គម្រោងនេះមានគោលដៅផ្តល់ហិរញ្ញប្បទានដើម្បីអភិវឌ្ឍន៍ទៅលើបណ្តាញផ្លូវថ្នល់មួយចំនួនក្នុងតំបន់ទំនាបកណ្តាល​ដែល​មានចំនួនប្រជាជនច្រើន ងាយរងគ្រោះដោយសារការប្រែប្រួលអាកាសធាតុ។ បន្ថែមពីនេះ ក៏មានការបន្ថែមនូវហេដ្ឋារចនាសម្ព័ន្ធ​ទៅលើវិស័យ​ទឹកស្អាត អនាម័យ កសិកម្ម សុខាភិបាល និងអប់រំ។ នេះបើ​យោង​​តាមទំព័រហ្វេសប៊ុករបស់សហភាពអឺរ៉ុបប្រចាំកម្ពុជាកាលពីថ្ងៃទី៣១ ខែធ្នូ ឆ្នាំ២០២០។

លោកស្រី Carmen Moreno ឯកអគ្គរដ្ឋទូតសហភាពអឺរ៉ុប​ប្រចាំនៅកម្ពុជាបានបញ្ជាក់​​ក្នុងទំព័រហ្វេសប៊ុកថា លោកស្រីជឿជាក់ថាគម្រោងដែលមានបីភាគីចូលរួមនេះ នឹងផ្តល់ផលវិជ្ជមានទៅដល់​ប្រជាពលរដ្ឋ​កម្ពុជា​ជាច្រើនគ្រួសារ។

ការទទួលបានសេវាកម្មផ្សេងៗនេះ គឺជាគន្លឹះក្នុងការកាត់បន្ថយភាពក្រីក្រ និងភាពមិន​ស្មើ​គ្នាក្នុងសេដ្ឋកិច្ច ជាពិសេសវាពិតជាមានសារសំខាន់ក្នុងការជួយស្តារឡើងវិញពីវិបត្តិកូវីដ១៩។

លោកស្រីលើកឡើងដូច្នេះថា៖ «ខ្ញុំជឿថា គម្រោងក្រុមអឺរ៉ុបថ្មីមួយនេះដែលរួមគ្នារវាងអាល្លឺម៉ង់ បារាំង និងសហភាពអឺរ៉ុប នឹងផ្តល់ផលជាវិជ្ជមានដល់ជីវិតប្រជាជនកម្ពុជានៅទីជនបទរាប់ម៉ឺនគ្រួសារ។ ការតភ្ជាប់ដ៏ប្រសើរជាងមុនទៅកាន់ទីផ្សារនឹងទទួលបានសេវាកម្មផ្សេងៗ គឺជាគន្លឹះក្នុងការកាត់បន្ថយភាពក្រីក្រ និងភាពមិនស្មើគ្នាក្នុងសេដ្ឋកិច្ ចហើយក៏បង្កើតឱកាសការងារថ្មីៗតាមបណ្តាខេត្តផ្សេងៗផងដែរ។ វាពិតជាសំខាន់ណាស់ក្នុងការជួយ ស្តារឡើងវិញពីវិបត្តិកូវីដ១៩»។

«លើសពីការស្តារផ្លូវជនបទ យើងនឹងផ្តោតសំខាន់លើដំណើរការប្រព័ន្ធសមស្រប ដើម្បីថែរទាំផ្លូវជនបទទាំងនោះយ៉ាងទៀងទាត់»។

ក្នុងគម្រោងនេះ ធនាគារអភិវឌ្ឍន៍អាល្លឺម៉ង់ផ្តល់ជាកម្ចី និងជំនួយសរុប ៣៧,១ លានអឺរ៉ូ កម្ចីរបស់ភ្នាក់ងារ​អភិវឌ្ឍ​ន៍បារាំង ៥០លានអឺរ៉ូ និងជំនួយរបស់សហភាពអឺរ៉ុបចំនួន ៨,៧៣ លានអឺរ៉ូ៕

លោក Christian Berger ឯកអគ្គរដ្ឋទូត​អាល្លឺម៉ង់​ប្រចាំ​នៅ​​កម្ពុជា​បាននិយាយក្នុងសេចក្តីថ្លែងការណ៏តាមរយៈ Twitter ថាបណ្ដាញ​អគ្គិសនី​ប្រសើរ​ជាង​មុន ​គឺ​ល្អ​សម្រាប់​ប្រជាជន ល្អ​សម្រាប់​សេដ្ឋកិច្ច និងល្អ​សម្រាប់​ភពផែនដី​ទាំង​មូល‍។

«ការ​វិនិយោគ​​របស់អាល្លឺម៉ង់​នេះ​គឺ​ដើម្បី​ទទួល​បាន​ការ​ប្រើប្រាស់​ថាមពល​អគ្គិសនី​ប្រសើរ​ជាង​មុន ការ​ចំណាយ​លើ​ថាមពល​តិច​ជាង​មុន ការ​ផ្គ​ត់ផ្គង់​ថាមពល​អគ្គិសនី​ដែល​គួរ​ឱ្យ​ទុក​ចិត្ត​ជាង​មុន និង​ការពារ​ការ​ចេញ​ឧស្ម័ន​ផ្ទះ​កញ្ចក់​តិច​ជាង​មុន»។

ថវិការ ៣០លាន​អឺរ៉ូ​នេះ គឺជាកម្ចីដែលមានការប្រាក់តិច ​ហើយនឹង​ជួយ​ធ្វើ​ឱ្យ​មាន​ការ​ប្រសើរ​ឡើង ​និង​ពង្រាយ​ថាមពល​អគ្គិសនី​នៅ​តាម​ទី​ជនបទ​ និង​រួម​ចំណែក​ដល់​កម្ពុជា​ក្នុង​ការ​កាត់​បន្ថយ​នូវ​ការ​ភាយ​ចេញ​ឧស្ម័ន​ផ្ទះ​កញ្ចក់​ក៏​ដូច​ជាជួយកម្ពុជាបានអាចឈានគោលដៅ​ក្នុង​ការ​ផ្គត់ផ្គង់​អគ្គិសនី​នៅ​ត្រឹមឆ្នាំ ២០៣០។ នេះយោងតាមស្ថានទូតអាល្លឺម៉ង់។

គួរ​បញ្ជាក់​ដែរ​ថា អាល្លឺម៉ង់​បាន​ផ្ដល់​ប្រាក់កម្ចី​កាត់​បន្ថយ​ការ​ប្រាក់​ ៣០លានអឺរ៉ូ ដល់​កម្ពុជា​ម្ដង​ហើយកាល​ពី​ឆ្នាំ ២០១៨ នាំ​ឲ្យ​ទឹក​ប្រាក់​នៃ​ការ​វិនិយោគ​នេះ​កើន​ដល់ ៦០លាន​អឺរ៉ូ។ នេះយោងតាមស្ថានទូតអាល្លឺម៉ង់។

យោងតាមស្ថានទូតអាល្លឺម៉ង់ដដែល លទ្ធផល​នៃ​ការវិនិយោគ​នៅ​ឆ្នាំ២០១៨ រួម​មាន​ការ​បញ្ចូន​ថាមពល​សុទ្ធ​កើន​ឡើង​ ២០​ភាគរយ​ ជាមួយ​នឹង​បណ្តាញ​អគ្គិសនី​ប្រសើរ​ជាង​មុន និង​បាន​ជួយ​ឲ្យ គ្រួសារ​ចំនួន​ ១៥.០០០ ថែម​ទៀតមាន​អគ្គិសនី​ប្រើប្រាស់៕

ស្ថានទូតអាល្លឺម៉ង់ បានប្រកាសកាលពីថ្ងៃទី៣០ ខែកញ្ញា ឆ្នាំ២០២០ថា បានសម្រេចផ្តល់ជំនួយជាថវិកាចំនួន ៧លានអឺរ៉ូបន្ថែមទៀត ដល់ការឆ្លើយតបនឹងផលប៉ះពាល់នៃជំងឺកូវីដ ១៩ ក្នុងប្រទេសកម្ពុជា។

នៅក្នុងនោះ ថវិកាចំនួន៦លានអឺរ៉ូដែលជាការផ្តល់ហិរញ្ញប្បទានថ្មី នឹងត្រូវដាក់អោយប្រើប្រាស់ទៅក្នុងកម្មវិធីអត្តសញ្ញាណកម្មគ្រួសារក្រីក្រ ជាពិសេសការផ្ទេរសាច់ប្រាក់របស់រដ្ឋាភិបាលកម្ពុជាដល់ជនក្រីក្រ។

ចំណែកថវិកា១លានអឺរ៉ូទៀត នឹងត្រូវបានប្រើប្រាស់ក្នុងការគាំទ្រដល់ក្រសួងសុខាភិបាលជាជំនួយបច្ចេកទេស។ នេះយោងតាមការប្រកាសរបស់ស្ថានទូតអាល្លឺម៉ង់នៅកម្ពុជាតាម Twitter។ 

សេចក្តីប្រកាសនោះបាននិយាយថាជំនួយនេះមានគោលបំណងសម្រាប់យុទ្ធនាកាលើកកម្ពស់ការយល់ដឹង វិធានការអនាម័យ ការបង្កើតមន្ទីរពិសោធន៍បង្អែកទី២ និងសម្រាប់ការព្យាបាលបន្ទាន់។

គួរបញ្ជាក់ដែរថា គិតត្រឹមថ្ងៃទី២ខែតុលាឆ្នាំ២០២០នេះ ប្រទេសកម្ពុជាបានព្យាបាលអ្នកជំងឺកូវីដ ១៩ ជាសះស្បើយសរុបចំនួន២៧៤នាក់ និងកំពុងព្យាបាលនៅឯមន្ទីរពេទ្យចំនួន៣នាក់៕