អ្នកប្រើប្រាស់បណ្តាញសង្គមបង្ហោះសារបង្ហាញពីក្តីបារម្ភរបស់ពួកគេចំពោះការបង្កើតតំបន់ត្រីកោណអភិវឌ្ឍន៍ (CVL) ថាអាចនឹងធ្វើឱ្យកម្ពុជាបាត់បង់ខេត្តចំនួន៤ នៅភូមិភាគឦសាន ទៅប្រទេសវៀតណាម ប៉ុន្តែលោក ហ៊ុន សែន ថា កម្ពុជានឹងទទួលបានប្រយោជន៍ច្រើនជាងគេ។
តំបន់អភិវឌ្ឍន៍ត្រីកោណ ហៅកាត់ថា(CLV) ត្រូវបានបង្កើតឡើងនៅឆ្នាំ១៩៩៩ ដោយមានការចូលរួមសហប្រតិបត្តិការពីភាគីកម្ពុជា វៀតណាម និងឡាវ។ ក្នុងនោះមានចំនួន១៣ខេត្តដែលដាក់បញ្ចូលគ្នារួមមាន កម្ពុជាចំនួន ៤ខេត្តមាន ខេត្តក្រចេះ ខេត្តស្ទឹងត្រែង ខេត្តមណ្ឌលគិរី និងខេត្តរតនៈគិរី មានប្រជាជនប្រមាណជា៥សែននាក់។ ប្រទេសវៀតណាម ៥ខេត្ត មានប្រជាជនប្រមាណជា ៧លាននាក់។ ប្រទេសឡាវ ៤ខេត្ត មានប្រជាជនប្រមាណជា៥សែននាក់។ នេះបើតាមប្រធានព្រឹទ្ធសភាកម្ពុជា។
ថ្មីៗនេះ មានការបង្ហោះសារលើបណ្តាញសង្គមដោយសរសេរថា តំបន់អភិវឌ្ឍន៍ត្រីកោណ អាចធ្វើកម្ពុជាបាត់បង់ខេត្តចំនួនបួនទៅប្រទេសវៀតណាម។ សារស្រដៀងគ្នានេះត្រូវបានចែកចាយជាបន្តបន្ទាប់។
សារខ្លះមានខ្លឹមសារថា៖ «ខ្ញុំមិនគាំទ្រឱ្យមានការដាក់បញ្ជូលខេត្ត៤របស់កម្ពុជា មានស្ទឹងត្រែង ក្រចេះមណ្ឌលគិរី និងរតនៈគិរី ជាតំបន់រួមជាមួយ វៀតណាម និងឡាវទេ»។ អ្នកប្រើបណ្តាញសង្គមខ្លះលើកឡើងថា គម្រោងនេះអាចធ្វើឱ្យកម្ពុជាបាត់បង់ខេត្តទាំង៤ទៅឱ្យប្រទេសវៀតណាម ដូចករណីទឹកដីកម្ពុជាក្រោម និងកោះត្រល់។
ក្រោយសារទាំងនោះត្រូវបានបង្ហោះ និងចែករំលែក ប្រធានព្រឹទ្ធសភាកម្ពុជា លោក ហ៊ុន សែន បានផ្សាយផ្ទាល់ជាវីដេអូលើទំព័រហ្វេសប៊ុកផ្លូវការរបស់លោក កាលពីថ្ងៃទី២៣ ខែកក្កដា ឆ្នាំ២០២៤ ថា គម្រោងតំបន់អភិវឌ្ឍន៍ត្រីកោណ (CLV) គឺជាគំនិតផ្តួចផ្តើមរបស់លោក តាំងពីឆ្នាំ១៩៩៩មក។ លោកថា តំបន់នៅភូមិភាគឦសាន វៀតណាមមួយផ្នែក និងឡាវមួយផ្នែក នៅជាប់ព្រំប្រទល់មុំ៣ គឺជាតំបន់ក្រីក្រ និងលំបាកជាងគេ ហេតុនេះចាំបាច់ត្រូវអភិវឌ្ឍន៍។
បើតាមលោក ហ៊ុន សែន អត្ថប្រយោជន៍ដែលកម្ពុជានឹងទទួលបានពីគម្រោងនេះ គឺនឹងជួយដល់កិច្ចសន្តិសុខជាតិ រួមមានការទប់ស្កាត់ការជួញដូរមនុស្ស ការរត់ពន្ធឈើ ទប់ស្កាត់ក្រុមចលនាប្រដាប់អារវុធ មានកិច្ចសហការផ្នែកអប់រំ បណ្តុះបណ្តាលធនធានមនុស្ស និងផ្នែកសុខាភិបាល ព្រមទាំងមានការតភ្ជាប់ហេដ្ឋារចនាសម្ព័ន្ធ រួមមាន ផ្លូវអគ្គិសនីទេសចរណ៍ និងការធ្វើពាណិជ្ជកម្មជាដើម។
លោកបន្ថែមថា៖ «វាបានផ្តល់ផលប្រយោជន៍សម្រាប់កម្ពុជាយ៉ាងច្រើន បើប្រៀបធៀបជាមួយនឹងភាគីវៀតណាមទទួលបានផលប្រយោជន៍ គឺកម្ពុជាជាអ្នកទទួលបានផលប្រយោជន៍ច្រើនជាងគេនៅក្នុងការអភិវឌ្ឍនេះ»។
ក្នុងវីដេអូដែលមានរយៈពេលជិត២ម៉ោងនោះ លោក ហ៊ុន សែន ក៏បានព្រមានដាក់ទោសដោយគ្មានការបន្ធូរបន្ថយចំពោះអ្នករិះគន់គម្រោងអភិវឌ្ឍន៍នេះ។
ពាក់ព័ន្ធនឹងការបង្ហោះសារលើបណ្តាញសង្គមពាក់ព័ន្ធនឹងតំបន់អភិវឌ្ឍន៍ត្រីកោណនេះ មនុស្សយ៉ាងហោចណាស់បួននាក់ត្រូវបានចាប់ខ្លួន។ ក្នុងនោះមានលោក ស្រ៊ុន ស្រ៊ន និងកញ្ញា ភឹង សោភា ដែលជាអ្នកផ្សព្វផ្សាយអំពីសន្ធិសញ្ញាទីក្រុងប៉ារីស ២៣ តុលា។
លោក សេង វណ្ណលី អ្នកតាមដានភូមិស្រ្តនយោបាយអន្តរជាតិ យល់ស្របចំពោះការលើកឡើងរបស់លោក អតីតនាយករដ្ឋមន្ត្រី លោក ហ៊ុន សែន ទាក់ទងជាមួយផលប្រយោជន៍ដែលប្រជាជន ក៏ដូចជាប្រទេសកម្ពុជាទទួលបាន។
លោក ធឿន សុវណ្ណា និស្សិតនៅសាកលវិទ្យាល័យបានប្រាប់ Newsroom Cambodai ថា លោកពិតជាមានការព្រួយបារម្ភខ្លាំងចំពោះគម្រោង CLV ព្រោះថាអាចមាន ការរីករាលដាលអំពីជនអន្តោប្រវេសន៍មកលើទឹកដីកម្ពុជា ហើយប្រជាជនកម្ពុជា អាចទទួលបានផលប្រយោជន៍តិចជាងប្រជាជនវៀតណាម។
លោកបានបញ្ជាក់ថា៖ «ខ្ញុំនឹងមានការព្រួយបារម្ភបែបនឹងថា វាអាចនឹងមានការ រីករាលដាលអំពីជនអន្តោប្ររេសន៍របស់ជនជាតិវៀតណាមមករស់នៅជាច្រើន ពិសេសយើងសង្កត់ធ្ងន់មួយទៀតថានៅក្នុងខេត្ត១៣ ដែលកម្ពុជា មាន៤ ឡាវមាន ៤ ហើយវៀតណាមមាន ៥ ឡាវហើយនិងខ្មែរ៤ខេត្តដូចគ្នា ហើយមានប្រជាពលរដ្ឋ មានតែកន្លះលានដូចគ្នាទេ ហើយក៏ប៉ុន្តែវៀតណាម ៥ខេត្ត មានប្រជាពលរដ្ឋជិត ៧លាននាក់ អាហ្នឹងយើងសបញ្ជាក់ថា បើទោះបីជាទាក់ទងនឹងសេដ្ឋកិច្ចក្តី ក៏ខ្មែរយើងបានប្រយោជន៍ហ្នឹងតិចមែនទែន យើងមើលតែចំនួនប្រជាពលរដ្ឋទៅដឹងហើយ»។
ទាក់ទិននឹងកង្វល់របស់ប្រជាពលរដ្ឋ លោក សេង វណ្ណលី យល់ថា កង្វល់របស់ប្រជាជនមិនមែនគ្មានសំអាង ឬមូលដ្ឋានទាល់តែសោះនោះទេ ដោយសារកម្ពុជាធ្លាប់មានប្រវត្តិបាត់ទឹកដីទៅប្រទេសវៀតណាម។
លោកបញ្ជាក់ថា៖ «តាមពិតទៅមិនមែនគ្មានមូលដ្ឋាន ឬក៏សំអាងទាល់តែសោះនោះទេ មូលហេតុដែលប្រជាពលរដ្ឋភាគច្រើន ឬក៏ប្រតិកម្មនៅលើបណ្តាញសង្គមស៊ីវិល ខ្ញុំគិតថាអាចដោយសារតែទី១ វៀតណាមធ្លាប់លេបត្របាក់ទឹកដីខ្មែរច្រើនដងមកហើយ ទី២ នោះគឺកង្វះទំនុកចិត្តរបស់ប្រជាពលរដ្ឋលើការអនុវត្តច្បាប់ស្តីពីអន្តោប្រវេសន៍»។
សាស្រ្តាចារ្យវិទ្យាសាស្រ្តនយោបាយលោក ឯម សុវណ្ណរ៉ា យល់ឃើញថា មិនមានបញ្ហាប្រឈមអ្វីខ្លាំងរហូតដល់បាត់បង់ទឹកដីនោះទេ គ្រាន់តែជាការទាញយកផលប្រយោជន៍រវាងប្រទេសនីមួយៗតែប៉ុណ្ណោះ ។
លោកបានលើកឡើងថា៖ «ខ្ញុំគិតថាវាមិនប្រឈមហានិភ័យអីខ្លាំងក្លារហូតដល់ បាត់បង់ទឹកដី ដូចជាការលើកឡើងពេកទេ គ្រាន់ថាជាការទាញអត្ថប្រយោជន៍នាពេលបច្ចុប្បន្ន និងពលរដ្ឋកម្ពុជា នៅខេត្ត៤ ហ្នឹងវាតិចជាងគេដូចឡាវ ចឹង។ អីចឹងអ្នកដែលមានពលរដ្ឋច្រើននឹងទទួលបានអត្ថប្រយោជន៍ច្រើន»។
លោកបន្ថែមទៀតថា វាជារឿងល្អ ប្រសិនបើ រដ្ឋនីមួយៗមានកិច្ចព្រមព្រៀងដើម្បីចែកអត្ថប្រយោជន៍ក្នុងតំបន់។
លោកលើកឡើងថា៖ «ប្រសិនបើរដ្ឋមួយៗហ្នឹង គាត់មានកិច្ចព្រមព្រៀងដើម្បីចែកបាននូវអត្ថប្រយោជន៍នៃការអភិវឌ្ឍនៅក្នុងតំបន់ ធ្វើឱ្យពលរដ្ឋគាត់អាចរក្សាលំនឹងការងារបាន ឬក៏មានឱកាសទាញយកអត្ថប្រយោជន៍ពីការអភិវឌ្ឍនឹង ខ្ញុំគិតថាល្អទេ»។
យោងតាមសេចក្តីថ្លែងការណ៍របស់អ្នកនាំពាក្យរាជរដ្ឋាភិបាល ចេញនៅថ្ងៃទី២៥ ខែកក្កដា ឆ្នាំ២០២៤ បានបញ្ជាក់ជូនពាក់ព័ន្ធនឹងតំបន់អភិវឌ្ឍន៍ត្រីកោណ (CLV) នេះថា ទី១ គ្មានការកាត់ទឹកដី៤ខេត្ត ជូនប្រទេសវៀតណាមដូចការចោទប្រកាន់ ទី២ គ្មានការយកខេត្តទាំង៤របស់កម្ពុជាទៅដាក់ហ៊ុនជាមួយប្រទេសជិតខាង ដើម្បីបញ្ជូលដែនដីតែមួយនោះទេ ទី៣ គ្មានការដាក់ហ៊ុនធនធានធម្មជាតិ ដើម្បីវិនិយោគរួមគ្នាទេ និងទី៤ គ្មានការអនុញ្ញាតឱ្យប្រជាពលរដ្ឋប្រទេសនីមួយៗចេញចូលដោយសេរី ក្នុងទឹកដីតំបន់អភិវឌ្ឍន៍ត្រីកោណឡើយ។
លោក ហ៊ុន សែន បានអះអាងថា ប្រទេសទាំងបីបានរៀបចំកិច្ចប្រជុំពាក់ព័ន្ធនឹងតំបន់អភិវឌ្ឍន៍ត្រីកោណនេះ ចំនួន ១១លើករួចទៅហើយ។ លោកថា សម្រាប់កិច្ចប្រជុំកំពូលលើកទី១២ គ្រោងធ្វើឡើងនៅប្រទេសកម្ពុជា តែមិនទាន់កំណត់ពេលវេលាជាក់លាក់នៅឡើយ ដោយត្រូវរង់ចាំការផ្ដល់ចម្លើយពីប្រទេសឡាវ និងវៀតណាម៕
