security – Newsroom Cambodia

បទយកការណ៍៖ អ្នកភូមិមួយនៅបាត់ដំបងរស់នៅដោយភ័យព្រួយ ព្រោះគ្រឿងញៀនកំពុងញាំញីក្នុងភូមិ

ពក ខឺយ (Pork Kheuy) — Tue, 16 Feb 2021 04:46:12 +0000

អ្នកស្រី ឈួន តូច រស់នៅភូមិវត្តលៀប ឃុំចំការសំរោង ក្រុងបាត់ដំបង ខេត្តបាត់ដំបង មានមុខរបរជាអ្នកដើរទិញនិងរើសអេតចាយសម្រាប់ផ្គត់ផ្គង់កូន៧នាក់។ អ្នកស្រីមិនបានខ្លាចការនឿយហត់ដែលកើតចេញពីមុខរបរដែលត្រូវដើរហាលថ្ងៃហាលភ្លៀងពីភូមិមួយទៅភូមិមួយទេ ប៉ុន្តែអ្វីដែលអ្នកស្រីខ្លាចនិងបារម្ភបំផុតនៅពេលនេះ គឺកូនប្រុសវ័យ២៨ឆ្នាំរបស់គាត់ដែលបានប្រើប្រាស់គ្រឿងញៀនអស់រយៈពេល៣ឆ្នាំមកហើយ។

ករណីប្រើប្រាស់គ្រឿងញៀនមិនមែនកើតទៅលើតែកូនប្រុសរបស់អ្នកស្រី ឈួន តូច តែម្នាក់នោះទេ គ្រួសារខ្លះដែលរស់នៅក្នុងភូមិវត្តលៀប ឃុំចំការសំរោង ក្រុងបាត់ដំបង ខេត្តបាត់ដំបង ក៏កំពុងជួបប្រទះនិងប្រឈមនឹងបញ្ហានេះដូចគ្នា។ អ្នកខ្លះត្រូវគេចចេញពីផ្ទះ ដោយសារតែសមាជិកគ្រួសាររបស់ខ្លួនដែលប្រើប្រាស់គ្រឿងញៀន ធ្វើទុក្ខបុកម្នេញ គំរាម និងប្រើហិង្សាមកលើខ្លួន ខណៈគ្រួសារខ្លះទៀតត្រូវបាត់បង់សម្ភារ ដោយសារកូនយកទៅលក់ឬបញ្ចាំដើម្បីបានលុយទិញគ្រឿងញៀន។

https://vodkhmer.news/2021/02/15/people-in-watleap-village-in-battambong-province-worry-about-drug/?fbclid=IwAR2AzkvP1DMmIZHd1POoHevPg__k3jcKDUnABzHDXrphHdkal398dymhuZE

អ្នកសារព័ត៌មានកម្ពុជាពិភាក្សាអំពីការ «រំខាន» ពេលកំពុងបំពេញការងារវិជ្ជាជីវៈក្នុងឆ្នាំ២០២០

សុក លីហេង (Lyheng Sok) — Tue, 05 Jan 2021 03:39:33 +0000

អ្នកសារព័ត៌មានកម្ពុជាបានពិភាក្សាអំពីការ «រំខាន» មួយចំនួនដោយសារការផ្ទុះឡើងនូវវីរុសកូវីដ ១៩ និងពីអាជ្ញាធរ ខណៈពេលកំពុងបំពេញការងារវិជ្ជាជីវៈក្នុងឆ្នាំ២០២០កន្លងទៅ។

តាមរយៈផ្សាយផ្ទាល់តាមហ្វេសប៊ុករបស់ផេកមជ្ឈមណ្ឌលសិទ្ធិមនុស្សកម្ពុជា កាលពីថ្ងៃទី៣១ ខែធ្នូ ឆ្នាំ២០២០ ដែលមានរយៈពេល១ម៉ោង២នាទី និង១៧វិនាទី អ្នកនាង អេង គីមហុង អ្នកសារព័ត៌មាននៃវិទ្យុបារាំងអន្ដរជាតិ និងលោក ណុប វី នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា (ខេមបូចា) បាននិយាយអំពី ការវិវឌ្ឍនៃសេរីភាពខាងការបញ្ចេញមតិ និងសេរីភាពសារព័ត៌មានក្នុងឆ្នាំកន្លងទៅ។

លោក ណុប វី បានយល់ឃើញថាស្ថានភាពនៃអ្នកការសែតមានភាពលំបាកខ្លះៗកំឡុងពេលបំពេញសកម្មភាពរបស់ខ្លួនហើយពួកគាត់ទទួលបានការយាយីពីដែនសមត្ថកិច្ចដោយដកសម្ភារៈមានកាមេរ៉ា និងប្រដាប់ថតសំឡេងជាដើម។

«បើសិនជាពីរភាគីហ្នឹងមានការគោរពគ្នា ហើយយល់ដឹងពីការអនុវត្តតួនាទី នោះនឹងកាត់បន្ថយបាននូវការគំរាមកំហែងច្រើនណាស់ទៅដល់បងប្អូនអ្នកសារព័ត៌មាន»។

លោកណុប វី បានបន្តថាក៏មាន អ្នកសារព័ត៌មានមួយចំនួនតូចផងដែរ ដែលបានអនុវត្តខុសក្រមសីលធម៌វិជ្ជាជីវៈក្នុងការបំពេញតួនាទីរបស់ខ្លួន ហើយត្រង់ចំណុចនេះផងដែរលោកក៏ចង់បានជាយោបល់ ឬការណែនាំពីខាងរដ្ឋាភិបាលក្នុងការពង្រឹមសមត្ថភាព និងក្រមសីលធម៌ដល់អ្នកសារព័ត៌មានដើម្បីបំពេញបេសកម្មរបស់ខ្លួនទៅថ្ងៃក្រោយទៀត។

លោក ណុប វី បានបញ្ជាក់ថា «មនុស្សយើងមិនដែលមានអ្នកណាគេល្អឥតខ្ចោះនោះទេឱ្យតែយើងមានការប្ដេជ្ញាចិត្តមួយទៅជាមនុស្សល្អ មនុស្សដែលមានក្រមសីលធម៌វិជ្ជាជីវៈ មានភាគីមានសិស្សច្បងអ្នកសារព័ត៌មានច្រើនណាស់ដែលគេចាំចែករំលែក បង្រៀន ណែនាំ ជួយយើងនៅក្នុងការបង្កើតឱ្យមានគោលការណ៍និងក្រមសីលសម្រាប់ការអនុវត្តរបស់យើង»។

នៅក្នុងកាលៈទេសៈនៃការផ្ទុះឡើងនូវមេរោគកូវីដ ១៩ អ្នកការសែតបានជួបទុក្ខលំបាកដូចអ្នកដទៃដែរ។ នេះយោងតាមការលើកឡើងរបស់អ្នកនាង អេង គីមហុង អ្នកសារព័ត៌មានវិទ្យុបារាំងអន្ដរជាតិ ហើយបានអះអាងថាយោបល់របស់នាងមិនតំណាងឲ្យស្ថាប័ននាងនោះទេ។

អ្នកនាង អេង គីមហុងបាននិយាយថាបានជួបការឧបសគ្គនោះគឺមិនទទួលបានព័ត៌មានគ្រប់ជ្រុងជ្រោយពីក្រសួងនិមួយៗ ទៅតាមអ្វីដែលអ្នកសារព័ត៌មាន ក៏ដូចជាអ្នកនាងផ្ទាល់ បានសួររកផងដែរ។

អ្នកនាងបន្តទៀតថា «យើងមានអ្នកនាំពាក្យមែនពិត ក៏ប៉ុន្ដែយើងអត់អាចទទួលបានព័ត៌មានគ្រប់ជ្រុងជ្រោយនោះទេ» ។

សម្រាប់សេរីសារព័ត៌មានក្នុងឆ្នាំ២០២០ អ្នកនាងអេង គីមហុង បាននិយាយថាអាចទទួលយកបានក៏ប៉ុន្តែកូវីដ ១៩ គឺជាការរំខាននិងបង្កការភិតភ័យ។

«ងាកមកកម្ពុជាយើងវិញខ្ញុំមិននិយាយថាស្ថានភាពអ្នកកាសែតនៅកម្ពុជាវាល្អឥតខ្ចោះទេ ប៉ុន្តែយើងមើលឃើញយ៉ាងណាក៏ដោយបើទោះបីជាបញ្ហាមួយចំនួនដូចបងណុប វី លើកឡើងអញ្ចឹង មានការរំខានពីអាជ្ញាធរដែលភាគច្រើនជាសន្តិសុខ គាត់មកយីយារផ្នែកដកកាម៉េរ៉ា ឬដកម៉ាស៊ីនថត ទទួលស្គាល់ចំនុចហ្នឹងវាពិតជាមានការរំខានអ្នកសារព័ត៌មាន ហើយយើងមានអីខុស បើគ្រាន់តែសម្ភាសន៏គេ សម្ភាសន៏ប្រភពដែលមានកិច្ចសហការជាមួយយើងហ្នឹង»។

យោងទៅតាមរបាយការណ៍អង្គការអ្នកសារព័ត៌មានគ្មានព្រំដែនប្រចាំឆ្នាំ២០២០ដែលបានចេញនៅថ្ងៃទី១៩ ខែមេសា ប្រទេសកម្ពុជាមានចំណាត់ថ្នាក់នៅលេខរៀងទី១៤៤ក្នុងចំណោមប្រទេស១៨០ ដោយបានធ្លាក់ចុះមួយលេខ រៀងរាល់ឆ្នាំ៕

ក្រសួងប្រៃសនីយ៍ប្រកាសឲ្យអ្នកប្រើប្រព័ន្ធតេឡេក្រាម ប្រយ័ត្នពីការវាយប្រហាររបស់ Hacker

វ៉ាន់នី ទេវី (Vanny Tevy) — Fri, 18 Dec 2020 04:25:42 +0000

ក្រសួងប្រៃសនីយ៍ និងទូរគមន៍នៅសប្តាហ៍នេះ បានប្រកាសឲ្យអ្នកប្រើប្រាស់បណ្តាញសង្គមតេឡេក្រាម (Telegram) ឲ្យមានការប្រុងប្រយ័ត្នចំពោះឧក្រិដ្ឋជន (hacker) ដែលបានធ្វើសកម្មភាពក្លែងបន្លំជានរណាម្នាក់ដើម្បីបញ្ជូនមេរោគតាមសារតេឡេក្រាម ដែលអាចលួចយកទិន្នន័យ និងឯកសារផ្សេងៗរបស់អ្នកប្រើដោយស្វ័យប្រវត្តិ។

យោងតាមទំព័រហ្វេសប៊ុកផ្លូវការរបស់ក្រសួងប្រៃសនីយ៍ និងទូរគមន៍ បានផ្សព្វផ្សាយកាលពីថ្ងៃទី១៥ ខែធ្នូ ឆ្នាំ២០២០នេះ បញ្ជាក់ថា ក្រុមការងារបច្ចេកទេសបានសង្កេត ឃើញមានការបញ្ជូនសារតាមប្រព័ន្ធតេឡេក្រាម ដោយក្លែងបន្លំធ្វើជាថ្នាក់ដឹកនាំក្នុងជួររដ្ឋាភិបាល ឬនរណាម្នាក់។ នៅពេលដែលអ្នកប្រើប្រាស់ចុកលើសារនោះ មេរោគនឹងស្រូបយកទិន្នន័យ និងលេខសម្ងាត់កម្មវិធីផ្សេងៗ ព្រមទាំងបញ្ជាមាស៊ីនថតរូប ឬឧបករណ៍ថតសំឡេងដើម្បីលួច យកព័ត៌មានរបស់ជនរងគ្រោះ បន្ទាប់មកទៀតឧក្រិដ្ឋជននឹងយកអត្តសញ្ញាណជនគ្រោះទៅបោក បញ្ឆោតអ្នកដទៃផ្សេងទៀត។

ក្រសួងប្រៃសនីយ៍បានបន្ថែមដោយក្រើនរំឮកដល់អ្នកប្រើប្រាស់ប្រព័ន្ធតេឡេក្រាមទាំងអស់ ឲ្យមានការប្រុងប្រយ័ត្ន ដោយពុំត្រូវចុចលើតំណរភ្ជាប់ដែលពុំមានប្រភពច្បាស់លាស់ និងត្រូវជៀសវាងការផ្តល់លេខសម្ងាត់គណនីឲ្យទៅនរណាម្នាក់ ឬឃើញមានករណីសង្ស័យលើគណនីតេឡេក្រាមណាមួយមិនប្រក្រតី ត្រូវចុកប្លុកជាបន្ទាន់៕

ក្រសួងមហាផ្ទៃប្រកាសឲ្យអ្នកប្រើប្រាស់អ៊ីនធឺណេត ប្រុងប្រយ័ត្នចំពោះមេរោគក្នុងបណ្តាញសង្គម Facebook

វ៉ាន់នី ទេវី (Vanny Tevy) — Wed, 09 Dec 2020 14:57:16 +0000

នាយកដ្ឋានព័ត៌មានវិទ្យានៃក្រសួងមហាផ្ទៃ ប្រកាសឲ្យអ្នកប្រើប្រាស់អ៊ីនធឺណេត ប្រុងប្រយ័ត្នចំពោះករណីចម្លងមេរោគក្នុងបណ្តាញទំនាក់ទំនងសង្គម Facebook ដែលអាចលួចយកលេខសម្ងាត់ ឬរូបភាព ឬវីដេអូរបស់អ្នកប្រើប្រាស់។

បើតាមទំព័រហ្វេសប៊ុករបស់នាយកដ្ឋានព័ត៌មានវិទ្យានៃក្រសួងមហាផ្ទៃផ្សព្វផ្សាយកាលពីថ្ងៃទី៨ ខែធ្នូនេះបញ្ជាក់ថា ក្រុមការងារបច្ចេកទេសរបស់ក្រសួងបានសង្កេតឃើញមានករណីចម្លងមេរោគក្នុងបណ្តាញទំនាក់ទំនងសង្គម Facebook ដែលមានឈ្មោះថា «BIST DU ESIMVIDEO?» ឬជាភាសាខ្មែរមានន័យថា «តើបុគ្គលក្នុងវីដេអូនេះពិតជាអ្នកមែនទេ?»។ ទំព័រហ្វេសប៊ុកនាយកដ្ឋានព័ត៌មានវិទ្យានៃក្រសួងមហាផ្ទៃបន្ថែមថា មេរោគនេះត្រូវបានចែករំលែកតាមរយៈសារ Messenger នៃគណនីមួយទៅកាន់គណនី ផ្សេងមួយទៀត និងស្ទើរពាសពេញគណនីក្នុងស្រទាប់យុវវ័យកម្ពុជា។

នាយកដ្ឋានព័ត៌មានបន្ថែមថា មេរោគនេះ ពីដំបូងសង្កេតឃើញមានការផ្ញើសារភ្ជាប់ជាមួយតំណរភ្ជាប់វីដេអូ ពីគណនីអនាមិកដែលបង្ហាញខ្លឹមសារថា «តើបុគ្គលក្នុងវីដេអូនេះ ពិតជាអ្នកមែនទេ?» និងករណីមួយចំនួនជាមិត្តភ័ក្តិ ឬបុគ្គលដែលម្ចាស់គណនីស្គាល់។ តំណរភ្ជាប់នោះមើលទៅហាក់ដូចជារូបភាព ឬវីដេអូ YouTube ដូច្នេះដែរ ហើយនៅពេលដែលអ្នកប្រើប្រាស់ចុចលើរូបភាព ឬវីដេអូក្នុងកម្មវិធីសារ MESSENNGER តំណរ ភ្ជាប់នោះនឹងនាំអ្នកទៅកាន់គេហទំព័រមេរោគដែលមានសមត្ថភាពលួចយកលេខសម្ងាត់គណនីបណ្តាញសង្គមរបស់អ្នក ឬចម្លងរោគទៅគណនីរបស់អ្នកប្រើប្រាស់។

នាយកដ្ឋានព័ត៌មានដដែលបញ្ជាក់តាមន័យដើមថា៖ «បន្ទាប់ពីលួចគណនីជនរងគ្រោះ មេរោគនេះនឹងធ្វើការទាញយករូបភាពជនគ្រោះដាក់បញ្ចូលក្នុងរូបភាព ឬវីដេអូអាសអាភាស ឬវីដេអូផ្សេងៗដោយប្រើប្រាស់បច្ចេក វិទ្យា DEEPFAKE ហើយធ្វើការចែករំលែកបន្តទៅកាន់មិត្តភក្តិដែលមានក្នុងគណនីដោយស្វ័យប្រវត្តិ។ សកម្មភាពបន្លំលួចគណនីដូចរៀបរាប់ខាងលើនឹងបន្តពីគណនីមួយទៅគណនីមួយយ៉ាងលឿន»។

នាយកដ្ឋានព័ត៌មានវិទ្យាបានបានបន្ថែមដោយក្រើនរំឮកដល់អ្នកប្រើបណ្តាញទំនាក់ទំនងសង្គមឲ្យមានការប្រុងប្រយ័ត្ន ដោយពុំត្រូវចុចលើតំណរភ្ជាប់ដែលពុំមាន ប្រភពច្បាស់លាស់ និងត្រូវជៀសវាងការផ្តល់លេខសម្ងាត់គណនីឲ្យទៅនរណាម្នាក់ ឬត្រូវ អង្កេតមើលអាសយដ្ឋានគេហទំព័រមុនវាយបញ្ចូលលេខសម្ងាត់៕

ក្រសួងមហាផ្ទៃត្រូវបានផ្អាកការងារបណ្ដោះអាសន្ន ខណៈករណីវិជ្ជមានកូវីដកើនដល់៣២

កេត អ៊ីយាន (Ket Eyean) — Mon, 07 Dec 2020 15:05:23 +0000

រដ្ឋមន្ត្រីក្រសួងមហាផ្ទៃ លោកស ខេង នៅថ្ងៃទី០៧ ខែធ្នូ ឆ្នាំ២០២០ នេះបានចេញបទបញ្ជាផ្អាកការចូលបំពេញការងារបណ្ដោះអាសន្ន ចំពោះមន្ត្រីរាជការដែលបម្រើការងារនៅតាមអគ្គនាយកដ្ឋាន និងអង្គភាពដែលស្ថិតនៅក្នុងបរិវេណទីស្តីការក្រសួង បន្ទាប់ពីបានរកឃើញស្រ្តី០១នាក់ទៀតវិជ្ជមានកូវីដ ១៩។

កម្ពុជាបានរកឃើញករណីវិជ្ជមានកូវីដ ១៩ ចំនួន៣៤៨នាក់ ដោយក្នុងនោះ មានអ្នកឆ្លងក្នុងសហគមន៍ ឬ ព្រឹត្តិកាណ៏ ២៨ វិច្ឆិកា ចំនួន ៣២នាក់ដែលបានពាក់ព័ន្ធនឹងករណីវិជ្ជមានលើភរិយារបស់ប្រធាននាយកដ្ឋានពន្ធនាគារនៅក្នុងក្រសួងមហាផ្ទៃ។

ស្ត្រីជនជាតិខ្មែរឈ្មោះ ជី ពេជ្រឆារ៉ា អាយុ ២៩ឆ្នាំ ដែលជាមន្ត្រីរាជការនៅក្រសួងមហាផ្ទៃ ត្រូវបានគេរកឃើញវិជ្ជមានកូវីដ ១៩ ចុងក្រោយគេនៃ «ព្រឹត្តិកាណ៏២៨ វិច្ឆិកា»។ នេះយោងតាមក្រសួងសុខាភិបាល។

ការបិទផ្អាកក្រសួងមហាផ្ទៃនេះគឺ ដើម្បីបានធ្វើតាមអនុសាសន៍របស់នាយករដ្ឋមន្ត្រី លោកហ៊ុន សែន និងបន្ទាប់ពីមានការពិគ្រោះពិភាក្សាជាមួយក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩ ដល់មន្ត្រីធ្វើការនៅតាមអគ្គនាយកដ្ឋាន និងអង្គភាពដែលមានទីតាំងស្ថិតក្នុងបរិវេណក្រសួង។

បទបញ្ជានោះបានសរសេរដូច្នេះថា «ផ្អាកការចេញចូលមកបំពេញការងារ ជាបណ្តោះអាសន្នក្នុងបរិវេណទីស្តីការក្រសួងមហាផ្ទៃ ចំពោះមន្រ្តីរាជការ មន្រ្តីនគរបាលជាតិ និងមន្រ្តីពន្ធនាគារ នៅតាមអគ្គនាយកដ្ឋាន និងអង្គភាពនានា ដែលមានទីតាំងស្ថិតក្នុងបរិវេណទីស្តីការក្រសួងមហាផ្ទៃ ចាប់ពីថ្ងៃទី០៧ ខែធ្នូ ឆ្នាំ២០២០ នេះរហូតដល់មានការជូនដំណឹងជាថ្មី»។

លោកស ខេង ក៏បានអំពាវនាវឲ្យថ្នាក់ដឹកនាំ និងមន្ត្រីខាងលើដែលមិនទាន់បានមកយកសំណាកពីការធ្វើតេស្តរកវីរុសកូវីដ ១៩ រួសរាន់មកក្នុងថ្ងៃនេះ និងតម្រូវឲ្យពួកគាត់ធ្វើចត្តាឡីស័ក ១៤ ថ្ងៃទៅតាមការណែនាំរបស់ក្រសួងសុខាភិបាល។

អគ្គនាយកដ្ឋាន និងអង្គភាពនានាត្រូវចាត់មន្ត្រីដែលមិនប៉ះពាល់ផ្ទាល់ ឬប្រយោលជាមួយ ព្រឹត្តិការណ៍ ២៨ វិច្ឆិកា ពី០៥ ទៅ ០៧នាក់ មកប្រចាំការនៅទីស្តីការក្រសួង ព្រមទាំងអនុវត្តឲ្យបានត្រឹមត្រូវនូវវិធានការការពារជំងឺកូវីដ ១៩។ នេះយោងតាមបទបញ្ជាដដែលនេះ៕

រកឃើញករណីវិជ្ចមានកូវីដចំនួន២ទៀតពីព្រឹត្តិការណ៍សហគមន៍ ២៨ វិច្ឆិកា

គឹម ចាន់សុខា (Kim Chansokha ) — Mon, 07 Dec 2020 07:57:37 +0000

ក្រសួងសុខាភិបាលនៅថ្ងៃទី៧ ខែធ្នូ ឆ្នាំ២០២០នេះ បានប្រកាសថារកឃើញអ្នកផ្ទុកមេរោគកូវីដចំនួន២នាក់បន្ថែមទៀត ដែលនាំឲ្យមានការកើនទ្បើងសរុបចំនួន ៣២នាក់ ពី់់៉ព្រឹត្តិការណ៍សហគមន៍២៨ វិច្ឆិកា។

ការកឃើញវិជ្ជមានចុងក្រោយនេះ បាននាំឱ្យកម្ពុជាមានអ្នកផ្ទុកមេរោគនេះកើនទ្បើងដល់ ៣៤៨នាក់។ នេះតាមការប្រកាសជាព័ត៌មានក្រសួងសុខាភិបាល នៅថ្ងៃទី០៧ ខែធ្នូ ឆ្នាំ២០២០នេះ។

អ្នកឆ្លងជំងឺកូវីដ ១៩នេះ មានបុរសជនជាតិខ្មែរឈ្មោះ អ៊ី តារា អាយុ ២១ឆ្នាំ មានអាសយដ្ឋានស្នាក់នៅជិតវត្តសន្យំកុសល សង្កាត់បឹងទំពន់ ខណ្ឌមានជ័យ រាជធានីភ្នំពេញ ធ្លាប់ស្នាក់នៅជាមួយអ្នកជំងឺឈ្មោះ ញិល សុខកូទ្បា ភេទប្រុស អាយុ ២២ឆ្នាំ ធ្វើការនៅ Pedro ផ្លូវព្រះសីហនុ ដែលបានរកឃើញមានវីរុសកូវីដ-១៩នៅថ្ងៃទី០៣ខែធ្នូ ឆ្នាំ២០២០។

រីឯករណីមួយទៀត ជាស្ត្រីជនជាតិខ្មែរឈ្មោះ ជី ពេជ្រឆារ៉ា អាយុ ២៩ឆ្នាំ អាសយដ្ឋានស្នាក់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ គាត់ជាមន្ត្រីរាជការនៅក្រសួងមហាផ្ទៃ ដែលបានចូលក្នុងហាង Zando បឹងកេងកងនៅថ្ងៃទី២៧ ខែវិច្ជិកា ឆ្នាំ២០២០។

ក្រសួងសុខាភិបាលបាននិយាយថា ពួកគាត់ទាំងពីរនាក់កំពុងតែសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។

គិតត្រឹមព្រឹកថ្ងៃទី០៧ ខែធ្នូ ឆ្នាំ២០២០ បើយោងតាមក្រសួងសុខាភិបាល មានអ្នកឆ្លងសរុប ៣៤៨នាក់ អ្នកជាសះស្បើយចំនួន ៣០៦ នាក់ ដោយក្នុងនោះមានអ្នកឆ្លងក្នុងសហគមន៍ចំនួន ៣២នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕

អាជីវករផ្សារកំពង់ពិល ខេត្តព្រៃវែង បារម្ភពីជីវភាពក្រោយអគ្គិភ័យឆាបឆេះផ្សារ

ហាន ណូយ (Han Noy) — Tue, 24 Nov 2020 04:13:31 +0000

(ព្រៃវែង)៖ ក្រោមពន្លឺថ្ងៃពេលរសៀល កំពុងឈរមើលគេរុះរើគំនរតូបដែលឆេះដើម្បីលក់អេតចាយទាំងទឹកមុខស្រពោន លោក ខេង នឿង អាជីវករលក់ខោអាវ និងស្បែកជើងនៅផ្សារកំពង់ពិល ដែលស្ថិតក្នុងភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង បានរៀបរាប់ប្រាប់ Newsroom Cambodia ថា ទ្រព្យសម្បត្តិទាំងអស់របស់លោកក្នុងតូបនៅផ្សារនេះ គឺត្រូវរងខូតខាតទាំងស្រុង។

ដៃប្រឡាក់ធ្យូងលើកកាន់ក្រមា បុរសអាយុ៤៥ឆ្នាំរូបនេះនិយាយរៀបរាប់ទាំងអួលដើមក លាយទឹកភ្នែកថា លោកមិនមានផ្ទះនោះទេ គឺស្នាក់នៅតូបផ្សារដែលឆេះនេះ ដោយមានតែខោអាវមួយកំផ្លេរជាប់នឹងខ្លួនប៉ុណ្ណោះ៖ «ទៅថ្ងៃខាងមុខទៀតគឺអត់មានអីទេ គឺមានតែតស៊ូលក់ដូររបស់កំប៉ិកកំប៉ុកដើម្បីចិញ្ចឹមជីវិត និងកូនបីនាក់ទៀតដែលនៅតូចៗកំពុងតែខិតខំសិក្សារៀនសូត្រ។

កាលពីយប់ថ្ងៃទី៤ ឈានចូលថ្ងៃទី៥ ខែវិច្ឆិកា ឆ្នាំ២០២០ ផ្សារកំពង់ពពិលដែលមានតូបលក់ដូរចំនួន៩៦តូប ត្រូវបានអគ្គិភ័យឆាបឆេះខូចខាតអស់៧៥តូប ឬស្មើនឹង៧០ភាគរយ ដោយមិនទាន់គិតអ្នកលក់កញ្ច្រែងល្អី ស្មើនិងទឹកប្រាក់ប្រហែល ១លាន៨ម៉ឺនដុល្លារអាមេរិក។ នេះបើតាមការផ្សាយរបស់ទំព័រហ្វេសប៊ុករដ្ឋបាលខេត្តព្រៃវែង។

កំពុងឈរសម្លឹងមើលទៅកាន់អ្នកទិញអេតចាយរុះរើយកដែកចេញពីហាង ដែលបានឆេះ អ្នកស្រី អៀង ស្រេង ជាងកាត់ដេរម្នាក់ក្នុងផ្សារកំពង់ពពិល ដែលរងគ្រោះដោយសារអគ្គិភ័យដែរនោះនិយាយនៅថ្ងៃទី៦ ខែវិច្ឆិកា ថា ខណៈពេលដែលភ្លើងកំពុងឆាបឆេះផ្សារ អ្នកស្រីមិនបាននៅទីនោះទេតែគឺកំពុងស្នាក់នៅផ្ទះ។ អ្នកស្រីបន្តថា មិនទាន់មានការបញ្ជាក់អំពីមូលហេតុដែលធ្វើឲ្យភ្លើងឆេះនៅឡើយទេ។

អ្នកស្រីថា ៖ «ទ្រព្យសម្បត្តិខូតខាតអស់ជាងមួយម៉ឺនដុល្លារ ទាំងអីវ៉ែអីវ៉ាន់។ ពេលរុះរើនេះហើយចង់សុំគេធ្វើសារឡើងវិញ ប៉ុន្តែគេថាគេអត់ឲ្យធ្វើទេ រដ្ឋគេថាគេធ្វើឲ្យ»។

អាជីវករកាត់ដេររូបនេះបន្ថែមថា អ្នកស្រីបារម្ភអំពីជីវភាព ដោយសារអ្នកស្រីមិនមានដើមទុនដើម្បីដើម្បីរកស៊ីបន្តនោះទេ ដោយសារការរកស៊ីបច្ចុប្បន្នគឺបានដើមទុនពីការខ្ចីលុយធនាគារ និងលេងតុងទីន។

«និយាយទៅរកស៊ីនៅហ្នឹង គឺដូចធ្វើស្រែធ្វើចម្ការនៅហ្នឹងអញ្ចឹង បានលុយមកទិញមកដាក់កន្លែងហ្នឹងទាំងអស់»។

ចំណែកលោក ជី អ៊ាង មានកូន២នាក់ ជាអាជីវករលក់នាឡិកា កាបូប គ្រឿងកាឡៃ ក្នុងផ្សារកំពង់ពពិល បានប្រាប់ Newsroom Cambodia ថា លោករងការខូចខាតបើគិតជាទឹកប្រាក់ប្រហែល៥ពាន់ដុល្លារ។ ដៃកំពុងកាន់ចបប្រមូលកម្ទេចកម្ទីពីភ្លើងឆេះដើម្បីបើកអាជីវកម្មឡើងវិញ បុរសវ័យ៤០ឆ្នាំរូបនេះបន្ថែមថា លោកមិនទាន់ដឹងថា តើអ្នកពាក់ព័ន្ធនឹងមានចំណាត់ការបែបណាអំពីតូបដែលបានឆេះនៅឡើយ។

«ខ្ញុំចង់ធ្វើខ្លួនឯង ឆាប់បានលក់ដូរ ព្រោះចាំគេធ្វើឱ្យវាយូរ។ ចំពោះអាជីវកម្មពេលនេះ យើងអាចឆក់ឱកាសបានលុយខ្លះតិចតួច ប្រក់តង់លក់សិនទៅ ឱ្យតែគែឱ្យបើកឱ្យលក់ ព្រោះនៅសល់លុយតិចតួច ទិញយកមកដាក់លក់បណ្ដើរៗសិនទៅ»។

លោក ជា អ៊ាង បន្ថែមទាំងទឹកមុខស្រងូតស្រងាត់ថា មកដល់ពេលនេះ លោកមិនទាន់បានទទួលជំនួយពីខាងណាទេ ឮតែគេកត់តែឈ្មោះប៉ុន្ដែមិនទាន់បានជំនួយទេ។

ចំណែកលោក ថឹង សំនៀង ជាមេឃុំកំពង់ពពិល បានប្រាប់Newsroom Cambodia កាលពីល្ងាចថ្ងៃអង្គារ៍ ថា ភ្លើងឆាបឆេះបានបំផ្លាញតូប និងផ្ទះរបស់ប្រជាពលរដ្ឋអស់ប្រមាណ៧៧គ្រួសារ ហើយបើគិតទឹកប្រាក់ជាមធ្យម១លាន៨ម៉ឺនដុល្លារ។

លោកបន្ថែមថា មូលហេតុដែលនាំឲ្យភ្លើងឆេះផ្សារ គឺដោយសារតែការផ្ទុះចរន្តអគ្គីសនីដែលបង្កឡើងពីផ្ទះដែលធ្វើកង់ម៉ូតូ។ វេលាម៉ោងជិត៩នាទីយប់ ខណៈពេលដែលភ្លើងកំពុងតែឆាបឆេះផ្សារកំពង់ពពិលនោះគឺមានការអន្តរាគមន៍ជាច្រើនពីភូមិ ឃុំ ស្រុក និងខេត្ត ក្រុង ដែលសរុបទៅគឺមានឡានទឹករហូតដល់ទៅ២១គ្រឿង។

លោក សំនៀង បន្ដថា អាជ្ញាធរនឹងចាត់ចែងកសាងផ្សារឡើងវិញដើម្បីឲ្យមានសណ្តាប់ធ្នាប់៖ «ការងារពាក់ព័ន្ធបើឲ្យពួកគាត់ធ្វើទៀត វាត្រូវតែឆេះទៀត បើធ្វើទៅគាត់សង់ជាផ្ទះអនាធិបតេយ្យ មានជម្លោះកាន់តែច្រើនហើយខ្វះខាតអនាម័យស្អីៗអញ្ចឹង វាអត់មានស្តង់ដារទេ អញ្ចឹងបានខាងខ្ញុំ ខាងឃុំស្នើរទៅខាងស្រុកខេត្តអាជ្ញាធរ ឲ្យគេធ្វើទៅកុំវាឲ្យអត់មានស្តង់ដារទៀត»។

លោកមេឃុំរូបនេះលើកឡើងថា ការឆាបឆេះផ្សារនេះមិនមានអ្នករងរបួស ឬបាត់បង់ជីវិតនោះទេ ហើយថា ប្រជាពលរដ្ឋដែលរងគ្រោះដោយសារអគ្គិភ័យនេះបានទទួលជំនួយសប្បុរសធម៌មួយចំនួនផងដែរ។

បើតាមរបាយការណ៍របស់នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ ក្នុងរយៈពេល១០ខែ នៃឆ្នាំ២០២០នេះ គ្រោះអគ្គិភ័យបានកើតឡើងចំនួន៨៧២ករណីគឺកើនឡើងចំនួន១១០ករណី បើធៀបនឹងរយៈពេលដូចគ្នាកាលពីឆ្នាំ២០១៩។ ក្នុងនោះអ្នកស្លាប់ក៏មានការកើនឡើងផងដែរ។

ក្រៅពីបង្កការស្លាប់ និងរបួសមនុស្ស គ្រោះអគ្គិភ័យក្នុងរយៈពេល១០ខែ ឆ្នាំ២០២០នេះ ក៏បានបង្កឲ្យខូចខាតផ្ទះពលរដ្ឋតូចធំចំនួន៦៥៤ខ្នង និងតូបលក់ដូរចំនួន៥០៥តូបផងដែរ។ ចំនួននេះមាន ការកើនឡើង៧៨ខ្នងផ្ទះ និង១២៣តូប បើធៀបនឹងរយៈពេលដូចគ្នាពីឆ្នាំ ២០១៩។

លោក នេត វន្ថា ប្រធាននាយកដ្ឋានបង្ការ ពន្លត់អគ្គិភ័យ និងសង្គ្រោះនៃអគ្គស្នងការនគរបាលជាតិក្រសួងមហាផ្ទៃកាលពីថ្ងៃទី១០ ខែវិច្ឆិកា បានអំពាវនាវដល់ពលរដ្ឋក៏ដូចជា អាជ្ញាធរពាក់ព័ន្ធឱ្យបង្កើនការប្រុងប្រយ័ត្នចំពោះគ្រោះអគ្គិភ័យ ពិសេសអ្នករស់នៅរាជធានីភ្នំពេញ ដែលមានខ្សែបណ្ដាញអគ្គិសនីខ្វាត់ខ្វែង៕

យ៉ាងហោចណាស់មនុស្សស្លាប់ចំនួន១១នាក់ ដោយសារទឹកជំនន់

នន់ រិទ្ធី (Non Rithy) — Tue, 13 Oct 2020 03:12:34 +0000

យ៉ាងហោចណាស់មានអ្នកស្លាប់ចំនួន១១នាក់ ដោយសារគ្រោះទឹកជំនន់ ចាប់ពីដើមខែតុលាមក បន្ទាប់ពីមានភ្លៀងធ្លាក់ខ្លាំងនៅទូទាំងប្រទេសកម្ពុជា។ នេះបើយោងតាមអ្នកនាំពាក្យគណៈកម្មាធិការជាតិគ្រប់គ្រង់គ្រោះមហន្តរាយ លោក ឃុន សុខា។

ភ្លៀងធ្លាក់ខ្លាំងក្នុងសប្តាហ៍នេះ បានបណ្ដាលឱ្យមានទឹកជន់លិចនៅខេត្ត ក្រុង ចំនួន១១ រួមមានពោធិសាត់ ប៉ៃលិន កំពង់ឆ្នាំង បន្ទាយមានជ័យ បាត់ដំបង ស្វាយរៀង កំពង់ស្ពឺ តាកែវ ស្ទឹងត្រែង កណ្ដាល និងរាជធានីភ្នំពេញ។ ខេត្តដែលរងផលប៉ះពាល់ខ្លាំងជាងគេ គឺប៉ៃលិន។

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា លើកឡើងថា ក្នុងចំណោមជនរងគ្រោះ១១នាក់ ដែលបានបាត់បង់ជីវិត ក៏មានកុមារម្នាក់ផងដែរ។

លោកបន្ថែមទៀតថា រហូតមកដល់ពេលនេះ ទឹកជំនន់បានស្រកបន្តិចនៅតាមខេត្តមួយចំនួន គ្រាដែលខេត្តមួយចំនួនទៀតមិនទាន់ស្រកនោះដោយសារកម្ពុជាក៏កំពុងតែស្ថិតនៅចន្លោះព្យុះលីនហ្វា (LINFA) ទី១៥ ដែលតម្រូវឱ្យប្រជាពលរដ្ឋត្រូវមានការប្រុងប្រយ័ត្នខ្ពស់។

តាមរយៈទំព័រហ្វេសប៊ុកលោកនាយករដ្ឋមន្ត្រី ហ៊ុន សែន កាលពីថ្ងៃអាទិត្យទី១១ ខែតុលា បានប្រាប់ដល់ក្រសួងដែលពាន់ព័ន្ធ បន្តចាត់វិធានការចាំបាច់នានា និងដឹកនាំកម្លាំងក្នុងការចេញទៅជួយសង្គ្រោះប្រជាពលរដ្ឋតាមភូមិសាស្ត្រដែលទទួលខុសត្រូវឱ្យបានទាន់ពេលវេលា ដើម្បីទប់ទល់នឹងគ្រោះទឹកជំនន់ ព្រមទាំងកាត់បន្ថយឱ្យបានជាអតិបរមានូវការលំបាក និងផលប៉ះពាល់ដល់អាយុជីវិតប្រជាពលរដ្ឋ និងទ្រព្យសម្បត្តិនានា។

កាលពីថ្ងៃ១១ ខែតុលា ឆ្នាំ២០២០នេះ មន្ទីរធារណការ និងដឹកជញ្ជូនខេត្ត ក៏បានប្រកាសឱ្យផ្អាកបណ្ដោះអាសន្ននូវរថយន្តធុនធំគ្រប់ប្រភេទ ដែលធ្វើដំណើរឆ្លងកាត់ទូទាំងខេត្តពោធិ៍សាត់ និងបាត់ដំបង ដើម្បីធានាបានសុវត្ថិភាពការធ្វើដំណើររបស់ប្រជាពលរដ្ឋ និងបញ្ចៀសគ្រោះថ្នាក់ដែលអាចកើតមានឡើងជាយថាហេតុ អំឡុងពេលមានភ្លៀងព្យុះ៕

មនុស្ស៩០នាក់ បានប៉ះពាល់ជាមួយបុរសហុងគ្រី ដែលផ្ទុកវីរុសកូវីដ

វុធ ច័ន្ទតារា (Vuth Chandara) — Mon, 28 Sep 2020 14:48:12 +0000

ក្រសួងសុខាភិបាល បានប្រកាសកាលពីថ្ងៃអាទិត្យ ទី២៧ ខែកញ្ញា ឆ្នាំ២០២០នេះថា មានមនុស្សចំនួន៩០នាក់ ដែលបានអ្នកប៉ះពាល់ផ្ទាល់ និងប្រយោលជាមួយនឹងបុរសជនជាតិហុងគ្រី ដែលវិជ្ជមានវិរុសកូវីដ ១៩ ហើយពួកគាត់ត្រូវបានដាក់ក្នុងចត្តាឡីស័កជាបន្តបន្ទាប់។

ក្នុងចំណោមមនុស្សទាំង៩០នាក់នោះ មានមនុស្សចំនួន៨៦នាក់ ដែលជាអ្នករួមដំណើរតាមជើងយន្តហោះជាមួយបុរសហុងគ្រីនេះ ដែលមកទល់នឹងពេលនេះ ក្រសួងបានទាក់ទងទៅអ្នកទាំងអស់នោះដើម្បីយកវត្ថុសំណាកមកធ្វើតេស្តជាលើកទី២។

សេចក្ដីប្រកាសព័ត៌មានរបស់ក្រសួងសុខាភិបាល ក៏បានបញ្ជាក់ថាក្រៅតែពីអ្នករួមដំណើរលើយន្តហោះជាមួយបុរសសញ្ជាតិហុងគ្រី ក្នុងនោះក៏មានប្រពន្ធជនជាតិខ្មែរបស់គាត់ដែលរស់នៅជាមួយគ្នា និងបុរសបើកម៉ូតូកង់បីដែលបានដឹកជនជាតិហុងគ្រីរូបនោះទៅទិញគំនូរនៅគ្រឹះស្ថានអង្គរក្រុងសៀមរាប ហើយពួកគាត់ត្រូវបានដាក់អោយនៅដាច់ដោយឡែករយៈពេល១៤ថ្ងៃនៅមន្ទីរពេទ្យខេត្តសៀមរាប។

ចំណែកឯប្រពន្ធ និងកូន២នាក់របស់អ្នកបើកកង់បី អ្នកបម្រើការនៅគ្រឹះស្ថានអង្គរ និងបុរសបើកតាក់ស៊ីដឹកជនជាតិហុងគ្រីពីភ្នំពេញ មកសៀមរាប កាលពីថ្ងៃទី១៦ ខែកញ្ញា ឆ្នាំ២០២០ ត្រូវបានមន្ត្រីសុខាភិបាលណែនាំឲ្យតាមដានសុខភាព និងធ្វើចត្តាឡីស័កដោយខ្លួនឯងនៅផ្ទះរៀងៗខ្លួន។

គិតត្រឹមថ្ងៃទី២៧ ខែកញ្ញា ឆ្នាំ២០២០នេះ កម្ពុជាបានព្យាបាលអ្នកជំងឺកូវីដ ១៩ ឲ្យជាសះស្បើយចំនួន២៧៥នាក់ ក្នុងចំណោមអ្នកជំងឺសរុប២៧៦នាក់ ដែលបច្ចុប្បន្ននៅសល់អ្នកជំងឺជនជាតិហុងគ្រីខាងលើ កំពុងសម្រាកព្យាបាលនៅមន្ទីរពេទ្យខេត្តសៀមរាប៕

ការចាក់ធុងបាសច្រៀងខារ៉ាអូខេ ធ្វើឲ្យពលរដ្ឋមួយចំនួនក្នុងសង្កាត់ចោមចៅ២ ខឹងសម្បា

ឈឹម សុភទ្ទ (Chhoem Soport) — Tue, 22 Sep 2020 14:20:16 +0000

ប្រជាពលរដ្ខមួយចំនួន បានត្អូញត្អែរ និងខឹងសម្បាចំពោះការចាក់បាសច្រៀងខារ៉ាអូខេតាមផ្ទះ ដែលមានសម្លេងលឺខ្លាំងៗ រំខានដល់ការរស់នៅ ការប្រកបរបរ និងការរៀនសូត្រ នៅក្នុងសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។

អ្នកស្រី សម ស្រីនាង អាយុ ៣០ រស់នៅភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ បាននិយាយថា ការច្រៀងខារ៉ាអូខេបែបនេះ បានបង្កការលំបាកខ្លាំងណាស់ពេលនិយាយទូរស័ព្ទ និងពិបាកក្នុងការនិយាយជួបជុំគ្រួសារផងដែរ។

អ្នកស្រី ក៏បានលើកផងដែរថានេះក៏បានរំខានដល់សិក្សាតាមអនឡាញរបស់កូនគាត់ ដែលតម្រូវឱ្យមានភាពស្ងៀមស្ងាត់។

លោក វ៉ាន់ ម៉ៅ អាយុ ៤៦ ឆ្នាំ អាជីវករនៅផ្សារទួលពង្រ បាននិយាយថា ឲ្យតែល្ងាចឡើង សម្លេងធុងបាសលឺសឹងតែគ្រប់ផ្ទះ។

លោក វ៉ាន់ ម៉ៅ បាននិយាយដូច្នេះថា៖ «ឲតែល្ងាចៗឡើង សម្លេងធុងបាសលឺសឹងតែគ្រប់ផ្ទះ ហើយពេលខ្លះ ចាក់ចម្រៀងរហូតដល់ម៉ោង១០ ដល់ ១១ ដែលធ្វើឲ្យ ខ្ញុំពិបាកដេកពេលក្បាលព្រលប់ ព្រោះវាអស់កំលាំង លក់ដូរថ្ងៃ»។

លោកបានអះអាងថា ធ្លាប់បានទៅនិយាយជាមួយនឹងអាជ្ញាធរនៅមូលដ្ឋានរួចហើយដែរ ដើម្បីឲ្យអាជ្ញាធរចុះមកអប់រំបងប្អូនពលរដ្ឋដែលចាក់បាស់តម្លង់គេ។

អ្នកស្រី សាក់ កន្នីការ អាយុ ៣៣ឆ្នាំ រស់នៅភូមិ តំណាក់ត្រយឹង សង្កាត់ចោមចៅ២ បាននិយាយថា ឲ្យតែថ្ងៃសៅរ៍ អាទិត្យ ឬក៏ថ្ងៃឈប់សម្រាក អ្នកជិតខាងតែងតែចាក់ធុងបាស់ច្រៀង ដោយមិនបានគិតពីម៉ោងកំណត់ណាមួយឲ្យបានជាក់លាក់ ឬក៏ពួកគាត់មិនទាន់ដឹងអំពីច្បាប់ទំលាប់មូលដ្ឋាន។

អ្នកស្រី បានបន្ថែមថា «នាងខ្ញុំធ្លាប់បានស្នើទៅអាជ្ញាធរភូមិ ឬក៏សន្តិសុខភូមិដែរហើយ ជាការពិត គាត់បានមកចុះ ឱ្យសម្រួលនៅក្នុងមូលដ្ឋានហ្នឹងពិតប្រាកដមែន ប៉ុន្តែអ្វីដែលជាសំខាន់គឺអ្នកដែលចាក់ធុងបាសហ្នឹង គឺគាត់ស្រវឹង ហើយអញ្ចឹងទៅ ធ្វើឲ្យមានកើតមានអំពើហិង្សាកើតឡើង ហើយពេលហ្នឹងហើយ ដែលអ្នកសន្តិសុខភូមិ ឬក៏អាជ្ញាធរហ្នឹង និយាយមិនស្ដាប់ ក៏រឿងហ្នឹងវានៅតែបន្តទៅដែរទៅ»។

ទាក់ទងដើម្បីសុំការបំភ្លឺ ចៅសង្កាត់ចោមចៅ២ លោក វ៉ា សារ៉ង បាននិយាយថា នឹងឲ្យមេភូមិ ចុះទៅ មូលដ្ឋានដើម្បីអប់រំ ហើយក៏បិទទូរស័ព្ទគាត់ទៅ។

មន្ទាប់មកបុរសម្នាក់ដែលអះអាងជាមេភូមិ ហើយមិនបានប្រាប់ឈ្មោះ បាននិយាយតាមទូរស័ព្ទថា នឹងចុះទៅមូលដ្ឋានរបស់លោកដើម្បីធ្វើការអប់រំដល់គ្រួសារមួយចំនួនដែលមានការ ចាក់បាសរំខាន ដល់ប្រជាពលរដ្ឋ។

លោកបានបន្ថែមថា «ចាប់ពីពេលនេះទៅ ខ្ញុំនឹងរឹតបន្តឹងចំពោះបងប្អូន ប្រជាពលរដ្ឋណា ដែលមានការចាក់ធុងបាស់»៕