អ្នកជំនាញផ្នែកកសិកម្ម ហៅសារនយោបាយរបស់រដ្ឋាភិបាល ដែលសន្យាទម្លាក់កញ្ចប់ថវិកាប្រមាណ១០០លានដុល្លារអាមេរិក ដើម្បីគាំពារសម្រាប់វិស័យកសិកម្ម គឺជាមធ្យោបាយមួយដែលល្អប្រសើរ ប្រសិនបើរដ្ឋាភិបាលអាចមានលទ្ធភាពជួយឱ្យដំណើរការទៅបាន ស្របពេលវិស័យនេះ រង់ការរិះគន់ថាមិនអាចឆ្លើយតបទៅនឹងតម្រូវការចាំបាច់ របស់កសិករបាននៅឡើយ។
ប្រធានសមាគមសម្ព័ន្ធសហគមន៍កសិករកម្ពុជា (CCFC) លោក ថេង សាវឿន លើកឡើងថាការត្រៀមកញ្ចប់ថវិកាមួយរយលានដុល្លារអាមេរិក ដើម្បីជួយអន្តរាគមន៍ដល់វិស័យកសិកម្មនៅពេលប្រជាកសិករមានបញ្ហាប្រឈមនានាដែលកើតមានឡើងនេះ គឺជារឿងមួយល្អ។
លោកបន្ថែមថា៖«ខ្ញុំចង់ឱ្យកញ្ចប់ថវិកាមួយរយលានដុល្លារនេះ ធ្វើយ៉ាងម៉េចជួយដល់អ្នកដែលក្រីក្ររងផលប៉ះពាល់ទៅលើវិស័យកសិកម្មពិតប្រាកដ ហើយកុំឲ្យបង្កើតនូវភាពស្មុគស្មាញច្រើនពេក សម្រាប់ជួយដល់ពួកគាត់ »។
បើតាមលោក ថេង សាវឿន ការប្ដេជ្ញាចិត្តរបស់រដ្ឋាភិបាលនេះអាចនឹងទៅរួច ប្រសិនបើមានផែនការទិសដៅយុទ្ធសាស្ត្ររួមជាមួយនឹងការគ្រប់គ្រង ដោយប្រសិទ្ធភាពដែលមានការចូលរួមពីគ្រប់ភាគីពាក់ព័ន្ធរាប់ចាប់តាំងពីកសិករដែលជាអ្នកផលិត សហគមន៍កសិកម្ម អង្គការសង្គមស៊ីវិល និងអាជ្ញាធរពាក់ព័ន្ធ ដែលធានាបាននូវគោលការណ៍តម្លាភាព ដើម្បីទទួលបាននូវការគាំពារទៅដល់វិស័យកសិកម្មនេះ។
ការលើកឡើងដូចនេះ នៅក្រោយពេលនាយករដ្ឋមន្រ្តីលោក ហ៊ុន ម៉ាណែត បានប្រកាសផ្តល់កញ្ចប់ថវិកាកក្នុងទិសដៅគាំពារសម្រាប់វិស័យកសិកម្ម។
កាលពីថ្ងៃទី៦ ខែកុម្ភៈ ឆ្នាំ២០២៤ នៅក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា លោក ហ៊ុន ម៉ាណែត បានលើកឡើងថារដ្ឋាភិបាលនឹងត្រៀមកញ្ចប់ថវិកាប្រមាណ១០០ លានដុល្លារអាមេរិក ដើម្បីជួយកសិករពេលប្រឈមនឹងបញ្ហាប្រឈមនានា។
លោកបន្តថា៖«ការដាក់ចេញនូវយុទ្ធការសម្របសម្រួលកម្មវិធីហិរញ្ញប្បទានសំដៅលើកស្ទួយផលិតផលទីផ្សារ រក្សាលំនឹងកសិផលផ្សេងៗដែលយើងគ្រោង ១០០លានដុល្លារនោះ ដើម្បីជួយកសិករ ដែលមានការប្រឈមមួយចំនួន ដើម្បីរក្សាតម្លៃ » ។
លោក ហ៊ុន ម៉ាណែត លើកឡើងថារដ្ឋាភិបាលមិនមែនទៅចញ្ចឹមកសិករនោះទេ តែរដ្ឋាភិបាលទៅអន្ដរាគមន៍ជួយកិច្ចការងារមួយចំនួន ដើម្បីឱ្យកសិករមានលំនឹង។ លោកបន្ថែមថា នយោបាយគាំពារសង្គម មិនមែនបង្កើតវប្បធម៌ពឹងផ្អែកនោះទេ ផ្ទុយទៅវិញជាការបង្កើតនូវវប្បធម៌ម្ចាស់ការ ជាការជួយពលរដ្ឋពេលមានបញ្ហា និងជួយទប់កុំឱ្យស្ថានភាពជីវភាពធ្លាក់ក្នុងស្ថានភាពលំបាក។
ទាក់ទងបញ្ហានេះ តំណាងសហគមន៍ និងប្រធានសម្ព័ន្ធកសិករប្រចាំខេត្តព្រះសីហនុ លោក ស៊ុន សុផាត សាទរចំពោះសារនយោបាយដែលដាក់ចេញដោយលោក ហ៊ុន ម៉ាណែត នៅពេលនេះ។ប៉ុន្តែលោករំពឹងថា កញ្ចប់ថវិកាដែលរដ្ឋាភិបាលប្រកាសនេះ នឹងយកទៅប្រើប្រាស់ក្នុងទិសដៅមួយដែលមានសុចរិតភាព។
លោកថ្លែងថា៖ «សូមឱ្យការចាយវាយថវិការនោះប្រកបដោយតម្លាភាព និងចំគោលដៅដល់កសិករ »។
បើតាមលោក ស៊ុន សុផាត ក្រៅពីសន្យាផ្តល់សាច់ប្រាក់ហើយ ក្នុងនាមសហគមន៍ដែលតំណាងឱ្យកសិករ រូបលោកក៏ចង់ឱ្យរដ្ឋាភិបាលជួយរកទីផ្សាសម្រាប់កសិករដែរ ដោយសារផលិតបានហើយ កសិករខ្វះទីផ្សារដើម្បីលក់ចេញ។
កសិករមានវ័យ២៩ឆ្នាំ នៅភូមិខ្ពក ឃុំស្រីសំបូរ ស្រុកពាមរ ខេត្តព្រៃវែង លោក ចំណាប់ យល់ឃើញថា រដ្ឋាភិបាលត្រៀមកញ្ចប់ថវិកានេះជារឿងល្អ ប៉ុន្តែ លោកសង្កេតឃើញនៅតាមភូមិ និងនៅតាមឃុំបច្ចប្បន្ន មិនទាន់បានអនុវត្តនៅឡើយ។
លោកថ្លែងថា៖ «អាចទៅរួច អាច ព្រោះរាជរដ្ឋាភិបាល ជាអ្នកគ្រប់គ្រងបញ្ជេញកញ្ជប់ថវិកាហើយ បើអនុវត្តបានមែនប្រជាពលរដ្ឋប្រាកដសប្បាយចិត្តដែលឃើញរាជរដ្ឋាភិបាលចេះជួយកសិករដែលរងគ្រោះ ព្រោះកសិករជាហត់ខ្លាំង ចំណាយដើមទុនផងចំណាយកម្លាំងពលកម្មផង ដល់ពេលទិន្នផលដាំបានលក់បានតម្លៃទាបមែនទែន ឱ្យតែដាំបានបន្លែអ្វីក៏ដោយ ឱ្យតែដាំបានផលតម្លៃទាប »។
បើទោះបែបណា នាយករដ្ឋមន្រ្តីលោក ហ៊ុន ម៉ាណែត បានប្រកាសនៅក្នុងទិវាបិទសន្និបាតបូកសរុបការងារឆ្នាំ២០២៣ ដែលរៀបចំដោយក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣០ ខែមករា ឆ្នាំ២០២៤ ថាកម្ពុជានៅតែអាចនាំមុខ និងសម្រេចលើផែនការរបស់ខ្លួន ក្នុងវិស័យកសិកម្មនេះ។បើតាមលោក ហ៊ុន ម៉ាណែត ជាលទ្ធផលកម្ពុជាសម្រេចបានលើការផលិតស្រូវកើនឡើង៦ភាគរយដែលស្មើ៣៦,៨១លានតោន បើធៀបក្នុងរយៈពេលដូចគ្នាក្នុងឆ្នាំ២០២២ មានចំនួន១២,៤៩លានតោន។
ដោយឡែក ចំពោះផលិតផលកសិកម្មវិញ លោកនាយករដ្ឋមន្រ្តី លើកឡើងថា កម្ពុជានាំចេញទៅកាន់គោលដៅបាន ៧៨ប្រទេស មានចំនួនជាង៨,៨២លានតោន ស្មើទឹកប្រាក់ប្រមាណ៤,៨ពាន់លានដុល្លារអាមេរិក ក្នុងនោះការនាំចេញអង្ករសម្រេចបាន ៦៥៦ពាន់តោន កើនឡើងជាង ៣% ឆ្នាំ២០២៣។
យ៉ាងនេះក្តី គេសង្កេតឃើញថា ក្នុងរយៈប៉ុន្មានឆ្នាំចុងក្រោយនេះ វិស័យកសិកម្មនៅកម្ពុជា ហាក់មិនដំណើរការទៅមុខទេបើទោះជាមានព័ត៌មានស្តីពីការនាំចេញរបស់រដ្ឋាភិបាល សម្រាប់វិស័យកសិកម្មនេះក្តី។ព័ត៌មាននៅលើបណ្តាញសង្គម ដែលនិយាយពីគ្មានទីផ្សារសម្រាប់លក់កសិផលចេញក្រោយផលិតបាន ត្រូវបានគេចែកចាយព្រោងព្រាត។
កសិករផ្តល់បទសម្ភាសន៍ឱ្យក្រុមអ្នកកាសែតជារឿយៗ ក្នុងពេលកន្លងទៅថា សព្វថ្ងៃនេះកម្ពុជាក្រៅពីត្រូវប្រឈមមុខនឹងការចំណាយដើមទុនខ្ពស់ដើម្បីទិញវត្ថុធាតុដើមចូល និងបំណុលធនាគារ សម្រាប់ធ្វើកសិកម្មហើយ ក្រៅពីនេះ ពួកគេត្រូវជួបបញ្ហាគ្មានទីផ្សារលក់កសិផលថែមទៀត។បើក្នុងករណីលក់ចេញ ក៏ត្រូវបង្ខំចិត្តលក់ក្នុងតម្លៃធូរថ្លៃ ហើយមិនរួចថ្លៃដើមដែរ។
លើសពីនេះទៅទៀត អ្វីដែលជាបញ្ហានោះ គឺពលរដ្ឋត្រូវជួបប្រទះគ្មានទឹកធ្វើស្រូវប្រាំង ក្នុងពេលដែលកម្ពុជាមានទាំងទន្លេមេគង្គ និងទន្លេសាបនៅចាំកណ្តាលប្រទេស។នៅដើមឆ្នាំ២០២៤ នេះ រដ្ឋបាលខេត្តមួយចំនួន ដូចជាខេត្តបាត់ដំបង បន្ទាយមានជ័យ តាកែវ ពោធិ៍សាត់ និងកំពង់ឆ្នាំងជាដើម ចេញសេចក្តីថ្លែងការណ៍ផ្សេងៗគ្នា ដោយអំពាវនាវមិនឱ្យពលរដ្ឋធ្វើស្រែប្រាំង ក្រោមហេតុផលខ្វះប្រភពទឹក។
ជាមួយគ្នានេះ លោក ចំណាប់ ជាកសិករ រស់នៅខេត្តព្រៃវែង ស្នើឱ្យរដ្ឋាភិបាលបញ្ឈប់ការនាំចូលបន្លែពីវៀតណាម និងលើកស្ទួយផលិតផលកសិករខ្មែរឱ្យមានតម្លៃសមរម្យ៕
