មជ្ឈមណ្ឌលកូវ៉ាក់ផ្តល់វ៉ាក់សាំងកូវីដជាង៣០ម៉ឺនដូសដល់កម្ពុជា ខណៈនាយករដ្ឋមន្រ្តីថានឹងចាក់វ៉ាក់សាំងនេះ

លាស់ លីបលីប (Lors Liblib) — Sun, 28 Feb 2021 14:38:43 +0000

មជ្ឈមណ្ឌលកូវ៉ាក់ (COVAX Facility) នឹងផ្តល់វ៉ាក់សាំងប្រឆាំងកូវីដផលិតនៅប្រទេសឥណ្ឌាដល់កម្ពុជាចំនួន ៣២៤,០០០ដូស នៅថ្ងៃទី០២ ខែមីនា ឆ្នាំ២០២១ ហើយលោកនាយករដ្ឋមន្រ្តី ហ៊ុន សែន បានប្រកាសលោកនឹងចាក់វ៉ាក់សាំងនេះ។

យោងតាមសេចក្តីជូនដំណឹងរបស់ក្រសួងសុខាភិបាលលើបណ្តាញសង្គមហ្វេកប៊ុក នៅថ្ងែទី២៨ ខែកុម្ភៈ នេះជាលើកដំបូងហើយដែលកូវ៉ាក់បានផ្តល់វ៉ាក់សាំងដល់កម្ពុជាជាវ៉ាក់សាំងដែលបានទទួលអាជ្ញាបណ្ណផលិតដោយវិទ្យាស្ថានសេរ៉ុម (Serum Institute)។

មជ្ឈមណ្ឌលកូវ៉ាក់ គឺដឹកនាំដោយអង្គការជាច្រើនរួមមានអង្គការសុខភាពពិភពលោក (WHO) ក្នុងភាពជាដៃគូជាមួយអង្គការយូនីសែហ្វ (UNICEF) ហើយកម្ពុជាជាប្រទេសដំបូងគេក្នុងតំបន់ប៉ាស៊ីហ្វិកខាងលិចដែលនឹងទទួលបាន។

នេះជាកិច្ចខិតខំប្រឹងប្រែងសកលដែលពុំធ្លាប់មាន និងដើម្បីជួយសម្របសម្រួលផ្តល់ឱ្យប្រទេសទាំងអស់នៅក្នុងពិភពលោក នូវសមភាពទទួលបានវ៉ាក់សាំងប្រកបដោយសុវត្តិភាព ក្នុងការការពារជំងឺកូវីដ១៩ ឱ្យបានឆាប់តាមដែលអាចធ្វើទៅបាន។

លើបណ្តាញសង្គមហ្វេកប៊ុក លោកហ៊ុន សែន នៅថ្ងែទី២៨ ខែកុម្ភៈនេះ បានអរគុណប្រទេសនានា ក្រុមហ៊ុន និងសប្បុរសជននៅលើសកលលោកដែលបានផ្តល់ជំនួយតាមរយៈកូវ៉ាក់។

«ខ្ញុំសូមជំរាបបន្ថែមថា ប្រសិនបើពុំមានការប្រែប្រួលទេ ខ្ញុំនឹងទទួលចាក់វ៉ាក់សាំងនៅម៉ោង ៨និង៣០នាទីព្រឹកថ្ងៃទី៤ ខែមីនា ឆ្នាំ២០២១ នៅមន្ទីពេទ្យកាល់ម៉ែត្រ ដោយមានការធ្វើសន្និសីទសារព័តមានផងដែរ»៕

តំណាងអង្គការសុខភាពពិភពលោក៖ វ៉ាក់សាំងសំខាន់ដើម្បីការពារជីវិតពីកូវីដ ប៉ុន្តែគួរបន្តអនុវត្តវិធានការពារខ្លួន

សោម ពេជ្រច័ន្ទរស្មី (Som Pichchanraksmey) — Tue, 26 Jan 2021 04:52:32 +0000

លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោក (WHO) នៅកម្ពុជា បាននិយាយកាលពីថ្ងៃទី២៤ ខែមករា ឆ្នាំ២០២១ ថាវ៉ាក់សាំងគឺជាឧបករណ៍ដ៏សំខាន់មួយដើម្បីការពារប្រជាពលរដ្ឋប្រឆាំងនឹងកូវីដ ១៩ ហើយអាចជួយសង្គ្រោះជីវិត និងកាត់បន្ថយការរំខានដល់សង្គម និងសេដ្ឋកិច្ច ក៏ប៉ុន្តែពលរដ្ឋទាំងអស់គួរបន្តអនុវត្តនូវវិធានការពារខ្លួន ដោយមិនត្រូវពឹងផ្អែកទៅលើវ៉ាក់សាំងតែមួយមុខនោះទេ។

លោកស្រីវេជ្ជបណ្ឌិត បានសរសេរថាលើបណ្តាញសង្គម Twitter «ប៉ុន្តែយើងមិនអាចពឹងផ្អែកលើវ៉ាក់សាំងវីរុសកូវីដ ១៩ តែមួយមុខនោះទេ។ ប្រទេសកម្ពុជាគួរបន្តអនុវត្តយុទ្ធសាស្រ្ត និងវិធានការរួមគ្នា»។

https://twitter.com/DrLiAilan/status/1353150027909095427https://twitter.com/DrLiAilan/status/1353150027909095427

លោកស្រីវេជ្ជបណ្ឌិត Li Ailan បានរៀបរាប់ និងណែនាំនូវការអនុវត្តវិធានការពារខ្លួន មនុស្សជុំវិញខ្លួន និងសង្គមដូចជាការលាងដៃញឹកញាប់ ពាក់ម៉ាស រក្សាគម្លាតសុវត្ថិភាពពីគ្នា ជៀសវាងទៅកន្លែងមនុស្សច្រើនកុះករ កុំប៉ះពាល់គ្នានៅពេលជួបគ្នា កុំទៅកន្លែងបិទជិត និងត្រៀមខ្លួនសម្រាប់ការចាក់វ៉ាក់សាំង។

ករណីអ្នកមានវីរុសកូវីដ១៩ សរុបចំនួន ៤៦០នាក់ ក្នុងនោះអ្នកជាសះស្បើយមានចំនួន ៤១២នាក់ និងអ្នកជម្ងឺកំពុងសម្រាកព្យាបាលនៅមន្ទីរពេទ្យ មានចំនួន ៤៨នាក់ គិតត្រឹមថ្ងៃទី ២៦ ខែមករា ឆ្នាំ២០២១។ នេះយោងតាមក្រសួងសុខាភិបាល៕

WHO – Newsroom Cambodia

មជ្ឈមណ្ឌលកូវ៉ាក់ផ្តល់វ៉ាក់សាំងកូវីដជាង៣០ម៉ឺនដូសដល់កម្ពុជា ខណៈនាយករដ្ឋមន្រ្តីថានឹងចាក់វ៉ាក់សាំងនេះ