UN – Newsroom Cambodia

ក្រុមសិទ្ធិមនុស្សថាច្បាប់ប្រឆាំងកូវីដមិនត្រូវតាមស្តង់ដារសិទ្ធិមនុស្សអន្តរជាតិ ហើយស្នើសុំឲ្យរដ្ឋាភិបាលពិនិត្យឡើងវិញ

សុត បាន (Soth Ban) — Tue, 06 Apr 2021 05:28:09 +0000

អ្នកជំនាញសិទ្ធិមនុស្ស អ.ស.ប ចំនួន ៣រូប បានសម្តែងនូវកង្វល់លើច្បាប់ស្តីពីវិធានការណ៍ការពារប្រឆាំងនឹងការរីករាលដាលនៃជំងឺកូវីដ-១៩ កាលពីថ្ងៃទី០៣ ខែមេសា ឆ្នាំ២០២១នេះ ដោយបានអះអាងថាច្បាប់នេះមិនត្រូវតាមស្តង់ដារសិទ្ធិមនុស្សអន្តរជាតិ ហើយបានស្នើសុំឲ្យរដ្ឋាភិបាលពិនិត្យឡើងវិញ។

គួររំលឹកថា រដ្ឋសភាជាតិបានអនុម័តច្បាប់នេះកាលពីថ្ងៃទី៥ ខែមីនា ឆ្នាំ២០២១ ហើយច្បាប់នេះផ្តល់អំណាចដល់រដ្ឋាភិបាលក្នុងការរឹតត្បិត ឬហាមឃាត់ការធ្វើដំណើរ ការជួបជុំ និងការជួបប្រជុំ ការប្រតិបត្តិការអាជីវកម្ម និងសកម្មភាពអាជីពមួយចំនួន ក៏ដូចជា អំណាចក្នុងការទប់ស្កាត់ ឬរឹតត្បិតតំបន់ និងទីកន្លែងមួយចំនួនផងដែរ។

គេហទំព័រ Special Rapporteur Cambodia របស់លោកស្រីរ៉ូណា ស្មីត បាននិយាយកាលពីថ្ងៃទី៣ ខែមេសា ឆ្នាំ២០២១ថា ក្រុមអ្នកជំនាញសិទ្ធិមនុស្សអ.ស.ប មានកង្វល់ពាក់ព័ន្ធនឹងការដាក់ទណ្ឌកម្មយ៉ាងធ្ងន់ធ្ងរ និងមិនសមាមាត្រទាំងនេះ។

ហ្វេសប៊ុកផេកនោះបាននិយាយថា «ក្រុមអ្នកជំនាញសិទ្ធិមនុស្សអ.ស.ប ក៏បាន លើកកង្វល់ពាក់ព័ន្ធនឹងការដាក់ទណ្ឌកម្មយ៉ាងធ្ងន់ធ្ងរ និងមិនសមាមាត្រ ចំពោះបុគ្គលដែលមិនគោរពតាមវិធានការសុខភាព វិធានការរដ្ឋបាល និងវិធានការផ្សេងទៀត ដែលមានចែងនៅក្នុងច្បាប់នេះ ហើយជំរុញឲ្យរដ្ឋាភិបាលពិនិត្យឡើងវិញលើច្បាប់នេះ ដើម្បីធានានូវការគោរពតាមបទដ្ឋានសិទ្ធិមនុស្សអន្តរជាតិ ដែលការពារសិទ្ធិ និងសេរីភាពរបស់ប្រជាជនកម្ពុជា»។

លោកផៃ ស៊ីផាន អ្នកនាំពាក្យរដ្ឋាភិបាល បានប្រាប់ Newsroom Cambodia បានច្រានចោលការលើកឡើងរបស់ក្រុមសិទ្ធិមនុស្សអ.ស.ប ដោយបានអះអាងថានេះជាវិធានការការពារជីវិតមនុស្ស ហើយបានចោទសួរមន្រ្តីសិទ្ធិមនុស្សថាតើ «មានស្គាល់ពាក្យថាសមរភូមិប្រយុទ្ធប្រឆាំងជំងឺកូវីដ១៩ ទេ ព្រោះពាក្យថាសមរភូមិមានន័យគ្រប់គ្រាន់ណាស់ ហើយពួកអ្នកសិទ្ធិមនុស្សប៉ុន្មាននាក់ ប៉ុន្មានក្រុមហ្នឹងចេះខ្មែរអត់?»។

លោកបាននិយាយដូច្នេះថា «អ្នកដែលមិនចង់គោរពវិធានការ និងការណែនាំរបស់រដ្ឋាភិបាលហ្នឹង ចង់ងាប់មែន? បើចង់ងាប់ទៅចងកទៅ លោកឃើញទេអត្រានៃការឆ្លងរីករាលដាលច្រើន តួរលេខមិនក្រោមពី១០០ ទៅ ១០០ជាង។ យើងធ្វើនេះគឺបំណងដើម្បីរក្សាជីវិតរបស់ប្រជាពលរដ្ឋ បើយើងទុកឲ្យឆ្លងគ្រប់គ្នាយ៉ាងម៉េច?»

លោកផៃ ស៊ីផានបានបញ្ជាក់បន្ថែមថា៖ «ធ្វើតាមវិធានការរបស់រដ្ឋាភិបាលទៅ គេមិនដែលចង់ទៅបញ្ចេញកម្លាំងរាប់រយនាក់តាមចិញ្ចើមផ្លូវ ឬតាមដងផ្លូវទាំងអត់ងងុយ វេទនា គេចង់ការពារជីវិតមនុស្ស ហើយមានប្រយោជន៍អ្វី? គេទៅធ្វើបាបមនុស្សនោះ»៕

អ្នករាយការណ៍ពិសេសសិទ្ធិមនុស្ស UN៖ ៦០ថ្ងៃហើយរដ្ឋាភិបាលកម្ពុជាមិនទាន់ឆ្លើយតបករណីលោក រ៉ុង ឈុន

វុធ ច័ន្ទតារា (Vuth Chandara) — Thu, 22 Oct 2020 10:14:16 +0000

លោកស្រី Mary Lawlor អ្នករាយការណ៍ពិសេសស្តីពីស្ថានភាពអ្នកការពារសិទ្ធិមនុស្ស នៅថ្ងៃព្រហស្បតិ៍នេះលើកឡើងថា រដ្ឋាភិបាលកម្ពុជាមិនទាន់បានផ្តល់ជូនព័ត៌មានបន្ថែម ពាក់ព័ន្ធនឹងការចាប់ឃុំខ្លួនមេសហជីពមួយរូប គឺលោក រ៉ុង ឈុន តាមការស្នើរបស់ក្រុមអ្នកជំនាញសិទ្ធិមនុស្សនៅឡើយទេ ក្នុងរយៈពេលជាង៦០ថ្ងៃមកនេះ។

ក្រុមអ្នកជំនាញខាងសិទ្ធិមនុស្សនៃអង្គការសហប្រជាជាតិចំនួន៥រូប បានផ្ញើលិខិតរួមគ្នាមួយទៅកាន់រដ្ឋមន្ត្រីការបរទេសកម្ពុជា កាលពីថ្ងៃទី១៨ ខែសីហា ឆ្នាំ២០២០ និងទើបត្រូវបានបង្ហោះជាសាធារណៈនៅថ្ងៃទី១៧ ខែតុលានេះ។

ក្រុមអ្នកជំនាញសិទ្ធិមនុស្សទាំង៥រូបនោះរួមមាន អ្នករាយការណ៍ពិសេសស្តីពីការលើកកម្ពស់ និងការការពារសិទ្ធិសេរីភាពនៃការបញ្ចេញគំនិត និងមតិក្រុមការងារស្តីពីការឃុំខ្លួនដោយបំពាន អ្នករាយការណ៍ពិសេសស្តីពីស្ថានភាពសិទ្ធិមនុស្សប្រចាំប្រទេសកម្ពុជា អ្នករាយការណ៍ពិសេសស្តីពីសិទ្ធិសេរីភាពក្នុងការជួបជុំដោយសន្តិវិធី និងបង្កើតសមាគម និងអ្នករាយការណ៍ពិសេសស្តីពីស្ថានភាពអ្នកការពារសិទ្ធិមនុស្ស។

ក្នុងលិខិតនោះ ក្រុមអ្នកជំនាញខាងសិទ្ធិមនុស្សនៃអង្គការសហប្រជាជាតិបាន ស្នើសុំព័ត៌មានបន្ថែមអំពីមូលដ្ឋានពិត និងមូលដ្ឋានច្បាប់លើការចាប់ និងឃុំខ្លួន លោក រ៉ុង ឈុន និងរបៀបនៃការចាប់ខ្លួន និងឃុំខ្លួននេះស្របតាមនិយាម និងបទដ្ឋានសិទ្ធិមនុស្សអន្តរជាតិ ទាក់ទងនឹងសិទ្ធិសេរីភាពក្នុងការបញ្ចេញមតិ និងសិទ្ធិចូលរួមក្នុងកិច្ចការសាធារណៈ។

ក្រៅពីករណីលោក រ៉ុង ឈុន ក្រុមអ្នកជំនាញខាងសិទ្ធិមនុស្សនៃអង្គការសហប្រជាជាតិក៏បានស្នើសុំព័ត៌មានបន្ថែមពីភាពត្រូវគ្នានៃការចាប់ខ្លួន ជាមួយនឹងសិទ្ធិសេរីភាព និងសន្តិសុខបុគ្គល រាប់ទាំងការទទួលបានការជូនដំណឹងនៅពេលចាប់ខ្លួន និងអំពីមូលហេតុនៃការចាប់ខ្លួនផង ដែរ។

ជាមួយគ្នានេះដែរ ក្រុមអ្នកជំនាញសិទ្ធិមនុស្សទាំងនោះក៏បានស្នើសុំព័ត៌មានបន្ថែមពីរបៀបនៃការបំបែកការជួបជុំដោយសន្តិវិធីកាលពីថ្ងៃទី៣ និងទី៥ ខែសីហា ឆ្នាំ២០២០ នៅក្រៅសាលាដំបូងរាជធានីភ្នំពេញ ទាមទារឲ្យដោះលែងលោក រ៉ុង ឈុន ដែលក្រុមអ្នកជំនាញអះអាងថា ការតវ៉ានោះគឺស្របតាមកាតព្វកិច្ចផ្លួវច្បាប់ដែលមានចែងក្នុងមាត្រា២១នៃកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ និងច្បាប់របស់កម្ពុជាផងដែរ ដែលបានធានានូវការជួបជុំដោយសន្តិវិធី។

ថ្លែងប្រាប់ Newsroom Cambodia តាមរយៈបណ្តាញសង្គម Signal លោកស្រី Mary Lawlor អ្នករាយការណ៍ពិសេសស្តីពីស្ថានភាពអ្នកការពារសិទ្ធិមនុស្សបានឲ្យដឹងថា ចាប់តាំងពីពេលដែលក្រុមអ្នកជំនាញស្នើសុំព័ត៌មានបន្ថែមករណីលោក រ៉ុង ឈុន មកគឺអស់រយៈពេលជាង៦០ថ្ងៃមកហើយដែលរដ្ឋាភិបាលមិនបានធ្វើការឆ្លើយតប តែលោកស្រីក៏បានបញ្ជាក់ដែរថា រដ្ឋាភិបាលក៏នៅតែអាចឆ្លើយតបបានក្នុងពេលឆាប់ៗនេះ។

លោកស្រីបន្ថែមថា ទោះបីជាបានទទួល ឬមិនបានទទួលការឆ្លើយតបក្តី ក្រុមអ្នកជំនាញនឹងនៅតែបន្តការតាមដាន និងឃ្លាំមើលលើករណីទាំងនេះ។

លោកស្រីថា៖ «អ្នករាយការណ៍ពិសេសនឹងនៅតែបន្តឃ្លាំមើលទោះបីជាមាន ឬមិនមានការឆ្លើយក៏ដោយ ហើយដោយផ្អែកទៅលើការវិវត្ត និងព័ត៌មានថ្មីៗដែលខ្ញុំទទួលបាន និងអាចបញ្ជាក់បាន»។

តំណាងកម្ពុជានៅអង្គការសហប្រជាជាតិ កាលពីខែកញ្ញាបានលើកឡើងថា កម្ពុជាពុំមានការអនុញ្ញាតឲ្យមានការចាប់ខ្លួនតាមអំពើចិត្តនោះឡើយ ហើយថា ការចាប់ខ្លួនសកម្មជននានាដែលតវ៉ាកន្លងមក គឺជាការអនុវត្តច្បាប់របស់កម្ពុជា។

Newsroom Cambodia មិនអាចទាក់ទងសុំការអត្ថាធិប្បាយពីលោក កុយ គួង អ្នកនាំពាក្យក្រសួងការបរទេសកម្ពុជាបានទេ រហូតមកដល់ល្ងាចថ្ងៃព្រសហ្បតិ៍នេះ។

យ៉ាងណាមិញសមាជិកគណៈកម្មាធិការសិទ្ធិមនុស្សកម្ពុជា លោក កត្តា អ៊ន បានប្រាប់ Newsroom Cambodia កាលពីរសៀលថ្ងៃទី២២ ខែតុលា ឆ្នាំ២០២០នេះថា ក្រសួងការបរទេស និងក្រសួងដែលពាក់ព័ន្ធ នឹងធ្វើបច្ចុប្បន្នភាពជុំវិញករណីនេះ ហើយក្រសួងនឹងពិនិត្យពិចារណាថា នឹងត្រូវឆ្លើយតប ឬមិនឆ្លើយតបក្នុងពេលខាងមុខ។

លោកថា៖ «តាមរយៈក្រសួងការបរទេស គឺយើងបានប្រមូលព័ត៌មានពីស្ថាប័នពាក់ព័ន្ធ ហើយនឹងធ្វើបច្ចុប្បន្នភាពលើករណីនេះ ដោយសារករណីនេះបានផុតពីដៃរដ្ឋាភិបាលទៅដល់តុលាការហើយ ហើយក្រសួងការបរទេសនឹងពិនិត្យពិចារណាថា នឹងគួរឆ្លើយតបតាមវិធីណា ឬក៏មិនឆ្លើយតប ពីព្រោះករណីនេះយើងបានឆ្លើយតបជាច្រើនដងមកហើយ»។

លោក រ៉ុង ឈុន ប្រធានសហភាពសហជីពកម្ពុជា ត្រូវបានសមត្ថកិច្ចចាប់ខ្លួនកាលពីយប់ថ្ងៃទី៣១ ខែកក្កដា ឆ្នាំ២០២០ ហើយត្រូវបានតុលាការសម្រេចឃុំខ្លួនក្រោមការចោទប្រកាន់ពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» បន្ទាប់ពីលោកបានចេញសេចក្តីថ្លែងការណ៍មួយក្នុងនាមជាតំណាងក្រុមប្រឹក្សាឃ្លាំមើលកម្ពុជា កាលពីថ្ងៃទី២១ ខែកក្កដា ដោយលើកឡើងថា ការបោះបង្គោលព្រំដែនលេខ១១៤ ដល់១១៩ មានភាពមិនប្រក្រតីច្រើន ដែលធ្វើឲ្យពលរដ្ឋបាត់បង់ដីទៅភាគីវៀតណាមជាច្រើនរយហិកតា ក្នុងខេត្តត្បូងឃ្មុំ៕

កម្ពុជា ចិន និងយូនីសេហ្វ រួមគ្នាការពារសិស្សមត្តេយ្យចំនួន៧ម៉ឺននាក់អំឡុងការកើតមានជំងឺកូវីដ១៩

ភិន រតនា (Rathana Phin) — Thu, 22 Oct 2020 07:06:27 +0000

ក្រសួងអប់រំកម្ពុជា ស្ថានទូតចិន និងអង្គការយូនីសេហ្វ នៅថ្ងៃពុធបានជួបជុំគ្នានៅរាជធានីភ្នំពេញ ដើម្បីសង្កេតមើលការប្រើប្រាស់បរិក្ខាអនាម័យ និងសម្ភារសិក្សា ដែលក្រសួងពាណិជ្ជកម្មចិន បានឧបត្ថម្ភសម្រាប់ជួយដល់កុមារប្រមាណជា៧ម៉ឺននាក់បានចូលរៀនដោយសុវត្ថិភាពក្នុងអំឡុងការកើតមានជំងឺកូវីដ១៩។

យោងតាមទំព័រហ្វេសបុករបស់អង្គការយូនីសេហ្វកម្ពុជាបញ្ជាក់ថា ក្រសួងពាណិជ្ជកម្មចិន បានឧបត្ថម្ភសម្ភាររៀន និងបង្រៀន ព្រមទាំងបរិក្ខារទឹកស្អាត និងអនាម័យដល់សាលាមត្តេយ្យសិក្សាចំនួន៣,០៦៤ កន្លែងទូទាំងប្រទេសកម្ពុជា។

«ការផ្ដល់សម្ភាររៀន និងបង្រៀន (ព្រមទាំងបរិក្ខារទឹកស្អាត និងអនាម័យ) ដូចជាឧបករណ៍សម្រាប់លាងសម្អាតដៃចល័ត ធុងចម្រោះទឹក និងសម្ភារលាងសម្អាតដទៃទៀតដែលមានសារៈសំខាន់ចំាបាច់សម្រាប់ការពារសុវត្ថិភាព និងសុខភាពរបស់កុមារតូចៗ។ បច្ចុប្បន្នសម្ភារទាំងអស់នេះកំពុងត្រូវបានចែកជូនការិយាល័យអប់រំស្រុកចំនួន១៨៧ស្រុក នៅក្នុងរាជធានីខេត្តទាំង២៥»។

ចាប់តាំងពីកម្ពុជាមានករណីឆ្លងរាលដាលជំងឺកូវីដ១៩នៅដើមឆ្នាំ២០២០មក កម្ពុជាបានប្រកាសបិទសាលារៀនជាបណ្តោះអាសន្ននៅទូទាំងប្រទេស និងទើបប្រកាសបើកសាលាវិញបណ្តោះអាសន្ននៅដើមខែតុលានេះ ដោយប្រកាសឲ្យគ្រប់សាលាទាំងអស់អនុវត្តគោលការណ៍ប្រតិបត្តិស្តង់ដា សម្រាប់ដំណើរការគ្រឹះស្ថានសិក្សាឡើងវិញក្នុងបរិបថនៃជំងឺកូវីដ-១៩ របស់ក្រសួងអប់រំ យុវជន និងកីឡា៕

អគ្គលេខាធិការ UN គ្រោងលើកឡើងពីការបំភិតបំភ័យក្នុងវិស័យសិទ្ធិមនុស្សនៅកម្ពុជា

នន់ រិទ្ធី (Non Rithy) — Wed, 30 Sep 2020 08:25:50 +0000

អគ្គលេខាធិការអង្គការសហប្រជាជាតិ លោក António Guterres គ្រោងនឹងលើកឡើងអំពីរបាយការណ៍ប្រចាំឆ្នាំស្ដីពីបញ្ហាសិទ្ធិមនុស្សនៅកម្ពុជា ក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅថ្ងៃ៣០ ខែកញ្ញា ឆ្នាំ២០២០នេះ។

តាមរយៈទំព័រហ្វេសប៊ុករបស់ការិយាល័យឧត្តមស្នងការអង្គការសហប្រជាជាតិទទួលបន្ទកសិទ្ធិមនុស្សនៅកម្ពុជា UNHRC លោក António Guterres នឹងធ្វើបទបង្ហាញអំពីរបាយការណ៍ប្រចាំឆ្នាំរបស់លោកទៅក្រុមប្រឹក្សាសិទ្ធិមនុស្សស្តីពីការបំភិតបំភ័យ និងការសងសឹកដែលបានធ្វើឡើងដោយមន្រ្តីសន្តិសុខប្រឆាំងនឹងអ្នកដែលបានសហការជាមួយអង្គការសហប្រជាជាតិ តំណាង និងយន្តការរបស់ខ្លួន នៅក្នុងវិស័យសិទ្ធិមនុស្ស នៅកម្ពុជា។

ស្ថាប័នអង្គការសិទ្ធិមនុស្សមួយនេះ ក៏បានរំលឹកផងដែរថា នៅខែតុលា ឆ្នាំ ២០០៩កន្លងទៅ ក្រុមប្រឹក្សាសិទ្ធិមនុស្សបានស្នើសុំអគ្គលេខាធិការឲ្យរាយការណ៍ជារៀងរាល់ឆ្នាំ ទៅក្រុមប្រឹក្សាសិទ្ធិមនុស្សលើប្រធានបទនេះ។

UNHRC បានបន្តថាកាលខែសីហា ឆ្នាំ ២០១៩ កន្លងទៅថា អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា លោកស្រី រ៉ូណា ស្មីត បានកត់សម្គាល់ថាខ្លួនទទួលរបាយការណ៍ជាច្រើនអំពីមន្ត្រីនគរនបាលមូលដ្ឋានដែលមិនបានអញ្ជើញចូលរួមព្រឹត្តិការណ៍វគ្គបណ្តុះបណ្តាល កិច្ចជុំដែលរៀបចំឡើងដោយអង្គការសង្គមស៊ីវិល តែមន្រ្តីអាជ្ញាធរទាំងនោះបានមកថតរូប សាកសួរព័ត៌មាន និងទាមទារលិខិតអនុញ្ញាត។

បន្ទាប់ពីមានអន្តរាគមន៍ពីការិយាល័យ OHCHR កិច្ចប្រជុំនោះត្រូវបានអនុញ្ញាតឲ្យបន្តធ្វើ ក៏តែទោះជាយ៉ាងនេះក៏ដោយ ក៏មន្ត្រីនគរបាល នៅថ្ងៃបន្ទាប់ បានមកទាមទារព័ត៌មានលម្អិតអំពីសកម្មភាព និងឈ្មោះអ្នកចូលរួមពីអង្គការ ហើយក្រុមគ្រួសាររបស់ពួកគេក៏ត្រូវបានឃ្លាំមើលយ៉ាងដិតដល់ផងដែរ។

ជាការឆ្លើយតប លោក ជិន ម៉ាលីន អ្នកនាំពាក្យក្រសួងយុត្តិធម៏ បាននិយាយថា ការសន្និដ្ឋានថា មានការរឹតត្បិតសិទ្ធិសេរីភាពរបស់អង្គការសង្គមស៊ីវីល និងភ្នាក់ងារអង្គការសហប្រជាជាតិនោះ គឺជាការវិភាគមិនស៊ីជម្រៅ និងមិនបានជួបពិក្សាជាមួយនឹងក្រុមភាគីពាក់ព័ន្ធមានអាជ្ញាធរខាងសមត្ថកិច្ច ដើម្បីឱ្យមានតុល្យភាពនៃការធ្វើការសន្និដ្ឋាននោះទេ។

លោកគូសបញ្ជាក់ថា «ការលើកឡើងនៃការបូកសរុបនៃរបាយការខាងលើនេះ មិនបានធ្វើការពីគ្រោះយោបល់ ជជែកគ្នានិងប្រមួលព័ត៌មានពីគ្រប់ភាគីពាក់ព័ន្ធទេ ជាការសន្និដ្ឋានមួយដែលមិនគ្រប់ជ្រុងជ្រោយ មិនឆ្លើយតបទៅនឹងស្ថានពិតជាក់ស្ដែង នៃការអនុវត្តសិទ្ធិសេរីភាព ហើយមានការលំអៀង»៕