travel – Newsroom Cambodia

ពលរដ្ឋខ្មែរមួយចំនួននៅក្រៅប្រទេសស្វាគមន៍ការមិនធ្វើចត្តាឡីស័ក សង្ឃឹមថាមានពេលច្រើនជាមួយគ្រួសារ

លន់ អុីនជី (Lun Inchy) — Fri, 03 Dec 2021 01:17:15 +0000

ពលរដ្ឋខ្មែរមួយចំនួនដែលរស់នៅក្រៅប្រទេសបាននិយាយនៅក្នុងបទសម្ភាសន៍នាពេលថ្មីៗនេះថា ពួកគេសប្បាយចិត្តជាមួយនឹងការលែងឱ្យមានធ្វើចត្តាឡីស័ក ហើយពួកគាត់សង្ឃឹមថានឹងអាចត្រឡប់ចូលប្រទេសក្នុងពេលឆាប់ៗនេះ និងអាចមានវេលាច្រើននៅស្រុកកំណើតខ្លួន។

កម្ពុជាបានអនុញ្ញាតឲ្យអ្នកដំណើរដែលបានចាក់វ៉ាក់សាំងកូវីដ-១៩ ពេញលេញចូលមកក្នុងប្រទេសខ្លួនដោយមិនចំបាច់ធ្វើចត្តាឡីស័កទេ ចាប់ពីថ្ងៃទី១៥ ខែវិច្ឆិកា ឆ្នាំ២០២១តទៅ។

នាយករដ្ឋមន្រ្តី លោកហ៊ុន សែន នាថ្ងៃទី១៤ ខែវិច្ឆិកា ឆ្នាំ២០២១ បានបញ្ជាក់ថាអ្នកដំណើរចូលមកកម្ពុជាតាមផ្លូវអាកាស ផ្លូវទឹក និងផ្លូវគោក ដែលបានចាក់វ៉ាក់សាំងកូវីដ-១៩ពេញលេញ ត្រូវមានប័ណ្ឌចាក់វ៉ាក់សាំង និងវិញ្ញាបនបត្រដែលមានសុពលភាពរយៈពេល ៧២ម៉ោង បញ្ជាក់ថាគ្មានជំងឺកូវីដ-១៩ (តេស្ត CPR) មុនមកដល់កម្ពុជា។

ពេលមកដល់កម្ពុជា អ្នកដំណើរត្រូវធ្វើតេស្តរហ័ស (Rapid Test) នៅច្រកចូល ហើយត្រូវរងចាំលទ្ធផល ហើយបើសិនលទ្ធផលអវិជ្ជមាន អ្នកដំណើរអាចធ្វើដំណើរបានដោយសេរីមិនចំបាច់ធ្វើចត្តាឡីស័កទេ។

អ្នកស្រីលន់ ស្រីជា ជាជនជាតិខ្មែរ រស់នៅតៃវ៉ាន់បានលើកឡើងថា៖ «វាជារឿងល្អណាស់ ដែលបានផ្តល់អាទិភាពដល់អ្នកបានចាក់វ៉ាក់សាំងរួចរាល់ មិនចាំបាច់់ចំណាយពេលលើការធ្វើចត្តាឡីស័ក ព្រោះអ្នកខ្លះមានពេលតែកន្លះខែ ដើម្បីទៅលេងស្រុកបើសិនជាប់ធ្វើចត្តាឡីស័ក១៤ថ្ងៃទៀត ទម្រាំបានចេញដល់ពេលត្រឡប់មកវិញបាត់ហើយ តែបើបានគេសម្រេចចឹងគឺល្អខ្លាំងណាស់»។

អ្នកស្រីលន់ ស្រីជា

លោកសំអាង សានីត អាយុ២១ឆ្នាំ រស់នៅសហរដ្ឋអាមេរិកយល់ឃើញថា៖ «ខ្ញុំគិតថាល្អម្យ៉ាងដែរ ល្អត្រង់ចំណេញពេលមានឪកាសជួបជុំក្រុមគ្រួសារកាន់តែច្រើន និងមានច្រើនសម្រាប់បំពេញការងារផ្សេងៗ តែអ្វីដែលសំខាន់មនុស្សម្នាក់ៗត្រូវតែពាក់ម៉ាស និងបាញ់អាល់កុលឲ្យបានទៀងទាត់ ដើម្បីរក្សាបាននូវសុខសុវត្ថិភាពទាំងអស់គ្នា»។

លោកសំអាង សានីត

អ្នកស្រីម៉ៅ ម៉ាឡែន អាយុ ២៤ឆ្នាំ រស់នៅប្រទេសកូរ៉េ បាននិយាយថា៖ «ខ្ញុំយល់ថាល្អដែរ ប្រសិនបើសម្តេចប្រកាសបើកចឹង ព្រោះយើងបានជួបជុំគ្រួសារយើងលឿន មិនចាំបាច់ខាតពេលនៅធ្វើចត្តាឡីស័ក ១៤ថ្ងៃ ហើយណាមួយយើងនឹកគ្រួសារយើងឆាប់បានជុំគ្រួសារញ៉ាំអីជាមួយគ្នា ណាមួយយើងបានចាក់វ៉ាក់សាំងរួច ចឹងភាគរយតិចណាស់ដែរឆ្លង»៕

អ្នកស្រីម៉ៅ ម៉ាឡែន

ក្រសួងការបរទេសកម្ពុជាសម្រេចផ្ដល់ទិដ្ឋាការទេសចរណ៍ឡើងវិញ

សេង ម៉េងហេង (Seng Mengheng) — Sun, 24 Oct 2021 09:52:55 +0000

ក្រសួងការបរទេសកម្ពុជាបានបើកឱ្យមានការផ្តល់ឡើងវិញនូវទិដ្ឋាការទេសចរណ៍ដើម្បីទទួលភ្ញៀវបរទេស និងទេសចរណ៍ទូទៅ និងដាក់ឱ្យដំណើរការឡើងវិញនូវគោលការណ៍លើកលែងទិដ្ឋាការ និងការធ្វើចត្ដាឡីស័កស្របតាមគន្លងប្រក្រតីភាពថ្មី។

យោងតាមលិខិតរបស់ក្រសួងការបរទេសកម្ពុជាចេញកាលពីថ្ងៃទី២០ ខែតុលា ជម្រាបជូនអគ្គកុងស៊ុល និងកុងស៊ុលកិត្តិយសនៃព្រះរាជាណាចក្រកម្ពុជាប្រចាំនៅបរទេស បញ្ជាក់ថា ដោយសារការវិវឌ្ឍកាន់តែប្រសើរឡើងនៃស្ថានភាពទប់ទល់នឹងជំងឺកូវីដ១៩ រាជរដ្ឋាភិបាលបានសម្រេចកែសម្រួលគោលការណ៍នៃការផ្ដល់ទិដ្ឋាការ និងរបបនៃការធ្វើចត្ដាឡីស័ក សម្រាប់អ្នកដំណើរមកកម្ពុជា។

ក្នុងលិខិតនោះបន្ថែមថា កម្ពុជាសម្រេចបើកឲ្យមានការផ្ដល់ឡើងវិញនូវទិដ្ឋាការទេសចរណ៍បរទេស និងភ្ញៀវទេសចរណ៍ទូទៅឡើងវិញ និង ដាក់ឲ្យដំណើរការឡើងវិញនូវគោលការណ៍លើកលែងទិដ្ឋាការ ។ ដាក់ដំណើរការឡើងវិញនូវការស្នើសុំទិដ្ឋាការតាមប្រព័ន្ធអេឡិចត្រូវនិច ប៉ុន្ដែនៅបន្ដផ្អាកការផ្ដល់ទិដ្ឋាការនៅពេលមកដល់។ កែសម្រួលលក្ខខណ្ឌធ្វើដំណើរ និងការធ្វើចត្តាឡីស័កនៅកម្ពុជា សម្រាប់អ្នកដំណើរចូលមកកម្ពុជា ស្របតាមគន្លងប្រក្រតីភាពថ្មី តាមការអនុវត្តវិធានការសុខាភិបាល។

គិតត្រឹមថ្ងៃទី២៤ ខែ តុលា ឆ្នាំ២០២១នេះ កម្ពុជាមានករណីឆ្លងជំងឺកូវីដសរុបចំនួន១១៧,៧៧២ អ្នកជាសះស្បើយចំនួន១១២,៩៧៧ និងមានករណីស្លាប់បាត់បង់ជីវិតចំនួន២,៧៣៤នាក់៕

ក្រសួងទេសចរណ៍ប្រកាសការអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥

សេង ម៉េងហេង (Seng Mengheng) — Sun, 24 Oct 2021 09:38:48 +0000

ក្រសួងទេសចរណ៍បានរៀបចំពិធីប្រកាសជាផ្លូវការដាក់ឲ្យអនុវត្តផែនការមេ អភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ នៅសប្តាហ៍ក្រោយ ដែលត្រូវបានរំពឹងថា ផែនការមេនេះនឹងជួយធ្វើឱ្យខេត្តសៀមរាប និងតំបន់នៅជុំវិញក្លាយជាគោលដៅទេសចរណ៍ប្រកបដោយគុណភាព ដែលទាក់ទាញភ្ញៀវទេសចរកាន់តែច្រើន។

យោងតាមសេចក្តីប្រកាសព័ត៌មានរបស់ក្រសួងទេសចរណ៍ចេញនៅថ្ងៃទី២០ ខែតុលា បញ្ជាក់ថា ក្រសួងទេសចរណ៍បានរៀបចំពិធីប្រកាសឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ តាមប្រព័ន្ធអនឡាញ។ ការប្រកាសឲ្យអនុវត្តនេះធ្វើឡើងបន្ទាប់ពីរដ្ឋាភិបាលបានធ្វើការជាច្រើនខែដើម្បីសម្រេចបានផែនការមេ អភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ នេះ ហើយត្រូវបានរដ្ឋាភិបាលកម្ពុជាអនុម័តកាលពីថ្ងៃទី ៣០ ខែមីនា ឆ្នាំ២០២១។ នេះបើតាមសេចក្តីប្រកាសព័ត៌មានដដែល។

ផែនការមេនេះត្រូវបានចូលរួមចំណែកយ៉ាងច្រើនក្នុងការជួយលើកស្ទួយវិស័យទេសចរណ៍ក្នុងខេត្តសៀមរាប តាមរយៈការអនុវត្តនូវយុទ្ធសាស្ត្រមួយចំនួនដូចជា ការអភិវឌ្ឍតំបន់ទេសចរណ៍អាទិភាពក្នុងខេត្ត ការអភិវឌ្ឍផលិតផលទេសចរណ៍ថ្មី ការផ្សព្វផ្សាយ និងទាក់ទាញភ្ញៀវទេសចរ ការពង្រឹងគុណភាព និងនិរន្តរភាព ការគ្រប់គ្រងបរិស្ថាន ការអភិវឌ្ឍហេដ្ឋារចនាសម្ព័ន្ធ និងពង្រីកការតភ្ជាប់គាំទ្រវិស័យទេសចរណ៍ និងការពង្រឹងអភិបាលកិច្ចសម្រាប់ទ្រទ្រង់ការអភិវឌ្ឍវិស័យទេសចរណ៍ខេត្តនេះ។

ទន្ទឹមនឹងនេះគោលបំណងយុទ្ធសាស្រ្តដែលនឹងដាក់ចេញដោយផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ មានចំនួន ៣ ដែលបំពេញឲ្យទាល់តែបាន គឺ ទេសចរណ៍ប្រកបដោយគុណភាពខ្ពស់ ទេសចរណ៍ឆ្លាត និងទេសចរណ៍អភិរក្សធនធានវប្បធម៌ និងបរិស្ថានធម្មជាតិ។

កន្លងមកក្រសួងទេសចរណ៍បានលើកឡើងថា តាមរយៈផែនការមេនេះ ខេត្តសៀមរាបរំពឹងនឹងអាចទាក់ទាញបានភ្ញៀវទេសចរជាតិបាន ១០,៩ លាននាក់នៅឆ្នាំ ២០២៣ និងភ្ញៀវទេសចរអន្តរជាតិ ៧,៥ លាននាក់នៅឆ្នាំ ២០២៥។ តាមរយៈនេះ រដ្ឋាភិបាលក៏មានចក្ខុវិស័យបង្កើតការងារឱ្យបាន ៩៤ ម៉ឺននាក់ និងប្រាក់ចំណូលហូរចូលក្នុងចរន្តសេដ្ឋកិច្ចខេត្តសៀមរាបប្រមាណ ៦ ពាន់លានដុល្លារ។

បើតាមរបាយការណ៍ក្រសួងទេសចរណ៍ ការរីករាលដាលនៃជំងឺកូវីដ១៩ បានធ្វើឱ្យប្រាក់ចំណូលពីវិស័យទេសចរអន្តរជាតិរបស់កម្ពុជា ក្នុងឆ្នាំ ២០២០ ធ្លាក់ចុះជិត ៨០ភាគរយ បានចំណូលត្រឹមតែជាង ១ពាន់លានដុល្លារប៉ុណ្ណោះ៕

ខេត្តចំនួន៨ នឹងត្រូវបិទខ្ទប់ជាបណ្តោះអាសន្តដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដប្រភេទដែលតា

សួន កំសាន្ត (Suon Kamsan) — Thu, 29 Jul 2021 06:58:46 +0000

កម្ពុជាបានសម្រេចបិទខ្ទប់ខេត្តចំនួន ៨ជាបណ្តោះអាសន្ននៅតាមព្រំដែនកម្ពុជា-ថៃក្នុងរយៈពេល ១៤ថ្ងៃដើម្បីទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគកូវីដ-១៩បំប្លែងថ្មីប្រភេទដែលតា (Delta)។

យោងតាមសេចក្តីសម្រេចរបស់រាជរដ្ឋាភិបាលកម្ពុជានៅថ្ងៃទី២៨ ខែកក្កដា ឆ្នាំ២០២១នេះ ការបិទខ្ទប់ជាបណ្តោះអាសន្ននេះនឹងគិតចាប់ពីម៉ោង ២៣:៥៩នាទីនាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១។

សេចក្តីសម្រេចដដែលនោះបានបញ្ជាក់ថាខេត្តទាំង៨ ដែលត្រូវបានបិទខ្ទប់ជាបណ្តោះអាសន្ននោះរួមមាន ខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប។

ភូមិសាស្ត្រដែលត្រូវបានបិទខ្ទប់អាចត្រូវបានបែកចែកជាតំបន់ក្រហម បញ្ជាក់ពីការឆ្លងរាលដាលជំងឺកូវីដ-១៩កម្រិតធ្ងន់ធ្ងរ តំបន់លឿងទុំបញ្ជាក់ពីការឆ្លងរាលដាលកម្រិតមធ្យម និងតំបន់លឿងបញ្ជាក់ពីការឆ្លងរាលដាលកម្រិតស្រាលនៅក្នុងសហគមន៍ ដោយសេចក្តីសម្រេចរបស់អភិបាលនៃគណៈអភិបាលខេត្តដែលត្រូវបានបិទខ្ទប់។ នេះយោងតាមសេចក្តីសម្រេចខាងលើដដែល។

សេចក្តីសម្រេចដដែលបានបញ្ជាក់ថា៖ «គណៈអភិបាលខេត្តនៃខេត្តដែលត្រូវបានបិទខ្ទប់មានភារកិច្ចដើម្បីដាក់ចេញនូវវិធានការហាមឃាត់ ឬវិធានការរឹតត្បិត ជាអាទិ៍ ទាក់ទងនឹងការធ្វើដំណើរក្នុងភូមិសាស្ត្របិទខ្ទប់ ឬការធ្វើដំណើរចេញ-ចូលឆ្លងកាត់ព្រំប្រទល់ភូមិសាស្ត្រខេត្តដែលត្រូវបានបិទខ្ទប់ ការជួបជុំឬការប្រមូលផ្តុំមនុស្ស សកម្មភាពការងារ មុខរបរ ឬ អាជីវកម្ម និងបម្រាមគោចរស្របតាមច្បាប់ដែលមាន»។

គួរបញ្ជាក់ផងដែរថា ក្នុងកំឡុងពេលបិទខ្ទប់នេះ សកម្មភាពពាក់ព័ន្ធនឹងវិស័យអាកាសចរណ៍ស៊ីវិលនៅក្នុងតំបន់បិទខ្ទប់ ត្រូវបានអនុញ្ញាតឱ្យដំណើរការជាធម្មតា រួមទាំងការធ្វើដំណើរពាក់ព័ន្ធនឹងវិស័យនេះ៕

ភ្ញៀវទេសចរអន្តរជាតិនៅកម្ពុជាធ្លាក់ចុះ ៨០% ដោយសារជំងឺកូវីដ ១៩

សេន តុលា (Sen Tola) — Thu, 28 Jan 2021 09:07:12 +0000

រដ្ឋមន្រ្តីក្រសួងទេសចរណ៍ថ្លែងថា អ្នកទេសចរណ៍អន្តរជាតិ៨០% និងអ្នកទេសចរណ៍ជាតិ២០%បានធ្លាក់ចុះចាប់តាំងពីដើមខែមករា ឆ្នាំ២០២០ មកដល់ពេលបច្ចុប្បន្ននេះ ដោយសារតែការរីករាលដាលនៃជំងឺកូវីដ១៩។

លោក ថោង ខុន រដ្ឋមន្រ្តីក្រសួងទេសចរណ៍ថ្លែងបែបនេះក្នុងសិក្ខាសាលារវាងអន្តរក្រសួងមួយស្ដីពីកម្មវិធីវេទិកាអេកូទេសចរណ៍លើកទី២ កាលពីថ្ងៃទី២៧ ខែមករា ក្នុងខេត្តសៀមរាប។ លោកលោកឡើងថា ដោយសារតែវិបត្តិ ជំងឺកូវីដ១៩ បានធ្វើឱ្យចំនួនភ្ញៀវទេសចរដែលមកលេងប្រទេសកម្ពុជាធ្លាក់ចុះជាខ្លាំងគួរឲ្យកត់សម្គាល់ ដោយលោកថា ចំនួនភ្ញៀវទេសចរអន្តរជាតិដែលមកលេងប្រទេសកម្ពុជាថយចុះ៨០% ។

លោកបានថ្លែងថា៖ «ស្ថិតក្នុងបរិយាការណ៍ប្រឈមខាងលើ ដែលធ្វើឱ្យកម្ពុជាទទួលបានភ្ញៀវទេសចរអន្តរជាតិត្រឹមតែប្រមាណ១.៣១លាននាក់ ក្នុងឆ្នាំ២០២០ ថយចុះ៨០%ធៀបនឹងឆ្នាំ២០១៩»។

លោកបានបន្ថែមថា បើទោះជាចំនួនភ្ញៀវទេសចរណ៍អន្តរជាតិមានការថយចុះខ្លាំង ប៉ុន្តែចំនួនភ្ញៀវផ្ទៃក្នុង ឬក្នុងស្រុកបានបង្ហាញពីសញ្ញានៃការងើបឡើងវិញ ដោយចំនួនភ្ញៀវទេសចរក្នុងស្រុកមានប្រមាណជា៩លាននាក់ ហើយបានចុះត្រឹមតែ២០%តែប៉ុណ្ណោះ។

លោក មិន ពិសាល គ្គុទេសក៍ទេសចរណ៍ ភាសាអង់គ្លេស និងបារាំងបានប្រាប់ Newsroom Cambodia តាមរយ:បណ្ដាញសង្គមហ្វេសប៊ុកនៅថ្ងៃទី២៨ ខែមករានេះថា ចាប់តាំងពីកំណើនភ្ញៀវទេសចរអន្តរជាតិបានធ្លាក់ចុះ

តាំងតែពីដើមខែមករា ឆ្នាំ២០២០មក លោកមានផលពិបាកយ៉ាងច្រើនដែលទាក់ទងទៅនឹងការរស់នៅ ហិរញ្ញវត្ថុ និងការចិញ្ចឹមជីវិតប្រចាំថ្ងៃ។

លោករៀបរាប់ថា៖ «ជួនកាលដល់ថ្នាក់លក់ដី លក់របស់របរដែលយើងធ្លាប់ទិញពីមុនមក គឺយើងលក់អស់ហើយដើម្បីផ្គត់ផ្គង់ជីវិតប្រចាំថ្ងៃ ពីព្រោះតែឥលូវយើងអត់មានចំណូល អត់មានភ្ញៀវទេសចរ ចំណូលបាត់បង់អស់រលីង»។

វិបត្តិកូវីដ១៩បានធ្វើឱ្យសកលលោកទាំងមូលមានភាពលំបាក និងរងនូវវិបត្តិសេដ្ឋកិច្ចយ៉ាងធ្ងន់ធ្ងរហើយក៏បានធ្វើឱ្យប្រទេសកម្ពុជាក៏ត្រូវរងផលប៉ះពាលយ៉ាងទម្ងន់ផងដែរ។ ប្រជាជនត្រូវបាត់បង់ការងារដោយសារតែជំងឺផ្លូវដង្ហើមមួយនេះ ហើយក៏បានធ្វើឱ្យវិស័យស្នូលជាច្រើន ជាពិសេសវិស័យទេសចរណ៍របស់ប្រទេសម្ពុជា ត្រូវរងវិបត្តិយ៉ាងធ្ងន់ធ្ងរ៕

វិស័យទេចរណ៍ត្រូវការពេល ២ទៅ ៣ឆ្នាំដើម្បីអាចវិលមកស្ថានភាពដើម ខណៈវិស័យកសិកម្មព្យាករណ៍ថានឹងមានកំណើនខ្ពស់

សេន តុលា (Sen Tola) — Thu, 28 Jan 2021 02:44:34 +0000

វិស័យទេសចរណ៍នៅកម្ពុជា ដែលជាវិស័យស្នូលមួយនៃសេដ្ឋកិច្ចរបស់ប្រទេស អាចត្រូវការពេលវេលាប្រមាណជា ២ ទៅ៣ឆ្នាំទៀត ទើបអាចវិលត្រឡប់មកស្ថានភាពដូចដើម បន្ទាប់ពីមនុស្សរាប់ពាន់នាក់បានបាត់បង់ការងារ និងចំណូលក៏បាត់បង់ ដោយសារតែរងផលប៉ះពាល់ដោយការរាលដាលនៃជំងឺកូវីដ ១៩។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១ បានសរសេរថាវិស័យសេវាកម្ម ឬវិស័យទេសចរណ៍នេះតែម្ដងនឹងមានកំណើនអត្រាទាបត្រឹមតែ ៣,៦% ប៉ុណ្ណោះសម្រាប់ឆ្នាំ២០២១នេះ ហើយប្រសិនបើប្រៀបធៀបនឹងកំណើនអត្រាអវិជ្ជមានត្រឹម - ៣,០% ក្នុងឆ្នាំ២០២០។

ខ្លឹមសារដដែលនេះក៏បានសរសេរបន្ថែមដែរថាសម្រាប់វិស័យសណ្ឋាគារ និងភោជនីយដ្ឋាន កំណើនវិជ្ជមានត្រូវបានរំពឹងថានឹងមានឡើងវិញ ប៉ុន្តែស្ថិតក្នុងកម្រិតទាបតែប៉ុណ្ណោះ ដោយសារធ្លាក់ការចុះលទ្ធភាពក្នុងការធ្វើដំណើរកំសាន្ត ហើយសម្រាប់វិស័យនេះ ទាំងមូលក៏ត្រូវការពេលវេលារហូត ២ ទៅ៣ឆ្នាំទើបអាចងើបទៅរកស្ថានការណ៍ដូចកាលមុន មិនទាន់មានជំងឺកូវីដបានឡើងវិញ។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១នោះក៏បានសរសេរបន្ថែមដែរថាកម្ពុជាអាចប្រឈមនឹងការប្រកួតប្រជែងខ្ពស់ដោយសារគ្រប់បណ្ដារប្រទេសដែលជាគោលដៅទេសចរណ៍ដទៃទៀតគេ ក៏មានវិធានការដើម្បីត្រៀមខ្លួនក្នុងស្រូបទាញភ្ញៀវទេសចរបន្ទាប់ពីស្ថានភាពនៃជំងឺកូវីដបានធូរស្រាលផងដែរ។

សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២១ក៏បាននិយាយផងដែរថា វិស័យកសិកម្មក្នុងឆ្នាំនេះត្រូវបានធ្វើការប៉ានស្មានបានថានឹងអាចមានអត្រាកំណើនរហូតដល់ ១,៦% នៅក្នុងឆ្នាំ២០២១នេះ ពីកំណើន ០,៩% ក្នុងឆ្នាំ២០២០កន្លងទៅនេះក៏ដោយសារមានកំណើននៃការដំាដំណាំ ចិញ្ជឹមសត្វ និងនេសាទ។

ទន្ទឹមនេះនៅក្នុងខ្លឹមសារសង្ខេបមួយនេះក៏បានលើកសរសេរឡើងថាវិស័យដំណាំត្រូវបានព្យាករណ៍ដែលថាអាចនឹងមានកំណើនខ្ពស់ជាងឆ្នាំ២០២០ នេះក៏ដោយសារកំណើនផលិតខាងកសិកម្ម និងស្របពេលថ្លៃ និងមានតំរូវការខាងក្រៅច្រើន៕

អាជីវកម្មនៅតំបន់ប្រាសាទអង្គរវត្តប្រឈមនឹងភាពមិនប្រាកដប្រជាបន្ទាប់ពីការធ្លាក់ចុះនៃភ្ញៀវទេសចរដោយសារតែកូវីដ

Vannsak Wathnak — Mon, 25 Jan 2021 04:12:49 +0000

ខេត្តសៀមរាប៖ អាជីវករ និងអ្នករត់ម៉ូតូកង់បីនៅតំបន់ប្រាសាទអង្គរវត្ត ខេត្តសៀមរាប បាននិយាយថាពួកគាត់បានរងផលប៉ះពាល់ដោយការធ្លាក់ចុះនៃភ្ញៀវទេសចរ បន្ទាប់ពីការផ្ទុះឡើងនៃជំងឺ ១៩ ដែលបានវាយលុកប្រទេសកម្ពុជាកាលពីដើមឆ្នាំ២០២០។

លោកស ឡៃ អាយុ៤៨ឆ្នាំ ជាអ្នករត់កង់បីនៅក្នុងតំបន់អង្គរបានប្រាប់ថា ប្រាក់ចំណូលរបស់លោកពីមុនមានចន្លោះពី១០ដុល្លារ ទៅដល់ ៧០ដុល្លារ ក្នុងមួយថ្ងៃ ក៏ប៉ុន្តែបច្ចុប្បន្ននេះ បានត្រឹម ៥០០០រៀល ហើយពេលខ្លះ បាន៣ម៉ឺន ទៅ៤ម៉ឺនរៀល។

លោកលើកឡើងដូច្នេះថា៖ «កាលភ្ញៀវមាននៅ ចំណូលយ៉ាងតិចក៏១០ដុល្លារដែរ បើអាខ្ពស់បំផុតមិនអាចប្រាកដទេ ដូចថា ២០-៣០ដុល្លារ ជួនកាលបានដល់ទៅ ៧០ដុល្លារអីទៅ បើយកភ្ញៀវទៅដាក់ទន្លេ ឬតាមហាងអីទៅអញ្ចឹង យើងបានច្រើនតាមហ្នឹងទៅជាពិសេសភ្ញៀវបរទេស។ បើឥឡូវនិយាយអោយត្រង់ទៅជួនកាលបានប្រាំពាន់ ហើយថ្ងៃណាក៏អត់ទៅ បើហេងបាន ៣ទៅ៤ម៉ឺន»។

លោកបានបន្ថែមថា៖ «បើផ្គត់ផ្គង់គ្រួសារទៅ គឺទៅអត់រួចទេ ទាល់តែមានប្រពន្ធជួយរកនេះខ្លះ នោះខ្លះ តែប្រពន្ធពូនៅតែផ្ទះមើលតែកូន តែពូមានម្តាយនៅក្រៅប្រទេសផងដែរ គាត់អោយមួយខែ ១០០ដុល្លារគ្រាន់ជួយទប់ខ្លះក្នុងពេលកូវីដអញ្ចឹង»។

«ពិបាកនិយាយវាខុសប្លែកគ្នាឆ្ងាយណាស់ ហើយក្នុងមួយថ្ងៃទៅលើម្ហូបតិចបំផុតក៏ត្រឹម ៣ម៉ឺនដែរ ឥឡូវទិញម្ហូបត្រឹម៣ពាន់ ហូបពីរនាក់ប្តីប្រពន្ធទៅ និយាយទៅវាពិបាកណាស់ មិនហ៊ានស៊ីចាយអីទេ ពិបាករកលុយមិនបានតែម្តងបើអាកាលផ្ទុះកូវីដដំបូង គឺស្ងាត់ឈឹងតែម្តង អត់មាននរណាមកទេ»។

អ្នកស្រីឡាយ លី អាយុ ៣៦ឆ្នាំ។ រូបភាព៖ កេត អ៊ីយាន

អ្នកស្រីឡាយ លី អាយុ ៣៦ឆ្នាំ ជាអ្នកលក់វត្ថុអនុស្សាវរីយ៍នៅជិតប្រាសាទអង្គរវត្តបានប្រាប់ថាពីមុនអ្នកស្រី រកប្រាក់ចំណូលបានពី ៤ម៉ឺន ទៅ១០ម៉ឺនរៀលក្នុងមួយថ្ងៃ បច្ចុប្បន្នរកបានតិចតួច ចំណេញបានតិចតួចស្ទើរតែមិនអាចផ្គត់ផ្គង់ជីវភាពព្រោះត្រូវចំណាយលើម្ហូបអាហារ ការរៀនសូត្ររបស់កូន និងត្រូវបង់ការ ប្រាក់នៅធនាគារជាដើម។

អ្នកស្រីបានលើកឡើងថា៖ «ខ្ញុំលក់នៅនេះយូរហើយ តែនៅខាងក្នុង ៦-៧ឆ្នាំហើយ លក់តែអាហ្នឹងឯង កាលមុនកូវីដ មួយថ្ងៃបានប្រហែលជា ៤-១០ម៉ឺនអត់ទៀងទេ តែថ្ងៃនេះអត់។ ផ្គត់ផ្គង់អត់គ្រប់គ្រាន់ទេ ព្រោះវាចំណេញតិចតួចលក់បាន ៦-៧ម៉ឺនយកទៅទិញឥវ៉ាន់វិញ សល់តែបន្តិចបន្តួចគ្រាន់ទុកអោយកូនហូបអោយរួចមួយថ្ងៃ សឹងតែមិនរួច»។

«ប៉ះព៉ាល់តែមែនទែនតែម្តង ដូចជាពួកខ្ញុំលក់អញ្ចឹងមានការជំពាក់អង្គការអីអញ្ចឹង ហើយត្រូវការបង់អោយគេរាល់ខែ ដល់ពេលអញ្ចឹងទៅវាពិបាកណាស់ ដូចការរៀនសូត្ររបស់កូន វាត្រូវរៀនគួរ រៀនអង់គ្លេស អញ្ជឹងយើងត្រូវការចំណាយដល់ពេលអត់បានអញ្ចឹងវាពិបាក»។

លោកប៊ុន យូរឆៃលៀង អាយុ ៣៨ឆ្នាំ។ រូបភាព៖ វឌ្ឃនៈ វណ្ណសក្តិ

លោកប៊ុន យូរឆៃលៀង អាយុ ៣៨ឆ្នាំ ជាអ្នករត់កង់បីបាននិយាយថាប្រាក់ចំណូលពីមុន និងបច្ចុប្បន្នខុសគ្នា ឆ្ងាយហើយឥឡូវនេះរកបានតែ២ម៉ឺនរៀល ទៅ៣ម៉ឺនរៀលប៉ុណ្ណោះក្នុងមួយថ្ងៃ ជួនកាលក៏អត់បាន។

លោកបានលើកឡើងថា៖ «ខុសគ្នាឆ្ងាយណាស់ប្អូន កាលនៅភ្ញៀវបរទេសហើយអត់មានកូវីដ យើងរកបានម៉ូយស្រួល ឲ្យតែចេញរកដឹងតែបាន ប៉ុន្តែឥឡូវ ទោះបីយើងប្រឹងចេញរកប៉ុណ្ណានៅតែរកអត់បានដូចមុនទេ ដោយសារយើងអត់មានភ្ញៀវបរទស អាចបានជា ៨-១០ម៉ឺន តែឥឡូវបានតែ ២ម៉ឺន ៣ម៉ឺន ជួនកាលសឹងតែអត់សោះតែម្តង»។

លោកបន្ថែមថាចំណូលអត់គ្រប់ដោយសារតែគាត់ជំពាក់គេដែរ ហើយមានការពិបាកក្នុងការសន្សំសងគេ ដូចជាប៉ុន្មានខែមុន គាត់បានសុំពន្យារសងលុយគេ ព្រោះតែអត់មានលទ្ធភាពសង អញ្ចឹងទៅគេឲ្យបង់តែការ។

«ពេលបង់តែការអញ្ចឹងទៅវាខាតយើងវិញ។ មុនធ្លាប់ឲ្យគ្រូសារគាត់ចេញលក់ដូរតិចតួច តែពេលលក់ទៅវាអត់ដាច់ ព្រោះឥឡូវគេចេញលក់ច្រើន នៅពេលបាត់បង់ទេសចរណ៍ទៅ គាត់អត់មានអីធ្វើ គាត់ចេញលក់ដូចយើងដែរ ដល់ពេលយូរៗទៅវាពិបាកអត់មានពីណាមើលកូន អញ្ចឹងទៅអោយគាត់មើលកូនយើងចេញរកតែឯងទៅ តែជួនកាលខ្វះខាតអីម៉ែឪគាត់ផ្ញើរមកខ្លះទៅ»។

លោក ង៉ូវ សេងហាក់ ប្រធានមន្ទីរទេសចរណ៍ខេត្តសៀមរាបបានប្រាប់ Newsroom Cambodia យ៉ាងខ្លីថា ភ្ញៀវទេសចរនឹងចាប់ផ្តើមមកកម្សាន្តវិញនៅពេលដែលស្ថានភាពជំងឺកូវីដមានភាពប្រសើរឡើង។

«បើសភាពការណ៍កូវីដប្រសើរ ភ្ញៀវនឹងត្រឡប់មកវិញ ដល់ពេលកូវីដអីចឹង យើងដឹងថាស្ថានភាពវាដោយសារជំងឺកូវីដ ការហោះហើរក៏អត់មានដែរ មកសៀមរាបអីចឹង»។

Newsroom Cambodia មិនអាចសុំការអធិប្បាយពីលោក តុប សុភ័ក អ្នកនាំពាក្យក្រសួងទេសចរណ៍ ដោយ ទូរស័ព្ទហៅជាច្រើនដង ប៉ុន្តែគ្មានអ្នកទទួល។

យោងទៅតាមរបាយការណ៍របស់ក្រសួងទេសចរណ៍ ចំនួនភ្ញៀវទេសចរណ៍ក្នុងឆ្នាំ២០១៩ មានប្រមាណជាជាង ៦លាននាក់ កើនឡើង៨ភាគរយប្រៀបធៀបឆ្នាំ២០១៨ ក៏ប៉ុន្តែក្នុងឆ្នាំ ២០២០ ភ្ញៀវទេសចរណ៍សរុបមានត្រឹមតែជាង ១លាននាក់ប៉ុណ្ណោះ ពោលគឺមានការធ្លាក់ចុះជិត៨០ភាគរយ។ នេះយោងតាមស្ថិតិផ្លូវការ៕

ខណៈកូវីដវាយលុក ការធ្វើឱ្យវត្ថុអនុស្សាវរីយ៍ពីដូងជាប្រភពចំណូលថ្មីសម្រាប់អ្នកភូមិក្នុងខេត្តសៀមរាប

សេន តុលា (Sen Tola) — Sat, 23 Jan 2021 05:12:46 +0000

ស្រុកអង្គធំ ខេត្តសៀមរាប៖ កាលពីដំបូងឡើយ អ្នកស្រីសំ សំភាស់ គ្រាន់តែចង់កែច្នៃផ្លែដូងធ្វើជារបស់លេងសម្រាប់កូនគាត់នៅក្នុងភូមិមួយនៃស្រុកអង្គធំ ខេត្តសៀមរាប តែប៉ុណ្ណោះ ហើយការច្នៃប្រឌិតរបស់គាត់ក៏បានចាប់ផ្តើមទទួលបានការចាប់អារម្មណ៍ពីអ្នកទេសចរដែលបានឆ្លងកាត់។

វត្ថុអនុស្សាវរីយ៍សត្វក្រពើធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

ជាមួយនឹងការមកដល់នៃជំងឺរាតត្បាតកូវីដ១៩ ដែលបានប៉ះពាល់ដល់ជីវភាពរស់នៅរបស់ប្រជាជនរាប់ម៉ឺននាក់ ការធ្វើរូបជាសិល្បៈចេញពីផ្លែដូងសម្រាប់ភ្ញៀវទេសចរ បានក្លាយជាប្រភពចំណូលថ្មីសម្រាប់អ្នកស្រីសំ សំភាស់ និងគ្រួសារដទៃទៀតនៅភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប ដែលភាគច្រើនប្រកបរបរជាកម្មករសំណង់។

អ្នកស្រីសំ សំភាស់ អាយុ ២៩ឆ្នាំ បាននិយាយថាគំនិតនៃការច្នៃប្រឌិតនេះគឺប្តីគាត់បានឃើញគេធ្វើនៅប្រទេសថៃនៅពេលគាត់ធ្វើជាពលករចំណាកស្រុកនៅប្រទេសថៃកាលពីដើមឆ្នាំ២០២០។

ទឹកមុខញញឹមដែលបង្កប់ទៅដោយក្ដីរីករាយ និងការស្វាគមន៍ អ្នកស្រី សំ សំភាស់ បាននិយាយថា «មុនដំបូងប្ដីរបស់ខ្ញុំគាត់ទៅថៃ មិនដឹងថាគាត់ឃើញឯណោះ ឬក៏យ៉ាងណាទេ ដល់ពេលគាត់ត្រឡប់មកវិញ ឃើញផ្លែដូងក៏ធ្វើតាមគេដាក់ឱ្យកូនលេងទៅ»។

ដោយសម្តីរដឺនៗបន្ដិចផងនោះ អ្នកស្រីសំ សំភាស់បានបន្តថា «ប៉ុន្តែកាលធ្វើលើកនោះមិនបានស្អាតអ្វីទេដោយសារមិនទាន់លាបថ្នាំ ហើយកូនឈប់លេងហើយក៏វាចោលទៅ ស្រាប់តែពេលក្រោយកូនក៏វាទារលេងម្ដងទៀត ក៏ធ្វើឱ្យវាម្ដងទៀតទៅ តែលើកនេះលាបពណ៌ហើយក៏ចេះតែច្នៃដាក់ជើងផងអីផង ហើយក៏ស្រាប់តែអ្នកស្រុកឃើញក៏មកសុំរៀនបន្តក៏ចេះ បានដាក់លក់ ហើយកាលនោះលក់ដាច់សម្បើម»។

អ្នកស្រីសំ សំភាស់បានរៀបរាប់ថាកាលដើមឡើយ គឺមានតែគ្រួសារគាត់តែប៉ុណ្ណោះដែលចេះពីរបៀបនៃការកែច្នៃផ្លែដូងចេញជារូបសត្វនេះមុនគេ ហើយក៏ត្រូវបានអ្នកស្រុកដឹង ក៏បានមកសុំរៀនបន្ត ហើយរហូតមកដល់ក្នុងពេលបច្ចុប្បន្ននេះ អ្នកស្រីថាឱ្យតែមានអ្នកចង់រៀន គឺគាត់រីករាយក្នុងការបង្ហាត់បង្រៀនដោយមិនកំណាញ់នោះទេ។

វត្ថុអនុស្សាវរីយ៍សត្វទន្សាយធ្វើពីដូងនៅស្រុកអង្គធំ ខេត្តសៀមរាប។ រូបភាព៖ វឌ្ឍនៈ វណ្ណសក្តិ

អ្នកស្រីបាននិយាយផងដែរថាមុខរបរនេះជារបរបន្ទាប់បន្សំរបស់គាត់ដែលអាចជួយសម្រួល
ទៅដល់ការចំណាយម្ហូបប្រចាំថ្ងៃបាន។ អ្នកស្រីបានបន្ថែមថារូបសត្វមួយអ្នកស្រីលក់បាន១៥០០០៛ ប៉ុន្ដែបើមានគេកម្ម៉ង់ច្រើន អ្នកស្រីលក់ក្នុងមួយរូបតែ ១២០០០៛តែប៉ុណ្ណោះ ហើយក៏ មិនសូវជាបានចំណេញច្រើននោះទេ ដោយសារត្រូវចំណាយទៅលើការទិញក្រដាសកាសែតមករុំពីលើ។

អ្នកស្រីបានបន្ថែមថាក្នុងមួយថ្ងៃ គាត់ផលិតបានមួយរូបដោយសារតែអ្នកស្រីរវល់និងកិច្ចការផ្ទះខ្លាំងពេក ប៉ុន្តែជួនពេលខ្លះ ទំនេរ ក៏បាន ០៤រូបទៅ ប្រសិនបើមានគេកម្ម៉ង់អ្នកស្រីអាចធ្វើបានរហូតដល់ទៅជាង១០ក្នុងមួយថ្ងៃ ហើយមិនលក់ដាច់រាល់ថ្ងៃនោះទេ ជួនកាល មួយអាទិត្យ ឬមួយខែ ទើបមានការកម្ម៉ង់ម្ដង។

របរធ្វើដូងទៅជាវត្ថុអនុស្សាវរីយ៍ មានជារូបសត្វឱម៉ាល់ ក្រពើ ទន្សាយ និងមេអំបៅផងដែរនោះ បានពង្រីកដល់ចំនួនប្រហែល ៤ ឬ ៥ គ្រួសារហើយនៅក្នុងភូមិនេះ ដែលនេះបានបង្កឲ្យមានការលំបាកក្នុងការស្វែងរកដូងមកធ្វើ។

អ្នកស្រីបាននិយាយថា៖ «ចាប់តាំងតែពីអ្នកភូមិចេះធ្វើដែរមក ពិបាករកផ្លែដូងមកធ្វើខ្លាំងណាស់ ប្រសិនបើចង់រក មានតែទៅភូមិឆ្ងាយៗ ទើបបានហើយត្រូវទិញទៀតទើបបាន»។

«កាលមុនគេយកដុតចោល តែឥលូវចាប់តាំងពីគេដឹងមក ផ្លែដូងសណ្ដមួយត្រូវចំណាយ ៥០០៛ទិញមកទើបបាន ជួនណា គេមិនយកលុយទេ តែយើងយកមកធ្វើលក់ដែរ ក៏ជូនលុយគេខ្លះៗទៅ»។

អង្គុយលើកៅអីហើយនិយាយលឺៗ អ្នកស្រី ហាវ សារុំ អាយុ ៥៤ឆ្នាំ ដែលជាអ្នកភូមិរស់នៅភូមិក្បែរនោះក៏បាន
និយាយបន្ថែមថាកាលពីគាត់នៅក្មេងៗ គាត់មិនដែលធ្លាប់ឃើញការច្នៃផ្លែដូងធ្វើជារូបសត្វបែបនេះនោះទេ ហើយកាលមុន គ្រាន់តែយកមកធ្វើជាអុសដុតបបរបាយជ្រូកតែប៉ុណ្ណោះ។

«ខ្ញុំស្ងើចសរសើរថាវាល្អដែលគេមានគំនិតបែបនេះ បើខ្ញុំមិនដឹងយកធ្វើអ្វីមានតែយកទៅដុតបបរបាយជ្រូក។ មិនបាច់ទៅធ្វើការស្រុកគេ ក៏អាចយកលក់បានលុយស្រួល ហើយវាអាចជួយទៅលើបរិស្ថានបានច្រើនដែរណា»។

នៅក្រោមដំបូលផ្ទះប្រក់ក្បឿង ហើយអង្គុយចាក់រូបមានទឹកមុខផ្ចង់អារម្មណ៍នឹងការងារតែបង្កប់ដោយក្ដីរាក់ទាក់ អ្នកស្រីសំ ទូច អាយុ ៤២ឆ្នាំ ដែលជាអ្នកភូមិម្នាក់ទៀត ហើយបាន ចេះការច្នៃផ្លែដូងបន្តពីប្អូនស្រីគាត់។

គាត់បានរៀបរាប់ថាកាលដើមឡើយគាត់គ្រាន់តែធ្វើឱ្យកូនគាត់លេងតែប៉ុណ្ណោះ តែដល់មាន អ្នកធ្វើដំណើរឃើញ ក៏បានចុះមកសួរ និងសុំទិញ សុំថត។ ចាប់តាំងតែពីពេលនោះមក របរច្នៃដូងរបស់អ្នកស្រីសំ ទូច ក៏ចេះតែល្បីតៗគ្នារហូតដល់មានអ្នកខ្លះកម្ម៉ង់ឱ្យធ្វើតែម្ដងទៅ។

អ្នកស្រីបាននិយាយថា៖ «ថាទៅវាមិនបានចំណេញចំណូលអ្វីប៉ុន្មាននោះទេ ដូចថាយើងរករបស់បានដូចជាដូងអីចេះតែចង់ធ្វើទៅ បើទោះបីជាយើងរកចំណូលអ្វីមិនបានច្រើនក៏យើងចាត់ទុកថាយើងរួចថ្លៃម្ហូបមួយពេលដែរ។ មានអ្នកឆ្ងាយៗ មកទិញដែលភាគច្រើនជាភ្ញៀវទេសចរ ហើយក៏មានអ្នកកម្ម៉ង់មកពីឆ្ងាយដែលតែភាគច្រើនមិនសូវជាចំណេញទេ ដោយសារការចំណាយទៅលើការវិចខ្ចប់ច្រើន»។

លោក ខុង ឆន អាយុ ៦១ឆ្នាំ ដែលជាមេឃុំ ឃុំលាងដៃ បាននិយាយថាអ្នកចេះកែច្នៃផ្លែងដូងជារូបសត្វនេះមានត្រឹមតែ ៥គ្រួសារ ក្នុង៨ភូមិ ហើយលោកក៏បានរៀបរាប់បន្តថា អាជ្ញាធរក្នុងឃុំក៏មានការគាំទ្រ និងលើកទឹកចិត្ត សរសើរពួកគេដែលមានគំនិតក្នុងការច្នៃប្រឌិត ដោយលោកបានជួយផ្សព្វផ្សាយដែរដើម្បីមានការគាំទ្រ រួមមានការលើកឡើងក្នុងអង្គប្រជុំក្រុមប្រឹក្សាឃុំជាដើម ឲ្យមានកាទិញយកទៅលំអរ៕

រកឃើញករណីវិជ្ជមានជំងឺកូវីដថ្មីលើបុរសខ្មែរ និងភរិយា ដែលធ្វើដំណើរមកពីប្រទេសអ៊ីរ៉ាក់

Kim Sinien (គីម ស៊ីនៀន) — Tue, 20 Oct 2020 14:17:27 +0000

ក្រសួងសុខាភិបាល បានរកឃើញករណីវិជ្ជមានជំងឺកូវីដ ១៩ថ្មីចំនួន០២នាក់ទៀត លើបុរសជនជាតិខ្មែរអាយុ ៣៣ឆ្នាំ និងស្ត្រីខ្មែរ អាយុ ៣២ឆ្នាំ ត្រូវជាភរិយា ដែលបានធ្វើដំណើរមកពីប្រទេសអ៊ីរ៉ាក់។

អ្នកទាំងពីរបានធ្វើដំណើរឆ្លងកាត់ទីក្រុងដូហា និងបន្តជើងហោះហើរនៅប្រទេសកូរ៉េខាងត្បូង មុនចូលមកកម្ពុជានៅថ្ងៃទី១៨ ខែតុលា ឆ្នាំ២០២០ ហើយក៏ត្រូវបានគេដាក់ឲ្យសម្រាកព្យាបាលនៅមន្ទីពេទ្យខ្មែរ-សូវៀត។ នេះយោងតាមសេចក្តីប្រកាសព័ត៍មានក្រសួងសុខាភិបាល។

សេចក្តីប្រកាសព័ត៌មានក្រសួងសុខាភិបាល ចុះថ្ងៃទី២០ តុលា ឆ្នាំ២០២០ បានឲ្យដឹងថា បុរសខ្មែរ និងស្ត្រីខ្មែរនេះ មានកូនអាយុ ០៣ឆ្នាំផងដែរ ហើយមានអាសយដ្ឋានស្នាក់នៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។

អ្នករួមដំណើរតាមយន្តហោះជាមួយអ្នកជំងឺខាងលើ សរុបមានចំនួន១០៨នាក់ មានស្រី៣៤នាក់ កុមា០៣នាក់ និង ទារក០១នាក់ ហើយចំណែក អ្នកដំណើរចំនួន១០៧នាក់ទៀត ដែលមានលទ្ធផលតេស្តអវិជ្ជមានវីរុសកូវីដ ១៩ ត្រូវបានដាក់ឱ្យធ្វើចត្តាឡីស័កចំនួន១៤ថ្ងៃ នៅមណ្ឌលកងទ័ពជើងអាកាស ចំនួន៣៧នាក់ និងសណ្ឋាគារមួយចំនួន ក្នុងរាជធានីភ្នំពេញចំនួន៦៩នាក់។

កម្ពុជាមានចំនួនវីរុសកូវីដសរុបចំនួន ២៨៥ករណី មានស្ត្រី ៥៨នាក់ និងបុរស ២២៧នាក់ ដោយ ក្នុងនោះបានព្យាបាលជាសះស្បើយសរុបទូទាំងប្រទេស ចំនួន២៨០នាក់។

អ្នកសម្រាកព្យាបាលនៅមន្ទីពេទ្យមិតភាពខ្មែរ-សូវៀត មានចំនួន ០៥នាក់ មានជនជាតិឥណ្តូណេស៊ី ០១នាក់ បុរសខ្មែរ ០២នាក់ ស្ត្រីខ្មែរ ០១នាក់ និងស្ត្រីជនជាតិបារាំង ០១នាក់។ នេះយោងតាមក្រសួងសុខាភិបាល៕

ភូមិវប្បធម៌កម្ពុជាប្រកាសបិទអាជីវកម្មដោយសារជំងឺកូវីដជះឥទ្ធិពលដល់សេដ្ឋកិច្ចក្រុមហ៊ុន

ហាន ណូយ (Han Noy) — Mon, 12 Oct 2020 14:39:15 +0000

ក្រុមហ៊ុន «ភូមិវប្បធម៌កម្ពុជា» នៅខេត្តសៀមរាប បានប្រកាសបិទអាជីវកម្មរបស់ខ្លួនទាំងស្រុង ចាប់ពីថ្ងៃទី៧ ខែវិច្ឆិកា ឆ្នាំ២០២០នេះតទៅ ដោយអះអាងថា សេដ្ឋកិច្ចរបស់ក្រុមហ៊ុនជួបការលំបាកខ្លាំងដោយសារការរីករាលដាលជំងឺកូវីដ-១៩។

នេះបើតាមសេចក្ដីជូនដំណឹងរបស់ក្រុមហ៊ុនវប្បធម៌កម្ពុជា ចេញនៅថ្ងៃទី១១ ខែតុលា ឆ្នាំ២០២០ បញ្ជាក់ថា ដោយសារតែការរីករាលដាលជំងឺកូវីដ-១៩ បានធ្វើឱ្យចំនួនភ្ញៀវចូលទស្សនាថយចុះយ៉ាងគំហុកជាច្រើនខែ បណ្តាលឲ្យក្រុមហ៊ុនជួបការលំបាកផ្នែកសេដ្ឋកិច្ច និងហិរញ្ញវត្ថុ រហូតមិនអាចផ្គត់ ផ្គង់លើការចំណាយនានាជុំវិញដំណើរការអាជីវកម្មបន្តទៀតបាន។

ក្នុងសេចក្តីជូនដំណឹងនោះបន្ថែមថា ការបិទអាជីវកម្មនេះនាំឲ្យមានការបញ្ចប់កិច្ចសន្យាការងារជាមួយបុគ្គលិកគ្រប់ផ្នែកទាំងអស់ ដូច្នេះគណៈគ្រប់គ្រងនៃក្រុមហ៊ុនវប្បធម៌កម្ពុជានឹងទូទាត់ប្រាក់សំណងជូនបុគ្គលិកទាំងអស់ស្របតាមបទប្បបញ្ញត្តិស្តីពីការងារ។

កញ្ញា ស៊ិន សុគន្ធារ៉ា បុគ្គលិកក្រុមហ៊ុនវប្បធម៌កម្ពុជាប្រាប់ Newsroom Cambodia នៅថ្ងៃទី១២ ខែតុលា ឆ្នាំ២០២០នេះថា កញ្ញា និងបុគ្គលិកទាំងអស់មានការភ្ញាក់ផ្អើល និងសោកស្តាយនៅពេលឮថាក្រុមហ៊ុនប្រកាសបិទទ្វារ។ កញ្ញាបន្ថែមថា ក្នុងពេលបច្ចុប្បន្ន កញ្ញាមិនទាន់ដឹងថាត្រូវរកការងារអ្វីធ្វើបន្តនៅឡើយទេ។

កញ្ញាថា៖ «ខ្ញុំត្រូវបាត់បង់ការងារក្នុងខណៈពេលដែលស្ថានភាពកូវីដបែបនេះ គឺពិបាករកការងារធ្វើណាស់»។

ចំណែកលោក ទូច សុជាតិ អនុប្រធានគ្រប់គ្រងទូទៅក្រុមហ៊ុនភូមិវប្បធម៌កម្ពុជាម្នាក់ទៀត ប្រាប់ Newsroom Cambodia ដែរថា ពាក់ព័ន្ធនឹងសេចក្តីប្រកាសរបស់ក្រុមហ៊ុនភូមិវប្បធម៌កម្ពុជាដែលថានឹងទូទាត់ប្រាក់សំណងជូនបុគ្គលិកទាំងអស់ស្របតាមបទប្បញ្ញត្ដិស្ដីពីការងារ គឺក្រុមហ៊ុននឹងមានវាគ្មិនមួយដើម្បីស្រាយចម្ងល់ឬក៏បង្ហាញពីបែបបទនិងលក្ខ័ណ្ឌផ្សេងៗដល់បុគ្គលិកទាក់ទិននិងបញ្ហានេះ។

លោកថា៖ «យើងនឹងឲ្យខាងមន្ទីរការងារចុះទៅសម្របសម្រួលការងារ បានន័យថាគាត់នឹងបង្ហាញអំពីលក្ខខណ្ឌនៃការទូទាត់ហ្នឹងទាំងអស់ គឺខាងមន្ទីរជាអ្នករៀបចំ។ យើងនឹងមានវាគ្មិនខាងមន្ទីរដើម្បីឲ្យអស់ចម្ងល់ដល់បុគ្គលិក»។

ភូមិវប្បធម៌កម្ពុជាមានទីតាំងស្ថិតនៅភូមិគ្រួស ឃុំស្វាយដង្គុំ ស្រុកសៀមរាប។ ភូមិវប្បធម៌កម្ពុជាគឺជាកូនភូមិគំរូមួយដែលមានសំណង់ផ្ទះ និងអគារប្រវត្តិសាស្រ្តទំនៀមទម្លាប់របស់ប្រជាជនខ្មែរ និង ជីវភាពរបស់ជនជាតិទាំងអស់។ កន្លែងនេះមានទំហំ២១០,០០០ម៉ែត្រការ៉េ។ ក្នុងភូមិវប្បធម៌កម្ពុជាមានភូមិចំនួន១២ ដែលតំណាងឲ្យវប្បធម៌ផ្សេងៗគ្នា និងចរិតលក្ខណៈរបស់ជនជាតិ១៩។ ទីនោះក៏មានការសម្តែងរបាំអប្សរា និងរបាំរបស់ជនជាតិភាគតិចនៅកម្ពុជា និង អាចទស្សនាការសម្តែងអំពីប្រពៃណីរៀបអាពាហ៌ពិពាហ៍របស់ជនជាតិខ្មែរ ព្រមទាំងរបៀបឆ្លាក់លើថ្ម លើឈើ ដំគ្រឿងប្រាក់ និងច្នៃត្បូងជាដើម៕

នាយករដ្ឋមន្រ្តីថា នឹងទទួលកម្ចីពីចិនដើម្បីកសាងផ្លូវថ្មីចំនួន៣ ច្រានចោលការរិះគន់ថារណបទីក្រុងប៉េកាំង

បឿ សុភា (Boeur Sophea) — Wed, 07 Oct 2020 14:37:53 +0000

លោកនាយករដ្ឋមន្រ្តី លោក ហ៊ុន សែន បានប្រកាសកាលពីថ្ងៃទី៧ ខែតុលា ឆ្នាំ២០២០នេះថា ផ្លូវថ្មីចំនួន៣នៅកម្ពុជា នឹងទទួលមូលនិធិពីប្រទេសចិនដើម្បីកសាង ហើយបានច្រានចោលការរិះគន់ថាកម្ពុជារណបទីក្រុងប៉េកាំង។

ក្នុងពិធីសម្ពោធមជ្ឈមណ្ឌលកម្សាន្តព្រីនម៉ាណ័រ ដែលមានស្ថិតទីតាំងក្នុងឃុំដីឥដ្ឋ ស្រុកកៀនស្វាយ ខេត្តកណ្តាល លោក ហ៊ុន សែន បានមានប្រសាសន៍ថា លោកបានសម្រចកាលពីថ្ងៃទី៦ ខែតុលា ឆ្នាំ២០២០ថា ឲ្យមាការសាងសង់គម្រោងចំនួន៣បន្ថែមទៀត ហើយថវិកាជាការសុំកម្ចីពីចិនក្រោយពីមានការចរចារត្រូវថ្លៃរួចមក។

លោកមានប្រសាសន៍ថា គម្រោងនេះត្រូវបានឯកភាពគ្នាចរចារក្នុងគម្រោងរួចហើយ បន្ទាប់ពីមានការចុះហត្ថលេខាដោយរដ្ឋមន្រ្តីហិរញ្ញវត្ថុ និងសេដ្ឋកិច្ច លោក អូន ព័ន្ធមុន្នីរត្ន័ និងរដ្ឋមន្រ្តីសាធារណៈការ និងដឹកជញ្ជូន លោក ស៊ុន ចាន់ថុល។

លោកមានប្រសាសន៍ថា៖ «អរគុណចំពោះមិត្តចិនដែលបានជួយកម្ពុជាធ្វើផ្លូវរាប់ពាន់គីឡូម៉ែត្រ»។

លោកនាយករដ្ឋមន្រ្តីបន្ថែមថា គម្រោងផ្លូវទាំង៣នេះ មានទី១ ផ្លូវជាតិលេខ៤១ តភ្ជាប់ពីផ្លូវជាតិលេខ៤ ទៅកាន់ខេត្តកំពត ទី២ ផ្លូវជាតិលេខ៣១ នៅខេត្តកំពត និង ទី៣ ផ្លូវជាតិលេខ៣៣ ខេត្តកំពតដូចគ្នាផងដែរ។

លោក ហ៊ុន សែន ក៏បាននិយាយការពារការយកថវិកាពីប្រទេសចិនមកកសាងផ្លូវ និងស្ពាននៅកម្ពុជា ដោយអះអាងថា បើមិនមានចិនទេ គ្មានប្រទេសណាផ្សេងនឹងធ្វើទេ។

លោក ហ៊ុន សែន បាននិយាយដូច្នេះថា «អ្នកខ្លះឃើញចិនមកធ្វើផ្លូវ មកជួយធ្វើផ្លូវ ផ្តល់ជាជំនួយឥតសំណង ផ្តល់ជាប្រាក់កម្ចីឲ្យកម្ពុជាធ្វើផ្លូវ បែរជាថាកម្ពុជារណបចិន ជ្រើសរើសយកចិន ចោលមហាអំណាចនេះ មហាអំណាចនោះ ប៉ុន្តែខ្ញុំចង់បញ្ជាក់ ខ្ញុំចង់សួរត្រលប់ទៅវិញ បើផ្លូវហ្នឹង ស្ពានហ្នឹង ចិនមិនបានធ្វើទេ តើអ្នកណាមកធ្វើជួស?»៕

កម្ពុជាបានចំណូលប្រមាណ៦លានដុល្លារ ពីការលក់ស្លាកលេខពិសេស ខណៈដាក់ចេញប័ណ្ណបើកបរអន្ដរជាតិលើកដំបូង

សួស ធីតា (Sours Thida) — Sun, 04 Oct 2020 14:47:25 +0000

ភ្នំពេញ៖ រដ្ឋមន្រ្ដីក្រសួងសាធារណការ និងដឹកជញ្ជូន លោក ស៊ុន ចាន់ថុល បានប្រកាសថា រកបានចំណូលប្រមាណ៦លានដុល្លារ ចូលជាថវិការរដ្ឋក្នុងពេល៩ខែ តាមរយៈការលក់ស្លាកលេខយានយន្ដពិសេសផ្ទាល់ខ្លួន ខណៈដែលកម្ពុជាដាក់ចេញប័ណ្ណបើកបរអន្ដរជាតិជាលើកដំបូង។

រូបភាពស្លាកលេខពិសេសលើគេហទំព័រក្រសួងសាធារណការ និងដឹកជញ្ជូន

ថ្លែងក្នុងពិធីសម្ពាធដាក់ឲ្យដំណើរការជាផ្លូវការប្រព័ន្ធស្វ័យប្រវត្តិកម្មផ្ទេរកម្មសិទិ្ធយានជំនិះ និងមណ្ឌលផ្ដល់សេវាសាធារណៈថ្មី នាថ្ងៃទី ៣០ ខែកញ្ញា ឆ្នាំ២០២០ នៅផ្សារទំនើបជីបម៉ុងណូរ៉ូម៉ល លោក ស៊ុន ចាន់ថុល មានប្រសាសន៍ថាថវិកានេះគឺចាប់រាប់ពីដើមខែមករា ដល់ខែកញ្ញា។

លោកបន្ថែមថា៖ «ក្នុងរយៈពេល៩ខែនេះ ក្រសួងបានលក់ស្លាកលេខរថយន្ដផ្ទាល់ខ្លូនជាង ២,០០០ គ្រឿងដោយប្រមូលបានជាង ៦លានដុល្លារ។»

ឆ្លៀតក្នុងឱកាសនោះ លោក ក៏បាននិយាយផងដែរថា៖ «ការដាក់លក់ស្លាកលេខពិសេសផ្ទាល់ខ្លួននេះ គឺជាការឆ្លើយតបទៅនឹងតម្រូវការរបស់ប្រជាពលរដ្ឋអ្នកប្រើប្រាស់រថយន្ដ។ ការដាក់ដំណើរនេះ គឺជាមធ្យោបាយបង្កើតនូវប្រាក់ចំណូលដែលនឹងជួយទ្រទ្រង់ដល់សេដ្ឋកិច្ចជាតិ។»

នៅថ្ងៃដដែលនោះដែរ លោករដ្ឋមន្រ្ដី ក៏បានធ្វើការណែនាំពីប័ណ្ណបើកបរអន្ដរជាតិ ដោយបានប្រកាសថាវាគឺជាថ្ងៃដំបូងដែលកម្ពុជាចាប់ផ្ដើមដាក់ចេញប័ណ្ណបើកបរអន្ដរជាតិដែលអ្នកបើកបរអាចប្រើប្រាស់ដើម្បីបើកបរក្នុង ៩៩ប្រទេស៕

រកឃើញករណីវិជ្ជមានកូវីដលើជនជាតិចិន ខណៈអ្នកដំណើរជាង១០០នាក់ ត្រូវបានដាក់ឲ្យធ្វើចត្តាឡីស័ក

វុធ ច័ន្ទតារា (Vuth Chandara) — Tue, 29 Sep 2020 14:51:57 +0000

ក្រសួងសុខាភិបាល រកឃើញអ្នកឆ្លងវីរុសកូវីដ១៩ថ្មីម្នាក់ទៀតជាជនជាតិចិន ខណៈដែលមនុស្ស ជាង១០០នាក់ ដែលរួមដំណើរជាមួយគាត់ ត្រូវបានគេដាក់ឲ្យធ្វើចត្តាឡីស័ក និងមិនមានករណីជាសះស្បើយថ្មីឡើយ នៅថ្ងៃទី២៩ ខែកញ្ញា ឆ្នាំ២០២០។

ក្រសួងសុខាភិបាលបាននិយាយថាបុរសជនជាតិចិន វ័យ២៨ឆ្នាំ បានធ្វើដំណើរមកកម្ពុជាពីប្រទេសហ្វីលីន ដោយបន្តជើងហោះហើរនៅកូរ៉េខាងត្បូង។

តាមរយៈសេចក្តីប្រកាសព័ត៌មានក្រសួងសុខាភិបាល បុរសជនជាតិចិននេះបានមកដល់កម្ពុជានៅថ្ងៃទី២៧ ខែកញ្ញា ឆ្នាំ២០២០ ដែលមានអ្នកដំណើរដែលស្ថិតនៅលើយន្តហោះរួមជាមួយសរុប ១០២នាក់ ដែលក្នុងនោះមាន៥២នាក់ត្រូវបានដាក់អោយធ្វើចត្តាឡីស័ក១៤ថ្ងៃនៅអនុវិទ្យាល័យពោធិ៍ចិន និង៤៩នាក់ផ្សេងទៀតនៅសណ្ឋាគារមួយក្នុងក្រុងភ្នំពេញ។

គិតត្រឹមថ្ងៃទី២៩ ខែកញ្ញា ឆ្នាំ២០២០នេះ កម្ពុជា បានរកឃើញអ្នកឆ្លងជំងឺកូវីដ១៩សរុបចំនួន ២៧៧នាក់ ក្នុងនោះបានព្យាបាលជាសះស្បើយចំនួន ២៧៥នាក់ និងកំពុងសម្រាកព្យាបាលនៅមន្ទីរពេទ្យចំនួន ២នាក់៕

មនុស្ស៩០នាក់ បានប៉ះពាល់ជាមួយបុរសហុងគ្រី ដែលផ្ទុកវីរុសកូវីដ

វុធ ច័ន្ទតារា (Vuth Chandara) — Mon, 28 Sep 2020 14:48:12 +0000

ក្រសួងសុខាភិបាល បានប្រកាសកាលពីថ្ងៃអាទិត្យ ទី២៧ ខែកញ្ញា ឆ្នាំ២០២០នេះថា មានមនុស្សចំនួន៩០នាក់ ដែលបានអ្នកប៉ះពាល់ផ្ទាល់ និងប្រយោលជាមួយនឹងបុរសជនជាតិហុងគ្រី ដែលវិជ្ជមានវិរុសកូវីដ ១៩ ហើយពួកគាត់ត្រូវបានដាក់ក្នុងចត្តាឡីស័កជាបន្តបន្ទាប់។

ក្នុងចំណោមមនុស្សទាំង៩០នាក់នោះ មានមនុស្សចំនួន៨៦នាក់ ដែលជាអ្នករួមដំណើរតាមជើងយន្តហោះជាមួយបុរសហុងគ្រីនេះ ដែលមកទល់នឹងពេលនេះ ក្រសួងបានទាក់ទងទៅអ្នកទាំងអស់នោះដើម្បីយកវត្ថុសំណាកមកធ្វើតេស្តជាលើកទី២។

សេចក្ដីប្រកាសព័ត៌មានរបស់ក្រសួងសុខាភិបាល ក៏បានបញ្ជាក់ថាក្រៅតែពីអ្នករួមដំណើរលើយន្តហោះជាមួយបុរសសញ្ជាតិហុងគ្រី ក្នុងនោះក៏មានប្រពន្ធជនជាតិខ្មែរបស់គាត់ដែលរស់នៅជាមួយគ្នា និងបុរសបើកម៉ូតូកង់បីដែលបានដឹកជនជាតិហុងគ្រីរូបនោះទៅទិញគំនូរនៅគ្រឹះស្ថានអង្គរក្រុងសៀមរាប ហើយពួកគាត់ត្រូវបានដាក់អោយនៅដាច់ដោយឡែករយៈពេល១៤ថ្ងៃនៅមន្ទីរពេទ្យខេត្តសៀមរាប។

ចំណែកឯប្រពន្ធ និងកូន២នាក់របស់អ្នកបើកកង់បី អ្នកបម្រើការនៅគ្រឹះស្ថានអង្គរ និងបុរសបើកតាក់ស៊ីដឹកជនជាតិហុងគ្រីពីភ្នំពេញ មកសៀមរាប កាលពីថ្ងៃទី១៦ ខែកញ្ញា ឆ្នាំ២០២០ ត្រូវបានមន្ត្រីសុខាភិបាលណែនាំឲ្យតាមដានសុខភាព និងធ្វើចត្តាឡីស័កដោយខ្លួនឯងនៅផ្ទះរៀងៗខ្លួន។

គិតត្រឹមថ្ងៃទី២៧ ខែកញ្ញា ឆ្នាំ២០២០នេះ កម្ពុជាបានព្យាបាលអ្នកជំងឺកូវីដ ១៩ ឲ្យជាសះស្បើយចំនួន២៧៥នាក់ ក្នុងចំណោមអ្នកជំងឺសរុប២៧៦នាក់ ដែលបច្ចុប្បន្ននៅសល់អ្នកជំងឺជនជាតិហុងគ្រីខាងលើ កំពុងសម្រាកព្យាបាលនៅមន្ទីរពេទ្យខេត្តសៀមរាប៕

ជនជាតិហុងគ្រីមានផ្ទុកវីរុសកូវីដ ខណៈក្រសួងបន្តស្រាវជ្រាវរកអ្នកប៉ះពាល់បន្ត

វុធ ច័ន្ទតារា (Vuth Chandara) — Sat, 26 Sep 2020 16:29:39 +0000

ក្រសួងសុខាភិបាល បានប្រកាសនៅថ្ងៃសៅរ៍ ទី២៦ ខែកញ្ញា ឆ្នាំ២០២០នេះថា បានរកឃើញលទ្ធផលវិជ្ជមានវីរុសកូវីដ ១៩ លើបុរសអាយុ៧០ឆ្នាំ ជនជាតិហុងគ្រី ដែលបានរត់គេចខ្លួនពីចត្តាឡីស័ក នៅក្នុងខេត្តសៀមរាប ខណៈដែលក្រសួងសុខាភិបាលបន្តស្រាវជ្រាវរកអ្នកដែលបានប៉ះពាល់បន្តទៀត។

ក្រសួងសុខាភិបាល តាមរយៈសេចក្តីប្រកាសព័ត៌មាន បានលើកឡើងដូច្នេះថា៖ «លទ្ធផលធ្វើតេស្តវត្ថុសំណាកបុរសជនជាតិហុងគ្រីអាយុ៧០ឆ្នាំ មានអាសយដ្ឋានស្នាក់នៅភូមិគ្រួស ឃុំស្វាយដង្គុំ ក្រុងសៀមរាប ខេត្តសៀមរាបនោះគឺបញ្ជាក់ថាវិជ្ជមានវីរុសកូវីដ១៩»។

ជនជាតិហុងគ្រីរូបនេះបានរត់ចេញពីការកន្លែងចត្តាឡីស័ក ដោយបានចាកចេញពីភ្នំពេញនៅថ្ងៃទី១៦ ខែកញ្ញា ឆ្នាំ២០២០ ទៅខេត្តសៀមរាបហើយ ត្រូវអាជ្ញាធរបានរកឃើញគាត់រស់នៅក្នុងវីឡាមួយក្នុងភូមិគ្រួស ឃុំស្វាយដង្គុំ ក្រុងសៀមរាប នៅថ្ងៃសៅរ៏ទី២៦ ខែកញ្ញា ឆ្នាំ២០២០នេះ ។ រូបគាត់ត្រូវបានគេដឹកយកទៅព្យាបាលនៅមន្ទីរពេទ្យខេត្តសៀមរាបរួចហើយ។

ក្រសួងបាននិយាយដូច្នេះថា «ក្រុមការងារកំពុងតែបន្តធ្វើស្រាវជ្រាវរកអ្នកដែលប៉ះពាល់ជាបន្តទៀត»។

បុរសនេះបានធ្វើដំណើរមកពីប្រទេសបារំាង រួចបន្តជើងហោះហើរ ពីប្រទេសកូរ៉េខាងត្បូង និងបានមកដល់កម្ពុជានៅថ្ងៃទី១៣ ខែកញ្ញា ឆ្នាំ២០២០។

គិតត្រឹមថ្ងៃទី២៦ ខែកញ្ញា ឆ្នាំ២០២០ ស្ថានភាពជំងឺកូវីដ១៩ នៅកម្ពុជាមាន អ្នកឆ្លងសរុបចំនួន២៧៦នាក់ ព្យាបាលជាសះស្បើយចំនួន២៧៤នាក់ និងកំពុងសំរាកព្យាបាលចំនួន២នាក់ នៅមន្ទីរពេទ្យមិត្តភាពខ្មែរសូវៀត រាជធានីភ្នំពេញ និងនៅមន្ទីរពេទ្យខេត្តសៀមរាប៕

ផ្សែងចេញពីម៉ាស៊ីនយានយន្តជជុះធ្វើឲ្យប៉ះពាល់ដល់សុខភាពមនុស្ស និងបរិស្ថាន

នងម៉ៃចរីយា (Nong Maichakreya) — Thu, 24 Sep 2020 07:48:06 +0000

ជារៀងរាល់ថ្ងៃ គេតែងឃើញយានយន្តធ្វើចរាចរនៅតាមដងផ្លូវជាហូរហែមិនដាច់។ យានយន្តទាំងនោះមានទាំងថ្មី និងចាស់ៗ ដែលភាគច្រើនជារថយន្តជជុះ។ ម៉ាស៊ីនយានយន្តចាស់ៗ ឬយានយន្តជជុះដែលធ្វើចរាចរក្នុងប្រទេស តែងមានផ្សែងពុលធ្វើឲ្យប៉ះពាល់ដល់សុខភាពមនុស្ស និងបរិស្ថាន។

កញ្ញា ស៊ន ចណ្ណា និសិ្សតផ្នែកបរិស្ថាន ឆ្នាំទី៣ នៅពុទ្ធិកសាកលវិទ្យាល័យព្រះសីហមុនីរាជាលើកឡើងថា ផ្សែងខ្មៅចេញពីរថយន្ត ឬម៉ាស៊ីនចាស់ៗ គឺជាផ្សែងពុលដែលធ្វើឲ្យប៉ះពាល់ដល់សុខភាព។

«កត្តាដែលវាចាស់ ហើយផ្សែងហ្នឹងវាចេញមកមានផ្សែងពុល កាបូនឌីអុកស៊ីត ហើយផលប៉ះពាល់ទៅជុំវិញខ្លួនរបស់យើង ទៅក្នុងបរិយាកាស។ ទី១វាប៉ះពាល់ ងាយរងគ្រោះ ឈឺ ប៉ះពាល់ការដកដង្ហើមចេញចូលអីអញ្ចឹង។ ទី២ធ្វើឲ្យមនុស្សយើងពិបាកដកដង្ហើម»។

កញ្ញាបន្ថែមថា ប្រសិនបើចង់ឲ្យបាត់ផ្សែងខ្មៅពីម៉ាស៊ីនចាស់ៗទាំងនោះ លុះត្រាតែឈប់ប្រើរថយន្តចាស់ៗ ហើយដាំដើមឈើឲ្យបានច្រើនដើម្បីដើមឈើស្រូបជាតិពុល និងបញ្ចេញខ្យល់អុកស៊ីហ្សែន។

«ឧទាហរណ៍ពេលឡានចាស់ចេញជាតិពុលមក ហើយមានដើមឈើបួនប្រាំដើម បានន័យថាដើមឈើនៅក្បែរហ្នឹងវាស្រូបយកជាតិពុលច្រើនដូចថា១០០ភាគរយ វាស្រូបបាន៩៥ភាគរយ អញ្ចឹងយើងស្រូបយកអាខ្យល់ហ្នឹងតែ៥ភាគរយ តែបើសិនអត់មានដើមឈើនៅហ្នឹងទេ អាជាតិពុលហ្នឹង១០០ភាគរយយើងស្រូបចូលទាំងអស់»។

ចំណែកអ្នកស្រី ស៊ីវ ស៊ីន អ្នកលក់ម្ហូបអាហារតាមដងផ្លូវនៅម្តុំវត្តទួលសង្កែ រាជធានីភ្នំពេញ និងជាអតីតគ្រូពេទ្យម្នាក់លើកឡើងថា យូរៗម្តងមានរថយន្តផ្សែងខ្មៅបើកកាត់កន្លែងអ្នកស្រី លក់ដូរ បណ្តាលឲ្យអ្នកស្រី និងគ្រួសារកណ្តាស់ និងឈ្លក់ផ្សែង។ អ្នកស្រីបន្ថែមថា ភ្លាមៗប្រហែលជាមិនមានផលប៉ះពាល់ដល់សុខភាពនោះទេ ប៉ុន្តែអ្នកស្រីបារម្ភថា វាអាចវិវត្តន៍ទៅជាមហារីក និងជំងឺធ្ងន់ធ្ងរផ្សេងៗនាពេលអនាគប្រសិនបើបន្តហិតផ្សែងនោះ។

«វាមិនប៉ះពាល់ភ្លាមៗទេ វាអាចយូរឆ្នាំ បើយើងនៅតែបន្តហិតដដែលៗ វានឹងវិវត្តន៍ទៅជាជំងឺផ្សេងៗ ទៅមហារីកអីផ្សេងៗ តែយើងអត់ដឹង តែវាបូកផ្សំគ្នាទៅនឹងសារធាតុគីមីដែរ»។

លោក ឈួន វ៉ន់ អគ្គនាយកដ្ឋានដឹកជញ្ជូនផ្លូវគោក លើកឡើងថា ចំពោះតែរថយន្តដែលបានចុះបញ្ជីប្រើបាស់ក្នុង១ខែៗមានចំនួន៣ពាន់គ្រឿង ក្នុងនោះ២០ ទៅ៣០ភាគរយចាត់ទុកថាថ្មីដែលប្រើបាន១ឆ្នាំ ទៅ៣ឆ្នាំ និងថ្មីសុទ្ធប្រហែល១០ភាគរយ។ លោកបន្តថា ចំពោះម៉ូតូដែលបានចុះបញ្ជីហើយទាំងថ្មីទាំងចាស់ មានចំនួនស្មើគ្នា៥០ភាគរយ។ ជាសរុបក្នុងមួយឆ្នាំ ទាំងម៉ូតូ និងរថយន្តដែលបានចុះបញ្ជីហើយមានចំនួន៣០ ទៅ៤០ម៉ឺនគ្រឿង ក្នុងនោះ៨០ភាគរយជាម៉ូតូ។

លោក អ៊ុន វ៉ាត ប្រធានការិយាល័យត្រួតពិនិត្យលក្ខណៈបច្ចេកទេសយានយន្តមានប្រសាសន៍ថា កម្ពុជាបាននាំចូលរថយន្ត ម៉ូតូជជុះ ឬមួយទឹក និងមានម៉ាស៊ីនចាស់ផ្សេងៗដូចជាម៉ាស៊ីនទូកជាដើមពីបរទេស មកកែច្នៃ និងប្រើឡើងវិញ ដែលលោកថា ម៉ាស៊ីនទាំងនោះមានផ្ទុកជាតិពុល ធ្វើឲ្យមានផ្សែងពុលច្រើន។

«ធម្មតាកាលណាថ្មី ជាតិពុលវាមិនសូវមាន ឬស្ទើរតែអត់មាន អាជាតិពុលហ្នឹងណា ធម្មតាតែចាស់គេហៅថាចុងម៉ាស៊ីន មានជាតិផ្សែងច្រើន ជាតិពុលច្រើន»។

លោកបន្ថែមថា ប្រជាពលរដ្ឋគួរប្រើ និងនាំចូលម៉ាស៊ីនថ្មី ហើយអ្នកប្រើប្រាស់គួរត្រួតពិនិត្យមើលរថយន្ត ឬម៉ាស៊ីនជាប្រចាំដើម្បីរកកម្រិតជាតិពុលថាគួរប្រើ ឬមិនគួរប្រើ។

បើតាមគេហទំព័ររបស់ក្រសួងបរិស្ថាន កម្ពុជាបានលក់ឥណទានកាបូននៅក្នុង ដែនជម្រកសត្វព្រៃកែវសីមា ដែនជម្រកសត្វព្រៃក្រវ៉ាញខាងត្បូង និងដែនជម្រកសត្វព្រៃតាតៃក្នុងក្រប ខណ្ឌទីផ្សារស្ម័គ្រចិត្ត ដោយទទួលបានថវិកាសរុបប្រមាណ១១លានដុល្លារអាមេរិក សម្រាប់ទ្រទ្រង់ដល់ការការពារ និងអភិរក្ស ក៏ដូចជាជួយលើកកម្ពស់ជីវភាពរបស់ប្រជាសហគមន៍មូលដ្ឋាន៕

ជំនន់ទឹកភ្លៀង បង្កការខូចខាតដល់ដំណាំរាប់ពាន់ហិចតានៅខេត្តពោធិ៍សាត់

បឿ សុភា (Boeur Sophea) — Wed, 23 Sep 2020 08:22:30 +0000

ជំនន់ទឹកភ្លៀងបានបង្កការខូចខាតដល់ដំណាំកសិកម្មជាច្រើនហិចតា ប៉ះពាល់លំនៅដ្ឋាន និងរចនាសម្ព័នមួយចំនួន ខណៈដែលប្រជាជនរាប់រយគ្រួសារ ក៏ត្រូវបានជម្លៀសចេញដើម្បីរកទីទួលសុវត្តិភាពផងដែរ នៅក្នុងខេត្តពោធិ៍សាត់។នេះបើយោងតាមរបាយការណ៏ទឹកជំនន់ ចេញដោយអាជ្ញាធរខេត្តកាលពីថ្ងៃទី២១ ខែកញ្ញា ឆ្នាំ២០២០នេះ។

របាយការណ៍ដដែលបានបង្ហាញបន្ថែមថា រយៈពេលត្រឹម២ថ្ងៃចុងក្រោយនេះ ផលដំណាំប្រមាណ ៦០០ហិចតា ក្នុងខេត្តពោធិ៍សាត់ ត្រូវបានលិចលង់ ហើយផលដំណាំទាំងនោះ មានចំនួន៣១៨,៥ហិកតា នៅស្រុកវាលវែង ក្នុងឃុំប្រម៉ោយ ឃុំអន្លង់រាប ឃុំក្រពើពីរ និងឃុំអូរសោម។

នៅក្នុងពោធិ៍សាត់ មានការលិចផលដំណាំស្រូវចំនួន៨២៤ហិកតា និងនៅក្នុងស្រុកកណ្ដៀង មានការប៉ះពាល់ស្រូវស្រាល ចំនួន២៨៣ហិកតា។នេះបើយោងតាមរបាយដដែល។

ស្ថានភាពទឹកជំនន់នៅខេត្តពោធិ៍សាត់ រូបភាពដោយ៖ ក្រសួងធនធានទឹក និងឧតុនិយម

ក្រុងចំនួន៤ នៅខេត្តពោធិ៍សាត់ រួមមាន ក្រុងពោធិ៍សាត់ ស្រុកវាលវែង ស្រុកកណ្ដៀង ស្រុកភ្នំក្រវាញ ក៏បានរងការប៉ះពាល់ទៅលើហេដ្ឋារចនាសម្ព័ន្ធ ដែលបង្ខំឲ្យអោយប្រជាជនចំនួន១៨០គ្រួសារ ត្រូវជម្លៀសដើម្បីរកទីទួលសុវត្តិភាព។

សរុបមកត្រឹមថ្ងៃ២១ ខែកញ្ញា ឆ្នាំ២០២០ ទឹកជំនន់បានបំផ្លាញស្ពានចំនួន៤ និងផ្លូវចំនួន២០ខ្សែ នៅក្នុងក្រុង និងស្រុកចំនួន៤ នៃខេត្តពោធិ៍សាត់។

លោក កែវ វ័យ ប្រធានធនធានទឹក និងឧតុនិយមខេត្តពោធិ៍សាត់ បានផ្តល់បទសម្ភាសដល់ Newsroom Cambodia កាលពីថ្ងៃអង្គារ ទី២២ ខែកញ្ញា ឆ្នាំ២០២០ថា ស្ថានភាពទឹកនៅខេត្តពោធិ៍សាត់ មានលក្ខណៈធូរស្បើយច្រើន បើទោះកម្រិតទឹកនៅក្នុងក្រុង ជិតដល់កំរិតនឹងប្រកាសអាសន្នក្តី។

លោកបានបន្តថា៖ «កម្ពស់ទឹកស្ទឹងនៅភ្នំក្រវាញស្រកជាង២ម៉ែត្រ បើធៀបនឹងពេលមុនមានរយៈកម្ពស់៦,១២សង់ទីម៉ែត្រ ដែលបច្ចុប្បន្ននៅសល់៣,៥៦សង់ទីម៉ែត្រ រីឯក្រុងពោធិ៍សាត់មានរយៈកម្ពស់៥,៤៥សង់ទីម៉ែត្រ បច្ចុប្បន្នស្រក៥ហ៊ុន នៅត្រឹម៥,៤០សង់ទីម៉ែត្រ»។

គួរបញ្ជាក់ផងដែរថា ស្ថានភាពកម្ពស់ទឹកខេត្តពោធិ៍សាត់ក្នុងឆ្នាំនេះ គឺមានសភាពទឹកធំជាងបើប្រៀបធៀបទៅនឹងឆ្នាំមុន ដោយសារតែជន់ស្ទឹងទាំងបីផ្នែកខាងលើជាហេតុបណ្ដាលឲ្យជន់លិចមកក្រុងពោធិ៍សាត់ខ្លាំង។ នេះបើយោងតាមការរៀបរាប់របស់លោក កែវ វ័យ៕