ស្នងការនគរបាលខេត្តបាត់ដំបង អះអាងថា ករណីរកឃើញអាវុធជាច្រើនដើមនៅត្រង់លំនៅដ្ឋានក្នុងដីឡូតិ៍មួយកន្លែង ដែលស្ថិតក្នុងភូមិសាស្រ្តស្រុកសង្កែ សមត្ថកិច្ចជំនាញកំពុងបើកការស៊ើបអង្កេត និងបន្តស្រាវជ្រាវរកមុខសញ្ញាបន្ថែមទៀតនៅឡើយ ខណៈជនសង្ស័យជាស្រ្តីម្នាក់នៅក្នុងសំណុំរឿងមួយនេះ ត្រូវសមត្ថកិច្ចចាប់បាន និងឃុំខ្លួនបណ្តោះអាសន្នរង់ចាំបន្តនីតិវិធីកសាងសំណុំរឿងបញ្ជូនទៅតុលាការ។
លោកឧត្តមសេនីយ៍ទោ សាត គឹមសាន ស្នងការដ្នាននគរបាលខេត្តបាត់ដំបង ប្រាប់គេហទំព័រ Newsroom Cambodia នៅថ្ងៃទី០៥ ខែមិថុនា ឆ្នាំ២០២៤ នេះថាតាមពិតទៅសំណុំរឿងនេះ គឺជាករណីកើតឡើងក្នុងខេត្តព្រះសីហនុទេ ប៉ុន្តែដោយសារបញ្ហានេះ វាបានបន្តហូរចូលដល់ខេត្តបាត់ដំបង ហេតុនេះការកំណត់មុខសញ្ញា វាគឺជាកិច្ចសហការរវាងខេត្តទាំងពីរ។លោកបន្តថា ក្រោយបញ្ចប់នីតិវិធី សំណុំរឿងនេះ អាចនឹងត្រូវបញ្ជូនត្រឡប់ទៅម្ចាស់សំណុំរឿង ជាអ្នកទទួលខុសត្រូវវិញ។ម្យ៉ាងវិញទៀត លោកបដិសេធក្នុងការផ្តល់ការអត្ថាធិប្បាយ ដោយចាត់ទុកថា នីតិវិធីនេះ កំពុងស្ថិតនៅក្នុងការស៊ើបអង្កេតនៅឡើយ។
លោកបន្តថា៖ «ម្ចាស់ករណីរបស់ខេត្តព្រះសីហនុ បាត់ដំបងមែនប៉ុន្តែម្ចាស់ករណីរបស់ខេត្តព្រះសីហនុគ្រា ន់តែគាត់មកសហការជាមួយបាត់ដំបង។យើងចង់ដឹងអីច្រើនមេសអ្នកសារព័ត៌មានហ្នឹងគេកំពុងតែស្រាវ ជ្រាវ» ។
គេសង្កេតឃើញថាអាវុធជាច្រើនគ្រឿងត្រូវបានផ្សព្វផ្សាយព្រោងព្រាតនៅលើបណ្តាញសង្គមហ្វេសប៊ុក កាលពីថ្ងៃទី០៤ ខែមិថុនា ឆ្នាំ២០២៤។តាមរយៈរូបភាពជាច្រើនសន្លឹក បានបង្ហាញពីអាវុធដែលសមត្ថកិច្ចចាប់បាន ដាក់ក្រាលលើក្រណាត់កៅស៊ូពណ៌បៃតង មានដូចជា ប្រភេទ AK ៤៧ ចំនួន១១ដើម,M ១៦ ចំនួន ៤ដើម, M ៤ ចំនួន ២ដើម, កាំភ្លើង THUNDER X ១ដើម, កាំភ្លើងខ្យល់ ៥ដើម, កាំភ្លើងរឡូ ១ដើម, កាំភ្លើងវែងបាញ់សត្វ ១៦ដើម។ ក្រៅពីនេះក៏មានបង់ AK ២៩បង់, M ១៦ ចំនួន ១៤បង់, គ្រាប់AK ៤៧, M ១៦, ៩ MM , គ្រាប់ ៣៨០ សរុបចំនួន ២២គ្រាប់ និងសម្ភារ:កែច្នៃមួយចំនួនទៀត។
នាយប៉ុស្តិ៍នគរបាលរដ្ឋបាលឃុំតាប៉ុន លោក ពេញ រ៉ានី បដិសេធក្នុងការផ្តល់ព័ត៌មានលម្អិត ដោយលោកអះអាងថា កិច្ចការនេះវាផុតពីដៃរបស់សមត្ថកិច្ចមូលដ្ឋាន។
លោកបន្តថា៖«បាទព្រោះខ្ញុំក៏ក្រោមគេដែលថ្នាក់មូលដ្ឋានទេ ឥឡូវខ្ញុំចង់ឲ្យខាងបងទាក់ទងព័ត៌មានលម្អិតទៅខាងអ្នកនាំពាក្យស្នងការបាទ»។
មិនខុសគ្នាទេ អ្នកនាំពាក្យ និងប្រតិកម្មរហ័ស នៃស្នងការរដ្ឋាននគរបាលខេត្ត លោក អ៊ម កុសល បដិសេធក្នុងការអត្ថាធិប្បាយដោយលោកចាត់ទុកថា សំណុំរឿងនេះ វាជាការបន្ទុករបស់តុលាការ។
លោកបន្តថា៖«ការងារចាប់ផ្តើមរហូតមកដល់ឥឡូវនៅក្នុងការដឹងនាំរបស់ឯកឧត្តមព្រះរាជអាជ្ញាអាចសាកសួរគាត់ នៅលើព្រះរាជអាជ្ញាគាត់ធើ្វតាំងពីពេលដំបូងមកចឹងខ្ញុំអត់អាចឆ្លើយយ៉ាងបានទេបាទខ្ញុំនៅអង្គភាពរបស់ស្នងការដ្ឋាន»
យ៉ាងនេះកី្ត លោក ភី កុសល អ្នកនាំពាក្យសាលាដំបូងខេត្តបាត់ដំបង បដិសេធក្នុងការផ្តល់ព័ត៌មានលម្អិត ដោយលោកអះអាងថា សំណុំរឿងនេះលោកនៅមិនទាន់ទទួលបានតម្រុយគ្រប់គ្រាន់នៅឡើយទេ។
លោកបន្តថា៖«ជម្រាបបាទដោយសារតែរឿងខ្ញុំអត់ទាន់បានក្តោបចឹងហាចឹងអត់ទាន់មកដល់ខ្ញុំទេណាយើងគេពីនិតីវិធី ចឹងបានន័យថាភ្លាមៗហ្នឹងខាងខ្ញុំមិនទាន់បានក្តោបទេណាដោយសារមាននិតីវិធីសួរចំលើវយផ្សេងៗ។បើជាមកដល់នេះអើយបើនិយាយទៅខ្ញុំខាងតុលាការវាអាចស្អែក ឬក៏ល្ងាចនេះចឹងហាព្រោះនៅស្ថិតនៅក្នុងតំណាក់កាលអយ្យការមួយទៀតចឹងអាចសួរដំណាក់កាលអយ្យការសិនទៅបាទអរគុណច្រើន» ។
ដោយឡែក លោក អ៊ិន គង់ជិត មន្រ្តីសម្របសម្រួល អង្គការការពារសិទ្ធិមនុស្ស លីកាដូ (Licadho) ប្រចាំខេត្តបន្ទាយមានជ័យ លើកឡើងថាតាមពិតទៅបញ្ហានេះ វាហាក់ដូចមិនពិបាកទេសម្រាប់សមត្ថកិច្ចក្នុងការស្រាវជ្រាវ។ម្យ៉ាងវិញទៀត ដើម្បីរក្សាសណ្ឋាប់ធ្នាប់ឱ្យមានស្ថេរភាព និងសន្តិសុខ ការពង្រឹងផ្ទៃក្នុង រួមទាំងការត្រួតពិនិត្យអាវុធជាតិផ្ទុះ គឺជារឿងចាំចាប់ដែលត្រូវយកចិត្តទុកដាក់។
លោកបន្តថា៖ «យើងឃើញថារដ្ឋាភិបាលលោកមានជំនាញ ក្នុងស្រាវជ្រាវនេះជាការយកចិត្តទុកដាក់របស់សមត្ថកិច្ចព្រោះត្រូវពង្រឹងសន្តិសុខផ្ទៃក្នុងដើម្បីរក្សាសន្តិសុខ សន្តិភាពផ្ទៃក្នុងត្រូវមានការស្រាវជ្រាវឲ្យបានហ្មត់ចត់ អាវុធជាតិផ្ទុះទាំងការជួញដូរទាំងសំណល់ដែលនៅសល់ត្រូវតែមានការគ្រប់គ្រងត្រួតពិនិត្យ ឬក៏ត្រូវតែស្រាវជ្រាវ»។
កាលពីថ្ងៃទី៤ មិថុនា ឆ្នាំ២០២៤សមត្ថកិច្ចស្រាវជ្រាវ និងរកឃើញអាវុធជាតិផ្ទុះមួយចំនួន ស្ថិតនៅក្នុងលំនៅដ្ឋានដីឡូត៍មួយកន្លែង ក្នុងភូមិសាស្រ្តក្រុមទី២៧ ភូមិសម្តេច ឃុំតាប៉ុន ស្រុកសង្កែ ខេតបាត់ដំបង។ក្នុងប្រតិបត្តិការនេះ សមត្ថកិច្ចឃាត់ខ្លួនបានស្រ្តីម្នាក់ ដែលពាក់ព័ន្ធនឹងសំណុំរឿងនេះ និងកំពុងស្វែងរកសហចារីបន្តទៀត៕
