ក្រសួងធនធានទឹក និងឧតុនិយម នៅថ្ងៃទី៣ ខែសីហា ឆ្នាំ២០២១ បានប្រកាសពីការប្រែប្រួលនៅតាមតំបន់មួយចំនួនក្នុងប្រទេសកម្ពុជា ដោយអាកាសធាតុនឹងត្រជាក់រហូតដល់ ២៤អង្សារសេ ចាប់ពីថ្ងៃទី៤ ដល់ទី១០ ខែសីហា ដោយសារទទួលឥទ្ធិពលខ្សោយពីជ្រលងនៃប្រព័ន្ធសម្ពាធទាប ពីប្រទេសមីយ៉ាន់ម៉ា ប្រទេសឡាវ និងប្រទេសវៀតណាម។

ជាមួយគ្នានឹងខ្យល់មូសុងនិរតីបក់ក្នុងល្បឿនពីមធ្យមទៅបង្គួរ សេចក្តីជូនដំណឹងខាងលើ ក៏បានបញ្ជាក់ថាតំបន់វាលទំនាបកណ្តាល បណ្តាខេត្តជាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមាមានពី ២៣អង្សារសេដល់ ២៦អង្សារសេ និងសីតុណ្ហភាពអតិបរមា មានពី ៣០អង្សារសេដល់ ៣៤អង្សារសេ។

ក្រសួងធនធានទឹក និងឧតុនិយម ក៏បានអំពាវនាវអោយប្រជាជនពរដ្ឋនៅតាមតំបន់ទំាងនោះ ធ្វើការប្រុងប្រយ័ត្នចំពោះខណៈដែលអាចនឹងមានភ្លៀងក្នុងកម្រិតពីតិច ទៅបង្គួរ លាយឡំទៅដោយ ផ្គរ រន្ទះ និងខ្យល់កន្រ្កាក់ និងនៅតាមបណ្តាតំបន់មាត់សមុទ្រ​ នៅលើផ្ទៃសមុទ្រនឹងអាចមានភ្លៀង លាយឡំនិងខ្យល់បក់ខ្លាំង នឹងរលកសមុទ្រខ្ពស់៕