real esate – Newsroom Cambodia

រដ្ឋាភិបាលថានឹងកែលម្អឆ្នេរភក់សមុទ្រកែបឲ្យទៅជាឆ្នេរខ្សាច់កម្សាន្តស្អាត

គង់ រស្មី (Kong Raksmey) — Thu, 19 Aug 2021 15:03:42 +0000

គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក) បានប្រកាសកាលពីថ្ងៃទី ២២ ខែកក្កដា ឆ្នាំ ២០២១ ថានឹងកែលម្អឆ្នេរភក់ ឲ្យទៅជាឆ្នេរខ្សាច់កម្សាន្តសាធារណៈកម្រិតខ្ពស់ប្រវែង ២៧០០ ម៉ែត្រ ចាប់ពីផ្សារក្តាម ទៅដល់ព្រៃកោងកាង ស្ថិតនៅភូមិថ្មី សង្កាត់ព្រៃធំ ក្រុងកែប។

សេចក្តីប្រកាសដដែលបានបញ្ចាក់ទៀតថា គម្រោងនេះនឹងមានការរៀបចំកែលម្អឆ្នេរខ្សាច់កម្សាន្តសាធារណៈកម្រិតខ្ពស់តាមបណ្តោយឆ្នេរសមុទ្រ ដែលមានប្រវែងទទឹងយ៉ាងតិច ៣០ម៉ែត្រ និង បណ្តោយប្រវែង ២៧០០ម៉ែត្រ ដោយការរៀបចំគ្រឹះ និងចាក់ខ្សាច់សល្អ។

រូបគំរោងចេញដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា

ការកែលម្អក៏នឹងមានការចំសួនច្បារសាធារណៈ និងដាំដើមឈើនៅលើដីចំណីរឆ្នេរសមុទ្រដែលមានទទឹងប្រវែង ៥០ម៉ែត្រ ដោយការរៀបចំគ្រឹះ និងចាក់ដីមានជីជាតិល្អសម្រាប់សួនច្បារ និង ការដាំដើមឈើ។ នេះយោងតាមសេចក្តីប្រកាសដដែល។

សេចក្តីប្រកាសដដែលបានបន្តថា ថវិកាសម្រាប់គំរោងនេះគឺជាការចូលរួមរបស់ម្ចាស់ដីនៅជាប់ឆ្នេរសមុទ្រ ជាថ្នូរនឹងការទទួលបានដីប្រវែង ៥០ម៉ែត្រ បន្តពីព្រំដីកម្មសិទ្ធិឆ្ពោះទៅសួនច្បារ៕

Q & A អំពីផលប៉ះពាល់វិស័យអចលនទ្រព្យនៅកម្ពុជាបន្ទាប់ពីការផ្ទុះឡើងនៃជំងឺរាតត្បាតកូវីដ១៩

ហឿន យ៉ាត (Yat Hoeurn) — Sat, 10 Jul 2021 04:08:09 +0000

វិស័យអចលនទ្រព្យនៅប្រទេសកម្ពុជាត្រូវបានរងផលប៉ះពាល់បន្ទាប់ពីការផ្ទុះឡើងនៃជំងឺរាតត្បាតកូវីដ១៩ ដែលបានប៉ះពាល់ដំណើរការយឺតនៃការលក់ ការទិញទ្រព្យសម្បត្តិ និងលទ្ធភាពក្នុងការបង់រំលស់ដោយអតិថិជនដល់អ្នកអភិវឌ្ឍន៍។ នេះបើយោងតាមលោកឡែម ឌឿន ដាឡឹម ស្ថាបនិក និងអគ្គនាយកក្រុមហ៊ុនអេតសឹលូសិន រៀលអ៊ីស្តេត។

លោកឡែម ឌឿន ដាឡឹម បានផ្តល់បទសម្ភាសន៍បែបសំណួរ ចម្លើយដល់សិក្ខាកាម Newsroom Cambodia កញ្ញាហឿន យ៉ាត នាពេលថ្មីៗនេះ អំពីផលប៉ះពាល់ទាំងនោះលើវិស័យអចលនទ្រព្យ។

លោកឡែម ឌឿន ដាឡឹម

Q: តើវិស័យអចលនទ្រព្យនៅរដូលកាលកូវីតមានបញ្ហាប្រឈមអ្វីខ្លះ?

A: វិស័យអចលនទ្រព្យនៅកម្ពុជារបស់យើងគឺវាមានផលប៉ះពាល់ច្រើនគួសមដែរ ដោយសារតែវិបត្តិកូវីដនេះវាជាវិបត្តិសកល ហើយការជួបប្រទះទៅលើហានិភ័យដល់វិស័យអចលនទ្រព្យនេះ ក៏ប៉ះពាល់ទូទាំងពិភពលោកដូចគ្នាដែរ។

អ៊ីចឹងនៅក្នុងប្រទេសកម្ពុជារបស់យើង ការប្រឈមនេះគឺ ទីមួយការទិញលក់ ការទិញលក់វាមិនសូវមានចរន្តខ្លាំងដូចមុនទេ អ៊ីចឹងនិយាយសរុបសេចក្ដីមកវាប៉ះពាល់ដល់ការទិញលក់ ដល់ការអភិវឌ្ឍន៍ទៅលើវិស័យអចលនទ្រព្យហ្នឹង ហើយបញ្ហាមួយទៀតការកកស្ទះទៅចរន្តសាច់ប្រាក់អ្នកអភិវឌ្ឍន៍ដែលតាមរយៈការ

ពន្យាទៅលើការបង់ប្រាក់ពីអតិថិជនដែលគាត់រងផលប៉ះពាល់ដោយសារកូវីដ១៩ហ្នឹងដែរ។

Q: តើអចលនទ្រព្យប្រភេទណាដែលជួបបញ្ហាខ្លាំងជាងគេ? ព្រោះអ្វី?

A: នៅក្នុងផ្នែកអចលនទ្រព្យដែលជួបបញ្ហានេះគឺយើងជួបបញ្ហាគ្រប់ផ្នែកទាំងនៃអចលនទ្រព្យ ទាំងការទិញលក់ ទាំងការជួល ទាំងការអភិវឌ្ឍ ហើយនិងភ្នាក់ងារគឺគាត់ជួបបញ្ហាហ្នឹងខ្លាំងមែនទែន អ៊ីចឹងចំណុចទាំងអស់ហ្នឹង វាជួបបញ្ហាប្រហាក់ប្រហែលគ្នា ដែលកើតមាននៅក្នុងប្រទេសកម្ពុជារបស់យើង ជាពិសេសទៅលើការទិញលក់ជួលជួបបញ្ហាខ្លាំងទៅលើចំណុចនេះ។

ប៉ុន្តែវិបត្តិកូវីតនេះ វាក៏ជាឱកាសសម្រាប់អ្នកដែលមានលុយគាត់ទិញអចលនទ្រព្យទុក ដោយសារតែជួបបញ្ហានេះ អ្នកដែលគាត់មានដី មានផ្ទះ គាត់ត្រូវការលុយដោះស្រាយទៅលើបញ្ហាបំណុល ហើយនិងតម្រូវការផ្សេងៗរបស់គាត់ អ៊ីចឹងអ្នកដែលខ្វះខាតគាត់ត្រូវការលក់អចលនទ្រព្យនេះ ហើយការលក់របស់គាត់ទៀតសោតគឺគាត់លក់ក្រោមតម្លៃទីផ្សារជាក់ស្ដែង អ៊ីចឹងវាជាឱកាសសម្រាប់អ្នកមានលុយគាត់ទិញអចលនទ្រព្យទុក។

Q: ភាគច្រើន តើជនបរទេសណាខ្លះមកវិនិយោគវិស័យអចលទ្រព្យនៅស្រុកខ្មែរ?

A: នៅក្នុងប្រទេសកម្ពុជាយើង ចំពោះជនបរទេសដែលមកវិនិយោគនៅពេលបច្ចុប្បន្ននេះគឺមកពីតាមបណ្ដាប្រទេសជាង៥០ ប៉ុន្ដែជនបរទេសដែលមកវិនិយោគច្រើនជាងគេគឺ ជនជាតិចិន ហើយបន្ទាប់មកមាន កូរ៉ែ តៃវ៉ាន់ ហុងកុង។

Q: ហើយនៅក្នុងរដូវកាលកូវីតនេះទៀត តើមានការផ្អាក់ឬពន្យាពេលទិញអចលនទ្រព្យដែលឬទេ?

A: បច្ចុប្បន្ននៅក្នុងរដូវកាលកូវីតនេះមិនមានការផ្អាក ក្នុងការទិញលក់អចលនទ្រព្យនោះទេ ទាំងការជួល ទាំងការទិញលក់ វានៅតែមានចរន្តនៃការទិញលក់ ជួល និងការអភិវឌ្ឍន៍ទៅលើអចលនទ្រព្យគឺនៅដដែល ប៉ុន្តែគ្រាន់តែថាល្បឿននៃការទិញលក់ ជួល វាមានការធ្លាក់ចុះហើយនិងយឺតជាងមុន។

Q: ក្នុងរដូវកាលកូវីដនេះ លោកអាចណែនាំបានទេ តើអ្នកទិញគួរទិញអចលនទ្រព្យប្រភេទណាដែរចំណេញទៅថ្ងៃខាងមុខ? ព្រោះអ្វី?

A: សម្រាប់គំនិតរបស់ខ្ញុំ សម្រាប់អ្នកដែលមានលុយគឺគាត់អាចទិញដីក៏បាន ទិញផ្ទះក៏បាន ឬទិញខនដូក៏បានឱ្យតែក្រោមតម្លៃទីផ្សារនិងទៅតាមលទ្ធភាពដែលអាចទៅរួច ហើយបើទិញអចលនទ្រព្យគឺសំខាន់ណាស់ទីតាំង និងគោលបំណងនៃការទិញរបស់យើង។ យើងអាចសិក្សាទីតាំងដែលយើងចង់ទិញថា តើស្ថិតនៅតំបន់ណា? នៅថ្ងៃអនាគតទៅយើងអាចប៉ាន់ប្រមាណគម្រោងអភិវឌ្ឍន៍ណាមួយដែលធ្វើឱ្យអចលនទ្រព្យរបស់យើងវាមានការកើនតម្លៃបានលឿនដែរ ឬក៏អត់? ហើយនៅក្នុងសម័យកាលបែបនេះ បើមានលុយសម្រាប់ការវិនិយោគទៅលើអចលនទ្រព្យ យើងគួតែទិញទៅលើដី ផ្ទះ ឱ្យតែមានលទ្ធភាព និងទិញបានក្រោមតម្លៃទីផ្សារ។

ពីព្រោះអចលនទ្រព្យនាពេលបច្ចុប្បន្ននេះ មិនមែនមានន័យថាអចលនទ្រព្យធ្លាក់ថ្លៃនោះទេ អចលនទ្រព្យមានតែឡើងថ្លៃជាងមុន អ្វីដែលធ្លាក់ថ្លៃគឺម្ចាស់អចលនទ្រព្យត្រូវការលុយលឿន អ៊ៅចឹងគាត់លក់ទម្លាក់តម្លៃ៕

Q & A ជាមួយគង់ រស្មី ភ្នាក់ងារអចលនទ្រព្យស្ត្រីអំពីវិស័យអចលនទ្រព្យ ផលលំបាក និងភាពជាស្ត្រីក្នុងវិស័យនេះ

ណាន់សំណាង (Nann Samnang) — Sun, 07 Mar 2021 15:14:02 +0000

គង់ រស្មី ជាស្ត្រីមួយរូបដែលបានបញ្ចប់ការសិក្សាមកពីខេត្តព្រៃវែង និងកំពុងបម្រើការងារសម្រាប់ក្រុមហ៊ុនអចលនទ្រព្យធំពីរ នៅកម្ពុជា។ គង់ រស្មីបានផ្តល់សម្ភាសដល់លោកណាន់ សំណាង សិក្ខាកាមព័ត៌មាន Newsroom Cambodia កាលពីពេលថ្មីៗនេះ អំពីវិស័យអចលនទ្រព្យ ផលលំបាក និងភាពជាស្ត្រីក្នុងវិស័យនេះ។

Q: តើកត្តាអ្វីខ្លះបណ្តាលអោយរស្មីចង់ចូលធ្វើការងារក្នុងវិស័យមួយនេះ?

A: សម្រាប់នាងខ្ញុំ កត្តាបណ្តាលអោយចូលរួមក្នុងវិស័យអចលនទ្រព្យ គឺនាងខ្ញុំអាចស្វែយរកចំណូល… ទី២ ជាការងារដែលខ្ញុំអាចម្ចាស់ការលើខ្លួនឯង ទី៣ ស្វែងរកអចលនទ្រព្យដ៍ល្អសម្រាប់ខ្លួនឯង និងមនុស្សដែលខ្ញុំស្គាល់

Q: តើរស្មីគិតថាវិស័យនេះមានអត្ថប្រយោជន៏យ៉ាងណាខ្លះដែរសម្រាប់ក្នុងនាមជាស្រ្តីមួយរូប?

A: ក្នុងនាមជាស្ត្រីម្នាក់ក្នុងវិស័យអចលនទ្រព្យ អ្វីដែលជាអត្ថប្រយោជន៍សម្រាប់ខ្ញុំគឺ ខ្ញុំមានទំនាក់ទំនងល្អជាមួយភ្ញៀវ និង មានភាពទាក់ទាញ។

Q: តើមានផលលំបាកអ្វីខ្លះដែរសម្រាប់ការប្រកបការងារនេះកន្លងមក?

A: ផលលំបាកដែលជាស្ត្រីក្នុងវិស័យនេះគឺមានច្រើន ទី១ ពិបាកក្នុងការធ្វើការងារឆ្ងាយ និងពេលជួបភ្ញៀវពេលយប់

Q: ដើម្បីចង់អភិវឌ្ឍក្នុងវិស័យនេះ ក្នុងនាមជាស្ត្រីម្នាក់មានប្រសាសន៌អ្វីខ្លះចង់ផ្តាំផ្ញើ?

A: សម្រាប់ខ្ញុំដើម្បីចូលរួមអោយស្ត្រីក្នុងវិស័យនេះមានការអោយតម្លៃខ្ពស់ ខ្ញុំសូមអោយស្ត្រីខ្លួនឯងផ្ទាល់ មានការអភិវឌ្ឍន៍ខ្លួនឯងអោយបានច្បាស់លាស់ទៅលើគម្រោង និងការងាររបស់ខ្លួន ហើយសម្រាប់មនុស្សទូទៅអោយតម្លៃទៅលើស្ត្រីអោយបានស្ត្រីអោយបានច្រើន ព្រោះស្ត្រីជាមនុស្សស្រីដែលពូកែមិនចាញ់បុរសនោះទេ អរគុណច្រើន៕

រដ្ឋាភិបាលនិរាករណ៍សេចក្តីសម្រេចគម្រោង១៥ហិកតានៅបឹងតាមោក ខណៈសង្គមស៊ីវិលថា ជាជំហានត្រឹមត្រូវ

ពក ខឺយ (Pork Kheuy) — Wed, 06 Jan 2021 03:36:23 +0000

ទីស្ដីការគណៈរដ្ឋមន្រ្តីបាននិរាករណ៍សេចក្តីសម្រេចរបស់ខ្លួនកាលពីថ្ងៃទី៤ ខែមករា ឆ្នាំ២០២១ លើគម្រោងទំហំ១៥ហិកតា ដើម្បីសាងសង់អគារទីស្តីការក្រសួងអភិវឌ្ឍន៍ជនបទនៅបឹងតាមោក ឬបឹងកប់ស្រូវ ដែលស្ថិតក្នុងខណ្ឌព្រែកព្នៅ រាជធានីភ្នំពេញ។

លោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៅទីស្ដីការគណៈរដ្ឋមន្រ្តី បានយោងក្នុងលិខិតចុះថ្ងៃទី៤ ខែមករា ឆ្នាំ២០២១ ថាការសម្រេចនិរាករណ៍នេះគឺតាម «ប្រសាសន៍ដ៏ខ្ពង់ខ្ពស់បំផុត» របស់លោកនាយករដ្ឋមន្រ្តីហ៊ុន សែន។

«និរាករណ៍លិខិតលេខ៧៩០ សជណ.មយ ចុះថ្ងៃទី១ ខែកញ្ញា ឆ្នាំ២០២០ របស់ទីស្តីការគណៈរដ្ឋមន្រ្តី ស្តីពីសំណើសុំគោលការណ៍អនុញ្ញាតកាត់ផ្ទៃដីបឹងតាមោក (បឹងកប់ស្រូវ) ទំហំ១៥ហិកតា ស្ថិតនៅខណ្ឌព្រែកព្នៅ រាជធានីភ្នំពេញសម្រាប់សាងសង់អគារទីស្តីការក្រសួងអភិវឌ្ឍន៍ជនបទ និងនិរាករណ៍អនុក្រឹត្យលេខ១៣៨ អនក្រ ចុះថ្ងៃទី១ ខែកញ្ញា ឆ្នាំ២០២០ ស្តីពីការកែសម្រួលផ្ទៃបឹងតាមោក (បឹងកប់ស្រូវ) ស្ថិតក្នុងរាជធានីភ្នំពេញ»។

ការសម្រេចនិរាករណ៍នេះបានកើតឡើង បន្ទាប់ពីមានការរិះគន់យ៉ាងខ្លាំងពីអង្គការសង្គមស៊ីវិល និងពលរដ្ឋជាទូទៅថានឹងធ្វើឲ្យរាជធានីភ្នំពេញលិចទឹក ចំពោះការលុបបឹងតាមោកជាបន្តបន្ទាប់ដើម្បីយកផ្ទៃដីអភិវឌ្ឍន៍។

ជាមួយនឹងការសម្រេចនិរាករណ៍នេះ លោកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជាបានសរសេរលើបណ្ដាញសង្គមហ្វេសប៊ុករបស់អ្នកស្រីកាលពីថ្ងៃទី០៥ ខែមករា ឆ្នាំ២០២១នេះថា ការសម្រេចនេះជា «ជំហានត្រឹមត្រូវ» ហើយបានលើកឡើងថា ការលុបបឹងនេះមិនគួរកើតឡើងតាំងពីដំបូងមកម៉្លេះ ព្រោះរដ្ឋាភិបាលជាអ្នកធានាថាផ្ទៃបឹងនេះគួរជាសម្បត្តិសាធារណៈរបស់រដ្ឋ និងមិនអាចលុបបាននោះទេ ព្រោះនឹងមានគ្រោះថ្នាក់។

លោកស្រីបានបន្តទៀតថា៖ «រដ្ឋាភិបាលគួរពិនិត្យបន្ថែមទៀតលើការអនុប្បយោគ និងការផ្ទេរកម្មសិទ្ធិដទៃទៀតក្នុងតំបន់បឹងតាមោកផងដែរ។ ទាំងស្ថាប័នរដ្ឋ និងឯកជនដែលទទួលបានផលប្រយោជន៍ពីតំបន់នេះគួរមានទំនួលខុសត្រូវ និងធានាថា ធុរកិច្ចរបស់ខ្លួននឹងមិនប៉ះពាល់ដល់សង្គម និងបរិស្ថាន»។

លោកស្រីបានសំណូមពរឱ្យរដ្ឋាភិបាលបង្ហាញការវាយតម្លៃផលប៉ះពាល់ និងមូលហេតុនៃការកាត់ផ្ទៃដីបឹងជាបន្តបន្ទាប់ដល់សាធារណជនឱ្យបានយល់ដឹង និងជ្រាបពីការសម្រេចចិត្តទាំងឡាយកន្លងមក ជាពិសេសត្រូវបង្ហាញថា តំបន់ដែលជាសម្បត្តិសាធារណៈនោះបាត់បង់នូវតម្លៃផលប្រយោជន៍សាធារណៈទៀតហើយ បើតាមលក្ខខណ្ឌនៃការបំលែងទៅជាសម្បត្តិឯកជនរបស់រដ្ឋវិញ។

លោកស្រីថា៖ «ការអភិវឌ្ឍមួយត្រូវតែជាការអភិវឌ្ឍប្រកបដោយចីរភាព ដែលត្រូវផ្សារភ្ជាប់មុំសេដ្ឋកិច្ច សង្គម និងបរិស្ថាន។ បើគ្រាន់តែបំពេញតែមុំណាមូយនោះ នោះមិនអាចធានានូវចីរភាពបានឡើយ»៕

ប្រជាជនក្នុងភូមិចំនួនបីនៅខេត្តកំពង់ស្ពឺ ត្អូញត្អែរពីបញ្ហាផ្លូវខូច និងដីហុយខ្លាំង

សុក លីហេង (Lyheng Sok) — Wed, 30 Dec 2020 11:19:31 +0000

(កំពង់ស្ពឺ)៖ ប្រជាពលរដ្ឋក្នុងភូមិចំនួនបី នៅឃុំក្សេមក្សាន្ដ និងឃុំត្រាចទង ស្រុកឧដុង្គ ខេត្តកំពង់ស្ពឺ បានត្អែញត្អែរថា ក្រុមហ៊ុនដឹកដីឯកជនមួយចំនួនបាន និងកំពុងធ្វើឲ្យផ្លូវលំមួយខ្សែរកាត់ភូមិស្រុករបស់ពួកគេខូចខាត។

ភូមិចំនួន៣ ដែលពលរដ្ឋអះអាងថា មានផ្លូវលំមួយខ្សែរខូចខាតស្ទើរទាំងស្រុងនោះរួមមាន ភូមិតាលីងត្បូង ភូមិតាលីងជើង និងភូមិវត្តត្រាចទង ឃុំក្សេមក្សាន្ដ និងឃុំត្រាចទង ស្រុកឧដុង្គ ខេត្តកំពង់ស្ពឺ។

នៅពេលទៅដល់ផ្លូវលំដែឡមានទំហំប្រមាណជា៦ម៉ែត្រ និងប្រវែងប្រមាណជាពីរគីឡូម៉ែត្រនោះ គេឃើញមានឡានដឹកដីធំៗ ទំងន់ផ្ទុក៥តោន និង៨តោន បើកបរដោយមានឮ សំឡេងកងរំពង។ ចំណែករុក្ខជាតិនៅតាមដងផ្លូវរួមទាំងផ្ទះសម្បែងរបស់ប្រជាពលរដ្ឋ ត្រូវបានគ្របដណ្ដប់ដោយធូលីដី។

អ្នកស្រី យឹម លួន ជាពលរដ្ឋនៅភូមិតាលីងជើង ប្រាប់ Newsroom Cambodia កាលពីថ្ងៃទី២៣ ខែធ្នូ ឆ្នាំ២០២០នេះថា តៃកុងឡានដែលដឹកដីកាត់ផផ្លូវលំដែលអ្នកស្រីរស់នៅ បើកបរគ្មានសណ្ដាប់ធ្នាប់ ចុចស៊ីផ្លេរឡានឮសំឡេងកងរំពង។ អ្នកស្រីបន្តថា ក្នុងរយៈពេលប្រមាណជាមួយខែនេះ រាល់ពេលដែលពលរដ្ឋធ្វើដំណើរឆ្លងកាត់ម្ដងៗ ពួកគេត្រូវពាក់ម៉ាស់ ឬរុំនឹងក្រមាដើម្បីការពារធូលីដី។

អ្នកស្រីបន្ដថា៖ «កូរ៉ូណាយើងអាចការពារបាន តែនេះដីហុយគ្រប់កន្លែង ហើយឲ្យការពារយ៉ាងម៉េច?»។

លោក ម៉ន វិន អ្នកធ្វើដំណើរឆ្លងកាត់ផ្លូវលំមួយនេះដែរ បានលើកឡើងថា ពេលលោកជិះកាត់ផ្លូវនេះម្ដងៗ មានដីហុយ និងរលាក់ខ្លាំង។

«ចង់ឲ្យខាងក្រុមហ៊ុនគេហ្នឹង មានស្រោចទឹកស្រោចអីទៅ កុំឲ្យហុយដល់ប្រជាពលរដ្ឋ»។

ចំណែកកញ្ញា សិទ្ធិ ធីតា ដែលជាសិស្សវិទ្យាល័យបាត់ដឹង និងជាអាជីវករលក់កាហ្វេនៅផ្ទះជាមួយម្ដាយនិយាយថា កញ្ញាបារម្ភថា ផ្លូវនេះនឹងកាន់តែទ្រុឌទ្រោមទៅៗ ដផោយសារមានឡានដឹកដីទម្ងន់រាប់តោនបើកកាត់។

«ឡានធំៗបានធ្វើឲ្យខ្ញុំជួបបញ្ហាក្នុងការធ្វើដំណើរ ព្រោះផ្លូវនេះមានជង្ហុកដូចបាយខុម ហុយដូចខ្យល់ព្យុះអីចឹង»។

ចំពោះវត្តអារាមវិញ ព្រះសង្ឃបានត្អូញត្អែរអំពីសំឡេងរំខានជុំវិញទីតាំងវត្ត ដោយសារវត្តជាទីកន្លែងស្ងប់ស្ងាត់ក្នុងការបដិបត្តធម៌។

ព្រះតេជគុណ ម៉ន បាន គង់នៅវត្តសម្ដេចកែវ ហៅវត្តត្រាចទង ក្នុងឃុំត្រាចទង ស្រុកឧដុង្គ ខេត្តកំពង់ស្ពឺមានសង្ឃដីកាថា នៅពេលថ្ងៃត្រង់វិញ ព្រះសង្ឃគ្រប់អង្គត្អូញញត្អែរថាពិបាកក្នុងការសិក្សាព្រះធម៌ដោយសារសំឡេងខ្ទរ និងសំឡេងរំខានរបស់ឡានទាំងនោះ។

ព្រះអង្គបន្ថែមថា៖ «ដោយអាត្មាភាពជាព្រះសង្ឃ អីចឹងហើយបានជាពិបាកក្នុងការនិយាយ ប៉ុន្តែអាត្មាភាពចង់សំណូមពរទៅកាន់ក្រុមហ៊ុនក៏ដូចជាមេឃុំឲ្យជួយដោះស្រាយទៅលើបញ្ហារឿងដីហ្នឹង ក៏ដូចជាជួយសម្របសម្រួលរឿងផ្លូវទៅឲ្យបានប្រសើរឡើងផង»។

លោក រុច សារីម មេឃុំក្សេមក្សាន្តលើកឡើងថា លោកមានការព្រួយបារម្ភខ្លាំងជុំវិញករណីនេះ ដោយលោកថា លោកតែងទទួលបានការរាយការណ៍ពីពលរដ្ឋអំពីបញ្ហាផ្លូវខូច ដីហុយដោយសារឡានទាំងនោះ។ លោកបន្តថា ខាងក្រុមហ៊ុនឯកជនបានធ្វើកិច្ចសន្យាជាមួយសាលាឃុំ ដោយសន្យាចំនួន៣ចំណុច គឺត្រូវស្រោចទឹកឲ្យបានច្រើនដងក្នុងមួយថ្ងៃ ត្រូវបញ្ឈប់រាល់សកម្មភាពដឹកដីត្រឹមម៉ោង៤ល្ងាច នៅពេលបញ្ចប់គម្រោង ត្រូវធ្វើផ្លូវថ្នល់ឲ្យបានល្អប្រសើរឡើងវិញ។

លោកមេឃុះរូបនេះបញ្ជាក់ថា៖ «ការយកចិត្តទុកដាក់របស់ឃុំគឺយកចិត្តទុកដាក់ជាងប្រជាពលរដ្ឋទៀត ព្រោះផ្លូវជាផ្លូវគម្រោងរបស់ឃុំជាអ្នកធ្វើ»៕

ធនាគារពិភពលោក៖ សេដ្ឋកិច្ចកម្ពុជានឹងងើបឡើងវិញនៅឆ្នាំក្រោយ បន្ទាប់ពីរងការប៉ះពាល់ដោយកូវីដ ១៩

ជា សំអៀង (Chea Sameang) — Wed, 16 Dec 2020 14:55:56 +0000

ធនាគារពិភពលោក បានធ្វើការព្យាករថា សេដ្ឋកិច្ចកម្ពុជាអាចនឹងងើបចេញពីការរួញចុះ នៃសេដ្ឋកិច្ចដែលប៉ះពាល់ដោយវីរុសកូវីដ ១៩ ហើយនឹងមានកំណើនប្រមាណ ៤ភាគរយ នៅឆ្នាំក្រោយវិញ។

ធនាគារពិភពលោក បានឱ្យដឹងដូច្នេះនៅក្នុងរបាយការណ៍របស់ខ្លួនឈ្មោះថា Restrained Recovery ស្តីពីបច្ចុប្បន្នភាពសេដ្ឋកិច្ចកម្ពុជា ដែលត្រូវបានផ្សព្វផ្សាយនៅថ្ងៃទី១៦ ខែធ្នួ ឆ្នាំ២០២០នេះ។

សេដ្ឋកិច្ចកម្ពុជាត្រូវបានព្យាករថានឹងរួញចុះទំហំប្រមាណដក ២ភាគរយក្នុងឆ្នាំ២០២០ នេះយោងតាមធនាគារពិភពលោក ហើយក៏បានអះអាងថាមានសញ្ញាសកម្មនៃសេដ្ឋកិច្ចកំពុងចាប់ផ្តើមកម្រើកឡើងវិញ នៅពេលដែលមានការធូរស្រាលបន្តិចនៅក្នុងវិធានការរក្សាសុវត្ថិភាពសង្គម។

លោកស្រី អ៊ីងហ្គូណា ដូប្រាចា នាយិកាគ្រប់គ្រងប្រចាំកម្ពុជារបស់ធនាគារពិភពលោក បានមានប្រសាសន៍ថា៖ «ចក្ខុវិស័យកំណើនរបស់កម្ពុជានៅប្រឈមនឹងភាពមិនប្រាកដប្រជាច្រើនណាស់។ គោលដៅដ៏សំខាន់បំផុតនៃគោលនយោបាយនាពេលនេះគឺជាបន្ទាន់ ត្រូវធ្វើយ៉ាងណាស្តារឡើងវិញនូវការងារដែលបាត់បង់ ឬដែលត្រូវព្យួរដោយសារតែការរាលដាលជំងឺនេះ»។

លោកស្រី បានពោលបន្តទៀតថាឆ្ពោះទៅពេលខាងមុខ ជាការចាំបាច់ដែលត្រូវជំរុញលើកទឹកចិត្តដល់ការវិនិយោគក្នុងស្រុក និងពីបរទេសឱ្យទាញយកផលចំណេញពីកិច្ចព្រមព្រៀងពាណិជ្ជកម្មសេរីទ្វេភាគី និងក្នុងតំបន់ដែលត្រូវបានបង្កើតឡើងកាលពីពេលថ្មីៗនេះ។

លទ្ធភាពនេះអាចធ្វើទៅរួចតាមរយៈការដាក់ចេញឱ្យបានឆាប់រហ័សនូវច្បាប់វិនិយោគមានភាពប្រកួតប្រជែង និងប្រការលើកទឹកចិត្តនានាដល់ការវិនិយោគ អមដោយវិធានការទាំងឡាយសំដៅបង្កភាពងាយស្រួលដល់ការធ្វើអាជីវកម្ម ផងដែរ។ នេះយោងតាមលោកស្រី អ៊ីងហ្គូណា ដូប្រាចា។

យោងតាមរបាយការណ៍ខាងលើដដែលនេះ លំហូរនៃការវិនិយោគផ្ទាល់ពីបរទេសទៅក្នុងគម្រោងក្រៅឧស្សាហកម្មកាត់ដេរ និងទៅក្នុងវិស័យកសិកម្មនៅតែបន្តកើនឡើង ទំនងជាដោយសារភាពទាក់ទាញរបស់កិច្ចព្រមព្រៀងពាណិជ្ជកម្មសេរី ដែលកម្ពុជាកំពុងធ្វើជាមួយប្រទេសនានាក្នុងតំបន់ ដូចជាកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងចិនហៅកាត់ថា(RCEP) ជាដើម៕

ប្រធានក្រុមប្រឹក្សាភិបាលធនាគារព្រីនស៍ ត្រូវបានតែងតាំងជាទីប្រឹក្សារបស់នាយករដ្ឋមន្រ្តី

បឿ សុភា (Boeur Sophea) — Thu, 08 Oct 2020 09:19:05 +0000

ប្រធានក្រុមប្រឹក្សាភិបាលនៃ Prince Bank លោក ចេន ហ្ស៊ី ត្រូវបានតែងតាំងជាទីប្រឹក្សាផ្ទាល់របស់នាយករដ្ឋមន្រ្តីកម្ពុជា លោក ហ៊ុន សែន កាលពីថ្ងៃទី៣ មិថុនា ឆ្នាំ២០២០។ នេះយោងតាមព្រះរាជក្រឹត្យចុះលេខ នស/រកត/០៦២០/៥៩៥។

យោងតាមព្រះរាជក្រឹត្យដដែល ការតែងតាំងលោក ចេន ហ្ស៊ី ជាទីប្រឹក្សាផ្ទាល់នេះ គឺមានឋានៈស្មើរដ្ឋមន្រ្តី ដោយពុំទទួលប្រាក់បំណាច់មុខងារ។

លោក ផៃ ស៊ីផាន អ្នកនាំពាក្យរដ្ឋាភិបាល បានផ្តល់បទសម្ភាសន៏ដល់ Newsroom Cambodia ថានាយករដ្ឋមន្រ្តី មានបុព្វសិទ្ធិពេញលេញក្នុងការផ្តល់ដល់ជនណាម្នាក់យកមកធ្វើជាទីប្រឹក្សាផ្ទាល់ខ្លួនរបស់សម្តេច។

លោកក៏បានគូសបញ្ជាក់ថា ក្នុងឋានៈជាទីប្រឹក្សាផ្ទាល់ដែលមានឋានៈស្មើរដ្ឋមន្រ្តីនេះ មានន័យថាលោក ចេន ហ្ស៊ី ប្រាកដជាមានតម្លៃធំ ហើយមានសមត្ថភាពក្នុងការ ដែលមានការឆ្លើយឆ្លងជាមួយប្រជាពលរដ្ឋដែលបានបង្ហាញការព្រួយបារម្ភ។

លោកបានមានប្រសាសន៏ថា៖ «សម្តេច ហ៊ុន សែន លោកជានាយករដ្ឋមន្រ្តីមួយស្តាប់ពីអ្នកជុំវិញខ្លួន ដែលស្តាប់ពីមហាជន ពីអ្នកឯកទេស ស្តាប់ពីអ្នកជំនាញទាំងអស់ សម្តេចគឺជាអ្នកស្តាប់ដូចនេះលោកត្រូវការជំនួយ»។

លោក ចេន ហ្ស៊ី កាលពីខែធ្នូ ឆ្នាំ២០១៩កន្លងទៅ ក៏ត្រូវបានផ្តល់ឋានៈជាទីប្រឹក្សាឧបនាយករដ្ឋមន្ត្រី លោក ស ខេង មានឋានៈស្មើរដ្ឋលេខាធិការ ផងដែរ។

នេះបើយោងតាមគេហទំព័រធនាគារព្រីនស៍ លោក ចេន ហ្ស៊ី ចូលរួមក្នុងការធ្វើការសម្រេចចិត្តសំខាន់ៗដូចជាការបង្កើនដើមទុនសម្រាប់ធនាគារ និងពង្រីកប្រតិបត្តិការអាជីវកម្ម។ គាត់មានការវិនិយោគលើវិស័យអចលនៈទ្រព្យ និងវិនិយោគលើសេវាកម្មអ៊ីនធឺណិតផងដែរ៕

អភិបាលក្រុងសៀមរាប៖ ប្រជាពលរដ្ឋភាគច្រើនរុះរើសំណង់ បន្ទាប់ពីរយៈពេលកំណត់១០ថ្ងៃ

បឿ សុភា (Boeur Sophea) — Tue, 06 Oct 2020 04:05:41 +0000

អភិបាលក្រុងសៀមរាប លោក នួន ពុទ្ធារ៉ា បាននិយាយកាលពីថ្ងៃទី២ ខែតុលា ឆ្នាំ២០២០ ថាប្រជាពលរដ្ឋភាគច្រើនបានរុះរើសំណង់របស់ខ្លួចរួចហើយ បន្ទាប់ពីរយៈពេលកំណត់១០ថ្ងៃ ដែលអាជ្ញាធរបានទុកពេលឲ្យ ដើម្បីយកទីកន្លែងដើម្បីសាងសង់ផ្លូវ ៣៨ខ្សែថ្មី នៅក្នុងក្រុង។

ប្រជាពលរដ្ឋបង្ខិតរបងចូល នៅក្នុងក្រុងសៀមរាប រូបភាពដោយ៖ មុនី

រដ្ឋបាលខេត្តសៀមរាប បានជូនដំណឹងដល់ប្រជាពលរដ្ឋដែលរស់នៅ ឬសាងសង់រំលោភលើដីចំណីផ្លូវ ឲ្យធ្វើការរុះរើចាប់ពីថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី២ ខែតុលា ឆ្នាំ២០២០ ហើយក៏បានប្រកាសថានឹងគ្មានសំណងអ្វីនោះឡើយ។

លោក នួន ពុទ្ធារ៉ា បាននិយាយប្រាប់ Newsroom Cambodia ដូច្នេះថា «ក្នុងកាលកំណត់ឲ្យរុះរើហ្នឹងមកទល់ថ្ងៃនេះ ភាគច្រើនពួកគាត់ (ប្រជាពលរដ្ឋ) សហការរុះរើបានច្រើនហើយតែមិនទាំងស្រុង នៅខ្លះទៀតមានការយឺតយ៉ាវព្រោះប៉ុន្មានថ្ងៃនេះវាមានភ្លៀង»។

លោក នួន ពុទ្ធារ៉ា មិនបាននិយាយពីចំនួនប្រជាពលរដ្ឋដែលបានរុះរើហើយនោះទេ ហើយបានរៀបរាប់ថាតាមផែនការគ្រឿងចក្រត្រូវចាប់ផ្តើមធ្វើនៅថ្ងៃទី៧ ខែកញ្ញា ឆ្នាំ២០២០នេះ ប៉ុន្តែលោកថានឹងនៅបន្តមើលតាមស្ថានភាពជាក់ស្តែងសិន។

លោកបាននិយាយថាការសាងសង់ផ្លូវទាំងនេះមិនបានរំលោភលើដីឯកជននោះឡើយ ពោលគឺធ្វើតែនៅលើដីផ្លូវសាធារណៈតែប៉ុណ្ណោះហើយ ការប៉ះពាល់វិញ ភាគច្រើនគឺប៉ះរបង និងសំយាបផ្ទះ ពីព្រោះប្រជាពលរដ្ឋមួយចំនួនបានសាងសង់ចូលដីផ្លូវ តាំងពីយូរមកហើយ។

លោកបានមានប្រសាសន៏ថា៖ «វាមានប៉ះពាល់ដល់ប្រជាពលរដ្ឋមួយចំនួនដែរ ប៉ុន្តែជារួមប្រជាពលរដ្ឋសាទរ ហើយនាំគ្នាសហការ ចុះរុះរើតាំងពីពេលជូនដំណឹងរហូតមកដល់ពេលនេះ»។

លោកសោម លីន ជាអ្នកលក់ដូរ និងជាប្រជាពលរដ្ឋមួយរូបដែលរស់នៅភូមិតាភុល ឃុំស្វាយដង្គំ ស្រុកសៀមរាប ខេត្តសៀមរាប បានរៀបរាប់ទាំងសកម្មភាពកំពុងរើតូបលក់ឥវ៉ាន់ទាំងភ្លៀងរលឹមថា លោកមិនមានបញ្ហាចំពោះរឿងដែលអាជ្ញាធរឲ្យរុះរើ នោះទេពីព្រោះថា ការរុះរើនេះធ្វើឡើងចំពោះប្រជាពលរដ្ឋគ្រប់គ្នា។

លោកបានបន្ថែមថាបើទោះបីជាប៉ះពាល់ចូលប្លង់រឹងបន្តិចបន្តួចក្តី ក៏នៅតែមិនមែនជាបញ្ហាព្រោះឲ្យតែបានផ្លូវធ្វើដំណើរ ហើយបង្កលក្ខណៈងាយស្រួលដល់ការរកស៊ីទៅ គឺវាល្អណាស់ទៅហើយ។

លោក សោម លីនបាននិយាយថា៖ «អត់អីទេព្រោះជាតម្រូវការតែប៉ុណ្ណឹងទៅហើយវាស្មើភាពគ្នា ណាមួយមិនមែនប៉ះតែខ្ញុំផង អ្នកតូចអ្នកធំអីវាទៅទាំងអស់ហ្នឹង»៕

ធនាគារពិភពលោក៖ សេដ្ឋកិច្ចកម្ពុជាត្រូវបានព្យាករណ៏ថានឹងរួញមកនៅត្រឹម -២%

ភិន រតនា (Rathana Phin) — Tue, 29 Sep 2020 13:58:31 +0000

ធនាគារពិភពលោក បានព្យាករណ៍នៅថ្ងៃទី២៩ ខែកញ្ញ ឆ្នាំ២០២០នេះថា សេដ្ឋកិច្ចកម្ពុជានឹងមានកំណើនអវិជ្ជមាន -២ភាគរយសម្រាប់ឆ្នាំនេះ ដែលជាការធ្លាក់ចុះយ៉ាងគំហុកបំផុតមិនធ្លាប់មានក្នុងប្រវត្តិសាស្ត្រថ្មីៗនេះរបស់កម្ពុជា បន្ទាប់ពីរងផលប៉ះពាល់យ៉ាងធ្ងន់ធ្ងរពីវិបត្តិដែលបង្កឡើងដោយការរាលដាលជំងឺកូវីដ-១៩។

កំណើនអវិជ្ជមាននេះ យោងតាមធនាគារពិភពលោក អាចនឹងមានផលប៉ះពាល់ដល់ធ្ងន់ធ្ងរដល់សុខមាលភាពគ្រួសារនិងធ្វើឲ្យភាពក្រីក្រមានការកើនឡើង។

ធនាគារពិភពលោកបាននិយាយថា «អត្រាភាពក្រីក្រនៅកម្ពុជាទំនងជានឹងកើនឡើងវិញ ដោយសារតែកំណើនសេដ្ឋកិច្ចមានសភាពមិនសូវល្អ បន្ថែមដោយការបាត់បង់ការងារ, ការធ្លាក់ចុះក្នុងចំណូលគ្រួសារ, និងការឡើងថ្លៃទំនិញស្បៀងអាហារផង»។

«ការថមថយកាន់តែខ្លាំងនូវមូលធនមនុស្សក្នុងស្រុក ក៏ជាហានិភ័យមួយទៀតដែរ ដោយសារសកម្មភាពសិក្សានិងលទ្ធផលនៃការរៀនចេះធ្លាក់ចុះ នៅពេលដែលសាលារៀនត្រូវបានបិទទ្វារ»។

កូវីដ១៩ ក៏បានធ្វើឲ្យសេដ្ឋកិច្ច និងក្បាលម៉ាស៊ីនសំខាន់ៗរបស់កម្ពុជា មានដូចជាវិស័យសំណង់ ទេសចរណ៍ និងការនាំចេញទំនិញ បានទទួលរងផលប៉ះពាល់យ៉ាងធ្ងន់ធ្ងរ។ កូវីដ ១៩ ក៏បានធ្វើឲ្យវិស័យសំណង់ និងអចលនទ្រព្យនៅទ្រឹងផងដែរ ដែលជាវិស័យដែលមានការពឹងពាក់ខ្លាំងទៅលើការវិនិយោគពីបរទេស។

វិស័យទេសចរណ៍ និងបដិសណ្ឋារកិច្ចរបស់កម្ពុជាបានដួលរលំ ដោយសារតែការរឹតត្បិតលើការធ្វើដំណើរនិងវិធានការរាំងខ្ទប់ឱ្យនៅមួយកន្លែង។ ចំនួនភ្ញៀវមកដល់បានធ្លាក់ចុះប្រហែល ៦៤,៦ភាគរយ ក្នុងកំឡុងពេល៦ខែដំបូងនៃឆ្នាំ២០២០។

ចំណែកការនាំចេញផលិតផលកាត់ដេរ, សម្ភារធ្វើដំណើរ និងស្បែកជើង បានធ្លាក់ចុះ ៧,២ភាគរយក្នុងកំឡុងពេល៦ខែដំបូងនៃឆ្នាំ២០២០ ហើយទន្ទឹមគ្នានោះការនាំចូលក្រណាត់សម្រាប់យកមកកាត់ដេរ បានធ្លាក់ចុះ ៨៥,៤ភាគរយ។

របាយការណ៍ដដែលនេះថា ការកាត់ប្រព័ន្ធអនុគ្រោះពន្ធ EBA បានធ្វើឲ្យប៉ះពាល់ដល់ការនាំចេញរបស់កម្ពុជាចំនួន២០ភាគរយ។

យ៉ាងណាក្តី សកម្មភាពសេដ្ឋកិច្ចផ្ទៃក្នុងរបស់កម្ពុជាបានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយ ក្រោយពីមានការសម្រាលលើវិធានការរក្សាគម្លាតសុវត្ថិភាពសង្គម។

ធនាគារពិភពបាននិយាយដូច្នេះថា «តម្រូវការក្នុងស្រុក រួមមានការធ្វើដំណើរនិងសកម្មភាពទេសចរណ៍ក្នុងស្រុកផង កំពុងតែងើបឡើងវិញ។ កម្ពុជា និងចិន បានប្រកាសបញ្ចប់ការចរចាកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ (CCFTA) រួចហើយៗកិច្ចព្រមព្រៀងនេះទំនងជានឹងចូលជាធរមានក្នុងឆ្នាំ២០២១»។

ពលរដ្ឋ និងអ្នកជំនាញបារម្ភថា ការលុបទន្លេពង្រីកកោះនរាហ៍អាចធ្វើឲ្យប៉ះពាល់បរិស្ថានធ្ងន់ធ្ងរ

ទួក ពិសិដ្ឋ (Touk Piseth) — Mon, 28 Sep 2020 06:03:06 +0000

(ភ្នំពេញ)៖ ដី ថ្ម និងខ្សាច់ ជាច្រើនឡានត្រូវបានដឹកយ៉ាងសកម្មក្នុងមួយថ្ងៃៗ ដើម្បីចាក់ពង្រីកកោះនរាហ៍ ដែលនៅក្បែរកោះពេជ្រផ្នែកខាងកើត។ កោះស្ថិតក្នុងសង្កាត់និរោធ ខណ្ខច្បារអំពៅនេះ ត្រូវបានរដ្ឋាភិបាលផ្តល់សិទ្ធិឲ្យក្រុមហ៊ុនឯកជនមួយ ដើម្បីអភិវឌ្ឍន៍ជាទីក្រុងរណបថ្មី លើផ្ទៃដីប្រមាណ១០០ហិចតា ដោយគម្រោងនេះត្រូវចំណាយទឹកប្រាក់ប្រមាណពីរពាន់លានដុល្លារអាមេរិក។

ទោះបីជាចំណាយអស់ទឹកប្រាក់រាប់រយលានដុល្លារ ក្នុងការអភិវឌ្ឍក្តី ប៉ុន្តែពលរដ្ឋមួយចំនួននៅតំបន់នោះ រួមទាំងអ្នកជំនាញផ្នែកបរិស្ថានផង បានបង្ហាញការព្រួយបារម្ភថា ការសាងសង់ទីក្រុងរណបទំនើបនេះ នឹងឈានទៅដល់ការលុបទន្លេមេគង្គដើម្បីពង្រីកកោះ ដែលអាចប៉ះពាល់ដល់បញ្ហាបរិស្ថាន មានជីវៈចម្រុះនៅក្នុងទឹកទន្លេជាដើម។

កំពុងអង្គុយលើគ្រែឬស្សីមួយនៅខាងមុខផ្ទះ អ្នកស្រី ពោត ពេញ ពលរដ្ឋម្នាក់ដែលរស់នៅភូមិក្បាលកោះនរាហ៍រយៈពេលជាង១០ឆ្នាំមកហើយនោះរៀបរាប់ថា ការអភិវឌ្ឍកោះនេះត្រូវចាក់លុបទន្លេមេគង្គ ដោយចាប់ពីម្តុំចំណុចកណ្តាលមកគៀកនឹងច្រាំងទន្លេក្បែរផ្ទះរបស់អ្នកស្រី។ អ្នកស្រីបន្តថា ចាប់ពីមានការលុបទន្លេមក ខ្យល់អាកាសហប់ជាងមុន និងបាត់បង់ចំនួនត្រីជាដើម។

លើកដៃទៅទន្លេមេគង្គ អ្នកស្រីបញ្ជាក់ថា៖ «ពីមុនត្រីរកបាន ស្ទូច ដាក់មងអីចេះតែបានតើ តែឥឡូវអស់ហើយ តាំងពីចាក់ដីមកស្ងាត់ឈឹង ត្រីក៏អស់ទឹកក៏រីង»។

ស្រ្តីវ័យ៦៨ឆ្នាំរូបនេះបន្តទៀតថា ការលុបទន្លេដើម្បីបង្កើតទីក្រុងទំនើបនេះ បានធ្វើឲ្យបាត់បង់ភ្ញៀវដែលធ្លាប់មកកំសាន្តស្ទើរតែទាំងស្រុង ខណៈដែលមិនទាន់លុបទន្លេ មានមនុស្សតែងតែមកអង្គុយលេងកំសាន្ត ជាពិសេសនៅចុងសប្តាហ៍។ អ្នកស្រីបន្ថែមថា ទឹកទន្លេពេលនេះបានប្រែទៅជាល្អក់ និងមានសភាពរីងស្ងួត ដោយសារជារៀងរាល់ឆ្នាំក្នុងខែសីហា ទឹកមានច្រើន តែឆ្នាំនេះទឹកមិនទាន់មានដូចរាល់ឆ្នាំនោះទេ។

អ្នកស្រីថា៖ «ទឹកពីមុនថ្លា មានល្អក់ខ្លះ ពីមុនខែហ្នឹងអីហូរត្របាញ់ ហូរវឹងតែម្តង ដល់ពេលឥឡូវហ្នឹង វាលែងហូរហើយ ។

ចំណែកពលរដ្ឋរស់នៅភូមិក្បាលកោះនរាហ៍ម្នាក់ទៀត អ្នកស្រី ចាន់ ម៉ានី ដែលមានផ្ទះទល់មុខទន្លេ លើកឡើងថា នៅពេលដែលឃើញមានការចាក់ខ្សាច់លុបទន្លេដើម្បីអភិវឌ្ឍន៍ដូច្នេះ អ្នកស្រីមានអារម្មណ៍ថាស្តាយទន្លេ និងជីវចម្រុះនៅក្នុងទឹក ព្រោះថាទន្លេនេះមានតាំងពីយូរណាស់មកហើយ។ អ្នកស្រីបន្ថែមថា អ្នកស្រី បារម្ភថា នាពេលអនាគតក្មេងៗជំនាន់ក្រោយមិនស្គាល់ទន្លេបួនមុខ ត្រឹមតែឮគេថា និងតាមមេរៀន។

អ្នកស្រី ម៉ានី និយាយថា៖ «មានអារម្មណ៍ថាដូចជាបាត់បង់ទន្លេ ធ្លាប់តែមើលមកមុខផ្ទះមានទន្លេវាល ហើយសម្បូរត្រីទៀត […] ស្តាយទន្លេស្តាយភោគផលធម្មជាតិដូចជាត្រីពេលលុប (ទន្លេ) ទៅវាធ្វើឲ្យខ្សត់ខ្សោយជាងមុន តែមិនដឹងធ្វើមិចបើយើងជាប្រជាជន។ ខ្ញុំបារម្ភក្មេងជំនាន់ក្រោយ ខា្លចពួកគេមិនស្គាល់ទន្លេបួនមុខ (ទន្លេចតុមុខ) អស់ហើយ»។

បើតាមលិខិតរបស់រដ្ឋបាលរាជធានីភ្នំពេញចុះផ្សាយថ្ងៃទី៨ ខែឧសភាបានឱ្យដឹងថា ក្រុមហ៊ុនអូ.ស៊ី.អាយ.ស៊ី (OCIC) របស់ឧកញ្ញា ពុង ឃាវសែ បានទទូលសិទ្ធិវិនិយោគពីរដ្ឋាភិបាល កាលពីខែតុលា ឆ្នាំ២០១៨កន្លងទៅ ដើម្បីអភិវឌ្ឍន៍កោះនរាហ៍ជាទីក្រុងរណប ហើយក្រុមហ៊ុននឹងស្ថាបនាស្ពានបេតុងខ្សែកាប១ខ្សែដើម្បីតភ្ជាប់ពីទីក្រុងកោះពេជ្រ ទៅកោះនរាហ៍ផងដែរ។

ក្នុងលិខិតដដែលបានបញ្ជាក់ថា ស្ពាននេះនឹងជួយកាត់បន្ថយការកកស្ទះចរាចណ៍របស់ប្រជាពលរដ្ឋដែលធ្វើដំណើរនៅស្ពានព្រះមុន្នីវង្សបានមួយកម្រិតធំ ពេលដែលស្ថាបនារួច។

អ្នកពិគ្រោះយោបល់ឯករាជ្យផ្នែកធនធានទន្លេ និងបរិស្ថានលោក ហែម ឧត្តម បានប្រាប់ Newsroom Cambodia ថា ការអភិវឌ្ឍទីក្រុងទំនើបថ្មីនេះ ប្រាកដណាស់ថានឹងប្រែក្លាយកោះនរាហ៍ទៅជាតំបន់ដែលមានភាពទំនើប ស៊ីវិល័យ និងប្តូរពីភូមិដែលស្ងាត់ទៅជាមានសភាពអ៊ូអរ។ ប៉ុន្តែលោកថា គម្រោងដែលអភិវឌ្ឍន៍ដោយក្រុមហ៊ុនឯកជនមួយនេះ ហាក់ខ្វះតម្លាភាព ដោយសារទាំងរដ្ឋាភិបាល និងក្រុមហ៊ុនមិនបានបង្ហាញការសិក្សាពីហេតុប៉ះពាល់ផ្នែកបរិស្ថាននោះទេ។ លោកបន្តថា ពួកគេបានព្យាយាមបិទបាំងព័ត៌មាន នៅពេលដែលមានការសួរនាំពីសាធារណៈជន។

លោក ឧត្តម បញ្ជាក់ថា៖ «គម្រោងអភិវឌ្ឍន៍ធំៗបែបនេះគឺត្រូវការឲ្យមានការ សិក្សាវាយតម្លៃអំពីហេតុប៉ះពាល់បរិស្ថាន ដើម្បីឲ្យយើងដឺង។ យើងអាចមើលឃើញថាមានផលប៉ះពាល់អី ហើយជាយោបល់របស់ប្រជាពលរដ្ឋមូលដ្នាន សាធារណៈជន និងសង្គមស៊ីវិលថា ពួកគាត់មានការព្រួយបារម្ភយ៉ាងម៉េច បន្ទាប់មកបានយើងផ្អែកទៅលើទាំងអស់ហ្នឹង យកមកពិចារណាថា តើគួរធ្វើ ឬមិនគួរធ្វើ បើធ្វើ ធ្វើទំហំប៉ុណ្ណឹង តូចជាងហ្នឹង ឬយ៉ាងណា?»។

កាលពីថ្ងៃទី២១ ខែកក្កដា គណបក្សប្រជាធិបតេយ្យមូលដ្ឋាន ក៏បានបង្ហោះសារលើទំព័រហ្វេសប៊ុករបស់ខ្លួន ដោយស្នើដល់លោកនាយករដ្ឋមន្រ្តី ហ៊ុន សែន ត្រួតពិនិត្យឱ្យបានជុំវិញការអភិវឌ្ឍនេះ និងជំរុញឲ្យក្រសួងបរិស្ថានបញ្ជូនក្រុមការងារចុះវាយតម្លៃជាបន្ទាន់ ដោយថា តាមការសង្កេតឃើញជាក់ស្តែងរបស់គណបក្ស គម្រោងនេះកំពុងតែធ្វើផ្ទុយនឹងច្បាប់ ។

គណបក្សក្រៅសភានេះសរសេរថា ៖ «ការអភិវឌ្ឍពង្រីកកោះនរាហ៍នឹងឈានទៅលុបទន្លេមេគង្គក្រោមប្រមាណជិតពាក់កណ្តាល ដើម្បីបម្រើផលប្រយោជន៍ឯកជន ដែលផ្ទុយនឹងច្បាប់ ក៏ដូចជាខុសឆ្ងាយពីផ្ទាំងបិទប្រកាសព័ត៌មានអំពីការអភិវឌ្ឍកោះនរាហ៍។ ការណ៍នេះអាចនឹងបង្កផលប៉ះពាល់ធ្ងន់ធ្ងរដល់បរិស្ថាន ជាពិសេសការរារាំងផ្លូវមច្ឆាជាតិ (ត្រី) បង្កទឹកជំនន់ និងការបាក់ច្រាំងទន្លេនាពេលអនាគត»។

ឆ្លើយតបជុំវិញការលើកឡើងទាំងនោះ អ្នកនាំពាក្យក្រសួងបរិស្ថានលោក នេត្រ ភក្ត្រា មានប្រសាសន៍ថា កន្លងមករាល់គម្រោងអភិវឌ្ឍន៍នានាដែលសាងសង់ហើយពាក់ព័ន្ធនឹងបរិស្ថាន គឺត្រូវឆ្លងកាត់ការវាយតម្លៃរបស់ក្រសួងបរិស្ថានជានិច្ច។ លោកបន្ថែមថា គម្រោងអភិវឌ្ឍន៍នៅតំបន់កោះនរាហ៍ ក៏កំពុងតែត្រូវបានវាយតម្លៃពីផលប៉ះពាល់ទៅលើបរិស្ថានផងដែរ។ ប៉ុន្តែអ្នកនាំពាក្យរូបនេះមិនបានបញ្ជាក់អំពីលទ្ធផលនៃការវាយតម្លៃនោះទេ។

លោកបញ្ជាក់ថា៖ «រាល់គម្រោងអភិវឌ្ឍន៍ទាំងអស់ មិនថាគម្រោងណាជាគម្រោងណា ដែលមានការពាក់ព័ន្ធផ្សេងៗ ត្រូវឆ្លងកាត់ការវាយតម្លៃហេតុប៉ះពាល់បរិស្ថាន។ ហើយគម្រោងកោះនរាហ៍នេះគឺបានកំពុងឆ្លងកាត់លើការវាយតម្លៃហេតុប៉ះពាល់បរិស្ថាន»។

បើតាមលោក ហែម ឧត្តម កន្លងមកសកម្មភាពផ្សេងៗដែលលោកហៅថាជាសកម្មភាពបំផ្លាញទន្លេមេគង្គមានជាបន្តបន្ទាប់ ដូចជាការបូមខ្សាច់ សំណល់ប្លាស្ទិច និងកាកសំណល់រោងចក្រជាដើម បានធ្វើឱ្យទន្លេនេះកាន់តែមានសភាពទ្រុឌទ្រោមទៅៗ ហើយបញ្ហាបម្រែបម្រួលអាកាសធាតុ គ្រោះរាំងស្ងួត និងទឹកជំនន់បានកើតឡើងជាបន្តបន្ទាប់ក្នុងឆ្នាំនេះ និងឆ្នាំមុនៗ។ លោកថា រដ្ឋាភិបាលគួរតែដាក់ការពិចារណា រកទីកន្លែងផ្សេងដើម្បីអភិវឌ្ឍន៍ ជាជាងការលុបទន្លេ។

លោក ឧត្តម បញ្ជាក់ថា៖ «យើងខាតបង់ទិន្នផលត្រី ខាតបង់ដំណាំស្រែចម្ការ កសិកម្មរបស់យើង។ អីចឹងថាតើការអភិវឌ្ឍន៍ថ្មីជាផ្សារទំនើប ជាក្រុងរណប ខុនដូ អីអស់ហ្នឹងវាអាចប៉ះប៉ូវការបាត់បង់បានដែរឬអត់ ជាតម្លៃលុយ និងជីវៈចម្រុះបរិស្ថាន»៕