រដ្ឋាភិបាលកម្ពុជានៅថ្ងៃអង្គារនេះបានសម្រេចផ្អាកជាបណ្តោះអាសន្នសម្រាប់ការធ្វើដំណើរចេញ-ចូលឆ្លងកាត់ព្រំដែនកម្ពុជា-វៀតណាមដើម្បីទប់ស្កាត់ការរីករាលដាលនៃជំងឺកូវីដ-១៩ចម្លងចូលមកទឹកដីកម្ពុជារយៈពេលមួយខែ។
យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិកម្ពុជានៅថ្ងៃទី១៣ ខែកក្កដា ឆ្នាំ២០២១នេះ ការសម្រេចផ្អាកជាបណ្តោះអាសន្ននេះគឺនឹងអនុវត្តចាប់ពីថ្ងៃទី១៨ ខែកក្កដា ឆ្នាំ២០២១នេះតទៅ។
ទោះបីជាយ៉ាងណាក៏ដោយការផ្អាកចេញ-ចូលនេះត្រូវបានលើកលែងសម្រាប់អ្នកជំងឺដែលត្រូវទៅព្យាបាលនៅវៀតណាម អ្នកការទូត មន្ត្រីរាជការដែលមានបេសកម្មតាមការអញ្ជើញរបស់អាជ្ញាធរនៃប្រទេសទាំងពីររួមទាំងនិស្សិត សិក្ខាកាមដែលបានបញ្ចប់វគ្គសិក្សា ឬករណីមានការអនុញ្ញាតពិសេសពីរដ្ឋាភិបាល។នេះយោងតាមការបញ្ជាក់ដដែលរបស់លិខិតខាងលើ។
រដ្ឋលេខាធិការប្រចាំការរបស់ក្រសួងការបរទេស លោកអ៊ុច បូររិទ្ធបានបញ្ជាក់ក្នុងលិខិតខាងលើនោះថា៖ «ចំពោះបុគ្គលិក និងកម្មករជំនាញរបស់ក្រុមហ៊ុនវៀតណាម ដែលបានចូលមកកម្ពុជារួចហើយ ទាំងអ្នកដែលបានធ្វើចត្តាឡីស័ករួច និងអ្នកដែលកំពុងធ្វើចត្តាឡីស័ក មិនត្រូវអនុញ្ញាតឱ្យវិលត្រឡប់ទៅប្រទេសវៀតណាមវិញទេ ក្នុងអំឡុងពេលនៃការផ្អាកការចេញ-ចូលបណ្តោះអាសន្ននេះ»។
លោកអ៊ុច បូររិទ្ធបានបញ្ជាក់បន្ថែមទៀតថាដំណើរការនៃការដឹកជញ្ជូននាំចេញ និងនាំចូលទំនិញនានាត្រូវអនុវត្តឱ្យបានម៉ឺងម៉ាត់ តាមវិធានសុខាភិបាលនៃប្រទេសទាំងពីរ។
គួរបញ្ជាក់ផងដែរ ជំងឺកូវីដ-១៩នៅកម្ពុជាកំពុងតែឆ្លងរាលដាលខ្លាំងទាំងនៅក្នុងសហគមន៍គិតត្រឹមថ្ងៃទី១៣ខែកក្កដាឆ្នាំ២០២១នេះ កម្ពុជាមានអ្នកស្លាប់ដោយសារជំងឺកូវីដ-១៩កើនដល់ ៩៨៦នាក់ និងឆ្លងសរុបកើនដល់៦៣.៦១៥នាក់៕
