នគរបាលខេត្តព្រះសីហនុបន្តអះអាងថា ការស្លាប់យុវតីអង់គ្លេស មិនមែនជាករណីសម្លាប់ ឬរំលោភទេ

ជា សំអៀង (Chea Sameang) — Tue, 29 Dec 2020 09:06:25 +0000

ស្នងការនគរបាលខេត្តព្រះសីហនុ លោកជួន ណារិន្ទ បានអះអាងកាលពីថ្ងៃទី២៩ ខែធ្នូ ឆ្នាំ២០២០នេះថា ការស្លាប់ជនជាតិអង់គ្លេស Amelia Bambridge កាលពីឆ្នាំ ២០១៩ គឺមិនមែនជាករណីសម្លាប់ ឬរំលោភទេ បន្ទាប់ពីមានរបាយការណ៍ព័ត៌មានថ្មីនេះថាបានរកឃើញជាតិថ្នាំសណ្តំ នៅក្នុងរាងកាយរបស់នាងមុនពេលស្លាប់។

យុវតីអាយុ២១ឆ្នាំ Amelia Bambridge ត្រូវបានអាជ្ញាធររកឃើញអណ្តែតលើផ្ទៃសមុទ្រ នៅចម្ងាយប្រហែលជា៨០គីឡូម៉ែត ពីកន្លែងដែលនាងបាត់ខ្លួនរាប់ថ្ងៃមក កាលពីឆ្នាំមុន។ មន្ត្រីកម្ពុជានៅពេលនោះត្រូវបានគេរាយការណ៏និយាយថា នាងបានស្លាប់ដោយសារលង់ទឹក។

សារព័ត៌មាន Daily Mirror ដែលមានមូលដ្ឋាននៅចក្រភពអង់គ្លេស កាលពីសប្តាហ៍មុនបានបង្ហាញរបាយការណ៍ធ្វើកោសល្យវិច្ឆ័យថា Amelia មានសារធាតុថ្នាំញៀន GHB ដែលត្រូវបានគេស្គាល់ជាទូទៅថាជាថ្នាំរំលោភសេពសន្ថវៈ នៅក្នុងប្រព័ន្ធរាងកាយរបស់នាងនៅពេលយប់ដែលនាងបានបាត់ខ្លួននៅលើកោះរ៉ុងនៅថ្ងៃទី២៤ ខែតុលា ឆ្នាំ២០១៩។

សារព័ត៌មានដដែលបានបញ្ជាក់ថាថ្នាំញៀនត្រូវបានកំណត់អត្តសញ្ញាណរួចហើយ បន្ទាប់ពីអ្នកស្រាវជ្រាវទីក្រុងឡុងដុនរកឃើញនៅលើសំណាកឆ្អឹងដែលបានបញ្ជូនទៅអង់គ្លេសវិញ។

អត្ថបទដដែល បានបន្តថាលទ្ធផលតេស្តករណីនៃការរកឃើញនេះក៏បានបញ្ជូនមកកាន់អាជ្ញាធរខ្មែរដែលធ្វើការពាក់ព័ន្ធនៅលើរឿងនេះ កាលពីមីនាឆ្នាំ២០២០ ក៏ប៉ុន្តែក្រុមគ្រួសារនៃសពមិនបានទទួលចម្លើយឆ្លើយតបពីអាជ្ញាធរកម្ពុជានោះទេ។

ឆ្លើយតបទៅលើករណីនេះ លោក ជួន ណារិន្ទ ស្នងការនគរបាលខេត្តព្រះសីហនុ បានប្រាប់ Newsroom Cambodia នៅថ្ងៃទី២៩ ខែធ្នូ ឆ្នាំ២០២០ថា ករណីនេះមិនពាក់ព័ន្ធនឹងការរំលោភ ឬសម្លាប់ទេ។

«យើងបានស្រាវជ្រាវនៅទីនេះលម្អិតថា វាមិនមានករណីពាក់ព័ន្ធនឹងករណីឃាតកម្ម ឬចាប់រំលោភអីទេ»។

លោក ជួន ណារិន្ទ ក៏បានប្រាប់អ្នកសារព័ត៌មានឲ្យទៅសួរលោកឆាយ គឹមឃឿន អ្នកនាំពាក្យអគ្គស្នងការនគរបាលជាតិ បន្ថែម។

លោកឆាយ គឹមឃឿន បានប្រាប់ Newsroom Cambodia ថាករណីយុវតីស្លាប់នេះគឺដោយការលង់ទឹកហើយបានបន្តថាអង់គ្លេសគួរទាក់ទងមកសមត្ថកិច្ចកម្ពុជាដើម្បីបើកការស្រាវជ្រាវបន្ថែម។

«ខ្ញុំមិនទាន់បានទទួលឯកសារផ្លូវការណាមួយពីលទ្ធផលស៊ើបអង្កេតថាមានថ្នាំសំរើបអីហ្នឹងទេ។ ហើយកន្លងមកសមត្ថកិច្ចកម្ពុជាក៏បានធ្វើការជាមួយសមត្ថកិច្ចរួចមកហើយមុននឹងរកឃើញសាកសពហ្នឹង»។

លោកបានបន្តថា «យើងបានធ្វើកោសលវិច្ឆ័យហើយតើ យើងមិនពូកែជាងគេលើពិភពលោកទេ តែយ៉ាងហោចណាស់សមត្ថភាពបំពេញកោសលវិច្ឆ័យរបស់ខ្ញុំអាចកំណត់ថ្នាក់បាន ព្រោះយើងក៏មានទីប្រឹក្សាពីបរទេសជួយធ្វើការកោសលវិច្ច័យរឿងហ្នឹង»៕

អ្នកជំងឺកូវីដ១៩ម្នាក់ទៀតជាជនជាតិអង់គ្លេសបានជាសះស្បើយពីជំងឺកូវីដ១៩

ភិន រតនា (Rathana Phin) — Mon, 28 Sep 2020 06:39:14 +0000

ក្រសួងសុខាភិបាលនៅថ្ងៃច័ន្ទនេះ បានប្រកាសថា អ្នកជំងឺកូវីដ១៩ម្នាក់ ជាជនជាតិអង់គ្លេស មានវ័យ៥៤ឆ្នាំ ត្រូវបានព្យាបាលជាសះស្បើយ និងពុំមានករណីរកឃើញអ្នកឆ្លងថ្មីនោះទេ សម្រាប់ថ្ងៃទី២៧ កញ្ញា ម្សិលមិញ។

យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញនៅថ្ងៃទី២៨ ខែកញ្ញា ឆ្នាំ២០២០នេះបញ្ជាក់ថា បុរសជនជាតិអង់គ្លេសនោះមានអាសយដ្ឋាននៅអាផាតមិន (Apartment) មួយកន្លែងក្នុងសង្កាត់បឹងកក់២ រាជធានីភ្នំពេញ ជាអ្នកដំណើរមកពីចក្រភពអង់គ្លេស ឆ្លងកាត់ប្រទេសហូឡង់ និងបន្តជើងហោះហើរពីប្រទេសកូរ៉េខាងត្បូងមកប្រទេសកម្ពុជាកាលពីថ្ងៃទី១១ ខែកញ្ញា ឆ្នាំ២០២០។

គួរជម្រាបថា រហូតមកដល់ពេលនេះ កម្ពុជាបានព្យាបាលអ្នកជំងឺកូវីដ១៩ឲ្យជាសះស្បើយ ចំនួន២៧៥នាក់ ដែលស្មើទៅនឹង៩៩.៦៤%។ ចំណែកនៅសល់គឺជាអ្នកជំងឺម្នាក់ ដែលកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មានសញ្ជាតិហុងគ្រី៕

England – Newsroom Cambodia

នគរបាលខេត្តព្រះសីហនុបន្តអះអាងថា ការស្លាប់យុវតីអង់គ្លេស មិនមែនជាករណីសម្លាប់ ឬរំលោភទេ

អ្នកជំងឺកូវីដ១៩ម្នាក់ទៀតជាជនជាតិអង់គ្លេសបានជាសះស្បើយពីជំងឺកូវីដ១៩