ក្រសួងរុក្ខប្រមាញ់ និងនេសាទ បានប្រកាសកាលពីពេលថ្មីនេះថា បរិមាណត្រីធម្មជាតិក្នុងប្រទេសបានធ្លាក់ចុះដោយសារមានកំណើនប្រជរាស្រ្តក្នុងរយ:ពេល ១១ឆ្នាំចុងក្រោយ និងមានការប្រកួតប្រជែងក្នុងការគ្រប់គ្រងទីផ្សារត្រីក្នុងស្រុក។
យោងតាមសេចក្តីប្រកាសដែលចេញពីក្រសួងរុក្ខប្រមាញ់ និងនេសាទ កាលពីថ្ងៃទី១៥ ខែមិថុនាកន្លងទៅនេះ ការថមថយនូវត្រីធម្មជាតិគឺបណ្តាលមកពីកត្តាកំណើនប្រជាសាស្រ្ត កើនឡើង ១៤,១ ភាគរយ ដែលជាហេតុចំបងដែលនាំឱ្យការបរិភោគត្រីមានការកើនឡើងទ្វេឡើងដែល តម្រូវការលើសពីលទ្ធភាពផ្គត់ផ្គង់បាន។
ក្រសួងបានបន្តថា ឱនភាពត្រី កើតឡើងក៏ដោយសារកំណើនអ្នកនេសាទ បទល្មើសក្នុងការនេសាទកើនឡើងខ្ពស់ ការបាត់បង់ជម្រកត្រីពងកូន ការប្រើប្រាស់ដីធ្លី លទ្ធភាពបង្រ្កាបបទល្មើសជលផលធ្លាក់ចុះបន្ទាប់ពីការផ្ទេរសិទ្ធិអំណាចផ្នែកនេះទៅថ្នាក់ក្រោមជាតិ។
យោងតាមក្រសួងដដែល កត្តាធំៗពីរយ៉ាងផ្សេងទៀត រួមមាន ការគ្រប់គ្រងទីផ្សារត្រី ដែលមាននិន្នាការទៅរកផលិតផលត្រីដែលនាំចូលមានតម្លៃថោកជាង និង កត្តាប្រកួតប្រជែងទីផ្សារក្នុងស្រុក ដោយវារីវប្បករមិនអាចផលិត ឬផ្គត់ផ្គង់បានក្នុងតម្លៃទាបជាងទីផ្សារក្រៅស្រុក កត្តាត្រួតពិនិត្យមានភាពស្មុគស្មាញ និងកត្តាកង្វះវិនិយោគឯកជនលើវារីវប្បកម្ម។
ក៏ប៉ុន្តែលោកឱម សាវ៉ាត នាយកប្រតិបត្តិសម្ព័ន្ធដើម្បីអភិរក្សធនធានជលផល បានប្រាប់ Newsroom Cambodia ថាការធ្លាក់ចុះនូវកម្រិតទឹកជារឿងសំខាន់ ហើយដែលលោកបានឃើញថា ពីរឆ្នាំចុងក្រោយនេះ ឆ្នាំ២០១៩ និងឆ្នាំ ២០២០ កម្រិតទឹកទាបមែនទែន គឺទាបខុសប្រក្រតី។
លោកឱម សាវ៉ាត បាននិយាយថា «ទិន្នផលត្រីធ្លាក់ចុះជាការពិត ដែលមានទំនាក់ទំនងយ៉ាងខ្លាំងជាមួយនឹងកម្ពស់ទឹកនៅក្នុងតំបន់បឹងទន្លេសាបយើង ព្រោះយើងដឹងថាទន្លេសាបជាបេះដូង ទន្លេមេគ្គងជាសរសៃឈាម ចឹងបើសិនជាចរន្តទឹកទន្លេមេគ្គង ៦២% គឺជារៀងរាល់ឆ្នាំហូរចាក់ចូលទៅក្នុងបឹងទន្លេសាបតាមចំនួនកម្រិតកម្ពស់ទឹក វាប្រក្រតីដូចរាល់ឆ្នាំ អានឹងយើងឃើញផលត្រីមិនសូវជាប្រែប្រួលខ្លាំងប៉ុន្មានទេ»។
អ្នកជំនាញរូបនេះបានបន្តថា ព្រៃលិចទឹក ជាជម្រកពងកូនរបស់ត្រី ជាជម្រកសម្រាប់ការរីកធំធាត់របស់ត្រី ហើយតែកាលណាកម្រិតទឹកឡើងខ្ពស់ នោះវាសាលភាពនៃទឹកនឹងគ្របដណ្តប់ទៅលើព្រៃលិចទឹកជុំវិញបឹងទន្លេសាប ហើយត្រីនឹងរីកធំធាត់តាមបរិមាណកម្ពស់ទឹកដែល ផ្តល់ឱកាសដល់ការបង្កបង្កើនលទ្ធភាពត្រីពងកាន់តែកើនឡើងដែរ ជាពិសេសនៅរដូវបិទនេសាទ ចន្លោះពីខែមិថុនា ដល់ខែកញ្ញា ជារៀងរាល់ឆ្នាំ សម្រាប់ឱ្យត្រីទម្លាក់ពងកូន។
ករណីដែលគួរឱ្យកត់សម្គាល់ គឺសកម្មភាពបទល្មើសនេសាទជាលក្ខណ:សិប្បកម្ម ឧស្សាហកម្ម គម្រោងអភិវឌ្ឍន៍វារីអគ្គិសនីនានា ការការពារព្រៃលិចទឹកមិនមានប្រសិទ្ធភាព ព្រមទាំងការលួចចាប់ត្រីមេពូជជាដើម។
លោកឱម សាវ៉ាត បានលើកឡើងថាប្រសិនបើមានការគោរពច្បាប់នេសាទ វាមិនសូវជាធ្វើឲ្យបរិមាណត្រីធ្លាក់ចុះនោះទេ។
ការធ្លាក់ចុះទិន្នផលត្រីក្នុងប្រទេសកម្ពុជានេះ បានផ្តល់ផលប៉ះពាល់ដល់ប្រជាជនប្រមាណ ១,៥ ទៅ២ លាននាក់ដែលប្រកបរបរនេសាទត្រី ចំណែក ៦លាននាក់ទៀតកំពុងអាស្រ័យទៅលើការនេសាទ ពោលជាអ្នកនេសាទរយ:ពេលខ្លីនៅរដូវច្រូតកាត់រួច។ នេះយោងតាមលោក ឱម សាវ៉ាត។
អ្នកលក់ត្រីធម្មជាតិម្នាក់នៅតាមត្រើយម្ខាងនៃរាជធានីភ្នំពេញ បានត្អូញត្អែរពីការចាប់ត្រីមិនសូវបានដូចកាលពីមុន។
«ធ្លាក់ចុះតាស ព្រោះអីរកយូរៗទៅវាកាន់តែខ្សត់ទៅៗហើយត្រី។ ប្រសិនបើត្រីគេចិញ្ចឹម ចាប់ខែនឹង គេចាប់ដាក់លក់ ដាក់ចិញ្ចឹមវិញហើយ»។
អ្នកស្រីដែលកំពុងវិចខ្ចប់ត្រីបណ្តើរ និយាយបណ្តើរ ថាខ្លួនរកត្រីបានច្រើនបំផុតនៅកំឡុងខែវិច្ឆិកា ឯថ្ងៃផ្សេងទៀតមិនទៀងទាត់នោះទេ។
ក្រសួងរុក្ខប្រមាញ់ និងនេសាទ បានសន្យាក្នុងសេចក្តីប្រកាសដដែលថាក្រសួងបាននឹងកំពុងខិតខំប្រឹងប្រែងយ៉ាងសកម្មតាមអភិក្រម «រដ្ឋ ឯកជន ដៃគូអភិវឌ្ឍន៍ និងសហគមន៍» ដើម្បីរួមចំណែកដោះស្រាយនេះ៕
