយុត្តិធម៌។

លោកហួរ សុខសំណាង

លោកបានលើកឡើងថា «ការបញ្ឈប់បុគ្គលិក ១៣១នាក់នៅព្រលានយន្តហោះខេត្តសៀមរាបនេះជាការឆ្លៀតឱកាសក្នុងវិបត្តិកូវីដ-១៩ ដែលធ្វើឲ្យបុគ្គលិកទទួលទុក្ខយ៉ាងធ្ងន់ធ្ងរពីអំពើអមនុស្សធម៌របស់ក្រុមហ៊ុនមួយនេះ»។

បុរសម្នាក់ក្នុងចំណោមបាតុករដ៏ទៃទៀតដែលជាបុគ្គលិកបានឈរបាតុកម្មដោយលើកបដាស្នើរឱ្យក្រុមហ៊ុន (VINCI/ CAMS/ SCA) និងក្រសួងការងារជួយដោះស្រាយការបញ្ឈប់បុគ្គលិកឱ្យបានឆាប់ចប់។

ស្រដៀងគ្នានេះ ស្រ្ដីម្នាក់ក្នុងចំណោមបាតុករដ៏ទៃទៀតដែលជាបុគ្គលិកបានឈរបាតុកម្មនៅមុខក្រុមហ៊ុនថា «ខ្ញុំស្នើរឱ្យក្រុមហ៊ុន (VINCI/ CAMS/ SCA) ក្រសួងការងារ អាជ្ញាធរអាកាសចរណ៍ជួយដោះស្រាយការបញ្ឈប់បុគ្គលិក ១៣១នាក់ឱ្យបានឆាប់ចប់ មិនត្រូវពន្យាពេលទៀតទេ»។

បុគ្គលិកផ្នែកបម្រើអតិថិជន លោកមុំ សឹមសីហា បានផ្ដល់កិច្ចសម្ភាសន៍មកកាន់Newsroom Cambodia ថាការបញ្ឈប់នេះផ្ទុយច្បាប់ទាំងស្រុង ដោយសារក្រុមហ៊ុនមិនបានជូនដំណឹងជាមុន ជាពិសេសបញ្ឈប់តែបុគ្គលិកណាដែលមានប្រាក់អតីតភាពការច្រើន។

លោកលើកឡើងថា «ជាក់ស្ដែងខ្ញុំមានអតីតភាពការងារ ១៩ឆ្នាំមកហើយ តាមមាត្រា៩៥នៅពេលគេបញ្ឈប់បុគ្គលិក ពេលគេកាត់បន្ថយបុគ្គលិកហ្នឹង អ៊ីចឹងអ្នកដែលមានអតីតភាពការងារយូរ គេអត់បញ្ឈប់ទេ គេបញ្ឈប់តែអ្នកមានអតីតភាពការងារតិចជាង»។

ដូចគ្នានេះដែរ លោកស្រីថុល ណាមុន្នី បុគ្គលិកទទួលបន្ទុកផ្នែកសេវាកម្មរថយន្តសម្រាប់ភ្ញៀវចេញចូលប្រលានយន្តហោះ ដែលមានអតីតភាពការងារចំនួន ១៦ឆ្នាំ បានលើកឡើងថា ការបញ្ឈប់នេះខុសច្បាប់ទាំងស្រុង ដោយសារក្រុមហ៊ុនមិនបានជូនដំណឹងជាមុន ជាពិសេសបញ្ឈប់តែបុគ្គលិកណាដែលមានប្រាក់អតីតភាពការច្រើន។ លោកស្រីក៏បានលើកឡើងដែរថាក្រុមហ៊ុនក៏បានទូទាត់សំណង តែអ្នកស្រីបានយល់ថាក្រុមហ៊ុនមិនបានទូរទាត់បានគ្រប់ចំនួននោះទេ។

ប្រធាននាយកដ្ឋានដោះស្រាយទំនាស់នៅខេត្តសៀមរាប លោកផេង ឈាងលី បានផ្ដល់កិច្ចសម្ភាសន៍មកកាន់ Newsroom Cambodia ថាលោកមិនដឹងថាក្រុមហ៊ុនរកស៊ីដោយវិធីណានោះទេ ហើយក៏មិនដឹងថាក្រុមហ៊ុននោះចំនេញ ឬខាតនោះដែរ ប៉ុន្តែទាំងកម្មករនិយោជិត និងនិយោជក ត្រូវតែគោរពច្បាប់។

លោកផេង ឈាងលី បាននិយាយថាលោកយល់ថាក្រុមហ៊ុនដូចជាបានធ្វើស្របតាមច្បាប់ការងារហើយ។ លោកបាននិយាយថា «ក្រុមហ៊ុនបានទូទាត់ប្រាក់បំណាច់

អតីតភាពការងារទៅតាមការណែនាំដែលមានតាមការបញ្ចាំងស្លាយ កម្មករនិយោជិតក៏បានចូលរួមក្នុងកម្មវិធីនេះ នេះជាការធ្វើបទបង្ហាញដោយក្រសួងការងាររួចហើយ បើមានបញ្ហាអីគួរតែជជែកគ្នាពេលហ្នឹងទៅ»។

នាយកប្រតិបត្តិទំនាក់ទំនងសាធារណៈលោក Khek Norinda បានប្រាប់ Newsroom Cambodia ថាដោយសារតែវិបត្តិជំងឺកូវីដនេះ ទើបក្រុមហ៊ុនបានបង្ខំសម្រចចិត្តបញ្ឈប់បុគ្គលិក និងក្រុមហ៊ុនក៏បានផ្ដល់កញ្ចប់សំណងដែលស្របទៅតាមច្បាប់ការងាររួចហើយដែរ។

លោកក៏បានបន្ដែមថាសូមឱ្យមានការយកយល់ទាំងអស់គ្នាក្នុងស្ថានភាពបែបនេះ ហើយការទ្រង់ទ្រងក្រុមហ៊ុន និងរក្សាបុគ្គលិក គីជារឿងសំខាន់ដែរ។ លោកបានលើកឡើងថា «វាជាការពិតដ៏ក្រៀមក្រំនៃវិបត្តិដោយសារជំងឺរាតត្បាតកូវីដ ១៩ ដែលបានបង្ខំឱ្យក្រុមហ៊ុនបញ្ឈប់បុគ្គលិករបស់ខ្លួនខ្លះនៅឯព្រលានយន្តហោះខេត្តសៀមរាប»។

លោកបាននិយាយថាក្រុមហ៊ុនបានបញ្ឈប់និយោជិកចំនួន ១៣០នាក់ កាលពីខែធ្នូឆ្នាំ ២០២០ បន្ទាប់ពីចំនួនអ្នកដំណើរនៅព្រលានយន្តហោះសៀមរាបបានធ្លាក់ចុះ ចំនួន ៨៤ ភាគរយសម្រាប់ឆ្នាំ ២០២០។

លោក Khek Norinda បាននិយាយថា «យើងបារម្ភថាឆ្នាំ ២០២១ រឹតតែពិបាកថែមទៀត។ ស្ថានភាពនេះកាន់តែអាក្រក់ទៅៗ ហើយ ៦ខែដំបូងក្នុងឆ្នាំ ២០២១ ឃើញថាចរាចរណ៍បានធ្លាក់ចុះ ៩៩,៩% ហើយភាពមិនប្រាកដប្រជាជាច្រើននៅខាងមុខ»៕

បទយកការណ៍៖ កម្មករស៊ីនទ្រីរាប់រយនាក់ត្រូវបញ្ឈប់ខណៈជីវភាពដុនដាបស្របពេលជំងឺកូវីដបន្តរុកគួន

មាស មល្លិកា (Meas Molika) — Wed, 21 Jul 2021 04:29:38 +0000

នៅម៉ោងប្រមាណជា១២ថ្ងៃត្រង់ ថ្ងៃទី១៤ ខែកក្កដា អ្នកស្រី ទង់ រ៉ន អតីតកម្មករបោសសំរាមរបស់ក្រុមហ៊ុនស៊ីនទ្រីបានដើរចេញពីកន្លែងបើកលុយនៅហ្គារ៉ាស់ស៊ីនទ្រីក្នុងខណ្ឌដង្កោរ រាជធានីភ្នំពេញជាមួយកម្មការីនីជាស្រ្តីវ័យចំណាស់ៗដូចគ្នាបណ្តើរ និយាយត្អូញត្អែរបណ្តើរ អំពីការបញ្ឈប់បុគ្គលិក ដែលមានទាំងឈ្មោះរបស់ពួកគេផង។

អ្នកស្រីវ័យ៦១ឆ្នាំ សម្បុរខ្មៅស្រអែម សក់រួញអង្គាដីប្រះស្មា មានស្នាមជ្រីវជ្រួញនៅលើដៃដែលចេញសរសៃរដោយសារការធ្វើការងារប្រើកម្លាំងដៃខ្លាំង និយាយប្រាប់ Newsroom Cambodia ដោយមានចងចិញ្ចើមលើផ្ទៃមុខជ្រីវជ្រួញរបស់ខ្លួនថា៖ «ពួកខ្ញុំសុទ្ធតែធ្វើនៅហ្នឹង២០ឆ្នាំជាងហើយ។ គេ (ក្រុមហ៊ុនស៊ីនទ្រី) បញ្ឈប់ចោលទទេរ គេបង់លុយឱ្យក៏អត់ដែរ អូនអើយ។ ហើយផ្ទះជួល ទិញដីបង់រំលួស បង់អី រកលុយឱ្យគេគ្មាន។ ទឹកភ្នែករហេមរហាម។ ហើយដល់មកបើកលុយចុងក្រោយបានម្នាក់២០ម៉ឺន»។

ក្នុងអំឡុងពេលរងចាំបើកប្រាក់ កម្មករវ័យប្រមាណជា៤០ ទៅ៦០ឆ្នាំប្លាយផ្សេងទៀត កំពុងជំនុំគ្នាឈរចាំទល់មុខច្រក ដើម្បីចូលទៅបើកប្រាក់បៀវត្សចុងក្រោយបង្អស់ដែលខ្លួនបានធ្វើក្នុងរយ:ពេល១៥ថ្ងៃចុងក្រោយ។ ពួកគេខ្លះបានទ្រហោរយំក្រោយមើលឃើញឈ្មោះរបស់ខ្លួននៅលើក្រដាសជម្រុះបុគ្គលិកពីក្រុមហ៊ុនប្រមូលសំរាមស៊ីនទ្រី ដែលពួកគេចំណាយពេលជាង១០ ទៅ២០ឆ្នាំបម្រើការងារសម្អាត និងរក្សាអនាម័យរាជធានីភ្នំពេញតាំងពីក្រុមហ៊ុនចាប់បដិសន្ធិនៅឆ្នាំ២០០៣មក។

អ្នកស្រី ទង់ រ៉ន អះអាងថា អ្នកស្រីបានចូលបម្រើការឱ្យក្រុមហ៊ុនស៊ីនទ្រីនេះតាំងពីអាយុ៣៣ឆ្នាំ ដែលមានប្រាក់ខែដំបូងគេបង្អស់ត្រឹម៨,០០០រៀលមកម្ល៉េះ រហូតដល់ថ្ងៃទី៣០ ខែមិថុនា ឆ្នាំ២០២១នេះ។ លើក្រដាសជម្រុះបុគ្គលិកចេញពីការងារមានឈ្មោះអ្នកស្រីដែលត្រូវបណ្តេញ ជាមួយសមាជិកកម្មករនិយោជិត និងសហជីពដទៃទៀតព្រមគ្នា ។

អ្នកបោសសំអាតតាមផ្លូវថ្នល់មុខព្រលានយន្តហោះអន្តរជាតិភ្នំពេញរូបនេះបានរំឮកថា កាលពីថ្ងៃទី២០ ខែមិថុនា ឆ្នាំ២០២១នេះ ភាគីក្រុមហ៊ុនស៊ីនទ្រីបានបង្ខំឱ្យខ្លួនរួមជាមួយកម្មករស៊ីនទ្រីចំណាស់ៗដូចគ្នាឯទៀតផ្តិតមេដៃនៅលើលិខិតកិច្ចសន្យាដែលមិនច្បាស់លាស់មួយ។ អ្នកស្រីថា អ្នកស្រីមិនចេះអក្សរហើយមិនបានដឹងច្បាស់ថាខ្លឹមសារនៅខាងក្នុងនិយាយពីអ្វី ឬមានលក្ខខណ្ឌអ្វីនោះទេ ដោយគ្រាន់តែឮពីមិត្តរួមការងារថាជាកិច្ចសន្យាបន្តការងារនៅក្រុមហ៊ុនស៊ីនទ្រីតទៅទៀត ទើបអ្នកស្រីសម្រេចថាផ្តិតមេដៃតាមការណែនាំរបស់ក្រុមហ៊ុន។

«អ្នកចេះអក្សរអី គេអ្នកមើល គេថាបើបញ្ឈប់ពួកយើងអត់ការងារធ្វើ គេ (ក្រុមហ៊ុនស៊ីនទ្រី) សង១,០០០ (ដុល្លារ) វិញ។ ពួកខ្ញុំចូលការងារនឹងវិញគេ (ក្រុមហ៊ុនស៊ីនទ្រី) ថាបង់ឱ្យពួកគេ១,០០០ (ដុល្លារ) វិញ។ ហើយឥឡូវមានបង់មានសងអីឯណាវិញ? អត់ផងនឹង! បើកលុយបានតែ២៤ ម៉ឺននឹង!»។

អតីតកម្មករបោសសំអាតផ្លូវស៊ីរូបនេះនិយាយបណ្តើរ ក្រឡេកមើលទៅមិត្តរួមការងារជាស្រ្តីចំណាស់ៗដូចគ្នាបណ្តើរថា៖ «ខ្ញុំវាអត់ចេះ អញ្ចឹងខ្ញុំឱ្យគេមើលឱ្យ ដល់ស្តាប់ទៅឮគេនិយាយថាអញ្ចឹង (យល់ច្រឡំថាជាកិច្ចសន្យាបន្តការងារចាស់)»។

អតីតអ្នកបោសសំរាមដែលមានកូនប្រុសស្រីចំនួន៧នាក់បានបន្តថា ពេលធ្វើការ អ្នកស្រីត្រូវ ប្រឈមនឹងគ្រោះថ្នាក់តាមដងផ្លូវ និងឈរក្រោមកម្តៅថ្ងៃក្តៅហួតហែងចំនួន៨ម៉ោងជាប្រចាំ។ អ្នកស្រីថា អ្នកស្រីធ្វើការចាប់ពីម៉ោង៤ព្រឹកព្រលឹម ដល់ម៉ោង៩ព្រឹក និងម៉ោង១២ថ្ងៃត្រង់ ដល់ម៉ោង៣រសៀលទើបបានទៅផ្ទះនៅសង្កាត់ចោមចៅ ផ្លូវជាតិលេខ៣ សម្រាកវិញនោះទេ។ ប៉ុន្តែអ្នកស្រីនិយាយក្តែងៗដោយការតាំងចិត្តថា អ្នកស្រីមិនដែលគិតចង់បោះបង់ការងារ ដែលជាអ្នកបោសដីតាមថ្នល់នោះទេ។

អ្នកស្រី ទង់ រ៉ន គឺជាកម្មករម្នាក់ក្នុងចំណោមកម្មករស៊ីនទ្រី និងសហជីពប្រមាណជាជាង១,០០០នាក់ទៀតដែលត្រូវបានក្រុមហ៊ុនបញ្ឈប់ពីការងារតាំងពីថ្ងៃទី១ ខែកក្កដា ឆ្នាំ២០២១។

កម្មករក្រុមហ៊ុនស៊ីនទ្រីដើរចេញពីហ្គារ៉ាស់ជួសជុលរថយន្តដឹកសំរាម ដែលជាទីតាំងបើកប្រាក់ខែចុងក្រោយ បន្ទាប់ពីក្រុមហ៊ុនស៊ីនទ្រីបញ្ឈប់ នៅថ្ងៃទី១៤ ខែកក្កដា ឆ្នាំ២០២១។ (រូបភាព៖ ង៉ឹល ហេន)

ការបញ្ឈប់កម្មករជាច្រើនរយនាក់របស់ក្រុមហ៊ុនស៊ីនទ្រីនេះ ធ្វើឡើងបន្ទាប់ពីរដ្ឋបាលរាជធានីភ្នំពេញ បានជូនដំណឹងនៅថ្ងៃទី៣០ ខែមិថុនា ឆ្នាំ២០២១ ពីការចាប់ផ្តើមប្រតិបត្តិការប្រមូលសំរាមរបស់ក្រុមហ៊ុនថ្មី២ទៀត រួមមាន ក្រុមហ៊ុន Mizuda Sanitation ដែលមានម្ចាស់ជាជនជាតិចិន និងក្រុមហ៊ុន 800 Super របស់សិង្ហបុរី នៅថ្ងៃទី១ ខែកក្កដា ឆ្នាំ២០២១ បន្ទាប់ពីពន្យារពេលអស់រយៈពេល៣ខែ។

អតីតកម្មករប្រមូលសំរាម ដែលត្រូវបានគេបញ្ឈប់ម្នាក់ទៀតឈ្មោះ គង់ គីម មកពីខេត្តព្រៃវែង ដែលមានកូនស្រី២ ប្រុស ១នាក់ក្នុងបន្ទុក បានប្រាប់ពីទុក្ខលំបាករបស់ខ្លួនទាំងគ្រវីក្បាលថា៖ «អត់ដឹងដែរ រកការងារអត់បានធ្វើ វាចប់! ដេកបានតែហូបបាយផ្ទះ។ ធ្វើសំណង់ក៏គេមិនយកទៀតឥឡូវ»។

លោក គីម បន្ថែមថា លោកបានព្យាយាមដាក់ពាក្យធ្វើការងារនៅក្រុមហ៊ុនប្រមូលសំរាមថ្មីរួចហើយ ប៉ុន្តែគេបដិសេដដោយសំអាងថាមានបុគ្គលិកគ្រប់គ្រាន់។

អតីតកម្មករកើបសំរាមរូបនេះបញ្ជាក់ថា ជំហានបន្ទាប់នឹងដាក់ពាក្យទៅធ្វើការជាសន្តិសុខវិញ ប៉ុន្តែលោក គីម មិនជាសង្ឃឹមថាអាចទទួលការងារនោះបានទេក្នុងអំឡុងពេលរាតត្បាតនៃជំងឺកូវីដ-១៩ នេះដែលចំពេលដែលសេដ្ឋកិច្ចជាតិកំពុងស្រុតចុះដូចគ្នាដែរ។

លោក ចន្ថា អតីតកម្មករស៊ីនទ្រី វ័យ៤០ឆ្នាំ បានសម្តែងការស្មុគស្មាញ និងអស់ជំនឿក្នុងការទាមទារតវ៉ារកជំនួយក្រោយសហជីពទាំងមូលត្រូវអស់សិទ្ធិអំណាចក្នុងការជ្រោមជ្រែង និងទាមទារសិទ្ធិដល់កម្មករស៊ីនទ្រីតទៅទៀត លោកបាននិយាយតាមទូរស័ព្ទ ប្រាប់ Newsroom Cambodia ថា៖ «ដំណាក់កាលនេះ ជាដំណាក់កាលចុងក្រោយហើយ គ្មានអ្វីដែលអាចធ្វើទៅទៀតទេ! មិនដឹងធ្វើអីទាមទារទៅក្រុមហ៊ុនបានទៀតទេ។ បើក្រុមហ៊ុនជិតរលាយដែលហើយ ។ »

លោកបន្ថែមថា លោកកំពុងជាប់បំណុលពីធនាគារមីក្រូហិរញ្ញវត្ថុប្រមាណជាង១,០០០ដុល្លារអាមេរិក ហើយកំពុងមានកូនប្រុស២ ស្រី១ក្នុងបន្ទុកដែលត្រូវរ៉ាប់រងតែម្នាក់ឯង ដោយប្រពន្ធរបស់លោកមិនអាចរកចំណូលពីការធ្វើស្រែបានទេ។

លោកបញ្ជាក់ថា ក្រុមហ៊ុនមិនអាចធានារកការងារឱ្យកម្មករចាស់បានទេ ដោយនៅថ្ងៃទី១៤ ខែកក្កដា ដែលជាថ្ងៃប្រកាសបើកប្រាក់៥%នៃប្រាក់សរុបនោះ ក្រុមហ៊ុនបានជម្រុះបុគ្គលិកអស់៤ នាក់បន្ថែមទៀតចេញពីជួរការងារដែលកំពុងធ្វើភ្លាមៗ។

លោក កៅ សុខវ៉ាត ដែលជាអតីតប្រធានសហជីពកម្មករនិយោជិតវិស័យទេសចរណ៍នៃក្រុមហ៊ុនស៊ីនទ្រី បានខលមក Newsroom Cambodia នៅថ្ងៃទី១៦ ខែកក្កដាថា លោកឈប់ធ្វើជាសហជីព ដោយលោកទទួលបានដំណឹងថាសាលារាជធានីភ្នំពេញមិនអនុញ្ញាតឱ្យទទួលយកសហជីពកម្មករស៊ីនទ្រីធ្វើការវិញដូចដើមទេ។

លោកប្រាប់ពីហេតុផលថា៖ «គេថាអ្នកប្រឆាំង អ្នកបះបោរម៉េច? អានឹងខ្ញុំមិនដឹងថាយ៉ាងម៉េចដែរ បើគេចោទមកចឹង»។

លោកសុខវ៉ាត ដែលមានប្រវត្តិធ្លាប់ធ្វើការជាកម្មករឱ្យក្រុមហ៊ុនស៊ីនទ្រីតាំងពីឆ្នាំ២០០៧ បន្តថា មូលហេតុដែលលោកមិនបានបន្តតវ៉ារកខុសត្រូវជូនកម្មករពីព្រោះលោកបារម្ភពីសុវត្ថិភាពផ្ទាល់ខ្លួន ដោយលោកបញ្ជាក់ថា៖ «ខ្ញុំគិតថាដោយសារតែមានការគំរាមគំហែងពីក្រុមហ៊ុន ក៏ដូចជាសាលាក្រុងចឹង។ ខ្ញុំគិតពីសុវត្ថិភាពការងារ គិតពីសុវត្ថិភាពរបស់ខ្លួនខ្ញុំផ្ទាល់ដែរ ខ្ញុំក៏ខ្ជិលតវ៉ា ខ្ចិលអី។ សុំបញ្ចប់ រកការងារថ្មី»។

កម្មករកំពុងចាំបើកប្រាក់នៅខាងមុខយាន្តដ្ឋានជួសជុលរថយន្តក្រុមហ៊ុនស៊ីនទ្រី នៅព្រឹកថ្ងៃទី១៤ ខែកក្កដា ឆ្នាំ២០២១។ (រូបភាព៖ មាស មល្លិកា)

អតីតកម្មករក្រុមហ៊ុនស៊ិនទ្រីមួយចំនួនទទួលបានការងារធ្វើនៅក្រុមហ៊ុនប្រមូលសំរាមឯកជនថ្មី២មាន ម៉ាស៊ូដា (Mazuda) និង៨០០ ស៊ុបភើ (800 Super) ដោយបន្សល់កម្មករប្រមាណជាង ៥០០ ទៅ៦០០ នាក់តែលតោលគ្មានប្រភពចំណូលច្បាស់លាស់ គួបផ្សំនឹងការពិបាកក្នុងការរកការងារធ្វើ ជាពិសេសក្នុងបរិបទកូវីដនេះ។

កម្មករទាំងនោះព្រួយបារម្ភចំពោះលុយដែលពួកគេមាន ដែលមិននៅសេសសល់ច្រើនសម្រាប់ទប់ចំណាយក្នុងអំឡុងពេលដែលខ្លួននៅទំនេរអត់ការងារច្បាស់លាស់ បូករួមនឹងបំណុលដែលមានជាប់ជំពាក់មិនទាន់ដោះស្រាយបាន។

លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស សង់ត្រាល់ លើកឡើងថា ការបញ្ឈប់បុគ្គលិកដោយមិនមានការផ្តល់ដំណឹង និងការបើកប្រាក់ខែមិនគ្រប់តាមចំនួនដែលកម្មករមានសិទ្ធិត្រូវទទួលបាន ជាការដែលខុសនឹងផ្លូវច្បាប់។

លោកបញ្ជាក់ថា៖ «បើផ្អែកតាមមាត្រា៩៤ នៃច្បាប់ស្តីពីការងារ ត្រូវមានលក្ខណ:វិនិច្ឆ័យសមរម្យ។ ត្រូវតែមានការអនុញ្ញាតបំពេញនូវបែបបទនៅក្នុងការបញ្ឈប់កម្មករនិយោជិតជាលក្ខណ:ទ្រង់ទ្រាយធំ»។

លោកបន្ថែមថា យោងតាមការវិនិច្ឆ័យថាក្នុងស្ថានភាពនៃការរាតត្បាតនៃជំងឺកូវីដ-១៩ នេះទៀតសោត ក្នុងនាមក្រុមហ៊ុនស៊ីនទ្រីដែលបម្រើផ្នែកសេវាកម្ម និងមានកម្មករនិយោជិតដែលមានអតីតភាពការងាររាប់ឆ្នាំមកហើយនោះគឺ ការបញ្ឈប់ការងារកម្មករក្នុងកាល:ទេស:នេះរឹងតែផ្ទុយពីគោលការណ៍ច្បាប់នៃការងារ។ ចំណែកការទូទាត់សំណងមិនត្រឹមត្រូវជូនកម្មករនិយោជិតរឹតមានទោសបន្ថែមទៀត។

លោក ថារ៉ូ បញ្ជាក់ថា៖ «ការបញ្ឈប់កម្មករនិយោជិតក្នុងទ្រង់ទ្រាយធំ គឺមានថ្នាក់ដឹកនាំសហជីពនៅក្នុងនឹង ហើយច្បាប់មានការការពារពិសេសទៅដល់ស្ថាបនិក ទៅដល់ថ្នាក់ដឹកនាំសហជីពតំណាងប្រតិភូបុគ្គលិកនៅកន្លែងការងារ។ អានឹងលុះត្រាតែមានការធ្វើអធិការកិច្ច ឬក៏លក្ខខណ្ឌដែលគាត់មានកំហុសធ្ងន់ បានគាត់អាចបញ្ឈប់ថ្នាក់ដឹកនាំសហជីព។ ចឹងករណីនឹងក្រុមហ៊ុននឹងរំលោភច្បាប់ទៅហើយ ដោយសារគាត់បញ្ឈប់ទាំងថ្នាក់ដឹកនាំសហជីព រលាយរចនាសម្ព័ន្ធអង្គការវិជ្ជាជីវ:នៅកន្លែងការងារ ហើយមិនអនុវត្តន៍តាមនិតិវិធីផ្លូវច្បាប់ អានឹងមានន័យថាក្រុមហ៊ុននឹងធ្វើខុសច្បាប់ហើយ»។

អ្នកគ្រប់គ្រងកម្មវិធីការងារ សង់ត្រាល់ រូបនេះបានអំពាវនាវឱ្យរដ្ឋធានានូវការអនុវត្តច្បាប់ឱ្យមានប្រសិទ្ធភាពខ្ពស់តាមដែលអាចធ្វើទៅបាន ជាពិសេសក្នុងស្ថានភាពនៃការរាលដាលនៃកូវីដ-១៩ ចាំបាច់ត្រូវធានាស្ថេរភាពការងារដល់កម្មករនិយោជិត ដោយមិនអាចឱ្យក្រុមហ៊ុនមូលធនទាំងអស់បញ្ឈប់ការងារកម្មករនិយោជិត ដោយយកលេសពីបញ្ហាសេដ្ឋកិច្ចបាននោះទេ។

លោកបានបន្តថា៖ «អញ្ចឹងប្រសិនបើក្រុមហ៊ុនអាចបញ្ឈប់ទៅតាមចិត្តរបស់គាត់បាន មិនយកច្បាប់មកប្រើប្រាស់ អញ្ចឹងយើងបង្កើតច្បាប់ធ្វើអី? ហើយវាជាគំរូអាក្រក់ដល់ក្រុមហ៊ុនផ្សេងទៀត ដែលអាចអនុវត្តន៍បានដូចគ្នាមានន័យថាប្រសិនជាអនុវត្តន៍បាន ក្រុមហ៊ុនផ្សេងៗទៀតក៏អាចយកគំរូអាក្រក់ទៅអនុវត្តបានដូចគ្នា។ អញ្ចឹងនៅក្នុងស្ថានភាពនឹង រំលោភទៅនឹងសិទ្ធិការងារ រំលោភនូវលក្ខខណ្ឌការងារសម្រាប់កម្មករនិយោជិត»។

Newsroom Cambodia បានព្យាយាមទាក់ទងទៅលោកស្រី សេង សូលីដា ដែលជាអនុប្រធានក្រុមហ៊ុនស៊ីនទ្រីតាំងពីថ្ងៃទី១៣ ខែកក្កដា តែមិនមានការឆ្លើយតប។

លោក ហេង សួរ អ្នកនាំពាក្យក្រសួងការងារតាមប្រព័ន្ធសារតេឡេក្រាមនៅថ្ងៃទី១៦ ខែកក្កដានេះបានបញ្ជាក់ថា លោកមិនអាចអត្ថាធិប្បាយពីបញ្ហានេះបានទេ ដោយសារកិច្ចព្រមព្រៀងវិវាទការងាររបស់កម្មករស៊ីនទ្រីកន្លងទៅ គឺធ្វើឡើងដោយរដ្ឋបាលរាជធានីភ្នំពេញ។

Newsroom Cambodia មិនបានអាចទាក់ទងសុំការអត្ថាធិប្បាយពីលោក ម៉េត មាសភក្តី អ្នកនាំពាក្យសាលារាជធានីភ្នំពេញជុំវិញបញ្ហានេះបានទេ។

យោងតាមសេចក្តីប្រកាសរបស់សាលារាជធានីភ្នំពេញ ចេញនៅយប់ ថ្ងៃទី៣០ ខែមិថុនា បានបញ្ជាក់ថា ក្រុមហ៊ុនថ្មីចំនួន៣ នឹងចុះទៅប្រមូល និងដឹកជញ្ជូនសំរាម សំណល់រឹង បន្តពីប្រតិបត្តិករចាស់ នៅតាមតំបន់ដោយឡែកពីគ្នាចំនួន៣៖ «ក្រុមហ៊ុន 800 Super/Global Action for Environment Awareness Public Limited នឹងផ្តល់សេវា ដល់តំបន់ទី១ ដែលមានខណ្ឌចំនួន៥ គឺ ខណ្ឌទួលគោក ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ និងខណ្ឌព្រែកព្នៅ។ ក្រុមហ៊ុន Mizuda Group Co, Ltd នឹងត្រូវផ្តល់សេវាដល់ខណ្ឌចំនួន៥ផ្សេងទៀតដែលស្ថិតក្នុងតំបន់ទី២ គឺ ខណ្ឌដូនពេញ ខណ្ឌ៧មករា ខណ្ឌដង្កោ ខណ្ឌពោធិ៍សែនជ័យ និងខណ្ឌកំបូល។ និងក្រុមហ៊ុន CINTRI (Cambodia)/Everbright (China) នឹងផ្តល់សេវា ដល់ខណ្ឌចំនួន៤ ផ្សេងទៀត ក្នុងតំបន់ទី៣ គឺ ខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ»។

នៅថ្ងៃទី១ កក្កដា ឆ្នាំ២០២១ ក្រុមហ៊ុនក៏ចេញបញ្ជីឈ្មោះបញ្ចប់កិច្ចសន្យាការងារទាំងកម្មករ និងសហជីពសរុបប្រមាណជាជាង១,០០០នាក់។ ភាគីក្រុមហ៊ុនបានជូនដំណឹងទៅកម្មករនិយោជិតទាំងអស់ឱ្យមកទទួលប្រាក់ខែកន្លះខែចុងក្រោយ នៅថ្ងៃទី១៤ កក្កដានេះ ប៉ុន្តែកម្មករអះអាងថា ពួកគេបើកបានត្រឹមប្រាក់៥%ប៉ុណ្ណោះ។

ទន្ទឹមនឹងការប្រកាសបញ្ឈប់បុគ្គលិករាប់រយនាក់ និងការមិនទាន់ទទួលបានដំណោះស្រាយសមស្របពីសំណាក់ក្រុមហ៊ុនស៊ិនទ្រី ប៉ុន្តែអ្នកស្រី ទង់ រ៉ន បញ្ជាក់ថា នឹងតស៊ូដើររកការងារថ្មីធ្វើបន្តដើម្បីជីវភាព បើទោះបីជារាងកាយដែលមានវ័យជាង៦០ឆ្នាំ ចាប់ផ្តើមទ្រុឌទ្រោមក្តី។

«រកៗ (ការងារថ្មី) នៅនោះដេកផ្ទះបានអីបង់រំលួសដី។ ទិញដីបង់រំលួសបង់អីគេ បានអីបង់ឱ្យគេ? គេបញ្ឈប់! ប្រាក់ខែធ្លាប់បានថោកណាស់ ២០០ (ដុល្លារ)។ ហើយដល់ពេលយើងអត់សោះនៅចឹងម៉េចនឹងកើត។ ចេះតែរកចេះតែធ្វើទៀតទៅ»៕

ធនាគារពិភពលោកថា សេដ្ឋកិច្ចកម្ពុជាកំពុងតែងើបឡើងវិញជាបណ្តើរៗ បន្ទាប់ពីការថយចុះឆ្នាំមុន

ហួត ហុងហុង (Hout Hong Hong) — Wed, 23 Jun 2021 05:22:18 +0000

ធនាគារពិភពលោកបាននិយាយកាលពីពេលថ្មីៗនេះថា សេដ្ឋកិច្ចកម្ពុជាកំពុងតែងើបឡើងវិញជាបណ្តើរៗ បន្ទាប់ពីការថយចុះចំនួន ៣,១ ភាគរយកាលពីឆ្នាំមុន ហើយតាមការព្យាករណ៍ សេដ្ឋកិច្ចនឹងមានកំណើនចំនួន ៤ភាគរយ នៅឆ្នាំ២០២១ ព្រោះតែការវិលត្រឡប់នៃសេចក្តីត្រូវការជាសកល។

ប៉ុន្តែការងើបឡើងវិញនេះនៅតែមានភាពមិនប្រក្រតី និងទន់ខ្សោយនៅឡើយនៅគ្រប់ផ្នែកនៃសេដ្ឋកិច្ចដោយសារតែការអនុវត្តការបិទខ្ទប់ម្តងទៀតដើម្បីទប់ស្កាត់ការឆ្លងជម្ងឺកូវីដ១៩។ នេះយោងតាមសេចក្តីប្រកាសព័ត៌មានរបស់ធនាគារពិភពលោក នៅថ្ងៃទី១៦ ខែមិថុនា។

វិស័យកសិកម្មនៅតែមានភាពរឹងមាំ ដោយសារតែស្ថានភាពវិជ្ជមាននៃកិច្ចព្រមព្រៀងពាណិជ្ជកម្មសេរី ខណៈដែលវិស័យកម្មន្តសាលកាន់តែវិវត្តន៍ ប៉ុន្តែវិស័យទេសចរណ៍នៅតែទទួលរងផលប៉ះពាល់ធ្ងន់ធ្ងរ។

ការនាំចេញទំនិញកំពុងមានការកើនឡើងវិញជាបណ្តើរៗ ដោយកើន ចំនួន ១២,២ ភាគរយក្នុងរយៈពេល ៤ខែដំបូង ក្នុងឆ្នាំ២០២១ រីឯការនាំចេញសម្លៀកបំពាក់ ធៀបនឹង ការនាំចេញ ទំនិញសរុប (មិនគិត មាស) បានថយចុះមកត្រឹម ៤៥,៦ភាគរយ។

លំហូរ ចូលនៃការវិនិយោគផ្ទាល់ពីបរទេស នៅតែមានភាពរឹងមាំ និងបាន ជួយគាំទ្រដល់វិស័យក្រៅប្រទេស។

អាជីវករខ្លះមានការស្ទាក់ស្ទើរក្នុងការចុះឈ្មោះដើម្បីលក់ទំនិញតាមអ៊ីនធឺណិត

មាស មល្លិកា (Meas Molika) — Sat, 19 Jun 2021 12:42:23 +0000

អាជីវករមួយចំនួនបាននិយាយកាលពីពេលថ្មីៗនេះថា ពួកគាត់មានការស្ទាក់ស្ទើរក្នុងការចុះឈ្មោះដើម្បីលក់ទំនិញតាមអ៊ីនធឺណិត គិតថាជាការលំបាកក្នុងការលក់ ហើយការរកស៊ីដោយផ្ទាល់គឺងាយស្រួលជាង។

ក្រសួងពាណិជ្ជកម្មនៅថ្ងៃពុធ ទី៩ ខែមិថុនា ឆ្នាំ២០២០១នេះ បានប្រកាសឲ្យអាជីវកម្មមកចុះឈ្មោះទុកជាមុន បើសិនចង់លក់ផលិតផលរបស់ខ្លួននៅលើគេហទំព័រ cambodiatrade.com ដែលទើបតែបង្កើតឡើងថ្មីៗដោយក្រសួង។

ក្រសួងពាណិជ្ជកម្មបាននិយាយថាផ្សារពាណិជ្ជកម្មតាមប្រព័ន្ធអេឡិចត្រូនិចមួយនេះ មានគោលបំណងជួយដល់សហគ្រាសធុនតូច និងមធ្យម ក្នុងការលក់ផលិតផលដល់អតិថិជនសក្តានុពលទាំងក្នុងស្រុក និងក្រៅស្រុក។

នៅក្នុងបទសម្ភាសន៍នាពេលថ្មីៗនេះ អាជីវករខ្លះមានការស្ទាក់ស្ទើរក្នុងការចុះឈ្មោះដើម្បីលក់តាមអ៊ីនធឺណិត។

អ្នកស្រីម្នាក់ដែលអះអាងថាជាម្ចាស់ហាងឈ្មោះ ផ្សារចំការខ្មែរ លក់បន្លែធម្មជាតិ នៅខណ្ឌសែនសុខ បានយល់ឃើញថានេះជាប្រយោជន៍ល្អ វាអាចប្រមូលព័ត៌មានបានជាលក្ខណ:ទិន្នន័យឱ្យខាងក្រសួងពាណិជ្ជកម្មអាចគ្រប់គ្រងបានពីខ្នាតតូច ខ្នាតមធ្យម។

ដោយមិនបានប្រាប់ឈ្មោះ អ្នកស្រីបានបន្តថា ជាផលល្អមួយទៀត ប្រសិនជាដាក់បញ្ចូលទៅ វាអាចជាបណ្តាញ រវាងអ្នកអ្នកផ្គត់ផ្គង់ និងអ្នកផ្គត់ផ្គង់ ដូចគ្នាឲ្យស្គាល់គ្នា។

អ្នកស្រី បានបន្តនិយាយដោយកំពុងពាក់ម៉ាស់ថា ខ្លួននឹងមិនចុះឈ្មោះសម្រាប់ដាក់លក់ផលិតផលកសិកម្មធម្មជាតិរបស់ខ្លួននៅលើផ្សារឌីជីថល Cambodia Trade នេះទេ ដោយហេតុថា តាមបទពិសោធន៍ដែលខ្លួនធ្លាប់ឆ្លងកាត់ គឺទាមទារឱ្យម្ចាស់អាជីវកម្មមានលក្ខណ:លេចធ្លោ ពិសេសប្លែកពីគេ ទើបទទួលបានការចាប់អារម្មណ៍ច្រើន បូករួមទាំងតម្លៃទីផ្សារប្រកួតប្រជែងឈ្នះគេ ទើបអាចដំណើរការបានក្នុងទីផ្សារឌីជីថលមួយនេះបាន។

អ្នកស្រីនិយាយដោយសើចតិចៗថា៖ «ការលក់គឺចាញ់ការលក់នៅកន្លែងផ្ទាល់ ចាញ់បងមិនចាំបាច់ទៅផុសអី ទៅដាក់លក់ក្នុងឌីជីថលអីទេ។ ជួនកាលផុស (Post) មួយឆ្នាំអី មិនទាន់មានអ្នកទាក់ទងអីមកម្តងផង។ ណាមួយទីផ្សារចឹង ជាការប្រមូលផ្តុំតែ អ្នកលក់ អត់មានប្រមូលផ្តុំអ្នកទិញ»។

អ្នកលក់សម្លៀកបំពាក់មួយរូបឈ្មោះ តួ ចន្ទឌី ដែលមានតូបជួលមួយកន្លែងលក់នៅផ្សាររីករាយ អស់រយ:ពេលជាង១០ឆ្នាំ បាននិយាយពីចំណាប់អារម្មណ៍ទៅលើផ្សារឌីជីថលរបស់ក្រសួងពាណិជ្ជកម្មថា៖ «ដូចជាមិនបាច់ទេ មិនបាច់ក៏បានដែរ មិនចង់ចុះរញ៉េរញ៉ៃទេ ចង់លក់ចឹងបានហើយ»។

អ្នកស្រីញញឹមស្រស់រូបនេះ បានបញ្ជាក់ថា ខ្លួនសព្វថ្ងៃមានគេហទំព័រហ្វេសប៊ុក (Facebook Page) ផ្ទាល់ខ្លួនសម្រាប់តែបង្ហោះរូបភាពឱ្យអតិថិជនខ្លួនបានមើលតែប៉ុណ្ណោះ តែមិនងាយទទួលបានការបញ្ជាទិញតាមអនឡាញនោះទេ ផ្ទុយទៅវិញអ្នកដែលមកទិញភាគច្រើនជាអ្នកមកទិញដល់កន្លែងផ្ទាល់ ទោះធ្លាប់បានឃើញតាមរយ: រូបភាពលើគេហទំព័រក្តី។

លោកសៀង ថៃ អ្នកនាំពាក្យក្រសួងពាណិជ្ជកម្ម បានបញ្ជាក់យ៉ាងច្បាស់ថា Cambodia trade មិនមែនបើកសម្រាប់ប្រជាជនទូទៅទេគឺ សម្រាប់សហគ្រាសធុនតូច និងធុនមធ្យម ដែលផលិតនូវផលិតផលខ្មែរ ហើយមានបំណងចង់លក់ផលិតផលរបស់ខ្លួននៅលើទីផ្សារក្នុងស្រុក និងទីផ្សារក្រៅប្រទេស។

លោកសៀង ថៃ ក៏បានបង្ហាញពីគោលបំណងចំបង ២យ៉ាងដែលបង្កើត ផ្សារអេឡិចត្រូនិចបែបឌីជីថល ទាន់សម័យកាលនេះថាជាការភ្ជាប់ទំនាក់ទំនង បង្កើនខ្សែចង្វាក់តម្លៃរវាងអ្នកផលិត អ្នកទិញ អ្នកលក់ នៅក្នុងប្រទេស និងជំរុញការនាំចេញផលិតផលខ្មែរទៅក្រៅប្រទេស៕

ក្រសួងពាណិជ្ជកម្មអំពាវនាវដល់អាជីវកម្មឱ្យចុះឈ្មោះ បើមានបំណងលក់ផលិតផលលើផ្សារអនឡាញរបស់ក្រសួង

សួន កំសាន្ត (Suon Kamsan) — Thu, 10 Jun 2021 02:33:19 +0000

តាមរយៈសេចក្តីប្រកាស ក្រសួងពាណិជ្ជកម្មបាននិយាយថាផ្សារពាណិជ្ជកម្មតាមប្រព័ន្ធអេឡិចត្រូនិចមួយនេះ មានគោលបំណងជួយដល់សហគ្រាសធុនតូច និងមធ្យម ក្នុងការលក់ផលិតផលដល់អតិថិជនសក្តានុពលទាំងក្នុងស្រុក និងក្រៅស្រុក។

ក្រសួងពាណិជ្ជកម្មបានបញ្ជាក់នៅក្នុងសេចក្តីប្រកាសដដែលនោះថា សហគ្រាសធន់តូច និងមធ្យមអាច ប្រើប្រាស់ផ្សារនេះបានលុះត្រាណាតែបានចុះឈ្មោះជាផ្លូវការរួចហើយជាមួយក្រសួង ឬមានលិខិតអនុញ្ញាតប្រកបអាជីវកម្មដែលមានវិញ្ញាបនបត្រពន្ធប៉ាតង់ និងលេខអត្តសញ្ញាណសារពើពន្ធមានសុពលភាព និងលក់ផលិតផលដែលផលិតនៅប្រទេសកម្ពុជាប៉ុណ្ណោះ។

ក្រោយពេលការចុះឈ្មោះនិងអនុម័តរួចហើយ សហគ្រាសធុនតូចនិងមធ្យមអាចបង្ហោះផលិតផលរបស់ខ្លួននៅលើទំព័រហាងរបស់ខ្លួនបាន ហើយផលិតផលទាំងនោះនឹងត្រូវបានដាក់បង្ហាញនៅលើផ្សារនៅពេលដែលផ្សារបានដាក់ដំណើរការជាផ្លូវការ។ នេះតាមសេចក្តីប្រកាសក្រសួងដដែល៕

ពលរដ្ឋលក់ដូរពេលយប់ត្អូញត្អែរបាត់ចំណូលទ្រទ្រង់ជីវភាពអំឡុងបម្រាមបិទចរាចរ

រ៉ាត់ ទី (Rath Thy) — Tue, 13 Apr 2021 08:35:06 +0000

(ភ្នំពេញ)៖ ក្នុងរាត្រីថ្ងៃទី១ខែមេសា ២០២១ ជាថ្ងៃចាប់ផ្តើមការដាក់បម្រាមគោចរ គេសង្កេតឃើញថា គ្រប់ដងផ្លូវសំខាន់ៗក្នុងរាជធានីភ្នំពេញដែលធ្លាប់តែមានសកម្មភាពលក់ដូរ និងចរាចរណ៍ទៅមកឈូឆរឥតដាច់ ប្រែក្លាយទៅជាស្ងប់ស្ងាត់ ឃើញតែលម្ហដងផ្លូវល្វឹងល្វើយ បំភ្លឺដោយអំពូលភ្លើងមានបង្គោលអមផ្លូវច្រូងច្រាង ព្រមជាមួយក្រុមអាជ្ញាធរមានសមត្ថកិច្ច ឈរជើងប្រចាំការទៅតាមទីតាំងគោលដៅរបស់ពួកគាត់រៀងៗខ្លួន។

បម្រាមគោចរដែលដាក់ចេញដោយសាលារាជធានៅភ្នំពេញ ត្រូវបានប្រកាសកាលពីថ្ងៃទី៣១ ខែមីនា ឆ្នាំ២០២១ ដោយសម្រេចឲ្យផ្អាកសកម្មភាពប្រមូលផ្ដុំ សកម្មភាពប្រកបអាជីវកម្ម និងដំណើរចរាចរណ៍ ក្នុងចន្លោះពេលពីម៉ោង៨យប់ ដល់៥ភ្លឺ ជាបណ្ដោះអាសន្ន រយៈពេលពីរសប្តាហ៍ ដើម្បីទប់ស្កាត់ការរីករាលដាលជំងឺកូវីដ១៩ ដែលបានផ្ទុះឆ្លងក្នុងសហគមន៍លើកទីបីនៅកម្ពុជា ឬហៅថាព្រឹត្តិការណ៍ ២០កុម្ភៈ រយៈពេលមួយខែជាងកន្លងទៅហើយនេះ។

Article: https://khmernas.com/archives/31262?fbclid=IwAR0Qyk1fv5DShj03rXmeBlfAd-225w_UHCFxvL-Lsuon2QawlNjr6-nV_-k

ប្រជាពលរដ្ឋកំពុងជួបការលំបាកផ្នែកសេដ្ឋកិច្ចខណៈកូវីដ១៩ កាន់តែរាលដាលខ្លាំង

លាស់ លីបលីប (Lors Liblib) — Sun, 11 Apr 2021 04:56:24 +0000

ប្រជាពលរដ្ឋជាច្រើនបានជួបផលលំបាកទាក់ទងទៅនឹងបញ្ហាសេដ្ឋកិច្ចគ្រួសារ រួមមានការចាយវាយផ្សេងៗក្នុងសម័យកាលកូវីដ១៩នេះ ដោយសារតែការរកប្រាក់ចំនូលត្រូវបានធ្លាក់ចុះយ៉ាងខ្លាំង និងត្រូវរកប្រាក់បង់សងទៅខាងធនាគារវិញ ជាពិសេសពួកគេភ័យខ្លាចក្នុងការបាត់បង់ដីធ្លី ឬផ្ទះសម្បែង ប្រសិនបើពួកគេគ្មានលទ្ធភាពសងប្រាក់វិញទេនោះ។

នៅថ្ងៃទី០៦ ខែមេសា ឆ្នាំ២០២១ ក្រុមសង្គមស៊ីវិលជាង១០០ស្ថាប័ន បានស្នើសុំទៅរាជរដ្ឋាភិបាល
ចេញវិធានការណែនាំដល់គ្រឹះស្ថានមីក្រូហិរញ្ញវត្ថុ និងធនាគារ ក្នុងការផ្អាកបង់សងប្រាក់កម្ចី និងការប្រាក់ទាំងអស់សម្រាប់រយៈពេលយ៉ាងតិច ៣ខែ ដើម្បីឲ្យអ្នកខ្ចីប្រាក់មានឱកាសក្នុងការស្នាក់នៅផ្ទះ និងរក្សាសុវត្ថិភាពរបស់ពួកគេក្នុងអំឡុងពេលផ្ទុះឡើងនៃវីរុសកូវីដ១៩នេះ។

របាយការណ៍ដែលបានចេញផ្សាយតាមបណ្តាញសង្គមហ្វេសប៊ុកអង្គការលីកាដូ បានបង្ហាញថា វិស័យកាត់ដេរ ទេសចរណ៍ សេវាកំសាន្ត និងសំណង់ កំពុងត្រូវបានរងគ្រោះជាខ្លាំងពីការរីករាលដាលនៃជំងឺនេះ។ វិស័យទាំងនេះផ្ដល់ការងារដល់ស្រ្តីរាប់សែននាក់ ខណៈដែលអត្រានៃអ្នកកម្ចីខ្នាតតូចគឺមានស្រ្តីចំនួន ៧៥% មានន័យថាមានករណីជាច្រើនដែលវិបត្តិជំងឺរីករាលដាលនេះប៉ះពាល់យ៉ាងខ្លាំងចំពោះស្រ្តីជាអ្នកខ្ចីប្រាក់។

ក្នុងរបាយការណ៍ដដែលបានកត់សម្គាល់ឃើញថា៖ «ការបន្តរីករាលដាលនៃជំងឺកូវីដ១៩ ក្នុងព្រឹត្តិការណ៍២០កុម្ភៈ
បានអូសបន្លាយពេលជាងមួយខែមកហើយ និងកំពុងតែបន្តប៉ះពាល់យ៉ាងខ្លាំងដល់ជីវភាពរស់នៅរបស់ប្រជាពលរដ្ឋជាច្រើន។ របាយការណ៍ពីការធ្វើអត្តឃាតដោយសារបញ្ហាបំណុលកំពុងកើតមានឡើង។ ស្រដៀងគ្នានេះដែររបាយការណ៍ការប្រើប្រាស់អំពើហិង្សាក្នុងគ្រួសារ រួមមានឃាតកម្មផងដែរនោះ ក៏កំពុងកើតឡើងមានក្នុងបរិបទនៃការតានតឹងផ្លូវចិត្តដោយសារបញ្ហាបំណុល និងបញ្ហាហិរញ្ញវត្ថុ»។

លោកវន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ថ្លែងប្រាប់Newsroom Cambodia តាមរយៈទូរស័ព្ទថា លោកយល់ឃើញថា បញ្ហាប្រឈមចំបងរបស់ប្រជាពលរដ្ឋខ្មែរនៅពេលសម័យកាលកូវីដ១៩នេះ គឺចំណូលប្រជាពលរដ្ឋមានការធ្លាក់ចុះយ៉ាងគំហុក។

«ព្រឹត្តិការណ៍២០កុម្ភៈនេះ មើលឃើញថា ប្រជាពលរដ្ឋធ្លាក់ប្រាក់ចំណូល អ្នកខ្លះដល់កម្រិតសូន្យ
អ្នកខ្លះស្ទើរតែដល់កម្រិតសូន្យ អ៊ីចឹងពួកគាត់មិនអាចមានលទ្ធភាពក្នុងការសងបំណុលទៅធនាគារ មិនថាឡើងការប្រាក់ ឬថ្លៃដើមនោះទេ»។

លោកបន្ថែមទៀតថា៖ «អ្នកលក់ដូរពេលយប់ អាជ្ញាធរបិទចរាចរណ៍ (បម្រាមគោចរ ចាប់ពីម៉ោង៨យប់
ដល់ម៉ោង៥ព្រឹក)លែងឲ្យធ្វើដំណើរ អ៊ីចឹងធ្វើឱ្យអ្នកលក់ដូរបាត់អាជីព និងប្រាក់ចំណូល ហេតុនេះហើយពួកគាត់មិនមានលទ្ធភាពបង់សងទៅធនាគារវិញ»។

លោកហេង សុភក្ត្រា ប្រកបរបររត់កង់បីឥណ្ឌាម្នាក់ បានប្រាប់Newsroom Cambodia តាមរយៈទូរស័ព្ទថា
លោកកំពុងតែជួបបញ្ហាសេដ្ឋកិច្ចក្នុងគ្រួសារយ៉ាងខ្លាំងក្នុងអំឡុងពេលជំងឺកូវីដ១៩ និងការដាក់បម្រាមគោចររបស់រដ្ឋបាលរាជធានីភ្នំពេញ ដែលធ្វើឱ្យគាត់មិនអាចរកចំណូលបាន ក្នុងការផ្គត់ផ្គង់ក្នុងគ្រួសារ
ក៏ដូចជាដោះស្រាយបញ្ហាបង់ប្រាក់សង់ត្រឡប់ទៅខាងធនាគារ។

លោកលើកឡើងថា៖ «ខ្ញុំបង់រំលោះកង់បី និងធនាគារផ្សេងទៀត មួយខែចូលជិត ៤០០ដុល្លារ ហើយនៅពេលនេះមួយខែៗ ខ្ញុំរក ១០០ដុល្លាសឹងតែមិនឃើញផង គ្រាន់តែថ្លៃហូបគឺហូបមិនគ្រាន់ផង។ ហើយមិញៗនេះខ្ញុំរកបានលុយ ១៣៥០០រៀល ហើយថ្ងៃខ្លះលោតដល់ ១៨០០០រៀល ដល់ ២០០០០រៀល ឯថ្ងៃខ្លះទៀតបាន៨០០០រៀលក៏មាន»។

ចំណែកប្រពន្ធរបស់លោកហេង សុភក្ត្រា គឺជាអ្នកដើរលក់នំប៉័ងតាមកញ្ជ្រែង ដែលមួយថ្ងៃៗ អាចរកចំណូលបានត្រឹមតែ១ម៉ឺនរៀលក្នុងមួយថ្ងៃតែប៉ុណ្ណោះ។ ហើយនៅពេលផ្ទុះកូវីដ១៩បែបនេះទៀត ប្រពន្ធរបស់លោក
គឺមិនសូវជាលក់ដាច់ប៉ុន្មាននោះទេ ដែលធ្វើឱ្យបាត់បង់ប្រាក់ចំណេញ និងសល់នំប៉័ងសឹងរាល់ថ្ងៃ។

«ប្រពន្ធរបស់ខ្ញុំ គាត់ស្ពាយកញ្ជ្រែងមួយដើរលក់នំប៉័ងសាប មួយដើមចំណេញ២០០រៀល អញ្ចឹងទៅ
មួយព្រឹកគាត់លក់អស់៥០ ទៅ៦០នំ ហើយចំណេញបានលុយខ្ទង់ ១ម៉ឺនរៀល»។

ចំណែកឯការផ្គត់ផ្គង់ម្ហូបអាហារ ឬការហូបចុកក្នុងក្រុមគ្រួសាររបស់លោកហេង សុភក្ត្រាវិញ គឺគ្មានអ្វីក្រៅពីនំប៉័ង និងពងទារាល់ថ្ងៃនោះទេ ហើយលោកពិតជាមានអារម្មណ៍អាណិតកូនៗរបស់លោកខ្លាំងមែនទែន
ដែលលោកមិនអាចរកអ្វីដើម្បីឱ្យកូនរបស់គាត់បានហូបឆ្ញាញ់ដូចកូនរបស់គេ។

លោករៀបរាប់ថា៖ «នំប៉័ងដែលនៅសល់គឺយកមកកែឆ្នៃដាក់ស្ករ ឬជៀនហូបឱ្យចេះតែឆ្អែតៗសិនទៅ
ហើយថ្ងៃខ្លះហូបពងទា…..រាល់ថ្ងៃខ្ញុំអាណិតតែកូនៗទេគឺមិនមានអ្វីហូបដូចគេដូចឯង ខ្ញុំធ្លាប់រត់កង់បីបានលុយទិញឱ្យកូនហូបគ្រប់គ្រាន់ តែដល់ពេលឥឡូវនេះរកតែលុយទិញទឹកដោះគោឱ្យកូនហូបតែមួយកំប៉ុងសឹងតែមិនបានផង»។

ចំណែកបុរសម្នាក់ទៀត ដែលកំពុងអង្គុយរង់ចាំភ្ញៀវក្នុងកង់បីឥណ្ឌារបស់ខ្លួននៅតាមសួនច្បារមាត់ទន្លេ ក្រុងតាខ្មៅ ដោយទឹកមុខមានសភាពស្រងួតស្រងាត់ បានប្រាប់Newsroom Cambodiaថា ចាប់តាំងពីមានការផ្ទុះជំងឺកូវីដ១៩មក លោកពិបាករកចំណូលមែនទែន សឹងតែថ្ងៃខ្លះគឺរកមិនបានមួយរៀលក៏មាន វាពិតជាធ្វើឱ្យលោកជួបវិបត្តសេដ្ឋកិច្ចក្នុងគ្រួសារ ដោយត្រូវការចំណាយថ្លៃផ្ទះជួល ចំណាយសម្រាប់កូនៗ ជាពិសេសរឿងបង់សងទៅធនាគារវិញតែម្តង។

«ពេលកូវីដអ៊ីចឹង ខ្ញុំមានបញ្ហាច្រើនណាស់ គឺរកលុយអត់បាន អត់មានម៉ូយជិះ ដោយជួនថ្ងៃណាខ្លះរកមិនបានសូម្បីមួយរៀល ថ្ងៃណាខ្លះបាន១ម៉ឺន ថ្ងៃខ្លះ២ម៉ឺនអញ្ចឹងទៅ ប៉ុន្តែភាគច្រើនប៉ុន្មានថ្ងៃនេះគឺរកលុយមិនបានតែម្តង ចេះតែប្រឹងរកទៅ បើមិនប្រឹងកាន់តែពិបាកថែមទៀត ហើយខ្ញុំគ្មានលុយបង់ធនាគារវិញ គឺពិបាកមែនទែន ពេលខ្លះខ្ចីលុយបងប្អូន ហើយយកលុយប្រពន្ធទាំងបង់ថ្លៃផ្ទះជួលផង ផ្គត់ផ្គង់កូនផង ជួនកាលប្រពន្ធខ្ញុំឲ្យលុយខ្ញុំបង់ធនាគារខ្លះថែមទៀត»។

បុរសម្នាក់ទៀតអាយុ ៤៤ឆ្នាំ ប្រកបមុខរបររត់កង់បីឥណ្ឌាដូចគ្នានេះ លោកស៊ឹម កុសល់ បានប្រាប់ Newsroom Cambodia តាមរយៈទូរសព្ទថា ក្នុងសម័យកូវីដ១៩នេះ លោកគឺប៉ះពាល់ចំណូលខ្លាំងលំបាករឿងលុយបង់សង់ធនាគារ និងការចំណាយផ្សេងៗ ដោយពីមុនគ្រាន់រកលុយបានខ្លះ តែដល់ពេលឥឡូវនេះគឺមិនបានសោះតែម្តង បើចេញមួយព្រឹកមកទល់ថ្ងៃត្រង់បានលុយត្រឹមតែ៤០០០ទៅ៥០០០រៀលតែប៉ុណ្ណោះ។

លោករៀបរាប់ថា៖ «តាំងពីកូវីដផ្ទុះនេះចប់តែម្តង រកតែលុយទិញអង្ករហូបមិនបានផង ពេលបាយសឹងតែហូបពងទា១គ្រាប់ក្នុងមួយពេល ដល់ចឹងមិនដឹងគិតយ៉ាងម៉េចទេ។ ខាងធនាគារក៏ទារលុយថ្លៃខ្ចីទិញកង់បីឥណ្ឌារត់ ដល់ពេលនេះរកមិនបានអ៊ីចឹងពិបាកដែរ។ នៅពេលផ្ទុះកូវីដនេះខ្ញុំខានបង់ធនាគារ២ទៅ៣ខែហើយ ខ្ញុំមិនដឹងថាគេនឹងរឹបអូសរបស់អ្វីនោះទេ តែគេឲ្យយើងរកបង់គេបណ្តើរៗទៅ អញ្ចឹងគេ(ធនាគារ)ក៏សម្រួលយើងដែរ ដោយឲ្យយើងទៅដាក់ពាក្យពន្យា»។

«ហើយសម្រាប់ខ្ញុំពន្យាចេះតែពន្យាបានហើយ តែការប្រាក់បូកៗទៅ លើសដើមៗលើសការទៀត វាពិបាកគិតដែរដល់អ៊ីចឹង ខ្ញុំមិនដឹងគិតបែបណានោះទេ ដោះស្រាយមិនចេញ ហើយក្នុងបន្ទុកខ្ញុំមានកូនតូចមួយដែរ និងកូនៗផ្សេងទៀតគេធ្វើការ ដល់សម័យកូវីដនេះមកនៅជុំគ្នាទាំងអស់»។

នៅថ្ងៃពុធនេះ សមាគមន៍ធនាគារនៅកម្ពុជា(ABC) និងសមាគមន៍មីក្រូហិរញ្ញវត្ថុកម្ពុជា(CMA)បានចេញនូវសេចក្តីថ្លែងការណ៍រួមមួយលើទំព័រហ្វេសប៊ុកសមាគមន៍មីក្រូហិរញ្ញវត្ថុកម្ពុជាស្តីអំពី«អន្តរាគមន៍បន្ថែមរបស់គ្រឹះស្ថានធនាគារ និងហិរញ្ញវត្ថុដើម្បីគាំពារដល់អតិថិជនក្នុងពេលរីករាលដាលនៃជំងឺកូវីដ-១៩» ដើម្បីចូលរួមជួយគាំទ្រ និងសម្រួលបន្ថែមទៀត ដល់អតិថិជនដែលរងផលប៉ះពាល់ដោយជំងឺកូវីដ-១៩ ក្នុងគ្រាដ៏លំបាកនេះ។

ក្នុងសេចក្តីថ្លែងការណ៍រួមរបស់ស្ថាប័នធនាគារ និងមីក្រូហិរញ្ញវត្ថុទាំងនោះ បានលើកឡើងថា៖« សមាគមទាំងពីរសូមដាក់ចេញនូវគោលការណ៍បន្ថែមដូចជា សម្រាប់អតិថិជនដែលឆ្លងកូវីដ១៩ មានការលើកលែងសម្រាប់ការបង់ប្រាក់និងរាល់ការផាកពិន័យទាំងអស់រយៈពេលមួយខែ ព្រមទាំងទទួលបានការរៀបចំឥណទានថ្មីដោយស្វ័យប្រវត្តិ(ប្រសិនបើអតិថិជនយល់ព្រម)រួមទាំងការពន្យាការបង់ប្រាក់ដើមរយៈពេលបីខែ។

រាល់អតិថិជនដែលឆ្លងជំងឺកូវីដ១៩ ត្រូវបង្ហាញលទ្ធផលតេស្តវិជ្ជមានកូវីដ១៩ ចេញដោយអាជ្ញាធរមានសមត្ថកិច្ច ហើយសម្រាប់អតិថិជនធ្វើចត្តាឡីស័កផ្តល់ការរៀបចំឥណទានឡើងវិញដោយស្វ័យប្រវត្តិ(ប្រសិនបើអតិថិជនយល់ព្រម) រួមទាំងការពន្យាការបង់ប្រាក់ដើម និងការប្រាក់រយៈពេលមួយខែ និងលើកលែងការផាកពិន័យទាំងអស់។ នេះយោងតាមសេចក្តីថ្លែងការណ៌ដដែល។

សេចក្តីថ្លែងការណ៌នោះបានបន្តថានឹងបន្តធ្វើការផ្តល់ជូនការរៀបចំឥណទានឡើងវិញឲ្យឆាប់រហ័ស និងបង្ករលក្ខណៈងាយស្រួលសម្រាប់អតិថិជនដែលរងផលប៉ះពាល់ដោយសារកូវីដ១៩ និងបញ្ចេញឥណទានសង្គ្រោះបន្ទាន់ឬបន្ថែម ដោយបន្ធូរបន្ថយលក្ខខណ្ឌ ព្រមទាំងកាត់បន្ថយអាត្រាការប្រាក់ ដើម្បីជួយបន្តនិងស្តារឡើងវិញនូវសេដ្ឋកិច្ចគ្រួសារ និងអាជីវកម្មមុន និងក្រោយមានវិបត្តិ។

ពួកគេបាននិយាយបន្តថានឹងធ្វើការរៀបចំឥណទានឡើងវិញ ព្រមទាំងលើកលែងការផាកពិន័យទាំងអស់ សម្រាប់អតិថិជនទិញផ្ទះផ្ទាល់ខ្លួនទីមួយសម្រាប់រស់នៅ និងផ្តល់ការអនុគ្រោះសម្រាប់អតិថិជនដែលទទួលមរណភាពដោយសារជំងឺកូវីដ១៩តាមលទ្ធភាពជាក់ស្តែងរបស់គ្រឹះស្ថាននីមួយៗ។

ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោកកាំង តុងងី បានថ្លែងប្រាប់ Newsroom Cambodia ថា ធនាគារជាតិក៏បានដាក់ចេញគោលនយោបាយនៃការរៀបចំឥណទានឡើងវិញសម្រាបអតិថិជន មានបញ្ហាក្នុងការបង់សង់ត្រឡប់ដែរ។

លោកបានបញ្ជាក់ថា៖ «វិស័យហិរញ្ញវត្ថុមានតួនាទីសំខាន់ណាស់នៅក្នុងចរន្តសេដ្ឋកិច្ចរបស់យើង ដូចជាសរសៃឈាមអ៊ីចឹង ប្រសិនបើយើងធ្វើអ្វីមិនប្រយ័ត្ន ធ្វើឲ្យវិស័យហិរញ្ញវត្ថុជួបបញ្ហានោះវានឹងមានហានិភ័យខ្ពស់ណាស់ ក្នុងការបង្ករឱ្យមានវិបត្តិសេដ្ឋកិច្ចក្នុងប្រទេសទាំងមូល ដូច្នេះយើងមិនអាចធ្វើអ្វីផ្តេសផ្តាសតាមតែការនឹកឃើញនោះទេ។

លោកកាំង តុងងី បានជឿជាក់ថាសមាជិកស្ថាប័នធនាគារ និងមីក្រូហិរញ្ញវត្ថុ នឹងមិនមានការរឹបអូសផ្ទះសម្បែងរបស់ប្រជាពលរដ្ឋនៅក្នុងគ្រាលំបាកនៃការរីករាលដាលនៃជំងឺកូវីដ១៩នេះទេ។

«សមាគមន៍មីក្រូហិរញ្ញវត្ថុគឺយើងអាចធានាបានថាសមាជិកទាំង ១១៤ នឹងមិនមានការរឹបអូសដីធ្លីផ្ទះសម្បែងរបស់អតិថិជនក្នុងពេលដ៏លំបាកនេះទេ ហើយមែនទែនទៅវាជាផ្នែកមួយ នៃយុទ្ធសាស្រ្តទីផ្សាររបស់គ្រឹះស្ថានទាំងអស់នោះដែរ ប្រសិនបើគាត់ព្យាយាមជួយអតិថិជនរបស់គាត់ក្នុងពេលលំបាកនេះបាន អញ្ចឹងថ្ងៃក្រោយអតិថិជន នឹងបន្តសេវាកម្មរបស់គាត់ទៀត នៅពេលដែលគាត់ឆ្លងកាត់ការលំបាកនេះ»។

គិតត្រឹមថ្ងៃទី១០ ខែមេសា ឆ្នាំ២០២១ កម្ពុជាមានករណីវិជ្ជមានវីរុសកូវីដ១៩ សរុបចំនួន ៤,០៨១នាក់ អ្នកជាសះស្បើយសរុបចំនួន ២,០៨០ នាក់ អ្នកកំពុងសម្រាកព្យាបាល ១,៩៧០នាក់ និងអ្នកស្លាប់ចំនួន ២៦នាក់៕

អភិបាលរាជធានីភ្នំពេញ អំពាវនាវដល់ម្ចាស់ផ្ទះជួល និងបន្ទប់ជួល បញ្ចុះតម្លៃ ឬលើកលែងថ្លៃឈ្នួលរហូតដល់ស្ថានភាពកូវីដធូរស្រាលឡើងវិញ

Bunheng You — Sun, 28 Mar 2021 08:32:33 +0000

អភិបាលរាជធានីភ្នំពេញ លោកឃួង ស្រេង នៅថ្ងៃទី២៦ មិនា ២០២១ បានអំពាវនាវដល់ម្ចាស់ផ្ទះជួល និងបន្ទប់ជួលទាំងអស់ក្នុងរាជធានីភ្នំពេញឲ្យជួយគិតគូរ និងទ្រទ្រង់ជីវភាពរបស់បងប្អូនប្រជាពលរដ្ឋដែលកំពុងស្នាក់នៅផ្ទះជួល ឬបន្ទប់ជួល តាមរយៈបញ្ចុះតម្លៃ ឬលើកលែងការបង់ថ្លៃឈ្នួលរហូតដល់ស្ថានភាពនៃការរីករាលដាលមេរោគកូវីដ ១៩មានសភាពធូរស្រាលឡើងវិញ។

សេចក្តីអំពាវនាវពីអភិបាលក្រុង លោកឃួង ស្រេង បានសរសេរដូច្នេះថា «យោគយល់អធ្យាស្រ័យចំពោះការយឺតយ៉ាវក្នុងការបង់ថ្លៃឈ្នួល ដោយគួរលើកលែងការពិន័យឲ្យបង់ប្រាក់បន្ថែម ឬដកយកប្រាក់កក់ចំពោះការយឺតយ៉ាវក្នុងការបង់ថ្លៃឈ្នួល និងបន្តរអនុញ្ញាតិអោយពួកគាត់ស្នាក់នៅបន្តរទៀត ដោយមិនគួរបណ្តេញពួកគាត់ចេញឡើយ»។

ក្រសួងសុខាភិបាលបានប្រកាសកាលពីថ្ងៃទី២៨ ខែមីនា ឆ្នាំ២០២១នេះ ថាមានករណីវិជ្ជមានចំនួន៨៦ និងជាសះស្បើយចំនួន ៣៤នាក់។ គិតត្រឹមថ្ងៃទី២៨ ខែមីនា ឆ្នាំ២០២១ កម្ពុជាមានអ្នកឆ្លងសរុបចំនួន ២២៣៣នាក់ ជាសះស្បើយចំនួន ១១៦៦នាក់ កំពុងព្យាបាលចំនួន ១០៥៤នាក់ និងមានអ្នកស្លាប់ចំនួន ១០នាក់៕

ប្រជាជនរស់នៅស្រុកកោះធំ ខេត្តកណ្តាល ព្រួយបារម្ភពីការបាត់បង់ការងារនិងប្រាក់ចំណូលបន្ទាប់ពីកូវីដ ១៩ផ្ទុះឡើងដល់សហគមន៍

លាស់ លីបលីប (Lors Liblib) — Wed, 24 Mar 2021 08:33:31 +0000

ប្រជាពលរដ្ឋរស់នៅក្នុងឃុំសំពៅពូន ស្រុកកោះធំ ខេត្តកណ្តាល បាននិយាយថា ពួកគាត់មានការព្រួយបារម្ភអំពីការបាត់បង់ការងារនិងប្រាក់ចំណូល បន្ទាប់ពីជំងឺរាតត្បាតកូវីដ-១៩ បានផ្ទុះឡើងរាលដាលមកដល់សហគមន៍របស់ពួកគាត់។

អាជ្ញាធរខេត្តកណ្តាលបានសម្រេចបិទភូមិចំនួន៣ រួមមាន ភូមិជ្រៃធំ ភូមិព្រែកស្បូវ ភូមិព្រែកស៊ឹង និងបានផ្អាកអាជីវកម្មបណ្តោះអាសន្ន បន្ទាប់ពីមានករណីវិជ្ជមានកូវីដ-១៩ រហូតដល់ទៅ ៦៤នាក់ បើគិតត្រឹមថ្ងៃទី១៥ ខែមីនា ឆ្នាំ២០២១ ហើយការបិទភូមិទាំងនេះ គឺដើម្បីកុំឱ្យមានការរីករាលដាលនៃជំងឺកូវីដ-១៩បន្តទៀត។

អត្ថបទនៅទីនេះ ៖ https://cambonomist.com/news/residents-in-lockdown-areas-in-kandal-province-bemoan-hardships/

អ្នកប្រើបណ្តាញសង្គម បង្ហោះសារសុំឲ្យលោកនាយករដ្ឋមន្រ្តីដោះស្រាយបញ្ហាជីវភាពដោយសារជំងឺកូវីដ១៩

លាស់ លីបលីប (Lors Liblib) — Sat, 20 Mar 2021 05:19:37 +0000

ប្រជាពលរដ្ឋដែលប្រើប្រាស់បណ្តាញសង្គមមួយចំនួន បង្ហោះសារលើគណនីហ្វេសប៊ុករបស់ពួកគេ ដោយអំពាវនាវឲ្យលោកនាយករដ្ឋមន្រ្តី ហ៊ុន សែន ដោះស្រាយបញ្ហាសេដ្ឋកិច្ចដែលពួកគេកំពុងជួបប្រទះក្នុងអំឡុងការរីករាលដាលជំងឺកូវីដ១៩។

នៅលើបណ្តាញសង្គមហ្វេសប៊ុក ក្នុងសប្តាហ៍នេះ គេឃើញមានអ្នកប្រើបណ្តាញសង្គមជាច្រើនបង្ហោះសារភ្ជាប់ជាមួយរូបថតនៃការរកស៊ីរបស់ពួកគេ និងរូបថតលោកនាយករដ្ឋមន្រ្តីជាបន្តបន្ទាប់ ដោយត្អូញត្អែរពីផលលំបាក និងផលប៉ះពាល់ក្នុងអំឡុងការកើតមានជំងឺកូវីដ១៩ ព្រមទាំងស្នើឲ្យមានការដោះស្រាយបញ្ហាប្រឈមផ្សេងៗ។

កាលពីថ្ងៃទី១៨ ខែមីនា ឆ្នាំ២០២១ គណនីហ្វេសប៊ុកឈ្មោះ តាំង គីមឡេង ដែលជាគណនីហ្វេសប៊ុកមួយក្នុងចំណោមគណនីហ្វេសប៊ុកជាច្រើនទៀតដែលបានបង្ហោះសារសុំជំនួយពីលោកនាយករដ្ឋមន្រ្តីហ៊ុន សែន បានសរសេររៀបរាប់ថា លោកស្នើសុំទៅលោកនាយករដ្ឋមន្រ្តី ហ៊ុន សែន ជួយដោះស្រាយបញ្ហាទុក្ខធុរៈ និងទុក្ខសោករបស់ប្រជាជន ក្នុងស្ថានភាពកូវីដ១៩។

ខ្លឹមសារនៃសាររបស់លោក តាំង គីមឡេង បានរៀបរាប់ចំនួនបួនចំណុចថា៖ «ទី១ សូមមេត្តាជួយដោះស្រាយបញ្ហាសាំងឡើងថ្លៃ សម្រួលឱ្យថោក ឬធូរថ្លៃសមរម្យក្នុងស្ថានភាពសេដ្ឋកិច្ចជីវភាពប្រជាជនសម័យកូវីដ ទី២សូមមេត្តាធ្វើសេចក្តីប្រកាសសម្រួលជាមួយម្ចាស់ផ្ទះ ម្ចាស់កន្លែងជួលបើករកស៊ី ឱ្យចុះថ្លៃបន្ទប់ ឬផ្ទះល្វែងឱ្យសល់ត្រឹមតែពាក់កណ្តាល១រយៈពេល ទី៣ សូមសម្រួលជាមួយធនាគាហិរញ្ញវត្ថុគ្រប់ស្ថាប័នរដ្ឋ និងឯកជនចំពោះប្រជាពលរដ្ឋនៃប្រាក់កម្ចីដោយធ្វើការផ្អាកបង់១រយៈពេល ទី៤ សូមជួយសម្រួលជាមួយអគ្គីសនីកម្ពុជា និងរដ្ឋាករទឹក ឱ្យចុះថោកបន្តិច ដើម្បីជួយសម្រួលជីវភាពប្រជាពលរដ្ឋដោយអនុគ្រោះផងសម្តេចអ៊ុំ»។

ចំណែកអ្នកនាង គឹម លីហ្សា អាជីវករមួយរូប ក៏បានបង្ហោះសារដូចគ្នានេះដែរ ដែលមកដល់ត្រឹមថ្ងៃទី១៩ ខែមីនាឆ្នាំ២០២១នេះ មានចំនួនអ្នកគំាំទ្រ (Like) ប្រមាណជាជាង១ម៉ឺននាក់ និងអ្នកចែករំលែកបន្តជិត១ម៉ឺននាក់ ។ ក្នុងនោះក៏មានអ្នកបញ្ចេញមតិគាំទ្រយ៉ាងច្រើនដោយមួយចំនួនបញ្ចេញមតិ (Commet) ស្នើឲ្យមានការអន្តរាគមន៍ពីលោកនាយករដ្ឋមន្រ្តី និងខ្លះត្អូញត្អែរពីផលលំបាក និងផលប៉ះពាល់បណ្តាលមកពីការរាលដាលជំងឺកូវីដ១៩។

កម្ពុជាបានជួបវិបត្តិកូវីដ១៩ជាងមួយឆ្នាំមកហើយ ប៉ុន្តែចាប់ពីព្រឹត្តិការណ៍សហគមន៍២០កុម្ភៈ មក គឺត្រឹមតែរយៈពេល១ខែ ធ្វើឱ្យកម្ពុជាមានសភាពធ្ងន់ធ្ងរ ស្ងប់ស្ងាត់ជាងរយៈពេលមួយឆ្នាំមុន ដោយសារមានចំនួនអ្នកឆ្លងជំងឺកូវីដច្រើន ហើយទីតាំងអាជីវកម្មមួយចំនួនត្រូវផ្អាក និងបិទជាបន្តបន្ទាប់។

លោក ផៃ ស៊ីផាន អ្នកនាំពាក្យរាជរដ្ឋាភិបាល បានប្រាប់ Newsroom Cambodia នៅថ្ងៃទី១៩ ខែមីនាថា រដ្ឋាភិបាល និងក្រសួងពាក់ព័ន្ធកំពុងពិចារណាក្នុងករណីនៃផលប៉ះពាល់របស់ប្រជាជននេះ។ លោកថា ដំណាក់កាលដំបូងក្រសួងពាក់ព័ន្ធកំពុងស្នើទៅប្រធានក្រុមប្រឹក្សាភិបាលនៃធនាគារកណ្តាល ដើម្បីសិក្សាមើលទៅលើបញ្ហាទាំងនេះ។

«យើងយកផលប៉ះពាល់មកពិចារណា ហើយក្រសួងសាម៉ីដែលពាក់ព័ន្ធក្នុងសាច់រឿងហ្នឹង យើងមានក្រសួង៣ដែលពាក់ព័ន្ធសាច់រឿងហ្នឹង ទី១គឺក្រសួងផែនការ ទី២គឺក្រសួងសង្គមកិច្ច ទី៣គឺក្រសួងសេដ្ឋកិច្ច និងហិរញ្ញវត្ថុ កំពុងជជែកគ្នា ដោយជំហានទីមួយបានស្នើសុំតាមរយៈប្រធានក្រុមប្រឹក្សាភិបាលនៃធនាគារកណ្តាលដើម្បីសុំឱ្យមានការផ្លាស់ប្តូរកម្មវិធីក្នុងការប្រមូលប្រាក់ជំពាក់ពីអតិថិជនរបស់គេ ដើម្បីបន្ធូរ ឬពន្លាតពេលវេលានៃកាសងប្រាក់»។

លោកក៏បានលើកឡើងទាក់ទងបញ្ហាទឹកភ្លើងទៀតថា៖ «ចំពោះទឹកភ្លើង ខ្ញុំជឿជាក់ថាសម្តេចលោក កំពុងតែពិចារណា ថាធ្វើយ៉ាងម៉េច ពីព្រោះវាប៉ះពាល់ឧស្សាហកម្មរដ្ឋដែរ»។

ចំណែកថ្លៃជួលបន្ទប់ និងឈ្នូលផ្ទះ លោក ផៃ ស៊ីផានលើកឡើងថា មិនមានអ្វីក្រៅពីសំណូមពរឱ្យម្ចាស់ផ្ទះ ជួយបន្ទូរបន្ថយ ពីព្រោះលោកបានបញ្ជាក់ថាគឺជារឿងបុគ្គល។

«រដ្ឋាភិបាលគ្មានអ្វីក្រៅពីអំពាវនាវដើម្បីដោះស្រាយក្នុងរបៀបទន់ភ្លន់នោះទេ ព្រោះម្ចាស់ផ្ទះគ្មានចំណូលដែរ ដូច្នេះយើងមិនហ៊ានឱ្យជាគោលការណ៍ធំទេ យើងសុំឱ្យម្ចាស់ផ្ទះ តើយើងសម្របសម្រួលរបៀបម៉េច ជាមួយសមាគមកម្មករ សមាគមដទៃទៀតដែលពាក់ព័ន្ធបញ្ហានេះ»។

លោក ផៃ ស៊ីផាន បានបន្តទៀតថា រដ្ឋាភិបាលកំពុងគិតគូរទៅលើក្រុមអាទិភាពចាំបាច់ជាមុន ដើម្បីប្រយុទ្ធប្រឆាំង និងការពារសេដ្ឋកិច្ចរបស់ប្រទេសជាតិឱ្យមានដំណើរការល្អ។ លោកបន្ថែមដោយជឿជាក់ថា បញ្ហានានាដែលកំពុងតែកើតមានបច្ចុប្បន្ន ពិសេសចំពោះប្រជាជន លោកនាយករដ្ឋមន្រ្តីនឹងមានការសម្របសម្រួល ហើយស្ថានភាពសេដ្ឋកិច្ចអាចនឹងវិលទៅជាធម្មតាវិញ។

«ខ្ញុំជឿជាក់ថានឹងមានការសម្រួល ក៏ប៉ុន្តែតើពេលណាមួយនោះ យើងចាំស្តាប់នៃការដោះសា្រយពីប្រមុខរាជរដ្ឋាភិបាល គឺយើងធ្វើការដោះស្រាយមួយដើម្បីរស់ទាំងអស់គ្នា។ ប្រសិនបើយើងទប់ស្កាត់មួយរយៈពេល ៣ទៅ៤អាទិត្យនេះ យើងបើកចំហរមកវិញ គឺសេដ្ឋកិច្ចយើងឡើងមកវិញហើយ»។

គិតមកដល់ថ្ងៃទី១៩ ខែមីនា ឆ្នាំ២០២១ អ្នកមានផ្ទុកវីរុសកូវីដ១៩ សរុបមានចំនួន១,៥៧៨នាក់ ដែលក្នុងនេះមានអ្នកឆ្លងក្នុងព្រឹត្តិការណ៍២០កុម្ភៈ មានចំនួនរហូតដល់១,០៦២នាក់ ក្នុងរយៈពេលត្រឹមតែ១ខែ និងមានអ្នកស្លាប់ដោយសារជំងឺកូវីដ១៩ចំនួន៣នាក់៕

ភ្ញៀវទេសចរជិះទូកកម្សាន្តធ្លាក់ចុះដោយសារការីករាលដាលជំងឺកូវីដ១៩

ស៊ាម សុភា (Seam Sophea) — Thu, 18 Mar 2021 05:30:53 +0000

អ្នកប្រកបរបររកស៊ីដឹកភ្ញៀវទេសចរជិះទូកលេងកម្សាន្តនៅតាមដងទន្លេសាប និងទន្លេមេគង្គក្នុងរាជធានីភ្នំពេញ បានត្អូញត្អែរអំពីការបាត់បង់ភ្ញៀវទេសចរមកជិះទូកកម្សាន្ត ដោយសារការផ្ទុះឆ្លងរាលដាលជំងឺកូវីដ១៩ ក្នុងសហគមន៍ជាលើកទីបី។

លោក រិន ណារ៉ាន់ ម្ចាស់ទូកទេសចរណ៍ឈ្មោះចំការស្នេហ៍បានប្រាប់សារព័ត៌មាន Newsroom Cambodia ឱ្យដឹងកាលពីល្ងាចថ្ងៃទី១៧ ខែមីនា ឆ្នាំ២០២១នេះថា ក្រោយមានការផ្ទុះឡើងនៃជំងឺកូវីដ១៩ក្នុងសហគមន៍ជាលើកទីបីមក កំណើនភ្ញៀវទេសចរជាតិ និងអន្តរជាតិមកជិះទូកលេងកម្សាន្តបានថយចុះជាខ្លាំង បើធៀបទៅនឹងព្រឹត្តិការណ៍សហគមន៍មុនៗ ។

លោកបញ្ជាក់ថា៖ «បើសិនជាភ្ញៀវជាតិយើង គឺថយតាមព្រឹត្តិការណ៍ ពេលណារាងបានធូរស្បើយមានការកើនឡើងវិញ ពេលណាស្ថានការណ៍ធ្ងន់ធ្ងរគឺស្ងាត់ ដូចដំណាក់កាលចុងក្រោយនេះ ថ្ងៃទី២០ កុម្ភៈហ្នឹង គឺស្ងាត់មែនទែនតែម្ដង»។

ព្រះតេជគុណ យាន សុខគីម ជាព្រះសង្ឃមួយអង្គគង់ក្នុងវត្តឧណ្ណាលោម រាជធានីភ្នំពេញ មានសង្ឃដីកាថា ជាញឹកញាប់ព្រះសង្ឃអង្គចូលចិត្តនិមន្តជិះទូកលេងកម្សាន្ត មុនពេលការផ្ទុះឡើងនៃជំងឺកូវីដ១៩ ក្នុងសហគមន៍ជាលើកទីបី ។ ប៉ុន្តែព្រះអង្គថា ក្រោយការផ្ទុះការឆ្លងជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈមក លោកម្ចាស់ សុខគីម បានកាត់បន្ថយការនិមន្តជិះទូកកម្សាន្តដូចសព្វដង ដោយសារព្រះអង្គព្រួយបារម្ភចំពោះការរីករាលដាលក្នុងសហគមន៍នេះ។

ព្រះអង្គបានលើកឡើងថា៖ «កូណាអង្គុយគិតដែរថា បើថា បើឆ្លងសហគមន៍អីចឹងប្រហែលជាមិនមែនតិចទេ ប្រហែលអាចនឹងបែកទៅច្រើនៗទៀត ចេះតែអង្គុយបារម្ភ»។ គិតត្រឹមថ្ងៃព្រហស្បតិ៍ ទី១៧ ខែមីនា ឆ្នាំ២០២១នេះ ព្រឹត្តិការណ៍ឆ្លងក្នុងសហមគន៍ ២០កុម្ភៈ មានចំនួន២៦ថ្ងៃហើយ ដែលក្នុងនោះអ្នកឆ្លងសរុបមានចំនួន៩៩០នាក់ អ្នកព្យាបាលជាសះស្បើយមានចំនួន៣៤០នាក់ នេះបើតាមការចេញផ្សាយរបស់ក្រសួងសុខាភិបាលកម្ពុជា៕

គ្រឹះស្ថានអង្គរ បន្ថែមសុពលភាពលើសំបុត្រទស្សនារមណីយដ្ឋានអង្គរ ដើម្បីជុំរុញកំណើនចូលទស្សនា

Sok Molenna — Mon, 15 Mar 2021 10:03:58 +0000

គ្រឹះស្ថានអង្គរ បានប្រកាសបន្ថែមសុពលភាព កាលពីពេលថ្មីៗនេះ លើសំបុត្រទស្សនារមណីយដ្ឋានអង្គរ ដើម្បីជុំរុញការលក់សំបុត្រចូលទស្សនា បន្ទាប់ពីវិស័យទេសចរណ៌ត្រូវបានប៉ះពាល់យ៉ាងខ្លាំងដោយសារការផ្ទុះឡើងនូវជំងឺកូវីត ១៩។

គ្រឺះស្ថានអង្គរ ដែលជាស្ថាប័នគ្រប់គ្រងដោយរដ្ឋទទួលបន្ទុកលក់សំបុត្រសម្រាប់ភ្ញៀវអន្តរជាតិ បានចេញសេចក្តីជូនដំណឹងទាក់ទងនឹងការការអនុវត្តន៍គោលនយោបាយលើកទឹកចិត្តនៃការលក់សំបុត្រចូលទស្សនារមណីយដ្ឋានអង្គរ កាលពីថ្ងៃទី១០ ខែមីនា ឆ្នាំ២០២១ បន្ទាប់ពីមានការធ្លាក់ចុះនៃចំនួនភ្ញៀវទេសចរណ៌នៅតំបន់អង្គរ។

ក្រោមស្ថានភាពដ៏តឹងតែងនេះ រដ្ឋាភិបាលបានសម្រេចចិត្តក្នុងការអនុវត្តនយោបាយនេះចាប់ពី ថ្ងៃទី១១ ខែ មីនា ឆ្នាំ ២០២១ រហូតដល់ ថ្ងៃ ៣១ ខែធ្នូ ឆ្នាំ ២០២១ ក្នុងគោលបំណងជួយវិស័យទេសចរណ៌ និងធានានូវភាពទាក់ទាញរបស់ទេសចរណ៍ក្នុងការទស្សនារមណីយដ្ឋានអង្គរ។

នៅក្នុងសេចក្តីប្រកាសពត៌មានបានបញ្ជាក់ថា បណ្ណទស្សនកិច្ចនឹងមានការប្រែប្រួលសុពលភាពការចូលទស្សនារមណីយដ្ឋានអង្គររបស់ភ្ញៀវទេសចរឲមានរយៈពេលយូជាងមុន។ ប័ណ្ណធម្មតាដែលធ្លាប់មានសុពលភាពរយៈពេល១ថ្ងៃ អាចមានសុពលភាពទៅដល់២ថ្ងៃ ប័ណ្ណរយៈពេល៣ថ្ងៃ ទៅជា ៥ថ្ងៃ ហើយបើសិនជាបណ្ណដែលមានសុពលភាព ៧ថ្ងៃ កើនទៅជាសុពលភាព ១០ថ្ងៃវិញ។

ចំណែកឯប័ណ្ណទស្សនារយៈពេលយូរសម្រាប់ភ្ញៀវទេសរដែលមានទិដ្ឋាការលើសពី ៣ខែ ក៏មានការប្រែប្រួលដែរ ដែលប័ណ្ណចូលទស្សនារយៈពេល១ខែ នឹងឡើងដល់ ២ខែ ប័ណ្ណ ៣ខែ នឹងឡើងដល់ ៦ខែ និង សម្រាប់ប័ណ្ណ ៦ខែ នឹងមានសុពលភាពរហូតដល់ ១២ខែ៕

តម្លៃប្រេងឥន្ធនៈខែមីនាឡើងថ្លៃ ខណៈអ្នកប្រើប្រាស់ថាឡើងចំពេលលំបាករកចំណូលដោយសារកូវីដ

ឈាន សៅវ័ន (Chhean Saovon) — Sun, 07 Mar 2021 08:09:42 +0000

ក្រសួងពាណិជ្ជកម្មបានប្រកាសកាលពីពេលថ្មីៗនេះថា តម្លៃប្រេងឥន្ធនៈនាខែមីនា មានតម្លៃថ្លៃជាងខែកុម្ភៈ ខណៈពេលដែលអ្នកប្រើប្រាស់មួយចំនួនថាការឡើងនេះកើតឡើងចំពេលដែលពួកគាត់មានការលំបាកក្នុងការរកប្រាក់ចំណូលដោយសារតែជំងឺរាតត្បាតកូវីដ ១៩។

បើយោងទៅតាមសេចក្តីជួនដំណឹងរបស់ក្រសួងពាណិជ្ជកម្ម តម្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី០១ ដល់ ថ្ងៃទី១៥ ខែមីនា ឆ្នាំ២០២១ លក់ក្នុងតម្លៃ ៣.៧០០រៀល/លីត្រ សម្រាប់សាំងធម្មតា EA92 និង ៣.៣៥០រៀល/លីត្រ សម្រាប់ប្រេងម៉ាស៊ូត។

កញ្ញាទួន ស្រីវីន មានអាយុ ២២ឆ្នាំជានិស្សិតម្នាក់នៅក្នុងភ្នំពេញ បានប្រាប់មកកាន់សិក្ខាកាមNewsroom Cambodia ថា «ថ្លៃ ពីព្រោះរយៈពេលកូវីដ រកចំណូលមិនសូវបាន»។

លោកសម្បតិ្ត អាយុ៥៦ឆ្នាំ ដែលជាអ្នករត់កង់បីប្រមាណជាង១០ឆ្នាំនៅក្នុងរាជធានីភ្នំពេញ បាននិយាយាថា «តាំងពីមានកូវីតមក ខ្ញុំរកមិនសូវបានទេ ពេលខ្លះមានភ្ញៀវ ពេលខ្លះក៏អត់ហើយ ពេលនេះសាំងឡើងថ្លៃទៀត គេមិនសូវជិះកង់បីទេ ភាគច្រើនគេជិះកង់បីឥណ្ឌា ដែលគេចាក់ហ្គាសដែលជាផលប៉ះពាល់សម្រាប់ខ្ញុំ»។

លោកក៏បានបន្ថែមទៀតថា លោកគ្មានលុយណាទៅបង់រំលស់កង់បីឥណ្ឌាដូចគេ បើឥឡូវរកមិនសូវបានផង។

ក្រសួងពាណិកម្មបានបញ្ជាក់ផងដែរថា មិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង ចុះនៃប្រេងតាមទីផ្សារអន្តរជាតិ មកគណនាតាមប្រកាសដូចមានក្នុងឯកសារយោងតែប៉ុណ្ណោះ៕